رواية أساور الفضة ج2 الجزء الرابع
للكاتبة نهى
.....
ﻫﺪﻯ
ﺗﻌﺮﻓﻮﻥ ﺷﻨﻮ ﻣﻌﻨﻰ ﺗﻜﻌﺪ ﺗﻠﻤﻠﻢ ﺍﺟﺰﺍﺀ ﻣﺒﻌﺜﺮﺓ ﻣﻦ ﺣﻴﺎﺗﻚ
ﺑﻌﺪﻣﺎ ﻣﺰﻗﻬﺎ ﺍﻟﺰﻣﻦ
ﻫﺬﺍ ﺟﺎﻥ ﺣﺎﻟﻲ ﻭﺣﺎﻝ ﺧﻮﺍﺗﻲ
ﻓﺮﻗﺘﻨﺎ ﺍﻟﺤﻴﺎﺓ ﻭﺷﺘﺖ ﺷﻤﻠﻨﺎ
ﺍﻧﻲ ﻭﺷﻴﻤﺎﺀ ﻭﺿﺤﻰ ﻭﻣﺮﻳﻢ . ﺟﻨﺎ ﻛﺎﻋﺪﺍﺕ ﺑﺎﻟﻜﻮﺷﺔ ﺩﻧﺎﺧﺬ ﺻﻮﺭ ﻭﺍﻧﻈﺎﺭ ﺍﻟﻤﻌﺎﺯﻳﻢ ﻛﻠﻬﺎ ﻣﺘﻮﺟﻬﺔ ﻋﻠﻴﻨﺎ
ﺗﺒﺎﻭﻉ ﻋﻠﻴﺔ ﺑﺘﻤﻌﻦ ﺑﺼﻔﺘﻲ ﻋﺮﻭﺳﺔ ﻗﺎﺳﻢ
ﻭﺣﻴﺪ ﺍﻫﻠﻪ
ﻟﻜﻦ ﻓﺠﺎﺀﺓ ﺳﻜﺖ ﺻﻮﺕ ﺍﻟﺪﻳﺠﻲ
ﻭﻋﻢ ﺍﻟﻬﺪﻭﺀ ﺑﺎﻟﻘﺎﻋﺔ ﻭﺧﻔﺘﺖ ﺍﻻﻧﻮﺍﺭ ﻭﺍﺗﺴﻠﻂ ﺿﻮﺓ ﺧﺎﺹ ﻋﻠﻰ ﺑﺎﺏ ﺍﻟﻘﺎﻋﺔ
ﻭﺟﺎﻥ ﻧﺴﻤﻊ ﺻﻮﺕ ﻣﻨﻈﻤﺔ ﺍﻟﺪﻳﺠﻲ ﺗﺸﻐﻞ ﺍﻏﻨﻴﺔ
ﻭﺗﻌﻠﻦ ﻋﻦ ﺍﻫﺪﺍﺀ
ﻭﺗﻜﻮﻝ ( ﻫﺎﻱ ﺍﻻﻏﻨﻴﺔ ﻃﻠﺐ ﺧﺎﺹ
ﻫﺪﻳﺔ ﻟﻠﻌﺮﻭﺱ ﻣﻦ ﺍﺧﺘﻬﺎ ﺍﻟﺪﻛﺘﻮﺭﺓ ﻣﺮﻭﺓ )
ﻧﻬﻈﺖ ﻣﻦ ﻣﻜﺎﻧﻲ ﻣﺘﻔﺎﺟﺌﺔ ﻭﺍﺗﺒﻌﻮﻧﻲ ﺧﻮﺍﺗﻲ ﻣﺎ ﻣﺼﺪﻛﺎﺕ ﺍﻟﻲ ﺳﻤﻌﻨﺎﻩ
ﻳﻌﻨﻲ ﺷﻨﻮ
ﺟﺎﻧﺖ ﺍﻟﻌﻴﻮﻥ ﺷﺎﺧﺼﺔ ﺑﺘﺮﻗﺐ ﻋﻠﻰ ﻣﻜﺎﻥ ﺑﺎﺏ ﺍﻟﻘﺎﻋﺔ ﺍﻟﻲ ﺑﺪﺓ ﻳﻨﻔﺘﺢ ﺑﺎﻟﺘﺪﺭﻳﺞ ﻭﻳﺔ ﺗﺸﻐﻴﻞ ﺍﻻﻏﻨﻴﺔ
ﺟﻨﺎ ﻧﺒﺎﻭﻉ ﺑﺄﻣﻞ ﻣﻤﺰﻭﺝ ﺑﺎﻟﺤﻨﻴﻦ
ﺍﻧﻔﺘﺢ ﺑﺎﺏ ﺍﻟﻘﺎﻋﺔ ﻋﻠﻰ ﻭﺳﻌﻪ ﻭﺟﺎﻥ ﺗﺘﻘﺪﻡ ﻣﺮﻭﺓ ﺑﺨﻄﻮﺍﺕ
ﺑﻄﻴﺌﺔ ﻭﻳﺔ ﺍﻻﻏﻨﻴﺔ
ﺑﻘﻴﺖ ﺟﺎﻣﺪﺓ ﺑﻤﻜﺎﻧﻲ ﻣﻦ ﺣﺠﻢ ﺍﻟﻤﻔﺎﺟﺌﺔ ﺍﺣﺲ ﻛﻠﺒﻲ ﻃﺎﺭ
ﻭﺭﺍﺡ ﻳﻤﻬﺎ
ﺍﺗﺒﻬﺖ ﻋﻠﻴﻬﺎ ﺍﻟﺘﻔﺘﺖ
ﻟﻠﺠﻬﺔ ﺍﻟﻴﻤﻨﺔ ﻭﻧﺰﻟﺖ ﺑﻨﻈﺮﻫﺎ ﻭﺍﺑﺘﺴﻤﺖ ﺑﻔﺨﺮ
ﺍﺗﺒﻌﺖ ﻧﻈﺮﺍﺗﻬﺎ ﻭﻋﺮﻓﺖ ﺷﻨﻮ ﻣﺼﺪﺭ ﻓﺨﺮﻫﺎ
ﺟﺎﻧﺖ ﻻﺯﻣﺔ ﺑﺄﻳﺪﻫﺎ ﻃﻔﻠﺔ ﺻﻐﻴﺮﺓ ﻳﺠﻲ ﻋﻤﺮﻫﺎ ﺛﻼﺛﺔ ﺳﻨﻮﺍﺕ
ﻻﺑﺴﺔ ﺑﺪﻟﺔ ﺑﻴﻀﺔ ﻭﻃﻮﻕ ﻭﺭﺩ ﺍﺑﻴﺾ
ﺷﻌﺮﻫﺎ ﺍﺳﻮﺩ ﻃﻮﻳﻞ ﻭﺑﻴﺪﻫﺎ ﺳﻠﺔ ﻭﺭﺩ ﺍﺑﻴﺾ
ﺳﻤﻌﺖ ﺷﻬﻜﺔ ﺷﻴﻤﺎﺀ
ﺑﺎﻭﻋﺖ ﻋﻠﻴﻬﺎ ﺟﺎﻧﺖ ﺣﺎﻃﺔ ﺍﻳﺪﻫﺎ ﻋﻠﻰ ﺣﻠﻜﻬﺎ ﻭﺗﺒﺠﻲ
ﺟﺎﻧﺖ ﻣﺮﻭﺓ ﻻﺑﺴﺔ ﺑﺪﻟﺔ ﻃﻮﻳﻠﺔ ﻃﺎﻟﻌﺔ ﻛﻠﺶ ﺣﻠﻮﺓ
ﻣﺸﺖ ﻋﻠﻰ ﻃﻮﻝ ﺍﻟﻤﻤﺮ ﻭﺍﻟﻌﻴﻮﻥ ﺗﺒﺎﻭﻉ ﻋﻠﻴﻬﺎ ﺑﻔﻀﻮﻝ
ﺍﺗﻌﺎﻭﻧﺖ ﻛﻠﻤﺎﺕ ﺍﻻﻏﻨﻴﺔ ﻭﻳﺔ ﺩﺧﻮﻝ ﻣﺮﻭﺓ ﻭﺣﻀﻮﺭﻫﺎ ﺍﻟﻤﻔﺎﺟﻲﺀ ﻋﻠﻰ ﺍﻧﻬﻴﺎﺭ ﺩﻣﻮﻋﻲ
ﺟﻨﺖ ﺍﺑﺠﻲ ﺑﺤﺮﻛﺔ ﻛﻠﺐ ﻣﺎﻝ ﻭﺣﺪﺓ ﻣﺨﺰﻭﻧﺔ
ﺍﻗﺘﺮﺑﺖ ﻣﻦ ﻋﺪﻧﺎ ﺑﺘﺮﺩﺩ
ﻭﺑﺎﻭﻋﺖ ﻋﻠﻴﻨﺎ ﻣﻨﺘﻈﺮﺓ ﻣﻨﺎ ﺗﻠﻤﻴﺢ ﻳﺪﻝ ﻋﻠﻰ ﺗﻘﺒﻠﻨﺎ
ﻟﻮﺟﻮﺩﻫﺎ ﺧﺎﻳﻔﺔ ﻧﺮﻓﻀﻬﺎ ﻭﻧﺼﺪﻫﺎ
ﻛﻠﺒﻲ ﺭﻑ ﻋﻠﻴﻬﺎ ﻭﺭﺍﺡ ﻟﻌﻨﺪﻫﺎ
ﻭﺍﺗﺨﺬﺕ ﺍﻟﻘﺮﺍﺭ ﻭﺭﻓﻌﺖ ﺑﺪﻟﺘﻲ ﺣﺘﻰ ﺍﻛﺪﺭ ﺍﻧﺰﻝ ﻣﻦ ﺍﻟﻜﻮﺷﺔ
ﻭﺍﺗﺠﻬﺖ ﻋﻠﻴﻬﺎ ﺑﺪﻭﻥ ﺷﻌﻮﺭ ﺣﻨﺎﻥ ﺍﻟﺨﻮﺍﺕ ﻳﺤﺮﻛﻨﻲ
ﻭﺷﻤﺮﺕ ﺭﻭﺣﻲ ﺑﺤﻀﻨﻬﺎ ﻭﻫﻲ ﺍﺗﻠﻜﺘﻨﻲ ﺣﻮﻃﺘﻨﻲ ﺑﺜﻨﻴﻦ ﺍﻳﺪﻳﻬﺎ
ﺻﺮﻧﺎ ﺍﺛﻨﻴﻨﺎ ﻧﺒﺠﻲ ﻭﻣﻨﻌﺮﻑ ﺷﻨﻮ ﺍﻛﺜﺮ ﺷﻲ ﻧﺒﺠﻲ ﻋﻠﻴﻪ
ﺣﺮﻣﺎﻧﺔ ﻣﻦ ﺑﻌﻀﻨﺎ ﻟﻮﻧﺒﺠﻲ ﻇﻠﻢ ﺍﻟﺰﻣﻦ ﺍﻟﻨﺎ
ﺟﺎﻧﺖ ﺗﺒﺠﻲ ﻭﺗﻜﻮﻝ
.. ﻟﺞ ﻫﺪﻯ ﻣﻨﺪﺭﻳﻦ ﺷﻜﺪ ﺟﻨﺖ ﺧﺎﻳﻔﺔ ﺍﻛﻮﻥ ﺧﺴﺮﺕ ﻓﺮﺻﺘﻲ ﻭﻳﺎﻛﻢ
ﺧﻔﺖ ﺍﺭﺟﻊ ﺍﺗﻮﺍﺻﻞ ﻭﻳﺎﻛﻢ ﺗﺼﺪﻭﻧﻲ
ﻭﺍﺗﺤﺮﺭﺕ ﻣﻦ ﺣﻀﻨﻬﺎ ﻭﺑﺎﻭﻋﺖ ﻋﻠﻴﻬﺎ
.. ﺍﻧﺘﻲ ﺳﺎﻣﻌﺔ ﺑﻮﺍﺣﺪ ﻳﺘﺨﻠﻰ ﻋﻦ ﺭﻭﺣﻪ
ﻣﺮﻭﺓ ﺍﻧﺘﻲ ﺍﺧﺘﻨﺎ ﺭﻳﺤﺔ ﺍﻣﻨﺎ ﺷﻠﻮﻥ ﺗﺘﻮﻗﻌﻴﻦ ﻧﺪﻭﺭ ﻭﺟﻬﻨﺎ ﻋﻨﺞ
......
ﻗﻄﻌﺖ ﻋﻠﻴﻨﺎ ﺍﻟﻠﺤﻈﺔ ﻣﻮﻇﻔﺔ ﺗﻨﺴﻴﻖ ﺍﻟﺤﻔﻠﺔ
ﻭﻛﺎﻟﺖ ﻣﻤﻜﻦ ﺗﺘﻔﻀﻠﻮﻥ ﺗﺼﻌﺪﻭﻥ ﻋﺎﻻﺳﺘﻴﺞ ﻭﺗﻜﻤﻠﻮﻥ ﺍﻟﻔﻘﺮﺓ
ﺍﻧﺘﺒﻬﺖ ﻟﻤﻜﺎﻧﺎ ﺟﺎﻧﻮﺍ ﺍﻟﻤﻌﺎﺯﻳﻢ ﻳﺒﺎﻭﻋﻮﻥ ﺑﻔﻀﻮﻝ ﻣﻤﺰﻭﺝ ﺑﺎﻻﻋﺠﺎﺏ
ﻣﺮﻭﺓ ﻣﻦ ﺑﻴﻦ ﺩﻣﻮﻋﻬﺎ ﻭﺍﺑﺘﺴﻤﺖ ﺑﺄﻣﺘﻨﺎﻥ
.. ﺷﻮﻑ ﺷﻠﻮﻥ ﻫﻤﺰﻳﻦ ﻣﺎ ﻧﺴﻴﺖ ﺍﻟﻤﻔﺎﺟﺌﺔ
ﻟﺰﻣﺖ ﺍﻳﺪ ﺍﻟﻄﻔﻠﺔ ﺍﻟﻲ ﺟﺎﻧﺖ ﺷﺎﻳﻠﺔ ﺳﻠﺔ ﻭﺗﺒﺎﻭﻉ ﺑﻔﻀﻮﻝ
ﻭﺻﻌﺪﻧﺎ ﻋﺎﻟﻜﻮﺷﺔ ﻭﻛﻌﺪﺗﻨﻲ
ﻭﺑﻌﺪﻫﺎ ﺍﺧﺬﺕ ﺍﻟﻌﻠﺒﺔ ﻣﻦ ﺍﻟﺴﻠﺔ ﻭﻓﺘﺤﺘﻬﺎ ﻭﻃﻠﻌﺖ ﻣﻨﻬﺎ
ﻛﻼﺩﺓ ﺫﻫﺐ ﻛﻠﺶ ﻓﺨﻤﺔ ﻭﻟﺒﺴﺘﻬﺎ ﺍﻟﻲ ﻛﺪﺍﻡ ﺍﻟﻤﻌﺎﺯﻳﻢ
ﻭﺭﺟﻌﺖ ﺣﻈﻨﺘﻨﻲ ﻭﻫﻤﺴﺖ
ﺍﺗﻤﻨﻴﺖ ﺍﻛﻮﻥ ﻣﺼﺪﺭ ﻓﺨﺮﻛﻢ ﺑﻬﺎﻱ ﺍﻟﻠﺤﻈﺔ
ﻭﺍﺭﻓﻊ ﺭﺍﺳﻜﻢ ﺑﻴﺔ
ﺣﺠﻴﺖ ﻣﻦ ﺑﻴﻦ ﺩﻣﻮﻋﻲ .. ﻣﺮﻭﺓ ﻳﻜﻔﻲ ﺍﻥ ﺍﻧﺘﻲ ﺍﺧﺘﻨﺎ
ﻫﺬﺍ ﺍﻛﺒﺮ ﻓﺨﺮ ﻣﻴﺤﺘﺎﺝ ﺗﺜﺒﺘﻴﻨﻠﻨﺎ
ﺍﺑﺎﻭﻉ ﻋﻠﻴﻬﺎ ﺍﻟﺘﻔﺘﺖ ﻭﺑﺎﻭﻋﺖ ﻋﻠﻰ ﺷﻴﻤﺎﺀ ﻭﺿﺤﻰ ﻭﻣﺮﻳﻢ
ﺭﺍﺣﺖ ﻋﻠﻰ ﺷﻴﻤﺎﺀ ﻭﻫﻲ ﻛﻮﺓ ﻻﺯﻣﺔ ﻧﻔﺴﻬﺎ ﻣﺎ ﺗﺮﻛﺾ ﻋﻠﻴﻬﺎ ﻭﺗﺤﻀﻨﻬﺎ ﺑﻜﻞ ﻟﻬﻔﺔ
ﻭﺑﻌﺪﻫﺎ ﺍﻧﺘﻘﻠﺖ ﻟﻀﺤﻰ ﻭﻧﻔﺲ ﺍﻟﺴﻼﻡ ﻭﻣﺮﻳﻢ ﻫﻢ ﺳﻠﻤﺖ ﻋﻠﻴﻬﺎ ﻭﻛﺮﺻﺘﻬﺎ ﻣﻦ ﺧﺪﻫﺎ
.. ﻟﺞ ﻣﺮﻳﻢ . ﻫﺎﻱ ﺷﻮﻛﺖ ﻛﺒﺮﺗﻲ
ﺍﺑﺎﻭﻉ ﻋﻠﻰ ﺷﻴﻤﺎﺀ ﻭﺿﺤﻰ ﻭﻣﺮﻭﺓ ﻛﻮﺓ ﺍﺗﻤﺎﻟﻜﻦ ﻧﻔﺴﻬﻦ
ﻭﺳﻠﻤﻮﺍ ﺑﻜﻞ ﻫﺪﻭﺀ
ﻻﻥ ﻋﻴﻮﻥ ﺍﻟﻨﺎﺱ ﻛﻠﻬﺎ ﻋﻠﻴﻬﻦ ﻭﺩﺗﺮﺍﻗﺐ
ﻣﺎ ﺭﺍﺩﻭﺍ ﻳﻠﻔﺘﻮﻥ ﺍﻧﺘﺒﺎﻩ ﺍﻟﻨﺎﺱ ﺑﺤﺮﺍﺭﺓ ﺳﻼﻣﻬﻢ
ﺍﻧﺘﺒﻬﺖ ﻟﺸﻴﻤﺎﺀ ﺑﻘﺖ ﻻﺯﻣﺔ ﺍﻳﺪ ﻣﺮﻭﺓ ﻣﺜﻞ ﺍﻟﻲ ﻟﻜﺔ
ﺟﺰﺀ ﻣﻦ ﺭﻭﺣﻪ ﻭﻳﺨﺎﻑ ﻳﺘﺮﻛﻪ ﻭﻳﺨﺘﻔﻲ ﻣﺮﺓ ﺛﺎﻧﻴﺔ
ﻭﻣﺮﻭﺓ ﻻﺯﻣﺔ ﺍﻳﺪ ﺿﺤﻰ ﻣﻦ ﺍﻟﺠﻬﺔ ﺍﻟﺜﺎﻧﻴﺔ ﻭﻛﺄﻧﻤﺎ ﻭﺣﺪﺓ ﺗﻮﺻﻞ ﻟﻠﺜﺎﻧﻴﺔ ﻣﺪﻯ ﺍﺷﺘﻴﺎﻗﻬﺎ ﻭﻣﺮﻳﻢ ﺟﺎﻧﺖ ﻻﺯﻣﺔ ﺍﻳﺪ ﺍﻟﻄﻔﻠﺔ ﻭﺍﻳﺪ ﺷﻴﻤﺎﺀ
ﻭﺍﻧﻲ ﻛﻌﺪﺗﻲ ﺑﻤﻜﺎﻧﻲ ﺑﺲ ﺍﺑﺘﺴﻢ
ﻭﺍﻟﻤﺼﻮﺭﺓ ﻛﻌﺪﺕ ﺗﺎﺧﺬﻟﻨﺎ ﺻﻮﺭ ﻭﺗﺼﻮﺭ ﺑﻨﻔﺲ ﺍﻟﻮﻗﺖ
ﺧﻠﺼﺖ ﺍﻻﻏﻨﻴﺔ ﺟﺎﻧﺖ ﻋﻦ ﺍﻟﺨﻮﺍﺕ
ﻭﻫﻨﺎ ﺍﺷﺮﺕ ﻟﻔﺎﻃﻤﺔ ﺗﺠﻲ ﺗﺎﺧﺬ ﺻﻮﺭﺓ ﻭﻳﺎﻧﺎ
ﻓﺎﻃﻤﺔ ﺍﻻﺧﺖ ﺍﻟﻲ ﻣﺠﺎﺑﺘﻬﺎ ﺍﻣﻲ
ﻫﻲ ﻭﺍﻣﻬﺎ ﻛﺎﻥ ﺍﻟﻬﻢ ﺍﺛﺮ ﺟﺒﻴﺮ ﺑﺤﻴﺎﺗﻲ
ﻭﺑﻌﺪﻫﺎ ﺍﺳﺘﻤﺮﺕ ﺍﻏﺎﻧﻲ ﺍﻟﻌﺮﺱ ﺍﻟﻤﻌﺘﺎﺩﺓ
ﻟﻔﺖ ﺍﻧﺘﺒﺎﻫﻨﺎ ﺻﻮﺕ ﺍﻟﻄﻔﻠﺔ ﺟﺎﻧﺖ ﺗﺴﺤﺐ ﺑﺒﺪﻟﺔ ﻣﺮﻭﺓ
ﻭﻛﺎﻟﺖ
.. ﻣﺎﻣﺎ ﺍﻧﻲ ﺍﻏﻴﺪ ﺍﻏﻜﺺ ( ﺍﺭﻳﺪ ﺍﺭﻛﺺ )
ﺍﺗﺴﻌﺖ ﻋﻴﻮﻧﺎ ﺑﺘﻌﺠﺐ
ﺷﻴﻤﺎﺀ .. ﻣﺮﻭﺓ ﻻ ﺗﻜﻮﻟﻴﻦ ﻫﺎﻱ ﺍﻟﺒﻨﻴﺔ ﺍﻟﺤﻠﻮﺓ ﺍﻟﺞ
ﻣﺮﻭﺓ .. ﺍﻱ ﺣﺒﻴﺒﺘﻲ ﻫﺎﻱ ﺑﻨﺘﻲ
ﺗﻌﺎﻟﻲ ﻣﺎﻣﺎ ﺷﻴﻤﺎﺀ ﺳﻠﻤﻲ ﻋﻠﻰ ﺧﺎﻻﺗﺞ
ﺷﻴﻤﺎﺀ ﺑﺠﺖ ﺑﺼﻮﺕ ﻳﺮﺟﻒ ﻭﺭﻛﻌﺖ ﻛﺪﺍﻡ ﺑﻨﺖ ﻣﺮﻭﺓ ﻭﻟﻤﺘﻬﺎ ﻟﺤﻀﻨﻬﺎ
.. ﻳﻤﺔ ﻓﺪﻭﺓ ﻫﻼ ﻳﺎﺭﻭﺡ ﺧﺎﻟﺘﺞ
ﺿﺤﻰ ﺍﻗﺘﺮﺑﺖ ﻣﻨﻬﺎ ﺑﻜﻞ ﻟﻬﻔﺔ ﻭﺍﺧﺬﺗﻬﺎ ﻟﺤﻀﻨﻬﺎ ﻭﺻﺎﺭﺕ
ﺗﺒﻮﺱ ﺑﺨﺪﻭﺩﻫﺎ
ﻭﻣﺮﻳﻢ ﺳﻮﺕ ﻣﺜﻞ ﺧﻮﺍﺗﻬﺎ ﻭﻛﺎﻣﺖ ﺗﺒﻮﺱ ﺑﺸﻴﻤﺎﺀ ﺍﻟﺼﻐﻴﺮﺓ
.. ﻟﺞ ﻣﻐﻮﺓ ﻣﺮﻭﺓ ﺟﻴﺒﻴﻬﺎ ﻳﻤﻲ ﺧﻠﻲ ﺍﻛﻠﻬﺎ ﻣﻦ ﺧﺪﻭﺩﻫﺎ
ﻟﺰﻣﺖ ﺍﻳﺪﻫﺎ ﻭﻗﺮﺑﺘﻬﺎ ﻋﻠﻴﺔ
ﻛﻠﺘﻠﻬﺎ .. ﻻ ﺧﻠﻴﻬﺎ ﺗﻜﻌﺪ ﻳﻤﻲ ﻋﺎﻟﻜﻮﺷﺔ ﻫﻲ ﻫﻢ ﻋﻐﻮﺳﺔ
ﻣﺎ ﺗﺸﻮﻓﻴﻬﺎ ﻻﺑﺴﺔ ﺑﺪﻟﺔ ﺑﻴﻀﺔ ﻣﺜﻠﻲ
ﻣﻦ ﺳﻤﻌﺖ ﻫﻲ ﻋﺮﻭﺳﺔ
ﻛﺎﻟﺖ ﻻﻣﻬﺎ .. ﺍﻱ ﺍﻧﻲ ﻋﻐﻮﺳﺔ ﺍﻛﻌﺪ ﻳﻤﻬﺎ
ﺟﺎﻧﺖ ﺗﺤﺠﻲ ﺗﺒﺎﻭﻉ ﻋﻠﻴﺔ ﺑﺄﻧﺒﻬﺎﺭ
ﻭﻋﻴﻮﻧﻬﺎ ﺗﻠﻤﻊ ﺑﺄﻋﺠﺎﺏ ﻋﻠﻰ ﺑﺪﻟﺘﻲ ﻋﺒﺎﻟﻚ
ﺩﺗﺒﺎﻭﻉ ﻋﻠﻰ ﻭﺣﺪﺓ ﻣﻦ ﺍﻣﻴﺮﺍﺕ ( ﻭﺍﻟﺖ ﺩﺯﻧﻲ ) ﻛﺪﺍﻣﻬﺎ
......
ﺷﻴﻤﺎﺀ ﺗﺤﺠﻲ ﺑﺼﻮﺕ ﻋﺎﻟﻲ ﺣﺘﻰ ﻧﺴﻤﻌﻬﺎ ﻻﻥ ﺻﻮﺕ ﺍﻟﺪﻳﺠﻲ ﻣﻐﻄﻲ ﻋﻠﻰ ﺍﻻﺻﻮﺍﺕ
ﻛﺎﻟﺖ .. ﺑﻨﺎﺕ ﺗﺪﺭﻭﻥ ﻫﺴﺔ ﺷﻨﻮ ﺍﺗﻤﻨﻰ
ﺿﺤﻰ .. ﻛﻮﻟﻲ ﺷﻨﻮ
.. ﺍﺗﻤﻨﻰ ﺍﺧﻄﻔﻜﻢ ﻭﻧﺮﻭﺡ
ﻟﻤﻜﺎﻥ ﺧﺎﺹ ﻟﻮﺣﺪﻧﺎ ﺣﺘﻰ ﻧﻜﻌﺪ ﺳﻮﻳﺔ
ﻋﻨﺪﻱ ﻛﻮﻣﺔ ﺣﺠﻲ
ﺿﺤﻰ .. ﻋﻔﻴﺔ ﺣﺘﻰ ﻧﺎﺧﺬ ﺭﺍﺣﺘﻨﺎ ﺑﺎﻟﺴﻮﺍﻟﻒ
ﺍﻧﺎ ﻣﺜﻠﺞ ﻋﻨﺪﻱ ﻫﻮﺍﻱ ﺣﺠﻲ ﺑﻜﻠﺒﻲ ﻭﻟﻬﻔﺔ
ﻫﺪﻯ .. ﻭﻟﻜﻢ ﺍﻧﻲ ﻛﻮﺓ ﻻﺯﻣﺔ ﻧﻔﺴﻲ ﻛﺪﺍﻡ ﺍﻟﻤﻌﺎﺯﻳﻢ
ﺿﺤﻰ .. ﺑﺲ ﺷﻨﺴﻮﻱ ﻟﻤﺮﻭﺓ ﺍﺟﺘﻲ ﺑﺎﻟﻮﻗﺖ
ﺑﺪﻝ ﺍﻟﻀﺎﺋﻊ . ﻫﻬﻬﻬﻪ
ﻣﺮﻭﺓ .. ﻏﺼﺐ ﻋﻨﻲ ﺍﺳﺘﻐﻠﻴﺖ ﻫﺎﻱ ﺍﻟﻠﺤﻈﺔ ﺑﺎﻟﺬﺍﺕ
ﺣﺘﻰ ﺍﺿﻤﻦ ﺗﺴﺎﻣﺤﻜﻢ ﺍﻟﻲ ﻛﺪﺍﻡ ﺍﻟﻨﺎﺱ
ﻛﻠﺖ ﺍﻟﻮﺍﺟﺐ ﻭﺍﻟﻤﺴﺘﺤﺔ ﺭﺍﺡ ﻳﻘﻴﺪﻫﻢ
ﻭﻣﺎ ﺭﺍﺡ ﺗﻜﺪﺭﻭﻥ ﺗﺮﻓﻀﻮﻧﻲ
ﻣﺮﻭﺓ .. ﺑﺲ ﻭﻻ ﻳﻬﻤﻜﻢ ﺑﻌﺪ ﺍﻟﻌﺮﺱ ﺍﺧﺬﻛﻢ
ﻷﻱ ﻣﻜﺎﻥ ﺗﺮﺩﻭﻧﻪ ﺣﺘﻰ ﻧﻜﻤﻞ ﺟﻤﻌﺘﻨﺎ ﺳﻮﻳﺔ ﺷﻨﻮ ﻛﻠﺘﻮﺍ
ﻫﺪﻯ .. ﻃﺒﻌﺎً ﻣﻮﺍﻓﻘﻴﻦ ﻫﺎﻱ ﻣﺎ ﻳﺤﺘﺎﺟﻠﻬﺎ ﺳﺆﺍﻝ
ﺍﻟﺘﻔﺘﺖ ﻋﻠﻴﺔ ﻫﻲ ﻭﺷﻴﻤﺎﺀ ﻭﺿﺤﻰ ﻭﻣﺮﻳﻢ ﻳﻀﺤﻜﻮﻥ
ﺿﺤﻰ .. ﺣﺒﻴﺒﺘﻲ ﺍﻧﺘﻲ ﻣﺎﻣﺸﻤﻮﻟﺔ ﺑﻬﺎﻱ ﺍﻟﺪﻋﻮﺓ
ﻣﺮﻭﺓ .. ﺷﻜﻠﺞ ﻧﺴﻴﺘﻲ ﻧﻔﺴﺞ ﺍﻧﺘﻲ ﺍﻟﻌﺮﻭﺱ
ﺣﺠﻴﺖ ﻭﺍﻧﻲ ﺣﺎﺻﺮﺗﻨﻲ ﺍﻟﺒﺠﻴﺔ ﺷﻮﻓﺔ ﻣﺮﻭﺓ ﻧﺴﺘﻨﻲ ﻧﻔﺴﻲ
ﻭﻣﻜﺎﻧﻲ ﻭﺍﻟﺪﻭﺍﻣﺔ ﺍﻟﻲ ﺍﻧﻲ ﺑﻴﻬﺎ
ﻛﻠﺖ ﺑﻘﻠﺔ ﺣﻴﻠﺔ .. ﻻ ﻋﻔﻴﺔ ﺑﻨﺎﺕ ﺍﺧﺬﻭﻧﻲ ﻭﻳﺎﻛﻢ
ﻭﺍﻟﻠﻪ ﺍﺻﻴﻎ ( ﺍﺻﻴﺮ ) ﻋﺎﻗﻠﺔ ﺍﻧﺎ ﻫﺎﺩﻱ ﺍﺧﻮﻛﻢ ﺍﻟﺼﻐﻴﻎ ( ﺍﻟﺼﻐﻴﺮ ) ﺷﻨﻮ ﻧﺴﻴﺘﻮﻧﻲ
ﺷﻴﻤﺎﺀ .. ﺷﻨﻮ ﺗﺮﺩﻳﻦ ﻗﺎﺳﻢ ﻳﻤﻮﺗﻨﺎ
.. ﻳﺎ ﺍﻟﻠﻪ ﺍﺷﻜﺪ ﺍﺗﻤﻨﻰ ﺍﺟﻲ ﻭﻳﺎﻛﻢ
ﻣﺮﻳﻢ ﺣﺠﺖ ﺑﺼﻮﺕ ﻣﺤﺮﻭﻡ
.. ﻣﺜﻠﻲ ﺣﺘﻰ ﺍﻧﻲ ﺍﺗﻤﻨﻰ ﺍﺟﻲ ﻭﻳﺎﻛﻢ ﺑﺲ ......
ﻗﻄﻌﺖ ﻛﻼﻣﻬﺎ ﻭﺩﻧﻜﺖ
ﺭﺟﻌﺖ ﺭﻓﻌﺖ ﺭﺍﺳﻬﺎ ﻭﻫﻲ ﻣﺒﺘﺴﻤﺔ ﻭﻛﻤﻠﺖ ﻛﻼﻣﻬﺎ
.. ﺑﺲ ﺍﻧﻲ ﻋﻨﺪﻱ ﺩﻭﺍﻡ ﻣﺎ ﺍﻛﺪﺭ ﺍﻛﻮﻥ ﻭﻳﺎﻛﻢ
ﺟﺎﻧﺖ ﺗﺤﺠﻲ ﻭﺗﺒﺎﻭﻉ ﺑﺄﺗﺠﺎﻩ ﻣﻴﺰ ﺳﻠﻴﻤﺔ ﻭﺟﻨﺎﻥ
ﻣﺎ ﻋﺒﺮﺕ ﻋﻠﻴﻨﺎ ﻧﻈﺮﺍﺕ ﺧﻮﻑ ﻣﺮﻳﻢ
ﻭﻫﻨﺎ ﺷﻴﻤﺎﺀ ﻭﻣﺮﻭﺓ ﺣﺠﻮﺍ ﺳﻮﻳﺔ ﺑﺼﻮﺕ ﻭﺍﺣﺪ
.. ﺗﻌﺎﻟﻲ ﻭﻳﺎﻧﺔ ﻭﺍﻧﺎ ﺍﻭﺻﻠﺞ ﻟﻠﻤﺪﺭﺳﺔ
ﺍﻟﺘﻘﺖ ﻧﻈﺮﺍﺗﻬﻢ ﺳﻮﻳﺔ ﻭﺍﺑﺘﺴﻤﻮﺍ ﻟﺒﻌﻀﻬﻢ
ﺟﺎﻧﺖ ﻫﺎﻱ ﺍﻟﻠﺤﻈﺔ ﺍﺛﻤﻦ ﻭﺍﻏﻠﻰ ﻟﺤﻈﺔ ﺑﺤﻴﺎﺗﻲ
ﻭﻟﻮ ﺧﻴﺮﻭﻧﻲ ﺑﻜﻨﻮﺯ ﺍﻟﺪﻧﻴﺎ ﻣﺎ ﺍﺑﺪﻟﻬﺎ ﻭﻻ ﺭﺍﺡ ﺍﻟﻜﺔ ﺍﻏﻠﻰ ﻣﻨﻬﺎ
ﺍﺣﻨﺎ ﺍﻟﺨﻤﺴﻪ ﻣﺠﻤﻮﻋﻴﻦ ﻧﺎﺳﻴﻦ ﺍﻟﺪﻧﻴﺎ ﻭﻫﻤﻮﻣﻬﺎ ﺩﻧﻀﺤﻚ ﻓﺮﺣﺎﻧﻴﻦ
ﺭﻏﻢ ﺍﻟﻈﺮﻭﻑ ﻭﺍﻟﻤﺸﺎﻛﻞ ﺍﻟﻲ ﻣﺮﻳﻨﺎ ﺑﻴﻬﺎ ﺍﺣﻨﺎ ﻭﻣﺮﻭﺓ
ﺑﺲ ﺑﺎﻻﺧﻴﺮ ﻧﺒﻘﻰ ﺧﻮﺍﺕ ﻭﺍﻟﺪﻡ ﻳﺤﻦ
ﻛﺎﻥ ﻛﻔﻴﻞ ﺑﻨﺴﻴﺎﻥ ﺍﻟﺰﻋﻞ ﻭﺍﻟﻌﺘﺐ ﻭﺍﻟﺼﺎﺭ ﻏﺼﺐ ﻋﻨﺎ ﻣﻮ ﺑﻴﺪ ﺍﺣﺪ ﻫﺬﺍ ﻣﻘﺪﺭ ﻭﻣﻜﺘﻮﺏ
ﺳﺒﺤﺎﻥ ﺍﻟﻠﻪ ﻣﺤﺒﺔ ﺍﻟﺨﻮﺍﺕ ﻓﻄﺮﺓ ﺑﺸﺮﻳﺔ ﺍﻟﻠﻪ ﺯﺭﻋﻬﺎ ﺑﻜﻠﻮﺑﻨﺎ ﻣﻦ ﻳﻮﻡ ﻭﻻﺩﺗﻨﺎ
ﻗﺎﻃﻌﻨﺎ ﺻﻮﺕ ﺍﻡ ﻗﺎﺳﻢ ﻭﻫﻲ ﺩﺗﺼﻌﺪ ﻋﺎﻟﺴﺘﻴﺞ ﻭﺍﻟﻜﻮﺷﺔ ﻭﺭﺍﻫﺎ ﻫﺎﻟﺔ ﻭﺍﻟﺒﻨﺎﺕ
ﺍﻡ ﻗﺎﺳﻢ .. ﻳﺎ ﻫﻼ ﻭﻛﻞ ﺍﻟﻬﻼ ﺑﺪﻛﺘﻮﺭﺗﻨﺎ ﺍﻟﻐﺎﻟﻴﺔ ﻭﺍﻟﻠﻪ ﻧﻮﺭﺗﻲ ﺍﻟﻌﺮﺱ ﻭﺳﻠﻤﺖ ﻋﻠﻴﻬﺎ
ﺍﺟﺘﻲ ﻫﺎﻟﺔ ﻭﺍﻗﺘﺮﺑﺖ ﻣﻨﻲ
.. ﻟﺞ ﻋﻮﺑﺔ ﻟﻴﺶ ﻣﺎ ﻛﻠﺘﻴﻠﻲ ﺍﻧﺘﻮﺍ ﺭﺍﺡ ﺗﺴﻮﻭﻥ ﻫﻴﺞ ﻓﻘﺮﺓ ﺑﺎﻟﻌﺮﺱ
ﺿﺤﻜﺖ .. ﻟﺞ ﺷﻠﻮﻥ ﺍﻛﻠﺞ ﻭﺍﻧﻲ ﻣﺎ ﻋﻨﺪﻱ ﻋﻠﻢ ﺑﻴﻬﺎ
ﺍﻧﻲ ﻫﻢ ﻣﺜﻠﺞ ﻣﺘﻔﺎﺟﺌﺔ ﺑﺪﺧﻠﻮﻫﺎ
ﻭﺟﺎﻧﺖ ﺍﺣﻠﻰ ﻣﻔﺎﺟﺌﺔ
.....
ﻣﻨﻰ ﺑﺒﺘﺴﺎﻣﺔ .. ﻫﺎ ﺑﻨﺎﺕ ﺷﻨﻮ ﺭﺃﻳﻜﻢ ﺑﺎﻟﻔﻘﺮﺓ ﻋﺠﺒﺘﻜﻢ ﻟﻮ ﻻ
ﻫﺎﻱ ﺍﻟﻔﻘﺮﺓ ﺗﺮﺗﻴﺒﻲ ﺍﻧﻲ ﺻﺎﺣﺒﺔ ﺍﻟﻔﻴﻜﺔ
ﻭﺍﻟﺘﺨﻄﻴﻂ ﺍﺣﻢ ﺍﺣﻢ
ﻋﻘﺪﺕ ﺣﻮﺍﺟﺒﻲ ﻭﺑﺎﻭﻋﺖ ﻣﺘﻔﺎﺟﺌﺔ
ﻭﺍﻟﺘﻔﺘﺖ ﻋﻠﻰ ﻣﺮﻭﺓ ﺟﺎﻧﺖ ﺩﺗﺴﻠﻢ ﻋﻠﻰ ﺧﻮﺍﺕ ﻗﺎﺳﻢ ﻭﺍﻡ ﻓﺮﺯﺩﻕ ﻭﺍﻡ ﺻﻬﻴﺐ
ﻭﺭﺟﻌﺖ ﺍﺑﺎﻭﻉ ﻋﻠﻰ ﻣﻨﻰ ﻭﺳﺄﻟﺘﻬﺎ
.. ﺷﻠﻮﻥ ﻭﺻﻠﺘﻠﺞ ﻣﺮﻭﺓ
ﻣﻨﻰ .. ﻭﺍﻟﻠﻪ ﻳﺎ ﺣﻠﻮﺓ ﻣﺮﻭﺓ ﺗﺼﻴﺮ ﺯﻣﻴﻠﺔ ﺯﻭﺟﻲ ﺍﻟﺪﻛﺘﻮﺭ
ﻭﺍﻟﻈﺎﻫﺮ ﻫﻲ ﺗﻌﺮﻓﻨﻲ ﻭﺍﻧﻲ ﻣﺎ ﺍﻋﺮﻓﻬﺎ
ﻭﺟﺎﻥ ﻳﺠﻲ ﺯﻭﺟﻲ ﺍﻟﺤﺒﻴﺐ ﻭﻳﻜﻠﻲ ﺯﻣﻴﻠﺘﻲ ﺍﻟﺪﻛﺘﻮﺭﺓ ﺗﺮﻳﺪ ﺗﺤﺠﻲ ﻭﻳﺎﺝ
ﻭﻫﻨﺎ ﺑﺪﺕ ﻣﺮﻭﺓ ﺗﻌﺮﻓﻨﻲ ﻋﻠﻰ ﻧﻔﺴﻬﺎ
ﻭﻛﺎﻟﺖ ﺷﻜﺪ ﺳﻌﻴﺖ ﺣﺘﻰ ﺍﻭﺻﻞ ﻻﻱ ﺷﺨﺺ ﻣﻦ ﺍﻫﻞ ﻗﺎﺳﻢ
ﻣﺎ ﺍﺳﺘﻐﺮﺑﺖ ﻣﻦ ﻛﻼﻡ ﻣﻨﻰ
ﻻﻥ ﺍﻋﺮﻑ ﺑﻤﺮﻭﺓ ﺍﺫﺍ ﺣﻄﺖ ﺑﺒﺎﻟﻬﺎ ﺷﻲ ﺗﻮﺻﻠﻪ
ﻻﻥ ﻫﻲ ﺻﺎﺣﺒﺔ ﺍﺻﺮﺍﺭ ﻭﺍﺭﺍﺩﺓ
ﻭﺑﻌﺪ ﻣﺮﻭﺭ ﺳﺎﻋﺘﻴﻦ
ﺧﻮﺍﺗﻲ ﺑﻘﻮﺍ ﻭﺍﻛﻔﺎﺕ ﻳﻤﻲ ﺑﺎﻟﻜﻮﺷﺔ
ﻣﺮﻭﺓ ﺗﺤﺠﻲ ﻭﻳﺔ ﺑﻨﺘﻬﺎ .. ﻣﺎﻣﺎ ﻣﺸﻤﺶ ﻛﺎﻓﻲ ﺭﻛﺺ
ﺟﻨﺖ ﻛﺎﻋﺪﺓ ﻋﺎﻟﻜﺮﺳﻲ ﺍﻟﻄﻮﻳﻞ ﺍﻟﻲ ﻣﺘﻮﺳﻂ ﺍﻟﻜﻮﺷﺔ ﻭﻓﺎﺭﺷﺔ ﺑﺪﻟﺘﻲ
ﻭﻣﺸﻤﺶ ﺻﺎﻋﺪﺓ ﻳﻤﻲ ﻋﺎﻟﻜﺮﺳﻲ ﻭﺩﺗﺮﻛﺺ
ﺟﺎﻧﺖ ﺩﺑﺪﻭﺑﺔ ﻭﺍﻟﺸﻌﺮ ﻃﻮﻳﻞ
.. ﻟﺞ ﻣﻐﻮﺓ ( ﻣﺮﻭﺓ ) ﻫﺎﻱ ﺷﻨﻮ ﺑﻨﺘﺞ ﺍﺗﻤﻨﻰ ﺍﻛﻐﻄﻬﺎ ( ﺍﻛﺮﻃﻬﺎ )
ﻟﻮﻣﺎ ﺍﻧﻲ ﺍﻟﻌﻐﻮﺱ ( ﺍﻟﻌﺮﻭﺱ ) ﺟﺎﻥ ﻛﺎﺑﻠﺘﻬﺎ ﻭﻛﻌﺪﺕ ﺍﻏﻜﺺ( ﺍﺭﻛﺺ ) ﻭﻳﺎﻫﺎ
ﻟﻔﺖ ﺍﻧﺘﺒﺎﻫﻲ ﻣﻦ ﺩﺗﺤﺠﻲ ﻛﺎﻟﺖ
.. ﻻ ﻣﺎﻣﺎ ﻣﻮ ﻛﺎﻓﻲ ﺍﻏﻴﺪ ﺍﻏﻜﺺ
ﺿﺤﻜﻨﺎ ﺍﻧﻲ ﻭﺍﻟﺒﻨﺎﺕ ﻣﺘﻔﺎﺟﺌﺎﺕ
ﺿﺤﻰ .. ﻫﻬﻬﻪ ﻣﺮﻭﺓ ﻫﺎﻱ ﺷﻨﻮ ﺑﻨﺘﺞ ﺩﺗﻐﻮﻏﻮ
ﻣﺮﻭﺓ .. ﺷﺴﻮﻱ ﺍﻧﻬﺎ ﺍﻟﺠﻴﻨﺎﺕ ﺍﻟﻮﺍﺭﺛﻴﺔ
ﻛﻌﺪﻧﺎ ﻧﻀﺤﻚ ﻋﻠﻰ ﺣﺮﻛﺎﺕ ﻣﺸﻤﺶ
ﺿﺤﻰ .. ﺑﻨﺘﺞ ﺷﻜﻠﻬﺎ ﻭﺭﺍﺛﺔ ﺣﺘﻰ ﺍﻟﺮﻛﺺ
ﺟﻨﺖ ﻣﻠﺘﻬﻴﺔ ﻭﻣﻨﺪﻣﺠﺔ ﺑﺒﻨﺖ ﻣﺮﻭﺓ ﻭﺳﻮﺍﻟﻔﻬﺎ
ﻭﺟﺎﻥ ﺍﺳﻤﻊ ﻣﻦ ﺑﻌﻴﺪ ﺻﻮﺕ ﻃﺒﻮﻝ ﺍﻟﺤﺮﺏ
ﺍﺍﺍﺍﺍﻗﺼﺪ ﻃﺒﻮﻝ ﺍﻟﻔﺮﺡ ﺟﺎﻧﺖ ﻫﺎﻱ ﺍﻋﻼﻥ ﻋﻦ ﺑﻮﺍﺩﺭ ﺍﻧﺘﻬﺎﺀ ﺍﻟﻌﺮﺱ
ﻛﻠﺒﻲ ﻛﻤﺰ ﻣﻦ ﻣﻜﺎﻧﻪ
ﺳﻤﻌﺖ ﺍﻡ ﻗﺎﺳﻢ ﻛﺎﻟﺖ
ﺑﻨﺎﺕ ﺣﻀﺮﻭﺍ ﻧﻔﺴﻜﻢ ﺍﺟﺘﻲ ﺍﻟﺰﻓﺔ
ﺭﺍﺡ ﻳﺪﺧﻠﻮﻥ ﻗﺎﺳﻢ ﻭﺍﻟﺮﻳﺎﺟﻴﻞ
ﺍﺑﺎﻭﻉ ﻟﺨﻮﺍﺗﻲ
ﺷﻴﻤﺎﺀ ﻟﺒﺴﺖ ﺳﺘﺮﺓ ﻓﻮﻙ ﺍﻟﺒﺪﻟﺔ ﻻﻥ ﻣﻮ ﻣﺤﺠﺒﺔ
ﻭﻣﺮﻭﺓ ﻟﺒﺴﺖ ﺳﺘﺮﺓ ﻣﻨﺴﻘﺘﻬﺎ ﻭﻳﺔ ﻓﺴﺘﺎﻧﻬﺎ ﻭﻟﺒﺴﺖ ﺷﺎﻝ ﻋﻠﻰ ﺭﺍﺳﻬﺎ ﺍﻟﻈﺎﻫﺮ ﻣﺮﻭﺓ ﻣﺘﺤﺠﻴﺔ
ﻭﺿﺤﻰ ﻟﺒﺴﺖ ﻋﺒﺎﻳﺘﻬﺎ ﻭﺍﻟﺒﺮﻛﻊ
ﻭﻣﺮﻳﻢ ﻟﺒﺴﺖ ﺑﺲ ﺟﺎﻛﻴﺖ ﻋﺎﻟﺒﺪﻟﺔ ﻫﻢ ﻣﻮ ﻣﺤﺠﺒﺔ
ﻭﻫﺎﻟﺔ ﻛﻌﺪﺕ ﺗﺴﺎﻋﺪﻧﻲ ﺍﻟﺒﺲ ﺍﻟﺒﺮﻧﺺ ﻭﻫﻤﺴﺖ
.. ﻗﺎﺳﻢ ﺍﺗﺼﻞ ﻭﻛﺎﻝ ﻏﻠﻔﻴﻬﺎ ﻋﺪﻝ
ﺟﻤﺎﻋﺘﻪ ﻭﺍﻟﻮﻟﺪ ﺭﺍﺡ ﻳﻔﻮﺗﻮﻥ ﻭﻳﺎﻩ ﻟﻠﻘﺎﻋﺔ ﺣﺘﻰ ﻳﺰﻓﻮﻧﻪ
ﻫﻲ ﻭﺗﺤﺠﻲ ﻭﺍﻧﻲ ﺍﺳﻨﺎﻧﻲ ﺍﺻﻄﻜﺖ ﻣﻦ ﺍﻟﺨﻮﻑ
ﻭﺟﺎﻥ ﻳﺪﺧﻞ ﻗﺎﺳﻢ ﻋﻠﻰ ﺍﻳﻘﺎﻉ ﺍﻟﺪﻑ ﻭﺍﻏﺎﻧﻲ ﺍﻟﻬﻮﺳﺎﺕ
ﻭﺻﻞ ﻭﻛﻌﺪ ﻳﻤﻲ
ﻭﻫﺎﻟﺔ ﺑﺎﻟﻜﻮﺓ ﻛﺪﺭﺕ ﺗﻘﻨﻊ ﻣﺸﻤﺶ ﺗﻨﺰﻝ ﻣﻦ ﻳﻤﻲ ﺣﺘﻰ ﻗﺎﺳﻢ ﻳﻜﻌﺪ
ﺟﺎﻧﺖ ﻣﺸﻤﺶ ﻣﺒﺮﻃﻤﺔ ﺷﻔﺎﻳﻔﻬﺎ ﻭﺗﺒﺎﻭﻉ ﻟﻘﺎﺳﻢ
ﺍﺷﻮ ﻫﺎﻱ ﺑﻘﺖ ﻭﺍﻛﻔﺔ ﻳﻤﻨﺎ ﻭﺍﻟﻌﻴﻮﻥ ﺗﻠﻤﻊ ﺑﺎﻟﺪﻣﻮﻉ
ﻭﺍﻟﺨﺪﻭﺩ ﺣﻤﺮ
ﺷﺎﻓﻬﺎ ﻗﺎﺳﻢ ﻭﻛﺎﻝ
.. ﻫﺎﻱ ﻣﻨﻮ ﺍﻟﺒﻄﺔ ﺍﻟﺤﻠﻮﺓ
ﺟﺎﻭﺑﺘﻪ .. ﻫﺎﻱ ﻣﺸﻤﺶ ﺑﻨﺖ ﺍﺧﺘﻲ ﻣﻐﻮﺓ
ﺑﺲ ﻣﺸﻤﺶ ﺍﻋﺘﺮﺿﺖ ﻋﻠﻰ ﻛﻼﻣﻲ ﻭﺣﺠﺖ ﺑﻜﻞ ﺛﻘﺔ
.. ﻻﺍﺍﺍﺍ ﺍﻧﻲ ﻣﻮ ﺑﻨﺖ ﻣﻐﻮﺓ ﺍﻧﻲ ﺍﻟﻌﻐﻮﺳﺔ ﻭﺍﻧﺖ ﻭﺗﺒﺎﻭﻉ ﻋﻠﻰ ﻗﺎﺳﻢ ﺍﻟﻌﻐﻴﺲ
......
ﻳﻌﻨﻲ ﺻﺪﻙ ﺿﺤﻜﺘﻨﻲ ﻣﻦ ﻛﻞ ﻛﻠﺒﻲ ﺟﺎﻧﺖ ﻣﺮﻭﺓ
ﻭﺍﻟﺒﻨﺎﺕ ﻳﻀﺤﻜﻮﻥ ﻋﻠﻴﻬﺎ
ﻗﺎﺳﻢ .. ﺣﻠﻔﻲ ﻭﺍﻟﻠﻪ
ﻫﻲ ﻫﺎﻱ ﺍﻟﻌﺎﻳﺰﺓ ﻛﺎﻓﻲ ﻋﻠﻴﺔ ﺧﺎﻟﺘﺞ
ﺟﻨﺖ ﺑﻮﺣﺪﺓ ﺗﺎﻟﻲ ﺻﺮﺕ ﺑﺜﻨﻴﻦ
ﻻﻓﻮﻛﺎﻫﺎ ﻫﺎﻱ ﻫﻢ ﺗﻐﻮﻏﻮ
ﺟﺎﻥ ﻳﺤﺠﻲ ﻭﻳﺒﺘﺴﻢ ﻟﻜﻦ ﻛﻞ ﻫﺬﺍ ﻣﺎ ﻛﺪﺭ ﻳﺨﻔﻲ ﺍﻟﻐﺼﺔ ﺍﻟﻲ ﺑﻌﻴﻮﻧﻪ
ﺷﻴﻤﺎﺀ
ﺟﻨﺖ ﺍﺑﺎﻉ ﻋﻠﻰ ﺑﻨﺘﻲ ﻭﺍﺧﺘﻲ ﺍﻟﺼﻐﻴﺮﺓ ﺷﻠﻮﻥ ﺯﻓﻮﻫﺎ
ﻛﺪﺍﻡ ﻋﻴﻨﻲ ﻧﺰﻟﺖ ﺩﻣﻮﻋﻲ
ﻳﻌﻨﻲ ﺷﻨﻮ ﺍﻧﻲ ﺻﻔﻴﺖ ﻟﻮﺣﺪﻱ
ﺑﻌﺪ ﻣﺎﻛﻮ ﺍﺣﺪ ﻳﻨﺘﻈﺮﻧﻲ ﻣﻦ ﺍﺭﺟﻊ ﻣﻦ ﺩﻭﺍﻣﻲ ﻭﺍﻟﺠﻲﺀ ﺍﻟﻬﺎ
ﺍﺣﺠﻴﻠﻬﺎ ﻋﻦ ﺧﻮﻓﻲ ﻭﻋﻦ ﺍﺣﻼﻣﻲ
ﺟﻨﺖ ﺍﺑﺎﻭﻉ ﻋﻠﻴﻬﺎ ﺟﺎﻧﺖ ﺭﺍﻓﻌﺔ ﺑﺪﻟﺘﻬﺎ ﻭﻗﺎﺳﻢ ﻭﻫﺎﻟﺔ ﺩﻳﺴﺎﻋﺪﻭﻧﻬﺎ ﺣﺘﻰ ﺗﺼﻌﺪ ﺑﺎﻟﺴﻴﺎﺭﺓ
ﻋﺮﺱ ﻫﺪﻯ ﺟﺎﻥ ﻋﺒﺎﺭﺓ ﻋﻦ ﻣﺠﻤﻮﻋﺔ ﻣﻔﺎﺟﺌﺎﺕ
ﻟﻜﻦ ﺣﺴﻴﺖ ﻋﻠﻰ ﺍﻳﺪ ﺗﺸﺪ ﻋﻠﻰ ﻛﺘﻔﻲ ﺗﻮﺍﺳﻴﻨﻲ
ﺍﻟﺘﻔﺘﺖ ﺟﺎﻧﺖ ﻣﺮﻭﺓ ﻭﺍﻛﻔﺔ ﻳﻤﻲ ﻫﻲ ﻭﺿﺤﻰ ﻭﻣﺮﻳﻢ
ﺳﺤﺒﺖ ﻧﻔﺲ ﻋﻤﻴﻖ ﻭﺍﺑﺘﺴﻤﺖ ﻟﻠﺒﻨﺎﺕ
ﻭﺑﻌﺪﻫﺎ ﻃﻠﺒﺖ ﻣﻦ ﻣﺮﻭﺓ ﺗﺠﻲ ﻭﻳﺎﻧﺎ ﻟﻠﺒﻴﺖ
ﻣﺮﻭﺓ .. ﻻ ﺷﻴﻤﺎﺀ ﻣﺎ ﺍﻛﺪﺭ ﺍﺟﻲ ﻭﻳﺎﻛﻢ
ﻟﺬﺍﻙ ﺍﻟﺒﻴﺖ ﺍﻟﻲ ﺍﻧﻈﻠﻤﺖ ﺑﻲ ﻭﺍﻧﺤﺮﻣﺖ ﺑﻲ ﻣﻨﻜﻢ
ﺍﻧﻲ ﺣﺮﻣﺖ ﻋﻠﻰ ﻧﻔﺴﻲ ﺍﺩﺧﻞ ﺑﻴﺖ ﺳﻠﻴﻤﺔ ﻭﺍﺛﻴﺮ
ﻻﻥ ﻣﺎ ﺍﻃﻴﻖ ﺍﺷﻮﻑ ﺭﻛﻌﺔ ﻭﺟﻬﻢ
ﺳﻜﺘﺖ ﻣﺠﺎﻭﺑﺘﻬﺎ ﺣﻘﻬﺎ
ﻧﻔﺲ ﺷﻌﻮﺭﻱ ﺍﻧﻲ ﻫﻢ ﺍﻛﺮﻩ ﺭﺟﻌﺘﻲ ﻟﻠﺒﻴﺖ ﻣﻦ ﻭﺭﺓ ﺳﻠﻴﻤﺔ
ﺑﺲ ﻭﺟﻮﺩ ﺧﻮﺍﺗﻲ ﻫﻮ ﺍﻟﻲ ﺟﺎﻥ ﻣﺼﺒﺮﻧﻲ ﻭﻳﺨﻠﻴﻨﻲ ﺍﺭﺟﻊ ﻟﻠﺒﻴﺖ ﻋﻠﻤﻮﺩﻫﻢ
ﺳﺄﻟﺘﻬﺎ ﺑﺨﻮﻑ .. ﻳﻌﻨﻲ ﺷﻨﻮ ﺑﻌﺪ ﻣﺎ ﻧﺸﻮﻓﺞ
ﻣﺮﻭﺓ .. ﻻ ﻟﻴﺶ ﻣﺎ ﺗﺸﻮﻓﻮﻧﻲ ﻫﻮ ﺍﻧﻲ ﻣﺎ ﺻﺪﻛﺖ ﺍﻧﺠﻤﻊ ﺑﻴﻜﻢ
ﻭﻳﻨﺘﻬﻲ ﺍﻟﺨﻼﻑ ﺑﻴﻨﺎﺗﻨﺎ ﻭﻧﺘﺼﺎﻟﺢ ﺷﻠﻮﻥ ﺍﻋﻮﻓﻜﻢ ﺑﻌﺪﻣﺎ ﻟﻜﻴﺘﻜﻢ
ﺍﻧﺘﻮﺍ ﺗﻌﺎﻟﻮﺍ ﻭﻳﺎﻱ ﻟﺒﻴﺘﻲ
ﺗﺪﺭﻭﻥ ﺑﻨﺎﺕ ﺟﺎﻧﺖ ﺍﻣﻨﻴﺘﻲ ﺗﺘﺠﻤﻌﻮﻥ ﻋﻨﺪﻱ ﺑﺎﻟﺒﻴﺖ
ﻭﻧﺤﺠﻲ ﺑﺮﺍﺣﺘﻨﺎ ﺑﺪﻭﻥ ﻣﺎ ﺍﺣﺪ ﻳﻨﻐﺺ ﻋﻠﻴﻨﺎ ﻟﻤﺘﻨﺎ ﻣﺜﻞ ﺳﻠﻴﻤﺔ ﻭﺍﺛﻴﺮ
ﺍﻱ ﺻﺪﻙ ﻋﻠﻰ ﻃﺎﺭﻱ ﺳﻠﻴﻤﺔ ﺷﻔﺘﻮﺍ ﺳﻠﻴﻤﺔ ﺷﻠﻮﻥ ﺍﺟﺘﻲ ﺗﻨﺠﻠﻂ ﻣﻦ ﺷﺎﻓﺘﻨﻲ ﺩﺧﻠﺖ ﻟﻠﻘﺎﻋﺔ
ﺿﺤﻰ .. ﻫﻬﻬﻬﻬﻬﻪ ﻟﺞ ﺍﻱ ﺟﺎﻥ ﺷﻜﻠﻬﺎ ﻳﺨﺮﺏ ﺿﺤﻚ
ﻣﺮﻳﻢ ﺑﺨﺠﻞ .. ﻫﻬﻬﺔ ﺟﺎﻧﺖ ﺍﻟﻤﻔﺎﺟﺌﺔ ﻭﺍﺿﺤﺔ ﻋﻠﻰ ﻭﺟﻬﺎ
ﺣﺘﻰ ﺷﻜﻴﺖ ﺑﻴﻬﺎ ﺩﺧﻠﺖ ﺳﻜﺘﺔ ﻗﻠﺒﻴﺔ
ﺑﻌﺪﻫﺎ ﻣﺸﻴﻨﺎ ﻟﻠﺴﻴﺎﺭﺍﺕ ﺍﻟﻤﺠﺘﻤﻌﺔ ﻛﺪﺍﻡ ﻗﺎﻋﺔ ﺍﻟﻌﺮﺱ ﻭﺻﺎﻳﺮﺓ ﺧﺒﺼﺔ
ﺍﺗﻔﻘﻨﺎ ﻭﻳﺔ ﻣﺮﻭﺓ ﻧﻠﺘﻘﻲ ﻋﻠﻰ ﻳﻮﻡ ﺍﻟﺠﻤﻌﺔ
ﻣﺮﻳﻢ ﺍﺗﺮﺧﺼﺖ ﻭﻛﺎﻟﺖ ﺭﺍﺡ ﺍﺭﻭﺡ ﺍﺷﻮﻑ ﻣﺎﻣﺎ ﻭﻳﻦ
ﻣﺮﻭﺓ .. ﺗﺠﻮﻧﻲ ﻋﺎﻟﻐﺪﺓ ﺍﻧﺘﻲ ﻭﺍﻟﺒﻨﺎﺕ
ﺑﻌﺪﻧﻲ ﻣﺎ ﺷﺒﻌﺖ ﻣﻨﻜﻢ ﻭﺍﺗﻤﻨﻰ ﺍﺧﺬﻛﻢ ﻫﺴﺔ ﻭﻳﺎﻱ ﻟﻠﺒﻴﺖ
ﺑﺲ ﺷﻜﻠﻲ ﺻﺮﺕ ﻃﻤﺎﻋﺔ ﻭﺭﺣﺖ ﺯﺍﻳﺪ ﺑﺎﻟﺤﻠﻢ
ﺷﻴﻤﺎﺀ .. ﻻ ﻭﻳﻦ ﻣﺎﻧﻜﺪﺭ ﻧﺠﻲ ﻭﻳﺎﺝ ﺷﻮﻓﺔ ﻋﻴﻨﺞ ﻛﻞ ﻭﺣﺪﺓ ﺑﻴﻨﺎ ﻋﻨﺪﻫﺎ ﺍﺭﺗﺒﺎﻁ
ﺿﺤﻰ ﺯﻭﺟﻬﺎ ﻋﻜﺮﺓ ﻣﺴﺘﺤﻴﻞ ﻳﻘﺒﻞ ﺗﺒﺎﺕ ﻋﻨﺪﺝ
ﻭﻣﺮﻳﻢ ﻣﺘﻜﺪﺭ ﻋﻨﺪﻫﺎ ﺩﻭﺍﻡ
ﺍﻧﻲ ﺑﺎﺟﺮ ﺭﺍﺡ ﺗﺨﻠﺺ ﺍﺟﺎﺯﺗﻲ ﻭﻻﺯﻡ ﺍﺭﺟﻊ ﺍﺩﺍﻭﻡ ﺑﺎﻟﻤﺴﺘﺸﻔﻰ
ﻣﺮﻭﺓ .. ﺍﺫﺍ ﺗﺮﺩﻳﻦ ﺍﺟﺪﺩ ﻟﺞ ﺍﻻﺟﺎﺯﺓ ﻣﺮﺓ ﺛﺎﻧﻴﺔ
ﺑﺎﻭﻋﺖ ﻣﺘﻔﺎﺟﺌﺔ .. ﻣﺮﻭﺓ ﻻﺗﻜﻮﻟﻴﻦ ﺍﻧﺘﻲ ﻭﺭﺓ ﻣﻮﺿﻮﻉ ﺍﺟﺎﺯﺗﻲ
ﺍﺑﺘﺴﻤﺖ .. ﺍﻱ ﺍﻧﻲ ﻭﺭﺓ ﻣﻮﺿﻮﻉ ﺍﻻﺟﺎﺯﺓ ﻣﺎﻟﺘﺞ
.. ﻫﺎﻱ ﺷﻠﻮﻥ ﻭﺷﻮﻛﺖ ﻣﺎ ﺍﺩﺭﻱ ﻋﻨﺪﺝ ﻣﻌﺎﺭﻑ ﺑﺎﻟﻤﺴﺘﺸﻔﻰ
ﺍﺑﺘﺴﻤﺖ .. ﻟﺘﺨﺎﻓﻴﻦ ﺍﺧﺘﺞ ﺍﻟﺪﻛﺘﻮﺭﺓ ﻣﺮﻭﺓ ﻣﻮ ﺷﻮﻳﺔ ﻋﻨﺪﻱ ﻧﻔﻮﺫ
ﺍﻛﺪﺭ ﺍﻭﺻﻞ ﺑﻴﻬﺎ ﻻﻛﺒﺮ ﺭﺍﺱ
ﺟﻨﺎ ﻧﺤﺠﻲ
.....
ﻭﺷﻔﻨﺎ ﻣﺮﻳﻢ ﺍﺟﺘﻲ ﺗﺒﺠﻲ ﺑﻐﻴﺾ
ﻗﻄﻌﻨﺎ ﻛﻼﻣﻨﺎ ﻭﺍﻟﺘﻔﺘﻨﺎ ﻋﻠﻴﻬﺎ
ﺷﻴﻤﺎﺀ .. ﺷﻜﻮ ﻣﺮﻳﻢ ﻟﻴﺶ ﺗﺒﺠﻴﻦ ﻣﻨﻮ ﻭﻳﺎﺝ
ﺣﺠﺖ ﻣﺮﻳﻢ ﻣﻦ ﺑﻴﻦ ﺩﻣﻮﻋﻬﺎ
.. ﻫﺬﺍ ﻭﺍﺣﺪ ﺣﻘﻴﺮ ﺯﻣﺦ ﺑﻴﺔ ﻻﻥ ﺟﻨﺖ ﻭﺍﻛﻔﺔ ﺍﺩﻭﺭ ﻋﻠﻰ ﺳﻴﺎﺭﺓ ﺑﺎﺑﺎ ﺍﻣﺠﺪ
ﻣﺎﻣﺎ ﻛﻠﺘﻠﻲ ﺭﻭﺣﻲ ﺷﻮﻓﻲ ﺳﻴﺎﺭﺓ ﺍﺑﻮﺝ ﻭﻳﻦ ﺻﺎﺭﺕ
ﻳﻜﻮﻝ ﻣﻨﺘﻈﺮﻛﻢ ﻋﺎﻟﺸﺎﺭﻉ ﻛﻠﻴﻠﻪ ﺧﻠﻲ ﻳﻘﺮﺏ ﺳﻴﺎﺭﺗﻪ ﻋﺎﻟﺒﻮﺍﺑﺔ
ﺑﻴﺒﻲ ﺳﻠﻴﻤﺔ ﻣﺎ ﺑﻴﻬﺎ ﺣﻴﻞ ﺗﻤﺸﻲ
ﺷﻴﻤﺎﺀ .. ﺍﻱ ﻭﻫﺬﺍ ﺷﻨﻮ ﺣﺠﺔ ﻭﻳﺎﺝ
ﻋﺎﻁ ﺑﻴﺔ ﺑﻨﺘﺮﺓ
.. ﻛﺎﻝ ﻫﻲ ﺍﻧﺘﻲ ﺷﻨﻮ ﺗﺴﻮﻳﻦ ﻭﺍﻛﻔﺔ ﻫﻨﺎ
ﺣﻀﺮﺗﺞ ﺩﺗﺴﺘﻌﺮﺿﻴﻦ ﺍﻧﺘﻲ ﻭﺷﻌﺮﺝ ﻫﺬﺍ
ﺍﻧﺎ ﻛﻤﺰﺕ ﻣﻦ ﻣﻜﺎﻧﻲ ﺟﻨﺖ ﻣﺮﺗﺒﻜﺔ
ﻻﻥ ﻛﻠﻬﺎ ﺷﺒﺎﺏ ﻭﻫﻮﺳﺔ ﻭﻓﺸﻠﻨﻲ ﻛﺪﺍﻣﻬﻢ
ﺟﺎﻭﺑﺘﻪ .. ﻣﻨﺘﻈﺮﺓ ﺳﻴﺎﺭﺓ ﺑﺎﺑﺎ
ﻭﻫﻮ ﺍﺗﻘﺪﻡ ﻋﻠﻴﺔ ﺧﻮﻓﻨﻲ
ﻭﻛﺎﻝ ﺑﺰﻣﺨﺔ .. ﺑﺎﻟﻠﻪ ﺷﻮ ﺍﻣﺸﻲ ﻓﻮﺗﻲ ﻟﻠﻘﺎﻋﺔ ﻭﻣﺎ ﺗﻄﻠﻌﻴﻦ ﺍﻻ ﻭﻳﺔ ﺍﻫﻠﺞ
ﻭﺭﺟﻌﺖ ﺗﺒﺠﻲ .. ﺍﻟﺤﻘﻴﺮ ﺣﺴﺴﻨﻲ ﻋﺒﺎﻟﻚ ﺍﻧﻲ ﻣﺴﺘﻐﻠﺔ ﻓﺮﺻﺔ ﺍﻧﺸﻐﺎﻝ ﺍﻫﻠﻲ ﺑﺎﻟﻌﺮﺱ
ﺣﺘﻰ ﺍﺧﺬ ﺭﺍﺣﺘﻲ
ﺍﻟﺤﻘﻴﺮ ﻋﺒﺎﻟﻪ ﺭﺍﺡ ﺍﺧﺎﻑ ﻣﻦ ﻋﻀﻼﺗﻪ ﻫﻮ ﻭﺷﻜﻠﻪ
ﻣﺮﻭﺓ ﺑﻐﻴﺾ .. ﺑﺎﻟﻠﻪ ﺷﻮ ﺭﺍﻭﻳﻨﻲ ﺍﻳﺎﻩ
ﺍﺷﺮﺕ ﻋﻠﻰ ﻣﻜﺎﻥ ﻗﺮﻳﺐ ﻋﻠﻰ ﻣﻜﺎﻥ ﺑﻮﺍﺑﺔ ﺍﻟﻘﺎﻋﺔ
ﻭﺟﺎﻧﺖ ﺍﻟﺴﻴﺎﺭﺍﺕ ﻣﺘﺠﻤﻌﺔ ﻭ ﺗﺮﻳﺪ ﺗﻄﻠﻊ
ﻭﺟﺎﻧﻮﺍ ﺍﻟﺸﺒﺎﺏ ﻣﻨﺘﺸﺮﻳﻦ ﺣﺘﻰ ﻳﻨﻈﻤﻮﻥ ﺳﻴﺎﺭﺍﺕ ﺍﻟﺰﻓﺔ
ﻣﺮﻳﻢ .. ﻫﺬﺍ ﺍﻟﻮﻟﺪ ﺍﻟﻄﻮﻳﻞ ﺍﺑﻮ ﺍﻟﻘﺎﻁ ﺍﻟﻜﺤﻠﻲ ﺍﻟﻲ ﻋﻨﺪﻩ ﻟﺤﻴﺔ
ﻣﺮﻭﺓ ﺗﺒﺎﻭﻉ ﻋﻠﻰ ﺍﻟﻤﻜﺎﻥ ﺍﻟﻲ ﺗﺄﺷﺮ ﻋﻠﻴﻪ ﻣﺮﻳﻢ
.. ﻫﺎ ﺍﻱ ﺫﺍﻙ ﺷﻔﺘﻪ ﺑﺴﻴﻄﺔ ﺍﻧﺎ ﺍﻟﻪ ﺧﻠﻲ ﻳﺼﺒﺮﻟﻲ
ﺍﻟﺘﻔﺘﺖ ﻋﻠﻰ ﺿﺤﻰ ﻭﻛﺎﻟﺖ .. ﻫﺎﺝ ﺿﺤﻰ ﻟﺰﻣﻲ ﻣﺸﻤﺶ
ﻋﻴﻨﺞ ﻋﻠﻴﻬﺎ ﺧﻠﻲ ﺍﺭﻭﺡ ﺍﺷﻮﻑ ﻫﺬﺍ ﺷﺒﻲ
ﻭﺣﺠﺖ ﻭﻳﺔ ﻣﺮﻳﻢ .. ﺑﺎﻟﻠﻪ ﺷﻮ ﺗﻌﺎﻟﻲ ﻭﻳﺎﻱ
ﺍﺧﺬﺗﻬﺎ ﻭﻣﺸﺖ
ﻭﺍﻧﺎ ﺭﺣﺖ ﻭﺭﺍﻫﺎ ﺍﻫﺪﻳﻬﺎ
.. ﻳﺎ ﻋﺰﺓ ﻟﺞ ﻣﺮﻭﺓ ﻟﺤﻈﺔ ﺍﻭﻛﻔﻲ ﻭﻳﻦ ﺭﺍﻳﺤﺔ
ﻟﺞ ﻋﻴﺐ ﻫﺬﺍ ﻣﺒﻴﻦ ﻣﻦ ﺍﻗﺎﺭﺏ ﺍﻟﻌﺮﻳﺲ
ﻣﺘﺴﻮﻯ ﻧﺴﻮﻱ ﻣﺸﻜﻠﺔ
ﻣﺮﻭﺓ .. ﻻ ﻭﺍﻟﻠﻪ ﻣﺎ ﺍﺳﻜﺘﻠﻪ ﻭﻻ ﺭﺍﺡ ﺍﻋﺪﻳﻬﺎ ﻟﺤﻀﺮﺗﻪ
.. ﻳﺒﻮﻭﻭ ﺍﻟﻠﻪ ﻳﺴﺘﺮ
ﺟﻨﺖ ﺍﺣﺠﻲ ﻭﺍﻣﺸﻲ ﻭﺭﺍﻫﻢ
ﻭﺻﻠﺖ ﻟﻤﻜﺎﻥ ﺍﻟﻮﻟﺪ ﺍﻟﺸﺎﺏ
ﻭﻭﻛﻔﺖ ﻭﺭﺍﻩ ﺟﺎﻥ ﻭﺍﻛﻒ ﻳﻢ ﺳﻴﺎﺭﺓ ﺑﻴﻀﺔ ﻋﺎﻟﻴﺔ
ﻓﺎﺗﺢ ﺍﻟﺒﻴﺒﺎﻥ ﻣﺎﻟﺖ ﺍﻟﺴﻴﺎﺭﺓ ﻭﺩﻳﺤﺠﻲ ﺑﺎﻟﻨﻘﺎﻝ ﻣﺴﺘﻌﺠﻞ
.. ﻳﻤﺔ ﺭﺣﻤﺔ ﻋﻠﻰ ﻭﺍﻟﺪﻳﺞ ﻭﻳﻦ ﺻﺮﺗﻲ ﺍﻟﺰﻓﺔ ﺭﺍﺡ ﺗﻄﻠﻊ
ﻭﻣﻨﺘﻈﺮﻳﻨﺞ ﺗﻄﻠﻌﻴﻦ
ﻳﻌﻨﻲ ﺷﻨﻮ ﺭﺍﺡ ﺗﻌﺰﻟﻴﻦ ﺍﻟﻘﺎﻋﺔ ﻋﻠﻰ ﺍﻳﺪﺝ ﺍﻟﻴﻮﻡ
ﻣﺮﻭﺓ ﺣﺠﺔ ﻣﻦ ﻭﺭﺍﻩ ﺑﻨﺘﺮﺓ . .. ﺍﻧﺖ ﻫﻲ
ﺍﺗﻌﻤﺪﺕ ﺗﺤﺠﻲ ﻭﻳﺎﻩ ﺑﻨﻔﺲ ﺍﺳﻠﻮﺑﻪ
ﻣﺮﻳﻢ ﻭﺍﻛﻔﺔ ﻭﺭﺍﻫﺎ ﻭﺍﻧﻲ ﻭﺍﻛﻔﺔ ﻳﻤﻬﺎ ﺣﺘﻰ ﺍﻫﺪﻱ ﺍﻟﻨﻔﻮﺱ
ﻋﻘﺪ ﺣﻮﺍﺟﺒﻪ ﻭﺍﻟﺘﻔﺖ ﻭﻧﺰﻝ ﻧﻘﺎﻟﻪ ﻭﺑﺎﻭﻉ ﻋﻠﻰ ﻣﺮﻭﺓ
.. ﺍﻟﻌﻔﻮ ﺩﺗﺤﺠﻴﻦ ﻭﻳﺎﻱ
.. ﺍﻱ ﻭﻳﺎﻙ ﺍﻧﺖ
ﺭﺟﻊ ﺭﻓﻊ ﻧﻘﺎﻟﻪ ﻭﺣﺠﺔ ﻭﻳﺔ ﺍﻟﻤﺘﺼﻞ .. ﻳﻤﺔ ﻳﺎﻟﻠﻪ ﺍﻧﺎ ﺍﻧﺘﻈﺮﺝ ﺍﺳﺘﻌﺠﻠﻲ
ﻭﺍﻧﻬﻰ ﺍﻻﺗﺼﺎﻝ ﻭﺑﺎﻭﻉ ﻋﻠﻴﻨﺎ
.. ﺍﺗﻔﻀﻠﻲ ﺷﻨﻮ ﺭﺩﺗﻲ
ﻣﺮﻭﺓ ﺑﺘﻬﺠﻢ .. ﺍﻧﺖ ﻋﻠﻰ ﺍﻱ ﺍﺳﺎﺱ ﺗﺼﻴﺢ ﺑﻮﺟﻪ
ﺍﺧﺘﻲ ﻭﺗﻔﺸﻠﻬﺎ ﻛﺪﺍﻡ ﺍﻟﻨﺎﺱ ﻣﻨﻮ ﺍﻧﻄﺎﻙ ﺍﻟﺤﻖ ﺗﺘﺠﺎﻭﺯ ﻋﻠﻴﻬﺎ
ﺍﺷﺮ ﻋﻠﻰ ﻧﻔﺴﻪ .. ﺍﻧﺎ ﻣﺘﺠﺎﻭﺯ ﻋﻠﻰ ﺍﺧﺘﺞ ﻫﺎﻱ ﺷﻮﻛﺖ
ﺳﺤﺒﺖ ﻣﺮﻳﻢ ﻭﺣﻄﺘﻬﺎ ﻛﺪﺍﻣﻪ
ﻭﻛﺎﻟﺖ .. ﺍﺣﺠﻲ ﻣﻮ ﻫﻮ ﻫﺬﺍ ﺍﻟﻲ ﺣﺠﺔ ﻋﻠﻴﺞ
ﻣﺮﻳﻢ ﻫﺰﺕ ﺭﺍﺳﻬﺎ ﺑﺘﺄﻛﻴﺪ ﻭﻛﺎﻟﺖ
.. ﺍﻱ ﻫﻮ
ﺟﺎﻧﺖ ﺗﺤﺠﻲ ﻭﺗﺒﺎﻭﻉ ﻋﻠﻴﻪ ﺧﺎﻳﻔﺔ
ﻭﻛﺎﻟﺖ .. ﻣﺮﻭﺓ ﻋﻮﻓﻲ ﻣﺎﻋﻠﻴﺞ ﺑﻲ
ﻟﺰﻣﺖ ﺍﻳﺪ ﻣﺮﻭﺓ
ﺭﻓﻊ ﺣﺎﺟﺒﻪ ﻭﺣﺠﺔ .. ﺯﻳﻦ ﻣﺎ ﺩﺍﻣﺞ ﺣﺮﻳﺼﺔ ﻋﻠﻰ ﺍﺧﺘﺞ
ﻭﻫﻴﺞ ﺧﺎﻳﻔﺔ ﻋﻠﻴﻬﺎ ﻟﻴﺶ ﻣﺎ ﺟﻨﺘﻲ ﻭﻳﺎﻫﺎ
.....
ﻣﻦ ﺟﺎﻧﺖ ﻭﺍﻛﻔﺔ ﻭﺍﻟﺸﺒﺎﺏ ﻭﺍﻛﻔﻴﻦ ﻳﺼﺠﻤﻮﻥ ﺑﻴﻬﺎ
ﺍﺗﺴﻌﺖ ﻋﻴﻮﻥ ﻣﺮﻳﻢ ﻭﺣﻄﺖ ﺍﻳﺪﻫﺎ ﻋﻠﻰ ﺣﻠﻜﻬﺎ
.. ﺟﺬﺏ ﻣﺎﻛﻮ ﻫﻴﺞ ﺷﻲ ﺟﻨﺖ ﻭﺍﻛﻔﺔ ﻟﻮﺣﺪﻱ
.. ﺍﻱ ﻻﻥ ﺣﻀﺮﺗﺞ ﻣﻄﻔﻴﺔ ﺣﻘﺞ ﻣﻨﺘﻨﺘﺒﻬﻴﻦ ﻋﻠﻴﻬﻢ
ﺍﺫﺍ ﺣﻀﺮﺗﺞ ﺟﻨﺘﻲ ﻣﻠﺘﻬﻴﺔ ﺗﻜﻠﺒﻴﻦ ﻳﺸﻌﺮﺍﺗﺞ
ﺟﺎﻥ ﻳﺤﺠﻲ ﻭﻋﻴﻮﻧﻪ ﺗﺠﺪﺡ ﻧﺎﺭ
ﻭﻣﺮﻭﺓ ﺣﺠﺖ .. ﻭﺍﻧﺖ ﻣﻨﻮﺍ ﺗﺤﺎﺳﺒﻬﺎ ﺍﺧﻮﻫﺎ ﺍﺑﻮﻫﺎ
ﻋﻠﻤﻮﺩ ﺗﻔﺮﺽ ﺭﺟﻮﻟﺘﻚ ﻋﻠﻴﻬﺎ
.. ﺍﻧﻲ ﺑﺼﻔﺘﻲ ﺍﺑﻮ ﺍﻟﻌﺮﺱ ﻭﻫﻲ ﻣﺎ ﺩﺍﻣﻬﺎ ﻣﻦ ﻣﻌﺎﺯﻳﻤﻨﺎ
ﺍﺫﻥ ﺻﺎﺭﺕ ﻣﻦ ﻋﺮﺿﻲ ﻭﺗﺤﺖ ﺣﻤﺎﻳﺘﻲ ﻟﺤﺪ ﻣﺎ ﺗﻮﺻﻞ ﻟﺒﻴﺘﻪ
ﻗﻄﻊ ﻋﻠﻴﻨﺎ ﺍﻟﻜﻼﻡ ﺻﻮﺕ ﺍﻡ ﻗﺎﺳﻢ
ﺍﻗﺘﺮﺑﺖ ﻣﻦ ﻋﺪﻧﺎ ﻭﻭﺭﺍﻫﺎ ﻫﺪﻳﻞ ﻭﻫﺎﻟﺔ ﻭﺣﺠﺖ ﻭﻫﻲ ﺗﺒﺎﻭﻉ ﻋﺎﻟﻮﺟﻮﻩ ﺑﺘﺴﺎﺋﻞ
.. ﻫﺎ ﻳﻤﺔ ﻫﺸﺎﻡ ﺷﻜﻮ ﺷﺼﺎﻳﺮ ﻟﻴﺶ ﻣﻌﺼﺐ
ﺟﺎﻧﺖ ﺗﺤﺠﻲ ﻭﺗﺒﺎﻭﻉ ﻋﻠﻴﻨﺎ
ﻫﺸﺎﻡ ﺭﺟﻊ ﺷﻌﺮﻩ ﻟﻠﺨﻠﻒ ﻭﺍﻟﺮﺑﻄﺔ ﺟﺎﻧﺖ ﻣﺤﻠﻮﻟﺔ ﻣﻠﺘﻔﺔ ﻋﺎﻟﺮﻛﺒﺔ
.. ﻳﻤﺔ ﻫﻴﺞ ﻛﻠﺸﻲ ﻣﺎﻛﻮ ﺭﻭﺣﻲ ﺻﻌﺪﻱ ﻗﺎﺳﻢ ﺣﺮﻙ ﺍﻟﺪﻧﻴﺎ ﻳﻜﻮﻝ ﻭﻳﻦ ﺻﺮﺗﻮﺍ
ﻣﺮﻭﺓ .. ﺧﺎﻟﺔ ﺍﻡ ﻗﺎﺳﻢ ﺍﺑﻨﺞ ﺍﺗﻌﺪﺓ ﻋﻠﻰ ﺍﺧﺘﻲ ﺑﺎﻟﻜﻼﻡ
ﺍﻡ ﻗﺎﺳﻢ .. ﻳﺎ ﻳﻤﺔ ﻫﺸﺎﻡ ﻋﻠﻰ ﺑﺨﺘﻚ ﺍﻧﺖ ﺗﻌﺮﻑ ﻫﺎﻱ ﻣﻨﻮ
ﻫﺸﺎﻡ ﻋﺎﻗﺪ ﺍﻟﺤﻮﺍﺟﺐ ﺑﻐﻴﺾ .. ﻣﻨﻮ
.. ﻫﺎﻱ ﺍﺧﺖ ﺍﻟﻌﺮﻭﺱ ﺯﻭﺟﺔ ﻗﺎﺳﻢ ﻭﻫﺬﻧﻲ ﺧﻮﺍﺗﻬﺎ ﺍﻟﻜﺒﺎﺭ
ﺍﺷﺮﺕ ﻋﻠﻴﺔ ﻭﻋﻠﻰ ﻣﺮﻭﺓ
ﻣﺴﺢ ﻛﻒ ﺍﻳﺪﻩ ﻋﻠﻰ ﻭﺟﻬﻪ ﻭﺳﺤﺐ ﻧﻔﺲ ﻋﻤﻴﻖ
ﻭﺣﺠﺔ ﻣﻦ ﺑﻴﻦ ﺍﺳﻨﺎﻧﻪ ﻭﻫﻮ ﻣﺴﺘﻌﺠﻞ ﻳﺮﻳﺪ ﻳﺼﺮﻓﻨﺎ
.. ﺍﺳﻒ ﺧﻴﺘﻲ ﺣﻘﻜﻢ ﻋﻠﻴﺔ
ﻗﻄﻊ ﻛﻼﻣﻪ ﺻﻮﺕ ﻧﻘﺎﻟﻪ ﺭﻓﻌﻪ ﻭﺑﺎﻭﻉ ﻋﻠﻴﻪ ﻭﻛﻠﺐ ﻋﻴﻮﻧﻪ ﺑﻨﻔﺎﺫ ﺻﺒﺮ
.. ﻳﻤﺔ ﻫﺬﺍ ﻗﺎﺳﻢ ﺩﻳﺘﺼﻞ ﺍﺑﻮﺱ ﺍﻳﺪﻛﻢ ﺻﻌﺪﻭﺍ
ﺭﺍﺡ ﻳﻄﻴﻦ ﻋﻴﺸﺘﻲ ﻻﻥ ﻫﻮﺍﻱ ﺍﺗﺄﺧﺮﺗﻮﺍ
ﺍﻡ ﻗﺎﺳﻢ .. ﺣﺒﻴﺒﺔ ﻣﺴﺤﻴﻬﺎ ﺑﻮﺟﻬﻲ ﻭﻋﺬﺭﻳﻪ ﻣﻴﻌﺮﻓﻬﺎ ﻻﺧﺘﺞ
ﻭﺑﺎﻭﻋﺖ ﻟﻤﺮﻳﻢ .. ﻣﺴﺤﻲ ﺩﻣﻮﻋﺞ ﺧﺎﻟﺔ .
ﺍﻧﺎ ﺍﻋﻠﻤﻪ ﺑﺎﻟﺒﻴﺖ ﺟﺎﻧﺖ ﺗﺤﺠﻲ ﻭﺗﺨﺰﺭ ﺑﻬﺸﺎﻡ
ﺍﺑﺎﻭﻉ ﻋﻠﻴﻪ ﻫﻮ ﺑﺲ ﻳﻨﺎﻓﺦ ﻭﻳﺒﺎﻭﻉ ﻋﻠﻰ ﺳﺎﻋﺔ ﺍﻳﺪﻩ
ﺍﺗﺪﺧﻠﺖ ﺣﺘﻰ ﺍﻫﺪﻱ ﺍﻟﻤﻮﻗﻒ .. ﻻ ﺧﺎﻟﺔ ﻣﺼﺎﺭ ﺷﻲ
ﺍﺣﻨﺎ ﺍﻫﻞ ﺍﻥ ﺷﺎﺀ ﺍﻟﻠﻪ ﻭﻣﺎ ﺑﻴﻨﺎ ﺯﻋﻞ
ﻭﻣﺮﻭﺓ ﺗﺨﺰﺭ ﺑﻲ ﻭﻛﺎﻟﺖ .. ﺍﻟﻠﻪ ﺣﺎﺑﻪ ﻃﻠﻊ ﺍﺑﻨﺞ ﺟﺎﻥ ﺻﺎﺭ
ﺣﺴﺎﺑﻪ ﻋﺴﻴﺮ
ﺯﻡ ﺷﻔﺎﻳﻔﻪ ﺑﻐﻴﺾ ﻛﻮﺓ ﻻﺯﻡ ﺭﻭﺣﻪ ﻛﺪﺍﻡ ﺍﻣﻪ ﻣﺎ ﻳﺤﺠﻲ
ﻻﻥ ﺍﻟﻤﻮﻗﻒ ﻣﺘﺄﺟﺞ ﻣﺎ ﻳﺤﺘﺎﺝ ﻧﺎﺭ
ﺑﻌﺪﻫﺎ ﺍﻡ ﻗﺎﺳﻢ ﺍﺗﺮﺧﺼﺖ ﻣﻦ ﻋﺪﻧﺎ
ﻭ ﺍﻋﺘﺬﺭﺕ ﻣﺮﺓ ﺛﺎﻧﻴﺔ ﻣﻨﻲ ﻭﻣﻦ ﻣﺮﻭﺓ ﻋﻠﻰ ﺍﻻﺷﻜﺎﻝ ﺍﻟﻲ ﺻﺎﺭ
ﻫﺪﻯ
ﺑﻌﺪﻣﺎ ﻭﺩﻋﺖ ﺧﻮﺍﺗﻲ ﺟﻨﺖ ﻛﻠﺶ ﺧﺎﻳﻔﺔ ﺍﺗﻮﺳﻠﺖ ﻟﺸﻴﻤﺎﺀ ﺗﺠﻲ ﻭﻳﺎﻱ
ﺑﺲ ﺭﻓﻀﺖ ﻛﺎﻟﺖ ﻋﻴﺐ ﻣﺎ ﻳﺼﻴﺮ
ﺻﻴﺮﻱ ﺳﺒﺎﻋﻴﺔ
ﻭﺭﺍﺣﺖ ﻭﻋﺎﻓﺘﻨﻲ ﻳﻢ ﻗﺎﺳﻢ ﺍﻟﻲ ﻛﺎﻡ ﻣﻦ ﻣﻜﺎﻧﻪ ﻭﺳﺎﻋﺪﻧﻲ ﺣﺘﻰ ﺍﻛﻮﻡ ﻭﻳﺎﻩ
ﻭﻧﺰﻟﻨﺎ ﻣﻦ ﺍﻟﻜﻮﺷﺔ
ﻭﺍﺻﻮﺍﺕ ﺍﻟﻤﺰﺍﻳﻖ ﻭﺍﻟﻬﻼﻫﻞ ﻭﺍﻟﻬﻮﺳﺎﺕ ﺗﺘﺒﻌﻨﺎ
ﺑﻌﺪﻫﺎ ﺻﻌﺪﻧﺎ ﺑﺎﻟﺴﻴﺎﺭﺓ ﻭﻫﺎﻟﺔ ﺟﺎﻧﺖ ﻭﻳﺎﻱ ﺑﻜﻞ ﺧﻄﻮﺓ
ﺭﻭﺣﻲ ﺻﺎﺭﺕ ﻣﻌﻠﻜﺔ ﺑﻬﺎﻟﺔ ﻣﻦ ﻛﺪ ﺍﻟﺨﻮﻑ
ﺻﻌﺪﺕ ﺑﺎﻟﺴﻴﺎﺭﺓ ﻭﻛﻌﺪﺕ ﺍﻋﺪﻝ ﺑﺒﺪﻟﺘﻲ ﻭﺍﻟﺒﺮﻧﺺ
ﻭﻗﺎﺳﻢ ﻛﻞ ﺷﻮﻳﺔ ﻳﺘﺼﻞ ﻭﻳﺤﺠﻲ ﺑﻐﻀﺐ ﻭﻳﺔ ﻫﺸﺎﻡ ﺍﺧﻮﻩ
ﻫﻮ ﻣﻨﺎ ﺍﻧﻲ ﻛﻠﺒﻲ ﻳﺮﻳﺪ ﻳﻮﻛﻒ ﻣﻦ ﺍﻟﺨﻮﻑ
.....
ﻭﻫﺬﺍ ﻛﻞ ﺷﻮﻳﺔ ﺻﺎﺭﻋﻨﻲ ﺑﺼﻮﺗﻪ
ﻭﺍﻟﻠﻪ ﻳﻤﻜﻦ ﺭﺍﺡ ﻳﺼﻴﺮ ﺑﻴﺔ ﺳﻜﺮ
ﻣﻦ ﻭﺭﺓ ﺍﻟﻬﺒﻄﺎﺕ
ﻋﻔﻴﺔ ﻧﻘﺎﻝ ﻣﺎ ﻳﺴﻜﺘﻠﻪ ﻟﺤﻈﺔ
ﻭﺑﻌﺪﻫﺎ ﺍﺟﺎﻩ ﺍﺗﺼﺎﻝ ﺣﺠﺔ ﻗﺎﺳﻢ
.. ﺭﺍﺋﺪ ﻫﺎﻱ ﻭﺣﺪﺓ ﻭﻳﺎﻙ ﻭﻟﻚ ﻧﺎﻗﺺ ﺍﺷﻜﺪ ﺍﻧﺘﻈﺮﺗﻚ
ﻛﻞ ﺷﻮﻳﺔ ﺍﺑﺎﻭﻉ ﻋﺎﻟﺒﺎﺏ ﺍﻛﻮﻝ ﻫﺴﺔ ﻳﺪﺧﻞ ﻇﻠﻌﻲ ﻭﻳﻜﺤﻞ ﻋﻴﻨﻲ ﺑﻔﺮﺣﺘﻪ ﺑﻴﻮﻡ ﻋﺮﺳﻲ
ﺗﺎﻟﻲ ﺗﻜﻠﻲ ﻃﻴﺎﺭﺗﻲ ﺍﺗﺄﺧﺮﺕ ﻋﻠﻴﺔ
ﺟﺎﻥ ﻫﻮ ﻳﺤﺠﻲ ﻭﺍﻧﺎ ﺣﺎﺑﺴﺔ ﺍﻟﻨﻔﺲ ﻭﻣﺘﺸﻨﺠﺔ
ﺣﺴﻴﺖ ﺑﺼﻮﺕ ﻭﺷﺔ ﺑﺄﺫﺍﻧﻲ ﻭﻋﺮﻙ ﺟﺴﻤﻲ
ﻣﺎ ﺍﻋﺮﻑ ﺷﺼﺎﺭ ﺑﻴﺔ ﻣﻦ ﺫﻛﺮ ﺍﺳﻢ ﺭﺍﺋﺪ
ﺑﻌﺪﻫﺎ ﺍﻧﺘﺒﻬﺖ ﻋﻠﻰ ﺳﻴﺎﺭﺗﻨﺎ ﺍﺗﺤﺮﻛﺖ
ﻭﻭﺭﺍﻫﺎ ﺍﺗﺤﺮﻛﺖ ﺍﻟﺴﻴﺎﺭﺍﺕ ﻭﺍﺻﻮﺍﺕ ﺍﺑﻮﺍﻕ ﺍﻟﺴﻴﺎﺭﺍﺕ
ﺳﻮﻭﻫﺎ ﻣﺜﻞ ﺍﻟﻤﻮﺳﻴﻘﻰ
ﻃﻠﻌﺖ ﺍﻟﺰﻓﺔ ﻭﻋﻠﻰ ﻃﻮﻝ ﺍﻟﻄﺮﻳﻖ ﺍﻧﻲ ﻣﺪﻧﻜﺔ
ﻭﺍﺑﺎﻭﻉ ﻋﻠﻰ ﻣﺴﻜﺔ ﺍﻟﻮﺭﺩ ﺍﻟﻲ ﻻﺯﻣﺘﻬﺎ ﺑﻴﻦ ﺍﻳﺪﻳﺔ
ﺟﺎﻧﺖ ﺍﻻﻓﻜﺎﺭ ﺗﺘﻼﻃﻢ ﺑﺪﺍﺧﻞ ﺭﺍﺳﻲ ﻣﺜﻞ ﺍﻣﻮﺍﺝ ﺍﻟﺒﺤﺮ ﺍﻟﻬﺎﺋﺞ
ﺟﺎﻥ ﺍﻟﻮﺿﻊ ﺩﺍﺧﻞ ﺍﻟﺴﻴﺎﺭﺓ ﻛﻠﺶ ﻫﺎﺩﻯﺀ ﻋﻜﺲ
ﺍﺻﻮﺍﺕ ﺍﻟﻬﻮﺳﺔ ﺑﺨﺎﺭﺟﻬﺎ
ﻳﻌﻨﻲ ﺍﺫﺏ ﺍﻻﺑﺮﺓ ﺍﺳﻤﻊ ﺻﻮﺗﻬﺎ ﻣﻦ ﻛﺪ ﺍﻟﺴﻜﻮﻥ
ﻣﺎ ﺍﺳﻤﻊ ﻏﻴﺮ ﺍﻧﻔﺎﺱ ﻗﺎﺳﻢ ﺍﻟﻤﺨﻨﻮﻛﺔ
ﻛﻞ ﺷﻮﻳﺔ ﻳﺠﺮ ﺣﺴﺮﺓ
ﺍﻧﺘﺒﻬﺖ ﻟﻠﺴﻴﺎﺭﺓ ﺧﻔﻔﺖ ﺳﺮﻋﺘﻬﺎ
ﻭﺑﻠﺤﻈﺘﻬﺎ ﻋﺮﻓﺖ ﻭﺻﻠﻨﺎ ﻟﻤﻨﻄﻘﺔ ﺑﻴﺖ ﻗﺎﺳﻢ
ﺭﻓﻌﺖ ﻋﻴﻮﻧﻲ ﺣﺘﻰ ﺍﺷﻮﻑ ﺍﺣﻨﺎ ﻭﻳﻦ
ﻭﺟﺎﻥ ﺗﺠﻲ ﻋﻴﻮﻧﻲ ﻋﻠﻰ ﺷﻮﺍﺭﻉ ﻣﻨﻄﻘﺘﻲ
ﺍﻟﻘﺪﻳﻤﺔ ﺟﺎﻧﺖ ﺍﻟﺴﻴﺎﺭﺓ ﻋﺒﺎﻟﻚ ﻣﺘﻌﻤﺪﺓ
ﺗﻤﺮﺭﻧﻲ ﻋﻠﻰ ﻃﺮﻳﻖ ﻣﺪﺭﺳﺘﻲ ﺍﻟﻲ ﻫﻮ ﻧﻔﺴﻪ ﻳﻮﺻﻞ ﻟﺒﻴﺖ ﺍﻫﻞ ﻗﺎﺳﻢ
ﺍﺑﺎﻭﻉ ﻟﻠﺸﻮﺍﺭﻉ ﻭﺍﻟﺬﻛﺮﻳﺎﺕ ﻫﺠﻤﺖ ﻋﻠﻴﺔ
ﻭﺍﻟﻌﻴﻮﻥ ﻏﺮﻛﺖ
ﻭﻛﻠﺒﻲ ﻳﻨﺎﻏﻲ ﺍﻟﺬﻛﺮﻳﺎﺕ
ﻫﺎ ﻳﺎﺷﺎﺭﻉ ﺍﺣﻠﻔﻚ ﺑﺎﻟﻠﻪ ﻫﻢ ﺣﻨﻴﺖ ﻟﺨﻄﻮﺍﺗﻲ ﻋﻠﻰ ﺩﺭﺑﻚ
ﻣﺜﻠﻤﺎ ﻣﺎ ﺍﻧﺎ ﺣﻨﻴﺖ ﻟﻠﻤﺸﻲ ﻋﻠﻰ ﺭﺻﻴﻔﻚ
ﺑﻄﺌﺖ ﺍﻟﺴﻴﺎﺭﺓ ﺗﺮﻳﺪ ﺗﺴﺘﺪﻳﺮ ﺑﻨﻬﺎﻳﺔ ﺍﻟﺸﺎﺭﻉ
ﻭﺍﺻﻮﺍﺕ ﺍﻟﺴﻴﺎﺭﺍﺕ ﻻﺯﺍﻟﺖ ﺗﺘﺒﻌﻨﺎ
ﻓﺠﺎﺀﺓ ﻭﺟﺎﻥ ﺍﺷﻮﻑ ﻣﺸﺎﻋﻞ ﺍﻟﻤﺨﺒﻞ ﻳﺮﻛﺾ
ﻭﻳﺔ ﺳﻴﺎﺭﺗﻨﺎ ﻭﻳﺮﻛﺺ ﻭﻳﻬﻮﺱ
ﺷﻬﻜﺖ ﻭﺣﻄﻴﺖ ﺍﻳﺪﻱ ﻋﻠﻰ ﺣﻠﻜﻲ
ﻣﺎ ﺍﻋﺮﻑ ﺍﺿﺤﻚ ﻣﺪﺭﻱ ﺍﺑﺠﻲ ﻋﻠﻰ ﻫﺬﺍ ﺍﻟﻤﻮﻗﻒ
ﺷﻜﻠﻲ ﺭﺍﺡ ﺍﺻﻴﺮ ﻣﺨﺒﻠﺔ ﻣﺜﻞ ﻣﺸﺎﻋﻞ ﻭﺍﻓﻘﺪ ﻋﻘﻠﻲ
ﻳﻌﻨﻲ ﺳﺨﺮﻳﺔ ﺍﻟﻘﺪﺭ ﻃﺎﻟﺖ ﻭﻭﺻﻠﺖ ﻋﻠﻰ ﺍﺑﻮﺍﺏ ﺣﻴﺎﺗﻲ
ﺍﺑﺎﻭﻉ ﻟﻤﺸﺎﻋﻞ ﻻﺑﺲ ﻛﻼﺑﻴﺔ ﻣﻘﻠﻤﺔ ﺟﺒﻴﺮﺓ ﻭﻣﻌﻠﻚ
ﺟﻴﺲ ﺑﺮﻛﺒﺘﻪ ﻣﺒﻴﻦ ﻣﻤﻠﻲ ﺣﻠﻮﻳﺎﺕ ﺍﻟﻈﺎﻫﺮ ﻣﺎﺧﺬﻫﺎ ﻣﻦ ﺑﻴﺖ ﺍﻡ ﻗﺎﺳﻢ
ﺟﺎﻥ ﺣﺎﻓﻲ . ﻭﻓﺮﺣﺎﻥ
ﺍﺍﺥ ﻳﺎﻣﺸﺎﻋﻞ ﻭﺍﻟﻠﻪ ﺍﻟﻲ ﻭﻳﺎﻙ ﻣﻮﺍﻗﻒ
ﻭﺷﻜﻠﻚ ﺭﺍﺡ ﺗﺼﻴﺮ ﺍﺷﺎﺭﺓ ﻭﻣﻌﻠﻢ ﺗﺎﺭﻳﺨﻲ ﻋﻠﻰ ﻛﻞ ﺍﻃﻼﻝ ﺫﻛﺮﻳﺎﺗﻲ
ﻻﻋﺐ ﺩﻭﺭ ﺍﻟﺒﻄﻮﻟﺔ ﻓﻲ ﻛﻞ ﺫﻛﺮﻯ ﻣﻦ ﺫﻛﺮﻳﺎﺗﻲ
ﺍﺍﺗﻮﻗﻔﺖ ﺍﻟﺴﻴﺎﺭﺓ ﻭﺑﺪﻭﺍ ﺍﻟﻨﺎﺱ ﻳﻨﺰﻟﻮﻥ ﻣﻦ ﺳﻴﺎﺭﺍﺗﻬﻢ ﻭﻗﺎﺳﻢ
ﺳﺒﻘﻨﻲ ﻭﻧﺰﻝ ﻣﻦ ﺍﻟﺴﻴﺎﺭﺓ ﻳﺮﻳﺪ ﻳﺴﺘﺪﻳﺮ
ﺣﺘﻰ ﻳﻔﺘﺤﻠﻲ ﺍﻟﺒﺎﺏ ﻭﻳﻨﺰﻟﻨﻲ
ﺍﺑﺎﻭﻉ ﻟﻤﺸﺎﻋﻞ ﺍﻟﻤﺨﺒﻞ ﻭﺍﻛﻒ ﻳﺮﻛﺺ
ﻭﻳﺼﻴﺢ ﻋﺎﻟﻨﺎﺱ
ﺻﺮﺕ ﺍﺳﺘﻨﺠﺪ ﺑﻤﺸﺎﻋﻞ
( ﻳﺎﻣﺸﺎﻋﻞ ﻣﺎ ﺍﻟﻠﻪ ﻳﻬﺪﻳﻚ ﺍﻟﻲ
ﻭﺗﻬﺪ ﻋﻠﻰ ﻗﺎﺳﻢ ﺑﺎﻟﺤﺠﺎﺭ ﻋﻠﻰ ﺭﺍﺳﻪ ﻭﺗﻨﺴﻴﻪ
ﺍﺳﻤﻪ ﻭﺍﺳﻢ ﻫﺪﻯ ﻭﻋﺸﻴﺮﺗﻬﺎ )
ﺿﺤﻜﺖ ﻋﻠﻰ ﺍﻓﻜﺎﺭﻱ ﺍﻟﻤﻌﻮﻗﺔ
ﺍﻧﻔﺘﺢ ﺍﻟﺒﺎﺏ ﻭﻗﺎﺳﻢ ﻭﺍﻛﻒ ﻳﻤﻪ ﺳﺎﺩ ﻋﻠﻴﺔ ﺍﻟﺮﺅﻳﺔ
ﻧﺰﻟﺖ ﻣﻦ ﺍﻟﺴﻴﺎﺭﺓ ﻭﺟﺘﻲ ﻫﺎﻟﺔ ﺳﺎﻋﺪﺗﻨﻲ ﺍﻧﺰﻝ
......
ﺑﻌﺪﻣﺎ ﻧﺰﻟﺖ ﺑﺪﻳﺖ ﺍﻣﺸﻲ ﻭﻳﺔ ﻗﺎﺳﻢ ﻣﺘﺠﻪ ﻟﺒﻴﺘﻬﻢ
ﺑﺎﻭﻋﺖ ﺑﺎﺏ ﺑﻴﺘﻬﻢ ﺟﺎﻥ ﻣﻔﺘﻮﺡ ﻋﻠﻰ ﻭﺳﻌﻪ
ﻟﻜﻦ ﻓﺠﺄﺀﺓ ﺳﻤﻌﻨﺎ ﺻﻮﺕ ﺭﻣﻲ ﺑﺎﻟﺠﻮ
ﺍﻧﺘﺒﻬﺖ ﻋﻠﻰ ﻗﺎﺳﻢ ﺍﺗﻮﻗﻒ ﺑﻤﻜﺎﻧﻪ ﻭﺍﻧﻲ ﺍﺗﻮﻗﻔﺖ ﻭﻳﺎﻩ
ﺭﻓﻌﺖ ﺭﺍﺳﻲ ﻭﺑﺎﻭﻋﺖ ﺑﺄﺗﺠﺎﻩ ﻧﻈﺮﺍﺕ ﻗﺎﺳﻢ
ﻭﺟﺎﻥ ﺍﺷﻬﻚ ﺑﺼﻮﺕ ﻣﻜﺘﻮﻡ ﺣﻄﻴﺖ ﺍﻳﺪﻱ ﻋﻠﻰ ﺣﻠﻜﻲ
ﻣﺼﺪﻭﻣﺔ
ﺭﺍﺋﺪ ﺭﺍﻓﻊ ﺳﻼﺣﻪ ﻟﻴﻔﻮﻙ ﻭﻭﺍﻛﻒ ﻳﻢ ﻋﺘﺒﺔ ﺑﺎﺏ ﺑﻴﺖ ﻗﺎﺳﻢ
ﻛﺎﻡ ﻳﺮﻣﻲ ﻭﻋﻴﻮﻧﻪ ﺗﻠﻤﻊ ﺍﻟﻢ ﺣﺴﺮﺓ
ﻭﺣﺠﺔ ﺑﻌﺎﻟﻲ ﺻﻮﺗﻪ ﻟﻠﻜﺼﺎﺏ
.. ﻳﺎﻟﻠﻪ ﻫﺴﺔ ﺍﺑﺪﻱ ﺍﺫﺑﺢ ﺟﻮﺓ ﺭﺟﻴﻠﻦ
ﺍﻟﻐﺎﻟﻲ
ﺟﺎﻥ ﺟﺎﻳﺐ ﺧﺮﻭﻑ ﻭﺑﺪﺓ ﺍﻟﻜﺼﺎﺏ ﻳﺬﺑﺢ
ﺍﺑﺎﻭﻉ ﻟﻘﺎﺳﻢ ﺟﺎﻥ ﻳﺒﺘﺴﻢ ﺑﻔﺨﺮ
ﻭﻛﺎﻝ .. ﻭﺍﻟﻠﻪ ﻋﺮﻓﺘﻚ ﺭﺍﺡ ﺗﺤﻀﺮ
ﺍﺟﺔ ﺭﺍﺋﺪ ﻭﺍﺗﻘﺪﻡ ﻋﻠﻴﻪ
ﻭﻛﺎﻝ .. ﻣﺒﺎﺭﻙ ﻋﺮﺳﻚ ﻳﺎﻟﻈﻠﻊ ﺷﻠﻮﻥ ﻣﺎ ﺍﺣﻀﺮ ﺯﻓﺔ ﺍﻟﻐﺎﻟﻲ
ﺍﺗﻘﺪﻡ ﻟﻘﺎﺳﻢ ﻭﻟﻤﻪ ﺑﻴﻦ ﺫﺭﺍﻋﻪ ﻭﺍﺗﺒﺎﺩﻟﻮﺍ ﺍﻻﺣﻀﺎﻥ
ﻭﺍﻧﻲ ﻭﺍﻛﻔﺔ ﺟﺎﻣﺪﺓ ﺑﻤﻜﺎﻧﻲ ﻭﺍﻟﺮﺟﻔﺔ ﺻﺎﺭﺕ ﺗﺴﺮﻱ ﺑﺪﺍﺧﻞ ﻇﻠﻮﻋﻲ ﻣﻦ ﺍﻟﻤﻨﻈﺮ ﺍﻟﻜﺪﺍﻣﻲ
ﻳﺎﺭﺑﻲ ﺷﻨﻮ ﻫﺎﻟﻤﺤﻨﺔ ﺗﺮﻛﺖ ﺭﻫﻒ ﻭﺭﺍﻱ ﺑﺎﻟﻘﺎﻋﺔ ﻣﻨﻬﺎﺭﺓ
ﻭﺍﺟﻴﺖ ﻭﻟﻜﻴﺖ ﺭﺍﺋﺪ ﻣﻨﺘﻈﺮﻧﺎ ﺑﻌﺘﺒﺔ ﺍﻟﺒﺎﺏ
ﺍﻟﺪﻧﻴﺎ ﺷﻜﺪ ﻏﺮﻳﺐ ﺍﻣﺮﻫﺎ
ﺣﻄﻤﺖ ﺍﺭﺑﻌﺔ ﻗﻠﻮﺏ ﺟﺎﻧﺖ ﻋﺎﻣﺮﺓ ﺑﺎﻟﺤﺐ
ﺑﺲ ﻣﻊ ﺍﻻﺳﻒ ﻭﻻ ﻭﺣﺪﺓ ﻣﻦ ﻫﺎﻱ ﺍﻟﻘﻠﻮﺏ ﺍﻟﻤﺴﻜﻮﻧﺔ
ﺑﺎﻟﺤﺐ .. ﻭﺍﺣﺪ ﺑﻴﻬﻢ ﺳﻌﻴﺪ
ﻫﻮ ﺻﺤﻴﺢ ﺍﻟﺤﺐ ﻣﻮﺟﻮﺩ ﻟﻜﻦ ﻃﺮﻳﻖ ﺍﻟﻮﺻﻮﻝ ﺍﻟﻪ ﻭﻋﺮ ﻭﺻﻌﺐ
ﺑﺎﻻﺧﻴﺮ ﺻﻔﻴﻨﺎ ﻭﻻ ﻭﺍﺣﺪ ﺑﻴﻨﺎ ﻛﺪﺭ ﻳﻨﺎﻝ ﻣﺤﺒﻮﺑﻪ
ﺍﻧﺘﺒﻬﺖ ﻋﻠﻰ ﺻﻮﺕ ﺭﺍﺋﺪ ﺟﺎﻱ ﻳﻬﻨﻴﻨﻲ
.. ﻣﺒﺮﻭﻙ ﻋﻠﻴﺞ ﻳﺎﻣﺮﺕ ﺍﻟﻐﺎﻟﻲ
ﺣﺠﺔ ﻫﺎﻱ ﺍﻟﻜﻠﻤﺘﻴﻦ ﻭﺍﺑﺘﻌﺪ ﻣﺨﻨﻮﻙ
ﻭﺍﻧﺘﺒﻬﺖ ﻋﻠﻰ ﻗﺎﺳﻢ ﺣﺜﻨﻲ ﺣﺘﻰ ﺍﺗﺤﺮﻙ ﻭﺍﻣﺸﻲ
ﺍﺩﺧﻞ ﻟﻠﺒﻴﺖ ﻭﺍﺟﺎﻧﻲ ﺻﻮﺕ ﺍﻡ ﻗﺎﺳﻢ
.. ﻳﻤﺔ ﻓﻮﺗﻲ ﻭﺧﻄﻲ ﺑﺮﺟﻠﺞ ﺍﻟﻴﻤﻴﻦ
ﺣﺘﻰ ﺗﺨﻀﺮ ﺩﺍﺭﻧﺎ ﺑﻴﺞ ﻭﺑﺠﻬﺎﻝ ﻗﺎﺳﻢ
ﺟﺎﻧﺖ ﺗﺤﺠﻲ ﺑﺼﻮﺕ ﻣﺴﻤﻮﻉ ﺗﺮﻳﺪ ﺗﺴﻤﻊ ﺍﻟﻌﺬﺍﻝ
ﺑﻌﺪﻣﺎ ﺩﺧﻠﻮﻧﻲ ﻟﻠﺒﻴﺖ ﻧﺰﻋﻮﺍ ﻋﻨﻲ ﺍﻟﺒﺮﻧﺺ
ﻭﺑﻌﺪﻫﺎ ﺻﻌﺪﻧﺎ ﺍﻧﺎ ﻭﻗﺎﺳﻢ ﻓﻮﻙ ﻟﻠﻐﺮﻓﺔ
ﻭﺍﻧﺎ ﻣﻦ ﻛﺪ ﺍﻟﺨﻮﻑ ﺍﺣﺲ ﺻﺮﻧﺎ ﺍﻧﻲ ﻭﺍﻟﺨﻮﻑ ﺍﺧﻮﺍﻥ
ﻻﻥ ﺟﺎﻥ ﻭﻳﺎﻱ ﺑﻜﻞ ﺧﻄﻮﺓ ﺍﺧﻄﻴﻬﺎ ﻭﻳﺔ ﻗﺎﺳﻢ
ﺩﺧﻠﻨﺎ ﻟﻠﻐﺮﻓﺔ ﻭﺍﻧﺴﺪ ﺍﻟﺒﺎﺏ ﻭﺭﺍﻧﺎ
ﻭﺍﻟﺘﻔﺘﺖ ﻋﺎﻟﺒﺎﺏ ﺍﻟﻤﺴﺪﻭﺩ ﺍﺑﺎﻭﻉ ﻋﻠﻴﻪ ﺑﺠﺰﻉ
ﻟﻔﺖ ﺍﻧﺘﺒﺎﻫﻲ ﺣﺮﻛﺔ ﻗﺎﺳﻢ
ﺍﺗﻮﻏﻞ ﻟﺪﺍﺧﻞ ﺍﻟﻐﺮﻓﺔ
ﺣﻞ ﺭﺑﻄﺔ ﺍﻟﻌﻨﻖ ﻣﺜﻞ ﺍﻟﻤﺨﻨﻮﻙ ﻭﺷﻤﺮﻫﺎ ﻋﺎﻟﻜﺮﺳﻲ
ﻭﻟﺤﻜﺘﻬﺎ ﺍﻟﺴﺘﺮﺓ ﻭﻓﺘﺢ ﺍﻭﻝ ﺩﻛﻤﺘﻴﻦ ﻣﻦ ﺍﻟﻘﻤﻴﺺ
ﻭﻣﺴﺢ ﻋﻠﻰ ﻭﺟﻬﻪ ﻭﺳﺤﺐ ﻧﻔﺲ ﻋﻤﻴﻖ ﻭﺑﺎﻭﻉ ﻋﻠﻴﺔ
ﻟﻜﺎﻧﻲ ﺑﻌﺪﻧﻲ ﻭﺍﻛﻔﺔ ﺑﻤﻜﺎﻧﻲ ﻣﺜﻞ ﺍﻟﻄﻔﻠﺔ ﺍﻟﺘﺎﻳﻬﺔ ﺍﻟﻤﺎ ﺗﻌﺮﻑ ﺍﻟﻄﺮﻳﻖ ﻣﻨﻴﻦ
ﺍﺑﺘﺴﻢ ﻋﻠﻰ ﺷﻜﻠﻲ ﻭﻋﻴﻮﻧﻪ ﺳﺎﻓﺮﺕ ﻋﻠﻰ ﻃﻮﻟﻲ
ﺟﺎﻧﺖ ﻧﻈﺮﺓ ﺍﻻﻋﺠﺎﺏ ﺑﺎﻟﻤﻨﻈﺮ ﺍﻟﻜﺪﺍﻣﻪ ﻭﺍﺿﺤﺔ
ﻟﻤﻴﺖ ﺷﻔﺎﻳﻔﻲ ﺑﺤﺬﺭ
ﻭﻫﻮ ﺣﺠﺔ .. ﺍﺳﺘﻐﻔﺮ ﺍﻟﻠﻪ ﻳﺎﺑﺔ ﺷﺒﻴﺞ ﻣﺒﺮﻃﻤﺔ ﺍﻟﺸﻔﺎﻳﻒ
ﻻ ﺗﺨﺎﻓﻴﻦ ﺗﺮﺓ ﺑﻌﺪﻧﺎ ﻣﺎ ﻛﻠﻨﺎ ﺣﻼﻝ
.. ﺗﻌﺎﻟﻲ ﻓﻮﺗﻲ ﺍﺭﺗﺎﺣﻲ ﺧﻮﻣﺎ ﺗﻜﻀﻴﻬﺎ ﻋﻠﻴﻨﺎ ﻭﺍﻛﻔﺔ ﻳﻢ ﺍﻟﺒﺎﺏ
.. ﻻ ﻣﺎ ﺍﻏﻴﺪ ( ﺍﺭﻳﺪ ) ﺧﻠﻴﻨﻲ ﻫﻨﺎ ﻣﻐﺘﺎﺣﺔ ( ﻣﺮﺗﺎﺣﺔ )
.....
ﺍﻱ ﻫﻮ ﻣﺒﻴﻦ ﻛﻠﺶ ﻣﺮﺗﺎﺣﺔ ﻭﺍﻟﺪﻟﻴﻞ ﻋﻴﻮﻧﺞ
ﺍﻟﺨﺎﻳﻔﺔ
.. ﻻ ﺍﻧﻲ ﻣﺎ ﺧﺎﻳﻔﺔ ﺑﺲ ﺷﻮﻳﺔ ﻫﻮﺍﻳﺔ ﻏﺎﺡ ( ﺭﺍﺡ ) ﺍﻣﻮﺕ ﻣﻦ ﺍﻟﺨﻮﻑ
.. ﺍﻟﻈﺎﻫﺮ ﺍﻧﺘﻲ ﺷﻜﻠﺞ ﺭﺍﺡ ﺗﺘﻌﺒﻴﻨﻲ ﻭﻳﺎﺝ
ﺷﻮﻓﻲ ﺍﻧﺎ ﻃﺎﻟﻊ ﻭﺍﻧﺘﻲ ﺍﺧﺬﻱ ﺭﺍﺣﺘﺞ ﻭﺑﺪﻟﻲ ﻣﻼﺑﺴﺞ
ﺟﺎﻥ ﻳﺤﺠﻲ ﻭﻋﻴﻮﻧﻪ ﻻﺯﺍﻟﺖ ﺗﺴﺮﻕ ﺍﻟﻨﻈﺮﺍﺕ
ﺣﺴﻴﺖ ﺑﺮﻭﺣﻲ ﻋﺒﺎﻟﻚ ﻭﺍﻛﻔﺔ ﻛﺪﺍﻣﻪ ﻋﺎﺭﻳﺔ
ﺑﺪﻭﻥ ﻣﻼﺑﺲ
( ﻃﻠﻊ ﻣﻦ ﺍﻟﻐﺮﻓﺔ ﺍﻭ ﺑﺎﻻﺣﺮﻯ ﺍﻧﻬﺰﻡ ﻗﺒﻞ ﻻ ﻳﻀﻌﻒ
ﻛﺪﺍﻣﻬﺎ ﻭﻳﻔﻘﺪ ﺻﺒﺮﻩ ﻭﻳﻘﻊ ﺍﻟﻤﺤﻈﻮﺭ )
ﺳﺤﺒﺖ ﻧﻔﺲ ﺑﺮﺍﺣﺔ ﺍﻧﺘﺒﻬﺖ ﻟﻨﻔﺴﻲ ﺟﻨﺖ ﺣﺎﺑﺴﺔ ﺍﻧﻔﺎﺳﻲ ﺑﻮﺟﻮﺩﻩ
ﺍﺗﻮﻏﻠﺖ ﻟﻠﻐﺮﻓﺔ ﺍﺑﺎﻭﻉ ﻋﻠﻴﻬﺎ ﻭﺑﺎﻭﻉ ﻟﺸﻜﻠﻲ ﺑﺎﻟﻤﺮﺍﻳﺎ
ﺍﻛﺘﺎﻓﻲ ﻭﺯﻧﻮﺩﻱ ﺟﺎﻧﺖ ﻛﻠﻬﺎ ﻃﺎﻟﻌﺔ
ﻛﻌﺪﺕ ﻋﺎﻟﺴﺮﻳﺮ ﻭﺩﻧﻜﺖ ﻭﻧﺰﻋﺖ ﺍﻟﺤﺬﺍﺀ ﺍﻟﻌﺎﻟﻲ
ﺧﺮﺏ ﻭﺍﻟﻠﻪ ﺍﺗﻜﻄﻌﺖ ﺭﺟﻠﻴﺔ ﻣﻦ ﻭﺭﺍﻩ
ﻭﺍﺗﻨﻬﺪﺕ ﺑﺮﺍﺣﺔ
ﻟﻜﻦ ﻣﺎ ﻟﺤﻜﺖ ﺍﺧﺬ ﺍﻧﻔﺎﺳﻲ
ﺩﺧﻠﺖ ﺍﻡ ﻗﺎﺳﻢ ﻭﺑﻨﺘﻬﺎ ﺍﻟﺠﺒﻴﺮﺓ ﻓﺎﻃﻤﺔ ﻭﻣﻨﻰ
ﺟﺎﻧﻮﺍ ﺷﺎﻳﻠﻴﻦ ﺻﻴﻨﻴﺔ ﺍﻟﻌﺸﺎ ﻣﻐﻄﺎﻳﺔ
ﺍﻡ ﻗﺎﺳﻢ .. ﻫﺎ ﻋﺮﻭﺳﺘﻨﺎ ﺍﺷﻮ ﺑﻌﺪﺝ ﺑﺎﻟﺒﺪﻟﺔ
ﺑﻠﻌﺖ ﺭﻳﻜﻲ ﻭﻛﻤﺖ ﺍﻣﺘﻤﺖ
.. ﻫﺎ ﺍﻧﺎ ﻫﺴﻪ ﺍﻏﻴﺪ ( ﺍﺭﻳﺪ ) ﺍﺑﺪﻝ ﻭﺍﻧﺘﻮﺍ ﺩﺧﻠﺘﻮﺍ
ﻣﻨﻰ .. ﺍﺻﻼ ﺣﺘﻰ ﻟﻮ ﺭﺩﺗﻲ ﺗﺒﺪﻟﻴﻦ ﻣﺎ ﺭﺍﺡ ﺗﻜﺪﺭﻳﻦ ﺗﻨﺰﻋﻴﻦ ﺍﻟﺒﺪﻟﺔ ﻟﻮﺣﺪﺝ
ﺑﺎﻟﻠﻪ ﺷﻮ ﺗﻌﺎﻟﻲ
ﺍﺗﺠﻬﺖ ﻋﻠﻴﺔ ﻭﺻﺪﻙ ﻛﻌﺪﺕ ﺑﺎﻟﺮﺑﻊ ﺳﺎﻋﺔ
ﺗﻨﺰﻋﻨﻲ ﺍﻟﺒﺪﻟﺔ ﻭﺗﻔﺘﺢ ﺍﻟﺘﺴﺮﻳﺤﺔ
ﻋﺒﺎﻟﻚ ﻛﺎﻋﺪﺓ ﺑﻮﺭﺷﺔ ﺗﺼﻠﻴﺢ ﺳﻴﺎﺭﺍﺕ
ﻭﺍﻡ ﻗﺎﺳﻢ ﻭﻓﺎﻃﻤﺔ ﻳﺘﺤﺮﻛﻮﻥ ﺑﺎﻟﻐﺮﻓﺔ ﺍﻧﺘﺒﻬﺖ ﻟﻔﺎﻃﻤﺔ
ﺟﺎﻧﺖ ﺷﺎﻳﻠﺔ ﺛﻮﺏ ﺍﺑﻴﺾ
ﺍﻗﺘﺮﺑﺖ ﻣﻨﻲ ﻭﺣﻄﺘﻪ ﻋﺎﻟﺴﺮﻳﺮ
ﻋﺰﺯﺓ ﻫﺬﺍ ﺭﻭﺏ ﺍﻟﻨﻮﻡ
ﺻﺮﺕ ﺍﺭﻣﺶ ﺑﻌﻴﻮﻧﻲ ﻣﻦ ﺍﻻﺣﺮﺍﺝ
ﻭﺍﻡ ﻗﺎﺳﻢ ﺟﺎﻧﺖ ﺷﺎﻳﻠﺔ ﺩﺷﺪﺍﺷﺔ ﺭﺟﺎﻟﻴﺔ ﺑﻴﻀﺔ ﻭﺣﻄﺘﻬﺎ ﻳﻢ
ﺍﻟﺮﻭﺏ
ﻭﺑﻌﺪ ﻣﺮﻭﺭ ﺳﺎﻋﺔ
ﺟﻨﺖ ﻛﺎﻋﺪﺓ ﻋﺎﻟﺴﺮﻳﺮ
ﺑﻌﺪﻣﺎ ﺟﻬﺰﺗﻨﻲ ﻣﻨﻰ
ﺑﻌﺪﻫﺎ ﺍﺳﺘﻠﻤﺘﻨﻲ ﺍﻡ ﻗﺎﺳﻢ ﻭﻛﻌﺪﺕ ﺗﻮﺻﻴﻨﻲ
ﺍﺩﻳﺮ ﺑﺎﻟﻲ ﻋﻠﻰ ﺍﺑﻨﻬﺎ ﻭﺍﺳﻌﺪﻩ
ﺍﺟﻴﺖ ﺍﺑﺠﻲ ﻫﻮ ﻣﻨﻮ ﺍﻟﻤﻔﺮﻭﺽ ﺗﻮﺻﻲ ﺍﻧﻲ ﻟﻮ ﺍﺑﻨﻬﺎ
ﺑﻌﺪﻫﺎ ﻃﻠﻌﺖ ﺍﻡ ﻗﺎﺳﻢ ﻭﻣﻨﻰ ﻭﺑﻘﺖ ﻓﺎﻃﻤﺔ ﺍﺧﺖ ﻗﺎﺳﻢ ﺍﻟﺠﺒﻴﺮﺓ
ﻳﻤﻲ ﺗﻔﻬﻤﻨﻲ ﺷﻨﻮ ﺍﺳﻮﻱ ﻣﻦ ﻳﻘﺘﺮﺏ ﻣﻨﻲ ﻗﺎﺳﻢ
ﻓﺎﻃﻤﺔ ﺑﺼﻮﺕ ﻗﻮﻱ ﻛﻤﻠﺖ ﻛﻼﻣﻬﺎ
.. ﻫﺎﺝ ﺍﺧﺬﻱ ﻫﺎﻱ ﺍﻟﻘﻄﻌﺔ ﺍﻟﺒﻴﻀﺔ ﺧﻠﻴﻬﺎ ﺟﻮﺓ ﺍﻳﺪﺝ
ﻳﻤﺔ ﺍﻧﺎ ﻫﻲ ﻛﺎﻟﺖ ﻫﻴﺞ ﻭﺍﻧﻲ ﻏﺪﻳﺖ ﻣﺎﻱ ﻣﻦ ﺍﻟﻤﺴﺘﺤﻰ
ﻋﻤﻲ ﺳﺘﺮ ﺍﻟﻠﻪ ﺿﺤﻰ ﺍﺧﺘﻲ ﻋﻠﻰ ﺍﻻﻗﻞ ﺟﺎﻧﺖ ﺷﻮﻳﺔ ﺧﺠﻼﻧﺔ
ﺑﺲ ﻫﻨﺎ ﺍﻻﺧﺖ ﺟﺎﻧﺖ ﺗﺤﺠﻲ ﺑﺎﻟﻘﻠﻢ ﺍﻟﻌﺮﻳﺾ
ﻭﻧﻮﺏ ﻫﻲ ﺍﻟﻠﻪ ﻳﺤﻔﻈﻬﺎ ﺗﺤﺠﻲ ﺑﺠﺪﻳﺔ ﻳﻌﻨﻲ ﺗﺨﻠﻲ ﺍﻟﻮﺍﺣﺪ ﻏﺼﺐ ﻋﻨﻪ ﻳﺮﺗﻌﺪ
ﻛﺎﻣﺖ ﻭﻫﻲ ﺗﻜﻮﻝ
.. ﻳﺎﻟﻠﻪ ﺑﻌﺪ ﻣﺎ ﺍﻭﺻﻴﺞ ﺣﺒﻴﺒﺘﻲ
ﺷﻮﻳﺔ ﺍﻧﺘﻲ ﺍﺗﺤﻠﺤﻲ ﻣﻮ ﺗﺼﻴﺮﻳﻦ ﻓﺎﻫﻴﺔ ﺗﺮﺓ ﺍﻟﺮﺟﺎﻝ
ﻳﺤﺐ ﺍﻟﺒﻨﻴﺔ ﺍﻟﻔﻄﻨﺔ ﻭﺍﻟﺤﺮﻛﺔ
ﻳﻤﺔ ﻫﻲ ﻣﻨﺎ ﺿﺨﻤﺔ ﻭﻃﻮﻳﻠﺔ ﻭﻧﻮﺏ ﺗﺤﺠﻲ ﻭﻳﺎﻱ ﻫﻴﺞ ﻋﺒﺎﻟﻚ ﻋﺘﺮﻳﺲ
ﺑﺤﻴﺚ ﻫﻲ ﻣﻦ ﻛﺎﻣﺖ ﻣﻦ ﻣﻜﺎﻧﻬﺎ ﺗﺮﻳﺪ ﺗﻄﻠﻊ
ﺍﻧﺎ ﻛﺒﻞ ﻛﻤﺰﺕ ﻣﻦ ﻣﻜﺎﻧﻲ ﻭﻛﻔﺖ ﻛﺪﺍﻣﻬﺎ
ﻋﺎﻳﺰ ﺑﺲ ﺍﺧﺬﻟﻬﺎ ﺗﺤﻴﺔ ﻣﺜﻞ ﺍﻟﺠﻨﺪﻱ
ﺑﻌﺪﻫﺎ ﻫﻲ ﻃﻠﻌﺖ ﻣﻦ ﺍﻟﻐﺮﻓﺔ ﻭﺳﺪﺕ ﺍﻟﺒﺎﺏ
ﻭﺍﻧﺎ ﺻﺮﺕ ﺍﺣﻮﻡ ﺑﺎﻟﻐﺮﻓﺔ
ﻣﺜﻞ ﺍﻟﺒﺰﻭﻧﺔ ﺣﺎﺑﺴﻴﻬﺎ ﺑﻐﺮﻓﺔ ﻟﻮﺣﺪﻫﺎ
ﻳﺎﺭﺑﻲ ﺷﻠﻮﻥ ﺭﺍﺡ ﺍﺗﻌﺪﻱ ﻫﺎﻱ ﺍﻟﻠﻴﻠﺔ ﻭﻳﺔ ﻗﺎﺳﻢ ﻫﺎﻱ
ﻣﻌﻘﻮﻟﺔ ﺍﺻﻴﺮ ﺳﺒﺎﻋﻴﺔ
ﻭﺍﺗﺤﻤﻞ ﻗﺎﺳﻢ ﻳﺠﻲ ﻳﺎﺧﺬﻧﻲ ﻭﻳﺴﻮﻳﻨﻲ ﻣﺮﺗﻪ
ﻛﻮﻝ ﻭﻓﻌﻞ
ﺟﻨﺖ ﺍﺭﻭﺡ ﻭﺍﺭﺟﻊ ﺑﺎﻟﻐﺮﻓﺔ
ﻳﺎﺭﺑﻲ ﺷﻠﻮﻥ ﺑﻴﺔ ﻭﻳﻦ ﺍﺭﻭﺡ ﺍﺫﺍ ﺷﺎﻑ ﺍﻟﻮﺣﻤﺔ
ﻭﺳﻤﻌﺖ ﺻﻮﺗﻪ ﺻﺎﺭ ﻗﺮﻳﺐ ﻋﺎﻟﺒﺎﺏ
ﻓﺘﺢ ﺍﻟﺒﺎﺏ ﻭﺩﺧﻞ ﻭﻭﻛﻌﺖ ﻋﻴﻨﻪ ﻋﻠﻴﺔ
ﺳﺤﺐ ﻧﻔﺲ ﻋﻤﻴﻖ ﻭﻏﺾ ﺑﻨﻈﺮﻩ ﻋﻨﻲ ﻭﻣﺴﺢ ﻋﻠﻰ ﻭﺟﻬﻪ
ﻭﺑﻌﺪﻫﺎ ﺩﺍﺭ ﻭﺟﻬﻪ ﻭﺭﺍﺡ ﺍﺧﺬ ﺍﻟﺪﺷﺪﺍﺷﺔ ﻭﺍﺗﻮﺟﻪ ﻋﺎﻟﺤﻤﺎﻡ
ﺍﺳﻤﻌﻪ ﻳﺤﺠﻲ ﻭﻳﺔ ﻧﻔﺴﻪ
.. ﻳﺎﻟﻠﻪ ﻫﺎﻙ ﺍﺳﺘﻠﻢ ﻳﻘﺎﺳﻢ
ﺷﻠﻮﻥ ﺭﺍﺡ ﺍﺗﺤﻤﻞ ﻭﻫﺎﻱ ﻭﺍﻛﻔﺔ ﻛﺪﺍﻣﻲ ﻫﻴﺞ
ﺷﻬﻜﺖ ﻭﺣﻄﻴﺖ ﺍﻳﺪﻱ ﻋﻠﻰ ﺣﻠﻜﻲ
ﻋﺰﺯﺓ ﺍﻟﻴﻮﻡ ﻫﺮﻗﻞ ﻧﺎﻭﻱ ﻋﻠﻴﺔ
ﻳﻤﺔﺓﺓﺓﺓ
ﻭﺭﺓ ﺩﻗﺎﻳﻖ ﻃﻠﻊ ﻣﻦ ﺍﻟﺤﻤﺎﻡ ﻭﻫﻮ ﻻﺑﺲ ﺍﻟﺪﺷﺪﺍﺷﺔ ﻭﺍﻟﻤﻨﺸﻔﺔ ﻋﻠﻰ ﺭﺍﺳﻪ ﺑﺎﻭﻉ ﻋﺎﻟﺼﻴﻨﻴﺔ
ﻭﺭﺟﻊ ﺑﺎﻭﻉ ﻋﻠﻴﺔ ﻭﻛﺎﻝ
.. ﻫﺎﻱ ﺷﻨﻮ ﺑﻌﺪﺝ ﻣﺎ ﺍﻛﻠﺘﻲ
ﺗﺮﺓ ﺍﻧﺎ ﺍﻛﻠﺖ
ﻫﻤﺴﺖ ﺑﺼﻮﺕ ﻧﺎﺻﻲ ﻛﻮﺓ ﻳﻨﺴﻤﻊ
.. ﻣﺎ ﺍﻏﻴﺪ ( ﻣﺎﺭﻳﺪ ) ﺷﺒﻌﺎﻧﺔ
ﺑﺮﺑﻚ ﻳﺎ ﺍﻛﻞ ﺑﻬﺬﺍ ﺍﻟﺰﻟﻚ ﺗﻌﺎﻝ ﻛﺎﺑﻠﻨﻲ ﻭﺍﻟﻄﻢ
ﺟﺎﻥ ﻳﺘﺤﺮﻙ ﺑﺎﻟﻐﺮﻓﺔ ﻭﺍﻧﻲ ﺍﺑﺎﻭﻉ ﻋﻠﻴﻪ ﺷﻠﻮﻥ ﺭﺍﺡ ﻭﻛﻒ ﻛﺒﺎﻝ ﺍﻟﻤﺮﺍﻳﺔ
ﻭﻛﻌﺪ ﻳﻤﺸﻂ ﺑﺸﻌﺮﻩ
ﻭﺭﺵ ﻋﻄﺮ ﻭﺑﻌﺪﻫﺎ
ﺩﺍﺭ ﻭﺟﻬﻪ ﻭﺑﺎﻭﻉ ﻋﻠﻴﺔ
ﻧﻈﺮﺍﺕ ﻋﻴﻮﻧﻪ ﺗﻜﻮﻝ ﻭﺍﺧﻴﺮﺍ ﻓﺮﻏﺘﻠﺞ
ﺍﺟﺔ ﻭﻛﻌﺪ ﻳﻤﻲ ﻋﺎﻟﺴﺮﻳﺮ ﻭﺑﺪﺓ ﻳﺤﺠﻲ ﻭﻳﻤﻬﺪ ﻟﻠﻘﺎﺩﻡ ﺍﻻﺗﻲ
.. ﺷﻮﻓﻲ ﻳﺎﺑﻨﺖ ﺍﻟﺤﻼﻝ
ﺍﻧﺘﻲ ﺻﺮﺗﻲ ﻣﺮﺗﻲ ﻭﺣﻼﻟﻲ ﻓﺄﺭﻳﺪ ﻣﻨﺞ ﺗﺨﻠﻴﻨﻲ ﺍﺗﻬﻨﺎ
ﺑﺤﻼﻟﻲ
ﺍﻗﺘﺮﺏ ﻋﻠﻴﺔ ﻭﺍﻟﻨﻴﺔ ﺑﺎﻳﻨﺔ ﻣﻦ ﻋﻴﻮﻧﻪ
ﻟﺰﻡ ﺍﻳﺪﻱ
ﻭﺍﻧﻲ ﻛﺎﻋﺪﺓ ﻋﺎﻟﺴﺮﻳﺮ ﺍﺑﺎﻭﻉ ﻟﻴﻜﺪﺍﻡ ﺍﺟﻴﺖ ﺍﺑﺠﻲ ﻣﻦ ﺍﻟﺨﻮﻑ
ﻟﻤﺴﺎﺕ ﺍﻳﺪﻩ ﺍﻧﺘﻘﻠﺖ ﻋﻠﻰ ﻃﻮﻝ ﺯﻧﺪﻱ
ﻭﻛﺎﻝ ﺑﺼﻮﺕ ﻫﺎﻣﺲ
.. ﺩﺧﻴﻞ ﺭﺑﺞ ﺷﻜﺪ ﺗﺮﻓﺔ
ﺍﺧﺎﻑ ﺍﻣﺮﺭ ﺍﻳﺪﻱ ﻋﻠﻰ ﺑﺸﺮﺗﺞ ﻭﺗﻨﺠﺮﺡ
ﻗﺮﺏ ﺭﺍﺳﻪ ﻋﻠﻰ ﺭﻛﺒﺘﻲ ﻭﺣﺮﺍﺭﺓ ﺍﻧﻔﺎﺳﻪ ﺻﺎﺭﺕ ﻗﺮﻳﺒﺔ ﻋﻠﻰ ﺍﻟﻨﺒﺾ
ﻳﻤﺔ ﻫﻮ ﻗﺮﺏ ﺭﺍﺳﻪ
ﻭﺍﻧﺎ ﻛﻤﺰﺕ ﻣﻦ ﻣﻜﺎﻧﻲ ﻭﻭﻛﻔﺖ
ﻭﺑﻬﺎﻱ ﺍﻟﻠﺤﻈﺔ
ﻫﺠﺮﺗﻨﻲ ﺷﺠﺎﻋﺘﻲ ﻭ ﻋﻘﻠﻲ ﺍﺗﺨﻠﻰ ﻋﻨﻲ
ﻭﺗﺮﻛﻮﻧﻲ ﻟﻮﺣﺪﻱ ﺍﻭﺍﺟﻪ ﻫﺮﻗﻞ
ﻋﻜﺪ ﺣﻮﺍﺟﺒﻪ ﻭﻧﻬﺾ ﻣﻦ ﻣﻜﺎﻧﻪ ﻭﺭﺍﻱ
.. ﺷﻜﻮ ﻟﻴﺶ ﻛﻤﺘﻲ ﺑﻌﺪﻧﺎ ﻣﺎ ﻛﻠﻨﺎ ﺑﺴﻢ ﺍﻟﻠﻪ
ﺍﺑﺘﻌﺪﺕ ﻋﻨﻪ ﻭﺩﺭﺕ ﺣﻮﻝ ﺍﻟﺴﺮﻳﺮ ﻭﺻﺎﺭ
ﺍﻟﺴﺮﻳﺮ ﺑﻴﻨﺎ
ﻣﻦ ﺷﺎﻑ ﺣﺮﻛﺘﻲ ﻏﻤﺾ ﻋﻴﻮﻧﻪ ﺑﺼﺒﺮ
ﻭﻛﺎﻝ ﺑﻐﻀﺐ
.. ﺷﻨﻮ ﻛﺎﻋﺪﺓ ﺗﻠﻌﺒﻴﻦ ﻭﻳﺎﻳﺔ
ﻳﺎﻟﻠﻪ ﺷﻮ ﺗﻌﺎﻱ ﺍﻟﻴﻮﻡ ﺍﺧﺬﺝ
ﺍﺧﺬﺝ ﻭﻳﻦ ﺗﺮﺣﻴﻦ ﻭﺭﺍﺝ ﻭﺭﺍﺝ
ﺟﺎﻥ ﻳﺤﺠﻲ ﻭﻫﻮ ﻳﻤﺸﻲ ﺑﺘﺠﺎﻫﻲ
ﻋﺎﺩ ﺍﻧﺎ ﻫﻮ ﺣﺠﺔ ﻫﻴﺞ
ﻭﺍﻧﺎ ﺍﻟﺠﻨﻲ ﺍﻟﻬﺪﺍﻭﻱ ﺑﺮﺯ ﻟﻠﺴﺎﺣﺔ
ﻭﺍﺗﺒﺨﺮﺕ ﺍﺧﺮ ﻗﻄﺮﺓ ﻋﻘﻞ ﺑﺮﺍﺳﻲ
ﻭﺟﺎﻥ ﺍﻃﻔﺮ ﻓﻮﻙ ﺍﻟﺴﺮﻳﺮ
ﻭﺣﺠﻴﺖ ﺑﺨﻮﻑ ﻭﺍﻧﺎ ﻭﺍﻛﻔﺔ ﻋﺎﻟﺴﺮﻳﺮ
.. ﺑﻐﻮﺡ ﺍﺑﻮﻙ ﻻ ﺗﻘﺘﻐﺐ ﻣﻨﻲ
( ﺑﺮﻭﺡ ﺍﺑﻮﻙ ﻻﺗﻘﺘﺮﺏ ﻣﻨﻲ )
.......
ﻫﺪﻯ
ﺟﻨﺖ ﻭﺍﻛﻔﺔ ﺧﺎﻳﻔﺔ ﻋﺎﻟﺴﺮﻳﺮ ﻣﺘﺄﻫﺒﺔ
ﻭﺣﺠﻴﺖ ﺑﺨﻮﻑ
.. ﺑﻐﻮﺡ ﺍﺑﻮﻙ ﻻ ﺗﻘﺘﻐﺐ ﻣﻨﻲ
( ﺑﺮﻭﺡ ﺍﺑﻮﻙ ﻻﺗﻘﺘﺮﺏ ﻣﻨﻲ )
ﻗﺎﺳﻢ ﺟﺎﻥ ﻭﺍﻛﻒ ﻳﺒﺎﻭﻉ ﻣﺼﺪﻭﻡ
ﻫﺰ ﺍﻳﺪﻩ ﺑﺴﺨﺮﻳﺔ ﻭﺳﻤﻌﺘﻪ ﻳﻜﻮﻝ ﺑﻐﻀﺐ
.. ﻳﺎﻟﻠﻪ ﻫﺎﻙ ﺍﺳﺘﻠﻢ ﺑﺎﻟﻠﻪ ﻫﺎﻱ ﺷﺤﺠﻲ ﻭﻳﺎﻫﺎ
ﺍﻟﻠﻪ ﻳﺴﺎﻣﺤﺞ ﻳﺎ ﺍﻣﻲ ﻋﻠﻰ ﻫﺎﻱ ﺍﻟﻮﺭﻃﺔ
ﺍﺑﺎﻭﻉ ﻋﻠﻴﻪ ﻋﻴﻮﻧﻪ ﻧﺎﺭ
ﺷﻠﻮﻥ ﻳﺎﺭﺑﻲ ﺷﻲ ﻳﻌﺪﻱ ﻫﺎﻱ ﺍﻟﻠﻴﻠﺔ
ﺟﻨﺖ ﺍﻓﺮﻙ ﺍﻳﺪﻳﺔ ﺑﺒﻌﻀﻬﻢ ﻭﺣﺠﻴﺖ ﺑﺘﺮﺟﻲ
.. ﺍﻟﻠﻪ ﻳﺨﻠﻴﻚ ﺍﻧﻄﻴﻨﻲ ﻓﻐﺼﺔ ﺑﺲ ﻫﺎﻟﻤﻐﺔ ( ﻓﺮﺻﺔ ﺑﺲ ﻫﺎﻟﻤﺮﺓ )
ﺑﺲ ﺍﻟﻰ ﺍﻥ ﺍﺗﻌﻮﺩ ﻋﻠﻴﻚ ﻭﺍﻟﻠﻪ ﺍﺧﺎﻑ
ﻏﻤﺾ ﻋﻴﻮﻧﻪ ﺑﺼﺒﺮ
.. ﺯﻳﻦ ﻧﺰﻟﻲ ﻣﻦ ﺍﻟﺠﺮﺑﺎﻳﺔ ﺧﻠﻲ ﺍﺣﺠﻲ ﻭﻳﺎﺝ
ﻧﻜﻌﺪ ﻭﻧﺘﻔﺎﻫﻢ ﻣﺜﻞ ﺍﻟﻨﺎﺱ ﻭﺍﻟﻌﺎﻟﻢ
.. ﻻ ﺧﻠﻴﻨﻲ ﻫﻨﺎ ﻣﻐﺘﺎﺣﺔ ﻋﺎﺩﻱ ﺍﺣﺠﻲ ﺍﺳﻤﻌﻚ
.. ﻟﻌﺪ ﺍﺑﻘﻲ ﺑﻤﻜﺎﻧﺞ ﺍﻧﺎ ﺟﺎﻳﺞ
ﻛﺎﻟﻬﺎ ﺑﺘﻬﺪﻳﺪ
ﻳﻤﺔ ﻫﻮ ﺻﻌﺪ ﻋﺎﻟﺴﺮﻳﺮ ﻭﺍﻧﺎ ﻃﻔﺮﺕ ﻣﻦ ﺍﻟﺼﻔﺤﺔ ﺍﻟﺜﺎﻧﻴﺔ
ﻭﺟﺎﻥ ﻫﻲ ﻃﻔﺮﺓ ﻭﻫﻲ ﺻﺮﺧﺔ
ﻭﺣﺴﻴﺖ ﺍﻻ ﺭﺟﻠﻲ ﺍﻟﺘﻮﺕ ﺑﺤﻴﺚ ﻛﻌﺪﺕ ﻋﻠﻴﻬﺎ
ﻋﻄﺖ ﺑﺼﻮﺕ ﻋﺎﻟﻲ ﻣﻮﺟﻮﻋﺔ ﻭﺧﺎﻳﻔﺔ
ﺍﺷﻮ ﺑﻌﺪ ﻣﺎﺍﻧﻲ ﻋﻄﺖ ﺍﺳﻤﻊ ﺍﺻﻮﺍﺕ ﺍﻟﻬﻼﻫﻞ ﻻﻡ ﻗﺎﺳﻢ ﺑﺮﺓ ﺍﻟﻐﺮﻓﺔ
ﻭﺭﺍﻫﺎ ﺻﺎﺭ ﺻﻮﺕ ﺿﺤﻚ ﻭﺗﺼﻨﻴﻒ
ﻭﺍﻣﻪ ﺗﻜﻠﻪ
.. ﻳﻤﺔ ﻗﺎﺳﻢ ﻋﻠﻰ ﻛﻴﻔﻚ ﻭﻳﺔ ﻣﺮﻳﺘﻚ
ﺑﻌﺪﻫﺎ ﺻﺎﺭ ﺍﻟﻀﺤﻚ ﻭﺍﻟﺘﻨﺼﻨﻴﻒ ﺑﻔﻠﺲ
ﺷﻬﻜﺖ ﻭﺣﻄﻴﺖ ﺍﻳﺪﻱ ﻋﻠﻰ ﺣﻠﻜﻲ
ﻭﻋﺮﻛﺖ ﻛﺼﺘﻲ ﻣﻦ ﺍﻟﻤﻮﻗﻒ ﺍﻟﻤﺤﺮﺝ
ﻭﺑﺎﻭﻋﺖ ﻟﻘﺎﺳﻢ ﺑﺤﺬﺭ ﺟﺎﻧﺖ ﻋﻴﻮﻧﻪ ﺗﺠﺪﺡ ﻧﺎﺭ
ﺑﻠﻌﺖ ﺭﻳﻜﻲ
ﻻ ﺍﻡ ﻗﺎﺳﻢ ﻋﻠﻰ ﺑﺨﺘﺞ ﻛﻠﺶ ﻣﻮ ﻭﻛﺘﺞ ﺍﺩﺭﻱ ﺷﻨﻮ ﺟﺎﻧﺖ ﺧﺎﺗﻠﺔ ﻭﺭﺓ ﺍﻟﺒﺎﺏ
ﻛﻤﺰ ﻛﻠﺒﻲ ﻋﻠﻰ ﺻﻮﺕ ﻗﺎﺳﻢ ﺍﻟﺨﺸﻦ ﻭﻫﻮ ﻳﺴﺐ ﻭﻳﻐﻠﻂ
.. ﻻ ﺍﻟﻴﻮﻡ ﺷﻜﻠﻲ ﺭﺍﺡ ﺍﺟﺮﻡ ﺑﻮﺍﺣﺪ ﻣﻨﻜﻢ ﻟﻮ ﺍﻧﺘﻲ ﻟﻮ ﺍﻣﻲ
..
ﻫﻮ ﻳﺤﺠﻲ ﻭﺍﻧﺎ ﻛﺎﻋﺪﺓ ﺑﺎﻟﻜﺎﻉ ﺍﺗﻠﻤﺲ ﺑﺮﺟﻠﻲ ﻭﺍﺑﻠﻊ ﺑﺮﻳﻜﻲ
ﻭﺍﻟﻠﻪ ﻫﺴﺔ ﻳﺠﻲ ﻳﺎﻛﻠﻨﻲ ﺑﺴﻨﻮﻧﻪ
ﺍﺗﺠﻪ ﻋﻠﻴﺔ ﻭﺭﻛﻊ ﻳﻤﻲ ﺑﺎﻟﻜﺎﻉ
ﻭﺍﻧﺎ ﺣﺠﻴﺖ
.. ﻻ ﻏﻮﺡ ﻭﺧﻎ ﻋﻨﻲ ﻛﻠﻪ ﻣﻦ ﻭﻏﺎﻙ ﺍﻟﺘﻮﺕ ﻏﺠﻠﻲ
( ﺭﻭﺡ ﻭﺧﺮ ﻋﻨﻲ ﻛﻠﻪ ﻣﻦ ﻭﺭﺍﻙ ﺍﻟﺘﻮﺕ ﺭﺟﻠﻲ )
.. ﺑﺎﻟﻠﻪ ﻫﺴﺔ ﺍﻧﺎ ﺷﻨﻮ ﺍﻓﺘﻬﻤﺖ ﻣﻦ ﻭﺭﺓ ﻏﻮﻏﻮﺗﺞ
ﻣﺪ ﺍﻳﺪﻩ ﻋﻠﻰ ﺭﺟﻠﻲ
ﺍﺟﻴﺖ ﺍﺳﺤﺒﻬﺎ ﺧﺰﺭﻧﻲ ﻭﻛﺎﻝ
.. ﺍﻧﻄﻴﻨﻲ ﻣﺠﺎﻝ ﺧﻠﻲ ﺍﺷﻮﻑ
ﺍﺣﺘﻤﺎﻝ ﺻﺎﺭ ﻋﻨﺪﺝ ﺍﻟﺘﻮﺍﺀ ﺑﺎﻟﻘﺪﻡ
ﻟﺰﻣﻬﺎ ﻭﺣﺮﻛﻬﺎ ﻭﺍﻧﻲ ﻛﺎﺗﻤﺔ ﺍﻟﺼﺮﺧﺔ ﻭﺍﻋﺾ ﻋﻠﻰ ﺷﻔﺎﻳﻔﻲ ﺑﺄﻟﻢ
.. ﻫﺴﺔ ﻫﻴﺞ ﺍﺣﺴﻨﻠﺞ ﺻﺎﺭﻟﺞ ﺳﺎﻋﺔ ﺗﻜﻤﺰﻳﻦ ﺟﻨﺞ ﻗﺮﺩ
ﻓﻀﺤﺘﻴﻨﺎ ﺍﻟﻠﻪ ﻳﻠﻌﻨﺞ ﺑﻌﺪﻧﻲ ﻣﻤﺴﻮﻱ ﺷﻲ
ﺧﺮﺏ ﺍﺣﺲ ﺣﺘﻰ ﺍﻟﻮﺟﻊ ﺭﺍﺡ ﻣﻦ ﻛﺪ ﺍﻟﺨﻮﻑ ﻭﺍﻟﺘﺮﻗﺐ
..
ﺑﺎﻭﻉ ﻋﻠﻰ ﺩﻣﻮﻋﻲ ﻭﺭﺟﻔﺔ ﺷﻔﺎﻳﻔﻲ
ﻏﻤﺾ ﻋﻴﻮﻧﻪ ﻳﻄﻠﺐ ﺍﻟﺼﺒﺮ ﻭﻛﻌﺪ ﻛﺪﺍﻣﻲ ﺑﺎﻟﻜﺎﻉ
ﻭﺻﺎﺭ ﻳﺒﺎﻭﻉ ﻋﻠﻴﺔ ﺑﺘﻔﻜﻴﺮ ﻣﺜﻞ ﺍﻟﻲ ﻳﺮﻳﺪ ﻳﺘﺨﺬ ﻗﺮﺍﺭ
ﻇﻞ ﺻﺎﻓﻦ ﻋﻠﻴﺔ ﻭﺳﺎﻛﺖ ﻣﺒﻴﻦ ﻋﻠﻴﻪ ﺍﻟﺤﻴﺮﺓ ﺩﻳﻔﻜﺮ ﺑﺸﻲ
ﻭﺑﻌﺪﻫﺎ ﻣﺴﺢ ﻋﻠﻰ ﻭﺟﻬﻪ ﻭﺟﻠﻰ ﺻﻮﺗﻪ
ﻭﻛﺎﻝ
.. ﻛﺎﻓﻲ ﻟﺘﺒﺠﻴﻦ ﻛﻮﻣﻲ ﻭﻣﺴﺤﻲ ﺩﻣﻮﻋﺞ
.....
ﻧﻬﺾ ﻣﻦ ﻣﻜﺎﻧﻪ ﻭﺩﻧﻚ ﻋﻠﻴﺔ ﺣﺘﻰ ﻳﺴﺎﻋﺪﻧﻲ ﺍﻛﻮﻡ ﻣﻦ ﺍﻟﻜﺎﻉ
ﺣﻮﻃﻨﻲ ﺑﺬﺭﺍﻋﻪ ﻣﻦ ﺧﺼﺮﻱ ﻭﺳﻨﺪﻧﻲ ﻋﻠﻰ ﺻﺪﺭﻩ
ﺍﻧﺨﺒﺼﺖ ﻭﻣﺎ ﺍﻋﺮﻑ ﺷﺼﺎﺭ ﺑﺤﺎﻟﻲ
ﻗﺮﺑﻪ ﻭﺣﺮﺍﺭﺓ ﺟﺴﻤﻪ ﻭﺗﺮﺗﻨﻲ
ﻛﻌﺪﺕ ﻋﺎﻟﺴﺮﻳﺮ ﻭﺍﺑﺘﻌﺪ ﻣﻨﻲ
ﻭﻛﻒ ﻛﺪﺍﻣﻲ ﻭﻋﻴﻮﻧﻪ ﻭﺍﻟﻨﻔﺲ ﻣﺎﻟﺘﻪ ﺟﺎﻧﻮﺍ ﺷﺎﻫﺪﻳﻦ ﻋﻠﻰ ﺍﺛﺎﺭﺗﻪ
ﺩﻧﻜﺖ ﺭﺍﺳﻲ ﻣﻦ ﺍﻟﻔﺸﻠﺔ ﻭﺧﺪﻭﺩﻱ ﺻﺎﺭﻭﺍ ﺣﻤﺮ
ﺑﻌﺪﻳﻦ ﺍﺟﺎﻧﻲ ﺻﻮﺗﻪ
.. ﺍﺍﺍ .. ﺍﺣﻢ ﺍﺣﻢ
.. ﺗﺼﺮﻓﺎﺗﺞ ﺩﺗﺼﻌﺐ ﻋﻠﻴﺔ ﺍﻻﻣﻮﺭ ﻭﺗﻌﻘﺪﻫﺎ ﻓﻮﻙ ﻣﺎ
ﻫﻲ ﻣﺘﻌﻘﺪﺓ ﺍﺷﻮﻑ ﻣﻦ ﺍﻻﻓﻀﻞ ﺍﺗﺮﻛﺞ ﺍﻟﻴﻮﻡ ﻟﻮﺣﺪﺝ
ﻻﻥ ﺍﻟﻈﺎﻫﺮ ﺍﺣﻨﺎ ﺍﺛﻨﻴﻨﺎ ﺍﻋﺼﺎﺑﻨﺎ ﻣﺘﻮﺗﺮﺓ
ﻣﻦ ﻛﺜﺮ ﺍﻟﻀﻐﻮﻃﺎﺕ
ﺟﺎﻥ ﻳﺤﺠﻲ ﻭﻗﻄﻊ ﻛﻼﻣﻪ ﺻﻮﺕ ﺍﻟﻨﻘﺎﻝ
ﻋﻘﺪ ﺣﻮﺍﺟﺒﻪ ﻭﺭﺍﺡ ﺑﺘﺠﺎﻩ ﺍﻟﺴﺘﺮﺓ ﻭﻃﻠﻌﻪ ﻣﻦ ﺟﻴﺒﻪ
ﺍﺑﺎﻭﻉ ﻋﻠﻴﻪ
ﺟﺮ ﺣﺴﺮﺓ ﻭﻏﻤﺾ ﻋﻴﻮﻧﻪ ﻭﺭﺟﻊ ﺷﻌﺮﻩ ﻟﻠﺨﻠﻒ ﺣﺮﻛﺘﻪ ﺩﻟﺖ ﻋﻠﻰ ﺍﻟﻌﺼﺒﻴﺔ
ﺭﺩ ﻋﺎﻟﻤﺘﺼﻞ ﻭﺍﻧﻄﺎﻧﻲ ﻇﻬﺮﻩ ﻭﻛﺎﻡ ﻳﺤﺠﻲ ﺑﻬﻤﺲ
ﻣﺎ ﻛﺪﺭﺕ ﺍﺳﻤﻊ ﺷﻲ
ﻏﻴﺮ ﻛﻠﻤﺔ .. ﻭﺍﻟﻠﻪ ﺍﻛﻠﺖ ﺗﺒﻦ
ﺟﺎﻥ ﻳﺤﺠﻲ ﻭﻳﻤﺸﻲ ﺑﺘﺠﺎﻩ ﺍﻟﺒﺎﺏ ﻳﺮﻳﺪ ﻳﻄﻠﻊ
ﻫﻮ ﻃﻠﻊ ﻭﺍﻧﻲ ﺍﺳﺘﻐﻠﻴﺖ ﺍﻧﺸﻐﺎﻟﻪ ﺑﺎﻻﺗﺼﺎﻝ
ﺭﺣﺖ ﺍﻋﺮﺝ ﻋﺎﻟﺨﻔﻴﻒ ﺑﺘﺠﺎﻩ ﺍﻟﺒﺎﺏ ﺍﺭﻳﺪ ﺍﺗﺄﻛﺪ ﺭﺍﺡ ﻟﻮ ﺑﻌﺪﻩ
ﺍﺭﻳﺪ ﺍﻏﻴﺮ ﻣﻼﺑﺲ ﺍﻟﻨﻮﻡ ﺍﺣﺲ ﺑﺎﻟﺘﻬﺪﻳﺪ ﻣﻦ ﻭﺭﺍﻫﻢ ﺍﻗﺘﺮﺑﺖ ﻋﺎﻟﺒﺎﺏ
ﻭﺟﺎﻥ ﺍﺳﻤﻊ
.. ﺧﻴﺮ ﺣﺠﻴﺔ ﺷﻜﻮ ﺷﻌﻨﺪﺝ ﺗﺤﻮﻣﻴﻦ ﻫﻨﺎ
ﻟﻴﺶ ﻣﻮ ﻧﺎﺯﻟﺔ ﺟﻮﺓ ﻳﻢ ﺧﻄﺎﺭﺝ
ﺟﺎﻥ ﻳﺤﺠﻲ ﺑﻐﻴﺾ ﻋﺰﺓ ﺷﻜﻠﻪ ﺍﺗﻔﺎﺟﻲﺀ ﺑﻮﺟﻮﺩ ﺍﻣﻪ
ﺻﺎﻋﺪﺓ ﻓﻮﻙ
ﺑﺲ ﺍﺭﻳﺪ ﺍﻋﺮﻑ ﺍﻡ ﻗﺎﺳﻢ ﺷﺘﺤﺲ ﻭﻳﻦ ﺗﺮﻳﺪ ﺗﻮﺻﻞ
ﻳﺎﺭﺏ ﻫﺎﻱ ﺍﻟﻌﺎﺋﻠﺔ ﺭﺍﺡ ﺗﺨﺒﻠﻨﻲ
ﺟﺎﻭﺑﺘﻪ .. ﻫﺎ ﻳﻤﺔ ﻗﺴﺎﻡ ﺑﺸﺮ
ﺟﺎﻭﺑﻬﺎ ﻭﻫﻮ ﻛﻮﺓ ﻻﺯﻡ ﺍﻋﺼﺎﺑﻪ
.. ﺣﺠﻴﺔ ﻭﺭﺏ ﺍﻟﻜﻌﺒﺔ ﺭﺍﺡ ﺗﻄﻠﻌﻴﻨﻲ ﻋﻦ ﻃﻮﺭﻱ
ﺑﻬﺎﻱ ﺳﻮﺍﻟﻔﺞ
.. ﻳﻤﺔ ﻏﻴﺮ ﻭﻟﻴﺪﻱ ﻭﺍﺭﻳﺪ ﺍﻃﻤﻦ ﻋﻠﻴﻚ
.. ﻫﻮ ﺷﻨﻮ ﺍﻟﺼﺎﻳﺮ ﻭﺗﻄﻤﻨﻴﻦ ﻋﻠﻴﺔ
ﻗﺎﺑﻞ ﺭﺍﻳﺢ ﺍﺣﺎﺭﺏ ﺣﺠﻴﺔ ﻟﺨﺎﻃﺮ ﺍﻟﺤﻤﺰﺓ ﻋﺘﻘﻴﻨﻲ ﻭ ﻋﻮﻓﻴﻨﻲ ﺑﺤﺎﻟﻲ
.. ﻟﻚ ﻳﻤﺔ ﻗﺴﺎﻡ ﻟﻴﺶ ﺩﻭﻣﻚ ﺷﺎﻟﻊ ﻛﻠﺒﻲ
ﻭﺗﻜﺴﺮ ﻭﺍﻫﺴﻲ
ﻫﺴﺔ ﺍﻧﻲ ﺷﻨﻮ ﺭﺍﻳﺪﺓ ﻣﻨﻚ ﻏﻴﺮ ﺑﺲ ﺍﺷﻮﻓﻚ ﻣﺮﺗﺎﺡ ﻭﻳﺔ ﻣﺮﻳﺘﻚ
.. ﺍﺩﺭﻱ ﺑﻴﺞ ﻋﻠﻰ ﺷﻨﻮ ﺗﺤﻮﻣﻴﻦ ﻭﻣﺎ ﺭﺍﺡ ﺗﻌﻮﻓﻴﻨﻲ ﺍﻻ ﺗﻌﺮﻓﻴﻦ ﺷﺴﻮﻳﺖ
ﺑﺲ ﺍﻃﻤﻨﻲ ﺳﺪﺝ ﺍﻣﻴﻦ ﻣﺎﻛﻮ ﺷﻲ ﺻﺎﺭ
ﺧﻠﻴﻨﻲ ﺍﻧﻲ ﺑﺮﺍﺣﺘﻲ ﺷﻮﻛﺖ ﻣﺎ ﻳﻌﺠﺒﻨﻲ ﺍﺧﺬﻫﺎ
ﻳﺎﻟﻠﻪ ﻫﺴﺔ ﺍﺭﺗﺎﺣﻴﺘﻲ
ﻟﻄﻤﺖ ﻋﻠﻰ ﺻﺪﺭﻫﺎ
.. ﻳﺎﺍﺍﺍﺍﺍﺍﺍ ﻳﻤﺔ ﻗﺴﺎﻡ ﻟﻌﺪ ﻭﺍﻟﺼﻮﺕ ﺍﻟﺴﻤﻌﻨﺎﻩ
ﺟﺎﻥ ﺷﻨﻮ
.. ﺍﻱ ﻣﻮ ﺟﻨﺎ ﻧﺴﻮﻱ ﺍﺣﻤﺎﺀ ﻭﻫﻲ ﻋﺎﻃﺖ
ﺍﻛﻠﺞ ﺣﺠﻴﺔ ﺑﺎﻟﻠﻪ ﺭﺣﻤﺔ ﻋﻠﻰ ﻣﻮ ﺗﺎﺝ ﻣﺎ ﺗﻌﻮﻓﻴﻨﻲ
ﺗﺮﺓ ﻭﺍﻟﻠﻪ ﺭﻭﺣﻲ ﻭﺍﺻﻠﺔ ﻟﺨﺸﻤﻲ
ﻋﺰﺓ ﺑﻌﻴﻨﻪ ﻛﺎﻋﺪ ﻳﺤﺸﺶ ﻋﻠﻰ ﺍﻣﻪ ﻭﻫﻮ ﺑﻌﺰ ﺍﻟﻐﻀﺐ
ﺑﻌﺪﻫﺎ ﻋﺎﻑ ﺍﻣﻪ ﺗﺪﺭﺩﻡ ﻭﺭﺍﻩ ﻭﺭﺍﺡ
ﺍﺑﺘﻌﺪﺕ ﻋﻦ ﺍﻟﺒﺎﺏ ﻭﺭﺣﺖ ﺍﻣﺸﻲ ﺳﺮﻳﻊ ﺑﻴﺔ ﻣﺎ ﺑﻴﻪ
ﺣﺘﻰ ﺍﻭﺻﻞ ﻟﺒﺎﺏ ﺍﻟﺤﻤﺎﻡ ﺧﺎﻑ ﺗﺪﺧﻞ ﻋﻠﻴﺔ
ﺩﺧﻠﺖ ﻟﻠﺤﻤﺎﻡ ﻭﺍﻧﺘﻈﺮﺕ ﺗﻔﺘﺢ ﺍﻟﺒﺎﺏ ﻭﺗﺪﺧﻞ ﻟﻠﻐﺮﻓﺔ
ﺑﺲ ﻣﺎﻛﻮ ﻣﺎ ﺩﺧﻠﺖ
ﺷﻜﻠﻬﺎ ﻏﻴﺮﺕ ﺭﺃﻳﻬﺎ
ﻃﻠﻌﺖ ﻣﻦ ﺍﻟﺤﻤﺎﻡ ﻭﺭﺣﺖ ﺍﺧﺬﺗﻠﻲ ﺑﺠﺎﻣﺔ ﻧﻮﻡ
ﻭﻟﺒﺴﺘﻬﺎ ﺑﺎﻟﺤﻤﺎﻡ ﻭﺗﺎﻟﻲ ﻃﻠﻌﺖ ﻭﻗﺎﺳﻢ ﺑﻌﺪﻩ ﻣﺎ ﺭﺟﻊ
.......
ﺍﺳﺘﻐﻠﻴﺖ ﺍﻟﻔﺮﺻﺔ ﻭﺩﺧﻠﺖ ﺟﻮﺓ ﺍﻟﻐﻄﺎ
ﻭﺣﻄﻴﺖ ﺭﺍﺳﻲ ﻋﺎﻟﻤﺨﺪﺓ ﻭﺍﻧﻲ ﺍﻧﺘﻈﺮ ﺷﻮﻛﺖ ﻳﺮﺟﻊ ﻟﻠﻐﺮﻓﺔ
ﺣﺘﻰ ﺍﻋﺮﻑ ﺭﺍﺳﻲ ﻣﻦ ﺭﺟﻠﻴﺔ
ﻣﺎ ﺍﻋﺮﻑ ﺷﻨﻮ ﺍﺳﻮﻱ ﻫﺴﺔ ﺷﻨﻮ ﺍﻧﺎﻡ ﻟﻮ ﺍﻧﺘﻈﺮﻩ ﻳﺮﺟﻊ
ﻭﺑﻌﺪﻳﻦ ﺍﻧﺎﻡ
ﻭﻋﻠﻰ ﻫﺎﻱ ﺍﻟﺤﺴﺒﺔ ﻣﺎ ﺣﺴﻴﺖ ﺍﻻ ﻭﺍﻧﺎ ﻏﺎﻃﺔ ﺑﺴﺎﺑﻊ ﻧﻮﻣﺔ
ﺷﻴﻤﺎﺀ
ﺑﻌﺪ ﻣﺎ ﺧﻠﺺ ﺍﻟﻌﺮﺱ ﺻﻠﻨﺎ ﻋﻤﻮ ﺍﻣﺠﺪ ﺍﻧﻲ ﻭﺳﻠﻴﻤﺔ ﻟﻠﺒﻴﺖ
ﺟﺎﻧﺖ ﺳﻠﻴﻤﺔ ﻋﻠﻰ ﻃﻮﻝ ﺍﻟﻄﺮﻳﻖ ﺑﺲ ﺗﺪﺭﺩﻡ
ﻋﻠﻰ ﻣﺮﻭﺓ ﻭﺗﺤﺠﻲ
ﺳﻠﻴﻤﺔ .. ﺍﻧﺖ ﻟﻮ ﺗﺸﻮﻓﻬﺎ ﺷﻠﻮﻥ ﺩﺧﻠﺖ ﻟﻠﻌﺮﺱ
ﻣﺎ ﺗﻜﻮﻝ ﻟﻠﻔﻠﻚ ﻭﻟﻚ
ﺷﺎﻳﻔﺔ ﻧﻔﺴﻬﺎ ﻛﻠﺶ ﻭﻫﺎﻱ ﺍﻟﻤﻜﻄﻤﺔ ﻧﻔﺨﺖ ﺭﻳﺸﺎﺗﻬﺎ
ﻭﺻﺎﺭﺕ ﻣﺎ ﺗﺘﺤﺎﺟﺔ ﻣﻦ ﺷﺎﻓﺖ ﻣﺮﻳﻮﺓ
ﺍﺑﺎﻭﻉ ﻋﻠﻴﻬﺎ ﺣﺘﻰ ﻣﺎ ﻛﺎﻟﺖ ﻫﺎﻱ ﺑﻴﺒﺘﻲ ﺧﻠﻲ ﺍﺭﻭﺡ ﺍﺳﻠﻢ ﻋﻠﻴﻬﺎ
ﻟﺒﺴﺘﻨﻲ ﻭﻻ ﺟﻨﻚ ﺍﻧﻲ ﻣﻮﺟﻮﺩﺓ ﺷﻜﺪ ﻓﺸﻠﺔ ﻣﻦ ﺟﺎﺭﺍﺗﻲ ﻛﻠﻬﻢ
ﺳﺄﻟﻮﻧﻲ ﻫﺎﻱ ﺑﻨﺖ ﺍﺑﻨﺞ
ﺻﺮﺕ ﺑﻨﺺ ﻫﺪﻭﻣﻲ ﺍﺣﺘﺎﺭﻳﺖ ﺷﺠﺎﻭﺑﻬﻢ
ﺧﺮﺏ ﺟﺎﻧﺖ ﻣﺴﺘﻤﺮﺓ ﺗﺤﺠﻲ ﺑﺪﻭﻥ ﺍﻧﻘﻄﺎﻉ
ﻋﺒﺎﻟﻚ ﺑﺎﻟﻌﺔ ﻣﺴﺠﻞ ﻭﻋﻤﻮ ﺍﻣﺠﺪ ﺑﺲ ﻳﺠﺎﻭﺑﻬﺎ
ﺍﻱ ﻭﺍﻱ ﻳﺴﺎﻳﺮﻫﺎ
ﻣﻨﺎ ﺍﻟﻰ ﺍﻥ ﻭﺻﻠﻨﺎ ﻟﻠﺒﻴﺖ ﺭﺍﺳﻲ ﺻﺎﻳﺮ ﻃﺒﻞ
ﻭﺍﻭﻝ ﻣﺎ ﺩﺧﻠﻨﺎ ﻟﻠﺒﻴﺖ
ﻭﺍﺗﻮﻏﻠﺖ ﺑﻲ ﺣﺴﻴﺖ ﺧﻨﻜﺘﻨﻲ ﺍﻟﻌﺒﺮﺓ
ﺩﺧﻠﺖ ﻟﻠﻐﺮﻓﺔ ﺍﻟﻲ ﺟﻤﻌﺘﻨﻲ ﺑﺨﻮﺍﺗﻲ
ﺻﻔﺖ ﻋﻠﻴﺔ ﻭﺣﺪﻱ ﺑﺲ ﺍﻧﻲ ﺑﻴﻬﺎ
ﺑﺪﻟﺖ ﻣﻼﺑﺴﻲ ﻭﻏﺴﻠﺖ ﻭﺟﻬﻲ
ﻭﺑﻌﺪﻫﺎ ﻓﺮﺷﺖ ﻓﺮﺍﺵ ﻭﺍﺣﺪ ﻭﺍﺗﻤﺪﺩﺕ
ﻭﺍﻧﻲ ﺍﻓﻜﺮ ﺑﻬﺪﻯ ﺷﻨﻮ ﺩﺗﺴﻮﻱ ﺑﻬﺎﻱ ﺍﻟﻠﺤﻈﺔ
ﺧﺎﻳﻔﺔ ﻟﻮﺗﺠﺎﻭﺯﺕ ﺧﻮﻓﻬﺎ .. ﻧﺎﻳﻤﺔ ﻟﻮ ﻛﺎﻋﺪﺓ
ﻭﺍﻟﻠﻪ ﻫﺴﻪ ﻋﺮﻓﺖ ﺍﺣﺴﺎﺱ ﺍﻟﻲ ﻳﻜﻮﻝ
ﻛﻮﻥ ﺍﻧﻜﻠﺐ ﻃﻴﺮ ﻭﺍﺷﻮﻑ ﺷﺤﺎﻝ ﺍﻟﻌﺰﺍﺯ
ﺍﺳﺘﺪﺍﺭﻳﺖ ﻭﺍﺟﺘﻲ ﻋﻴﻨﻲ ﻋﻠﻰ ﻣﻜﺎﻥ ﻓﺮﺍﺷﻬﺎ
ﺟﺎﻧﺖ ﺩﺍﺋﻤﺎ ﺗﻔﺮﺵ ﺑﺼﻔﻲ ﻭﺗﻨﺎﻡ ﺑﺤﻀﻨﻲ
ﻭﻫﺴﻪ ﺣﻀﻨﻲ ﻓﺎﺭﻍ ﻣﺸﺘﺎﻗﻠﻬﺎ
ﻗﻄﻊ ﻋﻠﻴﺔ ﺗﻔﻜﻴﺮﻱ ﺻﻮﺕ ﻧﻘﺎﻟﻲ ﺭﺩﻳﺖ ﺟﺎﻥ ﺍﻟﻤﺘﺼﻞ ﻣﺮﻭﺓ
.. ﻫﻼ ﻣﺮﻭﺓ ﺷﻨﻮ ﻭﺻﻠﺘﻲ ﻟﺒﻴﺘﺞ
.. ﻫﻼ ﺷﻮﻣﺔ ﺍﻱ ﻭﺻﻠﺖ ﻭﻧﻮﻣﺖ ﻣﺸﻤﺶ
ﻭﻛﻠﺖ ﺍﺗﺼﻞ ﻋﻠﻴﺞ ﻗﺒﻞ ﻻ ﺗﻨﺎﻣﻴﻦ ﻭﺍﺑﻠﻐﺞ
ﺑﺎﺟﺮ ﺍﻟﺼﺒﺢ ﺣﻀﺮﻱ ﻧﻔﺴﺞ ﻧﺮﻭﺡ ﺍﻧﻲ ﻭﻳﺎﺝ ﻧﺎﺧﺬ ﺍﻟﺮﻳﻮﻙ ﻟﻬﺪﻯ ﻭﻗﺎﺳﻢ
.. ﻭﺍﻟﻠﻪ ﻫﺎﻱ ﺟﺎﻧﺖ ﻧﻴﺘﻲ ﻛﻠﺖ ﺑﺎﺟﺮ ﺍﻛﻌﺪ ﻣﻦ ﻭﻛﺖ
ﻭﺍﺳﻮﻳﻠﻬﺎ ﺭﻳﻮﻙ ﻭﺍﺧﺬﻩ ﺍﻟﻬﺔ ﻛﺪﺍﻡ ﻋﻴﺎﻟﻬﺎ
.. ﻳﺎﻟﻠﻪ ﻟﻌﺪ ﺍﻧﺘﻈﺮﻳﻨﻲ ﺍﻣﺮ ﻋﻠﻴﺞ ﺑﺎﺟﺮ
ﻭﺍﺧﺬﺝ ﻭﻳﺎﻱ
ﻳﺎﻟﻠﻪ ﺣﺒﻴﺒﺘﻲ ﺷﻮﻣﺔ ﺍﺧﺬﻱ ﺭﺍﺣﺘﺞ ﺷﻜﻠﺞ ﺗﻌﺒﺎﻧﺔ ﻣﺒﻴﻦ ﻣﻦ ﺻﻮﺗﺞ
.. ﻳﺎﻟﻠﻪ ﺣﺒﻴﺒﺘﻲ ﺍﻟﻠﻪ ﻭﻳﺎﺝ
ﻧﻬﻴﺖ ﺍﻻﺗﺼﺎﻝ
ﻭﺍﻧﻲ ﺍﻓﻜﺎﺭﻱ ﺻﺎﺭﺕ ﺗﺪﻭﺭ ﻋﻠﻰ ﺍﺣﺪﺍﺙ ﺍﻟﻴﻮﻡ
ﻣﺮﻭﺓ ﻭﻫﺪﻯ ﻭﺯﻭﺍﺟﻬﺎ ﺿﺤﻰ
ﺍﻟﻲ ﺧﺘﻤﻬﺎ ﻋﻠﻴﻨﺎ ﺯﻭﺟﻬﺎ ﻣﻦ ﺍﺟﺔ ﻭﻟﻜﺎﻫﺎ ﻭﺍﻛﻔﺔ ﻟﻮﺣﺪﻫﺎ
ﺑﺎﻟﺸﺎﺭﻉ ﻭﻭﻳﺎﻫﺎ ﻣﺸﻤﺶ
ﺣﺮﻙ ﺍﻟﺪﻧﻴﺎ ﻋﻠﻴﻬﺎ ﻭﺻﻠﻨﺎ
ﺍﻧﻲ ﻭﻣﺮﻭﺓ ﻭﺍﻧﺘﺒﻬﻨﺎ ﻟﻀﺤﻰ ﻭﺍﻛﻒ ﻳﻤﻬﺎ ﺳﻴﻒ ﺳﻠﻢ ﻋﻠﻴﻨﺎ ﺑﻐﻀﺐ
ﻭﺿﺤﻰ ﺣﺠﺖ ﻭﻣﺒﻴﻦ ﻣﻦ ﺻﻮﺗﻬﺎ ﺟﺎﻧﺖ ﺗﺒﺠﻲ
ﻛﺎﻟﺖ .. ﻣﺮﻭﺓ ﺣﺒﻴﺒﺘﻲ ﻫﺎﻱ ﺑﻨﺘﺞ ﺍﻧﻲ ﻻﺯﻡ ﺍﺭﺟﻊ ﻭﻳﺔ ﺳﻴﻒ
ﺟﺎﻧﺖ ﻛﻮﺓ ﺗﺤﺠﻲ
ﺑﺲ ﺑﻨﺖ ﻣﺮﻭﺓ ﻣﺸﻤﺶ .. ﻟﺰﻣﺖ ﺍﻳﺪ ﺍﻣﻬﺎ ﻭﻛﺎﻟﺖ
ﻣﺎﻣﺎ ﻫﺬﺍ ﻋﻤﻮ ﺍﻳﻴﻴﻊ ﺷﺮﻳﺮ
ﺟﺎﻧﺖ ﺗﺤﺠﻲ ﻭﺗﺄﺷﺮ ﻋﻠﻰ ﺳﻴﻒ
ﻣﺮﻭﺓ ﺑﻐﻴﺾ ﺳﻠﻤﺖ ﻋﻠﻰ ﺿﺤﻰ ﻭﻛﺎﻟﺖ ﺑﺼﻮﺕ ﻋﺎﻟﻲ
ﺣﺘﻰ ﻳﺴﻤﻊ ﺳﻴﻒ .. ﺑﻨﺎﺕ ﻣﻮ ﺗﻨﺴﻮﻥ ﻋﺎﺯﻣﺘﻜﻢ ﻳﻮﻡ ﺍﻟﺠﻤﻌﺔ ﻋﺎﻟﻐﺪﺓ
......
ﺳﻴﻒ .. ﻳﺎﻟﻠﻪ ﺿﺤﻰ ﺍﺳﺘﻌﺠﻠﻲ ﺗﺮﺓ ﺍﻟﺴﻴﺎﺭﺍﺕ ﻃﻠﻌﺖ
ﻭﺑﻌﺪﻫﺎ ﺿﺤﻰ ﺳﻠﻤﺖ ﻋﻠﻴﻨﺎ ﻭﺭﺍﺣﺖ
ﻭﻣﺮﻭﺓ ﺣﺠﺖ .. ﻫﺎﻱ ﻳﻤﻜﻦ ﺟﺎﻥ ﻳﺘﻌﺎﺭﻙ ﻭﻳﺔ ﺿﺤﻰ ﺑﺎﻟﺸﺎﺭﻉ
ﺷﻴﻤﺎﺀ .. ﺷﻠﻮﻥ ﻋﺮﻓﺘﻲ
.. ﻣﺸﻤﺶ ﻛﺎﻟﺖ ﻋﻠﻴﻪ ﺷﺮﻳﺮ
ﻫﺎﻱ ﺍﻟﻜﻠﻤﺔ ﺗﺴﺘﺨﺪﻣﻬﺎ ﺍﺫﺍ ﺷﺎﻓﺖ ﻭﺍﺣﺪ ﻣﻌﺼﺐ ﻭﻳﻐﻠﻂ ﻛﺪﺍﻣﻬﺎ
ﺷﻴﻤﺎﺀ .. ﻋﺎﺩﻱ ﻛﻠﺸﻲ ﺍﺗﻮﻗﻊ ﻣﻦ ﺳﻴﻒ
ﻣﺮﻭﺓ .. ﺍﻟﻠﻪ ﻛﺮﻳﻢ ﻳﺼﻴﺮ ﺧﻴﺮ ﺗﺠﻲ ﺍﻟﺠﻤﻌﺔ ﻭﺍﻓﺘﻬﻢ ﻣﻨﻬﺎ ﺷﺒﻲ ﻫﺬﺍ ﺍﻟﺜﺎﻧﻲ ﻭﻳﺎﻫﺎ
ﺍﺗﺜﺎﻭﺑﺖ ﻭﻋﺪﻟﺖ ﺍﻟﻤﺨﺪﺓ
ﻣﺎ ﺍﺩﺭﻱ ﻟﻴﺶ ﺍﺣﺲ ﻣﺮﻭﺓ ﺗﻌﺮﻑ ﻋﻨﺎ ﻛﻠﺸﻲ
ﺑﺲ ﺷﻠﻮﻥ ﻛﺪﺭﺕ ﺗﻌﺮﻑ ﻭﺍﺣﻨﺎ ﻣﺤﺪ ﻳﺘﻮﺍﺻﻞ ﻭﻳﺎﻫﺎ
ﺣﺘﻰ ﺳﺎﻟﻔﺔ ﺍﻻﺟﺎﺯﺓ ﺩﻭﺧﺘﻨﻲ
ﺷﻠﻮﻥ ﻋﺮﻓﺖ ﺑﻴﺔ ﺍﻧﻲ ﺍﺭﻳﺪ ﺍﺧﺬ ﺍﺟﺎﺯﺓ ﻭﻫﺬﺍ ﻓﺮﺍﺕ ﺭﻓﺾ ﻳﻨﻄﻨﻴﺎﻫﺎ
ﻭﺍﻟﻠﻪ ﻣﺮﻭﺓ ﻟﻐﺰ ﻣﺤﻴﺮ ﺑﺤﺪ ﺫﺍﺗﻬﺎ
ﺑﺲ ﺍﻟﺤﻠﻮ ﺑﻜﻞ ﻫﺬﺍ ﻫﻲ ﺭﺟﻌﺖ ﻟﺤﻴﺎﺗﻨﺎ
........
ﻫﺪﻯ
ﺟﻨﺖ ﻧﺎﻳﻤﺔ ﺣﺴﻴﺖ ﻋﻠﻰ ﺍﻳﺪ ﺗﻨﺪﻫﻨﻲ ﺣﺘﻰ ﺍﻛﻌﺪ ﻣﻦ ﺍﻟﻨﻮﻡ
ﻓﺘﺤﺖ ﻋﻴﻮﻧﻲ ﻭﺭﺟﻌﺖ ﻏﻤﻀﺘﻬﺎ ﻭﺍﻧﻲ ﺍﻛﻮﻝ ﻣﻦ ﺑﻴﻦ ﻧﻮﻡ ﻭﻳﻘﻀﻰ
.. ﺷﻴﻤﺎﺀ ﻋﻤﻐﻲ ( ﻋﻤﺮﻱ ) ﺍﻭﻛﻔﻲ ﻫﺴﺔ ﺍﻛﻌﺪ ﺑﺲ ﺷﻮﻳﺔ
ﺣﺴﻴﺖ ﺑﺄﻳﺪ ﺧﺸﻨﺔ ﻫﺰﺗﻨﻲ ﺣﻴﻞ ﻭﺑﺼﻮﺕ ﺧﺸﻦ
.. ﻳﺎﺑﺔ ﺗﻜﻌﺪﻳﻦ ﻟﻮ ﺷﻨﻮ
ﺍﻣﻲ ﻭﺧﻮﺍﺗﻲ ﺭﺍﺡ ﻳﺼﻌﺪﻭﻥ ﻭﻳﺸﻮﻓﻮﻧﺞ ﻧﺎﻳﻤﺔ
ﻳﻤﺔ ﺍﻧﺎ ﺳﻤﻌﺖ ﺍﻟﺼﻮﺕ ﻭﺍﻧﺎ ﻛﻌﺪﺕ ﻣﻔﺰﻭﻋﺔ
ﻭﻧﺰﻟﺖ ﺍﻟﻐﻄﻰ ﻭﺷﻌﺮﻱ ﻣﻜﻮﺵ ﺑﻔﻮﺿﻰ ﻭﻧﺰﻝ ﻋﻠﻰ ﻭﺟﻬﻲ
ﺑﺎﻭﻋﺖ ﻋﻠﻰ ﻣﻜﺎﻧﻲ ﻣﻨﺎ ﻭﻣﻨﺎ
ﻋﺰﺓ ﻭﺍﻟﻠﻪ ﻟﻠﻮﻫﻠﺔ ﺍﻻﻭﻟﻰ ﻋﺒﺎﻟﻲ ﺍﻧﻲ ﻧﺎﻳﻤﺔ ﺑﺒﻴﺘﻨﺎ
ﻭﻛﻌﺖ ﻋﻴﻨﻲ ﻋﻠﻰ ﻗﺎﺳﻢ ﺟﺎﻥ ﻭﺍﻛﻒ ﻓﻮﻙ ﺭﺍﺳﻲ ﻭﻳﺒﺎﻭﻉ ﻋﻠﻴﺔ ﺷﻌﺮﻩ ﺟﺎﻥ ﻣﺒﻠﻞ
ﺑﻠﻌﺖ ﺭﻳﻜﻲ ﻋﺰﺓ ﺍﻧﻲ ﺷﻮﻛﺖ ﻧﻤﺖ ﻭﻫﻮ ﺷﻮﻛﺖ ﺭﺟﻊ
ﻭﻫﺴﺔ ﺷﺴﻮﻱ
ﻋﺒﺎﻟﻚ ﺣﺲ ﺑﻴﺔ ﺑﺸﻨﻮ ﻛﺎﻋﺪ ﺍﻓﻜﺮ ﻛﺎﻝ
.. ﺳﻤﻌﻴﻨﻲ ﺯﻳﻦ ﺍﻣﻲ ﻭﺧﻮﺍﺗﻲ ﺭﺍﺡ ﻳﺼﻌﺪﻭﻥ ﻓﻮﻙ
ﻭﻳﻜﻌﺪﻭﻥ ﻳﺠﺮﺟﺮﻭﻧﺞ ﺑﺎﻟﻜﻼﻡ
ﻓﺎﻧﺘﻲ ﺍﻱ ﻭﺣﺪﺓ ﺗﺴﺄﻟﺞ ﻛﻠﻴﻠﻬﻢ ﻗﺎﺳﻢ ﻣﻴﻘﺒﻞ
ﺍﺳﻮﻟﻒ ﻭﻳﺎﻛﻢ ﺑﺨﺼﻮﺻﻴﺎﺗﻨﺎ
ﻭﻛﺎﻝ ﺑﺲ ﺍﺳﻤﻌﺞ ﻣﻄﻠﻌﺔ ﻳﻮﻡ ﺣﺠﺎﻳﺔ ﻭﺣﺪﻩ
ﺭﺍﺡ ﻳﻜﻮﻥ ﺣﺴﺎﺑﺞ ﻋﺴﻴﺮ ﻭﻣﺤﺪ ﻳﺨﻠﺺ ﻣﻦ ﺍﻳﺪﻱ
ﻫﺰﻳﺖ ﺭﺍﺳﻲ ﺑﻨﻌﻢ ﻭﻛﻤﺖ ﻣﻦ ﻣﻜﺎﻧﻲ
ﻧﺰﻟﺖ ﻋﻴﻮﻧﻪ ﻋﻠﻰ ﺑﺠﺎﻣﺘﻲ ﻭﺍﺗﺴﻌﺖ ﻋﻠﻰ ﻗﻤﻴﺺ ﺍﻟﺒﺠﺎﻣﺔ
ﺑﺎﻭﻋﺖ ﻋﻠﻰ ﻣﻜﺎﻥ ﻧﻈﺮﺍﺗﻪ
ﻭﺟﺎﻥ ﺍﺷﻮﻑ ﺭﻭﺣﻲ ﻣﺪﻛﻤﺔ ﺍﻟﺒﺠﺎﻣﺔ ﻏﻠﻂ
ﻭﻧﺺ ﺍﻟﺸﺴﻤﺔ ﻃﺎﻟﻊ ﻭ ﻣﺒﻴﻦ
ﺷﻬﻜﺖ ﻭﻟﻤﻴﺖ ﺻﺪﺭ ﺍﻟﺒﺠﺎﻣﺔ ﻋﻠﻰ ﺻﺪﺭﻱ
ﻭﺧﺰﺭﺗﻪ
.. ﻋﻔﻴﺔ ﺩﻳﻎ ( ﺩﻳﺮ ) ﻭﺟﻬﻚ ﻻ ﺗﺒﺎﻭﻉ
ﻫﻮ ﺭﻓﻊ ﺣﺎﺟﺒﻪ ﻭﻛﺎﻝ ﺑﺜﻘﺔ
.. ﺍﺑﺎﻭﻉ ﻋﻠﻰ ﺣﻼﻟﻲ ﺷﻨﻮ ﺣﺮﺍﻡ
ﺑﺎﻭﻉ ﻟﺴﺎﻋﺘﻪ ﻭﻛﻤﻞ ﻛﻼﻣﻪ
ﺑﺎﻟﻠﻪ ﺷﻮ ﻛﻮﻣﻲ ﺍﺗﺤﺮﻛﻲ ﺭﺍﺡ ﻳﺠﻴﺒﻮﻥ ﺍﻟﺮﻳﻮﻙ
ﺑﺲ ﺭﺣﻤﺔ ﻋﻠﻰ ﻭﺍﻟﺪﻳﺞ ﺳﺘﺮﻱ ﻋﻠﻴﻨﺎ ﻭﺑﺪﻟﻲ ﺍﻟﺒﺠﺎﻣﺔ
ﻣﺸﺔ ﻣﻦ ﻳﻤﻲ ﻭﺭﺍﺡ ﻟﻠﺒﺎﺏ ﻳﺮﻳﺪ ﻳﻄﻠﻊ
ﺟﺎﻥ ﻳﺤﺠﻲ ﻭﻳﺔ ﻧﻔﺴﻪ ﺑﺼﻮﺕ ﻣﺴﻤﻮﻉ
.. ﻫﻲ ﺑﺠﺎﻣﺔ ﻟﻮ ﺑﻠﻮﻯ ﺍﻟﻠﻪ ﻳﻠﻌﻨﻚ ﻳﺎﻟﺸﻴﻄﺎﻥ
ﻓﺘﺢ ﺍﻟﺒﺎﺏ ﻭﻃﻠﻊ
ﻭﺍﻧﺎ ﻛﺒﻞ ﺭﺣﺖ ﻋﺎﻟﻜﻨﺘﻮﺭ ﻭﻃﻠﻌﺖ ﺩﺷﺪﺍﺷﺔ ﻟﻮﻧﻬﺎ
ﺍﻭﻑ ﻭﺍﻳﺖ ﻛﻠﺶ ﻧﺎﺯﻛﺔ
ﺷﻴﻤﺎﺀ ﻛﺎﻟﺖ ﻫﺎﻱ ﺗﻠﺒﺴﻴﻬﺎ ﺑﺼﺒﺎﺣﻴﺔ ﺍﻟﻌﺮﺱ ﺑﺎﻭﻝ ﻳﻮﻡ
ﺍﻧﺘﺒﻬﺖ ﻟﺮﺟﻠﻲ ﺑﻴﻬﺎ ﺍﻟﻢ ﺑﺲ ﻃﻔﻴﻒ
ﺭﺣﺖ ﺩﺧﻠﺖ ﻟﻠﺤﻤﺎﻡ
ﻭﺭﺓ ﻧﺺ ﺳﺎﻋﺔ
ﺟﻨﺖ ﻭﺍﻛﻔﺔ ﻛﺪﺍﻡ ﺍﻟﻤﺮﺍﻳﺎ ﻣﺒﺪﻟﺔ ﻭﺩﺍﻣﺸﻂ ﺑﺸﻌﺮﻱ
ﺑﻌﺪ ﻣﺎ ﺟﻔﻔﺘﻪ ﺑﺎﻟﺸﺴﻮﺍﺭ
......
ﺩﺧﻞ ﻗﺎﺳﻢ ﻟﻠﻐﺮﻓﺔ ﻭﻫﺎﻟﺔ ﺩﺧﻠﺖ ﻭﺭﺍﻩ ﺷﺎﻳﻠﺔ ﺑﻴﺪﻫﺎ ﺻﻴﻨﻴﺔ
ﺍﻟﺮﻳﻮﻙ ﻭﻛﺎﻋﺪﺓ ﺗﻮﺯﻉ ﺍﺑﺘﺴﺎﻣﺎﺕ
ﻫﺎﻟﺔ .. ﺻﺒﺎﺡ ﺍﻟﻨﻮﺭ ﻋﺮﻭﺳﺘﻨﺎ
ﺟﺎﻧﺖ ﺗﺤﺠﻲ ﻭﺗﺒﺎﻭﻉ ﻋﻠﻰ ﺷﻜﻠﻲ
ﺗﺮﻳﺪ ﺗﺸﻮﻑ ﺍﻱ ﻋﻼﻣﺔ ﻋﻦ ﻟﻴﻠﺔ ﺍﻟﺒﺎﺭﺣﺔ
ﻗﺎﺳﻢ .. ﻫﺎﻟﺔ ﺣﻄﻲ ﺍﻟﺼﻴﻨﻴﺔ ﻭﺍﺗﻮﻛﻠﻲ ﻳﺎﻟﻠﻪ
ﻭﺳﻠﻤﻴﻨﺎ ﻋﻠﻰ ﺍﻣﺞ ﻭﻳﺎﺝ
ﻣﺎ ﺍﻓﺘﻬﻤﺖ ﺷﻨﻮ ﺟﺎﻥ ﻳﻘﺼﺪ
ﻫﺎﻟﺔ ﻭﺟﻬﺎ ﺍﺣﻤﺮ ﻛﺎﻟﺖ .. ﻫﺪﻯ ﺧﻮﺍﺗﺞ ﺍﺟﻮﻱ ﻭﺟﺎﺑﻮﺍ ﺍﻟﺮﻳﻮﻙ ﻭﺍﻣﻲ ﻛﺎﻟﺖ ﺻﻌﺪﻱ ﺍﻟﻬﻢ
ﺣﺘﻰ ﻳﺘﺮﻳﻜﻮﻥ ﻭﻳﻨﺰﻟﻮﻥ ﻓﻤﻮ ﺗﻨﺴﻴﻦ ﺗﻜﻤﻠﻴﻦ ﻭﺗﻨﺰﻟﻴﻦ ﺧﻮﺍﺗﺞ ﻳﻨﺘﻈﺮﻭﻧﺞ ﺟﻮﺓ
ﻫﻲ ﺑﺲ ﺫﻛﺮﺕ ﺧﻮﺍﺗﻲ ﺍﻧﻲ ﺭﺣﺖ ﻋﻠﻴﻬﺎ ﺑﻠﻬﻔﺔ
.. ﺍﻧﻲ ﻣﺎ ﺍﻏﻴﺪ ﺗﻐﻴﻚ ( ﻣﺎﺍﺭﻳﺪ ﺍﺗﺮﻳﻚ ) ﺷﺒﻌﺎﻧﺔ
ﺍﺟﺎﻧﻲ ﺻﻮﺕ ﻗﺎﺳﻢ ﻣﻦ ﻭﺭﺓ
.. ﻫﺎﻟﺔ ﻃﻠﻌﻲ ﻭﺳﺪﻱ ﺍﻟﺒﺎﺏ ﻭﺭﺍﺝ
ﻭﻫﻲ ﻛﺒﻞ ﺭﺍﺣﺖ ﺑﺪﻭﻥ ﻣﺎ ﺗﺒﺎﻭﻉ ﻋﻠﻴﺔ ﻭﻻ ﺗﺠﺎﻭﺑﻨﻲ
ﻧﻔﺬﺕ ﻛﻼﻡ ﺍﺧﻮﻫﺎ ﻭﻃﻠﻌﺖ
ﺑﺎﻭﻋﺖ ﻋﻠﻴﻪ ﻫﺴﺔ ﺷﻨﻮ ﺷﺴﻮﻱ
ﻛﻤﻞ ﻛﻼﻣﻪ
ﺍﻟﺤﺠﻴﺔ ﻭﺷﻐﻠﺔ ﺍﻻﺳﺘﺨﺒﺎﺭﺍﺕ ﻣﺎ ﺭﺍﺡ ﺗﺒﻄﻠﻬﺎ
ﺭﺍﺡ ﺍﺗﻮﺟﻪ ﻋﺎﻟﺼﻴﻨﻴﺔ ﻭﺑﺴﻂ ﻳﺎﻛﻞ
.. ﺗﻌﺎﻟﻲ ﺍﺗﺮﻳﻜﻲ ﺣﺘﻰ ﺗﻨﺰﻟﻴﻦ ﻳﻢ ﺧﻮﺍﺗﺞ
ﺷﻮﻓﻲ ﺍﻧﺎ ﺑﻴﺔ ﻃﺒﻊ ﺍﺗﺨﺒﻞ ﻣﻦ ﺍﻟﺒﻨﻴﺔ ﺍﻟﻲ ﺗﺘﻨﻌﻮﺹ
ﻭﺗﺘﺪﻟﻞ ﻋﻠﻰ ﻧﻌﻤﺔ ﺍﻟﻠﻪ
ﺟﺎﺑﻮﻟﺞ ﺭﻳﻮﻙ ﺗﻜﻌﺪﻳﻦ ﺗﺎﻛﻠﻴﻦ ﻣﺜﻞ ﺍﻟﺨﻠﻚ ﻭﺍﻟﻌﺎﻟﻢ
ﻭﺗﻜﻮﻣﻴﻦ
ﻳﻤﺔ ﻫﻮ ﻳﺤﺠﻲ ﻭﺍﻧﺎ ﻣﻦ ﺍﻟﺨﻮﻑ ﺍﻧﻌﻜﺪﺕ ﻣﻌﺪﺗﻲ
ﺑﺮﺑﻚ ﻫﺴﺔ ﻫﺬﺍ ﺩﻳﺪﻋﻮﻧﻲ ﻟﻠﻄﻌﺎﻡ ﻟﻮ ﻟﻼﻋﺪﺍﻡ
ﺧﺮﺏ ﺣﻈﻲ ﺍﻟﻤﻠﻄﻠﻂ
ﺭﺣﺖ ﻛﻌﺪﺕ ﻳﻤﻪ ﻗﺎﺑﻀﺎً
ﺻﺒﻠﻪ ﺟﺎﻱ ﺑﺎﻟﻜﻮﺏ
ﻭﺑﺎﻭﻉ ﻋﻠﻴﺔ ﻭﺳﺄﻟﻨﻲ ﺗﺮﻳﺪﻳﻦ ﺟﺎﻱ
.. ﻻ ﻣﺎ ﺍﻏﻴﺪ ﺷﺒﻌﺎﻧﺔ
ﺍﺑﺎﻭﻉ ﻋﺎﻟﺼﻴﻨﻴﺔ ﺟﺎﻧﺖ ﻣﻠﻴﺎﻧﺔ ﺍﻛﻞ ﻛﺎﻫﻲ ﻭﻛﻴﻤﺮ
ﻭﺧﺒﺰ ﺣﺎﺭ
ﺟﻨﺖ ﻣﻴﺘﺔ ﻣﻦ ﺍﻟﺠﻮﻉ ﻭﺑﻄﻨﻲ ﻇﻠﺖ ﺗﻄﻠﻊ ﺍﺻﻮﺍﺕ ﻣﻮﺳﻴﻘﻴﺔ
ﺑﺎﻭﻉ ﻋﻠﻴﺔ ﻭﺧﺰﺭﻧﻲ ﺑﻨﻔﺎﺫ ﺻﺒﺮ
.. ﻣﺒﻴﻦ ﺷﺒﻌﺎﻧﺔ
ﺍﻛﻠﺞ ﺗﺎﻛﻠﻴﻦ ﻻ ﻭﺍﻟﻠﻪ
ﻋﺰﺓ ﻛﻠﺸﻲ ﻻ ﻳﻜﻌﺪ ﻳﺘﺤﻠﻒ
ﺑﻌﺪﻩ ﻣﺎ ﻣﻜﻤﻞ ﻛﻼﻣﻪ ﺍﻧﻲ ﻛﺒﻞ ﻣﺪﻳﺖ ﺍﻳﺪﻱ ﻋﺎﻟﺼﻴﻨﻴﺔ
ﻭﻛﻌﺪﺕ ﺍﻛﻞ ﻭﻋﻴﻮﻧﻲ ﻋﻠﻴﻪ
ﺩﻧﻚ ﻭﻛﻤﻞ ﺍﻛﻠﻪ ﺍﺑﺎﻭﻉ ﻋﻠﻴﻪ ﻣﺎ ﺷﺎﺀ ﺍﻟﻠﻪ
ﻃﺒﻚ ﺍﻟﻤﻴﻤﻨﺔ ﻋﺎﻟﻤﻴﺴﺮﺓ ﻣﺎﺧﺬ ﺭﺍﺣﺘﻪ
ﺑﺤﻴﺚ ﺳﻮﺍﻟﻲ ﻭﺍﻫﺲ ﺍﻛﻞ ﻣﺎ ﺍﻋﺮﻑ ﻟﻴﺶ ﻃﺮﻳﻘﺔ ﺍﻛﻠﻪ
ﺗﺸﻬﻲ ﻋﺎﻻﻛﻞ
ﺷﻨﻔﺖ ﺍﻟﺮﺩﺍﻥ ﻭﺍﻧﻄﻠﻘﺖ ﺍﻛﻞ ﻭﻧﺴﻔﺖ ﺍﻟﻤﻮﺍﻋﻴﻦ ﺍﻟﻜﺪﺍﻣﻲ
ﻭﺷﺮﺑﺖ ﺍﻟﺠﺎﻱ ﻭﺑﻌﺪﻫﺎ ﺍﺗﻨﻬﺪﺕ ﺑﺮﺍﺣﺔ
ﻣﺎﻝ ﻭﺍﺣﺪ ﺷﺒﻌﺎﻥ ﺭﻓﻌﺖ ﺭﺍﺳﻲ
ﻭﺟﺎﻥ ﺍﺑﺎﻭﻉ ﻋﻠﻴﻪ ﻻﺯﻡ ﻛﻮﺏ ﺍﻟﺠﺎﻱ ﻭﻳﺒﺎﻭﻉ ﻋﻠﻴﺔ
ﻭﻋﻴﻮﻧﻪ ﻋﻠﻰ ﺷﻔﺎﻳﻔﻲ
ﻣﺪ ﺍﻳﺪﻩ ﻭﻟﺰﻡ ﺷﻔﺘﻲ ﺍﻟﺘﺤﺘﻴﺔ ﻭﻣﺴﺢ ﺍﺛﺎﺭ ﺍﻟﻜﻴﻤﺮ
ﻣﻦ ﻋﻠﻴﻬﺎ
ﻇﻠﺖ ﺍﻳﺪﻩ ﺗﺘﻠﻤﺲ ﺷﻔﺘﻲ
ﺭﺟﻌﺖ ﺭﺍﺳﻲ ﻟﻴﻮﺭﺓ
ﻭﻫﻮ ﺍﻧﺘﺒﻪ ﻋﻠﻰ ﻧﻔﺴﻪ ﻭﻛﺎﻡ
.. ﺍﻧﺎ ﻧﺎﺯﻝ
ﺭﺍﺡ ﻟﻠﺤﻤﺎﻡ ﻭﺑﻌﺪﻫﺎ ﺍﺗﻮﺟﻪ ﻟﻠﻤﺮﺍﻳﺎ ﺭﺵ ﺭﻳﺤﺔ ﻭﻋﺪﻝ ﺷﻌﺮﻩ ﻭﻃﻠﻊ
ﺍﺗﺒﻌﺘﻪ ﻭﻛﻤﺖ ﻣﻦ ﺍﻟﺼﻴﻨﻴﺔ ﺑﻌﺪﻣﺎ ﻛﺘﺮﺗﻬﺎ
ﻭﺭﺣﺖ ﻏﺴﻠﺖ ﺟﻨﺖ ﻭﺍﻛﻔﺔ ﻋﺎﻟﻤﺮﺍﻳﺎ ﺍﻋﺪﻝ ﺑﻨﻔﺴﻲ ﻗﺒﻞ ﻻ ﺍﻧﺰﻝ
ﺍﻧﺪﻙ ﺍﻟﺒﺎﺏ ﻭﺑﻌﺪﻫﺎ ﺍﻧﻔﺘﺢ
ﺑﺎﻭﻋﺖ ﻭﺟﺎﻥ ﺗﺪﺧﻞ ﺷﻴﻤﺎﺀ ﻭﻣﺮﻭﺓ
ﻭﺭﺍﻫﻢ ﺍﻡ ﻗﺎﺳﻢ ﻭﺍﻟﺒﻨﺎﺕ
ﺭﺣﺖ ﺭﻛﻀﺖ ﻋﻠﻰ ﺧﻮﺍﺗﻲ ﻭﺍﺧﺬﺗﻬﻢ ﻟﺤﻀﻨﻲ
ﺍﻡ ﻗﺎﺳﻢ .. ﺻﺒﺎﺡ ﺍﻟﺨﻴﺮ ﻋﺮﻭﺳﺘﻨﺎ ﺷﻨﻮ ﻫﺎﻟﺠﻤﺎﻝ
ﻣﺎ ﺍﻋﺮﻑ ﻭﻟﻴﺪﻱ ﻣﻦ ﺍﺗﺮﻳﻚ ﺑﺪﺓ ﺑﻴﺞ ﻟﻮ ﺑﺎﻟﻜﻴﻤﺮ
.....
ﺧﻄﻴﺔ ﺍﻡ ﻗﺎﺳﻢ ﻋﺎﻳﺸﺔ ﺍﻟﻠﺤﻈﺔ
ﺟﺎﻭﺑﺘﻬﺎ .. ﻃﺒﻜﻨﺎ ﺳﻮﻳﺔ ﻭﺍﺗﺮﻏﻴﻚ ( ﺍﺗﺮﻳﻚ ) ﺑﻴﻨﺎ
ﺳﻮﺍﻧﺎ ﻟﻜﻤﺔ ﻭﺣﺪﺓ
ﻣﻨﻰ .. ﻫﻬﻬﻬﻬﻪ ﺍﻭﻝ ﻣﺮﺓ ﺍﺷﻮﻑ ﻋﺮﻭﺱ ﺗﺤﺸﺶ ﺑﺼﺒﺎﺣﻴﺔ ﻋﺮﺳﻬﺎ
ﻭﺑﻌﻬﺪﻫﺎ ﺍﻡ ﻗﺎﺳﻢ ﻛﺎﻣﺖ ﺗﺒﺎﻭﻉ ﻣﻨﺎ ﻭﻣﻨﺎ ﻣﺜﻞ ﺍﻟﻲ ﺗﺪﻭﺭ ﻋﻠﻰ ﺷﻲ
ﻣﺒﻴﻦ ﻣﻦ ﻭﺟﻬﻬﺎ ﺍﻛﻮ ﻋﻠﻰ ﻟﺴﺎﻧﻬﺎ ﺳﺆﺍﻝ
ﺑﺲ ﻣﺎ ﺗﻜﺪﺭ ﺗﺤﺠﻲ ﻻﻥ ﻣﻨﺎ ﺧﻮﺍﺗﻲ
ﺑﻌﺪﻣﺎ ﻛﻌﺪﻭ ﺍﻟﺒﻨﺎﺕ ﻣﺮﻭﺓ ﻭﺷﻴﻤﺎﺀ ﻭﺧﻮﺍﺕ ﻗﺎﺳﻢ ﻳﺴﻮﻟﻔﻮﻥ
ﻭﺣﻴﻞ ﺍﻧﺪﻣﺠﻮﺍ ﻻﻥ ﻫﻤﺔ ﺟﺎﻧﻮﺍ ﺻﺪﻳﻘﺎﺕ ﻣﻦ ﻗﺒﻞ
ﻭﺑﻌﺪﻫﺎ ﺍﻡ ﻗﺎﺳﻢ ﻛﺎﻣﺖ
.. ﻳﺎﻟﻠﻪ ﺧﺎﻟﺔ ﺍﻧﻲ ﻭﺍﻟﺒﻨﺎﺕ ﻧﺎﺯﻟﻴﻦ ﻻﻥ ﻭﺭﺍﻧﺎ ﻃﺒﺦ
ﻋﻤﺎﻡ ﻗﺎﺳﻢ ﺭﺍﺡ ﻳﺠﻮﻥ ﻋﺎﻟﻐﺪﺓ
ﻭﺍﻧﺘﻮﺍ ﺍﺑﻘﻮﺍ ﺍﺧﺬﻭﺍ ﺭﺍﺣﺘﻜﻢ
ﻭﺍﻭﻝ ﻣﻄﻠﻌﻮﺍ ﺍﻟﺒﻨﺎﺕ ﻭﺍﺳﺘﻠﻤﺘﻨﻲ ﻣﺮﻭﺓ ﺑﺎﻻﺳﺌﻠﺔ
.. ﻫﺎ ﻫﺪﻭﺵ ﺑﺸﺮﻱ ﺷﻨﻮ ﺳﻮﻳﺘﻲ ﺍﻟﺒﺎﺭﺣﺔ
ﺧﻮ ﻣﺎ ﺍﺗﺄﺫﻳﺘﻲ ﻛﻠﻴﻠﻲ ﺷﻨﻮ ﺗﺤﺴﻴﻦ
ﺣﺘﻰ ﺍﻛﺘﺒﻠﺞ ﻭﺻﻔﺔ ﻋﻼﺝ ﻟﻤﺜﻞ ﻫﻴﺞ ﺣﺎﻻﺕ
ﻋﻠﻤﻮﺩ ﻗﺎﺳﻢ ﻳﺠﻴﺒﻬﺎ ﺍﻟﺞ ﻣﻦ ﺍﻟﺼﻴﺪﻟﻴﺔ
ﺷﻴﻤﺎﺀ .. ﻫﻬﻬﻬﻪ ﺧﺮﺏ ﻳﻮﻣﺞ ﻣﺮﻭﺓ ﻣﻦ ﺍﺳﺄﻟﺘﺞ ﻣﺒﻴﻦ ﻋﻠﻴﺞ ﺩﻛﺘﻮﺭﺓ
ﻫﻤﺔ ﻳﺤﺠﻮﻥ ﺍﻧﻲ ﺻﺮﺕ ﺑﻨﺺ ﻫﺪﻭﻣﻲ ﻣﺎ ﺍﻋﺮﻑ ﺷﻨﻮ ﺍﺟﺎﻭﺑﻬﻢ
ﻣﺮﻭﺓ .. ﺷﻨﻮ ﺷﺒﻴﺞ ﻫﺪﻭﺵ ﺍﺗﺰﻭﺟﺘﻲ ﻟﻮ ﺧﻴﻄﻮ ﺣﻠﻜﺞ
ﻭﻳﻦ ﻟﺴﺎﻧﺞ ﻳﻤﻌﻮﺩﺓ ﻟﻮ ﺗﻌﺮﻑ ﺑﻴﺞ ﺳﻠﻴﻤﻪ ﺗﻜﻮﻡ ﺗﻬﻠﻬﻞ
ﺟﺎﻭﺑﺘﻬﺎ ﺑﻜﻞ ﺧﺠﻞ
.. ﻣﻐﻮﺓ ﻋﻔﻴﺔ ﻻ ﺗﺬﻛﻐﻴﻨﻲ ( ﻣﺮﻭﺓ ﻋﻔﻴﺔ ﻟﺘﺬﻛﺮﻳﻨﻲ )
.. ﺷﻜﻮ ﺷﺒﻴﺞ ﺍﺣﺠﻴﻠﻨﺎ
.. ﻳﺎﺑﺔ ﺷﻨﻮ ﻣﻦ ﻣﻮﻗﻒ ﻣﺤﺮﺝ ﺻﺎﻍ ( ﺻﺎﺭ ) ﺑﻴﺔ
ﻭﺩﺍﻋﺘﺞ
ﺍﻟﺒﺎﺭﺣﺔ ﻗﺎﺳﻢ ﺍﻧﻜﻠﺐ ﻃﺮﺯﺍﻥ ﻭﺍﺧﺘﻜﻢ ﺻﺎﺭﺕ ﺍﻟﻘﺮﺩﺓ ﺷﻴﺘﺎ
ﻫﻮ ﻳﺮﻛﺾ ﻭﺍﻧﺎ ﺍﻃﻔﺮ ﻣﻦ ﻣﻜﺎﻥ ﻟﻤﻜﺎﻥ
ﻭﻣﻦ ﺯﻭﺩ ﺍﻟﺨﻔﺔ ﺍﻟﺘﻮﺕ ﺭﺟﻠﻲ ﻭﻭﻛﻌﺖ ﻭﻫﻮ
ﻛﺎﻡ ﻳﻐﺮﺩ ﻣﻦ ﺍﻟﻐﻀﺐ ﻭﺍﻟﻌﺼﺒﻴﺔ
ﺷﻴﻤﺎﺀ .. ﻋﺰﺓ ﺑﻌﻴﻨﺞ ﻫﺪﻯ ﻭﺍﻟﻠﻪ ﻛﻠﺖ ﻣﺎ ﺭﺍﺡ ﺗﺪﺑﺮﻳﻬﺎ
ﻭﺷﺴﻮﺓ ﺑﻴﺞ ﺑﺲ ﻻ ﺍﺫﺍﺝ
ﺟﺎﻧﺖ ﺗﺤﺠﻲ ﻭﻳﺎﻱ ﻭﺗﻔﺘﺢ ﺑﺎﻟﻌﻼﻟﻴﻚ ﺍﻟﻲ ﺟﺎﻳﺒﺘﻬﻢ ﻫﻲ ﻭﻣﺮﻭﺓ ﻃﻠﻌﺖ ﺣﻠﻮﻳﺎﺕ ﻭﻋﺼﺎﻳﺮ ﻭﻛﻌﺪﺕ ﺗﺴﻔﻂ ﺑﻴﻬﻢ ﺑﺎﻟﺜﻼﺟﺔ ﺍﻟﻘﺼﻴﺮﺓ ﺍﻟﻤﻮﺟﻮﺩﺓ ﺑﺮﻛﻦ ﺍﻟﻐﺮﻓﺔ
ﺟﺎﻭﺑﺘﻬﺎ ﻭﺍﻧﺎ ﺍﺑﺎﻭﻉ ﻋﻠﻴﻬﺎ
.. ﻻ ﺑﺎﻟﻌﻜﺲ ﻣﺴﻮﺍﻟﻲ ﺷﻲ ﺷﻜﻠﻪ ﻫﻮ ﻫﻤﻴﻦ ﺟﺎﻥ ﻣﺘﻀﺎﻳﻖ ﻣﻦ ﺍﻟﻤﻮﻗﻒ
ﻭﺍﺣﺲ ﺑﻲ ﺍﻗﺘﺮﺏ ﻣﻨﻲ ﻣﺜﻞ ﺍﻟﻲ ﻳﺮﻳﺪ ﻳﺄﺩﻱ ﻭﺍﺟﺐ
ﻣﺎ ﺍﻧﻜﺮ ﺟﺎﻥ ﺍﻛﻮ ﻧﻈﺮﺍﺕ ﺍﻋﺠﺎﺏ ﺑﻌﻴﻮﻧﻪ
ﺑﺲ ﻫﺬﺍ ﺍﻟﺸﻲ ﻟﻮﺣﺪﻩ ﻣﻮ ﺩﺍﻓﻊ ﻗﻮﻱ ﻳﺨﻠﻴﻪ ﻳﺘﻮﺍﺯﺓ ﻭﻳﺎﺧﺬﻧﻲ
ﻭﺍﻧﻲ ﺧﺎﻳﻔﺔ ﻭﺑﺠﻴﺖ ﻭﻫﻮ ﻋﻄﻒ ﻋﻠﻰ ﺣﺎﻟﻲ ﻭﻋﺘﻘﻨﻲ
ﻭﻛﺎﻝ ﺑﺲ ﻫﺎﻟﻤﺮﺓ ﺭﺍﺡ ﺍﻋﺬﺭﺝ
ﻣﺮﻭﺓ .. ﺷﻮﻓﻲ ﻫﺪﻯ ﺻﺤﻴﺢ ﺯﻭﺍﺟﻜﻢ ﺗﻢ ﺑﻈﺮﻭﻑ ﻏﺮﻳﺒﺔ
ﺑﺲ ﺑﻌﺪﻣﺎ ﺷﻔﺖ ﺍﻣﻪ ﻭﺍﻫﻠﻪ ﻭﻫﻮ ﻫﻤﻴﻦ ﻣﻦ ﺳﻠﻢ ﻋﻠﻴﻨﺎ ﻣﺒﻴﻦ ﺷﺨﺼﻴﺘﻪ ﻗﻮﻳﺔ ﺍﺗﻄﻤﻨﺖ ﻋﻠﻴﺞ
ﻻﻥ ﺍﻋﺮﻑ ﺍﻧﺘﻲ ﺑﻴﻦ ﻧﺎﺱ ﻣﺎ ﺭﺍﺡ ﻳﻈﻠﻤﻮﺝ
ﻓﺎﺗﻤﻨﻰ ﻣﻨﺞ ﺍﻥ ﺗﻜﺒﺮﻳﻦ ﻋﻘﻠﺞ ﻭﺗﺼﻴﺮﻳﻦ ﺳﺒﺎﻋﻴﺔ
ﻭﺗﻨﺠﺤﻴﻦ ﺑﺰﻭﺍﺟﺞ
ﺩﻧﻜﺖ ﺑﻀﻴﻖ ﻣﺎ ﺍﻛﺪﺭ ﺍﺑﻮﺡ ﻟﻤﺮﻭﺓ
ﻋﻦ ﺧﻮﻓﻲ ﻣﻦ ﺍﻟﻮﺣﻤﺔ ﻭﺣﺒﻪ ﻟﺮﻫﻒ ﻭﻭﻋﺪﻩ ﺑﺎﻟﺰﻭﺍﺝ ﻣﻨﻬﺎ
ﺑﻌﺪﻧﻲ ﻣﻤﺎﺧﺬﺓ ﻋﻠﻰ ﻣﺮﻭﺓ . ﺻﺎﺭ ﺯﻣﺎﻥ ﻣﻔﺎﺭﻛﺘﻨﺎ
ﻣﻮ ﺑﺴﻬﻮﻟﺔ ﺍﺣﺠﻲ ﻭﻳﺎﻫﺎ ﻣﺜﻞ ﺷﻴﻤﺎﺀ
.....
ﺑﺲ ﺍﻟﻤﺸﻜﻠﻪ ﺷﻴﻤﺎﺀ ﻳﻜﻔﻲ ﺍﺑﺎﻭﻉ ﻟﻮﺟﻬﺔ ﺍﻟﺘﻌﺒﺎﻥ ﻭﺍﻋﺮﻑ
ﻫﻲ ﺍﻟﺒﺎﺭﺣﺔ ﻣﺎ ﻧﺎﻣﺖ
ﻣﺮﻭﺓ ﺍﻧﻄﺘﻨﻲ ﺭﻗﻢ ﻧﻘﺎﻟﻬﺎ ﻭﻛﺎﻟﺖ
.. ﻫﺪﻯ ﺍﻋﺮﻑ ﺑﻴﺞ ﺍﻧﺘﻲ ﺧﺎﻳﻔﺔ ﻣﻦ ﺍﻟﻮﺣﻤﺔ
ﻓﺎﺣﺐ ﺍﻛﻠﺞ ﺍﺫﺍ ﺗﺸﻮﻓﻴﻦ ﺍﻥ ﺍﻟﻮﺣﻤﺔ ﺭﺍﺡ ﺗﺸﻜﻞ ﺣﺎﺟﺰ ﺑﻴﻨﺞ ﻭﺑﻴﻦ ﻗﺎﺳﻢ
ﺗﻌﺮﻓﻴﻦ ﺍﻟﺴﻨﺘﺮ ﻣﺎﻟﺘﻲ ﻫﻮ ﻧﺴﺎﺋﻴﺔ ﻭﺗﺠﻤﻴﻞ
ﺗﻌﺎﻟﻲ ﻋﻠﻴﺔ ﻟﻠﺴﻨﺘﺮ ﺍﻱ ﻭﻗﺖ ﺗﺮﻳﺪﻳﻦ ﺑﻲ ﺍﺣﺴﻦ ﺩﻛﺘﻮﺭﺓ ﺗﺠﻤﻴﻞ
ﺗﺮﺓ ﻫﻲ ﻣﺠﺮﺩ ﺗﺼﺒﻎ ﺍﻧﺘﻲ ﻟﻴﺶ ﻫﻴﺞ ﻣﻜﺒﺮﺓ
ﻣﻮﺿﻮﻋﻬﺎ
.. ﻣﻐﻮﺓ ﺍﻟﻮﺣﻤﺔ ﻭﺣﺪﺓ ﻣﻦ ﻫﻮﺍﻳﺔ ﺍﺳﺒﺎﺏ
ﺍﻟﻲ ﺗﺨﻠﻴﻨﻲ ﺍﺧﺎﻑ ﻣﻦ ﻗﺎﺳﻢ
ﻳﻤﻜﻦ ﺍﻟﻮﺣﻤﺔ ﺍﻫﻮﻥ ﺍﻻﺳﺒﺎﺏ
ﻭﺭﺓ ﺳﺎﻋﺔ ﺭﺍﺣﻮ ﻣﺮﻭﺓ ﻭﺷﻴﻤﺎﺀ ﺑﻌﺪﻣﺎ ﻛﻌﺪﻭﺍ ﻳﻮﺻﻮﻧﻲ
ﻋﻠﻰ ﺯﻭﺟﻲ ﻭﺑﺒﻴﺘﻲ
ﻧﺰﻟﺖ ﺟﻮﺓ ﻟﻠﺒﻴﺖ ﻭﺟﺎﻥ ﺍﻟﺒﻴﺖ ﻣﺨﺒﻮﺹ
ﺑﺎﻟﺠﻬﺎﻝ
ﺷﺎﻓﻮﻧﻲ ﻧﺰﻟﺖ ﺟﺎﻥ ﻳﺠﻴﻨﻲ ﻭﺍﺣﺪ ﻣﻦ ﺍﻭﻻﺩ ﻛﻮﺛﺮ
ﺍﺳﻤﻪ ﺯﻳﻦ ﻭﻛﺎﻝ
.. ﻭﻟﻜﻢ ﺗﻌﺎﻟﻮﺍ ﻧﺰﻟﺖ ﺍﻟﻌﺮﻭﺱ ﻭﻛﺎﻡ ﻳﻬﻠﻬﻞ
ﻣﺜﻞ ﺑﻴﺒﺘﻪ
ﻭﺍﻟﺘﻤﻮﺍ ﺍﻟﺠﻬﺎﻝ ﻋﻠﻴﺔ
ﺳﺎﻟﺘﻪ .. ﺯﻳﻮﻧﻲ ﻣﺎﻣﺎ ﻭﻳﻦ
ﺍﺷﺮﻟﻲ ﻋﺎﻟﻤﻄﺒﺦ ﻭﻫﻮ ﻳﺒﺎﻭﻉ ﻋﻠﻴﺔ
.. ﻋﺎﺍﺍﺍﺍﺍﺍ ﻭﻟﻜﻢ ﺷﻮﻓﻮﺍ ﺷﻌﺮﻫﺎ ﺷﻜﺪ ﻃﻮﻳﻞ
ﺍﺟﺘﻲ ﺍﻡ ﻗﺎﺳﻢ ﻭﻓﺮﻗﺘﻬﻢ ﻋﻦ ﻃﺮﻳﻘﻲ
.. ﻟﻚ ﺯﻳﻦ ﺳﻤﻲ ﺑﺎﺳﻢ ﺍﻟﻠﻪ
ﻳﺎﻟﻠﻪ ﺭﻭﺡ ﻣﻨﺎ
ﺑﺎﻭﻋﺖ ﻋﻠﻴﺔ ﻭﺍﺧﺬﺗﻨﻲ ﻟﻠﻤﻄﺒﺦ
ﻭﻛﺎﻟﺖ ﺍﻟﺒﻨﺎﺕ ﻣﺸﻐﻮﻻﺕ ﻳﺴﺎﻋﺪﻭﻧﻲ ﺑﺎﻟﻄﺒﺦ
.. ﺧﺎﻟﺔ ﺗﺤﺘﺎﺟﻮﻥ ﺍﺳﺎﻋﺪﻛﻢ
.. ﻻ ﺣﺒﻴﺒﺘﻲ ﺍﻧﺘﻲ ﺍﻟﻴﻮﻡ ﻋﺮﻭﺱ ﻛﺎﻓﻲ ﻋﻠﻴﺞ ﻗﺴﺎﻡ
ﺍﻟﺒﻨﺎﺕ ﻇﻠﻮ ﻳﻀﺤﻜﻮﻥ
ﺩﺧﻠﺖ ﻫﺪﻳﻞ ﻟﻠﻤﻄﺒﺦ
ﻭﺷﺎﻓﺘﻨﻲ ﻭﻋﻔﺴﺖ ﺍﻟﻮﺟﻪ ﻭﻛﺎﻟﺖ
.. ﺍﻛﻮﻝ ﻣﺎﻣﺎ ﺑﻴﺖ ﻋﻤﻮ ﻣﺤﻤﺪ ﺭﺍﺡ ﻳﻮﺻﻠﻮﻥ ﻫﻤﺔ ﻭﺑﻴﺖ ﻋﻤﻮ ﻛﺎﻇﻢ
ﺍﻡ ﻗﺎﺳﻢ ﻛﺎﻟﺖ .. ﻟﻌﺪ ﺧﻠﻲ ﺍﺭﻭﺡ ﺍﺑﺪﻝ ﺛﻮﺑﻲ ﺻﺎﺭ ﻛﻠﻪ ﺭﻳﺤﺔ ﻃﺒﺦ
ﻃﻠﻌﺖ ﻣﻦ ﺍﻟﻤﻄﺒﺦ
ﻭﻫﺪﻳﻞ ﺍﺟﺘﻲ ﻳﻤﻲ
.. ﻫﻤﺰﻳﻦ ﺭﺍﺡ ﺗﺠﻲ ﺭﻫﻒ ﺍﻛﻴﺪ ﻗﺎﺳﻢ ﺭﺍﺡ ﻳﻔﺮﺡ
ﺑﺸﻮﻓﺘﻬﺎ
ﻣﻨﻰ ﺯﻣﺨﺖ ﺑﻴﻬﺎ ﺑﻐﻀﺐ
.. ﻫﺪﻳﻞ ﻃﻠﻌﻲ ﺑﺮﺓ ﻻ ﺍﺑﺘﻠﻲ ﺑﻴﺞ ﻭﺍﻟﻠﻪ
ﻫﺪﻳﻞ .. ﻋﻠﻰ ﺷﻨﻮ ﺗﺒﺘﻠﻴﻦ ﺑﻴﺔ ﺗﺮﺓ ﻫﻮ ﻣﻮ ﺳﺮ
ﻛﻠﻨﺎ ﻧﻌﺮﻑ ﺑﻘﺎﺳﻢ ﻭﺭﻫﻒ ﺍﻭﻝ ﻭﺗﺎﻟﻲ ﺭﺍﺡ ﻳﺘﺰﻭﺟﻮﻥ
ﻫﺎﻟﻪ .. ﻫﺪﻳﻞ ﺍﺫﺍ ﻣﺎ ﺍﻧﻠﺼﻤﺘﻲ ﺍﺭﻭﺡ ﺍﻛﻮﻝ ﻟﻤﺎﻣﺎ ﻋﻠﻴﺞ
ﻫﺪﻳﻞ .. ﺷﻨﻮ ﺷﺒﻴﻜﻢ ﻫﺪﻳﺘﻮﺍ ﻋﻠﻴﺔ ﻭﺍﻛﻠﺘﻮﻧﻲ ﺑﻜﺸﻮﺭﻱ
ﻫﻤﺔ ﻳﺤﺠﻮﻥ ﻭﺍﻧﻲ ﻭﺟﻬﻲ ﻛﺎﻡ ﺻﺎﺭ ﻧﺎﺭ
ﻣﻮ ﻋﻠﻤﻮﺩ ﺷﻲ ﺑﺲ ﺣﺴﻴﺖ ﺑﺬﻝ
ﻛﻤﺖ ﻣﻦ ﺍﻟﻜﺮﺳﻲ ﻭﺑﺎﻭﻋﺖ ﻟﻬﺎﻟﺔ ﻭﻛﻠﺖ
.. ﻻ ﻋﺎﺩﻱ ﺍﻧﺎ ﻏﺎﺡ ( ﺭﺍﺡ ) ﺍﻃﻠﻊ ﻣﻨﺎ
ﺩﺧﻠﺖ ﻓﺎﻃﻤﺔ ﻭﺧﺰﺭﺕ ﻫﺪﻳﻞ ﻭﻛﺎﻟﺖ
.. ﻻ ﺍﻧﺘﻲ ﺗﺒﻘﻴﻦ ﻭﻫﺪﻳﻞ ﺗﻄﻠﻊ
ﻫﺪﻳﻞ ﻛﺒﻞ ﻃﻠﻌﺖ ﻭﻫﻲ ﺗﺤﺠﻲ
.. ﻭﺍﻟﻠﻪ ﺯﻳﻦ ﺗﻄﺮﺩﻭﻧﻲ ﻋﻠﻤﻮﺩ ﻭﺣﺪﺓ ﻣﺎ ﻋﻨﺪﻫﺎ ﻛﺮﺍﻣﺔ
ﺍﻫﻠﻬﺎ ﻟﺰﻛﻮﻫﺎ ﺑﺄﺧﻮﻱ
ﺭﺻﻴﺖ ﺍﺳﻨﺎﻧﻲ ﺑﻐﻴﺾ ﻭﺍﻟﻠﻪ ﻟﻮ ﻣﺎ ﺍﺳﺘﺤﻲ ﻭﻋﻴﺐ
ﺟﺎﻥ ﺭﺣﺖ ﻧﺘﻔﺖ ﺷﻌﺮﻫﺎ ﻛﻠﻪ ﺑﻴﺪﻱ
ﺑﺲ ﻣﻊ ﺍﻻﺳﻒ ﺍﻟﻜﺎﻉ ﻣﺤﻀﻮﺭﺓ
ﻛﻮﺓ ﻻﺯﻣﺔ ﻧﻔﺴﻲ
ﺩﺧﻠﺖ ﺍﻡ ﻗﺎﺳﻢ ﻭﺑﺎﻭﻋﺖ ﻟﻠﻮﺟﻮﻩ ﻭﺣﺴﺖ ﺍﻛﻮ ﺷﻲ ﻭﺳﺄﻟﺖ
.. ﺷﻜﻮ ﺷﺒﻲ ﺻﻮﺕ ﻫﺪﻳﻞ ﻳﻠﻌﻠﻊ ﺻﺎﻳﺮ ﺷﻲ
ﻣﻨﻰ .. ﻻ ﻳﻤﺔ ﻣﺎﻛﻮ ﺷﻲ ﺗﻌﺮﻓﻴﻦ ﻫﺪﻳﻞ ﻣﺨﺒﻠﺔ ﻭﺯﻋﻄﻮﻃﺔ
ﻭﺑﺴﺮﻋﺔ ﺗﺘﻤﺰﻋﻞ
......
ﻫﺎﻟﺔ .. ﻻ ﻫﺪﻳﻞ ﻣﻮ ﺻﻐﻴﺮﺓ ﺟﺒﻴﺮﺓ ﻭﺗﻌﺮﻑ ﺍﻟﺤﺠﻲ ﻛﻠﺶ ﺯﻳﻦ
ﻭﻻﺯﻡ ﺍﻣﻲ ﺗﻌﺮﻑ ﺑﻬﺪﻳﻞ ﺷﻠﻮﻥ ﺍﺗﺠﺎﻭﺯﺕ ﻋﻠﻰ ﻫﺪﻯ ﻭﻏﻠﻄﺖ ﻋﻠﻴﻬﺎ
ﺍﻡ ﻗﺎﺳﻢ .. ﺳﺪﻭ ﺍ ﺍﻟﻤﻮﺿﻮﻉ ﻫﺴﺔ ﺍﻟﺨﻄﺎﺭ ﺭﺍﺡ ﻳﻮﺻﻠﻮﻥ
ﻭﺑﺎﻭﻋﺖ ﻋﻠﻴﺔ
ﻣﺎﻣﺎ ﻫﺪﻯ ﻟﺘﻀﻮﺟﻴﻦ ﻫﺪﻳﻞ ﺣﺴﺎﺑﻬﺎ ﻳﻤﻲ ﺍﻧﺎ ﺍﺧﻠﻴﻬﺎ
ﺗﺠﻲ ﺗﻌﺘﺬﺭﻟﺞ
ﻫﺪﻯ .. ﻻ ﺧﺎﻟﺔ ﻣﺎﻛﻮ ﺷﻲ ﻳﻜﻔﻴﻨﻲ ﺍﻥ ﻫﻲ ﺗﺤﺲ ﺑﻐﻠﻄﻬﺎ
ﻻﻥ ﺍﻧﻲ ﻣﻤﺴﻮﻳﺘﻠﻬﺎ ﺷﻲ
ﻭﺭﺓ ﺳﺎﻋﺘﻴﻦ
ﺟﻨﺖ ﻓﻮﻙ ﺑﻐﺮﻓﺘﻲ ﺍﺑﺪﻝ ﻭﺣﻄﻴﺖ ﻣﻜﻴﺎﺝ
ﻭﺳﻤﻌﺖ ﺍﻻﺻﻮﺍﺕ ﺟﻮﺓ ﺷﻜﻠﻬﻢ ﻭﺻﻠﻮﺍ
ﺭﺷﻴﺖ ﻣﻌﻄﺮ ﻭﺣﻀﺮﺕ ﺷﺎﻝ ﻟﻠﺤﺎﻻﺕ ﺍﻟﻄﺎﺭﺋﺔ ﺧﺎﻑ
ﺍﺣﺪ ﻣﻮﺟﻮﺩ
ﻭﻧﺰﻟﺖ ﺟﻮﺓ ﻭﻛﻠﺒﻲ ﻛﺎﻡ ﻳﺪﻙ ﺣﻴﻞ ﺩﺧﻠﺖ
ﻋﻠﻴﻬﻢ ﻟﻠﺼﺎﻟﺔ ﺟﺎﻧﻮﺍ ﺍﻟﻜﻞ ﻣﻮﺟﻮﺩﻳﻦ ﺍﻟﻌﻤﺎﺕ ﻭﺯﻭﺟﺎﺕ ﺍﻟﻌﻤﺎﻡ ﻭﺑﻨﺎﺗﻬﻢ
ﺳﻠﻤﺖ ﻋﻠﻴﻬﻢ ﻭﺣﺪﺓ ﻭﺣﺪﺓ ﺑﺲ ﻭﻻ ﺍﺭﺗﺎﺣﻴﺖ ﺍﻟﻬﻢ
ﻛﻠﻬﻢ ﺷﺎﻳﻔﻴﻦ ﻧﻔﺴﻬﻢ ﻭﻣﻌﺎﺟﺒﻬﻢ ﺍﻟﻌﺠﺐ
ﻭﺍﻛﻮ ﻭﺣﺪﺓ ﺟﺎﻧﺖ ﻣﻤﻴﺰﺓ ﻋﻨﻬﻢ
ﻋﻴﻮﻧﻬﺎ ﻭﻻ ﺍﺳﺘﻘﺮﺕ ﺑﺲ ﺗﺒﺼﺒﺺ
ﺑﻌﺪﻳﻦ ﻋﺮﻓﺖ ﻫﺎﻱ ﺳﻌﺎﺩ ﻣﺮﺕ ﻋﻤﻬﻢ ﻛﺎﻇﻢ
ﻋﺰﺓ ﻫﻲ ﻫﺎﻱ ﺳﻌﺎﺩ
ﻭﺍﻡ ﻗﺎﺳﻢ ﻭﺍﻟﺒﻨﺎﺕ ﻳﺤﺠﻮﻥ ﻭﻳﺴﻮﻟﻔﻮﻥ ﻭﻳﺎﻫﻢ
ﻣﺠﺎﻣﻠﺔ
ﻣﺎ ﺍﺧﺬﻳﻦ ﺭﺍﺣﺘﻬﻢ ﻭﻳﺎﻫﻢ
ﻭﺍﻧﻲ ﺗﻠﻘﺎﺋﻴﺎ ﺍﻧﻀﻤﻴﺖ ﻟﻔﺮﻳﻘﻬﻢ
ﻧﻈﺮﺍﺕ ﺭﻫﻒ ﺍﻛﻠﺘﻨﻲ ﺍﻛﻞ
ﺟﺎﻧﺖ ﻛﺎﻋﺪﺓ ﻭﻳﺔ ﺍﻣﻬﺎ ﻓﺎﺗﺤﺔ ﺍﻟﺸﻌﺮ ﻭﺻﺎﺑﻐﺘﻪ
ﻭﻃﻮﻟﻬﺎ ﻳﺠﻨﻦ ﻭﺭﻏﻢ ﻫﺬﺍ ﻛﻠﻪ ﻋﻴﻮﻧﻬﺎ ﻣﻠﻴﺎﻧﺔ ﺣﺰﻥ
ﻋﻤﺔ ﻗﺎﺳﻢ ﺳﺄﻟﺘﻨﻲ
.. ﺷﻠﻮﻧﺞ ﺍﻧﺘﻲ ﻭﻗﺎﺳﻢ ﺍﻟﺒﺎﺭﺣﺔ ﺑﺎﻟﻌﺮﺱ ﺟﺎﻥ ﻛﻠﺶ
ﺿﺎﻳﺞ
ﺿﻠﻴﺖ ﻓﺎﺗﺤﺔ ﺣﻠﻜﻲ ﺑﺎﻟﻠﻪ ﻫﺎﻱ ﺷﺠﺎﻭﺑﻬﺎ
ﻭﺍﻡ ﻗﺎﺳﻢ ﻛﺒﻞ ﺟﺎﻭﺑﺘﻬﺎ
ﻭﻫﻲ ﺗﻀﺤﻚ
.. ﻫﻬﻬﻬﻬﻪ ﻫﻬﻬﻪ ﺣﺒﻴﺒﺘﻲ ﻏﻀﺐ ﻗﺎﺳﻢ ﺻﺎﺭ ﺧﺒﺮ ﻛﺎﻥ
ﺍﻭﻝ ﻣﺎ ﺩﺧﻞ ﻟﻐﺮﻓﺘﻪ ﻭﺷﺎﻑ ﺯﻭﺟﺘﻪ
ﻭﺩﺍﻋﺘﺞ ﺍﻟﻴﻮﻡ ﻛﻮﺓ ﻃﻠﻌﺘﻪ ﻣﻦ ﺍﻟﻐﺮﻓﺔ
ﺑﻌﺪ ﺗﻌﺮﻓﻴﻦ ﺳﻮﺍﻟﻒ ﺍﻟﻌﺮﺳﺎﻥ
ﻫﻲ ﺗﺤﺠﻲ ﻭﺍﻧﺎ ﻭﺟﻬﻲ ﻛﺎﻡ ﻳﻨﻄﻲ ﺍﻟﻮﺍﻥ
ﺍﺑﺎﻭﻉ ﻟﻤﻨﻰ ﻭﻛﻮﺛﺮ ﺧﺮﺑﺎﻧﺎﺕ ﺿﺤﻚ
ﻫﺎﻟﺔ .. ﺍﻱ ﻭﺍﻟﻠﻪ ﻳﻤﺔ ﻭﺍﻧﺘﻲ ﺍﻟﺼﺎﺩﻛﺔ
ﺍﻟﻴﻮﻡ ﻣﻦ ﺩﺧﻠﺖ ﻋﻠﻴﻬﻢ ﺻﻴﻨﻴﺔ ﺍﻟﺮﻳﻮﻙ
ﻛﺒﻞ ﺷﺤﺘﻨﻲ ﻣﻦ ﺍﻟﻐﺮﻓﺔ ﻋﺒﺎﻟﻚ ﺧﺮﺑﺖ ﻋﻠﻴﻪ ﺍﻟﺠﻮ
ﺍﻡ ﻗﺎﺳﻢ ﻛﺮﺻﺘﻬﺎ ﻭﻫﻤﺴﺖ ﻳﻤﻬﺎ
.. ﺍﻧﺎ ﺍﻟﺞ ﻋﻮﺑﺔ ﻭﺍﻧﺘﻲ ﺷﻌﺮﻓﺞ ﺑﻬﺎﻱ ﺍﻟﺴﻮﺍﻟﻒ
ﻳﺎﻟﻠﻪ ﺍﻣﺸﻲ ﻛﻮﻣﻲ ﺳﺎﻋﺪﻱ ﺳﺮﻭﺭ
ﻫﺎﻟﺔ ﻛﻤﺰﺕ ﻣﻦ ﺍﻟﻜﺮﺻﺔ ﻭﻛﺎﻣﺖ ﻣﻦ ﻣﻜﺎﻧﻬﺎ ﻭﻫﻲ ﺗﺤﻚ
.. ﺭﺣﻤﺔ ﺍﻟﻠﻪ ﻭﺍﻟﺪﻳﺞ ﺍﻡ ﻗﺎﺳﻢ ﻫﺎﻱ ﺟﺰﺍﺕ
ﺍﻟﻲ ﻳﻮﻓﻲ ﻟﻠﻮﻃﻦ
ﺳﻤﻌﺖ ﻫﺪﻳﻞ ﺗﻜﻮﻝ ﻟﺮﻫﻒ
.. ﺭﻫﻒ ﺣﺒﻴﺒﺘﻲ ﺗﻌﺎﻟﻲ ﻭﻳﺎﻱ ﺧﻠﻲ ﺍﺭﺍﻭﻳﺞ ﺍﻟﻤﻼﺑﺲ ﺍﻟﻲ ﺍﺷﺘﺮﻳﺘﻬﻢ
ﺍﺑﺎﻭﻉ ﻟﺮﻫﻒ ﻛﺎﻣﺖ ﻣﻦ ﻣﻜﺎﻧﻬﺎ ﻭﺍﻟﻌﻴﻮﻥ ﻛﺎﻣﺖ ﺗﻠﻤﻊ ﺑﺎﻟﺪﻣﻮﻉ
ﻭﻃﻠﻌﺖ ﺑﺴﺮﻋﺔ ﻫﻲ ﻭﻫﺪﻳﻞ ﻣﻦ ﺍﻟﺼﺎﻟﺔ
ﻭﺻﻌﺪﻭﺍ ﻓﻮﻙ
ﻫﺎﻟﺔ .. ﻫﺪﻯ ﺗﻌﺎﻟﻲ ﻭﻳﺎﻱ ﻟﻠﻤﻄﺒﺦ
ﺷﻌﻨﺪﺝ ﻛﺎﻋﺪﺓ ﻭﻳﺎﻫﻢ ﻭﺍﻟﻠﻪ ﺍﺫﺍ ﺑﻘﻴﺘﻲ ﺑﻌﺪ ﺳﺎﻋﺔ ﻳﻤﻬﻢ
ﻳﺼﻌﺪ ﻋﻨﺪﺝ ﺍﻟﻀﻐﻂ
ﻣﻦ ﻓﻬﻮﺍﺗﻬﻢ
ﻣﺎ ﺍﻋﺮﻑ ﻟﻴﺶ ﺍﺣﺲ ﺑﺮﻭﺣﻲ ﺿﺎﻳﻌﺔ ﻭﻳﺎﻫﻢ
ﻳﻤﻜﻦ ﻻﻥ ﺟﺪﻳﺪﺓ ﺑﻬﺬﺍ ﺍﻟﺒﻴﺖ
ﺩﺧﻠﻨﺎ ﻟﻠﻤﻄﺒﺦ ﻭﺳﻤﻌﻨﺎ ﻫﺸﺎﻡ ﻳﺤﺠﻲ ﺑﻐﻀﺐ ﻭﻳﺔ ﻛﻮﺛﺮ
.. ﻫﺎﻱ ﺍﻟﺰﻓﺖ ﺷﻌﺪﻫﺎ ﺟﺎﻳﺔ ﻫﻨﺎ
.. ﺍﻱ ﻏﻴﺮ ﻣﺮﺕ ﺍﺑﻮﻙ ﺍﻟﻤﺰﻳﻮﻥ
ﻣﺤﺴﻮﺑﺔ ﻋﻠﻴﻨﺎ ﻣﻦ ﺍﻟﻌﺎﺋﻠﺔ ﻭﻻﺯﻡ ﺍﻣﻲ ﺗﻌﺰﻣﻬﺎ
.. ﻣﻦ ﻫﺴﺔ ﺍﻛﻠﻜﻢ ﺑﺲ ﺍﺷﻮﻓﻬﺎ ﻛﺪﺍﻣﻲ ﺍﻧﺎ ﻏﻴﺮ ﻣﺴﺆﻝ ﻋﻦ ﺍﻟﺮﺍﺡ ﻳﺼﻴﺮ
ﻣﻮ ﺗﻜﻮﻟﻮﻥ ﻫﺸﺎﻡ ﻣﺎ ﻛﺎﻝ
ﻫﺎﻟﺔ .. ﻋﻔﻴﺔ ﻫﺸﺎﻡ ﺻﻠﻲ ﻋﺎﻟﻨﺒﻲ ﻭﺍﺗﻜﻔﻰ ﺍﻟﺸﺮ ﺧﻠﻴﻬﺎ ﺗﻮﻟﻲ
ﺍﻋﺘﺒﺮﻫﺎ ﻣﺎ ﻣﻮﺟﻮﺩﺓ ﻫﻲ ﻣﻮ ﻳﻤﻚ
ﺩﺧﻞ ﻗﺎﺳﻢ ﻭﺷﺎﻑ ﻫﺸﺎﻡ ﻣﻌﺼﺐ
.. ﺷﻜﻮ ﺷﺒﻴﻚ ﺗﺠﻌﺮ ﻭﺻﻮﺗﻚ ﻭﺍﺻﻞ ﻟﻠﺨﻄﺎﺭ
ﻫﺎﻟﺔ .. ﻫﺸﺎﻡ ﻣﺘﻀﺎﻳﻖ ﻣﻦ ﻭﺟﻮﺩ ﺳﻌﺎﺩ ﻣﺮﺓ ﺍﺑﻮ
ﻗﺎﺳﻢ ﺑﺎﻭﻉ ﻋﻠﻴﻪ ﻭﺑﻌﻴﻮﻧﻪ ﻧﻈﺮﺓ ﺍﺳﺘﻔﺰﺍﺯ .. ﻭﻛﺎﻝ
.. ﺳﻬﻠﺔ ﻣﺎ ﺗﺮﻳﺪ ﺳﻌﺎﺩ ﺗﻌﺘﺐ ﻫﺬﺍ ﺍﻟﺒﻴﺖ ﺭﻭﺡ ﺍﺩﺧﻞ ﻋﻠﻴﻬﺎ
ﻭﺍﻃﺮﺩﻫﺎ ﻣﻦ ﺍﻟﺒﻴﺖ ﻭﻛﻠﻠﻬﺎ ﺍﻛﺴﺮ ﺭﺟﻠﺞ ﺍﺫﺍ ﻋﺘﺒﺘﻲ ﻫﻨﺎ
ﻫﺸﺎﻡ .. ﻣﺎ ﺍﻛﺪﺭ ﺻﻌﺒﺔ ﺍﻣﻲ ﺗﻮﻛﻒ ﺑﻌﻴﻮﻧﻲ
ﺻﻌﺒﺔ ﺍﺣﺮﺟﻬﺎ ﻛﺪﺍﻡ ﺧﻄﺎﺭﻫﺎ
.. ﺯﻳﻦ ﻣﺎ ﺩﺍﻣﻚ ﺗﻌﺮﻑ ﻋﻨﺪﻙ ﺧﻄﺎﺭ ﻭﺯﺣﻤﺔ
ﻟﻴﺶ ﻣﺎ ﺍﺗﺴﻴﻄﺮ ﻋﻠﻰ ﻏﻀﺒﻚ ﻭﺗﺼﻴﺮ ﺣﻠﻴﻢ ﻭﺗﻨﺘﻈﺮ ﺍﻟﻔﺮﺻﺔ ﺗﺠﻲ ﻟﺤﺪ ﻋﻨﺪﻙ
ﻭﺗﺎﺧﺬ ﺑﺤﻴﻔﻚ ﻣﻮ ﺍﻧﺖ ﺗﺮﻭﺡ ﺗﻜﻤﺰ ﻭﻳﻘﻞ ﻣﻘﺪﺍﺭﻙ ﺧﻠﻴﻚ ﺛﻜﻴﻞ ﻭﺭﺍﻛﺰ ﺑﻜﻠﺸﻲ
ﺧﻠﺔ ﻭﻃﻠﻊ ﻗﺎﺳﻢ
ﻭﻗﺒﻞ ﻻ ﻳﻄﻠﻊ ﻛﻠﻪ
.. ﺭﻭﺡ ﺍﻛﻌﺪ ﻳﻢ ﺍﻟﺨﻄﺎﺭ ﺑﻴﻦ ﻣﺎ ﺍﺭﻭﺡ ﺍﺑﺪﻝ ﻣﻼﺑﺲ ﻭﺍﺟﻲ ﺣﺘﻰ ﻳﺼﺒﻮﻥ ﻏﺪﺓ
ﻃﻠﻌﻮﺍ ﺍﺛﻨﻴﻨﻬﻢ ﻣﻦ ﺍﻟﻤﻄﺒﺦ
ﻭﺳﺮﻭﺭ ﺑﻌﺠﻠﺔ .. ﻳﺎﻟﻠﻪ ﺑﻨﺎﺕ ﺻﻴﺤﻮﺍ ﺍﻣﻲ ﺧﻠﻲ ﺗﺠﻲ
ﺣﺘﻰ ﻧﺒﻠﺶ ﻧﺼﺐ ﻏﺪﺍ ﻗﺎﺳﻢ ﺑﺲ ﻳﻨﺰﻝ ﻳﺮﻳﺪ ﺍﻻﻛﻞ ﻛﻮﻥ ﺟﺎﻫﺰ
ﺍﺟﺘﻲ ﺍﻡ ﻗﺎﺳﻢ ﻭﻛﻢ ﻭﺣﺪﺓ ﻣﻦ ﺑﻨﺎﺕ ﻋﻤﺎﺗﻬﻢ
ﺣﺒﻮﺍ ﻳﺴﺎﻋﺪﻭﻥ ﻣﺪﺭﻱ ﻳﺮﺩﻭﻥ ﻳﺸﻮﻓﻮﻧﻲ ﻣﻦ ﺑﺎﺏ ﺍﻟﻔﻀﻮﻝ
ﺍﻟﻤﻬﻢ ﻛﻠﻨﺎ ﺍﺗﻌﺎﻭﻧﺎ ﺑﺘﺠﻬﻴﺰ ﺍﻟﺴﻔﺮﺓ
ﻭﺍﻡ ﻗﺎﺳﻢ ﻛﺎﻟﺖ
.. ﺷﻨﻮ ﻫﻮ ﻭﻳﻦ ﻗﺎﺳﻢ ﺍﺷﻮ ﻣﺎﻛﻮ ﻫﺬﺍ ﺑﺲ ﻫﺸﺎﻡ
ﺩﻳﻨﻘﻞ ﺍﻻﻛﻞ ﻳﻢ ﺍﻟﺮﺟﺎﻝ
ﻫﺎﻟﺔ .. ﻳﻤﺔ ﻗﺎﺳﻢ ﺻﻌﺪ ﻓﻮﻙ ﻳﺒﺪﻝ ﻣﻼﺑﺴﻪ
ﺟﻨﺖ ﺍﺣﻀﺮ ﺑﺎﻟﻤﻮﺍﻋﻴﻦ ﺣﺘﻰ ﻳﺼﺒﻮﻥ
ﺍﻡ ﻗﺎﺳﻢ ﺑﺎﻭﻋﺘﻠﻲ ﻭﺣﺠﺖ ﻣﻦ ﺑﻴﻦ ﺍﺳﻨﺎﻧﻬﺎ
.. ﻋﻮﻓﻲ ﺍﻟﻲ ﺑﻴﺪﺝ ﻭﺭﻭﺣﻲ ﺻﻌﺪﻱ ﺻﻴﺤﻲ ﺭﺟﻠﺞ ﺧﻠﻲ ﻳﻨﺰﻝ ﻛﻮﻟﻴﻠﻪ ﺻﺒﻮﺍ ﺍﻟﻐﺪﺓ
ﺟﺎﻧﺖ ﺗﺤﺠﻲ ﻭﻋﻴﻮﻧﻬﺎ ﺗﺠﺪﺡ ﻧﺎﺭ
ﺗﺮﻛﺖ ﺍﻟﻤﻮﺍﻋﻴﻦ ﻭﺭﺣﺖ ﺑﺴﺮﻋﺔ
ﺧﺮﺏ ﺷﻠﻮﻥ ﺑﻴﻬﻢ ﻳﺎﺭﺑﻲ ﺗﺼﺮﻓﺎﺕ ﻫﺎﻱ ﺍﻟﻌﺎﺋﻠﺔ ﺍﺑﺪ ﻣﺎ ﺗﻨﺤﺰﺭ ﺷﻜﻠﻲ ﺭﺍﺡ ﺍﺿﻞ
ﺍﺗﻌﺜﺮ ﺑﻴﻨﺎﺗﻬﻢ ﻭﺍﻧﺼﺪﻡ ﺍﻟﻰ ﺍﻥ ﺭﺑﻲ ﻳﻔﺘﺤﻬﺎ ﻋﻠﻴﺔ ﻭﺍﻓﻬﻢ ﻋﻠﻴﻬﻢ
ﺻﻌﺪﺕ ﻓﻮﻙ
ﺟﺎﻥ ﺍﻟﻔﻮﻙ ﺳﻨﻄﺔ ﻫﺪﻭﺀ ﻣﺎﻛﻮ ﺍﻱ ﺻﻮﺕ
ﺭﺣﺖ ﻟﻐﺮﻓﺘﻨﺎ ﺣﺘﻰ ﺍﺻﻴﺤﻪ ﻋﺒﺮﺕ ﻣﻦ ﻳﻢ ﺑﺎﺏ ﺷﻮﻳﺔ ﻣﻔﺘﻮﺡ
ﻟﻔﺖ ﺍﻧﺘﺒﺎﻫﻲ ﺻﻮﺕ ﻭﺣﺪﺓ ﺗﺒﺠﻲ
ﺍﺗﻮﻗﻔﺖ ﻭﺑﺎﻭﻋﺖ ﺑﻔﻀﻮﻝ ﺍﺭﻳﺪ ﺍﻋﺮﻑ ﻣﻨﻮ ﺻﺎﺣﺐ ﺍﻟﺼﻮﺕ
ﺍﻗﺘﺮﺑﺖ ﻋﺎﻟﺒﺎﺏ ﺍﻟﻤﻔﺘﻮﺡ
ﻭﺟﺎﻥ ﺍﺷﻮﻑ
ﺭﻫﻒ ﻛﺎﻋﺪﺓ ﻋﺎﻟﺴﺮﻳﺮ ﺩﺗﺒﺠﻲ ﻭﻗﺎﺳﻢ ﺭﺍﻛﻊ ﻳﻢ ﺭﺟﻠﻴﻬﺎ
ﻭﺩﻳﻤﺴﺢ ﺑﺪﻣﻮﻋﻬﺎ ﻳﻮﺍﺳﻴﻬﺎ
.....
ﻫﺪﻯ
ﺟﻨﺖ ﻣﺘﺠﻬﺔ ﻟﻐﺮﻓﺘﻲ ﺣﺘﻰ ﺍﺻﻴﺢ ﻟﻘﺎﺳﻢ ﻳﻨﺰﻝ
ﻟﻠﻐﺪﺍ ﺑﺲ ﺳﻤﻌﺖ ﺻﻮﺕ ﻭﺣﺪﺓ ﺩﺗﺒﺠﻲ ﻟﻔﺖ ﺍﻧﺘﺒﺎﻫﻲ
ﺑﺎﺏ ﻏﺮﻓﺔ ﻫﺪﻳﻞ ﻣﻔﺘﻮﺡ ﺷﻮﻳﺔ
ﺍﻗﺘﺮﺑﺖ ﺑﻔﻀﻮﻝ ﺍﺭﻳﺪ ﺍﺷﻮﻑ ﻣﻨﻮ ﺩﺗﺒﺠﻲ ﻭﻟﻴﺶ
ﺟﺎﻥ ﺍﺷﻮﻑ
ﺭﻫﻒ ﻛﺎﻋﺪﺓ ﻋﺎﻟﺴﺮﻳﺮ ﻭﻗﺎﺳﻢ ﺭﺍﻛﻊ ﻳﻢ ﺍﻟﺴﺮﻳﺮ
ﻭﺩﻳﻤﺴﺢ ﺑﺪﻣﻮﻋﻬﺎ ﻳﻮﺍﺳﻴﻬﺎ
ﺟﻤﺪﺕ ﺑﻤﻜﺎﻧﻲ ﻣﻦ ﺍﻟﻤﻮﻗﻒ ﻣﺎ ﺍﻋﺮﻑ ﺷﺼﺎﺭ ﺑﻴﺔ
ﺟﺎﻥ ﻗﺎﺳﻢ ﻳﺤﺠﻲ ﻭﻳﺔ ﺭﻫﻒ ﻭﻳﻤﺴﺢ ﺑﺪﻣﻮﻋﻬﺎ
ﻭﺍﺛﻨﻴﻨﻬﻢ ﺭﺍﻳﺤﻴﻦ ﺑﻌﺎﻟﻢ ﺛﺎﻧﻲ ﻭﻻ ﺣﺘﻰ ﺍﻧﺘﺒﻬﻮﺍ ﻟﻮﺟﻮﺩﻱ
ﺍﻧﻲ ﻭﺍﻛﻔﺔ ﺍﺑﺎﻭﻉ ﻋﻠﻴﻬﻢ
.. ﺭﻫﻒ ﻛﺎﻓﻲ ﻟﺨﺎﻃﺮ ﺍﻟﻠﻪ ﻻ ﺗﺒﺠﻴﻦ
ﺍﺣﻨﺎ ﻣﻮ ﺍﺗﻔﻘﻨﺎ ﺗﺼﺒﺮﻳﻦ ﻭﺗﺼﻴﺮﻳﻦ ﻗﻮﻳﺔ ﻭﻣﺎ ﺗﺴﺘﺴﻠﻤﻴﻦ
.. ﺻﺪﻛﻨﻲ ﺣﺎﻭﻟﺖ ﺑﺲ ﻭﺍﻟﻠﻪ ﻣﺎ ﻛﺪﺭﺕ ﺍﺗﺤﻤﻞ
ﺷﻠﻮﻥ ﺗﺮﻳﺪ ﻣﻨﻲ ﺍﻧﺎﻡ ﻟﻴﻠﻲ ﻭﺍﻧﺎ ﺍﻋﺮﻑ
ﺍﻧﺖ ﻭﻳﺎﻫﺎ ﺟﻤﻌﺘﻜﻢ ﻏﺮﻓﺔ ﻭﺣﺪﺓ
ﻭﺭﺍﺡ ﺗﻨﺎﻡ ﺑﺤﻀﻨﻚ
ﻳﻌﻨﻲ ﺧﻠﻲ ﺭﻭﺣﻚ ﺑﻤﻜﺎﻧﻲ
ﺗﻜﺪﺭ ﺗﺼﺒﺮ ﺗﺸﻮﻓﻨﻲ ﻛﺒﺎﻝ ﻋﻴﻨﻚ ﺍﺗﺰﻭﺝ ﻏﻴﺮﻙ ﻭﺍﻧﺎﻡ ﺑﺤﻀﻨﻪ ؟؟
ﻗﻄﻊ ﻛﻼﻣﻬﺎ ﻭﺣﻂ ﺍﻳﺪﻩ ﻋﻠﻰ ﺣﻠﻜﻬﺎ
.. ﻣﺎ ﺍﻧﺘﻈﺮ ﻛﺒﻞ ﺍﺩﻓﻨﺞ ﺍﻧﺘﻲ ﻭﻳﺎﻩ
.. ﺷﻔﺖ ﺷﻠﻮﻥ ﻣﺎ ﺍﺗﺤﻤﻠﺖ ﻣﺠﺮﺩ ﺗﺴﻤﻊ ﺳﺆﺍﻟﻲ ﻭﺗﻠﻮﻣﻨﻲ ﻣﻦ
ﺍﺑﺠﻲ ﻭﺍﻧﻘﻬﺮ
.. ﺷﻮﻓﻲ ﺭﻫﻒ ﺍﻧﺎ ﻣﻦ ﺍﻻﻭﻝ ﺍﻛﺪﺕ ﻋﻠﻴﺞ ﺍﺫﺍ ﺟﻨﺘﻲ ﺗﺮﺩﻳﻦ
ﺗﺴﺘﻤﺮﻳﻦ ﻭﻳﺎﻱ
ﻳﺎﺑﻨﺖ ﺍﻟﻨﺎﺱ ﻓﻼﺯﻡ ﺗﺘﺤﻤﻠﻴﻦ
ﺗﺸﻮﻓﻴﻨﻲ ﺍﺗﺰﻭﺝ ﻛﺪﺍﻡ ﻋﻴﻨﺞ
ﺗﺮﺓ ﻫﺬﺍ ﺯﻭﺍﺝ ﻣﻮ ﻟﻌﺒﺔ ﻭﻋﻨﺪﻱ ﻭﺍﺟﺐ ﻻﺯﻡ ﺍﺍﺩﻳﻪ ﺍﺗﺠﺎﻩ ﺯﻭﺟﺘﻲ
ﻭﺍﻧﺘﻲ ﻋﺮﻓﺘﻲ ﻇﺮﻭﻑ ﺍﻟﺰﻭﺍﺝ ﻭﻭﺍﻓﻘﺘﻲ ﺗﺒﻘﻴﻦ
ﻭﻳﺎﻱ ﻭﻫﺬﺍ ﺍﻟﺸﻲ ﻛﺒﺮ ﻗﺪﺭﺝ ﻭﺯﺍﺩ ﻣﻦ ﻣﻌﺰﺗﺞ ﺑﻜﻠﺒﻲ ﻻﻥ ﺭﻏﻢ
ﺍﻟﺼﺎﺭ ﺑﻘﻴﺘﻲ ﻣﺘﻤﺴﻜﺔ ﺑﺤﺒﻨﺎ
ﻣﺜﻠﻤﺎ ﺍﻧﺎ ﺑﺎﻗﻲ ﻋﻠﻰ ﺍﻟﻌﻬﺪ ﻭﻳﺎﺝ ﻭﻣﺘﻤﺴﻚ ﺑﻴﺞ
ﺭﻫﻒ .. ﺍﺷﻮ ﻛﻼﻡ ﺧﺎﻟﺔ ﻋﻜﺲ ﻛﻼﻣﻚ
ﻗﺎﺳﻢ .. ﺷﻠﻮﻥ ﺍﻣﻲ ﻋﻜﺲ ﻛﻼﻣﻲ ﻣﺎ ﺍﻓﺘﻬﻤﺖ
.....
ﺍﺷﻮ ﺗﻜﻮﻝ ﻗﺎﺳﻢ ﻓﺮﺣﺎﻥ ﺑﻌﺮﻭﺳﺘﻪ ﻭﺍﻟﻴﻮﻡ ﻭﺑﺎﻟﻜﻮﺓ ﻳﺎﻟﻠﻪ ﻗﺒﻞ
ﻳﻨﺰﻝ ﺟﻮﺓ ﻳﻤﻨﺎ
ﻭﻣﺎﺧﺬ ﺭﺍﺣﺘﻚ ﻭﻳﺎﻫﺎ ﻭﺍﻧﻲ ﻛﺎﻋﺪﺓ ﺍﺗﻜﻠﺐ ﺑﻨﺎﺭﻱ
ﺍﺑﺎﻭﻉ ﻋﻠﻴﻪ ﺍﺑﺘﺴﻢ ﻣﺜﻞ ﺍﻟﻲ ﻳﻌﺮﻑ ﺳﻮﺍﻟﻒ ﺍﻣﻪ
ﺭﻫﻒ ﺷﺎﻓﺖ ﺍﺑﺘﺴﺎﻣﺘﻪ ﻭﺣﺠﺖ ﺑﻐﻴﺾ
.. ﻳﻌﻨﻲ ﺗﺒﺘﺴﻢ ﻭﻣﺎ ﻧﻜﺮﺕ ﻛﻼﻡ ﺍﻣﻚ .
ﻣﻌﻨﺎﻫﺎ ﻛﻼﻡ ﺍﻣﻚ ﺻﺤﻴﺢ
ﻭﺍﻧﻲ ﺍﻟﻐﺒﻴﺔ ﺍﻛﻮﻝ ﻫﻲ ﺩﺗﺤﺠﻲ ﻫﺸﻜﻞ ﺣﺘﻰ ﺗﻐﻴﻀﻨﻲ
.. ﺭﻫﻒ ﻭﻳﻦ ﺗﺮﺩﻳﻦ ﺗﻮﺻﻠﻴﻦ ﺑﻬﺬﺍ ﻛﻼﻣﺞ
.. ﺍﺭﻳﺪ ﺗﻄﻤﻨﻲ ﻭﻫﺬﺍ ﻣﻦ ﺣﻘﻲ .
ﻫﻤﺔ ﻳﺤﺠﻮﻥ ﻭﺍﻧﻲ ﺍﺣﺲ ﻛﻠﺒﻲ ﻛﺎﻡ ﻳﻔﻮﺭ ﻣﻮ ﺣﺒﺎً ﺑﻘﺎﺳﻢ ﻻ
ﺑﺲ ﻣﻮﻗﻔﻬﻢ ﺣﺴﺴﻨﻲ ﺑﺎﻻﻫﺎﻧﺔ ﻭﺍﻟﺬﻝ
ﻗﺎﺳﻢ .. ﻣﺜﻼ ﺷﻠﻮﻥ ﺗﺮﺩﻳﻨﻲ ﺍﻃﻤﻨﺞ
.. ﺍﻧﻲ ﻣﻮ ﻏﺒﻴﺔ ﺻﺤﻴﺢ ﺍﻧﺖ ﺍﺗﺰﻭﺟﺘﻬﺎ ﻏﺼﺐ ﻋﻨﻚ
ﺑﺲ ﺍﻧﻲ ﻣﺘﺄﻛﺪﺓ ﺍﻗﺘﺮﺑﺘﻠﻬﺎ ﻭﺍﺧﺬﺗﻬﺎ ﻭﺗﻤﻤﺖ ﺯﻭﺍﺟﻚ ﻣﻨﻬﺎ
ﻻﻥ ﻫﺬﺍ ﻭﺍﺟﺒﻚ ﺑﺲ ﺍﻟﻲ ﺍﺭﻳﺪ ﺍﻋﺮﻓﻪ ﻣﺎ ﺑﻌﺪ ﺫﻟﻚ
ﺷﻨﻮ ﺻﺎﺭ ﻣﻦ ﺑﻌﺪﻣﺎ ﺍﺧﺬﺗﻬﺎ ﻫﻢ ﺭﺟﻌﺖ ﻧﻤﺖ ﺑﺤﻀﻨﻬﺎ
ﻫﻢ ﻫﻤﺴﺘﻠﻬﺎ ﺑﻜﻼﻡ ﺍﻟﺤﺐ ﺍﻟﻲ ﺗﻜﻮﻟﻪ ﺍﻟﻲ
ﻫﻢ ......
ﻗﺎﺳﻢ ﻗﺎﻃﻊ ﻛﻼﻣﻬﺎ ﺑﻐﻀﺐ ﻭﻛﺎﻡ ﻣﻦ ﻣﻜﺎﻧﻪ ﻭﻋﻴﻮﻧﻪ ﻋﻠﻴﻬﺎ
.. ﻟﺤﻈﺔ ﺭﻫﻒ ﺍﻧﺘﻲ ﻫﻮﺍﻱ ﺭﺣﺘﻲ ﺯﺍﻳﺪ ﺑﻜﻼﻣﺞ ﻭﻳﺎﻱ
ﺗﺮﺓ ﺣﺒﻲ ﺍﻟﺞ ﻣﺎ ﻳﻨﻄﻴﺞ ﺍﻟﺤﻖ ﺗﺘﺪﺧﻠﻴﻦ
ﻭﺗﺴﺄﻟﻴﻨﻲ ﻋﻦ ﻫﻴﺞ ﺷﻲ ﺧﺎﺹ
ﻻ ﺗﺘﻮﻗﻌﻴﻦ ﻣﻨﻲ ﺑﻴﻮﻡ ﺍﺟﻲ ﺍﺣﺠﻴﻠﺞ
ﺷﻨﻮ ﻳﺪﻭﺭ ﺑﻴﻨﻲ ﻭﺑﻴﻦ ﺯﻭﺟﺘﻲ
ﺍﺧﺬﺗﻬﺎ ﻣﺎ ﺍﺧﺬﺗﻬﺎ ﺷﻨﻮ ﺍﺳﻮﻱ ﻣﻮ ﺩﺧﻠﺞ
ﻫﺬﺍ ﺍﻟﺸﻲ ﺧﺎﺹ ﺑﻴﺔ ﻭﻣﺎ ﺍﺳﻤﺢ ﻟﻜﺎﺋﻦ ﻣﻦ ﻛﺎﻥ ﻳﺘﻄﻔﻞ ﻋﻠﻰ
ﺧﺼﻮﺻﻴﺎﺗﻲ
ﺣﺘﻰ ﻟﻮ ﻛﺎﻧﺖ ﻫﺎﻱ ﺍﻟﻮﺣﺪﺓ ﺍﻧﺘﻲ ﺍﻟﻲ ﺍﺣﺒﻬﺎ ﻭﺷﺎﺭﻳﻬﺎ ﺑﺮﻭﺣﻲ
ﺳﺎﻣﻌﺔ ﻟﻮ ﺍﻋﻴﺪ
ﺭﺟﻌﺖ ﺗﺒﺠﻲ
.. ﺗﺮﺓ ﺍﻧﻲ ﺳﺄﻟﺘﻚ ﻻﻥ ﺍﺣﺒﻚ
ﺍﺩﺭﻱ ﺑﻴﻚ ﻣﺠﺒﻮﺭ ﻋﻠﻴﻬﺎ ﺑﺲ ﺍﺭﻳﺪ ﺍﺗﺄﻛﺪ ﺣﺘﻰ ﻛﻠﺒﻲ ﻳﺮﺗﺎﺡ
ﺍﺧﺎﻑ ﺗﺎﺧﺬﻙ ﻣﻨﻲ ﻭﺗﻐﻴﺮﻙ ﻋﻠﻴﺔ
ﻭﺑﻬﺎﻱ ﺍﻻﺛﻨﺎﺀ ﺳﻤﻌﺖ ﺻﻮﺕ ﺍﻡ ﻗﺎﺳﻢ ﺗﺼﻴﺢ ﻋﻠﻰ ﻗﺎﺳﻢ ﺣﺘﻰ
ﻳﻨﺰﻝ ﻻﻥ ﺻﺒﻮﺍ ﻏﺪﺍ
ﺟﺎﻭﺑﻬﺎ ﺑﺼﻮﺕ ﻋﺎﻟﻲ ﻭﻫﻮ ﻳﺒﺎﻭﻉ ﻟﺮﻫﻒ
.. ﻟﺤﻈﺔ ﺣﺠﻴﺔ ﻫﺴﺔ ﺍﻧﺰﻝ
.....
ﻣﻜﺪﺭﺕ ﺍﻟﺰﻡ ﺭﻭﺣﻲ ﺣﺴﻴﺖ ﺑﺎﻻﻫﺎﻧﺔ
ﺩﻓﻌﺖ ﺍﻟﺒﺎﺏ ﻭﺩﺧﻠﺖ ﻋﻠﻴﻬﻢ
ﺭﻫﻒ ﻛﺎﻣﺖ ﻣﻦ ﻣﻜﺎﻧﻬﺎ ﻣﺘﻮﺗﺮﺓ
ﻭﺍﻧﻲ ﺣﺠﻴﺖ ﺑﻐﻴﺾ ﻭﺍﺑﺎﻭﻉ ﻋﻠﻴﻬﻢ ﺍﺛﻨﻴﻨﻬﻢ
.. ﺣﺒﻴﺘﻲ ﺍﻧﻲ ﻫﻢ ﻣﺜﻞ ﻗﺎﺳﻢ ﺍﻧﺠﺒﻐﺖ ( ﺍﻧﺠﺒﺮﺕ ) ﻋﻠﻰ ﻫﺬﺍ ﺍﻟﺰﻭﺍﺝ
ﺍﻟﻠﻪ ﻭﻛﻴﻠﺞ ﺍﺗﺰﻭﺟﺘﻪ ﻏﺼﺐ ﻋﻨﻲ
ﻗﺎﻃﻌﻨﻲ ﻗﺎﺳﻢ ﻭﺣﺠﺔ ﻭﻳﺔ ﺭﻫﻒ ﻣﻦ ﺑﻴﻦ ﺍﺳﻨﺎﻧﻪ
.. ﺭﻫﻒ ﻃﻠﻌﻲ ﻭﺗﺮﻛﻴﻨﺎ ﻟﻮﺣﺪﻧﺎ
ﺷﻔﺘﻬﺎ ﺍﺗﻮﺟﻬﺖ ﻟﻠﺒﺎﺏ ﺗﺮﻳﺪ ﺗﻄﻠﻊ ﻭﻫﻲ ﻣﺮﺗﺒﻜﺔ
ﻭﻛﻔﺘﻬﺎ
ﺣﺠﻴﺖ ﻭﻳﺎﻩ
.. ﻻ ﻟﺤﻈﺔ ﻟﻴﺶ ﺗﻄﻠﻊ ﻫﺬﺍ ﺍﻟﻤﻮﺿﻮﻉ ﻳﻬﻤﻨﺎ ﺛﻼﺛﺘﻨﺎ
ﺧﻠﻲ ﺍﻃﻤﻨﻬﺎ ﻋﻠﻰ ﺍﻻﻗﻞ
ﺑﺪﺍﻝ ﻣﺎ ﺻﺎﻏﻠﻚ ( ﻣﺼﺎﺭﻟﻚ ) ﺳﺎﻋﺔ ﺗﻮﺍﺳﻲ ﺑﻴﻬﺎ
ﻭﻧﺎﺳﻲ ﻧﻔﺴﻚ ﻭﺧﻄﺎﻏﻚ ( ﺧﻄﺎﺭﻙ ) ﻛﺎﻋﺪﻫﻨﺎ ﺍﻧﺖ ﻭﻳﺎﻫﺎ
ﻭﻣﺎ ﻣﺴﻮﻳﻦ ﺍﻋﺘﺒﺎﻍ ( ﺍﻋﺘﺒﺎﺭ ) ﻻﻱ ﺍﺣﺪ
ﻗﺎﺳﻢ ﻣﻦ ﺑﻴﻦ ﺍﺳﻨﺎﻧﻪ .. ﻫﺪﻯ ﺑﻼ ﺣﺠﻲ ﺯﺍﻳﺪ
ﻣﺎ ﺍﻫﺘﻤﻴﺖ ﻟﺘﺤﺬﻳﺮﻩ ﻭﻻ ﻟﻐﻀﺒﻪ ﻻﻥ ﻏﻀﺒﻲ ﻋﻤﺎﻧﻲ ﻋﻦ ﻛﻠﺸﻲ
ﻭﺻﺎﺭ ﻫﻤﻲ ﺍﺳﺘﺮﺩ ﻛﺮﺍﻣﺘﻲ
ﺑﺎﻭﻋﺖ ﻋﻠﻴﻬﺎ
.. ﺣﺒﻴﺒﺘﻲ ﻏﻬﻮﻓﺔ ﺍﺗﻄﻤﻨﻲ ﻣﺎﺻﺎﻍ ( ﻣﺎﺻﺎﺭ ) ﺷﻲ ﻣﻦ ﺍﻟﻲ ﺑﺒﺎﻟﺞ
ﺗﻐﺔ ( ﺗﺮﺓ ) ﻗﺎﺳﻢ ﻻ ﺍﺧﺬﻧﻲ ﻭﻻ ﺳﻮﺍﻟﻲ ﺷﻲ ﻓﻤﺎﻟﻬﺎ ﺩﺍﻋﻲ ﺗﻜﻌﺪﻳﻦ
ﺗﺒﺠﻴﻦ ﻣﺜﻞ ﺍﻟﺒﻮﻣﺔ
ﻻﻥ ﺍﻧﻲ ﻣﺎ ﻛﺎﺗﻠﺔ ﻧﻔﺴﻲ ﻋﻠﻴﻪ ﻭﺍﺫﺍ ﺗﻐﻴﺪﻳﻦ ( ﺗﺮﻳﺪﻳﻦ ) ﺍﻧﻲ ﻣﺘﻨﺎﺯﻟﺔ
ﻋﻨﻪ ﺍﻟﺞ
ﺷﺒﻌﻲ ﺑﻲ ﺍﻟﻒ ﻋﺎﻓﻴﺔ
ﻭﺍﺻﻼ ﺍﻧﻲ ..........
ﺑﻌﺪﻧﻲ ﻣﺎ ﻣﺨﻠﺼﺔ ﻛﻼﻣﻲ ﻭﻣﺎ
ﺣﺴﻴﺖ ﺍﻻ ﻭﻗﺎﺳﻢ ﻟﺰﻣﻨﻲ ﻣﻦ ﺯﻧﺪﻱ ﺧﻠﻊ ﺍﻳﺪﻱ ﻣﻦ ﻣﻜﺎﻧﻬﺎ
ﺭﻓﻌﺖ ﺭﺍﺳﻲ ﺍﺑﺎﻭﻉ ﻋﻠﻴﻪ ﺷﻠﻮﻥ ﺭﺍﺹ ﺍﺳﻨﺎﻧﻪ ﺑﻐﻀﺐ
ﻭﻛﺮﺭ ﻛﻼﻣﻪ ﻭﻋﻴﻮﻧﻪ ﺑﻌﻴﻮﻧﻲ ﻣﺜﻞ ﺍﻟﻲ ﻛﻮﺓ ﻻﺯﻡ ﻧﻔﺴﻪ ﻻ ﻳﻨﻔﺠﺮ
.. ﺭﻫﻒ ﻃﻠﻌﻲ ﺑﺮﺓ ﻭﺳﺪﻱ ﺍﻟﺒﺎﺏ ﻭﺭﺍﺝ
ﺑﻠﻌﺖ ﺭﻳﻜﻲ ﻭﻛﻠﺒﻲ ﻃﻔﺮ ﻣﻦ ﻣﻜﺎﻧﻪ ﻭﺑﻠﺤﻈﺘﻬﺎ ﻋﺮﻓﺖ ﻣﻦ ﻭﺭﺓ
ﺍﻟﺴﺎﻧﻲ ﺍﺗﻌﺪﻳﺖ ﺣﺪﻭﺩﻱ ﻭ ﺻﺤﻴﺖ ﺍﻟﻮﺣﺶ ﺍﻟﻲ ﺑﺪﺍﺧﻠﻪ
ﻃﻠﻌﺖ ﺭﻫﻒ ﻣﻦ ﺍﻟﻐﺮﻓﺔ
ﻗﻄﻊ ﻛﻼﻣﻨﺎ ﺩﺧﻮﻝ ﻫﺎﻟﺔ ﺍﻟﻤﺴﺘﻌﺠﻞ
.. ﻗﺎﺳﻢ ﺑﺴﺮﻋﺔ ﺍﻧﺰﻝ ﺍﻣﻲ ﺣﺮﻛﺖ ﺍﻟﺪﻧﻴﺎ
ﺍﻟﻐﺪﺍ ﻣﻦ ﺳﺎﻋﺔ ﺍﻧﺼﺐ ﻭﻋﻤﻮ ﻣﺤﻤﺪ ﻛﺎﻡ ﻳﺤﺠﻲ ﻳﻜﻮﻝ ﻗﺎﺳﻢ ﻭﻳﻦ
ﺻﺎﺭ ﺑﺮﺩ ﺍﻻﻛﻞ
......
ﻳﻤﺔ ﻭﺍﻟﻠﻪ ﺍﺟﻴﺖ ﺍﺑﺠﻲ ﻣﻦ ﺍﻟﺮﺍﺣﺔ ﻣﻦ ﻫﺎﻟﺔ ﺩﺧﻠﺖ
ﺑﺎﻭﻉ ﻋﻠﻴﺔ ﻭﻧﻔﺾ ﺍﻳﺪﻱ
ﻭﻛﺎﻝ ﻳﺘﻮﻋﺪ .. ﻭﺍﻟﻠﻪ ﺑﺨﺘﺞ ﺑﺎﻟﺨﻄﺎﺭ ﻭﺍﻣﻲ
ﺑﺲ ﺑﺴﻴﻄﺔ ﺣﺴﺎﺑﻲ ﻭﻳﺎﺝ ﺑﻌﺪﻳﻦ
ﺣﺠﺎﻫﺎ ﻭﻫﻮ ﻳﻄﻠﻊ ﻣﻦ ﺍﻟﻐﺮﻓﺔ
ﻭﺭﻛﻊ ﺍﻟﺒﺎﺏ ﺣﻴﻞ ﺑﻜﻞ ﻗﻮﺗﻪ
ﻛﻤﺰﻧﺎ ﺍﻧﻲ ﻭﻫﺎﻟﺔ ﻣﻦ ﻣﻜﺎﻧﺎ
ﻭﺻﺮﻧﺎ ﻭﺣﺪﺓ ﺗﺒﺎﻭﻉ ﺑﻮﺟﻪ ﺍﻟﺜﺎﻧﻴﺔ
ﻫﺎﻟﺔ .. ﻟﺞ ﻋﻮﺑﺔ ﺍﻧﺘﻲ ﺍﻟﻈﺎﻫﺮ ﻣﺎ ﺭﺍﻳﺪﺓ ﺭﻭﺣﺞ ﺍﻟﻴﻮﻡ ﺷﻴﺨﻠﺼﺞ ﻣﻦ
ﻗﺎﺳﻢ
ﺍﻟﻠﻪ ﺣﺎﺑﺞ ﺍﻣﻲ ﺩﺭﺗﻨﻲ ﺍﺻﻴﺢ ﻟﻘﺎﺳﻢ
ﺑﺲ ﺍﺗﻮﻗﻔﺖ ﻣﻦ ﺳﻤﻌﺖ ﻛﻼﻣﺞ ﻳﻢ ﺍﻟﺒﺎﺏ
ﻭﻣﻦ ﻃﻠﻌﺖ ﺭﻫﻒ ﻛﻠﺖ ﻫﺎﻱ ﻫﻲ ﻗﺎﺳﻢ ﺭﺍﺡ ﻳﻔﻄﺲ ﻫﺪﻯ
.. ﺳﻜﺘﻲ ﻭﺍﻟﻠﻪ ﺍﺟﻴﺘﻲ ﺑﻮﻛﺘﺞ ﺟﺎﻥ ﺷﺎﻟﻨﻲ ﻓﻠﻘﺔ ﻟﻮ ﻣﺎ ﻣﻠﺤﻜﺔ
ﻋﻠﻴﺔ
.. ﻟﺞ ﺛﻮﻟﺔ ﺍﻧﺘﻲ ﺷﻠﻮﻥ ﺗﺤﺠﻴﻦ ﻫﻴﺞ
ﻭﺗﻨﻄﻴﻦ ﺍﻟﻤﺠﺎﻝ ﻟﻮﺣﺪﺓ ﻣﺜﻞ ﺭﻫﻒ ﺗﺴﺘﻐﻞ ﺍﻟﻔﺮﺻﺔ ﻭﺗﺎﺧﺬ ﺯﻭﺟﺞ
ﻣﻨﺞ ﺑﻜﻞ ﺳﻬﻮﻟﺔ
ﻻ ﻫﻲ ﻛﻠﻪ ﺑﻜﻔﺔ ﻭﻛﻼﻣﺞ ﺑﺨﺼﻮﺹ ﻟﻴﻠﺔ ﻋﺮﺳﻜﻢ ﺑﻜﻔﺔ
ﺷﻠﻮﻥ ﺗﻜﻠﻴﻠﻬﺎ ﻣﺎ ﺍﺧﺬﻧﻲ ﻭﻻ ﺍﻗﺘﺮﺏ ﻣﻨﻲ
ﺑﺲ ﺍﻟﻠﻪ ﻳﺴﺘﺮ ﺍﻟﻴﻮﻡ ﻗﺎﺳﻢ ﺷﻨﻮ ﺭﺍﺡ ﻳﺴﻮﻱ ﺑﻴﺞ ﻋﻠﻰ ﻫﺬﺍ ﺣﺠﻴﺞ
ﻫﻮ ﺍﻣﻲ ﺑﻜﺒﺮﻫﺎ ﻣﻦ ﺳﺄﻟﺘﻪ ﺍﻟﻴﻮﻡ ﻋﻦ ﻫﺬﺍ ﺍﻟﻤﻮﺿﻮﻉ ﻫﻮ ﺍﺗﺨﺒﻞ
ﻭﻛﺎﻡ ﻣﻦ ﻳﻤﻬﺎ ﻣﻌﺼﺐ
ﻛﻠﻨﺎ ﻧﻌﺮﻑ ﺑﻘﺎﺳﻢ ﻳﺘﺨﺒﻞ ﻭﻻ ﻭﺍﺣﺪ ﻳﺘﺪﺧﻞ ﺑﺤﻴﺎﺗﻪ ﻭﻳﻌﺮﻑ ﺍﺳﺮﺍﺭﻩ
ﻭﺧﺼﻮﺻﻴﺎﺗﻪ
ﻫﻲ ﺗﺤﺠﻲ ﻭﺍﻧﻲ ﺍﺣﺲ ﺍﻃﺮﺍﻓﻲ ﺑﺎﺩﺕ ﻭﺻﺎﺭﺕ ﺛﻠﺞ
ﻣﻦ ﺍﻟﺨﻮﻑ
.. ﺍﻧﻲ ﺍﻋﻐﻒ ( ﺍﻋﺮﻑ ) ﺟﻨﻴﺖ ﻋﻠﻰ ﻧﻔﺴﻲ ﺑﺰﻟﺔ ﺍﻟﺴﺎﻧﻲ
ﺑﺲ ﻏﺼﺐ ﻋﻨﻲ
ﻳﻌﻨﻲ ﺧﻠﻲ ﻧﻔﺴﺞ ﺑﻤﻜﺎﻧﻲ
ﻋﻐﻮﺱ ( ﻋﺮﻭﺱ ) ﻭﺑﺼﺒﺎﺣﻴﺔ ﻋﻐﺴﻬﺎ
ﺗﺼﻌﺪ ﺗﻠﻜﺔ ﺯﻭﺟﻬﺎ ﻛﺎﻋﺪ ﻭﻳﺔ ﺣﺒﻴﺒﺘﻪ ﺑﻐﻐﻔﺔ ( ﺑﻐﺮﻓﺔ ) ﻟﻮﺣﺪﻫﻢ
ﻭﺍﺷﻮﻓﻪ ﺷﻠﻮﻥ ﻳﻮﺍﺳﻴﻬﺎ ﻭﻳﻄﻤﻨﻬﺎ ﺧﺎﻑ ﺍﻧﺠﻐﺤﺖ ﻣﺸﺎﻋﻐﻬﺎ ( ﺍﻧﺠﺮﺣﺖ ﻣﺸﺎﻋﺮﻫﺎ )
ﺑﺰﻭﺍﺟﻪ ﻣﻨﻲ ﺷﻨﻮ ﺗﻐﻴﺪﻳﻨﻲ ( ﺗﺮﻳﺪﻳﻨﻲ ) ﺍﺳﻮﻱ
ﻳﻌﻨﻲ ﺍﻧﻲ ﻫﻢ ﺑﺸﻎ ( ﺑﺸﺮ ) ﻭﺍﻟﻲ ﻛﺮﺍﻣﺘﻲ
ﺣﺘﻰ ﻟﻮ ﺍﻏﺬﻝ ( ﺍﺭﺫﻝ ) ﺍﻟﻨﺴﻮﺍﻥ
ﻣﺎ ﺗﻘﺒﻞ ﺗﻨﻬﺎﻥ ﺑﻬﺬﺍ ﺍﻻﺳﻠﻮﺏ ﻣﺎﻝ ﺍﺧﻮﺝ
.. ﻳﻌﻨﻲ ﺍﻓﺘﻬﻢ ﻣﻦ ﻛﻼﻣﺞ
ﻫﺎﻱ ﻏﻴﺮﺓ ﻋﻠﻰ ﻗﺎﺳﻢ ﻟﻮ ﺷﻨﻮ
.....
ﻫﻮ ﺑﺎﻻﻭﻝ ﺧﻠﻲ ﺍﺣﺒﻪ ﻭﺑﻌﺪﻳﻦ ﺍﻏﺎﻍ ( ﺍﻏﺎﺭ ) ﻋﻠﻴﻪ
.. ﺷﻮﻑ ﻫﺎﻱ ﺍﻡ ﺍﻏﺎﻍ ﻣﺼﺪﻛﻪ ﺭﻭﺣﻬﺎ
ﺗﺮﺓ ﻗﺎﺳﻢ ﻣﺎ ﻳﺘﻔﻮﺕ ﻣﻮ ﻻﻥ ﺍﺧﻮﻱ ﺍﻛﻠﺞ ﻫﻴﺞ ﺑﺲ ﻭﺍﻟﻠﻪ ﻫﻮ ﺧﻮﺵ
ﺭﺟﺎﻝ
.. ﻭﺷﻨﻮ ﺍﻟﻔﺎﻳﺪﺓ ﻭﺍﺫﺍ ﺧﻮﺵ ﺭﺟﺎﻝ
ﺷﻠﻮﻥ ﺗﻐﺪﻳﻨﻲ ( ﺗﺮﺩﻳﻨﻲ ) ﺍﺣﺐ ﻭﺍﺣﺪ
ﻭﺍﻧﻲ ﺍﻋﺮﻑ ﺍﺣﺴﺎﺳﻪ ﻭﻣﺸﺎﻋﺮﺓ ﻭﻳﺔ ﻭﺣﺪﺓ ﺛﺎﻧﻴﺔ
ﻫﺎﻟﺔ .. ﻋﺰﺓ ﺍﻟﻌﺰﺍﺝ ﻳﻬﺪﻳﻮﺓ
ﻛﻮﻥ ﺍﻣﻲ ﺗﺴﻤﻌﺞ ﺷﻨﻮ ﺗﻜﻮﻟﻴﻦ ﻭﺍﻟﻠﻪ ﺗﻨﺠﻠﻂ
ﺟﺎﻧﺖ ﻣﻌﻠﻜﺔ ﺍﻣﻠﻬﺎ ﻋﻠﻴﺞ ﺗﺒﻌﺪﻳﻦ ﺭﻫﻒ ﻋﻦ ﻃﺮﻳﻖ
ﻗﺎﺳﻢ ﺗﺎﻟﻲ ﺣﻀﺮﺗﺞ ﻛﺎﻋﺪﺓ ﺗﺠﻤﻌﻴﻦ ﺭﺍﺳﻬﻢ ﺑﺎﻟﺤﻼﻝ
ﻫﺪﻯ .. ﺍﻱ ﺻﺪﻙ ﻫﺎﻟﺔ ﺍﺭﻳﺪ ﺍﻋﺮﻑ ﺍﻣﺞ ﻟﻴﺶ ﻣﺎ ﺗﻐﻴﺪ ( ﻣﺎﺗﺮﻳﺪ )
ﻗﺎﺳﻢ ﻳﺘﺰﻭﺝ ﻏﻬﻒ ﺑﻨﺖ ﻋﻤﻜﻢ
ﻭﻫﻲ ﺗﻌﻐﻒ ( ﺗﻌﺮﻑ ) ﻛﻠﺶ ﺯﻳﻦ ﻫﻮ ﻳﺤﺒﻬﺎ
ﻫﺎﻟﺔ .. ﺍﻫﻮﻭﻭﻭ ﺳﻜﺘﻲ ﻫﺎﻱ ﺳﺎﻟﻔﺔ ﻃﻮﻳﻠﺔ ﺑﻌﺪﻳﻦ ﺍﺣﺠﻴﻬﺎ ﺍﻟﺞ
ﻫﺴﺔ ﺧﻠﻲ ﻧﻨﺰﻝ
ﻻﻥ ﺍﻣﻲ ﻛﻠﺶ ﻣﻌﺼﺒﺔ
ﻧﺰﻟﻨﺎ ﺟﻮﺓ ﻭﺍﺗﻠﻜﺘﻨﺎ ﻣﻨﻰ
.. ﺷﻨﻮ ﻭﻳﻦ ﺍﺧﺘﻔﻴﺘﻮﺍ ﺗﻌﺎﻟﻮﺍ ﺗﻐﺪﻭﺍ
ﺭﺣﻨﺎ ﺍﺗﻐﺪﻳﻨﺎ ﻭﺍﻡ ﻗﺎﺳﻢ ﻛﻞ ﺷﻮﻳﺔ ﺗﺒﺎﻭﻉ ﻋﻠﻴﺔ ﻭﻳﻌﺪﻳﻦ ﺗﺒﺎﻭﻉ ﻋﻠﻰ
ﺭﻫﻒ
ﻣﺒﻴﻦ ﻋﻨﺪﻫﺎ ﻫﻮﺍﻱ ﺣﺠﻲ ﺑﺲ ﻣﺘﻜﺪﺭ ﺗﺤﺠﻲ ﻣﻨﺎ ﺍﻟﺨﻄﺎﺭ
ﺧﻠﺺ ﺍﻟﻐﺪﺍ ﻭﻃﻠﻌﻮﺍ ﻋﻤﺎﻣﻬﻢ
ﺟﻨﺖ ﻛﺎﻋﺪﺓ ﻳﻢ ﻣﻨﻰ ﻭﻫﺎﻟﺔ ﻭﻛﻮﺛﺮ
ﺳﺮﻭﺭ ﻭﻓﺎﻃﻤﺔ ﻃﻠﻌﻮﺍ ﻟﻠﺴﻮﻙ ﻳﺮﺩﻭﻥ ﻳﺸﺘﺮﻭﻥ
ﻏﺮﺍﺽ ﻗﺒﻞ ﻻ ﻳﺴﺎﻓﺮﻭﻥ ﺑﺎﺟﺮ
ﺍﺑﺎﻭﻉ ﻻﻡ ﻗﺎﺳﻢ ﻛﺎﻋﺪ ﻛﺪﺍﻣﻲ ﺗﺒﺎﻭﻉ ﻋﻠﻴﺔ
ﺍﻡ ﻗﺎﺳﻢ .. ﻫﺪﻯ ﺗﻌﺎﻱ ﺷﻮﻳﺔ ﺍﺭﻳﺪ ﺍﺣﺠﻲ ﻭﻳﺎﺝ
ﺑﻠﻌﺖ ﺭﻳﻜﻲ ﻭﻛﻤﺖ ﻣﻦ ﻣﻜﺎﻧﻲ ﻭﺭﺣﺖ ﻛﻌﺪﺕ ﻳﻤﻬﺎ
ﺍﻗﺘﺮﺑﺖ ﻣﻨﻲ ﻭﺣﺠﺖ ﺑﺼﻮﺕ ﻧﺎﺻﻲ ﺗﺴﺄﻟﻨﻲ
.. ﺍﻛﻮﻝ ﻳﻤﺔ ﻫﺪﻯ . ﺍﻟﺒﺎﺭﺣﺔ ﻗﺎﺳﻢ ﺍﺧﺬﺝ
ﻫﻲ ﺗﺤﺠﻲ ﺗﺤﺠﻲ ﻭﺍﻧﻲ ﻭﺟﻬﻲ ﺻﺎﺭ ﺍﺣﻤﺮ
ﻋﺮﻓﺖ ﺷﻨﻮ ﺳﺒﺐ ﻣﻠﺤﺔ ﺍﻡ ﻗﺎﺳﻢ ﻋﻠﻰ ﺍﻗﺘﺮﺍﺑﻪ ﺍﻟﻲ
ﻻﻥ ﺗﺮﻳﺪ ﻣﻦ ﻗﺎﺳﻢ ﻳﻨﺸﻐﻞ ﺑﻴﺔ ﻋﻦ ﺭﻫﻒ ﺣﺘﻰ ﺗﺒﻌﺪﻫﺎ ﻋﻦ
ﻃﺮﻳﻘﻪ
.. ﺧﺎﻟﺔ ﻗﺎﺳﻢ ﻣﺄﻛﺪ ﻋﻠﻴﺔ ﻣﺎ ﺍﺣﺠﻲ ﺍﻱ ﺷﻲ ﻳﺼﻴﻎ ( ﻳﺼﻴﺮ )
ﺑﻐﻐﻔﺘﻨﺎ ( ﻏﺮﻓﺘﻨﺎ )
ﺍﺑﺘﺴﻤﺖ ﻭﻛﺎﻟﺖ .. ﻋﻔﻴﺔ ﻋﻠﻴﺞ ﻻﺯﻡ ﺍﻟﺰﻭﺟﺔ ﺗﺼﻮﻥ ﻭﺗﺨﻔﻆ ﺳﺮ
ﺭﺟﻠﻬﺎ
ﺑﺲ ﻻ ﺗﻨﺴﻴﻦ ﺍﻧﻲ ﺍﻣﻪ ﻭﺍﺧﺘﻠﻒ
.....
ﻋﻔﻴﺔ ﺧﺎﻟﺔ ﻻ ﺗﺨﻠﻴﻨﻲ ﺑﺤﻠﻚ ﻗﺎﺳﻢ ﻭﺍﻟﻠﻪ ﺍﺳﺘﺤﻲ
ﻫﻮ ﻫﺪﺩﻧﻲ ﻛﺎﻝ ﺍﺫﺍ ﺗﺤﺠﻴﻦ ﻣﺘﻠﻮﻣﻴﻦ ﺍﻻ ﻧﻔﺴﺞ
ﻭﺍﻧﻲ ﺗﻌﻐﻔﻴﻦ ( ﺗﻌﺮﻓﻴﻦ ) ﺑﺪﻭﻥ ﻣﻴﻬﺪﺩﻧﻲ ﺍﺧﺎﻑ ﻣﻨﻪ
ﺑﺎﻭﻋﺖ ﻋﻠﻴﺔ ﺑﻄﺮﻑ ﻋﻴﻨﻬﺎ ﻣﺜﻞ ﺍﻟﻲ ﻛﻼﻣﻲ ﻣﺎ ﻋﺠﺒﻬﺎ
ﻛﻤﺖ ﻭﺭﺓ ﻫﺎﻟﺔ ﻟﻠﻤﻄﺒﺦ
ﻫﺎﻟﺔ .. ﻫﺎ ﺍﺷﺘﻐﻠﺖ ﺍﺳﺘﺨﺒﺎﺭﺕ ﺍﻡ ﻗﺎﺳﻢ
.. ﻟﺞ ﺍﻱ ﺗﺴﺄﻟﻨﻲ ﻋﻦ ﻗﺎﺳﻢ ﺗﻤﺖ ﺍﻟﻤﻬﻤﺔ ﻟﻮ ﺑﻌﺪﻫﺎ
.. ﻋﺰﺓ ﺑﻌﻴﻨﻲ ﺍﻣﻲ ﻭﻻ ﺗﻜﻌﺪ
ﻭﺍﻟﻠﻪ ﻋﺮﻓﺘﻬﺎ ﺭﺍﺡ ﺗﺴﺄﻟﺞ ﻫﺬﺍ ﺍﻟﺴﺆﺍﻝ
ﺧﺮﺏ ﻭﺍﻧﺘﻲ ﺷﺠﺎﻭﺑﺘﻴﻬﺎ
.. ﻛﻠﺘﻠﻬﺎ ﺧﺎﻟﺔ ﻗﺎﺳﻢ ﻣﻴﻘﺒﻞ ﺍﺣﺠﻲ ﺑﻬﻴﺞ ﻣﻮﺍﺿﻴﻊ
ﻟﻜﺎﺋﻦ ﻣﻦ ﻛﺎﻥ
ﻫﺎﻟﺔ ﺿﺤﻜﺖ .. ﻭﻳﻦ ﺟﺎﻥ ﻫﺬﺍ ﺍﻟﻌﻘﻞ
ﻣﻦ ﺭﺣﺘﻲ ﺯﻋﺘﻲ ﺍﻻﻛﻮ ﻭﺍﻟﻤﺎﻛﻮ . ﻛﺪﺍﻡ ﺳﺖ ﺭﻫﻒ
ﺟﻨﺎ ﻧﺤﺠﻲ ﻭﺟﺎﻥ ﻧﺴﻤﻊ ﺻﻮﺕ ﺻﻴﺎﺡ ﻗﺎﺳﻢ ﻭﺭﻛﻀﺘﻪ ﻋﻠﻰ ﺑﺎﺏ
ﺍﻟﺸﺎﺭﻉ
ﺭﺣﻨﺎ ﻧﺒﺎﻭﻉ ﺷﻨﻮ ﺍﻟﺼﺎﻳﺮ
ﺷﻮﻳﺔ ﻭﺩﺧﻞ ﻗﺎﺳﻢ ﺷﺎﻳﻞ ﺯﻳﻦ ﻛﺼﺘﻪ ﻛﻠﻬﺎ ﺩﻡ
ﻭﺭﺍﻩ ﻫﺸﺎﻡ
ﻗﺎﺳﻢ ﺻﺎﺡ ﺑﺼﻮﺕ ﺭﺝ ﺍﻟﺒﻴﺖ
.. ﻟﺨﺎﻃﺮ ﺍﻟﻜﻌﺒﺔ ﺍﺭﻳﺪ ﺍﻋﺮﻑ ﻫﺬﺍ ﻭﻳﻦ ﺍﻣﻪ ﺍﻟﻔﺎﻫﻴﺔ ﻋﻨﻪ
ﻫﺸﺎﻡ .. ﻫﺎﻟﺔ ﺭﻛﻀﻲ ﺟﻴﺒﻲ ﻛﻄﻦ ﻭﺩﻳﺘﻮﻝ
ﺍﺟﺘﻲ ﺍﻡ ﻗﺎﺳﻢ ﻋﻠﻰ ﺻﻮﺕ ﻗﺎﺳﻢ
ﻫﻲ ﻭﺍﻟﺒﻨﺎﺕ . ﻣﻨﻰ ﻭﻛﻮﺛﺮ ﻭﻫﺪﻳﻞ
ﻛﻮﺛﺮ ﺷﺎﻓﺖ ﺍﺑﻨﻬﺎ ﻟﻄﻤﺖ ﻋﻠﻰ ﺻﺪﺭﻫﺎ
.. ﻳﻤﺔ ﺻﺨﺎﻡ ﺷﺒﻲ ﺍﺑﻨﻲ
ﻫﺸﺎﻡ .. ﻻ ﺗﺨﺎﻓﻴﻦ ﺩﻳﻠﻌﺐ ﺑﺎﻟﺸﺎﺭﻉ ﻭﻳﺔ ﺍﻟﺠﻬﺎﻝ ﻭﺩﺍﻓﻌﻴﻨﻪ
ﻭﻭﺍﻛﻊ ﻋﻠﻰ ﺣﺎﻓﺔ ﺍﻟﺮﺻﻴﻒ
ﻋﻠﻰ ﺭﺍﺳﻪ
ﺍﺑﺎﻭﻉ ﻟﻘﺎﺳﻢ ﺍﺧﺬ ﺍﻟﻘﻄﻦ ﻭﺍﻟﺪﻳﺘﻮﻝ ﻣﻦ ﺍﻳﺪ ﻫﺎﻟﺔ
ﻭﻳﺤﺠﻲ ﺑﻐﻀﺐ
.. ﺑﺲ ﺍﺭﻳﺪ ﺍﻋﺮﻑ ﺍﻧﺘﻲ ﺷﻨﻮ ﺳﺎﻟﻔﺘﺞ
ﻣﻠﺘﻬﻴﺔ ﺑﺸﻨﻮ ﻭﻋﺎﻳﻔﺔ ﺍﺑﻨﺞ ﺑﺎﻟﺸﺎﺭﻉ
ﻏﻴﺮ ﺗﻨﺘﺒﻬﻴﻦ ﺗﺸﻮﻓﻴﻪ ﻭﻳﻦ ﻣﺎ ﻭﻳﻦ
ﺍﻧﺘﻲ ﻓﻜﺮﺝ ﺫﺍ ﺻﺎﺭ ﺑﺎﻟﻮﻟﺪ ﺷﻲ ﺭﺍﺡ ﺍﺭﺣﻤﺞ
ﻭﺍﻟﻠﻪ ﻣﺤﺪ ﻳﻔﻜﺞ ﻣﻨﻲ
ﻛﻮﺛﺮ .. ﻫﺴﻪ ﺟﺎﻥ ﻳﻤﻲ ﻳﻠﻌﺐ ﺣﺘﻰ ﺍﺳﺄﻝ ﺍﻟﺒﻨﺎﺕ
ﺟﺎﻧﺖ ﺗﺤﺠﻲ ﺑﻴﻦ ﺍﻟﺨﺎﻳﻔﺔ ﻋﻠﻰ ﺍﺑﻨﻬﺎ ﻭﺑﻴﻦ ﺍﻟﺨﺎﻳﻔﺔ ﻣﻦ ﻗﺎﺳﻢ
ﻭﺍﻧﻲ ﻣﻦ ﻳﻤﻲ ﺍﺭﺗﻌﺪ ﺟﺴﻤﻲ ﻋﺰﺓ ﻫﺬﺍ ﻣﺎ ﻋﻨﺪﻩ
ﻳﻤﺔ ﺍﺭﺣﻤﻴﻨﻲ
ﻛﻠﻪ ﺻﻠﺦ .. ﻧﺘﻞ .. ﺫﺑﺢ
......
ﺍﻡ ﻗﺎﺳﻢ .. ﺑﺎﻟﻠﻪ ﺷﻮ ﺍﻧﻄﻴﻨﻲ ﺧﻠﻲ ﺍﺷﻮﻑ ﺟﺮﺣﻪ ﺧﺎﻑ ﻋﻤﻴﻖ
ﻭﻳﺤﺘﺎﺟﻠﻪ ﺧﻴﺎﻁ
ﺯﻳﻦ ﺳﻤﻊ ﺧﻴﺎﻁ ﻭﻫﻮ ﺯﺍﺩ ﺑﺎﻟﺒﺠﻲ
ﻋﺎﻁ ﺑﻲ ﻗﺎﺳﻢ .. ﺍﻳﺎﻧﻲ ﻭﻳﺎﻙ ﺍﺳﻤﻌﻚ ﺗﺒﺠﻲ ﺍﻧﺖ ﺭﺟﺎﻝ
ﺑﺎﻟﻠﻪ ﺷﻮ ﺍﻣﺴﺢ ﺩﻣﻮﻋﻚ ﺍﺣﻨﺎ ﻣﺎ ﻋﺪﻧﺎ ﺭﺟﺎﻝ ﻳﺒﺠﻲ ﻣﺜﻞ ﺍﻟﺒﻨﺎﺕ
ﺗﺮﺓ ﻣﺎ ﺑﻴﻚ ﺷﻲ ﻫﻮ ﺷﻮﻳﺔ ﺩﻡ
ﺍﺑﺎﻭﻉ ﻟﻠﻮﻟﺪ ﺑﻠﻊ ﺩﻣﻮﻋﻪ ﺧﺎﻳﻒ ﻣﻦ ﺧﺎﻟﻪ ﻭﻛﻮﺓ ﻻﺯﻡ ﻧﻔﺴﻪ
ﻭﻋﻴﻨﻪ ﻋﻠﻰ ﺍﻣﻪ ﻳﺴﺘﻨﺠﺪ ﺑﻴﻬﺎ
ﺍﻡ ﻗﺎﺳﻢ .. ﻳﻤﺔ ﻗﺎﺳﻢ ﺧﺮﻋﺖ ﺍﻟﻮﻟﺪ ﻋﻠﻰ ﻛﻴﻔﻚ
ﻣﺪﺕ ﺍﻳﺪﻫﺎ ﻭﺍﺧﺬﺕ ﺯﻳﻦ ﻣﻦ ﺍﻳﺪ ﻗﺎﺳﻢ
ﻛﺎﻡ ﻣﻦ ﻣﻜﺎﻧﻪ ﺟﺎﻧﺖ ﺩﺷﺪﺍﺷﺘﻪ ﺍﻟﺒﻴﻀﺔ ﻛﻠﻬﺎ ﺩﻡ
ﻫﺸﺎﻡ .. ﺭﻭﺡ ﺑﺪﻝ ﻣﻼﺑﺴﻚ ﺗﺮﺓ ﺟﻤﺎﻋﺘﻚ ﺭﺍﺡ ﻳﻮﺻﻠﻮﻥ
ﺣﺘﻰ ﻳﺘﺒﺎﺭﻛﻮﻟﻚ
ﻗﺎﺳﻢ .. ﺍﻱ ﻳﻤﺔ ﺻﺪﻙ ﺳﻮﻱ ﺣﺴﺎﺑﺞ ﺟﻤﺎﻋﺘﻲ ﺭﺍﺡ ﻳﺒﻘﻮﻥ ﻋﻠﻰ
ﺍﻟﻌﺸﺎ
ﺑﻌﺪﻫﺎ ﻃﻠﻊ ﻣﻦ ﺍﻟﻤﻄﺒﺦ ﻭﺻﻌﺪ ﻓﻮﻙ
ﻭﺳﻤﻌﺖ ﺻﻮﺗﻪ ﺻﺎﺡ
.. ﻫﺪﻯ ﻛﻤﺖ ﻣﻦ ﻣﻜﺎﻧﻲ ﻭﺑﺎﻭﻋﺖ ﻟﻬﺎﻟﺔ
ﺍﺳﺘﻨﺠﺪ ﺑﻴﻬﺎ
ﻫﻲ ﻛﺎﻣﺖ ﻭﻳﺎﻱ ﻭﺍﺟﺘﻲ ﺗﻄﻠﻊ ﻭﻳﺎﻱ
ﺍﻡ ﻗﺎﺳﻢ ﺻﺎﺣﺘﻬﺎ .. ﻫﺎﻟﺔ ﺗﻌﺎﻱ ﻫﻮ ﺻﺎﺡ ﻫﺪﻯ ﻣﺮﺗﻪ ﺑﺲ
ﻗﺎﺑﻞ ﺻﺎﺡ ﻫﺎﻟﺔ ﺭﺍﻳﺤﺔ ﺗﺮﻛﻀﻴﻦ ﻭﺭﺍﻫﺎ
ﻋﺰﺓ ﺍﻡ ﻗﺎﺳﻢ ﻣﺎ ﻳﻔﻮﺗﻬﺎ ﺷﻲ ﺧﺮﺏ ﺑﺎﻟﺤﻆ
ﺭﺣﺖ ﺻﻌﺪﺕ ﻓﻮﻙ ﻭﺍﻧﻲ ﻣﺘﺮﻗﺒﺔ ﻳﺎﺭﺑﻲ ﺷﻮﺭﻃﻨﻲ ﻭﺣﺠﻴﺖ
ﺷﺒﻴﺔ ﺍﻧﻘﻬﺮﺕ ﻣﻦ ﺷﻔﺘﻬﻢ ﺳﻮﻳﺔ ﻋﺴﺎﻫﻢ ﻧﺎﺭﻫﻢ ﺗﺎﻛﻞ ﺣﻄﺒﻬﻢ
ﺻﻌﺪﺕ ﻓﻮﻙ ﻭﺍﻧﻲ ﺍﻗﺪﻡ ﺭﺟﻞ ﻭﺍﺧﺮ ﺭﺟﻞ
ﺩﺧﻠﺖ ﻟﻠﻐﺮﻓﺔ ﻭﺟﺎﻥ ﺍﻟﻜﺎﻩ
ﻻﺑﺲ ﺑﻨﻄﻠﻮﻥ ﺟﻴﻨﺰ ﻭﺩﻳﻠﺒﺲ ﻗﻤﻴﺺ
ﺍﺟﺘﻲ ﻋﻴﻨﻲ ﻋﻠﻰ ﺻﺪﺭﻩ
ﻭﺿﻠﻴﺖ ﻣﺴﻬﺴﻬﺔ ﻭﻓﻬﻴﺖ ﻋﺎﻟﻤﻨﻈﺮ ﺍﻟﻜﺪﺍﻣﻲ
ﺍﺑﻦ ﺍﻟﻠﺬﻳﻦ ﻭﺍﻟﻠﻪ ﻋﻠﻴﻪ ﺟﺴﻢ ﺍﻻ ﺑﺸﺪﺓ
ﻗﻄﻊ ﻋﻠﻴﺔ ﺗﺄﻣﻠﻲ ﺻﻮﺗﻪ
ﺍﻟﺨﺸﻦ ﻛﻤﺰﺕ ﻣﻦ ﻣﻜﺎﻧﻲ
ﻗﺎﺳﻢ .. ﺳﺪﻱ ﺍﻟﺒﺎﺏ ﻭﺗﻌﺎﻟﻲ ﺧﻠﻲ ﺍﺣﺠﻲ ﻭﻳﺎﺝ ﻗﺒﻞ ﻻ ﺍﻧﺰﻝ
ﺍﺗﻘﺪﻣﺖ ﻋﻠﻴﻪ ﻭﻭﻛﻔﺖ ﻛﺪﺍﻣﻪ
ﺭﻓﻌﺖ ﺭﺍﺳﻲ ﺍﻟﻠﻪ ﻳﺤﻔﻈﻪ ﺷﻜﺪ ﻃﻮﻳﻞ
ﺣﺴﻴﺖ ﺑﺮﻭﺣﻲ ﻭﺍﻛﻔﺔ ﺑﺎﻟﻄﺎﺑﻖ ﺍﻻﺭﺿﻲ ﺩﺍﺣﺠﻲ ﻭﻳﺔ ﻭﺍﺣﺪ
ﺑﺎﻟﻄﺎﺑﻖ ﺍﻟﺜﺎﻧﻲ
ﺑﺎﻭﻉ ﻋﻠﻴﺔ ﻭﻛﺎﻝ
.. ﺷﻮﻓﻲ ﻫﺪﻯ ﺍﻟﺼﺎﺭ ﻣﺎ ﺭﺍﺡ ﻳﺘﻜﺮﺭ ﺍﻋﺮﻑ
ﺍﻧﺘﻲ ﻛﻼﻣﺞ ﺻﺪﺭ ﺑﻠﺤﻈﺔ ﻏﻀﺐ
ﻫﺎﻱ ﺍﻟﻤﺮﺓ ﺭﺍﺡ ﺍﻋﺪﻳﻬﺎ ﺍﻟﺞ ﻻﻥ ﺍﻧﺘﻲ
ﺑﻌﺪﺝ ﺟﺪﻳﺪﺓ ﻋﻠﻰ ﺣﻴﺎﺗﻲ ﻭﻣﺘﻌﺮﻓﻴﻦ ﻻﻃﺒﺎﻋﻲ
......
ﺍﺗﻤﻨﻰ ﻣﺮﺓ ﺍﻟﺜﺎﻧﻴﺔ ﺗﻜﻮﻧﻴﻦ ﺍﻛﺜﺮ ﺣﺬﺭ
ﻭﺳﻴﻄﺮﺓ ﻋﻠﻰ ﺍﻟﺴﺎﻧﺞ ﻫﺎﻟﻤﺮﺓ ﺳﻜﺘﺖ ﻣﺮﺓ ﺍﻟﺜﺎﻧﻴﺔ
ﻣﺎ ﺭﺍﺡ ﺍﺿﻤﻠﻨﺞ ﺷﻨﻮ ﺍﺳﻮﻱ ﺑﻴﺞ
ﺟﻨﺖ ﺣﺎﺑﺴﺔ ﺍﻧﻔﺎﺳﻲ ﺑﺪﺍﺧﻞ ﺻﺪﺭﻱ ﺍﺗﺮﻗﺐ ﺍﻟﻬﺠﻮﻡ ﻭﺍﻟﻜﻼﻡ
ﺍﻟﺠﺎﺭﺡ
ﻣﺠﻨﺖ ﻣﺘﻮﻗﻌﺔ ﻭﺍﺣﺪ ﺑﺎﻟﻤﻴﺔ ﺭﺍﺡ ﺗﻜﻮﻥ ﻫﻴﺞ ﺭﺩﺓ ﻓﻌﻠﻪ
ﺣﺴﻴﺖ ﺑﺮﺍﺣﺔ
ﻭﺍﺑﺘﺴﻤﺖ ﺑﻮﺟﻬﻪ ﻭﻋﻴﻮﻧﻲ ﻟﻤﻌﺖ ﺑﺄﺣﺘﺮﺍﻡ ﺍﻛﺜﺮ
.. ﺍﻭﻋﺪﻙ ﻣﻐﺎﺡ ( ﻣﺎﺭﺍﺡ ) ﺗﺴﻤﻊ ﻣﻨﻲ . ﺍﻱ ﻛﻠﻤﺔ ﺑﺨﺼﻮﺹ ﻫﺬﺍ
ﺍﻟﻤﻮﺿﻮﻉ
ﻣﺎ ﺩﺍﻣﻚ ﺍﻧﺖ ﺗﺤﺎﻓﻆ ﻋﻠﻰ ﻛﻐﺎﻣﺘﻲ ﻭﺗﺤﺘﻐﻢ ( ﻛﺮﺍﻣﺘﻲ ﻭﻧﺤﺘﺮﻡ )
ﻭﺟﻮﺩﻱ
ﺟﻨﺖ ﺍﺣﺠﻲ ﻣﻨﺪﻣﺠﺔ
ﻭﻫﻮ ﺟﺎﻥ ﻳﺪﻛﻢ ﺑﻘﻤﻴﺼﻪ ﻭﻳﺒﺎﻭﻉ ﻋﻠﻴﻪ
ﺑﺎﻭﻋﺖ ﻋﻠﻴﻪ ﺷﻠﻮﻥ ﻳﺪﻛﻢ
ﺟﻠﺔ ﺻﻮﺗﻪ ﻣﺜﻞ ﺍﻟﻲ ﺣﺲ ﺑﺎﻟﺠﻮ ﺍﺗﻮﺗﺮ
.. ﻳﺎﻟﻠﻪ ﺍﻧﻲ ﺭﺍﺡ ﺍﻧﺰﻝ ﻳﻢ ﺟﻤﺎﻋﺘﻲ ﺟﻮﺓ
ﺭﺍﺡ ﺍﺗﺠﻪ ﻟﻠﻤﺮﺍﻳﺎ ﻣﺸﻂ ﺷﻌﺮﻩ ﻭﻋﺪﻝ ﻗﻤﻴﺼﻪ
ﻭﻟﺒﺲ ﺳﺎﻋﺘﻪ ﻭﺭﺵ ﻋﻄﺮ
ﻣﺎ ﺍﻋﺮﻑ ﻟﻴﺶ ﺣﺴﻴﺖ ﺍﻛﻮ ﺭﺍﺑﻂ ﺣﻤﻴﻤﻲ ﻳﺠﻤﻌﻨﺎ
ﺍﻟﻔﺔ ﻏﺮﻳﺒﺔ ﻣﻦ ﻧﻮﻋﻬﺎ
ﻣﺜﻞ ﺍﻟﻲ ﻳﺤﺎﻭﻝ ﻳﺒﺪﻱ ﻳﺘﺄﻗﻠﻢ ﻭﻳﺔ ﻭﺟﻮﺩ ﺷﺨﺺ ﺛﺎﻧﻲ
ﺍﻧﺪﻙ ﺍﻟﺒﺎﺏ ﻭﺍﺟﺘﻨﻲ ﻫﺎﻟﺔ ﺗﺒﺎﻭﻉ ﻋﻠﻴﺔ ﻟﺰﻣﺘﻨﻲ
ﻭﻛﻌﺪﺕ ﺗﻜﻠﺐ ﺑﻴﺔ
ﻫﺎﻟﺔ .. ﻫﺎ ﺧﻴﺔ ﺑﺸﺮﻱ ﺷﻨﻮ ﺣﺰﺍﻡ ﻟﻮ ﺑﻮﻛﺲ
ﺗﺤﺠﻲ ﻭﺗﺒﺎﻭﻉ
.. ﻫﻬﻬﻬﻬﻪ ﺳﻜﺘﻲ ﻻ ﺣﺰﺍﻡ ﻭﻻ ﺑﻮﻛﺲ
ﺍﻟﺤﻤﺪﻟﻠﻪ ﻫﺎﻟﻤﻐﺔ ( ﻫﺎﻟﻤﺮﺓ ) ﻋﺪﺕ ﻋﻠﻰ ﺧﻴﻎ ( ﺧﻴﺮ )
ﺷﻜﻠﻲ ﻛﺴﻐﺖ ﺧﺎﻃﻐﻪ ﻻﻥ ﻋﻐﻮﺱ ( ﻛﺴﺮﺕ ﺧﺎﻃﺮﻩ ﻻﻥ ﻋﺮﻭﺱ )
ﻫﺎﻟﺔ .. ﻟﻌﺪ ﻳﺎﻟﻠﻪ ﻧﺰﻟﻲ ﺍﺟﻮﻱ ﺧﻄﺎﺭ ﻋﻠﻤﻮﺩ ﻳﺘﺒﺎﺭﻛﻮﻥ
ﺑﺪﻟﻲ ﻣﻼﺑﺴﺞ ﻭﺗﻌﺎﻱ ﻭﺭﺍﻱ
ﺑﺪﻟﺖ ﻭﻟﺒﺴﺖ ﻓﺴﺘﺎﻥ ﺑﺴﻴﻂ ﻛﻠﺶ ﺣﻠﻮ ﻭﻧﺰﻟﺖ ﺑﻌﺪﻣﺎ ﻋﺪﻟﺖ
ﺍﻟﻤﻜﻴﺎﺝ
ﺍﻭﻝ ﻣﺎ ﻧﺰﻟﺖ ﺭﺣﺖ ﻟﻠﻤﻄﺒﺦ
ﻟﻜﻴﺖ ﺍﻡ ﻗﺎﺳﻢ
ﻭﺍﻛﻔﺔ ﻳﻢ ﻣﻨﻰ ﺩﺗﺤﻀﺮ ﺻﻴﻨﻴﺔ ﺍﻟﺘﻘﺪﻳﻢ
ﺑﺎﻭﻋﺖ ﻋﻠﻴﺔ ﻣﻦ ﻓﻮﻙ ﻟﻴﺠﻮﺓ
ﻟﺰﻣﺖ ﺷﻌﺮﻱ ﻭﻫﺰﺕ ﺍﻳﺪﻫﺎ
ﻣﻨﻰ ﻭﻛﻮﺛﺮ ﺧﺮﺑﺎﻧﺎﺕ ﺿﺤﻚ
ﺷﻜﻮ ﺷﺒﻴﻬﺎ ﺍﻡ ﻗﺎﺳﻢ ﺍﻟﻴﻮﻡ ﻣﻮ ﻋﻠﻰ ﺑﻌﻀﻬﺎ
.. ﺍﺩﺭﻱ ﺷﻨﻮ ﺳﺎﻟﻔﺘﺞ ﺍﻧﻲ ﺍﻋﺮﻑ ﺍﻟﻌﺮﻭﺱ
ﺑﺄﻭﻝ ﻳﻮﻡ ﻋﺮﺳﻬﺎ ﺷﻌﺮﻫﺎ ﻣﺎ ﻳﻨﺸﻒ ﻣﻦ ﺍﻟﻤﺎﻱ
.....
ﻣﻨﻰ .. ﻫﻬﻬﻬﻪ ﻻﺍﺍ ﻳﻤﺔ ﺍﻧﺘﻲ ﺩﺍﻫﻴﺔ ﻭﺭﺑﻲ
ﺻﺪﻙ ﺿﺤﻜﺘﻴﻨﻲ ﺷﻠﻮﻥ ﺩﺑﺮﺗﻴﻬﺎ ﻫﺎﻱ
ﻫﻤﺔ ﻳﻀﺤﻜﻮﻥ ﻭﺍﻧﻲ ﺍﺿﺤﻚ ﻭﻳﺎﻫﻢ ﻣﺜﻞ ﺍﻻﻃﺮﺵ ﺑﺎﻟﺰﻓﺔ
ﺍﻡ ﻗﺎﺳﻢ .. ﺩﺟﻴﺒﻲ ﺍﻟﺼﻴﻨﻴﺔ ﻭﺧﻠﻴﻨﻲ
ﺍﻗﺪﻡ ﻟﻠﻨﺎﺱ ﻻ ﻋﻘﻠﻲ ﻳﻮﻛﻒ ﻣﻦ ﺍﻟﺘﻔﻜﻴﺮ
ﺍﺧﻮﻛﻢ ﺭﺍﺡ ﻳﻄﻠﻌﻠﻲ ﻛﻠﺐ ﺛﺎﻧﻲ ﺑﺼﻒ ﻛﻠﺒﻲ
ﻃﻠﻌﺖ ﻭﺭﺍﻫﺎ ﻭﻭﺩﺧﻠﺖ ﺳﻠﻤﺖ ﻋﻠﻰ ﺍﻟﺨﻄﺎﺭ
ﻭﺧﻠﺺ ﺍﻟﻴﻮﻡ ﺑﻜﺒﺮﻩ ﻛﻞ ﺷﻮﻳﺔ ﻳﺠﻮﻥ ﺧﻄﺎﺭ
ﻭﺑﻌﺪﻫﺎ ﺍﻟﺘﻬﻴﻨﺎ ﻧﺴﻮﻱ ﻋﺸﺎ ﻭﺻﺒﻴﻨﺎﻩ ﻟﺠﻤﺎﻋﺘﻪ ﻭﺑﻌﺪﻫﺎ
ﺍﻧﻲ ﻭﺍﻟﺒﻨﺎﺕ ﺍﻛﻠﻨﺎ ﺳﻮﻳﺔ ﻭﺍﻡ ﻗﺎﺳﻢ ﺍﻛﻠﻬﺎ ﻳﺨﺘﻠﻒ ﻋﻦ ﺍﻛﻠﻨﺎ
ﻻﻥ ﺳﻜﺮ ﻣﻮ ﺍﻱ ﺷﻲ ﺗﺎﻛﻞ
ﺟﻨﺖ ﺍﺳﺘﺤﻲ ﻭﺍﻛﻞ ﺷﻮﻳﺔ
ﺣﺘﻰ ﺑﺎﻟﻐﺪﺓ ﻣﺎ ﺍﻛﻠﺖ
ﻭﻛﻠﻤﺎ ﺍﺟﻮﻉ ﺍﺭﻭﺡ ﺍﺻﻌﺪ ﻟﻐﺮﻓﺘﻲ ﺑﺎﻟﺨﺘﻠﺔ ﺍﻛﻞ ﻛﻢ ﻧﺴﺘﻠﺔ ﻭﺍﻧﺰﻝ
ﺑﺲ ﺍﻟﻨﺴﺘﻠﺔ ﻟﻮﺣﺪﻫﺎ ﻣﺎ ﺗﻔﻴﺪ .
ﺍﻡ ﻗﺎﺳﻢ ﺍﻧﺘﺒﻬﺖ ﻋﻠﻴﺔ ﻭﻛﺎﻟﺖ .. ﻣﺎﻣﺎ ﻫﺪﻯ
ﺍﻛﻠﻲ ﻭﻻ ﺗﺴﺘﺤﻴﻦ ﻫﺬﺍ ﺑﻴﺖ ﺭﺟﻠﺞ ﻳﻌﻨﻲ ﺑﻴﺘﺞ
ﺍﺧﺬﻱ ﺭﺍﺣﺘﺞ
.. ﻻ ﻭﺍﻟﻠﻪ ﺩﺍ ﺍﻛﻮﻝ
.. ﻭﺍﻟﻠﻪ ﻣﺎ ﺍﺩﺭﻱ ﺍﻧﺘﻲ ﺩﺍﺗﺎﻛﻠﻴﻦ ﻣﺪﺭﻱ ﺍﻻﻛﻞ ﺩﻳﺎﻛﻠﺞ
ﺍﺷﻮ ﺍﻻﻛﻞ ﻋﻠﻰ ﺣﻄﺘﻪ ﺑﺎﻗﻲ
.. ﻭﺍﻟﻠﻪ ﺍﻧﻲ ﻫﻲ ﺍﻛﻠﻲ ﻫﻴﺞ
ﻭﺑﺪﺕ ﺍﻡ ﻗﺎﺳﻢ ﺗﺤﺠﻴﻠﻲ ﻭﺗﻌﺮﻓﻨﻲ ﻋﻠﻰ ﺍﻫﻠﻬﺎ ﻭﺍﻫﻞ ﺍﺑﻮ ﻗﺎﺳﻢ
ﺍﻟﻲ ﺍﻓﺘﻬﻤﺘﻪ ﻣﻦ ﺍﻡ ﻗﺎﺳﻢ
ﺍﻥ ﻫﻤﺔ ﻣﻮ ﻫﺎﻟﻜﺪ ﻋﻼﻗﺘﻬﻢ ﻭﻳﺔ ﺍﻫﻞ ﺍﺑﻮ ﻗﺎﺳﻢ
ﺩﺧﻞ ﻫﺸﺎﻡ ﻭﺭﺍﻩ ﻗﺎﺳﻢ ﻭﺑﺪﻭﺍ ﻳﻨﻘﻠﻮﻥ ﺍﻻﻛﻞ ﻟﻠﻤﻄﺒﺦ
ﺍﻡ ﻗﺎﺳﻢ .. ﻫﺎ ﻳﻤﺔ ﺧﻠﺼﺘﻮﺍ
.. ﺍﻱ ﺣﺠﻴﺔ ﻭﻋﺎﺷﺖ ﺍﻳﺪﺝ ﻋﺼﺎﻡ ﻳﻜﻮﻝ ﻫﻮ ﻛﻞ ﻣﻦ ﺍﺟﺔ ﻭﻛﺎﻝ ﺍﻧﺎ
ﺍﻋﺮﻑ ﺍﻃﺒﺦ
ﻳﺎﺑﺔ ﺧﻠﻲ ﺍﻟﻄﺒﺦ ﻻﻫﻠﻪ
ﻭﺍﻡ ﻗﺎﺳﻢ ﻫﻲ ﺍﻫﻠﻪ
ﺍﻡ ﻗﺎﺳﻢ .. ﺍﻟﻒ ﻋﺎﻓﻴﺔ ﻋﻠﻰ ﻛﻠﺒﻜﻢ
ﻫﺸﺎﻡ .. ﻫﺎﻟﺔ ﺻﺒﻲ ﺟﺎﻳﺎﺕ ﻗﺒﻞ ﻻ ﻳﻄﻠﻌﻮﻥ ﻻﻥ ﻣﺴﺘﻌﺠﻠﻴﻦ ﻋﻨﺪﻫﻢ
ﺷﻐﻞ
ﺍﺧﺬﺕ ﺍﻟﺼﺤﻮﻥ ﺍﻟﻤﺘﻜﺪﺳﺔ ﻭﺍﺧﺬﺗﻬﻢ ﻟﻠﻤﻄﺒﺦ ﺍﻟﺼﻐﻴﺮ ﺍﻟﺤﺎﺭ ﺣﺘﻰ
ﺍﻏﺴﻠﻬﻢ ﻭﺍﻟﺒﻨﺎﺕ ﺑﺎﻟﻤﻄﺒﺦ ﺍﻟﺒﺎﺭﺩ
ﺷﻔﺖ ﻗﺎﺳﻢ ﺩﺧﻞ ﻭﺭﺍﻱ ﺍﺷﻮ ﻫﺬﺍ ﺍﻗﺘﺮﺏ ﻣﻨﻲ
ﻭﺩﻧﻚ ﺭﺍﺳﻪ ﻭﻗﺮﺑﻪ ﻳﻢ ﺍﺫﻧﻲ ﻭﻛﺎﻝ
.. ﻋﺪﻟﻲ ﺣﺠﺎﺑﺞ ﺷﻌﺮﺝ ﻃﺎﻟﻊ
......
ﻳﻤﺔ ﻫﻮ ﺍﻗﺘﺮﺏ ﻣﻨﻲ ﻳﻤﺔ ﻏﻴﺮ ﺍﺟﺔ ﻛﻠﺒﻲ ﻳﻮﻛﻒ ﺑﺲ ﻫﺎﻟﻤﺮﺓ ﻣﻮ
ﻣﻦ ﺍﻟﺨﻮﻑ
ﻣﺎ ﺍﻋﺮﻑ ﻣﻦ ﺷﻨﻮ ﺑﺲ ﺍﺣﺴﺎﺱ ﻏﺮﻳﺐ
ﺭﻓﻌﺖ ﺭﺍﺳﻲ ﻭﺍﺟﺘﻲ ﻋﻴﻨﻲ ﻋﻠﻰ ﺍﻡ ﻗﺎﺳﻢ ﺗﺘﺤﺮﻙ ﺑﺎﻟﻤﻄﺒﺦ
ﻭﻋﻴﻮﻧﻬﺎ ﻋﻠﻴﻨﺎ ﻭﺍﻟﺤﻠﻚ ﻣﺸﻜﻮﻙ
ﻭﺍﻟﻠﻪ ﺣﻴﺮﺗﻨﻲ ﻫﺎﻱ ﺍﻟﻤﺮﻳﺔ ﺷﺒﻴﻬﺎ ﺷﺘﺤﺲ
ﺍﺷﻮ ﻛﻞ ﺷﻮﻳﺔ ﻳﺘﺒﺪﻝ ﻣﺰﺍﺟﻬﺎ
ﻃﻠﻊ ﻣﻦ ﺍﻟﻤﻄﺒﺦ ﻭﻛﺎﻝ ﻫﺎ ﺧﻠﺼﺘﻮﺍ ﺍﻟﺠﺎﻱ
ﻫﺎﻟﺔ .. ﺍﻱ ﺧﻠﺼﻨﺎﻩ ﻭﻫﺸﺎﻡ ﺍﺧﺬﻩ ﺍﻟﻬﻢ
ﺑﻌﺪﻫﺎ ﺍﺟﺘﻲ ﺍﻡ ﻗﺎﺳﻢ ﻳﻤﻲ
.. ﻫﺪﻯ ﺧﺎﻟﺔ ﻋﻮﻓﻲ ﻣﻦ ﺍﻳﺪﺝ ﺍﻟﻤﻮﺍﻋﻴﻦ
ﺍﻧﺘﻲ ﻋﺮﻭﺱ ﺑﻌﺪﺝ ﺑﺄﻭﻝ ﻳﻮﻡ ﻣﻴﺼﻴﺮ ﺗﻐﺴﻠﻴﻦ ﻣﻮﺍﻋﻴﻦ
ﺗﻌﺎﻟﻲ ﻫﺎﻟﺔ ﺍﺧﺬﻱ ﻣﻦ ﻣﺮﺕ ﺍﺧﻮﺝ ﺍﻟﻤﻮﺍﻋﻴﻦ
ﻫﺎﻟﺔ .. ﻋﻔﻴﺔ ﻫﺎﻟﺔ ﺣﺎﻃﻴﻬﺎ ﻛﺒﺶ ﻓﺪﺍﺀ ﻟﻠﻤﻬﻤﺎﺕ ﺍﻟﺼﻌﺒﺔ
ﺍﻡ ﻗﺎﺳﻢ .. ﺍﺷﺘﻐﻠﻲ ﻭﺍﻧﺘﻲ ﺳﺎﻛﺘﺔ ﻭﺭﻭﺣﻲ ﺻﻴﺤﻴﻠﻲ ﺫﻳﺞ ﺍﺧﺘﺞ
ﺧﻠﻲ ﺗﺮﻭﺡ ﻋﻠﻰ ﻏﺮﻓﺔ ﻫﺸﺎﻡ ﺗﻨﻈﻔﻬﺎ
ﺻﻌﺪﺕ ﻗﺒﻞ ﺷﻮﻳﺔ ﻟﻜﻴﺘﻬﺎ ﻫﻮﺳﺔ
ﻭﺭﺟﻌﺖ ﺍﻟﺘﻔﺘﺖ ﻋﻠﻴﺔ ﻭﻛﺎﻟﺖ
.. ﺭﻭﺣﻲ ﺻﻌﺪﻱ ﻓﻮﻙ ﻟﻐﺮﻓﺘﺞ ﻭﺟﻬﺰﻱ ﻧﻔﺴﺞ ﻭﺍﺭﺗﺎﺣﻲ
ﺍﻟﻴﻮﻡ ﻛﻀﻴﺘﻮﻫﺎ ﻛﻠﺔ ﺧﻄﺎﺭ ﺧﻄﻴﺔ ﺣﺘﻰ ﻣﺎ ﻟﺤﻜﺘﻮﺍ ﺗﺘﻬﻨﻮﻥ
ﺟﺎﻭﺑﺘﻬﺎ ﺑﺼﻮﺕ ﻭﺍﻫﻦ
.. ﺍﻱ ﺧﺎﻟﺔ ﻫﺴﺔ ﺍﺻﻌﺪ
ﺍﻧﻤﻐﺼﺖ ﺑﻄﻨﻲ ﺫﻛﺮﺗﻨﻲ ﺑﺎﻟﻲ ﻳﻨﺘﻈﺮﻧﻲ
ﺻﻌﺪﺕ ﻓﻮﻙ ﻟﻐﺮﻓﺘﻲ ﻣﺎ ﺍﻋﺮﻑ ﺷﻨﻮ ﺍﺳﻮﻱ ﺧﺎﻳﻔﺔ
ﺍﺣﺲ ﺑﺮﻭﺣﻲ ﻣﺤﺎﺻﺮﺓ
ﻓﺘﺤﺖ ﺍﻟﻜﻨﺘﻮﺭ ﻭﻃﻠﻌﺖ ﺑﺠﺎﻣﺔ ﺧﻔﻴﻔﺔ ﺗﺼﻴﺮ ﺣﻔﺮ
ﻣﻦ ﺍﻟﺼﺪﺭ ﻭﻣﺎ ﺑﻴﻬﺎ ﺭﺩﻥ
ﺍﺧﺬﺗﻬﺎ ﻭﺭﺣﺖ ﻟﻠﺤﻤﺎﻡ ﺳﺒﺤﺖ ﻭﺑﻌﺪﻫﺎ ﻟﺒﺴﺖ ﺍﻟﺒﺠﺎﻣﺔ ﻭﻧﺸﻔﺖ
ﺷﻌﺮﻱ ﻭﺍﻧﻲ ﺑﺎﻟﺤﻤﺎﻡ ﻭﻟﺰﻣﺖ ﺍﻟﺸﺴﻮﺍﺭ ﺍﻟﻤﻮﺟﻮﺩ ﻗﺮﻳﺐ ﻋﺎﻟﻤﻐﺴﻠﺔ
ﻭﻛﻌﺪﺕ ﺍﻧﺸﻒ ﺷﻌﺮﻱ
ﻭﺍﺗﺬﻛﺮﺕ ﻛﻼﻡ ﺍﻡ ﻗﺎﺳﻢ ﻋﻦ ﺍﻟﺸﻌﺮ ﺍﻟﻤﺒﻠﻞ ﻭﺟﺎﻥ ﻳﺪﻙ ﺍﻟﺠﺮﺱ
ﻋﻨﺪﻱ ﻣﻦ ﺳﺒﺤﺖ ﻫﻬﻬﻬﻬﻬﻬﻬﻪ ﻳﺎ ﺣﻈﻲ
ﻭﺍﻟﻠﻪ ﺍﻡ ﻗﺎﺳﻢ ﺩﺍﻫﻴﺔ
ﺧﻠﺼﺖ ﻭﻃﻠﻌﺖ ﻣﻦ ﺍﻟﺤﻤﺎﻡ ﻭﺟﺎﻥ ﺍﺷﻮﻑ ﻗﺎﺳﻢ
ﻣﺘﻤﺪﺩ ﻋﺎﻟﺴﺮﻳﺮ
ﻧﺰﻝ ﻧﻘﺎﻟﻪ ﻭﺑﺎﻭﻉ ﻋﻠﻴﺔ
ﻗﺎﺳﻢ .. ﻧﻌﻴﻤﺎ
.. ﺍﻟﻠﻪ ﻳﻨﻌﻢ ﻋﻠﻴﻚ
ﺣﺠﻴﺘﻬﺎ ﻭﺍﻧﻲ ﻋﻴﻮﻧﻲ ﺗﺘﻬﺮﺏ ﺑﻜﻞ ﻣﻜﺎﻥ ﺍﻻ ﻋﻠﻴﻪ ﺭﺣﺖ ﻟﻤﻴﺰ ﺍﻟﻤﺮﺍﻳﺎ
ﻭﺭﺷﻴﺖ ﻋﻄﺮ
.....
ﺍﻟﺘﻔﺘﺖ ﻟﻜﻴﺘﻪ ﺷﺎﻣﺮ ﻣﻼﺑﺴﻪ ﻋﺎﻟﺴﺮﻳﺮ
ﺭﺣﺖ ﻋﻠﻴﻬﻢ ﻭﺷﻠﺘﻬﻢ ﻭﺻﺮﺕ ﺍﺭﺗﺐ ﺑﻴﻬﻢ ﺍﺭﻳﺪ ﺍﻱ ﺷﻲ ﻳﺸﻐﻠﻨﻲ
ﻋﻨﻪ
ﻭﻋﻦ ﺍﻟﺘﻔﻜﻴﺮ ﺑﺎﻟﺨﻄﻮﺓ ﺍﻟﻲ ﺑﻌﺪﻫﺎ
ﺍﻧﻲ ﺑﻌﺪ ﺍﻟﻲ ﺷﻔﺘﻪ ﺍﻟﻴﻮﻡ ﻫﻮ ﻭﺭﻫﻒ ﻭﺷﻔﺖ ﺣﺒﻪ ﺍﻟﻬﺎ
ﺧﺎﻑ ﺟﻨﺖ ﻣﺠﺮﺩ ﺍﺳﻤﻊ ﺑﻴﻬﺎ ﻫﺴﻪ ﺷﻔﺖ ﻫﻢ ﻛﻮﻟﺸﻲ ﺑﻌﻴﻨﻲ
ﺍﺷﻮﻓﻪ ﺻﻌﺐ ﻳﻘﺘﺮﺑﻠﻲ
ﻫﺴﺔ ﻣﻦ ﺷﻔﺘﻬﻢ ﺑﻌﻴﻨﻲ ﺻﺎﺭ ﻣﺴﺘﺤﻴﻞ ﺍﺗﻘﺒﻠﻪ
ﻭﺍﺳﻠﻤﻪ ﻧﻔﺴﻲ
ﺍﺟﺎﻧﻲ ﺻﻮﺗﻪ ﻣﻦ ﻭﺭﺍﻱ ﻭﻛﺎﻝ
ﺟﺎﻥ ﻭﺍﻛﻒ ﻭﺭﺍﻱ ﻛﻠﺶ ﻗﺮﻳﺐ ﻋﻠﻴﺔ ﻛﻤﺰﺕ ﻣﻦ ﻣﻜﺎﻧﻲ
ﻋﺰﺓ ﻫﺬﺍ ﺷﻮﻛﺖ ﻛﺎﻡ ﻣﻦ ﺍﻟﺴﺮﻳﺮ
ﻭﻫﻤﺲ .. ﺗﺪﺭﻳﻦ ﺍﻭﻝ ﻣﺎ ﺷﻔﺖ ﻃﻮﻝ ﺷﻌﺮﺝ
ﺣﻠﻔﺖ ﺍﺷﺒﺮﻩ ﻋﻠﻰ ﺍﻳﺪﻱ
ﺍﻗﺘﺮﺏ ﻋﻠﻴﺔ ﻭﻣﺪ ﺍﻳﺪﻩ ﻋﻠﻰ ﺭﺍﺳﻲ ﻭﺻﺎﺭ ﻳﺤﺮﻙ ﺍﺻﺎﺑﻊ ﺍﻳﺪﻩ ﻋﻠﻰ
ﻃﻮﻝ ﺷﻌﺮﻱ
ﻭﺻﻞ ﻟﺤﺪ ﺍﺳﻔﻞ ﻇﻬﺮﻱ ﻭﻛﺎﻝ
.. ﻣﺎ ﺷﺎﺀ ﺍﻟﻠﻪ ﻋﺒﺎﻟﻚ ﻋﺒﺎﻳﺔ ﺍﻳﺎﻧﻲ ﻭﻳﺎﺝ ﺗﻔﻜﺮﻳﻦ ﺗﻜﺼﻴﻨﻪ
ﻟﺰﻣﺖ ﺧﺼﻠﺔ ﻣﻦ ﺷﻌﺮﻱ ﻭﺑﺎﻭﻋﺖ ﻋﻠﻴﻪ
.. ﻻ ﻳﻤﺔ ﺍﺳﻢ ﺍﻟﻠﻪ ﻋﻠﻰ ﺷﻌﻐﻲ ( ﺷﻌﺮﻱ )
ﻣﺴﺘﺤﻴﻞ ﺍﻛﺼﻪ ﺑﺪﻭﻥ ﻣﺘﻜﻮﻝ ﺍﻧﻲ ﺍﺣﺐ ﺷﻌﻐﻲ ﻭﺍﻫﺘﻢ ﺑﻲ
ﺍﻗﺘﺮﺏ ﻋﻠﻴﺔ ﻭﺍﻧﻲ ﺟﻤﺪﺕ ﺑﻤﻜﺎﻧﻲ
ﻭﻫﻤﺲ ﻳﻢ ﺭﻛﺒﺘﻲ .. ﺍﻟﻠﻴﻠﺔ ﺍﺭﻳﺪ ﺍﺗﻮﺳﺪﻩ ﻭﺍﺷﻢ ﻋﻄﺮﻩ
ﻓﺘﺤﺖ ﺣﻠﻜﻲ ﺑﻔﻬﺎﻭﺓ .. ﻫﺎﻩ
ﺷﺎﻑ ﻓﻬﺎﻭﺗﻲ ﻋﻠﻰ ﺻﺪﻣﺘﻲ ﺗﺮﺟﻢ ﺳﻜﻮﺗﻲ ﻋﺎﻟﺨﻀﻮﻉ
ﻟﺰﻣﻨﻲ ﻣﻦ ﺍﻳﺪﻱ ﻭﺍﺧﺬﻧﻲ ﻣﺘﺠﻪ ﻟﻠﺴﺮﻳﺮ
ﻟﻠﺤﻈﺔ ﺍﺗﺒﻌﺘﻪ ﻣﺜﻞ ﺍﻟﻤﺴﺤﻮﺭﺓ ﻏﺮﻛﺎﻧﺔ ﺑﻴﻦ ﺍﻟﺨﻮﻑ ﻭﺑﻴﻦ
ﺍﻟﻔﻀﻮﻝ
ﻛﻌﺪﻧﻲ ﻋﺎﻟﺴﺮﻳﺮ ﻭﻛﺎﻝ
.. ﻫﺪﻯ ﺍﺭﻳﺪﺝ ﻛﻠﺞ ﺍﻟﻲ ﺷﻌﺮﺝ ﻃﻮﻟﺞ ﺟﺴﻤﺞ
ﻛﻠﻪ ﺍﺭﻳﺪﻩ ﺍﺣﺐ ﺍﺗﻤﻌﻦ ﺑﻜﻠﺸﻲ ﻳﺨﺼﺞ
ﻣﺎ ﺍﻋﺮﻑ ﻟﻴﺶ ﻣﻦ ﺷﻔﺘﺞ ﺍﺧﺬﻧﻲ ﺍﻟﻔﻀﻮﻝ
ﺍﻛﺘﺸﻒ ﻛﻠﺸﻲ ﺑﻴﺞ
ﻋﺮﻓﺖ ﺍﻥ ﺳﺎﻋﺔ ﺍﻟﺼﻔﺮ ﻗﺪ ﺣﺎﻧﺖ
ﻣﺎﻝ ﺭﺍﺳﻪ ﻭﻋﻴﻮﻧﻪ ﺑﻌﻴﻮﻧﻲ
ﻭﻗﺮﺏ ﺷﻔﺎﻳﻔﻪ
ﻛﻠﺒﻲ ﻭﻋﻘﻠﻲ ﻳﺘﺼﺎﺭﻋﻮﻥ
ﻭﺍﻟﺜﻨﻴﻦ ﻳﺴﺄﻟﻮﻧﻲ ﻫﺪﻯ ﺗﺮﺿﻴﻦ ﺗﻌﻴﺸﻴﻦ ﺑﻘﻴﺔ ﺣﻴﺎﺗﺞ ﺗﺤﺖ ﺍﻟﻈﻞ
ﺍﻧﺘﺒﻬﺖ ﻋﻠﻴﻪ ﺑﺪﺓ ﻳﻤﻴﻞ ﺟﺴﻤﻲ ﻋﺎﻟﺴﺮﻳﺮ ﺣﺘﻰ ﺍﺳﺘﻠﻘﻲ ﻋﻠﻰ
ﻇﻬﺮﻱ ﺍﺗﺒﻌﻨﻲ ﻭﺻﺎﺭ ﻳﻌﺘﻠﻴﻨﻲ ﻭﺍﻧﻔﺎﺳﻪ ﺍﻟﺤﺎﺭﺓ ﺗﻠﻔﺢ ﻭﺟﻬﻲ
ﻛﻠﺒﻲ ﻣﻦ ﺍﻟﺨﻮﻑ ﻳﺮﻳﺪ ﻳﻮﻛﻒ ﻏﺼﺐ ﻋﻨﻲ ﻧﺰﻟﺖ ﺩﻣﻮﻋﻲ
ﻣﺎ ﺍﻛﺪﺭ ﻭﺍﻟﻠﻪ ﻣﻮﺑﻴﺪﻱ ﻣﺎ ﺍﻛﺪﺭ ﺍﺳﻠﻤﻪ ﻧﻔﺴﻲ ﻭﺍﻧﻲ ﺍﻋﺮﻑ
ﺟﺎﻳﻨﻲ ﻋﻠﻤﻮﺩ ﺍﻟﻮﺍﺟﺐ ﻭﻛﻠﺒﻪ ﻭﻳﺔ ﻭﺣﺪﺓ ﺛﺎﻧﻴﺔ
ﺍﻣﻮﺕ ﻭﻻ ﻫﺬﺍ ﺍﻟﺬﻝ
......
ﺍﺗﻔﺎﺟﻲﺀ ﺑﺤﺮﻛﺘﻲ ﺷﻜﻠﻪ ﻣﺜﻞ ﺍﻟﻲ ﺩﺍﻳﺦ ﻭﺫﺍﻳﺐ
ﻋﻘﺪ ﺣﻮﺍﺟﺒﻪ ﻭﻛﺎﻝ
.. ﺷﻜﻮ ﺷﺒﻴﺞ ﻫﺪﻯ ﺗﺮﺓ ﺍﻟﺒﺎﺭﺣﺔ ﺗﺮﻛﺘﺞ ﺑﺮﺍﺣﺘﺞ ﻋﻠﻤﻮﺩ ﺟﻨﺘﻲ
ﺧﺎﻳﻔﺔ ﻭﺍﻭﻝ ﻟﻴﻠﺔ ﺍﻟﺞ
ﺑﺲ ﺍﻟﻴﻮﻡ ﻻ ﺗﺘﻮﻗﻌﻴﻦ ﻣﻨﻲ ﺍﺗﺮﻛﺞ ﺑﺪﻭﻥ ﻣﺎ ﺍﺧﺬﺝ
ﻛﻤﺖ ﻣﻦ ﻣﻜﺎﻧﻲ ﻭﺧﻠﻴﺖ ﻣﺴﺎﻓﺔ ﺑﻴﻨﻲ ﻭﺑﻴﻨﻪ
.. ﻟﺤﻈﺔ ﻗﺎﺳﻢ
ﺑﻠﻠﺖ ﺷﻔﺎﻳﻔﻲ ﻭﺍﻟﺪﻣﻮﻉ ﻏﺼﺐ ﻋﻨﻲ ﺗﻨﺰﻝ
.. ﻫﺴﺔ ﺷﻜﻮ ﻟﻴﺶ ﺗﺒﺠﻴﻦ
ﺳﺤﺒﺖ ﻧﻔﺲ ﻋﻤﻴﻖ ﻭﻗﻮﻳﺖ ﻧﻔﺴﻲ ﻣﻨﻮ ﻳﺎﺧﺬ ﺑﺤﻘﻲ ﻏﻴﺮﻱ ﺍﻧﻲ
ﻻﺯﻡ ﺍﺻﻴﺮ ﻗﻮﻳﺔ ﻭﺍﻭﺟﻬﻪ ﻣﺎﻛﻮ ﺗﺎﻟﻴﺘﻲ ﺍﺭﻭﺡ ﺑﺎﻟﺮﺟﻠﻴﻦ ﻫﻮ ﻳﺼﻔﻰ
ﻟﺮﻫﻒ ﻭﺍﻧﻲ ﺍﻧﻜﺴﺮ
ﺟﻠﻴﺖ ﺣﻨﺠﺮﺗﻲ ﻭﺑﺪﻳﺖ
.. ﻗﺎﺳﻢ ﺍﻧﺖ ﻣﻮ ﺫﺍﻙ ﺍﻟﻴﻮﻡ ﻗﺒﻞ ﺍﻟﺰﻭﺍﺝ ﻛﻠﺖ ﺍﻥ
ﺍﻧﺖ ﺯﻭﺍﺟﻨﺎ ﻣﻔﺎﺟﻲﺀ ﻭﻣﺠﻨﺖ ﻣﺘﻮﻗﻊ ﺍﻥ ﺑﻴﻮﻡ ﺍﺻﻴﺮ ﺯﻭﺟﺘﻚ
ﻭﻛﻠﺘﻠﻲ ﺍﻧﺖ ﺗﺤﺐ ﺑﻨﺖ ﻋﻤﻚ ﻭﺣﺘﻰ ﻟﻮ ﺍﺗﺰﻭﺟﺘﻨﻲ ﻣﺎ ﻧﺎﻭﻱ ﺗﻐﻴﻴﺮ
ﺍﺗﻔﺎﻗﻚ ﻭﻳﺎﻫﻢ ﻭﺑﻌﺪﻙ ﻣﻠﺘﺰﻡ ﻭﻳﺎﻫﺎ ﺑﻮﻋﺪﻙ ﺑﺎﻟﺰﻭﺍﺝ
.. ﺍﻱ ﺻﺤﻴﺢ
.. ﺯﻳﻦ ﺗﺘﺬﻛﺮ ﺷﻨﻮ ﻛﺘﻠﺘﻠﻲ ﺑﻠﺤﻈﺘﻬﺎ ﻭﻋﺪﺗﻨﻲ ﺍﻥ ﺍﻧﺖ
ﺗﺮﻳﺪ ﺗﻤﻢ ﺯﻭﺍﺟﻚ ﻭﻳﺎﻱ ﻋﻠﻤﻮﺩ ﺣﺠﻲ ﺍﻟﻨﺎﺱ ﻭﺍﻥ ﻫﺬﺍ ﻭﺍﺟﺒﻚ
ﺑﺘﺠﺎﻫﻲ ﻭﻻﺯﻡ ﺗﺴﻮﻳﻪ
ﻭﺑﻴﻮﻣﻬﺎ ﻃﻤﻨﺘﻨﻲ ﻭﻛﻠﺖ
ﻣﺎ ﺍﺭﻳﺪ ﺍﻇﻠﻤﺞ ﻭﺍﻛﺴﺮ ﺑﺨﺘﺞ
.. ﺍﻱ ﺻﺤﻴﺢ ﻭﺍﻧﻲ ﺑﻌﺪﻧﻲ ﻣﺼﺮ ﻋﻠﻰ ﻛﻼﻣﻲ ﻣﺴﺘﺤﻴﻞ ﺍﻇﻠﻤﺞ
ﺯﻳﻦ ﺍﺫﺍ ﺍﻧﺎ ﻣﺘﻨﺎﺯﻟﺔ ﻋﻦ ﻭﺍﺟﺒﻲ
ﻻﻥ ﺍﻧﻲ ﻣﺴﺘﺤﻴﻞ ﺍﺧﻠﻴﻚ ﺗﻘﺘﺮﺏ ﻣﻨﻲ ﺍﻗﺒﻞ ﺍﺳﻠﻤﻚ ﻧﻔﺴﻲ
ﻭﺍﻧﺖ ﻭﻓﻜﺮﻙ ﻭﻛﻠﺒﻚ ﻭﻳﺔ ﻭﺣﺪﺓ ﺛﺎﻧﻴﺔ
.. ﻫﺬﺍ ﻛﻼﻣﺞ ﻣﺎ ﻟﻪ ﺩﺍﻋﻲ ﻣﻮ ﺍﻧﺎ ﺍﻟﻲ ﻏﺼﺒﺘﺞ ﻋﺎﻟﺰﻭﺍﺝ
ﺍﺑﻮﺝ ﻫﻮ ﺍﻟﻲ ﺟﺒﺮﺝ
ﻭﺍﻧﺎ ﻣﺎ ﺍﺭﻳﺪ ﺍﻛﺴﺮﺝ ﻭﺍﻇﻠﻤﺞ ﻣﺜﻠﻤﺎ ﺍﺑﻮﺝ ﻭﺍﺧﻠﻴﺞ ﻋﻠﺞ ﺑﺤﻠﻮﻙ
ﺍﻟﻨﺎﺱ ﺍﻟﻤﺎ ﺗﺮﺣﻢ
ﻭﺍﻧﺎ ﺍﺭﻳﺪﺝ ﻋﻠﻰ ﺣﺐ ﺍﻟﻠﻪ ﻻ ﺗﺨﺎﻓﻴﻦ ﻣﺎ ﺭﺍﺡ ﺍﺧﻠﻴﺞ ﺗﺤﺴﻴﻦ
ﺑﻔﺮﻕ ﺍﻭ ﺑﺘﻘﺼﻴﺮ ﺳﻮﺍﺀ ﺑﺎﻟﻔﺮﺍﺵ ﺍﻭ ﺧﺎﺭﺟﻪ
.. ﻻ ﻗﺎﺳﻢ ﺍﻧﻲ ﻣﺎ ﺍﺭﻳﺪﻙ ﺗﻘﺘﺮﺑﻠﻲ ﺣﺘﻰ ﺗﺸﺒﻊ ﻏﺮﻳﺰﺗﻚ
ﻋﻨﺪﻱ
ﺳﺎﻋﺘﻬﺎ ﺻﺪﻛﻨﻲ ﺍﺫﺍ ﺍﺑﻮﻱ ﻏﺼﺒﻨﻲ ﻭﻛﺴﺮﻧﻲ ﻣﺮﺓ
ﻓﺎﻧﺖ ﺍﺫﺍ ﺟﺒﺮﺗﻨﻲ ﻭﺍﺧﺬﺗﻨﻲ ﺭﺍﺡ ﺗﻜﺴﺮﻧﻲ ﻋﺸﺮﺓ ﺍﺿﻌﺎﻓﻪ
.........
ﻗﺎﺳﻢ ﺍﺗﻤﻨﻰ ﺗﻔﻬﻤﻨﻲ ﻭﺗﺴﻤﻌﻨﻲ
ﺍﺑﺎﻭﻉ ﻋﻠﻴﻪ ﻓﺮﻙ ﻭﺟﻬﻪ ﻭﻛﻌﺪ ﻋﺎﻟﺴﺮﻳﺮ
ﻳﺒﺎﻭﻉ ﻋﻠﻴﺔ ﻭﻛﺄﻧﻤﺎ ﺍﻭﻝ ﻣﺮﺓ ﻳﺸﻮﻓﻨﻲ
.. ﺍﺗﻔﻀﻠﻲ ﺍﺣﺠﻲ ﺍﺳﻤﻌﺞ
..
ﻣﺜﻠﻤﺎ ﺍﻧﺖ ﻣﺨﻄﻂ ﻟﺤﻴﺎﺗﻚ ﻭﻧﺎﻭﻱ ﺗﺘﺰﻭﺝ ﺍﻟﻲ ﻛﻠﺒﻚ ﻳﺤﺒﻬﺎ
ﺍﻧﻲ ﻫﻢ ﻣﺜﻠﻚ ﺣﺎﻟﻲ ﺣﺎﻝ ﺍﻱ ﺑﻨﻴﺔ
ﺣﻠﻤﻲ ﺍﺗﺰﻭﺝ ﻭﺍﺣﺪ ﻳﺤﺒﻨﻲ ﻳﺮﺩﻧﻲ ﺍﻟﻲ ﻟﻨﻔﺴﻲ ﻭﻧﻔﺘﺢ ﺍﻧﻲ ﻭﻳﺎﻩ
ﺑﻴﺖ ﻳﻠﻤﻨﻲ ﻭﺍﻛﻮﻥ ﺍﻧﻲ ﺍﻡ ﺍﻭﻻﺩﻩ ﻭﺍﻻﻭﻟﻰ ﻭﺍﻻﺧﻴﺮﺓ ﺑﺤﻴﺎﺗﻪ ﺍﻋﺘﻘﺪ
ﻣﻮ ﻫﻮﺍﻱ ﻋﻠﻴﺔ
ﺑﺲ ﻣﻊ ﺍﻻﺳﻒ ﺍﻧﻲ ﻳﺘﻴﻤﺔ ﻭﻣﺎ ﺍﻣﻠﻚ ﻻ ﺣﻮﻝ ﻭﻻ ﻗﻮﺓ
ﺣﺘﻰ ﺍﺧﺘﻴﺎﺭ ﺣﻴﺎﺗﻲ
ﺍﻧﻲ ﻣﻮ ﺑﺲ ﻳﺘﻴﻤﺔ ﺍﻡ ﻻ ﺍﻧﻲ ﺣﺘﻰ ﻳﺘﻤﺔ ﺍﻻﺏ
ﻻﻥ ﺍﺑﻮﻱ ﺳﺒﺐ ﺑﻜﻞ ﺫﻝ ﻭﻛﻞ ﻣﻬﺎﻧﺔ ﻛﺎﻋﺪﺓ ﺍﻣﺮ ﺑﻴﻬﺎ ﺑﻬﺬﺍ ﺍﻟﺰﻭﺍﺝ
ﻇﻠﻤﻨﻲ ﻭﺍﻟﺪﻧﻴﺎ ﻣﺎ ﺭﺣﻤﺘﻨﻲ
ﻋﻘﺪ ﺣﻮﺍﺟﺒﻪ ﻭﺍﻟﻨﺎﺭ ﺗﺴﻌﺮ ﻣﻦ ﻋﻴﻮﻧﻪ
.. ﻳﻌﻨﻲ ﺷﻨﻮ ﺍﻓﺘﻬﻢ ﻣﻦ ﻛﻼﻣﺞ ﺍﻥ ﺍﻧﺘﻲ
ﻣﺎ ﺗﺮﺩﻳﻦ ﺍﺧﺬﺝ ﻫﺴﺔ
.. ﺍﺗﺮﺟﺎﻙ ﻻ ﺗﻔﺮﺽ ﻧﻔﺴﻚ ﻋﻠﻴﺔ ﺑﺤﺠﺔ ﺍﻟﻮﺍﺟﺐ ﺍﻭ ﺍﻟﻐﺮﻳﺰﺓ ﻭﺍﻟﻠﻪ
ﺗﺠﺮﻡ ﺑﻴﺔ ﻭﺑﻌﻤﺮﻱ
ﺍﻧﺖ ﻣﻮ ﻛﻠﺖ ﺍﻧﻲ ﺍﺷﺒﻪ ﺍﺧﺘﻚ ﻫﺎﻟﺔ
ﺯﻳﻦ ﺍﺣﻠﻔﻚ ﺑﺎﻟﻠﻪ ﻟﻮ ﺍﺧﺘﻚ ﺗﺼﻴﺮ ﺑﻬﺬﺍ ﺍﻟﻤﻮﻗﻒ
ﺗﺮﺿﻰ ﻋﻠﻴﻬﺎ ﺗﺸﻮﻓﻬﺎ ﻣﻬﻀﻮﻣﺔ ﻭﺗﻨﻬﺎﻥ ﺑﻬﺎﻱ ﺍﻟﻄﺮﻳﻘﺔ
ﺍ
.. ﺯﻳﻦ ﺷﻨﻮ ﺍﻟﺤﻞ ﺑﻔﻜﺮﺝ ﻳﻌﻨﻲ ﺍﻧﺎ ﺭﺟﺎﻝ ﻭﺍﻧﺘﻲ ﻣﺮﺗﻲ
ﻟﺸﻮﻛﺖ ﺍﺑﻘﻰ ﻣﺎﻧﻊ ﻧﻔﺴﻲ ﻋﻨﺞ
ﻟﻨﻔﺘﺮﺽ ﺍﻧﻲ ﻭﺍﻓﻘﺖ ﺍﻧﻄﻴﺞ ﻓﺮﺻﺔ ﺗﺘﻘﺒﻠﻴﻦ ﻭﺿﻌﺞ ﻭﻳﺎﻱ
ﺯﻳﻦ ﻟﺸﻮﻛﺖ
ﺟﺎﻥ ﻳﺤﺠﻴﻬﺎ ﻭﻫﻮ ﻋﺎﻛﺪ ﺣﻮﺍﺟﺒﻪ ﻭﻛﻮﺓ ﻻﺯﻡ ﺍﻋﺼﺎﺑﻪ
ﺷﻜﻞ ﻛﻼﻣﻲ ﻣﺎ ﻳﺼﺮﻓﻠﻪ ﺑﺲ ﺟﺎﻧﺖ ﺑﻌﻴﻮﻧﻪ ﻟﻤﺤﺔ
ﻣﻦ ﺍﻟﺮﺣﻤﺔ ﺧﺼﻮﺻﺎً ﻣﻦ ﺫﻛﺮﺕ ﺍﺧﺘﻪ ﻫﺎﻟﺔ ﻭﺍﻟﻴﺘﻢ ﻣﺎﻟﺘﻲ
ﻣﺮ ﺑﻌﻴﻮﻧﻪ ﻃﻴﻒ ﺍﻧﻜﺴﺮ ﺧﺎﻃﺮﻩ ﻋﻠﻴﺔ
ﺍﺳﺘﻐﻠﻴﺖ ﺍﻟﻔﺮﺻﺔ ﻭﻛﻠﺘﻠﻪ
ﻗﺎﺳﻢ ﺍﻧﻲ ﺳﻠﻤﺘﻚ ﺣﻴﺎﺗﻲ ﻭﺩﺍﺧﻠﺔ ﻋﻠﻰ ﺍﻟﻠﻪ ﻭﻋﻠﻴﻚ
ﺍﺭﻳﺪﻙ ﺗﺼﺒﺮ ﻋﻠﻴﺔ ﻟﺤﺪ ﻣﺎ ﺍﻧﺖ ﺗﺘﺰﻭﺝ ﺭﻫﻒ ﻭﺗﺸﻮﻑ ﺣﻴﺎﺗﻚ
ﻭﺗﻄﻠﻜﻨﻲ ﻭﺍﻧﻲ ﻫﻢ ﺍﺷﻮﻑ ﺣﻴﺎﺗﻲ ﻭﺑﻬﺎﻱ ﺍﻟﻔﺘﺮﺓ ﺍﺭﻳﺪ ﺍﻛﻤﻞ ﻛﻠﻴﺘﻲ
ﻭﺍﺗﻌﻴﻦ ﺣﺘﻰ ﺍﻛﺪﺭ ﺍﻋﺘﻤﺪ ﻋﻠﻰ ﻧﻔﺴﻲ
ﻭﻣﺎ ﺍﺻﻴﺮ ﺗﺤﺖ ﺭﺣﻤﺔ ﺍﺑﻮﻱ
ﻭﺍﻟﻠﻪ ﺗﺴﻮﻳﻠﻲ ﺟﻤﻴﻞ ﻣﺎ ﺍﻧﺴﺎﻟﻚ ﺍﻳﺎﻩ ﻃﻮﻝ ﻋﻤﺮﻱ
ﻭﺗﻜﺴﺐ ﺍﺟﺮ ﻭﺛﻮﺍﺏ ﺑﻮﺣﺪﺓ ﻳﺘﻴﻤﺔ ﺍﻟﺰﻣﻦ ﺣﻄﻬﺎ ﻳﻢ
ﺑﺎﺑﻚ ﻻ ﺗﺤﻄﻤﻬﺎ
ﺟﻨﺖ ﻟﻄﺎﻟﻤﺎ ﺍﺣﺠﻲ ﺟﺎﻧﺖ ﺩﻣﻮﻋﻲ ﺗﻨﺰﻝ ﺍﺣﺲ ﺟﻨﺖ ﺍﺑﺠﻲ ﻋﻠﻰ
ﻏﺮﺑﺔ ﺍﻟﺰﻣﻦ ﻭﺍﻟﻮﻛﺖ ﺍﻟﻲ ﺧﻼﻧﻲ
ﺍﺳﺘﻨﺠﺪ ﺑﺸﺨﺺ ﺍﻥ ﻳﻨﻘﺬﻧﻲ ﻭﻳﺠﺘﺜﻨﻲ ﻣﻦ ﺣﻴﺎﺗﻲ
ﻭﺍﻟﻠﻪ ﺍﻟﻤﻮﻗﻒ ﺻﻌﺐ
ﻛﺎﻡ ﻣﻦ ﻣﻜﺎﻧﻪ ﻭﺑﺎﻭﻉ ﻋﻠﻴﺔ ﻭﺳﺤﺐ ﻧﻔﺲ ﻋﻤﻴﻖ
ﻭﻛﺎﻝ ........
ﻳﺘﺒﻊ
ﺍﺣﺒﻜﻢ ﻫﻮﺍﻱ ﺍﺣﺒﻜﻢ ﻛﻮﻣﺔ ️☺️☺️☺️
السلام عليكم ورحمة الله وبركاته ، موقع روايات-Novels يهتم بنشر جديد الروايات للكتاب العراقين ، حمل تطبيقنا على جوجل بلاي وستمتع بلقراءة ، تمنياتنا لكم بلتوفيق
تحويل كودإخفاء محول الأكواد الإبتساماتإخفاء