رواية خطوات نحو الجحيم ج3 الجزء السادس

رواية خطوات نحو الجحيم ج3 الجزء السادس

للكاتبة زينب ماجد

....

ﻻ ﺩﺍﻋﻲ ﺍﻥ ﺗﻠﻘﻲ ﺑﻠﻮﻣﻚ ﻋﻠﻰ ﺍﻟﺪﻧﻴﺎ ﻭ ﺍﻷﻳﺎﻡ

ﻓﺄﻧﺖ ﺍﻧﺖ ﻻ ﻏﻴﺮﻙ ﻣﻦ ﺷﻖ ﻃﺮﻳﻘﻪ ﻭ ﺍﺧﺘﺮﺕ ﻟﻨﻔﺴﻚ ﺍﻥ ﺗﻜﻮﻥ ﺑﻬﺬﺍ ﺍﻟﻨﻔﻖ ﺍﻟﺸﺎﻕ، ﺍﻧﺖ ﺍﻟﺬﻱ ﺭﻣﻴﺖ ﺑﻨﻔﺴﻚ ﺍﻟﻰ ﻃﻮﺍﺭﻕ ﺍﻷﻳﺎﻡ، ﻓﻼ ﺗﻠﻤﻬﺎ ﺑﻞ ﻟﻢ ﻧﻔﺴﻚ ﻭ ﻛﻦ ﻟﻬﺎ ﺣﺴﻴﺒﺎ .

ﺗﺮﻛﻴﺎ _ ﺃﺳﻄﻨﺒﻮﻝ

ﺍﻟﺴﺎﻋﺔ ٩ ﻣﺴﺎﺀﺍ

- ﺍﻫﻼ ﺑﻴﻚ ﺍﺳﺘﺎﺫ

- ﺭﺟﺎﺋﺎ ﺑﻼ ﺭﺳﻤﻴﺎﺕ ﺍﺣﻨﻪ ﺍﻻﻥ ﺑﻌﻴﺪﻳﻦ ﻋﻦ ﺍﻣﺎﻛﻦ ﺷﻐﻠﻨﺎ ﻭ ﺑﻌﻴﺪﻳﻦ ﺣﺘﻰ ﻋﻦ ﺍﻟﻌﺮﺍﻕ ﻓﻴﺎﺭﻳﺖ ﻳﺎ ﻟﺠﻴﻦ ﺗﺴﻤﻴﻨﻲ ﺯﺍﻫﺮ

ﺑﺪﻭﻥ ﻣﺴﻤﻰ ﺍﺧﺮ

.... ﺍﺑﺘﺴﻤﺖ ﻣﺠﺎﻭﺑﺖ ، ﺍﺷﺮﻟﻲ ﺍﺗﻔﻀﻞ ﺳﺤﺒﺖ ﺍﻟﻜﺮﺳﻲ ﻭ ﻛﻌﺪﺕ

ﺟﺎﻥ ﺍﻟﻤﻄﻌﻢ ﺍﻭ ﺍﻟﻤﻜﺎﻥ ﺍﻟﻜﺎﻋﺪﻳﻦ ﺑﻴﻪ ﻳﻄﻞ ﻋﻠﻰ ﺑﺤﺮ ، ﺍﺧﺬﺕ ﻋﻴﻨﻲ ﻭ ﺍﻧﻲ ﺍﺑﺎﻭﻉ ﻻﺟﻮﺍﺀ ﺍﻟﺒﺤﺮ ﻳﺠﻨﻦ ﻭ ﺍﻟﻨﺴﻴﻢ ﺍﻟﺒﺎﺭﺩ ﺍﻟﻴﻮﺻﻞ ﻣﻨﻌﺶ

- ﺣﻠﻮﺓ ﺍﻷﺟﻮﺍﺀ

- ﺟﺪﺍ

- ﺧﺮﻳﺠﺔ ﺷﻨﻮ ﺍﻧﺖ ؟

- ﺻﻴﺪﻟﺔ

- ﺟﻤﻴﻞ ﻣﻊ ﺫﻟﻚ ﺗﺸﺘﻐﻠﻴﻦ ﺑﻐﻴﺮ ﺍﻟﺼﻴﺪﻟﺔ

- ﻣﻮ ﻫﻮﺍﻳﺘﻲ ﻭﻻ ﻃﻤﻮﺣﻲ ﻣﻦ ﺍﻧﻲ ﻭ ﺻﻐﻴﺮﺓ ﺍﻟﺰﻡ ﺟﻔﺠﻴﺮ ﻟﻮ ﺧﺎﺷﻮﻛﺔ ﻭ ﺍﻛﻌﺪ ﻋﻮﺩ ﺍﻗﺪﻡ ﺑﺮﺍﻣﺞ ﻭ ﺍﻟﻌﺐ ﻟﻮ ﺍﻃﻠﻊ ﻣﻼﺑﺴﻲ ﻛﻠﻬﻢ ﻭ ﺍﺳﻮﻱ ﺍﺯﻳﺎﺀ ، ﻓﻬﺬﺍ ﻋﺎﻟﻤﻲ ﺍﻻﺣﺒﻪ ﻣﺎﻟﻲ ﺑﺎﻟﻄﺐ ﻭ ﺍﻟﺘﻌﻘﻴﺪ ﻭ ﺍﻟﻬﻮﺳﺔ

- ﺻﺢ ﻛﻞ ﺍﻧﺴﺎﻥ ﻳﺒﺪﻉ ﺑﺎﻟﻤﺠﺎﻝ ﺍﻟﻠﻲ ﻳﺤﺒﻪ

- ﺑﺎﻟﻀﺒﻂ

- ﻣﺘﺰﻭﺟﺔ ﺍﻧﺖ ؟

- ﻻ ، ﻣﻄﻠﻘﺔ

- ﻣﺎ ﻋﻨﺪﺝ ﺍﻃﻔﺎﻝ ؟

- ﺑﻠﻲ ﻋﻨﺪﻱ ﺑﻨﺖ، ﺑﺲ ﻋﻨﺪ ﺍﺑﻮﻫﺎ

- ﻭﻟﻴﺶ ﻣﻮ ﻋﻨﺪﺝ

- ﺍﺧﺬ ﺍﻟﺤﻀﺎﻧﻪ ﻫﻮ ﺑﺎﻟﺤﻴﻠﺔ ﻭ ﺍﻣﻮﺭ ﻫﻮﺍﻳﺔ

- ﺍﺫﺍ ﻓﻲ ﻣﺸﻜﻠﻪ ﺍﻛﺪﺭ ﺍﺳﺎﻋﺪ . ﺑﻴﻬﺎ ﻛﻮﻟﻲ

- ﻻ ﻻ ﺍﺷﻜﺮﻙ ، ﺍﻟﻤﻮﺿﻮﻉ ﺍﻛﺒﺮ ﻣﻦ ﺍﻥ ﻳﻨﺤﻞ ﻣﻮﺿﻮﻉ ﺑﻨﺘﻲ ﺻﺎﺭﻟﻲ ﺣﻠﻢ

- ﻟﻴﺶ ؟ ﺍﻧﻲ ﺍﺳﻒ ﻟﻮ ﻛﺎﻥ ﺗﺪﺧﻞ ﻓﻲ ﺧﺼﻮﺻﻴﺎﺗﻚ ﺑﺲ ﺛﺎﺭﻧﻲ ﺍﻟﻔﻀﻮﻝ ﺧﺼﻮﺻﺎ ﻷﻧﻲ ﺷﻔﺖ ﻭﺭﺍ ﻫﺎﻟﺠﻤﺎﻝ ﻭ ﺍﻟﻤﺮﺃﺓ ﺍﻟﻘﻮﻳﺔ ﺍﻧﺴﺎﻧﻪ ﻣﻌﺬﺑﺔ

- ﺷﻠﻮﻥ ﺷﻔﺖ ؟

- ﻻﺣﻈﺖ ﺍﺛﺎﺭ ﺗﻌﻨﻴﻒ ﻋﻠﻰ ﺭﻛﺒﺘﺞ ﺑﺄﻭﻝ ﻟﻘﺎﺀ ﺗﺆﻛﺪ ﺍﻥ ﺍﻧﺖ ﺗﺘﻌﺮﺿﻴﻦ ﻟﻠﻌﻨﻒ

- ﺍﻫﺎﺍ ، ﻫﻮ ﻣﺠﺮﻡ .. ﻗﺎﺗﻞ ﻣﺄﺟﻮﺭ ﺳﻴﺎﺳﻲ ﺑﺲ ﺧﻠﺼﺖ ﻣﻨﻪ

- ﺍﻫﺎﺍ ، ﺍﺫﺍ ﺗﺮﻳﺪﻳﻦ ﻣﺴﺎﻋﺪﻩ ﺑﺄﺭﺟﺎﻉ ﺑﻨﺘﺞ ﺍﻧﻲ ﺣﺎﻇﺮ

- ﻭ ﺷﻠﻮﻥ ﺗﻜﺪﺭ ﺗﺮﺟﻌﻬﺎ ؟

- ﻫﺎﻻﻣﻮﺭ ﺷﻐﻠﻨﺎ

- ﻣﻔﻬﻤﺖ ﺍﺷﻮﻥ ﻳﻌﻨﻲ ﺷﻐﻠﻜﻢ

- ﺷﻮﻓﻲ ﺳﺖ ﻟﺠﻴﻦ ، ﺍﻧﻲ ﻣﻦ ﻟﻤﺎ ﺷﻔﺘﺞ ﺑﺎﻟﻘﺎﺀ ﺍﺗﻌﻠﻘﺘﻲ ﺍﺑﺎﻟﻲ، ﻓﻮﺭ ﺭﺟﻮﻋﻲ ﻣﻦ ﺍﻟﻤﻜﺎﻥ ﻃﻠﺒﺖ ﺍﻝ CV ﺍﻟﺨﺎﺹ ﺑﻴﺞ ﻭ ﺍﻟﺴﻴﺮﺓ ﺍﻟﺬﺍﺗﻴﺔ .. ﻭ ﻋﺮﻓﺖ ﺷﻨﻮ ﺍﻧﺖ ﻭ ﺍﺧﺬﺕ ﻧﺒﺬﺓ ﻋﻦ ﻋﻤﻠﺞ، ﺧﻠﻴﻨﻲ ﻻ ﺍﻟﻒ ﻭ ﺍﺩﻭﺭ ﻟﻜﻦ ﺍﻧﻲ ﺍﻃﻠﺐ ﺍﻳﺪﺝ ﻟﻠﺰﻭﺍﺝ

.....

 ﺑﻘﻴﺖ ﺻﺎﻓﻨﺔ ﺑﻮﺟﻬﻪ

- ﺁﺍﺍﺍﺍﺍ ﺻﺮﺍﺣﺔ ﻓﺎﺟﺌﺘﻨﻲ ﺑﻬﺬﺍ ﻃﻠﺒﻚ

- ﺍﻋﺮﻑ ﻭ ﺍﻟﺞ ﺍﻟﻮﻗﺖ ﺑﺎﻟﺘﻔﻜﻴﺮ ، ﺍﻛﻴﺪ ﻫﻜﺬﺍ ﻣﻮﺿﻮﻉ ﻣﻴﺠﻲ ﺑﺎﻟﺴﻬﻮﻟﺔ ﻓﻤﻦ ﺣﻘﺞ ﺍﻟﺘﻔﻜﻴﺮ

- ﺍﻓﻜﺮ ﺍﺷﻮﻥ ﻭ ﺍﻧﻲ ﻣﺎ ﺍﻋﺮﻑ ﻋﻨﻚ ﺷﻲﺀ ﺍﺑﺪﺍ ، ﻻ ﻋﻦ ﺣﻴﺎﺗﻚ ﺍﻫﻠﻚ ﺍﻥ ﻛﻨﺖ ﻣﺘﺰﻭﺝ ﺍﻭ ﻻ ﺗﻤﺘﻠﻚ ﺍﻭﻻﺩ ﺑﻨﺎﺕ ، ﺍﻧﻲ ﺍﻋﺮﻓﻚ

- ﺍﻱ ﺻﺢ ، ﺍﻧﻲ ﻣﺘﺰﻭﺝ ﻭ ﻋﻨﺪﻱ ٢ ﺍﻭﻻﺩ ﻭ ﺑﻨﺖ ﻭﺣﺪﺓ ، ﻋﺎﺋﻠﺘﻲ ﺗﺴﻜﻦ ﺑﺎﻟﻤﻨﺼﻮﺭ ، ﺑﺲ ﺗﺄﻛﺪﻱ ﺍﻥ ﺍﻧﺖ ﺣﺘﻜﻮﻧﻴﻦ ﺑﻌﻴﺪﻩ ﻋﻨﻬﻢ ﺗﻤﺎﻣﺎ ﻭ ﻣﺮﺍﺡ ﻳﺄﺛﺮ ﻫﺎﻟﺸﻲﺀ

- ﺷﺘﻘﺼﺪ ﺯﻭﺍﺝ ﺳﺮ ﻳﻌﻨﻲ

- ﻻ ﺍﻛﻴﺪ ﻭ ﻟﻴﺶ ﺳﺮ ﺍﻧﻲ ﻣﺎ ﻣﺴﻮﻱ ﺟﺮﻳﻤﺔ ﻭ ﻣﻦ ﺣﻖ ﺍﻟﺮﺟﻞ ﻳﺘﺰﻭﺝ ﺍﻛﺜﺮ ﻣﻦ ﻭﺣﺪﺓ، ﺍﻃﻠﺒﺞ ﻣﻦ ﺍﻫﻠﺞ ﺣﺴﺐ ﺍﻻﺻﻮﻝ ﻭ ﺍﺳﻜﻨﺞ ﺍﺑﻴﺘﻲ ﺑﺎﻟﻤﻨﻄﻘﺔ ﺍﻟﺨﻀﺮﺍﺀ

- ﺻﺮﺍﺣﺔ ﻣﺎ ﺍﻋﺮﻑ ﺍﻧﻲ ﺿﺪ ﺍﻥ ﺍﺗﺰﻭﺝ ﺷﺨﺺ ﻣﺘﺰﻭﺝ ﻣﺎ ﺍﺣﺐ

- ﺯﻭﺟﺘﻲ ﻛﺒﻴﺮﺓ ﺑﺎﻟﻌﻤﺮ ﻭ ﺩﺧﻠﺖ ﺳﻦ ﺍﻟﻴﺄﺱ ﻭ ﺍﺫﺍ ﺍﻟﻠﻪ ﻣﺤﻠﻞ ﺍﻟﺰﻭﺍﺝ ﻓﻠﻴﺶ ﻧﺤﺮﻡ

- ﺍﻧﻲ ﻣﺪﺍ ﺍﺣﺮﻣﺔ ﻟﻜﻦ ﻛﻞ ﺍﻟﻘﺼﺔ ﺍﻧﻮ ﻣﺎ ﺍﺣﺐ

- ﺍﻧﻄﻴﺘﺞ ﻣﻬﻠﺔ ﺗﻔﻜﺮﻳﻦ ﺍﺧﺬ ﺍﻟﺠﻮﺍﺏ ﺍﻟﻨﻬﺎﺋﻲ ﺑﻌﺪ . ﺍﺳﺒﻮﻉ، ﻫﺴﻪ ﺧﻠﻴﻨﺎ ﻧﻄﻠﺐ ﺷﻲﺀ ﻧﺎﻛﻠﻪ

ﺍﺑﺘﺴﻤﺖ ، ﺳﺄﻟﻨﻲ ﺍﺫﺍ ﺍﺣﺐ ﺍﻷﻛﻼﺕ ﺍﻟﺒﺤﺮﻳﺔ ؟

ﺟﺎﻭﺑﺘﻪ ﺏ ‏( ﻧﻌﻢ ‏)

ﻭﺑﻌﺪﻫﺎ ﺩﺧﻠﻨﺎ ﺑﻨﻘﺎﺵ ﻋﻦ ﺍﻟﺴﻴﺎﺳﺔ ﻭ ﺍﻟﻠﻲ ﺩﻳﺼﻴﺮ ﺑﺎﻟﻌﺮﺍﻕ ﻭ ﻋﻦ ﺍﻟﺒﺮﻟﻤﺎﻥ ﺍﻟﻌﺮﺍﻗﻲ ﻭﻋﻦ ﺍﻟﺸﻬﺮﺓ ﻭ ﺍﻻﻋﻼﻧﺎﺕ ﻭ ﺍﻟﺸﺮﻛﺔ ﻭﻭﻭ ... ﺍﻟﺦ

ﻛﻤﻠﺖ ﺭﺟﻌﺖ ﻟﻠﻔﻨﺪﻕ ، ﻃﻠﻊ ﺣﺎﺟﺰ ﺑﻨﻔﺲ ﺍﻟﺠﻨﺎﺡ ﺍﻟﻠﻲ ﺣﺎﺟﺰ ﻏﺮﻓﺘﻲ ﺑﻴﻪ ﺑﻴﻨﺎ ﻏﺮﻓﺔ ﻭﺣﺪﺓ ...

ﺻﺮﺍﺣﺔ ﻛﻞ ﺍﻟﻤﻮﺿﻮﻉ ﻣﺎ ﺧﺶ ﺑﻌﻘﻠﻲ ﻏﻴﺮ ﻣﻮﺿﻮﻉ ﺑﻨﺘﻲ ، ﺑﻘﻴﺖ ﺍﻓﻜﺮ ﺑﻴﻪ ﺑﺲ ﺟﻨﺖ ﺗﻌﺒﺎﻧﻪ ﻛﻠﺶ ﻧﻤﺖ

.. ﻛﻌﺪﺕ ﻣﻦ ﺍﻟﺼﺒﺢ ، ﻓﺮﺻﺔ ﺟﻤﻴﻠﺔ ﺍﺳﺘﺮﺟﻊ ﺍﻳﺎﻡ ﺑﻴﺮﻭﺕ ﻭ ﺍﺭﻛﺾ ﺍﻟﺼﺒﺢ

ﺑﺪﻟﺖ ﺟﻴﻨﺰ ﻭ ﺑﺎﺗﻪ ﺭﻳﺎﺿﻴﺔ ﻭ ﺗﻴﺸﻴﺮﺕ ، ﺍﺧﺬﺕ ﺍﻟﻬﻴﺘﻔﻮﻥ ﻭ ﺍﻟﻤﻮﺑﺎﻳﻞ ﻭ ﻃﻠﻌﺖ ﺩﺧﻠﺖ ﻟﻠﻤﺼﻌﺪ، ﺩﺧﻞ ﻫﻮ ﺍﻟﻤﺼﻌﺪ ﻫﻢ

- ﺻﺒﺎﺡ ﺍﻟﺨﻴﺮ

- ﺍﻫﻼ ﺻﺒﺎﺡ ﺍﻟﻨﻮﺭ

- ﺍﻥ ﺷﺎﺀﺍﻟﻠﻪ ﺍﻟﻐﺮﻓﺔ ﻛﺎﻧﺖ ﻣﺮﻳﺤﺔ ﻭ ﻣﺎ ﻧﻘﺼﻚ ﺷﻲﺀ؟

- ﺍﺷﻜﺮﻙ ﺟﺪﺍ ﻛﺎﻧﺖ ﻣﺮﻳﺤﺔ، ﺑﺲ ﺗﻜﺪﺭ ﺗﺴﺤﺐ ﺍﻟﻤﺮﺍﻓﻖ ﺍﻟﺨﺎﺹ ﺍﻟﻠﻲ ﺧﻠﻴﺘﻪ ﺣﻀﺮﺗﻚ ﻭ ﺍﺷﻜﺮﻙ ﻋﻠﻰ ﺩﻓﻊ ﺍﻟﻔﺘﻮﺭﺓ ﻭ ﺗﻜﺎﻟﻴﻒ ﺍﻟﺴﻔﺮ ﺑﺲ ﺍﻧﻲ ﺭﺍﺡ ﺍﺑﻘﻰ ﻳﻮﻣﻴﻦ ﺯﻳﺎﺩﺓ ﻋﻨﺪﻱ ﺍﻋﻼﻧﺎﺕ ﻭ ﺟﻠﺴﺎﺕ ﺗﺼﻮﻳﺮ ﺍﻛﻤﻠﻬﻢ ﻭ ﺍﺭﺟﻊ

- ﻣﺎﻛﻮ ﻣﺸﻜﻠﺔ ﻳﺒﻘﻰ ﻭﻳﺎﺝ ﻭ ﺍﻧﻲ ﺗﻜﻔﻠﺖ ﺳﻔﺮﺝ ﻛﺎﻣﻞ ﻣﻴﺼﻴﺮ ﺍﺗﺮﺍﺟﻊ ﺑﻴﻪ

- ﻣﻴﺤﺘﺎﺝ ﺻﺪﻛﻨﻲ

- ﺍﺭﺟﻮﺝ

- ﺍﺷﻜﺮﻙ

- ﻭﻳﻦ ﻣﺘﻮﺟﻬﻪ ؟

- ﺍﺭﻛﺾ ﻟﻠﺮﻳﺎﺿﺔ ،ﺍﺟﻮﺍﺀ ﺗﺮﻛﻴﺎ ﺟﻤﻴﻠﺔ

- ﺟﻤﻴﻞ ﺍﻧﻚ ﺗﻤﺎﺭﺳﻴﻦ ﺍﻟﺮﻳﺎﺿﺔ ﻋﺎﺩﺓ ﺍﻟﻤﺮﺍﺓ ﺍﻟﻌﺮﺍﻗﻴﺔ ﻣﻬﻤﻠﺔ ﺑﻤﺎ ﻳﺨﺺ ﺍﻟﺼﺤﺔ ﻭ ﺍﻟﺮﻳﺎﺿﺔ

- ﺃﻏﻠﺐ ﺍﻟﻨﺴﺎﺀ ﺍﻟﻌﺮﺍﻗﻴﺎﺕ ﻣﻀﻄﻬﺪﺍﺕ ﻭ ﻣﻘﻴﺪﺍﺕ ﺑﺎﻟﺒﻴﻮﺕ، ﻓﻲ ﺍﻟﻠﻲ ﻳﺮﺍﻯ ﻭﺍﺟﺒﻬﻢ ﺧﺪﻣﺔ ﺍﻟﺰﻭﺝ ﻭ ﺍﻻﻃﻔﺎﻝ ﻭ ﺍﻫﻞ ﺍﻟﺰﻭﺝ ﺍﻥ ﻛﺎﻧﺖ ﺳﺎﻛﻨﺔ ﻣﻊ ﺍﻫﻠﻪ ﻭ ﺑﻬﻴﺞ ﺣﺎﻟﺔ ﻳﻜﻮﻥ ﻫﻤﻬﺎ ﺍﻥ ﺗﻠﻜﻰ ﺍﻟﻬﺎ ﻓﺴﺤﺔ ﻣﻦ ﺍﻟﺮﺍﺣﺔ ﺗﻨﺴﻰ ﺷﻲﺀ ﺍﺳﻤﻪ ﺻﺤﺔ ﻭ ﺭﻳﺎﺿﺔ

.......

ﺻﺤﻴﺢ

.. ﺍﻧﻔﺘﺢ ﺍﻟﻤﺼﻌﺪ ، ﻭﺩﻋﺘﻪ ﻭ ﻃﻠﻌﺖ ﺑﺮﺍ ﺍﺭﻛﺾ

ﺭﻛﻀﺖ ﻗﺮﺍﺑﺔ ﺍﻟﺴﺎﻋﺔ، ﺍﺧﺬﺕ ﻣﻲ ﺷﺮﺑﺖ ﻭ ﻛﻌﺪﺕ ﺍﺭﺗﺎﺡ ﺷﻮﻱ ﻭ ﺧﺎﺑﺮﺕ ﻣﺎﻣﺎ : ﺍﻟﻮﻭ

- ﺍﻟﻮ ﻫﻠﻮ ﻣﺎﻣﺎ ﻟﺠﻮﻧﻪ، ﻟﺞ ﻋﻴﻨﻲ ﺑﺎﻟﻲ ﻳﻤﺞ ﻭ ﺍﺗﺼﻠﺖ ﺍﻟﺒﺎﺭﺣﺔ ﻭ ﻣﺎﻛﻮ ، ﺷﻨﻮ ﻭﺻﻠﺘﻲ ﺗﺮﻛﻴﺎ ؟

- ﺍﻱ ﻣﺎﻣﺎ ﺍﻧﻲ ﺣﺎﻟﻴﺎ ﺑﺘﺮﻛﻴﺎ

- ﺍﻱ ﻭ ﺷﺼﺎﺭ

- ﻋﺮﺽ ﻋﻠﻴﻪ ﺍﻟﺰﻭﺍﺝ

- ﻳﺎﺍﺍﺍ ﻋﺰﺍ ﺩﺍﺩﻩ ﻫﺬﺍ ﺷﻮ ﻓﺎﻳﺖ ﮔﺒﻞ !

- ﻫﻬﻬﻬﻪ ﻭﺍﻟﻠﻪ ﺍﻧﻲ ﻫﻢ ﺍﺳﺘﻐﺮﺑﺖ

- ﺍﻱ ﻭ ﺷﺠﺎﻭﺑﺘﻲ

- ﺍﻧﻄﺎﻧﻲ ﻣﻬﻠﺔ ﺍﻓﻜﺮ

- ﻭ ﺍﻧﺖ ﺷﻨﻮ ﺭﺃﻳﺞ ، ﻣﺪﺍﻡ ﻣﺎ ﺍﻧﻄﻴﺘﻲ ﺭﻓﺾ ﺍﻛﻮ ﺷﻲ ﺧﻼﺝ ﺗﻔﻜﺮﻳﻦ

- ﺍﻱ ، ﻛﻠﻤﻨﻲ ﺑﺨﺼﻮﺹ ﺑﻨﺘﻲ ﻭ ﻛﺎﻝ ﺑﺄﺳﺘﻄﺎﻋﺘﻲ ﺍﺭﺟﻌﻬﺎ ﻭ ﺍﺳﻜﻨﺞ ﺍﻟﻤﻨﻄﻘﺔ ﺍﻟﺨﻀﺮﺍﺀ ﻭ ﺑﻌﻴﺪ ﻋﻦ ﺑﻴﺘﻪ ﺍﻻﻭﻝ

- ﻣﺘﺰﻭﺝ ﻳﻌﻨﻲ

- ﺍﻱ ﻭ ﺳﺎﻛﻦ ﺑﺎﻟﻤﻨﺼﻮﺭ ﺍﺑﻐﺪﺍﺩ

- ﻭ ﻛﻞ ﺗﻔﻜﻴﺮﺝ ﺑﻨﺘﺞ

- ﻟﻌﺪ ﺷﻔﻜﺮ ﻟﻴﺶ ﺍﻧﻲ ﺍﻟﻤﺜﻠﻲ ﺗﺘﺰﻭﺝ ، ﻛﺮﻫﺖ ﺍﻟﺰﻭﺍﺝ ﻛﻠﻪ ﺑﺲ ﻣﺎﻣﺎ ﺍﻧﻲ ﺍﺣﺘﺎﺝ ﺑﻨﺘﻲ ﺑﻠﻜﻲ ﻫﺬﺍ ﺑﺎﺏ ﺍﻟﻠﻪ ﻓﺘﺤﻠﻴﺎﻩ ﺩﻳﺮﺟﻌﻠﻲ ﺑﻨﺘﻲ

- ﻭﺍﻟﻠﻪ ﻣﺎﻣﺎ ﻣﺎ ﺍﻋﺮﻑ ، ﻋﺴﻰ ﻓﻌﻼ ﻭ ﻳﻜﻮﻥ ﻃﺮﻳﻖ ﺧﻼﺻﺞ ﺧﺎﺻﺔ ﺍﺫﺍ ﺍﺗﺰﻭﺟﺘﻲ ﺭﺍﺡ ﻳﺼﻴﺮﻟﺞ ﺣﻤﺎﻳﺔ ﻭ ﺳﺎﻳﻖ ﻳﻌﻨﻲ ﺗﺄﻣﻨﻴﻦ ﻋﻠﻰ ﺭﻭﺣﺞ ﻭ ﻣﺮﺕ ﻧﺎﺋﺐ ﻣﺎ ﻳﻜﺪﺭﻟﺞ

- ﻫﻮ ﻳﻜﻮﻝ ﺍﻛﺪﺭ ﺍﻧﻬﻲ ﻣﻮﺿﻮﻋﻪ ﻳﻌﻨﻲ ﺍﺫﺍ ﺍﺿﻄﺮ ﺍﻻﻣﺮ ﻳﻘﺘﻠﻪ

- ﻻ ﺍﺳﻢ ﺍﻟﻠﻪ ﻗﺎﺑﻞ ﺍﺣﻨﻪ ﻳﻤﺎﻣﺎ ﻣﺠﺮﻣﻴﻦ ﺩﻧﻘﺒﻞ ﺑﺎﻟﻘﺘﻞ ﻳﻜﻔﻴﻨﺎ ﻳﺒﺘﻌﺪ ﻣﻨﺞ، ﺑﺲ ﺍﻧﺖ ﻓﻜﺮﻱ ﺯﻳﻦ ﻫﻲ ﻫﻢ ﻓﺮﺻﺔ ﺍﻟﺞ ﻫﻮ ﻧﺎﺋﺐ ﻭ ﻣﺴﺆﻝ ﺟﺒﻴﺮ ﻭ ﻳﺨﻄﺒﺞ ﻛﺪﺍﻡ ﺍﻟﻨﺎﺱ ﻟﻴﺶ ﻻ ﺍﺣﺴﻦ ﻣﺎ ﺗﺒﻘﻴﻦ ﻭﺣﺪﺝ ﻳﻤﺎﻣﺎ ﺗﻜﺪﺭﻳﻦ ﻭ ﺗﻔﺮﻳﻦ ﺣﺘﻰ ﺗﻌﻴﺸﻴﻦ ﻧﻔﺴﺞ

- ﺍﻥ ﺷﺎﺀﺍﻟﻠﻪ ، ﻳﻼ ﻣﺎﻣﺎ ﻻﺯﻡ ﺍﺭﺟﻊ ﻟﻠﻔﻨﺪﻕ ﻣﻦ ﺍﻭﺻﻞ ﺍﺧﺎﺑﺮﺝ

- ﺍﻭﻙ ﺣﺒﻴﺒﺘﻲ

- ﺑﻴﺒﺎﻱ

ﻗﻔﻠﺘﻪ ﻣﻦ ﻣﺎﻣﺎ ﻭﺭﺟﻌﺖ ﺭﻛﺾ ﻟﻠﻔﻨﺪﻕ، ﺳﺒﺤﺖ ﻭ ﺷﺴﻮﺭﺕ ﺳﻌﺮﻱ ﻭ ﻣﻜﻴﺎﺟﻲ ﻭ ﻟﺒﺴﺖ ﺍﻟﻤﻼﺑﺲ ﺍﻟﻠﻲ ﻟﻼﻋﻼﻥ ﻭ ﺧﺎﺑﺮﺕ ﺍﻟﻤﺼﻮﺭ ﻋﻼﺀ ﺍﺗﻔﻘﻨﺎ ﺑﻜﺬﺍ ﻣﻜﺎﻥ ، ﺣﺘﻰ ﻧﻜﻤﻞ ﺷﻐﻠﻨﺎ

ﺍﺧﺬﺕ ﻭﻳﺎﻳﻪ ﺟﻨﻄﺔ ﺍﻟﻤﻼﺑﺲ ﻭ ﺍﻟﻤﻜﻴﺎﺝ ﻭ ﺍﻟﻜﺎﻭﻳﺔ .. ﺣﺘﻰ ﻟﻤﺎ ﻧﻐﻴﺮ ﺍﻟﻤﻜﺎﻥ ﺍﻏﻴﺮ ﺍﻟﺴﺘﺎﻳﻞ ﺩﺍ ﺍﻛﻤﻞ ﺷﻐﻠﻲ ﺑﺄﺳﺮﻉ ﻭﻗﺖ

... ﺍﻟﺘﻘﻴﺖ ﻋﻼﺀ ﻭ ﺳﻮﻳﻨﺎ ﺟﻠﺴﺎﺕ ﺗﺼﻮﻳﺮ ، ﻃﻠﻌﻮﺍ ﻳﺠﻨﻨﻮﻥ ﻛﺘﻠﻪ ﺍﺑﻌﺜﻠﻴﺎﻫﻢ ﻟﻔﻮﻧﻲ ﺩﺍ ﺍﻧﺸﺮﻫﻢ ﻉ ﺍﻻﻧﺴﺘﻜﺮﺍﻡ

... ﺑﻌﺜﻠﻴﺎﻫﻢ ﻭ ﻧﺰﻟﺘﻬﻢ

ﺑﻌﺪﻫﺎ ﺑﻴﻮﻡ ﻛﻤﻠﺖ ﻛﻞ ﺷﻲ ﻭ ﺭﺟﻌﺖ ﻷﺭﺑﻴﻞ ، ﺍﻭﻝ ﻣﺎ ﺩﺧﻠﺖ ﺍﻟﻌﺮﺍﻕ ﺧﺎﺑﺮﻧﻲ ﻣﺨﻠﺪ : ﺍﻟﻮﻭﻭﻭ

- ﺍﻟﻮ ﻫﻼ ﻣﺨﻠﺪ

- ﺷﻠﻮﻧﺞ ﻟﺠﻴﻦ

- ﺯﻳﻨﻪ ﺍﻟﺤﻤﺪ ﻟﻠﻪ ﺍﻧﺖ ﺍﺷﻮﻧﻚ

- ﺑﺨﻴﺮ ﻭ ﻧﻌﻤﺔ ﺍﻟﺤﻤﺪﻟﻠﻪ، ﺍﻧﺖ ﻭﻳﻦ

- ﺑﺄﺭﺑﻴﻞ

- ﺷﻮ ﻣﻨﺰﻟﻪ ﺻﻮﺭ ﺍﻟﺞ ﺑﺘﺮﻛﻴﺎ

....

 ﺍﻱ ﻣﻮ ﻃﻠﻊ ﻋﻨﺪﻱ ﺷﻐﻞ ﻃﺎﺭﺉ ﺍﺿﻄﺮﻳﺖ ﺍﻃﻠﻊ ﻓﻮﺭﺍ ، ٣ ﺍﻳﺎﻡ ﻭ ﺭﺟﻌﺖ

- ﻫﺎﺍﺍ ﺯﻳﻦ ﺍﻟﺤﻤﺪﻟﻠﻪ ﻋﻠﻰ ﺳﻼﻣﺘﺞ

- ﺍﻟﻠﻪ ﻳﺴﻠﻤﻚ

- ﺍﻧﺖ ﻭﻳﻦ

- ﺑﺎﻟﺪﻭﺍﻡ

- ﻳﻤﻜﻦ ﻫﺎﻟﻴﻮﻣﻴﻦ ﺍﺟﻴﻜﻢ، ﻣﺸﺘﺎﻗﺔ ﻟﻌﻤﺎﻣﻲ ﻛﻠﺶ ﻫﻮﺍﻳﻪ

- ﺍﻱ ﻫﻼ ﺑﻴﺞ ، ﺑﺲ ﻣﺸﺘﺎﻗﺔ ﺑﺲ ﺍﻟﻌﻤﺎﻣﺞ ؟

- ﻻ ﻭﻷﺑﻦ ﻋﻤﻲ ﺍﺳﻤﻪ ﻣﺨﻠﺪ ، ﻫﺴﻪ ﺍﺭﺗﺎﺣﻴﺖ ؟

- ﻫﻬﻬﻬﻬﻬﻬﻬﻪ ﻣﻦ ﺗﺠﻴﻦ ﺍﻧﻄﻴﻨﻲ ﺧﺒﺮ

ﺩﺍ ﺍﺭﻳﺪ ﺍﺣﺠﻲ ﺍﻧﺪﻛﺖ ﺍﻟﺒﺎﺏ، ﻛﻠﺘﻠﻪ : ﻣﺨﻠﺪ ﺍﻟﺒﺎﺏ ﺩﻳﻨﺪﻙ ﻣﻦ ﺭﺧﺼﺘﻚ

- ﺍﺧﺬﻱ ﺭﺍﺣﺘﺞ

ﺭﺣﺖ ﻟﻠﺒﺎﺏ ﻓﺘﺤﺘﻬﺎ ﻃﻠﻌﺖ ﺻﺪﻳﻘﺘﻲ ﺑﺎﻟﺸﻐﻞ ﺍﺳﻤﻬﺎ ﺩﺍﻧﻴﺎ ، ﻓﺘﺤﺘﻠﻬﺎ ﺍﺩﻳﺔ : ﻟﺞ ﻫﻼﺍﺍﺍﻭ

- ﻫﻠﻮ ﻋﻴﻨﻲ ﻫﻠﻮ ، ﺍﻟﺘﺴﺎﻓﺮ ﻟﺘﺮﻛﻴﺎ ﻭ ﻣﺘﻜﻮﻝ ﻻﺣﺪ

- ﻟﺞ ﺑﺎﻟﻠﻪ ﺍﻟﻌﻈﻴﻢ ﺻﺎﺭﺕ ﻣﻔﺎﺟﺌﺔ ﺑﺲ ﺷﻨﻮ ﻏﻴﺮ ﺗﺠﻨﻦ ، ﺷﻮﻳﺔ ﻟﺦ ﻧﺼﻔﻲ ﺍﻣﻮﺭﻧﺎ ﻭ ﻧﺴﺎﻓﺮ ﺍﻧﻲ ﻭﻳﺎﺝ

- ﺍﻱ ﻟﺞ ﻛﻠﺶ ﻣﺘﻜﺄﺑﺔ ﻓﺪ ﻣﺮﻩ ﻋﻠﻮﺍﺍﺍ ﻟﻮ ﻧﻄﻠﻊ ﻧﺘﺮﻓﻪ ﺷﻮﻳﻪ

- ﻭﺍﻟﻠﻪ ﺧﻠﺼﺘﻬﺎ ﺗﺼﻮﻳﺮ ﻭ ﺷﻐﻞ ﻛﻠﺸﻲ ﻣﺸﻔﺖ ﻣﻨﻬﺎ ، ﻧﺨﻠﺺ ﺷﻐﻞ ﻧﺎﺧﺬ ﺍﺟﺎﺯﺓ ﻭ ﻧﻄﻠﻊ ﻓﺪ ﺃﺳﺒﻮﻉ

- ﺍﻥ ﺷﺎﺀﺍﻟﻠﻪ ﺑﺲ ﺳﻮﻟﻔﻴﻠﻲ ﺻﺪﻙ ﻫﺬ ﺍﻟﻨﺎﺋﺐ ﺯﺍﻫﺮ ﻃﻠﺒﺞ ﺑﻤﻮﻋﺪ

- ﺍﺣﻤﺪ ﻛﻠﺞ ﻣﻮ ؟

- ﺍﻱ ﺗﻌﺮﻓﻴﻦ ﺍﺣﻤﺪ ﻣﻴﻀﻢ ﻋﻠﻴﻪ ﺷﻲﺀ

- ﺍﻱ، ﺍﻟﻨﺎﺋﺐ ﻃﻠﺒﻨﻲ ﻟﻠﺰﻭﺍﺝ

- ﺟﺬﺫﺫﺫﺫﺏ

- ﺍﻱ ﻭﺍﻟﻠﻪ

- ﻟﺞ ﻳﺮﺍﺩﻟﻬﺎ ﺑﺨﺖ ﻫﻴﺞ ﻭ ﺗﺘﺰﻭﺟﻴﻠﺞ ﻧﺎﺋﺐ ﻭ ﺍﻃﻜﻴﻦ ﻭ ﻓﻴﻼ ﻭ ﺣﺴﺎﺏ ﻛﺒﻴﺮ ﺑﺎﻟﺒﻨﻚ ﻭ ﺍﻃﻠﻌﻴﻦ ﻷﻱ ﺩﻭﻟﻪ ﺗﺮﻳﺪﻳﻬﺎ ﺍﻭﻱ ﺍﻭﻱ ﻟﺠﻴﻦ ﻟﺞ ﺍﻧﻔﺘﺤﺘﻠﺞ ﺍﺑﻮﺍﺏ ﺍﻟﺪﻧﻴﺎ

- ﻣﺎ ﺍﻋﺮﻑ ﻟﺴﻪ ﻣﺎ ﻗﺮﺭﺕ

- ﺩﻧﺠﺒﻲ ﻟﺴﺔ ﻣﺎ ﻗﺮﺭﺕ ﺷﻨﻮ ﻣﻨﺘﻈﺮﻩ ﺍﺣﺴﻦ ﻣﻦ ﻫﻴﺞ

- ﻟﺞ ﻣﻮ ﻫﻴﺞ ﺑﺲ ﻫﺬﺍ ﺯﻭﺍﺝ ﻣﺎ ﺍﺭﻳﺪ ﺍﺳﺘﻌﺠﻞ ﺑﻴﻪ

- ﺍﻱ ﺣﻘﺞ ﺑﺲ ﻫﻴﺞ ﺯﻭﺍﺟﻪ ﻣﺎ ﻳﺤﺘﺎﺟﻠﻬﺎ ﺗﻔﻜﻴﺮ، ﻫﺬﺍ ﺣﻆ ﻭ ﺍﺟﺎﺝ ﻻ ﺗﻀﻴﻌﻴﻦ ﺍﻟﻔﺮﺻﺔ

- ﻣﺎ ﺍﻋﺮﻑ ﺑﻌﺪ ..

..... ﻋﻠﻰ ﺍﻟﺮﻏﻢ ﻣﻦ ﺍﻥ ﺍﻧﻲ ﺍﺗﺄﻣﻞ ﺍﻥ ﻳﺮﺟﻌﻠﻲ ﺑﻨﺘﻲ ﻭ ﺍﺣﺴﻪ ﺣﺒﻞ ﺍﻟﻨﺠﺎﺓ ﺍﻟﻮﺣﻴﺪ ﺍﻻ ﺍﻧﻮ ﺍﻛﻮ ﺷﻲﺀ ﺑﺪﺍﺧﻠﻲ ﻣﺎ ﻗﺎﺑﻞ، ﻣﺎ ﺍﻋﺮﻑ ﺍﻧﻲ ﻛﺎﺭﻫﺔ ﺍﻟﺰﻭﺍﺝ ﻣﺪﺭﻱ

.... ﺭﺑﺤﻨﺎ ﺍﻟﻌﻘﺪ ﻭ ﻭﻗﻌﻨﺎ ﻭ ﺣﺼﻠﺖ ﻋﻠﻰ ﻣﻜﺎﻓﺌﺘﻲ، ﻣﻔﻜﺮﺓ ﺍﺳﺘﺜﻤﺮ ﺍﻟﻠﻲ ﻋﻨﺪﻱ ﻭ ﺍﻓﺘﺢ ﻣﺤﻞ ﺍﺯﻳﺎﺀ ﻭ ﺍﺣﻂ ﺍﻟﺴﺘﺎﻳﻼﺕ ﺍﻟﻠﻲ ﺗﻌﺠﺒﻨﻲ ﺍﺳﺘﻮﺭﺩﻫﺎ ﻭ ﺍﻋﺮﺿﻬﺎ ﻭ ﺍﻧﻲ ﺍﺭﻭﺝ ﻟﻤﺤﻠﻲ

ﺑﺲ ﻫﺬﺍ ﻣﻮ ﺗﻔﻜﻴﺮﻱ، ﺍﻧﻲ ﺗﻔﻜﻴﺮﻱ ﺍﻻﻥ ﺑﻤﻮﺿﻮﻉ ﺍﻟﻨﺎﺋﺐ، ﻳﻌﺪﻧﻲ ﺣﺎﻳﺮﺓ ، ﻓﺨﻠﺼﺖ ﺷﻐﻠﻲ ﺍﻟﺨﻤﻴﺲ ﻭ ﻃﻠﻌﺖ ﻟﺒﻐﺪﺍﺩ

ﺭﺣﺖ ﻟﺒﻴﺖ ﻋﻤﻮ ﻋﺜﻤﺎﻥ ﻫﻢ ﺍﺳﺘﻘﺒﺎﻝ ﻭ ﻫﻼ ﻭ ﻣﺮﺣﺒﺎﻭ ﺿﻴﺎﻓﺔ، ﺑﻘﻴﺖ ﺍﻟﻠﻴﻠﺔ ﻭ ﺍﻟﺼﺒﺢ ﺧﺎﺑﺮﺕ ﻋﻠﻰ ﻣﺨﻠﺪ ﻛﺘﻠﻪ : ﺍﻧﻲ ﺍﺑﻐﺪﺍﺩ ﺍﺑﻴﺖ ﻋﻤﻮ ﻋﺜﻤﺎﻥ، ﺗﻌﺎﻝ ﺍﺭﻳﺪ ﺍﺷﻮﻓﻚ

.....

ﻭﺍﻟﻠﻪ ﻣﻜﺎﻝ ﺑﺎﻃﻞ ﺭﺑﻊ ﺳﺎﻋﻪ ﻭ ﻫﻮ ﻓﺎﺕ ﻋﻠﻴﻨﺎ ﺳﻠﻢ : ﺷﻠﻮﻧﺞ ﻭ ﺷﺨﺒﺎﺭﺝ

- ﺯﻳﻨﺔ ﺍﻟﺤﻤﺪﻟﻠﻪ

- ﺷﻮ ﻻﺑﺴﺔ ﻭﻳﻦ ﺗﺮﻳﺪﻳﻦ

- ﺍﺭﻳﺪ ﺍﻃﻠﻊ ﺷﻮﻳﻪ

ﻏﻤﺰﺗﻠﻪ ﻭ ﺍﺷﺮﺗﻠﻪ ، ﻣﻔﻬﻢ ﺍﺷﺎﺭﺗﻲ

- ﺗﺮﻭﺡ ﻭﻳﺎﻱ

- ﺍﻱ ﻳﻼ

ﻃﻠﻌﻨﺎ ﺍﻧﻲ ﻭﻳﺎﻩ ﻭ ﺻﻌﺪﻧﺎ ﺑﺎﻟﺴﻴﺎﺭﺓ ، ﺣﺠﻪ : ﺷﻜﻮ ﺷﻮ ﺗﺄﺷﺮﻳﻠﻲ ﻗﺒﻞ ﺷﻮﻳﺔ

- ﻻ ﺭﺩﺗﻚ ﺗﻄﻠﻊ ﻷﻥ ﻋﻨﺪﻱ ﻣﻮﺿﻮﻉ ﻭﻳﺎﻙ

- ﻭﻫﻮ ؟

- ﻻﺯﻡ ﻧﺴﺘﻘﺮ ﺑﻤﻜﺎﻥ ﻳﻼ ﻧﺤﺠﻲ

ﺭﺣﻨﺎ ﻟﻠﺠﻨﺪﻭﻝ ﻛﻌﺪﻧﺎ ﻫﻨﺎﻙ ﻃﻠﺒﻨﺎ ﻟﺤﻢ ﺑﻌﺠﻴﻦ ﻭ ﻫﻮ ﻗﻠﻖ ﻳﺮﻳﺪ ﻳﻌﺮﻑ ﺷﻨﻮ ﺍﻟﻤﻮﺿﻮﻉ ﺍﻟﻠﻲ ﺍﺭﻳﺪﻩ ﺑﻴﻪ

- ﻛﻮﻟﻲ ﺷﻜﻮ ﺷﻨﻮ ﺍﻟﺴﺎﻟﻔﺔ

- ﺷﻐﻠﺖ ﺑﺎﻟﻚ ﻫﻬﻬﻬﻬﻪ

- ﺍﻱ ﻻﻥ ﺍﺷﻮﻑ ﺍﺣﻴﺮﺓ ﺑﻌﻴﻮﻧﺞ ﻓﻘﻠﻘﺘﻴﻨﻲ ﺷﻜﻮ

- ﻻ ﻭﺍﻟﻠﻪ ﻓﺪ ﺍﻣﺮ ﺣﺒﻴﺖ ﺍﺧﺬ ﻧﺼﻴﺤﺘﻚ ﺑﻴﻬﺎ ﻻﻥ ﻓﻜﺮﺕ ﻫﻮﺍﻳﻪ ﻭ ﻣﻘﺘﻨﻌﻪ ﺑﺲ ﺷﻲﺀ ﺑﺪﺍﺧﻠﻲ ﻣﺎ ﺭﺍﺿﻲ ﻭ ﻣﺎ ﻣﻘﺘﻨﻊ

- ﺷﻨﻮ ﻫﻮ

- ﺍﻭﻝ ﺷﻲﺀ ﺍﻛﻮﻟﻚ ﺑﺪﺍﻋﺘﻲ ﺍﻟﻨﺼﻴﺤﺔ ﺍﻟﻄﺎﻟﺒﺘﻪ ﺧﻠﻴﻬﺎ ﻟﻤﺼﻠﺤﺘﻲ ﻻ ﺗﺮﻓﺾ ﻟﻤﺼﻠﺤﺘﻚ ... ﺷﻮﻟﻔﻲ ﺷﻨﻮ ﺍﻟﻠﻲ ﻳﻨﺎﺳﺒﻨﻲ ﺑﺪﻭﻥ ﺍﻧﺎﻧﻴﺔ

- ﺩﺣﺠﻲ ﻳﻤﻌﻮﺩﻩ ﻓﻀﻴﻬﺎ ﺷﻄﻠﻌﺖ ﻫﺎﻱ ﺍﻧﺎﻧﻲ ﻭ ﻣﺼﻠﺤﺘﻚ ﺷﻨﻮ

- ﻫﻴﺞ ﺩﺍ ﺍﻧﺒﻬﻚ ﻣﻦ ﺍﻟﺒﺪﺍﻳﺔ ﻷﻥ ﺍﻧﻲ ﻛﻞ ﻫﻤﻲ ﺑﻨﺘﻲ

- ﺑﻨﺘﺞ ﻣﻮ ﺣﺠﻴﻨﺎ ﺑﻴﻬﺎ ﻭ ﻛﺘﻠﺞ ﻣﺎﻟﻚ ﻣﺎ ﺗﻜﺪﺭﻳﻼ

- ﻣﻮ ﻟﻜﺒﺖ ﻃﺮﻳﻘﺔ

- ﻭ ﺷﻨﻮ ﻫﻲ ؟

- ﺳﻤﻌﺘﻨﻲ ﺫﺍﻙ ﺍﻟﻴﻮﻡ ﻭ ﺍﻧﻲ ﺍﻛﻮﻟﻚ ﻋﻦ ﻧﺎﺋﺐ ﺑﺎﻟﺒﺮﻟﻤﺎﻥ ﻋﺪﻧﺎ ﺷﻐﻞ ﻭﻳﺎﻩ

- ﺍﻳﻴﻴﻴﻲ

- ﻃﻠﺐ ﺍﻳﺪﻱ ﻟﻠﺰﻭﺍﺝ ﻭﻣﺴﺘﻌﺪ ﻳﺮﺟﻌﻠﻲ ﺑﻨﺘﻲ ﻣﻦ ﻣﺎﻟﻚ ﻭ ﺣﺘﻰ ﻟﻮ ﺍﺿﻄﺮ ﻳﻜﺘﻞ ﻣﺎﻟﻚ ﻧﻔﺴﻪ

ﺑﺮﻃﻢ ﺣﻠﻜﺔ ﻭ ﻛﺎﻡ ﻳﻬﺰ ﺑﺮﺍﺳﺔ - ﻭ ﺍﻧﺖ ﺻﺪﻛﺘﻲ ﻣﻮ ؟

- ﺍﻟﺮﺟﺎﻝ ﻣﻮ ﺟﺬﺍﺏ ﻭ ﺍﺗﻤﻨﻰ ﺗﻨﻈﺮ ﻟﻸﻣﺮ ﺑﺠﺪﻳﺔ ﻣﻮ ﺑﺄﺳﺘﻬﺰﺍﺀ ﻷﻥ ﻓﻌﻼ ﻣﺤﺘﺎﺟﻪ ﺍﻟﻨﺼﻴﺤﺔ

ﺳﻮﻟﻔﺘﻠﻪ ﻛﻞ ﺍﻟﻘﺼﺔ ﺣﺘﻰ ﺳﻔﺮﻱ ﻟﺘﺮﻛﻴﺎ

- ﻛﻤﻠﺘﻲ ؟

- ﺍﻱ

- ﺗﺮﻳﺪﻳﻦ ﻧﺼﻴﺤﺘﻲ ﺑﻌﻘﻞ ﺑﻌﻴﺪﻩ ﺍﻥ ﺍﻱ ﻋﻮﺍﻃﻒ ﻣﻨﻲ ﺍﻭ ﻣﺸﺎﻋﺮ ، ﺗﺮﻳﺪﻳﻦ ﻛﻼﻡ ﺗﻘﻨﻌﻴﻦ ﺑﻴﻪ !!

- ﺻﺎﺭﻟﻪ ﺷﻜﺪ ﻳﻌﺮﻓﺞ ﻫﺬﺍ ﺍﻟﻨﺎﺋﺐ ؟

- ﺍﺳﺒﻮﻉ ﺍﻭ ﺍﻛﺜﺮ ﻳﻌﻨﻲ

- ﻣﻔﻜﺮﺗﻲ ﻋﻠﻰ ﺍﻱ ﺍﺳﺎﺱ ﺗﻘﺪﻣﻠﺞ ﻟﻠﺰﻭﺍﺝ ﻭ ﻫﻮ ﺟﺎﻫﻞ ﻷﻃﺒﺎﻋﺞ ﻭ ﺍﺳﻠﻮﺑﺞ ﻭ ﺍﺧﻼﻗﺞ ﻭ ﺍﻫﻠﺞ ﻭﻭﻭﻭ ﻭ ﻣﻴﻌﺮﻑ ﻏﻴﺮ ﺍﻝ CV ﻭ ﺳﻴﺮﺗﺞ ﺍﻟﺬﺍﺗﻴﺔ ؟

- ﻣﺎ ﺍﻋﺮﻑ

- ﻻ ﺍﻧﻲ ﺍﻋﺮﻑ ، ﺍﻧﻌﺠﺐ ﺑﺸﻜﻠﺞ ، ﺑﻨﺖ ﺣﻠﻮﺓ ﻭ ﻣﻠﻮﻧﻪ ﻭ ﺻﻐﻴﺮﻩ ﻭ ﺍﻋﻼﻣﻴﺔ ﻭ ﻋﻠﻰ ﻛﺎﻣﻞ ﺍﻻﻧﺎﻗﺔ ﻭ ﺍﻟﺸﻴﺎﻛﺔ ﻟﻌﺎﺑﺔ ﻟﻬﺬﺍ ﺭﺍﺩ ﻳﺤﺘﻮﻳﺞ ﺑﻤﻨﺼﺒﺔ، ﻳﻌﻨﺐ ﺣﺒﺞ ﺑﻌﻴﻦ

.....

ﻋﻮﻓﻴﻨﺎ ﻣﻦ ﻣﻮﺿﻮﻉ ﺑﻨﺘﺞ ، ﺳﻤﻌﺘﻲ ﻓﺪ ﻳﻮﻡ ﻋﻴﻦ ﺗﺤﺐ ؟

ﻣﺎﻟﻚ ﺣﺒﺞ ﺑﻌﻴﻮﻧﻪ ﻟﺠﻤﺎﻟﺞ، ﻟﻤﺎ ﺷﺒﻊ ﻣﻨﺞ ﺷﺴﻮﺍ ؟

ﺗﺮﻳﺪﻳﻦ ﺗﻌﻴﺪﻳﻦ ﻧﻔﺲ ﺍﻟﻤﻮﺿﻮﻉ ؟

ﻋﻮﻓﻴﻨﺎ ﻣﻦ ﺍﻟﺤﺐ

ﺗﺮﻳﺪﻳﻨﻪ ﻳﻘﺘﻞ ﻣﺎﻟﻚ ؟

- ﻻ

- ﻟﻌﺪ

- ﻳﺮﺟﻌﻠﻴﺎﻫﺎ

- ﻳﻌﻨﻲ ﻣﺎﻟﻚ ﻳﺒﻘﻰ ﻋﺎﻳﺶ ، ﺯﻳﻦ ﺍﻛﺪﺭ ﺍﺳﺄﻟﺞ ﻣﺎﻟﻚ ﺷﻨﻮ ﺷﻐﻠﺔ ؟

- ﻣﺠﺮﻡ

- ﺍﻟﻤﺠﺮﻣﻴﻦ ﺍﻧﻮﺍﻉ ﺑﻴﻬﻢ ﺍﻟﻴﺘﺎﺟﺮ ﻣﺨﺪﺭﺍﺕ ﺑﻴﻬﻢ ﺍﻟﻴﺴﺮﻕ ، ﻣﺎﻟﻚ ﺷﻨﻮ ؟

- ﻗﺎﺗﻞ ﻣﺄﺟﻮﺭ ﺳﻴﺎﺳﻲ

- ﻭ ﺯﺍﻫﺮ ؟

- ﻧﺎﺋﺐ

- ﻳﻌﻨﻲ ﺳﻴﺎﺳﻲ

- ﺍﻱ

- ﻭ ﻣﺎﻟﻚ ﻣﺎﺟﻮﺭ ﺳﻴﺎﺳﻲ ﻳﻌﻨﻲ ﺍﻟﺤﺎﻝ ﻣﻦ ﺑﻌﻀﻪ ﻟﺠﻴﻦ ﺍﻣﺜﺎﻝ ﺯﺍﻫﺮ ﻫﻢ ﺍﻟﻠﻲ ﺻﻨﻌﻮ ﻣﺎﻟﻚ ﻭ ﻏﻴﺮﻩ ﻭ ﺩﺷﻮﻓﻴﻦ ﻳﻜﻮﻟﺞ ﺍﻛﺪﺭ ﺍﻧﻬﻲ ﻣﻮﺿﻮﻋﻪ ﻳﻌﻨﻲ ﻋﻨﺪﻩ ﺍﻟﻴﻜﺘﻠﻮﻥ ﺟﻮﺍ ﺍﻳﺪﻩ ﻭ ﻓﻲ ﺣﺎﻝ ﻳﻮﻡ ﻣﻦ ﺍﻻﻳﺎﻡ ﻭﻛﻔﺘﻲ ﺑﻮﺟﻬﻪ ﻣﻤﻜﻦ ﻳﺄﺫﻳﺞ ﺍﻟﺞ

ﻳﻌﻨﻲ ﺍﻧﺖ ﺑﻌﺪﺝ ﺍﺩﻭﺭﻳﻦ ﺑﻨﻔﺲ ﺍﻟﻤﺴﺘﻨﻘﻊ

ﻭ ﺧﻠﻪ ﺷﻐﻠﺔ ﺍﺑﺎﻟﺞ ، ﻣﺎﻟﻚ ﻳﻌﺮﻑ ﻛﻞ ﺩﺭﻭﺏ ﺫﻭﻟﻪ ﺍﻟﺴﻴﺎﺳﻴﻴﻦ ﻳﻌﻨﻲ ﻣﺴﺘﺤﻴﻞ ﻳﻜﺪﺭﻟﻪ

ﻟﺠﻴﻦ ﻫﺬﺍ ﻃﺎﻣﻊ ﺑﻴﺞ ﻭ ﻋﻨﺪﻩ ﻋﺎﺋﻠﻪ ﻳﻮﻣﻴﻦ ﻳﻤﻞ ﻣﻨﺞ ﻭ ﺯﻭﺟﺘﻪ ﺗﻜﻮﻟﻪ ﻃﻠﻜﻬﺎ ﻳﻄﻠﻜﺞ ﻭ ﻳﺨﻠﺺ ﻣﻨﺞ ﻭ ﻣﺠﺮﺩ ﻳﻨﺤﺴﺐ ﻋﻠﻴﺞ ﺯﻭﺍﺝ ﺛﺎﻧﻲ ﻭ ﻛﻠﻬﺎ ﺗﻀﻞ ﺗﻠﻮﻡ ﺑﻴﺞ

ﻣﺤﺪ ﻳﻜﻮﻝ ﺍﺯﻭﺍﺟﻬﺎ ﻗﺬﺭﻳﻦ، ﻻ ﻫﻲ ﺗﻀﻴﻊ ﺑﻴﺘﻬﺎ ﺑﺲ ﻋﻠﻤﻮﺩ ﺍﻟﺸﻬﺮﺓ ﻭ ﺳﻮﺍﻟﻒ ﺍﻻﻋﻼﻧﺎﺕ ﻣﺎ ﺗﺜﺒﺘﻠﻬﺎ ﻋﺪ ﺭﺟﺎﻝ

- ﺳﺪﻳﺘﻬﺎ ﻣﻦ ﻣﻞ ﺍﻟﻨﻮﺍﺣﻲ

- ﻫﺬﻩ ﺍﻟﺤﻘﻴﻘﺔ ﺍﻟﻠﻲ ﺩﺍ ﺍﻓﻜﺮﻟﺞ ﺑﻴﻬﺎ ﺑﺼﻮﺕ ﻋﺎﻟﻲ ﻋﻠﻤﻮﺩ ﺗﺴﺘﻮﻋﺒﻴﻬﺎ

ﺍﻟﺮﺟﺎﻝ ﺍﻟﻠﻲ ﻳﻜﻠﺞ ﺍﻧﻲ ﻣﺴﺘﻬﺪ ﺍﻗﺘﻞ، ﻫﺬﺍ ﻗﺎﺗﻞ ﻭ ﺍﻟﻘﺎﺗﻞ ﻣﺎ ﻳﺘﺄﻣﻦ ﻣﻮ ﺗﺄﻣﻨﻴﻨﻪ ﻋﻠﻰ ﻧﻔﺴﺞ ﻭ ﺑﻨﺘﺞ ﻫﻢ

- ﻳﻌﻨﻲ ﺍﺭﻓﻀﻪ ؟

- ﺑﻌﺪ ﺩﺍﻭﺭﻱ ﺍﻛﺘﻠﺞ ﻋﻠﻴﻪ ﺑﺪﻣﺎﻏﺞ ﻭ ﺷﻮﻓﻲ ﺍﻟﻴﻨﺎﺳﺒﺞ ﺧﺎﻑ ﺗﻜﻮﻟﻴﻦ ﺍﻣﻨﻌﺞ ، ﺍﻧﻲ ﻧﺼﺤﺘﺞ ﻭ ﺍﻧﺖ ﺷﻮﻓﻲ ﻟﺬﺍ ﺍﻟﻨﺼﻴﺤﺔ ﺍﺗﻨﺎﺳﺒﺞ

- ﻳﻌﻨﻲ ﺍﺧﺬﺕ ﻧﺼﻴﺤﺔ ﻣﺎﻣﺎ ﻭ ﺻﺪﻳﻘﺘﻲ ﻛﻠﻬﻢ ﺍﻳﺪﻭﻧﻲ ﺑﺲ ﺍﻧﻲ ﻣﺎ ﻣﺮﺗﺎﺣﺔ

- ﺍﻧﺘﻢ ﻧﺴﻮﺍﻥ ﻭ ﺍﻟﻨﺴﻮﺍﻥ ﺗﻔﻜﺮ ﺑﻌﻮﺍﻃﻔﻬﺎ، ﺍﻻ ﺍﻟﻠﻪ ﻟﻴﺶ ﺟﻌﻠﻪ ﺷﻬﺎﺩﺓ ﺭﺟﻞ ﻭﺍﺣﺪ ﺑﺸﻬﺎﺩﺓ ٢ ﻧﺴﻮﺍﻥ ؟ ﻏﻴﺮ ﺍﻟﺮﺟﻞ ﻳﻤﺘﻠﻚ ﻗﻮﺓ ﺍﻟﻌﻘﻞ ﻣﻮ ﺍﻟﻌﺎﻃﻔﺔ

ﻳﻜﺪﺭ ﻳﺤﻠﻞ ﻭ ﻳﺴﺘﻮﻋﺐ ﺍﻻﻣﻮﺭ ﺍﻟﻠﻲ ﻣﺎ ﺗﻜﺪﺭ ﺍﻟﻤﺮﺃﺓ ﺗﺴﺘﻮﻋﺒﻬﺎ ﺑﻌﺎﻃﻔﺘﻬﺎ، ﻭ ﺍﻟﺪﻟﻴﻞ ﻫﺴﻪ ﺍﻧﺖ ﺑﺎﻧﻴﻪ ﻗﺮﺍﺭﺝ ﻋﻠﻰ ﻋﺎﻃﻔﺔ ﺍﻣﻮﻣﻪ ﻭ ﺯﻭﺍﺟﺞ ﻣﻦ ﻫﺬﺍ ﺑﺪﺍﻋﻲ ﺗﺮﺟﻌﻴﻦ ﺑﻨﺘﺞ ﻣﻮ ﺑﺘﻌﻘﻞ ﻭﻻ ﺑﺸﻲﺀ ﻳﻘﻨﻊ ﻋﻘﻠﺞ

- ﻻ ﻛﻼﻣﻚ ﺻﺤﻴﺢ

- ﻛﻼﻣﻲ ﺻﺤﻴﺢ ﺑﺲ ﺍﻧﺖ ﻣﺎ ﻣﺮﺗﺎﺣﺔ

- ﺍﻧﻲ ﺑﺲ ﺍﺭﻳﺪ ﺑﻨﺘﻲ ﻣﺨﻠﺪ ﺗﻌﺒﺖ

ﺑﺠﻴﺖ، ﺍﺧﺬ ﺍﺩﻳﻪ : ﻛﺘﻠﺞ ﺧﻠﻲ ﻋﻴﻨﺞ ﺑﻌﻴﻦ ﺍﻟﻠﻪ، ﻟﻮ ﺳﻌﻴﺘﻲ ﺑﺄﺩﻳﺞ ﻭ ﺭﺟﻠﻴﺞ ﻭ ﺍﻟﻠﻪ ﻣﺎ ﻛﺎﺗﺒﻠﺞ ﺑﻨﺘﺢ ﻣﺎ ﺭﺍﺡ ﺗﺸﻮﻓﻴﻬﺎ ﻭ ﻟﻮ ﻛﺘﺒﻠﺠﻴﺎﻫﺎ ﻭﻛﺘﻬﺎ ﺍﻻﻛﺒﺮ ﻣﻦ ﻣﺎﻟﻚ ﻣﺎ ﻳﻜﺪﺭﻭﻥ ﻳﻤﻨﻌﻮﻥ ﺭﺟﻮﻋﻬﺎ ﺍﻟﺞ

.....

ﺷﻮﻛﺖ

- ﻛﺘﻠﺞ ﻟﻤﺎ ﺍﻟﻠﻪ ﻳﻜﺘﺒﻠﺞ ﺍﻧﺖ ﺍﺩﻋﻲ

- ﺍﻧﻲ ﻣﺎ ﺍﺩﻋﻲ ﻣﻮ ﺣﺘﻰ ﺍﻟﺪﻋﺎﺀ ﻣﻞ ﻣﻨﻲ ﻣﺨﻠﺪ ﺍﻧﺖ ﺷﺘﺤﺠﻲ

ﺩﻛﻮﻣﻲ ﻛﻮﻣﻲ ﺧﻞ ﻧﺎﺧﺬ ﻫﺎﻟﻠﺤﻢ ﺑﻌﺠﺒﻦ ﻭ ﻧﻄﻠﺐ ﺑﻌﺪ ﻭ ﻧﺮﻭﺡ ﻧﺎﻛﻠﻬﻢ ﻭﻳﺎ ﺍﻷﻫﻞ

- ﺍﻣﻚ ﻣﺎ ﺍﺣﺠﻲ ﻭﻳﺎﻫﺎ

- ﻭﻟﺞ ﻣﻦ ﻳﻤﺘﻰ ﺍﻧﺖ ﺣﻘﻮﺩﺓ ؟

- ﻻ ﻣﻮ ﺍﺧﺎﻑ ﺗﺴﻮﻳﻠﻲ ﻣﺸﻜﻠﺔ

- ﺩﻛﻮﻣﻲ ﻟﺞ ﻋﺎﺩ ﻟﺨﺎﻃﺮ ﺍﺑﻮﻳﺔ ﻳﻼ، ﻣﻌﻠﻴﺞ ﺑﺄﻣﻲ

ﻛﻤﻨﺎ ﺍﻧﻲ ﻭﻳﺎﻩ ﺭﺣﻨﺎ ﻟﻠﺒﻴﺖ ﻓﺘﺖ ﺳﻠﻤﺖ ﻋﻠﻰ ﻋﻤﻲ ﻭ ﻋﻠﻴﻬﻢ ﻛﻠﻬﻢ، ﻫﻲ ﺳﻠﻤﺖ ﻋﻠﻴﻬﺎ ﻣﻦ ﺑﻌﻴﺪ : ﺷﻠﻮﻧﺞ ﻋﻤﻪ

ﺳﻠﻤﺖ ﻋﻠﻴﻪ ﻣﻦ ﻭﺭﻩ ﺧﺸﻤﻬﺎ

ﻛﻌﺪﻧﺎ ﻧﺎﻛﻞ ﺍﺣﻨﺎ ﻭ ﺍﻟﺠﻬﺎﻝ ﻭ ﻫﻮﺳﺔ ﻭ ﻃﻴﺒﺔ ﻭ ﻣﺎﺯﻥ ﻭ ﺳﻮﺍﻟﻔﻬﻢ ﺗﻤﻮﺕ ﺿﺤﻚ ..

ﺛﺎﻧﻲ ﻳﻮﻡ ﺯﺭﺕ ﻗﺒﺮ ﺑﺎﺑﺎ ﻭ ﻃﻠﻌﺖ ﻷﺭﺑﻴﻞ ، ﻣﺨﻠﺪ ﻛﺎﻝ ﻛﻢ ﻳﻮﻡ ﻭ ﺍﺗﺒﻌﺞ ﺍﺭﻳﺪ ﺍﺧﺬ ﺍﺟﺎﺯﺓ ﻭ ﺍﺭﺗﺎﺣﻠﻲ ﺍﻳﺎﻡ ﺑﺄﺭﺑﻴﻞ ﺗﻌﺒﺖ ﻣﻦ ﻫﻮﺳﺔ ﺍﻟﺸﺮﻃﺔ ﻭ ﺍﻟﺸﻐﻞ ﺍﺭﻳﺪ ﺍﻧﻔﻪ ﻧﻔﺴﻲ

ﻛﺘﻠﻪ : ﻫﻼ ﺑﻴﻚ

ﺭﺣﺖ ﻷﺭﺑﻴﻞ ، ﺧﺎﺑﺮﺕ ﻣﺎﻣﺎ ﻭ ﺣﺠﻴﺘﻠﻬﺎ ﺑﺮﺃﻱ ﻣﺨﻠﺪ ﻛﺎﻟﺖ : ﻫﻢ ﺻﺤﻴﺢ ﻛﻼﻣﻪ

- ﻳﻌﻨﻲ ﺍﺧﺎﺑﺮ ﺍﻟﻨﺎﺋﺐ ﻭ ﺍﻧﻄﻲ ﺭﻓﺾ

- ﺭﻓﻀﻲ ﻭ ﺍﻟﻠﻪ ﻳﻜﺘﺒﻠﺞ ﺍﻟﻠﻲ ﺑﻴﻪ ﺍﻟﺨﻴﺮ

... ﻭ ﺍﻧﻄﻴﺖ ﺭﻓﺾ ﻟﻠﻨﺎﺋﺐ ﻭ ﺑﻌﺜﺘﻠﻪ ﻭ ﻭﺍﺗﺴﺎﺏ ﺍﻥ ﺍﻧﺖ ﺍﻧﺖ ﺭﺟﻞ ﻧﺒﻴﻞ ﻭ ﺍﻟﻒ ﺍﻧﺴﺎﻧﻪ ﺗﺘﻤﻨﻰ ﺗﺮﺗﺒﻂ ﺑﻴﻚ ﺑﺲ ﺍﻧﻲ ﺍﺑﺪﺍ ﻣﺎ ﻣﻔﻜﺮﺓ ﺑﺎﻟﺰﻭﺍﺝ ﺣﺎﻭﻟﺖ ﻭ ﻣﻜﺪﺭﺕ ﻷﻥ ﺍﻭﻝ ﺗﺠﺮﺑﺔ ﺧﻠﺘﻨﻲ ﺍﻧﻬﻲ ﻫﺎﻟﻤﻮﺿﻮﻉ ﺑﺮﺍﺳﻲ

ﻭ ﻣﻦ ﻫﺎﻟﻜﻼﻡ ...

ﻓﺘﺮﺓ ﺍﻟﺘﻬﻴﺖ ﺑﻴﻬﺎ ﺑﻨﻔﺴﻲ ﺑﺸﻐﻠﻲ، ﺣﺘﻰ ﺍﻧﺴﻰ ﺑﻨﺘﻲ، ﺻﺎﻟﻮﻧﺎﺕ ﻣﺮﺍﻛﺰ ﺗﺠﻤﻴﻞ ﻭ ﻟﻠﻌﻨﺎﻳﺔ ﺍﺑﺸﺮﺗﻲ ﻭ ﺑﻘﻴﺖ ﻣﻬﻮﻭﺳﺔ ﺑﺮﻭﺣﻲ ﻭ ﺍﺷﻐﻞ ﻧﻔﺴﻲ ﺑﻬﺎﻻﻣﻮﺭ ﺣﺘﻰ ﺍﻧﺴﺎﻫﺎ ﺑﺲ ﻛﻞ ﻣﺎ ﺗﺰﻳﺪ ﺍﻳﺎﻣﻲ ﻳﺰﻳﺪ ﺷﻮﻗﻲ ﺍﻟﻬﺎ

ﺗﺒﻘﻰ ﻧﺎﺭ ﻭ ﺗﺴﻌﺮ ﺑﺪﺍﺧﻠﻲ ﻭ ﻃﻔﻰ ﻛﻠﺸﻲ ﺑﺪﺍﺧﻠﻲ ﻭ ﺷﻮﻗﻲ ﺍﻟﻬﺎ ﻣﺪﺍ ﻳﻄﻔﻰ ، ﺍﺑﻘﻰ ﺍﻟﻠﻴﻞ ﺍﺧﻠﺼﻪ ﺍﺩﺧﻦ ﻭ ﺍﺑﺠﻲ ﻋﻠﻴﻬﺎ

ﺍﺣﺴﻬﺎ ﺿﺎﻋﺖ ﻣﻨﻲ ﺧﻠﺺ،

ﺑﺲ ﺑﻌﺪﻳﻦ ﺍﺗﺬﻛﺮﺕ ﺍﻫﻠﻪ ﺍﺧﺎﺑﺮﻫﻢ ﺍﺧﺎﺑﺮ ﺍﺑﻮﻩ ﺑﻠﻜﻲ ﻳﻜﺪﺭ ﻳﺤﺠﻲ ﻭﻳﺎﻩ ﺍﻭ ﺣﺘﻰ ﻳﻨﻄﻴﻨﻲ ﺭﻗﻤﻪ ﻳﺨﻠﻴﻨﻲ ﺍﺷﻮﻑ ﺑﻨﺘﻲ ﺍﻭ ﺍﺣﺠﻲ ﻭﻳﺎﻫﺎ

ﺍﺧﺬﺕ ﺭﻗﻢ ﺍﺑﻮﻩ ﻣﻦ ﺻﺪﻳﻖ ﻋﻨﺪﻱ ﻳﻌﺮﻓﻪ، ﺧﺎﺑﺮﺗﻪ ﻭ ﺣﺠﻴﺘﻠﻪ

- ﻛﺎﻝ ﺍﻧﻲ ﻣﺎ ﻋﻨﺪﻱ ﻭﻟﺪ ﺍﺳﻤﻪ ﻣﺎﻟﻚ ﺗﺒﺮﻳﺖ ﻣﻦ ﻋﻨﺪﻩ ﻣﻦ ﺯﻣﺎﺍﺍﻥ

- ﺯﻳﻦ ﻋﻤﻮ ﺑﺲ ﺍﻧﻄﻴﻨﻲ ﺭﻗﻤﻪ ﺍﺫﺍ ﺗﻌﺮﻓﻪ ﻓﺪﻭﺓ ﺑﺲ ﺍﺧﺎﺑﺮﻩ ﻟﻠﻜﻲ ﻳﺨﻠﻴﻨﻲ ﺍﺳﻤﻊ ﺻﻮﺕ ﺑﻨﺘﻲ

- ﻫﺴﻪ ﺍﺑﻌﺜﻠﺞ ﺭﻗﻤﺔ ﻭ ﺍﺗﻤﻨﻰ ﺑﻌﺪ ﻣﺎ ﺗﺘﺼﻠﻴﻦ ﺑﻴﻪ

- ﻣﺎﺷﻲ

ﺍﺧﺬﺕ ﺍﻟﺮﻗﻢ ﻭ ﺩﻛﻴﺖ ﻋﻠﻰ ﻣﺎﻟﻚ ، ﺭﻥ ﺭﻥ ﻣﺎ ﺟﺎﻭﺏ ﺭﺟﻌﺖ ﺩﻛﻴﺖ ﻣﺮﻩ ﺛﺎﻧﻴﺔ : ﺟﺎﻭﺏ

- ﺍﻟﻮ

- ﻣﺎﻟﻚ ﺍﺭﻳﺪ ﺑﻨﺘﻲ

- ﻫﺎﻱ ﺍﻧﺖ

...

ﻣﺎﻟﻚ ﺍﻟﻠﻪ ﻳﺨﻠﻴﻚ ﺑﺲ ﺳﻤﻌﻨﻲ ﺻﻮﺗﻬﺎ

- ﺩﺍ ﺍﺣﺠﻲ ﻭﻳﺎﻩ ﻭ ﻫﻲ ﺣﺠﺖ ‏( ﺑﺎﺑﺎ ﻧﻨﻲ ﻭﻳﻨﺎ ‏)

ﻛﻤﺖ ﺍﺑﺠﻲ ﺣﻴﻞ : ﺧﻠﻴﻨﻲ ﺍﺣﺠﻲ ﻭﻳﺎﻩ ﺍﻧﻄﻴﻬﺎ ﺍﻟﻔﻮﻥ ﻓﺪﻭﺓ

- ﺗﻌﺎﻟﻲ ﻳﺤﻠﻮﺓ ﺗﻌﺎﻟﻲ ، ﺍﻧﺖ ﺗﺮﻳﺪﻳﻦ ﻧﻨﻲ ﻟﻮ ﻣﺎﻣﺎ

- ﻧﻨﻲ

- ﺷﻔﺘﻲ ؟ ﻣﺪﺍ ﺗﺮﻳﺪﺝ ﺗﺮﻳﺪ ﺍﻣﻬﺎ ﺍﻟﺜﺎﻧﻴﺔ

- ﺑﻴﻼ ﻣﺎﻣﺎ ﺗﺴﻤﻌﻴﻨﻲ

ﺍﻧﻄﻰ ﺍﻟﺠﻬﺎﺯ ﺍﻟﻬﺎ ﻭ ﻛﺎﻝ ﺍﻟﻬﺎ : ﺍﺣﺠﻲ

ﻫﻲ ﻛﺎﻟﺖ ﺍﻟﻮ ﻟﻮ ﺍﻧﻲ ﺩﻣﻮﻋﻲ ﻋﺸﺮﺓ ﻋﺸﺮﺓ ﺍﺭﻳﺪ ﺍﺣﺠﻲ ﻣﺎ ﺍﻛﺪﺭ، ﻭ ﻫﻲ ﺗﻜﻮﻝ : ﻫﻴﺪﻱ ﺗﺒﻜﻲ ﺑﺎﺑﺎ

- ﺑﻴﻼ ﺍﻧﻲ ﻣﺎﻣﺎ ﻟﺠﻴﻦ ﺍﺷﻮﻧﺞ ﻳﻤﺎﻣﺎ ﻣﺸﺘﺎﻗﺘﻠﺞ ﻛﻮﻣﻪ ﻓﺪﻭﻩ ﺍﻟﺼﻮﺗﺞ ﻭﻻﻧﻔﺎﺳﺞ ﺣﻴﺎﺗﻲ

ﺑﻘﻴﺖ ﺍﺣﺠﻲ ﻭﻳﺎﻫﺎ ﻭ ﺍﺑﺠﻲ ﺷﻮﻳﺔ ﻭ ﺍﺧﺬﻩ ﻣﻨﻬﺎ ﻭ ﻛﺎﻝ : ﻳﻼ ﺻﺎﺭ ﻻﺯﻡ ﺗﻨﺎﻡ

- ﻣﺎﻟﻚ ﺑﺪﺍﻋﺖ ﻛﻞ ﻏﺎﻟﻲ ﻋﻨﺪﻙ ﺍﺷﻮﻧﻬﺎ ﺍﺷﻮﻥ ﻭﺿﻌﻬﺎ .

- ﺯﻳﻨﻪ ﻭ ﻧﺎﺳﻴﺘﺞ ﺗﻤﺎﻣﺎ ﻣﻔﻜﺮﺓ ﻧﻨﻲ ﺯﻭﺟﺘﻲ ﺍﻟﻠﺒﻨﺎﻧﻴﺔ ﻫﻲ ﺍﻣﻬﺎ ﻭ ﻣﺘﻌﻠﻘﺔ ﺑﻴﻬﺎ

- ﺑﺲ ﻫﺬﻩ ﺑﻨﺘﻲ

- ﻳﻼ ﺭﻭﺣﻲ ﻛﺎﻓﻲ ﺧﻠﻴﺘﺞ ﺗﺤﺠﻴﻦ ﻭﻳﺎﻫﺎ

.. ﻭ ﻗﻔﻞ ﺍﻟﺠﻬﺎﺯ ﺑﻮﺟﻬﻲ

ﺑﻘﻴﺖ ﺍﻟﻠﻴﻞ ﻛﻠﻪ ﺍﺑﺠﻲ ﻟﻮﺟﻪ ﺍﻟﺼﺒﺢ ﻳﻼ ﻧﻤﺖ

ﺍﻧﺪﻙ ﺍﻟﺒﺎﺏ ﺍﻟﺼﺒﺢ ، ﻛﻤﺖ ﻓﺘﺤﺖ ﺍﻟﺒﺎﺏ ﻟﻜﻴﺘﻪ ﻣﺨﻠﺪ

ﻛﻠﺘﻠﻪ ﻫﻠﻮ ﻣﺨﻠﺪ ﻭ ﻓﺘﺖ

- ﻫﺎﻱ ﺷﺒﻴﺞ ﺷﻮ ﻋﻴﻮﻧﺞ ﻣﻮﺭﻭﻣﻪ

- ﻣﺸﺎﺑﻌﺔ ﻧﻮﻡ

ﻭﺭﺟﻌﺖ ﻟﻔﺮﺍﺷﻲ ﻧﻤﺖ ، ﺍﺟﺎ ﻭﺭﺍﻳﺎ ، ﻛﻌﺪ ﻉ ﺍﻟﺴﺮﻳﺮ ﻳﺒﺎﻭﻋﻠﻲ ﻭ ﺍﻧﻲ ﻧﺎﻳﻤﻪ ، ﻭ ﺍﻧﻲ ﻣﻐﻤﻀﺔ ﺣﺠﻴﺖ : ﺧﺎﺑﺮﺕ ﻣﺎﻟﻚ ﻭ ﺧﻼﻧﻲ ﺍﺣﺠﻲ ﻭﻳﺎ ﺑﻴﻼ

- ﻭ ﻫﺬﺍ ﺍﻟﺴﺒﺐ ﺍﻟﻠﻲ ﻣﺒﺠﻴﺞ !

- ﺍﻣﻤﻢ

- ﻗﺮﺭﺕ ﻗﺮﺍﺭ

- ﻭ ﻫﻮ ؟

- ﺍﺳﺎﻓﺮ ﻟﻤﺎﻣﺎ ﻭ ﺍﻃﻠﺐ ﻟﺠﻮﺀ ﻫﻨﺎﻙ ﻭ ﺍﻋﻴﺶ ﻳﻤﻬﺎ

- ﻫﺎﺍﺍ

- ﻭ ﻫﺬﺍ ﺍﻟﻘﺮﺍﺭ ﻋﺎﻃﻔﻲ ﻫﻢ

- ﻻ ﺑﺲ ﺑﻌﺪ ﺷﺒﻘﺎﻟﻲ ﻫﻨﺎ

- ﻫﻤﻤﻢ

- ﻧﺎﻣﻲ ﻟﻮ ﺟﻌﺖ ﻣﺎ ﺍﺧﺠﻞ ﺍﻣﺪ ﺍﻳﺪﻱ ﻭ ﺍﻛﻞ

ﻟﻔﻴﺖ ﺭﺍﺳﻲ ﻭ ﺩﺭﺕ ﺍﻧﺎﻡ ﻫﻮ ﺑﻘﻰ ﻳﻤﺴﺢ ﻋﻠﻰ ﺷﻌﺮﻱ

- ﺗﻀﺎﻳﻘﺖ ﻣﻮ

ﺗﻨﻬﺪ : ﻫﻪ ﺗﻌﻮﺩﺕ ﺑﻌﻤﺮﺝ ﻣﺎ ﺣﺎﺳﺒﺘﻠﻲ ﺍﺣﺴﺎﺏ ﺑﺲ ﻛﻠﺒﻲ ﻳﻤﺞ ﻃﻔﻞ ﺷﻤﺎ ﺳﻤﻊ ﺑﻴﺞ ﻳﻔﺰ ، ﻭ ﻳﺪﻭﺭﺝ ﺑﻜﻞ ﻣﻜﺎﻥ ، ﻳﻌﺒﺮ ﺍﻟﻤﺴﺎﻓﺎﺕ ﺣﺘﻰ ﻳﺠﻲ ﻳﻄﻤﻦ ﻋﻠﻴﺞ

ﺑﺲ ﺍﺳﺄﻝ ﺭﻭﺣﻲ ﺍﻟﻰ ﻣﺘﻰ ﺍﺑﻘﻰ ﺷﺎﻳﻞ ﻫﻤﺞ، ﺷﻮﻛﺖ ﺍﻧﺴﻰ ﻭ ﺍﻃﻠﻌﺞ ﻣﻦ ﺑﺎﻟﻲ ، ﺷﻮﻛﺖ ﺍﻋﻴﺶ ﻭ ﻣﺎ ﺍﻓﻜﺮ ﻭ ﺍﻛﻮﻝ ﺗﻌﻮﺩ ﻭ ﺗﺮﺟﻌﻠﻲ

ﺣﺒﻲ ﺍﻟﺞ ﺣﺐ ﺍﻡ ﻟﻄﻔﻠﻬﺎ ﺷﻠﺘﺞ ﺑﺪﺍﺧﻠﻲ ﻭ ﺍﻧﺖ ﻫﻠﻜﺪﺝ ﺑﺲ ﻣﺎ ﺣﻀﻴﺖ ﺑﻴﺞ ﺑﻴﻮﻡ

ﻟﺰﻣﺖ ﺍﻳﺪﻩ ﻋﺼﺮﺗﻬﺎ ﻭ ﺑﻘﻴﺖ ﺑﻨﻮﻣﺘﻲ ﻣﻜﻤﻠﻪ

ﻋﺎﻓﻨﻲ ﻭ ﻛﺎﻡ ﺍﻧﻲ ﺑﻘﻴﺖ ﻧﺎﻳﻤﻪ ﺑﻤﻜﺎﻧﻲ ﻟﻠﻌﺼﺮ ﻳﻼ ﻛﻌﺪﺕ

ﻟﻜﻴﺘﻪ ﻧﺎﻳﻢ ﺑﺎﻟﺼﺎﻟﺔ، ﺗﻘﺮﺑﺖ ﻣﻨﻪ ﻋﻠﻰ ﻛﻴﻒ ، ﺍﺧﺬﺕ ﺧﺼﻠﺔ ﻣﻦ ﺷﻌﺮﻱ ، ﻭ ﻟﻌﺒﺖ ﺑﻮﺟﻬﻪ ، ﺑﻌﺪ ﻫﻴﺞ ﺑﺄﻳﺪﻩ ﺿﺤﻜﺖ ، ﺭﺟﻌﺖ ﺳﻮﻳﺖ ﻛﺎﻡ ﻳﻬﻔﻲ ﻋﺒﺎﻟﻪ ﺫﺑﺎﻥ

ﺭﺟﻌﺖ ﺳﻮﻳﺖ ﻟﺰﻡ ﺑﺴﺮﻋﻪ ﻭ ﻛﺎﻡ

........

ﻫﺎﻱ ﺍﻧﺖ ﺑﻨﺖ ﺍﻟﻜﻠﺐ ﻣﺘﺸﻮﻓﻴﻨﻲ ﻧﺎﻳﻢ

- ﻭﻟﻚ ﻣﻨﻮ ﻫﺎﻱ ﺑﻨﺖ ﺍﻟﻜﻠﺐ ﺗﻮﺏ ﺗﻐﻠﻂ ﻋﻠﻰ ﺑﺎﺑﺎ ﺗﻮﻭﻭﻭﻭﺏ ، ﻭﺑﻌﺪﻳﻦ ﺷﻨﻮ ﻧﺎﻳﻢ ، ﻗﺎﺑﻞ ﺍﻧﺖ ﺟﺎﻱ ﺍﺭﺑﻴﻞ ﺗﻨﺎﻡ ﻟﻮ ﺗﻄﻠﻊ ﺗﺘﻮﻧﺲ

- ﺷﻤﺪﺭﻳﻨﻲ ﺷﻔﺘﺞ ﻧﺎﻳﻤﻪ ﺿﺮﺑﺘﻨﻲ ﺍﻟﻨﻮﻣﻪ ﻛﺎﻋﺪﻩ ﻣﻦ ﺍﻟﺼﺒﺢ ﻣﺘﻌﻨﻴﻠﺞ

- ﺍﻭﻭﻭﻱ

- ﺷﻔﺎﻳﺪﺕ ﺍﻻﻭﻭﻭﻱ ﻭ ﺍﺣﻨﺎ ﻣﻤﺤﺼﻠﻴﻦ ﺷﻲ

- ﻛﻮﻡ ﺧﻞ ﻧﻄﻠﻊ ﻧﻔﺘﺮ ﺷﻮﻳﻪ ﺣﺘﻰ ﻧﺎﻛﻞ ﺑﺮﺍ

- ﺷﻠﻮﻥ ﻣﻌﺰﺑﻪ ﺟﺎﻳﺞ ﺧﻄﺎﺭ ﻭ ﺗﻮﻛﻠﻴﻨﻪ ﺑﺮﺍ

- ﺷﻮﻑ ﻣﻨﻮ ﺍﻟﺨﻄﺎﺭ ﻳﺎﻟﻠﻪ ﻫﻢ ﺣﺎﺳﺐ ﻧﻔﺴﻪ ﺧﻄﺎﺭ ﺩﻛﻮﻡ ﻛﻮﻡ

- ﺍﺥ ﻣﻦ ﺍﻟﺴﺎﻧﺞ ﻻ ﺍﻧﺖ ﻭﻻ ﻛﺮﺟﻴﻪ ﺍﺛﻨﻴﻨﺠﻦ ﻣﺎ ﺍﻛﺪﺭ ﻟﻠﺴﺎﻧﺎﺗﺠﻦ

- ﻫﻬﻬﻬﻬﻬﻬﻪ ﻳﻼ ﺍﻛﻮﻡ ﺍﺑﺪﻝ ﻭ ﺍﺭﺟﻌﻠﻚ

ﻛﻤﺖ ﺑﺪﻟﺖ ﻭ ﻃﻠﻌﻨﺎ ﺍﻧﻲ ﻭﻳﺎﻩ ﺗﻌﺸﻴﻨﺎ ﻫﻮ ﻏﺪﺍ ﻫﻮ ﻋﺸﺎ ﻫﻮ ﺭﻳﻮﻙ .. ﻭ ﺍﻓﺘﺮﻳﻨﺎ ﺷﻮﻱ ﻭ ﺭﺟﻌﻨﺎ ﻟﻠﺒﻴﺖ ، ﺑﺪﻟﺖ ﻭ ﺳﻮﻳﺖ ﺷﺎﻣﻴﻪ ﻭ ﺷﻐﻠﻨﺎ ﻓﻠﻢ

ﺟﺎﻥ ﺍﻟﻔﻠﻢ ﺭﻭﻣﺎﻧﺴﻲ ﻋﻠﻰ ﺍﻟﺮﻏﻢ ﻫﻮ ﻓﻠﻢ ﺍﻛﺸﻦ، ﻫﻮ ﻛﻞ ﺷﻮﻱ ﻳﺪﻭﺭ ﻭﺟﻬﻪ ﻟﻮ ﻳﺤﻚ ﺑﻜﺼﺘﻪ، ﺷﻔﺖ ﺍﻟﻔﻠﻢ ﻣﺎ ﻓﺎﺩﻧﻲ ﻛﻤﺖ ﺍﺧﺬﺕ ﺍﻟﻜﻮﺍﺑﻪ ﻭ ﺳﻠﺔ ﺍﻟﺸﺎﻣﻴﺔ

ﺣﺴﻴﺘﻪ ﺍﺟﺎ ﻭﺭﺍﻳﺎ ، ﺩﺍ ﺍﺭﻳﺪ ﺍﻧﻈﻔﻬﻢ ﻉ ﺍﻟﺴﻨﻚ، ﺟﺘﻦ ﻣﺨﻠﺪ ﻳﻤﺪ ﺍﺩﻳﻪ ﻋﻠﻰ ﺧﺼﺮﻱ ﻭ ﻭﮔﻒ ﻭﺭﺍﻳﺎ ﻭﻗﺮﺏ ﺭﺍﺳﻪ ﻳﻢ ﺭﺍﺳﻲ ﻭ ﻫﻤﺲ : ﻣﺎ ﻛﺎﻓﻲ ﺭﺣﻤﻲ ﺑﺤﺎﻟﻲ ، ﻟﺞ ﻭﺍﻟﻠﻪ ﺍﻋﺸﻜﺞ ﻭ ﺍﺭﻳﺪﺝ ﺷﻮﻛﺖ ﺗﺼﻴﺮﻳﻦ ﺍﻟﻲ ، ﻟﺞ ﺟﻴﺶ ﻧﺴﻮﺍﻥ ﻣﺎ ﻳﻤﻠﻮﻥ ﻓﺮﺍﻏﺞ ﺑﻴﻪ ﻛﺎﻓﻲ ﺣﺴﻲ ﺑﻴﻪ

- ﻣﺨﻠﺪ

- ﺷﺸﺸﺶ ﻛﺎﻓﻲ ﺗﺤﻤﻠﺖ ﻫﻮﺍﻳﻪ ، ﻟﻮ ﺑﺲ ﺍﻛﺪﺭ ﺍﻧﺴﺎﺝ ﺯﻳﻦ ﺑﺲ ﺍﻧﻲ ﻣﺎ ﺟﺎﻱ ﺍﻓﻬﻢ ﻟﻴﺶ ﻣﺎ ﺗﺮﻳﺪﻳﻨﻲ ، ﺷﻨﻮ ﺍﻟﺒﻴﻪ ﻣﺎ ﻋﺠﺒﺞ

- ﻣﺎ ﺍﻛﺪﺭ ﻣﺨﻠﺪ

- ﺷﻨﻮ ﺍﻟﻠﻲ ﻣﺎ ﺗﻜﺪﺭﻳﻠﻪ

- ﺍﻟﺘﻔﺘﺖ ﺩﺍ ﺍﺭﻳﺪ ﺍﺣﺠﻲ، ﻣﺪ ﺍﻳﺪ ﻭﺭﺍ ﺧﺼﺮﻱ ﻗﺮﺑﻨﻲ ﻣﻨﻬﻮ ﻭ ﺍﻳﺪ ﺳﺤﺐ ﺭﺍﺳﻲ ﻭ ﻗﺮﺏ ﺷﻔﺘﻪ ﻫﻮ ﻳﺒﻮﺱ ﺑﺸﻔﺘﻲ ﺑﻠﻬﻔﺔ، ﺍﺣﺎﻭﻝ ﺍﺩﻓﻌﻪ ﻣﻦ ﻋﻨﺪﻱ ﻣﺎ ﺩﻳﻮﺧﺮ

ﺑﻘﻰ ﻣﺴﺘﻤﺮ

ﺑﻌﺪﺗﻪ ﻣﻦ ﻋﻨﺪﻱ ﻭ ﻃﻠﻌﺖ ﻟﻠﻐﺮﻓﻪ ،ﺳﺤﺒﻨﻲ : ﻛﺎﻓﻲ ﻟﺠﻴﻦ ، ﺣﺴﻲ ﻋﺎﺩ ، ﻟﺞ ﺷﺘﺮﻳﺪﻳﻦ ﺍﻛﺜﺮ ﻣﻦ ﺍﺣﺒﺞ ﻟﺞ ﻣﺴﺘﻌﺪ ﺑﻜﻞ ﺍﻟﺘﻤﺄﻣﺮﻳﻦ ﺑﻴﻪ ﺷﺘﺮﺩﻳﻦ ﺑﻌﺪ ﻛﺎﻓﻲ ، ﻟﺞ ﻋﺬﺑﺘﻴﻨﻲ

- ﻣﺨﻠﺪ

- ﺍﻧﻌﻞ ﺍﺑﻮ ﻣﺨﻠﺪ ﻭﻟﺞ ﺟﻨﻨﺘﻴﻨﻲ ﺗﺎﻟﻲ ﺗﻜﻮﻟﻴﻠﻲ ﺍﺭﻳﺪ ﺍﺳﺎﻓﺮ ﻭ ﺍﻧﻲ ؟ ﻟﺞ ﺳﺎﻋﻪ ﺍﻟﻜﺎﻟﺘﻠﻲ ﻣﺮﺗﻲ ﺍﺭﻳﺪ ﺍﻟﻄﻼﻙ ﺭﻛﺼﺘﻠﻬﺎ ﺑﺠﻔﻴﻪ ﺣﺘﻰ ﻣﺎ ﻳﺒﻘﻰ ﺷﻲ ﻳﻤﻨﻌﻨﻲ ﻋﻨﺞ ﻭ ﺑﻌﺪﺝ ﻣﻮ ﺍﻟﻲ ﻟﻴﺶ

ﻟﻴﺶ ﻛﻞ ﻭﺍﺣﺪ ﻳﺨﻄﺒﺞ ﺗﻔﻜﺮﻳﻦ ﺑﻴﻪ ﺑﺲ ﺍﻧﻲ ﻻ ، ﻟﻴﺶ ﻷﻥ ﺣﺒﻴﺘﺞ ﺑﺸﺮﻑ

ﻟﺞ ﻛﺎﻓﻲ ﻣﻮ ﻋﺬﺑﺘﻴﻨﻲ ﺩﻣﺮﺗﻴﻨﻲ ﻭﺍﻟﻠﻪ

ﺣﺠﺎﻫﺎ ﻭ ﺑﺠﻰ ، ﺭﺟﻌﺘﻠﻪ ﻣﻦ ﻛﻞ ﻋﻘﻠﻚ ﻣﺨﻠﺪ ، ﺗﺒﺠﻲ ﺷﺒﻴﻚ

ﺩﻓﻌﻨﺐ ﻣﻦ ﻋﺪﻧﻪ : ﻭﺧﺮﺭﺭﻱ ﺗﺬﻟﻴﻨﻲ ﻭ ﺗﻜﻠﻴﻠﻲ ﺷﺒﻴﻚ ﺑﺲ ﻻ ﺗﻈﻨﻴﻦ ﻛﻞ ﻋﻤﺮﻱ ﺍﺑﻘﻰ ﻣﺬﻟﻮﻝ ﺍﻟﺞ، ﻛﺪﺍﻣﺞ ﺑﺲ ﻫﺎﻟﻠﺤﻈﺔ ﺗﻘﺮﺭﻳﻦ ﺍﻱ ﻟﻮ ﻻ ﺑﻌﺪﻫﺎ ﻭﺍﻟﻠﻪ ﺗﺤﺮﻣﻴﻦ ﻋﻠﻴﻪ ﻭ ﺑﻌﻤﺮﺝ ﻣﺎ ﺗﺸﻮﻓﻴﻦ ﻫﺎﻟﻮﺟﻪ ﺑﻌﺪ ﻭﻋﺪ

- ﻣﺨﻠﺪ . ﺷﺒﻴﻚ

- ﻣﻮﺍﻓﻘﺔ ﻧﺘﺰﻭﺝ ﻟﻮ ﻻ

- ﻣﺨﻠﺪ ﺻﻮﺗﻚ ﺍﻟﺸﻘﺔ ﻣﺴﻤﻮﻋﻪ

- ﺍﻧﻌﻞ ﺍﺑﻮ ﺍﻟﺸﻘﺔ ، ﺟﺎﻭﺑﻲ

- ﻣﺨﻠﺪ

ﺿﺮﺏ ﺍﻟﺼﻴﻨﻴﻪ ﺍﻟﻌﻠﻰ ﺍﻟﺴﻨﻚ ﺑﻴﺪﻩ ﻛﺴﺮ ﺍﻟﻜﻮﺍﺑﻪ ﻭ ﻃﺸﺮﻫﻢ ﻭ ﺗﻮﺟﻪ ﻃﻠﻊ ﻣﻦ ﺍﻟﻤﻄﺒﺦ

ﺭﺣﺖ ﻭﺭﺍﻩ ، ﻣﺨﻠﺪ ﻭﻳﻦ ، ﺍﺧﺬ ﺳﻮﻳﺞ ﺳﻴﺎﺭﺗﻪ ﻭ ﺑﺎﻛﻴﺖ ﺟﻜﺎﻳﺮﺓ ﻭ ﺟﻨﻄﺘﻪ ﻭ ﻭ ﺭﺍﺩ ﻳﻄﻠﻊ

- ﻭﻛﻔﺖ ﻛﺒﺎﻝ ﺍﻟﺒﺎﺏ : ﻻ ﺗﻄﻠﻊ ﺍﻧﻄﻴﻨﻲ ﻣﻬﻠﻪ ﺍﻓﻜﺮ

- ﺟﻮﺍﺑﺞ ﻣﻌﺮﻭﻑ ﻣﺎ ﻳﺤﺘﺎﺝ ﻭﺧﺮﻱ ﻣﻨﻲ

- ﻣﺨﻠﺪ ﺍﺧﺎﻑ ﻣﺎ ﺍﻛﺪﺭ ﺍﺣﺒﻚ، ﻭﺍﻟﻠﻪ ﺍﻧﻲ ﻣﻦ ﻣﺎﻟﻚ ﺗﻌﺒﺖ

ﺍﺧﺬ ﻧﻔﺲ ﻭ ﺩﺍﺭ ﻭﺟﻬﻪ : ﺍﻧﻲ ﻣﺎﻟﻚ ؟

- ﻻ ﺑﺲ ﺍﻧﻲ ﺗﻌﺒﺖ ﺍﻟﺸﻔﺘﻪ ﺧﻼﻧﻲ ﺍﻛﺮﻩ ﺷﻲ ﺍﺳﻤﻪ ﺣﺐ ﻭ ﺯﻭﺍﺝ ﻭ ﻣﻞ ﻭﺍﺣﺪ ﻓﻜﺮﺕ ﺍﻭﺍﻓﻖ ﻋﻠﻴﻪ ﻟﻤﺼﻠﺤﺔ ﻻ ﺍﻛﺜﺮ ﻭﺍﻟﻠﻪ ﻣﺎ ﻓﻜﺮﺕ ﺑﺄﺣﺪ ﺣﺐ ﺍﺑﺪ

- ﺟﺮﺑﻲ

- ﻭ ﺍﺫﺍ ﻓﺸﻠﺖ

- ﺧﻠﻴﻨﺎ ﻧﺠﺮﺏ ﻧﺘﺰﻭﺝ ﻟﻤﺪﺓ ﺍﺳﺒﻮﻉ ﻧﺠﺮﺏ ﻧﻔﺴﻨﺎ ﺑﺪﻭﻥ ﻧﺎ ﺍﺣﺪ ﻳﻌﺮﻑ ﺍﺫﺍ ﺷﻔﺘﻲ ﻧﻔﺴﺞ ﻣﺎ ﺗﻜﺪﺭﻳﻦ ﺍﻧﺴﺨﺐ ﻣﻦ ﺣﻴﺎﺗﺞ ﻭ ﺍﻧﺖ ﺣﺮﻩ ﺑﻌﺪ ﻭﻳﻦ ﻣﺎ ﺗﺮﻭﺣﻴﻦ

- ﺷﻠﻮﻥ ﻳﻌﻨﻲ ﻧﺘﺰﻭﺝ ﺍﺳﺒﻮﻉ

- ﻧﺮﻭﺡ ﻧﻌﻘﺪ ﻋﻘﺪ ﺷﻴﺦ ﻭ ﻧﺠﺮﺏ ﻧﻔﺴﻨﺎ ﺍﺳﺒﻮﻉ ﺗﺸﻮﻓﻴﻦ ﺍﺫﺍ ﻛﺪﺭﺗﻲ ﺗﺘﻘﺒﻠﻴﻦ ﻣﺸﺎﻋﺮﺝ ﻭﻳﺎﻳﻪ ﻭ ﻫﺎﻳﺎﻧﻲ ﺑﺎﻗﻲ ﺍﺳﺒﻮﻉ ﻫﻨﺎ

ﺑﻘﻴﺖ ﺻﺎﻓﻨﻪ ﺑﻮﺟﻬﻪ ﺷﺠﺎﻭﺑﺔ ...... ﻳﺘﺒﻊ

☆☆☆☆☆

# ﺯﻳﻨﺐ _ ﻣﺎﺟﺪ

• غرد
• شاركه
• شاركه
• شاركه
• شاركه

روايات - Novels بقلم سيد مرتضى الموسوي

السلام عليكم ورحمة الله وبركاته ، موقع روايات-Novels يهتم بنشر جديد الروايات للكتاب العراقين ، حمل تطبيقنا على جوجل بلاي وستمتع بلقراءة ، تمنياتنا لكم بلتوفيق

مقالات مقترحة لك ❤