رواية حب بين ثنايا القلوب الجزء الخامس

رواية حب بين ثنايا القلوب الجزء الخامس

للكاتبة امان السامرائي

🌸

ﺩﺧﻠﺖ ﻟﻠﻤﺼﺮﻑ .... ﺍﻟﺤﻤﺪ ﺍﻟﻠﻪ ﻫﺪﺀ ﻛﻠﺒﻲ ... ﺩﺧﻠﺖ ﻭﺑﺪﻳﺖ ﺍﺣﺠﻲ ﻭﻳﺔ ﺍﻟﻤﻮﺿﻒ ﻋﻠﻰ ﺻﺮﻑ ﺍﻟﻔﻠﻮﺱ ....

ﺟﺎﻥ ﺍﻟﻤﻮﺿﻒ ﺩﻳﺤﻀﺮﻫﻦ ... ﻭﺍﻧﻲ ﻭﺍﻛﻔﺔ ﺍﻧﺘﻀﺮﺓ ... ﺷﻜﺪ ﺛﻜﻴﻞ ﻳﺎﻟﻠﻪ ... ﺍﺣﺠﻲ ﺑﻜﻠﺒﻲ ﻳﻤﻌﻮﺩ ﺩﻓﻀﻬﺎ ﻛﻮﻣﺔ ﻋﻨﺪﻱ ﺷﻐﻞ ... ﺷﻜﺪ ﻓﺎﻫﻲ ... ﻓﺠﺄﺓ ... ﺳﻤﻌﺖ ﺻﻮﺕ ﻛﻠﺒﻲ ﺩﻙ ﺩﻛﺔ ﻗﻮﻳﺔ ﺍﺗﺨﻴﻠﺖ ﺭﺍﺡ ﻳﺨﺘﺮﻕ ﺻﺪﺭﻱ .... ﻏﻤﻀﺖ ﻋﻴﻮﻧﻲ ... ﺍﺳﻤﻌﺔ ﻳﻜﻮﻝ ...

ﻣﺎﻛﻮ ﻫﻴﺞ ﺷﻲ ... ﺍﻧﻲ ﻣﺴﺎﺣﺐ ﻭﻻ ﺩﻳﻨﺎﺭ ... ﻭﻻ ﻛﺎﺗﺐ ﺷﻴﻚ ﻻﺣﺪ ...

ﺟﺎﻥ ﻋﺼﺒﻲ ﻭﻳﺼﻴﺢ ... ﺟﺎﻭﺑﺔ ﺍﻟﻤﻮﺿﻒ .... ﺍﺳﺘﺎﺫ ﻫﺴﺔ ﺍﻧﺸﻮﻑ ﺍﻟﺨﻄﺄ ﻭﻳﻦ .... ﺗﻜﺪﺭ ﺗﺴﺘﺮﻳﺢ

ﻳﻼ ﺭﺍﺡ ﺍﻧﺘﻀﺮ ﺍﻟﻰ ﺍﻥ ﺗﻔﺮﺝ ....

ﺍﻟﺘﻔﺖ ﻻﻻ ﻣﺎ ﺍﻟﺘﻔﺖ .... ﺍﻛﻴﺪ ﻣﻮ ﻫﻮ ... ﺍﻛﻴﺪ ﺻﻮﺕ ﺷﺒﻪ ﺻﻮﺗﺔ ..... ﺑﺲ ﻟﻬﺪﺭﺟﺔ ... ﺯﻳﻦ ﺷﺮﺍﺡ ﺍﺧﺴﺮ ﺍﺫﺍ ﺍﻟﺘﻔﺘﺖ ....

ﺍﺫﺍ ﻃﻠﻊ ﻫﻮ ﺷﻜﻮﻝ ... ﻣﺠﺮﺩ ﺗﺨﺎﻳﻠﻲ ﺍﻧﻮ ﻳﻄﻠﻊ ﻫﻮ .. ﻛﻠﺒﻲ ﺗﺼﻴﺮ ﺩﻛﺎﺗﺔ ﺑﺄﺫﻧﻲ ....

ﻳﺎﺍﻧﺴﺔ ... ﻳﺎ ﺍﻧﺴﺔ ...

ﺍﻳﻲ ﺍﺧﻲ ﻭﻳﺎﻙ ...

ﻫﺬﺍ ﺍﻟﻤﺒﻠﻎ .... ﺍﺗﻔﻀﻠﻲ ...

ﺷﻜﺮﺍ ... ﺍﺧﺬﺕ ﺍﻟﻌﻼﻛﺔ ﻭﺣﻄﻴﺖ ﺑﻴﻬﺎ ﺍﻟﻔﻠﻮﺱ .. ﻭﺧﻠﻴﺘﻬﻢ ﺑﺎﻟﺠﻨﻄﺔ ... ﻟﺤﺪ ﻫﺴﻪ ﻭﺍﻧﻲ ﺍﺧﺎﻑ ﺍﻟﺘﻔﺖ ... ﺷﻨﻮ ﺭﺍﺡ ﺍﺧﺴﺮ .. ﺑﺲ ﺍﺷﻮﻓﺔ .. ﻣﺎ ﺍﺧﻠﻲ ﻳﺸﻮﻓﻨﻲ ... ﺍﻟﺘﻔﺘﺖ ﻣﻠﻜﻴﺘﺔ ... ﺭﺍﺍﺍﺡ ﻻ .. ﺿﻠﻴﺖ ﺍﺗﻠﻔﺖ ﻋﻠﻴﺔ ﺑﻜﻞ ﻣﻜﺎﻥ ﻭﺍﺩﻭﺭ ﺑﻴﻦ ﺍﻟﻮﺟﻮﻩ .. ﺑﺲ ﻣﺸﻔﺘﺔ ﻣﻌﻘﻮﻟﺔ ﻭﺻﻠﺖ ﻣﺮﺣﻠﺔ ﻛﻤﺖ ﺍﺗﺨﻴﻞ .... ﻻ ﻣﺴﺘﺤﻴﻞ ﻭﺍﻟﻠﻪ ﺻﻮﺗﺔ ... ﻃﻠﻌﺖ ﻣﻦ ﺍﻟﺒﺎﺏ ﻭﺍﻧﻲ ... ﻓﻘﺪﺕ ﺍﻻﻣﻞ ﺑﺸﻮﻓﺘﺔ ﻣﺮﺓ ﺛﺎﻧﻴﺔ ... ﺍﻧﺘﻲ ﺷﺪﺗﺤﻠﻤﻴﻦ ﻧﺮﻳﻤﺎﻥ .... ﺍﺟﺘﻲ ﻋﻴﻨﻲ ﻋﻠﻰ ﺿﻬﺮ ﺷﺨﺺ ...

ﻫﺬﺍ ﻫﻮ ﻧﻔﺲ ﻃﻮﻟﺔ ﻭﻧﻔﺲ ﺷﻌﺮﺓ ﺍﺟﻴﺖ ﺍﺭﻛﺾ ﻋﻠﻴﺔ .. ﺑﺲ ﻓﺠﺎﺓ ﻭﻛﻔﺖ ﻫﺬﺍ ﻣﻮ ﻫﻮ ﺍﻣﺠﺪ ﻣﻴﻮﻛﻒ ﺗﻜﺴﻲ .... ﺍﻛﻴﺪ ﻏﻠﻄﺎﻧﺔ .... ﺭﻛﺐ ﺑﺘﻜﺴﻲ ﻭﺭﺍﺡ ... ﻭﺍﻧﻲ .. ﻫﻢ ﺍﺧﺬﺕ ﺗﻜﺴﻲ .. ﻭﺭﺣﺖ .. ﻟﻠﻤﻌﻤﻞ ... ﺩﺧﻠﺖ ... ﺍﺟﺎﻧﻲ ﺻﻮﺕ ﻣﻦ ﻭﺭﺍﻳﺔ ... ﻧﺮﻳﻤﺎﻥ ﻧﺮﻳﻤﺎﻥ ﺍﻟﺘﻔﺘﺖ ﺧﺎﺍﺍﺍﻟﺔ ﻧﺎﺩﻳﺔ .. ﺭﻛﻀﺖ ﻋﻠﻴﻬﺎ ﻭﺣﻀﻨﺘﻬﺎ ﻭﺑﻮﺳﺘﻬﺎ ... ﺧﺎﻟﺘﻲ ﺣﺒﻴﺒﺘﻲ .. ﺟﻴﺮﺍﻥ ﺍﻟﻌﻤﺮ ... ﺧﺎﻟﺔ ﺷﺘﺴﻮﻳﻦ ﻫﻨﺎ ...

ﺍﺷﻠﻮﻥ ﻭﺻﻠﺘﻠﺞ ﺻﻮﻓﻴﺎ .. ﻏﻴﺮ ﻋﻦ ﻃﺮﻳﻘﻲ

ﺍﺷﻠﻮﻥ .. ؟ ﻳﺎﻟﻠﻪ ﺷﻜﺪ ﻏﺒﻴﺔ ﻭﻻ ﻓﻜﺮﺕ ﺍﺷﻠﻮﻥ ﺍﻧﺪﻟﺖ ﺑﻴﺘﻨﺎ ....

ﺟﻨﺖ ﺍﻣﺸﻲ ﺑﺸﺎﺭﻋﻜﻢ ... ﺭﺍﻳﺤﺔ ﺍﻭﺩﻱ ﺧﻴﺎﻃﺔ ... ﻣﺎﻝ ﺍﻡ ﺣﺴﻦ ... ﻭﺩﻛﺘﻠﻲ ﻫﻮﺭﻥ ﻧﺰﻟﺖ ﺍﻟﺠﺎﻣﺔ ﻭﺳﺄﻟﺘﻨﻲ ....

ﺗﻌﺮﻓﻴﻦ ﺑﻴﺖ ﻧﺮﻳﻤﺎﻥ ﻭﻳﻦ ... ﻛﻠﺘﻠﻬﺎ ﺷﺎﻟﻮ ... ﻛﺎﻟﺖ ﺍﻋﺮﻑ ﺑﺲ ﺍﻧﺘﻮ ﺟﻴﺮﺍﻧﻬﻢ ﻣﺘﻌﺮﻓﻮﻥ ﻭﻳﻦ ﺷﺎﻟﻮ ... ﻛﺎﻟﺖ ﺍﻧﻲ ﺻﺎﺣﺒﺔ ﺍﻟﻤﺸﻐﻞ ﻣﺎﻝ ﺍﻟﺨﻴﺎﻃﺔ .... ﻭﺩﻟﻴﺘﻬﺎ ...

ﺑﻌﺪ ﻋﻤﺮﻱ ﺧﺎﻟﺔ ﺷﻜﺪ ﻣﺸﺘﺎﻗﺘﻠﺞ .... ﺑﺲ ﺍﻧﺘﻲ ﺍﻟﻴﻮﻡ ﺟﺎﻳﺔ ﻋﻠﻴﺔ ...

ﻻ ﺣﺒﻴﺒﺘﻲ .. ﺍﺗﺼﻠﺖ ﺑﻴﺔ ﺻﻮﻓﻴﺎ ﻭﻛﺎﻟﺖ ﺭﺍﺡ ﺗﻔﺘﺢ ﻣﻌﻬﺪ ﻣﺎﻝ ﺗﻌﻠﻴﻢ ﻭﺗﺮﻳﺪﻧﻲ ﺑﻲ ....

ﺻﺪﻙ .. ﺍﺧﺘﺎﺭﺗﺞ ﺍﻟﺞ ... ﺗﺴﺘﺎﻫﻠﻴﻦ ﺧﺎﻟﺔ ﺣﺒﻴﺒﺘﻲ ...

ﺩﺧﻠﻨﺔ ﻋﻠﻰ ﻣﺪﺍﻡ ﺻﻮﻓﻴﺎ .... ﺭﺣﺒﺖ ﺑﺨﺎﻟﺔ ﻧﺎﺩﻳﺔ .. ﻧﻄﻴﺘﻬﺎ ﺍﻟﻤﺒﻠﻎ ...

ﻧﺮﻳﻤﺎﻥ ﺷﻠﻮﻧﻬﺎ ﺭﻭﺣﺘﺞ ...

🤔 ﻣﺪﺍﻡ ﺍﻧﻲ ﺭﺣﺖ ﻟﻠﻤﺼﺮﻑ ﻭﺭﺟﻌﺖ ...

ﺍﻱ ﺍﻋﺮﻑ ... ﻳﻌﻨﻲ ﻣﺎﻛﻮ ﺷﻲ

😕 ﻻ ﻣﺎﻛﻮ ... ﺍﻧﻲ ﺍﺳﺘﺄﺫﻥ ....

ﺷﺒﻴﻬﺎ ﺍﻟﻤﺪﺍﻡ ﺑﺲ ﻻ ﺑﺪﺕ ﺗﺨﺮﻑ ... ﺷﻨﻮ ﻫﺎﻱ ﺍﻭﻝ ﻣﺮﺓ ﺍﺩﺯﻳﻨﻲ ﺑﻨﺺ ﺍﻟﺪﻭﺍﻡ ﻟﻠﻤﺼﺮﻑ ... ﻣﺮ ﺍﻟﻴﻮﻡ ﻣﺜﻞ ﺍﻱ ﻳﻮﻡ ... ﺭﺟﻌﺖ ﻟﻠﺒﻴﺖ .. ﻭﺍﻣﻲ ﻭﺧﻮﺍﺗﻲ ﻋﻠﻰ ﺭﻭﺗﻴﻨﻬﻦ ﺍﻟﻴﻮﻣﻲ ...

ﻣﺎﻣﺎ ... ﺑﺎﺟﺮ ﻋﻄﻠﺔ ... ﺍﻣﺸﻲ ﺧﻠﻲ ﺍﻧﺮﻭﺡ ﻟﻤﻘﺎﻡ ﺷﻴﺦ ﻋﺒﺪ ﺍﻟﻘﺎﺩﺭ ﺍﻟﻜﻴﻼﻧﻲ ....

ﺍﻧﺸﺎﺀ ﺍﻟﻠﻪ ﺍﻟﻒ ﺟﺪﺭ ﺩﻭﻟﻤﺔ ﻭﻧﺘﻐﺪﺓ ﻫﻨﺎﻙ ﻭﺍﻟﻌﺼﺮ ﺍﻧﺮﻭﺡ ﻟﻤﻘﺎﻡ ﺍﻟﺨﻀﺮ

ﺍﻳﻲ ﻋﻔﻴﺔ ....

ﺻﺎﺭ ﺛﺎﻧﻲ ﻳﻮﻡ .. ﻛﻌﺪﻧﺔ ﺭﺗﺒﻨﺔ ﺍﻟﺒﻴﺖ ﻭﺑﺪﻟﻨﺎ ﻭﺍﺧﺬﻧﺎ ﻋﺒﻲ ﻣﺎﻝ ﺭﺍﺱ ﻭﻳﺎﻧﺔ ﻭﺟﺪﺭ ﺍﻟﺪﻭﻟﻤﺔ ... ﻭﺻﻠﻨﺔ ﻭﻟﺒﺴﻨﺔ ﻋﺒﻴﻨﺔ ... ﻭﺩﺧﻠﻨﺔ ... ﻭﺻﻠﻨﺔ ﻭﻳﺔ ﺻﻼﺓ ﺍﻟﺠﻤﻌﺔ ... ﻭﺻﻠﻴﻨﺔ .. ﻭﺩﻋﻴﺖ ...

ﻳﺎﺟﺎﺑﺮ ﺍﻟﺨﻮﺍﻃﺮ ﺍﺟﺒﺮ ﺧﺎﻃﺮﻱ ﺟﺒﺮﺍ ﻳﻠﻖ ﺑﺮﺣﻤﺘﻚ ...

ﺟﺒﺮﺍ ﻳﺘﻌﺠﺐ ﻟﻮ ﺍﻫﻞ ﺍﻻﺭﺽ ﻭﺍﻫﻞ ﺍﻟﺴﻤﺎﺀ ....

ﻭﻃﻠﻌﻨﺔ ﻭﺍﺗﻐﺪﻳﻨﺔ ﺍﻃﻴﺐ ﺩﻭﻟﻤﺔ ﻣﻦ ﺍﻳﺪ ﺍﻣﻲ ... ﻭﺿﻠﻴﻨﺔ ﻛﺎﻋﺪﻳﻦ ﺑﺎﻟﺒﺎﺣﺔ .. ﻧﺘﻔﺮﺝ ﻋﻠﻰ ﺍﻟﺤﻤﺎﻡ ﻭﺍﻟﻨﺎﺱ .. ﻭﺍﻟﺒﺎﻛﺴﺘﺎﻧﻴﻦ .... ﻏﻴﺮﻧﺔ ﺟﻮﻭ ﺍﺻﻼ ﻫﻲ ﺍﻟﻜﻌﺪﺓ ﺑﺎﻟﻤﺮﺍﻗﺪ ﺍﺗﺨﻔﻒ ﻣﻦ ﺍﻟﻨﻔﺲ ﻭﺗﺸﺮﺡ ﺍﻟﺼﺪﺭ ...

ﺻﺎﺭ ﺍﻟﻌﺼﺮ ﻭﺍﺧﺬﻧﺔ ﺗﻜﺴﻲ ﻟﺦ ﻭﺍﺗﻮﺟﻬﻨﺎ ... ﻟﻤﻘﺎﻡ ﺍﻟﺨﻀﺮ ..... ﻭﺻﻠﻨﺎﻟﺔ ... ﻭﺟﺎﻥ ﺍﻟﻤﻜﺎﻥ ﻳﺠﻨﻦ ﺩﺧﻠﻨﺔ ﻭﺻﻠﻴﻨﺔ ﺭﻛﻌﺘﻴﻦ ﻭﻃﻠﻌﻨﺔ ﺷﻔﻨﺔ ﺍﻟﺴﻮﻙ ﺍﻟﺼﻐﻴﺮ ﻣﺎﻟﺘﺔ ...

ﻭﺍﻟﺸﻤﻮﻉ ﺍﻟﻲ ﺑﺎﻟﻤﻲ ... ﺑﺪﺓ ﺍﻟﻐﺮﻭﺏ .. ﻭﺍﻟﺸﻤﺲ ﺣﻤﺮﺕ ﺑﺎﻟﻤﻲ ... ﻭﻣﻨﻀﺮ ﺍﻟﺸﻤﻮﻉ ﻛﻠﺶ .. ﺣﻠﻮ .. ﺭﺣﺖ ﺷﻌﻠﺖ ﺷﻤﻌﺔ ... ﻭﺍﺗﻤﻨﻴﺖ ﻣﻦ ﺍﻟﻠﻪ ﻳﺮﺟﻌﻠﻲ .. ﺍﻣﺠﺪ ﺍﻭ ﻳﺸﻴﻞ ﺣﺒﺔ ﻣﻦ ﻛﻠﺒﻲ ﻭﺍﻛﻤﻞ ﺣﻴﺎﺗﻲ ﺑﺪﻭﻥ ﻣﺎ ﺍﺗﺬﻛﺮﺓ ... ﺷﻌﻠﺘﻬﺎ ﻭﺣﻄﻴﺘﻬﺎ ﺑﺎﻟﻤﻲ ... ﺷﻮﻳﺔ ﺿﻠﻤﺖ ﻛﺎﻟﺖ ﺍﻣﻲ ﻳﻼ ... ﺭﺟﻌﻨﺔ ﻟﻠﺒﻴﺖ .... ﺻﺪﻙ ﺟﻨﺖ ﻣﺤﺘﺎﺟﺔ ﺍﻃﻠﻊ ﺻﺎﺭﻟﻲ ﺷﻬﻮﺭ ﻣﻄﺎﻟﻌﺔ ﻟﻤﻜﺎﻥ ﺍﻏﻴﺮ ﺟﻮ ... ﺑﺪﻟﺖ ﻭﺑﻠﺸﺖ ﺍﻓﺼﻞ ﺍﻟﻘﻄﻊ ﺍﻟﻌﻨﺪﻱ ﻣﺎﻝ ﺍﻟﻨﺎﺱ .... ﻭﻳﺎﺳﻤﻴﻦ ﺣﻄﺖ ﺭﺍﺳﻬﺎ ﻭﻧﺎﻣﺖ ﻭﻧﻮﺭ ﺗﻘﺮﺓ ﻋﺪﻫﺎ ﺍﻣﺘﺤﺎﻥ ....

ﻧﺮﻳﻤﺎﻥ ﺑﺎﺟﺮ ﻧﻔﺮﺵ ﺍﻟﺰﻭﺍﻟﻲ ﺍﻧﺸﺎﺀ ﺍﻟﻠﻪ ...

ﺑﺎﺟﺮ ﺍﻣﺮ ﺍﺟﻴﺐ ﺗﻘﺎﻋﺪ ﺍﺑﻮﻳﺔ ﻣﺤﺘﺎﺟﺔ ﺷﻲ ﺑﻄﺮﻳﻘﻲ ﺍﺟﻴﺒﺔ ... ﺍﻱ ﺟﻴﺒﻴﻠﻨﺔ ﺯﻧﻮﺩ ﺍﻟﺴﺖ .... ﻳﺎﺳﻤﻴﻦ ﻛﻞ ﻣﺮﺓ ﺍﺗﻜﻮﻝ ﻣﺸﺘﻬﻴﺘﻬﻦ ...

ﺍﻥ ﺷﺎﺀ ﺗﺪﻟﻠﻴﻦ ...

ﻛﻤﻠﺖ ﺷﻐﻠﻲ ﻭﺭﺣﺖ ﻧﻤﺖ ... ﻭﺻﺒﺢ ﺍﻟﺼﺒﺢ ﺩﻭﺍﻡ ....

ﺭﺣﺖ ﺟﺎﻧﺖ ﺻﻮﻓﻴﺎ ﺗﻨﺘﻀﺮﻧﻲ ﺑﻤﻜﺘﺒﻲ ... ﻓﺘﺤﺖ ﺍﻟﺒﺎﺏ ﻭﺗﻔﺎﺟﺄﺕ .....

ﺻﺒﺎﺡ ﺍﻟﺨﻴﺮ ﻣﺪﺍﻡ ....

ﺻﺒﺎﺡ ﺍﻟﻨﻮﺭ ﻧﺮﻳﻤﺎﻥ ..

. ﻛﻌﺪﺕ ﻛﺒﺎﻟﻬﺎ . ﺧﻴﺮ ﻣﺪﺍﻡ

ﻧﺮﻳﻤﺎﻥ ﻣﺘﺤﻤﻠﺖ ﺍﺍﺟﻞ ﺍﻟﻤﻮﺿﻮﻉ ﻟﻀﻬﺮ ﻣﻦ ﻓﺮﺣﺘﻲ

ﺗﺪﺭﻳﻦ ﺍﺑﻨﻲ ﺭﺟﻊ ﻣﻦ ﺍﻣﺮﻳﻜﺎ .. ﺑﻌﺪ ﻣﺎﻛﻤﻞ ﺩﺭﺍﺳﺔ ﺍﻟﻄﺐ

ﺍﻱ ﺍﻋﺮﻑ

ﻗﺮﺭ ﻳﺨﻄﺐ ...

ﺑﻠﻌﺖ ﺭﻳﻜﻲ ... ﺷﺘﻘﺼﺪ ...

ﻧﺮﻳﻤﺎﻥ ﺻﺮﺍﺣﺔ ﻣﺎﻛﻮ ﺍﺣﺴﻦ ﻣﻨﻜﻢ ﻭﻣﻦ ﻋﺎﺋﻠﺘﻜﻢ ﻭﺛﺎﻗﻔﺘﻜﻢ .. ﺗﻤﻨﻴﺘﺞ ﺍﻧﺘﻲ ﺗﻜﻮﻧﻴﻦ ﺑﺲ ﺗﺪﺭﻳﻦ ﺍﻧﺘﻲ ﺍﻣﻨﻴﺔ ﺷﺨﺺ ﺛﺎﻧﻲ ....

ﺍﺣﺎﺟﻲ ﺭﻭﺣﻲ ﺍﻟﺤﻤﺪ ﺍﻟﻠﻪ ﻣﻮ ﺍﻧﻲ ... ﻳﻤﺔ ﻟﻌﺪ ﻣﻨﻮ ﻣﻦ ﻋﺪﻧﺔ ..

ﻣﺪﺍﻡ ﻣﻔﻬﻤﺖ ﻗﺼﺪﺝ ...

ﺑﺪﻭﻥ ﺗﻌﻘﻴﺪ ﻟﻠﻤﻮﺿﻮﻉ .. ﺍﻧﻲ ﺍﺭﻳﺪ ﺍﺧﺘﺞ ﻧﻮﺭ .. ﻻﺣﻤﺪ ﺍﺑﻨﻲ .... ﻭﺍﺣﻨﺔ ﻣﻮﺍﻓﻘﻴﻦ ﻋﻠﻰ ﻛﻞ ﺷﺮﻭﻃﻜﻢ .....

ﻃﺒﻌﺎ ﻣﻨﻠﻜﺔ ﺍﺣﺴﻦ ﻣﻨﻜﻢ ... ﻭﺍﻟﻲ ﺍﻧﺘﻲ ﺍﻣﺔ ﺍﺷﻠﻮﻥ ﻳﻜﻮﻥ ... ﺑﺲ ﻣﺪﺍﻡ ﻧﻮﺭ ﻟﺴﺎﻋﻬﺎ ﺑﺎﻟﺮﺍﺑﻊ ﻋﺎﻡ ... ﻳﻌﻨﻲ ﺗﻮﻫﺎ ﺑﺪﺕ ﺑﺎﻝ ١٧ ﺳﻨﻪ ..... ﻭﻫﻲ ﻫﺎﺩﺋﺔ ﻛﻠﺶ ..... ﻭﺧﺠﻮﻟﺔ ... ﻭﺍﺣﻨﺔ ﺣﺘﻰ ﻣﻨﻌﺮﻑ ﺍﻱ ﺷﻲ ﻋﻦ ﺍﺣﻤﺪ ﻭﻻ ﻣﻠﺘﻘﻴﻦ ﺑﻲ ....

ﺍﻧﻲ ﻭﻳﺎﺝ ﻧﺮﻳﻤﺎﻥ .. ﺍﻛﻌﺪﻭ ﺍﺗﻔﺎﻫﻤﻮ ﺑﺎﻟﻤﻮﺿﻮﻉ ﻭﺍﺧﺬﻭ ﻭﻗﺘﻜﻢ ... ﺍﺣﻤﺪ ﺟﺎﻥ ﻳﺸﺘﻐﻞ ﻭﻳﺔ ﺍﻣﺠﺪ ﺗﻜﺪﺭﻳﻦ ﺗﺴﺄﻟﻲ ﻋﻨﻪ ... ﺍﻋﺮﻑ ﻣﺎﻋﻨﺪﺝ ﺍﻱ ﺍﺗﺼﺎﻝ ﺑﻲ ﺑﺲ ﻫﺎﻱ ﺍﻟﺸﻐﻠﺔ ﺑﻌﻴﺪﺓ ﻋﻦ ﺧﻼﻓﺎﺗﻜﻢ .... ﺍﺣﻤﺪ ﻋﻤﺮﺓ ٢٧ ﺳﻨﺔ ﻭﺧﺮﻳﺞ ﻃﺐ ﻭﺍﻧﺪﺯ ﺑﻌﺜﺔ ﺳﻨﺘﻴﻦ ﻻﻣﺮﻳﻜﺎ ... ﻭﻫﺎﻱ ﺻﻮﺭﺗﺔ .. ﺧﻞ ﺍﺗﺸﻮﻓﻬﺎ ﻧﻮﺭ ....

ﻣﺪﺍﻡ ﻣﺎﻋﺮﻑ ﺷﻜﻠﺞ .... ﺑﺲ ﻧﻮﺭ ﺍﻛﻴﺪ ﻣﺮﺍﺡ ﺗﻮﺍﻓﻖ ... ﻳﻌﻨﻲ ﻫﻲ ﺑﻌﺪﻫﺎ ﺻﻐﻴﺮﺓ ..

ﺻﺪﻛﻴﻨﻲ ﻫﻮ ﻣﻤﺴﺘﻌﺠﻞ ﻋﻠﻰ ﺍﻟﺰﻭﺍﺝ .. ﺧﻠﻲ ﺍﻟﺒﻨﻴﺔ ﺗﻜﻮﻥ ﻣﺨﻄﻮﺑﺔ ﺍﻟﺔ ... ﻭﺍﺫﺍ ﺍﺗﺮﻳﺪ ﺍﺗﻜﻤﻞ ﺍﻟﻌﺪﺍﺩﻳﺔ ﻳﻼ ﻳﺘﺰﻭﺟﻮﻥ ﻭﻳﻤﻨﺔ ﺍﺗﻜﻤﻞ ﺍﻟﺠﺎﻣﻌﺔ ... ﻭﻫﺎﺍ ﻧﺮﻳﻤﺎﻥ ﻫﺬﺍ ﺍﻟﻤﻮﺿﻮﻉ ﺑﻌﻴﺪ ﻋﻦ ﻋﻤﻠﻨﺔ ﺗﻤﺎﻣﺎ ....

ﺍﺭﺗﺎﺣﻴﺖ ﻣﻦ ﺣﺠﺖ ﻫﻴﺞ ... ﻣﺎﻛﻮ ﺍﺣﺴﻦ ﻣﻦ ﻫﻠﻤﻜﺎﻥ ﻟﻨﻮﺭ ﺑﺲ ﺑﻌﺪﻫﺎ ﺻﻐﻴﺮﺓ ... ﺷﻔﺖ ﺻﻮﺭﺗﺔ ﺷﺨﺼﻴﺔ ﻭﺣﻠﻮﻭ ... ﺍﻟﻠﻪ ﻳﺤﻔﻀﺔ ﺿﻠﺖ ﺍﺑﺎﻟﻲ ﻛﻠﻤﺔ ﺍﺗﺼﻠﻲ ﺑﺎﻣﺠﺪ ﺍﺳﺄﻟﻲ ﻋﻠﻴﺔ .... ﺯﻳﻦ ﺍﻧﻲ ﻣﻴﻦ ﺍﺟﻴﺐ ﺭﻗﻢ ﺍﻣﺠﺪ ﻭﺍﺷﻠﻮﻥ ﺭﺍﺡ ﺍﺣﺠﻲ ﻭﻳﺎ ... ﺷﺮﺍﺡ ﺍﻛﻮﻟﺔ ... ﻣﺎﻋﺮﻑ ﻣﺠﺮﺩ ﺍﻟﺘﻔﻜﻴﺮ ﺍﻧﻮ ﺍﺳﻤﻊ ﺻﻮﺗﺔ ﻳﺨﻠﻲ ﻛﻠﺒﻲ ﻳﺪﻙ .... ﺭﺣﺖ ﻟﻤﺪﺍﻡ ﺻﻮﻓﻴﺎ

ﻣﺪﺍﻡ ﻋﻨﺪﺝ ﺭﻗﻢ ﺍﻣﺠﺪ ﻣﺎﻝ ﻓﺮﻧﺴﺎ ... ﺑﺲ ﻭﺟﻬﻲ ﺍﺣﻤﺮ ﻣﺘﺖ ﺧﺠﻞ ...

ﺍﻣﺠﺪ ﻣﻮ ﺑﻔﺮﻧﺴﺎ ﺍﻣﺠﺪ ﺍﺑﻐﺪﺍﺩ

.....

ﺍﺑﻐﺪﺍﺩ !! ؟؟؟

ﻣﻦ ﺍﺳﺒﻮﻉ ﻫﻮ ﻫﻨﺎﺍ ﺳﻤﻌﺖ ﻣﻦ ﺍﺣﻤﺪ ﻻﻥ ﺍﻟﺘﻘﻮ ... ﻋﻨﺪﺓ ﻣﺸﺎﻛﻞ ﻣﺎﻟﻴﺔ ﻭﺟﺎﻱ ﻋﻠﻰ ﻣﻮﺩ ﺍﻳﺤﻠﻬﺎ .... ﻭﻛﺎﻋﺪ ﺍﺑﻴﺘﻬﻢ

ﺿﻠﻴﺖ ﺑﺸﻚ ﻣﻌﻘﻮﻟﺔ ﻫﻮ ﺍﻟﻲ ﺷﻔﺘﺔ ﺑﺎﻟﻤﺼﺮﻑ ...

ﺭﺟﻌﺖ ﻟﻠﺒﻴﺖ ﻭﻛﻌﺪﺕ ﺑﻠﻴﻞ .. ﻭﻳﺎ ﺍﻣﻲ ... ﻭﻓﺘﺤﺖ ﺍﻟﻤﻮﺿﻮﻉ ﻭﻳﺎﻫﻢ ... ﻧﻮﺭ ﺍﻭﻝ ﺷﻲ ﺧﺎﻓﺖ ﻭﺻﻔﺮﺕ ...

ﺑﻌﺪﻳﻦ ﺷﻮﻓﺘﻬﻢ ﺻﻮﺭﺗﺔ .. ﻭﻓﻬﻤﺘﻬﺎ ﻫﻲ ﺑﺲ ﺧﻄﻮﺑﺔ ﺍﻟﻰ ﺍﻥ ﺗﺘﺨﺮﺟﻴﻦ ﻣﻦ ﺍﻟﻌﺪﺍﺩﻳﺔ ... ﻭﺑﻌﺪﻫﺎ ﺗﺘﺰﻭﺟﻴﻦ .. ﻭﺗﻜﺪﺭﻳﻦ ﺍﺗﻜﻤﻠﻴﻦ ﺟﺎﻣﻌﺔ ... ﻭﻫﻮ ﺟﺎﻥ ﻳﺸﺘﻐﻞ ﻭﻳﺔ ﺍﻣﺠﺪ ﻗﺒﻞ ﻟﻴﺼﻴﺮ ﻃﺒﻴﺐ ... ﻭﻗﺖ ﺍﻟﻌﻄﻞ ﺟﺎﻥ ﻳﺸﺘﻐﻞ ﺑﻔﺮﻉ ﺍﻣﺮﻳﻜﺎ ... ﻧﻮﺭ ﻳﻌﻨﻲ ﺍﻧﺘﻲ ﻣﺮﺍﺡ ﺗﺘﺮﻛﻴﻦ ﺩﺭﺍﺳﺘﺞ ﻭﻫﺬﺍ ﺍﻫﻢ ﺷﻲ ... ﻭﺍﻟﻮﻟﺪ ﻛﺎﻣﻞ ...

ﺑﺲ ﺍﻧﻲ ﻋﻨﺪﻱ ﺷﺮﻁ ... ﺍﺗﻌﺮﻑ ﻋﻠﻰ ﺍﻟﻮﻟﺪ ﻭﺍﻋﺮﻑ ﺍﺳﻠﻮﺑﺔ ... ﻳﻼ ﺍﻛﺪﺭ ﺍﻗﺮﺭ ... ﺍﺧﺎﻑ ﻳﻄﻠﻊ ﻣﺜﻞ ﻓﺮﻗﺎﻥ ﻟﻮ ﺧﺎﻟﺪ ... ﺻﺎﺭﺕ ﻋﻨﺪﻱ ﻋﻘﺪﺓ ﻣﻦ ﺍﻟﺮﺟﺎﻝ ....

ﺷﻮﻓﻲ ﻧﻮﺭ ﺍﻧﻲ ﺭﺍﺡ ﺍﺗﺼﻞ ﺑﺎﻣﺠﺪ ﻭﺍﺳﺄﻝ ﻛﻠﺸﻲ ﻋﻦ ﺍﻟﻮﻟﺪ ﺍﻛﻴﺪ ﻳﻌﺮﻓﺔ ﺣﻖ ﺍﻟﻤﻌﺮﻓﺔ ﻭﺍﻣﺠﺪ ﻣﻴﻜﺬﺏ .

ﻋﻠﻰ ﺭﺍﺣﺘﺞ ﻧﺮﻳﻤﺎﻥ ﺍﻧﺘﻲ ﺍﺳﺄﻟﻲ ﻋﻠﻰ ﺍﻟﻮﻟﺪ ﻭﻟﻮ ﺍﻧﻲ ﺍﺷﻮﻑ ﺑﻌﺪﻧﻲ ﺻﻐﻴﺮﺓ ﺑﺲ ﺍﺧﺎﻑ ﻣﺘﺠﻴﻨﻲ ﻫﻴﺞ ﻓﺮﺻﺔ

ﻣﺨﺴﺮﺍﻧﺔ ﺷﻲ ﺧﻠﻲ ﺍﺗﻌﺮﻑ ﻋﻠﻴﺔ .

ﻣﺎﺷﻲ ﺣﺒﻴﺒﺘﻲ ... ﺍﺣﺎﻭﻝ ﻫﻠﻴﻮﻣﻴﻦ ﺍﺗﺼﻞ ﻋﻠﻰ ﺍﻣﺠﺪ ....

ﻳﻼ ﺗﺼﺒﺤﻮﻥ ﻋﻠﻰ ﺧﻴﺮ ..

ﺭﺣﺖ ﻧﻤﺖ ﻭﺍﻧﻲ ﺍﺭﻳﺪ ﺍﻟﻨﻬﺎﺭ ﻳﻄﻠﻊ ﺑﺴﺮﻋﺔ ... ﻛﻌﺪﺕ ﻣﻦ ﻭﻛﺖ ﻭﺭﺣﺖ ﻟﺪﻭﺍﻡ ... ﺍﺷﻮ ﺍﻟﻮﻛﺖ ﻣﺪﻳﻤﺸﻲ .. ﺍﺭﻳﺪﻫﺎ ﺍﺗﺼﻴﺮ ﻓﺪ ﺏ ١١ ﺣﺘﻰ ﺍﺗﺼﻞ ... ﺿﻠﻴﺖ ﻋﻴﻨﻲ ﻋﻠﻰ ﺍﻟﺴﺎﻋﺔ ﺍﻟﻰ ﺻﺎﺭﺕ ﺏ ١١ ﻛﻤﺰﺕ ﻟﺰﻣﺖ ﺍﻟﺘﻠﻔﻮﻥ ... ﺭﺟﻌﺖ ﻃﺒﻜﺘﺔ ... ﺑﺲ ﺍﻛﻮ ﺭﺟﻔﺔ ﺑﻜﻠﺒﻲ ﻭﺑﺎﻳﺪﻱ ...

ﻗﻮﻱ ﻧﻔﺴﺞ ﻫﺬﺍ ﺍﺗﺼﻠﺞ ﻋﻠﻰ ﻣﻮﺩ ﺍﺧﺘﺞ ... ﻫﺬﺍ ﻣﺴﺘﻘﺒﻞ ﺍﺧﺘﺞ ... ﺍﺗﺸﺠﻌﻲ ﻭﺍﺗﺼﻠﻲ ... ﺭﺟﻌﺖ ﺭﻓﻌﺖ ﺍﻟﺴﻤﺎﻋﺔ .

ﻭﺩﻛﻴﺖ ﺍﻟﺮﻗﻢ ... ﺭﻥ ﻭﻛﻠﺒﻲ ﻭﻳﺔ ﻛﻞ ﺭﻧﺔ ﻳﺪﻙ ﺍﺳﺮﻉ ....

ﺍﺟﺔ ﺻﻮﺗﺔ ﺑﺄﺫﻧﻲ ...

ﺍﻟﻮﻭﻭﻭﻭﻭ ﺍﻟﻮﻭﻭﻭﻭ

ﻣﻜﺪﺭﺕ ﺍﺣﺠﻲ ... ﺿﻴﻠﺖ ﻣﺘﻤﻌﻨﺔ ﺑﺼﻮﺗﺔ ... ﺍﻳﻲ ﻫﺬﺍ ﺍﻣﺠﺪ ... ﺭﺟﻒ ﺍﻟﺴﺎﻧﻲ ... ﺍﺍ ﺍﻟﻮﻭﻭﻭ

ﻧﺮﻳﻤﺎﺍﺍﺍﻥ .... ؟؟؟؟

ﻟﻴﺶ ﺍﺳﻤﻲ ﺑﺼﻮﺗﺔ ﻳﺨﺘﻠﻒ ...

)) ﺍﺳﻤﻲ ﻓﺎﻫﻲ ﺑﺤﻠﻚ ﻏﻴﺮﻙ ﺟﻦ ﺩﻋﺎﺀ ﺑﺼﻮﺕ ﻓﺪ ﻭﺍﺣﺪ ﻏﻨﻲ ﺣﺴﻴﻦ ﻋﻠﻲ ﺍﻟﻤﻄﻮﺭﻱ ((

ﺍﺍﺍﻳﻲ .... ﻧﺮﻳﻤﺎﻥ

ﺷﺬﻛﺮﺝ !!! ﻭﻳﻦ ﺍﺧﺘﻔﻴﺘﻲ

ﺍﻣﺠﺪ ﺍﻧﻲ ﻣﺘﺼﻠﺔ ﺑﻴﻚ ﻋﻠﻰ ﻣﻮﺩ ﻣﻮﺿﻮﻉ ﻣﻬﻢ ... ﻣﻴﺨﺺ ﺍﻱ ﺷﻲ ﻣﻦ ﺍﻟﻤﺎﺿﻲ .... ﺍﻟﻤﺎﺿﻲ ﺻﻔﺤﺔ ﻭﺍﻧﻄﻮﺕ ... ﻭﻫﺴﺔ ﺍﻧﺖ ﺑﺼﻔﺘﻚ ﺍﺑﻦ ﺧﺎﻟﺘﻨﺔ ... ﻭﻣﺎﻋﺪﻧﺔ ﻏﻴﺮﻙ ﻧﻜﺪﺭ ﻧﺴﺘﻔﺴﺮ ﻣﻨﺔ ﻭﻧﺴﺄﻟﺔ ﺍﺣﻨﺔ ﻧﺴﻮﺍﻥ ﻭﻣﻨﻜﺪﺭ ﻧﻔﺘﺮ ﺑﺎﻟﺸﻮﺍﺭﻉ ﻭﻧﺴﺄﻝ

ﻫﻬﻪ ﻟﻴﺶ ﻫﺬﺍﻙ ﺍﻟﻤﻬﻨﺪﺱ ﻭﻳﻦ ... ﻣﻮ ﻫﻮ ﺟﺎﻥ ﺍﻟﻜﻞ ﺑﺎﻟﻜﻞ ..

ﺍﻣﺠﺪ .. ﻓﺮﻗﺎﻥ ﺍﺳﺘﺸﻬﺪ ﻭﺭﺍﺡ ﻟﺪﺍﺭ ﺣﻘﺔ ﻣﺠﻮﺯ ﻋﻠﻰ ﺍﻟﻤﻴﺖ ﻏﻴﺮ ﺍﻟﺮﺣﻤﺔ . ...

ﻋﻠﻰ ﺷﻨﻮ ﺗﺮﻳﺪﻳﻦ ﺗﺴﺄﻟﻴﻨﻲ .. ؟؟؟

ﺩﻛﺘﻮﺭ ﺍﺣﻤﺪ ﺍﺑﻦ ﻣﺪﺍﻡ ﺻﻮﻓﻴﺎ ﺍﺗﻘﺪﻡ ﻟﺨﻄﺒﺔ ﻧﻮﺭ ﺍﺧﺘﻲ . ﺷﻔﻨﺎ ﻣﻮﺿﻮﻉ ﻣﻨﺎﺳﺐ ... ﻭﻛﺎﻟﺖ ﺻﻮﻓﻴﺎ ... ﺍﻥ ﺍﻧﺖ ﺗﻌﺮﻓﺔ ﻣﺸﺘﻐﻞ ﻭﻳﺎﻛﻢ ﻓﺘﺮﺓ ﻭﺗﻌﺮﻓﺔ ﻣﻌﺮﻓﺔ ﺷﺨﺼﻴﺔ ...

ﻧﺮﻳﻤﺎﻥ ﺍﻟﺤﺠﻲ ﻣﻮ ﻣﺎﻝ ﺗﻠﻔﻮﻥ ... ﺑﻌﺪ ﺳﺎﻋﺔ ﻧﻠﺘﻘﻲ ﺑﺎﻟﻤﻄﻌﻢ ﺍﻟﻲ ﻋﻠﻰ ﺩﺟﻠﺔ

ﺑﺲ ......

ﻗﺎﻃﻌﻨﻲ ...

ﺗﺮﻯ ﻣﻬﺎﻣﻨﻲ ﺍﺷﻮﻓﺞ ... ﺍﺭﻳﺪ ﺍﻛﻌﺪ ﺍﻓﺘﻬﻢ ﺍﻟﻤﻮﺿﻮﻉ ﻭﺍﻓﻬﻤﺞ ...

ﻏﻤﻀﺖ ﻋﻴﻮﻧﻲ ﺑﻘﻬﺮ ﺗﻤﺎﻡ ﻧﻠﺘﻘﻲ ﺑﻌﺪ ﺳﺎﻋﺔ ...

ﻃﺒﻜﺖ ﺍﻟﺨﻂ ﻣﻨﺔ ... ﺭﺣﺖ ﻟﻠﺤﻤﺎﻣﺎﺕ ... ﻏﺴﻠﺖ ﻭﺟﻬﻲ .. ﻭﺭﺗﺒﺖ ﺷﻌﺮﻱ ... ﻭﺣﻄﻴﺖ ﻛﺤﻠﺔ ﺷﻮﻳﺔ ﻃﻮﺧﺘﻬﺎ ..... ﻭﺍﺳﺘﺄﺫﻧﺖ ﻣﻦ ﺻﻮﻓﻴﺎ ﻭﻃﻠﻌﺖ .. ﺭﻛﺒﺖ ﺗﻜﺴﻲ ... ﺣﺘﻰ ﻣﻜﻠﻲ ﺍﻣﺮ ﺍﺧﺬﺝ ... ﻣﻌﻘﻮﻟﺔ ﺍﻣﺠﺪ ﺗﻐﻴﺮ .. ﻭﻣﻌﺎﺩ ﻳﺤﺒﻨﻲ ... ﻧﺮﻳﻤﺎﻥ ﺭﻛﺰﻱ .. ﺍﻧﺘﻲ ﺭﺍﻳﺤﺔ ﺑﺲ ﻋﻠﻰ ﻣﻮﺩ ﺍﺧﺘﺞ .. ﻣﺎﻋﻨﺪﺝ ﺷﻲ ﻭﻳﺔ ﺍﻣﺠﺪ ... ﺑﺲ ﺷﺮﺍﺡ ﺍﻛﻮﻝ ﻣﻦ ﺍﺷﻮﻓﺔ ﺍﻫﻢ ﺷﻲ ﻣﺘﺨﻮﻧﻲ .. ﺩﻣﻮﻋﻲ ... ﻭﺻﻠﺖ ﻭﻧﺰﻟﺖ ﻣﻦ ﺍﻟﺘﻜﺴﻲ ... ﺗﻤﺸﻴﺖ ﻭﻛﻌﺪﺕ ﻋﻠﻰ ﻣﻴﺰ ﻗﺮﻳﺐ ﻣﻦ ﺍﻟﻤﻲ ﺍﺣﺐ ﺍﻟﻤﻲ ﻭﺍﻟﻄﺒﻴﻌﺔ ... ﺍﻧﺘﻀﺮﺕ ﺍﻣﺠﺪ ﻟﻴﺶ ﻟﺴﺔ ﻣﺂﺟﺔ ... ﻳﻤﻜﻦ ﺍﻧﻲ ﺟﺎﻳﺔ ﻣﻦ ﻭﻛﺖ ﺷﻜﺪ ﻓﺸﻠﺔ ﻣﻤﺼﺪﻛﺔ ﺭﺍﺡ ﺍﺷﻮﻓﺔ ... ﺍﻟﺘﻔﺘﺖ ﻣﻦ ﺑﻌﻴﺪ ﻟﻤﺤﺘﺔ ... ﻫﺬﺍ ﺍﻣﺠﺪ 😍 ﺑﺪﺓ ﻛﻠﺒﻲ ﻳﺪﻙ ﺑﺴﺮﻋﺔ ﻳﺎﺭﺑﻲ ﻟﻴﺶ ﻩﺀﺍ ﺍﻟﺸﺨﺺ ﺷﻮﻓﺘﺔ ﻫﻴﺞ ﺻﻌﺒﺔ

ﺷﻔﺘﻪ ﻣﻦ ﺑﻌﻴﺪ ﺍﺟﺔ ... ﻋﺎﻛﺪ ﺣﺎﺟﺒﺔ .. ﻣﺜﻞ ﻣﻦ ﺍﻭﻝ ﻣﺮﺓ ﺷﻔﺘﺔ ... ﺿﻞ ﻳﺪﻭﺭ ﻋﻠﻴﺔ ﺑﻴﻦ ﺍﻟﻤﻴﻮﺯﺓ .... ﺭﺍﻓﻊ ﺗﻚ ﺣﺎﺟﺐ ... ﻻ ﺍﺭﺍﺩﻱ ﻛﻤﺖ ﻣﻦ ﻣﻜﺎﻧﻲ .. ﻭﺍﺷﺮﺗﻠﺔ ﺑﻴﺪﻱ ﻭﺍﻧﻲ ﻣﺒﺘﺴﺔ ... ﺑﺎﻭﻉ ﻋﻠﻴﺔ ﻭﻋﻜﺪ ﺣﺎﺟﺒﺔ .. ﻓﺸﻠﺖ ﻭﻛﻌﺪﺕ ﺑﻤﻜﺎﻧﻲ ... ﺷﻨﻮ ﻫﻠﺨﻔﻴﺔ ﻧﺮﻳﻤﺎﻥ ﺛﻜﻠﻲ ﺷﻮﻳﺔ ... ﺭﻓﻌﺖ ﺭﺍﺳﻲ ﻭﺍﻟﺘﻔﺘﺖ ﻋﻠﻰ ﺍﻟﻤﻲ ... ﺍﺟﺔ ﺟﺮ ﺍﻟﻜﺮﺳﻲ ﻭﻛﻌﺪ ... ﺍﻟﺘﻔﺘﺖ ﻋﻠﻴﺔ ... ﻣﺮﺣﺒﺎ ﺟﺎﻭﺏ ﺑﻜﻞ ﺑﺮﻭﺩ ﻣﺮﺣﺒﺎ ﺍﻧﺴﺔ ﻧﺮﻳﻤﺎﻥ ....

ﺍﻫﻮ ﺭﺟﻊ ﻟﺴﺎﻟﻔﺔ ﺍﻻﺳﺘﻬﺰﺍﺀ ....

ﺗﺸﺮﺑﻴﻦ ﺷﻲ ...

ﻋﺼﻴﺮ ...

ﺻﺎﺡ ﻟﻨﺎﺩﻝ ... ﻭﺍﺟﺔ .. ﺍﺗﻔﻀﻞ ﺍﺳﺘﺎﺫ ...

ﺛﻨﻴﻦ ﻛﻬﻮﺓ ﺳﺎﺩﺓ ...

ﻓﺘﺤﺖ ﻋﻴﻨﻲ ﻋﻠﻴﺔ .. ﻫﺬﺍ ﺷﺒﻲ ﺳﻜﺘﺖ ﻣﺤﺠﻴﺖ ﺍﻱ ﺷﻲ ﺑﺲ ﺿﺠﺖ ﻣﻦ ﺗﺼﺮﻓﺔ ...

ﺍﻳﻲ ﻧﺮﻳﻤﺎﻥ ﻛﻠﺘﻴﻠﻲ ﺍﺣﻤﺪ ﺟﺎﻱ ﻳﺨﻄﺐ ﻧﻮﺭ ... ﺍﺧﺘﺞ ...

ﺍﻱ ﻧﻌﻢ ... ﻭﺭﺩﺕ ﺍﺳﺄﻟﻚ ﻋﻠﻴﺔ ...

ﺷﺘﺴﺄﻟﻴﻦ ﻳﻌﻨﻲ ...

ﻳﻌﻨﻲ ﺍﺧﻼﻗﺔ .. ﻭﻋﻼﻗﺎﺗﺔ ﻭﺍﺳﻠﻮﺑﺔ .. ﻣﻌﺘﻘﺪﺍﺗﺔ ... ﺗﻔﻜﻴﺮﺓ

ﻛﻞ ﻫﺎﻱ ﺍﻻﺷﻴﺎﺀ ﺍﺭﻳﺪ ﺍﻋﺮﻓﻬﺎ .. ﻋﻨﺔ ...

ﻫﻮ ﻭﻟﺪ ﺍﻣﻴﻦ .. ﺭﺟﺎﻝ ﻭﺍﺧﻮ ﺧﻴﺘﺔ .... ﺍﻣﻤﻢ ﻣﻼﺣﻀﺖ ﻋﻨﺪﺓ ﻋﻼﻗﺎﺕ ﻣﺤﺮﻣﺔ ... ﻭﺍﻧﺘﻲ ﺗﺪﺭﻳﻦ ﻛﻞ ﺷﺎﺏ ﺗﺼﻴﺮ ﻋﻨﺪﺓ ﻋﻼﻗﺎﺕ ﺑﺎﻟﺒﻨﺎﺕ ﺑﺲ ﻣﻦ ﻳﻘﺮﺭ ﻳﺴﺘﻘﺮ ﻳﺘﺰﻭﺝ ﻭﺣﺪﺓ ﻣﻮ ﻣﻦ ﺍﻟﻲ ﺟﺎﻥ ﻋﻨﺪﺓ ﻋﻼﻗﺔ ﺑﻴﻬﻦ ...

ﺑﺲ ﺍﺫﺍ ﺳﺄﻟﻨﻲ ﻫﻮ ﻋﻠﻰ ﻧﻮﺭ ﺍﻧﻲ ﺷﺮﺍﺡ ﺍﺟﺎﻭﺑﺔ .... ؟؟؟

ﺷﺘﺠﺎﻭﺑﺔ ﻳﻌﻨﻲ ... ﻟﻴﺶ ﻫﻮ ﺍﻛﻮ ﻣﺜﻞ ﻧﻮﺭ ... ؟؟

ﻭﺍﻟﻠﻪ ﺭﺍﺡ ﺍﻛﻠﺔ ﺍﺧﺘﻬﺎ ﺍﻟﺠﺒﻴﺮﺓ ﻋﻘﻠﻬﺎ ﺿﺎﺭﺏ ﻭﺗﺤﻠﻞ ﺍﻻﻣﻮﺭ ﻋﻠﻰ ﻣﺰﺍﺟﻬﺎ .. ﻭﺗﺼﺪﻙ ﺗﺤﻠﻴﻠﻬﺎ ﺍﻟﻤﻌﻘﺪ .....

ﻭﺍﻛﻠﺔ ﺩﻳﺮ ﺑﻴﺎﻟﻚ ﺍﺗﻌﺸﻤﻚ ﺑﺎﻟﺤﺐ .. ﻭﺍﺗﻮﻛﻌﻚ ﺑﺒﺮﺍﺋﺘﻬﺎ ﺗﺎﻟﻲ ﻣﻦ ﺍﻭﻝ ﺯﻟﺔ ﺗﻌﻮﻓﻚ ... ﻭﻓﺠﺄﺓ ﺗﻨﺨﻄﺐ ...

ﺑﺎﻟﻠﻪ ﺑﺎﻟﻠﻪ ﻫﻢ ﻫﻴﺞ ﺗﺒﺎﻭﻋﻴﻦ ﻟﻔﺮﻗﺎﻥ ﺑﻬﻞ ﺍﻟﺒﺮﺍﺋﺔ ...

ﺻﺮﺕ ﺍﻓﻮﺭ ﻣﻦ ﺩﺍﺧﻠﻲ ﺑﺲ ﺿﺒﻄﺖ ﺍﻋﺼﺎﺑﻲ ... ﻏﻤﻀﺖ ﻋﻴﻮﻧﻲ ﺑﺼﺒﺮ ...

ﺍﻣﺠﺪ ﻟﺘﺨﻠﻂ ﺍﻻﻣﻮﺭ ﺑﺒﻌﺾ .... ﺍﻭﻝ ﺷﻲ ﻧﻮﺭ ﻣﺎﻟﻬﺎ ﺍﻱ ﻋﻼﻗﺔ ﺑﻴﺔ .... ﺛﺎﻧﻲ ﺷﻲ .. ﺍﻟﻤﺎﺿﻲ ﺧﻠﻴﻨﺎ ﻧﻄﻮﻱ .. ﻭﻧﻨﺴﻰ ﺍﻧﻲ ﺟﺎﻳﺘﻚ ﻋﻠﻰ ﻣﻮﺩ ﻫﻠﻤﻮﺿﻮﻉ ... ﻭﻣﻦ ﺑﻌﺪﻫﺎ ﺭﺍﺡ ﺍﺭﺟﻊ ﻟﻤﻜﺎﻧﻲ ﻭﺍﻧﺖ ﺭﺍﺡ ﺗﺮﺟﻊ ﻟﻤﻜﺎﻧﻚ ﻭﻳﺠﻮﺯ ﻟﻌﺎﺋﻠﺘﻚ ...

ﻣﻤﻜﻦ ﺍﻋﺮﻑ ﺷﻨﻮ ﺍﻟﻲ ﺍﻧﺴﻰ .... ﻫﻬﻬﻪ ﺍﻛﻴﺪ ﻧﺎﺳﻲ ﻭﻣﻤﺤﺮﻙ ﻋﻨﺪﻱ ﺳﺎﻛﻦ .... ﻭﻳﻦ ﺑﻴﺘﻜﻢ ﺍﻟﺠﺪﻳﺪ ...

ﻟﻴﺶ ...

ﺣﺘﻰ ﺍﺟﻲ ﺍﺷﻮﻓﺞ ... ﻫﻬﻪ 😏 ﺍﺭﻳﺪ ﺍﺯﻭﺭ ﺧﺎﻟﺘﻲ ... ﺍﻛﻴﺪ

ﺍﻣﺠﺪ ﺭﺟﺎﺋﺎ ﻟﺘﺤﺠﻲ ﻭﻳﺎﻳﺔ ﺑﻬﻞ ﺍﻻﺳﻠﻮﺏ ... ﺍﻧﻲ ﻣﺎ ﺍﺷﺘﻐﻞ ﻋﻨﺪﻙ .... ﺍﺗﻤﻨﻰ ﻣﻦ ﺗﺰﻭﺭ ﺧﺎﻟﺘﻚ ﺍﻛﻮﻭﻥ ﺍﻧﻲ ﻣﻮ ﺑﺎﻟﺒﻴﺖ .... ﻛﺘﺒﺘﻠﺔ ﺍﻟﻌﻨﻮﺍﻥ ﻋﻠﻰ ﻭﺭﻗﺔ ﺩﻓﺘﺮ ﺻﻐﻴﺮ ﻭﻳﺎﻳﺔ ﺑﺎﻟﺠﻨﻄﺔ ...

ﺑﻼ ﻣﺘﻮﺻﻴﻦ ﺍﻛﻴﺪ ﻣﺮﺍﺡ ﺗﻜﻮﻧﻴﻦ ﻣﻮﺟﻮﺩﺓ ... ﺍﻳﻲ ﻣﺪﺍﻡ ... ﺍﻭﻭﻭ ﺍﻗﺼﺪ ﺍﻧﺴﺔ ... ﺑﺲ ﺟﺎﻥ ﺍﻧﺘﻲ ﻫﺴﺔ ﻣﺪﺍﻡ .. ﺑﺲ ﻟﻼﺳﻒ ﻣﺎﺕ ... ﺍﻋﺘﻘﺪ ﺍﻧﺘﺤﺮ ﻣﻦ ﺍﻓﻌﺎﻟﺔ ... ﺍﻩ ﻭﺻﻠﺖ ﺍﻟﻜﻬﻮﺓ ﺍﻟﺴﺎﺩﺓ ... ﻫﺎﻱ ﻋﻠﻰ ﺭﻭﺡ ﺍﻟﻐﺪﺍﺭ ﻓﺮﻗﺎﻥ ...

ﻳﺎﺭﺏ ﺻﺒﺮﻙ .. ﺍﻧﻲ ﺭﺍﻳﺤﺔ ... ﻻ ﻻ ﻭﻳﻦ ... ﻛﻌﺪﻱ ﻛﻌﺪﻱ ...

ﺑﻌﺪ ﻣﺎ ﺍﺟﻴﺐ ﻃﺎﺭﻳﺔ ....

ﻛﻌﺪﺕ ﻭﻫﻮ ﻛﺎﻡ ...

ﻫﻠﻤﺮﺓ ﺍﻧﻲ ﺍﻟﻲ ﺍﻋﻮﻓﺞ ﻭﺍﺭﻭﺡ 😏... ... ﻃﻠﻊ ﻓﻠﻮﺱ ﻭﺣﻄﻬﻦ ﻋﻠﻰ ﺍﻟﻤﻴﺰ ﻭﺭﺍﺡ ...

ﺿﻠﻴﺖ ﻣﺼﺪﻭﻣﺔ ﻫﺬﺍ ﺍﻣﺠﺪ ﻣﻌﻘﻮﻟﺔ ... ﻫﺬﺍ ﺷﺒﻲ ... ﻟﻴﺶ ﻫﻴﺞ ﺩﻳﺘﺼﺮﻑ ... ﻣﻌﻘﻮﻟﺔ ﻫﻴﺞ ﺩﻳﺴﻮﻱ ﺑﺲ ﻻﻧﻲ ﻣﻘﺒﻠﺖ ﺍﺳﻤﻊ ﻋﺬﺭﺓ .... ﻣﺘﻜﺒﺮ ... ﻣﻴﺘﻐﻴﺮ ... ﻛﻤﺖ ﻭﺍﺧﺬﺕ ﺟﻨﻄﺘﻲ ﻭﺭﺟﻌﺖ ﻟﻠﻤﻌﻤﻞ .. ﺫﺑﻴﺖ ﻧﻔﺴﻲ ﻋﻠﻰ ﺍﻟﺸﻐﻞ ﻣﺎﺭﻳﺪ ﺍﺗﺬﻛﺮﺓ ﻣﺎﺭﻳﺪ ﺍﻓﻜﺮ ﺑﻲ ... ﺷﻜﺪ ﺷﺎﻳﻔﺔ ﻣﺘﻜﺒﺮﻳﻦ ﻭﻣﻐﺮﻭﺭﻳﻦ ﻣﺜﻠﺔ ﻣﺎﺷﻮﻑ ...

ﻛﻤﻞ ﺍﻟﺪﻭﺍﻡ ﻭﺭﺟﻌﺖ ﻟﻠﺒﻴﺖ ﺑﻮﺟﻬﻲ ﻧﻤﺖ ﺣﺘﻰ ﺑﺪﻭﻥ ﻏﺪﺓ ... ﻛﻌﺪﺕ ﺍﻟﻤﻐﺮﺏ ... ﺭﺣﺖ ﻻﻣﻲ ....

ﺍﻛﻮﻝ ﻣﺎﻣﺎ ... ﺍﻧﺘﻲ ﻣﻤﺨﺒﺎﺭﺓ ﺧﺎﻟﺘﻲ ﺍﺑﺪ ﻣﻦ ﻛﻌﺪﻧﺔ ﺑﺎﻟﺒﻴﺖ ﻟﺤﺪ ﺍﻻﻥ ..

ﻻ ﻭﺍﻟﻠﻪ ﻣﺎﻣﺎ ﻣﻤﺨﺎﺑﺮﺗﻬﺎ ..

ﻟﻴﺶ ..

. ﻣﺎﺭﺩﺕ ﺍﺭﺟﻊ ﺍﻓﺘﺢ ﺟﺮﻭﺡ ﺑﺪﻳﺘﻲ ﺗﺴﺪﻳﻬﻦ ....

ﺣﺒﻴﺒﺘﻲ ﺍﻣﻲ ﺍﻟﻠﻪ ﻟﻴﺤﺮﻣﻨﺔ ﻣﻨﺞ ... ﻭﻳﺨﻠﻴﺞ ﺧﻴﻤﺔ ﻓﻮﻙ ﺭﻭﺳﻨﺔ ...

ﺣﺠﻴﺖ ﻻﻣﻲ ﻭﻟﻨﻮﺭ ﺷﻜﺎﻝ ﺍﻣﺠﺪ ﻋﻠﻰ ﺍﺣﻤﺪ ... ﻣﻊ ﺫﺍﻟﻚ ﻃﻠﺒﺖ ﻧﻮﺭ ﺍﻧﻮ ﺗﺘﻌﺮﻑ ﻋﻠﻴﺔ ﺑﺎﻻﻭﻝ . .... ﻣﺮﺍﺕ ﺍﺻﻔﻦ ﻋﻠﻴﻬﺎ ﺍﺣﺲ ﻋﻘﻠﻬﺎ ﻳﻮﺍﺯﻱ ﻋﻘﻠﻲ ﺭﻏﻢ ﺍﻟﻔﺮﻕ ﺑﻴﻨﺎﺗﺔ ٧ ﺳﻨﻮﺍﺕ ....

ﻧﺮﻳﻤﺎﻥ ...

ﻧﻌﻢ ﻣﺎﻣﺎ ...

ﺑﺎﺟﺮ ﺟﻴﺒﻲ ﻧﻔﻂ ﺑﻄﺮﻳﻘﺞ ﻻﻥ ﺑﺮﺩﺕ ﺍﻟﺪﻧﻴﺎ ﻭﺭﺍﺡ ﺍﻧﺰﻝ ﺻﻮﺑﺔ ﻋﻼﺀ ﺍﻟﺪﻳﻦ ... ﺍﺣﻀﺮﻫﺎ ﺳﻤﻌﺖ ﺑﺎﻟﺮﺍﺩﻳﻮ ﺍﻛﻮ ﻣﻄﺮ ﻫﻠﻴﻮﻣﻴﻦ ..

ﺍﻧﺸﺎﺀ ﺍﻟﻠﻪ ... ﺍﻛﻠﺞ ﺍﻣﻲ ﺻﺪﻙ ﺷﻨﻮ ﺭﺃﻳﺞ ﺍﺷﺘﺮﻱ ﺗﻠﻔﺰﻳﻮﻥ ... ﻳﻌﻨﻲ ﺍﻟﻠﻪ ﻳﺮﺣﻢ ﺭﻭﺣﺔ ﺍﺑﻮﻳﺔ ﺟﺎﻥ ﻣﻴﻘﺒﻞ .. ﺻﺢ ﺑﺲ ﻣﻨﻌﺮﻑ ﻟﻴﺶ ﺟﺎﻥ ﻣﻌﺎﺭﺽ ﻫﻠﺸﻲ ...

ﺟﺎﻥ ﻳﻜﻮﻝ ﺍﻟﻠﻪ ﻳﺮﺣﻤﺔ ﺍﻓﻼﻡ ﺳﻌﺎﺩ ﺣﺴﻨﻲ ﻭﺷﺎﺩﻳﺎ ﺗﺘﻔﺘﺢ ﻋﻴﻦ ﺍﻟﺒﻨﺎﺕ ﻋﻠﻰ ﺍﺷﻴﺎﺀ ﻭﺗﻐﻴﺮ ﺗﻔﻜﻴﺮﻫﻦ ﻭﻳﻬﻤﻠﻦ ﺩﺭﺍﺳﺘﻬﻦ ...

ﻳﻼ ﻋﻠﻰ ﺍﺳﺎﺱ ... ﻧﺮﻳﻤﺎﻥ ﺷﻜﻤﻠﺖ ﻫﻲ ﻟﻠﻌﺪﺍﺩﻳﺔ ﻭﺍﻟﺨﺎﻳﺒﺔ ﻣﻜﺪﺭﺕ ﺗﺪﺧﻞ ﺟﺎﻣﻌﺔ ...

ﻟﺞ ﻧﻮﺭ ﺍﻧﺘﻲ ﻣﻌﻠﻴﺞ ... ﻃﺎﻟﻌﻠﺞ ﺍﻟﺴﺎﻥ ﻋﺒﺎﻟﺞ ﺭﺍﺩﻭﺝ ﻭﻛﺒﺮﺗﻲ ﺑﺮﺍﺳﻨﺔ .....

ﻣﺎﻣﺎ ﻋﻮﻓﻴﻬﺎ ﻟﺘﺮﺯﻟﻴﻬﺎ ﻛﺒﺮﺕ .. ﻓﺪﻭﺓ ﻟﺨﺪﻭﻫﺎ ﻭﺻﺎﺭﻭ ﻳﺨﻄﺒﻮﻫﺎ

ﺍﺣﺠﻲ ﻭﻳﺔ ﺭﻭﺣﻲ ﺭﺑﻲ ﻟﺘﺤﺮﻣﻨﻲ ﻣﻦ ﻫﺎﻱ ﺍﻟﻠﻤﺔ ﻭﻟﺘﺪﺧﻞ ﺑﻴﻨﺔ ﺍﻟﺸﻴﻄﺎﻥ ﻃﻮﻝ ﻋﻤﺮﻧﺔ ... ﻭﺗﺤﻔﻀﻠﻲ ﺍﻣﻲ ﻣﻦ ﻛﻞ ﺷﺮ .... ﺍﻣﻴﻴﻦ ﻳﺎﺭﺏ ...

ﺭﺟﻌﻨﺔ ﻣﺜﻞ ﻗﺒﻞ ﻧﻔﺮﺵ ﻛﻠﻨﺔ ﺑﺎﻟﻬﻮﻝ ﻻﻥ ﺍﻟﺸﺘﺔ ﺗﻀﻠﻢ ﻣﻦ ﻭﻛﺖ ﻭﻭﺣﺸﺔ ﻭﺑﺮﺩ ... ﺍﺣﻠﻰ ﺷﻌﻮﺭ ﺍﻧﻮ ﺍﻧﺎﻡ ﻳﻢ ﺍﻣﻲ ﻭﺍﻟﺒﻨﺎﺕ .. ﻭﺍﻣﻮﺭﻧﺔ ﺍﻟﻤﺎﺩﻳﺔ ﻛﻠﺶ ﺯﻳﻨﺔ ﻣﻜﻔﻴﺘﻨﺔ ﻛﻠﺶ ...

ﺑﺲ ﻛﻞ ﻣﺎ ﺍﺣﻂ ﺭﺍﺳﻲ ﻋﻠﻰ ﺍﻟﻤﺨﺪﺓ ﺍﺗﺬﻛﺮﺓ ﺿﻞ ﺍﻣﺠﺪ ﺑﻜﻠﺒﻲ ﻣﺜﻞ ﺍﻟﺤﺴﺮﺓ ﺍﻟﻲ ﻣﺮﺍﺿﻴﺔ ﺗﻄﻠﻊ ... ﻛﻼﻣﺔ ﻛﺴﺮ ﻛﻠﺒﻲ ﻭﻓﺘﺘﺔ .. ﻫﻮ ﻫﻢ ﺣﻘﺔ ﺍﻧﻲ ﺍﺷﻠﻮﻥ ﺍﺗﺼﺮﻓﺖ ﻫﻴﺞ ... ﻋﻘﻠﻲ ﻭﻳﻦ ﺟﺎﻥ ... ﻣﺎﻛﻮﻝ ﻏﻴﺮ ﺍﻟﻠﻪ ﻳﺮﺣﻤﻚ ﻳﺎﻓﺮﻗﺎﻥ ...

ﻣﺮﺕ ﺍﻻﻳﺎﻡ ﻭﻃﻠﺒﻮ ﻣﻮﻋﺪ ﺻﻮﻓﻴﺎ ﻭﺍﺣﻤﺪ ...

ﻛﻠﺘﻠﻬﺎ ﺍﻟﺠﻤﻌﺔ ﺣﺘﻰ ﻣﺎﻋﺪﻫﺎ ﺩﻭﺍﻡ ...

ﺻﺎﺭ ﺍﻟﺠﻤﻌﺔ ﻛﻌﺪﻧﺔ ﻣﻦ ﻭﻛﺖ ﻭﺍﻣﻲ ﻟﺰﻣﺘﻨﺔ ﺣﻤﻠﺔ ﻋﻠﻰ ﺍﻟﺒﻴﺖ ... ﻋﺒﺎﻟﻚ ﻋﺪﻧﺔ ﻋﺮﺱ ﻣﻮ ﺗﻌﺎﺭﻑ ... ﻧﻀﻔﻨﺔ ﺍﻟﺠﺎﻡ ... ﺭﻏﻢ ﻫﻮ ﻳﻠﻤﻊ ... ﺭﺟﻌﺖ ﻃﻠﻌﺖ ﺍﻟﺴﺠﺎﺩ ﻭﻧﻔﻀﻨﺎ ... ﻫﻠﻜﺖ ﺑﻜﺪ ﻣﺸﺘﻐﻠﺖ ... ﺟﻌﺖ ﻛﺘﺒﺘﻠﻲ ﻗﺎﺋﻤﺔ ﺣﻠﻴﻮﻳﺎﺕ ﻭﻓﻮﺍﻛﻪ ..... ﺩﺯﺗﻨﻲ ﺑﻨﺺ ﺍﻟﻀﻬﺮﻳﺔ ﺧﻠﺘﻨﻲ ﺍﺟﻴﺐ .... ﺭﺟﻌﺖ ﻟﻜﻴﺘﻬﺎ ﻛﺎﻋﺪﺓ ﺗﺨﺘﺎﺭ ﻟﺒﺲ ﻟﻨﻮﺭ ... ﻣﻦ ﻛﻨﺘﻮﺭﻱ .... ﻫﻬﻬﻬﻬﻪ ﻣﺎﻣﺎ ﻧﻮﺭ ﻓﺴﺎﺗﻴﻨﻬﺎ ﺍﺟﻦ ﺷﺪﺳﻮﻳﻦ ﻳﻤﻌﻮﺩﺓ .... ﻭﻻﻛﻨﻪ ﺩﺍ ﺍﺣﺠﻲ ﻭﻳﺎﻫﺎ ... ﻳﻼ ﻧﺮﻳﻤﺎﻥ ﻛﻮﻣﻲ ﻗﺮﻣﻴﻠﻬﺎ ﻫﺬﺍ ﺍﻟﻔﺴﺘﺎﻥ ﺑﺴﺮﻋﺔ ...

ﻣﺎﻣﺎ

ﻳﻼ ﻧﺮﻳﻤﺎﻥ ﺑﺴﺮﻋﺔ ...

ﺣﺎﺿﺮ ﻟﻌﺪ ﺑﻌﺮﺳﻬﺎ ﺷﺮﺍﺡ ﺍﺗﺴﻮﻳﻦ ...

ﺻﺎﺣﺖ ﻧﻮﺭ ﻣﻦ ﻏﺎﺩ .. ﻫﺎﻱ ﺍﺫﺍ ﻭﺍﻓﻘﺖ ....

ﺍﺗﻮﺍﻓﻘﻴﻦ ﻣﺎﻣﺎ ﺍﺗﻮﺍﻓﻘﻴﻦ ....

ﺣﺒﻴﺒﺘﻲ ﺍﻣﻲ ... ﺷﺎﻳﻠﺔ ﻫﻤﻨﺔ ﻭﺑﻮﺩﻫﺎ ﻧﺴﺘﻘﺮ ﻭﺗﺎﻣﻦ ﻋﻠﻴﻨﺔ ﻫﻢ ... ﺣﻘﻬﺎ ...

ﻣﺎﻣﺎ ﺍﻟﻠﻪ ﻳﺨﻠﻴﺞ ﻛﺎﻓﻲ ﺗﺮﻛﻀﻴﻦ ﻣﻨﺎ ﻭﻣﻨﺎ .... ﻛﻠﺸﻲ ﺟﺎﻫﺰ ﻭﺗﻤﺎﻡ ...

ﺭﻭﺣﻲ ﻋﻠﻰ ﻧﻮﺭ ﺷﻮﻓﻴﻬﺎ ..

ﺩﺧﻠﺖ ﻋﻠﻰ ﻧﻮﺭ ﺟﺎﻧﺖ .. ﻛﺎﻋﺪﺓ ﻭﺻﺎﻓﻨﺔ ... ﻧﻮﻭﺭ ﺷﺒﻴﺞ ...

ﻧﺮﻳﻤﺎﻥ ... ﺧﺎﻳﻔﺔ ...

ﻟﻴﺶ ﺧﺎﻳﻔﺔ ﺣﺒﻴﺒﺘﻲ .. ﻫﻮ ﻣﺠﺮﺩ ﺗﻌﺮﻑ ..

ﻧﻮﺭ ﺍﻧﻲ ﺑﻌﺪﻧﻲ ﻋﻤﺮﻱ ١٧ ﺳﻨﺔ ..

ﺍﻭﻝ ﺷﻲ ﻣﺮﺍﺡ ﺗﺘﺰﻭﺟﻴﻦ ﻫﺴﺔ ... ﺛﺎﻧﻲ ﺷﻲ ... ﻣﺎﺷﺎﺀ ﺍﻟﻠﻪ ﻋﻠﻴﺞ ﺷﻜﺪ ﻛﺒﺮﺍﻧﺔ ﻭﻋﻘﻠﺞ ﻳﻮﺯﻥ ﺑﻠﺪ ... ﻣﻦ ﺗﻮﻓﺔ ﺍﺑﻮﻳﺔ ... ﺷﻔﺘﺞ ﺷﻜﺪ ﻗﻮﻳﺔ ... ﻭﺍﻫﺘﻤﻴﺘﻲ ﺑﻴﻨﺔ ... ﻣﻦ ﻭﻛﺘﻬﺎ ﻋﺮﻓﺖ ﻧﻮﺭ ﺍﺧﺘﻲ .. ﻛﺒﺮﺕ .. ﻭﺻﺎﺭ ﻳﻌﺘﻤﺪ ﻋﻠﻴﻬﺎ ... ﺑﻌﺪﻳﻦ ﻋﻨﺪﺝ ﻓﺘﺮﺓ ﻭﺗﺘﻌﺮﻓﻴﻦ ﻋﻠﻰ ﺍﺣﻤﺪ .... ﻭﺍﻧﺘﻲ ﻗﺮﺭﻱ ﺑﻌﺪﻫﺎ ... ﺍﻟﻴﻮﻡ ﺍﻧﻲ ﺭﺍﺡ ﺍﻋﻮﻓﺞ ﺍﻧﺘﻲ ﺍﻟﻲ ﺗﺤﺠﻴﻦ ﻭﺗﻘﻘﺮﻳﻦ ﻭﻟﺘﺨﺠﻠﻴﻦ ﺍﺫﺍ ﻋﻨﺪﺝ ﺷﺮﻁ ﺍﻭ ﻣﻮﺿﻮﻉ ﻫﺎﻱ ﺣﻴﺎﺗﺞ ﻭﺧﻠﻲ ﻳﺸﻮﻑ ﺷﺨﺼﻴﺘﺞ ﻗﻮﻳﺔ .... ﺷﻮﻓﻲ .. ﺟﺒﺘﻠﺞ ﻗﻠﻢ ﺍﻟﻜﺤﻠﺔ ﻛﺤﻠﻲ ﻫﻠﻌﻮﻥ ﺍﻟﺤﻠﻮﺓ ....

ﻻ ﻧﺮﻳﻤﺎﻥ .. ﺧﻠﻴﻨﻲ ﻋﻠﻰ ﺣﻘﻴﻘﺘﻲ ﺍﺣﺴﻦ ...

ﺍﻧﺘﻲ ﺗﺨﺒﻠﻴﻦ ﻋﻤﺮﻱ ... ﻣﺘﺤﺘﺎﺟﻴﻦ ﺍﻱ .. ﺷﻲ ﻫﺴﺔ ﻳﻄﻴﺮ ﻋﻘﻞ ﺍﻟﻮﻟﺪ .. ﺑﻴﺞ ... ﺭﺍﺡ ﺍﺭﻭﺡ ﺍﺷﻮﻑ ﺍﻣﻲ ... ﺩﺍﺧﺖ ﻭﻫﻲ ﺗﻔﺘﺮ ﻭﺗﺘﻔﺤﺺ ﺍﺧﺎﻑ ﺍﻛﻮ ﻧﻘﺺ ﻭﻛﻞ ﺷﻮﻳﺔ ﻣﺘﺬﻛﺮﺓ ﺷﻲ ..

ﺍﻧﺪﻙ ﺍﻟﺠﺮﺱ ... ﻭﺍﻣﻲ ﺻﺎﺭﺕ ﺗﺮﻛﺾ ﺣﺘﻰ ﺍﻟﺒﺎﺏ ﺑﻌﺪ ﻣﺘﻨﺪﻟﺔ ...

ﻟﺤﻀﺔ ﻣﺎﻣﺎ ﺭﻭﺣﻲ ﺍﻓﺘﺤﻲ ﺑﺎﺏ ﺍﻻﺳﺘﻘﺒﺎﻝ .. ﻭﺍﻧﻲ ﺭﺍﺡ ﺍﻓﺘﺤﻠﻬﻢ ﺑﺎﺏ ﺍﻟﺸﺎﺭﻉ ... ﻃﻠﻌﺖ ﺭﺣﺒﺖ ﺑﻴﻬﻢ ﺩﺧﻠﺖ ﺻﻮﻓﻴﺎ ﻭﺭﺍﻫﺎ ﺍﺣﻤﺪ ... ﻋﺒﺎﻟﻲ ﻫﺎﻳﻬﺔ .. ﺩﺍ ﺍﺳﺪ ﺍﻟﺒﺎﺏ .. ﺍﻧﺪﻓﻊ ... ﻭﺩﻓﻌﻨﻲ ﻣﺘﺮ ﻭﺭﺓ ... ﺷﻮﻳﺔ ﻭﺍﻛﻊ ... ﻳﻤﻪ ﻳﻤﻪ .. ﺭﻓﻌﺖ ﺭﺍﺳﻲ ﺩﺍ ﺍﺷﻮﻑ ﻫﺬﺍ ﺍﻟﻌﻔﺮﻳﺖ ﺍﻟﻲ ﺩﻓﻊ ﻋﻠﻴﺔ ﺍﻟﺒﺎﺏ ﻣﻨﻮ .... ﺍﻣﺠﺪﺩﺩ ﻛﺎﺑﻲ ﻛﺎﻡ ﻳﺪﻙ ... ﺍﺗﻠﻌﺜﻤﺖ ﺑﺎﻟﻜﻼﻡ ... ﻭﺑﻌﺪ ﻣﺎ ﺍﻋﺮﻑ ﺣﺘﻰ ﺍﺳﻠﻢ ﻋﻠﻴﺔ ﻭﺍﺻﻼ ﻫﻮ ﻣﺪﺍﺭﻟﻲ ﺑﺎﻝ ﻭﺩﺧﻠﻨﺎﻫﻢ ﻟﻼﺳﺘﻘﺒﺎﻝ .. ﺟﺎﻥ ﺍﺣﻤﺪ ﺟﺪﺍﺍ ﻣﺮﺗﺐ .. ﻭﻣﺜﻘﻒ ﻭﻣﺆﺩﺏ ﺣﺘﻰ ﺳﻼﻣﺔ ﺍﻧﻴﻖ ..... ﺍﻣﻲ ﺍﺗﻔﺎﺟﺌﺖ ﺑﺎﻣﺠﺪ ﺑﺲ ﺭﺣﺒﺖ ﺑﻲ ﻛﻠﺶ .... ﻛﻌﺪﻭ ﺷﻮﻳﺔ ﻗﻄﻤﺘﻠﻬﻢ ﺟﻜﻠﻴﺖ ﺑﺎﻟﺸﻜﺮﺩﺍﻥ ﺍﻟﻲ ﺍﻣﻲ ﻣﺘﻘﺒﻞ ﺍﻧﻄﻠﻌﺔ ﻣﻦ ﺍﻟﺒﻮﻓﻴﺎ ﺑﺲ ﻫﻠﻤﺮﺓ ﻫﻲ ﻃﻠﻌﺘﺔ .... ﻭﺭﺣﺖ ﺣﻀﺮﺕ ﺍﻟﻌﺼﻴﺮ ﻧﻮﺭ ﻭﺍﻛﻔﺔ ﺗﻜﺮﺽ ﺑﺎﺻﺎﺑﻌﻴﻬﺎ .....

ﺷﺒﻴﺞ ﻣﺘﻜﻮﻟﻴﻠﻲ ﻋﻠﻰ ﺷﻨﻮ ﻫﻠﺘﻮﺗﺮ ... ﺗﻌﺎﻟﻲ ﻫﺪﺋﻲ ﻧﻔﺴﺞ ﻟﺘﺠﻔﻴﻦ ﺍﻟﻌﺼﻴﺮ ﻭﺗﺼﻴﺮﻳﻦ ﻣﻀﺤﻜﺔ ...

ﺍﺟﺘﻲ .. ﻋﺪﻟﺘﻬﺎ ﺷﻌﺮﻫﺎ ﺯﻳﻦ ... ﺟﺎﻧﺖ ﺷﺎﻳﻠﺘﺔ ﺫﻳﻞ ﺍﻟﺤﺼﺎﻥ ﻭﺑﻌﺪ ﺍﺻﺮﺍﺭ ﻣﻨﻲ .. ﺷﺪﻳﺘﺔ ﺍﻟﻬﺎ ﻧﺺ ﻭﻧﺺ .. ﻻﻥ ﻫﻮ ﻃﻮﻳﻞ ﻭﺳﺮﺡ ....

ﺩﺧﻠﺖ ﻛﺪﺍﻣﻬﺎ ... ﻭﻛﻌﺪﺕ ﻛﺘﻠﻬﺎ ﺩﻗﻴﻘﺔ ﻭﺍﺩﺧﻠﻲ ... ﺿﻠﻴﺖ ﺍﺑﺎﻭﻉ ﻋﻠﻰ ﺍﺣﻤﺪ ﺣﺘﻰ ﺍﺷﻮﻑ ﺷﻠﻮﻥ ﺭﺍﺡ ﻳﺒﺎﻭﻉ ﻋﻠﻰ ﻧﻮﺭ ...

ﺩﺧﻠﺖ ﻧﻮﺭ ... ﺍﺣﻤﺪ ﺟﺎﻥ ﻳﺴﻮﻟﻒ ﻭﻳﺔ ﺍﻣﺔ ﺭﻓﻊ ﻋﻴﻨﺔ ﻭﺷﺎﻓﻬﺎ ﻟﻨﻮﺭ ... ﺳﻜﺖ ﻓﻮﺭﺍﺍ ... ﻓﺘﺢ ﻋﻴﻨﺔ ﻭﻣﺮﻣﺶ ﻭﻫﻮ ﻳﺘﻤﻌﻦ ﺑﻴﻬﺎ ... ﻭﻛﻔﺖ ﻛﺒﺎﻟﺔ ﻭﻫﻮ .. ﻳﺒﺎﻭﻉ ﻋﻠﻴﻬﺎ ... ﻧﻮﺭ ﺻﺎﺭﺕ ﺗﻨﻄﻲ ﺍﻟﻮﺍﻥ ﺣﺘﻰ ﻣﻨﺘﺒﻪ ﺩﺗﻘﺪﻣﺔ ﻋﺼﻴﺮ ...

ﺣﺠﻴﺖ ﻣﻦ ﻳﻤﻲ ...

ﺩﻛﺘﻮﺭ ﺍﺣﻤﺪ ﺍﻟﻌﺼﻴﺮ ...

ﻫﺎﺍﺍ ﺍﻳﻲ ﺍﻋﺘﺬﺭ ﺭﻓﻊ ﻋﻴﻨﺔ ﻭﺍﺑﺘﺴﻤﻠﻬﺎ ... ﺍﺳﻒ ﻭﻛﻔﺘﺞ ﻫﻮﺍﻳﺔ .....

ﺣﺴﻴﺖ ﻧﻮﺭ ﻣﺎﻋﺖ ﻣﻦ ﺍﻟﺨﺠﻞ .. ﺧﺪﻭﺩﻫﺎ ﺻﺎﺭﻥ ﺣﻤﺮ ﺩﻡ ... ﻭﺑﻌﺪ ﻣﺘﻌﺮﻑ ﺗﻤﺸﻲ ... ﺍﻧﻲ ﺍﺑﺎﻭﻉ ﻋﻠﻴﻬﻢ ﻭﺍﺑﺘﺴﻢ ... ﻏﻤﻀﺖ ﻋﻴﻮﻧﻲ ﻭﺟﺮﻳﺖ ﺣﺴﺮﺓ ... ﻳﻤﻜﻦ ﻃﻮﻝ ﻋﻤﺮﻱ ﻣﺮﺍﺡ ﺍﻋﻴﺶ ﻫﺎﻱ ﺍﻟﻠﺤﻀﺔ ... ﺍﻟﺘﻔﺘﺖ ﻭﺷﻔﺖ ﻋﻴﻮﻥ ﺍﻣﺠﺪ ﻋﻠﻴﺔ ... ﺟﺎﻧﺖ ﻧﻀﺮﺗﻪ ﻋﻜﺲ ﻧﻀﺮﺓ ﺍﺧﺮ ﻟﻘﺎﺀ ... ﺟﺎﻥ ﺑﻌﻴﻮﻧﺔ ﻋﺘﺐ ﻭﺗﻌﺐ ... ﻭﻗﻬﺮ ... ﻣﻜﺪﺭﺕ ﻋﻴﻨﻲ ﺍﺣﻄﻬﺎ ﺑﻌﻴﻨﺎ ﺍﻛﺜﺮ ... ﺩﻧﻜﺖ

....

ﺣﺠﺔ ﺍﺣﻤﺪ ..

ﺍﻳﻲ ﻧﻮﺭ .. ﺍﺷﻠﻮﻧﺔ ﺍﻟﺮﺍﺑﻊ ﻭﻳﺎﺝ ...

ﻧﻮﺭ ﻣﺪﻧﺠﺔ ﻭﺗﺤﺠﻲ ... ﺍﻟﺤﻤﺪ ﺍﻟﻠﻪ ﻣﻀﺒﻄﺔ ﺍﻣﻮﺭﻱ ...

ﻋﻨﺪﺝ ﻃﻤﻮﺡ ﺗﻜﻤﻠﻴﻦ ﺟﺎﻣﻌﺔ ...

ﺍﻛﻴﺪ ﻭﺍﻧﺸﺎﺀ ﺍﻟﻠﻪ ﺍﺩﺍﺭﺓ ﺍﻋﻤﺎﻝ ...

ﺣﻠﻮﻭﻭ ... ﺍﺧﺘﻴﺎﺭ ﻏﺮﻳﺐ ...

ﺿﻞ ﻳﺴﻮﻟﻒ ﻋﻦ ﺳﻔﺮﺓ .... ﺷﻔﺖ ﻧﻮﺭ ﺍﺗﺒﺎﻭﻉ ﻋﻠﻴﺔ ﺗﺮﺩﻳﻨﻲ ﺍﻛﻮﻟﻠﻬﻢ ﻋﻦ ﺷﺮﻃﻬﺎ .. ﺍﺷﺮﺗﻠﻬﺎ ﺑﻌﻴﻮﻧﻲ ﻣﻮ ﻫﺴﺔ .... ﻧﻄﻖ ﺍﻣﺠﺪ ﺍﻳﻲ ﻧﺴﻴﺒﻲ ﻫﺴﺔ ... ﺻﺮﺕ .. ﺟﺎﻥ ﻳﺤﺠﻲ ﻭﻳﺔ ﺍﺣﻤﺪ ﻭﻣﻨﺎ ﻛﺎﻝ ﺻﺮﺕ ﻧﺴﻴﺒﻲ ﺍﻫﺘﺰﻳﺖ ﻣﻦ ﺩﺍﺧﻠﻲ ... ﻳﻌﻨﻲ ﺍﻣﺠﺪ ﺟﺎﻱ ﻣﻦ ﺟﺎﻧﺒﻨﺔ ... ﻭﻓﺎﺟﺌﻨﻲ ﺍﻛﺜﺮ ﻣﻦ ﻛﻠﺔ ﻧﺪﺍﻧﺶ ﺑﺎﻟﻤﻮﺿﻮﻉ ﻭﺍﻧﺮﺩﻟﻚ ﺧﺒﺮ ... ﺍﺳﺘﺄﺫﻧﻮ ﺍﺣﻤﺪ ﻭﺻﻮﻓﻴﺎ ﻭﻛﺎﻡ ﻭﺭﺍﻫﻢ .. ﺍﻣﺠﺪ ﻋﺒﺎﻟﻲ ﺭﺍﺡ ﻳﻄﻠﻊ ﻭﻳﺎﻫﻢ ... ﺑﺲ ﺍﺷﻮﻫﺬﺍ ﻭﺻﻠﻬﻢ ﻟﻠﺒﺎﺏ .... ﻭﻃﺒﻜﺔ ﻭﺭﺍﻫﻢ ... ﻭﻫﻮ ﻳﺤﺎﺟﻲ ﺍﻣﻲ ... ﺍﻳﻲ ﺧﺎﻟﺔ ﺷﺮﺍﺡ ﺍﺗﻌﺸﻴﻨﻲ ﺍﻟﻴﻮﻡ ... ﺑﺲ ﻣﻴﻮﺟﻬﻠﻲ ﺍﻱ ﻛﻠﻤﺔ .... ﺭﺍﺣﺖ ﺍﻣﻲ ﺍﺗﺴﻮﻱ ﺍﻟﻌﺸﺔ ﺩﺧﻠﺖ ﻭﻳﺎﻫﺎ ﻟﻠﻤﻄﺒﺦ ﺍﺟﺔ ﻛﻌﺪ ﻳﻤﻨﺔ ... ﻳﺴﻮﻟﻔﻮﻥ ﻫﻮ ﻭﺍﻣﻲ .. ﻭﺍﻧﻲ ﻋﺒﺎﻟﻚ ﺧﻴﺎﻝ ﻳﻤﻬﻢ ... ﺿﻞ ﻳﺴﺄﻟﻬﺎ ﻋﻠﻰ ﻛﻠﺸﻲ ﺍﺷﻠﻮﻥ ﺑﻌﺘﻮ ﺫﺍﻟﻚ ﺍﻟﺒﻴﺖ ﻭﺍﺷﻠﻮﻥ ﺍﺷﺘﺮﻳﺘﻮ ﻫﺬﺍ ..

ﻣﺨﻠﺔ ﺷﻲ ﻣﺴﺘﻔﺴﺮ ﻋﻨﺔ ... ﻃﻜﺖ ﺭﻭﺣﻲ .. ﺣﺠﻴﺖ ﺑﺼﻮﺕ ﻧﺎﺻﻲ .. ﺍﺩﺭﻱ ﺷﺎﺭﻟﻚ ﻫﻮﻣﺰ ﻭﻣﻨﺪﺭﻱ ... ﺍﻟﺘﻔﺘﺖ ﺷﻔﺘﺔ ﻳﺒﺎﻭﻉ ﻋﻠﻴﺔ ﺳﻮﻳﺖ ﻧﻔﺴﻲ ﻣﻮ ﻳﻤﺔ .... ﻫﻤﺲ

ﺑﺼﻮﺕ ﺧﺎﻓﺖ

ﻻ ﺍﻧﺘﻲ ﺷﺎﺭﻟﻚ ﻫﻮﻣﺰ ﺍﺷﻠﻮﻥ ﺗﺤﻠﻠﻴﻦ ﺗﺤﻠﻴﻼﺕ .. ﺭﻫﻴﺒﺔ .😏 .. ﺩﻣﺎﻏﺞ ﺍﻟﻤﻌﻘﺪ ...

ﺳﻜﺘﺖ ﻣﺮﺩﻳﺖ ﺻﺎﺭﺕ ﻋﻠﻴﺔ ﻟﺰﻣﺔ ... ﺍﻧﻮ ﺍﻓﻜﺮ ﺍﻟﻔﻜﺮﺓ ﻭﺍﺻﺪﻛﻬﺎ ... ﻭﻭﻭﻑ ... ﻛﻌﺪﻧﺔ ﻋﻠﻰ ﺍﻟﻌﺸﺔ ﻳﻮﺟﻪ ﻛﻼﻡ ﻟﻠﻜﻞ ﺑﺲ ﺍﻧﻲ .. ﻛﺄﻧﻲ ﻣﻤﻮﺟﻮﺩﺓ ... ﻛﻤﻞ ﻋﺸﺔ ﻭﺍﺟﺔ ﺩﻳﻄﻠﻊ ... ﻭﻛﻠﻠﻬﺎ ﻻﻣﻲ ... ﺍﻧﺸﺎﺀ ﺍﻟﻠﻪ ﻧﺘﺸﺎﻭﻑ ﻏﻴﺮ .. ﻣﺮﺓ

ﺭﺩﺕ ﺍﻏﺜﺔ ...

ﺍﻧﺸﺎﺀ ﺍﻋﺰﻣﻚ ﻋﻠﻰ ﻋﺮﺳﻲ ﻋﻮﺩ ﺗﺠﻲ ﺑﺎﻭﻋﻨﻲ ﻣﻦ ﻓﻮﻙ ﻟﻴﺠﻮﺓ .... ﻛﻤﻞ ﻛﻼﻡ ﻭﻳﺔ ﺍﻣﻲ ﻭﺍﻟﺘﻔﺖ ﻟﻨﻮﺭ .. ﻛﻠﻠﻬﺎ ﻓﻜﺮﻱ ﺯﻳﻦ ﻭﺍﻟﻮﻟﺪ ﺍﻧﻲ ﺍﺿﻤﻨﺔ ﺍﻟﺞ .... ﻃﻠﻊ ﻭﺍﻧﻲ ﻣﺤﺘﺮﻛﺔ ﻣﻦ ﺗﺼﺮﻓﺎﺗﺔ ﻣﻌﻘﻮﻟﺔ ﺑﻄﻞ ﻳﺤﺒﻨﻲ ... ﻭﺷﻨﻮ ﻳﻌﻨﻲ ... ﻋﺴﺎﻟﻚ ﻻ ﺣﺒﻴﺖ ... ﺍﻭﻭﻑ ﻣﻜﺮﻭﻩ ...

ﺍﻣﺠﺪ ....

ﺍﻟﻮﻭﻭ ﺍﻱ ﻧﻌﻢ ﻭﻳﺎﻙ ﺍﻣﺠﺪ ﺍﻧﻲ ﻋﻨﺪﻱ ﺣﺴﺎﺏ ﻳﻤﻜﻢ .. ﺍﺟﻴﺖ ﺍﺳﺤﺐ ﺍﺗﻀﺢ ﺍﻧﻮ ﺍﻟﺤﺴﺎﺏ ﻣﺴﺤﻮﺏ ﻣﻨﺔ ﻣﺒﻠﻎ ﺟﺒﻴﺮ ..

ﺍﻱ ﻧﻌﻢ ﺍﺳﺘﺎﺫ .. ﺍﻧﺖ ﺳﺎﺣﺐ ﺑﻬﻠﻜﺪ ﺗﺎﺭﻳﺦ .. ﻫﺬﺍ ﺍﻟﺤﺴﺎﺏ ..

ﺑﺲ ﻳﺎ ﺍﺧﻲ ﺍﻓﻬﻤﻨﻲ ﺍﻧﻲ ﻣﺴﺎﺣﺐ .. ﻭﻫﺬﺍ ﻣﺒﻠﻎ ﺟﺒﻴﺮ ...

ﻳﻌﻨﻲ ﻣﻴﻨﺴﻜﺖ ﻋﻨﺔ ...

ﺍﺳﺘﺎﺫ ﺍﻧﻲ ﻣﺠﺮﺩ ﻣﻮﺿﻒ ... ﺗﻜﺪﺭ ﺗﺠﻲ ﻟﻠﻤﺼﺮﻑ ﻭﺗﺤﻞ ﺍﻻﻣﺮ ﻭﻳﺔ ﺍﻟﻤﺤﺎﺳﺒﺔ ﻭﺍﻟﺘﺪﻗﻴﻖ .....

ﺍﺧﻲ ﺍﻧﻲ ﺑﻔﺮﻧﺴﺎ ..

ﺍﻳﺎ ﺍﺳﺘﺎﺫ ﻣﺎﻋﻨﺪﻱ ﻏﻴﺮ ﻫﻠﻜﻼﻡ .. ﺍﺫﺍ ﺍﻧﺖ ﺻﺎﺩﻕ ﺗﻌﺎﻝ ﺷﻮﻑ ﻓﻠﻮﺳﻚ ﻭﻳﻦ ﺭﺍﺣﺖ ...

ﻃﺒﻜﺖ ﺍﻟﺘﻠﻔﻮﻥ ﻣﻨﺔ ﻭﺍﻧﻲ ﺍﻏﻠﻲ ﻳﺎ ﺍﻟﻠﻪ ﻣﻨﻲ ﻳﻜﺪﺭ ﻳﺴﺤﺐ ﻣﻦ ﺍﻟﺤﺴﺎﺏ ﺑﺄﺳﻤﻲ .... ﻣﻨﻮ ﻳﺴﺘﻐﻔﻠﻨﻲ ﻭﻳﺒﻮﻛﻨﻲ .. ﻛﺎﺩﺭ ﺍﺭﺟﻊ ﻟﺒﻐﺪﺍﺩ ﺍﺷﻠﻮﻥ ﺍﺭﺟﻊ ﻭﻫﻮ ﺣﺘﻰ ﻫﻮﺓ ﺑﻐﺪﺍﺩ ﺍﻳﺬﻛﺮﻧﻲ ﺑﻴﻬﺎ ... ﻳﺎﺍﺍ ﺍﻟﻠﻪ ﺳﺎﻋﻨﺪﻱ ... ﺑﺲ ﻫﺬﺍ ﺣﻼﻟﻲ .. ﻻﺯﻡ ﺍﺭﺟﻌﺔ .. ﺭﺣﺖ ﺣﺠﺰﺕ ﻭﺭﺟﻌﺖ ﻟﺒﻐﺪﺍﺩ ...

ﻭﺻﻠﺖ ﻟﻠﺒﻴﺖ ﺑﻠﻴﻞ ﻛﻞ ﺭﻛﻦ ﺑﺎﻟﺒﻴﺖ ﻳﺬﻛﺮﻧﻲ ﺑﻴﻬﺎ ... ﺍﺣﺒﻬﺎ ﻳﺎﺭﺏ ﻣﺪﺍ ﺍﻛﺪﺭ ﺍﻧﺴﺎﻫﺎ ... ﺳﺎﻋﺪﻧﻲ ﻳﺎﻟﻠﻪ ﺍﻧﺴﺎﻫﺎ ﻃﻠﻌﻬﺎ ﻣﻦ ﻛﻠﺒﻲ ....

ﺻﺒﺢ ﺍﻟﺼﺒﺢ ﻭﺭﺣﺖ ﻟﻠﺒﻨﻚ ... ﺍﺻﺮﻭ ﺍﻧﻲ ﺳﺎﺣﺐ ﻣﺒﻠﻎ .. ﻳﻤﻌﻮﺩﻳﻦ ﺟﺎﻱ ﺍﻛﻠﻠﻜﻢ ﺩﻳﻨﺎﺭ ﻣﺴﺎﺣﺐ ﺻﺮﺕ ﻋﺼﺒﻲ ﻭﻛﻤﺖ ﺍﻋﻴﻂ ... ﻃﻠﻌﺖ ﺍﻧﻲ ﻧﺎﺭ ﻻﻥ ﻣﻜﺪﺭﻭ ﻳﺤﻠﻮﻥ ﺍﻟﺴﺎﻟﻔﺔ ﻭﺍﻧﻲ ﺣﺎﺟﺰ ٣ ﺍﻳﺎﻡ .. ﺑﺲ .. ﻣﺮﺩﺕ ﺍﺷﻮﻓﻬﺎ ﻭﻛﻔﺖ ﺗﻜﺴﻲ ... ﻻﻥ ﺣﺘﻰ ﺳﻴﺎﺭﺗﻲ ﺍﺗﺬﻛﺮﻧﻲ ﺑﻴﻬﺎ .. ﻣﺸﺖ ﺍﻟﺘﻜﺴﻲ ﺍﻟﺘﻔﺘﺖ ﺷﻔﺖ ﻭﺣﺪﺓ ﻭﺍﻛﻔﺔ ﺍﺑﺎﺏ ﺍﻟﺒﻨﻚ ﻧﺮﻳﻴﻴﻤﺎﻥ ﻟﻮ ﺍﻥ ﻛﻤﺖ ﺍﺗﺨﻴﻠﻬﺎ ... ﻛﻠﺒﻲ ﺭﺟﻒ ﻭﺣﻨﻴﺖ ﺍﻟﻬﺎ ... ﻭﻛﻔﺖ ﺍﻟﺘﻜﺴﻲ ﻟﻴﻐﺎﺩ ﻭﺿﻠﻴﺖ ﺍﺑﺎﻭﻉ ﻋﻠﻴﻬﺎ ... ﺯﺍﻳﺪﺓ ﺟﻤﺎﻝ ... ﻭﺳﻤﻨﺎﻧﺔ ... ﻣﻌﻘﻮﻟﺔ ﻧﺮﻳﻤﺎﻥ ﺣﺒﻴﺘﻲ ﻭﻋﺸﺘﻲ ﺣﻴﺎﺗﺞ ﻭﻧﺴﻴﺘﻴﻨﻲ ... ﻟﻴﺶ ﺍﻧﻲ ﻣﺪﺍ ﺍﻛﺪﺭ ﺍﻋﻴﺶ ﺣﻴﺎﺗﻲ ﻭﺍﻧﺴﺎﺝ ﻟﻴﻴﻴﺶ .... ﺍﺗﺼﻠﻮ ﺑﻴﺔ ﻭﻛﺎﻟﻮ ﺷﻐﻠﺘﻚ ﺗﺤﺘﺎﺝ ﺍﺳﺒﻮﻉ ﻳﻼ ﺗﻜﻤﻞ ﻭﻧﺘﺂﻛﺪ ﺍﺧﺮﺕ ﺍﻟﺤﺠﺮ ﻣﺎﻟﺘﻲ ١٥ ﻳﻮﻡ ﺑﻌﺪ ... ﺿﻠﻴﺖ ﻃﻮﻝ ﻫﻠﻔﺘﺮﺓ ﻭﺍﻧﻲ ﻛﺎﻋﺪ ﺑﻠﺒﻴﺖ ﻣﻘﺒﻠﺖ ﺍﻃﻠﻊ ﺍﺧﺎﻑ ﺍﺷﻮﻓﻬﺎ .. ﺭﺣﺖ ﻟﺼﻮﻓﻴﺎ ﻟﻠﺒﻴﺖ .. ﻣﻘﺒﻠﺖ ﺍﺭﻭﺣﻠﻬﺎ ﻟﻠﻤﻌﻤﻞ ﻛﻠﺸﻲ ﻳﺬﻛﺮﻧﻲ ﺑﻴﻬﺎ ﺍﺭﻳﺪ ﻣﺎ ﺍﺷﻮﻓﺔ

... ﺟﻨﺖ ﻛﺎﻋﺪ ﻣﻦ ﺍﻟﻨﻮﻡ ﺿﺤﻮﻳﺔ ﺩﻙ ﺍﻟﺘﻠﻔﻮﻥ ... ﺍﻛﻴﺪ ﺍﻣﻲ ... ﺭﻓﻌﺖ ﺍﻟﺘﻠﻔﻮﻥ ... ﻭﻛﻠﺖ ﺍﻟﻮﻭﻭ ﺑﺲ ﺍﺟﺔ ﺑﺎﺫﻧﻲ ﺻﻮﺕ ﺍﻧﻔﺴﺎﻫﺎ .... ﻣﻌﻘﻮﻟﺔ ﻫﻲ .. ﺷﺬﻛﺮﻫﺎ ﺑﻴﺔ ﻭﺷﻌﺮﻓﻬﺎ ﺍﻧﻲ ﻫﻨﺎ ... ﺑﺲ ﺭﺩﺕ ﺍﺗﺎﻛﺪ ﻫﻲ ... ﺷﻜﺪ ﺷﺎﻳﻞ ﺑﻜﻠﺒﻲ ﻋﺘﺐ ... ﻭﺷﻜﺪ ﺍﻛﻮ ﺑﺼﺪﺭﻱ ﻣﺤﻨﺔ ﺑﺲ ﺧﻠﻴﺖ ﻛﺒﺮﻳﺎﺋﻲ ﻓﻮﻙ ﻛﻠﺸﻲ ... ﻣﻦ ﻛﺎﻟﺖ ﺍﻟﻮﻭﻭ ﺗﺄﻛﺪﺕ ﻫﻲ ... ﺣﺠﻴﺖ ﺑﺮﻭﺩ ﻭﺑﻜﺒﺮﻳﺎﺀ .... ﺳﺎﻟﺘﻨﻲ ﻋﻠﻰ ﺍﺣﻤﺪ ... ﺭﺍﻳﺪ ﻧﻮﺭ ... ﻣﺮﺩﺕ ﺍﺣﺠﻲ ﺑﺘﻠﻔﻮﻥ ﺭﺩﺕ ﺍﺷﻮﻓﻬﺎ ﺍﺗﺤﺠﺠﺖ ﻣﻮﺿﻮﻉ ﻣﻴﻨﺤﺠﻲ ﺑﺘﻠﻔﻮﻥ .... ﺍﻟﺘﻘﻴﺖ ﺑﻴﻬﺎ ﻭﺭﺓ ﺳﺎﻋﺔ .... ﺍﺗﻤﻨﻴﺖ ﺍﺧﺬﻫﺎ ﺑﻴﻦ ﺿﻠﻮﻋﻲ ﻭﺍﻛﻠﻠﻬﺎ ﺷﻜﺪ ﻣﺸﺘﺎﻛﻠﻬﺎ ... ﺑﺲ ﻛﻞ ﻣﺎ ﺍﺗﺬﻛﺮ ﺍﻧﺨﻄﺒﺖ ﻟﻐﻴﺮ ﻭﺍﺣﺪ ﺍﻧﺠﻦ .... ﺻﺢ ﻣﻦ ﻋﺮﻓﺖ ﺍﺳﺘﺸﻬﺪ ﺍﺭﺗﺎﺣﻴﺖ ﺑﺲ ﺍﻛﻮ ﺣﺮﻛﺔ ﺑﻜﻠﺒﻲ ﻣﻨﻬﺎ ... ﺟﺎﻭﻟﺖ ﺍﻏﻴﻀﻬﺎﻭﺍﻧﺮﻓﺰﻫﺎ ﻳﻤﻜﻦ ﻣﺸﺘﺎﻙ ﺍﺗﻨﺎﻛﺮ ﻭﻳﺎﻫﺎ ... ﺑﺲ ﺟﺎﻧﺖ ﺭﺩﺕ ﻓﻌﻠﻬﺎ ﻫﻲ ﺍﻟﺴﻜﻮﺕ ....

ﻣﺮﺕ ﺍﻻﻳﺎﻡ ﺑﺴﺮﻋﺔ ... ﻭﺭﺣﺖ ﻭﻳﺔ ﺍﺣﻤﺪ ﻟﺒﻴﺖ ﺧﺎﻟﺘﻲ ... ﺟﺎﻥ ﺗﺮﺣﻴﺒﻬﻢ ﻣﺜﻞ ﻣﺘﻮﻗﻌﺖ ﺭﺣﺒﻮ ﺑﻴﺔ ... ﻣﻦ ﺷﺎﻓﺘﻨﻲ .. ﺍﺗﺒﻠﻜﺖ .. ﻭﺿﻴﻌﺘﻨﻲ ... ﺳﻮﻟﻔﺖ ﻭﻳﺔ ﺍﻟﻜﻞ ﺑﺲ ﻛﻞ ﻓﻜﺮﻱ ﺟﺎﻥ ﻳﻤﻬﺎ ... ﻣﻜﺪﺭﺕ ﺍﻃﻠﻊ ... ﻣﺸﺘﺎﻛﻠﻬﺎ ﻭﺍﺭﻳﺪ ﺍﺷﺒﻊ ﻣﻨﻬﺎ ﺷﻮﻑ ... ﺑﻘﻴﺖ ﻭ ﺍﺗﻌﺸﻴﺖ ﺍﻣﻮﺩﻱ ﺍﻟﺴﺎﻋﺔ ﺗﻮﻛﻒ ﻭﻣﺎ ﺍﻃﻠﻊ ...... ﻣﻦ ﻳﻤﻬﻢ

ﻃﻠﻊ ﺍﻣﺠﺪ ﺑﺲ ﺣﺘﻰ ﺑﻬﺬﺍ ﺍﻟﺒﺮﻭﺩ ﻗﺎﺑﻠﺔ ... ﺍﻟﻤﻬﻢ ﻫﻮ ﻣﻮﺟﻮﺩ ﻭﺍﺳﻤﻊ ﺻﻮﺗﺔ ... ﺿﻠﻴﻨﺔ ﻧﺴﻮﻟﻒ ... ﻋﻠﻰ ﺍﺣﻤﺪ .. ﻭﻋﻠﻰ ﺻﻮﻓﻴﺎ .. ﻭﻋﻠﻰ ﺍﻣﺠﺪ ..

ﺍﻱ ﻧﻮﺭ ﺷﻨﻮ ﺍﻧﻄﺒﺎﻋﺞ ﻋﻦ ﺍﺣﻤﺪ ...

ﺣﺒﺎﺏ ﻭﺣﻠﻮ ... ﺑﺲ ﻣﺜﻞ ﻣﻜﺘﻠﺞ ﻧﺮﻳﻤﺎﻥ ﺍﺭﻳﺪ ﺍﺗﻌﺮﻑ ﻋﻠﻴﺔ ...

ﻣﺎﺷﻲ ﺣﺒﻴﺒﺘﻲ ﺗﺘﺪﻟﻴﻦ .. ﺑﺎﺟﺮ ﺍﻛﻮﻝ ﻟﺼﻮﻓﻴﺎ ...

ﺻﺎﺭ ﺳﻜﻮﺕ ... ﻭﺍﻧﻲ ﻋﻴﻨﻲ ﻋﻠﻰ ﺍﻟﺘﻠﻔﻮﻥ ﺍﺗﺨﻴﻞ ﺍﻣﺠﺪ ﺭﺍﺡ ﻳﺘﺼﻞ ﻻﻥ ﺳﻤﻌﺘﺔ ﻣﻦ ﻃﻠﺐ ﺍﻟﺮﻗﻢ ﻣﻦ ﺍﻟﻨﻮﺭ ...

ﻳﻼ ﺍﺗﺼﻞ ﺭﺍﺡ ﺍﻧﺘﻀﺮﻙ ... ﺍﻧﺘﻀﺮﺗﺔ ﺍﻟﻰ ﺍﻥ ﺍﺧﺬﺗﻨﻲ ﺍﻟﻨﻮﻣﺔ ﻭﻫﻮ ﻣﺪﻙ ... ﺧﺎﺏ ﺍﻣﻠﻲ .. ﻭﻫﺎﻫﻴﺔ ﺍﺗﺎﻛﺪﺕ ﺍﻧﻲ ﺍﻧﺘﻬﻴﺖ ﺑﺤﻴﺎﺓ ﺍﻣﺠﺪ .... ﺛﺎﻧﻲ ﻳﻮﻡ ﺭﺣﺖ ﻟﻠﺪﻭﺍﻡ ... ﺍﺗﻮﻗﻌﺘﺔ ﻣﻮﺟﻮﺩ ﻳﻢ ﺻﻮﻓﻴﺎ ﺭﺣﺖ ﻋﻠﻴﻬﺎ ... ﻭﺩﺧﻠﺖ ... ﻭﻫﻢ ﻣﻠﻜﻴﺘﺔ .....

ﺭﺣﺖ ﻟﻤﻜﺘﺒﻲ ﻣﺎﻋﻨﺪﻱ ﺣﺘﻰ ﻭﺍﻫﺲ ﺷﻐﻞ . ﺍﺟﺘﻲ ﻋﻠﻴﺔ ﻣﺪﺍﻡ ﺻﻮﻓﻴﺎ

ﻫﺎﺍ ﻧﺮﻳﻤﺎﻥ ﺷﻨﻮ ﺍﻧﻄﺒﺎﻉ ﻧﻮﺭ ﻋﻦ ﺍﺣﻤﺪ ..

ﻭﺍﻟﻠﻪ ﻣﺪﺍﻡ ﺍﺣﻨﻪ ﻛﻠﻨﺔ ﺍﺭﺗﺎﺣﻴﻨﺎﻟﺔ ... ﺍﻟﻠﻪ ﻳﺤﻔﻀﻠﺠﻴﺎ ... ﺑﺲ ﺍﻛﻮ ﺷﺮﻁ ﻋﺪ ﻧﻮﺭ ...

ﺷﻨﻮ ﺍﻟﺸﺮﻁ

ﺍﺗﺮﻳﺪ ﺗﺘﻌﺮﻑ ﻋﻠﻴﺔ ﺍﻭﻝ ﺷﻲ ﻳﻼ ﺍﺗﺼﻴﺮ ﺧﻄﺒﺔ ...

ﺍﻛﻮﻟﺔ ﻭﺍﺭﺩﻟﺞ ﺧﺒﺮ ﺑﺲ ﻫﻮ ﺍﻟﺒﺎﺭﺣﺔ ﺭﺟﻊ ﻃﺎﻳﺮ ﺑﻴﻬﺎ ﻳﻜﻮﻝ ﻣﺤﺎﻃﺔ ﺯﻭﺍﻛﺔ ﻭﺍﺗﺨﺒﻞ .... ﻋﻠﻰ ﻃﺒﻴﻌﺘﻬﺎ . ﻭﺧﺠﻮﻟﺔ ﻭﻣﺮﺑﺎﻳﺔ .. ﺍﻟﻠﻪ ﻳﻘﺪﻡ ﺍﻟﻲ ﺑﻲ ﺍﻟﺨﻴﺮ

ﺍﻥ ﺷﺎﺀ ﺍﻟﻠﻪ ..

ﻛﻤﻠﺖ ﺍﻟﻴﻮﻡ ﺑﺎﻟﻜﻮﺓ ... ﺭﺟﻌﺖ ﻟﻠﺒﻴﺖ ﺷﻔﺖ ﺧﻄﺎﺭ ﻳﻤﻨﺔ ... ﺩﺧﻠﺖ ﻛﺎﻟﺖ ﺍﻣﻲ ﻧﺎﺱ ﺟﺎﻳﻴﻦ ﻳﺸﻮﻓﻮﺝ

ﻟﻴﺶ ﻳﺸﻮﻓﻮﻧﻲ ﻳﻌﻨﻲ ...

ﻧﺮﻳﻤﺎﻥ ﻟﺘﺼﻴﺮﻥ ﻏﺒﻴﺔ ﻏﻴﺮ ﺩﻳﺨﻄﺒﻮﺝ ..

ﻫﺎﺍﺍﺍﺍ ﺩﻳﺨﻄﺒﻮﻧﻲ ﺍﻟﻲ ... ﺷﻠﻮﻥ ﻭﺍﻟﻤﻦ ... ﻭﻣﻨﻮ .. ﻭﻳﻦ ﺷﺎﻓﻮﻧﻲ ....

ﻧﺮﻳﻤﺎﻥ ﻳﻼ ﻏﺴﻠﻲ ﻭﺗﻌﺎﻟﻲ ﺳﻠﻤﻲ ...

ﻣﺎﺭﻳﺪ ﺍﻣﻲ ﻛﻮﻟﻴﻠﻬﻢ ﻣﺎﻋﺪﻧﺔ ﺑﻨﺎﺕ ﺣﻚ ﺯﻭﺍﺝ ...

ﻧﺮﻳﻤﺎﻥ ﻋﻴﺐ ﻣﻴﺼﻴﺮ ﻳﻼ ﺑﺴﺮﻋﺔ ﻣﺜﻞ ﻣﻜﺘﻠﺞ ﺑﺪﻭﻥ ﻧﻘﺎﺵ

ﺑﺲ ﺍﻣﻲ ...

ﻧﺮﻳﻤﺎﻥ ﺑﺴﺮﻋﺔ ....

ﻳﺎﻟﻠﻪ ﺷﻨﻮ ﻫﻠﻌﻴﺸﺔ ﻣﺎﺭﻳﺪ ﺍﺩﺧﻞ ... ﺍﺟﺘﻨﻲ ﻧﻮﺭ ...

ﻧﺮﻳﻤﺎﻥ ﻣﺮﺍﺡ ﺗﺨﺴﺮﻳﻦ ﺷﻲ ... ﺑﺲ ﺩﺧﻠﻲ ... ﺍﻭﻝ ﺗﺎﻟﻲ ﺍﻧﺘﻲ ﺭﺍﻓﻀﺔ .... ﺑﺲ ﺍﻟﻮﻟﺪ ﺷﺨﺼﻴﺔ ...

ﺍﻟﻮﻭﻭﻭﻟﺪ .... ﻟﻴﺶ ﺍﻟﻮﻟﺪ ﻭﻳﺎﻫﻢ ..... ﻳﺒﻮﻭﻭﻭ ...

٠ﺩﻳﻼ ﺣﺒﻲ ﺩﺧﻠﻲ ...

ﺩﺧﻠﺖ ﻭﺍﻧﻲ ﻣﻌﻜﺮﺓ ... ﺳﻠﻤﺖ ﺑﺮﻭﺩ ... ﻭﻛﻌﺪﺕ ... ﻭﻫﺬﺍ ﺑﺲ ﻳﺒﺎﻭﻉ ﻋﻠﻴﺔ ... ﺷﻨﻮ ﻫﻠﺠﺮﺃﺓ ... ﻛﺎﻋﺪ ﺍﺑﻴﺖ ﺍﻟﻨﺎﺱ ﻭﻳﺒﺎﻭﻉ ﻋﻠﻰ ﺑﻨﺎﺗﻬﻢ ... ﺷﻜﺪ ﺛﻮﻟﺔ ﻏﻴﺮ ﺟﺎﻱ ﻳﺨﻄﺒﺞ ...

ﺍﻭﻭﻑ ﻭﻳﻨﻚ ﺍﻣﺠﺪ ﺗﺠﻲ ﺍﺗﺸﻮﻑ ﺍﻟﺪﻧﻴﺎ ﻣﻮﺍﻛﻔﺔ ﻋﻠﻴﻚ ... ﻭﺍﻟﻒ ﻭﺍﺣﺪ ﻳﺘﻤﻨﺎﻧﻲ ﺑﺲ ﻫﻠﻜﻠﺐ ﺍﻻﻏﻢ ﻣﻴﺸﻮﻑ ﻏﻴﺮﻙ ﺿﻠﻴﺖ ﺳﺎﻛﺘﺔ ﻭﺍﺻﻼ ﻓﺎﺻﻠﺔ ﻣﻮ ﻳﻤﻲ ﺷﺪﻳﺤﺠﻮﻥ ﺟﻮﻋﺎﻧﺔ ﻭﻧﻌﺴﺎﻧﺔ ﻭ ﻛﺎﻋﺪﺓ ﻭﺍﻗﺮﺓ ﺳﻮﺭﺓ ﺍﻟﺰﻟﺰﻟﺔ ﺣﺘﻰ ﻳﻄﻠﻌﻮﻥ ... ﻛﺎﻣﻮ ﺍﺗﺮﺧﺼﻮ ﺍﻱ ﻭﺍﺧﻴﺮﺍ .... ﺭﺍﺣﻮ ... ﻭﻛﻌﺪﺕ ﺍﻛﻞ ﻭﺍﺟﺖ ﺍﻣﻲ ﻛﻌﺪﺕ ﻳﻤﻲ ...

ﺍﻱ ﻧﺮﻳﻤﺎﻥ ﻣﺴﺄﻟﺘﻴﻨﻲ ﻣﻨﻮ ﻫﺬﻭﻟﺔ ﺍﻟﻨﺎﺱ ...

ﻭﺷﻜﻮ ﺳﺎﺋﻠﺘﺞ ﻫﻮ ﻣﻮﺿﻮﻉ ﻭﻣﻨﺘﻬﻲ ... ﻗﺒﻞ ﻟﻴﺒﺪﻱ ...

ﻧﺮﻳﻤﺎﻥ ... ﺍﻟﻰ ﻣﺘﻰ ﻳﻌﻨﻲ ... ﺍﻣﺠﺪ ﺗﻌﺘﻘﺪﻳﻦ ﻣﻨﺔ ﺍﻣﻞ

ﻣﺎﻣﺎ ﺍﻟﻠﻪ ﻳﺨﻠﻴﺞ ﺳﺪﻱ ﺍﻟﻤﻮﺿﻮﻉ ﻟﺘﺸﻮﻓﻴﻨﻲ ﺍﺳﻮﻟﻒ ﻭﺍﺿﺤﻚ ﺑﺲ ﺗﺮﻯ ﺍﻟﻲ ﺑﻜﻠﺒﻲ ﺑﺲ ﺭﺑﺞ ﻳﻌﻠﻢ ﺑﻲ .. ﻻ ﺍﻣﺠﺪ ﻭﻻ ﻏﻴﺮﺓ ﺍﻧﻲ ﻭﻳﺎﺝ ﻭﺑﻌﺪ ﻳﺎﺳﻤﻴﻦ ﺻﻐﻴﺮﺓ .. ﺑﻌﺪﻳﻦ ﺍﻧﻲ ﺷﻜﻮﻝ ﺯﻭﺍﺝ ﻭﻣﺴﺆﻟﻴﺔ ... ﻋﻮﻓﻴﻨﻲ ﺍﺷﺒﻊ ﻣﻨﺞ ﺩﻻﻝ ...

ﻋﻠﻰ ﺭﺍﺣﺘﺞ ﺣﺒﻴﺒﺘﻲ ﺑﺲ ﻏﻴﺮ ﺍﺑﻮﺩﻱ ﺍﻓﺮﺡ ﺑﻴﺞ ﻭﺍﻃﻤﺌﻦ ﻋﻠﻴﺞ ﻗﺒﻞ ﻻ ﺍﻣﻮﺕ ...

ﺍﺳﻢ ﺍﻟﻠﻪ ﻋﻠﻴﺞ ... ﻣﻦ ﻋﻤﺮﻱ ﻋﻠﻰ ﻋﻤﺮﺝ ﺣﺒﻴﺒﺘﻲ ... ﺍﻧﻲ ﺭﺍﻳﺤﺔ ﺍﻧﺎﻡ ﻣﺘﺖ ﻧﻌﺎﺱ ﻭﻫﺬﻭﻟﺔ ﺍﻟﻨﺎﺱ ﺛﻘﻴﻠﻴﻦ ﺍﻟﺪﻡ .. ﺧﺮﺑﻮ ﻧﻮﻣﺘﻲ ...

ﻧﺮﻳﻤﺎﻥ ﺍﻟﻮﻟﺪ ﻣﻬﻨﺪﺱ .. ﻭﻋﺎﻳﺶ ﺑﺎﻟﺠﺎﺩﺭﻳﺔ ... ﻭﻋﺪﻫﻢ ﻣﺰﺍﺭﻉ .. ﻳﻌﻨﻲ ﻣﺘﺠﻲ ﻫﻴﺞ ﻣﻮﺍﺻﺎﻓﺎﺕ ﻳﻮﻣﻴﺔ ...

ﻣﺎﻣﺎﻱ .. ﺳﺪﻱ ﺍﻟﻤﻮﺿﻮﻉ ... ﻋﻮﺩ ﻛﻌﺪﻭﻧﻲ ﻋﻠﻰ ﺍﻟﻌﺸﺔ ..

ﻧﺮﻳﻤﺎﻥ ﻧﺮﻳﻤﺎﻥ ﻛﻌﺪﻱ ...

ﺍﻣﻤﻤﻢ ﻳﺎﺳﺔ ﺷﺘﺮﻳﺪﻳﻦ ... ﺻﺎﺭ ﺍﻟﻌﺸﺔ ....

ﻻ ﺑﺲ ﺍﻣﺠﺪ ﻭﺍﺣﻤﺪ ﺍﺟﻮﻱ ....

ﻓﺰﻳﺖ ﻣﻦ ﻣﻜﺎﻧﻲ ... ﺣﻠﻔﻲ ...

ﻭﺍﻟﻠﻪ ﺷﺒﻴﺞ ﻫﻴﺞ ﻛﻤﺘﻲ ...

ﻃﻠﻌﻲ ﻃﻠﻌﻲ ﺧﻞ ﺍﺑﺪﻝ ...

ﺷﺘﺒﺪﻟﻴﻦ ﺳﺎﻋﺔ ٧ ﻭﻧﺺ ﺑﻠﻴﻞ ...

ﻧﻮﺭ ﻭﻳﻦ

.. ﺧﺎﺗﻠﺔ ..

ﻳﻼ ﻃﻠﻌﻲ ... ﺧﻞ ﺍﺑﺪﻝ

ﻟﺒﺴﺖ ﺑﻨﻄﺮﻭﻥ .. ﻭﺑﻠﻮﺯﺓ ﺑﻴﻀﺔ ﻋﺮﻳﻀﺔ ... ﻋﺪﻟﺖ ﺷﻌﺮﻱ .. ﻭﺭﻓﻌﺘﺔ ﻓﻮﻭﻙ .. ﻭﻧﺰﻟﺖ ﺑﺲ ﻋﻴﻮﻧﻲ ﻣﺒﻴﻨﺔ ﻭﺣﺪﺓ ﻧﺎﻳﻤﺔ ﺻﺎﺭﻟﻬﺎ ﺍﺳﺒﻮﻉ ... ﻳﺎﺍﻟﻠﻪ ﻟﻴﺶ ﻫﻴﺞ ﻋﻴﻮﻧﻲ ﻣﻨﻔﻮﺧﺔ .. ﻧﺰﻟﺖ ﺍﺩﻭﺭ ﻋﻠﻰ ﻧﻮﺭ ﻛﺎﻋﺪﺓ ﺑﻐﺮﻓﺔ ﺍﻣﻲ ﻭﻣﻄﻔﻴﺔ ﺍﻟﻀﻮﺓ ...

ﻧﻮﺭ ﺷﺒﻴﺞ ...

ﻧﺮﻳﻤﺎﻥ ﻫﺬﺍ ﻟﻴﺶ ﺟﺎﻱ ﺍﺳﺘﺤﻲ ﺍﻃﻠﻊ ﻣﺎﺍﺍﺭﻳﺪ ...

ﻛﻮﻣﻲ ﺑﻼ ﺧﺒﺎﻝ ﻋﻴﺐ ﻭﻫﺎﻱ ﻋﻮﺩ ﺍﻛﻮﻝ ﻋﻠﻴﺞ ﺟﺒﻴﺮﺓ ﻳﻼ ﻋﻠﻰ ﺍﻟﺴﺮﻳﻊ ﺑﺪﻟﻲ ﺷﻲ ﺑﺴﻴﻂ ﻭﺗﻌﺎﻟﻲ ﻳﻼ ﺳﺮﻳﻊ ... ﻫﺎﺍ ﻓﻜﻲ ﻫﺎﻱ ﺍﻟﻀﻔﻴﺮﺓ ... ﻃﺎﻟﻌﺔ ﺍﺻﻐﺮ ﻣﻦ ﻳﺎﺳﻤﻴﻦ ..

ﻳﺎﺳﻤﻴﻦ ﺧﺪﺭﻱ ﺟﺎﻱ ﺣﺘﻰ ﻧﻮﺭ ﺍﺗﺠﻴﺒﺔ ... ﻳﻼ ﺑﺴﺮﻋﺔ ﺍﺛﻨﻴﻨﺠﻦ

ﺍﺧﺬﺕ ﻧﻔﺲ ﻭﺍﺑﺘﺴﻤﺖ .. ﻭﺩﺧﻠﺖ ...

ﻣﺮﺣﺒﺎﺍﺍ ﺩﻛﺘﻮﺭ ﺍﺣﻤﺪ ... ﺷﻨﻮ ﻫﻠﻤﻔﺎﺟﺌﺔ ﺍﻟﺤﻠﻮﺓ ... ﻣﺪﺍﻡ ﺻﻮﻓﻴﺎ ﻟﻴﺶ ﻣﺸﺮﻓﺘﻨﺎ ﻭﻳﺎﻙ ... ﺍﻟﺘﻔﺘﺖ ﻋﻠﻰ ﺍﻣﺠﺪ ﻣﺮﺣﺒﺎ .. ﺭﺩ ﺑﻬﻼ ... ﻋﺸﺘﻮ ﻳﺜﻜﻴﻞ .. ﻛﻠﺖ ﺑﻜﻠﺒﻲ ..

ﺧﺎﻟﺘﻲ ﺍﻧﺴﺔ ﻧﺮﻳﻤﺎﻥ ﺍﻧﻲ ﺟﺎﻱ ﺍﺣﺠﻲ ﻭﻳﺔ ﻧﻮﺭ .. ﻣﻦ ﻛﺎﻟﺘﻠﻲ ﺍﻣﻲ ﺷﺮﻃﻬﺎ ﺍﺟﻴﺖ ﺭﻛﺾ ... ﻟﻬﻨﺎ ﺍﺭﻳﺪ ﺍﻗﻨﻌﻬﺎﻭﻣﺎ ﺍﻃﻠﻊ ﺍﻟﺔ ﺍﻗﻨﻌﻬﺎ ......

ﺣﺠﺔ ﺍﻣﺠﺪ .. ﻛﺘﻠﻚ ﻣﻴﻘﺘﻨﻌﻦ . ﺑﺲ ﺍﻧﺖ ﻗﻔﻠﺖ ...

ﺣﺮﻙ ﺩﻣﻲ ﻛﻼﻣﺔ ... ﺭﺩﺕ ﺍﻏﺜﺔ ..

ﺍﻟﻴﻮﻡ ﺍﻟﺨﻄﺎﺑﺔ ﻻﺯﻣﻴﻦ ﺳﺮﺓ ... ﻗﺒﻞ ﺷﻮﻳﺔ ﻃﻠﻌﻮ ﺧﻄﺎﺑﺔ ﻣﻦ ﻳﻤﻨﺔ .... ﻳﺎﺭﻳﺖ ﻟﻮ ﻣﺘﺎﺧﺮﻳﻦ ﺷﻮﻳﺔ ﺟﺎﻥ ﺍﺗﻌﺮﻓﺖ ﻋﻠﻴﺔ ﺷﻠﻮﻥ ﺷﺎﺏ ﺍﻟﻠﻪ ﻳﺤﻔﻀﺔ ﻣﺮﺗﺐ ﻭﻣﻬﻨﺪﺱ ...

ﻓﺰ ﺍﺣﻤﺪ ﺍﻟﺨﻄﺎﺑﺔ ﻋﻠﻰ ﻧﻮﺭ ؟؟؟؟؟

ﺿﺤﻜﺖ ﺍﻣﻲ ... ﻻ ﻋﻠﻰ ﻧﺮﻳﻤﺎﻥ ...

ﻋﺪﻝ ﻛﻌﺪﺗﺔ ﺍﻣﺠﺪ .. ﺍﻟﺘﻔﺘﺖ ﻋﻠﻴﺔ ﻭﺍﺑﺘﺴﻤﺖ ..

ﺍﻱ ﺍﻧﺴﺔ ﻧﺮﻳﻤﺎﻥ ﻭﻳﻨﻬﺎ .. ﻧﻮﺭ ...

ﺧﺎﺗﻠﺔ ....

ﺷﻨﻮ ...

ﺍﺍﺍ ﻟﻠﻼ ﺍﻗﺼﺪ ﺩﺗﺤﻀﺮ ﺟﺎﻱ ...

ﺭﺣﺖ ﺍﺷﻮﻓﻬﺎ ﻭﻳﻦ ﻧﺎﻣﺖ ... ﻭﻳﻨﺞ ﻳﻼ ﺗﻌﺎﻟﻲ ... ﻋﺪﻟﺘﻬﺎ ﻭﺍﻧﻄﻴﺘﻬﺎ ﺻﻴﻨﻴﺔ ﺍﻟﺠﺎﻱ ﻏﺼﺐ ... ﻭﺩﺧﻠﺖ ﻭﺩﺧﻠﺖ ﻭﺭﺍﻳﺔ

ﻓﺎﺗﺖ ﻧﻮﺭ ﻭﻳﺎﺩﻭﺏ ﻳﻄﻠﻊ ﺣﺴﻬﺎ ... ﺑﺼﻮﺕ ﺧﺎﻓﺖ ﻛﺎﻟﺖ ﻣﺮﺣﺒﺎ ﺭﺩﻭ ﺍﻟﻤﺮﺣﺒﺎ ... ﻭﺻﺎﺣﻬﺎ ﺍﻣﺠﺪ ﻛﻠﻠﻬﺎ ﺗﻌﺎﻟﻲ ﻧﻮﺭ ﻛﻌﺪﻱ ﺑﺼﻔﻲ .....😒 ﺷﻨﻮ ﻫﻼﺣﺴﺎﺱ ﻣﻴﻦ ﻃﻠﻌﻠﻚ ..

ﺭﺍﺣﺖ ﻛﻌﺪﺕ ﺑﺼﻔﺔ ... ﻛﻠﺔ ﺍﻱ ﺍﺣﻤﺪ ﺗﻜﺪﺭ ﺗﺤﺠﻲ ...

ﺿﺤﻚ ﺍﺣﻤﺪ ﻛﻠﺔ ﺑﻌﺪ ﻛﻌﺪﺗﻬﺎ ﺑﺼﻔﻚ ﺷﺤﺠﻲ .. ﺍﺟﻴﺒﻚ ﻣﻦ ﻃﺮﻓﻲ ﺑﺲ ﺗﺪﺧﻞ ﻫﺬﺍ ﺍﻟﺒﻴﺖ ﺗﺼﻴﺮ ﺑﺼﻔﻬﻢ ...

ﺍﻱ ﻏﻴﺮ ﻋﺮﺿﻲ ... ﻫﻲ ﺍﻫﻢ ﻣﻨﻚ 😁

ﻫﺰﺗﻨﻲ ﻫﺎﻱ ﺍﻟﺤﺠﺎﻳﺔ ﺩﻣﻌﺖ ﻋﻴﻨﻲ ... ﺷﻜﺪ ﻣﻬﻢ ﺭﺟﺎﻝ ﺑﻠﺒﻴﺖ ...

ﻭﺟﻪ ﺍﺣﻤﺪ ﺍﻟﻜﻼﻡ ﻟﻨﻮﺭ ... ﻧﻮﺭ ﺳﻤﻌﺖ ﺍﻧﺘﻲ ﻣﺘﺮﺩﻳﻦ ﺧﻄﺒﺔ ﻭﻻ ﺍﻱ ﺷﻲ ﺭﺳﻤﻲ ﺍﻟﻰ ﺍﻥ ﺗﻌﺮﻓﻴﻨﻲ .. ﺯﻳﻦ ..

ﻧﻮﺭ ﻣﺪﻧﺠﺔ ﻭﺗﺤﺠﻲ ﺍﻱ ﻧﻌﻢ ... ﻫﺬﺍ ﺷﺮﻃﻲ ..

ﺯﻳﻦ ﺍﻧﻲ ﺍﺷﻠﻮﻥ ﺍﻛﺪﺭ ﺍﻋﺮﻓﺞ ﻋﻠﻰ ﻧﻔﺴﻲ ﻣﻦ ﻏﻴﺮ ﺷﻲ ﺭﺳﻤﻲ .. ﻳﻌﻨﻲ ﻣﺮﺍﺡ ﺍﻛﺪﺭ ﺍﻃﻠﻊ ﻭﺍﻃﺐ ﻭﻳﺎﺝ ... ﺍﺫﺍ ﻣﻮ ﺧﻄﻮﺑﺔ ﺭﺳﻤﻴﺔ ...

ﺟﺎﻭﺑﺔ ﺍﻣﺠﺪ ... ﺍﻛﻴﺪ ﻣﺘﻜﺪﺭ ﺗﻄﻠﻊ ﻭﺗﺪﺧﻞ ﻭﻳﺎﻫﺎ ... ﺣﺘﻰ ﻭﺍﻥ ﺧﻄﺒﺖ ...

ﺍﻣﺠﺪ ... ﻣﻮ ﺭﺩﺗﻚ ﻋﻮﻥ ﻃﻠﻌﺘﻠﻲ ﻓﺮﻋﻮﻥ ... ﻳﺎﺧﻲ ﺷﺒﻴﻚ .. ﺑﺲ ﺗﺮﻳﺪ ﺗﻔﺮﻛﺸﻬﺎ ﻧﻮﺭ ﻋﻔﻴﺔ ﻣﻌﻠﻴﺞ ﻣﻨﺔ ﻣﺎﺩﺭﻱ ﺷﺒﻲ ﻭﻳﺎﻳﺔ ﺍﻟﻴﻮﻡ ... ﻭﺍﻓﻘﻲ ﻋﻠﻰ ﺍﻟﺨﻄﺒﺔ ﻭﻧﻘﺮﺓ ﻓﺎﺗﺤﺔ .. ﺣﺘﻰ ﺍﻛﺪﺭ ﺍﺟﻲ ﻋﻠﻴﻜﻢ .. ﺑﺼﻔﺘﻲ ﺧﻄﻴﺒﺞ ... ﻭﺧﻼﻝ ﺍﻟﺨﻄﺒﺔ ﺭﺍﺡ ﺗﺘﻌﺮﻓﻴﻦ ﻋﻠﻴﺔ ... ﻭﺍﺍﺫﺍ ﻣﺘﻔﺎﻫﻤﻨﺔ ﺗﻜﺪﺭﻳﻦ ﺗﻨﻬﻴﻦ ﻛﻠﺸﻲ ...

ﻭﺍﻟﻠﻪ ﻣﺎﻋﺮﻑ ﻣﺎ ﺍﺭﺩﻟﻚ ﺟﻮﺍﺏ ﻫﺴﺔ ... ﺑﺎﺟﺮ ﻧﺮﻳﻤﺎﻥ ﺗﺮﺩﻟﻜﻢ ﺍﻟﺨﺒﺮ ...

ﻳﺎﻟﻠﻪ ﺍﻧﺸﺎﺀ ﺍﻟﻠﻪ ﺍﻣﺮﻧﺔ ﻛﻠﺔ ﺑﻴﺪﺝ ﻧﺮﻳﻤﺎﻥ ﻗﻨﻌﻴﻬﺎ ...

....

ﺍﻧﺸﺎﺀ ﺍﻟﻠﻪ ﺍﺣﺠﻲ ﻭﻳﺎﻫﺎ ... ﻭﻳﺼﻴﺮ ﺧﻴﺮ ...

ﺍﻱ ﻳﺎﺟﻤﺎﻋﺔ ﺍﺣﻨﺔ ﻧﺴﺘﺄﺫﻥ ..... ﺍﻣﺠﺪ ﺑﺎﺟﺮ ﻭﺭﺍﻙ ﺳﻔﺮ ﻫﻢ ﻳﺎﻟﻠﻪ ....

ﺍﻧﺼﺪﻣﺖ ... ﺑﺎﺟﺮ ﻳﺴﺎﻓﺮ ... ﻭﻫﻢ ﺑﻌﺪ ﻣﺎ ﺍﺷﻮﻓﺔ ... ﻫﻢ ﺭﺍﺡ ﻳﺮﺟﻊ ﻣﺠﺮﺩ ﺫﻛﺮﻳﺎﺕ ... ﺍﻧﻘﺒﺾ ﻛﻠﺒﻲ ﻭﻛﺎﻧﻪ ﻭﻛﻔﺖ ﺍﻟﺪﻧﻴﺎ ...

ﻃﻠﻌﻮ ﻭﻃﻠﻌﺖ ﻭﺭﺍﻫﻢ ... ﺟﺎﻥ ﺍﺣﻤﺪ ﻳﻤﺸﻲ ﻗﺒﻠﻨﺔ ... ﻃﻠﻊ ﻣﻦ ﺍﻟﺒﺎﺏ ... ﻭﺍﻣﺠﺪ ﻭﺭﺍ ﺍﻟﺘﻔﺖ ﻋﻠﻴﺔ ... ﻭﻋﻘﺪ ﺣﺎﺟﺒﺔ ...

ﺍﻳﻲ ﻧﺮﻳﻤﺎﻥ ﺍﻟﺨﻄﻴﺐ ﻋﺎﺟﺒﺞ ... ﺍﺿﺎﻫﺮ ..

ﻭﺍﻟﻠﻪ ﻣﻴﺘﻌﻴﺐ .. ﺑﺲ ﺍﻓﻜﺮ ..

ﻧﺼﻴﺤﺔ ﻭﺍﻓﻘﻲ ... ﺣﺘﻰ ﺍﺫﺍ ﻫﺬﻳﺞ ﺍﻟﻤﺮﺓ ﻣﻘﺘﻠﺘﺞ .. ﻫﻠﻤﺮﺓ ﺍﻛﻄﻌﺞ ...

ﻟﻴﺶ ﻋﻴﻨﻲ .. ﻧﺎﻫﻲ ﻋﻠﻴﺔ ﻭﻣﺎ ﺍﺩﺭﻱ 😏...

ﺗﺤﻠﻤﻴﻦ ﺍﻧﻬﻲ ﻋﻠﻴﺞ ... ﻻ ﺍﺧﺬﺝ ﻭﻻ ﺍﺧﻠﻲ ﺍﺣﺪ ﻳﺎﺧﺬﺝ ...

ﻻ ﻭﺍﻟﻠﻪ 😏.... ﺍﻧﺖ ﻣﺴﺎﻓﺮ ﺑﺎﺟﺮ .. ﻭﻣﺘﻌﺮﻑ ﺍﺧﺒﺎﺭﻱ ﺑﻌﺪ ..

ﻧﺮﻳﻤﺎﻥ ... ﺿﻮﻛﻲ ﺷﻮﻳﺔ ﻣﻦ ﻋﺬﺍﺑﻲ ... ﺍﺷﺮﺑﻲ ﻣﻦ ﺍﻟﻜﺎﺱ ﺍﻟﻲ ﺳﻘﻴﺘﻴﻨﻲ ﻣﻨﺔ ...

ﺍﻣﺠﺪ ﺻﺪﻙ ﺭﺍﺡ ﺍﺗﺴﺎﻓﺮ .. ؟؟ﺑﺪﻭﻥ ﺭﺟﻌﺔ ﻫﻠﻤﺮﺓ

ﺍﻳﻲ ... ﺍﺗﻤﻨﻰ ﻣﻴﺼﻴﺮ ﺷﻲ ﻳﺨﻠﻴﻨﻲ ﺍﺭﺟﻊ .... ﻳﻼ ﺩﺧﻠﻲ ﻭﺳﺪﻱ ﺍﻟﺒﺎﺏ ... ﻫﻬﻬﻪ ﻭﻣﺎ ﺍﻭﺻﻴﺞ ﺍﻧﺨﻄﺒﻲ ..

ﺭﺍﺡ ﺭﻛﺐ ﺑﺴﻴﺎﺭﺓ ... ﻭﻋﺎﻓﻨﻲ ﻭﺣﺪﻱ .. ﻣﺸﺖ ﺍﻟﺴﻴﺎﺭﺓ .. ﻭﻣﺸﺔ ﻛﻠﺒﻲ ﻭﻳﺎﻫﺎ ... ﻛﻞ ﺗﻔﻜﻴﺮﻱ .. ﺍﻧﻮ ﺍﻧﻲ ﻛﺴﺮﺕ ﺍﺣﻠﻰ ﺷﻲ ﺟﺎﻥ ﺑﻴﻨﺎﺗﻨﺔ ... ﻭﻣﺪﺍ ﺍﻛﺪﺭ ﺍﺻﻠﺤﺔ ... ﺿﻠﻴﺖ ﻭﺍﻛﻔﺔ ﺑﺎﻟﺒﺎﺏ ﺍﻧﺘﻀﺮﺗﺔ ﻳﻨﺰﻝ ﻭﻳﺮﺟﻊ ﻭﻳﻜﻠﻲ ﻛﻠﻤﺔ ﻭﺣﺪﺓ ﺗﺨﻠﻲ ﻛﻠﺒﻲ ﻳﺰﻫﺮ ﻣﻦ ﺟﺪﻳﺪ ... ﺑﺲ ﻣﺎ ﺍﺟﺔ ﻣﻨﺔ ﺍﻱ ﻣﻮﻗﻒ ﻳﺨﻠﻴﻲ ﺍﻻﻣﻞ ﻳﺮﺟﻊ ﺑﺪﺍﺧﻠﻲ .... ﺭﺍﺡ ﺗﺮﺟﻊ ﻣﻦ ﺟﺪﻳﺪ ﺍﻟﻴﺎﻟﻲ ﺍﻟﺤﺰﻳﻨﺔ ﺑﻔﺮﺍﻛﻚ ... ﺭﺣﺖ ﺍﺗﻮﺟﻬﺖ ﻟﻠﻤﺮﺟﻮﺣﺔ .. ﻏﻤﻀﺖ ﻋﻴﻮﻧﻲ ﻭﺗﺠﻴﺖ ﺭﺍﺳﻲ ﻋﻠﻰ ﺍﻟﻤﺮﺟﻮﺣﺔ ... ﻭﺑﺪﺕ ﺍﻟﺪﻣﻮﻉ ﺗﻨﺰﻝ ... ﺷﻨﻮ ﺍﻟﻲ ﺳﻮﻳﺘﺔ ﻳﺎﺭﺑﻲ ... ﺣﺘﻰ ﺣﻴﺎﺗﻲ ﺑﺪﺕ ﺑﻌﺬﺍﺏ ﻭﻟﺴﺎﻋﻨﻲ ﺑﻌﺬﺍﺏ ﺑﻜﻠﺸﻲ ﺣﻠﻮ ﻣﺎﻟﻲ ﻧﺼﻴﺐ ... ﻣﺴﺘﺤﻴﻞ ﺍﻛﺪﺭ ﺍﻧﺴﻰ ﺍﻭ ﺍﻛﻤﻞ ﺣﻴﺎﺗﻲ ﺑﺪﻭﻧﺔ ....

ﺻﺎﺭ ﺛﺎﻧﻲ ﻳﻮﻡ ﻭﺭﺣﺖ ﺍﻟﻌﺼﺮ .. ﻭﺍﺷﺘﺮﻳﺖ ﺗﻠﻔﺰﻳﻮﻥ .. ﻭﻧﺼﺒﻨﺎ ... ﺟﻨﺔ ﻣﺘﺸﻮﻗﻴﻦ ... ﻧﺘﻔﺮﺝ ﺍﻟﺒﺮﺍﻣﺞ ﺍﻟﻲ ﺑﻲ ... ﺷﻐﻠﻨﺎ ﻭﺍﻧﺘﻀﺮﻧﺎ ﻳﻔﺘﺢ ﺻﺎﺭﺕ ﺏ ٦ ﻭﺍﻧﻔﺘﺢ ... ﻭﻃﻠﻊ ﺑﺮﻧﺎﻣﺞ ﺍﻟﻌﻠﻢ ﻟﻠﺠﻤﻴﻊ ... ﺟﻨﺔ ﻛﺎﻋﺪﻳﻦ ﻧﺘﻔﺮﺟﺔ ﺑﺘﻤﻌﻦ ﻭﺑﺎﺳﺘﻤﺘﺎﻉ ...

ﺍﻫﻮﻭﻭ ﺷﻨﻮ ﻟﻌﺪ ﺍﺷﻮﻛﺖ ﺗﺒﺪﻱ ﺍﻓﻼﻡ ﺳﻌﺎﺩ ﺣﺴﻨﻲ ... ﻭﻋﺒﺪ ﺍﻟﺤﻠﻴﻢ ﺣﺎﻓﻆ ...

ﺷﺒﻴﺞ ﻧﻮﺭ .. ﻫﺎﻱ ﺍﻻﻓﻼﻡ ﺑﺲ ﺍﻟﺨﻤﻴﺲ ..

ﺑﻌﺪ ﻳﻮﻣﻴﻦ ﻟﻠﺨﻤﻴﺲ .. ﻭﻭﻭﻑ ﺷﻴﺼﺒﺮﻧﻲ

ﻭﺍﻧﺘﻲ ﻟﻴﺶ ﻛﺎﺗﻠﺔ ﻧﻔﺴﺞ ﻋﻠﻰ ﺳﻌﺎﺩ ﺣﺴﻨﻲ .. ﻭﻋﺒﺪ ﺍﻟﺤﻠﻴﻢ .. ﻫﺎﺍﺍﺍ

ﺷﺒﻴﺞ ﻣﺎﻣﺎ ... ﺑﺤﻴﺎﺗﻨﺔ ﻻ ﺭﺣﻨﺔ ﺳﻴﻨﻤﺎ ﻻ ﻣﺴﺮﺣﻴﺔ ... ﻻ ﺟﺒﺘﻮﻟﻨﺔ ﺗﻠﻔﺰﻳﻮﻥ .. ﻫﺎﻱ ﻛﻀﻴﻨﻨﺎ ﻋﻠﻰ ﻫﻠﺮﺍﺩﻳﻮ ... ﻭﻧﺴﻤﻊ ﺑﻼ ﻣﻨﺸﻮﻑ ﻭﺟﻮﻩ ...

ﺻﺪﻙ ﻓﺪﻳﻮﻡ ﺍﺧﺬﻛﻢ ﺳﻴﻨﻤﺎ ﻭﻧﻌﺰﻡ ﺍﺣﻤﺪ

ﺻﺪﻙ ﻧﺮﻳﻤﺎﻥ ﻭﻳﺠﻲ ﺍﺣﻤﺪ ..

ﺷﺒﻴﺞ ﻛﻴﻔﺘﻲ .. ﻭﺣﻠﻜﺞ ﻫﻠﻜﺒﺮﺓ ﺻﺎﺭ ...

ﻣﺎﻣﺎ ﻏﻴﺮ ﺭﺍﺡ ﻳﺼﻴﺮ ﺧﻄﻴﺒﻬﺎ ...

ﺍﻧﻲ ﻣﺘﻌﺠﺒﻨﻲ ﺳﻮﺍﻟﻒ ﺍﻟﺨﻔﻴﺔ ﻫﺎﻱ ...

ﻳﻤﻌﻮﺩﺓ ﻫﺴﺔ ﺍﺫﺍ ﺭﻓﻀﺖ ﺗﻘﺘﻠﻴﻬﺎ ... ﻫﻬﻬﻬﻬﻬﻬﻬﻬﻪ

ﺻﺪﻙ ﻧﻮﺭ ﺷﻨﻮ ﺭﺍﻳﺞ ﺑﻜﻼﻡ ﺍﺣﻤﺪ ...

ﻣﻮﺍﻓﻘﺔ ... ﺑﺲ ﻣﺎ ﺍﺭﻳﺪ ﻋﻘﺪ ...

ﻣﻴﺨﺎﻟﻒ ....

ﺻﺎﺭ ﺍﻟﻌﺸﺔ ﻭﺍﺗﻌﺸﻴﻨﺔ ﻭﻛﻤﻠﺖ ﺷﻜﻢ ﻗﻄﻌﺔ ﺧﻴﺎﻁ .. ﻭﻛﻞ ﻭﺍﺣﺪ ﺭﺍﺡ ﻟﻔﺮﺍﺷﺔ ...

ﺍﻭﻝ ﻣﺤﻄﻴﺖ ﺭﺍﺳﻲ ﻋﻠﻰ ﺍﻟﻤﺨﺪﺓ ﻧﺰﻟﺖ ﺩﻣﻌﺘﻲ ﻭﺍﻧﻲ ﻣﺎ ﺍﺭﻳﺪ ﺍﺳﺘﻮﻋﺐ ﺳﻔﺮﺓ ﻣﺮﺓ ﺛﺎﻧﻴﺔ ... ﻳﺎﺭﺑﻲ ﺳﺎﻋﺪﻧﻲ ﻭﻧﺴﻴﻨﻴﺎ ... ﻳﺎﺭﺏ ﻣﺎ ﺍﻗﻮﺓ ﻋﻠﻰ ﻭﺟﻊ ﺍﻟﻘﻠﺐ .. ﻏﻔﻴﺖ ﻭﺩﻣﻌﺘﻲ ﻋﻠﻰ ﺧﺪﻱ .. ﺻﺎﺭ ﺍﻟﺼﺒﺢ ﺍﺗﺮﻳﻜﻨﺎ ﻭﻃﻠﻌﺖ ﻗﺒﻞ ﺍﻟﺒﻨﺎﺕ ....

ﻧﻮﺭ ....

ﺣﺎﻃﺔ ﺭﺍﺳﻲ ﻋﻠﻰ ﺍﻟﻤﺨﺪﺓ ... ﻳﻌﻨﻲ ﻫﺴﺔ ﺍﻧﻲ ﺍﺭﻳﺪ ﺍﺷﻮﻑ ﻋﺒﺪ ﺍﻟﺤﻠﻴﻢ ﺍﺷﻠﻮﻥ ﻳﺤﺐ ﺳﻌﺎﺩ ﺣﺴﻨﻲ ﻻﺯﻡ ﺍﻧﺘﻀﺮ ﻟﻠﺨﻤﻴﺲ ... ﻣﻌﻘﻮﻟﺔ ﺍﺣﻤﺪ ﻳﻄﻠﻊ ﺣﺒﺎﺏ ... ﻭﻳﻌﻮﺿﻨﻲ ﻋﻦ ﺧﺴﺎﺭﺓ ﺍﻻﺏ ﻭﺍﻻﺥ ... ﻭﻳﻌﻮﺿﻨﺎ ﻋﻦ ﻧﻘﺺ ﺍﻟﺮﺟﺎﻝ ﺍﻟﻲ ﺑﺤﻴﺎﺗﻨﺔ ... ﻣﻦ ﺗﻮﻓﺔ ﺍﺑﻮﻳﺔ ﻭﺍﻧﻲ ﺍﺣﺲ ﻧﻔﺴﻲ ﻋﺎﻟﺔ ﻋﻠﻰ ﻧﺮﻳﻤﺎﻥ .... ﺻﺎﺭﺕ ﻫﻲ ﺍﻟﻤﺴﺆﻟﺔ ﻋﻦ ﻛﻠﺸﻲ ... ﺗﺘﺤﻤﻞ ﻓﻮﻙ ﻃﺎﻗﺘﻬﺎ ﺍﻟﺤﻴﺎﺓ ﺑﺪﻭﻥ ﺍﺏ ﺫﻟﺔ ... ﺻﺮﺕ ﻣﻦ ﺍﻣﺸﻲ ﺑﺸﺎﺭﻉ ﺍﻣﺸﻲ ﺳﺮﻳﻴﻊ ﻭﻣﺪﻧﺠﺔ ﺍﺧﺎﻑ ﺍﺣﺪ ﻳﻘﺮﺓ ﺑﻮﺟﻬﻲ ﺍﻟﻴﺘﻢ ﻭﻳﺴﺘﻐﻠﻨﻲ ﻻﻥ ﺍﺣﻨﺔ ﺣﻠﻮﺍﺕ .. ﻭﻧﺠﺬﺏ ﺍﻟﻨﻀﺮ .. .. ﻣﺮﺕ ﻋﻠﻴﺔ ﺍﻳﺎﻡ ﺳﻮﺩﺓ ﻭﻫﻤﻮﻡ ﻭﺧﻮﻑ ﻣﻦ ﺍﻟﻤﺴﺘﻘﺒﻞ ﺍﻟﻤﺠﻬﻮﻝ ﺻﺢ ﺟﺎﻥ ﻋﻤﺮﻱ ١٦ ﺳﻨﺔ ﻣﻦ ﺍﺗﻮﻓﺔ ﺍﺑﻮﻳﺔ ﺑﺲ ﻣﻮﺻﻐﻴﺮﺓ ﺍﻛﺪﺭ ﺍﻓﻬﻢ ﻛﻞ ﺍﻟﻲ ﺭﺍﺡ ﻧﺘﻌﺮﺿﻠﺔ .. ﻭﺍﻭﻝ ﻣﻮﻗﻒ ﺍﺗﻌﺮﺿﻨﺎﻟﺔ ﻫﻮ ﺧﺬﻻﻥ ﺧﺎﻟﺪ ﺍﻟﻨﺔ . ﺑﺤﻴﺚ ﻣﻦ ﺍﺟﺔ ﺧﻄﺒﻨﻲ ﺍﺣﻤﺪ ... ﺍﻧﻲ ﻣﻤﻔﻜﺮﺓ ﺑﻬﻞ ﻣﻮﺿﻮﻉ ﺍﺑﺪ ... ﻛﻞ ﻫﻤﻲ ﺗﻤﺸﻲ ﺍﻻﻳﺎﻡ ﺍﺭﻳﺪ ﺍﻛﻤﻞ ﺩﺭﺍﺳﺔ ﻭﺍﻋﻴﻦ ﻧﺮﻳﻤﺎﻥ ﻭﺍﺧﻠﻲ ﺑﺎﻟﻲ ﻣﻦ ﺍﻣﻲ ... ﺷﻔﺖ ﺍﻣﻲ ﻣﺘﺤﻤﺴﺔ ﻟﺨﻄﺒﺘﻲ .. ﺣﻘﻬﺎ .. ﺷﺎﻳﻠﺔ ﻫﻤﻨﺎ .. ﻭﺷﻔﺖ ﺍﺣﻤﺪ ﻓﺮﺻﺔ ﻻ ﺗﻌﻮﺽ ... ﻗﺮﺭﺕ ﺍﻭﺍﻓﻖ .. ﺑﺲ ﺟﺎﻧﺖ ﻋﻨﺪﻱ ﺧﻮﻓﺔ .. ﺍﺧﺎﻑ ﺍﺗﻮﺭﻁ ... ﻫﻮ ﺷﺎﺏ ﻣﺮﺗﺐ ﻭﻣﻴﺘﻌﻴﺐ ... ﻭﺩﻛﺘﻮﺭ .. ﻫﺬﺍ ﺍﻫﻢ ﺷﻲ ﺑﻮﻛﺘﻨﺎ ...

ﺍﻟﺘﻘﻴﺖ ﺑﻲ .. ﻳﻤﺔ ﻭﻧﻀﺮﺍﺗﺔ ﺗﺨﺠﻞ ﻣﺎ ﺍﻛﺪﺭ ﺍﺣﻂ ﻋﻴﻨﻲ ﺑﻌﻴﻨﺔ ﻧﻀﺮﺍﺗﺔ ﺛﺎﺑﺘﺔ ﻋﻠﻴﺔ ﻭﺣﺘﻰ ﻣﻴﺮﻣﺶ ... ﺑﻮﺟﻮﺩ ﺍﻣﺠﺪ .. ﻫﻮﺍﻳﺔ ﺍﺭﺗﺎﺣﻴﺖ .. ﺍﺣﺴﺔ ﺷﺨﺺ ﺧﻮﻭﺵ .. ﻭﻧﻜﺪﺭ ﻧﻌﺘﻤﺪ ﻋﻠﻴﺔ .. ﺣﺘﻰ ﻏﻴﺮ ﻋﻦ ﻓﺮﻗﺎﻥ ﺷﻜﺪ ﺟﺎﻥ ﺩﺍﻳﺮ ﺑﺎﻟﺔ ﻋﻠﻴﻨﺔ .. ﺑﺲ ﻣﺠﻨﺖ ﺍﺣﺲ ﺍﺗﺠﺎﻫﺎ ﺑﻼﻣﺎﻥ ﻣﺜﻞ ﺍﻣﺠﺪ ...

ﻃﺒﻜﺖ ﺑﺎﺏ ﺍﻟﺸﺎﺭﻉ ... ﻭﻃﻠﻌﺖ ﺍﺷﺔ ﻭﺍﻟﻠﻪ ﺍﻟﺪﻧﻴﺎ ﺑﺎﺭﺩﺓ ... ﺑﻘﻴﺖ ﺍﺭﺍﺟﻊ ﻣﺎﺩﺓ ﺍﻻﻣﺘﺤﺎﻥ ﺑﻴﺪﻱ ﺍﻟﺪﻓﺘﺮ ﻳﺎﺳﻤﻴﻦ ﺟﺎﻧﺖ ﻏﺎﻳﺒﺔ ... ﻋﻴﻨﻲ ﺑﺪﻓﺘﺮ ﻭﺍﻣﺸﻲ .. ﺍﻧﻀﺮﺑﺖ ﺭﺟﻠﻲ ﺑﺴﻴﺎﺭﺓ ... ﺍﺍﺍﺧﺨﺦ ... ﺛﻮﻝ ﺍﻳﻲ ﺭﺟﻠﻲ ... ﺭﻓﻌﺖ ﺭﺍﺳﻲ ... ﺷﻔﺖ ﺍﺣﻤﺪ ﺭﺍﻛﻦ ﺍﻟﺴﻴﺎﺭﺓ ﻭﺍﻛﻒ ...

ﺍﺣﺤﻤﻤﻤﺪ ... ﺷﻌﻨﺪﻙ ﻫﻨﺎ ﻣﻦ ﺍﻟﺼﺒﺢ .

.. ﺍﺟﻴﺖ ﺍﻛﻮﻝ ﺻﺒﺎﺡ ﺍﻟﺨﻴﺮ ...

ﺍﺗﻠﻔﺘﺖ ﺍﻟﻤﻦ ﺍﺗﻜﻮﻝ ﺻﺒﺎﺡ ﺍﻟﺨﻴﺮ .. ﻣﺎﻛﻮ ﺍﺣﺪ ...

ﺍﺑﺘﺴﻢ .. ﻓﺪﻭﺓ ﻟﻠﺒﺮﺍﺋﺔ ... ﻏﻴﺮ ﺍﻛﻮﻟﺞ ﺻﺒﺎﺡ ﺍﻟﺨﻴﺮ ﻭﺍﺳﺘﻔﺘﺢ ﺑﻴﺞ ﻳﻮﻣﻲ ...

ﺧﺠﻠﺖ ﻭﺩﻧﻜﺖ ﺭﺍﺳﻲ ... ﺻﺒﺎﺡ ﺍﻟﻨﻮﺭ ﺭﻓﻌﺖ ﺭﺍﺳﻲ ﻭﺳﺄﻟﺘﺔ

ﺍﺣﻤﺪ ﺻﺪﻙ ﺳﺎﻓﺮ ﺍﻣﺠﺪ

ﺍﻳﻲ ﺳﺎﻓﺮ ﺍﻟﻔﺠﺮ ...

ﺍﻭﻭﻭﻑ .. ﻫﻢ ﺭﺟﻊ ﺳﺎﻓﺮ .. ﻫﺴﺔ .. ﺍﺷﻠﻮﻥ

ﻗﺼﺪﺝ ﻋﻠﻰ ﻧﺮﻳﻤﺎﻥ ... ﺍﺩﺭﻱ ﺑﻤﻮﺿﻮﻋﻬﻢ ...

ﻭﺍﻟﻠﻪ ﻣﻴﻘﺒﻞ ﺍﻓﺘﺢ ﺍﻟﻤﻮﺿﻮﻉ ﻭﻳﺎ

... ﺍﻧﻲ ﻣﺴﻮﻳﺔ ﺿﻔﻴﺮﺓ ﺻﻔﺢ ... ﺍﺧﺬ ﻣﻦ ﺍﻟﺴﻴﺎﺭﺓ ... ﻭﺭﺩﺓ ﻛﺎﺭﺩﻳﻨﻴﺎ

ﻫﺎﺝ ﻧﻮﺭ ﻫﺎﻱ ﺗﺸﺒﻪ ﻧﻘﺎﺋﺞ ... ﻣﻦ ﺷﻔﺘﻬﺎ ﺍﺗﺬﻛﺮﺗﺞ

ﺷﻜﺮﺍ ﻫﺬﺍ ﻣﻦ ﺫﻭﻗﻚ ... ﻳﻼ ﻣﻊ ﺍﻟﺴﻼﻣﺔ ... ﺧﻠﻴﺘﻬﺎ ﺑﻀﻔﻴﺮﺓ ... ﺻﺎﺡ ... ﺍﻟﻮﺭﺩﺓ ﺍﺯﺩﺍﺩﺕ ﺟﻤﺎﺍﺍﺍﻝ ....

ﻳﻤﺔ ﻛﻠﺒﻲ ﻟﻴﺶ ﻫﻴﺞ ﻳﺪﻙ ... ﻛﻤﺖ ﺍﻣﺸﻲ ﺳﺮﻳﻊ ﺣﺘﻰ ﺑﻌﺪ ﻣﺎ ﺍﻋﺮﻑ ﺍﺭﺍﺟﻊ ... ﺑﺲ ﺷﻌﻮﺭ ﺣﻠﻮ ﺍﻻﻫﺘﻤﺎﻡ ﻳﺨﻠﻲ ﺍﻟﺼﺨﺮ ﻳﺰﻫﺮ ... ﻭﺧﻠﻲ ﺍﻟﻜﻠﺒﺔ ﺣﺠﺎﺭﺓ ﻫﻢ ﻳﺪﻙ ...

ﻳﺘﺘﺘﺒﻊ

• غرد
• شاركه
• شاركه
• شاركه
• شاركه

روايات - Novels بقلم سيد مرتضى الموسوي

السلام عليكم ورحمة الله وبركاته ، موقع روايات-Novels يهتم بنشر جديد الروايات للكتاب العراقين ، حمل تطبيقنا على جوجل بلاي وستمتع بلقراءة ، تمنياتنا لكم بلتوفيق

مقالات مقترحة لك ❤