رواية المهندس 🔞 الجزء الثاني
للكاتبة زينب علي
.....
ﻣﺴﺘﺤﻴﻞ ﻣﺮﺍﺡ ﺍﻛﺪﺭ ﻫﺬﺍ ﺍﺧﺮ ﺍﻣﻞ ﻭﺍﺭﻳﺪ ﺍﺗﻤﺴﻚ ﺑﻲ .
ﺍﻧﻲ ﺭﺍﺡ ﺍﻛﻠﺞ ﺷﻐﻠﻪ ﻭﺧﻠﻴﻬﺎ ﺗﺮﺟﻴﻪ ﺑﺄﺫﺍﻧﺞ ﻟﺘﺴﺘﻐﻠﻴﻦ ﺣﺒﻲ ﺍﻟﺞ ﺍﺑﺪﺩﺩ ﺗﺮﻩ ﻳﺠﻲ ﻳﻮﻡ ﻭﺍﺯﻫﻚ .
ﻣﻤﺴﺘﻐﻠﻪ . ﺣﺘﻪ ﻓﻠﻮﺱ ﻣﺎ ﺍﺭﻳﺪ ﻣﻨﻚ .
ﻟﻴﺶ ﻣﻨﻴﻠﺞ ﻓﻠﻮﺱ ﺍﻥ ﺷﺎﺀ ﺍﻟﻠﻪ ؟؟؟
ﺍﺑﻴﻊ ﺫﻫﺒﻲ ﻭﺍﺭﻭﺡ .
ﺩﻛﻠﻲ ﺧﺮﻩ ﻭﺍﻧﺠﺒﻲ ﻭﺻﻴﺮﻱ ﺍﺩﻣﻴﻪ . ﺍﻧﻲ ﺍﻧﻄﻴﺞ ﺑﺲ ﺑﺸﺮﻁ ﺍﺫﺍ ﻣﺼﺎﺭ ﻫﻠﻤﺮﻩ ﺍﺯﻭﺝ .
ﻣﻴﺨﺎﻟﻒ .
( ﺣﺠﻴﺘﻬﺎ ﺑﺼﻴﻐﻪ ﺗﻬﺪﻳﺪ ﻛﻠﺖ ﺑﻠﻜﻲ ﺗﺨﺎﻑ ﻭﺗﺒﻄﻞ ﺑﺲ ﺟﺎﻥ ﺟﻮﺍﺑﻬﺎ ﻋﻜﺲ ﺍﻟﻲ ﺗﻮﻗﻌﺘﻪ . ﻣﺎ ﺍﻋﺮﻑ ﻟﻮ ﺗﺪﺭﻱ ﺑﻴﻪ ﺍﺣﺒﻬﺎ ﻭﻣﺎ ﺍﺯﻭﺝ ﻋﻠﻴﻬﺎ . ﻟﻮ ﻣﻴﻔﺮﻕ ﻋﺪﻫﺎ ﺍﺯﻭﺝ ﻟﻮ ﻻ )
ﺗﺄﺧﺮﺕ ﺣﺒﺎﻟﻪ ﺍﺣﻼﻡ ﻫﺎﻱ ﺍﻟﻤﺮﻩ ﻭﺿﻠﺖ ﺗﺮﺍﺟﻊ ﻭﻳﻮﻣﻴﻪ ﺟﺎﻳﺒﻪ ﻃﻴﻦ ﻭﺳﺒﻮﺣﺎﺕ ﻭﺑﻄﺎﻟﻪ ﻣﺎﻱ ﺧﺒﻠﺘﻨﻲ ﻭﺍﻧﻲ ﻣﺎ ﺑﻴﺪﻱ ﺷﻲ . ﺑﺲ ﺍﺭﻳﺪ ﺍﻟﻠﻪ ﻳﻨﻄﻴﻬﺎ ﻃﻔﻞ ﺣﺘﻪ ﺍﺧﻠﺺ ﻣﻨﻬﺎ ﻛﻤﺖ ﺣﺘﻪ ﺍﻟﺒﻴﺖ ﺍﻛﺮﻩ ﻣﻦ ﻭﺭﺍﻫﺎ .
ﻟﺤﺪ ﻣﺎ ﺣﺒﻠﺖ ﻭﺗﺮﺍﺟﻊ ﻟﻠﻜﺸﺎﻓﻪ . ﻃﺒﻌﺎ ﺍﺣﻼﻡ ﺗﺒﺎﻃﻦ ﻭﻫﺎﻱ ﺣﺒﺎﻟﺘﻬﺎ ﻭﻟﺪ ﺣﺴﺐ ﻣﺘﻜﻮﻝ ﻫﻴﻪ ﺍﺑﺎﻃﻦ . ﻭﺻﺪﻙ ﻣﺮﺕ ﺍﻻﻳﺎﻡ ﻭﻫﺎﻱ ﺍﻟﻜﺸﺎﻓﻪ ﺗﺴﺤﺐ ﻓﻠﻮﺱ ﻭﺍﺣﻼﻡ ﺷﺎﺩﻩ ﻛﻀﻴﺐ ﻋﻠﻰ ﺑﻄﻨﻬﺎ ﻭﻋﻠﻚ ﻋﻠﻰ ﺍﺩﻳﻬﺎ ﻭﺭﺟﻠﻴﻬﺎ ﻭﺣﺮﺯ ﻟﻮﻧﻪ ﺍﺳﻮﺩ ﻭﺑﻲ ﺍﻳﺎﺕ ﻭﺍﺣﺎﺩﻳﺚ ﻭﻭﻃﻼﺳﻢ ﺍﺟﻴﺖ ﺍﺷﻜﻜﻪ ﺑﺲ ﻛﻠﺖ ﺧﺎﻑ ﺗﺴﻮﺩﻥ . ﻋﻔﺘﻪ . ﻭﺣﺎﻧﺖ ﺳﺎﻋﻪ ﺍﻟﺼﻔﺮ ﻭﺅﺍﺣﺖ ﻭﻳﺎﻫﺎ ﻣﺮﺕ ﺣﻴﺪﺭ ﻫﻠﻤﺮﻩ . ﻛﺎﻟﺖ ﻣﺎ ﺍﺭﻳﺪ ﻣﺮﻩ ﺣﺴﻦ ﺷﻮﻓﺘﻬﺎ ﻓﻜﺮ . ﺻﺤﺖ ﻟﻤﺮﻩ ﺣﻴﺪﺭ .
ﺍﺟﺘﻲ ﻧﻬﻠﻪ : ﺧﻮﻳﻪ ﺗﻌﺎﻝ ﻭﻗﻊ ﻋﻤﻠﻴﻪ .
ﻫﻬﻬﻬﻬﻪ ﺍﻟﻄﻔﻞ ﺭﺍﺳﻪ ﺟﺒﻴﺮ .
ﻳﻤﻜﻦ ﻫﻴﺞ ﺷﻲ .
ﻋﺮﻓﺘﻪ ﻭﻧﻔﺲ ﺭﻗﻢ ٢ ﻳﻤﻮﺕ ﺭﻗﻢ ٤ ﺑﺘﺸﻮﻩ ﺧﻠﻘﻲ .
ﺅﺟﻌﺖ ﻟﻠﺒﻴﺖ ﻋﻔﺘﻬﺎ ﻭﺣﺪﻫﺎ ﺑﻠﻤﺴﺘﺸﻔﻰ ﺅﺟﻌﺖ ﺑﺠﻴﺖ ﺑﺠﻲ ﻣﺎ ﺍﻋﺮﻑ ﻋﻠﻰ ﺷﻨﻮ ﻋﻠﻰ ﺣﻈﻲ ﻣﺪﺭﻱ ﺣﻈﻬﺎ ﻣﺪﺭﻱ ﻋﻠﻰ ﺍﻟﻔﻠﻮﺱ ﻣﺪﺭﻱ ﻋﻠﻰ ﻋﻨﺎﺩﻫﺎ ﺍﻟﻲ ﻣﻴﺮﺿﻪ ﻳﻨﺘﻬﻲ ﻟﻮ ﻋﻠﻰ ﺷﻨﻮﻭﻭﻭ .
ﻛﻠﺖ ﻟﻮ ﺗﻤﻮﺕ ﻣﺎ ﺍﺭﻭﺡ ﺍﻟﻬﺎ ﺷﺴﻮﺗﻠﻬﺎ ﺍﻡ ﺍﻟﺴﺤﻮﺭﻩ . ﻃﺒﻬﺎ ﻃﻮﺏ .
ﺷﻮﻳﻪ ﻭﻛﻠﺖ ﻻ ﺧﻄﻴﻪ ﺗﺤﺘﺎﺟﻨﻲ ﻣﻦ ﺗﺠﻲ ﺍﺗﻔﺎﻫﻢ ﻭﻳﺎﻫﺎ ﻭﺍﻛﻠﻬﺎ ﻫﻴﻪ ﺍﻧﻲ ﻣﺎ ﺍﺭﻳﺪ ﺟﻬﺎﻝ ﺑﻌﺪ ﺧﻼﺹ .
ﻭﺍﻟﻠﻪ ﺑﺴﺮﻋﻪ ﺭﺣﺖ ﺧﺬﺕ ﺍﻟﻬﺎ ﺍﻛﻞ ﻣﺴﻮﻳﺘﻪ ﻣﺮﻩ ﺣﺴﻦ ﻭﺍﺟﻴﺖ ﻟﻜﻴﺖ ﺍﻣﻬﺎ ﻭﺍﺧﺘﻬﺎ ﻭﻫﻴﻪ ﺗﺒﺠﻲ ﻭﻣﺎﻛﻮ .
ﻣﺮﻩ ﻋﻤﻲ ﺍﻡ ﺍﺣﻼﻡ : ﻫﻼ ﺑﻌﺪ ﻭﻛﺖ .
ﺟﻨﺖ ﺍﺟﻴﺐ ﺍﻟﻬﺎ ﺍﻻﻛﻞ .
ﻣﺰﺣﻢ ﺭﻭﺣﻚ .
ﻭﺍﻟﻠﻪ ﻋﻤﻪ ﻣﺎ ﻣﻘﺼﺮ ﻭﻱ ﺑﺘﺞ ﺍﻧﻲ ﺣﺘﻪ ﻣﺰﺣﻢ ﺭﻭﺣﻲ ﻭﻫﺬﺍ ﻭﺍﺟﺒﻲ ﺟﺎﻱ ﺍﺳﻮﻱ .
ﺿﻠﺖ ﺗﻠﻐﺚ ﺩﺭﺕ ﻭﺟﻬﻲ ﻋﻨﻬﺎ ﻭﺻﺤﺖ ﺑﺼﻮﺕ ﻋﺎﻟﻲ .
ﺷﺒﻴﺞ ﺷﻜﻮﻭﻭﻭﻭﻭ ﺗﻌﻮﻳﻦ .
ﺍﺣﻼﻡ : ﻫﻢ ﺭﺍﺍﺍﺡ ﺭﻋﺪ ﻫﻢ ﺭﺍﺡ .
ﻓﺪﻭﻩ ﺍﻟﺞ .
ﺍﺳﺘﻤﺮﺕ ﺗﺒﺠﻲ ﻭﻣﺎﻛﻮ ﺍﻧﻲ ﻟﻌﺒﺎﻧﻪ ﺭﻭﺣﻲ ﻛﻠﺒﻲ ﺧﻠﺼﺎﻥ ﻛﺘﺒﺖ ﺍﻟﻬﺎ ﺍﻟﺪﻛﺘﻮﺭﻩ ﺧﺮﻭﺟﻴﻪ ﻣﺎ ﺻﺪﻛﺖ ﻃﻠﻌﺖ ﺍﺭﻛﺾ
...
ﺑﻬﺎﻱ ﺍﻟﻔﺘﺮﻩ ﺍﺧﺬﺕ ﺷﻬﺮ ﺍﺣﻼﻡ ﺳﺎﻛﺘﻪ ﻻ ﺟﺎﺑﺖ ﻃﺎﺭﻱ ﺍﻟﻄﻔﻞ ﻭﻻ ﺍﺑﺪ ﻃﺒﻌﺎ ﺍﻧﻲ ﻣﺘﺮﻗﺐ ﺍﻟﻬﺪﻭﺀ ﻗﺒﻞ ﺍﻟﻌﺎﺻﻔﻪ ﻭﻣﻨﺘﻈﺮ ﺍﻟﺨﻄﻮﻩ ﺍﻟﻘﺎﺩﻣﻪ ﺍﻭ ﺍﻟﻤﺸﺮﻭﻉ ﺍﻟﻘﺎﺩﻡ . ﻭﺑﻠﻔﻌﻞ ﻣﺮﺕ ٣ ﺍﺷﻬﺮ ﻛﺎﻟﺖ ﺭﻋﺪ ﺍﺭﻳﺪ ﺍﺷﻴﻞ ﻫﺬﺍ ﺍﻟﺒﻴﺖ ﻋﺘﺒﺘﻪ ﻛﺸﺮﻩ .
ﻣﺠﺎﻭﺑﺘﻬﺎ ﻛﺘﻠﻬﺎ ﻣﻦ ﺑﺎﺟﺮ ﺍﺩﻭﺭ ﺑﻴﺖ ﻣﺠﺮﺩ ﺍﺭﻳﺪ ﺍﺟﺎﺭﻳﻬﺎ ﺑﻠﺤﺠﻲ ﺣﺘﻪ ﻣﺘﻀﻞ ﺗﻠﺢ .
ﻭﻣﺮﺕ ﺍﻻﻳﺎﻡ ﻭﺍﻛﺘﺸﻔﺖ ﺍﻧﻮ ﺍﺣﻼﻡ ﺗﺮﻭﺡ ﻟﺴﺤﺎﺭﻩ ﺛﺎﻧﻴﻪ ﻭﻛﺎﻳﻠﺘﻠﻬﺎ ﺍﻟﺴﺤﺎﺭﻩ ﺍﻟﺒﻴﺖ ﻫﺬﺍ ﺑﻲ ﺟﺎﻧﺖ ﻣﺮﻩ ﻭﺭﺟﻠﻬﺎ ﻭﺷﺮﻳﺠﺘﻬﺎ ﻛﺎﻳﻤﻪ ﺍﻟﺸﺮﻳﺠﻪ ﺍﻭﻝ ﻣﺎ ﺟﺎﻳﺒﻪ ﻣﺮﺕ ﺭﺟﻠﻬﺎ ﺩﺍﻓﻨﻪ ﺍﻟﻄﻔﻠﻪ ﻫﻴﻪ ﻭﻋﺎﻳﺸﻪ ﻭﻣﺸﻮﻫﻪ ﺍﻟﻄﻔﻞ ﻭﺩﺍﻓﻨﺘﻪ ﻫﻮ ﻭﻋﺎﻳﺶ ﺣﺎﺭﻛﻪ ﻭﺟﻬﻪ ﻟﻤﻦ ﻣﺘﺨﺒﻠﻪ ﺍﻟﺸﺮﻳﺠﻪ ﻣﻦ ﻭﺭﻩ ﺍﻻﺭﻭﺍﺡ ﺍﻟﻲ ﻛﺎﻳﻤﻪ ﺗﺠﻴﻬﺎ ﻭﻫﺬﺍ ﺍﻟﺒﻴﺖ ﻣﺴﻜﻮﻥ ﻭﻫﺬﺍ ﻣﺸﺄﻭﻭﻭﻡ ﻭﺭﻭﺡ ﺑﻲ ﺷﻜﻮ ﻣﺮﻩ ﺗﻜﻌﺪ ﺑﻲ ﻣﺘﺤﺒﻞ .
ﺍﻧﻲ ﺑﻴﻨﻲ ﻣﺎ ﺑﻴﻦ ﻧﻔﺴﻲ ﻣﺎ ﻣﺼﺪﻙ ﻭﻣﺼﺪﻙ ﺳﺎﻋﻪ ﺍﻛﻮﻝ ﺻﺤﻴﺢ ﺳﺎﻋﻪ ﺍﻛﻮﻝ ﻣﻮ ﺻﺤﻴﺢ . ﻟﻤﻦ ﺭﺣﺖ ﻟﻠﺠﻮﺍﺭﻳﻦ ﺳﺄﻟﺘﻬﻢ ﻭﺍﺣﺪ ﻭﺍﺣﺪ ﺍﻛﻮ ﻫﻴﺞ ﺷﻲ ﻛﻠﻬﺎ ﻛﺎﻟﺖ ﻣﻨﺪﺭﻱ ﻣﺴﺎﻣﻌﻴﻦ ﻣﻨﻌﺮﻑ ﻓﺄﻧﻲ ﻭﺍﻓﻘﺖ ﻻﻥ ﺍﺣﺘﻤﺎﻝ ﺻﺤﻴﺢ ﻟﻴﺶ ٤ ﺍﻃﻔﺎﻝ ﻣﺎﺗﻮ ﺷﻨﻮ ﺍﻟﺴﺒﺐ ﻳﻌﻨﻲ ﺷﻔﺖ ﺭﻭﺣﻲ ﻣﺎ ﻟﻜﻴﺖ ﻏﻴﺮ ﺣﻞ ﻟﻬﺎﻱ ﺍﻟﻤﺼﻴﺒﻪ ﻭﻣﺼﻴﺒﻪ ﺍﺷﻮﻑ ﺍﺣﻼﻡ ﻧﺴﻠﺖ ﻭﺻﺎﺭﺕ ﻋﺒﺎﺭﻩ ﻋﻦ ﻣﻮﻣﻴﺎﺀ . ﺷﺴﻮﻱ ﺷﺴﻮﻱ ﻣﺎ ﻟﻜﻴﺖ ﻏﻴﺮ ﺍﺧﻮﺗﻲ ﻛﺘﻠﻬﻢ ﻣﺎ ﻋﻨﺪﻱ ﻣﺤﺘﺎﺝ ﺗﻠﻤﻮﻟﻲ ﺟﻢ ﻓﻠﺲ ﻭﺍﺷﻮﻓﻠﻲ ﺑﻴﺖ ﻏﻴﺮ ﻫﺬﺍ . ﺧﻄﻴﻪ ﺟﻤﻌﻮﻟﻲ ﻭﺑﻌﺖ ﺍﻟﺒﻴﺖ ﻭﺍﻟﻌﻨﺪﻱ ﻭﺍﻟﻤﺎﻋﻨﺪﻱ ﻭﺫﻫﺐ ﺍﺣﻼﻡ ﻛﻠﻪ ﻭﺑﻌﺖ ﺍﻟﻜﺘﺐ ﻭﺍﻟﻤﺎﻋﻴﻦ ﻭﻏﺮﻓﻪ ﺍﻻﻏﺸﺎﺏ ﻭﺷﻜﻮ ﺷﻲ ﺑﻌﺘﻪ ﻛﻠﺸﻲ ﻣﺎ ﺧﻠﺼﺖ ﻻﻥ ﺍﻟﺒﻴﺖ ﺍﻟﻲ ﻛﻌﺪﺕ ﺑﻲ ﺍﻛﺒﺮ ﻭﺟﺪﻳﺪ ﺷﺎﻓﻠﻴﺎ ﻓﺮﺍﺕ ﻛﺘﻠﻪ ﻣﺎ ﺍﺭﻳﺪ ﻭﺍﺣﺪ ﺳﺎﻛﻦ ﺑﻲ ﻛﺒﻠﻲ ﻧﻬﺎﺋﻴﺎﺍﺍﺍ .
ﺍﻧﺘﻘﻠﻨﻪ ﻣﺠﺮﺩ ﺳﻴﺎﺭﻩ ﻋﺎﺩﻳﻪ ﺣﻤﻞ ﺷﺎﻟﺖ ﻛﻞ ﻏﺮﺍﺿﻨﻪ . ﻭﺩﺭﻧﻪ ﻟﺒﻴﺖ ﺍﻟﺠﺪﻳﺪ ﻭﻗﺮﻳﺐ ﻛﻠﺶ ﻣﻦ ﺑﻴﺖ ﻓﺮﺍﺕ ﺍﺧﻮﻳﻪ .
ﻛﻌﺪﺕ ﺍﺣﻼﻡ ﻭﻛﺎﻣﺖ ﺗﺤﻮﻙ ﻭﺗﻐﺰﻝ ﻭﺗﺸﺘﻐﻞ ﻟﻴﻞ ﻭﻧﻬﺎﺭ ﻭﺗﺒﻴﻊ ﻭﺗﺮﻭﺡ ﻟﻠﻜﺸﺎﻓﺎﺕ .
ﺍﺧﺮ ﺷﻲ ﻛﺘﻠﻬﺎ ﻟﻴﺶ ﻋﻘﻴﺪﺗﺞ ﺑﺎﻟﻠﻪ ﺿﻌﻴﻔﻪ ﺧﻠﻲ ﺍﻳﻤﺎﻧﺞ ﺑﺄﻟﻠﻪ . ﻟﻴﺶ ﻋﺎﻳﻔﻪ ﺍﻻﺋﻤﻪ ﻭﺍﻻﻧﺒﻴﺎﺀ ﻭﺗﺮﺣﻴﻦ ﺗﺬﺑﻴﻦ ﻓﻠﻮﺳﺞ ﺑﻠﺨﺎﻟﻲ ﺑﻼﺵ ﺧﻮ ﺳﺎﻋﺪﻳﻨﻲ ﺻﻴﺮﻱ ﻋﻮﻥ ﺍﻟﻴﻪ ﻟﻤﻲ ﺍﻟﻲ ﻋﻨﺪﺝ ﻭﺧﻞ ﻧﻔﺼﻞ ﺍﻟﺪﻳﻮﻥ ﺍﻟﻲ ﻋﻠﻴﻨﻪ ﻭﺍﻟﻠﻪ ﺍﺧﺬﺝ ﻭﺍﺳﺎﻓﺮ ﻟﻠﺨﺎﺭﺝ ﻧﺴﻮﻱ ﻃﻔﻞ ﻭﻧﺠﻲ .
ﺭﻋﺪ ﻋﻮﻓﻨﻲ ﺍﻟﻠﻪ ﻳﺨﻠﻴﻚ .
ﻟﺞ ﺑﺎﺑﺎ ﻭﺍﻟﻠﻪ ﻣﺮﺍﺡ ﻳﺴﻮﻥ ﺍﻟﺞ ﺷﻲ ﻫﺬﺍ ﻭﺳﻮﺳﻪ ﺷﻴﻄﺎﻥ ﺫﻧﻲ ﻛﺎﻓﺮﺍﺕ ﻟﻮﻣﺎ ﻛﺎﻓﺮﺍﺕ ﻣﺠﺎﻥ ﻳﻬﺒﺮﻥ ﻓﻠﻮﺱ ﻫﺒﺮ ﺍﻟﻲ ﺻﺪﻙ ﻣﺆﻣﻨﻪ ﺗﻨﻄﻴﺞ ﺩﻋﺎﺀ ﻋﻦ ﻧﺒﻲ ﻋﻦ ﺍﻣﺎﻡ ﺗﻌﻠﻤﺞ ﺻﻼ ﺍﻓﺘﻬﻤﻲ ﻫﻠﺸﻲ ﻟﻴﺶ ﺍﺗﻌﺒﻴﻨﻲ ﻭﻳﺎﺝ ﻭﺍﻧﻲ ﻭﺻﻠﺖ ﻣﺮﺣﻠﻪ ﺣﺘﻪ ﻣﻠﻴﺖ ﺑﻌﺪ ﻣﺎ ﺍﺗﺤﻤﻞ ﻭﺿﻌﺞ . ﻛﺎﻣﺖ ﺗﺒﺠﻲ ﻭﺗﺸﻬﻚ ﻭﺗﻤﻠﺦ ﺑﻮﺟﻬﻪ .
ﺭﺍﺡ ﺗﺼﻴﺮ ﺣﺴﺮﻩ ﺑﻜﻠﺒﻲ ﺻﺎﺭﻟﻲ ٥ ﺳﻨﻮﺍﺕ ﺭﺍﺡ ﺍﻃﺐ ﺑﻠﺴﻨﻪ ﺍﻟﺴﺎﺩﺳﻪ ﻭﺍﻧﻲ ﻳﻮﻣﻴﻪ ﺍﺩﻋﻲ ﺭﺑﻲ ﺑﺲ ﻓﺮﺣﻨﻲ ﺑﻄﻔﻞ ﺑﺲ ﺍﺗﺮﺱ ﺣﻈﻨﻲ ﺭﻋﺪ ﻭﺍﻟﻠﻪ ﺭﺍﺡ ﺍﻣﻮﺕ ﻣﺠﺎﻱ ﺗﺤﺲ ﺑﻴﻪ ﺍﻧﺖ .
ﺍﺣﺲ ﺑﻴﺞ ﻭﺍﻟﻠﻪ ﻭﺍﺩﺭﻱ ﺑﻴﺞ ﺑﺲ ﺍﻧﺘﻲ ﻫﻢ ﻣﺮﻩ ﺣﺴﻴﺘﻲ ﺑﻴﻪ ؟؟؟
ﺷﺒﻴﻚ ﺭﻋﺪ ﺷﻨﻮ ﺍﻟﻲ ﺗﺮﻳﺪﻩ ﻭﻣﺴﻮﻳﺘﻪ !!!
ﺍﺭﻳﺪ ﺣﺒﻴﺒﺘﻲ ﺍﺭﻳﺪ ﺯﻭﺟﻪ ﺍﺭﻳﺪ ﻣﺮﻩ ﺷﻮﻓﻲ ﻭﺿﻌﺞ . ﺍﻧﻲ ﻫﻢ ﺍﺭﻳﺪ ﻃﻔﻞ ﺍﺻﻐﺮ ﻣﻨﻲ ﻭﺗﺰﻭﺟﻮ ﻭﺭﺍﻳﻪ ﻭﺻﺎﺭ ﻋﺪﻫﻢ ﻛﻮﻣﻪ ﻭﺍﻧﻲ ﻟﺴﺎ ﺑﺲ ﻣﻮ ﻣﻌﻨﺎﺗﻬﺎ ﺍﻛﺘﻞ ﻧﻔﺴﻲ ﺍﺫﺍ ﻣﺎ ﺍﺣﺼﻞ ﻃﻔﻞ ﺧﻠﺺ ﻫﺎﻱ ﻧﻬﺎﻳﺔ ﺍﻟﻌﺎﻟﻢ . ﻳﻌﻨﻲ ﺍﻟﻤﻔﺮﻭﺽ ﺍﻧﻲ ﻣﺎ ﻋﻨﺪﻱ ﻃﻔﻞ ﻫﺴﻪ ﻋﺎﻳﺶ ﻭﻳﺎﺝ ﻣﺜﻞ ﺍﻟﻌﺮﻳﺲ ﻭﺍﻟﻌﺮﻭﺱ ﺑﺲ ﺍﻧﺘﻲ ﻛﺒﺮﺗﻴﻨﻲ ﻓﻮﻙ ﻫﻤﻲ ﻫﻤﻮﻭﻭﻭﻡ
.....
ﻫﺎﻱ ﺍﻧﻲ ﻛﺒﺮﺗﻚ ﻻﻥ ﺍﺭﻳﺪ ﻃﻔﻞ ﻫﺎﻱ ﺍﻧﻲ ﻫﻴﺞ ﺿﺎﻟﻤﺘﻚ ﻻﻥ ﺍﺭﻳﺪ ﻃﻔﻞ .
ﻟﺞ ﺍﺣﻼﻡ ﺑﺲ ﻓﻬﻤﻴﻨﻲ . ﺍﻟﻠﻪ ﻳﻜﻮﻝ ﻳﻬﺐ ﻣﻦ ﻳﺸﺎﺀ ﺍﻧﺎﺛﺎً ﻭﻳﻬﺐ ﻣﻦ ﻳﺸﺎﺀ ﺫﻛﻮﺭﺍ ﻭﻳﺠﻌﻞ ﻣﻦ ﻳﺸﺎﺀ ﻋﻘﻴﻤﺎً . ﻫﺎﻱ ﺍﻳﻪ ﺻﺮﻳﺢ ﺍﻟﻌﺒﺎﺭﻩ ﺟﺎﻱ ﺗﻔﻬﻤﺞ ﺍﻟﻠﻪ ﺍﺫﺍ ﺭﺍﺩ ﻳﻨﻄﻴﺞ .
ﻭﺍﻟﻠﻪ ﺟﺎﻱ ﻳﻨﻄﻴﻨﻲ ﻣﻮ ﻣﺠﺎﻱ ﻳﻨﻄﻴﻨﻲ ﺣﺘﻪ ﺍﺳﻜﺖ ﻟﻮ ﻣﺎ ﻋﻨﺪﻱ ﺟﺎﻥ ﻛﻠﺖ ﺑﻴﻬﺎ ﻭﺟﻬﻪ ﻧﻈﺮ ﺑﺲ ﺟﺎﻱ ﺍﺣﺒﻞ ﻭﻣﺠﺎﻱ ﻳﺼﻴﺮ .
ﺧﻠﻴﻬﺎ ﻭﺭﻩ ﺍﻟﻠﻪ ﻳﺠﻮﺯ ﻳﺼﻴﺮ ﺧﻠﺼﻨﻪ ﻣﻦ ﺫﺍﻙ ﺍﻟﺒﻴﺖ ﺧﻠﻴﻬﺎ ﻭﺍﺑﺪﻱ ﻣﻦ ﺟﺪﻳﺪ .
ﻣﻴﺨﺎﻟﻒ ﻣﺮﺍﺡ ﺍﺭﻭﺡ ﻻﻱ ﻭﺣﺪﻩ ﺑﻌﺪ ﻭﺍﻧﺘﻈﺮ .
ﺻﺪﻛﻴﻨﻲ ﺍﻟﻠﻪ ﻣﺮﺍﺡ ﻳﺨﻴﺐ ﻭﺍﺣﺪ ﻧﻬﺎﺋﻴﺎﺍﺍﺍ .
ﺍﻟﻠﻪ ﻛﺮﻳﻢ .
.
ﻣﺮﺕ ﺍﻻﻳﺎﻡ ﻭﺍﺣﻼﻡ ﻭﺍﻧﻲ ﺑﺪﻳﻨﻪ ﻧﻴﺄﺱ ﻣﻦ ﺷﻐﻠﻪ ﺍﻟﺤﻤﻞ ﻭﺗﺄﺧﺮ ﺍﻟﺤﻤﻞ ﻫﻠﻤﺮﻩ ﻭﺿﻌﻬﺎ ﻛﻠﺶ ﻣﻀﺎﻳﻘﻨﻲ ﻭﺍﻧﻲ ﺍﻟﺪﻳﻮﻥ ﺭﺍﻛﺒﻪ ﺭﺍﺱ ﺭﺍﺳﻲ ﻭﺍﺷﺘﻐﻞ ﻣﻦ ﺍﻟﺼﺒﺢ ﻟﻠﻴﻞ . ﺍﺭﺟﻊ ﻣﻦ ﺍﻟﺒﻴﺖ ﺍﻟﻜﺎﻫﺎ ﻋﻴﻮﻧﻬﺎ ﺩﻡ . ﻭﻛﺎﻋﺪﻩ ﻉ ﺍﻟﺴﺠﺎﺩﻩ ﻭﺗﺒﺠﻲ .
ﺭﺑﻲ ﺑﺠﺎﻩ ﺣﺒﻴﺒﻚ ﻣﺼﻄﻔﻰ ﻟﺘﺤﺮﻣﻬﺎ ﻣﻦ ﺍﻟﺬﺭﻳﻪ ﺭﺑﻲ ﺳﻮﻳﻠﻨﻪ ﺣﻞ ﻭﺟﺎﺭﻩ .
ﺻﺎﺭ ﻳﺪﻭﺭ ﺍﻟﺼﻤﺖ ﺑﻴﻨﺎﺗﻨﻪ ﺍﻓﺘﻘﺪﻧﻪ ﻟﻠﻀﺤﻜﻪ ﺍﻟﺤﻠﻮﻩ ﺍﻓﺘﻘﺪﻧﻪ ﻟﻠﺴﻮﺍﻟﻒ ﺍﻓﺘﻘﺪﻧﻪ ﻟﻜﻞ ﺷﻲ ﺍﻓﺘﻘﺪﻧﻪ ﻷﻱ ﺷﻲ ﻋﺒﺎﺭﻩ ﻋﻦ ﺍﻣﻮﺍﺕ ﺑﻠﺒﻴﺖ . ﻫﺬﺍ ﺍﺧﺘﺒﺎﺭﻧﻪ ﺑﻠﺤﻴﺎﻩ ﺍﺧﺘﺒﺎﺭ ﺻﻌﺐ ﻣﻜﻠﻒ . ﺟﻨﺖ ﺩﺍﺋﻤﺎ ﺍﻛﻮﻝ ﻣﻮ ﺍﺧﺘﺒﺎﺭﻱ ﻻﻥ ﺍﺣﺲ ﺭﻭﺣﻲ ﻣﻘﺎﻭﻡ ﻣﻊ ﻫﺎﻱ ﺍﻟﻀﺮﻭﻑ ﺑﺲ ﺍﻟﻲ ﻣﺘﺄﻛﺪ ﻣﻨﻪ ﺍﺧﺘﺒﺎﺭ ﺍﺣﻼﻡ ﻭﺧﺎﻳﻒ ﻻ ﻫﺬﺍ ﺍﻻﺧﺘﺒﺎﺭ ﻳﻔﺘﻚ ﺑﻴﻬﺎ . ﺑﺲ ﺍﺧﺮ ﺷﻲ ﻛﻠﺖ * ﻻ ﻳﻜﻠﻒ ﺍﻟﻠﻪ ﻧﻔﺴﺎ ﺍﻻ ﻭﺳﻌﻬﺎ * ...
ﺭﺑﻲ ﻟﺘﺨﺘﺒﺮﻧﻲ ﺑﺸﻲ ﺻﻌﺐ ﺧﺎﻳﻒ ﻋﻠﻰ ﻓﺮﺍﻙ ﺍﺣﻼﻡ ﺍﺧﺎﻑ ﻣﻦ ﻫﺬﺍ ﺍﻻﺧﺘﺒﺎﺭ ﺍﻭﻛﻊ ﺑﻲ .
ﻣﺮﺕ ﺍﻻﻳﺎﻡ ﻭﺣﺒﻠﺖ ﺍﺣﻼﻡ ﻭﻫﻠﻤﺮﻩ ﺑﻨﻴﻪ ﺍﻧﻲ ﻣﺎ ﻭﻛﻔﺖ ﻭﻳﺎﻫﻦ ﺭﺣﺖ ﺑﻮﺟﻬﻲ ﻟﻼﻣﺎﻡ ﻋﻠﻲ . ﻟﺤﺪ ﻳﺒﻮ ﺍﻟﺤﺴﻦ ﺍﺭﻳﺪ ﺑﺸﺎﺭﺗﻲ ﻣﻨﻚ ﺍﺭﻳﺪ ﻫﻠﻄﻔﻠﻪ ﺗﻀﻞ . ﻭﻣﺮﺕ ﺍﻻﻳﺎﻡ ﻭﺍﻟﻄﻔﻠﻪ ﺻﺎﺭ ﻋﻤﺮﻫﺎ ٣٠ ﻳﻮﻡ ﻭﺗﻮﻓﺖ ﺑﺪﻭﻥ ﺍﻱ ﺳﺒﺐ ﻣﻌﻠﻮﻡ .
ﻭﻫﺬﺍ ﺍﻟﻄﻔﻞ ﺭﻗﻢ ٥ ﺭﺍﺡ ﻭﺍﻟﻠﻪ ﻭﺍﻟﻠﻪ ﺍﻭﻝ ﻣﺮﻩ ﺍﺣﺲ ﺍﻧﻮ ﺍﻟﻠﻪ ﻣﻘﺎﺳﻢ ﺍﻟﻨﻪ ﻃﻔﻞ ﻭﻛﺄﻧﻮ ﺍﻛﻮ ﺳﺒﺐ ﺟﺎﻱ ﻳﺼﻴﺮ ﺍﻭ ﻳﺮﻳﺪ ﻳﺼﻴﺮ ﻧﻘﻄﻪ ﺭﺍﺱ ﺳﻄﺮ .
ﺍﻡ ﺳﺤﺮ ﻣﺮﺕ ﻓﺮﺍﺕ ﻛﺎﻟﺖ ﻭﺍﻟﻠﻪ ﺍﺫﺍ ﺻﺎﺭ ﻋﻨﺪﻱ ﻃﻔﻞ ﺍﺷﻴﻠﻪ ﻭﺍﺣﻄﻪ ﺑﺤﻈﻨﻬﺎ ﻣﻦ ﺍﻭﻝ ﻟﻴﻠﻪ .
ﺍﺣﻼﻡ : ﺷﺴﻮﻱ ﺑﻲ ﺍﺑﻨﺞ ﻫﺬﺍ ﻣﻮ ﺍﺑﻨﻲ .
ﻻ ﺍﺑﻨﺞ ﻳﺼﻴﺮ ﺭﺑﻲ ﻭﺗﻌﺒﻲ ﻋﻠﻴﺞ ﻭﻫﻮ ﺍﺑﻨﺞ ﻭﺍﻧﻪ ﻭﻳﺎﺝ ﺧﻮﺍﺕ ﻭﺍﻟﻌﻤﺎﻡ ﺍﺧﻮﻩ ﻭﻛﺒﺮﻱ ﻭﺯﻭﺟﻲ ﻭﺑﺰﺭﻩ ﺍﺣﻔﺎﺩﺝ ﻛﻔﻴﻠﺞ ﺍﺑﻮ ﻓﺎﺿﻞ ﺍﺫﺍ ﻓﺘﺤﺖ ﺣﻠﻜﻲ ﺑﻴﻮﻡ ﻭﻛﺘﻠﺞ ﺍﺑﻨﻲ ﻟﻮ ﺟﺒﺖ ﻃﺎﺭﻳﻪ ﻋﺴﻪ ﻛﻮﻥ ﺍﺑﻮ ﻓﺎﺿﻞ ﻳﻜﺺ ﻟﺴﺎﻧﻲ . ﺍﺻﻼ ﺍﻧﺴﺎ ﻭﻳﻦ ﺍﻟﻜﻪ ﻣﺜﻠﺞ ﺑﺖ ﻋﻤﻨﻪ ﻭﺣﺪﻩ ﻣﻨﻪ ﻭﺑﻴﻨﻪ ﻭﻣﺆﺩﺑﻪ ﻭﺣﺒﺎﺑﻪ ﻭﺧﻴﺮﻩ ﻣﺎ ﺳﻤﻌﻨﻪ ﻣﻨﺞ ﺍﻟﻌﺎﻳﺒﻪ .
ﺍﻡ ﺳﺤﻮﺭﻩ ﺧﻴﻪ ﺭﺣﻢ ﺍﻟﻠﻪ ﻭﺍﻟﺪﻳﺞ ﺑﺲ ﺍﻧﻲ ﻣﺎ ﺍﻛﺪﺭ ﺍﺭﻳﺪ ﻃﻔﻞ ﺍﺭﺿﻌﻪ ﻳﺎﺧﺬ ﺣﻠﻴﺒﻲ ﺍﺭﻳﺪ ﺍﺣﺲ ﺑﻲ ﺑﻤﺤﻨﺘﻪ . ﻟﻴﺶ ﺍﻧﻲ ﻣﺤﺮﻭﻣﻪ ﻣﻦ ﻫﻠﻨﻌﻤﻪ ﻳﺮﺑﻲ ﺷﻮﻛﺖ ﺗﺮﺣﻢ ﺑﺤﺎﻟﻲ ﺷﻮﻛﺖ ﺗﺸﻮﻓﻠﻲ ﺻﻮﺭﻩ ﺣﻞ .
ﺭﺣﻤﺔ ﺭﺑﺞ ﻋﻠﻰ ﺳﺎﻋﻪ ﻣﺘﺤﺴﻴﻦ ﻭﻟﻨﻪ ﻣﻬﺪﻭﺩﻩ ﻋﻠﻴﻜﻢ .
.
ﺍﺳﺘﻤﺮﺕ ﺍﻻﻳﺎﻡ ﻭﺍﻧﻲ ﻣﺎ ﺍﻓﻜﺮ ﻏﻴﺮ ﺑﺲ ﺷﻨﻮ ﺍﻟﺴﺒﺐ ﺻﺤﻴﺢ ﻳﻌﻨﻲ ﺍﻛﻮ ﻓﺪ ﺍﻧﻪ ﺑﻠﻤﻮﺿﻮﻉ ﻟﻴﺸﺸﺶ ﻳﻌﻨﻲ ﻭﺭﺍﺡ ﺍﺗﺨﺒﻞ ﻣﻦ ﻫﺬﺍ ﺍﻟﺸﻲ ﻟﻴﺶ ﺍﻟﻮﻟﺪ ﻋﻤﻠﻴﻪ ﻭﻣﺸﻮﻫﻴﻦ ﻭﺍﺻﻼ ﻣﻨﺸﻮﻓﻬﻢ ﻳﻌﻨﻲ ﻳﻄﻠﻌﻮﻥ ﻣﻦ ﺑﻄﻨﻬﺎ ﻣﺸﻮﻫﻴﻦ ﻭﻟﻴﺶ ﺍﻟﺒﻨﺎﺕ ﻋﺎﻳﺸﺎﺕ ﻭﺑﻌﺪﻳﻦ ﻣﻴﻜﻤﻠﻦ ﺍﻻﺭﺑﻌﻴﻦ ﻳﻤﻮﺗﻦ ﻫﺎﻱ ﻣﺼﻴﺒﻪ ﺯﻳﻦ ﻻ ﺍﻟﻜﺸﺎﻓﺎﺕ ﻭﻻ ﺍﻟﻌﻠﻮﻳﺎﺕ ﻭﻻ ﺍﻻﺩﻋﻴﻪ ﻭﻻ ﺍﻟﺪﻛﺎﺗﺮﻩ ﻭﻻ ﺍﻻﺣﺮﺍﺯ ﻛﻠﺸﻲ ﻣﺎ ﻓﺎﺩ ﻭﻻ ﺣﺘﻪ ﺑﻴﻌﺖ ﺍﻟﺒﻴﺖ ﺿﻞ ﺍﺑﺎﻟﻲ ﺑﺲ ﺍﺭﻳﺪ ﺍﻋﺮﻑ ﺷﻨﻮ ﺍﻟﺴﺒﺐ ﻭﻟﻴﺶ
......
ﺟﻨﺖ ﻗﺒﻞ ﻣﺎ ﺍﺣﺠﻲ ﻳﻢ ﺟﻤﺎﻋﺘﻲ ﻭﻛﻞ ﺍﻟﻲ ﻳﺴﺄﻟﻨﻲ ﺍﻛﻮﻝ ﺍﻟﻠﻪ ﻣﻘﺎﺳﻤﻪ ﺑﺲ ﻛﻠﺖ ﺑﻠﻜﻲ ﺍﻛﻮ ﻣﺜﻠﻲ ﺍﺭﻳﺪ ﺍﺷﻮﻑ ﺷﻨﻮ ﺍﻟﺴﺒﺐ ﺑﺲ ﺍﺑﺤﺚ ﺑﺪﻭﻥ ﻣﺎ ﺍﺣﻼﻡ ﺗﺪﺭﻱ .
ﻭﺻﺮﺕ ﻳﻮﻣﻴﻪ ﺍﺳﺎﻝ ﻋﻦ ﻫﺬﺍ ﺍﻟﻤﻮﺿﻮﻉ ﻧﺎﺱ ﺗﻜﻮﻝ ﺗﺎﺑﻌﻪ ﻭﻧﺎﺱ ﺗﻜﻮﻝ ﻳﺠﻮﺯ ﻣﺮﻩ ﻣﺴﻮﻳﺘﻠﻚ ﺍﻟﻚ ﻋﻤﻞ ﻣﻮ ﺍﻟﻬﺎ ﻭﻧﺎﺱ ﺗﻜﻮﻝ ﺩﺍﺀ ﺍﻟﻘﻄﻂ ﻭﻧﺎﺱ ﺗﻜﻮﻝ ﺭﺣﻤﻬﺎ ﻣﻜﻠﻮﺏ ﻳﺒﻮﻭﻭﻭﻭ ﺍﺷﻜﺎﻝ ﺍﻟﺘﻜﻬﻨﺎﺕ . ﻭﺭﺣﺖ ﻟﻮﺍﺣﺪ ﻣﻦ ﺍﻟﺴﺎﺩﻩ ﻣﻌﺮﻭﻓﻴﻦ ﺑﻠﻨﺠﻒ ﺑﺬﺍﻙ ﺍﻟﻮﻗﺖ ﻭﺍﻧﻮﺏ ﻛﺎﻟﻮ ﺧﻞ ﻳﻐﺴﻠﻮﻟﻚ ﺑﻠﻤﻐﻴﺴﻞ ﺣﺘﻪ ﺍﻟﻲ ﻣﺴﻮﻳﻠﻪ ﻋﻤﻞ ﻳﺮﻭﺡ ﻭﺭﺣﺖ ﻭﻏﺴﻠﻮﻟﻲ ﻭﺭﺟﻌﺖ ﺍﺧﺬﺕ ﺍﺣﻼﻡ ﻭﻏﺴﻠﻮﻟﻬﺎ ﻭﺍﺣﻼﻡ ﺻﺎﺭﻟﻬﺎ ﻛﻮﻣﻪ ﺗﺒﺠﻲ ﻭﻣﺎ ﻫﺪﺃ ﻟﺴﺎﻧﻬﺎ ﻣﻦ ﻫﻠﺸﻲ ﻭﺗﺮﻳﺪ ﻃﻔﻞ ﻣﺴﺘﻤﺮﻩ ﺑﻬﻠﻤﻮﺿﻮﻉ .
.
.
.
ﺑﻨﻬﺎﻳﻪ ﺳﻨﻪ ٩٧ ﻃﻠﻊ ﺗﻌﻴﻨﻲ ﻣﻬﻨﺪﺱ ( ﺑﻠﺘﺼﻠﻴﺢ ﺍﻟﻌﺴﻜﺮﻱ ) ﻋﻠﻰ ﻣﺸﺮﻭﻉ ﺑﻠﻌﺮﺏ ﻣﻜﺎﻥ ﻧﺎﺋﻲ ﺑﻌﻴﺪ ﻛﻞ ﺍﻟﺒﻌﺪ ﻋﻦ ﺑﻴﺘﻲ ﻭﺣﻴﺎﺗﻲ ﺍﻧﻲ ﻛﻴﻔﺖ ﻛﻠﺖ ﻭﺍﺧﻴﺮﺍ ﺑﻠﻜﻲ ﺍﻟﻠﻪ ﻓﺘﺤﻬﺎ ﺑﻮﺟﻬﻨﻪ ﺍﺗﻔﻘﺖ ﻭﻳﺎﻫﺎ ﺗﺮﻭﺡ ﻭﻳﺎﻱ . ﻭﻛﺎﻟﺖ ﻣﻴﺨﺎﻟﻒ ﺍﺭﻭﺡ ﺷﻌﻨﺪﻱ ﺿﺎﻟﻪ .
ﺍﻭﻝ ﻣﺎ ﺭﺣﺖ ﺷﻔﺖ ﺍﻟﻤﻜﺎﻥ ﻭﺍﻟﺘﺮﺗﻴﺐ ﻭﻛﻮﻥ ﻻﺯﻡ ﺗﻀﻞ ﻣﻠﺘﺰﻡ ﺑﻤﻜﺎﻥ ﻣﻌﻴﻦ ﻛﺒﻞ ﺑﺰﻣﻦ ﺻﺪﺍﻡ ﻣﻨﻮ ﻳﻜﺪﺭ ﻳﻔﻚ ﺣﻠﻜﻪ ﻟﻮ ﻳﺘﺄﺧﺮ ﻋﻦ ﺩﻭﺍﻣﻪ ﻭﺍﺟﺒﻪ . ﻭﺍﻧﻲ ﻣﺎ ﻋﻮﻟﺖ ﺳﻨﻴﻦ ﺍﻟﺘﻌﺐ ﺗﻄﻠﻌﻠﻲ ﻭﺍﺧﻠﺺ ﻣﻦ ﻫﻠﻀﻴﻢ ﻭﺍﻟﻠﻪ ﻓﺮﺣﺖ ﻛﻠﺶ . ﺭﺣﺖ ﺍﻭﻝ ﺳﺒﻮﻉ ﺍﺣﻼﻡ ﻛﺎﻟﺖ ﻣﺎ ﺍﻃﻴﻖ ﺍﻟﻜﻌﺪﻩ ﻫﻨﺎﻙ . ﻛﻌﺪﻧﻪ ﺍﺑﻴﺖ ﺍﻳﺠﺎﺭ ﺻﻐﻴﺮ ﻗﺮﻳﺐ ﻋﻠﻰ ﻭﺍﺣﺪ ﻣﻦ ﺍﻟﺒﻴﻮﺕ ﻣﺄﺟﺮﻳﻨﻪ ﻫﻤﻪ ﺍﻫﻠﻪ .
ﺍﺣﻼﻡ ﻳﻤﻌﻮﺩﻩ ﻋﺪﻟﻲ ﺑﺪﻟﻲ ﺷﻨﻮ ﻣﻄﻴﻘﻴﻦ ﺍﻟﺮﺟﻌﻪ ﺍﻟﻜﻌﺪﻩ ﻭﺍﻧﻲ ﺷﻠﻮﻥ ﺑﻴﻪ ﺍﺿﻞ ﻭﺣﺪﻱ .
ﺍﻧﻘﻞ ﺭﻭﺣﻚ .
ﻟﻴﺶ ﻫﻮ ﺑﻜﻴﻔﻪ ﺍﻟﻮﺍﺣﺪ ﻳﻨﻘﻞ ﺭﻭﺣﻬﻪ ﻏﻴﺮ ﺳﻨﻪ ﻛﺎﻣﻠﻪ ﺳﻤﻌﻲ ﺣﺠﺎﻳﺘﻲ ﺿﻠﻲ ﻭﻳﺎﻱ ﻭﻳﻦ ﺍﺿﻞ ﺍﻧﻲ ﻭﺣﺪﻱ ﺑﻬﻠﻬﻴﻤﻪ . ﻭﺷﻲ ﺛﺎﻧﻲ ﺷﻴﺠﻴﺒﻨﻲ ﺍﻟﺞ ﻣﺘﺸﻮﻓﻴﻦ ﺑﺲ ﺍﻟﻄﺮﻳﻖ ﻳﺤﺘﺎﺝ ٣ ﺳﺎﻋﺎﺕ ﺭﻭﺣﻪ ﻭ٣ ﺳﺎﻋﺎﺕ ﺭﺟﻌﻪ . ( ﻛﺒﻞ ﺟﺎﻧﺖ ﺑﺲ ﻓﻠﻮﺱ ﺍﻟﺮﻭﺣﻪ ﻭﺍﻟﺮﺟﻌﻪ ﺗﻜﺴﺮ ﺍﻟﻀﻬﺮ )
ﻣﺎ ﺍﻋﺮﻑ ﺭﻋﺪ ﻣﺎ ﻣﺘﻌﻮﺩﻩ ﻉ ﺍﻟﻌﻴﺸﻪ ﻫﻨﺎ ﺍﺑﺪﺩﺩ ﻭﺍﻟﻠﻪ .
ﺗﺤﻤﻠﻲ ﻛﻠﺒﻲ ﻋﻠﻰ ﺣﺴﺎﺑﻲ ﻫﻴﻪ ﺳﻨﻪ ﺑﻠﻜﻲ ﻫﺬﺍ ﺍﻟﻤﻜﺎﻥ ﺧﻴﺮ ﻭﻣﺤﺪ ﻳﻤﻨﻪ ﻻ ﺳﺤﺮ ﻭﻻ ﺷﻌﻮﺫﻩ ﻫﻮﻩ ﻧﻘﻲ ﺯﻳﻦ ﻋﻠﻴﺞ ﻭﻋﻠﻴﻪ ﻭﺑﻠﻜﻲ ﺍﻟﻠﻪ ﻳﺴﻬﻞ .
ﻣﻴﺼﻴﺮ ﺭﻋﺪ ﺷﻨﻮ ﻟﺴﺎ ﻣﺎ ﺍﻳﺴﺖ ﺍﻧﻲ ﺍﻳﺴﺖ ﻭﺭﺣﺖ ....
ﺍﻧﻲ ﻣﺎ ﺃﻳﺄﺱ ﻣﻦ ﺭﺣﻤﻪ ﺍﻟﻠﻪ ﻭﺍﺳﻌﻪ ﻭﺗﺸﻤﻠﺞ ﻭﺗﺸﻤﻠﻨﻲ .....
ﺍﻟﻠﻪ ﻛﺮﻳﻢ ....
ﻭﺭﻩ ﺳﺒﻮﻋﻴﻦ . ﻳﻮﻡ ﺍﻟﺠﻤﻌﻪ ﺟﺎﻧﺖ ﻣﺎﻛﻮ ﺟﻤﻌﻪ ﻭﺳﺒﺖ ﺭﺟﻌﺖ ﺍﻟﺨﻤﻴﺲ ﻭﺍﻧﻄﻠﻘﻨﻪ ﺑﻠﻠﻴﻞ ﺷﻔﺖ ﺍﻫﻠﻲ ﻭﻣﺮﻳﻨﻪ ﻋﻠﻴﻬﻢ ﻭﺳﻠﻤﻨﻪ ﻭﺳﻮﻟﻔﺖ ﻭﻱ ﺍﻣﻴﺮ ﺍﺧﻮﻳﻪ ﻛﺘﻠﻪ ﻟﻴﺶ ﻣﺘﺮﻭﺡ ﻧﺎﺧﺬ ﻛﺎﻉ ﻭﻧﺰﺭﻋﻬﺎ ﻭﺗﻮﻛﻒ ﺑﻴﻬﺎ ﻭﺍﻟﻠﻪ ﺍﺣﺴﻦ ﺍﻟﻚ ﺷﺮﺍﻳﻚ .
ﻳﺨﻮﻱ ﻣﺎ ﻋﻨﺪﻱ ﻭﺍﻟﻠﻪ .
ﺍﻛﻠﻚ ﺍﺷﻮ ﺧﻮﺵ ﻧﺎﺱ ﻭﻳﺰﺭﻋﻮﻥ ﻭﺻﻠﻮﺍﺕ ﺍﻟﻠﻪ ﻓﺎﺗﺤﻬﺎ ﺑﻮﺟﻮﻫﻢ ﺍﻧﻲ ﺍﻓﻜﺮ ﻧﺎﺧﺬ ﺍﻟﻨﻪ ﻗﻄﻌﻪ ﺍﺭﺽ ﻫﻨﺎﻙ ﻭﻫﻴﻪ ﺭﺧﻴﺼﻪ ﺗﺮﻩ ﻣﻮ ﻏﺎﻟﻴﻪ ﺍﺭﺧﺺ ﻣﻦ ﺑﻴﻮﺗﻨﻪ ﺍﻟﻠﻪ ﻭﻛﻴﻠﻚ ﺗﺼﺐ ﺍﻟﻨﻪ ﺫﻫﺐ .
ﻭﺍﻟﻠﻪ ﻣﺎ ﺍﺩﺭﻱ ﺍﻓﻜﺮ .
ﻓﻜﺮ ﻭﺭﺩﻟﻲ ﺍﻟﺨﺒﺮ .
ﻳﻮﻡ ﺍﻟﺠﻤﻌﻪ ﺑﻠﻠﻴﻞ ﺭﺟﻌﻨﻪ
.....
ﺍﺣﻼﻡ : ﺍﻟﻴﻮﻡ ﻛﻠﻬﺎ ﺗﻜﻠﻲ ﺻﺎﻳﺮﻩ ﺯﺭﻛﻪ .
ﺑﻠﻌﻜﺲ ﺻﺎﻳﺮﻩ ﺣﻠﻮﻩ .
ﺷﻨﻮ ﺣﻠﻮﻩ ﻣﺎ ﻣﺒﻴﻨﻪ ﺍﺻﻼ ﺻﺎﻳﺮﻩ ﺍﺧﺰﻱ ﻣﻦ ﺍﻟﺸﻤﺲ .
ﻫﺬﺍ ﻓﻴﺘﺎﻣﻴﻦ ﺩﻱ ﺍﻟﻠﻪ ﻭﻛﻴﻠﺞ ﻳﻨﺸﻂ ﺍﻟﻤﺒﺎﻳﺾ ﻭﻛﻞ ﺍﻟﻔﻮﺍﺋﺪ ﺑﻲ ﻣﺎ ﻋﻠﻴﺞ ﺑﻠﻴﺤﺠﻲ ﺍﻫﻢ ﺷﻲ ﺍﻧﻲ ﺍﺷﻮﻓﺞ ﺍﺣﻠﻰ ﻣﺮﻩ ﺑﻠﻌﺎﻟﻢ .
.
ﻣﺮﺕ ﺍﻻﻳﺎﻡ ﻭﺻﺎﺭ ﺍﻟﺸﻐﻞ ﻛﻠﺶ ﺻﻌﺐ ﻭﺍﻟﺘﺰﺍﻡ ﻭﺻﺎﺭ ﻛﻞ ﻣﻮﺿﻒ ﺍﻟﻪ ﺑﻠﺸﻬﺮ ﺳﺒﻮﻋﻴﻦ ﻳﻠﺰﻡ ﺧﻔﺮ ﻳﻮﻡ ﺍﻟﺠﻤﻌﻪ ﻳﻌﻨﻲ ﻣﻴﺮﺟﻊ ﻻﻫﻠﻪ ﻭﻫﺎﻱ ﺟﺎﻧﺖ ﻛﻠﺶ ﺻﻌﺒﻪ ﻋﻠﻴﻨﻪ ﻭﺍﺣﻼﻡ ﺗﻀﻞ ﻭﺣﺪﻫﺎ ﻭﺍﻟﻮﺿﻊ ﻳﻮﺗﺮ ﺍﻟﻮﺍﺣﺪ ﺑﻠﺨﺎﻟﻲ ﺑﻼﺵ .
ﻭﻣﺮ ﻋﻠﻰ ﺗﻌﻴﻨﻲ ﺷﻬﺮﻳﻦ ﻛﺎﻣﻼﺕ ﻭﺷﻐﻠﻪ ﺍﻟﺨﻔﺮ ﻣﺮﺗﻴﻦ ﺑﻠﺸﻬﺮ ﺍﺣﺴﻬﻦ ﻛﻠﺶ ﻫﻮﺍﻱ ﻋﻠﻴﻪ . ﻻﻥ ﺧﻄﻴﻪ ﺗﻀﻞ ﻭﺣﺪﻫﺎ ﻣﺘﺮﻫﻢ .
ﺍﺧﺮ ﺷﻲ ﺭﺟﻌﻨﻪ ﻟﻠﺒﻴﺖ . ﺍﺣﻼﻡ ﺍﺷﺘﺎﻗﺖ ﻟﻠﺒﻴﺖ ﻛﺎﻟﺖ ﺑﻌﺪ ﻣﺎ ﺍﺭﻭﺡ ﻭﻳﺎﻙ ﺗﺮﻳﺪ ﺗﺮﻭﺡ ﺭﻭﺡ ﻭﺣﺪﻙ ﺑﺮﺍﺣﺘﻚ ﺷﻲ ﻳﺨﺼﻚ ﺑﺲ ﺍﻧﻲ ﻣﺎ ﺍﺭﻭﺡ ﻉ ﺍﻻﻗﻞ ﺗﻀﻞ ﻳﻤﻲ ﻟﻮ ﺳﺤﺮ ﻟﻮ ﺳﺎﺭﻩ ﺍﻱ ﻭﺣﺪﻩ ﻣﻦ ﺑﻨﺎﺕ ﺣﻤﻮﻳﻨﻲ ﻳﻀﻠﻦ ﻳﻤﻲ .
ﻭﺍﻧﻲ ﺍﺣﻼﻡ ﻣﺎ ﻓﻜﺮﺗﻲ ﺑﻴﻪ .
ﺷﻠﻮﻥ ﻳﻌﻨﻲ ﺗﺨﻠﻴﻨﻲ ﻭﺣﺪﻱ ﺑﻠﻤﻜﻄﻮﻋﻪ ﺑﺲ ﺍﺭﻳﺪ ﺍﻋﺮﻑ ﺭﻋﺪ ﺍﻧﺖ ﺷﻨﻮ ﻣﺘﺤﺲ ﺑﻴﻪ .
ﺧﻮ ﺍﻧﺘﻲ ﺣﺴﻲ ﺑﻴﻪ ﻫﻴﻪ ﺳﻨﻪ ﺷﻨﻮ ﻗﻴﻤﻪ ﺍﻟﺴﻨﻪ ﺍﺫﺍ ﻛﻌﺪﺗﻲ ﻭﻳﺎﻱ .
ﻋﻠﻰ ﺷﻨﻮ ﺍﻛﻌﺪ ﺷﺎﻳﻒ ﺍﻧﺖ ﺍﻟﻠﻴﻞ ﻫﻨﺎﻙ ﺷﻴﺼﻴﺮ ﺑﻴﻪ ﻋﻠﻰ ﺳﺎﻋﻪ ﻟﻨﻪ ﺟﺎﻓﺘﻨﻲ ﻭﺍﺣﺪ .....
ﻣﺨﺎﻟﻒ ﺍﺧﺬ ﻭﺣﺪﻩ ﻣﻦ ﺍﻟﺒﻨﺎﺕ ﻭﻳﺎﻧﻪ .....
ﻣﻌﻮﻛﺎﺕ ﺍﻣﻬﺎﺗﻬﻦ ﻳﻨﻄﻨﻬﻦ ﻣﻮ ﻓﺸﻠﻪ ﺷﻜﻠﻬﻦ ﺍﺧﺎﻑ ﻭﺍﺿﺤﻲ ﺍﺑﻨﺎﺗﺠﻦ ....
ﺗﻀﺤﻴﻦ ﻫﻴﻪ ﺍﺳﻤﻬﺎ ﺗﻀﺤﻴﻦ ﻟﻴﺶ ﺍﻧﺘﻲ ﻣﺜﻼ ﺗﻀﺤﻴﻦ ؟
ﻭﺍﻟﻠﻪ ﺑﺲ ﻋﻴﺸﺘﻲ ﻭﻳﺎﻙ ﻛﺎﻓﻴﻪ .
ﻫﺎﺍﺍﺍ ﺻﺪﻙ ﻫﻴﺞ ﺻﺎﺭ ﺍﻟﺤﺠﻲ ﻳﻌﻨﻲ . ﻭﺍﻟﻠﻪ ﻣﺤﺪ ﺟﺎﺑﺮﺝ ﻋﻠﻴﻪ ﺍﻟﻠﻪ ﻭﻣﺤﻤﺪ ﻭﻋﻠﻲ ﻭﻳﺎﺝ .....
ﻃﺒﻌﺎ ﺻﺮﺕ ﻛﺦ .
ﺍﻛﻠﺞ ﺍﻧﺘﻲ ﻟﺘﻀﻠﻴﻦ ﺗﻤﺴﻠﺘﻴﻦ ﻣﺎﻛﻮ ﻧﺴﻮﺍﻥ ﻛﺎﻋﺪﺍﺕ ﻭﻱ ﺭﺟﻮﻟﺘﻬﻦ ﻟﻮ ﺑﺲ ﺍﻧﺘﻲ .
ﺭﻋﺪ ﺟﺎﻱ ﺍﻛﻠﻚ ﺍﺧﺎﻑ .....
ﻣﻴﺨﺎﻟﻒ ﺍﻧﻲ ﺭﺍﺡ ﺍﺭﻭﺡ ﻻﻣﺞ ﻭﺍﺧﻠﻴﻬﺎ ﺗﺠﻲ ﻭﻳﺎﺝ ﺑﺲ ﻟﻴﻠﻪ ﺍﻟﺠﻤﻌﻪ ﻫﻢ ﺍﺧﻠﻲ ﺣﺴﻦ ﺍﺧﻮﻱ ﻳﺠﻴﺐ ﻣﺮﺗﻪ ﻟﻮ ﻭﺍﺣﺪ ﻣﻦ ﻭﻟﺪﻩ ﻭﺍﻟﺴﺒﺖ ﻳﺮﺟﻌﻮﻥ
ﺍﺫﺍ ﻫﻴﺞ ﻣﻴﺨﺎﻟﻒ .
ﻋﻔﺘﻬﺎ ﻭﺭﺣﺖ ﻟﺤﺴﻦ ﻛﺎﻝ ﻣﻴﺨﺎﻟﻒ ﺍﺫﺍ ﻛﻠﺶ ﻋﻤﻲ ﺍﻧﻲ ﺍﺭﻭﺡ ﻭﻳﺎﻫﺎ ﻛﻞ ﺍﺣﻨﻪ ﻫﻨﺎﻙ . ﺑﺲ ﻫﻠﻴﻠﺘﻴﻦ ﺳﻬﻠﻪ .
ﻣﺮﻳﺖ ﻋﻠﻰ ﺍﻣﻴﺮ ﻫﺎ ﻳﺨﻮﻱ ﺷﻜﻠﺖ .
ﻛﺎﻝ ﺍﻟﻔﻠﻮﺱ ﺍﻟﻲ ﺟﺎﻣﻌﻦ ﻗﻠﻴﻼﺕ ﻣﺎ ﻳﻜﻔﻦ .
ﺍﻧﻲ ﻋﻨﺪﻱ ﻓﻠﻮﺱ ﺿﺎﻣﻬﻦ ﻭﺭﺍﺗﺒﻲ ﻣﻦ ﺍﺳﺘﻠﻤﻪ ﺣﺘﻪ ﻧﺸﻮﻑ ﺍﻟﻨﻪ ﻛﺎﻉ ﺷﻮﻳﻪ ﺟﺒﻴﺮﻩ ﻧﺰﺭﻋﻬﺎ ﻭﻣﺤﺎﺻﻴﻠﻬﺎ ﻧﺘﻘﺎﺳﻤﻬﻦ ﺧﻴﺮ ﻣﻦ ﺍﻟﻠﻪ .
ﺑﻜﻴﻔﻚ ﺧﻮﻳﻪ ﻳﻼ ﺗﻮﻛﻞ ﻋﻠﻰ ﺍﻟﻠﻪ .
ﻣﺮﺕ ﺍﻻﻳﺎﻡ ﻭﺍﻣﻴﺮ ﻟﻢ ﺍﻟﻌﻨﺪﻩ ﻭﺍﻟﻤﺎﻋﻨﺪﻩ ﻻﻥ ﻫﻢ ﺷﻐﻠﻪ ﺗﻌﺒﺎﻥ ﻣﻮ ﺫﺍﻙ ﺍﻟﺸﻲ ﻳﻮﻡ ﻳﻄﻠﻊ ﻳﻮﻡ ﻻ ﻭﻫﻢ ﺑﻴﺖ ﻭﻣﺴﺆﻟﻴﻪ . ﻓﺠﺎﺏ ﺧﻄﻴﻪ ﺍﻟﻌﻨﺪﻩ ﻭﺍﻟﻤﺎﻋﻨﺪﻩ ﻭﺍﻧﻲ ﺍﻟﻲ ﻋﻨﺪﻱ ﻭﺍﻟﻤﺎﻋﻨﺪﻱ . ﻭﺍﺷﺘﺮﻳﻨﻪ ﺍﺭﺽ ﺯﺭﺍﻋﻴﻪ ﺟﺎﻧﺖ ﺑﻼﻃﺮﺍﻑ ﺑﻌﻴﺪﻩ . ﺻﺢ ﻫﻴﻪ ﺟﺎﻧﺖ ﺭﺧﻴﺼﻪ ﺑﻠﻨﺴﺒﻪ ﻟﻠﻜﻴﻌﺎﻥ ﺍﻟﺒﻘﻴﻪ ﺑﺲ ﺍﺣﻨﻪ ﺟﻨﻪ ﺣﺎﺳﺒﻴﻦ ﺣﺴﺎﺏ ﺍﻟﻤﺤﺎﺻﻴﻞ ﻭﺍﻟﻜﻌﺪﻩ ﻭﺍﻟﺒﻨﻴﺎﻥ ﺑﻴﺖ ﻳﻠﻤﻨﻪ ﻉ ﺍﻻﻗﻞ ﻫﺬﺍ ﺍﻟﻲ ﺿﻬﺪﻧﻪ .
ﺍﻧﺘﻘﻠﻨﻪ ﺍﻧﻲ ﻭﺍﺣﻼﻡ ﻭﺍﻣﻴﺮ ﻭﻣﺮﻩ ﺍﻣﻴﺮ ﺿﻠﺖ ﺑﻠﺒﻴﺖ ﻋﻠﻰ ﺣﺴﺎﺏ ﺟﻬﺎﻟﻬﺎ ﻣﺘﻜﺪﺭ ﺗﻨﺰﻝ .
ﻭﻛﻞ ﻓﺘﺮﻩ ﻧﺮﺟﻊ ﻟﻠﺒﻴﺖ ﻭ ﺍﺣﻼﻡ ﺑﻠﻤﻮﺕ ﻳﻼ ﺍﺭﺟﻌﻬﺎ ﻭﻳﺎﻱ ﺑﺪﻭﻥ ﺍﻱ ﺩﻟﻴﻞ ﻣﻘﻨﻊ . ﻟﻮ ﺗﺘﺤﺠﺞ ﻣﺎ ﺍﺭﻭﺡ ﻟﻮ ﻣﻮﺕ ﺣﺮ ﻟﻮ ﺷﻐﻼﺕ ﺍﺻﻼ ﻣﺎ ﻣﻮﺟﻮﺩﻩ ﻭﺍﻧﻲ ﺍﻋﺮﻑ ﺍﻧﻮ ﻏﺎﻳﺘﻬﺎ ﺍﻟﻮﺣﻴﺪﻩ ﺗﻀﻞ ﻗﺮﻳﺒﻪ ﻉ ﺍﻟﻜﺸﺎﻓﺎﺕ .
ﻭﺍﺧﺮ ﻣﺮﻩ ﺭﺟﻌﻨﻪ ﻣﺎ ﻗﺒﻠﺖ ﺗﺮﺟﻊ ﻭﻳﺎﻱ ﻭﺗﻌﺎﺭﻛﺖ ﺍﻧﻲ ﻭﻳﺎﻫﺎ
ﺍﻧﺘﻲ ﺍﻧﺎﻧﻴﻪ ﻣﺘﻔﻜﺮﻳﻦ ﺑﺲ ﺑﺮﻭﺣﺞ .....
ﺭﻋﺪ ﺍﻧﻲ ﺍﺧﺎﻑ ﻭﺣﺪﻱ . ﻫﻨﺎﻙ
ﺷﻨﻮ ﺗﺨﺎﻓﻴﻦ ﺷﻨﻮ ﻣﻦ ﺍﻋﻮﻓﺞ ﺗﺠﻴﺒﻴﻦ ﻭﺍﺣﺪ ﻳﻤﺞ ﻣﺜﻼ .
ﻻ ﺑﺲ ﻫﻨﺎ ﺑﻴﺘﻲ ﻭﻣﺘﻌﻮﺩﻩ .
ﻳﻌﻨﻲ ﺷﻠﻮﻥ ﺗﻌﻮﻓﻴﻨﻲ ﻭﺣﺪﻱ ﻭﺍﻧﻲ ﻣﻨﻮ ﺍﻟﻲ ﺍﺿﻞ ﺧﻮ ﻣﺎ ﺍﻧﺰﻝ ﺍﻟﺞ ﺳﺒﻮﻋﻴﺎ ﻭﺍﻧﺘﻲ ﺗﺪﺭﻳﻦ ﺑﺸﻐﻠﻪ ﺍﻟﺨﻔﺎﺭﺍﺕ ﻭﺻﻌﺒﻪ ﻋﻠﻴﻪ ﻭﻫﻴﻪ ﺳﻨﻪ ﻭﺣﺪﻩ ﺗﺤﻤﻠﻴﻬﺎ ﻛﻀﻪ ﺍﺻﻌﺐ ﺷﻲ ﺑﻴﻬﺎ .
ﻣﺎ ﺍﻭﻟﻲ ﻟﻬﻨﺎﻙ ﻟﻠﻬﻤﺞ ﺷﻨﻮ ﺷﻌﻨﺪﻱ ﻣﻮﻟﻴﻪ . ﻫﺎﻱ ﻣﻮ ﻣﺮﺓ ﺍﻣﻴﺮ ﻭﻳﺎﻱ ﻣﺎ ﺗﻨﺰﻝ ﻭﻱ ﺭﺟﻠﻬﺎ ﻟﻮ ﺑﺲ ﺍﻧﻲ ﻛﻮﻥ ﺍﺭﻛﺾ ﻭﺭﺍﻙ .
ﺍﻧﺘﻲ ﺷﻴﺨﺼﺞ ﺑﻴﻬﺎ ﺍﻧﻲ ﺍﺭﻳﺪﺝ ﻭﻳﺎﻱ ﺍﺷﺘﺎﻗﻠﺞ ﺑﻌﺪﻳﻦ ﺟﻬﺎﻟﻬﺎ ﻋﺪﻫﻢ ﻣﺪﺍﺭﺱ ﺍﻧﺘﻲ ﺷﻌﻨﺪﺝ ؟
ﺍﻱ ﻃﺒﻌﺎ ﺑﺪﺕ ﺍﻟﻌﻴﺎﺭﺍﺕ . ﻣﺎ ﺍﺭﻭﺡ ﻟﻮ ﺗﻨﺰﻝ ﺍﻟﺴﻤﺎﻭﺍﺕ .
ﺗﺮﺣﻴﻦ ﻭﻏﺼﺒﺎ ﻋﻨﺞ ﺷﻨﻮ ﺍﻧﻲ ﺷﻌﻨﺪﻱ ﻛﺎﻋﺪ ﻭﺣﺪﻱ . ﻟﻮ ﻣﺎ ﺩﻭﺍﻣﻲ ﻭﺍﻛﻮﻝ ﺣﺮﺍﻣﺎﺕ ﺗﻌﺐ ﺍﻟﻌﻤﺮ ﻳﺮﻭﺡ ﺟﺎﻥ ﻭﺍﻟﻠﻪ ﻋﻔﺘﻪ ﻭﺿﻠﻴﺖ ﻛﺎﻋﺪ ﺑﺲ ﻟﻴﺶ ﺍﻟﻮﺿﻴﻔﻪ ﻭﺍﺣﺪ ﻳﻌﻮﻓﻬﺎ ﺧﻮ ﻭﺍﺣﺪ ﻳﻄﻮﺭ ﻣﻦ ﺭﻭﺣﻪ . ﻭﺷﻲ ﺛﺎﻧﻲ ﺷﻌﺪﻧﺞ ﻛﺎﻋﺪﻩ ﻭﺣﺪﺝ ﻫﻨﺎ ﺑﺲ ﺍﺭﻳﺪ ﺍﻋﺮﻑ ﺍﻟﻐﺎﻳﻪ ﻣﻦ ﻫﻠﺸﻲ ﺷﻨﻮﻭﻭﻭ؟؟؟
....
ﻛﻞ ﺍﻟﻲ ﺟﺎﻥ ﺗﺴﻮﻱ ﻛﻠﺒﺖ ﺧﻠﻔﺘﻬﺎ ﻭﻛﺎﻟﺖ ﻣﺎ ﺍﺭﻭﺡ . ﺍﻧﻲ ﻋﻔﺘﻬﺎ ﻛﺘﻠﻬﺎ ﻳﻄﺒﺞ ﻃﻮﺏ ﻟﺘﻮﻟﻴﻦ ﺷﻠﻌﺘﻲ ﻛﻠﺒﻲ .
ﺛﺎﻧﻲ ﻳﻮﻡ ﺍﻟﺼﺒﺢ ﻃﻠﻌﻨﻪ ﺍﻧﻲ ﻭﺍﻣﻴﺮ ﻭﻣﺮﺓ ﺍﻣﻴﺮ ﻭﻳﺎﻧﻪ .
ﻫﺎ ﺷﻌﺠﺐ ﻣﻮ ﻣﺘﺮﻭﺡ ﺍﻭﻝ ﺗﺎﻟﻲ .
ﻳﺨﻮﻱ ﻟﻮ ﻣﺎ ﺍﻟﻤﺪﺍﺭﺱ ﺟﺎﻥ ﻣﺎ ﺿﻠﺖ ﻫﻨﺎ ﻫﺎﻱ ﻣﺎ ﺗﻌﺮﻓﻬﺎ ﺑﻴﻬﺎ ﻣﺮﺽ ﻏﻴﺮﻩ .
ﻫﻬﻬﻬﻬﻪ ﺧﻄﻴﻪ . ﺣﺰﺕ ﺑﻜﻠﺒﻲ ﻛﻠﺶ ﻧﺰﻟﺖ ﻭﻳﺎ ﻭﺍﻧﻲ ﻣﺎ ﻧﺰﻟﺖ ﻭﻳﺎﻱ ﻭﻫﻨﻪ ﺑﻨﺎﺕ ﻋﻢ . ﻛﻠﺶ ﺍﻧﻘﻬﺮﺕ . ( ﻻﻥ ﺍﺣﻨﻪ ﻛﻠﻨﻪ ﻣﺎﺧﺬﻳﻦ ﺑﻨﺎﺕ ﻋﻤﻨﻪ ) . ﻭﺻﻠﻨﻪ ﻟﻠﻤﻨﻄﻘﻪ ﺍﻟﻲ ﻣﺎﺧﺬﻳﻦ ﺑﻴﻬﺎ ﻛﺎﻋﻨﻪ . ﻭﻛﺎﻝ ﺍﻣﻴﺮ ﺧﻞ ﻧﺒﻨﻲ ﺑﻴﺖ ﻣﺮﺗﺐ ﻭﻧﻜﻌﺪ ﺑﻲ
ﻳﺨﻮﻱ ﻣﻨﻴﻠﻨﻪ ﺷﻮ ﻫﻴﻪ ﻛﺎﺿﻴﻪ ﺍﻧﺖ ﻫﻢ ﺟﻨﻚ ﺗﺼﻔﻚ .
ﻣﺎ ﺗﺮﻫﻢ ﺍﻟﺒﻴﺖ ﺻﻐﻴﺮ ﻣﺎ ﻳﻮﺳﻌﻨﻪ ﻭﺍﻧﻲ ﺍﺫﺍ ﺍﺳﺘﻘﺮﻳﺖ ﻫﻨﺎ ﺣﺘﻪ ﺟﻬﺎﻟﻲ ﺍﺟﻴﺒﻬﻢ ﺑﺲ ﺧﻞ ﺍﺷﻮﻑ ﺭﺍﺳﻲ ﻣﻦ ﺭﺟﻠﻴﻪ ﻫﻨﺎ .
ﺛﺎﻧﻲ ﻳﻮﻡ ﺭﺣﺖ ﻟﻠﺪﻭﺍﻡ ﻭﺿﻞ ﺍﻣﻴﺮ ﻳﺰﺭﻉ ﻭﻳﺮﺗﺐ ﺑﻠﻜﺎﻉ ﻭﺍﺟﻮ ﺍﻟﻔﻼﻟﻴﺢ ﺍﻟﻲ ﺑﺼﻔﻨﻪ ﺑﻴﺖ ﺣﺠﻲ ﺭﺿﻮﺍﻥ ﻭﻛﺎﻟﻮ ﺍﺣﻨﻪ ﺑﺨﺪﻣﺘﻜﻢ .
.
.
.
* ﻓﻲ ﺍﻟﺤﻴﺎﺓ ﺍﺣﻴﺎﻧﺎً ﺍﻧﺖ ﺗﺤﺘﺎﺝ ﻓﻘﻂ ﺍﻥ ﺗﻀﻊ ﺍﻟﻤﺎﺿﻲ ﺟﺎﻧﺒﺎ ﻟﻜﻲ ﺗﻤﻀﻲ ﻗﺪﻣﺎً ﻓﻲ ﺣﻴﺎﺗﻚ *
ﺑﻴﻦ ﺍﻟﺤﺐ ﻭﺍﻟﺤﺮﺏ ﻧﻴﺮﺍﻥ ﺗﺸﺘﻌﻞ
يتبع
السلام عليكم ورحمة الله وبركاته ، موقع روايات-Novels يهتم بنشر جديد الروايات للكتاب العراقين ، حمل تطبيقنا على جوجل بلاي وستمتع بلقراءة ، تمنياتنا لكم بلتوفيق
تحويل كودإخفاء محول الأكواد الإبتساماتإخفاء