رواية قلوب على جرف الهاوية الجزء الأول
للكاتبة نهى الحسون
↙️
ﺍﺳﺘﺎﺫ ﻋﻠﻲ ﻣﻤﻜﻦ ﻟﺤﻈﺔ ﻣﻦ ﻭﻗﺘﻚ
ﻋﻠﻲ ﻭﻫﻮ ﻳﺘﺮﻙ ﺍﻟﻘﻠﻢ ﻣﻦ ﺍﻳﺪﺓ ﻭﻳﺮﻓﻊ ﺭﺍﺳﺔ
ﻋﻠﻲ - ﻧﻌﻢ ﺗﻔﻀﻞ ﺍﺣﻤﺪ ﺍﺳﻤﻌﻚ
ﺍﺣﻤﺪ - ﺳﻴﺪﻱ ﻗﺒﻞ ﻳﻮﻡ ﻭﺻﻠﻨﻲ ﺧﺒﺮ ﻣﻦ ﺻﺪﻳﻘﻨﺎ ﻧﻮﺭﺱ ﺍﻟﻲ ﻣﻮﺟﻮﺩ ﺑﺎﻟﻨﺎﺻﺮﻳﺔ ﻛﺎﻥ ﻣﺴﺘﻠﻢ ﻗﻀﻴﺔ ﺍﻏﺘﺼﺎﺏ ﻓﺘﺎﺓ ﻋﻤﺮﻫﺎ ٢٠ﺳﻨﺔ
ﻭﺍﺛﻨﺎﺀ ﺍﻟﺘﺤﻘﻴﻘﺎﺕ ﻓﻲ ﺍﻟﻤﺤﻀﺮ ﺍﺳﺘﻐﺮﺏ ﻧﺎﺻﺮ ﺑﺎﺳﻢ ﺍﻟﻀﺤﻴﺔ
ﻛﺎﻧﺖ ﺗﻤﻠﻚ ﻧﻔﺲ ﺍﺳﻢ ﺍﻟﺠﺪ ﻭﺍﻟﻌﺎﺋﻠﺔ ﻭﻟﻘﺐ ﻋﺸﻴﺮﺗﻚ
ﺍﻧﺖ
ﺑﺲ ﺣﺒﻴﺖ ﺍﻧﻄﻴﻚ ﺧﺒﺮ ﺧﺎﻑ ﺍﻛﻮ ﺍﺷﻜﺎﻝ ﺍﻭﺗﺸﺎﺑﻪ ﺑﺎﻻﺳﻤﺎﺀ ﺍﻭ ﺧﺎﻑ ﺍﻟﻤﻮﺿﻮﻉ ﻳﻤﺖ ﺍﻟﻜﻢ ﺑﺼﻠﺔ
ﻋﻠﻲ ﻭﻫﻮ ﻣﺘﻔﺎﺟﻲﺀ ﻣﻦ ﻛﻼﻡ ﺍﺣﻤﺪ
ﻋﻠﻲ - ﺍﺫﺍ ﺗﮕﺪﺭ ﺗﺨﻠﻲ ﻧﻮﺭﺱ ﻳﺤﻮﻟﻲ ﻣﻠﻒ ﺍﻟﻘﻀﻴﺔ ﺍﺭﻳﺪ ﺍﺗﻄﻠﻊ ﻋﻠﻴﻪ ﻫﻴﺞ ﻣﻦ ﺑﺎﺏ ﺍﻟﻔﻀﻮﻝ ﻭﻟﻮ ﺍﻧﻲ ﻣﺘﺎﻛﺪ ﺍﺣﻨﺎ ﻣﺎﻋﻨﺪﻧﺎ ﻗﺮﺍﻳﺐ ﺑﺎﻟﻨﺎﺻﺮﻳﺔ ﻟﻜﻦ ﺍﻛﻮﻥ ﻣﺸﻜﻮﺭ ﻟﻚ
ﺍﺣﻤﺪ - ﺗﻤﺎﻡ ﺳﻴﺪﻱ ﺍﻧﺖ ﺗﺄﻣﺮ
ﻓﻲ ﺍﻟﻨﺎﺻﺮﻳﺔ
ﺳﻤﺎﺡ
ﮔﻮﻣﻦ ﺑﻨﺎﺕ ﻳﺎﻟﻠﻪ ﺑﺴﺮﻋﺔ ﻣﺎ ﺭﺍﺡ ﺗﻠﺤﮕﻮﻥ ﻋﻠﻰ ﺍﻟﻤﺪﺭﺳﺔ ﮔﻮﻣﻦ ﻳﺎﻟﻠﻪ
ﻓﺮﺡ - ﻳﺎﻟﻠﻪ ﺗﺮﺓ ﺍﻧﺔ ﺻﺒﻴﺖ ﺍﻟﺮﻳﻮﻙ ﻭﻫﺪﺭﺕ ﺍﻟﺠﺎﻱ ﻋﻠﻰ ﺍﻟﺼﻮﺑﺔ ﺭﺍﺡ ﺍﺑﺪﻝ ﻣﻼﺑﺴﻲ
ﺳﻤﺎﺡ - ﮔﻮﻣﻲ ﺳﺮﻭﺭﻻ ﺍﺟﻲ ﺍﺑﺪﻱ ﺍﻟﻤﺎﻱ ﻋﻠﻰ ﺭﺍﺳﺞ ﮔﻮﻣﻲ ﻋﻠﺔ
ﺳﻠﻮﻯ - ﻫﺎﻱ ﺍﻟﻘﻮﺍﻧﺔ ﺍﻟﻴﻮﻣﻴﺔ ﺍﻟﻤﺎﺗﺨﻠﺺ
ﻓﺮﺡ ﻋﻤﺮﻱ ١٧ﺳﻨﺔ
ﺍﻧﻲ ﺍﻻﺧﺖ ﺍﻟﺜﺎﻟﺜﺔ ﻋﻨﺪﻱ ﺍﺛﻨﻴﻦ ﺧﻮﺍﺕ ﺍﻛﺒﺮ ﻣﻨﻲ
ﺳﻤﺎﺡ ﺍﻟﻜﺒﻴﺮﺓ ﻭﻋﻤﺮﻫﺔ ٢٠ﺳﻨﺔ
ﻭﺳﻠﻮﻯ ﺍﻻﺻﻐﺮ ﻣﻨﻪ ﻭﻋﻤﺮﻫﺔ ١٨ﺳﻨﺔ
ﻭﺍﺧﺘﻲ ﺍﻟﺼﻐﻴﺮﺓ ﺑﺰﺭ ﺍﻟﮕﻌﺪﺓ ﺍﺳﻤﻬﺔ ﺳﺮﻭﺭ
ﻭﻋﻤﺮﻫﺔ ١٢ﺳﻨﺔ
ﺻﺎﺭﺕ ﺑﻌﺪ ﻣﻌﺎﻧﺎﺓ ﺍﻣﻲ ﺑﺎﻟﺤﻤﻞ ﺭﺍﺩﺕ ﺗﺴﻮﻱ ﻭﻟﺪ ﻟﻜﻦ ﺍﻟﻠﻪ ﻣﺎ ﻛﺘﺐ
ﺍﺣﻨﺎ ﺍﺭﺑﻊ ﺧﻮﺍﺕ
ﻋﺎﻳﺸﻴﻦ ﺑﻤﺸﺘﻤﻞ ﺑﺴﻴﻂ ﻣﻠﻚ
ﻭ ﻣﺎﻣﺎ ﻭﺑﺎﺑﺎ ﺻﺎﺭﻟﻬﻢ ﺳﻨﺔ ﻣﻦ ﺗﻮﻓﻮ ﺑﺤﺎﺩﺙ ﺳﻴﺎﺭﺓ
ﻛﺎﻧﻮ ﻣﺴﺎﻓﺮﻳﻦ ﺣﺴﺐ ﻣﺎ ﺑﺎﺑﺎ ﮔﺎﻝ
ﺍﻥ ﻫﻮ ﻳﺮﻳﺪ ﻳﺮﻭﺡ ﺣﺘﻰ ﻳﺴﺘﺴﻤﺢ ﻣﻦ ﺍﺑﻮﻩ ﻭﻳﻄﻴﺢ ﻋﻠﻴﻪ ﺑﻠﻜﻲ ﺍﻟﻠﻪ ﻭﻳﻘﺒﻞ ﺍﻋﺘﺬﺍﺭﻩ ﻭﻳﺒﻄﻞ ﺻﺪ ﻭﻳﺤﻦ ﮔﻠﺒﻪ ﻋﻠﻴﻪ
ﺍﻧﻲ ﻭﺧﻮﺍﺗﻲ ﺍﺑﺪ ﻣﺎ ﺷﺎﻳﻔﻴﻦ ﺑﻴﺖ ﺟﺪﻱ ﻭﻻﻧﻌﺮﻑ ﺍﻱ ﺷﺨﺺ ﻣﻨﻬﻢ ﻟﻜﻦ ﺍﺑﻮﻱ ﺍﻟﻠﻪ ﻳﺮﺣﻤﺔ ﻛﺎﻥ ﺑﻴﻦ ﻓﺘﺮﺓ ﻭﻓﺘﺮﺓ ﻳﮕﻌﺪ ﻳﺴﻮﻟﻒ ﺍﻟﻨﺎ ﻋﻦ ﺣﻴﺎﺗﻬﻢ ﻭﻭﺿﻌﻬﻢ ﻭﻣﺮﺍﺕ ﻳﺤﺠﻲ ﻣﻮﺍﻗﻒ ﻣﻀﺤﻜﺔ ﻣﻦ ﻛﺎﻥ ﺷﺎﺏ ﻭﺍﻣﻲ ﻫﻢ ﻛﺎﻧﺖ ﺗﺴﻮﻟﻒ ﺍﻟﻨﺎ ﻋﻦ ﺑﻴﺖ ﺟﺪﻱ ﻭﻋﻦ ﻋﻤﺎﻣﻲ
ﺍﻣﻲ ﺍﺻﻠﻬﺎ ﻓﻠﺴﻄﻴﻨﻴﺔ ﻭﻛﺎﻧﺖ ﺳﺎﻛﻨﺔ ﻭﻳﺔ ﺍﻣﻪ ﻋﻨﺪ ﺑﻴﺖ ﺟﺪﻱ ﻛﺎﻥ ﻋﻨﺪﻫﻢ ﺑﻴﺖ ﺧﺎﺹ ﻟﻠﻔﻼﺡ ﻭﻫﻤﺔ ﻫﻨﺎﻙ ﺳﻜﻨﻮ
ﻭﻛﺎﻧﺖ ﺗﺴﻮﻟﻒ ﻋﻦ ﻋﻤﺎﺗﻲ ﻭﻋﻤﺎﻣﻲ ﻭﺍﻭﻻﺩﻫﻢ ﻭﺑﻨﺎﺗﻬﻢ
ﺍﻟﻲ ﺍﻋﺮﻓﺔ ﺍﻥ ﺍﺣﻨﺎ ﻋﻨﺪﻧﺎ ﺛﻼﺙ ﻋﻤﺎﻡ ﻭﺑﺎﺑﺎ ﺍﻟﺮﺍﺑﻊ ﻭﻫﻮﺍﻟﺼﻐﻴﺮ
ﻋﻤﻲ ﺍﻟﻜﺒﻴﺮ ﺗﻮﻓﻴﻖ ﻭﺍﻟﺜﺎﻧﻲ ﻭﺟﻮﺍﺩ . ﻭﻧﺒﻴﻞ ﻭﺑﺎﺑﺎ ﺍﺳﻤﺔ ﻣﻨﺬﺭ
ﺑﺲ ﺍﻣﻲ ﻛﺎﻧﺖ ﺗﻜﺮﻩ ﻧﺒﻴﻞ ﺣﻴﻞ ﻳﻌﻨﻲ ﻣﻦ ﺗﺠﻴﺐ ﻃﺎﺭﻳﻪ
ﻳﻨﮕﻠﺐ ﻭﺟﻬﺔ ﻭﺍﺑﻮﻱ ﻳﻨﻘﻬﺮ
ﻫﻮ ﺍﻟﻮﺣﻴﺪ ﺍﻟﻲ ﻣﺎ ﻳﺠﻴﺒﻮﻥ ﺳﻴﺮﺗﺔ ﻋﺮﻓﺖ ﻋﻤﺎﻣﻲ ﺍﻟﺒﻘﻴﺔ ﻛﺎﻧﻮ ﻳﺤﺒﻮﻥ ﺍﺧﻮﻫﻢ ﺍﻟﺼﻐﻴﺮ ﺍﻟﻲ ﻫﻮ ﺍﺑﻮﻱ ﻟﻜﻦ
ﺍﻟﻀﺮﻭﻑ ﺍﻟﻐﺎﻣﻀﺔ ﺍﻟﻲ ﺍﺑﻮﻱ ﻭﺍﻣﻲ ﻣﺎﺣﺠﻮﻟﻨﺎ ﻋﻨﻬﺎ
ﻛﺎﻥ ﺿﺮﻑ ﺟﺪﺍ ﻗﻮﻱ ﻟﺪﺭﺟﺔ ﻳﺨﻠﻲ ﺟﺪﻱ ﻳﻄﺮﺩ ﺍﺑﻮﻱ
ﻣﻦ ﺑﻴﺘﺔ
ﺑﺲ ﻛﻨﺖ ﻣﺮﺓ ﺍﺗﺬﻛﺮ ﻭﺍﻧﻲ ﺻﻐﻴﺮﺓ ﻣﻦ ﺍﺧﺬﻧﺎ ﺑﺎﺑﺎ
ﻛﺎﻥ ﻋﻤﺮﻱ ٧ﺳﻨﻮﺍﺕ ﺍﺧﺬﻧﺎ ﺍﻧﺔ ﻭﺍﺧﻮﺍﺗﻲ ﻟﺒﻐﺪﺍﺩ ﺑﺎﻟﻌﻴﺪ
ﻟﺒﻴﺖ ﺟﺪﻭ ﺍﺗﺬﻛﺮ ﺳﺎﻓﺮﻧﺎ ﻭﺻﻠﻨﺎ ﻟﻤﻜﺎﻥ ﻛﻠﺶ ﺣﻠﻮ ﻭﻭﻛﻔﻨﺎ ﻣﻘﺎﺑﻴﻞ ﺑﻮﺍﺑﺔ ﺟﺒﻴﺮﺓ ﻃﻠﻌﻨﺎ ﺭﺟﺎﻝ ﺟﺒﻴﺮ ﻻﺑﺲ ﺩﺷﺪﺍﺷﺔ ﻭﺟﻔﻴﺔ ﻻﻓﻪ ﻋﻠﻰ ﺭﺍﺳﺔ
ﺍﺑﻮﺳﻤﺎﺡ - ﺷﻠﻮﻧﻚ ﻋﻤﻲ ﺻﺎﺣﺐ ﺷﺨﺒﺎﺭﻙ
ﺻﺎﺣﺐ - ﻫﻠﺔ ﻫﻠﺔ ﺑﻮﻳﺔ ﻣﻨﺬﺭ ﺷﺨﺒﺎﺭﻙ
ﺍﺑﻮ ﺳﻤﺎﺡ
ﻳﺮﻳﺪ ﻳﻜﻤﻞ ﻛﻼﻣﺔ ﻟﻜﻦ ﻗﺎﻃﻌﺔ ﺻﻮﺕ ﻣﻦ ﺍﻟﺨﻠﻒ ﻛﺎﻥ ﻻﺧﻮﻩ ﻧﺒﻴﻞ
ﻧﺒﻴﻞ ﺑﺨﺒﺚ ﻭﻫﻮ ﻳﻌﺮﺝ - ﻫَـﺎ ﻭﻟﻚ ﻋﺎﺭ ﺷﻌﻨﺪﻙ ﻟﻔﻴﺖ ﺍﻟﻨﺎ ﺍ
ﺗﺮﺓ ﺍﺑﻮﻱ ﻣﺎ ﻳﺮﻳﺪ ﻳﺸﻮﻑ ﺟﻬﺮﺗﻚ ﻭﻣﺤﺮﻡ ﻋﻠﻴﻚ ﻋﺘﺒﺔ ﺍﻟﺒﻴﺖ
ﻭﺍﻧﻄﻰ ﻗﺮﺍﺭ ﻣﺤﺪ ﻳﻠﻔﻴﻚ ﻭﻳﺴﺘﻘﺒﻠﻚ ﺑﺎﻟﻌﺸﻴﺮﺓ ﻛﻠﻬﺔ
ﻓﺎﺣﺴﻦ ﺍﻟﻚ ﻻﺗﺮﺟﻊ ﺑﻌﺪ ﻫﻨﺎ ﻣﺮﺓ ﺛﺎﻧﻴﺔ
↙️
ﻣﻨﺬﺭ - ﺍﻧﺔ ﺍﺭﻳﺪ ﺍﺷﻮﻑ ﺍﺑﻮﻱ ﻻﺗﺨﻠﻴﻨﻲ ﺍﺗﻌﺪﺍﻙ ﻭﺍﺩﺧﻞ
ﻧﺒﻴﻞ - ﺗﺮﺓ ﺍﻟﻮﺍﻟﺪ ﺑﺎﻟﻤﺴﺘﺸﻔﻰ ﻭﺣﺎﻟﺘﺔ ﻣﻮ ﺯﻳﻨﺔ ﻓﻼ ﺗﺨﻠﻲ ﺗﺘﺄﺯﻡ ﺣﺎﻟﺘﺔ ﻣﻦ ﻭﺭﺍﻙ ﻣﻮ ﺯﻳﻦ ﻋﻠﻰ ﮔﻠﺒﻪ
ﻭﺩﺧﻞ ﻧﺒﻴﻞ ﻭﺗﺮﻛﻨﺎ ﺍﺣﻨﺎ ﻭﺑﺎﺑﺎ ﻣﻨﺘﻈﺮﻳﻦ ﺑﺎﻟﺒﺎﺏ
ﺑﺲ ﻛﺎﻥ ﺻﻮﺕ ﺍﻟﺮﺟﻞ ﺍﻟﻜﺒﻴﺮ ﺻﺎﺣﺐ ﻳﺮﺩﺩ - ﺣﺴﺒﻲ ﺍﻟﻠﻪ ﻭﻧﻌﻢ ﺍﻟﻮﻛﻴﻞ
ﻓﺮﺡ ﻭﻫﻲ ﺗﺄﺷﺮ ﻋﻠﻰ ﺻﺎﺣﺐ - ﺑﺎﺑﺎ ﻫﺬﺍ ﻣﻨﻮ ﺍﻟﺤﺠﻲ ﻫﻮ ﻫﺬﺍ ﺟﺪﻭ ؟
ﻣﻨﺬﺭ - ﺣﺒﻴﺒﺘﻲ ﻻ ﻫﺬﺍ ﻣﻮ ﺟﺪﻭ ﻫﺬﺍ ﺍﻟﺒﻮﺍﺏ
ﻳﺎﻟﻠﻪ ﺑﺎﺑﺎ ﺍﻣﺸﻮﻧﺎ
ﻟﻦ ﺍﻧﺴﻰ ﻧﻈﺮﺍﺕ ﺍﺑﻲ ﻋﻨﺪﻣﺎ ﺗﺮﻙ ﺑﻴﺖ ﺍﻫﻠﻪ ﻭﻣﺸﻰ ﻟﻜﻦ ﻓﻲ ﻧﻬﺎﻳﺔ ﺍﻟﻄﺮﻳﻖ ﺍﻟﺘﻔﺖ ﻭﻧﻈﺮ ﺍﻟﻰ ﺑﻴﺘﻬﻢ ﻭﻧﺰﻟﺖ ﺩﻣﻮﻋﻪ ﺍﻟﻄﻴﺒﺔ
ﺍﺧﺬ ﺍﻟﺤﺴﺮﺓ ﺑﺤﺰﻥ
ﻣﻨﺬﺭ - ﻭﺍﻟﻠﻪ ﻣﺸﺘﺎﻕ ﻟﻚ ﻳﺎ ﻳﺎﺑﺔ ﻣﺸﺘﺎﻕ ﻟﺤﻀﻦ ﺍﻣﻲ
ﻭﺭﻳﺤﺔ ﺍﻫﻠﻨﺎ
ﻓﺮﺡ ﺑﻘﻬﺮ ﺗﻌﻮﺩ ﺍﻟﻰ ﺍﻟﻮﻗﺖ ﺍﻟﺤﺎﻟﻲ
ﺍﺫﺍ ﺍﻛﻮ ﺷﻲ ﺑﺤﻴﺎﺗﻲ ﺍﻛﺮﻩ ﻓﻬﻮ ﺟﺪﻱ ﻭﺟﺪﺗﻲ ﻭﻋﻤﺎﻣﻲ
ﻻﻥ ﺳﻤﻌﻮﺍ ﺑﺎﺑﻮﻱ ﺍﺗﻮﻓﻰ ﻫﻮ ﻭﺍﻣﻲ ﻭﻻ ﻭﺍﺣﺪ ﺑﻴﻬﻢ ﻛﻠﻒ ﻧﻔﺴﺔ ﻳﺠﻲ ﻳﻄﻴﺐ ﺧﺎﻃﺮﻧﺎ
ﻋﺴﺎﻫﻢ ﻻ ﺍﺟﻮ ﻭﻻ ﻧﺸﻮﻑ ﺭﮔﻌﺔ ﻭﺟﻬﻢ ﻫﻤﺔ ﻫﺬﻭﻟﻲ ﻫﻢ ﺍﻫﻞ ﻣﺤﺴﻮﺑﻴﻦ ﻋﻠﻴﻨﺎ ﺍﻭﻑ
ﻓﺮﺡ ﺗﻜﻤﻞ ﻃﺮﻳﻘﻬﺎ ﻭﺗﺤﻂ ﺟﻨﻄﺘﻬﺔ ﻋﻠﻰ ﻛﺘﻔﻬﺎ ﻭﺗﻄﻠﻊ ﻟﻠﻤﺪﺭﺳﺔ ﻣﻊ ﺳﺮﻭﺭ
ﻭﻫﻨﺔ ﻳﻤﺸﻦ ﻓﻲ ﻃﺮﻳﻖ ﺍﻟﻤﺪﺭﺳﺔ ﺻﺤﻴﺢ ﺍﻟﻄﺮﻳﻖ
ﻃﻮﻳﻞ ﺑﺲ ﺍﺗﻌﻮﺩﻧﺎ
ﺍﺣﻨﺎ ﻣﻦ ﺑﻌﺪ ﻭﻓﺎﺓ ﺑﺎﺑﺎ
ﻋﺸﻨﺎ ﻋﻠﻰ ﺭﺍﺗﺐ ﺍﻟﺘﻘﺎﻋﺪ ﻭﺍﺧﺘﻲ ﺳﻤﺎﺡ ﻛﺎﻧﺖ ﺛﺎﻧﻲ ﻣﺮﺣﻠﺔ ﻛﻠﻴﺔ ﺗﺮﺑﻴﺔ ﻟﻜﻦ ﻣﻦ ﻭﻓﺎﺓ ﺑﺎﺑﺎ ﺑﻄﻠﺖ ﻭﮔﻌﺪﺕ ﺑﺎﻟﺒﻴﺖ ﺗﺪﺍﺭﻳﻨﺎ
ﻭﻟﺤﻜﺘﻬﺔ ﺳﻠﻮﻯ ﺑﻄﻠﺖ
ﺳﻠﻮﻯ - ﻣﺎ ﺍﺩﺑﺮﻫﺔ ﻫﺎﻱ ﺍﻟﺴﻨﺔ ﺳﺎﺩﺱ ﻭﻭﻓﺎﺓ ﺍﻣﻲ ﻭﺍﺑﻮﻳﺔ ﻣﺎ ﺧﻼﻧﻲ ﺍﺭﻛﺰ ﻓﺨﻠﻲ ﻫﺎﻱ ﺍﻟﺴﻨﺔ ﺍﺗﻮﻗﻒ ﻭﺍﺭﺟﻊ ﺍﻟﺴﻨﺔ ﺍﻟﺠﺎﻳﺔ ﺍﺫﺍ ﺭﺍﺩ ﺍﻟﻠﻪ ﻭﻋﻴﺸﻨﺎ
ﻭﺍﻧﺘﺒﻬﺖ ﻋﻠﻰ ﺳﻠﻮﻯ ﺫﺑﺖ ﺭﻭﺣﻬﺔ ﻋﻠﻰ ﺍﻟﺨﻴﺎﻃﺔ ﻻﻥ ﻫﻲ ﺗﻔﻨﻦ ﺑﺎﻟﺨﻴﺎﻁ ﻣﻮ ﺑﺲ ﺩﺷﺎﺩﻳﺶ ﻻ ﺣﺘﻰ ﻋﻨﺪﻫﺎ ﺍﻣﻜﺎﻧﻴﺔ ﺍﻥ ﺗﺨﻴﻂ ﻓﺴﺎﺗﻴﻦ ﺣﻔﻼﺕ ﺍﺫﺍ ﻭﺍﺣﺪ ﻭﻓﺮﻟﻬﺎ ﺍﻟﻐﺮﺍﺽ ﻭﺍﻟﻘﻤﺎﺵ ﺍﻟﻐﺎﻟﻲ
ﺻﺮﻧﺎ ﺑﺲ ﺍﻧﻲ ﻭﺳﺮﻭﺭ ﺍﻟﺼﻐﻴﺮﺓ ﺑﺎﻟﻤﺪﺭﺳﺔ
ﺷﺨﺼﻴﺔ ﺳﻠﻮﻯ ﻃﻴﺒﺔ ﺑﺲ ﺷﺨﺼﻴﺘﻪ ﺿﻌﻴﻔﺔ ﻳﻌﻨﻲ ﺑﺴﺮﻋﺔ ﺗﺴﺘﺴﻠﻢ ﻭﺗﺮﻓﻊ ﺍﻟﺮﺍﻳﺔ ﺍﻟﺒﻴﻀﺔ
ﻋﻜﺴﻲ ﺍﻧﻲ
ﺷﺨﺼﻴﺘﻲ ﻏﻴﺮ ﺗﺨﺘﻠﻒ ﻋﻨﻬﺎ ﻋﻨﻴﺪﺓ ﻭﺭﺍﺳﻲ ﻳﺎﺑﺲ ﻭﺣﻘﻲ ﺍﺑﺪ ﻣﺎ ﻳﻀﻴﻊ ﺍﺗﺬﻛﺮ ﻣﺎﻣﺎ ﻣﻦ ﺗﻜﻮﻝ ﺍﻧﺘﻲ ﺑﺎﻟﻐﻠﻂ ﺻﺮﺗﻲ ﺑﻨﻴﺔ ﺍﻟﻤﻔﺮﺽ ﺍﻧﺘﻲ ﻭﻟﺪ
ﺍﻣﺎ ﺍﺧﺘﻲ ﺍﻟﺤﺒﻴﺒﺔ ﺳﻤﺎﺡ ﺣﻨﻮﻧﺔ ﻭﻃﻴﺒﺔ ﻭﺑﺨﻮﻓﻬﺎ ﻋﻴﻠﻨﺎ ﻭﺣﺮﺻﻬﺎ ﺍﺣﺲ ﺑﻴﻬﺎ ﻣﺜﻞ ﺍﻣﻨﺎ
ﻭﺳﺮﻭﺭ ﺣﺒﻴﺘﻲ ﺑﻌﺪﻫﺎ ﺻﻐﻴﺮﺓ ﻭﻧﺤﺎﻭﻝ ﺍﺣﻨﺎ ﺍﻟﺜﻼﺛﺔ ﺍﻥ ﻣﺎﻧﺤﺴﺴﻬﺎ ﺑﺎﻟﻴﺘﻢ ﺧﻄﻴﺔ ﺑﻌﺪﻫﺎ ﻣﺎﺷﺒﻌﺖ ﻣﻦ ﺣﻨﺎﻥ ﺍﻣﻲ ﻭﺍﺑﻮﻱ
ﻓﻲ ﺑﺪﺍﻳﺔ ﻭﻓﺎﺓ ﺑﺎﺑﺎ
ﻛﺎﻧﺖ ﺍﻟﺤﻴﺎﺓ ﺑﻌﺪ ﻓﺮﺍﻗﻬﻢ ﻛﻠﺶ ﺻﻌﺒﺔ ﻋﻠﻴﻨﺎ ﻧﻌﻴﺶ ﺳﻮﻳﺎ ﻟﻮﺣﺪﻧﺎ ﻭﻛﺎﻥ ﺍﻟﺨﻮﻑ ﻣﺎﺧﺬ ﻣﻨﺎ ﻣﺄﺧﺬ ﻟﻜﻦ ﺍﻟﻠﻪ ﻳﺮﺿﻰ ﻋﻠﻴﻪ ﺍﺑﻮ ﻧﻮﺍﻝ ﺟﺎﺭﻧﺎ ﺗﺼﻴﺮ ﻋﻨﺪﺓ ﺩﻛﺎﻥ ﻣﻄﻠﻌﺔ ﻣﻦ ﺍﻟﺒﻴﺖ ﻣﻘﺎﺑﻴﻞ ﺑﻴﺘﻨﺎ
ﻭﻫﻮ ﻣﺮﺗﺔ ﻛﺒﺎﺭ ﺑﺎﻟﻌﻤﺮ ﻭﺍﻭﻻﺩﻫﻢ ﺍﻟﺜﻼﺛﺔ ﻣﻬﺎﺟﺮﻳﻦ ﻭﺑﻨﺘﻬﻢ ﻣﺘﺰﻭﺟﺔ ﺑﻐﻴﺮ ﻣﺤﺎﻓﻈﺔ
ﻓﻬﻮ ﻋﻴﻨﺔ ﻋﻴﻠﻨﺎ ﻭﺍﺣﻨﺎ ﻋﻴﻨﺎ ﻋﻠﻴﻬﻢ ﻳﻌﻨﻲ ﻛﻞ ﻳﻮﻡ ﻭﺣﺪﺓ ﺗﺮﻭﺡ ﺗﺴﺎﻋﺪ ﺧﺎﻟﺔ ﺍﻡ ﻧﻮﺍﻝ
ﺍﻧﻲ ﺍﻛﺜﺮ ﻭﺣﺪﺓ ﺍﺭﻭﺡ ﺍﻟﻬﻢ ﺍﻣﻮﺕ ﻋﻠﻰ ﻛﻼﻣﻬﻢ ﻭﻗﺼﺼﻬﻢ ﺟﻨﺖ ﻣﺎ ﺍﻣﻞ ﻣﻦ ﻛﻌﺪﺗﻬﻢ ﺍﺑﻘﻰ ﻫﻨﺎﻙ ﺍﺩﺭﺱ ﻭﺍﻧﻄﺮﻫﺔ ﺧﺎﻑ ﺗﺤﺘﺎﺝ ﺷﻲ ﻭﺍﻟﻠﻪ ﻣﺮﺍﺕ ﺍﺣﺲ ﺣﺎﻟﻬﻢ ﺍﺳﻮﺀ ﻣﻦ ﺣﺎﻟﻨﺎ
ﺍﺫﺍ ﻛﻨﺎ ﺍﺣﻨﺎ ﻣﺴﺘﺼﻌﺒﻴﻦ ﺣﺎﻟﻨﺎ ﺑﻨﺎﺕ ﻟﻮﺣﺪﻧﺎ ﻟﻌﺪ ﻫﻤﺔ ﺧﻄﻴﺔ ﻛﺒﺎﺭ ﺑﺎﻟﺴﻦ ﻟﻮﺣﺪﻫﻢ ﺷﻴﻜﻮﻟﻮﻥ ﻋﻠﻰ ﺣﺎﻟﻬﻢ
ﻋﻠﻰ ﺍﻻﻗﻞ ﺍﺣﻨﺎ ﻧﻜﺪﺭ ﻧﺨﺪﻡ ﻧﻔﺴﻨﺎ ﻭﻧﻌﻴﺶ ﺑﺲ ﺭﺏ ﺍﻟﻌﺒﺎﺩ ﻣﺎ ﻳﺘﺮﻙ ﻋﺒﺎﺩﻩ ﺳﺨﺮﻫﻢ ﺍﻟﻨﺎ ﻭﺳﺨﺮﻧﺎ ﺍﻟﻬﻢ ﻻﻥ ﺍﺣﻨﺎ ﻣﺤﺘﺎﺟﻴﻦ ﺑﻌﺾ
ﺳﻤﺎﺡ ﺍﺧﺘﻲ ﺣﺼﻠﺖ ﺷﻐﻠﺔ ﻋﻦ ﻃﺮﻳﻖ ﺻﺪﻳﻘﺘﻪ ﻛﺎﻥ ﺍﺑﻮﻫﺎ ﻋﻨﺪ ﻣﻌﻤﻞ ﺧﻴﺎﻃﺔ ﻳﺸﻐﻞ ﺑﻲ ﺍﻻﺭﺍﻣﻞ ﻭﺍﻟﻤﻄﻠﻘﺎﺕ ﻭﺍﻟﺒﻨﺎﺕ
ﻭﺍﻟﻠﻪ ﺑﺪﺕ ﺻﺎﺭﻟﻬﺎ ﺛﻼﺙ ﺍﺷﻬﺮ ﻓﺮﺣﺎﻧﺔ ﺑﺎﻟﺸﻐﻞ
ﺍﺑﻮ ﻧﻮﺍﻝ - ﺗﻌﺎﻱ ﻓﺮﺡ ﺑﻮﻳﺔ ﺍﺧﺬﻱ ﻫﺎﻱ ﺍﻟﺮﻭﺑﺔ ﻟﻠﺒﻨﺎﺕ ﻫﺎﻱ ﺧﺎﻟﺘﺞ ﻣﺴﻮﻳﺘﺔ ﻛﺎﻟﺖ ﺍﺧﺬ ﻭﻳﺎﻙ ﻟﻠﺒﻨﺎﺕ ﻧﺺ ﺣﺘﻰ ﻳﺘﻐﺪﻭﻥ ﺑﻴﻪ
ﻓﺮﺡ - ﺍﺷﻜﺮﻙ ﻋﻤﻮ ﺭﺣﻤﺔ ﺍﻟﻠﻪ ﻭﺍﻟﺪﻳﻚ
ﻫﻜﺬﺍ ﻛﺎﻧﺖ ﺣﻴﺎﺗﻨﺎ ﻣﻊ ﺍﻟﻌﻢ ﺍﺑﻮ ﻧﻮﺍﻝ ﻭﺍﻟﺨﺎﻟﺔ ﺍﻡ ﻧﻮﺍﻝ
ﻣﺜﻞ ﺍﻻﻫﻞ
ﻛﻨﺖ ﺍﺭﻯ ﺳﻤﺎﺡ ﺗﺠﻠﺲ ﻫﻲ ﻭﺳﻠﻮﻯ ﻭﺍﺷﻮﻓﻪ ﻻﺯﻣﺎﺕ ﻭﺭﻗﺔ ﻭﻳﺴﺠﻠﻦ ﻓﻴﻬﺎ ﺍﻟﻤﺼﺎﺭﻳﻒ ﺍﻟﻤﻨﺰﻟﻴﺔ ﻣﺴﻮﻳﺎﺕ ﻗﺎﺋﻤﺔ
ﺳﻤﺎﺡ - ﻻﺯﻡ ﻧﻘﻠﻞ ﺍﻟﻤﺼﺮﻑ ﺷﻮﻳﺔ
ﺑﻨﺎﺕ ﺷﻨﻮ ﺭﺍﻳﻜﻢ ﻧﻠﻐﻲ ﺍﻻﻣﺒﻴﺮﻳﺔ ﺍﻟﺴﺤﺐ ﺍﻟﺸﻬﺮﻳﺔ ﻻﻥ ﺷﻮﻓﺖ ﻋﻴﻨﻜﻢ ﺗﻘﺎﻋﺪ ﺑﺎﺑﺎ ﺻﺎﺭ ﻛﻞ ﺷﻬﺮﻳﻦ ﻧﺴﺘﻠﻢ
ﺳﻠﻮﻯ - ﺍﻱ ﻭﺍﻟﻠﻪ ﻫﻤﺔ ﺍﻟﻌﺎﻳﺸﻴﻦ ﻣﺎ ﺟﺎﻱ ﻳﺴﺘﻠﻤﻮﻥ ﺭﻭﺍﺗﺒﻬﻢ ﻣﻮ ﺍﻟﻨﻮﺏ ﺍﻟﻤﻮﺗﺔ
ﻓﺮﺡ - ﻫﺴﺔ ﺍﺣﻨﺎ ﺷﺼﺎﺭﻓﻴﻦ ﻗﺎﺑﻞ
ﻫﺴﺔ ﺑﻘﺖ ﻋﻠﻰ ﺍﻻﻣﺒﻴﺮﻳﺔ ﻋﻤﻲ ﺧﻞ ﻧﻠﻐﻴﻬﺎ ﻭﻋﻮﺩﻙ ﻣﻦ ﺍﺭﻳﺪ ﺍﺩﺭﺱ ﻟﻮ ﺍﺷﻮﻑ ﺍﻟﻤﺴﻠﺴﻞ ﺍﻟﺘﺮﻛﻲ ﻣﺎﻟﺘﻲ ﺍﺭﻭﺡ ﻋﻨﺪ ﺑﻴﺖ ﻋﻤﻮ ﺍﺑﻮ ﻧﻮﺍﻝ
ﻓﺮﺡ ﺍﺗﻌﻠﻤﺖ ﺍﻥ ﻣﺎ ﺍﺿﻐﻂ ﻋﻠﻰ ﺧﻮﺍﺗﻲ ﺑﺎﻟﻤﺼﺮﻑ ﺍﻻ ﻟﻠﺸﻲ ﺍﻟﻀﺮﻭﺭﻱ ﻟﻜﻦ ﺍﻟﻤﺸﻜﻠﺔ ﺍﺣﻨﺎ ﺑﻨﺎﺕ ﻳﻌﻨﻲ ﻛﻠﺶ ﻛﻠﺶ ﻣﺎ ﻧﺼﺮﻑ ﺑﺲ ﺍﻟﻀﺮﻭﺭﻳﺎﺕ ﻣﻦ ﻣﻤﻼﺑﺲ ﺩﺍﺧﻠﻴﺔ ﻋﻠﻰ ﻛﻞ ﻭﺣﺪﺓ ﻗﻄﻌﺔ ﺑﻴﻨﺎ ﻫﻢ ﺭﺍﺡ ﻳﺼﻴﺮ ﺫﺍﻙ ﺍﻟﻤﺒﻠﻎ ﺍﻟﻲ ﻳﻬﺪ ﺍﻟﺤﻴﻞ
ﺑﺲ ﺭﻏﻢ ﻫﺬﺍ ﺣﺎﻟﻨﺎ ﺍﺣﺴﻦ ﻣﻦ ﻫﻮﺍﻱ ﻧﺎﺱ
ﺍﺣﻤﺪ ﺍﻟﻠﻪ ﻭﺍﺷﻜﺮﺓ ﻋﻠﻰ ﺍﻟﻨﻌﻤﺔ ﺍﻟﻔﻀﻴﻠﺔ
ﻣﺮﺕ ﺍﻻﻳﺎﻡ ﻭﺳﻮﺩﺓ ﻋﻠﻴﺔ ﺍﺧﺘﻲ ﺳﻤﺎﺡ ﺍﺗﻌﻮﺩﺕ ﺗﺮﺟﻊ ﻣﺸﻲ ﻻﻥ ﺍﻟﻤﺸﻐﻞ ﻣﺎﻳﺒﻌﺪ ﻋﻦ ﺑﻴﺘﻨﺎ ﻣﺴﺎﻓﺔ ﻫﻮﺍﻱ
ﻟﻜﻦ ﻛﺎﻧﺖ ﺗﺮﻭﺡ ﻟﻠﻤﺸﻐﻞ ﻣﻊ ﺍﻡ ﻣﺜﻨﻰ ﺟﺎﺭﺗﻨﺎ ﺑﻤﻨﻄﻘﺘﻨﺎ
ﻛﺎﻧﺖ ﺍﻣﺮﺍﺓ ﺍﺭﻣﻠﺔ ﺯﻭﺟﻪ ﺷﻬﻴﺪ ﻭﻋﻨﺪﻫﺎ ﺛﻼﺙ ﺍﻭﻻﺩ ﺩﺭﺓ ﻣﺎﻟﺖ ﺍﻟﻠﻪ ﺍﻛﺒﺮ ﻭﺍﺣﺪ ﺑﻴﻬﻢ ﺑﺼﻒ ﺍﻟﺴﺎﺩﺱ ﻋﻠﻤﻲ
ﻟﻜﻦ ﺫﺍﻙ ﺍﻟﻴﻮﻡ ﻏﺎﺑﺖ ﺍﻡ ﻣﺜﻨﻰ ﻋﻦ ﺍﻟﻌﻤﻞ ﻣﻤﺎ ﺍﺿﻄﺮﺕ ﺳﻤﺎﺡ ﺍﻥ ﺗﺮﻭﺡ ﻟﻠﻤﺸﻐﻞ ﻟﻮﺣﺪﻫﺎ
ﺍﺧﺘﻲ ﺳﻤﺎﺡ ﻛﺎﻧﺖ ﺟﻤﻴﻠﺔ ﻭﺭﻳﺎﻧﺔ ﻭﻛﺎﻧﺖ ﺍﻟﻌﻴﻦ ﻋﻠﻴﻪ
ﺑﺲ ﻫﻲ ﺟﺪﺍ ﻣﺤﺘﺸﻤﺔ ﻭﺭﺯﻧﺔ ﺍﺑﺪ ﻣﺎ ﻳﻮﻡ ﺷﻔﺘﻪ ﺗﺘﻤﻀﺤﻚ ﺑﺎﻟﺸﺎﺭﻉ ﺍﻭ ﺗﺘﻜﻠﻢ ﺑﻤﻴﺎﻋﺔ ﺍﺑﺪ ﻫﻮ ﺍﺣﻨﺎ ﻛﻠﻨﺎ ﻋﻠﻰ ﮔﻮﻟﺖ ﺑﺎﺑﺎ ﺍﻧﺘﻮ ﺯﻟﻢ ﺧﺸﻨﺔ ﻣﺎ ﻳﻨﺨﺎﻑ ﻋﻠﻴﻜﻢ
ﻟﻜﻦ ﺍﺧﺘﻲ ﺳﻤﺎﺡ ﺑﻬﺬﺍ ﺍﻟﻴﻮﻡ ﺍﻟﻲ ﺭﺍﺣﺖ ﺑﻲ ﻟﻮﺣﺪﻫﺎ
ﻣﺎﻛﻮ ﻣﺎ ﺭﺟﻌﺖ ﺍﺗﺄﺧﺮﺗﻌﻠﻴﻨﺎ
ﻭﻇﻞ ﺑﺎﻟﻨﺎ ﻋﻨﺪﻫﺎ ﺷﻠﻮﻥ ﺭﺑﻲ ﺻﺎﺭ ﺍﻟﻮﻗﺖ ﻣﻐﺮﺏ ﻭﺍﺧﺘﻨﺎ ﻣﺎﻛﻮ ﻣﺎﻧﻌﺮﻑ ﻣﻨﻮ ﻧﺴﺄﻝ ﻋﻠﻴﻬﺎ
ﺍﻧﻲ ﺭﺣﺘﺖ ﻟﺒﺴﺖ ﻋﺒﺎﺗﻲ ﻭﺍﺧﺬﺕ ﻭﻳﺎﻱ ﺧﺎﻟﺔ ﺍﻡ ﻧﻮﺍﻝ ﺣﺘﻰ ﺍﺷﻮﻑ ﻟﻴﺶ ﺍﺗﺄﺧﺮﺕ ﻭﺭﺣﻨﺎ ﻋﻠﻰ ﻣﻜﺎﻥ ﺍﻟﻌﻤﻞ ﺑﺎﻟﻤﺸﻐﻞ ﻭﺳﺄﻟﻨﺎ ﺍﻟﺒﻮﺍﺏ
ﮔﺎﻝ ﺑﻮﻳﺔ ﺑﺘﻜﻢ ﺳﻤﺎﺡ ﺍﻟﻴﻮﻡ ﻣﺎ ﺍﺟﺖ ﻟﻠﺸﻐﻞ
ﻓﺮﺡ ﻭﻫﻲ ﺗﻠﻄﻢ ﺻﺪﺭﻫﺔ ﻋﺰﺓ ﺑﻌﻴﻨﻲ
ﻳﻤﺔ ﻟﻴﺶ ﻣﺎﺩﺍﻭﻣﺖ ﺍﺧﺘﻲ ﻃﻠﻌﺖ ﻣﻦ ﺍﻟﺼﺒﺢ
ﻭﺭﺣﺤﺖ ﮔﺒﻞ ﻋﻠﻰ ﺑﻴﺖ ﺍﻡ ﻣﺜﻨﻰ
ﺍﻡ ﻣﺜﻨﻲ - ﺧﺎﻟﺔ ﺍﻟﻴﻮﻡ ﻣﺎ ﺩﺍﻭﻣﺖ ﻭﻣﻦ ﺍﺟﺖ ﻋﻠﻴﺔ ﺍﺧﺘﺞ ﺷﺎﻓﺘﻨﻲ ﻣﺎﻟﻲ ﺧﻠﻚ ﻣﺮﻳﻀﺔ ﻭﻫﻲ ﺭﺍﺣﺖ ﻛﻤﻠﺖ ﻃﺮﻳﻘﻪ ﻟﻠﻤﺸﻐﻞ
ﻓﺮﺡ
ﺑﺲ ﺍﻧﻲ ﺑﺴﺎﻋﺘﻬﺎ ﺍﻟﺪﻡ ﺟﻤﺪ ﺑﻌﺮﻭﮔﻲ ﻣﻦ ﺍﻟﺨﻮﻑ ﻋﻠﻰ ﺍﺧﺘﻲ ﻳﻌﻨﻲ ﺷﻠﻮﻥ ﺍﺧﺘﻲ ﻭﻳﻦ ﺭﺍﺣﺖ ﺩﺧﻴﻠﻚ ﻳﺎﺭﺏ ﺍﺳﺘﺮ ﻋﻠﻴﻨﺎ ﻭﺍﻟﻠﻪ ﺍﺧﺘﻲ ﻓﻘﻴﺮﺓ ﻭﻣﺎﻟﻬﺎ ﺍﺣﺪ ﺭﺑﻲ ﺍﺩﻓﻊ ﻋﻨﺎ ﺍﻟﺴﻮﺀ
ﻭﺍﻟﻠﻪ ﻭﻣﺮﺕ ﺍﻟﺴﺎﻋﺎﺕ ﻭﺍﺧﺬﻧﺎ ﻋﻤﻮ ﺍﺑﻮ ﻧﻮﺍﻝ ﻟﻤﺮﻛﺰ ﺍﻟﺸﺮﻃﺔ
ﺣﺘﻰ ﻧﻘﺪﻡ ﺑﻼﻍ ﺍﺧﺘﻔﺎﺀ ﺍﺧﺘﻲ
ﻟﻜﻦ
ﻣﻴﺼﻴﺮ ﻧﻘﺪﻡ ﺑﻼﻍ ﺑﺎﺧﺘﻔﺎﺀ ﺷﺨﺺ ﺍﻻ ﺗﻤﺮ ﻋﻠﻴﻪ ٢٤ﺳﺎﻋﺔ ﻋﻠﻰ ﺍﺧﺘﻔﺎﺀﻩ
↙️
ﺭﺣﻨﺎ ﺍﻧﻲ ﻭﻋﻤﻮ ﺍﺑﻮ ﻧﻮﺍﻝ ﻟﻤﺮﻛﺰ ﺍﻟﺸﺮﻃﺔ ﺣﺘﻰ ﻧﺒﻠﻎ ﻋﻦ ﻓﻘﺪﺍﻥ ﺍﺧﺘﻲ ﺳﻤﺎﺡ
ﻭﺭﺍﺟﻌﻨﺎ ﺑﻌﺪﻫﺎ ﻟﻠﺒﻴﺖ ﻭﻣﺎﻋﺪﻧﺎ ﺍﻱ ﺧﺒﺮ ﻋﻦ ﺍﺧﺘﻨﺎ ﺣﺘﻰ ﻳﺠﺒﺮ ﺑﺨﺎﻃﺮﻧﺎ
ﺩﺧﻠﺖ ﻟﻠﺒﻴﺖ ﻭﺍﻧﻲ ﺍﺣﺲ ﺑﺎﻟﻀﻴﺎﻉ ﺍﺧﺘﻲ ﻭﻳﻦ ﺍﺧﺘﻔﺖ ﻳﺎﺭﺏ ﺳﺘﺮﻙ ﻣﺎ ﻋﺪﻧﺎ ﻏﻴﺮﻫﺎ ﻫﻲ ﺟﺒﻴﺮﺕ ﺍﻟﺒﻴﺖ ﻭﺳﻨﺪﻧﺎ
ﻭﺭﺓ ﻋﺪﺓ ﺳﺎﻋﺎﺕ ﺍﻧﺪﻙ ﺍﻟﺒﺎﺏ ﻭﻃﻠﻌﺖ ﺷﻔﺖ ﻋﻤﻮ ﺍﺑﻮ ﻧﻮﺍﻝ
ﻓﺮﺡ - ﻫَـﺎ ﻋﻤﻮ ﺑﺸﺮ ﻣﺎﺳﻤﻌﺖ ﺷﻲ ﻋﻦ ﺳﻤﺎﺡ
ﺍﺑﻮ ﻧﻮﺍﻝ ﻭﻫﻮ ﻟﻮﻧﺔ ﻣﺨﻄﻮﻑ - ﻟﺤﮕﻮ ﺑﻨﺎﺕ ﺍﺗﺼﻠﻮ ﻋﻠﻴﺔ ﻣﺮﻛﺰ ﺍﻟﺸﺮﻃﺔ ﻋﺜﺮﻭ ﻋﻠﻰ ﺍﺧﺘﻜﻢ ﺳﻤﺎﺡ ﻣﺸﻤﻮﺭﺓ ﻗﺮﺏ ﺍﻟﻤﺴﺘﺸﻔﻰ
ﻓﺮﺡ ﻭﻫﻲ ﺗﻠﻄﻢ ﻋﻠﻰ ﺻﺪﺭﻫﺔ - ﻳﻤﺔ ﺻﺨﺎﻡ ﺷﻠﻮﻥ ﺷﻨﻮ ﻣﺴﻮﻳﺔ ﺣﺎﺩﺙ
ﺍﺑﻮ ﻧﻮﺍﻝ ﻭﻫﻮ ﺻﻮﺗﺔ ﺑﻲ ﻗﻬﺮﺓ ﻋﻠﻰ ﺣﺎﻟﻨﺎ ﻣﺎ ﺍﻋﺮﻑ ﻟﻴﺶ ﻣﻦ ﺷﻔﺖ ﻧﻈﺮﺍﺕ ﺍﺑﻮ ﻧﻮﺍﻝ ﺍﻟﻨﺎ ﺣﺴﻴﺖ ﺍﻛﻮ ﺷﻲ ﺟﺒﻴﺮ ﺻﺎﻳﺮ ﻋﻠﻰ ﺍﺧﺘﻲ
ﻭﺍﻧﻲ ﺑﻠﺤﻀﺘﻬﺎ ﺣﺴﻴﺖ ﻋﺒﺎﻟﻚ ﻭﺍﺣﺪ ﺿﺮﺏ ﻣﻌﺪﺗﻲ ﺑﺮﻓﺴﺔ ﻗﻮﻳﺔ
ﺍﺑﻮ ﻧﻮﺍﻝ - ﺑﻮﻳﺔ ﻟﺒﺴﻮ ﻭﺗﻌﺎﻟﻮ ﻭﻳﺎﻱ ﺍﻧﺘﻲ ﻭﺧﻮﺍﺗﺞ
ﺭﺣﻨﺎ ﺍﻧﻲ ﻭﺳﻠﻮﻯ ﻓﻘﻂ
ﻭﺳﺮﻭﺭ ﺑﻘﺖ ﻋﻨﺪ ﺍﻡ ﻧﻮﺍﻝ
ﻭﺻﻠﻨﺎ ﻟﻠﻤﺴﺘﺸﻔﻰ
ﺩﺧﻠﻨﺎ ﻭﮔﻌﺪﻧﺎ ﻧﺴﺘﻔﺴﺮ ﻋﻦ ﺍﺳﻢ ﺍﻟﻤﺮﻳﻀﺔ ﺳﻤﺎﺡ ﻣﻨﺬﺭ
ﻭﺩﻟﻮﻧﺎ ﻋﻠﻰ ﺍﻟﺮﺩﻫﺔ ﺍﻟﻤﻮﺟﻮﺩﺓ ﺑﻴﻪ ﺳﻤﺎﺡ ﺭﺣﺖ ﺍﺭﻛﺾ ﻣﻦ ﺧﻮﻓﻲ ﻋﻠﻰ ﺍﺧﺘﻲ ﻣﺎ ﺍﻋﺮﻑ ﺷﺼﺎﻳﺮ ﻋﻠﻴﻬﺎ ﻭﺻﻠﻨﺎ ﻟﻠﺮﺩﻫﺔ ﺷﻔﻨﺎ ﻗﺮﺏ ﺍﻟﺴﺮﻳﺮ ﺿﺎﺑﻂ ﻭﻭﻳﺎﻩ ﻛﺎﺗﺐ ﻋﻠﻰ ﻣﺎ ﺍﺗﻮﻗﻊ ﻭﺳﻤﻌﺖ ﺍﻟﻀﺎﺑﻂ ﻳﺴﺄﻝ ﺳﻤﺎﺡ ﺍﻟﻲ ﻣﻦ ﺷﻔﺘﻪ ﺍﺟﻴﺖ ﺍﺗﺨﺒﻞ ﻋﻠﻰ ﻣﻨﻈﺮﻫﺎ ﻛﺎﻥ ﻭﺟﻬﺎ ﺍﺯﺭﻕ ﻣﻦ ﺍﻟﻀﺮﺏ ﻭﺍﻟﻤﻼﺑﺲ ﻣﻤﺰﻗﺔ ﻭﻻﺑﺴﺔ ﻋﻠﻴﻬﻢ ﻋﺒﺎﻳﺔ
ﻓﺰﻋﺖ ﻣﻦ ﻣﻨﻈﺮﻫﺎ
ﺭﺣﺖ ﺭﻛﻀﺖ ﺍﻧﻲ ﻭﺳﻠﻮﻯ ﻋﻠﻴﻬﺎ ﻳﺎﺑﻌﺪ ﻋﻤﺮﻱ ﻛﺎﻧﺖ ﺑﺲ ﺗﺒﺠﻲ ﻭﻣﻨﻬﺎﺭﺓ ﻣﻦ ﺍﻟﺨﻮﻑ
ﺩﺧﻞ ﺍﻟﺪﻛﺘﻮﺭ ﻭﻃﻠﺐ ﻣﻨﺎ ﺍﻟﺨﺮﻭﺝ
ﺍﻟﺪﻛﺘﻮﺭ - ﺍﻟﻤﺮﻳﻀﺔ ﻻﺯﻡ ﺍﻧﻄﻴﻬﺎ ﺍﺑﺮﺓ ﻣﻬﺪﺋﺔ ﻻﻥ ﺍﺗﻌﺮﺿﺖ ﻟﻤﻮﻗﻒ ﺻﺪﻣﺔ ﺻﻌﺐ ﻋﻠﻴﻬﺎ ﻭﺍﻟﻤﺜﻞ ﺣﺎﻟﺘﻬﺎ ﻻﺯﻡ ﺍﻋﻄﻴﻬﺎ ﺍﺑﺮﺓ ﻣﻬﺪﻱﺀ
ﻓﺮﺡ ﻭﺳﻠﻮﻯ ﺑﻨﻔﺲ ﺍﻟﺴﺆﺍﻝ - ﻟﻴﺶ ﺳﻤﺎﺡ ﺷﺒﻴﻬﺔ
ﺍﻟﻀﺎﺑﻂ ﻭﺑﺼﻮﺕ ﻧﺎﺻﻲ ﺗﻜﺪﺭﻭﻥ ﺗﻨﺘﻈﺮﻭﻧﻲ ﺑﺮﺓ ﻓﺪ ﻟﺤﻈﺔ ﻭﺍﻧﺔ ﺟﺎﻱ ﻭﺭﺍﻛﻢ ﺍﻓﻬﻤﻜﻢ ﻋﻦ ﻭﺿﻊ ﺍﺧﺘﻜﻢ
ﻓﺮﺡ
ﺍﺧﺬﺕ ﺳﻠﻮﻯ ﻭﻃﻠﻌﺖ ﺑﺮﺓ ﺍﺣﺲ ﺑﺨﻮﻑ ﻭﻣﻐﺺ ﺻﺎﺭ ﻗﻮﻱ ﺑﺒﻄﻨﻲ ﻳﺎﺭﺏ ﺩﺧﻴﻠﻚ
ﺑﻌﺪ ﺭﺑﻊ ﺳﺎﻋﺔ ﻃﻠﻊ ﺍﻟﻀﺎﺑﻂ ﻣﻦ ﺍﻟﺮﺩﻫﺔ ﺍﻟﻲ ﺑﻴﻬﺔ ﺳﻤﺎﺡ
ﺭﻛﻀﺖ ﻋﻠﻴﻪ
ﻓﺮﺡ - ﺷﻨﻮ ﺷﺒﻴﻪ ﺍﺧﺘﻲ
ﺍﻟﻀﺎﺑﻂ - ﺍﺧﺘﻜﻢ ﻣﺘﻌﺮﺿﺔ ﻟﻠﺨﻄﻒ ﻭﺍﻻﻏﺘﺼﺎﺏ ﻣﻦ ﻗﺒﻞ ﺷﺨﺺ ﻣﺠﻬﻮﻝ
ﻓﺮﺡ - ﻳﻤﺔ ﺻﺨﺎﻡ ﺍﻟﺼﺨﻤﻨﺎ ﺳﻮﺩﺓ ﻋﻠﻴﺔ ﺍﺧﺘﻲ ﻫﺴﺔ ﺷﺮﺍﺡ ﻳﺼﻴﺮ ﺑﻴﻬﺎ
ﻓﺮﺡ ﻭﺗﺤﺠﻲ ﻭﻳﺔ ﻧﻔﺴﻬﺎ ﺑﻘﻠﻖ ﻋﺰﺓ ﻭﻳﻦ ﻧﻨﻄﻲ ﻭﻭﺟﻬﻨﺎ
ﺳﻠﻮﻯ - ﻻ ﻻ ﻣﺴﺘﺤﻴﻞ ﻳﺼﻴﺮ ﺑﻴﻨﺎ ﻫﻴﺞ ﺭﺑﻲ ﺳﺘﺮﻙ
ﺍﻟﻀﺎﺑﻂ - ﻭﻣﻊ ﺍﻻﺳﻒ ﺍﺧﺘﻜﻢ ﺩﺍﺧﻠﺔ ﺑﺤﺎﻟﺔ ﻫﺴﺘﻴﺮﻳﺔ ﺑﺲ ﻛﻞ ﺍﻟﻲ ﮔﺪﺭﻧﺎ ﻧﺴﺠﻠﺔ ﻣﻦ ﺍﻗﻮﺍﻟﻬﺎ ﺍﻥ ﺳﻴﺎﺭﺓ ﺳﻮﺩﺓ ﻣﻌﺘﺮﺿﺔ ﻃﺮﻳﻘﻬﺎ ﺑﺎﺛﻨﺎﺀ ﺫﻫﺎﺑﻬﺎ ﻟﻠﻌﻤﻞ ﻭﺳﺎﺣﺒﻴﻬﺎ ﺍﺛﻨﻴﻦ ﻣﻠﺜﻤﻴﻦ
ﺑﺎﻟﻘﻮﺓ ﻭﺩﺍﻓﻌﻴﻬﺎ ﻟﻠﺴﻴﺎﺭﺓ ﻭﺑﻌﺪﻫﺎ ﻣﺎﺧﺬﻳﻬﺎ ﻟﻤﻜﺎﻥ ﻫﻲ ﻣﺎ ﺗﻌﺮﻑ ﺗﻮﺻﻔﻪ ﺍﻟﻨﺎ ﺑﺲ ﺣﺴﺐ ﺍﻟﻤﻌﻠﻮﻣﺎﺕ ﺍﺣﺘﻤﺎﻝ ﺑﻴﺖ ﺑﻘﻴﺪ ﺍﻻﻧﺸﺎﺀ ﻣﺒﻨﻲ ﺑﺲ ﻫﻴﻜﻞ ﻭﻫﻨﺎﻙ ﻣﺎﺧﺬﻳﻬﺎ ﻭﻣﻐﺘﺼﺒﻴﻬﺎ
ﻓﺮﺡ
ﻛﺎﻥ ﻭﻗﻊ ﺍﻟﺨﺒﺮ ﻋﻠﻴﻨﺎ ﻣﺜﻞ ﺍﻟﺼﺎﻋﻘﺔ ﺷﻲ ﻣﻮ ﺑﺎﻟﺤﺴﺒﺎﻥ
ﺍﺧﺘﻰ ﺭﺍﺡ ﺗﺪﻣﺮ ﺣﻴﺎﺗﻬﺎ ﺍﻭ ﺑﺎﻻﺣﺮﻯ ﺍﺗﺪﻣﺮﺕ ﺣﻴﺎﺗﻬﺎ
ﺑﻌﺪ ﻣﻜﻮﺙ ﺳﻤﺎﺡ ﺍﺳﺒﻮﻉ ﻛﺎﻣﻞ ﺑﺎﻟﻤﺴﺘﺸﻔﻰ
ﺭﺟﻌﺖ ﻟﻠﺒﻴﺖ ﻭﻫﻲ ﺟﺪﺍ ﻏﻴﺮ ﺍﻧﺴﺎﻧﺔ ﻛﺎﻧﺖ ﺑﺲ ﻫﺎﺩﺀﺓ ﻭﻣﺎﺗﺤﺠﻲ ﻭﺑﺲ ﺗﺼﻔﻦ . ﻭﺗﮕﻌﺪ ﻟﻮﺣﺪﻫﺔ ﺭﺑﻲ ﺍﺟﺒﺮ ﺧﺎﻃﺮﻫﺎ ﻣﺴﻜﻴﻨﺔ ﺷﺒﺎﺑﻬﺎ ﺍﺗﺪﻣﺮً
↙️
ﻟﻜﻦ ﺍﺣﻨﺎ ﺣﻴﺎﺗﻨﺎ ﻛﻠﻬﺎ ﺍﺗﺪﻣﺮﺕ ﻣﻮ ﺑﺲ ﻫﻲ ﺍﻟﻲ ﺗﺤﻄﻤﺖ ﻭﻳﻨﻚ ﺑﻮﻳﺔ ﺗﻌﺎﻝ ﺷﻮﻑ ﺣﺎﻟﻨﺎ ﻣﻦ ﺑﻌﺪﻙ ﺷﺼﺎﺭ ﺑﻴﻨﺎ
ﺳﻠﻮﻯ - ﮔﻮﻣﻲ ﺳﻤﺎﺡ ﺍﻛﻠﻲ ﻭﻳﺎﻧﺎ ﻟﮕﻤﺔ ﺧﻮ ﻣﺎ ﺗﻤﻮﺗﻴﻦ ﺭﻭﺣﺞ ﻣﻦ ﺍﻟﺠﻮﻉ
ﻓﺮﺡ ﻭﺑﻘﻬﺮ - ﮔﻮﻣﻲ ﻭﺻﻴﺮﻱ ﻗﻮﻳﺔ ﻻﺗﺨﻠﻴﻦ ﺍﻟﻲ ﺻﺎﺭ ﺑﻴﺞ ﻳﻤﺤﻲ ﺷﺒﺎﺑﺞ ﺑﻌﺪﺝ ﺷﺎﺑﺔ ﻭﺑﺒﺪﺍﻳﺔ ﺣﻴﺎﺗﺞ ﻭﺍﻥ ﺷﺎﺀ ﺍﻟﻠﻪ ﺍﻻﻳﺎﻡ ﻛﻔﻴﻠﺔ ﺍﻥ ﺗﻨﺴﻴﺞ ﺍﻟﻲ ﺻﺎﺭ
ﺳﻤﺎﺡ ﺑﻨﻬﻴﺎﺭ ﻭﻫﻲ ﺗﺼﻴﺢ - ﺑﻌﺪﻭﺍ ﻋﻨﻲ ﻋﻮﻓﻮﻧﻲ ﻟﻮﺣﺪﻱ ﺍﺭﻳﺪ ﺍﻣﻮﺕ ﻛﻮﻥ ﻣﻴﺘﺔ ﻭﻻ ﻫﺬﺍ ﺍﻟﺼﺎﺭ ﺑﻴﺔ ﺍﻧﺘﻲ ﺷﺘﻜﻮﻟﻴﻦ
ﻋﻦ ﺍﻱ ﺯﻣﻦ ﻛﻔﻴﻞ ﻳﻨﺴﻴﻨﻲ ﻭﻟﺞ ﺍﻟﺼﺎﺭ ﺑﻴﺔ ﻣﺎ ﺍﮔﺪﺭ ﺍﻧﺴﺎﻩ ﺻﻌﺐ ﺻﻌﺐ ﻣﺎﻛﻮ ﺍﻣﻞ ﺑﺤﻴﺎﺗﻲ ﺑﻌﺪ
ﻓﺮﺡ - ﺳﻤﺎﺡ ﻣﻮ ﺑﻜﻴﻔﺞ ﺍﻧﺘﻲ ﻻﺯﻡ ﺗﺼﻴﺮﻳﻦ ﻗﻮﻳﺔ
ﻭﺗﮕﻮﻣﻴﻦ ﻋﻠﻰ ﺣﻴﻠﺞ ﻻﻥ ﺍﺣﻨﺎ ﻣﺤﺘﺎﺟﻴﻦ ﺍﺧﺘﻨﺎ ﺍﻟﺠﺒﻴﺮﺓ ﺍﻟﺤﻨﻮﻧﺔ
ﻭ ﻻﺗﻨﺴﻴﻦ ﺍﺑﻮﻱ ﻭﺻﺎﺝ ﻋﻠﻴﻨﺎ ﻣﺎﻳﺼﻴﺮ ﺗﺘﻘﻮﻗﻌﻴﻦ ﻋﻠﻰ ﻧﻔﺴﺞ ﻭﺗﺤﻄﻤﻴﻬﺎ
ﻟﻜﻦ ﻫﻴﻬﻴﺎﺕ ﻟﻤﻦ ﺗﻨﺎﺩﻱ
ﻓﺮﺡ
ﻣﺮﺕ ﺍﻻﻳﺎﻡ ﻭﺍﺧﺘﻲ ﺳﻤﺎﺡ ﺣﺎﻟﺘﻪ ﻣﻦ ﺳﻲﺀ ﺍﻟﻰ ﺍﺳﻮﺀ
ﻭﺻﺎﺭﺕ ﺑﺲ ﺟﺴﺪ ﺑﻼ ﺭﻭﺡ ﻭ ﻳﻮﻡ ﻋﻦ ﻳﻮﻡ ﺗﻀﻌﻒ ﺍﻛﺜﺮ ﺟﺴﺪﺍ ﻭﺭﻭﺣﺎ ﻳﻌﻨﻲ ﺑﺄﺧﺘﺼﺎﺭ ﺍﻟﻲ ﻳﺸﻮﻑ ﺷﻜﻞ ﺳﻤﺎﺡ ﻳﺨﺎﻑ ﻳﻌﺘﻘﺪ ﺑﻴﻬﺎ ﻣﺮﺽ ﺧﺒﻴﺚ
ﺳﻠﻮﻯ ﻻﺯﻣﺔ ﺑﻴﺪﻫﺎ ﻭﺭﻗﺔ ﻭﺗﻜﺘﺐ ﺍﻟﻤﺼﺎﺭﻳﻒ
ﺳﻠﻮﻯ - ﺷﻠﻮﻥ ﻳﺎﺭﺏ ﺯﺍﺩ ﺍﻟﻤﺼﺮﻑ ﻋﻠﻴﻨﺎ ﻭﺍﻧﻘﻄﻊ ﻋﻨﺎ ﺍﻟﻤﺼﺪﺭ ﺍﻟﺸﻬﺮﻱ ﺍﻟﻲ ﻛﺎﻧﺖ ﺗﺠﻴﺒﺔ ﺳﻤﺎﺡ ﻣﻦ ﺍﻟﻤﺸﻐﻞ
ﻫﺴﺔ ﺷﻠﻮﻥ
ﻓﺮﺡ
ﺍﻧﻲ ﺍﺭﻭﺡ ﺍﺷﺘﻐﻞ ﺑﺪﻝ ﻣﻦ ﺳﻤﺎﺡ
ﺳﻠﻮﻯ - ﻻ ﺍﻧﻲ ﺍﺭﻭﺡ
ﻓﺮﺡ - ﻻ ﺑﺮﺑﺞ ﺍﻧﺘﻲ ﺍﻛﺒﺮ ﻣﻄﻔﻴﺔ ﻭﻣﻦ ﺍﻟﺮﺋﻴﺴﻲ
ﻛﻌﺪﻱ ﻭﺳﻜﺘﻲ ﺍﻧﻲ ﺍﺣﺴﻦ ﻣﻨﺞ ﻋﻠﻰ ﺍﻻﻗﻞ ﺍﻋﺮﻑ ﺷﻠﻮﻥ ﺍﺣﺠﻲ ﻭﻳﺔ ﺍﻟﻌﺎﻟﻢ
ﺍﻧﺘﻲ ﻋﻴﺒﺞ ﺍﺫﺍ ﻭﺍﺣﺪ ﺣﺠﺔ ﻭﻳﺎﺝ ﺣﺮﻓﻴﻦ ﮔﺒﻞ ﺗﻐﺮﮔﻴﻦ ﻭﺗﻈﻠﻴﻦ ﺗﺮﺟﻔﻴﻦ
ﻓﺮﺡ ﺭﺣﺖ ﻟﻠﻤﺸﻐﻞ ﻭﻃﻠﺒﺖ ﺍﺷﻮﻑ ﺻﺎﺣﺒﺔ ﺍﻟﻤﺸﻐﻞ ﻭﻃﻠﻌﺖ ﻣﺮﺓ ﻣﺘﻮﺳﻄﺔ ﺍﻟﻌﻤﺮ ﻭﺳﺌﻠﺘﻪ ﻋﻦ ﺍﻟﻌﻤﻞ ﻋﻨﺪﻫﻢ ﻭﻛﻠﺘﻠﻬﺔ ﺍﻥ ﺍﻧﻲ ﺍﺧﺖ ﺳﻤﺎﺡ ﻭﺍﺭﻳﺪ ﺍﺷﺘﻐﻞ ﺑﺪﻝ ﺳﻤﺎﺡ ﻻﻥ ﺳﻤﺎﺡ ﻣﺮﻳﻀﺔ
ﺷﻔﺘﻬﺎ ﻧﻈﺮﺕ ﺍﻟﻲ ﻧﻈﺮﺍﺕ ﺷﻚ ﻭﺧﻮﻑ ﻭﺑﻌﺪﻳﻦ
ﺍﻡ ﺍﻟﻤﺸﻐﻞ - ﺍﺳﻔﺔ ﺣﺒﻴﺒﺘﻲ ﻣﺎ ﺍﺷﻐﻞ ﺑﻨﺎﺕ ﻣﻮ ﺭﺍﺣﺔ ﺗﺮﺓ ﺍﻧﻲ ﺍﻫﻢ ﺷﻲ ﺳﻤﻌﺖ ﺍﻟﻤﺸﻐﻞ ﻣﺎﻟﺘﻲ ﺗﺮﺓ ﺍﺣﻨﺎ ﻧﺎﺱ ﻋﻠﻰ ﺑﺎﺏ ﺍﻟﻠﻪ ﻭﻫﺎﻱ ﺍﺧﺘﺞ ﺳﺎﻟﻔﺘﻬﺎ ﻋﻠﻰ ﻛﻞ ﺍﻟﺴﺎﻥ ﻭﺗﺨﻮﻑ ﻣﺎ ﻳﻨﺴﻜﺖ ﻋﻠﻴﻬﺎ
ﻓﺎﻋﺘﺬﺭ ﻣﺎ ﺍﮔﺪﺭ ﺍﺷﻐﻠﺞ ﻋﻨﺪﻱ
ﻓﺮﺡ
ﺍﺥ ﺍﻟﻠﻪ
ﻃﻠﻌﺖ ﻣﻦ ﻋﻨﺪﻫﺎ ﻭﺍﻟﺤﺎﻝ ﻣﺎﻳﻌﻠﻢ ﺑﻴﻪ ﺑﺲ ﺍﻟﻠﻪ ﻳﻌﻨﻲ ﺣﻘﻬﺎ ﺍﺧﺘﻲ ﺑﻴﻮﻡ ﺗﻔﺮﻓﺢ ﻣﻦ ﺍﻟﻘﻬﺮ ﺍﺛﺎﺭﻱ ﺍﻟﻨﺎﺱ ﻣﺎ ﺗﺮﺣﻢ
ﻭﺍﻟﺮﺣﻤﺔ ﺍﻧﺸﺎﻟﺖ ﻣﻦ ﺍﻟﮕﻠﻮﺏ
ﻳﺎﻟﻠﻪ ﺷﺤﺠﻲ ﺍﺫﺍ ﻫﻢ ﺍﻫﻞ ﺍﺑﻮﻱ ﻣﺎﻳﺴﺌﻠﻮﻥ ﻭﻻ ﺣﻨﻮ ﻋﻠﻰ ﺑﻨﺎﺕ ﺍﺑﻨﻬﻢ ﺍﻟﻤﺎﺕ ﺑﻘﺖ ﻋﻠﻰ ﺍﻟﻨﺎﺱ ﺗﺤﻦ ﻋﻠﻴﻨﺎ
ﻻﺯﻡ ﺍﺗﺼﺮﻑ
ﺭﺟﻌﺖ ﻟﻠﺒﻴﺖ ﺷﻔﺖ ﺳﺮﻭﺭ ﮔﺎﻋﺪﺓ ﻋﺎﻟﺪﺭﺝ ﺗﺒﺠﻲ
ﻓﺮﺡ - ﻫﺎﻱ ﻟﻴﺶ ﺗﺒﺠﻴﻦ
ﺳﺮﻭﺭ - ﻫﺎﻱ ﺑﻨﻴﺔ ﺷﻜﺖ ﺍﻟﺪﻓﺘﺮ ﻣﺎﻟﺘﻲ ﻭﺍﻟﻤﻌﻠﻤﺔ ﻇﻠﺖ ﺗﺤﺠﻲ ﻋﻠﻴﺔ ﻭﮔﺎﻟﺖ ﺑﺪﻟﻲ ﺍﻟﺪﻓﺘﺮ ﻭﺗﺒﺪﻳﻦ ﺗﻜﺘﺒﻴﻦ ﻣﻦ ﺟﺪﻳﺪ
ﻭﺍﻟﻠﻪ ﻣﺘﺖ ﻗﻬﺮ
ﻓﺮﺡ - ﺍﻟﺒﺎﺟﺮ ﺍﺟﻲ ﻭﻳﺎﺝ ﻭﺭﺍﻭﻳﻨﻲ ﺍﻟﺒﻨﻴﺔ ﺍﻟﺸﻜﺖ ﺍﻟﺪﻓﺘﺮ
ﺭﺣﺖ ﺩﺧﻠﺖ ﻟﻠﻐﺮﻓﺔ ﻭﺍﺗﻤﺪﺩﺕ ﻋﻠﻰ ﺍﻟﻔﺮﺍﺵ ﻭﺍﻧﻲ ﻓﻜﺮﻱ ﻳﺮﻭﺡ ﻭﻳﻮﺩﻱ ﺷﻠﻮﻥ ﻧﺪﺑﺮﻫﺎ ﻭﻫﺎﻱ ﺳﻤﺎﺡ ﻣﺎ ﺭﺍﺿﻴﺔ ﺗﺴﺎﻋﺪ ﺭﻭﺣﻬﺎ ﻭﺍﻟﺪﻛﺘﻮﺭ ﻭﺍﻟﻤﺮﺍﺟﻌﺎﺕ ﻛﺴﺮﺕ ﻇﻬﺮﻧﺎ ﻻﺯﻡ ﺍﺗﺼﺮﻑ
ﻳﻮﻡ ﺛﺎﻧﻲ
ﺭﺣﺖ ﻟﻠﻤﺪﺭﺳﺔ ﻣﻊ ﺳﺮﻭﺭ ﻭﻟﺰﻣﺖ ﺍﻟﻄﺎﻟﺒﺔ ﻭﺭﺯﻟﺘﻬﺎ ﻭﺣﺠﻴﺖ ﻭﻳﺔ ﺍﻟﻤﻌﻠﻤﺔ ﺍﻟﻤﺴﺆﻟﺔ ﻋﻦ ﺍﻟﺼﻒ ﻭﺣﺠﻴﺖ ﻭﻳﺎﻫﺎ ﻋﻦ ﺳﺮﻭﺭ
ﻭﺭﺟﻌﺖ ﻣﺎ ﺍﺣﺐ ﻭﺍﺣﺪ ﻳﺄﺫﻱ ﺧﻮﺍﺗﻲ ﺍﺣﺲ ﺑﺮﻭﺣﻲ ﺍﻧﻲ ﺍﻟﻤﺤﺎﻣﻲ ﻣﺎﻟﺘﻬﻢ ﻣﺎ ﺍﻋﺮﻑ ﻟﻴﺶ ﻣﻦ ﺍﺗﻮﻓﻰ ﺑﺎﺑﺎ ﺍﺧﺬﺕ ﻋﻠﻰ ﻋﺎﺗﻘﻲ ﺣﻤﺎﻳﺘﻬﻢ ﻣﻦ ﻛﻠﺸﻲ ﻭﺧﺼﻮﺻﺎ ﺑﻌﺪ ﺣﺎﺩﺙ ﺍﺧﺘﻲ ﺳﻤﺎﺡ ﻫﺬﺍ ﺯﺍﺩ ﻣﻦ ﻗﻮﺓ ﺣﻤﺎﻳﺘﻲ ﺍﻟﻬﻦ
↙️
ﻟﻜﻦ ﺑﻤﺮﻭﺭ ﺍﻻﻳﺎﻡ ﺣﺴﻴﺖ ﺍﻟﺒﻨﺎﺕ ﺻﺪﻳﻘﺎﺕ ﺍﻟﻤﺪﺭﺳﺔ
ﻳﺴﺤﺒﻮﻥ ﻧﻔﺴﻬﻢ ﻣﻨﻲ ﺣﺘﻰ ﺍﻗﺮﺏ ﺻﺪﻳﻘﺔ
ﻛﺎﻥ ﻛﻼﻣﻬﺎ ﺍﻟﻲ ﻣﺜﻞ ﺍﻟﻄﻌﻨﺔ
- ﻓﺮﺡ ﺍﻧﻲ ﺍﺳﻔﺔ ﻣﺎ ﺍﻛﺪﺭ ﺑﻌﺪ ﺍﻣﺸﻲ ﻭﻳﺎﺝ ﻻﺯﻡ ﺍﻧﻬﻲ ﺻﺪﺍﻗﺘﻲ ﺑﻴﺞ
ﻻﻥ ﺳﻤﻌﺘﻜﻢ ﻣﻦ ﻭﺭﺓ ﺍﺧﺘﺞ ﺻﺎﺭﺕ ﻋﻠﻰ ﻛﻞ ﻟﺴﺎﻥ
ﻓﺮﺡ ﻭﻫﻲ ﺗﻀﺮﺏ ﺧﺪﻫﺎ ﻟﻴﺶ ﻭﻟﺞ ﺗﺤﺠﻴﻦ ﻫﻴﺞ ﻋﻮﺩﻙ ﻫﺎﻱ ﺍﻧﺘﻲ ﺻﺪﻳﻘﺘﻲ ﺍﻟﻤﻘﺮﺑﺔ ﻭﺗﻌﺮﻓﻴﻦ ﺍﺧﻼﻗﻲ ﺗﺤﺠﻴﻦ ﻫﻴﺞ ﺑﻌﺪ ﺷﮕﻮﻝ ﻋﻠﻰ ﺍﻟﻨﺎﺱ ﺍﻟﻤﺎﺗﻌﺮﻓﻨﺎ ﺍﻟﻌﻔﻮ ﻋﻠﻴﺞ ﺷﻠﻮﻥ ﻫﺎﻧﺖ ﻋﻠﻴﺞ ﻋﺸﺮﺗﻨﺎ ﻭﺻﺪﺍﻗﺘﻨﺎ
ﻟﻜﻦ ﻓﺮﺡ ﺍﺑﺘﺴﻤﺖ ﺑﺎﻟﻢ - ﺑﺲ ﺗﻌﺮﻓﻴﻦ ﺷﻨﻮ ﻳﮕﻮﻟﻮﻥ ﺑﺴﺎﻋﺔ ﺍﻟﺸﺪﺓ ﺗﻌﺮﻑ ﺍﻟﺼﺪﻳﻖ ﻭﺗﻨﻜﺸﻒ ﺍﻟﻮﺟﻮﻩ ﻋﻠﻰ ﺣﻘﻴﻘﺘﻬﺎ
ﻳﺎﻟﻠﻪ ﻫﻲ ﺑﻘﺖ ﻋﻠﻴﺞ
ﺑﺲ ﻣﺎ ﺍﻛﻮﻝ ﻏﻴﺮ ﺍﻛﻮ ﺍﻟﻠﻪ ﻣﻮﺟﻮﺩ ﻫﻮ ﺍﻟﻴﺎﺧﺬ ﺑﺤﻖ ﺍﻟﻤﻈﻠﻮﻡ
ﺭﺟﻌﺖ ﺑﻮﻛﺘﻬﺎ ﻟﻠﺒﻴﺖ ﻭﻛﺎﻥ ﮔﻠﺒﻲ ﺣﻴﻞ ﻣﻮﺟﻮﻉ ﻣﻮ ﺑﺲ ﻻﻥ ﺻﺪﻳﻘﺎﺗﻲ ﺗﺮﻛﻮﻧﻲ ﻻ ﻭﺍﻧﻤﺎ ﺍﻟﺸﺎﺭﻉ ﺍﻟﻜﻞ ﻳﻨﻈﺮ ﻋﻠﻴﻨﺎ ﺑﻨﻈﺮﺓ ﻭﻛﺄﻧﻤﺎ ﻋﺒﺎﻟﻚ ﺍﺧﺘﻲ ﻣﺴﻮﻳﺔ ﻣﻜﺴﻮﺭﺓ ﺧﻄﻴﺔ ﻋﻠﻰ ﺍﻻﺳﺎﺱ ﻣﻮ ﻫﻲ ﺍﻟﻲ ﺍﻧﻈﻠﻤﺖ ﻭﺍﺗﺄﺫﺕ ﻋﺪﻳﺖ ﻋﻠﻰ ﻣﺪﺭﺳﺔ ﺳﺮﻭﺭ ﻭﻛﺎﻥ ﻭﻛﺖ ﺍﻟﺤﻠﺔ
ﻓﺮﺡ - ﺳﺮﻭﺭ ﺳﺮﻭﺭ ﺗﻌﺎﻱ
ﺳﺮﻭﺭ ﺷﺎﻓﺖ ﻓﺮﺡ ﻭﺭﻛﻀﺖ ﻟﻌﻨﺪﻫﺎ ﻭﻫﻲ ﺗﺒﺠﻲ
ﻓﺮﺡ - ﺷﺒﻴﺞ ﻫﺴﺔ ﻣﻨﻮ ﻭﻳﺎﺝ ﻫﺎﻟﻤﺮﺓ ﻣﻨﻮ ﺿﺮﺑﺘﺞ
ﺳﺮﻭﺭ - ﻣﺤﺪ ﺿﺮﺑﻨﻲ ﺑﺲ ﺍﻟﺒﻨﺎﺕ ﻛﻠﻬﻢ ﻳﺤﺠﻮﻥ ﻋﻠﻰ ﺍﺧﺘﻲ ﺳﻤﺎﺡ ﻳﮕﻮﻟﻮﻥ ﺷﺮﺩﺕ ﻭﻳﺔ ﺻﺎﺣﺒﻬﺎ ﻭﻗﺸﻤﺮﻫﺎ ﻭﻟﻌﺐ ﺑﻴﻬﺎ ﻭﺷﻤﺮﻫﺎ ﺑﺎﻟﺸﺎﺭﻉ
ﻓﺮﺡ ﻭﻫﻲ ﺗﺮﺟﻒ ﻣﻦ ﺍﻟﻘﻬﺮ - ﻣﻨﻮ ﻫﺎﻱ ﺍﻟﺰﺑﺎﻟﺔ ﺍﻟﺤﺠﺖ ﻫﺬﺍ ﺍﻟﻜﻼﻡ
ﺳﺮﻭﺭ - ﻛﻠﻬﻢ ﻓﺮﺡ ﺍﻟﻜﻞ ﻳﺤﺠﻲ ﻭﻛﻠﺴﺎﻋﺔ ﻭﺣﺪﺓ ﺗﺠﻲ ﺗﮕﻮﻝ ﺻﺪﻙ ﺍﺧﺘﺞ ﻫﻴﺞ ﺳﻮﻭ ﺑﻴﻬﺎ
ﺳﺤﺒﺖ ﺍﺧﺘﻬﺎ ﻭﺭﺍﺣﻮ ﻟﻠﺒﻴﺖ ﻭﻫﻲ ﺍﻟﻨﺎﺭ ﺑﮕﻠﺒﻬﺎ
ﻭﻫﻲ ﺑﺎﻟﻄﺮﻳﻖ ﺻﻔﺖ ﻗﺮﻳﺐ ﻋﻠﻴﻬﻢ ﺩﺭﺍﺟﺔ ﺭﺍﻛﺒﻴﻦ ﻋﻠﻴﻬﺎ ﺷﺒﺎﺏ ﺍﺛﻨﻴﻦ ﻣﻦ ﺍﻭﻻﺩ ﻣﻨﻄﻘﺘﻬﻢ
ﺍﻟﺸﺒﺎﺏ - ﻫﻠﺔ ﻳﺎﺣﻠﻮﺓ ﺷﻠﻮﻧﺞ ﺑﻌﺪﺝ ﺗﺒﻴﻌﻴﻦ ﺑﺮﺍﺳﻨﺎ ﺛﮕﻞ
ﻓﺮﺡ ﻭﺑﻐﻀﺖ ﺭﻓﻌﺖ ﺟﻨﻄﺘﻬﺎ ﻭﺿﺮﺑﺖ ﺑﻴﻬﺎ ﺍﻟﻮﻟﺪ ﻭﺩﻓﻌﺘﺔ ﻭﻭﮔﻌﺘﺔ ﻣﻦ ﺍﻟﺪﺭﺍﺟﺔ
ﻛﺎﻧﺖ ﻣﺤﺘﺎﺟﺔ ﺗﻄﻠﻊ ﺣﺮﻛﺘﻬﺎ ﺑﺎﺣﺪ ﻭﻫﺬﺍ ﺍﺟﺔ ﺑﻮﻗﺘﻪ
- ﺍﻩ ﻳﺎﻟﺨﺴﻴﺲ ﻳﺎﻟﻨﺬﻝ ﻭﻟﻚ ﺍﻧﺖ ﺍﻟﻌﺎﺭ ﺗﺤﺠﻲ ﻭﻳﺎﻱ ﻫﺸﻜﻞ
- ﻫﻬﻬﻬﻬﻬﻪ ﻭﺍﻟﻠﻪ ﻭﺍﻟﺞ ﻋﻴﻦ ﻭﺗﺤﺠﻴﻦ ﺑﻌﺪ ﺳﻮﺍﻳﺔ ﺍﺧﺘﺞ ﺍﻧﻜﺸﻔﺖ ﺣﻘﻴﻘﺘﻜﻢ ﻭﻃﻠﻌﺘﻲ ﺑﻮﺧﺔ ﺍﻧﺘﻲ ﻭﺧﻮﺍﺗﺞ ﺗﺘﺪﻋﻴﻦ ﺑﺎﻟﺸﺮﻑ ﻭﺍﻧﺘﻲ ﺣﺘﻰ ﻣﺎ ﺗﻨﺪﻟﻴﻦ ﺩﺭﺑﻪ
- ﺳﺪﺓ ﺣﻠﻜﻚ ﻳﺎﻟﻨﺎﻗﺺ ﻻ ﺍﻟﺴﺎﻧﻚ ﺍﻛﺼﺔ ﻭﻟﻚ ﻣﻦ ﺗﺮﻭﺡ ﻓﺪﻭﺓ ﺍﻟﻨﺎ ﺍﻧﻲ ﻭﺧﻮﺍﺗﻲ ﺍﺣﻨﺎ ﺍﺷﺮﻑ ﻣﻨﻚ ﻭﻣﻦ ﺍﻣﻚ
ﻳﺎ ﻋﺎﺭ ﻭﻟﻮﺍﻟﻤﺜﻠﻚ ﻣﺎﻋﻨﺪﺓ ﻋﺮﺽ ﻳﺨﺎﻑ ﻋﻠﻴﻪ
ﻏﻀﺐ ﺍﻟﻮﻟﺪ ﻭﺳﺤﺐ ﺷﺎﻝ ﻓﺮﺡ ﻭﻭﮔﻌﻪ ﺑﺎﻟﮕﺎﻉ
ﻭﺷﺨﻂ ﺍﻟﺪﺭﺍﺟﺔ ﻭﺭﺍﺡ ﺷﺮﺩ
ﺭﻏﻢ ﺍﻟﻢ ﻓﺮﺡ ﻟﻜﻦ ﻣﺎ ﺑﻴﻨﺖ ﺍﻣﺎﻡ ﺍﺣﺪ ﮔﺎﻣﺖ ﻣﻦ ﺍﻟﮕﺎﻉ ﻭﻋﺪﻟﺖ ﺷﺎﻟﻬﺎ ﻭﮔﻠﺒﻬﺎ ﻳﻨﺰﻑ ﺩﻡ ﻭﺍﻟﻠﻪ ﻳﺴﺘﺮ ﻣﻦ ﺍﻟﺠﺎﻱ
ﺭﺍﺣﺖ ﺳﺮﻭﺭ ﺗﻠﻢ ﺑﻜﺘﺐ ﺍﺧﺘﻬﺎ ﻭﺗﻤﺴﺢ ﺗﺮﺍﺏ ﻋﻦ ﻭﺟﻪ ﺍﺧﺘﻬﺎ ﺑﺄﻳﺪﻫﺎ ﺍﻟﺼﻐﻴﺮﺓ ﻭﻫﻲ ﺗﺒﺠﻲ
ﻓﺮﺡ ﺍﻧﺘﺒﻬﺖ ﻻﺧﺘﻬﺎ ﺷﻠﻮﻥ ﺧﺎﻳﻔﺔ ﻋﻠﻴﻬﺎ
ﻓﺮﺡ ﻣﺴﺤﺖ ﺩﻣﻌﺔ ﺍﺧﺘﻬﺎ - ﺳﺮﻭﺭ ﻻﺗﺒﺠﻴﻦ ﻭﻫﺬﺍ ﺍﻟﻤﻮﻗﻒ ﺍﻟﺼﺎﺭ ﻭﺍﻟﻜﻼﻡ ﺍﻟﺴﻤﻌﺘﻲ ﺑﺎﻟﻤﺪﺭﺳﺔ ﻣﺎ ﺍﺭﻳﺪﺓ ﻳﻄﻠﻊ ﮔﺪﺍﻡ ﺳﻤﺎﺡ ﻣﺎ ﺍﺭﻳﺪ ﺳﻤﺎﺡ ﺗﻌﺮﻑ ﺑﺎﻟﻲ ﺟﺎﻱ ﻳﺤﺠﻮﻥ ﺑﻲ ﺍﻟﻨﺎﺱ ﻣﻦ ﻭﺭﺍﻫﺎ ﻋﻔﻴﺔ ﺳﺒﺎﻋﻴﺔ ﺍﻋﺘﺒﺮﻱ ﺳﺮ ﺑﻴﻨﻲ ﻭﺑﻴﻨﺞ
ﻭﺻﻠﻨﺎ ﻟﻠﺒﻴﺖ ﻭﺍﻧﻲ ﺍﺗﺨﺬﺕ ﻗﺮﺍﺭ ﺑﻴﻨﻲ ﻭﺑﻴﻦ ﻧﻔﺴﻲ ﺭﺍﺡ ﺍﻃﺒﻘﺔ ﻭﺭﺑﻲ ﻳﻌﻴﻨﺎ
ﺩﺧﻠﺖ ﻟﻠﻤﻄﺒﺦ ﻭﻓﺮﺣﺖ ﻣﻦ ﺷﻔﺖ ﺳﻤﺎﺡ ﻭﺍﻛﻔﺔ ﻋﻠﻰ ﺍﻟﻄﺒﺎﺥ ﺗﻄﺒﺦ ﺍﻟﻐﺪﺓ ﻳﺎﺭﺏ ﻛﻮﻥ ﺗﺮﺟﻊ ﻟﺤﻴﺎﺗﻬﺎ ﺍﻟﻄﺒﻴﻌﻴﺔ
ﻭﺍﻟﻠﻪ ﻣﺤﺘﺎﺟﻴﻦ ﺍﻟﻬﺎ ﻭﻟﺤﻨﺎﻧﻬﺎ ﻣﻦ ﺍﺗﻮﻓﻮ ﺍﻫﻠﻲ ﻫﻲ ﻣﺎ ﺣﺴﺴﺘﻨﺎ ﺑﺎﻟﻔﻘﺪ ﻛﺎﻧﺖ ﺭﻏﻢ ﻋﻤﺮﻫﺎ ﺍﻟﺼﻐﻴﺮ ﺿﻤﺘﻨﺎ ﻟﺘﺤﺖ ﺟﻨﺎﺣﻬﺎ ﻣﺜﻞ ﺍﻟﺪﺟﺎﺟﺔ ﺍﻻﻡ ﺍﻟﻲ ﺗﻐﻄﻲ ﺍﻓﺮﺍﺧﻬﺎ ﺗﺤﺖ ﺍﻟﺠﻨﺢ ﻭﺍﻟﻠﻪ ﻣﺎ ﺗﺴﺘﺎﻫﻞ ﺍﻟﻲ ﺻﺎﺭ ﺑﻴﻬﺎ ﻭﺍﻟﻲ ﺟﺎﻱ ﻳﺼﻴﺮ ﺭﺣﻤﺘﻚ ﺭﺑﻲ
ﺳﻤﺎﺡ ﻭﺑﺼﻮﺕ ﻧﺎﺻﻲ ﻫﺎﺩﻱﺀ - ﻳﺎﻟﻠﻪ ﺑﻨﺎﺕ ﺭﻭﺣﻮ ﺑﺪﻟﻮ ﻣﻼﺑﺴﻜﻢ ﻋﻠﻰ ﻣﺎ ﺍﺻﺐ ﺍﻟﻐﺪﺍ
ﺧﻄﻴﺔ ﺳﺮﻭﺭ ﻛﺴﺮﺕ ﺧﺎﻃﺮﻱ ﻣﻦ ﺭﻛﻀﺖ ﻋﻠﻰ ﺳﻤﺎﺡ ﻭﺣﻀﻨﺘﻬﺎ
ﻗﻮﻱ
ﺳﺮﻭﺭ ﺍﻧﺤﺮﻣﺖ ﻣﻦ ﺣﻀﻦ ﺍﻣﻲ ﻭﻫﻲ ﺻﻐﻴﺮﺓ ﻣﺎﻟﺤﻜﺖ ﺗﺸﺒﻊ ﻣﻨﻬﻢ
ﻟﺬﻟﻚ ﻛﻠﺶ ﻣﺘﻌﻠﻘﺔ ﺑﻴﻬﺎ ﻭﺍﻟﻠﻪ ﻫﻲ ﺍﻟﺤﻘﻴﻘﺔ ﻛﻠﻨﺎ ﻣﺘﻌﻠﻘﺎﺕ ﺑﺴﻤﺎﺡ
ﻳﺎﺑﻌﺪ ﻋﻤﺮﻱ ﻳﺎﺧﻴﺘﻲ ﻛﻮﻥ ﺍﻟﻠﻪ ﻳﺠﺒﺮ ﺧﺎﻃﺮﺝ ﻭﻳﻄﻴﺒﺔ
ﺭﺣﺖ ﻟﻠﻐﺮﻓﺔ ﺍﺑﺪﻝ ﻣﻼﺑﺴﻲ ﻭﺍﻧﻲ ﺍﻓﻜﺮ ﺑﻜﻼﻡ ﺍﻟﺒﻨﺎﺕ ﺻﺪﻳﻘﺎﺗﻲ ﻭﺗﻌﺎﻣﻠﻬﻢ ﻭﻳﺎﻱ ﺣﺘﻰ ﻛﺮﻫﺖ ﺍﻟﻤﺪﺭﺳﺔ ﻣﻦ ﻭﺭﺍﻫﻢ
ﺳﻠﻮﻯ - ﻓﺮﺡ ﺍﺭﻳﺪﺝ ﺍﻟﻌﺼﺮ ﺗﺮﺣﻴﻦ ﻟﻠﺴﻮﻙ ﺣﺘﻰ ﺗﺸﺘﺮﻳﻦ ﻛﻢ ﺷﻐﻠﺔ ﻟﻠﺨﻴﺎﻃﺔ ﺍﺭﻳﺪ ﺍﻛﻤﻞ ﺧﻴﺎﻁ ﺍﻟﻨﺴﻮﺍﻥ ﻻﻥ ﺍﺗﺄﺧﺮﺕ ﻭﺍﻟﻠﻪ ﺻﺮﺕ ﺍﺧﺎﻑ ﺍﻃﻠﻊ ﻣﻦ ﺍﻟﺒﻴﺖ
ﻓﺮﺡ
ﻃﺒﻌﺎ ﺻﺎﺭﺕ ﺗﺘﻜﺮﺭ ﻃﻠﺒﺎﺕ ﺧﻮﺍﺗﻲ ﻣﻨﻲ ﺣﺘﻰ ﺍﻛﻤﻞ ﺍﺣﺘﻴﺎﺟﺎﺗﻬﻢ ﺍﻧﺘﺒﻬﺖ ﻋﻠﻴﻬﻦ ﺑﺪﺓ ﺍﻋﺘﻤﺎﺩﻫﻦ ﻋﻠﻴﺔ ﺻﺎﺭ ﻳﻜﺜﺮ
ﺣﺘﻰ ﺧﻄﻴﺔ ﺳﻤﺎﺡ ﻣﺮﺓﻣﻦ ﺍﻟﻤﺮﺍﺕ ﺭﺩﺕ ﺍﻃﻠﻊ ﺍﺷﺘﺮﻱ ﻣﺴﻮﺍﻙ ﻟﻠﺒﻴﺖ
ﻗﺒﻞ ﻻ ﺍﻃﻠﻊ ﺭﺍﺣﺖ ﻋﻠﻴﺔ ﻭﺣﻀﺘﻨﻨﻲ
ﺳﻤﺎﺡ - ﺧﻴﺔ ﺩﻳﺮﻱ ﺑﺎﻟﺞ ﻋﻠﻰ ﺭﻭﺣﺞ ﺍﻧﺘﻲ ﺳﺒﺎﻋﻴﺔ ﻭﺍﺣﻨﺎ ﺧﻠﻴﻨﺎ ﺍﻋﺘﻤﺎﺩﻧﺎ ﻋﻠﻴﺞ ﺣﺒﻴﺒﺘﻲ ﺗﺤﻤﻠﻲ ﻻﻥ ﺍﻧﺘﻲ ﺍﻗﻮﻯ ﻭﺣﺪﺓ ﺑﻴﻨﺎ ﺣﺘﻰ ﺍﺣﺲ ﺑﻴﺞ ﺍﻧﺘﻲ ﺍﻻﺥ ﺍﻟﻲ ﺍﻟﻠﻪ ﻣﺎ ﺭﺯﻗﻨﺎ ﺑﻲ
ﻓﺮﺡ ﻭﻫﻲ ﺟﺪﺍ ﺳﻌﻴﺪﺓ ﺑﻜﻼﻡ ﻭﺍﻋﺘﻤﺎﺩ ﺧﻮﺍﺗﻬﺎ ﻋﻠﻴﻬﺎ ﻭﻫﻲ ﻫﺎﻱ ﻏﺎﻳﺘﻬﺎ ﺣﺘﻰ ﺗﻜﻮﻥ ﺍﻟﺴﻨﺪ ﻟﺨﻮﺍﺗﻬﺎ ﻭﺗﺤﻤﻴﻬﻦ ﻣﻦ ﺍﺫﻯ ﺍﻟﻨﺎﺱ
ﻓﺮﺡ ﺑﺒﺘﺴﺎﻣﺔ - ﻭﻻﻳﻬﻤﺞ ﺍﺧﻮﻛﻢ ﺟﻌﻔﺮ ﺑﺎﻟﺨﺪﻣﺔ
ﺭﺣﺖ ﺍﺧﺬﺕ ﺍﻟﻔﻠﻮﺱ ﻣﻨﻬﺎ
ﻭﺭﺣﺖ ﻋﻠﻰ ﺍﻟﺴﻮﻙ ﺭﻏﻢ ﺻﻼﺑﺘﻲ ﻭﻋﺪﻡ ﻣﺒﺎﻻﺗﻲ ﺑﻜﻼﻡ ﺍﻟﺘﺤﺮﺵ ﻟﻜﻦ ﺗﺒﻘﻰ ﺍﻻﻧﻔﺲ ﺍﻟﻀﻌﻴﻔﺔ ﻣﻮﺟﻮﺩﺓ ﺑﻜﻞ ﻣﻜﺎﻥ
ﻭﻣﻬﻤﺎ ﺣﺎﻭﻟﺖ ﺍﻥ ﺍﺟﺘﺎﺯ ﺍﻭ ﺍﻏﺾ ﺍﻟﻨﻈﺮ ﻋﻨﻬﻢ ﻟﻜﻦ ﻫﻤﺔ ﺍﻟﻤﺮﺿﺔ ﻣﺎ ﻳﺘﺮﻛﻮﻧﻲ ﺑﺤﺎﻟﻲ
ﻭﺭﺟﻌﺖ ﻟﻠﺒﻴﺖ ﻭﺣﺴﻴﺖ ﺑﺎﻻﺧﺘﻨﺎﻕ ﻣﻦ ﺍﻟﻲ ﺟﺎﻱ ﺍﺗﺤﻤﻠﺔ ﻣﻦ ﺍﻟﻲ ﺑﻌﺪ ﺣﺎﺩﺙ ﺳﻤﺎﺡ ﺍﺣﺲ ﺍﻟﻨﺎﺱ ﻛﺎﻣﺖ ﺗﻨﻬﺶ ﺑﻠﺤﻤﻨﺎ
ﻳﻮﻡ ﻋﻦ ﻳﻮﻡ ﻛﻤﺖ ﺍﻧﺘﺒﻪ ﻋﻠﻰ ﻣﻌﺎﻟﻢ ﺟﺴﻤﻲ ﺍﻻﻧﺜﻮﻳﺔ ﻛﺎﻣﺖ ﺗﺒﺮﺯ ﻭﺗﺼﺒﺢ ﺭﻳﺎﻧﺔ ﻭﻣﻠﻔﺘﺔ ﻟﻼﻧﺘﺒﺎﻩ
ﻛﻨﺖ ﺍﺣﺎﻭﻝ ﺍﻟﺒﺲ ﻣﻼﺑﺲ ﻋﺮﻳﻀﺔ ﻟﻜﻦ ﻫﻢ ﻣﺎ ﻛﺪﺭﺕ ﺗﺤﻤﻴﻨﻲ ﻣﻨﻬﻢ
ﻭﻗﺮﺭﺕ ﺍﻟﺒﺲ ﻋﺒﺎﻳﺔ ﺭﺍﺱ
ﺣﺘﻰ ﻭﻟﻮ ﻣﺎ ﺍﻋﺮﻑ ﺍﻟﺒﺴﻬﺎ
ﻭﻳﻮﻡ ﺍﻟﻲ ﻃﻠﻌﺖ ﺑﻴﻬﺎ ﺑﺎﻟﻌﺒﺎﻳﺔ ﺍﺷﻮ ﻭ ﻧﻮﺏ ﺯﺍﺩﺕ ﻋﻠﻴﺔ ﺑﻠﻔﺖ ﺍﻻﻧﺘﺒﺎﻩ ﺑﺎﻥ ﺍﻧﻲ ﺻﺮﺕ ﻣﺮﺓ ﺟﺒﻴﺮﺓ
ﻭﺍﻟﻠﻪ ﺍﺣﺘﺎﺭﻳﺖ ﺷﻠﻮﻥ ﺍﺩﺍﺭﻱ ﺭﻭﺣﻲ ﻭﺍﺣﻔﻈﻬﺎ
ﺗﺮﺓ ﻫﻲ ﻣﻮ ﺻﻌﺒﺔ ﻭﺣﺪﺓ ﺗﺤﻔﻆ ﺭﻭﺣﻬﺎ ﺑﻬﺬﺍ ﺍﻟﻮﻛﺖ ﻟﻜﻦ ﺍﻟﻲ ﺑﻮﺿﻌﻨﺎ ﻭﺳﺎﻟﻔﺔ ﺍﺧﺘﻲ ﻫﻲ ﺍﻟﻲ ﺧﻠﺖ ﺍﻟﻨﺎﺱ ﺗﺎﺧﺬ ﻧﻈﺮﺓ ﻋﻨﺎ ﺍﻥ ﺍﺣﻨﺎ ﺳﻬﻼﺕ
ﻓﺰﻳﺖ ﻣﻦ ﺍﻟﺬﻛﺮﻳﺎﺕ ﻋﻠﻰ ﺻﻮﺕ ﺻﺮﻳﺦ ﺳﺮﻭﺭ
ﺭﺣﺖ ﺭﻛﻀﺖ ﺷﻔﺖ ﺳﻤﺎﺡ ﺗﺪﻙ ﻭﺗﻠﻄﻢ ﺧﺪﻫﺎ
ﻓﺮﺡ - ﻳﻤﺔ ﺍﺧﺘﻲ ﻳﻤﺔ ﺷﻮﺩﺍﺝ ﻋﺎﻟﻤﺎﻱ ﺍﻟﺤﺎﺭ
ﺳﻠﻮﻯ ﻭﻫﻲ ﺗﻠﺒﺲ ﺑﻌﺒﺎﻳﺘﻬﺎ ﻭﺍﻧﻲ ﺭﺣﺖ ﮔﺒﻞ ﻟﺒﺴﺖ ﺷﺎﻟﻲ ﺭﻛﻀﺖ ﻋﻠﻰ ﺑﻴﺖ ﻋﻤﻮ ﺍﺑﻮ ﻧﻮﺍﻝ ﺍﻟﻲ ﻣﺎﻋﻨﺪﻧﺎ ﻏﻴﺮﺍﻟﻠﻪ ﻭﻫﻮﺓ
ﺧﻄﻴﺔ ﺍﺑﺘﻠﻰ ﺑﻴﻨﺎ ﺍﻧﻲ ﻭﺧﻮﺍﺗﻲ ﻭﺍﺧﺬﻧﺎ ﺳﺮﻭﺭ ﻟﻠﻤﺴﺘﺸﻔﻰ
ﻭﺍﺳﺘﻠﻤﻮﻫﺎ ﻣﻨﻲ ﻭﺍﻧﻲ ﺭﺣﺖ ﻭﻳﺔ ﺍﺑﻮ ﻧﻮﺍﻝ ﻟﻠﺪﻛﺘﻮﺭ ﺷﺮﺣﺖ ﺍﻟﺔ ﺷﻠﻮﻥ ﺟﺪﺭ ﺍﻟﻤﺎﻱ ﺍﻟﺤﺎﺭ ﺍﻟﻲ ﻛﺎﻥ ﻳﻔﻮﺭ ﻋﻠﻰ ﺍﻟﻄﺒﺎﺥ ﻃﺎﺡ ﻋﻠﻰ ﺭﺟﻠﻬﺎ
ﻭﺑﻌﺪﻫﺎ ﺑﻘﻴﺖ ﮔﺎﻋﺪﺓ ﺍﻧﺘﻈﺮ ﻋﻠﻰ ﺍﻋﺼﺎﺑﻲ
ﻭﻣﺮﺕ ﺳﺎﻋﺘﻴﻦ
ﻃﻠﻊ ﺍﻟﺪﻛﺘﻮﺭ ﻣﻦ ﻏﺮﻓﺔ ﺍﻻﺳﻌﺎﻑ
ﺭﺣﺖ ﺍﺭﻛﺾ ﻋﻠﻴﻪ
ﻓﺮﺡ - ﻫَـﺎ ﺩﻛﺘﻮﺭ ﻃﻤﻨﻲ ﻋﻠﻰ ﺍﺧﺘﻲ
ﺍﻟﺪﻛﺘﻮﺭ - ﺍﻟﻤﺮﻳﻀﺔ ﻣﺼﺎﺑﺔ ﺑﺤﺮﻭﻕ ﻣﻦ ﺍﻟﺪﺭﺟﺔ ﺍﻟﺜﺎﻧﻴﺔ ﺑﺎﻟﺴﺎﻕ ﻭﺻﺎﺭ ﻋﻨﺪﻫﺎ ﺗﻠﻒ ﺑﺎﻧﺴﺠﺔ ﺍﻟﺠﻠﺪ
ﺍﺣﻨﺎ ﻫﺴﺔ ﺳﻮﻳﻨﺎ ﺍﻟﻤﺮﺣﻠﺔ ﺍﻻﻭﻟﻰ ﻣﻦ ﺍﻻﺳﻌﺎﻓﺎﺕ
ﺭﺟﻌﻨﺎ ﺑﻴﻬﺎ ﻟﻠﺒﻴﺖ ﺑﻌﺪ ﻣﺎ ﺍﺧﺬﺕ ﺳﻠﻮﻯ ﺟﻤﻴﻊ ﺍﻻﺭﺷﺎﺩﺍﺕ ﻭﺍﻟﺪﻛﺘﻮﺭ ﻧﺼﺤﻨﺎ ﺍﻥ ﻧﻄﻠﻌﻬﺎ ﻣﻦ ﺍﻟﻤﺴﺘﺸﻔﻰ ﻻ ﺗﻨﻌﺪﻱ ﺑﺠﺮﺛﻮﻣﺔ ﻻﻥ ﻭﺍﻟﺤﻤﺪﻟﻠﻪ ﻣﺎﻛﻮ ﻋﻨﺎﻳﺔ ﻭﺧﺪﻣﺎﺕ ﺑﺎﻟﻤﺴﺘﺸﻔﻰ ﺟﺪﺍ ﻛﺎﻥ ﺍﻟﻮﺿﻊ ﺗﻌﺒﺎﻥ
ﻭﺧﻄﻴﺔ ﺭﻓﻌﻨﺎ ﺭﺟﻠﻬﺎ ﻟﻼﻋﻠﻰ ﺣﺘﻰ ﺗﺘﺠﻨﺐ ﻇﻬﻮﺭ ﺍﻟﻔﻘﺎﻋﺎﺕ
ﺍﻟﺠﻠﺪﻳﺔ ﻭﺳﻤﺎﺡ ﻛﻌﺪﺕ ﺗﺴﻬﺮ ﻋﻠﻴﻬﺎ ﻭﺗﻌﺎﻟﺠﻬﺎ
ﻭﻃﺒﻌﺎ ﻣﺎ ﺍﺣﺠﻴﻠﻜﻢ ﻋﻦ ﻣﺼﺎﺭﻳﻒ ﺍﻟﺪﻛﺎﺗﺮﺓ ﻭﺍﻟﻌﻼﺟﺎﺕ ﻣﺎﺧﻠﻴﻨﺎ ﺷﻲ ﺑﺎﻟﺒﻴﺖ ﻣﺎ ﺑﻌﻨﺎﻩ ﻭﺍﺷﺘﺮﻳﻨﺎ ﺑﻴﻪ ﻋﻼﺝ ﻟﺴﺮﻭﺭ ﻟﺤﺪ ﻭﺻﻞ ﺑﻴﻨﺎ ﺍﻟﺤﺎﻝ ﻓﻠﺴﻨﺎ ﻛﻠﺶ ﻭﺍﺿﻄﺮﻳﻨﺎ
ﺍﻥ ﻧﻬﻤﻞ ﻣﻮﻋﺪ ﺍﻟﺪﻛﺘﻮﺭ ﻻﻥ ﻣﺎﻋﺪﻧﺎ ﺟﻮﺓ ﺍﻳﺪﻧﺎ ﻓﻠﻮﺱ
ﻭﺧﻄﻴﺔ ﻫﻲ ﺍﺑﻨﻴﺔ ﺍﺫﺍ ﻣﺎ ﺍﺗﻼﺣﻜﻨﺎ ﻋﻠﻴﻬﺎ ﺗﺘﺸﻮﻩ
ﻭﻣﻦ ﻓﺎﺕ ﺍﻟﻤﻮﻋﺪ ﻋﻦ ﺍﻟﻄﺒﻴﺐ ﺻﺎﺭ ﺑﺠﻠﺪﻫﺎ ﺑﻤﻜﺎﻥ ﺍﻟﺤﺮﻙ ﺟﺮﺍﺣﺔ ﻭﺍﻟﺘﻬﺐ ﺍﻟﻤﻜﺎﻥ
ﻓﺮﺡ ﻭﻣﻦ ﻋﻨﺪﻫﺎ ﻗﺮﺭﺕ ﻗﺮﺍﺭ ﻻﺭﺟﻮﻉ ﻓﻴﻪ
ﻭﻫﻲ ﺗﺤﺠﻲ ﻭﻳﺔ ﺭﻭﺣﻬﺎ
ﻻﺯﻡ ﻭﺣﺪﺓ ﺑﻴﻨﺎ ﺗﻨﻬﺾ ﻭﺗﻘﺎﻭﻡ ﻣﺎﻳﺼﻴﺮ ﻛﻠﻨﺎ ﺿﻌﻴﻔﺎﺕ
ﺍﻟﻬﻲ ﺍﻃﻠﺐ ﻣﻨﻚ ﺍﻟﻌﻮﻥ
ﺭﺣﺖ ﺩﺧﻠﺖ ﻟﻠﻐﺮﻓﺔ ﻭﺍﻧﻲ ﺍﻣﺸﻲ ﺑﺨﻄﻮﺍﺕ ﺟﺪﺍً ﺛﻘﻴﻠﺔ ﻣﺘﻮﺟﻪ ﺑﺎﺗﺠﺎﻩ ﺍﻟﻘﺮﺍﺭ
↙️
ﻓﺮﺡ
ﺍﺗﺨﺬﺕ ﻗﺮﺍﺭ ﺑﻴﻨﻲ ﻭﺑﻴﻦ ﻧﻔﺴﻲ ﻭﻻﺯﻡ ﺍﺳﻮﻳﻪ ﻻﻥ ﻣﺎﻋﺎﺩ ﺍﻻﻣﺮ ﻳﻨﺴﻜﺖ ﻋﻠﻴﺔ
ﺭﺣﺖ ﺩﺧﻠﺖ ﻟﻠﻐﺮﻓﺔ
ﻭﻟﺰﻣﺖ ﻣﻜﺺ ﻭﻛﺼﻴﺖ ﺷﻌﺮﻱ ﺍﻟﻄﻮﻳﻞ ﺍﻟﻲ ﻛﺎﻥ ﺍﺑﻮﻳﺔ ﻳﺤﺒﺔ ﻭﻳﮕﻠﻲ ﺩﻳﺮﻱ ﺑﺎﻟﺞ ﺗﮕﺼﻲ
)) ﺍﻋﺘﺬﺭ ﻣﻨﻚ ﻳﺎ ﺍﺑﻲ ﻓﺎﻟﺰﻣﻦ ﻗﺪ ﺟﺎﺭ ﻋﻠﻴﻨﺎ
ﻓﻠﻢ ﻳﺮﺣﻢ ﺍﺑﻨﺘﻚ ﺍﻟﻜﺒﻴﺮﺓ ﻭﻟﻢ ﻳﺒﺎﻟﻲ ﺑﺎﺑﻨﺘﻚ ﺍﻟﺼﻐﻴﺮﺓ
ﻓﺒﺮﺯﺕ ﻓﻴﻬﻢ ﻻﻗﺎﺗﻞ ﺍﻻﻭﺟﺎﻉ ﺍﻟﺘﻲ ﺗﺪﻓﻊ ﺑﻲ ﻭﺑﺎﺧﻮﺗﻲ
ﺍﻟﻰ ﺣﺎﻓﺔ ﺍﻟﻬﺎﻭﻳﺔ
ﻛﺎﻥ ﻳﺠﺐ ﺍﻥ ﺍﺭﺩﻋﻬﺎ ﻋﻦ ﺣﺒﻴﺒﺎﺗﻚ ﻳﺎ ﺍﺑﻲ ((
ﻭﺍﺑﺎﻭﻉ ﻋﻠﻰ ﺷﻌﺮﻱ ﺍﻟﻄﻮﻳﻞ ﺷﻠﻮﻥ ﮔﺪﺍﻡ ﻋﻴﻮﻧﻲ ﻳﻮﮔﻊ ﻭﺳﻮﻳﺘﺔ ﻭﻻﺩﻱ ﺷﻔﺖ ﺑﻜﻞ ﺧﺼﻠﺔ ﺗﻮﻛﻊ ﻣﻨﻲ ﺑﺎﻟﮕﺎﻉ
ﺣﺴﻴﺖ ﺑﻬﺎ ﺣﻠﻢ ﻣﺬﺑﻮﺡ ﺑﺼﺪﺭﻱ
ﺻﺎﺭ ﻭﻳﺔ ﺳﻘﻮﻁ ﻛﻞ ﺧﺼﻠﺔ ﺻﺎﺭ ﻳﺴﻘﻂ ﻭﻳﺎﻩ ﺍﻣﻨﻴﺔ
ﻭﻛﺄﻧﻨﻲ ﻭﻗﻌﺖ ﻋﻠﻰ ﺍﻧﻬﺎﺀ ﺷﺒﺎﺑﻲ ﺑﻴﺪﻱ
ﺑﻌﺪﻫﺎ ﻟﺰﻣﺖ ﻣﻜﻴﻨﺔ ﻭﺣﻠﻘﺖ ﺷﻌﺮﻱ ﻭﺻﺎﺭ ﺝ ﻭﻻﺩﻱ
ﻭﻧﻈﺮﺕ ﻟﺮﻭﺣﻲ ﺑﺎﻟﻤﺮﺍﻳﺎ ﻭﺷﻔﺖ ﺷﻜﻞ ﻭﺣﺪﺓ ﺻﻐﻴﺮﺓ ﺧﺬﻟﻬﺎ ﺍﻟﺰﻣﻦ
ﺩﺧﻠﺖ ﻋﻠﻴﺔ ﺳﻤﺎﺡ
ﺳﻤﺎﺡ ﻭﻫﻲ ﺗﺸﻬﻚ ﻭﺗﻠﻄﻢ ﻭﺟﻬﺎ - ﻋﺰﺓ ﺑﻌﻴﻨﺞ ﻫﺎﻱ ﻟﻴﺶ ﻫﻴﺞ ﺳﻮﻳﺘﻲ ﺑﺸﻌﺮﺝ ﻓﺮﺡ ﺷﺒﻴﺞ ﺗﺨﺒﻠﺘﻲ
ﻓﺮﺡ - ﻻ ﺳﻤﺎﺡ ﻣﺎ ﺍﺣﺘﺎﺟﺔ ﺻﺎﺭ ﻭﻛﺖ ﺍﻟﻲ ﻻﺯﻡ ﻭﺣﺪﺓ ﺑﻴﻨﺎ
ﺍﻥ ﺗﮕﻮﻡ ﺑﻮﺍﺟﺐ ﻫﺬﺍ ﺍﻟﺒﻴﺖ ﺷﻮﻓﺖ ﻋﻴﻨﺞ ﺷﻔﺘﻲ ﺷﺼﺎﺭ ﺑﻴﺞ ﻣﻦ ﺭﺩﺗﻲ ﺗﺸﺘﻐﻠﻴﻦ ﺣﺘﻰ ﺗﻌﻴﻠﻴﻨﺎ ﻟﻜﻦ ﻫﺎﻟﻤﺮﺓ ﺍﻧﻲ ﺭﺍﺡ ﺍﺷﺘﻐﻞ ﻭﺍﺻﻴﺮ ﺍﺑﻮ ﺍﻟﺒﻴﺖ
ﺍﻧﻲ ﺍﻻﺑﻦ ﺍﻟﻤﺎﺟﺒﺘﺔ ﺍﻣﻲ ﻻﺯﻡ ﺍﺳﻮﻱ ﻫﻴﺞ
ﻧﻈﺮﺕ ﻋﻠﻰ ﺷﻜﻞ ﺳﻤﺎﺡ ﻛﺎﻧﺖ ﻣﻌﺎﻟﻢ ﻭﺟﻬﺎ ﺍﻧﺮﺳﻢ ﻋﻠﻴﻪ ﺍﻟﺒﺆﺱ ﻭﺍﻟﻴﺄﺱ
ﺳﻤﺎﺡ ﻭﻫﻲ ﺗﺒﺠﻲ ﻋﻠﻰ ﺷﻜﻞ ﺍﺧﺘﻬﺎ - ﻟﻴﺶ ﻭﻟﺞ ﻟﻴﺶ ﻫﻴﺞ ﺳﻮﺗﻲ ﻭﻟﺞ ﻣﻮ ﻫﺬﺍ ﺷﻌﺮﺝ ﺍﻟﻲ ﺍﺑﻮﻱ ﻳﺘﻐﺰﻝ ﺑﻲ ﻭﻳﺤﺒﺔ ﺷﻠﻮﻥ ﺍﻧﻄﺎﺝ ﮔﻠﺒﺞ ﻫﻴﺞ ﺗﻜﺼﻲ
ﺑﺲ ﺳﻤﺎﺡ ﺍﺳﺘﺴﻠﻤﺖ ﻟﻠﺒﻜﺎﺀ ﻻﻥ ﻫﻲ ﺑﻨﻔﺴﻬﺎ ﻣﺎﺑﻴﺪﻫﺎ ﻻﺣﻮﻝ ﻭﻻ ﻗﻮﺓ ﺣﺘﻰ ﺗﻤﻨﻌﻨﻲ
ﺍﻧﺘﺒﻬﺖ ﻋﻠﻰ ﺣﺮﻛﺔ ﺳﻤﺎﺡ ﺍﻟﻤﻜﺴﻮﺭﺓ ﺷﻠﻮﻥ ﺩﻧﮕﺖ ﻭﻟﻤﺖ ﺧﺼﻞ ﺍﻟﺸﻌﺮ ﻣﺎﻟﺘﻲ ﻭﻫﻲ ﺗﺒﺠﻲ
ﻭﺷﻔﺖ ﺳﻠﻮﻯ ﻭﺍﻛﻔﺔ ﺑﺎﻟﺒﺎﺏ ﻭﺍﻳﺪﻫﺎ ﻋﻠﻰ ﺣﻠﻜﻪ
ﻣﺼﺪﻭﻣﺔ ﻣﻦ ﺍﻟﺸﺎﻓﺘﺔ
ﺭﺣﺖ ﻟﺒﺴﺖ ﺷﺎﻟﻲ ﻭﻋﺒﺎﺗﻲ ﻭﻃﻠﻌﺖ ﻋﻠﻰ ﺍﻟﺴﻮﻙ ﻭﺭﺣﺖ ﺍﺷﺘﺮﻳﺖ ﻣﻼﺑﺲ ﻭﻻﺩﻳﺔ ﻋﻠﻰ ﻣﻘﺎﺳﻲ ﻭﺍﺷﺘﺮﻳﺖ ﺟﺮﺍﻭﻳﺔ ﺍﻭ ( ﭼﻔﻴﺔ ) ﺷﻤﺎﻍ ﺣﺘﻰ ﺍﻟﻔﻬﺔ ﻋﻠﻰ ﺭﺍﺳﻲ
ﻛﺎﻧﺖ ﻫﺪﻭﻡ ﺑﺴﻴﻄﺔ
ﺭﺟﻌﺖ ﻋﻠﻰ ﺍﻟﺒﻴﺖ ﻭﺩﺧﻠﺖ ﻟﻠﻐﺮﻓﺔ ﻭﻟﺒﺴﺖ ﺍﻟﻤﺸﺪ ﻣﺎﻟﺖ ﺍﻟﺼﺪﺭ ﺣﺘﻰ ﻳﺴﺎﻋﺪﻧﻲ ﺑﺄﺧﻔﺎﺀ ﺍﻟﻤﻌﺎﻟﻢ ﺍﻻﻧﺜﻮﻳﺔ ﻭﻟﺒﺴﺖ ﻓﻮﻛﻬﺎ ﺍﻟﻬﺪﻭﻡ ﺍﻟﺮﺟﺎﻟﻴﺔ
ﻟﻔﻴﺖ ﻋﻠﻰ ﺭﺍﺳﻲ ﺍﻟﺠﺮﺍﻭﻳﺔ ﻭﺻﺎﺭ ﺷﻜﻠﻲ ﻣﺜﻞ ﻋﻤﺎﻝ ﺍﻟﺒﻨﺎﺀ ﻭﺣﻄﻴﺖ ﺻﺨﺎﻡ ﺍﺳﻮﺩ ﻓﻮﻙ ﺷﻔﺘﻲ ﺍﻟﻌﻠﻮﻳﺔ
ﺣﺘﻰ ﺗﺒﻴﻦ ﻋﺒﺎﻟﻚ ﺷﻮﺍﺭﺏ ﺧﻔﻴﻔﺔ ﻭﺍﻧﻄﻠﻘﺖ ﺑﺎﻭﻝ ﻳﻮﻡ ﺍﻟﻲ ﺑﻤﺸﻮﺍﺭﻱ ﻓﻲ ﺍﻟﺸﺎﺭﻉ ﺍﻧﻲ ﺍﺣﺲ ﺑﺮﻭﺣﻲ ﺗﺎﻳﻬﺔ
ﻃﺒﻌﺎ ﻣﺜﻠﺖ ﺍﻟﻘﻮﺓ ﺍﻣﺎﻡ ﺧﻮﺍﺗﻲ
ﺑﺲ ﺍﻟﺤﻘﻴﻘﺔ ﺍﻧﻲ ﺩﺍﺧﻠﻲ ﺿﻌﻴﻔﺔ ﺑﻀﻌﻒ ﺍﻟﻄﻔﻞ ﺍﻟﺼﻐﻴﺮ ﺍﻟﻲ ﻻﺣﻮﻝ ﻭﻻ ﻗﻮﺓ
ﻭﺻﺮﺕ ﺍﺭﻭﺡ ﺍﺳﺄﻝ ﺍﺻﺤﺎﺏ ﺍﻟﻤﺤﻼﺕ ﺍﺫﺍ ﻛﺎﻥ ﻳﺤﺘﺎﺟﻮﻥ ﻋﺎﻣﻞ ﻟﻜﻦ ﺍﻻﻏﻠﺒﻴﺔ ﺍﻟﻤﻌﺮﻭﻑ ﻋﻨﻬﻢ ﻣﺎﻳﺸﻐﻠﻮﻥ ﻋﻨﺪﻫﻢ ﻋﺎﻣﻞ ﻣﺎ ﻳﻌﺮﻓﻮﻧﻪ ﻳﺨﺎﻓﻮﻥ ﻻﻥ ﻛﻠﻬﺎ ﺗﺪﻭﺭ ﻋﻠﻰ ﻋﺎﻣﻞ ﻛﻮﻥ ﺛﻘﺔ ﻋﻠﻤﻮﺩ ﺍﻻﻣﺎﻥ
ﻟﻜﻦ ﻭﺩﺗﻨﻲ ﺭﺟﻠﻲ ﺍﻟﻰ ﺑﺎﻧﺰﻳﻦ ﺧﺎﻧﺔ ﻫﻨﺎﻙ ﺷﻔﺖ ﻫﻮﺍﻱ ﺍﻭﻻﺩ ﺑﻌﻤﺮﻱ ﻳﻨﻈﻔﻮﻥ ﺍﻟﺴﻴﺎﺭﺍﺕ ﻭﺑﻌﻀﻬﻢ ﻳﺸﺘﻐﻠﻮﻥ ﻳﺒﻴﻌﻮﻥ ﻛﻠﻴﻨﻴﻜﺲ
ﻭﺍﻟﻠﻪ ﺭﺑﻲ ﻣﺎﻗﺼﺮ ﺍﻟﻲ ﺩﺑﺮ ﺍﻣﺮﻱ ﻭﺧﻠﺔ ﺍﻟﺮﺟﺎﻝ ﻳﺤﻦ ﻋﻠﻴﺔ
ﻭﻛﻠﻲ ﻫﺎﻙ ﻳﺎﻟﻠﻪ ﺍﺳﺘﻠﻢ ﺭﻭﺡ ﺍﻟﺰﻡ ﻗﻄﻌﺔ ﺍﻟﻘﻤﺎﺵ ﻭﺑﻄﻞ ﺍﻟﺘﻨﻈﻴﻒ ﻭﺷﻮﻑ ﺑﺎﺏ ﺭﺯﻗﻚ ﺑﺲ ﺗﺮﺓ ﻫﻨﺎ ﺣﺪﻙ ﻣﺎ ﺗﺮﻭﺡ ﻟﻠﻜﺮﺍﺝ ﺗﺮﺓ ﺍﻟﻜﺮﺍﺝ ﺣﺼﺔ ﻏﻴﺮ ﺷﺒﺎﺏ ﺍﺣﻨﺎ ﺣﺪﻧﺎ ﻫﻨﺎ ﺳﺎﻣﻊ
ﻓﺮﺡ ﻭﺑﻜﻞ ﻟﻬﻔﺔ - ﺍﻱ ﺳﻤﻌﺖ ﺗﻤﺎﻡ
- ﺷﻨﻮ ﺍﺳﻤﻚ
ﻓﺮﺡ ﺑﺎﺭﺗﺒﺎﻙ ﻭﻫﻲ ﺗﺨﺸﻦ ﺻﻮﺗﻬﺎ - ﺍﺳﻤﻲ ﻓﻼﺡ
- ﻳﺎﻟﻠﻪ ﺑﻮﻳﺔ ﻓﻼﺡ ﺷﺪ ﺍﻟﻬﻤﺔ
ﻭﺍﻧﻄﻠﻖ ﻳﻮﻣﻲ ﺑﺎﻟﻌﻤﻞ ﻓﻲ ﺍﻟﺸﺎﺭﻉ
ﺑﺎﻟﺒﺪﺍﻳﺔ ﻛﻨﺖ ﻛﻠﺶ ﻣﺴﺘﺤﻴﺔ ﻭﺧﺎﻳﻔﺔ ﻟﻜﻦ ﻛﻤﺖ ﺍﺻﻴﺮ ﻭﮔﺤﺔ ﻭﺻﻠﻔﺔ ﻭﻣﻮﺑﺲ ﻫﻴﺞ ﺍﻛﺘﺸﻔﺖ ﺍﻥ ﻋﺎﻟﻢ ﺍﻟﺸﺒﺎﺏ ﺑﻲ ﻫﻮﺍﻱ ﻣﺴﺎﺣﺔ ﺣﺮﻳﺔ ﻭﻫﻮﺍﻱ ﻣﺴﺎﺣﺔ ﻟﻠﻌﻴﺶ ﻭﺗﺪﺑﻴﺮ ﺍﻟﺮﺯﻕ
ﻭﺻﺎﺩﻗﺖ ﺍﺛﻨﻴﻦ ﺍﻭﻻﺩ ﺑﺤﻠﻲ ﻛﺎﻥ ﻭﺍﺣﺪ ﺑﺼﻒ ﺭﺍﺑﻊ ﺍﻋﺪﺍﺩﻱ ﻭﺍﻟﺜﺎﻧﻲ ﻣﺒﻄﻞ
ﻛﺎﻥ ﻳﺸﺮﺏ ﺟﻜﺎﻳﺮ ﻭﻋﺮﺽ ﻟﻲ ﺟﻴﻜﺎﺭﺓ
ﺍﻟﺸﺎﺏ - ﻫَـﺎ ﺗﺨﺎﻑ ﻣﺎﺗﺸﺮﺏ ﺟﻴﻜﺎﺭﺓ
ﻓﻼﺡ - ﻻ ﻳﺨﻮﻱ ﻣﻮ ﻗﺼﺔ ﺍﺧﺎﻑ ﻟﻜﻦ ﻣﺎ ﺍﻛﺪﺭ ﻋﻠﻰ ﻣﺼﺮﻓﻬﺎ ﺗﻔﻴﺪﻧﻲ ﺑﺪﻝ ﻣﺎ ﺍﺫﺏ ﻓﻠﻮﺳﻲ ﻋﻠﻰ ﺍﻟﺴﻢ ﺍﺫﺑﺔ ﺑﻜﻴﻠﻮ ﻃﻤﺎﻃﺔ ﺷﻔﺖ ﺍﻟﻔﺮﻕ
ﺍﻟﺸﺎﺏ - ﺍﻫﻬﻮﻭﻭﻭﻭﻭﻭﻭ ﻫﺎﻱ ﺷﻨﻮ ﺍﻧﺘﺔ ﻭﺍﻟﻠﻪ ﺗﻌﺒﺎﻥ
ﻭﺩﺍﻫﻴﺔ ﺻﺪﻙ ﺟﻠﻒ ﺧﺎﻳﺐ ﺩﺗﻌﺎﻝ ﺍﺧﺬﻟﻚ ﻧﻔﺲ ﻭﺭﻳﺢ ﺩﻣﺎﻏﻚ ﻣﻦ ﺍﻟﻬﻢ
ﻋﻔﺘﻬﻢ ﻭﺭﺣﺖ ﻣﺎ ﺍﺭﻳﺪ ﺍﻗﻮﻱ ﻋﻼﻗﺘﻲ ﻭﻳﺎﻫﻢ ﻻﻥ ﺷﻲ ﺍﻛﻴﺪ ﻣﻦ ﺗﺼﻴﺮ ﺍﻟﻌﻼﻗﺎﺕ ﻗﻮﻳﺔ ﻻﺯﻡ ﺻﺤﺒﺔ ﻭﻳﺠﻮﻧﻲ ﻋﺎﻟﺒﻴﺖ ﻭﺷﻠﻲ ﺑﻬﺎﻟﺒﻬﺬﻟﺔ
ﻭﻋﺪﺕ ﺍﻻﻳﺎﻡ ﺑﺤﺮﻫﺎ ﻭﺑﺒﺮﺩﻫﺎ ﺟﻨﺖ ﻣﻦ ﺍﺭﺟﻊ ﻟﻠﺒﻴﺖ ﺑﻨﺺ ﺍﻟﻠﻴﻞ ﺍﺷﻮﻑ ﺳﻤﺎﺡ ﻣﻨﺘﻈﺮﺗﻲ ﺧﺎﻳﻔﺔ ﻭﺭﺓ ﺍﻟﺒﺎﺏ ﻭﺍﺷﻮﻓﻬﺎ ﻛﺎﻣﺖ ﺗﻌﺎﻣﻠﻨﻲ ﻋﺒﺎﻟﻚ ﺻﺪﻙ ﻭﻟﺪ ﻫﻬﻬﻬﻬﻪ ﺍﻟﮕﺎﻫﺔ ﻣﺤﻀﺮﺗﻠﻲ ﺍﻟﺤﻤﺎﻡ ﻭﻣﺴﻮﻳﺘﻠﻲ ﺍﻟﻌﺸﺎﺀ
ﻭﻛﻤﺖ ﺷﺤﺼﻞ ﻣﻦ ﻓﻠﻮﺱ ﺍﺧﻠﻲ ﺑﻴﺪﻫﺎ ﻻﻥ ﻫﻲ ﻣﺪﺑﺮﺓ ﻭﺗﻌﺮﻑ ﺷﻠﻮﻥ ﺗﺪﻳﺮ ﺍﻣﻮﺭ ﺑﻴﺘﻨﺎ
ﻣﺎ ﺍﻧﻜﺮ ﻛﺎﻧﺖ ﺣﻴﺎﺓ ﺍﻟﺸﺎﺭﻉ ﺟﺪﺍ ﺻﻌﺒﺔ
ﻣﺮﺍﺕ ﺍﺷﻮﻑ ﺍﻭﻻﺩ ﻳﺘﻌﺎﺭﻛﻮﻥ ﻭﻣﺮﺍﺕ ﻳﻮﺻﻞ ﻟﻲ ﺍﻟﺴﺮﺓ ﺑﺎﻟﻌﺮﺍﻳﻚ
ﻳﺠﻮﻥ ﺑﺪﻭﻥ ﺳﺒﺐ ﻳﺘﻌﺎﺭﻛﻮﻥ ﻭﻳﺎﻱ ﻻﻥ ﻳﺤﺴﻮﻥ ﺍﻥ ﺍﻧﻲ ﻣﺎﺧﺬ ﻣﺴﺎﺣﺔ ﻣﻦ ﺷﻐﻠﻬﻢ ﻭﻣﻀﺎﻳﻖ ﺭﺯﻗﻬﻢ
ﻭﻓﺪ ﻳﻮﻡ ﺍﺟﺔ ﻭﺍﺣﺪ ﻣﻬﺘﻠﻒ ﺭﺍﺩ ﻳﺘﻌﺎﺭﻙ ﻭﻳﺎﻱ ﻭﺿﻞ ﻳﺤﺠﻲ ﻭﻳﺪﻓﻊ ﻟﻜﻦ ﺍﻧﻲ ﺿﻠﻴﺖ ﺳﺎﻛﺘﺔ ﻻﻥ ﻣﻬﻤﺎ ﻛﺎﻥ ﺍﺧﺎﻑ ﻋﻠﻰ ﺭﻭﺣﻲ ﻻﻥ ﺍﺑﻘﻰ ﺑﻨﻴﺔ ﻟﻮ ﻣﻬﻤﺎ ﻛﺎﻥ
ﻟﻜﻦ ﻣﻦ ﺣﺠﺔ ﺍﻟﻜﻠﻤﺔ ﺍﻻﺧﻴﺮ ﺍﻟﻲ ﻛﺎﻧﺖ ﺗﻤﺲ ﺍﻣﻲ
ﻭ ﻏﻠﻂ ﻋﻠﻰ ﺍﻫﻠﻲ ﺍﻧﻲ ﻣﺎ ﺍﺗﺤﻤﻠﺖ ﻭﺩﻣﻲ ﻓﺎﺭ ﻛﺒﻞ ﻟﺰﻣﺖ ﻃﺎﺑﻮﻛﺔ ﻛﺎﻧﺖ ﺑﺎﻟﮕﺎﻉ ﻭﺷﻤﺮﺗﻬﺎ ﻋﻠﻴﻪ
ﻭﻫﻮ ﮔﺒﻞ ﻫﺪ ﻋﻠﻴﺔ ﻭﺷﺒﻌﻨﻲ ﻃﻦ ﺿﺮﺏ ﺑﻮﻛﺴﺎﺕ ﻭﺭﻓﺲ
ﺑﺤﻴﺚ ﺣﺴﻴﺖ ﺯﻫﻜﺖ ﺭﻭﺣﻲ ﻣﻦ ﺍﻻﻟﻢ
ﺍﻧﺸﻜﺖ ﺍﻟﺸﻔﺔ ﻭﻧﺰﻝ ﻣﻨﻬﺎ ﺩﻡ ﻭﻋﻴﻨﻲ ﺻﺎﺭﺕ ﺯﺭﮔﺔ
ﻋﺒﺎﻟﻚ ﻣﻮ ﺍﻳﺪ ﺑﺸﺮ ﻋﺒﺎﻟﻚ ﺍﻳﺪ ﺣﺪﻳﺪ ﺍﻟﻠﻪ ﻳﻜﺴﺮ ﺍﻳﺪﺓ
↙️
ﻭﺭﺟﻌﺖ ﻟﻠﺒﻴﺖ ﺑﻴﻮﻣﻪ ﺧﻄﻴﺔ ﺳﻤﺎﺡ ﺷﺎﻓﺘﻨﻲ ﻇﻠﺖ ﺗﺪﻙ ﻭﺗﻠﻄﻢ ﻋﻠﻰ ﻭﺟﻬﺎ
ﺳﻤﺎﺡ - ﻭﻟﺞ ﻓﺮﺡ ﻫﺬﺍ ﻣﻨﻮ ﻣﺴﻮﻱ ﺑﻴﺞ ﻫﻴﺞ ﺷﻨﻮ ﺍﺣﺠﻲ ﻭﻟﺞ
ﻓﺮﺡ ﺑﺒﺘﺴﺎﻣﺔ ﻣﻌﻮﻗﺔ ﺣﺘﻰ ﺗﻄﻤﻦ ﺍﺧﺘﻬﺎ
ﻓﺮﺡ - ﻻﺗﺨﺎﻓﻴﻦ ﻋﻠﻴﺔ ﺍﺧﻮﺝ ﺟﻌﻔﺮ ﻣﺴﻮﻱ ﻋﺮﻛﺔ ﻭﻳﺔ ﺷﺒﺎﺏ
ﻻﺗﺨﺎﻓﻴﻦ ﻣﺎﻛﻮ ﺷﻲ ﻳﺨﻮﻑ ﺗﺮﺓ ﻋﺎﺩﻱ ﺍﻱ ﺷﺎﺏ ﺗﺼﻴﺮ ﺑﻲ ﻫﻴﺞ ﺷﻲ
ﺟﺎﺑﺖ ﺳﻤﺎﺡ ﺍﻟﻤﺎﻱ ﺍﻟﺪﺍﻓﻲ ﻭﺍﻟﻜﻄﻦ ﻭﻛﻌﺪﺕ ﺗﻤﺴﺢ ﻭﺟﻬﻲ ﻭﺗﺪﺍﻭﻱ ﺑﻲ ﺧﻴﺔ
ﺳﻤﺎﺡ - ﻭﺍﻟﻠﻪ ﺧﺎﻳﻔﺔ ﻋﻠﻴﺞ ﻻﺗﺨﻠﻴﻦ ﺑﺎﻟﻲ ﻳﻤﺞ ﻣﻦ ﻓﺪﻭﺓ ﺭﺣﺘﻠﺞ
ﻭﺑﻌﺪﻫﺎ ﺍﺳﺘﻤﺮﻳﺖ ﺍﺷﺘﻐﻞ ﻭﻣﺎﻋﻠﻴﺔ ﺑﺎﺣﺪ
ﺑﺲ ﻋﻠﻤﻨﻲ ﺻﺪﻳﻘﻲ ﺍﻥ ﺍﺷﻴﻞ ﻭﻳﺎﻱ ﺩﺍﺋﻤﺎً ﺳﺠﻴﻦ ﺻﻐﻴﺮﺓ
ﺗﻄﺒﮓ
ﻳﺴﻤﻮﻧﻬﺎ ﺍﻡ ﺍﻟﻴﺎﻱ ﻫﺎﻱ ﺍﻫﻞ ﺍﻟﺸﻘﺎﻭﺓ ﻭﺍﻟﺴﺠﻮﻥ ﻳﺴﺘﻌﻤﻠﻮﻧﻬﺎ ﺻﺮﺕ ﺩﺍﺋﻤﺎ ﺍﺣﻄﻬﺎ ﺑﺎﻟﺠﻮﺭﺍﺏ
ﻭﻣﺮﺕ ﺍﻻﻳﺎﻡ
ﻭﺑﻴﻮﻡ ﺍﺗﺬﻛﺮ ﻣﻦ ﻛﻨﺖ ﺍﻣﺴﺢ ﺟﺎﻡ ﺍﻟﺴﻴﺎﺭﺓ ﻭﻣﻠﺘﻬﻴﺔ ﻭﻣﺎ ﻣﻨﺘﺒﻪ ﻋﻠﻰ ﺍﻟﺸﺨﺺ ﺍﻟﺠﺎﻟﺲ ﺑﻴﻬﺎ
ﻟﻴﺶ ﻣﺎ ﺍﻧﻔﺘﺤﺖ ﺍﻟﺠﺎﻣﺔ ﻣﺎﻟﺖ ﺍﻟﺴﻴﺎﺭﺓ
ﺍﻟﺮﺟﺎﻝ ﺍﻟﻲ ﺩﺍﺧﻞ ﺍﻟﺴﻴﺎﺭﺓ ﮔﻌﺪ ﻳﺴﺄﻟﻨﻲ ﺍﺳﺌﻠﺔ ﻏﺮﻳﺒﺔ ﻭﺍﻧﻲ ﻣﻠﺘﻬﻴﺔ ﻋﻨﺔ
ﺍﻟﺮﺟﺎﻝ - ﺍﻛﻮﻝ ﺍﻧﺖ ﻳﺎﺣﻠﻮ ﺷﻜﺪ ﻋﻤﺮﻙ
ﻓﻼﺡ - ﺍﻧﺔ ﻋﻤﺮﻱ ١٧ﺳﻨﺔ
ﺍﺑﺎﻭﻉ ﻋﻠﻴﻪ ﺻﺎﻓﻦ ﻋﻠﻰ ﺟﺴﻤﻲ ﻭﻳﻔﺮﻙ ﺑﻠﺤﻴﺘﺎ
ﺍﻟﺮﺟﺎﻝ ﺍﺑﺘﺴﻢ - ﺍﻧﺖ ﻭﺍﻟﻠﻪ ﺻﺎﻙ ﺗﻌﺮﻑ ﺍﻧﺔ ﺣﺒﻴﺘﻚ
ﻭﺍﺭﻳﺪﻙ ﺗﺠﻲ ﻭﻳﺎﻱ ﺍﻋﺰﻣﻚ ﻋﻠﻰ ﻋﺸﺎ ﺑﺸﻘﺘﻲ
ﺳﻤﻌﺖ ﺻﻮﺕ ﺍﻟﺮﺟﺎﻝ ﺍﻟﻲ ﻣﺸﻐﻠﻨﻲ ﻋﻨﺪﺓ ﺍﺳﻤﺔ ﺍﺑﻮ ﺍﺑﺮﺍﻫﻴﻢ ﻳﺼﻴﺤﻨﻲ
ﻓﻼﺡ ﻓﻼﺡ
ﺭﺣﺖ ﻋﻠﻴﻪ ﺍﺭﻛﺾً ﻭﻧﻈﺮﺍﺕ ﺍﻟﺮﺟﺎﻝ ﺍﻟﻤﺠﻬﻮﻝ ﺍﺣﺲ ﺍﻛﻠﺘﻨﻲ ﺑﺤﻴﺚ ﺷﻜﻴﺖ ﺑﺮﻭﺣﻲ ﺧﺎﻑ ﻋﺮﻑ ﺑﻴﺔ ﻭﺍﻛﺘﺸﻔﻨﻲ ﺍﻧﻲ ﺍﺑﻨﻴﺔ
ﻭﺻﻠﺖ ﻟﻌﻨﺪ ﺍﺑﻮ ﺍﺑﺮﺍﻫﻴﻢ - ﻫَـﺎ ﻋﻤﻲ ﺁﻣﺮ ﻟﻴﺶ ﺻﺤﺘﻨﻲ
ﺍﺑﻮ ﺍﺑﺮﺍﻫﻴﻢ - ﻣﺎ ﺍﺭﻳﺪﻙ ﺗﺤﺘﻚ ﻭﺗﺴﻮﻟﻒ ﻭﻳﺔ ﻫﺬﺍ ﺍﻟﺮﺟﺎﻝ ﻓﺎﻫﻢ ﻻﺗﻄﻮﻝ ﻭﻳﺎﻩ ﺑﺎﻟﺤﺠﻲ ﺧﻠﺺ ﻣﺴﺢ ﺍﻟﺴﻴﺎﺭﺓ ﻭﺍﺑﺘﻌﺪ
ﻓﻼﺡ - ﺍﻱ ﻋﻤﻲ ﺑﺲ ﺍﮔﺪﺭ ﺍﻋﺮﻑ ﻟﻴﺶ ﻣﺎﺗﻘﺒﻞ ﺍﻗﺘﺮﺏ ﻣﻦ ﻋﻨﺪﺓ
ﺍﺑﻮ ﺍﺑﺮﺍﻫﻴﻢ - ﻭﺍﻟﻠﻪ ﻳﺎ ﺑﻮﻳﺔ ﻣﺎ ﺍﻋﺮﻑ ﺷﻨﻮ ﺍﮔﻠﻚ ﺑﺲ ﻛﻞ ﺍﻟﻠﻲ ﺍﮔﺪﺭ ﺍﮔﻮﻟﺔ ﺍﻥ ﻫﺬﺍ ﺍﻟﺮﺟﺎﻝ ﺷﺎﺫ ﻳﻌﻨﻲ ﻳﻨﺼﺐ ﻋﻠﻰ ﺍﻻﻭﻻﺩ ﺑﻌﻤﺮﻙ ﺍﻟﻲ ﻳﻌﺠﺒﻮﻧﺔ ﻭﻳﻘﺸﻤﺮﻫﻢ ﻭﻭﻭﻭﻭﻭﻭﻭﻭﻭﻭ
ﺍﺳﺘﻐﻔﺮ ﺍﻟﻠﻪ ﺍﺳﺘﻐﻔﺮ ﺍﻟﻠﻪ
ﻓﺮﺡ ﻣﻦ ﺍﻟﺨﻮﻓﺔ ﻭﺍﻟﻤﻔﺎﺟﺌﺔ ﻟﻄﻤﺖ ﻋﻠﻰ ﺻﺪﺭﻱ ﻣﺜﻞ ﺍﻟﺒﻨﻴﺔ ﻭﻟﻔﺘﺖ ﺍﻧﺘﺒﺎﻩ ﺍﻟﺮﺟﺎﻝ ﺍﺑﻮ ﺍﺑﺮﺍﻫﻴﻢ
( ﻳﻌﻨﻲ ﻫﺬﺍ ﺍﻟﺮﺟﺎﻝ ﺍﻟﻮﺻﺦ ﻳﺪﻭﺭ ﻭﻟﺪ ﻭﻳﻤﺎﺭﺱ ﻭﻳﺎﻫﻢ ﺍﻟﺮﺫﻳﻠﺔ ﺍﻟﻠﻪ ﻳﺎﺧﺬﺓ ﺍﻟﻨﺠﺲ )
ﺍﺑﻮ ﺍﺑﺮﺍﻫﻴﻢ - ﻭﺍﻧﺖ ﺍﻟﻠﻪ ﻳﺤﻔﻈﻚ ﺑﻮﻳﺔ ﻫﻢ ﺷﻮﻳﺔ ﺻﻴﺮ ﺳﺒﻊ ﻋﻨﺪﻙ ﻣﻴﺎﻋﺔ ﻭﺣﺮﻛﺎﺕ ﻣﺎﻝ ﺑﻨﺎﺕ ﻋﻴﺐ ﺍﻟﺮﺟﺎﻝ ﻳﺴﻮﻳﻬﺔ ﺻﻴﺮ ﺯﻟﻤﺔ ﺧﺸﻦ ﻫﺴﺔ ﺑﺎﻟﻠﻪ ﺍﻛﻮ ﻭﺍﺣﺪ ﻳﺴﻮﻱ ﺳﻮﺍﻳﺘﻚ ﻭﻳﻠﻄﻢ ﻋﻠﻰ ﺻﺪﺭﻩ ﻣﺜﻞ ﺍﻟﻤﺮﺓ
ﻓﺮﺡ ﺻﺪﻙ ﺑﻮﻛﺘﻬﺎ ﮔﻌﺪﺕ ﺍﻧﺘﺒﻪ ﻋﻠﻰ ﺣﺮﻛﺎﺕ ﺍﻟﺸﺒﺎﺏ
ﻭﺻﺮﺕ ﻳﻮﻡ ﻋﻦ ﻳﻮﻡ ﺍﻗﺘﻨﺺ ﺧﺼﻠﺔ ﻣﻦ ﻋﻨﺪﻫﻢ ﻭﺻﺮﺕ ﺍﺧﺰﺭ ﻭﺍﺯﻣﺦ ﺣﺘﻰ ﺻﺮﺕ ﺍﻋﺮﻑ ﺷﻘﺎﻭﺗﻬﻢ ﻭﺍﺳﻠﻮﺏ ﺍﻟﻜﻼﻡ
ﻫﻬﻬﻬﻬﻬﻬﻬﻬﻬﻬﻬﻪ ﻭﻓﺪ ﻳﻮﻡ ﺟﻨﺖ ﺍﻣﺴﺢ ﺳﻴﺎﺭﺓ ﻭﻛﺎﻧﺖ ﺍﻛﻮ ﺑﻨﻴﺔ ﻣﻮﺟﻮﺩﺓ ﺑﺎﻟﺴﻴﺎﺭﺓ ﻭﻳﺔ ﺍﺑﻮﻫﺎ ﻧﺰﻝ ﺍﺑﻮﻫﺎ ﻣﻦ ﺍﻟﺴﻴﺎﺭﺓ
ﻭﺑﻘﺖ ﺑﺲ ﻫﻲ ﻭﺍﻧﺔ ﻣﺎ ﺍﻧﺘﺒﻬﺖ ﻋﻠﻴﻬﺎ ﻭﻛﻌﺪﺕ ﺍﻣﺴﺢ ﺑﺎﻟﺠﺎﻡ ﻣﺎﻟﺖ ﺍﻟﺴﻴﺎﺭﺓ ﻛﻤﺰﺕ ﻣﻦ ﺷﻔﺘﻬﺎ ﺣﺮﻛﺖ ﺍﻟﻤﺎﺳﺤﺎﺕ ﻣﺎﻟﺖ ﺍﻟﺴﻴﺎﺭﺓ ﻭﺍﻧﺘﺒﻬﺖ ﻋﻠﻴﻬﺎ ﺍﺷﻮﻓﻬﺎ ﺭﻓﻌﺖ ﺣﺎﺟﺒﻬﺎ ﻭﺍﺷﺮﺕ ﻟﻲ ﺍﻥ ﺍﻗﺘﺮﺏ ﻣﻨﻬﺎ ﻭﻧﺰﻟﺖ ﺟﺎﻣﺘﻬﺎ ﻭﺍﻧﻲ ﻧﺴﻴﺖ ﻧﻔﺴﻲ ﻭﻟﺪ ﻭﺭﺣﺖ ﺍﻟﻬﺎ ﺍﺷﻮ ﻫﺎﻱ ﺍﻧﻄﺘﻨﻲ ﺭﻗﻢ ﻧﻘﺎﻟﻬﺎ
- ﺷﻮﻑ ﺍﻧﺖ ﺩﺧﻠﺖ ﺭﺍﺳﻲ ﻭﻋﺠﺒﺘﻨﻲ ﺗﺮﺓ ﺍﻧﺘﻈﺮﻙ ﻣﻮ ﻣﺎ ﺗﺘﺼﻞ ﻋﻠﻴﺔ ﺳﺎﻣﻊ
ﻭﻛﻌﺪﺕ ﺗﺴﺒﻞ ﺑﻌﻴﻮﻧﻪ
ﻭﺍﺟﺔ ﺍﺑﻮﻫﺎ ﻭﺷﺎﻓﻨﻲ ﺟﺎ ﻏﻴﺮ ﺍﻛﻠﻨﻲ ﺍﻛﻞ ﺑﺎﻟﻐﻠﻂ
ﻭﺯﻧﻜﻨﻲ ﻣﻦ ﻳﺎﺧﺘﻲ ﻣﺎﻟﺖ ﺍﻟﻘﻤﻴﺺ ﺯﻳﻦ ﻣﺎ ﺷﻜﻬﺎ
- ﺍﻧﺖ ﻫﻴﻲ ﺷﻠﻮﻥ ﻭﺍﻛﻒ ﺗﺘﺤﺮﺵ ﺑﺒﻨﺘﻲ
ﻓﻼﺡ ﻭﻫﻮ ﻳﻨﺘﺮ ﺍﻳﺪ ﺍﻟﺮﺟﺎﻝ ﻣﻨﺔ ﻭﻳﺪﻓﻌﺔ - ﻋﻤﻲ ﺩﺭﻭﺡ ﻭﺧﺮ ﻋﻨﻲ ﻫﻲ ﺑﻨﺘﻚ ﺍﻧﻄﺘﻨﻲ ﺭﻗﻤﻬﺎ ﻗﺎﺑﻞ ﻫﺴﺔ ﺍﻟﻴﺘﺤﺎﺭﺵ ﻫﻮ ﺍﻟﻴﻨﻄﻲ ﺍﻟﺮﻗﻢ ﻟﻮ ﻳﺎﺧﺬ ﺍﻟﺮﻗﻢ
ﻭﻋﻔﺘﺔ ﻭﺩﺭﺕ ﻭﺟﻬﻲ
ﻃﺒﻌﺎ ﺗﺮﻛﺖ ﺍﻟﻤﺪﺭﺳﺔ ﻭﺑﻄﻠﺖ ﻣﻨﻬﺎ ﺑﻌﺪ ﻣﺎ ﺻﺪﻳﻘﺎﺗﻲ ﻛﻠﻬﻢ ﺗﺮﻛﻮﻧﻲ ﺻﺎﺭﺕ ﺣﻴﺎﺓ ﺍﻟﻤﺪﺭﺳﺔ ﻣﺎ ﻳﻨﻄﺎﻕ ﻭﺻﺮﺕ ﻛﻠﺶ ﺍﻛﺮﻩ ﺍﺩﺍﻭﻡ ﻭﺑﻄﻠﺖ ﻣﻦ ﺍﻟﺨﺎﻣﺲ ﻋﻠﻤﻲ ﻭﻛﻤﻠﺖ ﺷﻐﻠﻲ ﺍﻟﻲ ﺑﻠﺸﺖ ﺑﻲ
ﻭﺻﺎﺭ ﻳﻮﻡ ﻋﻦ ﻳﻮﻡ ﺗﺰﻳﺪ ﺍﻟﻤﻀﺎﻳﻘﺎﺕ ﻳﻌﻨﻲ ﻻ ﺍﻟﺒﻨﻴﺔ ﻣﺮﺗﺎﺣﺔ ﻭﻻ ﺍﻟﻮﻟﺪ ﻫﻬﻬﻬﻬﻬﻬﻬﻬﻪ ﻭﺍﻟﻠﻪ ﻣﺸﻜﻠﺔ ﺻﺪﻙ ﺍﻟﺤﻴﺎﺓ ﻓﺘﻨﺔ
ﻟﻜﻦ ﻫﺬﺍ ﺍﻟﺮﺟﺎﻝ ﮔﺎﻡ ﻛﻞ ﻳﻮﻡ ﻳﺠﻲ ﻭﻳﻄﻠﺒﻨﻲ ﺑﺎﻻﺳﻢ ﻭﺻﺎﺭﺕ ﻣﻀﺎﻳﻘﺎﺗﺔ ﺍﻟﻲ ﻛﻠﺶ ﺗﺨﻮﻑ
ﻭﻣﺮﺓ ﻃﻠﺐ ﻣﻨﻲ ﻭﺑﺼﻮﺭﺓ ﻣﺒﺎﺷﺮﺓ ﺑﻌﺪ ﻣﺎ ﻛﺎﻥ ﻳﻠﻤﺢ ﻭﺍﻧﺔ ﺍﻏﻠﺲ
ﻟﻜﻦ ﻫﺎﻟﻤﺮﺓ ﺍﺟﺔ ﻭﺣﺠﺔ ﻭﻳﺎﻱ
- ﺷﻮﻑ ﻭﻟﻚ ﺍﻧﺔ ﺍﻧﻄﻴﺘﻚ ﻣﺠﺎﻝ ﻭﺗﻌﺒﺘﻨﻲ ﻭﻳﺎﻙ ﻭﺻﺎﺭﻟﻚ ﻓﺘﺮﺓ ﺷﺎﻟﻊ ﮔﻠﺒﻲ ﻭﺍﻧﺘﺔ ﻣﺒﻴﻦ ﻋﻠﻴﻚ ﻣﻦ ﺷﻜﻠﻚ ﻫﺎﻭﻱ ﻫﺎﻱ ﺍﻟﺴﻮﺍﻟﻒ ﻭﺍﺣﺴﻨﻠﻚ ﺳﻠﻤﻨﻲ ﻧﻔﺴﻚ ﺍﻭﻧﺴﻚ ﻭﺍﻋﻴﺸﻚ ﻣﻠﻚ
↙️
ﻓﺮﺡ ﺑﺎﻟﻘﺮﺍﻥ ﻫﻮ ﻳﺤﺠﻲ ﻭﺍﻧﻲ ﻣﻌﺪﺗﻲ ﺭﺍﺩﺕ ﺗﮕﻠﺐ ﺍﺟﻴﺖ ﺍﺗﻘﻲﺀ ﻣﻦ ﻛﻼﻣﻪ ﺷﻔﺖ ﺍﺑﻮ ﺍﺑﺮﺍﻫﻴﻢ ﻇﻞ ﻳﺒﺎﻭﻉ ﻋﻠﻴﺔ ﻭﻳﺨﺰﺭ
ﺍﻟﺮﺟﺎﻝ - ﺷﻮﻑ ﻭﻟﻚ ﺍﻟﻴﻮﻡ ﺍﺧﺮ ﻓﺮﺻﺔ ﺍﻟﻚ ﺍﺫﺍ ﺍﻟﺒﺎﺟﺮ ﺍﺟﻲ ﻭﻣﺎ ﺳﻮﻳﺖ ﺍﻟﻲ ﮔﺘﻠﻚ ﻋﻠﻴﻪ ﺍﺳﻮﺩ ﻋﻴﺸﺘﻚ ﺳﺎﻣﻊ ﻭﻟﻚ
ﻭﻧﻮﺏ ﺍﺷﻮ ﻫﺬﺍ ﺍﺟﺔ ﻳﺮﻛﺐ ﺑﺎﻟﺴﻴﺎﺭﺓ ﻭﺿﺮﺑﻨﻲ ﻋﻠﻰ ﻣﺆﺧﺮﺗﻲ ﻭﺳﻤﻌﻨﻲ ﻛﻠﻤﺔ ﺑﺬﻳﺌﺔ
ﺍﻧﺸﻠﻴﺖ ﻣﻦ ﺍﻟﻜﻼﻡ ﺻﺎﺭ ﺟﺴﻤﻲ ﻛﻠﺔ ﻳﺮﺟﻒ
ﻣﻦ ﺭﺣﺖ ﻋﻠﻰ ﺍﺑﻮ ﺍﺑﺮﺍﻫﻴﻢ ﺑﻨﻬﺎﻳﺔ ﺍﻟﻴﻮﻡ
ﺍﺑﻮﺍﺑﺮﺍﻫﻴﻢ - ﺷﻮﻑ ﺑﻮﻳﺔ ﻫﺬﺍ ﺍﺧﺮ ﻳﻮﻡ ﺍﻟﻚ ﺑﺎﻟﺸﻐﻞ ﺑﻌﺪ ﻣﺎ ﺍﺭﻳﺪﻙ ﺗﺸﺘﻐﻞ ﻋﻨﺪﻱ ﻫﻨﺎ ﻭﻫﺎﻱ ﻓﻠﻮﺱ ﻳﻮﻣﻴﺘﻚ
ﻓﻼﺡ - ﻟﻴﺶ ﻋﻤﻲ ﺷﻨﻮ ﺳﻮﻳﺖ ﻭﺗﻄﺮﺩﻧﻲ
ﺍﺑﻮ ﺍﺑﺮﺍﻫﻴﻢ - ﺷﻮﻑ ﺑﻮﻳﺔ ﺍﻧﺖ ﻣﺎﺳﻮﻳﺖ ﺷﻲ ﺑﺲ ﺭﺍﺡ ﺗﺴﻮﻳﻠﻲ ﻣﺸﺎﻛﻞ ﻭﻳﺔ ﻫﺬﺍ ﺍﻟﺮﺟﺎﻝ ﻳﻌﻨﻲ ﻟﻮ ﺍﻋﺎﻳﻦ ﺑﻌﻴﻮﻧﻲ ﻭﺍﺷﻮﻓﺔ ﺷﻠﻮﻥ ﺭﺍﺡ ﻳﺠﺮﻙ ﻟﻄﺮﻳﻖ ﺍﻟﺤﺮﺍﻡ ﻭﺍﻻﻧﺤﺮﺍﻑ ﻭﻻﺯﻡ ﺍﺳﻜﺖ ﻟﻮ ﺍﺣﺠﻲ ﻭﻣﺎ ﺍﺳﻜﺖ ﻋﻠﻰ ﺍﻟﻲ ﻳﺼﻴﺮ ﻭﺍﻧﻄﺮﺩ ﻣﻦ ﻋﻤﻠﻲ ﻻﻥ ﻫﺬﺍ ﻳﻤﻠﻚ ﻧﺺ ﺍﻟﺒﺎﻧﺰﻳﻦ ﺧﺎﻧﺔ ﻭﻣﺎ ﺍﺭﻳﺪﺓ ﻳﻜﻄﻊ ﺭﺯﻗﻲ ﻻﻥ ﺍﻧﺔ ﺧﻠﻚ ﻣﺴﺆﻝ ﻋﻤﺎﻝ ﻓﺒﻮﻳﺔ ﺭﻭﺡ ﻻﻫﻠﻚ ﺍﻟﻠﻪ ﻳﺮﺿﻰ ﻋﻠﻴﻚ ﻻﻥ ﻫﺬﺍ ﻧﺠﺲ ﻭﺧﺎﻑ ﻳﺴﻮﻳﻠﻚ ﻣﻜﺴﻮﺭﺓ ﻭﺍﻫﻠﻚ ﺍﻟﻈﺎﻫﺮ ﺧﻮﺵ ﻧﺎﺱ ﻻﻥ ﺍﺧﻼﻗﻚ ﺣﻠﻮﺓ ﻭﺍﻟﻜﻞ ﻳﺸﻬﺪ ﺑﻴﻬﺎ ﺗﺠﻲ ﺑﻄﺮﻳﻘﻚ ﻭﺗﺮﺟﻊ ﺑﻄﺮﻳﻘﻚ ﻻﺍﻟﻚ ﻏﺮﺽ ﺑﻬﺬﺍ ﻭﻻ ﺑﺬﺍﻙ
ﺑﺲ ﻳﺎ ﺑﻮﻳﺔ ﺍﻧﺎ ﻭﺍﻟﻠﻪ ﺍﻟﺸﺎﻫﺪ ﺧﺎﻳﻒ ﻋﻠﻴﻚ ﻻﻥ ﺍﻭﻻﺩ ﺍﻟﺤﺮﺍﻡ ﺑﻜﻞ ﻣﻜﺎﻥ ﻓﺒﻄﻞ ﻣﻨﺎ ﺍﺣﺴﻦ ﻟﻚ
ﻭﺷﻮﻓﻠﻚ ﻏﻴﺮ ﺷﻐﻠﺔ
ﻓﺮﺡ ﻭﻫﻲ ﺗﺘﻜﻠﻢ ﻣﻊ ﻧﻔﺴﻬﺎ
ﺍﺩﺭﻱ ﺍﻭﻻﺩ ﺍﻟﺤﺮﺍﻡ ﺍﻟﻠﻪ ﻣﺴﻠﻄﻬﻢ ﺑﺲ ﻋﻠﻴﻨﺎ
ﻭﺍﻟﻠﻪ ﻳﺎ ﺭﺑﻲ ﺭﺣﻤﺘﻚ ﺍﻟﻄﻒ ﺑﻴﺔ ﻭﺑﺨﻮﺍﺗﻲ
ﻫﺴﺔ ﺍﻧﻲ ﺷﺮﺍﻳﺪﺓ ﻏﻴﺮ ﺍﻋﻴﺶ ﻭﺍﻋﻴﺶ ﺧﻮﺍﺗﻲ
ﺗﺮﺓ ﻭﺍﻟﻠﻪ ﻣﺎﻃﺎﻟﺒﻴﻦ ﺷﻲ
ﻭﺭﺟﻌﺖ ﻟﻠﺒﻴﺖ ﻭﺣﻄﻴﺖ ﺍﻟﻔﻠﻮﺱ ﻋﻨﺪ ﺳﻤﺎﺡ ﺍﻧﻲ ﺍﻭﻝ ﺍﻳﺎﻡ ﻛﻨﺖ ﺍﻃﻠﻊ ﻣﻦ ﺑﻴﺘﻨﺎ ﻭﻻﺑﺴﺔ ﻫﺪﻭﻡ ﺍﻟﺮﺟﺎﻝ ﻟﻜﻦ ﺍﺳﺘﻐﻔﺮﺍﻟﻠﻪ ﺍﻟﻤﻨﻄﻘﺔ ﻭﺍﻟﻨﺎﺱ ﺍﻟﻔﻀﻮﻟﻴﺔ ﻃﻠﻌﻮﺍ ﻋﻠﻴﻨﺎ ﺣﺠﺎﻳﺔ ﻋﻠﻰ ﺍﻻﺳﺎﺱ ﺍﺣﻨﺎ ﻧﺎﻗﺼﻴﻦ ﺍﻥ ﺑﻨﺎﺕ ﺑﻴﺖ ﺍﺑﻮ ﺳﻤﺎﺡ ﻳﺪﺧﻠﻮﻥ ﺍﻟﻮﻟﺪ ﻟﻠﺒﻴﺖ ﻫﻮ ﻣﻨﻮ ﺍﻟﻮﻟﺪ ﻏﻴﺮﻱ ﺍﻧﺔ ﺍﻃﻠﻊ ﻭﺍﻃﺐ ﻭﺍﻟﻨﺎﺱ ﺍﻟﻬﺎ ﺍﻟﻈﺎﻫﺮ
ﻓﮕﻤﺖ ﻣﻦ ﺍﺭﻳﺪ ﺍﺭﻭﺡ ﻋﺎﻟﺸﻐﻞ ﺍﺩﺧﻞ ﻋﻠﻰ ﺑﻴﺖ ﺍﺑﻮ ﻧﻮﺍﻝ ﻭﺍﺗﻔﻘﺖ ﻣﻊ ﺍﺑﻮ ﻧﻮﺍﻝ ﺍﻥ ﻳﮕﻮﻝ ﺍﻥ ﺍﻧﺔ ﺍﺑﻦ ﺍﺧﻮﻩ ﺣﺘﻰ ﺍﻫﻞ ﺍﻟﻤﻨﻄﻘﺔ ﻣﺎﺗﻨﺸﺐ ﻭﻳﺎﻱ ﻋﻠﻰ ﺍﺑﻮ ﻏﺮﻳﺐ ﺑﺎﻟﻤﻨﻄﻘﺔ
ﻳﻌﻨﻲ ﺗﺨﻴﻠﻮ ﻭﻳﻦ ﻭﺍﺻﻞ ﺑﻴﻬﻢ ﺍﻟﻔﻀﻮﻝ
ﻳﻌﻨﻲ ﺍﺫﺍ ﻭﺍﺣﺪ ﻏﺮﻳﺐ ﺩﺧﻞ ﺑﺎﻟﻤﻨﻄﻘﺔ ﻻﺯﻡ ﺗﻌﺮﻑ ﺍﻟﻤﻨﻄﻘﺔ ﻫﺬﺍ ﺍﻟﻐﺮﻳﺐ ﺍﻟﺪﺍﺧﻞ ﺷﻌﻨﺪﺓ ﻭﺍﺫﺍ ﺗﻜﺮﺭﺕ ﺟﻴﺎﺕ ﺍﻟﻐﺮﻳﺐ ﻋﻠﻰ ﺍﻟﻤﻨﻄﻘﺔ ﺭﺍﺡ ﺗﺆﻟﻒ ﺍﻟﻘﺼﺺ ﻋﻦ ﻫﺬﺍ ﺍﻟﺪﺧﻴﻞ
ﻟﺬﻟﻚ ﺍﺗﻔﻘﺖ ﻭﻳﺔ ﺍﺑﻮ ﻧﻮﺍﻝ ﺣﺘﻰ ﺍﺧﺼﻢ ﺍﻟﺤﺠﻲ ﺍﻟﺰﺍﻳﺪ ﻭﺍﻻﺷﺎﻋﺔ ﻋﻦ ﺧﻮﺍﺗﻲ ﻋﻠﻤﻮﺩ ﺍﻋﻴﺶ
ﻭﺍﻟﻠﻪ ﺭﺍﺡ ﺗﻜﻮﻟﻮﻥ ﻣﻌﻘﻮﻟﺔ ﺍﻛﻮ ﻫﻴﺞ ﺷﻲ ﻋﺎﺩ ﻣﻮ ﻟﻬﺪﺭﺟﺔ ﻗﺼﺪﻛﻢ ﺍﻥ ﺍﻛﻮ ﻫﻮﺍﻱ ﺷﻐﻞ ﻏﻴﺮ ﻫﻴﺠﻲ
ﻳﻌﻨﻲ ﻣﺜﻼ ﻧﮕﺪﺭ ﻧﻌﻴﺶ ﻧﻔﺴﻨﺎ ﻧﺴﻮﻱ ﻛﺒﺐ ﻭﻛﻠﻴﺠﺔ ﻭﻣﻦ ﻫﺎﻱ ﺍﻟﺴﻮﺍﻟﻒ ﺟﺮﺑﻨﺎ ﻟﻜﻦ ﺍﻟﻌﻴﺐ ﺍﻥ ﺍﺣﻨﺎ ﮔﺎﻋﺪﻳﻦ ﺑﻤﻨﻄﻘﺔ ﻓﻘﻴﺮﺓ ﻭﻣﺤﺪ ﻣﺘﻌﺎﻓﻲ ﻳﺸﺘﺮﻱ ﺍﻭ ﻳﻮﺻﻲ ﻭﺣﺪﺓ ﺗﺴﻮﻳﻠﻬﻢ ﻛﻠﻴﺠﺔ ﻳﻌﺘﺒﺮﻭﻧﺔ ﻫﺬﺍ ﻧﻮﻉ ﻣﻦ ﺍﻧﻮﺍﻉ ﺍﻟﺘﺮﻑ ﺍﻟﻤﻌﻴﺸﻲ ﻭﻋﻔﺔ ﻓﻠﺬﻟﻚ ﻫﺎﻱ ﺍﻟﺴﺎﻟﻔﺔ ﻧﺎﺟﺤﺔ ﻟﻠﺒﻴﻮﺗﻬﻢ ﻗﺮﻳﺒﺔ ﻋﻠﻰ ﺍﻟﻤﻨﺎﻃﻖ ﺍﻟﺮﺍﻗﻴﺔ ﺍﻟﻲ ﺗﻜﻮﻥ ﻫﻮﺍﻱ ﺑﻴﻬﺎ ﻣﻮﺿﻔﺎﺕ ﻣﺸﻐﻮﻻﺕ ﺑﻮﻇﺎﺋﻔﻬﻢ ﻭﻧﺎﺱ ﻣﺘﻤﻜﻨﻴﻦ ﻓﻴﻄﻠﺒﻮﻥ ﻫﻴﺞ ﻃﻠﺒﺎﺕ ﻭﻳﻮﺻﻮﻥ ﻟﺤﻔﻼﺗﻬﻢ ﻭﺍﻋﺮﺍﺳﻬﻢ ﻭﻏﻴﺮﻫﺎ ﻭﻣﻨﻬﺎ ﺳﺪﻳﻨﺎ ﻫﺬﺍ ﺍﻟﺒﺎﺏ ﻣﻦ ﺍﻟﺮﺯﻕ ﻻﻥ ﻏﻴﺮ ﻧﺎﺟﺢ ﻭﺣﺘﻰ ﺳﻠﻮﻯ ﻣﻦ ﺗﺨﻴﻂ
ﻳﺸﻠﻌﻦ ﮔﻠﺒﻬﺎ ﻋﻠﻰ ﻣﺎ ﻳﻨﻄﻨﻬﺎ ﻓﻠﻮﺱ ﺧﻮ ﺍﻛﻮ ﻧﺴﻮﺍﻥ ﺍﺻﻼ ﻳﻐﻠﺴﻦ ﻣﺎ ﻳﻨﻄﻦ ﻭﻫﺎﻱ ﺳﻠﻮﻯ ﺳﻠﻴﻤﺔ ﻓﻘﻴﺮﺓ ﻭﺍﻟﻠﻪ ﻫﺎﻱ ﻟﻮ ﺍﻧﺔ ﻣﺎ ﺍﺧﻴﻂ ﺍﻻ ﺍﺳﺘﻠﻢ ﺍﻟﻔﻠﻮﺱ ﺟﺒﺢ ﻏﻴﺮ ﻋﻮﺑﺔ
ﻫﻤﺔ ﺣﻘﻬﻢ ﻫﻮ ﻣﻨﻮ ﻳﺠﻲ ﻳﺨﻴﻂ ﻋﻨﺪﻫﺎ ﻏﻴﺮ ﻧﺴﻮﺍﻥ ﺍﻟﻤﻨﻄﻘﺔ ﺍﻟﻔﻘﻴﺮﺓ
ﻭﻫﺎﻱ ﻣﻦ ﻏﻴﺮ ﺍﻧﻠﻐﺖ ﺍﻱ ﻓﺮﺻﺔ ﻋﻤﻞ ﻭﻣﺤﺪ ﻳﻘﺒﻞ ﻳﺸﻐﻠﻨﺎ ﻋﻨﺪﺓ ﻻﻥ ﺍﻟﺤﻤﺪﻟﻠﻪ ﺍﻟﺴﻤﻌﺔ ﻣﻦ ﻭﺭﺓ ﻛﻼﻡ ﺍﻟﻨﺎﺱ ﺻﺎﺭﺕ ﺯﻓﺖ
ﻟﺬﻟﻚ ﻟﺠﺌﺖ ﺍﻥ ﺍﺳﻮﻱ ﺑﺮﻭﺣﻲ ﻫﺸﻜﻞ
ﺣﺘﻰ ﻳﺴﻬﻞ ﻋﻠﻴﺔ ﺍﺣﺼﻞ ﺷﻐﻞ ﻭ
ﻭﻋﻠﻰ ﺍﻟﺮﻏﻢ ﺑﻄﻠﺖ ﻣﻦ ﺷﻐﻠﻲ ﻛﻌﺪﺕ ﺍﺩﻭﺭ ﻋﻠﻰ ﺷﻐﻞ ﺛﺎﻧﻲ ﻭﺍﻟﻠﻪ ﺭﺣﺖ ﻋﻠﻰ ﺍﺑﻮ ﺍﺑﺮﺍﻫﻴﻢ ﺑﻠﻜﻲ ﻳﺸﻐﻠﻨﻲ ﻋﻠﻰ ﻣﻌﺮﻓﺘﺔ ﻻﻥ ﻫﻢ ﺍﺑﻘﻰ ﺍﺧﺎﻑ ﻋﻠﻰ ﺭﻭﺣﻲ ﻭﻫﺬﺍ ﺷﻜﻠﺔ ﺍﻧﺴﺎﻥ ﻳﺨﺎﻑ ﺍﻟﻠﻪ
ﺍﺑﻮ ﺍﺑﺮﺍﻫﻴﻢ - ﺷﻮﻑ ﺍﺑﻨﻲ ﺭﺍﺡ ﺍﻭﺻﻲ ﻋﻠﻴﻚ ﺻﺪﻳﻘﻲ ﻳﺸﺘﻐﻞ ﺑﺘﺼﻠﻴﺞ ﺍﻟﺴﻴﺎﺭﺍﺕ ﺑﻨﺠﺮﺟﻲ ﻭﻏﻴﺮﻫﺎ ﻣﻦ ﻫﺎﻱ ﺍﻟﺴﻮﺍﻟﻒ ﺭﻭﺡ ﻋﻠﻴﻪ ﻭﺍﻧﺔ ﺭﺍﺡ ﺍﺗﺼﻞ ﻋﻠﻴﻪ ﺣﺘﻰ ﻳﺸﻐﻠﻚ ﻋﻨﺪﺓ
ﻭﺍﻟﻠﻪ ﻭﺭﺑﻲ ﻣﺎﻗﺼﺮ ﻭﻛﻌﺪﺕ ﺍﺷﺘﻐﻞ
ﺑﺲ ﻋﻮﺩﻙ ﺷﻨﻮ ﺍﻛﻠﺖ ﺗﺒﻦ ﻻﻥ ﺍﻟﺸﻐﻞ ﻳﺘﻌﺐ
ﻭﻛﻞ ﻳﻮﻡ ﺍﺟﻲ ﻣﻤﺴﻮﺡ ﺑﻴﺎ ﺍﻟﮕﺎﻉ ﻣﻦ ﺍﻟﺪﻫﻦ ﻭﺍﻟﺼﺨﺎﻡ
ﺑﺲ ﻫﻮﺍﻱ ﺗﻌﻠﻤﺖ ﺷﻐﻼﺕ ﻋﻦ ﺗﺼﻠﻴﺢ ﺍﻟﺴﻴﺎﺭﺍﺕ
ﻭﺍﻟﺤﻤﺪﻟﻠﻪ
ﺣﺒﻴﺒﺘﻲ ﺳﺮﻭﺭ ﺑﻔﻀﻞ ﺍﻟﻠﻪ ﻭﺳﻤﻮﺣﺔ ﺑﺪﺓ ﺑﻮﺍﺩﺭ ﺍﻟﺸﻔﺎﺀ ﺗﻈﻬﺮ ﻋﻠﻴﻬﺎ ﻭﻫﻮﺍﻱ ﺍﺗﺎﺧﺮﺕ ﺑﺪﺭﺍﺳﺘﻬﺎ ﻟﻜﻦ ﺳﻤﺎﺡ ﻣﺘﺎﺑﻌﺔ ﻭﻳﺎﻫﺔ ﺍﻟﺪﺭﺍﺳﺔ ﺍﻭﻝ ﺑﺄﻭﻝ ﻫﻢ ﺧﻠﻒ ﺍﻟﻠﻪ ﻋﻠﻰ ﺍﻟﻤﻌﻠﻤﺎﺕ ﻳﻨﻄﻮﻧﺔ ﺍﻟﻮﺍﺟﺒﺎﺕ ﻛﻞ ﻳﻮﻡ ﺍﻣﺮ ﻋﻠﻴﻬﻢ ﺑﺎﻟﺤﻠﺔ ﺍﻟﮕﺎﻫﻢ ﻛﺎﺗﺒﻴﻦ ﺍﻟﻨﺎ ﺑﻮﺭﻗﺔ ﻋﻠﻰ ﺍﻻﻗﻞ ﻭﺣﺪﺓ ﺑﻴﻨﺎ ﻳﺼﻴﺮ ﺑﺮﺍﺳﻬﺎ ﺧﻴﺮ
ﺭﺣﺖ ﻃﻠﻌﺖ ﻟﺒﻴﺖ ﻋﻤﻮ ﺍﺑﻮ ﻧﻮﺍﻝ ﻭﺧﻄﻴﺔ ﻛﺎﻥ ﻣﺮﻳﺾ
ﺑﺎﻟﻔﺮﺍﺵ ﻭﻭﺻﺎﻧﻲ ﻋﻠﻰ ﻛﻢ ﺷﻐﻠﺔ ﺍﺟﻴﺒﻬﺎ ﺍﻟﺔ ﻣﻦ ﺍﻟﺴﻮﻙ
ﻫﻬﻬﻬﻬﻬﻬﻬﻬﻪ ﺣﺘﻰ ﺍﺑﻮ ﻧﻮﺍﻝ ﻣﺼﺪﻙ ﺍﻧﻲ ﻭﻟﺪ ﺧﺮﺏ ﺣﻈﻲ
ﺑﺲ ﻛﻮﻥ ﺭﺑﻲ ﻳﮕﻮﻣﺔ ﺑﺎﻟﺴﻼﻣﺔ
ﺭﺣﺖ ﻋﺎﻟﺴﻮﻙ ﻭﺍﺷﺘﺮﻳﺖ ﺍﻟﻐﺮﺍﺽ ﻭﺍﻧﺘﺒﻬﺖ ﻋﻠﻰ ﺍﻭﻻﺩ ﺑﻌﻤﺮﻱ ﻭﺍﺻﻐﺮ ﻣﻨﻲ ﻳﺪﻓﻌﻮﻥ ﺑﺎﻟﻌﺮﺑﺎﻳﻦ ﻭﮔﻌﺪﺕ ﺍﺳﺌﻞ ﻟﻜﻦ ﻫﺎﻱ ﺍﻟﺴﺎﻟﻔﺔ ﻛﻠﺶ ﺻﻌﺒﺔ ﻳﻌﻨﻲ ﺑﻴﻬﺎ ﻣﺼﻠﺤﺔ ﻛﻞ ﻭﺍﺣﺪ ﻣﺴﺆﻝ ﻋﻠﻰ ﻣﻨﻄﻘﺔ ﻣﻦ ﺍﻟﺴﻮﻙ ﻭﺍﺫﺍ ﻭﺍﺣﺪ ﻣﺜﻞ ﺣﻼﺗﻲ ﻣﺎ ﻋﻨﺪﺓ ﻟﺴﺎﻥ ﻭﻋﻀﻼﺕ ﻳﺘﻮﺍﻛﺢ ﻭﻳﺎﻫﻢ ﻳﺎﻛﻠﻮﻧﺔ ﻭﻳﻄﺮﺩﻭﻧﺔ ﻣﻦ ﺍﻟﻤﻜﺎﻥ ﻳﻌﻨﻲ ﺑﺎﻟﺒﻀﻂ ﻣﺜﻞ ﻓﺼﻴﻠﺔ ﻛﻼﺏ ﺑﻨﺎﺕ ﺍﻭﻯ
ﺍﻟﻀﻌﻴﻒ ﻟﻴﺲ ﻟﺔ ﻣﻜﺎﻥ ﺑﻴﻨﻨﺎ
↙️
ﻭﺭﺟﻌﺖ ﻣﻦ ﺍﻟﺴﻮﻙ ﻭﺍﻧﻲ ﻣﺸﺘﺮﻳﺔ ﺍﻟﻐﺮﺍﺽ ﺍﻟﻲ ﻭﺻﺎﻧﻲ ﻋﻠﻴﻬﺎﻋﻤﻲ ﺍﺑﻮﻧﻮﺍﻝ ﺑﺲ ﻗﺒﻞ ﻻ ﺍﺭﺟﻊ ﺷﻔﺖ ﻣﺨﺒﺰ ﻛﺎﺗﺒﻴﻦ ﺑﻮﺭﻗﺔ ﺻﻐﻴﺮﺓ ﻣﻌﻠﻘﺔ ﻋﻠﻰ ﺍﻟﺤﺎﻳﻂ ﻧﺤﺘﺎﺝ ﻋﺎﻣﻞ
ﻭﺍﻟﻠﻪ ﺳﺌﻠﺖ ﮔﺎﻟﻮ ﺍﺑﻮ ﺍﻟﻤﺨﺒﺰ ﻣﺎﻣﻮﺟﻮﺩ ﺍﻟﺒﺎﺟﺮ ﻣﺮ ﻋﻠﻴﻨﺎ ﻭﺍﺣﺠﻲ ﻭﻳﺎﻩ ﻛﻤﺖ ﺍﺩﻭﺭ ﻋﻠﻰ ﺷﻐﻞ ﻻﻥ ﺍﻟﻌﻤﻞ ﺑﻮﺭﺷﺔ ﺗﺼﻠﻴﺢ ﺍﻟﺴﻴﺎﺭﺍﺕ ﻛﺎﻥ ﺟﺪﺍ ﻣﺘﻌﺐ ﻋﻠﻰ ﺑﻨﻴﺔ ﻣﺜﻠﻲ
ﻳﺎﻟﻠﻪ ﺑﻠﻜﻲ ﺍﻟﻠﻪ ﻳﺴﻬﻞ ﺍﻣﺮﻱ ﻟﺒﺎﺟﺮ
ﺭﺟﻌﺖ ﻋﺎﻟﺒﻴﺖ ﻣﺮﻳﺖ ﻋﻠﻰ ﺑﻴﺖ ﺍﺑﻮ ﻧﻮﺍﻝ ﻭﺍﻧﻄﻴﺘﺔ ﺍﻟﻐﺮﺍﺽ ﻭﺟﺎﻱ ﺍﻃﻠﻊ
ﺍﺑﻮ ﻧﻮﺍﻝ - ﺑﻮﻳﺔ ﻓﺮﺡ ﻋﻨﺪﻱ ﻭﻳﺎﺝ ﻛﻠﻤﺔ
ﻓﺮﺡ - ﮔﻮﻝ ﻋﻤﻲ
ﺍﺑﻮ ﻧﻮﺍﻝ - ﺍﻧﺘﻲ ﻣﻮ ﺟﺎﻱ ﺗﺪﻭﺭﻳﻦ ﻋﻠﻰ ﺷﻐﻞ
ﻓﺮﺡ - ﺍﻱ ﻭﺍﻟﻠﻪ ﻫﻞ ﺍﺩﻭﺭ ﻭﻣﺎﻛﻮ ﻣﺎ ﻻﮔﻴﺔ ﻻﻥ ﻃﺎﺡ ﺣﻀﻲ ﻣﻦ ﻫﺬﺍ ﺍﻟﺸﻐﻞ
ﺍﺑﻮ ﻧﻮﺍﻝ - ﺗﻌﺎﻟﻲ ﺍﺷﺘﻐﻠﻲ ﻋﻨﺪﻱ ﺑﺎﻟﺪﻛﺎﻥ ﻻﻥ ﺷﻮﻓﺖ ﻋﻴﻨﺞ ﺍﻧﺔ ﻣﺮﻳﺾ ﻭﺗﻌﺒﺎﻥ ﻭﺍﺣﺘﺎﺝ ﻭﺍﺣﺪ ﻳﻌﻴﻨﻲ ﻭﺷﻴﻄﻠﻊ ﺍﻟﺞ ﻧﺴﺒﺔ ﺑﻲ ﺷﮕﻠﺘﻲ ﺑﻮﻳﺔ
ﻓﺮﺡ ﻭﻫﻲ ﻃﺎﻳﺮﺓ ﻣﻦ ﺍﻟﻔﺮﺡ ﻻﻥ ﻭﺍﺧﻴﺮﺍ ﺍﻛﻮ ﺷﻐﻞ
- ﺍﻱ ﻋﻤﻲ ﺻﺎﺭ ﺗﺪﻟﻞ ﻣﻦ ﺑﺎﺟﺮ ﺍﺳﺘﻠﻢ ﺷﻐﻠﻚ ﻣﺎﻟﺖ ﺍﻟﺪﻛﺎﻥ ﻭﺍﻧﺖ ﺍﺭﺗﺎﺡ
ﻭﺍﻧﻲ ﺍﺑﻘﻰ ﻋﻠﻰ ﻧﻔﺲ ﻣﻼﺑﺴﻲ ﻣﺎﻟﺖ ﺍﻟﺮﺟﺎﻝ ﺍﺣﺴﻦ ﺣﺘﻰ ﺍﻟﻤﻨﻄﻘﺔ ﺗﻔﻚ ﻣﻨﻲ ﻳﺎﺧﺔ
ﻭﺻﺮﺕ ﻛﻞ ﻳﻮﻡ ﺍﺑﺴﻂ ﺑﺪﻛﺎﻥ ﺍﺑﻮ ﻧﻮﺍﻝ ﻭﺍﺭﻭﺡ ﻋﺎﻟﺴﻮﻙ ﻭﺍﺷﺘﺮﻱ ﺳﻠﻌﺔ ﻭﺍﻛﻤﻞ ﺍﻟﻨﻮﺍﻗﺺ ﻣﺎﻟﺖ ﺍﻟﺪﻛﺎﻥ ﻭﺍﺭﺟﻊ ﺍﺭﺗﺒﻬﻦ ﺑﺎﻟﺪﻛﺎﻥ ﻭﺻﺮﺕ ﻣﻦ ﻳﻤﻲ ﺍﺷﺘﺮﻱ ﺍﻛﻴﺎﺱ ﺻﻐﻴﺮﺓ ﻭﺍﺷﺘﺮﻱ ﻋﺼﻴﺮ ﺍﺯﺑﺮﻱ ﻭﺍﻋﺒﻲ ﺑﺎﻟﻜﻴﺲ ﺍﻟﺼﻐﻴﺮ ﻭﺍﺟﻤﺪﻫﻢ ﺑﺎﻟﺜﻼﺟﺔ ﻭﺍﺣﻄﻬﻢ ﺑﺎﻟﻔﺮﻳﺰ ﻭﻳﺠﻤﺪﻥ ﻭﺑﻤﺎ ﺍﻥ ﺟﻬﺎﻝ ﺍﻟﻤﻨﻄﻘﺔ ﺗﺤﺐ ﻫﺎﻱ ﺍﻟﺴﻮﺍﻟﻒ ﻭﺭﺧﻴﺼﺔ ﺑﺲ ﻭﺍﻟﻠﻪ ﺍﺳﻮﻱ ﺍﻟﻬﻢ ﻧﻈﻴﻒ ﻣﻮ ﻣﺜﻞ ﺍﻟﺒﺎﺋﻌﺔ ﺍﻟﻤﺘﺠﻮﻟﻴﻦ ﻣﻠﻮﺙ
ﻭ ﻳﻮﻡ ﻋﻦ ﻳﻮﻡ ﺍﻃﻮﺭ ﺑﺎﻟﺸﻐﻠﺔ ﻭﮔﺎﻣﻮ ﻣﺮﺍﺕ ﺑﺎﻟﻠﻴﻞ ﻳﺠﻮﻥ ﻭﻟﺪ ﺍﻟﻤﻨﻄﻘﺔ ﻫﺬﺍ ﺍﻟﻴﺎﺧﺬ ﺭﺻﻴﺪ ﺍﻭ ﻳﺎﺧﺬ ﺟﻜﺎﻳﺮ ﺗﻚ ﻳﻌﻨﻲ ﻣﻔﺮﺩﺍﺕ ﻳﻌﻨﻲ ﺣﺘﻰ ﺑﻬﺎﻱ ﻓﻘﺮ ﻣﺪﻗﻊ ﻣﺤﺪ ﻳﮕﺪﺭ ﻳﺎﺧﺬ ﺑﺎﻛﻴﺖ ﻫﺬﺍ ﺑﺲ ﺍﻟﻄﺎﻙ ﻭﺣﺎﻟﺘﺔ ﺯﻳﻨﺔ ﻳﺎﺧﺬ ﻣﻨﻲ ﺑﺎﻛﻴﺖ ﺟﻜﺎﻳﺮ ﺍﻟﻤﻬﻢ ﺑﺲ ﺍﻧﻲ ﺍﺑﺪ ﻣﺎ ﺍﻧﻄﻲ ﺑﺎﻟﺪﻳﻦ
ﻟﻜﻦ ﻓﻲ ﻳﻮﻡ ﻣﻦ ﺍﻻﻳﺎﻡ ﺍﺳﺘﻐﺮﺑﺖ ﻣﻦ ﺷﻐﻠﺔ ﻣﺮﺓ ﻭﺍﻧﻲ ﮔﺎﻋﺪﺓ ﺑﺎﻟﺪﻛﺎﻥ ﻭﻋﻴﻨﻲ ﻋﻠﻰ ﺑﺎﺏ ﺑﻴﺘﻨﺎ ﺧﺎﻑ ﻭﺣﺪﺓ ﻣﻦ ﺧﻮﺍﺗﻲ ﺗﺤﺘﺎﺝ ﺷﻲ ﺍﺭﻭﺡ ﺍﻟﻬﺔ ﺍﻟﻤﻬﻢ
ﺷﻔﺖ ﻭﺍﺣﺪ ﻻﺑﺲ ﺯﻱ ﺧﺎﺹ ﻋﺴﻜﺮﻱ
ﻭﺩﻙ ﺑﺎﺑﻨﺎ ﻭﺍﻟﻠﻪ ﺩﺧﻠﺖ ﺟﻮﺓ ﻋﻠﻰ ﺑﻴﺖ ﺍﺑﻮ ﻧﻮﺍﻝ ﻭﻃﻠﺒﺖ ﻣﻨﺎ ﺍﻥ ﻳﺮﻭﺡ ﻳﺸﻮﻑ ﺷﻴﺮﻳﺪ ﻫﺬﺍ ﺍﻟﻌﺴﻜﺮﻱ
ﺭﺍﺡ ﺍﺑﻮ ﻧﻮﺍﻝ ﻋﻠﻴﻪ ﻭﺍﺳﺘﻔﺴﺮ ﻣﻨﻪ
ﺍﻟﻌﺴﻜﺮﻱ - ﻛﺎﻥ ﻋﻨﺪﻛﻢ ﻗﺒﻞ ﺳﻨﺔ ﻣﻘﺪﻣﻴﻦ ﻋﻠﻰ ﺑﻼﻍ ﺍﻏﺘﺼﺎﺏ ﻟﻼﻧﺴﺔ ﺳﻤﺎﺡ ﻣﻨﺬﺭ ﺻﺎﻟﺢ
ﺍﺑﻮ ﻧﻮﺍﻝ - ﺍﻱ ﺑﻮﻳﺔ ﻭﺻﻠﺖ ﺷﻨﻮ ﺍﻟﻤﻄﻠﻮﺏ
ﺍﻟﻌﺴﻜﺮﻱ - ﺍﺳﺘﺠﺪﺕ ﻋﺪﺓ ﺍﻣﻮﺭ ﺑﺎﻟﻘﻀﻴﺔ ﻭﻟﺰﻣﻨﺎ ﺍﺛﻨﻴﻦ ﻣﻐﺘﺼﺒﻴﻦ ﺍﺑﻨﻴﺔ ﻓﺘﻢ ﺍﺳﺘﺪﻋﺎﺀ ﺳﻤﺎﺡ ﻣﻨﺬﺭ ﺣﺘﻰ ﺗﺠﻲ ﻭﺗﺘﻌﺮﻑ ﻋﻠﻰ ﺍﻟﻤﺸﺘﺒﻪ ﺑﻬﻢ ﺍﺫﺍ ﻛﺎﻧﻮ ﻫﻤﺔ ﺍﻡ ﻻ
ﺍﺑﻮ ﻧﻮﺍﻝ - ﺻﺎﺭ ﺑﻮﻳﺔ ﺍﻥ ﺷﺎﺀ ﺍﻟﻠﻪ ﺑﺲ ﮔﻮﻝ ﺍﻧﺘﻰ ﺷﻮﻛﺖ ﺍﺟﻴﺒﻬﺎ ﻭﺍﺟﻲ
ﺍﻟﻌﺴﻜﺮﻱ ﺍﻧﻄﺔ ﻻﺑﻮ ﻧﻮﺍﻝ ﻭﺭﻗﺔ ﻭﻭﻗﻊ ﻋﻠﻴﻬﺎ ﺍﺑﻮ ﻧﻮﺍﻝ . ﻭﺭﺍﺡ
ﺍﻗﺘﺮﺏ ﺍﺑﻮ ﻧﻮﺍﻝ ﻋﻠﻰ ﺷﺒﺎﻙ ﺍﻟﺪﻛﺎﻥ ﻭﺍﻧﻄﺎﻧﻲ ﺍﻟﻮﺭﻗﺔ ﻭﻗﺮﻳﺖ ﻣﻮﻋﺪ ﺍﻟﺤﻀﻮﺭ ﻛﺎﻥ ﻏﺪﺍ
ﻓﻴﻮﻡ
ﺛﺎﻧﻲ ﺭﺍﺡ ﺍﺑﻮ ﻧﻮﺍﻝ ﻭﺍﺧﺬ ﺍﺧﺘﻲ ﺳﻤﺎﺡ ﺍﻟﻲ ﺧﻄﻴﺔ
ﻣﻦ ﺑﻌﺪ ﺍﻟﻲ ﺻﺎﺭ ﺑﻴﻬﺎ ﺍﺑﺪ ﻣﺎ ﻃﻠﻌﺖ ﻟﺤﻈﺔ ﻟﺨﺎﺭﺝ ﺍﻟﺒﻴﺖ ﻭﺍﻧﻲ ﻇﻠﻴﺖ ﺍﻧﺘﻈﺮ ﻋﻠﻰ ﻧﺎﺭ ﺷﻠﻮﻥ ﻳﺎ ﺭﺑﻲ ﺍﺗﻤﻨﻴﺖ ﻃﻴﺮ
ﻭﺍﺭﻭﺡ ﻟﻌﻨﺪﻫﺎ ﻭﺍﺷﻮﻑ ﺣﺎﻟﻬﺎ
ﻭﺑﻌﺪ ﺍﺭﺑﻊ ﺳﺎﻋﺎﺕ ﻣﻦ ﺍﻻﻧﺘﻈﺎﺭ
ﺭﺟﻌﺖ ﺳﻤﺎﺡ ﻭﻫﻲ ﻓﺮﺣﺎﻧﺔ ﻻﻥ ﺍﻟﻤﺸﺘﺒﻪ ﺑﻬﻢ ﺍﻟﻲ ﻣﺤﺠﻮﺯﻳﻦ ﺑﺎﻟﺤﺒﺲ ﻃﻠﻌﻮ ﻫﻤﺔ ﻧﻔﺴﻬﻢ ﺍﻟﻲ ﺍﻋﺘﺪﻭ ﻋﻠﻴﻬﺎ
ﻭﺍﻟﻒ ﺍﻟﺤﻤﺪ ﻟﻠﻪ ﺭﺑﻲ ﻣﺎ ﻳﻀﻴﻊ ﺣﻖ ﺍﻟﻈﻠﻮﻡ
ﺑﺲ ﺷﻨﻮ ﺍﻟﻔﺎﻳﺪﺓ ﺍﻟﻨﺎﺱ ﻳﺒﻘﻰ ﺑﻴﻬﻢ ﺍﻟﻤﺘﺨﻠﻒ ﻭﺍﻟﻤﺮﻳﺾ ﺑﺘﻔﻜﻴﺮﻩ
ﻭﻣﺮﺓ ﺍﻧﻲ ﺟﺎﻟﺴﺔ ﺑﺸﺨﺼﻴﺔ ﻓﻼﺡ ﺑﺎﻟﺪﻛﺎﻥ
ﻭﺟﺎﻥ ﻳﺠﻮﻥ ﺛﻨﻴﻦ ﺷﺒﺎﺏ ﻏﺮﺑﺔ ﺍﻭﻝ ﻣﺮﺓ ﺍﺷﻮﻓﻬﻢ ﺑﺎﻟﻤﻨﻄﻘﺔ ﻭﺷﻜﻮﻟﻬﻢ ﻭﻟﺪ ﺧﻴﺮ
ﺍﺍﻫﻮﻭﻭﻭ ﻫﺎﻱ ﮔﻌﺪﺓ ﺍﻟﺪﻛﺎﻥ ﺧﺮﺑﺘﻨﻲ ﻭﺧﻠﺘﻨﻲ ﺻﺮﺕ ﻓﻀﻮﻟﻴﺔً ﻣﺜﻞ ﺍﻫﻞ ﻣﻨﻄﻘﺘﻲ ﺍﻗﺘﺮﺑﻮ ﻣﻦ ﺍﻟﺪﻛﺎﻥ ﻣﺎﻟﺘﻲ ﻭﺍﺳﺘﻔﺴﺮﻭﺍ ﻣﻨﻲ
ﻋﻠﻰ ﺑﻴﺘﻨﺎ
ﻭﺳﺌﻠﻮﻧﻲ ﻋﻠﻰ ﻋﺎﺋﻠﺔ ﺑﻴﺖ ﺍﺑﻮ ﺳﻤﺎﺡ ﻭﺑﻨﺎﺗﺔ ﺍﻟﻲ ﻫﻤﺎ ﺍﻧﻲ ﻭﺧﻮﺍﺗﻲ
ﻳﻤﺔ ﻫﺬﻭﻟﻲ ﺷﻴﺮﺩﻭﻥ ﻣﻦ ﻋﻨﺪﻧﺎ ﻭﻣﻨﻴﻦ ﺍﺟﻮﻧﺎ
ﻭﺻﺎﺭﺕ ﺍﻻﻓﻜﺎﺭ ﺗﻠﻌﺐ ﺑﺮﺍﺳﻲ
ﻓﺮﺡ - ﺍﺧﻮﻳﺔ ﻫﺬﻧﻲ ﺍﻟﺒﻨﺎﺕ ﺍﻟﻤﻮﺟﻮﺩﺍﺕ ﺑﻬﺬﺍ ﺍﻟﺒﻴﺖ ﺫﻫﺐ ﻣﺼﻔﻰ ﺷﻌﻨﺪﻙ ﺗﺴﺄﻝ ﻋﻨﻬﻢ ﺷﻨﻮ ﺗﻘﺮﺑﻠﻬﻢ ﺷﻲ ﻭﺟﺎﻱ ﺗﺴﺌﻠﻮﻥ ﻋﻠﻴﻬﻢ ﺗﺮﺓﺻﺤﻴﺢ ﻫﻨﺎ ﺑﻨﺎﺕ ﻭﺣﻴﺪﺍﺕ ﺑﺲ ﻭﺭﺍﻫﻢ ﺳﻨﺪ ﻣﻮ ﺣﺴﺒﺎﻟﻜﻢ ﻣﺎﻋﻨﺪﻫﻢ ﺍﺣﺪ ﻳﺪﺍﻓﻌﻠﻬﻢ
ﺍﻟﻤﻬﻢ ﻫﺬﻭﻟﻲ ﺍﻟﺸﺒﺎﺏ ﺍﻟﺜﻨﻴﻦ ﺍﻟﻲ ﺳﺌﻠﻮ ﻃﻠﻌﻮ ﺳﺎﺋﻠﻴﻦ ﻫﻮﺍﻱ ﻧﺎﺱ ﻗﺒﻠﻨﺎ ﻣﻦ ﺍﻟﻤﻨﻄﻘﺔ
ﻭﺍﻧﺔ ﮔﻠﺒﻲ ﮔﺎﻡ ﻳﻠﻌﺐ ﻣﻨﻬﻢ
↙️
ﻓﻲ ﻣﻜﺎﻥ ﺍﺧﺮ ﻓﻲ ﺑﻐﺪﺍﺩ
ﺍﻟﻀﺎﺑﻂ ﻋﻠﻲ
ﻛﻨﺖ ﺍﻗﺮﺓ ﻓﻲ ﻣﻠﻒ ﺍﻟﻘﻀﻴﺔ ﻟﻼﺷﺨﺎﺹ ﺍﻟﻤﺸﺘﺒﻪ ﺑﻴﻬﻢ ﻭﺑﻌﺪﻳﻦ ﺛﺒﺘﺖ ﺇﺩﺍﻧﺘﻬﻢ ﻋﻦ ﻃﺮﻳﻖ ﺍﻟﺸﻬﻮﺩ ﺍﻟﻲ ﻛﺎﻧﺖ ﻓﺘﺎﺓ ﻗﺒﻞ ﺳﻨﺔ ﻣﻐﺘﺼﺒﻴﻬﺎ ﻭﻣﻦ ﺧﻼﻝ ﻣﺘﺎﺑﻌﺔ ﻗﺮﺍﺋﺘﻲ ﻟﻤﻠﻒ ﺍﻟﻘﻀﻴﺔ ﺷﻔﺖ ﺍﻥ ﻛﺎﻥ ﻫﻨﺎﻙ ﺗﺸﺎﺑﻪ ﺑﺎﺳﻢ ﺍﻟﺠﺪﻭﺍﻟﻠﻘﺐ
ﺑﺲ ﻣﺎ ﻣﻌﻘﻮﻟﺔ
ﺍﻫﻮﻭﻭﻭﺍﺣﺴﻦ ﺷﻲ ﺍﺳﻮﻳﻪ ﺍﺗﺄﻛﺪ ﺑﺎﻻﻭﻝ
ﻋﻠﻲ
ﻓﻲ ﺑﻴﺖ ﺍﻟﺠﺪ
ﻛﺎﻥ ﺍﻟﺠﺪ ﺻﺎﻟﺢ ﻭﺍﺑﻨﺔ ﺍﻟﻜﺒﻴﺮ ﺗﻮﻓﻴﻖ ﻛﺎﻟﻌﺎﺩﺓ ﺟﺎﻟﺴﻴﻦ ﻳﺸﺮﺑﻮﻥ ﺟﺎﻱ
ﻋﻠﻲ - ﺍﻟﺴﻼﻡ ﻋﻠﻴﻜﻢ
ﺍﻟﺠﺪ ﻭﺗﻮﻓﻴﻖ - ﻭﻋﻠﻴﻜﻢ ﺍﻟﺴﻼﻡ ﻭﺍﻟﺮﺣﻤﺔ
ﻋﻠﻲ ﻭﻫﻮ ﻳﺮﻭﺡ ﻋﻠﻰ ﺟﺪﺓ ﻭﻳﺒﻮﺱ ﺭﺍﺳﻪ ﻭﺑﻌﺪﻫﺎ ﺍﻭﺑﻮﻩ ﻧﻔﺲ ﺍﻟﺸﻲ
ﺍﻟﺠﺪ - ﺷﻨﻮ ﻫﺎﻟﻐﻴﺒﺔ ﻣﺎﮔﻤﻨﺎ ﺍﻧﺸﻮﻓﻚ ﻣﻦ ﺭﻓﻌﻮﻙ ﻭﺷﺪﻳﺖ ﺍﻟﺮﺗﺒﺔ ﺍﻟﺠﺪﻳﺪﺓ ﺻﺮﺕ ﺑﺎﻟﺴﻨﺔ ﺣﺴﻨﺎ ﺗﺠﻲ ﻧﺸﻮﻓﻚ ﻣﺎﺗﮕﻮﻝ ﻫﺬﻭﻟﻲ ﺟﺪﻱ ﻭﺟﺪﺗﻲ ﺍﺷﻮﻓﻬﻢ ﻭﺍﻣﺮ ﻋﻠﻴﻬﻢ
ﺣﺴﺎﻡ - ﺍﻟﺴﻼﻡ ﻋﻠﻴﻜﻢ
ﺍﻟﻜﻞ - ﻭﻋﻠﻴﻜﻢ ﺍﻟﺴﻼﻡ ﻭﺍﻟﺮﺣﻤﺔ
ﺩﻧﻚ ﻋﻠﻰ ﺭﺍﺱ ﺟﺪﻩ ﻭﺍﺑﻮﻩ
ﻭﺭﺍﺡ ﻻﺧﻮﻩ ﻋﻠﻲ - ﻫﻠﺔ ﻳﺎﻟﺬﻳﺐ ﺷﺨﺒﺎﺭﻙ ﻋﺎﺵ ﻣﻦ ﺷﺎﻓﻚ ﺷﻨﻮ ﻳﺎﺑﺔ ﻣﺤﺪ ﻳﺸﻮﻓﻚ ﻫﺎﻻﻳﺎﻡ
ﻋﻠﻲ - ﻭﺍﻟﻠﻪ ﻣﻠﺘﻬﻲ ﻋﻨﺪﻱ ﺷﻐﻞ ﻛﻮﻣﺔ ﻭﻣﺎ ﻓﺎﺭﻍ ﺍﺣﻚ ﺭﺍﺳﻲ
ﺍﻧﺖ ﺷﻠﻮﻧﻚ ﺍﻟﻠﻪ ﻳﺴﺎﻋﺪﻙ ﺍﻟﺸﻐﻞ ﻛﻠﺔ ﻓﻮﻙ ﺭﺍﺳﻚ
ﺣﺴﺎﻡ - ﻭﺍﻟﻠﻪ ﻳﺎﺧﻮﻱ ﺗﻌﺒﺎﻥ ﻣﺎﺗﻌﺮﻑ ﺷﻲ ﻳﺼﻴﺮ ﺑﻴﺎ ﻣﻦ ﺍﺳﺎﻓﺮ ﻭﺍﺭﺟﻊ ﺻﺪ ﻭﺭﺩ ﻛﻠﺶ ﺍﺗﻌﺐ ﻭﻫﻤﺔ ﺍﻟﻠﻪ ﻳﺤﻔﻈﻬﻢ ﺫﺍﺑﻴﻦ ﺍﻟﺸﻐﻞ ﻛﻠﺔ ﻓﻮﻙ ﺭﺍﺳﻲ ﻭﻫﺬﻭﻟﻲ ﺍﻟﺸﻴﺎﺏ ﮔﺎﻋﺪﻳﻦ ﻫﻨﺎ ﻳﺸﺮﺑﻮﻥ ﺟﺎﻱ ﻭﻳﻠﻌﺒﻮﻥ ﻃﺎﻭﻟﻲ
ﻋﻠﻲ - ﺟﺪﻱ ﺍﻟﻴﻮﻡ ﺟﻴﺘﻜﻢ ﺑﻤﻮﺿﻮﻉ ﻛﻠﺶ ﻣﻬﻢ
ﺍﻟﺠﺪ - ﮔﻮﻝ ﺍﺑﻨﻲ ﺍﺳﻤﻌﻚ
ﻋﻠﻲ - ﻗﺒﻞ ﺍﺳﺒﻮﻉ ﺑﺎﻟﺼﺪﻓﺔ ﺍﺟﺔ ﺻﺪﻳﻘﻲ ﻟﻌﻨﺪﻱ ﻭﺣﺠﺎﻟﻲ ﻋﻦ ﻗﻀﻴﺔ ﻣﺤﻮﻟﻴﻬﺎ ﻟﺒﻐﺪﺍﺩ ﻭﻛﺎﻧﺖ ﻗﻀﻴﺔ ﺍﻏﺘﺼﺎﺏ ﻟﻔﺘﺎﺓ ﺷﺎﺑﺔ
ﻣﻮ ﻫﻨﺎ ﻣﻮﺿﻮﻋﻨﺎ ﺍﻟﻤﻮﺿﻮﻉ ﺍﻟﻲ ﺟﻴﺘﻜﻢ ﺑﻲ ﺍﻥ ﻫﺎﻱ ﺍﻟﺸﺎﺑﺔ ﻛﺎﻥ ﺍﺳﻤﻬﺎ
ﺳﻤﺎﺡ ﻣﻨﺬﺭ ﺻﺎﻟﺢ ﻛﺎﻧﺖ ﺗﺸﺘﺮﻙ ﻭﻳﺎﻱ ﺑﺎﻟﺠﺪ ﺍﻻﻭﻝ ﻭﺍﻟﺜﺎﻧﻲ ﻭﺍﻟﻠﻘﺐ ﻛﻠﺶ ﻏﺮﻳﺐ ﺍﻧﻲ ﺍﻋﺮﻑ ﻋﺪﻧﺎ ﻣﻦ ﺟﻨﺎ ﺻﻐﺎﺭ ﻋﻢ ﻣﺘﻮﻓﻲ ﻭﻫﻮ ﺻﻐﻴﺮ ﺯﻳﻦ ﺍﺭﻳﺪ ﺍﻓﺘﻬﻢ ﻋﻤﻲ ﺍﺳﻤﺔ ﻣﻨﺬﺭ ﻳﻌﻨﻲ ﻣﻌﻘﻮﻟﺔ ﺍﻛﻮﻫﻴﺞ ﺻﺪﻓﺔ ﺗﺸﺎﺑﻪ ﺑﺎﻻﺳﻤﺎﺀ
ﺍﻟﺠﺪ ﻭﺍﻻﺏ ﻭﻫﻤﺔ ﻣﺼﺪﻭﻣﻴﻦ
ﺍﻟﺠﺪ ﻭﺟﺴﻤﺔ ﻛﻠﺔ ﮔﺎﻡ ﻳﺮﺟﻒ ﻣﻦ ﺍﻟﻲ ﺳﻤﻌﺔ
ﻳﻌﻨﻲ ﻣﻮ ﺑﺲ ﺧﺒﺮ ﺍﻥ ﺍﺑﻨﺔ ﻋﻨﺪﺓ ﺑﻨﻴﺔ ﻻ ﻭﺍﻟﻤﺼﻴﺒﺔ ﻫﻢ ﻫﺎﻱ ﺍﻟﺒﻨﻴﺔ ﻣﻐﺘﺼﺒﻴﻬﺎ
ﺩﺧﻴﻠﻚ ﺭﺑﻲ ﺷﺠﺎﻱ ﻳﺼﻴﺮ ﺷﻨﻮ ﺍﻟﻌﺎﺭ ﻣﻦ ﺗﺎﻟﻲ ﻋﻤﺮﻱ ﻳﺮﻛﺒﻨﻲ
ﺍﻻﺏ ﺗﻮﻓﻴﻖ ﻭﻫﻮ ﻳﺘﺬﻛﺮ ﺍﺧﻮﻩ ﻣﻨﺬﺭ ﺍﻟﺼﻐﻴﺮ ﻭﻳﺤﻦ ﻋﻠﻴﻪ
ﺍﻟﺠﺪ - ﺷﻮﻑ ﺍﺑﻨﻲ ﺍﻧﺘﻮﺍ ﻣﺎ ﺗﺪﺭﻭﻥ ﺍﻥ ﻋﻨﺪﻛﻢ ﻋﻢ ﺍﺳﻤﺔ ﻣﻨﺬﺭ ﻋﺎﻳﺶ ﻣﺎﻣﺘﻮﻓﻲ ﻣﻦ ﻫﻮ ﻭﺻﻐﻴﺮ
ﻫﺬﺍ ﺍﻟﻮﻟﺪ ﻃﻠﻊ ﻋﻦ ﺷﻮﺭﻱ ﺑﻴﻮﻡ ﻣﻦ ﺍﻻﻳﺎﻡ
ﻛﺎﻧﺖ ﻗﺒﻞ ﻣﺮﻳﺔ ﻓﻠﺴﻄﻴﻨﻴﺔ ﺗﺨﺪﻡ ﻋﺪﻧﺎ ﻫﻲ ﻭﺑﻨﺘﻬﺎ
ﻭﻫﺎﻱ ﺑﺘﻬﺎ ﻛﺎﻧﺖ ﺷﺎﺑﺔ ﺟﺪﺍً ﺟﻤﻴﻠﺔ ﺍﺳﻤﻬﺎ ﻓﺎﺗﻦ
ﻭﻓﻌﻼً ﻣﺜﻞ ﺍﻟﻔﺘﻨﺔ ﺍﻟﻲ ﺗﺘﻨﻘﻞ ﺑﺎﻟﺒﻴﺖ ﺍﻣﺎﻡ ﻋﻴﻮﻥ ﻋﻤﺎﻣﻚ
ﻭﺟﺎﻧﻮ ﺑﻮﻗﺘﻬﻢ ﺷﺒﺎﺏ
ﺍﻟﻤﻬﻢ ﺣﺒﻮﻫﺎ ﺍﺛﻨﻴﻦ ﻣﻦ ﻭﻟﺪﻱ ﺍﻟﻲ ﻫﻮ ﻋﻤﻚ ﻣﻨﺬﺭ ﻭﻋﻤﻚ ﻧﺒﻴﻞ ﺍﻟﻲ ﺍﻛﺒﺮ ﻣﻨﺔ ﻛﺎﻥ ﻧﺒﻴﻞ ﻣﺘﺰﻭﺝ
ﻟﻜﻦ ﻣﻨﺬﺭ ﻣﺎ ﻣﺘﺰﻭﺝ
ﻟﻴﺶ ﻣﺎﻳﻮﻡ ﺍﺟﺎﻧﻲ ﻣﻨﺬﺭ ﻭﻓﺘﺢ ﻭﻳﺎﻱ ﻣﻮﺿﻮﻉ ﺯﻭﺍﺟﺔ ﻣﻦ ﻓﺎﺗﻦ ﻟﻜﻦ ﺍﻧﻲ ﺭﻓﻀﺖ ﻓﻜﺮﺓ ﺍﻟﺰﻭﺍﺝ ﻻﻥ ﺍﺣﻨﺎ ﻣﻦ ﺍﻟﻌﻮﺍﺋﻞ ﺍﻟﻌﺮﻳﻘﺔ ﺍﻻﻓﻨﺪﻳﺔ ﻭﻣﻦ ﺑﻴﺖ ﺳﻌﺎﺩ ﺧﺎﺗﻮﻥ ﻭﺍﺣﻨﺎ ﻣﻮ ﺍﻱ ﻭﺍﺣﺪ ﻧﺘﻨﺎﺳﺐ ﻭﻳﺎﻩ ﺍﻻ ﻛﻮﻥ ﺻﺎﺣﺒﻴﻦ ﺟﺎﻩ ﻭﻣﺎﻝ ﻭﺍﺳﻢ
ﻟﻜﻦ ﻋﻤﻚ ﻣﻨﺬﺭ ﻋﺎﻧﺪ ﻭﺍﺻﺮ ﺍﻥ ﻳﺘﺰﻭﺟﻬﺎ ﻭﻳﻜﺴﺮ ﻛﻤﻠﺘﻲ
ﻭﺑﻌﺪﻫﺎ ﺻﺎﺭﺕ ﻣﺸﺎﺟﺮﺓ ﺑﻴﻦ ﻧﺒﻴﻞ ﺍﻟﻲ ﻳﺮﻳﺪ ﻳﺘﺰﻭﺝ ﻓﺎﺗﻦ ﻋﻠﻰ ﻣﺮﺗﺔ ﻭﺑﻴﻦ ﻣﻨﺬﺭ ﺍﻟﻲ ﻋﺸﻚ ﻓﺎﺗﻦ ﻭﻳﺮﻳﺪ ﻳﺘﺰﻭﺟﻬﺎ
ﺍﻟﻰ ﺍﻥ ﺍﺟﺔ ﺍﻟﻴﻮﻡ ﺍﻟﻲ ﻛﺒﺮﺕ ﺑﻴﻪ ﺍﻟﺴﺎﻟﻔﺔ ﻭﮔﺎﻡ ﻣﻨﺬﺭ ﺍﺧﺬ ﺍﻟﺴﻼﺡ ﻭﺻﻮﺏ ﻋﻤﻚ ﻧﺒﻴﻞ ﺑﺮﺟﻠﻪ ﻭﺍﺧﺬ ﻓﺎﺗﻦ ﻭﺭﺍﺡ ﺷﺮﺩ ﺑﻴﻬﺎ ﻭﺍﺗﺰﻭﺟﻬﺎ
ﻭﺣﺴﺐ ﺍﻟﻤﻌﻠﻮﻣﺎﺕ ﻫﻮ ﺳﻜﻦ ﻭﻋﺎﺵ ﺑﺎﻟﻨﺎﺻﺮﻳﺎ
ﻟﻜﻦ ﺍﻧﻲ ﻃﺮﺩﺗﺔ ﻣﻦ ﺍﻟﻌﺸﻴﺮﺓ ﻭﺣﺮﻣﺖ ﻋﻠﻴﻪ ﺍﻥ ﻳﻌﺘﺐ ﻋﺘﺒﺔ ﺑﺎﺏ ﺍﻟﺒﻴﺖ ﻭﮔﺎﻡ ﺍﻭﻝ ﺍﻟﺴﻨﻴﻦ ﻛﺎﻥ ﻳﺠﻴﺐ ﻋﺎﺋﻠﺔ ﻭﻳﺠﻲ ﻟﻠﺒﺎﺏ ﻟﻜﻦ ﺍﻧﻲ ﺍﺭﻓﺾ ﺍﺷﻮﻓﺔ ﻓﻜﺎﻥ ﻳﺒﻘﻰ ﺑﺎﻟﺒﺎﺏ ﻓﺘﺮﺓ ﻭﻳﺮﺟﻊ ﻟﻜﻦ ﺑﺎﻟﺴﻨﻴﻦ ﺍﻻﺧﻴﺮ ﻇﻞ ﻣﺎ ﻳﺠﻲ ﻭﻫﺬﺍ ﺍﻟﺸﻲ ﺧﺸﻦ ﺧﺎﻃﺮﻱ ﻋﻠﻴﻪ ﻭﻗﻬﺮﻧﻲ ﻣﻨﺔ ﻛﺎﻧﺖ ﺗﻮﺻﻠﻨﻲ ﻣﻨﺔ ﺭﺳﺎﻳﻞ ﻟﻜﻦ ﺑﻌﺪﻳﻦ ﺣﺘﻰ ﺍﻟﺮﺳﺎﻳﻞ ﺍﻧﻘﻄﻌﺖ
ﺣﺴﺎﻡ ﻭﻋﻠﻲ ﻣﺘﻔﺎﺟﺌﻴﻦ ﺑﻜﻼﻡ ﺟﺪﻫﻢ ﺍﻟﻲ ﺳﻤﻌﻮﻩ
ﺍﻟﺘﻔﺖ ﺍﻟﺠﺪ ﻭﻛﺎﻟﻌﺎﺩﺓ ﺩﺍﺋﻤﺎ ﻳﺴﻠﻢ ﺍﻟﻤﻬﻤﺎﺕ ﺍﻟﺼﻌﺒﺔ ﺑﺮﺍﺱ ﺣﺴﺎﻡ ﺍﻟﻲ ﺍﺻﻼ ﺍﺗﻌﻮﺩ ﻋﻠﻰ ﺣﻤﻞ ﺍﻟﻤﺴﺆﻟﻴﺔ
ﺣﺴﺎﻡ
ﻳﺼﻴﺮ ﺍﺑﻦ ﺗﻮﻓﻴﻖ ﺍﻟﻜﺒﻴﺮ ﻭﻋﻤﺮﺓ ٣٠ﺳﻨﺔ ﻛﺎﻥ ﻣﺘﺰﻭﺝ ﺑﻨﺖ ﻋﻤﺔ ﻧﺒﻴﻞ ﻟﻜﻦ ﺍﺗﻮﻓﺖ ﺑﺎﻟﻮﻻﺩﺓ ﻭﺻﺎﺭ ﻋﻨﺪﺓ ﻭﻟﺪ ﻣﻨﻬﺎ ﺍﺳﻤﺔ ﻓﻬﺪ ﻭﻋﻤﺮﺓ ﺳﻨﺘﻴﻦ
ﺍﻟﻰ ﺍﻻﻥ ﻣﺎ ﺍﺗﺰﻭﺝ ﻻﻥ ﺍﺗﻌﻘﺪ ﻣﻦ ﺍﻟﺰﻭﺍﺝ ﻣﻦ ﻭﺭﺓ ﺯﻭﺟﺘﺔ ﺍﻻﻭﻟﻰ ﺍﻟﻲ ﻟﺰﻣﻬﺎ ﺗﺨﻮﻧﺔ ﻣﻊ ﺻﺪﻳﻘﺔ ﺑﺎﻟﻨﻘﺎﻝ ﻭﻣﺤﺪ ﻳﻌﺮﻑ ﺑﺴﺎﻟﻔﺘﻬﺔ ﺑﺲ ﻫﻮ ﻭﻣﺎﺗﺖ ﻭﻣﺎ ﺣﺠﺔ ﻻﺣﺪ ﻋﻦ ﻣﻮﺿﻮﻋﻬﺎ
ﻟﺬﻟﻚ ﻟﻢ ﻳﺘﺰﻭﺝ
ﺍﻟﻜﻞ ﻋﺒﺎﻟﻬﻢ ﺍﻥ ﻫﻮ ﻭﻓﻲ ﺍﻟﻬﺎ ﻭﻻﻥ ﻳﺤﺒﻬﺎ ﺑﺎﻗﻲ ﺍﻟﻰ ﺍﻻﻥ ﻣﺎﻣﺘﺰﻭﺝ
ﻟﻜﻦ ﺣﺴﺎﻡ ﻓﻀﻞ ﺍﻥ ﻳﺴﻜﺖ ﻭﻣﺎ ﻳﺼﺤﺢ ﺗﻮﻗﻌﻬﻢ ﺑﺲ
ﺣﺴﺎﻡ ﺑﺎﻟﻤﻘﺎﺑﻞ ﻟﻴﺲ ﺑﺎﻟﻤﻼﻙ ﺍﻟﺼﺎﻟﺢ
ﻳﻮﺟﺪ ﻟﺪﻳﻪ ﻋﺸﻴﻘﺎﺕ ﻣﺘﺰﻭﺟﻬﻢ
ﺯﻭﺍﺝ ﻣﺘﻌﺔ ﻭﻛﻞ ﻓﺘﺮﺓ ﻣﺒﺪﻝ ﻭﺣﺪﺓ
ﻣﺜﻼ ﻋﻨﺪﺓ
ﻭﺣﺪﺓ ﻣﺘﺰﻭﺟﻬﺎ ﺑﺒﻐﺪﺍﺩ ﺑﺲ ﻣﮕﻌﺪﻫﺎ ﺑﺒﻴﺖ ﺑﻤﻨﻄﻘﺔ ﺭﺍﻗﻴﺔ ﻫﺬﻭﻟﻲ ﻛﻠﻬﻢ ﻣﺘﺰﻭﺟﻬﻢ ﺯﻭﺍﺝ ﻣﺘﻌﺔ ﺑﺎﻟﺴﺮ ﻣﺤﺪ ﻳﺪﺭﻱ ﻋﻨﺔ ﻳﻌﻨﻲ ﺻﺪﻙ ﻟﻮ ﮔﺎﻟﻮ ﻣﺎﺗﺤﺖ ﺍﻟﺴﻮﺍﻫﻲ ﺩﻭﺍﻫﻲ ﻭﺍﻱ ﻭﺣﺪﺓ ﺗﻈﻞ ﺗﺘﺪﻟﻊ ﻭﺗﻠﻌﺐ ﺑﺬﻳﻠﻬﺎ ﮔﺒﻞ ﻳﻄﻠﻚ ﺍﺑﺪ ﻣﺎ ﻳﺤﺐ ﻭﺣﺪﺓ ﺗﻤﺸﻲ ﺑﺮﺍﺳﺔ ﻛﻼﻣﻬﺎ ﺑﺲ ﺍﻟﻲ ﺗﺼﻴﺮ ﻣﻦ ﻧﺼﻴﺒﺔ ﻳﺎ ﺳﻌﺪﻫﺎ ﻳﺪﻟﻠﻬﺎ ﺩﻻﻝ ﻣﻦ ﺳﻴﺎﺭﺍﺕ ﻣﻦ ﺫﻫﺐ ﻫﻮ ﻛﻠﺶ ﻛﺮﻳﻢ
ﺷﻐﻠﻪ ﺍﻟﺨﺎﺹ ﻣﻌﺮﺽ ﻣﺎﻝ ﺳﻴﺎﺭﺍﺕ ﻟﻜﻦ ﺟﺪﻩ ﻭﺍﺑﻮﻩ ﺣﻤﻠﻮﻩ ﺷﻐﻠﻬﻢ ﺍﻟﻤﺘﻮﺍﺭﺙ ﺍﺑﺎً ﻋﻦ ﺟﺪ ﺷﻐﻠﺔ ﺍﻟﻌﺎﺋﻠﺔ ﺑﺎﻟﻮﺭﺍﺛﺔ ﺍﻟﻲ ﻫﻲ ﺻﻴﺎﻏﺔ ﺍﻟﺬﻫﺐ ﻋﻨﺪﻫﻢ ﻣﺤﻼﺕ ﺑﺎﻟﻜﺎﻇﻤﻴﺔ ﻟﻠﺬﻫﺐ
ﺍﺭﺑﻊ ﻣﺤﻼﺕ ﺛﻨﻴﻦ ﻣﺤﻼﺕ ﺟﺪﻩ ﻭﻭﺍﺣﺪ ﻣﺎﻟﺖ ﺍﺑﻮﻩ ﻭﺍﻟﺮﺍﺑﻊ ﻣﻠﻜﻪ ﻣﻦ ﻣﺎﻟﻪ ﺍﻟﺨﺎﺹ ﻻﻥ ﻫﻮ ﻋﻠﻰ ﮔﺪ ﻣﺎ ﻳﻠﻌﺐ ﺑﺬﻳﻠﻪ ﻭﺻﺎﺣﺐ ﻣﺰﺍﺝ ﻭﻧﺴﻮﺍﻥ ﻋﻠﻰ ﮔﺪ ﻣﺎﻫﻮ ﺷﺎﻏﻮﻝ ﻭﺳﺒﻊ
ﺣﺴﺎﻡ - ﺻﺎﺭ ﺟﺪﻱ ﺗﺂﻣﺮ ﺑﺲ ﺧﻠﻲ ﺍﺭﺗﺐ ﻭﻳﺔ ﻋﻠﻲ ﻭﺍﺷﻮﻑ ﻣﻮﻗﻊ ﺍﻟﺴﻜﻦ ﻭﺍﻟﺒﺎﻗﻲ ﻋﻮﻓﺔ ﻋﻠﻴﺔ
↙️
ﺣﺴﺎﻡ - ﺟﺪﻱ ﺟﺒﺖ ﺍﻟﻤﻌﻠﻮﻣﺎﺕ ﻋﻦ ﺑﻴﺖ ﻋﻤﻲ ﻟﻜﻦ
ﻋﻤﻲ ﻣﻨﺬﺭ ﻣﺘﻮﻓﻲ ﺑﺤﺎﺩﺙ ﺳﻴﺮ ﻋﻠﻰ ﻃﺮﻳﻖ ﺑﻐﺪﺍﺩ ﻫﻮ ﻣﺮﺗﺔ ﻭﺑﺎﻗﻴﺎﺕ ﺑﺲ ﺍﻟﺒﻨﺎﺕ ﺳﺎﻛﻨﺎﺕ ﻟﻮﺣﺪﻫﻦ ﺑﻤﺸﺘﻤﻞ ﻭﻫﺴﺔ ﻫﻤﺔ ﺣﺎﻟﻴﺎ ﺑﺎﻟﻨﺎﺻﺮﻳﺔ ﻭﺍﻟﺤﺎﻟﺔ ﺍﻟﻤﺎﺩﻳﺔ ﺿﻌﻴﻔﺔ ﻭﻫﻨﺔ
ﺍﺭﺑﻊ ﺑﻨﺎﺕ ﺳﻤﺎﺡ ﻭﺳﻠﻮﻯ ﻭﻓﺮﺡ ﻭﺳﺮﻭﺭ ﻋﺎﺩ ﻫﺎﻱ ﺑﺎﻟﻨﺺ ﻟﻴﺲ ﻣﺎ ﺳﻤﺎﻫﺔ ﺍﺳﻢ ﺑﻨﻔﺲ ﺣﺮﻑ ﺧﻮﺍﺗﻬﺎ ﻣﺎ ﺍﻋﺮﻑ
ﺍﻟﺠﺪ ﺻﺎﻟﺢ ﻭﺣﺲ ﺑﮕﻠﺒﺔ ﻧﻐﺰﺓ ﻋﻠﻰ ﺍﺑﻨﺔ ﺍﻟﻲ ﺗﻮﻓﻰ ﺑﺪﻭﻥ ﻣﺎ ﻳﻘﻴﻢ ﻋﻠﻴﻪ ﺍﻟﻌﺰﺍﺀ ﻭﻻﻳﻨﺼﺐ ﻟﻪ ﻓﺎﺗﺤﺔ ﻭﻫﺎﻱ ﺷﺎﻧﺖ ﺑﻨﻔﺴﻪ - ﺷﻮﻑ ﺑﻮﻳﺔ ﺍﻟﻌﺎﺭ ﺭﻛﺒﻨﺎ ﻣﻦ ﺗﺎﻟﻲ ﻋﻤﺮﻱ ﺍﻧﻲ ﺗﻨﻜﺴﺮ ﺭﮔﺒﺘﻲ ﻭﺷﺮﻓﻨﺎ ﻳﻨﻤﺴﺢ ﺑﺎﻟﮕﺎﻉ ﺑﺴﺒﺐ ﺑﻨﺎﺕ ﻣﻨﺬﺭ
ﺷﻮﻑ ﺑﻮﻳﺔ ﻟﺤﻤﻨﺎ ﻣﺎ ﻳﺒﻘﺎ ﺑﻴﺪ ﺍﻟﻨﺎﺱ ﺍﻟﻐﺮﺏ
ﻭﻫﺬﺍ ﺷﺮﻓﻨﺎ
ﺻﺎﻟﺢ
ﺟﺪﺍ ﻗﺎﺳﻲ ﻭﻏﺎﺿﺐ ﻻﺑﻌﺪ ﺍﻟﺤﺪﻭﺩ ﺍﻟﻲ ﻳﺸﻮﻓﺔ ﻳﺨﺎﻑ ﻣﻨﺔ ﻭﻳﺘﺼﻮﺭﺓ ﻣﻨﺰﻭﻋﺔ ﻣﻦ ﮔﻠﺒﺔ ﺍﻟﺮﺣﻤﺔ ﻳﻌﻨﻲ ﺑﺎﺧﺘﺼﺎﺭ ﻃﺎﻏﻴﺔ
ﻋﻠﻰ ﺍﻟﺮﻏﻢ ﻣﻦ ﺣﺒﺔ ﻻﺑﻨﺔ ﺍﻟﺼﻐﻴﺮ ﻣﻨﺬﺭ ﻟﻜﻦ ﻗﺴﻰ ﻋﻠﻴﻪ ﻭﻃﺮﺩﺓ ﻣﻦ ﺣﻀﻨﻪ
ﻟﻜﻦ ﻫﻨﺎﻙ ﺍﺳﺮﺍﺭ ﺧﻠﻒ ﺟﻔﺎﺀ ﺍﻻﺏ ﻋﻠﻰ ﺍﻻﺑﻦ
ﺣﺴﺎﻡ - ﻳﻌﻨﻲ ﺍﻟﻤﻄﻠﻮﺏ ﺗﺮﻳﺪ ﺍﺟﻴﺐ ﺑﻨﺎﺕ ﻋﻤﻲ ﻭﺍﺟﻲ
ﺍﻟﺠﺪ - ﻻﺑﻮﻳﺔ ﻫﺎﻱ ﻋﻮﻓﻬﺎ ﻋﻠﻴﺔ ﺍﻧﻲ ﻭﻋﻤﻚ ﻭﺍﺑﻮﻙ ﺍﺣﻨﺎ ﻧﺘﻜﻔﻞ ﺑﺎﻟﺸﻐﻠﺔ ﺍﻧﺖ ﺑﺲ ﺍﻧﻄﻴﻨﺎ ﺍﻟﻌﻨﻮﺍﻥ
ﻻﻥ ﺍﻧﺖ ﻣﺎ ﻓﺎﺭﻍ ﻟﻬﺎﻱ ﺍﻻﺷﻴﺎﺀ ﺧﻠﻴﻨﺎ ﺍﺣﻨﺎ ﻧﺘﺼﺮﻑ
ﺣﺴﺎﻡ - ﺑﺮﺍﺣﺘﻚ ﺟﺪﻱ ﺍﻧﻲ ﺭﺍﺡ ﺍﺗﻮﻛﻞ ﻋﻠﻰ ﺷﻐﻠﻲ
ﺣﺴﺎﻡ ﻧﻘﺎﻟﻪ ﻳﺘﺼﻞ - ﺍﻟﻮ ﻫﻠﻮ ﺣﺐ
ﺣﻀﺮﻱ ﺭﻭﺣﺞ ﺍﺭﻳﺪﺝ ﺍﻟﻴﻮﻡ ﻋﺮﻭﺳﺔ ﺍﻟﻴﻮﻡ ﺍﺭﻳﺪ ﺗﻌﺪﻟﻴﻦ ﺍﻟﻤﺰﺍﺝ ﻻﻥ ﻛﻠﺶ ﺗﻌﺒﺖ ﻫﺎﻱ ﺍﻻﻳﺎﻡ
ﺍﻱ ﻻﺗﺨﺎﻓﻴﻦ ﺟﺎﻳﺐ ﺍﻟﺞ ﻫﺪﻳﺔ
ﻳﺎﻟﻠﻪ ﻣﻊ ﺍﻟﺴﻼﻣﺔ ﺑﺎﻟﻠﻴﻞ ﻧﻠﺘﻘﻲ
ﺣﺴﺎﻡ ﻭﻫﻮ ﻳﻨﻬﻲ ﺍﻻﺗﺼﺎﻝ ﺍﻭﻑ ﺑﺲ ﺧﻞ ﺍﺧﻠﺺ ﻣﻦ ﻫﺎﻱ ﻛﻮﻣﺔ ﺍﻟﺸﻐﻞ ﺍﻟﻌﻨﺪﻱ ﻻﻥ ﺍﻟﻠﻪ ﻳﺤﻔﻈﺔ ﺟﺪﻱ ﺳﻤﻠﻨﻲ ﻃﺮﻛﺎﻋﺔ ﺑﻨﺎﺕ ﻋﻤﻲ ﻣﺎ ﺍﻋﺮﻑ ﻣﻨﻴﻦ ﻃﻠﻌﻮﺍ ﻭﺍﻟﻠﻪ ﻳﺎﺟﺪﻱ ﻛﻞ ﻳﻮﻡ ﺍﻛﺘﺸﻒ ﺑﻴﻚ ﺷﻲ ﻭﺍﻟﻤﺼﻴﺒﺔ ﺍﻟﻜﻞ ﻳﮕﻮﻝ ﺍﻧﺖ ﺷﺒﻴﻪ ﺟﺪﻙ ﺍﺩﺭﻱ ﻫﻮ ﺍﻧﻲ ﺻﺤﻴﺢ ﻣﺤﺪ ﻳﺤﺰﺭﻧﻲ ﻟﻜﻦ ﻣﻌﻘﻮﻟﺔ ﻃﺎﻏﻲ ﻭﺍﻧﻲ ﻣﺎﻣﻨﺘﺒﻪ ﻋﻠﻰ ﻧﻔﺴﻲ
ﺣﺴﺎﻡ ﻭﻫﻮ ﻳﺤﺠﻲ ﻭﻳﺔ ﻧﻔﺴﻪ
ﺍﻱ ﺣﺴﺎﻡ ﺍﻧﺖ ﻃﺎﻏﻲ ﻭﻻﺗﻐﺎﻟﻂ ﻧﻔﺴﻚ ﺍﻧﺖ ﺗﻜﺴﺮ ﺍﻟﻤﻘﺎﺑﻞ ﻭﺍﺑﺪ ﻣﺎ ﺗﺮﺣﻢ ﻭﺍﻟﺪﻟﻴﻞ ﺣﻴﺎﺗﻚ ﻭﻋﻤﻠﻚ ﻭﻧﺴﻮﺍﻧﻚ ﻭﺍﺑﻨﻚ ﺍﻟﻲ ﻣﺎ ﺗﺴﺄﻝ ﻋﻨﻪ ﻭﻻﺗﻌﺮﻑ ﺍﻟﻠﻪ ﻭﻳﻦ ﺧﺎﻟﻘﻪ ﺣﺘﻰ ﻣﺎﻳﻌﺮﻓﻚ ﺍﺑﻮﻩ
ﺣﺴﺎﻡ ﻋﻨﺪﺓ ﺛﻼﺙ ﺍﺧﻮﺓ ﻋﻠﻲ ﻭﻋﻼﺀ ﻭﻋﺎﻣﺮ ﻭﺧﻮﺍﺕ ﺍﺛﻨﻴﻦ ﺭﺷﺎ ﻭﺷﻬﺪ
ﻭﻋﻤﺔ ﻧﺒﻴﻞ ﻋﻨﺪﺓ ﺣﺴﻴﻦ ﻭﻣﺤﻤﺪ ﻭﺍﺳﺮﺍﺀ ﻭﻧﺴﺮﻳﻦ ﻭﺯﻳﻨﺔ ﺯﻭﺟﺔ ﺣﺴﺎﻡ ﺍﻟﻲ ﺗﻮﻓﺖ
ﻋﻠﻲ ﺿﺎﺑﻂ ﻣﻘﺪﻡ ﺑﺎﻻﺳﺘﺨﺒﺎﺭﺍﺕ
ﻭﻋﺎﻣﺮ ﻣﺴﺎﻋﺪ ﻭﻳﺸﺘﻐﻞ ﻭﻳﺔ ﺣﺴﺎﻡ
ﻭﻋﻼﺀ ﻃﺎﻟﺐ ﺑﺎﻟﻜﻠﻴﺔ ﻋﻠﻮﻡ ﺣﺎﺳﺒﺎﺕ
ﺍﻟﺠﺪ ﻭﺍﻟﻌﻤﺎﻡ ﻛﻠﻬﻢ ﺳﺎﻛﻨﻴﻦ ﺑﻤﻨﻄﻘﺔ ﺭﺍﻗﻴﺔ ﻓﻲ ﺑﻐﺪﺍﺩ ﺑﺤﻴﺚ ﻳﻤﻠﻜﻮﻥ ﺷﺎﺭﻉ ﻛﺎﻣﻞ ﻛﻞ ﺍﻟﺒﻴﻮﺕ ﺍﻟﻬﻢ
ﺍﻟﺒﻴﻮﺕ ﺗﻜﻮﻥ ﺑﻴﺖ ﺑﺼﻒ ﺑﻴﺖ ﺍﻟﺠﺪ ﻳﺴﻜﻦ ﻭﻳﺎﻩ ﻧﻴﺒﻞ ﻭﻋﺎﺋﻠﺘﺔ
ﻭﺍﻟﺒﻘﻴﺔ ﻛﻠﻤﻦ ﻃﺎﻟﻊ ﺑﺒﻴﺖ
ﻃﺒﻌﺎ ﺍﻟﺠﺪ ﻛﻠﻤﻦ ﻣﻨﻄﻲ ﺣﺼﺔ ﻟﻜﻞ ﻭﺍﺣﺪ ﻣﻦ ﺍﻭﻻﺩﻩ ﻫﺎﻱ ﺍﻟﺤﺼﺔ ﺍﻟﻲ ﺑﻨﻄﻴﻬﺎ ﺣﺘﻰ ﻣﻦ ﻋﻨﺪﻫﺎ ﻭﻳﺒﺪﻱ ﻳﻜﻮﻥ ﻧﻔﺴﺔ ﻭﻳﺸﻖ ﻃﺮﻳﻘﻪ ﺑﺘﻜﻮﻳﻦ ﻧﻔﺴﻪ ﻭﺍﺳﻤﻪ
ﻛﻠﻬﻢ ﻧﺠﺤﻮ ﻣﻦ ﺍﺧﺬﻭﺍ ﻣﺴﺎﻋﺪﺓ ﺍﺑﻮﻫﻢ ﻭﻛﻠﻬﻢ ﻓﺘﺤﻮﻟﻬﻢ ﺑﻴﻮﺕ ﻭﻣﺸﺎﺭﻳﻊ ﺍﻻ ﻧﺒﻴﻞ ﺍﺗﻘﺸﻤﺮ ﻭﺿﺤﻜﻮ ﻋﻠﻴﻪ ﻭﺍﺧﺬﻭﺍ ﻓﻠﻮﺳﻪ ﻭﺭﺟﻊ ﺧﺎﻟﻲ ﺍﻟﻴﺪﻳﻦ ﺍﻟﻰ ﺍﺑﻴﻪ ﻭﺭﺟﻊ ﮔﻌﺪ ﻭﻳﺔ ﺍﺑﻮﻩ ﻋﺎﻳﺶ ﺟﻮﺓ ﺍﻳﺪ ﺍﺑﻮﻩ ﻭﺑﻜﻞ ﻇﻨﻪ ﺍﻥ ﻫﻮ ﺍﻟﻲ ﻳﻮﺭﺙ ﺍﺑﻮﻩ ﻣﻦ ﻳﻤﻮﺕ ﻻﻥ ﺍﻟﻜﻞ ﻣﺎﻣﻌﺘﺎﺯ
ﻟﻜﻦ ﻧﺒﻴﻞ ﺧﺎﻳﻒ ﻣﻦ ﺣﺴﺎﻡ ﻻﻥ ﻫﻮ ﺍﻟﻤﺴﺆﻝ ﻭﺑﻴﺪﺓ ﻛﻠﺸﻲ
↙️
ﻓﺮﺡ
ﻛﻨﺖ ﻛﺎﻋﺪﺓ ﺑﺎﻟﺪﻛﺎﻥ ﻛﺎﻟﻌﺎﺩﺓ ﺑﻌﺪ ﻣﺎﺟﺒﺖ ﻟﺨﻮﺍﺗﻲ ﺍﻟﻤﺴﻮﺍﻙ
ﺭﺟﻌﺖ ﺑﺴﻄﺖ ﺑﺎﻟﺪﻛﺎﻥ ﻭﺍﻟﻮﺿﻊ ﺍﻟﻒ ﺍﻟﺤﻤﺪﻟﻠﻪ ﻧﻌﻤﺔ ﻣﻦ ﺍﻟﻠﻪ ﻭﺑﻌﺪﻧﻲ ﺑﺰﻱ ﺍﻟﻮﻻﺩﻱ
ﻟﻜﻦ ﺍﺗﻔﺎﺟﺌﺖ ﻣﻦ ﺷﻔﺖ ﺍﺛﻨﻴﻦ ﺭﻳﺎﺟﻴﻞ ﺍﻛﺒﺎﺭ ﺑﺎﻟﻌﻤﺮ ﺭﺍﻛﺒﻴﻦ ﺳﻴﺎﺭﺓ ﺑﻴﻀﺔ ﻋﺎﻟﻴﺔ ﻟﻜﺰﺱ
ﻭﺭﺍﻫﻢ ﻃﺒﻜﺖ ﺳﻴﺎﺭﺓ ﻻﺥ ﻫﻢ ﻟﻜﺰﺱ ﺑﺲ ﺳﻮﺩﺓ
ﻭﻧﺰﻝ ﻣﻨﻪ ﺿﺎﺑﻂ
ﺍﻧﻲ ﻇﻞ ﮔﻠﺒﻲ ﻳﺮﺟﻒ ﺷﻠﻮﻥ ﻳﺎﺍﻟﻠﻪ ﺷﻨﺴﻮﻱ ﻫﺬﻭﻟﻲ ﻣﻨﻮ
ﺭﺣﺖ ﺩﺧﻠﺖ ﻋﻠﻰ ﺑﻴﺖ ﺍﺑﻮ ﻧﻮﺍﻝ ﺍﻧﻲ ﻣﻨﺒﻬﺔ ﻋﻠﻰ ﺍﻟﺒﻨﺎﺕ ﻣﺤﺪ ﺗﻔﺘﺢ ﺍﻟﺒﺎﺏ ﺍﻧﺔ ﻛﺎﻋﺪﺓ ﺑﺎﻟﺪﻛﺎﻥ ﻭﺍﺷﻮﻑ ﺍﻟﺠﺎﻱ ﻭﺍﻟﺮﺍﻳﺢ ﻓﻬﻨﺔ ﺍﺗﻌﻮﺩﻥ ﻋﻠﻴﺔ ﺍﻧﻲ ﻣﻮﺟﻮﺩﺓ
ﺭﺣﺖ ﺑﺪﻟﺖ ﻣﻼﺑﺴﻲ ﻭﻟﺒﺴﺖ ﻋﺒﺎﺕ ﺍﻟﺮﺍﺱ ﻭﺍﺧﺬﺕ ﻋﻤﻮ ﺍﺑﻮ ﻧﻮﺍﻝ ﻭﺭﺣﻨﺎ ﻟﺒﺎﺏ ﺑﻴﺘﻨﺎ
ﺍﺑﻮ ﻧﻮﺍﻝ - ﺗﻔﻀﻠﻮ ﻋﻤﻲ ﻃﺎﻟﺒﻴﻦ ﻣﻨﻮ
ﺍﻟﻐﺮﻳﺐ - ﻫﺬﺍ ﻣﻮ ﺑﻴﺖ ﺍﺑﻮ ﺳﻤﺎﺡ
ﺍﺑﻮ ﻧﻮﺍﻝ - ﺍﻱ ﻋﻤﻲ ﻭﺻﻠﺘﻮ
ﻓﺮﺡ ﻃﺒﻌﺎ ﻫﺬﺍ ﺍﻟﺤﺠﻲ ﻫﻤﺔ ﻳﺤﺠﻮﻥ ﻭﺍﻧﻲ ﻻﺑﺪﺓ ﺧﻠﻒ ﺍﺑﻮ ﻧﻮﺍﻝ ﺍﺗﺴﻤﻊ ﻭﻣﺪﻧﮕﺔ ﺭﺍﺳﻲ ﻟﻜﻦ ﺍﻧﺼﺪﻣﺖ ﻣﻦ ﺳﻤﻌﺖ ﻛﻼﻡ ﺍﻟﻐﺮﻳﺐ ﻣﻦ ﺣﺠﺔ ﻛﺎﻧﺖ ﺍﻟﻠﻬﺠﺔ ﻣﺎﻟﺘﺔ ﺑﻐﺪﺍﺩﻳﺔ
ﺍﻟﻐﺮﻳﺐ - ﺍﻧﻲ ﻋﻢ ﺍﻟﺒﻨﺎﺕ
ﻭﻃﻠﻊ ﺟﻨﺴﻴﺔ ﻭﺷﻮﻓﻬﺎ ﻻﺑﻮﻧﻮﺍﻝ ﺣﺘﻰ ﻳﺘﺄﻛﺪ
ﺍﻟﺘﻔﺖ ﺍﺑﻮ ﻧﻮﺍﻝ ﻋﻠﻰ ﻓﺮﺡ - ﻻﺗﺨﺎﻓﻴﻦ ﺑﻮﻳﺔ ﻫﺬﻭﻟﻲ ﻋﻤﺎﻣﺞ
ﺍﻟﺘﻔﺖ ﺗﻮﻓﻴﻖ ﻭﺍﺧﻮﻩ ﺟﻮﺍﺩ ﻋﻠﻰ ﻓﺮﺡ ﻭﺍﻧﺼﺪﻣﻮ
ﺗﻮﻓﻴﻖ ﻭﺍﻟﺪﻣﻌﺔ ﺻﺎﺭﺕ ﺑﻄﺮﻑ ﻋﻴﻨﻪ ﻣﻦ ﻧﻈﺮ ﻋﻠﻰ ﺣﺎﻝ ﺑﻨﺖ ﺍﺧﻮ ﺷﻠﻮﻥ ﺗﻌﺒﺎﻧﺔ ﻭﺿﻌﻴﻔﺔ ﻳﻌﻨﻲ ﺧﺪﺍﻣﺘﻬﻢ ﻣﻮﻫﻴﺞ ﺗﻌﺒﺎﻧﺔ ﺑﮕﺪ ﻫﺎﻱ ﺍﻟﻤﮕﺮﻭﺩﺓ ﺍﻟﻲ ﮔﺪﺍﻣﺔ ﺗﺒﺎﻭﻉ ﻋﻠﻴﻬﻢ ﻭﺑﺨﻮﻑ ﻭﺑﻌﺪ ﻭﻳﺎﻫﺔ ﻛﺮﻩ
ﻓﺮﺡ - ﺷﺘﺮﺩﻭﻥ ﻣﻦ ﻋﺪﻧﺎ ﻣﺎﻋﺪﻧﺎ ﺍﻱ ﺷﻲ ﻳﺮﺑﻄﻨﺎ ﻭﻳﺎﻛﻢ
ﺍﺑﻮ ﻧﻮﺍﻝ - ﺑﻮﻳﺔ ﻓﺮﺡ ﺩﺧﻠﻲ ﻋﻤﺎﻣﺞ ﺟﻮﺓ ﺑﺎﻟﺒﻴﺖ ﻣﺎﻳﺼﻴﺮ ﺗﺤﺠﻮﻥ ﻫﺬﺍ ﺍﻟﺤﺠﻲ ﺑﺎﻟﺸﺎﺭﻉ
ﺍﻧﺘﺒﻬﻮ ﺍﻟﻌﻤﺎﻡ ﺷﻠﻮﻥ ﻓﺮﺡ ﻣﻄﻴﻌﺔ ﻭﺗﺤﺘﺮﻡ ﺍﻟﺮﺟﻞ ﺍﻟﻜﺒﻴﺮ ﺍﻟﻲ ﻭﺍﻛﻒ ﺍﻣﺎﻣﻬﻢ ﻋﻜﺲ ﻣﻌﺎﻣﻠﺘﻬﺎ ﻭﻳﺎﻫﻢ ﺑﺠﻔﺎﺀ ﺻﺪﻣﻬﻢ
ﻋﻠﻲ - ﺍﺷﻮ ﺍﻧﺘﻲ ﻣﺎﺗﺤﺸﻤﻴﻦ ﺍﺣﺪ
ﻓﺮﺡ - ﺍﻧﻲ ﺍﺣﺘﺮﻡ ﺍﻟﻨﺎﺱ ﺍﻻﻋﺮﻓﻬﻢ ﻟﻜﻦ ﺍﻟﻐﺮﺑﺎﺀ ﻣﺎ ﻣﺠﺒﻮﺭﺓ ﺍﺣﺘﺮﻣﻬﻢ ﺧﺼﻮﺻﺎ ﺍﺫﺍ ﻛﺎﻥ ﻣﺎ ﻣﺮﺣﺐ ﺑﻴﻬﻢ
ﻋﻠﻲ ﺍﺟﺔ ﻳﻬﺪ ﻋﻠﻴﺔ ﻟﻜﻦ ﻭﻗﻔﻪ ﺍﺑﻮﻩ ﺑﺎﺷﺎﺭﺓ ﻣﻨﻪ
ﺗﻮﻓﻴﻖ - ﺷﻮﻓﻲ ﺑﻮﻳﺔ ﺗﺮﺓ ﺍﺣﻨﺎ ﻣﺎ ﺩﺭﻳﻨﺎ ﺑﻮﻓﺎﺓ ﺍﺧﻮﻧﺎ ﻣﻨﺬﺭﺍﻻ ﺍﻟﺒﺎﺭﺣﺔ ﻭﺑﺎﻟﺼﺪﻓﺔ ﻭﻻﻧﻌﺮﻑ ﺍﻥ ﻫﻮ ﻋﻨﺪﺓ ﺑﻨﺎﺕ ﻭﻫﻢ ﺑﺎﻟﺼﺪﻓﺔ ﻋﺮﻓﻨﺎ
ﻓﺮﺡ ﻭﺗﻨﻈﺮ ﺍﻟﻬﻢ ﻧﻈﺮﺕ ﺣﺬﺭ
ﻭﺑﺘﺮﺩﺩ ﺭﺍﺣﺖ ﻃﺮﻗﺖ ﺑﺎﺏ ﺍﻟﺸﺎﺭﻉ ﻭﻃﻠﻌﺖ ﺍﻟﻬﻢ ﺳﻠﻮﻯ ﻻﺑﺴﺔ ﺣﺠﺎﺏ
ﺳﻠﻮﻯ ﻣﻨﻮ
ﻓﺮﺡ - ﺍﻧﻲ ﻓﺮﺡ ﺍﺧﺘﺞ ﻓﺘﺤﻲ ﺍﻟﺒﺎﺏ
ﺍﻧﺘﺒﻬﻮ ﻋﻠﻰ ﻧﻮﻋﻴﺔ ﺍﻟﺤﺬﺭ ﻭﺍﻟﺨﻮﻑ ﻭﺍﺟﺮﺍﺀ ﺍﻟﺤﻤﺎﻳﺔ ﺍﻟﻲ ﻣﺘﺨﺬﺍﺗﻪ
ﺍﻧﻘﻬﺮﻭﺍ ﻋﻠﻴﻬﻢ
ﻓﺘﺤﺖ ﺳﻠﻮﻯ ﻭﺑﺒﺘﺴﺎﺑﺔ ﺗﺤﺠﻲ ﻭﻳﺔ ﻓﺮﺡ ﺑﺪﻭﻥ ﻣﺎ ﺗﻨﺘﺒﻪ ﻋﻠﻰ ﺍﻟﻲ ﺧﻠﻒ ﻓﺮﺡ
ﺳﻠﻮﻯ - ﻫَـﺎ ﻓﻼﺡ ﻟﻴﺶ ﺭﺍﺟﻊ ﻣﻦ ﻭﻛﺖ
ﺍﻟﻌﻴﻮﻥ ﻛﻠﻪ ﻋﻘﺪﺕ ﺍﻟﺤﻮﺍﺟﺐ ﺑﺎﺳﺘﻔﻬﺎﻡ ﻣﻦ ﻫﻮ ﻓﻼﺡ
ﻓﺮﺡ ﻭﻭﺟﻪ ﮔﺎﻡ ﻳﻨﻄﻲ ﺍﻟﻮﺍﻥ
ﻓﺮﺡ ﺑﺼﻮﺕ ﻧﺎﺻﻲ - ﺩﺧﻠﻲ ﻓﻮﺗﻲ ﺟﻮﺓ ﻓﻀﺤﺘﻴﻨﺎ ﺍﻧﺘﻲ ﻭﻛﺸﺮﺗﺞ
ﻋﻠﻲ ﺍﺑﺘﺴﻢ ﻋﻠﻰ ﺷﻜﻞ ﻓﺮﺡ ﺷﻠﻮﻥ ﺗﺨﺰﺭ ﺍﺧﺘﻬﺎ ﺍﻻﻛﺒﺮ ﻣﻨﻬﺎ ﻣﺒﻴﻨﺔ ﺍﻛﺒﺮ ﻣﻨﻬﺎ ﺑﺲ ﺍﻟﻠﻪ ﻳﺴﺘﺮ ﻋﻠﻴﻬﺎ ﺷﻜﺪ ﺣﻠﻮﺓ
ﺭﻓﻌﺖ ﺳﻠﻮﻯ ﻋﻴﻮﻧﻬﺎ ﻣﻦ ﻋﻠﻰ ﻓﺮﺡ ﻭﻭﮔﻌﺖ ﻋﻠﻰ ﺍﻟﺮﻳﺎﺟﻴﻞ ﺧﻠﻒ ﻓﺮﺡ ﺷﻬﻜﺖ ﺑﺼﺪﻣﺔ ﻭﺑﺨﻮﻑ ﻻﻥ ﺷﻜﻠﻬﻢ ﻋﺮﻓﺘﻬﻢ ﻣﺜﻞ ﺍﻟﺸﻜﻞ ﺍﻟﻲ ﺑﺎﻟﺼﻮﺭ ﻣﺎﻟﺖ ﺍﺑﻮﻫﺔ
ﻟﻜﻦ ﻓﺮﺡ ﻣﺎ ﺷﺎﻳﻔﺔ ﺍﻟﺼﻮﺭ ﻻﻥ ﻣﺎﺟﺎﻧﺖ ﺗﺤﺒﻬﻢ ﻻﻥ ﻫﻤﺔ ﺍﻟﻲ ﺍﺫﻭ ﺍﺑﻮﻫﺎ ﻭﻣﺤﺪ ﺭﺣﻤﺔ ﻭﻫﻮ ﻋﺎﻳﺶ ﻭﻻ ﺍﺣﺪ ﺭﺣﻤﺔ ﻭﻫﻮ ﻣﻴﺖ ﺍﺑﺪ ﻣﺎ ﺭﺍﺡ ﺗﻨﺴﺎﻟﻬﻢ ﺍﻟﻲ ﺻﺎﺭ ﺑﺎﺑﻮﻫﺎ ﻭﻗﻬﺮﺕ ﺍﺑﻮﻫﺎ ﻭﺩﻣﻌﺘﺔ ﺍﻟﻲ ﻛﺎﻧﺖ ﻛﻠﻬﺎ ﺍﺷﺘﻴﺎﻕ ﻟﺤﻀﻦ ﺍﻣﻪ ﻭﺍﺑﻮﻩ ﻭﺍﺧﻮﺍﻧﺔ ﻭﺍﻟﻲ ﻫﻤﺔ ﻣﻮ ﺑﺤﺎﻟﻪ
ﺩﺧﻠﻮ ﺍﻟﻌﻤﺎﻡ ﻭﻋﻠﻲ ﻟﻠﻬﻮﻝ ﺍﻟﺤﻮﻟﻲ ﺍﻟﺼﻐﻴﺮ ﻛﺎﻥ ﻣﻜﺎﻥ ﺻﻐﻴﺮ ﺩﺍﻓﻲ ﻳﺠﻤﻊ ﺍﻟﺒﻨﺎﺕ ﻭﺑﻲ ﺗﻌﻢ ﺍﻻﻟﻔﺔ ﻭﺍﻟﺴﻜﻴﻨﺔ
ﻭﻛﺎﻧﺖ ﺳﻤﺎﺡ ﺗﻄﺒﺦ ﺑﺎﻟﻤﻄﺒﺦ ﻭﺭﻳﺤﺔ ﺍﻟﻄﺒﺦ ﺍﻟﺰﻛﻴﺔ ﺗﻤﻠﻰﺀ ﺍﻟﻤﻨﺰﻝ
ﻓﺮﺡ - ﺳﻤﻮﺣﺔ ﺗﺮﻛﻲ ﺍﻟﺒﻴﺪﺝ ﻭﺗﻌﺎﻱ ﺷﻮﻓﻲ ﻣﻨﻮ ﺍﺟﺎﻧﺎ ﻟﻠﺒﻴﺖ
ﺳﻤﺎﺡ ﻭﻫﻲ ﺗﻨﺸﻒ ﺍﻳﺪﻫﺎ ﺑﻤﻨﺸﻔﺔ ﺍﻟﻤﻄﺒﺦ ﻭﺗﻨﺰﻝ ﺭﺩﻥ ﺍﻟﺜﻮﺏ ﻭﺗﻠﺒﺲ ﺷﺎﻟﻬﺎ ﺍﻟﻲ ﻣﻌﻠﮕﺘﻪ ﻋﻠﻰ ﺑﺎﺏ ﺍﻟﻤﻄﺒﺦ ﻭﺭﺍﺣﺖ ﻭﺭﺓ ﻓﺮﺡ ﻭﺗﻮﻗﻔﺖ ﺑﺼﺪﻣﺔ ﻣﻦ ﺷﺎﻓﺖ ﻣﻨﻮ ﺍﻟﻘﺎﺩﻡ ﻟﺰﻳﺎﺭﺗﻬﻢ
ﺳﻤﺎﺡ - ﺍﻟﺴﻼﻡ ﻋﻠﻴﻜﻢ
ﺍﻟﻜﻞ - ﻭﻋﻠﻴﻜﻢ ﺍﻟﺴﻼﻡ ﻭﺍﻟﺮﺣﻤﺔ
ﺍﺗﻘﺪﻡ ﻋﻠﻴﻬﺎ ﺗﻮﻓﻴﻖ ﻭﻫﻮ ﺍﻟﻘﻬﺮ ﻳﻨﺎﺯﻉ ﻳﮕﻠﺒﻪ - ﺍﻧﺘﻲ ﺳﻤﺎﺡ
ﺳﻤﺎﺡ ﻭﺍﻟﺨﻮﻑ ﻣﺎﻟﻲ ﮔﻠﺒﻬﺎ - ﺍﻱ ﺍﻧﻲ ﺳﻤﺎﺡ
ﺍﻟﻌﻢ ﻏﻤﺾ ﻋﻴﻨﺔ ﻭﺍﺧﺬ ﺷﻬﻴﻖ ﻭﺯﻓﻴﺮ
ﻋﻠﻲ ﺍﻟﺘﻔﺖ ﻋﻠﻴﻬﺎ ﻭﺍﻧﺼﺪﻡ ﺍﻥ ﻫﺬﺍ ﺍﻟﺠﻤﺎﻝ ﺍﺣﺪ ﻣﺪﻧﺴﺔ ﻭﻣﻐﺘﺼﺒﺔ ﺻﺪﮒ ﻗﻬﺮ ﻭﻏﺼﺔ ﺑﺎﻟﮕﻠﺐ ﺩﻧﻚ ﻭﺍﻟﺤﺴﺮﺓ ﺻﺎﺭﺕ ﺑﺎﻟﮕﻠﺐ
ﺧﻄﻴﺔ ﻫﺎﻱ ﺷﻨﻮ ﺷﺎﻓﺖ ﻣﻦ ﺩﻧﻴﺘﻬﺎ
ﺟﻮﺍﺩ - ﻫﻠﺔ ﺑﻮﻳﺔ ﻭﻳﻦ ﺍﺧﺘﻜﻢ ﺍﻟﺼﻐﻴﺮﺓ
ﻛﺎﻥ ﻫﻨﺎﻙ ﺑﻌﺾ ﺍﻟﺘﺮﺩﺩ ﻭﺍﻟﻔﻀﻮﻝ ﺑﻴﻦ ﺍﻟﻌﻤﺎﻡ ﻭﺑﻨﺎﺕ ﺍﻻﺥ
ﺳﻤﺎﺡ ﺍﻟﺘﻔﺘﺖ ﻟﻠﻐﺮﻓﺔ ﺍﻟﻲ ﺗﻨﺎﻡ ﺑﻴﻬﺎ ﺳﺮﻭﺭ ﺧﻄﻴﺔ ﻫﺎﻱ ﺍﻻﻳﺎﻡ ﻛﻌﺪﺕ ﺣﺎﻟﺘﻬﺎ ﺗﺘﺤﺴﻦ
ﺳﻤﺎﺡ - ﻓﺮﺡ ﺭﻭﺣﻲ ﺳﺎﻋﺪﻱ ﺳﺮﻭﺭ ﺣﺘﻰ ﺗﺠﻲ ﺗﺴﻠﻢ ﻋﻠﻰ ﻋﻤﺎﻣﻲ
ﺟﻮﺍﺩ - ﻟﻴﺶ ﺷﺒﻴﻪ ﺳﺮﻭﺭ
ﻓﺮﺡ ﻭﻫﻲ ﺗﻨﻈﺮ ﺍﻟﻬﻢ ﺑﻐﻀﺐ - ﺍﺧﺘﻲ ﻗﺒﻞ ﻓﺘﺮﺓ ﻣﻮﺑﻌﻴﺪﺓ ﺍﺣﺘﺮﮒ ﺟﺴﻤﻬﺎ ﺑﻤﺎﻱ ﺣﺎﺭ ﻭﺗﻀﺮﺭﺕ ﺑﺲ ﺭﺟﻠﻬﺎ ﻛﻠﻬﺎ
ﺗﻮﻓﻴﻖ - ﺷﻮﻓﻲ ﺑﻨﺘﻲ ﺍﺣﻨﺎ ﻧﺘﻜﻔﻞ ﺑﻴﻬﺎ ﻭﻧﺎﺧﺬﻫﺎ ﺍﻭ ﻧﺴﻔﺮﻫﺎ ﻻﺣﺴﻦ ﺟﺮﺍﺡ ﺑﺎﻟﻌﺎﻟﻢ ﺣﺘﻰ ﻳﻌﺎﻟﺠﻬﺔ
ﺭﺍﺣﺖ ﻓﺮﺡ ﺑﻌﺪ ﻣﺎﻏﺰﺭﺕ ﻋﻠﻲ ﻻﻥ ﮔﻌﺪ ﺑﺒﺎﻭﻉ ﻋﻠﻰ ﺳﻤﺎﺡ ﻭﻋﻴﻮﻧﺔ ﻣﺎ ﻃﺎﺣﺖ ﻣﻦ ﻋﻠﻴﻬﺎ
ﺭﺟﻌﺖ ﻓﺮﺡ ﻭﻫﻲ ﺗﺴﻨﺪ ﺳﺮﻭﺭ ﻭﻻﺯﻣﺔ ﺍﻳﺪﻫﺎ ﻭﺳﺮﻭﺭ ﺗﻤﺸﻲ ﺑﺒﻄﻲﺀ
ﺳﺮﻭﺭ ﺭﻓﻌﺖ ﺭﺍﺳﻬﺎ ﻭﻭﻛﻌﺖ ﻋﻴﻨﺎ ﻋﻠﻰ ﺗﻮﻓﻴﻖ ﻭﺻﺮﺧﺖ ﺻﻮﺕ ﻋﺎﻟﻲ ﻭﺻﺎﺣﺖ
ﺳﺮﻭﺭ ﻭﺑﺘﻌﺠﺐ - ﺑﺎﺑﺎ ﺑﺎﺑﺎ ﻋﺎﻳﺶ
ﺑﻨﺎﺕ ﺷﻔﺘﻮ ﺍﻧﻲ ﻣﻮ ﻛﻨﺖ ﺍﮔﻮﻝ ﺑﺎﺑﺎ ﻋﺎﻳﺶ ﺩﺍﺋﻤﺎ ﻳﺠﻴﻨﻲ ﺑﺎﻟﺤﻠﻢ ﻋﺒﺎﻟﻚ ﻋﺎﻳﺶ ﻣﺎﻣﻴﺖ
ﻃﺒﻌﺎ ﻛﺎﻥ ﻟﻜﻠﻤﺎﺕ ﺳﺮﻭﺭ ﺍﻟﺒﺮﻳﺌﺔ ﻛﺎﻥ ﻟﻬﺎ ﺍﻟﻮﻗﻊ ﺍﻟﺤﺰﻳﻦ ﻋﻠﻰ ﺗﻮﻓﻴﻖ ﻭﺟﻮﺍﺩ
ﻛﺎﻥ ﺣﺰﻧﻬﻢ ﻋﻠﻰ ﺑﻨﺖ ﺍﺧﻮﻫﻢ ﺍﻟﻲ ﺳﺘﻮﻫﻢ ﻋﺮﻓﻮ ﺑﻴﻬﺎ ﻣﺤﺘﺮﮔﺔ ﻭﺣﺰﻥ ﻋﻠﻰ ﻟﻬﻔﺘﻬﺎ ﻻﺑﻮﻫﺎ ﺧﻄﻴﺔ ﺑﻌﺪﻫﺎ ﺻﻐﻴﺮﺓ ﻭﻓﺎﺭﻛﺖ ﺍﺣﺒﺎﺏ ﮔﻠﺒﻬﺎ
ﺗﻮﻓﻴﻖ ﻣﺎ ﺗﺤﻤﻞ ﺍﻟﻤﻮﻗﻒ ﻭﺭﺍﺡ ﺍﻗﺘﺮﺏ ﻋﻠﻴﻬﺎ ﻭﺑﺠﺔ ﻭﺣﻀﻨﻬﺎ
ﺗﻮﻓﻴﻖ - ﺗﻌﺎﻱ ﻳﺎﺑﻌﺪ ﻋﻤﺞ ﺍﻧﻲ ﻣﺜﻞ ﺍﺑﻮﺝ
ﺳﺮﻭﺭ ﺑﺘﺴﺄﻝ ﻟﺴﻤﺎﺡ - ﻟﻌﺪ ﻣﻨﻮ ﻫﺬﺍ ﺍﺫﺍ ﺍﺑﻮﻱ
ﺳﻤﺎﺡ ﻭﺑﺼﻮﺕ ﻧﺎﺻﻲ - ﻫﺬﺍ ﻋﻤﻮ ﺗﻮﻓﻴﻖ ﺍﺧﻮ ﺑﺎﺑﺎ ﺍﻟﻠﻪ ﻳﺮﺣﻤﺔ
ﻋﻠﻲ - ﺍﺣﻢ ﺍﺣﻢ ﻫﻠﻮ ﺷﻠﻮﻧﺞ ﺳﺮﻭﺭ
ﺳﺮﻭﺭ ﻭﺑﺨﺠﻞ - ﺍﻧﻲ ﺯﻳﻨﺔ
ﺍﻗﺘﺮﺏ ﻣﻨﻬﺎ ﺟﻮﺍﺩ ﺑﺨﻄﻮﺍﺕ ﺛﻘﻴﻠﺔ ﻭﻧﺰﻝ ﻋﻠﻴﻬﺎ ﻭﺑﺎﺳﻪ ﻣﻦ ﺭﺍﺳﻬﺎ
ﺗﻮﻓﻴﻖ - ﺷﻮﻓﻮ ﺑﻮﻳﺔ ﺍﺣﻨﺎ ﺍﺟﻴﻨﺎ ﺣﺘﻰ ﻧﺎﺧﺬﻛﻢ ﻭﻳﺎﻧﺎ ﻟﺒﻴﺖ ﺍﺑﻮﻛﻢ ﻭﺟﺪﻛﻢ ﻣﺎﻳﺼﻴﺮ ﺑﻌﺪ ﺗﻌﻴﺸﻮﻥ ﻟﻮﺣﺪﻛﻢ ﻭﺍﺣﻨﺎ ﻣﺜﻞ ﻣﺎﺗﻌﺮﻓﻮﻥ ﻣﺎﻛﺎﻥ ﻋﻨﺪﻧﺎ ﺧﺒﺮ
ﻓﺮﺡ - ﻟﻴﺶ ﻣﻮ ﺍﺗﺼﻠﻨﺎ ﻋﻠﻴﻜﻢ ﻋﻠﻰ ﺍﻟﺮﻗﻢ ﺍﻟﻲ ﻛﺎﻥ ﺑﺎﺑﺎ ﺑﺘﺼﻞ ﻋﻠﻴﻪ ﻭﻛﺎﻥ ﻭﺍﺣﺪ ﻣﻨﻜﻢ ﺩﺍﺋﻤﺎ ﻳﺠﺎﻭﺑﻪ ﻭﻳﻈﻞ ﻳﺤﺠﻲ ﻋﻠﻴﻪ ﻭﻳﺴﺪﺓ ﺑﻮﺟﻬﺔ ﺍﺗﺼﻠﻨﺎ ﺑﻴﻮﻡ ﻭﻓﺎﺓ ﺑﺎﺑﺎ ﻭﮔﺎﻝ ﻣﺎﻋﺪﻧﺎ ﻭﺍﺣﺪ ﺑﻬﺬﺍ ﺍﻻﺳﻢ
ﺗﻮﻓﻴﻖ ﻭﺟﻮﺍﺩ ﺑﺎﺳﺘﻐﺮﺍﺏ - ﻣﻨﻴﻦ ﺟﺒﺘﻲ ﻫﺬﺍ ﺍﻟﻜﻼﻡ
ﺳﻤﺎﺡ ﺗﺼﻴﺢ ﺑﺎﺧﺘﻬﺎ - ﻓﺮﺡ ﺑﺲ ﻛﺎﻓﻲ
ﻓﺮﺡ - ﻻ ﻣﺎ ﺍﺳﻜﺖ ﻟﻴﺶ ﺗﺨﺎﻓﻴﻦ ﻋﻠﻰ ﻣﺸﺎﻋﺮﻫﻢ ﺧﺎﻑ ﺗﻨﺠﺮﺡ
ﻋﻠﻲ - ﺍﺣﺘﺮﻣﻲ ﻧﻔﺴﺞ ﺗﺮﺓ ﻣﻮ ﺗﺸﻮﻓﻴﻦ ﻟﺤﺪ ﻫﺴﺔ ﺍﺣﻨﺎ ﺳﺎﻛﺘﻴﻦ ﻋﻨﺞ ﻣﻌﻨﺎﻫﺎ ﺗﻈﻠﻴﻦ ﺗﻤﺴﻠﺘﻴﻦ ﺑﺎﻟﻜﻼﻡ
ﺗﻮﻓﻴﻖ - ﺍﺳﻜﺖ ﻋﻠﻲ ﺍﺗﺮﻛﻬﺎ ﺗﺤﺠﻲ ﺗﺮﺓ ﺣﻘﻬﺎ ﺍﻟﻈﺎﻫﺮ ﻛﺎﻥ ﺍﻛﻮ ﻭﺍﺣﺪ ﻳﺘﻮﺍﺻﻞ ﻭﻳﺔ ﺍﺧﻮﻱ ﺍﻟﻲ ﻣﺨﻠﻲ ﻳﻌﺘﻘﺪ ﺍﻥ ﺍﺑﻮﻱ ﻣﺎﻳﺮﺣﺐ ﺑﻲ ﻭﻣﺎ ﻳﺮﻳﺪ ﻳﺸﻮﻓﻪ
ﻭﻫﺬﺍ ﺍﻋﺮﻓﺔ ﻣﻨﻮ ﺑﺲ ﺧﻞ ﺍﻓﺮﻍ ﺍﻟﻪ ﻭﺍﺷﻮﻑ ﺷﻤﺼﺨﻢ ﻫﻠﻤﺮﺓ
ﻟﻜﻦ ﻣﺎ ﺭﺍﺡ ﺍﺳﻜﺖ ﺍﺫﺍ ﺍﻛﺘﺸﻔﺖ ﺍﻥ ﻫﻮ ﻭﺭﺓ ﻛﻞ ﺍﻟﺴﺎﻟﻔﺔ
ﺟﻮﺍﺩ - ﻳﺎﻟﻠﻪ ﻳﺎﺑﻌﺪ ﻋﻤﻜﻢ ﺟﻬﺰﻭ ﺣﺎﻟﻜﻢ ﻭﻗﻔﻠﻮ ﺑﻴﺘﻜﻢ ﻭﺍﺭﻳﺪﻛﻢ ﺣﺘﻰ ﺗﺮﺟﻌﻮﻥ ﻭﻳﺎﻧﺎ ﻟﻠﺒﻴﺖ ﺍﻟﻴﻮﻡ
ﻓﺮﺡ ﻭﻫﺪﺕ ﺭﺍﺩﺕ ﺗﻌﺎﺭﺽ ﻟﻜﻦ ﺳﻤﺎﺡ ﺳﺒﻘﺘﻬﺎ - ﺻﺎﺭ ﻋﻤﻮ ﺑﺲ ﺍﻧﻄﻮﻧﺎ ﻓﺮﺻﺔ ﺣﺘﻰ ﻧﻠﻢ ﻏﺮﺍﺽ ﺍﻟﺒﻴﺖ
ﻭﺍﻟﻠﻪ ﻭﻓﻌﻼ ﺑﻠﺸﻮ ﺍﻟﺒﻨﺎﺕ ﻳﻠﻤﻮﻥ ﻏﺮﺍﺽ ﺍﻟﺒﻴﺖ ﻭﻓﺮﺡ ﺍﺗﻜﻔﻠﺖ ﺍﻥ ﺗﺤﻔﻆ ﻏﺮﺍﺽ ﺍﺑﻮﻫﺎ ﻭﺍﻣﻬﺎ
ﻭﻛﺎﻧﺖ ﺗﺮﺗﺐ ﺑﻴﻬﻢ ﻭﺷﺎﻓﺖ ﺍﻟﺮﺳﺎﻳﻞ ﺍﻟﻲ ﻭﺍﺻﻠﺔ ﻻﺑﻮﻫﺎ ﻣﻦ ﺟﺪﻫﺎ ﻭﺣﻔﻈﺘﻬﻢ ﺑﺠﻨﻄﺘﻬﺎ ﻭﺷﺎﻓﺖ ﺻﻮﺭﻫﻢ ﺧﻄﻴﺔ ﻇﻠﺖ ﺗﺒﺠﻲ ﺷﻠﻮﻥ ﺭﺍﺡ ﺗﻔﺎﺭﻕ ﺍﻟﺒﻴﺖ ﺍﻟﻲ ﺍﺗﺠﻤﻌﺖ ﻣﻊ ﺍﻣﻬﺎ ﻭﺍﺑﻮﻫﺎ ﻭﺧﻮﺍﺗﻬﺎ ﺍﺗﺬﻛﺮﺕ ﺍﺑﻮﻫﺎ ﺷﻠﻮﻥ ﻣﻦ ﻳﺮﺟﻊ ﻣﻦ ﺍﻟﺸﻐﻞ ﺷﻠﻮﻥ ﻣﺤﻤﻞ ﺑﻤﺴﻮﺍﻙ ﻟﻠﺒﻴﺖ ﻭﺷﻐﻼﺕ ﺍﻟﻬﻦ ﻭﺷﻠﻮﻥ ﻳﻄﻠﻌﻬﻢ ﻟﻤﺪﻳﻨﺔ ﺍﻻﻟﻌﺎﺏ ﻭﺍﻣﻬﺎ ﻣﻦ ﻛﺎﻧﺖ ﺗﻤﺸﻂ ﺍﻟﻬﺎ ﺷﻌﺮﻫﺎ ﺍﻟﻄﻮﻳﻞ ﻭﺗﻜﻮﻝ ﺍﻧﺘﻲ ﺑﻴﻮﻡ ﻋﺮﺳﺞ ﺍﻧﻲ ﺍﺳﻮﻱ ﺷﻌﺮﺝ
ﻫﻮﺍﻱ ﻣﻮﺍﻗﻒ ﺍﻟﻬﺔ ﻭﻳﻪ ﻋﺎﺋﻠﺘﻬﺎ ﺑﻬﺬﺍ ﺍﻟﺒﻴﺖ ﺷﻠﻮﻥ ﺭﺍﺡ ﻳﺘﺮﻛﻮﻧﺔ ﻳﺎﺭﺏ ﻭﺍﺣﻨﺎ ﻧﺮﺍﺡ ﻧﺮﻭﺡ ﻟﻠﻤﺠﻬﻮﻝ
ﻭﺭﺣﻨﺎ ﺍﻧﻲ ﻭﺧﻮﺍﺗﻲ ﺍﻟﻰ ﺑﻴﺖ ﺍﻟﺮﺟﻞ ﺍﻟﻄﻴﺐ ﺍﺑﻮ ﻧﻮﺍﻝ ﺍﻟﺬﻱ ﻋﺎﺵ ﻣﻌﻨﺎ ﻛﻞ ﻣﻌﺎﻧﺎﺗﻨﺎ ﻭﺍﺣﺰﺍﻧﺔ ﻭﻣﺎ ﻗﺼﺮ ﻭﻳﺎﻧﺔ ﺍﺑﺪ ﺣﻀﻨﺖ ﺍﻟﺤﻀﻦ ﺍﻟﺤﻨﻴﻦ ﺍﻟﻲ ﺍﺳﺘﻘﺒﻠﻨﺎ ﺍﻡ ﻧﻮﺍﻝ ﻭﻛﺎﻥ ﺍﻟﻤﻮﻗﻒ ﻻﻳﺨﻠﻮ ﻣﻦ ﺍﻟﺤﺰﻥ ﻭﺍﻟﺪﻣﻮﻉ
ﺍﻻ . ﻓﺮﺡ ﺍﻟﻲ ﺗﻜﻮﻥ ﺍﻛﺜﺮ ﺻﻼﺑﺔ ﻓﻲ ﻛﻞ ﻣﺮﺓ
ﺣﺘﻰ ﻣﺮﺍﺕ ﺳﻤﺎﺡ ﺗﺘﻤﻨﻰ ﺍﺧﺘﻬﺎ ﻓﺮﺡ ﺍﻥ ﺗﺒﻜﻲ ﻓﻲ ﻭﻗﺖ ﺍﻟﺤﺰﻥ ﻣﺜﻞ ﺍﻱ ﻓﺘﺎﺓ ﺣﺘﻰ ﻻﺗﻈﻞ ﺣﺴﺮﺓ ﻣﻜﺒﻮﺗﺔ ﺑﺎﻟﮕﻠﺐ
ﻓﺮﺡ ﻭﻫﻲ ﺗﻠﺘﻔﺖ ﻋﻠﻰ ﺑﻴﺖ ﺍﺑﻮ ﻧﻮﺍﻝ ﻭﺗﻮﺩﻋﻬﻢ ﻓﻲ ﺳﺮﻫﺎ
ﺳﻮﻑ ﻧﺘﺮﻙ ﺍﻧﺎﺱ ﺍﺣﺒﻮﻧﺎ ﻭﺍﺣﺒﺒﻨﺎﻫﻢ ﺑﺎﻟﻠﻪ
ﺍﺑﻮﻧﻮﺍﻝ - ﺭﻭﺣﻦ ﺑﻮﻳﺔ ﻣﻮﺩﻋﺎﺕ ﺑﺎﻟﻠﻪ
ﻭﻓﻌﻼ ﺻﺎﺭ ﺍﻟﻴﻮﻡ ﺍﻟﺜﺎﻧﻲ ﻭﺍﻟﺒﻨﺎﺕ ﻣﺤﻤﻼﺕ ﻓﻲ ﺍﻟﻜﺜﻴﺮ ﻣﻦ ﺍﻟﺘﻔﺎﺋﻞ ﻭﺍﻻﻣﻞ ﺍﻻ ﻓﺮﺡ ﻣﺤﻤﻠﺔ ﺑﺎﻟﺤﻘﺪ ﻭﺍﻟﻜﺮﻩ ﺑﺎﺗﺠﺎﻩ ﻫﺆﻻﺀ ﺍﻟﺬﻳﻦ ﻳﻄﻠﻘﻮﻥ ﻋﻠﻰ ﺍﻧﻔﺴﻬﻢ ﺍﻫﻞ
↙️
ﻳﺘﺒﻊ
السلام عليكم ورحمة الله وبركاته ، موقع روايات-Novels يهتم بنشر جديد الروايات للكتاب العراقين ، حمل تطبيقنا على جوجل بلاي وستمتع بلقراءة ، تمنياتنا لكم بلتوفيق
تحويل كودإخفاء محول الأكواد الإبتساماتإخفاء