رواية لم تكن خطيئتنا ج2 الجزء الثالث
للكاتبة نور ناصر
.
.
ﺳﻤﻴﺔ .. ﺻﺪﺩﻙ ﻣﻨﻮ ﺧﻄﺒﻬﺎ ﺭﺿﻮﺍﺍﻥ ﻣﻮﻭ . ؟
ﺃﻣﺎﻥ .. ﻻ ﻣﻮ ﺭﺿﻮﺍﻥ ﺍﻟﻲ ﺧﻄﺒﻬﺎ ﻭﺍﺣﺪ ﺍﺑﻦ ﺻﺪﻳﻖ ﺍﺑﻮﻳﺔ
: ﺷﻌﺠﺐ ﻭﺍﻓﻘﺖ ﻭﺍﻣﻚ ﺗﺮﻳﺪﻫﺎ ﻟﺮﺿﻮﺍﻥ ..
: ﺭﺿﻮﺍﻥ ﻣﺴﺘﺤﻴﻞ ﻳﺘﺰﻭﺟﻬﺎ ﻻﻥ ﻫﻲ ﺭﺑﺖ ﻭﻳﺎ ﻭﻣﺜﻞ ﺍﺧﺘﻪ ..
: ﻫﺎ ..
: ﺍﻱ ﺣﺒﻴﺒﻲ ﻭﺭﺍﺡ ﻳﺒﻘﻰ ﺭﺿﻮﺍﻥ ﻋﺎﺋﻖ ﻭﻳﺄﺧﺮ ﺧﻄﻮﺑﺘﻨﺎ .
: ﻫﻮ ﺑﺲ ﺭﺿﻮﺍﻥ ﻭﺍﻣﻚ؟ ﺗﮕﻠﻲ ﺯﻭﺍﺟﺞ ﻣﻦ ﺍﻣﺎﻥ ﮔﻄﻨﺔ ﻭﺷﻴﻠﻴﻬﺎ ﻣﻦ ﺍﺫﻧﺞ ..
: ﻻﺗﻬﺘﻤﻴﻦ ﺍﻟﻜﻼﻣﻬﺎ ﺑﺴﺎﻋﺔ ﻋﺼﺒﻴﺔ
ﺍﻧﺖ ﺣﺎﻭﻟﻲ ﺗﻜﺴﺒﻴﻨﻬﺎ ﻭﺑﺎﻟﺤﻔﻠﺔ ﺍﺭﻳﺪ ﺣﻀﻮﺭﺝ ﻣﻤﻴﺰ ﺗﺴﻠﻤﻴﻦ ﻉ ﺍﻣﻲ ﻭﺍﻟﺒﻨﺎﺕ ﻭﺑﺤﺮﺍﺭﺓ ﻭﺑﺎﺭﻛﻲ ﻟﺮﺟﻮﺍﻥ .. ﻭﺗﺒﺴﻤﻲ ﻣﻮ ﺷﺎﻳﻠﻪ ﻟﺴﺎﻥ ﻣﺎﻝ ﻋﺸﺮ ﻧﺴﻮﺍﻥ ﺗﺘﻨﻈﺮﻳﻦ ﺍﺣﺪ ﻳﺤﺠﻲ ﻋﻠﻴﺞ ﺣﺘﻰ ﺗﻬﺪﻳﻦ .
: ﺗﺮﻩ ﺍﻋﺮﻑ ﻣﺎﺣﺎﺟﺔ ﺗﻌﻠﻤﻨﻲ ..
: ﻟﺨﺎﻃﺮﻱ ﺳﻤﻴﺔ ﻫﺎﻱ ﺍﺧﺮ ﻓﺮﺻﺔ ﻛﺪﺍﻣﻨﺎ ﺣﺘﻰ ﻧﺮﺗﺒﻂ ﺗﻌﺒﺖ ﻭﺍﻧﺖ ﺑﻌﻴﺪﺓ ﻋﻨﻲ ..
ﻓﺮﺍﻛﺞ ﻣﻌﺬﺑﻨﻲ ﺍﺭﻳﺪﺝ ﻳﻤﻲ ﺍﻟﺼﺒﺢ ﺍﺭﻳﺪ ﺍﻛﻌﺪ ﺍﻟﻜﺎﺝ ﻣﺘﻤﺪﺩﻩ ﺑﺼﻔﻲ ﻭﺭﺍﺳﺞ ﻋﻠﻰ ﺻﺪﺭﻱ ﻭﺍﻳﺪﻱ ﻣﺤﺎﻭﻃﺘﺞ ﻭﻣﻠﻤﺲ ﺷﻌﺮﺝ ﺑﻜﻔﻲ ﺍﺣﺲ ﺑﺪﻓﻮ ﺟﺴﻤﺞ .. ﺍﻛﻌﺪ ﺍﺑﻮﺳﺞ ﻋﻠﻰ ﺭﺍﺳﺞ ﻭﺍﺷﻢ ﻋﻄﺮ ﺷﻌﺮﺝ ﺍﺭﻓﻊ ﺭﺍﺳﺞ ﺍﻟﻲ ﻭﺍﺗﺬﻭﻕ ﻋﺴﻞ ﺷﻔﺎﻓﺞ ﻭﺍﺗﺮﻙ ﻋﻼﻣﺔ ﻋﻠﻰ ﻋﻨﻘﺞ ..
ﺍﻭﻭﻭﻭﻳﻠﻲ ﻳﻤﻪ ﺷﺪﻳﺤﺠﻲ ﺑﺪﺍﺧﻠﻲ ﻓﺮﺣﺎﻧﻪ ﺷﻜﺪ ﺭﺍﻳﺪﻧﻲ ﻭﺭﺍﻳﺪ ﺍﻛﻮﻥ ﻳﻤﻪ ﻣﺎﺗﻮﻗﻌﺖ ﺍﻧﺤﺐ ﻫﺎﻟﺪﺭﺟﻪ
ﺍﻭﻭﻑ ﻛﻼﻣﻪ ﻳﻨﺰﻝ ﻣﺜﻞ ﺍﻟﺸﻬﺪ ﻋﻠﻰ ﻗﻠﺒﻲ ﻭﺍﺧﺠﻞ ﺧﺠﻞ ﻋﺸﺎﮒ .
ﻗﻔﻠﺘﻪ ﺑﻮﺟﻬﻪ ﺑﺴﺮﻋﺔ ﺧﺠﻠﻨﻲ ﻣﻨﻪ
.. ﻟﺤﻈﺎﺕ ﻭﺭﺟﻊ ﺧﺎﺑﺮﻧﻲ
ﺟﺎﻭﺑﺘﻪ ﻃﮕﺎﻫــــﻪ ﺿﺤﻜﻪ ﺷﻜﺒﺮﻫﺎ .. ﺍﺑﺘﺴﻤﺖ ﻋﻠﻰ ﺍﺛﺮﻫﺎ .. ﮔﺎﻝ ﺷﺒﻴﺞ ﺳﺪﻳﺘﻲ؟
ﺳﻤﻴﺔ : ﺍﻣﺎﻥ ﻫﻮﺏ ﻫﻮﺏ ﻋﻠﻰ ﻫﺎﻟﻜﻼﻡ ﺗﺮﻩ ﻋﺒﺮﺕ ﺍﻟﺮﻭﻧﮓ ﺳﺎﻳﺪ .
ﺿﺤﻚ ﻭﺭﺟﻊ ﻳﺘﻐﺰﻝ ﺑﻴﻪ .. ﺍﺫﻭﺏ ﺑﺼﻮﺗﻪ ..
ﺍﻟﺒﻴﺖ ﻭﺣﺸﺔ ﻭﺿﻮﺟﻪ .. ﺑﻌﺪ ﺭﻗﻴﺔ ﻭﺻﻔﺎ
ﺑﺲ ﺍﻣﺎﻥ ﻳﺮﺩ ﻋﻨﻲ ﻭﺣﺸﺘﻲ ﺩﻭﻣﻪ ﻣﺘﻮﺍﺻﻞ ﻭﻳﺎﻱ ..
ﻓﺎﻃﻤﺔ ﻣﻮ ﻫﺎﻟﮕﺪ ﻭﻳﺎﻫﺎ ﻛﻠﻪ ﻣﻨﻌﺰﻟﻪ ﻻﻥ ﻣﺎﺍﺣﺲ ﻧﻔﺴﻲ ﺍﺣﺐ ﺍﺗﻌﻤﻖ ﺑﺎﻟﺤﺠﻲ ﻭﻳﺎﻫﺎ ﻭﺍﻟﺸﻘﺔ ﻓﺒﻘﻴﺖ ﻋﺎﺯﻟﺔ ﻧﻔﺴﻲ .
.. ﻟﺒﻴﺖ ﺭﻏﺒﺘﻪ ﻭﺍﺳﺘﻌﺪﻳﺖ ﻟﻠﺤﻔﻠﺔ . ﻛﻞ ﺷﻲ ﻳﻬﻮﻥ ﻻﺟﻠﻪ . ﻳﻮﻡ ﺛﺎﻧﻲ ﺍﻟﺼﺒﺢ ﮔﻌﺪﺕ ﺷﻔﺖ ﺍﺑﻮﻱ ﻭﻓﺎﻃﻤﺔ ﮔﺎﻋﺪﻳﻦ ﻉ ﺍﻟﺮﻳﻮﮒ ﻳﺸﺎﻗﻮﻥ ﻭﻳﻀﺤﻜﻮﻥ ﺑﻴﺒﻴﺘﻲ ﻛﺎﻋﺪﻩ ﻳﻤﻬﻢ ﻭﺗﺸﺮﺏ ﺟﺎﻱ ..
ﺷﺎﻓﻨﻲ ﺍﺑﻮﻱ ﻛﺎﻝ ﺗﻌﺎﻱ ﺍﻛﻠﻲ ﺑﺎﺑﺎ ..
ﻛﺘﻠﻪ ﻣﺎﺍﺷﺘﻬﻲ ﺑﺲ ﺍﺭﻳﺪ ﺍﺭﻭﺡ ﻟﻠﺴﻮﮒ ﻣﻤﻜﻦ ﺗﻮﺩﻳﻨﻲ .
ﺍﻳﻮﺏ .. ﺍﻱ ﺻﺎﺭ ﺗﺪﻟﻠﻴﻦ ﺑﺎﻭﻉ ﻟﻔﺎﻃﻤﺔ
ﻛﺎﻝ ﺗﻜﺪﺭﻳﻦ ﺗﺮﺣﻴﻦ ﻭﻳﺎﻫﺎ ..
ﻓﺎﻃﻤﺔ : ﺍﻱ ﺍﺭﻭﺡ ﻟﻴﺶ ﻻ ﺗﺪﻟﻞ ﺳﻤﻴﺔ
ﺳﻤﻴﺔ . ﻻ ﺍﻧﻪ ﻣﺎﺍﺭﻳﺪ ﺍﺗﻌﺒﺞ ﺍﻧﺖ ﺣﺎﻣﻞ ﻭﺗﻌﺒﺎﻧﺔ ﻭﻣﺎﺑﻴﺞ ﻉ ﺍﻟﻔﺮﺓ ..
: ﻻ ﺣﺒﻴﺒﺘﻲ ﻣﺎﻛﻮ ﺗﻌﺐ ﺍﻥ ﺷﺎﺀﺍﻟﻠﻪ ..
: ﻻ ﺑﺎﺑﺎ ﺍﻧﺖ ﻭﺩﻳﻨﻲ ﺍﻱ ﻣﺤﻞ ﻣﻼﺑﺲ ﻣﻮﻣﺸﻜﻠﺔ ﺍﺩﺑﺮ ﺣﺎﻟﻲ ﺑﻼ ﻣﺎﺍﺗﻌﺒﻬﺎ ..
: ﻓﺪ ﻧﻮﺏ ﺍﻧﻪ ﻫﻢ ﻣﺤﺘﺎﺟﺔ ﺍﻣﺮ ﻉ ﺍﻟﻄﺒﻴﺒﺔ ﻃﻠﺒﺖ ﻣﻨﻲ ﺳﻮﻧﺎﺭ ﻫﺎﻟﺸﻬﺮ ﻭﻫﻢ ﺍﻣﺮ ﻭﻳﺎﺝ ﻉ ﺍﻟﺴﻮﮒ .. ﻭﻫﺎ ﻧﺎﺧﺬ ﺭﻗﻴﺔ ﻭﻳﺎﻧﻪ ﻣﻨﺎﺿﻞ ﺧﺎﺑﺮﻧﻲ ﺍﻭﺩﻳﻬﺎ ﻟﻠﻄﺒﻴﺒﺔ
.
ﻟﻴﺶ ﺷﺒﻴﻬﺎ ﺭﻗﻴﺔ . ﺧﻮ ﻣﺎﻣﺮﻳﻀﺔ . ؟
: ﻻﺗﺨﺎﻓﻴﻦ ﻋﻠﻴﻬﺎ ﺭﺍﺡ ﺗﺼﻴﺮﻳﻦ ﺧﺎﻟﺔ ﻗﺮﻳﺒﺎ ﺍﻥ ﺷﺎﺀﺍﻟﻠﻪ .
: ﺿﺤﻜﺖ ﻳﻌﻨﻲ ﺭﻗﻴﺔ ﺣﺎﻣﻞ؟ ﻓﺪﻳﺘﻬﺎ ﺑﻌﺪ ﻋﻤﺮﻱ ﺍﻟﻠﻪ ﻳﺴﻬﻠﻠﻬﺎ .
ﺍﻳﻮﺏ : ﺍﻱ ﺣﺎﻣﻞ ﺭﺍﺡ ﺗﺴﻮﻳﺞ ﺧﺎﻟﻪ ﻭﺗﺴﻮﻳﻨﻲ ﺟﺪﻭ .
: ﺧﻄﻴﺔ ﻋﻤﺮﻱ ﺭﻗﻴﺔ
ﻓﺎﻃﻤﺔ .. ﺟﻬﺰﻱ ﻧﻔﺴﺞ ﺍﻟﻌﺼﺮ ﻋﻠﻰ ﻭﻛﺖ ..
: ﺧﻮﺵ ﺍﻥ ﺷﺎﺀﺍﻟﻠﻪ ..
-----------
ﻣﻨﺎﺿﻞ .. ﻇﻠﺖ ﺭﻗﻴﺔ ﻓﻮﻙ ﺍﻟﺸﻬﺮﻳﻦ ﻭﺭﺍ ﻣﺎ ﺭﺟﻌﺘﻬﺎ
ﻣﺎﻧﻌﺘﻨﻲ ﻣﻦ ﻧﻔﺴﻬﺎ ﻭﺍﻧﺎ ﻣﺎﺍﻛﺪﺭ ﺍﺿﻐﻂ ﻋﻠﻴﻬﺎ ﺍﺫﻳﺘﻬﺎ ﺑﻤﺎ ﻓﻴﻪ ﺍﻟﻜﻔﺎﻳﺔ .. ﻣﺎﺍﻛﺪﺭ ﺍﺫﻳﻬﺎ ﺍﻛﺜﺮ ..
ﺧﻠﻴﺘﻬﺎ ﻋﻠﻰ ﻫﻮﺍﻫﺎ .. ﻭﺗﺮﻛﺘﻬﺎ ﺑﻌﺪ ﺣﺘﻰ ﻣﺎﺻﻌﺪﺕ ﺍﻟﻬﺎ ﻓﻮﻙ ﺑﻌﺪ .
ﻓﺪ ﻳﻮﻡ ﺍﻟﻤﻐﺮﺏ ﺍﻧﻄﻔﺖ ﺍﻟﻜﻬﺮﺑﺎﺀ
ﻭﺍﺑﻮ ﺍﻟﺴﺤﺐ ﻣﺎﺷﻐﻞ ﺑﻘﻰ ﻓﻮﻙ ﺍﻟﻨﺺ ﺳﺎﻋﺔ ﻣﺎﻛﻮ ﻭﺍﻟﺒﻴﺖ ﻇﻠﻤﻪ .. ﻓﮕﺪﺕ ﺭﻗﻴﺔ ﻣﺎﻛﻮ ﻣﺎﻧﺰﻟﺖ ﺑﺲ ﻻ ﻣﺎﺗﺸﻮﻑ ﻓﻮﻙ ﻭﻣﺎﻳﻤﻬﺎ ﺿﻮﻩ .. ﻭﻫﻲ ﻣﺎﻋﺪﻫﻪ ﺗﻠﻴﻔﻮﻥ ﻻﻥ ﻣﺎﺗﻌﺮﻓﻠﻪ ..
ﺍﺧﺬﺕ ﺗﻠﻴﻔﻮﻧﻲ ﻭﺻﻌﺪﺕ ﻓﻮﻙ .. ﺧﺎﻳﻒ ﻋﻠﻴﻬﺎ ﺧﺎﻑ ﺍﻧﺮﻋﺒﺖ ﻫﺴﻪ .. ﺍﻓﻜﺮ ﺑﻴﻬﺎ ﻣﺜﻞ ﺍﻟﻄﻔﻠﺔ ﺍﻋﺘﺒﺮﻫﺎ ﺑﻨﻴﺘﻲ ﻣﺜﻞ ﺳﺮﻯ ..
ﺻﻌﺪﺕ ﺍﻟﺪﺭﺝ ﺳﻮﻳﺘﻪ ﺑﺎﻳﺘﻴﻦ ﻣﻦ ﺍﻻﺳﺘﻌﺠﺎﻝ ..
ﺩﺧﻠﺖ ﻟﻠﺼﺎﻟﺔ ﺍﻟﻔﻮﻙ ﺷﻔﺘﻬﺎ ﺟﺎﻱ ﺗﻤﻠﺲ ﺑﺎﻟﺤﺎﻳﻂ
ﺷﺎﻓﺘﻨﻲ ﺭﺣﺖ ﺍﻟﻬﺎ ﺍﺭﻛﺾ ﺣﻀﻨﺘﻬﺎ ..
ﺩﻓﻌﺘﻨﻲ ﻭﺟﺮﺕ ﺩﻣﻮﻋﻬﺎ
ﺧﻠﺖ ﺍﻳﺪﻳﻬﺎ ﻋﻠﻰ ﻭﺟﻬﻬﺎ ﻭﺗﺸﻬﮓ ﻣﺜﻞ ﺍﻟﻄﻔﻠﺔ
ﺍﺧﺬﺗﻬﺎ ﺑﻴﻦ ﺫﺭﻋﺎﻧﻲ
ﺍﻫﻤﺲ ﺑﺎﺫﻧﻬﺎ ﻭﺍﺩﺭﻱ ﻣﺎﺗﺴﻤﻊ
ﻛﺘﻠﻬﺎ ﻓﺪﻭﻩ ﺍﻟﻌﻤﺮﺝ ﻛﺎﻓﻲ ﺯﻋﻞ
ﻟﻤﺴﺎﺗﻲ ﻋﻠﻰ ﻛﻞ ﺟﺴﻤﻬﺎ
ﺍﻃﻤﻨﻬﺎ ﻫﺪﺃﺕ ﺣﻀﻨﺘﻬﺎ
ﺍﺧﺬﺗﻬﺎ ﻭﻛﻌﺪﻧﻪ ﻋﻠﻰ ﺍﻟﻘﻨﻔﺔ ﺍﻟﻲ ﺑﺎﻟﺼﺎﻟﺔ
ﺩﻣﻮﻋﻬﺎ ﺗﻨﺰﻝ ﻭﺗﺤﺠﻲ ﻭﻛﺄﻧﻬﺎ ﺗﻌﺎﺗﺒﻨﻲ
ﺍﻧﺖ ﺍﺳﺘﺨﺪﻣﺘﻨﻲ ﻭﺳﻴﻠﺔ ﻣﻦ ﺍﺟﻞ ﻏﺎﻳﻪ
ﺍﺳﺘﻐﻠﻴﺖ ﺿﻌﻔﻲ ﻭﻫﻮﺍﻧﻲ
ﻻﻥ ﺍﻧﻪ ﻣﻮ ﺳﻮﻳﻪ ﻭﺍﻧﺖ ﺗﻌﺮﻑ ﻛﻠﺶ ﺯﻳﻦ ﻣﻮ ﺍﻱ ﻭﺍﺣﺪ ﻳﺘﺰﻭﺟﻨﻲ .. ﺑﺲ ﺍﻧﻪ ﻣﺎﺍﻗﺒﻞ ﺑﺎﻟﺨﺪﺍﻉ
ﺍﻧﺎ ﺑﺸﺮ ﻗﻠﺒﻲ ﻳﻨﻜﺴﺮ ﻭﺩﻣﻲ ﻳﺤﺘﺮﮒ ﻭﻣﺸﺎﻋﺮﻱ ﺗﻨﺠﺮﺡ ﺑﺎﺧﺘﺼﺎﺭ ﺍﻧﺎ ﻛﺘﻠﺔ ﻣﺸﺎﻋﺮ ﻭﺍﺣﺴﺎﺱ
ﻭﻣﻤﻜﻦ ﻫﻮﺍﻱ ﺍﺗﺄﺫﻯ ﻭﺍﻧﺖ ﻣﺎﻗﺼﺮﺕ ﺑﺄﺫﻳﺘﻲ .
ﻧﺘﺠﻴﺖ ﻋﻠﻰ ﺍﻟﻘﻨﻔﻪ ﺧﻠﻴﺘﻬﺎ ﻋﻠﻰ ﺻﺪﺭﻱ
ﻣﺴﺤﺖ ﺟﺒﻴﻨﻬﺎ ﺟﻮ ﺣﺎﺭ ﻋﺮﮔﺖ .
ﻭﻋﺪﺗﻬﺎ ﻣﺎﺍﺧﻠﻲ ﺍﺣﺪ ﻳﺄﺫﻳﻬﺎ ﺑﻌﺪ ﺍﺑﺪ ﺷﻤﺮﺕ ﻧﻔﺴﻬﺎ
ﻧﺎﻣﺖ ﻋﻠﻰ ﺻﺪﺭﻱ ﻻﺯﻣﻪ ﻓﺎﻧﻴﻠﺘﻲ ﺑﻘﻮﻩ
ﺩﻣﻮﻋﻬﺎ ﺗﻨﻬﻤﺮ ﻋﻠﻰ ﺟﺴﻤﻲ ﺣﺴﻴﺖ ﺑﺤﺮﺍﺭﺗﻬﺎ ﺗﺠﻮﻳﻨﻲ ﻭﻛﺎﻧﻬﺎ ﺗﻌﺎﻗﺒﻨﻲ ..
ﺣﺴﻴﺘﻬﺎ ﻣﺸﺘﺎﻗﺔ ﺍﻟﻲ .. ﻭﺭﺟﻌﺖ ﺍﻟﻲ ﺻﺎﺣﺒﺔ ﻗﻠﺐ ﻃﻴﺐ ﺳﺎﻣﺤﺘﻨﻲ ﺑﻌﺪ ﺯﻋﻞ ﻻﻳﺎﻡ ﻃﻮﻭﻳﻠﻪ ﻣﺮﻣﺮﺗﻨﻲ .
ﻭﻋﺪﺗﻬﺎ ﻣﺎﺍﺧﻠﻰ ﺍﺣﺪ ﻳﺄﺫﻳﺞ ﺑﻌﺪ ﺍﺑﺪ ﻭﺭﺍﺡ ﺍﻋﻮﺿﺞ ﻋﻦ ﻛﻞ ﺷﻲ ..
ﺑﻌﺪﻫﺎ ﺑﺸﻬﺮﻳﻦ ﺷﻔﺘﻬﺎ ﺗﻌﺒﺎﻧﻪ ﻭﺟﻬﻪ ﺍﺻﻔﺮ ..
ﺍﻣﻲ ﻃﻠﺒﺖ ﻣﻨﻲ ﺍﺟﻴﺐ ﺍﻟﻬﺎ ﺗﺤﻠﻴﻞ ﺣﻤﻞ ﺑﻴﺘﻲ
ﻭﻃﻠﻊ ﺍﻳﺠﺎﺑﻲ ..
---------
ﺳﻤﻴﺔ ...
ﺍﻟﻌﺼﺮ ﺭﺣﻨﺎ ﻋﻠﻰ ﺭﻗﻴﺔ .. ﻃﻠﻌﻨﺎ ﻟﻠﺴﻮﮒ .. ﻫﻲ ﺭﺍﺣﺖ ﺣﺠﺰﺕ ﻋﻨﺪ ﺍﻟﻄﺒﻴﺒﺔ ﻭﺑﻴﻨﻤﺎ ﻳﻮﺻﻞ ﺳﺮﺍﻫﺎ ..
ﻧﺰﻟﻨﺎ ﻟﻠﺴﻮﮒ ﺍﺷﺘﺮﻳﺖ ﻣﻼﺑﺲ
ﻭﺭﺟﻌﻨﺎ ﻟﻠﻄﺒﻴﺒﺔ .. ﺩﺧﻠﺖ ﻓﺎﻃﻤﺔ ﺍﺧﺬﺕ ﺳﻮﻧﺎﺭ ﻭﻃﻠﻌﺖ ﻓﺮﺣﺎﻧﻪ ﮔﺎﻟﺖ ﺭﺍﺡ ﻳﺼﻴﺮ ﻋﻨﺪﺝ ﺍﺧﻮﻭ ﻭﻟﺪ ﻫﺴﻪ ﺍﺑﻮﺝ ﻳﻔﺮﺡ ..
ﺑﺎﻭﻋﺘﻠﻬﺎ ﮔﺘﻠﻬﺎ ﺍﻱ ﺍﻛﻴﺪ ﻳﻔﺮﺡ
ﺍﺷﺮﺕ ﻟﺮﻗﻴﺔ ﺩﺧﻠﺖ ﺟﻴﻜﺘﻬﺎ ﺍﻟﻄﺒﻴﺒﺔ ﻭﻃﻠﻌﺖ
ﻃﻠﻌﻨﻪ ﻣﻦ ﺍﻟﻌﻴﺎﺩﺓ
ﺟﺎﻱ ﻧﻤﺸﻲ ﺻﺎﺭ ﻟﻴﻞ .
ﺧﺎﺑﺮﻧﺎ ﻻﺑﻮﻱ ﺍﺟﺎﻧﻪ ..
ﻭﺻﻠﻨﻪ ﺭﻗﻴﺔ ﻟﺒﻴﺘﻬﺎ ..
ﺍﺑﻮﻱ ﺳﻤﻊ ﺍﻟﺨﺒﺮ ﻓﺮﺣﺎﻥ ﻃﺎﻳﺮ ﻛﻠﺴﺎﻉ ﻳﻠﺰﻡ ﺍﻳﺪ ﻓﺎﻃﻤﺔ
ﻭﻛﻠﺴﺎﻉ ﻳﻜﻠﻠﻬﺎ ﺧﻤﺎ ﻣﺸﺘﻬﻴﻪ ﺷﻲ .
ﺍﻧﺪﺍﺭ ﻋﻠﻴﻪ ﻭﻫﻮ ﻳﺴﻮﻕ
ﻛﻠﻲ ﺳﻤﻴﺔ ﺍﻓﺮﺣﻲ ﺭﺍﺡ ﻳﺠﻴﻠﺞ ﺳﻨﺪ .
ﻛﺘﻠﻪ ﻳﺎﺳﻨﺪ ﻫﺬﺍ ﺍﻧﻪ ﺑﻜﺪ ﺑﻴﺒﻴﺘﻪ ﻫﺴﻪ .
ﻓﺎﻃﻤﺔ .. ﺷﻨﻮ ﺭﺍﻳﺞ ﺍﻧﺖ ﺗﺴﻤﻴﻨﻪ ﺳﻤﻴﻪ؟
ﺳﻤﻴﺔ .. ﻻ ﻣﺎﺍﻋﺮﻑ ﺑﺎﻻﺳﻤﺎﺀ ﺍﻧﺘﻮﺍ ﺳﻤﻮﻭ .
ﺍﻳﻮﺏ . ﺍﻧﻪ ﺍﺭﻳﺪﻩ ﻃﻴﻒ ﺣﺘﻰ ﺍﺫﺍ ﺻﺎﺭ ﻋﺪﻧﻪ ﺑﻌﺪ ﻧﺴﻤﻲ ﺳﻴﻒ .
ﺳﻤﻴﺔ .. ﻫﺰﻳﺖ ﺍﻳﺪﻱ ﻭﺍﻟﻠﻪ ﻭﻣﻜﻴﻒ ﻟﻌﺪ ﺷﺒﻴﻬﻦ ﺍﻟﺒﻨﺎﺕ
.
ﺻﻔﺎ .. ﻣﺮﺕ ﺍﻳﺎﻡ ﺣﻠﻮﺓ .. ﺣﺴﻴﺖ ﺑﻨﻔﺴﻲ ﻋﺎﻳﺸﺔ
ﻣﻦ ﺻﺪﮒ ﻣﺎﺷﻔﺖ ﻫﻴﺞ ﺍﺣﺘﺮﺍﻡ ﻋﺎﺋﻠﺔ ﻣﺘﻜﺎﻣﻠﺔ
ﻓﺮﺍﺱ ﻫﺎﺩﺉ ﻛﻠﺶ ..
ﺍﻫﻠﻪ ﻣﺤﺘﺮﻣﻴﻦ ﻭﻳﺤﺒﻮﻧﻲ ..
ﻛﻠﺶ ﻳﺤﺒﻮﻥ ﻃﺒﺨﻲ ..
ﻓﺮﺍﺱ ﺩﻭﻡ ﻳﮕﻠﻲ ﻃﺒﺦ ﺍﻳﺪﺝ ﻣﺎﺟﺎﻱ ﺍﻛﺪﺭ ﺍﺷﻴﻊ ﻣﻨﻪ
ﮔﺘﻠﻪ ﺍﻧﻪ ﻳﻤﻚ ﻭﺍﻥ ﺷﺎﺀﺍﻟﻠﻪ ﺍﺧﻠﻴﻚ ﺗﺸﺒﻊ ﻣﻨﻪ ..
ﻳﻮﻡ ﻣﻨﻬﻦ ﺗﺤﻀﺮﻧﺎ ﺣﺘﻰ ﻧﻄﻠﻊ ﻛﻠﻨﺎ ﺳﻮﻩ
ﺍﺧﻮﺍﺕ ﻓﺮﺍﺱ ﻭﺍﺧﻮﺍﻧﻪ
ﻟﻠﻤﺪﻳﻨﺔ ﺍﻟﻌﺎﺏ ﺍﻟﺴﺎﺣﻞ ..
ﻃﻠﻌﺖ ﺑﺪﻱ ﺑﻴﺠﻲ ﻭﺭﺩﺍﻧﺎﺗﻪ ﻓﺴﻔﻮﺭﻱ ﺟﻠﺪ ﻟﺤﺪ ﺍﻟﺮﻛﺒﺔ ﻭﺑﻨﻄﺮﻭﻥ ﺟﻠﺪ ﻓﺴﻔﻮﺭﻱ ﻟﺒﺴﺘﻬﻦ .
ﻇﻞ ﻳﺒﺎﻭﻋﻠﻲ ﻓﺮﺍﺱ
ﮔﺎﻝ ﺻﻔﺎﻭﻱ ﺣﻴﺎﺗﻲ ﺷﻨﻮ ﻫﺎﻱ ﺗﺮﻩ ﻫﺬﺍ ﺍﻟﻠﺒﺲ ﻛﻠﺶ ﺑﺎﺭﺯ ﺍﻧﻮﺛﺘﺞ ﻭﺟﻤﺎﻟﺞ ﻭﺍﻧﻪ ﺍﻏﺎﺭ ﺑﺪﻟﻲ .
ﺻﻔﺎ .. ﻻ ﺣﺒﻴﺒﻲ ﻣﺎﺑﻲ،ﺷﻲ ﻭﻛﻌﺪﺕ ﺍﻣﻜﻴﺞ .
ﻓﺮﺍﺱ .. ﺻﻔﺎ ﻧﺰﻋﻲ ﺷﻮﻓﻴﻠﺞ ﻏﻴﺮﻩ .
ﺻﻔﺎ .. ﺣﺒﻴﺒﻲ،ﺷﺒﻴﻚ ﺗﺮﻩ ﻣﺎﺑﻲ ﺷﻲ ﻟﻌﺪ ﻣﺎﺍﺭﻭﺡ ﺍﻧﺘﻮﺍ ﺭﻭﺣﻮﺍ .
: ﻳﻠﻪ ﻳﻠﻪ ﻟﺒﺴﻲ ﻫﺴﻪ ﻣﺎﺻﺎﺭ ﺷﻲ .
ﺻﻔﺎ .. ﻭﺍﻧﻪ ﻛﺎﻋﺪﻩ ﺍﺧﻠﻲ ﻣﻜﻴﺎﺝ ﺑﺎﻭﻋﺘﻠﻪ ﺿﺎﻳﺞ ﻭﺟﺎﻱ ﻳﻠﺒﺲ ﻗﻤﻴﺼﻪ ..
ﺭﺣﺖ ﻟﻠﻜﻨﺘﻮﺭ ﻃﻠﻌﺖ ﺟﺒﻪ ﺑﻨﻔﺴﺠﻲ ﻓﺎﺗﺢ
ﻭﺑﻴﻬﺎ ﺟﻴﻮﺏ ﺑﻴﺠﻲ ﻭﺩﮔﻢ ﺑﻴﺠﻲ ﻣﻦ ﺍﻟﻮﺳﻂ ﺗﺘﺸﻜﻞ
ﻭﻟﺒﺴﺘﻬﺎ ﻭﺧﻔﻔﺖ ﺍﻟﻤﻜﻴﺎﺝ .
ﻛﺘﻠﻪ ﻭﻫﺴﻪ ﺷﻠﻮﻧﻲ ﺑﺎﻭﻋﻠﻲ ﻓﺮﺡ ﻛﺎﻝ ﺍﻱ ﻫﺴﻪ ﺗﺨﺒﻠﻴﻦ ﻣﺎﺍﺭﻳﺪ ﺍﺣﺪ ﻳﺤﺠﻲ ﻋﻠﻴﺞ .
ﺍﺟﻪ ﺗﻘﺮﺏ ﻳﻤﻲ ﺑﺎﺳﻨﻲ ﻋﻠﻰ ﺭﺍﺳﻲ
ﻛﺎﻝ ﻋﻨﺪﻱ ﺍﻟﺞ ﻣﻔﺎﺟﺎﻩ ﺍﺑﺘﺴﻤﺖ ﻛﺘﻠﻪ ﺷﻨﻮﻭ
: ﺍﻥ ﺷﺎﺀﺍﻟﻠﻪ ﻫﺎﻟﺴﻨﺔ ﺍﺗﺪﺍﻭﻣﻴﻦ ﻛﻠﻴﺔ .
: ﺻﺪﻙ ﻓﺮﺍﺱ ﻳﻌﻨﻲ ﻣﺎﺗﺤﺮﻣﻨﻲ ﻣﻦ ﺩﻭﺍﻣﻲ .
: ﺍﻱ ﺣﺒﻴﺒﺘﻲ ﻣﺎﻃﻮﻝ ﻫﻴﺞ ﻣﻄﻴﻌﺔ ﺍﻧﺖ .
: ﺣﻴﺎﺗﻲ ﺗﺸﻠﻊ ﻋﻴﻨﻲ ﻭﺗﺎﺧﺬﻫﺎ .
: ﻳﻼ ﺧﻠﺼﻲ ﻻﻳﺼﻴﺤﻮﻥ ﻋﻠﻴﻨﻪ .
ﻛﻤﻠﺖ ﻟﺒﺴﺖ ﺷﺎﻝ ﺑﻴﺠﻲ ﻭﻛﺐ ﺑﻨﻔﺴﺠﻲ ﺑﻠﻮﻥ ﺍﻟﺠﺒﻪ ﻭﻃﻠﻌﺖ ﻭﻳﺎﻫﻢ ﻭﺻﻠﻨﻪ ﻟﻠﺴﺎﺣﻞ ..
ﻧﺰﻟﻨﻪ ﺍﻏﺮﺍﺿﻨﻪ ﻛﻌﺪﻧﻪ ﺑﻤﻜﺎﻥ ﻗﺮﻳﺐ ﻋﻠﻰ ﺷﻂ ﺍﻟﻌﺮﺏ ﺍﻟﻬﻮﺍ ﺣﻠﻮ ﻭﺍﻟﻘﻮﺍﺭﺏ ﺟﺎﻳﻪ ﻭﺭﺍﻳﺤﺔ ﻛﻠﺶ ﺣﻠﻮﻩ
ﻛﻌﺪﻧﺎ ﻗﺮﻳﺐ ﻋﻠﻰ ﻗﺎﻋﺔ ﺍﻻﻋﺮﺍﺱ
ﻓﺎﺗﻮﺍ ﻋﻮﺍﺋﻞ ﻣﻌﺰﻭﻣﻴﻦ ﺑﺤﻔﻠﺔ ﺑﺎﻟﻘﺎﻋﺔ
ﻭﻭﻳﺎﻫﻢ ﺑﻨﺖ ﻳﺠﻲ ﻋﻤﺮﻫﺎ 3 ﺳﻨﻮﺍﺕ ﻻﺑﺴﻪ ﺑﺪﻟﺔ ﺑﺼﻠﻲ ﻣﻨﻔﻮﺷﺔ ﺷﻌﺮﻫﺎ ﻛﻴﺮﻟﻲ ﻋﺴﻠﻲ ﻟﺤﺪ ﻛﺘﻔﻬﺎ ﺑﻴﻀﺔ ﺣﻴﻞ ﻭﻣﺨﻠﻴﻦ ﺍﻟﻬﺎ ﺣﻤﺮﺓ .
ﺗﻤﺸﻲ ﻭﺑﺪﻟﺘﻬﺎ ﺗﺘﺤﺮﻙ ﻣﻨﺎ ﻭﻣﻨﺎ .
ﻧﺪﺳﻨﻲ ﻓﺮﺍﺱ ﻛﺎﻝ ﺻﻔﺎ ﻫﺎﻱ ﺑﺘﺞ
ﺿﺤﻜﺖ ﻇﻠﻴﺖ ﺍﺭﻛﺰ ﺑﻴﻬﺎ ﻭﻫﻲ ﺗﻤﺸﻲ ﺑﺎﻭﻋﺘﻠﻪ ﻟﺰﻣﺘﻪ ﻣﻦ ﻋﻜﺴﻪ ﻧﻈﺮﺍﺗﻪ ﺑﻌﻴﺪﺓ ﻋﻨﻲ
ﻛﺘﻠﺔ ﺑﺲ ﺑﺘﻲ ﻭﺑﺘﻚ ﺍﻧﺖ ﻫﻢ ﺳﻜﺖ
ﻭﻻﺟﻨﻪ ﻳﺴﻤﻌﻨﻲ ﺍﺳﺘﻐﺮﺑﺖ ﺣﺘﻰ ﻣﺎﺑﺎﻭﻋﻠﻲ ﺷﻨﻮ ﻣﺎﻳﺮﻳﺪ ﻣﻨﻲ ﺍﻃﻔﺎﻝ ﻟﻮ ﻣﺎﻳﺮﻳﺪ ﺑﻨﻴﺔ .
ﺧﺠﻠﺖ ﻛﺪﺍﻣﻬﻢ ﻛﺘﻠﻪ ﺑﺲ ﺍﻧﻪ ﺷﻌﺮﻱ ﺳﺮﺡ ﻫﺎﻱ ﺷﻌﺮﻫﺎ ﻛﻴﺮﻟﻲ .
ﺿﺤﻚ ﻭﻇﻠﻴﻨﻪ ﻧﺘﻤﺸﻰ .
ﻛﻠﺶ ﻓﺮﺣﺎﻧﺔ .. ﻭﺭﺍﺡ ﻳﺨﻠﻴﻨﻲ ﺍﺩﺍﻭﻡ ﻭﺑﺪﻭﻥ ﺍﻱ ﺟﻬﺪ ﻣﻨﻲ .
ﻭﺭﺍﻫﺎ ﺑﻜﻢ ﻳﻮﻡ ﺳﺎﻓﺮﻧﺎ ﻟﺘﺮﻛﻴﺎ ﺍﻟﺴﻔﺮﺓ ﻋﻠﻰ ﺣﺴﺎﺏ ﺍﻭﻻﺩ ﺧﻮﺍﻟﻪ ﻭﺧﺎﻻﺗﻪ ﻫﺪﻳﺔ ﻛﻠﻬﻢ ﻣﺸﺘﺮﻛﻴﻦ ﺑﻴﻬﺎ ﺟﺎﻧﺖ ﺳﻔﺮﺓ ﻣﻦ ﺍﻟﻌﻤﺮ ﻛﻠﺶ ﺗﻮﻧﺴﺖ ﺑﻴﻬﺎﺍ .
------
ﺳﻤﻴﺔ ... ﺑﻴﻮﻡ ﺣﻔﻠﺔ ﺭﺟﻮﺍﻥ ﺗﻮﺳﻠﺖ ﺑﻴﺒﻴﺘﻲ ﺗﺒﻘﻰ ﻭﻣﺎﺗﺮﻭﺡ ﮔﺒﻠﻬﺎ ﺑﻴﻮﻡ ﻟﺒﻴﺖ ﻋﻤﻪ ﺍﺷﻮﺍﻕ ..
ﻻﻥ ﻓﺎﻃﻤﺔ ﺗﻜﻮﻝ ﻣﺎﺑﻴﻬﺎ
ﻭﺭﻗﻴﺔ ﻫﻢ ﻧﻔﺲ ﺍﻟﺸﻲ ﻧﺴﺎﻭﺗﻬﺎ ﻣﺄﺫﻳﺘﻬﺎ
ﻭﺻﻔﺎ ﺑﺘﺮﻛﻴﺎ
ﻭﺍﻧﺎ ﻻﺯﻡ ﺍﺭﻭﺡ ﻭﺍﺭﻓﻊ ﺭﺍﺱ ﺍﻣﺎﻥ ﻛﺪﺍﻡ ﺍﻫﻠﻪ ﻣﺜﻠﻤﺎ ﻭﻋﺪﺗﻪ .
ﺑﺪﻟﺖ ﻟﺒﺴﺖ ﻓﺴﺘﺎﻥ ﺑﻴﺠﻲ ﻣﻦ ﻓﻮﻙ ﻟﻒ ﻣﺨﻤﻠﻲ ﻟﻤﺎﻉ ﻭﺍﻟﺘﻨﻮﺭﺓ ﻣﺎﻟﺘﻪ ﻛﻴﺒﻮﺭ ﺑﻴﻬﺎ ﻓﺘﺤﻪ ﻣﻦ ﺍﻟﻨﺺ .
ﺍﻟﺮﺩﺍﻧﺎﺕ ﻟﺤﺪ ﺍﻟﻌﻜﺲ .
ﺟﺎﻱ ﺍﺑﺪﻝ ﺧﺎﺑﺮﻧﻲ ﺍﻣﺎﻥ
ﺭﺩﻳﺖ ﻋﻠﻴﻪ
ﻛﺎﻝ ﻫﺎﺍ ﺣﺒﻴﺒﻲ ﺭﺍﺡ ﺗﺠﻴﻦ ﻣﻮ؟
ﺍﻱ ﺍﻛﻴﺪ ﺍﺟﻲ
ﻛﻞ ﺷﻲ ﺗﻤﺎﻡ ﻣﺜﻠﻤﺎ ﻭﺻﻴﺘﺞ ﻣﻮﻭ؟
ﺍﻱ ﻛﻠﺸﻲ ﺗﻤﺎﻡ .
ﺳﺪﻳﺘﻪ ﻣﻨﻪ .
ﻭﺻﻠﻨﻪ ﺍﺑﻮﻱ ﻟﻠﻘﺎﻋﺔ ﺍﻟﻲ ﺭﺍﺡ ﺍﺗﻢ ﺑﻴﻬﺎ ﺍﻟﺤﻔﻠﺔ ..
ﻧﺰﻟﻨﺎ ﺍﻧﻪ ﻭﺑﻴﺒﻴﺘﻲ ..
ﺳﻠﻤﺖ ﻋﻠﻰ ﺍﻟﻲ ﺍﻋﺮﻓﻬﻢ ﻭﺍﻟﺒﺎﻗﻴﻦ ﻣﺎﺍﻋﺮﻓﻬﻢ ﺑﺲ ﻟﭽﺤﺖ ﻓﺮﺡ ﻃﺎﻟﻌﻪ ﺣﻴﻞ ﺣﻠﻮﻩ .
ﺳﻠﻤﺖ ﻋﻠﻰ ﺍﺷﻮﺍﻕ ﻛﻮﻩ ﺭﺩﺕ ﻋﻠﻴﻪ .
ﻭﺗﺒﺎﻭﻋﻠﻲ ﻣﻦ ﻓﻮﻙ ﺍﻟﺠﻮﻩ ﺿﺠﺖ ﻭﺍﺣﺘﺮﻳﺖ ﻛﻠﺶ
ﻣﻦ ﺍﻟﻌﺼﺒﻴﺔ ﻭﻳﺼﻴﺮ ﻛﺒﺎﻟﻲ ﺍﻣﺎﻥ ﻭﺍﻛﻮﻝ ﺍﻟﺨﺎﻃﺮﻩ ﺍﺗﺤﻤﻞ .
ﺯﻭﺝ ﺭﺟﻮﺍﻥ ﺣﻠﻮ ﺑﺲ ﻫﻲ ﻣﺒﻴﻨﺔ ﺿﺎﻳﺠﻪ
ﺻﺎﺭﺕ ﺣﻔﻠﺘﻬﺎ ﻭﻻ ﺑﺎﻻﺣﻼﻡ ﺗﺠﻨﻨﻦ ﺍﻗﺎﺭﺑﻬﻢ ﻛﻠﻬﻢ ﺍﺑﻬﺎ ﻭﻃﺎﮔﻴﻦ ﺍﺣﺲ ﻧﻔﺴﻲ ﺑﻴﻨﺎﺗﻬﻢ ﻭﻻ ﺷﻲ .
ﺧﻠﺼﺖ ﺍﻟﺤﻔﻠﺔ ﻭﻣﺤﺪ ﻳﻮﺩﻳﻨﻲ ﻟﻠﺒﻴﺖ ﻭﺑﻴﺒﻴﺘﻲ ﺍﺻﺮﺕ ﺍﻟﻪ ﺍﻧﺮﻭﺡ ﻟﺒﻴﺖ ﻋﻤﺘﻲ ﺍﺷﻮﺍﻕ ﻭﻳﺎﻫﻢ .
ﻃﻠﻌﻨﺎ ﻣﻦ ﺍﻟﻘﺎﻋﺔ ﺻﺎﺭﺕ ﻣﻘﺎﺑﻴﻠﻲ ﺳﻴﺎﺭﺓ ﺍﻣﺎﻥ ﺑﺲ ﻫﻮ ﻣﺎﺷﺎﻓﻨﻲ .
ﺍﻣﻪ ﺍﻧﺘﺒﻬﺖ ﻋﻠﻴﻪ ﻭﺻﻌﺪﺕ ﻓﺮﺡ ﻳﻤﻪ ﻛﺪﺍﻡ
ﻭﺍﻧﻪ ﺍﺷﺘﻌﻠﺖ ﺑﻨﺎﺭ ﺍﻟﻐﻴﺮﺓ
ﺟﻨﺖ ﻣﺎﺍﺭﻳﺪ ﺍﺭﻭﺡ ﻟﺒﻴﺖ ﺍﺷﻮﺍﻕ ﺑﺲ ﻫﺴﻪ ﺍﻟﻪ ﺍﺭﻭﺡ ﻭﺍﺗﻌﺎﺭﻙ ﻭﻳﺎ .
ﺍﺧﺬﺕ ﺗﻠﻴﻔﻮﻧﻲ ﻭﺍﺣﻨﻪ ﻭﺍﻛﻔﻴﻦ ﺑﺎﻟﺸﺎﺭﻉ
ﻧﺘﻈﺮ ﻳﺴﻮﻥ ﺍﻟﻨﻪ ﻣﻜﺎﻥ ﺣﺘﻰ ﻧﺼﻌﺪ ﺑﺸﻲ ﺳﻴﺎﺭﺓ
ﺍﺗﺼﻠﺖ ﺑﻲ ﻣﺎﻳﺠﺎﻭﺏ
ﻇﻠﺖ ﺍﻟﻮﻡ ﺑﺮﻭﺣﻲ ﻫﺬﺍ ﺷﻮﻥ ﻳﺨﻠﻴﻬﺎ ﺗﻜﻌﺪ ﻳﻤﻪ
ﺯﻳﻦ ﻟﻴﺶ ﻣﺎﺧﺎﺑﺮﻧﻲ، ﺍﻛﻴﺪ ﻫﺴﻪ ﻛﺎﻋﺪ ﻳﺪﻙ ﻓﺞ ﻭﻳﺎﻫﺎ .
ﺷﺎﻓﻮﺍ ﺍﻟﻨﻪ ﺳﻴﺎﺭﺓ ﻭﺻﻌﺪﻧﺎ ﺑﻴﻬﺎ ﺍﻧﻪ ﻭﺑﻴﺒﻴﺘﻲ .
ﻭﺻﻠﻨﻪ ﺍﻟﺒﻴﺘﻬﻢ .
ﻧﺰﻟﻨﻪ ﻋﺪﻫﻢ ﻛﻌﺪﻧﻪ ﺑﺎﻟﺼﺎﻟﺔ .
ﺷﻔﺖ ﺍﻣﻞ ﻭﺍﻳﻨﺎﺱ ﻭﻋﻤﻪ ﺯﻳﻨﺐ ﻭﺍﻣﺘﺜﺎﻝ
ﺍﺟﺖ ﻋﻤﻪ ﺍﺷﻮﺍﻕ ﻇﻠﺖ ﺗﻌﺮﻓﻬﻢ ﻋﻠﻰ ﺑﻌﺾ
ﻭﺻﻠﺖ ﺍﻟﻲ ﻭﻏﻠﺴﺖ ﻋﻨﻲ .
ﺑﻠﺤﻈﺘﻬﺎ ﺣﺴﻴﺖ ﺑﺎﻻﻫﺎﻧﻪ ﻭﺍﻟﺬﻝ ﺑﻴﻨﻬﻢ
ﺑﻘﻴﺖ ﻛﺎﻋﺪﺓ ﺑﺪﻭﻥ ﺣﺮﻛﻪ ﺗﻤﻨﻴﺖ ﺍﻟﻜﺎﻉ
ﺗﻨﺸﮓ ﻭﺗﺒﻠﻌﻨﻲ .
ﺍﻟﺴﺒﻠﺖ ﺍﻟﻜﻨﺘﻮﺭﺭﻱ ﻛﺒﺎﻟﻲ ﻛﻠﺶ ﻭﺍﺣﺲ ﺣﺎﺭﻩ ﻭﻇﻠﻴﺖ ﺍﺗﺼﺒﺒﺐ ﻋﺮﮒ .
ﻣﺎﺍﺣﺴﻴﺖ ﻏﻴﺮ ﻋﻠﻰ ﺻﻮﺕ ﺑﺼﻔﻲ
ﺗﻜﻮﻟﻲ ﺍﻧﺖ ﺳﻤﻴﺔ؟
ﺑﺎﻭﻋﺘﻠﻬﺎ ﺍﻟﻪ ﻫﺎﻱ ﻓﺮﺡ
ﻛﺘﻠﻬﺎ ﺑﺎﻧﺰﻋﺎﺝ ﻭﺍﻧﺎ ﺍﻣﺴﺢ ﺍﻟﻌﺮﮒ ﻣﻦ ﺟﺒﻴﻨﻲ ﺍﻱ .
ﺷﻔﺘﻬﺎ ﺿﺤﻜﺖ ﺑﺴﺨﺮﻳﺔ .
ﻭﺍﻧﻪ ﺷﻮﻥ ﻣﺤﺘﺮﻩ ﻣﻨﻬﺎ ﻭﻣﻦ ﺷﻜﻠﻬﺎ
ﻛﺘﻠﻬﺎ ﺷﺒﻲ ﺍﺳﻤﻲ ﻳﻀﺤﻚ .
ﻛﺎﻟﺖ ﺑﺒﺮﺍﺀﺓ ﻻ ﻭﻛﺎﻣﺖ ﻣﻦ ﻳﻤﻲ .
ﺑﻘﻴﺖ ﻛﺎﻋﺪﻩ ﺷﻮﻳﻪ
ﻭﻛﻤﺖ ﺍﺩﻭﺭ ﺍﻣﺎﻥ ﺩﻛﻴﺖ ﻋﻠﻴﻪ ﻣﺎﻛﻮ ﻣﺎﻳﺠﺎﻭﺏ ﺷﺒﻲ
ﻇﻠﻴﺖ ﺍﻣﺸﻲ ﺑﺎﻟﺒﻴﺖ ﻣﺜﻞ ﺍﻟﻀﺎﻳﻌﻪ ﺍﻃﺐ ﺍﻟﺼﺎﻟﻪ ﻭﺍﻃﻠﻊ ﻣﻦ ﺍﻟﺜﺎﻧﻴﺔ .
ﺳﻤﻌﺖ ﺻﻮﺗﻪ ﻳﻀﺤﻚ .
ﺗﺒﻌﺖ ﻣﺼﺪﺭ ﺍﻟﺼﻮﺕ، ﺷﻔﺘﻪ ﺑﻤﻤﺮ ﻳﻔﺼﻞ ﺍﻟﺼﺎﻟﺔ ﺍﻟﻮﺳﻄﺎﻧﻴﺔ ﻋﻦ ﺍﻟﻤﻄﺒﺦ ..
ﻭﺍﻛﻒ ﻳﻢ ﻓﺮﺡ ﻭﻳﻀﺤﻜﻮﻥ
ﻭﺟﺎﻥ ﺗﺨﻠﻲ ﺍﻳﺪﻫﺎ ﻋﻠﻰ ﻛﺘﻔﻪ ﺗﺤﺠﻲ ﻭﻳﺎ ﺑﻜﻞ ﺭﻗﻪ ﻭﺍﻧﻮﺛﻪ
ﻣﺸﺎﻋﺮﻱ ﻣﺘﺨﺮﺑﻄﺔ ﺣﺴﻴﺖ ﺑﺎﻟﻢ ﻳﻮﺟﻊ ﻗﻠﺒﻲ
ﺣﺮﺍﺭﺓ ﺗﻄﻠﻊ ﻣﻦ ﺟﻮﻓﻲ ﻣﺎﺍﻛﺪﺭ ﺍﺳﻴﻄﺮ ﻋﻠﻰ ﻧﻔﺴﻲ ﺑﻌﺪ ﺷﺒﻌﺖ ﺫﻝ ﻭﺍﻫﺎﻧﺎﺕ ﺍﻟﻴﻮﻡ
ﻭﺑﻌﺪ ﻭﺑﻌﺪ ﻻ ﺍﻧﻪ ﻣﻮ ﻫﻴﺞ ﻭﻻﺍﻛﺪﺭ ﺍﺗﺤﻤﻞ ﺑﻌﺪ .
ﺍﺑﺎﻭﻋﻠﻬﻢ ﻭﻋﻘﻠﻲ ﻳﻜﻠﻲ ﺣﻴﻴﻞ ﻻﻳﻜﻴﻦ ﻟﺒﻌﻀﻬﻢ
ﻫﻮ ﻫﻴﺞ ﻳﺮﻳﺪ ﻭﺣﺪﺓ ﻋﺪﻫﺎ ﺍﺳﻠﻮﺏ ﻭﺫﻭﻕ ﻭﻫﺎﻱ ﻇﺎﻟﺘﻪ ﮔﺒﺎﻝ ﻋﻴﻮﻧﻪ ﺑﺲ ﻣﺎﺍﺩﺭﻱ ﺑﺸﻨﻮ ﻳﻔﻜﺮ .
ﺗﻌﺐ ﻋﻘﻠﻲ ﻣﻦ ﺍﻟﺘﻔﻜﻴﺮ
ﻏﺎﺩﺭﺕ ﻣﻜﺎﻧﻲ ﺑﺪﻭﻥ ﻣﺎﺍﺧﻠﻴﻬﻢ ﻳﺸﻮﻓﻮﻧﻲ
ﺳﻤﻌﺖ ﺍﺷﻮﺍﻕ ﺗﺼﻴﺤﻠﻲ ﺗﻌﺎﺍﻱ ﺳﻤﻴﺔ
ﺭﺣﺖ ﻭﺭﺍﻫﺎ ﺑﺲ ﻣﺜﻞ ﺍﻟﻌﺎﺟﺰﺓ ﻋﻦ ﻛﻞ ﺷﻲ .
ﻛﺎﻟﺖ ﻻﻋﺒﺎﻟﺞ ﻣﻦ ﻟﺒﺴﺘﻲ ﻟﺒﺲ ﺣﻠﻮ ﻭﺍﺟﻴﺘﻲ ﺗﺘﻠﻮﮔﻴﻦ ﺍﻗﺒﻞ ﺍﺧﻄﺒﺞ ﻷﻣﺎﻥ ﺗﺮﻩ ﺗﺒﻘﻴﻦ ﺑﻨﺖ ﺍﻣﺎﻟﻴﺪ ﺍﻧﺖ .
ﻟﺴﺎﻧﻲ ﺛﮕﻞ ﻭﺍﻧﺸﻞ ﺟﺴﻤﻲ ﺟﻤﺪ ﻋﻦ ﺍﻟﺤﺮﻛﺔ
ﻋﺎﻓﺘﻨﻲ ﻭﺭﺍﺣﺖ ..
ﻓﻜﺮﺕ ﺍﻧﺎ ﺷﻜﻮ ﺍﺟﻴﺖ ﺍﺭﺿﻲ ﺍﻧﺎ ﺷﻠﻲ ﺑﻲ
ﺣﻘﻬﺎ ﺻﻔﺎ ﻟﻮ ﺭﻓﻀﺖ ﺍﺳﻼﻡ ﺗﺮﻳﺪ ﺗﻘﺪﻳﺮ ﻣﺎﺗﺮﻳﺪ ﺫﻝ ﻭﺍﻧﺎ ﻧﻔﺲ ﺍﻟﺸﻲ ﺷﻜﻮ ﻣﺠﻠﺒﺔ ﺑﻲ .
ﺷﻜﺪ ﻣﺘﺸﺎﺑﻬﻪ ﻗﺼﺘﻨﻪ ﺍﻛﻴﺪ ﻻﻥ ﺍﻧﻮﻟﺪﻧﺎ ﺑﻨﻔﺲ ﺍﻟﻴﻮﻡ .
ﻃﻠﻌﺖ ﻣﻦ ﺍﻟﺒﻴﺖ ﻟﻠﺤﺪﻳﻘﺔ ﺍﺑﺠﻲ
ﺭﺣﺖ ﺑﺼﻒ ﺍﻟﺒﻴﺖ ﻣﺴﺤﺖ ﺍﻟﺤﻤﺮﺓ ﺑﻈﺎﻫﺮ ﻛﻔﻲ
ﺍﺭﻳﺪ ﺍﻣﻠﺦ ﻧﻔﺴﻲ ﺍﺭﻳﺪ ﺍﺻﺮﺥ
ﻳﺎﺭﺑﻲ ﻧﺎﺭ ﻧﺎﺭ ﺟﻮﻭﺍﻳﺔ .
ﺩﮒ ﺗﻠﻴﻔﻮﻧﻲ ﺍﺧﺬﺗﻪ ﻣﻦ ﺷﻔﺘﻪ ﺍﻣﺎﻥ ﻧﻬﺪﻳﺖ ﺑﻲ ﺑﺲ ﻣﻮ ﺑﺼﻮﺕ ﻋﺎﻟﻲ،
ﺣﺘﻰ ﻻﺍﺣﺪ ﻳﺴﻤﻌﻨﻲ
ﮔﺘﻠﻪ ﺍﻧﺖ ﺷﻜﻮﻭﻭ ﻣﺨﺎﺑﺮﻧﻲ ﺑﻌﺪ ﺍﺑﻘﻰ ﻳﻢ ﺣﺒﻴﺒﺘﻚ ﺧﻄﻴﺒﺘﻚ ﻭﺍﻧﻪ ﺧﻠﻴﻨﻲ ﻹﻫﺎﻧﺎﺕ ﺍﻣﻚ ﻭﺍﺩﻙ ﻋﻠﻴﻚ ﻭﻣﺎﺗﺠﺎﻭﺏ .
ﺻﺎﺡ ﻛﺎﻝ ﺍﻧﺖ ﻭﻳﻦ
ﻛﺘﻠﻪ ﻣﺎﻋﻠﻴﻚ ﺑﻴﻪ ﻭﺳﺪﻳﺘﻪ ﺑﻘﻴﺖ ﻛﺎﻋﺪﻩ ﻣﻜﺮﻓﺼﺔ
ﺑﺼﻔﻲ ﺩﺭﺝ ﺧﺎﺭﺟﻲ ﺭﻓﻴﻊ ﻳﺮﻭﺡ ﻟﺒﻠﻜﻮﻧﻪ ﻟﻴﻔﻮﮒ
ﻭﺍﺑﺠﻲ ﻭﺍﻣﺴﺢ ﻣﻜﻴﺎﺟﻲ ﺑﻴﺪﻱ
ﺗﻠﻔﺖ ﺍﻟﺪﻧﻴﻪ ﻭﺟﻬﻬﻲ ﻭﺍﻳﺪﻱ ﻋﺒﺎﺭﺓ ﻋﻦ ﺑﻘﺎﻳﺎ ﻣﻜﻴﺎﺝ ﺣﺘﻰ ﺍﻟﻜﻌﺐ ﺷﻤﺮﺗﻪ . ﻭﺑﻘﻴﺖ ﺣﺎﻓﻴﺔ
ﻣﺎﺍﺣﺲ ﺍﻟﻪ ﻭﺍﻛﻒ ﻳﻤﻲ ﺭﻓﻌﺖ ﺭﺍﺳﻲ ﺑﺎﻭﻋﺘﻠﻪ
ﻛﺎﻝ ﺷﻤﺴﻮﻳﺔ ﺑﻨﻔﺴﺞ؟
ﻛﺘﻠﻪ ﻣﺎﻋﻠﻴﻚ ﺑﻴﻪ .
ﻟﺰﻣﻨﻲ ﻣﻦ ﺯﻧﺪﻱ ﺭﻓﻌﻨﻲ ﻟﻤﺴﺘﻮﺍﻩ
ﻛﺎﻝ ﺑﻠﻪ ﻫﺎﻻﺳﻠﻮﺏ ﺷﻜﺘﻠﺞ ﺍﻧﻲ ! !!
ﻫﺪﻳﺖ ﺍﻳﺪﻱ ﻣﻨﻪ ﺑﺎﻟﻘﻮﻩ
ﮔﺘﻠﻪ ﻟﻬﻨﺎ ﻭﻛﻠﺸﻲ ﻳﻨﺘﻬﻲ ﺑﻴﻨﻨﺎ ﺍﻧﻪ ﻣﺎﺍﺗﺤﻤﻞ ﺫﻝ
ﻋﻤﻮﺩ ﺑﻘﺎﻳﺎ ﺣﺐ ﻭﺍﻧﺎ ﻣﻮﻣﻨﺎﺳﺒﺔ ﺍﻟﻚ .
ﺍﻣﺎﻥ : ﻛﻠﺶ ﺯﻭﺩﺗﻴﻬﺎ ﺳﻤﻴﺔ
ﻟﺰﻣﻨﻲ ﻣﻦ ﺍﻳﺪﻱ ﻗﻮﻱ ﻛﻠﺶ ﺻﻌﺪﻧﻲ ﺍﻟﺪﺭﺝ ﻭﺍﻧﻪ ﺍﺩﻓﻊ ﺑﻲ ﺑﺲ ﻫﻮ ﺍﻗﻮﻩ ﻣﻨﻲ
ﺑﺲ ﻭﺻﻠﻨﻪ ﻟﻨﻬﺎﻳﺔ ﺍﻟﺪﺭﺝ ﺷﻤﺮﻧﻲ ﻗﻮﻱ ﻭﻛﻌﺖ ﺑﺎﻟﻜﺎﻉ ﺑﺼﻒ ﺍﻟﻘﻨﻔﺔ .. ﺍﻳﺪﻱ ﺍﻟﻤﻜﺴﻮﺭﺓ ﻣﺴﺒﻘﺎ ﺗﺎﺫﺕ ﻛﻠﺶ ﻛﻮﻩ ﺳﻴﻄﺮﺕ ﻋﻠﻰ ﻧﻔﺴﻲ ﻭﻣﺎﻋﻄﺖ .
ﺍﺟﻪ ﻛﺮﻓﺺ ﻛﺒﺎﻟﻲ ﻭﻣﺒﻴﻦ ﻣﻌﺼﺐ ﻛﻠﺶ .
.
.
ﺳﻤﻴﺔ .. ﻛﺮﻓﺺ ﮔﺒﺎﻟﻲ ﻭﻣﺒﻴﻦ ﻣﻌﺼﺐ ﻛﻠﺶ ﺍﻭﻝ ﻣﺮﺓ ﺍﺷﻮﻓﻬﺎ ﻫﻴﺞ ﻋﺼﺒﻲ ..
ﻟﺰﻣﺖ ﺍﻳﺪﻱ ﻣﺘﺄﻟﻤﺔ ﻣﻨﻬﺎ .. ﻭﺍﻭﻥ ﺍﻩ ﻭﺻﻮﺗﻲ ﻣﺴﻤﻮﻉ
ﻣﺪﻧﮕﻪ ﺭﺍﺳﻲ ﺍﺑﺎﻭﻉ ﻟﻨﻔﺴﻲ ..
ﺟﺮ ﺣﺴﺮﺓ ﺧﻠﻪ ﺍﻳﺪﻩ ﻋﻠﻰ ﺭﺍﺳﻲ ﻭﻳﺮﻓﻊ ﺑﻲ ﻛﺎﻝ ﺗﺄﺫﻳﺘﻲ .. ؟
ﺗﻨﻔﺴﻲ ﺻﺎﺭ ﺳﺮﻳﻊ ﻛﻠﺶ
ﺍﺳﺤﺐ ﻧﻔﺲ ﻭﺍﺯﻓﺮﻩ
ﻣﺪﻳﺖ ﺍﻳﺪﻱ ﺩﻓﻌﺘﻪ ﻣﻦ ﺻﺪﺭﻩ
ﮔﺘﻠﻪ ﻭﺧﺮ ﻋﻨﻲ ﻳﻠﻠﻪ .
ﻣﻴﻞ ﻧﻔﺴﻪ .. ﺭﺍﺩ ﻳﻮﮔﻊ ﺑﺲ ﺳﻨﺪ ﺟﺴﻤﻪ ﺑﺎﻳﺪﻩ ﻭﺧﻼﻫﺎ ﻉ ﺍﻟﻜﺎﻉ .. ﻛﺎﻝ ﻭﻟﺞ
ﻛﻤﺖ .. ﻛﺎﻡ ﺻﺎﺭ ﮔﺒﺎﻟﻲ
ﺻﺎﺡ ﺍﻧﺖ ﺷﻨﻮ ﻣﺨﺒﻠﺔ ﺗﻮﺭﻃﺖ ﺑﻴﺞ ﺍﻧﻲ
: ﻻﺗﻮﺭﻃﺖ ﻭﻻﺷﻲ ﻣﻦ ﻫﺎﻟﻠﺤﻈﺔ ﻭﻳﻨﺘﻬﻲ ﺍﻟﻲ ﺑﻴﻨﻨﺎ ﻭﺍﻧﺴﺤﺐ ﻣﻦ ﺣﻴﺎﺗﻚ ﻣﻮ ﺻﻌﺒﺔ ﺗﺮﻩ .
: ﻫﺬﺍ ﺍﻟﺤﺠﻲ ﻣﺎﺍﺭﻳﺪ ﺍﺳﻤﻌﻪ ﻣﺮﻩ ﺛﺎﻧﻴﺔ، ﻭﻫﺴﻪ ﺷﻨﻮﻭﻭ ﺻﺎﺭ ﺍﺣﺠﻲ . ﻭﻣﻨﻮ ﻭﻳﺎﺝ ﺍﻣﻲ ؟ .
: ﺍﻧﺖ ﻭﻳﺎﻱ ﻭﻛﻠﻜﻢ ﻭﻳﺎﻱ
ﻟﻴﺶ ﻛﺘﻠﻲ ﺗﻌﺎﻱ ﻟﻠﺤﻔﻠﺔ ﺣﺘﻰ ﺍﻧﻬﺎﻥ ﻣﻮﻭﻭ ﺍﺳﻤﻊ ﺣﺠﻲ ﻳﺴﻢ ﻭﻳﻐﺚ ﻭﻛﻠﺶ ﺯﻳﻦ ﺗﻌﺮﻑ ﺍﻣﻚ ﻣﺎﺗﺮﻳﺪﻧﻲ ﺍﻟﻚ ﻟﻴﺶ ﺗﺄﺫﻳﻨﻲ
ﻟﻮ ﻋﻠﻴﻤﻦ ﺍﺳﺎﻟﻚ ﺍﻧﻪ ﺍﻋﺮﻑ ﻟﻴﺶ ﺣﺘﻰ ﺍﻧﺴﺤﺐ ﻣﻦ ﻛﻴﻔﻲ ﻣﻮ؟ .
: ﺳﻤﻴﺔ ﺍﻫﺪﻱ ﻭﻧﻨﺰﻝ ﻭﻧﻜﻌﺪ ﺍﻧﻲ ﻭﺍﻧﺖ ﻭﺍﻣﻲ ﻭﻧﺘﻮﺍﺟﻪ ﻭﺍﻟﻪ ﺍﻃﻠﻌﺞ ﻣﻨﺎ ﻣﺨﻄﻮﺑﺔ ﺍﻟﻲ .
: ﻣﺎﺍﺭﻳﺪﻙ ﻷﻥ ﻣﺎﺍﺭﻳﺪ ﺫﻝ ..
: ﺷﻨﻮ ﺫﻝ ﺳﻤﻴﺔ ﻻﺗﺤﺎﺳﺒﻴﻨﻲ ﻋﻠﻰ ﺳﻮﺍﻟﻒ ﺍﻣﻲ ﻛﺘﻠﺞ ﻣﺎﺭﺍﺡ ﻧﻌﻴﺶ ﻭﻳﺎﻫﺎ .
: ﻻ ﺫﻟﻪ ﻣﻦ ﺍﻭﻛﻒ ﺑﺎﻟﺸﺎﺭﻉ ﺍﻧﺘﻈﺮ ﺍﺣﺪ ﻳﻌﻄﻒ ﻋﻠﻴﻪ ﻳﻮﺻﻠﻨﻲ ﻟﻠﺒﻴﺖ ﺑﻴﻨﻤﺎ ﺍﻧﺖ ﻣﺼﻌﺪﻫﺎ ﻳﻤﻚ ﻭﻣﻮ ﺳﺎﺋﻞ ﻋﻨﻲ ﺍﺧﺎﺑﺮﻙ ﻣﺎﺗﺮﺩ ﻋﻠﻴﻪ ﺍﻛﻌﺪ ﺍﺑﻴﺘﻜﻢ ﺍﻣﻚ ﺗﻬﻴﻨﻲ ﻭﺍﻧﺎ ﻧﺎﺭ ﻣﺄﺟﺠﺔ ﺑﻴﻪ ﻭﺍﻧﺖ ﻭﺍﻛﻒ ﻳﻤﻬﺎ ﺗﻀﺤﻚ ﻭﺗﺘﺸﺎﻗﺔ ﻭﺗﻠﺰﻣﻚ ﺷﻮﻥ ﺗﺨﻠﻴﻬﺎ ﺗﻠﺰﻣﻚ ﺷﻮﻭﻥ .
ﺍﺭﻳﺪ ﺍﺭﻭﺡ ﻟﻤﻜﺎﻥ ﺍﻟﺪﺭﺝ ﺍﻧﺰﻝ ﺑﺲ ﻫﻮ ﻣﺎﻳﺨﻠﻴﻨﻲ ﻭﺻﺎﻳﺮ ﻣﻘﺎﺑﻴﻠﻲ ﻟﺰﻡ ﺍﻳﺪﻱ ﺿﺤﻚ
ﺍﻣﺎﻥ .. ﺗﻐﺎﺭﻳﻦ ﻣﻦ ﻓﺮﺡ ﺗﺮﻩ ﻣﺎﺗﻌﻨﻴﻠﻲ ﺷﻲ ﺍﺧﺘﺎﺭﻳﺘﺞ ﺍﻧﺖ ﻻﺗﺴﻮﻳﻦ ﻣﺸﻜﻠﺔ ﻣﻦ ﺍﻟﻤﺎﻛﻮﻭ ﺳﻤﻴﺔ .
ﺳﻤﻴﺔ .. ﻣﺸﻜﻠﺔ ﻣﻦ ﻣﺎﻛﻮﻭ ﺃﻣﺎﻥ؟ ؟ﺍﻧﺖ ﻣﺎﺷﻔﺖ ﺍﻣﻚ ﺷﻮﻥ ﻋﺎﻣﻠﺘﻨﻲ ﺍﺷﺸﺸﺶ ﻣﺎﺍﺭﻳﺪ ﺍﺣﺠﻲ ﺑﺲ ﺍﺣﻨﺎ ﺍﻧﺘﻬﻴﻨﺎ ﻻ ﻣﻦ ﺻﺪﻙ ﺍﻧﺎ ﻏﻠﻄﺖ ﻭﻳﺎﻙ ﺍﺻﻼ ﺣﺒﻨﺎ ﺟﺎﻥ ﻏﻠﻄﺔ ﻣﻦ ﺍﻻﻭﻝ .. ﺍﺧﺦ ﻣﻨﻲ ﺑﺎﻭﻋﺖ ﻟﻔﻮﮒ ﺯﺍﻳﺪ ﻭﻧﺴﻴﺖ ﺍﺻﻠﻲ ﻧﺴﻴﺖ ﻛﻞ ﺷﻲ ..
ﺿﻌﻔﺖ ﻇﻠﻴﺖ ﺍﺑﺠﻲ ..
ﺍﻣﺎﻥ .. ﻻﺗﺒﺠﻴﻦ ﺣﺒﻴﺒﺘﻲ ..
ﻃﻠﻊ ﺗﻠﻴﻔﻮﻧﻪ ﻓﺘﺤﻪ ﺷﻮﻓﻨﻴﺎ ﻣﺨﻠﻲ ﺳﺎﻳﻠﻨﺖ
ﻣﺴﺤﺖ ﺩﻣﻮﻋﻲ ﺑﻴﺪﻱ ﻛﺘﻠﻪ ﻣﺎﻳﻬﻢ ﺑﻌﺪ ﻫﺴﺔ .
ﺗﻘﺮﺏ ﻣﻨﻲ ﺍﻛﺜﺮ ﻃﻠﻊ ﻛﻠﻴﻨﻜﺲ ﻇﻞ ﻳﺒﺎﻭﻉ ﻟﻮﺟﻬﻲ
ﺑﺎﻭﻋﺖ ﺑﻌﻴﻮﻧﻪ
ﮔﺎﻝ ﺷﻤﺴﻮﻳﻪ ﺑﻮﺟﻬﺞ ﺑﺲ ﺭﻏﻢ ﻫﺬﺍ ﺗﺨﺒﻠﻴﻦ ﻃﺎﻟﻌﻪ ﺑﻜﻞ ﺣﺎﻻﺗﺞ ﺍﻧﺖ ﺣﻠﻮﺓ ..
ﻇﻞ ﻳﻤﺴﺤﻠﻲ ﺩﻣﻮﻋﻲ ﺑﺎﻟﻜﻠﻴﻨﻜﺲ
ﺟﻤﺪﺕ ﺑﻤﻜﺎﻧﻲ ﺑﻼ ﺣﺮﺍﻙ ﻛﻠﻲ ﻣﺴﺘﺴﻠﻢ ﺍﻟﻪ
ﻣﺮﺭ ﺍﺻﺎﺑﻌﻪ ﻋﻠﻰ ﺧﺪﻱ ﺍﺑﺎﻭﻋﻠﻪ ﻭﻳﺒﺎﻭﻋﻠﻲ
ﺳﺤﺒﻨﻲ ﻣﻦ ﺧﺼﺮﻱ ﺑﺎﻳﺪ ﻭﺍﻻﻳﺪ ﺍﻟﺜﺎﻧﻴﺔ ﺧﻠﻪ ﺭﺍﺳﻲ ﻋﻠﻰ ﺻﺪﺭﻩ
ﺷﺎﻟﻲ ﻭﺻﻞ ﻟﻨﺺ ﺭﺍﺳﻲ ﺭﺟﻌﺖ ﺭﻓﻌﺘﻪ
ﺭﺍﺳﻲ ﻳﻮﺻﻞ ﻟﺮﮔﺒﺘﻪ ﺭﻓﻌﺖ ﺭﺍﺳﻲ ﻇﻠﻴﺖ ﺍﺷﻢ ﺑﻌﻨﻘﻪ
ﺧﻠﻴﺖ ﺍﻳﺪﻱ ﻋﻠﻰ ﻗﻠﺒﻪ ﺍﺗﺤﺴﺲ ﻧﺒﻀﺎﺗﻪ ﺳﺮﻳﻌﻪ ﻛﻠﺶ
ﻣﺎﺍﺳﻤﻌﻪ ﺷﻨﻮ ﻳﻜﻮﻝ ﺍﺫﻧﻲ ﻧﺴﺪﺕ ﻭﻛﺎﻧﻲ ﺑﻌﺎﻟﻢ ﺛﺎﻧﻲ
ﻟﺰﻡ ﺍﻳﺪﻱ ﺍﻟﺨﻠﻴﺘﻬﺎ ﻋﻠﻰ ﺻﺪﺭﻩ ﻭﺑﺎﺳﻬﺎ ﻭﺭﺟﻊ ﺧﻼﻫﺎ ﺑﻤﻜﺎﻧﻬﺎ ﻋﻠﻰ ﺻﺪﺭﻩ ﻭﻟﺰﻣﻬﺎ ﻗﻮﻱ
ﮔﺎﻝ ﺍﺫﻳﺘﺞ ﺳﺎﻣﺤﻴﻨﻲ ..
ﻭﻳﻤﺴﺢ ﻋﻠﻰ ﺭﺍﺳﻲ .. ﻭﺧﺮﺕ ﺭﺍﺳﻲ ﻣﻦ ﻋﻠﻰ ﺻﺪﺭﻩ ﻭﺳﺤﺒﺖ ﺍﻳﺪﻱ ﻣﻦ ﺍﻳﺪﻩ
ﺑﻬﺪﻭﺀ ﮔﺘﻠﻪ ﺍﺭﻳﺪ ﺍﺭﻭﺡ ..
ﻇﻞ ﻳﺒﺎﻭﻋﻠﻲ ﻭﺍﻳﺪﻩ ﻣﺴﺘﻘﺮﺓ ﻋﻠﻰ ﺧﺪﻱ ..
ﻣﺸﺎﻧﻲ ﺑﻬﺪﻭﺀ ﻭﮔﻌﺪﻧﻲ ﻋﻠﻰ ﺍﻟﻜﺮﺳﻲ
ﻛﺮﻓﺺ ﮔﺒﺎﻟﻲ .. ﻛﺎﻝ ﺍﻧﻲ ﻫﺴﻪ ﺍﻭﺻﻠﺞ ﺍﻛﻌﺪﻱ ﺍﻧﺘﻈﺮﻳﻨﻲ ﻫﻨﺎ ﺑﻴﻨﻤﺎ ﺍﺟﻴﺐ ﺳﻮﻳﺞ ﺍﻟﺴﻴﺎﺭﺓ ﻣﻦ ﺟﻮﻩ
.
.
ﺃﻣﺎﻥ .. ﻛﺴﺮﺕ ﻗﻠﺒﻲ ﺳﻤﻴﺔ ﺑﺪﻣﻮﻋﻬﺎ ..
ﺑﺲ ﺍﻧﻲ ﻣﺨﻠﻴﻬﺎ ﺑﺮﺍﺳﻲ ﻭﺍﺻﺮﻳﺖ ﺍﻟﻪ ﻫﻲ ﻭﻣﺎﺍﺭﻳﺪ ﻏﻴﺮﻫﺎ ﺗﺼﻴﺮﻟﻲ ﻣﺮﺓ ..
ﺣﺎﺟﻴﺖ ﺍﻣﻲ ﻗﺒﻠﻬﺎ ﺑﻴﻮﻡ ﻛﺘﻠﻬﺎ ﺭﺍﺡ ﺗﺠﻲ ﻟﻠﺤﻔﻠﺔ ﻣﺎﺍﺭﻳﺪ ﻫﻮﺳﺔ ﻭﻳﺎﻫﺎ ﻫﺎﻟﺒﻨﻴﺔ ﺍﺭﻳﺪﻫﺎ ﻭﻣﺎﺍﺭﻳﺪ ﻏﻴﺮﻫﺎ .
ﺳﻜﺘﺖ ﻣﺎﺣﺠﺖ ﺑﺲ ﺍﻇﺎﻫﺮ ﺍﻟﻜﻼﻡ ﺍﻟﻲ ﻣﺎﺍﻧﺤﺠﻪ ﻳﻤﻲ
ﺍﻧﻜﺎﻝ ﻳﻢ ﺳﻤﻴﺔ ..
ﺍﻟﻠﺘﻬﻴﺖ ﻋﻨﻬﺎ ﺑﺎﻟﺤﻔﻠﺔ ﺍﻧﺸﻐﻠﺖ ﺟﻴﺐ ﻫﺬﺍ ﻭﺩﻱ ﺫﺍﻛﻪ
ﻭﺑﺎﻻﺧﻴﺮ ﺳﻮﻳﺖ ﻣﻮﺑﺎﻳﻠﻲ ﺳﺎﻳﻠﻨﺖ
ﻭﺩﻳﺖ ﻋﺎﺋﻠﺔ ﻋﻤﻲ ﻟﺒﻴﺘﻨﺎ
ﺗﻮﻗﻌﺖ ﺳﻤﻴﺔ ﺭﺟﻌﺖ ﻻﻥ ﻣﺎﺷﻔﺘﻬﺎ ﺑﻌﺪ ..
ﻣﻦ ﺷﻔﺖ ﺗﺼﺮﻓﻬﺎ ﻫﺬﺍ ﻋﺼﺒﺖ ﻣﻠﻴﺖ ﻭﺍﻧﺎ ﺍﻋﻠﻤﻬﺎ ﻣﺎﺗﻌﺮﻑ ﺗﺤﺠﻲ ﺑﻬﺪﻭﺀ
ﺩﻓﻌﺘﻬﺎ ﺷﻔﺘﻬﺎ ﺗﺘﺄﻟﻢ ﺗﻨﺪﻣﺖ ﺍﻧﻘﻬﺮﺕ ﻋﻠﻴﻬﺎ
ﺣﺎﻭﻟﺖ ﺍﺣﺘﻮﻳﻬﺎ ﺷﻔﺘﻬﺎ ﻫﺪﺃﺕ
ﻛﻌﺪﺗﻬﺎ ﻛﺘﻠﻬﺎ ﺍﺑﻘﻲ ﻫﻨﺎ ﻫﺴﻪ ﺍﻭﺻﻠﺞ ﻟﻠﺒﻴﺖ .
ﺩﺧﻠﺖ ﻣﻦ ﺍﻟﺒﻠﻜﻮﻥ ﻭﻧﺰﻟﺖ ﺟﻮﻩ ..
ﺑﻌﺪﻩ ﺑﻴﺘﻨﺎ ﺑﻲ ﺍﻗﺎﺭﺑﻨﺎ ..
ﺟﺎﻱ ﺍﺩﻭﺭ ﻋﻠﻰ ﺳﻮﻳﺞ ﺳﻴﺎﺭﺗﻲ ﺷﻔﺖ ﺍﻣﻲ ﻭﺍﺑﻮﻱ ﻛﺎﻋﺪﻳﻦ ﻭﺣﺪﻫﻢ .. ﺑﺎﻟﺼﺎﻟﺔ
ﺩﺧﻠﺖ ﻋﻠﻴﻬﻢ ﻭﺳﺪﻳﺖ ﺍﻟﺒﺎﺏ ..
ﺑﺎﻭﻋﺖ ﻻﻣﻲ .. ﮔﺘﻠﻬﺎ ﻳﻮﻡ ﺍﻧﺖ ﺷﻨﻮ ﮔﻠﺘﻲ ﻟﺴﻤﻴﺔ ﺍﻧﻲ ﺷﻨﻮ ﻭﺻﻴﺘﺞ .. ﺩﺍﺭﺕ ﻭﺟﻬﺎ ﺑﺘﻜﺒﺮ .. ﻭﺣﺎﺟﺖ ﺍﺑﻮﻱ ﮔﻠﺘﻠﻪ ﺣﺎﺟﻲ ﻻﺑﻨﻚ ﺍﻧﻪ ﺗﻌﺒﺖ ﻣﻦ ﺍﻟﺤﺠﻲ ﻭﻳﺎ ﻭﻭﻳﺎﻫﺎ
ﺍﻣﺎﻥ ﺍﺳﻤﻊ ﻻﺑﻮﻙ ..
ﺍﺑﻮ ﺍﻣﺎﻥ .. ﺍﺑﻨﻲ ﻫﺎﻱ ﺑﻨﺖ ﺍﻳﻮﺏ ﻣﻮﻣﻨﺎﺳﺒﺔ ﺍﻟﻚ ﺍﻣﻬﺎ ﺳﻤﻌﺘﻬﺎ ﻣﻮﺯﻳﻨﺔ ﻭﺍﺣﻨﺎ ﻧﺎﺱ ﻭﺍﻟﻨﺎ ﺳﻤﻌﺘﻨﺎ ﻣﺎﺗﻨﺎﺳﺒﻨﺎ ﻟﺬﻟﻚ ﺧﻄﺒﺖ ﺍﻟﻚ ﻓﺮﺡ ﺑﻨﺖ ﻋﻤﻚ ﻭﻣﻦ ﺯﻣﺎﻥ ﺍﺣﻨﺎ ﺣﺎﺟﻴﻦ ﺑﻬﺬﺍ ﺍﻟﻤﻮﺿﻮﻉ ..
ﺃﻣﺎﻥ .. ﺷﻨﻮ ﺧﻄﺒﺘﻮﻫﺎ ﺍﻟﻲ ﻭﺷﻮﻛﺖ ..
ﺍﺷﻮﺍﻕ .. ﻫﺴﻪ ﺑﺠﻴﺘﻬﻢ ﻫﺎﻱ ﻟﻠﺒﺼﺮﺓ ﺧﻄﺒﻨﺎﻫﺎ ﺍﻟﻚ .
ﺃﻣﺎﻥ .. ﻭﺷﻨﻮ ﺍﻧﻲ ﺟﺎﻫﻞ ﻋﻤﺮﻱ 17 ﺗﺮﻭﺣﻮﻥ ﺗﺨﻄﺒﻮﻟﻲ ﺑﺪﻭﻥ ﻋﻠﻤﻲ ﻫﺴﻪ ﺣﺘﻰ ﻟﻮ ﺟﺎﻫﻞ ﻭﻳﺨﻄﺒﻮﻟﻪ ﻫﻢ ﻳﻜﻠﻮﻟﻪ
ﺍﻟﻤﻬﻢ ﺧﻄﻮﺑﺘﻜﻢ ﻫﺎﻱ ﻣﺎﻣﻌﺘﺮﻑ ﺑﻴﻬﺎ ﻳﻌﻨﻲ ﺭﺍﺡ ﺗﻔﺸﻠﻮﻥ ﻧﻔﺴﻜﻢ ﺍﻧﺘﻮﺍ ﻣﻮ ﺍﻧﻲ .. ﻭﻣﺎﻛﻮ ﻏﻴﺮ ﺳﻤﻴﺔ ﺭﺍﺡ ﺗﺼﻴﺮﻟﻲ ﻣﺮﺓ .
ﺍﺑﻮ ﺍﻣﺎﻥ .. ﺍﻣﺎﺍﻥ .. ﻛﺘﻠﻚ ﺳﻤﻌﺔ ﺍﻣﻬﺎ ﻣﻮ ﺯﻳﻨﺔ ﻭﺍﻧﻲ ﺣﺘﻰ ﺭﺿﻮﺍﻥ ﻣﻦ ﺗﻘﺪﻣﻠﻬﺎ ﺟﻨﺖ ﺭﺍﻓﺾ ﺑﺲ ﺣﺮﺟﻨﻲ ﻛﺪﺍﻡ ﺧﺎﻟﻚ ..
ﺍﺷﻮﺍﻕ .. ﺍﻣﺎﻥ ﺳﻤﻴﺔ ﻣﺎﺗﺼﻴﺮ ﺟﻨﻪ ﻟﻚ ﻫﺎﻱ ﺗﺠﻴﺐ ﺍﻟﻌﺎﺭ ﻟﻌﺎﺋﻠﺘﻨﻪ .
ﺍﻣﺎﻥ .. ﺍﻛﺘﻔﻴﺖ ﻣﻨﺞ ﺭﺍﺡ ﺗﺨﺬﻟﻴﻨﻲ ﻟﻠﻤﺮﺓ ﺍﻟﺜﺎﻧﻴﺔ ﺍﻟﺒﻨﻴﺔ ﻣﻨﻬﺎﺭﺓ ﺑﺴﺒﺒﺞ ﻛﺎﻓﻲ ﺗﻮﺟﻬﻴﻠﻬﺎ ﺍﻫﺎﻧﺎﺕ
ﻋﻮﺩ ﻫﺎﻱ ﺑﻨﺖ ﺍﺧﻮﺝ ﻣﻮ ﻏﺮﻳﺒﺔ ﺗﺎﺧﺬﻳﻬﺎ ﺑﺬﻧﺐ ﺍﻣﻬﺎ ﻣﻮ ﻣﻦ ﺣﻘﺞ .
ﺍﺑﻮ ﺍﻣﺎﻥ .. ﺍﻣﺎﻥ ﻻﺗﻔﺸﻠﻨﻲ ﻭﻱ ﺍﺧﻮﻳﺔ ﻭﺗﻘﻠﻞ ﻣﻦ ﺍﺣﺘﺮﺍﻣﻲ .
ﺍﻣﺎﻥ .. ﻣﻮ ﻣﺸﻜﻠﺘﻲ ﺍﻧﺘﻮﺍ ﺣﻠﻮﻫﺎ ﻣﻦ ﻳﻤﻜﻢ ﺩﻭﻣﻜﻢ ﻣﺨﻠﻴﻨﻲ ﺷﻤﺎﻋﺔ ﻟﺘﻌﻠﻴﻖ ﺍﺧﻄﺎﺋﻜﻢ ﺩﻭﻡ ﻣﺨﻠﻴﻨﻲ ﺑﻮﺟﻪ ﺍﻟﻤﺪﻓﻊ ﻣﺎﻛﻮ ﻏﻴﺮ ﺳﻤﻴﺔ ﺍﺗﺰﻭﺟﻬﺎ ﺧﻠﻲ ﻳﻜﻮﻥ ﺍﺑﺎﻟﻜﻢ ﻫﺎﻟﺤﺠﻲ .
ﺍﺷﻮﺍﻕ : ﺍﺗﺒﺮﻯ ﻣﻨﻚ ﻭﺍﻟﻠﻪ ..
ﺍﻣﺎﻥ : ﻣﻮ ﺟﺪﻳﺪﺓ ﻋﻠﻴﺞ ﺩﻛﺘﻮﺭﺓ ..
ﻋﻔﺘﻬﻢ ﻭﺭﺣﺖ ﺍﺧﺬﺕ ﺳﻮﻳﺞ ﺳﻴﺎﺭﺗﻲ
ﻭﺻﻌﺪﺕ ﻟﻠﺒﻠﻜﻮﻥ .. ﺑﺎﻭﻋﺖ ﺳﻤﻴﺔ ﻣﺎﻛﻮ
ﻃﻠﻴﺖ ﺷﻔﺘﻬﺎ ﺗﺤﺠﻲ ﻭﻳﺎ ﺭﺿﻮﺍﻥ ﺑﻌﺪﻫﺎ ﺻﻌﺪﺕ ﻭﻳﺎ ﺑﺎﻟﺴﻴﺎﺭﺓ .. ﺿﺮﺑﺖ ﻗﺒﻀﺖ ﺍﻳﺪﻱ ﻋﻠﻰ ﻣﺤﺠﺮ ﺍﻟﺒﻠﻜﻮﻥ
ﺍﻧﻲ ﺍﺩﺍﻓﻊ ﺍﻟﻬﺎ ﺑﻜﻞ ﻣﺎﺍﻣﻠﻚ ﻣﻦ ﻗﻮﺓ ﻭﻫﻲ ﻣﺼﺮﺓ ﺗﻀﻮﺟﻨﻲ ..
ﻧﺰﻟﺖ ﺟﻮﻩ .. ﺷﻔﺖ ﺍﻣﻲ ﻭﺑﻴﺒﻴﺘﻲ
ﮔﺎﻟﺖ .. ﻟﻌﺪ ﻭﻳﻦ ﺳﻤﻴﺔ
ﮔﺘﻠﻬﺎ .. ﺭﺍﺣﺖ ﻭﻱ ﺭﺿﻮﺍﻥ
ﺑﻴﺒﻲ .. ﻳﻮﻭﻭ ﻛﻮﻭﻥ؟ ﻏﻴﺮ ﺗﮕﻠﻲ ﺷﻮ ﻣﺎﮔﺎﻟﺖ ﻭﺭﺍﺣﺖ ﻻﺣﺠﺖ ﻭﻛﺎﻟﺖ ﺑﻴﺒﻴﺘﻲ ﺍﻳﻈﻞ ﺑﺎﻟﻬﺎ ﻋﻠﻴﻪ .
ﺍﺷﻮﺍﻕ . ﺑﻨﻈﺮﺓ ﻻﻣﺎﻥ . ﻋﺮﻣﺔ ﻭﻋﻮﺑﺔ ﻭﻋﻮﺟﻪ ﻭﻋﻤﺮﻫﺎ ﻣﺮﺍﺡ ﺗﻨﻌﺪﻝ ﻣﺪﺍﻡ ﺍﻣﻬﺎ ﺍﻣﺎﻟﻴﺪ
.
ﺍﻣﺎﻥ .. ﺭﻣﻘﺘﻬﺎ ﺑﻨﻈﺮﺓ ﻏﻀﺐ ﻭﻋﻔﺘﻬﻢ ﻭﺻﻌﺪﺕ ﻓﻮﻙ
ﻭﺍﻧﻲ ﺍﺻﻌﺪ ﺍﺗﺼﻠﺖ ﻋﻠﻰ ﺳﻤﻴﺔ ﺭﻓﻀﺘﻪ ﺍﺗﺼﻠﺖ ﻣﺮﺓ ﺛﺎﻧﻴﺔ ﻣﻐﻠﻖ ﺷﻤﺮﺕ ﺍﻟﺘﻠﻴﻔﻮﻥ ﺑﻐﻀﺐ ..
------
ﺳﻤﻴﺔ .. ﺷﻔﺖ ﺍﻣﺎﻥ ﺭﺍﺡ ﺩﺧﻞ ﺟﻮﻩ
ﻛﻤﺖ ﻣﻦ ﻣﻜﺎﻧﻲ ﺍﻣﺸﻲ ﺑﻜﺴﻞ
ﻧﺰﻟﺖ ﺟﻮﻩ ﺍﺧﺬﺕ ﺣﺬﺍﺋﻲ ﺑﻴﺪﻱ
ﻭﺳﻤﻌﺖ ﺻﻮﺕ ﺍﺑﻮ ﺍﻣﺎﻥ ﻣﻦ ﺍﻟﺸﺒﺎﻙ
ﻳﻜﻮﻟﻪ ﺑﻨﺖ ﺍﻳﻮﺏ ﺍﻣﻬﺎ ﺳﻤﻌﺘﻬﺎ ﻣﻮ ﺯﻳﻨﺔ ﻭﻣﺎﺗﻨﺎﺳﺒﻨﻪ ﺍﺣﻨﻪ ﻧﺎﺱ ﺍﻟﻨﻪ ﺳﻤﻌﺘﻨﻪ ..
ﻭﻛﻊ ﻛﻼﻣﻪ ﻋﻠﻴﻪ ﻣﺜﻞ ﺍﻟﺴﻬﺎﻡ ﻭﺻﺎﺑﺖ ﺭﻭﺣﻲ
ﻣﺰﻗﺘﻨﻲ ﺍﺷﻼﺀ
ﻟﺰﻣﺖ ﺍﻟﻤﺤﺠﺮ ﻣﺎﻝ ﺍﻟﺪﺭﺝ ﺍﺟﻴﺖ ﺍﻭﻛﻊ ﻛﻮﻩ ﺗﻤﺎﺳﻜﺖ
ﻟﻴﺶ ﻳﺮﺑﻲ ﺷﻨﻮ ﺫﻧﺒﻲ ﻭﺧﻄﻴﺌﺘﻲ
ﺑﺠﻴﺖ ﺑﺤﺮﮔﺔ ﺍﺳﻤﻌﻬﻢ ﻳﺤﺠﻮﻥ ﺑﺲ ﻣﺎﺍﺗﺤﻤﻠﺖ ﺑﻌﺪ .
ﺍﺳﻤﻊ ﺍﻱ ﺷﻲ .. ﺍﻟﻐﻠﻂ ﻣﻨﻲ ﺑﺎﻭﻋﺖ ﻟﻴﻔﻮﻙ ﺯﻳﺎﺩﺓ ﻋﻦ ﺍﻟﻠﺰﻭﻡ .. ﺧﻠﺺ ﺍﻣﺎﻥ ﻣﺎﻳﺤﺘﺎﺝ ﺑﻌﺪ ﺍﺣﻨﺎ ﺍﻧﺘﻬﻴﻨﺎ ﻣﻦ ﻫﺎﻱ ﺍﻟﻠﺤﻈﺔ ﻭﺭﺍﺡ ﺍﻧﺴﺤﺐ ﻣﻦ ﺣﻴﺎﺗﻚ ﺍﺣﻨﻪ ﻣﺎﻧﺮﻫﻢ ﻟﺒﻌﺾ ﺍﺑﺪﺍﺍ ..
ﻃﻠﻌﺖ ﻣﻦ ﻣﻜﺎﻧﻲ ﻣﺸﻴﺖ ﻭﺑﻴﺪﻱ ﺣﺬﺍﺋﻲ
ﺍﻣﺸﻲ ﻭﺍﻣﺴﺢ ﺩﻣﻮﻋﻲ ﻭﺍﻋﺪﻝ ﺑﺸﺎﻟﻲ
ﺻﺎﺭ ﮔﺒﺎﻟﻲ ﺭﺿﻮﺍﻥ ﻣﻨﺘﺠﻲ ﻋﻠﻰ ﺑﻨﻴﺪ ﺳﻴﺎﺭﺗﻪ
ﺑﺎﻭﻋﻠﻲ ﺿﺤﻚ ﮔﺎﻝ ﺳﺒﻴﺞ؟
ﺿﺤﻜﺖ ﺭﻏﻢ ﺍﻻﻟﻢ ﺍﻟﻲ ﺟﺎﻱ ﺍﺣﺲ ﺑﻲ ﺑﺲ ﺭﺩﺕ ﺍﻇﻬﺮ ﻣﺎﺗﺒﻘﻰ ﻣﻦ ﻗﻮﺓ ﻋﻨﺪﻱ .
ﮔﺘﻠﻪ ﻣﻮ ﻏﺮﻳﺒﻪ ﻋﻠﻴﻚ ﺳﻮﺍﻟﻒ ﺍﻣﻚ ..
ﺭﺿﻮﺍﻥ .. ﻫﺎﻱ ﺳﻨﻮ ﺳﻨﺪﺭﻳﻼ ﺍﺳﻮ ﺳﺎﻳﻠﺔ ﺣﺬﺍﺋﺞ؟
: ﺍﻱ ﻧﻔﺲ ﺣﺎﻝ ﺳﻨﺪﺭﻳﻼ ﻋﺪﻫﺎ ﻣﺮﺕ ﺍﺑﻮ ﻭﺍﻧﺎ ﻋﻨﺪﻱ ﺍﺧﺖ ﺍﺑﻮ ﻧﻔﺴﻬﺎ ﻣﺎﺗﺨﺘﻠﻒ ﻋﻨﻬﺎ ﺑﺸﻲ .
ﺩﻧﻜﺖ ﺍﻟﻠﺒﺲ ﺣﺬﺍﺋﻲ
ﺭﺿﻮﺍﻥ : ﻭﻳﻦ ﺭﺍﻳﺤﻪ ..
: ﻟﻠﺒﻴﺖ ..
: ﻣﻨﻮ ﻳﻮﺩﻳﺞ
: ﺍﺷﻮﻓﻠﻲ ﺗﻜﺴﻲ ﻣﻦ ﺍﻟﺸﺎﺭﻉ
: ﺗﻌﺎﻱ ﺍﻧﻪ ﺍﻭﺻﻠﺞ .
: ﺿﺤﻜﺖ ﻭﻣﺎﺗﺨﺎﻑ ﻋﻠﻰ ﺭﻭﺣﻚ ﻣﺜﻞ ﺍﺧﺮ ﻣﺮﺓ
: ﻻ ﻣﺎﺍﺧﺎﻑ ﻋﻮﺩ ﺍﺗﺴﺎﻫﺪ ﻗﺒﻞ ﻻﺍﺻﻌﺪ .
... ﺿﺤﻜﺖ ﻭﺻﻌﺪﺕ ﻭﻳﺎﺍ ..
ﺣﺮﻙ ﺳﻴﺎﺭﺗﻪ .. ﺑﻬﺎﻟﻠﺤﻈﺔ ﺧﺎﺑﺮﻧﻲ ﺍﻣﺎﻥ
ﺭﻓﻀﺘﻪ ﻭﻗﻔﻠﺖ ﺍﻟﺘﻠﻴﻔﻮﻥ ..
ﺭﺿﻮﺍﻥ .. ﻭﻳﻦ ﻣﺎﻭﻳﻦ ﻭﺳﻮﻥ ﺗﻘﻀﻴﻦ ﻭﻗﺘﺞ ﻫﺴﻪ ﺑﺎﻟﻌﻄﻠﺔ ..
ﺳﻤﻴﺔ .. ﻣﺎﻛﻮ ﻏﻴﺮ ﺍﻟﺒﻴﺖ ﻃﺒﻌﺎ
: ﻟﻴﺲ ﻣﺎﺗﺴﺘﻐﻠﻴﻦ .
: ﻭﻳﻦ ﺍﺷﺘﻐﻞ ﺍﺻﺤﺎﺏ ﺷﻬﺎﺩﺍﺕ ﻣﺎﻻﻛﻴﻠﻬﻢ ﺷﻐﻞ ﺍﻧﻮﺏ ﺍﻧﻪ ! !
: ﺍﺳﺘﻐﻠﻲ ﻭﻳﺎﻱ ﺍﺭﻳﺪﺝ ﻣﺴﺎﻋﺪﺓ ﺍﻟﻴﻪ ﺑﺎﻟﻌﻴﺎﺩﺓ .
: ﺑﺲ ﻛﻠﺸﻲ ﻣﺎﺍﻋﺮﻑ ﺍﻧﺎ ﺑﺸﻨﻮ ﺍﺳﺎﻋﺪﻙ .
: ﺍﻧﺖ ﻣﻌﻠﻴﺞ ﺍﻧﻪ ﺍﻋﻠﻤﺞ ﻭﺍﻟﻤﺠﻤﻊ ﺍﻟﻄﺒﻲ ﻗﺮﻳﺐ ﻋﻠﻴﻜﻢ ﻛﻠﺲ ﻓﻜﺮﻱ ﻭﺭﺟﻌﻴﻠﻲ ﺧﺒﺮ ..
------
ﺻﻔﺎ .. ﻛﻌﺪﺕ ﺍﻟﺼﺒﺢ ﺳﻮﻳﺖ ﺭﻳﻮﮒ ﺍﻟﻔﺮﺍﺱ
ﻭﺭﺣﺖ ﻛﻌﺪﺗﻪ ﻧﺰﻝ ﺗﺮﻳﮓ ..
ﺧﻠﺺ ﻣﺤﻀﺮﺗﻠﻪ ﺍﻟﺤﻤﺎﻡ ﺳﺒﺢ ﻭﻧﺰﻝ ﻧﺰﻟﺖ ﻭﺭﺍﻩ
ﺑﻮﺱ ﺍﻣﻪ ﻣﻦ ﺍﻳﺪﻳﻨﻬﺎ ﻭﺭﺍﺳﻬﺎ ﻭﻃﻠﻊ
ﻋﻤﺘﻲ ﻣﮕﺮﻣﻪ ﻣﺎﺑﻴﻬﺎ ﺗﻤﺸﻲ ﺑﺲ ﺗﺰﺣﻒ .
ﻃﻠﻌﺖ ﻭﺭﺍﻩ ﺑﺎﺳﻨﻲ ﻛﺎﻝ ﺭﺟﻌﻲ ﻧﺎﻣﻲ ﻻﺗﻈﻠﻴﻦ ﻛﺎﻋﺪﺓ ﺑﻌﺪ ﻭﻛﺖ .. ﺍﺑﺘﺴﻤﺖ ﺍﻟﻪ ﻭﺩﺧﻠﺖ ﺟﻮﻩ ..
ﻏﺴﻠﺖ ﺍﻟﻤﻮﺍﻋﻴﻦ ﻭﺭﺟﻌﺖ ﻧﻤﺖ ﺷﻮﻳﺔ
ﻛﻌﺪﺕ ﺧﺎﺑﺮﻧﻲ ﻛﺎﻝ ﻧﺮﻭﺡ ﺍﻟﻌﺼﺮ ﻟﻠﺴﻮﻙ ﻧﺸﺘﺮﻱ ﻣﻼﺑﺲ،ﺟﻬﺰﻱ ﻧﻔﺴﺞ ﻛﺘﻠﻪ ﻣﺎﺷﻲ ..
ﺻﺎﺭ ﺍﻟﻌﺼﺮ ﺍﺟﻪ ﻫﻮ ﻳﺤﺐ ﻳﻨﺎﻡ ﻫﻴﺞ ﻭﻛﺖ
ﻧﺎﻡ ﻭﻛﻠﻲ ﺍﻛﻌﺪﺓ ﺑﻌﺪ ﻣﺎﺍﺧﻠﺺ ..
ﻟﺒﺴﺖ ﻭﺧﻠﺼﺖ ﻛﻌﺪﺗﻪ ﺳﺒﺢ ﻭﺑﺪﻝ ﻭﻃﻠﻌﻨﺎ ﻟﻠﺴﻮﻙ
ﺟﺎﻱ ﻧﻔﺘﺮ ﻭﻻﺯﻣﻴﻦ ﺍﻳﺪ ﺑﺈﻳﺪ
ﻛﺘﻠﻪ ﻓﺮﺍﺱ ﺍﻧﺘﻈﺮ ﺍﻧﻔﺘﺢ ﻗﻴﻄﺎﻥ ﺣﺬﺍﺋﻲ
ﻣﺎﺧﻼﻧﻲ ﺍﺩﻧﮓ .. ﻧﺰﻝ ﻭﺭﺑﻄﻪ ﺍﻟﻲ
ﻣﺘﺖ ﻣﻦ ﺍﻟﺨﺠﻞ ﮔﺘﻠﻪ ﻟﻴﺶ ﺳﻮﻳﺖ ﻫﻴﺞ ﺍﻧﺎ ﺍﺭﺑﻄﻪ
ﻛﺎﻝ ﻻ ﻣﺎﺑﻴﻬﺎ ﺷﻲ ﺍﻧﺖ ﻣﺮﺗﻲ ﻭﻣﺎﺍﺭﻳﺪﺝ ﺗﺪﻧﻜﻴﻦ ﻭﺍﻧﺎ ﺷﺴﻮﻳﺖ ﻗﺎﺑﻞ .
ﺍﺧﺬﻧﻲ ﻣﻦ ﺍﻳﺪﻱ ﺍﻓﺘﺮﻳﻨﺎ ﺍﻟﺴﻮﮒ ﺍﺷﺘﺮﻳﻨﺎ
ﻧﻔﺴﻪ ﺣﻠﻮﻩ ﻣﺎﻟﻬﺎ ﻣﺜﻴﻞ ﺍﺷﺘﺮﻩ ﻻﻫﻠﻪ ﻭﺧﻮﺍﺗﻪ ﻭﺟﻬﺎﻝ ﺍﺧﻮ ﻛﻞ ﻭﺍﺣﺪ ﺣﺎﺟﻪ ﺍﻣﻪ ﻭﺍﺑﻮﻩ ﻣﺎﻧﺴﺎﻫﻢ .
ﻳﻤﺸﻲ ﻭﻳﺴﻠﻢ ﺍﺻﺪﻗﺎﺋﻪ ﻫﻮﺍﻱ ..
ﻣﺮﺕ ﺍﻻﻳﺎﻡ ﻫﺎﺩﺋﺔ ﻭﺣﻠﻮﺓ ﻛﻞ ﺧﻤﻴﺲ ﻧﻄﻠﻊ ﻛﻠﻨﺎ ﺳﻮﻩ
ﻟﻮ ﻧﺮﻭﺡ ﻟﻠﺴﺎﺣﻞ ﻟﻮ ﺗﺎﻳﻢ ﺳﻜﻮﻳﺮ ﻟﻮ ﺑﺼﺮﺓ ﻻﻧﺪ
ﻭﺍﺫﺍ ﻣﺎﻳﺮﺣﻮﻥ ﺍﻫﻠﻪ ﻳﺎﺧﺬﻧﻲ ﻭﺣﺪﻱ ﻟﻠﻤﻄﻌﻢ ﻟﻮ ﻧﺮﻭﺡ ﻟﻠﺠﺰﺍﺋﺮ ﻧﺸﺘﺮﻱ ﻣﻮﻃﺔ ﻭﻟﻔﺎﺕ ﻭﻧﺮﺟﻊ
ﺑﻬﺎﻱ ﺍﻝ 3 ﺍﺷﻬﺮ ﺍﻟﻌﺸﺘﻬﺎ ﻭﻳﺎ ﺟﺎﻧﺖ ﺍﺣﻠﻰ ﺍﻳﺎﻡ ﺣﻴﺎﺗﻲ
ﺳﻤﻴﺔ ﺗﺨﺎﺑﺮ ﻭﺗﺮﺯﻟﻨﻲ ﻭﻟﺞ ﻟﻴﺶ ﻣﺎﺗﺠﻴﻦ ﺗﺨﺎﺑﺮﻳﻦ ﺗﺴﺄﻟﻴﻦ ﻧﺎﺳﻴﺘﻨﺎ ﺍﻛﻠﻬﺎ ﺍﻱ ﻻﻥ ﻋﺎﻳﺸﺔ ..
ﻳﻮﻡ ﻣﻨﻬﻦ ﺍﻟﻈﻬﺮ ﺍﺟﻪ ﻓﺮﺍﺱ ﺿﺎﻳﺞ ﺭﻭﺣﻪ ﺑﺨﺸﻤﻪ
ﻛﺎﻝ ﺭﺍﺡ ﺍﻧﺎﻡ ..
ﻫﻮ ﻧﺎﻡ ﻭﺍﻧﻪ ﺭﺣﺖ ﺍﻏﺴﻞ ﻣﻼﺑﺲ
ﻭﻛﻬﺮﺑﺎﺀ ﻣﺎﻛﻮ ﻓﺮﻛﺘﻬﻦ ﺑﻴﺪﻱ
ﺳﻤﻌﺖ ﻋﻤﻮ ﺻﺎﺣﻨﻲ ﻛﺎﻝ ﺭﻭﺣﻲ ﻭﻋﻲ ﻓﺮﺍﺱ ﺧﻠﻲ ﻳﺴﻮﻱ ﻭﺍﻳﺮ ﺍﻟﺴﺤﺐ ﻣﻜﻄﻮﻉ ..
ﺭﺣﺖ ﻛﻌﺪﺗﻪ ﻣﺎﻗﺒﻞ ﻳﻜﻌﺪ
ﻟﺤﺪ ﻣﺎﺍﺟﻪ ﻋﻤﻮ ﻟﻠﻐﺮﻓﺔ ..
ﻭﻇﻞ ﻳﺤﺠﻲ .. ﻛﺎﻡ ﻋﻠﻰ ﺣﻴﻠﻪ ﻭﺍﻧﺎ ﻣﻘﻬﻮﺭﺓ ﻋﻠﻴﻪ ﺧﻄﻴﺔ ﺗﻌﺒﺎﻥ ﻣﺎﻛﻤﻞ ﻧﻮﻣﺘﻪ .. ﺭﺍﺡ ﺳﺒﺢ ﻭﺑﺪﻝ
ﺍﺧﺬ ﺩﺭﺝ ﺣﺪﻳﺪ ﻭﺩﺭﻧﻔﻴﺲ ﻭﻃﻠﻊ ..
ﻛﻌﺪﺕ ﺑﺎﻟﻄﺎﺭﻣﺔ ﺍﻧﺘﻈﺮﻩ .. ﺣﺎﺭﻩ ﻭﻛﻬﺮﺑﺎﺀ ﻣﺎﻋﺪﻧﺎ ..
ﺑﻌﺪﻫﻪ ﺳﻤﻌﺖ ﻫﻮﺳﻪ ﺑﺎﻟﺪﺭﺑﻮﻧﻪ .
ﺍﺟﻪ ﺣﻤﺎﻱ ﻳﻨﻬﺪ ﻇﻞ ﻳﺼﻴﺢ ﻓﺮﺍﺱ ﺍﻧﺘﻞ ﻓﺮﺍﺱ ﺍﻧﺘﻞ
ﻟﻄﻤﺖ ﻭﺟﻬﻲ ﻭﺭﻛﺾ ﻟﺒﺎﺏ ﺍﻟﺸﺎﺭﻉ ..
ﺻﺎﺭ ﻛﺪﺍﻣﻲ ﺻﺎﺡ ﻭﻳﻦ ﺭﺍﻳﺤﺔ ﻃﺒﻲ ﺟﻮﻩ
ﺩﻓﻌﺘﻪ ﻭﻛﻮﻣﺘﻪ ﺑﺎﻟﻜﺎﻉ ﻣﺎﺍﺩﺭﻱ ﻣﻨﻴﻦ ﺍﺟﺘﻨﻲ ﺍﻟﻘﻮﺓ
ﻗﻠﺒﻲ ﻭﺭﻭﺣﻲ ﻣﺜﻞ ﻃﻴﺮ ﻣﺬﺑﻮﺡ ﻉ ﺍﻟﻨﺺ ..
ﻃﻠﻌﺖ ﺑﺮﻩ ﻭﻭﺻﻠﺖ ﻟﻤﻜﺎﻥ ﺍﻟﺤﺎﺩﺙ
ﺷﻔﺘﻬﻢ ﻣﻠﺘﻤﻴﻦ ﻋﻠﻴﻪ ﻭﻳﻀﺮﺑﻮﻧﻪ ﺑﺎﻟﻌﺼﻲ ﻳﺴﺤﺒﻮﻥ ﻣﻨﻪ ﺍﻟﻜﻬﺮﺑﺎﺀ ﻭﺍﻧﻪ ﺑﺪﺷﺪﺍﺷﺘﻲ ﻭﺍﺑﺠﻲ .. ﺍﺭﻳﺪ ﺑﺲ ﺍﺭﻭﺣﻠﻪ ﻣﺎﻛﺪﺭﺕ .. ﻛﻮﻣﻪ ﻣﻠﺘﻤﻴﻦ ﻋﻠﻴﻪ .
ﺷﺎﻓﺘﻨﻲ ﺟﻴﺮﺍﻧﻪ ﺍﻧﻄﺘﻨﻲ ﻋﺒﺎﻳﺔ ..
ﺧﺎﺑﺮﻭﺍ ﺍﻻﺳﻌﺎﻑ ﻭﺍﺟﺖ ﻭﺍﻧﻪ ﻭﺍﻛﻔﻪ ﻭﺍﺻﺮﺥ ﻭﺍﺑﺠﻲ ﻭﻣﺎﺣﺎﺳﺔ ﺑﻠﻲ ﺣﻮﺍﻟﻴﺔ ﺷﻨﻮﻭﻭ .
ﺑﺲ ﻟﺰﻣﻪ ﺍﻟﻤﺴﻌﻒ ﻧﺘﻠﻪ ﻣﻦ ﺷﺪﺓ ﺍﻟﻜﻬﺮﺑﺎﺀ ﺍﻟﻲ ﺑﺠﺴﻤﻪ
ﺻﻌﺪﺕ ﻭﻳﺎﻫﻢ ﺑﺎﻻﺳﻌﺎﻑ ﺑﺲ ﻣﺎﺍﻛﺪﺭ ﺍﺟﻴﺴﻪ
ﻛﻀﻴﺘﻬﺎ ﺑﺠﻲ ﻭﺻﻴﺎﺡ ﻭﻫﻮ ﻓﺎﻗﺪ ﻭﻣﺎﺣﺎﺱ ﺑﺸﻲ .
ﺍﻛﻠﻪ ﻓﺮﺍﺱ ﻻﺗﺘﺮﻛﻨﻲ ﺍﻟﻠﻪ ﻳﺨﻠﻴﻚ .
ﺍﺑﺠﻲ ﻭﺍﺷﻬﻚ ﻭﺍﺩﻋﻲ ﻭﺣﺎﻟﺘﻲ ﺣﺎﻟﻪ ..
ﻭﺻﻠﻨﻪ ﺍﻟﻤﺴﺘﺸﻔﻰ ..
ﻛﺎﻟﻮﺍ ﺣﺎﻟﺘﻪ ﺧﻄﺮﻩ ﻧﻘﻠﻮﺍ ﻟﻠﺠﻤﻠﺔ ﺍﻟﻌﺼﺒﻴﺔ
ﻧﻘﻠﻮﺍ ﻭﻫﻨﺎﻙ ﻗﺮﺭﻭﺍ ﻳﺴﻮﻭﻟﻪ ﻋﻤﻠﻴﺔ ﻻﻥ ﻋﻨﺪﻩ ﻧﺰﻳﻒ ﺩﺍﺧﻠﻲ .. ﺳﻮﻭﻟﻪ ﺍﻟﻌﻤﻠﻴﺔ ﻭﻧﺠﺤﺖ ﺑﺲ ﺩﺧﻞ ﺑﻐﻴﺒﻮﺑﺔ ﺑﻌﺪﻫﺎ ﻭﻣﺎﺧﻠﻮﻧﻲ ﺍﺷﻮﻓﻪ ..
ﺑﻌﺪ ﺍﻟﻌﻤﻠﻴﺔ ﺍﻟﻄﺒﻴﺐ ﮔﺎﻝ ﻧﻨﺘﻈﺮ 24 ﺳﺎﻋﻪ ..
ﻛﻌﺪﺕ ﺍﺩﻋﻲ ﻭﺍﺻﻠﻲ ﺭﺑﻲ ﻛﻮﻥ ﻳﻔﻴﻖ ﻭﻳﺼﺤﻰ ﻭﻳﺼﻴﺮ ﺯﻳﻦ ﺩﻣﻮﻋﻲ ﻣﺎﻧﺸﻔﺖ ﻭﻛﻌﺪﺕ ﺍﺗﻮﺳﻞ ﺑﻌﻤﻮ ﺑﺲ ﺧﻠﻴﻨﻲ ﺍﺩﺧﻞ ﺍﺷﻮﻓﻪ ﺍﺗﺮﺟﺎﻙ ﻋﻤﻮ ﻭﻧﺰﻟﺖ ﻋﻠﻰ ﺭﺟﻠﻪ ﺍﺑﻮﺳﻬﺎ ﺑﺲ ﺍﺳﻤﺤﻠﻲ ﺍﺷﻮﻓﻪ
.
.
ﺻﻔﺎ .. ﻋﻤﻮ ﺍﻟﻠﻪ ﻳﺨﻠﻴﻚ ﺩﺧﻠﻨﻲ ﺍﺑﻮﺱ ﺭﺟﻠﻚ ﺑﺲ ﺍﺷﻮﻓﻪ ﻃﻔﻲ ﺍﻟﻨﺎﺭ ﺍﻟﺒﻴﻪ ﻋﻠﻴﻪ ﻫﺬﺍ ﺭﺟﻠﻲ ﺍﻟﻠﻪ ﺣﺒﻮﺑﻲ .
ﻭﻧﺰﻟﺖ ﻋﻠﻰ ﺭﺟﻠﻪ ﺍﺭﻳﺪ ﺍﺑﻮﺳﻬﺎ ﮔﺎﻡ ﺭﻓﻌﻨﻲ ﻭﺍﻧﻪ ﻣﻨﻬﺎﺭﺓ ﺑﺲ ﻧﻈﺮﺓ ﻳﺎﺭﺑﻲ ﻧﻈﺮﺓ ﻣﻨﻚ ﺍﻟﻪ ﻻﺗﻴﺘﻤﻨﻲ ﺑﻲ .
ﺍﺑﻮ ﻓﺮﺍﺱ .. ﻳﺎﺑﻨﻴﺘﻲ ﺍﻟﺪﻛﺎﺗﺮﺓ ﻣﺎﻳﻘﺒﻠﻮﻥ ﻣﺎﻳﺼﻴﺮ ﺍﺣﺪ ﻳﺪﺧﻞ ﻭﺿﻌﻪ ﺣﺮﺝ ..
ﺍﺧﻮ ﻓﺮﺍﺱ .. ﻳﺎﺑﻪ ﻫﺎﻱ ﺧﺒﺼﺖ ﺍﻟﻤﺴﺘﺸﻔﻰ ﺧﺒﺺ ﻓﻀﺤﺘﻨﻪ ﺧﺘﺮﻭﺡ ﺗﺸﻮﻓﻪ ﻭﺍﻧﻪ ﺍﺭﺟﻌﻬﺎ ﻟﻠﺒﻴﺖ ﻣﺎﻇﻞ ﻫﻨﺎ ﺍﻧﻪ ﺭﺍﻳﺢ ﺍﺳﺘﺄﺫﻥ ﻣﻦ ﺍﻟﻄﺒﻴﺐ ﺍﮔﻠﻪ ﻳﻄﺒﺒﻬﺎ .
ﺻﻔﺎ .. ﮔﻌﺪﺕ ﺑﺎﻟﮕﺎﻉ ﻭﺍﺑﺠﻲ ﻭﺍﻧﺘﻈﺮ ﺣﻤﺎﻱ ﻋﺒﺎﺱ ﻳﺠﻲ ﺣﺘﻰ ﻳﺨﻠﻮﻧﻲ ﺍﺩﺧﻞ .
ﺍﺟﻪ ﻋﺒﺎﺱ ﻭﻭﻳﺎ ﺩﻛﺘﻮﺭ ﮔﺎﻝ ﺩﺧﻠﻲ ﺑﺲ ﻭﺣﺪﺝ 5 ﺩﻗﺎﻳﻖ ﺑﺲ ﻭﺗﻄﻠﻌﻴﻦ .
ﻇﻠﻴﺖ ﺍﻣﺴﺢ ﻋﻴﻮﻧﻲ ﻭﺧﺸﻤﻲ ﺑﺎﻟﻌﺒﺎﻳﺔ ﻭﺍﺟﺎﻭﺑﻬﻢ ﺍﻱ ﺍﻱ ﻣﺎﻃﻮﻝ ﻭﺍﻟﻠﻪ ﻫﺴﻪ ﻫﻮ ﺑﺲ ﻳﺸﻮﻓﻨﻲ ﻳﮕﻌﺪ .
ﺩﺧﻠﺖ ﻋﻠﻴﻪ ﺑﺲ ﺷﻔﺘﻪ ﺍﻧﺮﻋﺒﺖ
ﺭﺍﺑﻄﻴﻦ ﺍﻳﺪﻳﻪ ﺑﺴﺮﻳﺮ ﺍﻟﻤﺴﺘﺸﻔﻰ
ﺭﺍﺳﻪ ﻣﻀﻤﺪ ﻭﺍﻳﺮﺍﺕ ﻭﺻﻮﻧﺪﺍﺕ ﺍﺷﻜﺎﻝ ﻋﻠﻰ ﺟﺴﻤﻪ
ﺷﮕﺎﻟﺖ ﺭﻭﺣﻚ ﺣﺒﻴﺒﻲ ﻣﻦ ﻭﮔﻌﺖ ﻣﻦ ﻓﻮﮒ
ﻳﺒﻌﺪ ﻋﻤﺮﻱ ﺭﻳﺖ ﺍﻟﻮﺟﻊ ﺍﻟﺒﻴﻚ ﺑﻴﻪ ..
ﻇﻠﻴﺖ ﺍﺷﻬﮓ ﺍﺷﻬﮓ ﻭﺩﻣﻌﻲ ﻣﺎﻳﺸﻔﻌﻠﻲ
ﻭﻳﻦ ﺗﺮﻳﺪ ﺗﺮﻭﺡ ﻋﻨﻲ ﻓﺮﺍﺱ ﻭﻳﻦ ﻋﻠﻘﺘﻨﻲ ﺑﻴﻚ
ﻭﻟﻚ ﻟﻮ ﻛﺎﺗﻠﻨﻲ ﻟﻮ ﺫﺍﻟﻨﻲ ﻣﺎﺟﺎﻥ ﺍﻧﺤﺮﻡ ﻣﻨﻚ
ﺍﻛﻌﺪ ﻟﻮ ﻣﺸﻠﻮﻝ ﺍﻧﻪ ﺍﺻﻴﺮ ﺍﻟﻚ ﺍﻳﺪ ﻭﺭﺟﻞ ﺑﺲ ﺍﻛﻌﺪ ﻭﺣﻖ ﺍﻟﻠﻪ ﻣﺎﺭﺍﻳﺪﺓ ﻣﻨﻚ ﺷﻲ
ﺣﺒﻴﺘﻚ ﻓﺮﺍﺱ ﻭﺍﻟﻠﻪ ﺷﺎﻫﺪ ﻋﻠﻴﻪ
ﺷﻔﺖ ﺑﻴﻚ ﺍﻻﺏ ﻭﺍﻻﻡ ﻭﺍﻻﺥ ﺻﺮﺕ ﺍﻟﻲ ﻛﻞ ﺷﻲ .
ﺗﻘﺮﺑﺖ ﻣﻨﻪ ﺑﺨﻄﻮﺍﺕ ﻳﺎﺋﺴﺔ ﻭﺑﻌﺪ ﻟﺤﻈﺎﺕ ﺧﻮﻑ ﺧﺎﻳﻔﻪ ﺍﺍﺫﻱ ﺍﺫﺍ ﺍﻟﻠﻤﺴﻪ ..
ﺷﻔﺖ ﺍﻟﺪﻡ ﻣﺤﺼﻮﺭ ﻣﻦ ﻳﻢ ﺍﻟﺮﺑﻂ ﻣﺎﻝ ﺍﺩﻳﻴﻪ ﻭﺻﺎﻳﺮﺍﺕ ﺯﺭﮒ ﻛﺴﺮ ﮔﻠﺒﻲ ﻟﻴﺶ ﻫﻴﺞ ﻣﺄﺫﻳﻨﻪ ﺧﻄﻴﻪ
ﺗﻘﺮﺑﺖ ﻭﻓﺘﺤﺘﻬﺎ .. ﻫﻲ ﻟﺤﻈﺎﺕ ﻭ ﺟﺴﻤﻪ ﻇﻞ ﻳﻬﺘﺰ ﻗﻮﻭﻱ ﻭﻭﻛﻊ ﻣﻦ ﺍﻟﺠﺮﺑﺎﻳﺔ ﻇﻠﻴﺖ ﺍﺻﺮﺥ
ﺍﺟﻮ ﺍﻻﻃﺒﺎﺀ ﻭﻋﻤﻲ ﻭﺣﻤﺎﻱ ﻭﻃﻠﻌﻮﻧﻲ ﺑﺮﻩ .
ﻃﻠﻊ ﺍﻟﺪﻛﺘﻮﺭ ..
ﺳﺄﻟﻪ ﻋﻤﻮﻭ .. ﺷﺒﻲ ﺩﻛﺘﻮﺭ ﺷﺒﻲ ﺍﺑﻨﻲ
ﺻﻔﺎ .. ﺑﺎﻭﻋﻠﻲ ﻛﺎﻝ ﻟﻴﺶ ﺗﻔﺘﺤﻴﻦ ﺍﻳﺪﻳﻪ ﻣﻦ ﺍﻟﺴﺮﻳﺮ .
ﺻﻔﺎ .. ﻭﺳﻂ ﺍﻟﺪﻣﻮﻉ ﻛﺘﻠﻪ ﺍﻳﺪﻩ ﻣﺤﺼﻮﺭ ﺑﻴﻬﺎ ﺍﻟﺪﻡ ﻭﺻﺎﻳﺮﺓ ﺯﺭﮔﺔ ..
ﺍﻟﺪﻛﺘﻮﺭ .. ﺭﺟﻠﺞ ﻗﻮﻱ ﻭﺟﺴﻤﻪ ﺑﻲ ﺷﺤﻨﺎﺕ ﻛﻬﺮﺑﺎﺋﻴﻪ
ﺍﻟﻤﻬﻢ ﺍﻟﻨﺰﻳﻒ ﻫﻢ ﺭﺟﻊ ﻭﺭﺍﺡ ﻧﺴﻮﻳﻠﻪ ﻋﻤﻠﻴﻪ ﺛﺎﻧﻴﻪ .
ﺻﻔﺎ .. ﻋﻔﻴﺔ ﺩﻛﺘﻮﺭ ﮔﻠﻲ ﺷﺮﺍﺡ ﻳﺼﻴﺮ ﺑﻲ .
ﺍﻟﺪﻛﺘﻮﺭ .. ﺍﺣﻨﺎ ﺟﺎﻱ ﻧﺴﻮﻱ ﺍﻟﻲ ﻋﻠﻴﻨﻪ ﻭﺑﻘﺖ ﻳﻢ ﺍﻟﻠﻪ ﻭﺍﻧﺘﻮﺍ ﻫﻢ ﺗﻮﻗﻌﻮﺍ ﻛﻞ ﺷﻲ ..
ﻭﺭﺍﺡ ..
ﺭﺟﻌﺖ ﮔﻌﺪﺕ ﻋﻠﻰ ﺍﻻﺭﺽ ..
ﻋﺒﺎﺱ .. ﮔﻮﻣﻲ ﺻﻔﺎ ﮔﻮﻣﻲ ﺍﻭﺩﻳﺞ ﻟﻠﺒﻴﺖ ﻳﻠﻠﻪ ﻻﻇﻠﻴﻦ ﻫﻨﺎ ..
: ﻭﻳﻦ ﺗﻮﺩﻳﻨﻲ ﻣﺎﻋﻮﻓﻪ ﻟﺤﻈﺔ ﻭﺍﻟﻠﻪ ﺍﺑﻘﻰ ﻫﻨﺎ .
: ﻛﻮﻣﻲ ﻛﻮﻣﻲ ﻳﻠﻪ ﻻﺗﻌﺎﻧﺪﻳﻦ ﺍﺣﻨﻪ ﺍﻱ ﺷﻲ ﻳﺼﻴﺮ ﻧﺨﺎﺑﺮﻛﻢ .
: ﻭﺍﻧﻪ ﺍﻧﺘﻈﺮﻙ ﻋﻠﻤﺎ ﺗﺨﺎﺑﺮ ﻻ ﻣﺎﺭﻭﺡ ﻛﺎﻋﺪﺓ ﻫﻨﺎ ﻣﺎﺿﺎﺭﺗﻜﻢ ﺑﺸﻲ ﺍﻧﻪ ﻫﺬﺍ ﺭﺟﻠﻲ ﻭﻣﺎﻋﻮﻓﻪ ﻭﺣﺪﻩ .
ﻋﺒﺎﺱ .. ﺑﻮﻳﻪ ﺍﺣﺠﻴﻠﻚ ﻛﻠﻤﺔ ﻭﻳﺎﻫﺎ ﻣﺠﻠﺒﻪ ﻫﻨﺎ ﺧﻠﻲ ﺍﻭﺩﻳﻬﻪ ﻟﻠﺒﻴﺖ ﻭﺑﺎﺟﺮ ﺍﺟﻴﺐ ﺍﻣﻲ ﻭﺍﺟﻴﺒﻬﺎ ﻭﻳﺎﻫﺎ .
ﺻﻔﺎ .. ﺍﺟﻪ ﺻﻮﺑﻲ ﻋﻤﻲ ﻭﻛﻮﺓ ﻳﺤﺠﻲ ﻣﻦ ﺩﻣﻮﻋﻪ
ﻛﺎﻝ ﻛﻮﻣﻲ ﺑﻨﻴﺘﻲ ﺭﻭﺣﻲ ﻟﻠﺒﻴﺖ ﻇﻠﺘﺞ ﻫﻨﺎ ﻣﺎﻣﻨﻬﻪ ﻓﺎﻳﺪﻩ . ﺣﻄﻴﺖ ﺭﺍﺳﻲ ﻋﻠﻰ ﺭﻛﺒﻲ ﻭﻇﻠﻴﺖ ﺍﺑﺠﻲ
ﮔﺘﻠﻪ ﻋﻤﻲ ﻣﺎﺭﻭﺡ ﻣﺎﺍﺭﻳﺪ ﺧﻠﻲ ﺍﺑﻘﻰ ﻫﻨﺎ ﻣﺎﺳﻮﻱ ﺷﻲ ﻭﺍﻟﻠﻪ ..
ﺳﻤﻌﺘﻪ ﻛﺎﻝ ﺧﻠﻴﻬﻪ ﺗﺒﻘﻰ ..
ﺑﻘﻴﺖ ﮔﺎﻋﺪﺓ ﻭﺍﺷﻮﻑ ﺍﻟﺪﻛﺎﺗﺮﻩ ﺗﻄﺐ ﻭﺗﻄﻠﻊ ﻋﻠﻴﻪ
ﻭﻣﺎﺑﻘﻰ ﻭﺍﺣﺪ ﻣﺎﺍﺟﺎﻟﻪ ﻟﻠﻤﺴﺘﺸﻔﻰ ...
ﻭﺍﻟﻜﻞ ﻳﺒﺠﻲ ﻋﻠﻴﻪ ﻧﺴﻮﺍﻥ ﻭﺯﻟﻢ ﺗﺒﺠﻲ .
.
ﺑﻌﺪ ﻟﻴﻠﺔ ﺑﺎﻟﻤﺴﺘﺸﻔﻰ ﻣﺎﺿﻜﺖ ﻃﻌﻢ ﺍﻟﻨﻮﻡ ﺑﻴﻬﺎ ﻭﻻﺛﺎﻧﻴﺔ ﻗﻄﺮﺓ ﻣﺎﻱ ﻣﺎﺷﺮﺑﺖ ﻟﻜﻤﺔ ﺍﻛﻞ ﻣﺎﺍﻛﻠﺖ .
ﺻﺎﺭ ﺍﻟﻈﻬﺮ ﻭﻭﻗﺘﻬﺎ ﺷﻤﺲ ﻗﻮﻳﺔ ﻃﻠﻌﺖ
ﺍﺩﻋﻲ ﺍﻟﻠﻪ .. ﻛﻌﺪﺕ ﺑﺎﻟﺸﻤﺲ ﺑﻠﻜﻲ ﺍﻟﻠﻪ ﻳﻌﻄﻒ ﻋﻠﻴﻪ ﻭﻳﺴﺘﺠﺎﺏ ﺩﻋﺎﺋﻲ ..
ﺍﺑﻮﻱ ﻭﺳﻤﻴﺔ ﻭﺭﻗﻴﺔ ﻭﻓﺎﻃﻤﺔ ﺍﺟﻮ ﻟﻠﻤﺴﺘﺸﻔﻰ ﺭﻛﻀﺘﻠﻬﻢ ﺍﺑﺠﻲ ﻭﺍﻧﺤﺐ ..
ﺗﻌﺒﺖ ﻛﻌﺪﺕ ﺑﺎﻟﻜﺎﻉ ..
ﻭﻋﻤﻲ ﻳﻜﻠﻠﻬﻢ ﺍﺧﺪﻭﻫﺎ ﻟﻠﺒﻴﺖ ﺧﻠﺘﺒﺪﻝ ﻭﺗﻐﺴﻞ ﺗﺎﻛﻞ ﺗﺮﺗﺎﺡ ..
ﻛﺘﻠﻬﻢ ﻣﺎﺭﻳﺪ ﻣﺎﻣﺤﺘﺎﺟﺔ ﺷﻲ ﻛﻠﺸﻲ ﻣﺎﺍﺭﻳﺪ
ﺳﻤﻴﺔ ﻳﻤﻲ ﻛﺎﻋﺪﺓ ﺑﺎﻟﻜﺎﻉ ﻻﺯﻣﺘﻨﻲ ﻣﻦ ﻛﺘﻔﻲ ﻭﺗﺒﺠﻲ
ﻛﺮﻓﺺ ﻳﻤﻲ ﺍﺑﻮﻱ ﮔﻠﻲ ﻳﻠﻠﻪ ﻳﺎﺑﻪ ﮔﻮﻣﻲ ﺍﻭﺩﻳﺞ ﺍﺭﺗﺎﺣﻲ ﻭﺍﺭﺟﻌﺞ ﺑﻴﺪﻱ ﻭﺍﻟﻠﻪ ..
ﮔﺘﻠﻪ ﻳﺎﺑﻪ ﻛﻠﻠﻬﻢ ﺧﻠﻲ ﺍﺭﻭﺡ ﺍﺷﻮﻓﻪ ﻋﻔﻴﺔ ﻣﺎﻳﺨﻠﻮﻧﻲ ﻭﺍﻟﻠﻪ ﺍﺭﻭﺡ ﻭﻳﺎﻙ ﺑﺲ ﺧﻞ ﺍﺷﻮﻓﻪ ..
ﻛﺎﻡ ﻭﺭﺍﺡ ﺣﺎﺟﺎﻫﻢ ..
ﻗﺒﻠﻮﺍ ﺍﺩﺧﻞ .. ﺩﺧﻠﺖ ﻳﻤﻪ . ﺑﻌﺪﻩ ﺑﺎﻟﻐﻴﺒﻮﺑﺔ
ﺑﺎﻭﻋﺘﻠﻪ ﺍﺭﻳﺪ ﺍﺧﻠﻲ ﻋﻴﻮﻧﻲ ﻳﻤﻪ
ﻣﺎﺍﺟﺎﻱ ﺍﺷﺒﻊ ﺷﻮﻑ ﻣﻨﻪ ﺍﺣﺎﺟﻴﻚ .. ﺷﺒﺴﺎﻉ ﺍﺗﺮﻳﺪ ﺗﺘﺮﻛﻨﻲ ﺑﻌﺪﻧﻪ ﻣﺎﺷﻔﻨﻪ ﺷﻲ ﻣﻦ ﺯﻭﺍﺟﻨﺎ ﻉ ﺍﻻﻗﻞ ﺍﺗﺮﻛﻠﻲ ﺷﻲ ﻣﻨﻚ ﺍﺷﻢ ﺭﻳﺤﺘﻚ ﺑﻲ .
ﺧﻠﻴﻠﻲ ﺫﻛﺮﻯ ﻣﻨﻚ ..
ﺍﻟﻠﺘﻔﺘﺖ ﻟﻴﻮﺭﻩ ﺧﺎﻑ ﻻﺍﺣﺪ ﻭﺭﺍﻱ ﻻﻥ ﻣﺤﺬﺭﻳﻨﻲ ﻣﺎﺍﺗﻘﺮﺏ ﻫﻮﺍﻱ ﻣﻨﻪ ..
ﺣﺠﻴﺖ ﻭﻳﺎ ﻓﺮﺍﺱ ﻓﺪﻭﻩ ﺍﺳﻨﺪ ﻧﻔﺴﻚ ﺍﻟﺨﺎﻃﺮﻱ ﺍﺭﺟﻌﻠﻲ ﺍﺭﻳﺪﻙ ﻭﺍﻟﻠﻪ ﻋﺸﻴﺮﺗﻲ ﻛﻠﻬﺎ ﺗﺮﻭﺡ ﻓﺪﻭﻩ ﻷﺳﻤﻚ
ﻻﺗﻴﺘﻤﻨﻲ ﺑﻌﺪﻙ ﻋﻔﻴﻪ .. ﻓﺮﺍﺱ ﻳﺮﺩﻭﻧﻲ ﺍﺭﻭﺡ ﻟﻠﺒﻴﺖ ﺍﻧﺖ ﺗﻘﺒﻞ ﺍﺭﻭﺡ ﻟﻮ ﺍﺑﻘﻰ ﻳﻤﻚ ﻓﺮﺍﺱ ﺭﺍﺡ ﺍﻟﺰﻡ ﺍﻳﺪﻙ ﺍﺫﺍ ﺗﺮﻳﺪﻧﻲ ﺍﺑﻘﻰ
ﺍﻋﺼﺮ ﺍﻳﺪﻱ .. ..
ﻟﺰﻣﺘﻪ ﺣﺴﻴﺘﻪ ﻋﺼﺮ ﺍﻳﺪﻱ ﻭﺟﺴﻤﻪ ﻇﻞ ﻳﻬﺘﺰ ﺣﻴﻴﻴﻴﻴﻞ
ﻭﻛﻌﺖ ﻋﻠﻰ ﺭﻛﺒﻲ ﻭﻓﻘﺪﺕ ﻭﻇﻠﻴﺖ ﺍﺻﺮﺥ
ﺗﺮﻳﺪﻧﻲ ﻭﻣﺎﺗﻜﺪﺭ ﺗﺤﺠﻲ ﻭﻳﻨﻪ ﺻﻮﺗﻚ ﻓﺮﺍﺍﺍﺱ
ﺍﺗﺨﺒﻠﺖ ﻋﻠﻴﻪ
ﺍﺟﻮﻧﻲ ﻃﻠﻌﻮﻧﻲ ﻓﻘﺪﺕ ﻣﺎﺍﻋﺮﻑ ﺷﺴﻮﻱ ..
ﺑﻌﺪﻫﺎ ﺗﺨﺮﺑﻄﺖ ﻛﻠﺶ ..
ﻫﺒﻂ ﻋﻨﺪﻱ ﺍﻟﻀﻐﻂ ﺍﺧﺬﻭﻧﻲ ﻭﺍﻧﺎ ﺷﺒﻪ ﻓﺎﻗﺪﺓ ﻟﻠﺒﻴﺖ
ﻣﺪﺩﺗﻨﻲ ﺳﻤﻴﺔ ﻋﻠﻰ ﺟﺮﺑﺎﻳﺘﻲ ..
ﻭﻛﻌﺪﺕ ﻳﻤﻲ ﺗﻤﺴﺢ ﺑﺪﻣﻮﻋﻲ
ﻛﺘﻠﻬﺎ ﺑﻌﺪ ﻣﺎﺍﻧﺎﻡ ﻳﻤﻪ ﻫﻨﺎ ﻭﻟﺞ ﻛﻠﻪ ﻳﻨﻮﻣﻨﻲ ﻋﻠﻰ ﺍﻳﺪﻩ ﺳﻤﻴﻪ ﻛﻠﻜﻢ ﻣﺎﺍﺭﻳﺪﻛﻢ ﺑﺲ ﺧﻠﻲ ﻳﻌﻴﺶ ﺍﻟﻲ ﻫﻮﻭﻭ
ﺳﻤﻴﺔ .. ﺷﺒﻴﺪﻱ ﻋﻠﻴﺞ ﻭﺍﻟﻠﻪ ﻟﻮ ﺑﻴﺪﻱ ﺍﻧﻄﻲ ﺭﻭﺣﻲ ﺧﻠﻲ ﻳﻌﻴﺶ ﺍﻟﺞ ﻋﻠﻰ ﺍﻻﻗﻞ ﻭﺣﺪﺓ ﻣﻨﻪ ﺗﻌﻴﺶ ﺑﺴﻌﺎﺩﺓ ﺍﻧﻪ ﻣﺎﺭﺍﻳﺪﺓ ﺷﻲ ﻣﻦ ﻫﺎﻱ ﺍﻟﺪﻧﻴﻪ ﻣﺎﻋﻨﺪﻱ ﺍﻣﻞ ﺑﻴﻬﺎ .
ﺻﻔﺎ .. ﻣﺎﻳﺼﻴﺮ ﻭﺍﺣﺪ ﻳﻤﻮﻭﺕ ﺑﺪﺍﻟﻪ ﺧﻠﻲ ﻳﻌﻴﺶ ﺍﻟﻲ ﻫﻮ .
ﺳﻤﻴﺔ .. ﻣﺎﻛﺪﺭﺕ ﺍﺣﺠﻲ ﻃﮕﻴﺖ ﺑﺠﻲ ﺣﺎﻟﺘﻬﺎ ﺗﺼﻌﺐ ﻋﻠﻰ ﺍﻟﻜﺎﻓﺮ .
ﺻﻔﺎ .. ﺍﺭﻳﺪ ﺍﺭﺟﻊ ﻟﻠﻤﺴﺘﺸﻔﻰ ..
ﻛﻮﻣﺘﻨﻲ ﺳﻤﻴﺔ .. ﻣﺎﺗﺪﺧﻠﻴﻦ ﺗﺴﺒﺤﻴﻦ ﺍﻟﺠﻮ ﺣﺎﺭ
ﺑﻠﻜﻲ ﺗﺮﺗﺎﺣﻴﻦ .
ﺻﻔﺎ .. ﻣﺎﺍﺭﺗﺎﺡ ﺳﻤﻴﺔ ﺍﺫﺍ ﻣﺎﺍﺷﻮﻓﻪ ﮔﺒﺎﻟﻲ ..
ﺳﻤﻴﺔ .. ﺗﺸﻮﻓﻴﻨﻪ ﺍﻥ ﺷﺎﺀﺍﻟﻠﻪ ﺣﻴﺎﺗﻲ ﺑﺲ ﺍﺭﺣﻤﻲ ﺣﺎﻟﺞ ﺍﺗﻘﻮﻱ ﻫﻮ ﻳﺮﻳﺪﺝ ﻗﻮﻳﺔ ﻣﻮ ﻫﻴﺞ ﺍﻛﻠﻴﻠﺞ ﻟﻜﻤﺔ ﺍﻛﻞ ﺷﺮﺑﻲ ﻣﺎﻱ ..
ﺻﻔﺎ .. ﻣﺎﺍﺭﻳﺪ ﺑﺪﻟﺖ ﻫﺪﻭﻣﻲ ﮔﺘﻠﻬﺎ ﻭﻳﻦ ﻋﻤﺘﻲ؟
: ﻋﻤﺘﺞ ﺑﺎﻟﻀﻴﻢ ﺟﻮﻩ ..
: ﻃﻠﻌﻴﻠﻲ ﻋﺒﺎﻳﺔ ﺭﺍﺱ .
: ﻋﻨﺪﺝ ﺍﻧﺖ ﻋﺒﺎﻳﺔ ﺭﺍﺱ؟ ؟ﻣﻨﻴﻠﺞ ﻣﺎﻛﻮ .
: ﻫﺎﻱ ﺍﻟﻲ ﺟﻨﺖ ﻻﺑﺴﺘﻪ ﺑﺎﻟﻤﺴﺘﺸﻔﻰ .
: ﻏﺴﻠﺘﻬﺎ ﻭﺷﺮﻳﺘﻬﺎ ﻛﻠﻬﺎ ﺗﺮﺍﺏ .
: ﺑﺼﻴﺎﺡ ﺍﻟﻪ ﺗﻐﺴﻠﻴﻨﻬﺎ ﺗﻮﻟﻲ ﺍﻧﻪ ﻭﻳﻦ ﺭﺍﻳﺤﻪ ﺭﺍﻳﺤﻪ ﻋﺮﺱ .
: ﺍﻫﺪﻱ ﺷﺒﻴﺞ ﻫﺴﻪ ﻧﺪﺑﺮﻟﺞ ﻭﺣﺪﺓ ﻣﻦ ﺟﻮﻩ ﺍﻛﻴﺪ ﻋﺪﻫﻢ ﻭﻣﺎﻳﺨﻠﻮﻥ ﻣﻨﻬﺎ .
ﺗﺤﺴﺮﺕ ﻛﺘﻠﻬﺎ ﻳﻠﻠﻪ ﺍﺭﻭﺡ ﻟﻌﻤﺘﻲ ﻣﺎﺷﻔﺘﻬﺎ ﺭﺍﺳﺎ ﺻﻌﺪﺕ ﻟﻐﺮﻓﺘﻲ ..
ﻧﺰﻟﺖ ﺟﻮﻩ ﺭﺣﺖ ﻟﻐﺮﻓﺔ ﻋﻤﺘﻲ ﺟﺎﻱ ﻳﺤﻀﺮﻭﻧﻬﺎ ﻳﺮﺩﻭﻥ ﻳﻮﺩﻭﻧﻬﺎ ﻟﻠﻤﺴﺘﺸﻔﻰ
ﺷﻔﺘﻬﻪ ﻣﺘﻤﺪﺩﺓ
ﻋﻠﻰ ﺳﺮﻳﺮﻫﺎ ﺷﺎﻓﺘﻨﻲ ﻇﻠﺖ
ﻇﻠﺖ ﻣﺎﺗﻌﺮﻑ ﺷﻨﻮ ﺗﮕﻮﻝ
ﺗﺮﻳﺪ ﺗﻜﻮﻡ ﻣﺎﺑﻴﻬﺎ ﻭﺩﻣﻮﻋﻬﺎ ﻋﺸﺮﺓ ﻋﺸﺮﺓ ﻋﻠﻰ ﺧﺪﻭﺩﻫﺎ ﺷﻤﺮﺕ ﺭﻭﺣﻲ ﻋﻠﻴﻬﺎ ﺣﻀﻨﺘﻬﺎ ﻭﻫﻲ ﺑﺲ ﺗﻜﻮﻝ ﺃﻓﺎ ﺃﻓﺎ ﻛﻠﺶ ﺣﺎﻟﺘﻬﺎ ﻭﺣﺘﻰ ﺍﻟﻨﻄﻖ ﻓﻘﺪﺗﻪ .
ﮔﺎﺑﻠﺘﻬﺎ ﻭﺍﺑﺠﻲ ..
ﺟﺎﺑﺘﻠﻲ ﺳﻤﻴﺔ ﻋﺒﺎﻳﺔ ﺭﺍﺱ ﺩﺑﺮﺗﻬﺎ ﻣﻨﻬﻢ
ﺍﺧﺬﺗﻨﻲ ﻭﺻﻌﺪﺕ ﺑﺴﻴﺎﺭﺓ ﺍﺑﻮﻱ
ﻭﻋﻤﺘﻲ ﺍﺧﺬﻭﻫﺎ ﺑﻨﺎﺗﻬﺎ ﺑﺴﻴﺎﺭﺓ ﺯﻭﺝ ﺣﻤﺎﺗﻲ
.
ﻭﺻﻠﺖ ﻟﻠﻤﺴﺘﺸﻔﻰ ﺑﺎﻟﻠﻴﻞ ﺟﺎﻧﻮﺍ ﻣﺪﺧﻠﻴﻨﻪ ﻟﻐﺮﻓﺔ ﺍﻟﻌﻤﻠﻴﺎﺕ
ﺳﻮﺩﺓ ﻋﻠﻴﻪ ﺷﻜﺎﻟﺖ ﺭﻭﺣﻚ ﻋﻤﻠﻴﺘﻴﻦ ﺧﻼﻝ ﻳﻮﻡ ﻭﻧﺺ
ﺍﻻﻧﺘﻈﺎﺭ ﺻﻌﺐ ﻭﻃﻮﻳﻞ .. ﻟﺴﺎﻧﻲ ﻣﺎﺑﻄﻞ ﺩﻋﺎﺀ
ﻋﻴﻮﻧﻲ ﻣﺎﻧﺸﻔﺖ ﻣﻦ ﺍﻟﺒﺠﻲ
ﻭﻗﻠﺒﻲ ﻣﺎﺗﻌﺐ ﻣﻦ ﺍﻟﻮﺟﻊ ﺑﻘﻰ ﻳﻮﺟﻌﻨﻲ ﻋﻠﻴﻪ
ﺍﺻﺎﺑﻌﻲ ﻣﺎﺑﻄﻠﺖ ﺗﺴﺒﻴﺢ
ﺑﻴﺪﻱ ﺳﺒﺤﺔ ﻭﺍﺳﺒﺢ ..
ﺳﻤﻴﺔ ﻳﻤﻲ ﻭﺗﺒﺠﻲ ﻭﻳﺎﻱ ..
ﺻﺎﺡ ﻋﻠﻴﻬﺎ ﺍﺑﻮﻱ ﻛﺎﻝ ﻳﻠﻠﻪ ﺧﻨﺮﻭﺡ ﻣﺎﺗﺮﺣﻴﻦ ﻭﻳﺎﻧﻪ ﺻﻔﺎ ﺍﺭﺗﺎﺣﻲ ﻭﺑﺎﺟﺮ ﺍﺟﻴﺒﺞ ﻣﻦ ﺍﻟﺼﺒﺢ ..
ﻫﺰﻳﺖ ﺍﻟﻪ ﺭﺍﺳﻲ ﮔﺘﻠﻪ ﻻ ..
ﺑﻮﺳﺘﻨﻲ ﺳﻤﻴﺔ ﻭﺍﻧﺎﺍ ﻓﺎﻗﺪﺓ ..
ﻛﺎﻟﺖ ﺭﺍﻳﺤﻪ ﺟﺮﻳﺘﻬﺎ ﻣﻦ ﺍﻳﺪﻫﺎ ﻛﺘﻠﻪ ﺍﺩﻋﻴﻠﻪ ﻋﻔﻴﺔ
ﺭﺟﻌﺖ ﺣﻀﻨﺘﻨﻲ ﻭﺗﺤﺠﻲ .
ﺷﻮﻥ ﻣﺎﺍﺩﻋﻴﻠﻪ ﺑﺲ ﻭﺍﻟﻠﻪ ﻣﺎﻟﻬﺎ ﺩﺍﻋﻲ ﻛﻌﺪﺗﺞ ﻫﻨﺎ ﺍﻣﺸﻲ ﻭﻳﺎﻱ .
ﻣﺎﺍﺭﻳﺪ ﺳﻤﻴﺔ ﺭﻭﺣﻲ ﻳﻠﻠﻪ .. ﺍﻧﺎ ﺑﺎﻗﻴﺔ ﺣﺪ ﻣﺎﻳﺼﺤﻰ .
ﻭﺧﺮﺕ ﻣﻦ ﺣﻀﻨﻲ ﻛﺎﻟﺖ ..
ﺍﻥ ﺷﺎﺀﺍﻟﻠﻪ ﻳﺼﺤﻰ ﻋﻠﻰ ﻛﻴﻔﺞ ﻭﻳﺎ ﻧﻔﺴﺞ ﻭﺍﻛﻠﻲ ﻓﺪﻭﻩ ﺍﻟﻌﻴﻨﺞ .
ﻣﺎﺍﺭﻳﺪ ﺍﻛﻞ ﺧﻞ ﻳﻜﻌﺪ ﻳﻠﻠﻪ ..
ﻋﺼﺮﺕ ﺍﻳﺪﻱ ﺣﻴﻴﻞ ﻏﻤﻀﺖ ﻋﻴﻮﻧﻬﺎ ﻭﻃﺎﺣﺖ ﺩﻣﻮﻋﻬﺎ ﻛﺎﻣﺖ ﻭﺭﺍﺣﺖ ﺗﻤﺸﻲ ﻭﺭﻩ ﺍﺑﻮﻱ .
ﺑﻘﻴﺖ ﺍﻧﺘﻈﺮ ﻭﺑﺼﻔﻲ ﺍﺧﺖ ﻓﺮﺍﺱ ﺍﻟﺠﺒﻴﺮﺓ ﻣﺎﺑﻄﻠﻨﻪ ﺑﺠﻲ ﻭﻻﺩﻋﺎﺀ ..
ﻃﻠﻌﻮﺍ ﻣﻦ ﺍﻟﻌﻤﻠﻴﺎﺕ ..
ﻛﺎﻟﻮﺍ ﺍﻟﻲ ﻋﻠﻴﻨﺎ ﺳﻮﻳﻨﺎ ﺑﻘﻰ ﻛﻞ ﺷﻲ ﻳﻢ ﺍﻟﻠﻪ
ﻧﻨﺘﻈﺮ ﺍﺭﺑﻌﻪ ﻭﻋﺸﺮﻳﻦ ﺳﺎﻋﻪ ﻭﻧﺸﻮﻑ ..
ﺑﻘﻴﺖ ﺍﻭﻥ ﺍﺣﺲ ﻋﻴﻮﻧﻲ ﻏﻮﺷﺖ .. ﺻﺪﺍﻉ ﻣﻮﺗﻨﻲ ﺍﻟﻮﺏ ﻋﻠﻴﻪ ﺍﺭﻳﺪ ﺍﺷﻮﻓﻪ ﻣﻨﻌﻮﻧﻲ ﻣﻦ ﺷﻮﻓﺘﻪ ..
ﻣﺮ ﺍﻟﻮﻗﺖ ﺑﺴﺮﻋﻪ ﺑﻌﺪ 3 ﺍﻳﺎﻡ ﺑﺎﻟﻤﺴﺘﺸﻔﻰ
ﻛﺎﻟﻮﺍ ﻣﺎﺕ ﺳﺮﻳﺮﻳﺎ ..
ﺗﺨﺒﻠﺖ ﺗﺨﺒﻠﺖ ﺭﺑﻲ ﺑﻤﻌﺠﺰﺓ ﻭﺭﺟﻌﻪ ﺍﻟﻴﻪ
ﻓﺪﻭﺍﺗﻚ ﻣﺎﺭﺍﻳﺪﺓ ﻣﻨﻚ ﺷﻲ
ﻭﺍﻟﻠﻪ ﺍﺗﻮﺏ ﻋﻦ ﻛﻞ ﻣﻌﺼﻴﺔ ﻭﺷﻴﮕﻠﻲ ﺍﺳﻮﻳﻠﺔ ﺍﻃﻴﻌﻪ ﺍﻛﺜﺮ ﻣﻦ ﻗﺒﻞ ..
ﺳﺎﻋﺔ 5 ﺍﻟﻔﺠﺮ .. ﻃﺐ ﻋﻠﻴﻪ ﺍﻟﺪﻛﺘﻮﺭ
ﻭﻣﻦ ﻃﻠﻊ ﻛﺎﻝ ﺍﻧﺎ ﻟﻠﻪ ﻭﺍﻧﺎ ﺍﻟﻴﻪ ﺭﺍﺟﻌﻮﻥ .
ﻫﻨﺎ ﻋﺮﻓﺖ ﻣﺎﺕ ﻭﺭﺍﺡ ﻳﻢ ﺍﻟﻠﻪ ..
ﺷﻠﻮﻥ ﺑﻬﺎﻟﺴﺮﻋﻪ ﻳﺨﻄﺒﻨﻲ ﺍﻭﺍﻓﻖ ﻧﺘﺰﻭﺝ ﺍﺣﺒﻪ ﺍﺗﻌﻠﻖ ﺑﻲ ﻭﻳﻤﻮﺕ ﻣﺮ ﺷﺮﻳﻂ ﺍﻳﺎﻣﻲ ﻭﻳﺎ ﻛﺪﺍﻣﻲ
ﺗﻤﻨﻴﺘﻪ ﻣﻮﺯﻳﻦ ﻭﻳﺎﻱ ﺗﻤﻨﻴﺖ ﻳﺎﺫﻳﻨﻲ ﻳﻀﺮﺑﻨﻲ ﺑﺲ ﻣﻮ ﺍﺗﻌﻠﻖ ﺑﻲ ﻳﻤﻮﺕ ﻭﻳﺘﺮﻛﻨﻲ ..
ﻭﺩﻭﺍ ﻟﻠﺜﻼﺟﺔ ﮔﺒﺎﻝ ﻋﻴﻨﻲ .. ﻭﺍﻧﺎ ﻣﺜﻞ ﺍﻟﺤﻤﺎﻣﺔ ﺍﻟﻤﻨﺤﻮﺭﺓ ﻣﺎﺍﺩﺭﻱ ﺷﺴﻮﻱ ﺑﺮﻭﺣﻲ .. ﺿﺮﺑﺖ ﺭﺟﻠﻲ
ﻗﻮﻱ ﻣﺎﺍﺩﺭﻱ ﺷﺼﺎﺭ ﺑﻴﻪ ..
ﺭﺟﻠﻲ ﻇﻠﻴﺖ ﺍﻋﺮﺝ ﻣﺎﺍﻛﺪﺭ ﺍﻣﺸﻲ ﻣﻨﻬﺎ
ﺟﺴﻤﻲ ﻛﻠﻪ ﻳﻮﺟﻌﻨﻲ ﺑﺲ ﺍﻟﻢ ﺭﻭﺣﻲ ﺍﻗﻮﻩ
ﺭﺟﻌﻨﺎ ﻟﻠﺒﻴﺖ .. ﻋﻤﺘﻲ ﺟﺎﻧﻮﺍ ﺟﺎﻳﺒﻴﻨﻬﺎ ﻣﻦ ﺍﻟﻤﺴﺘﺸﻔﻰ ﺷﻤﺮﺕ ﺭﻭﺣﻲ ﻋﻠﻴﻬﺎ ﺍﺭﻳﺪ ﺍﺷﺘﻢ ﺭﻳﺤﺘﻪ ﺑﻴﻬﺎ
ﺍﻱ ﺻﻮﺕ ﻣﺎﻋﺪﻫﺎ ﺍﻟﺪﻣﻮﻉ ﻧﺎﺷﻔﻪ ﺑﻌﻴﻨﻬﺎ .
ﺑﺲ ﺗﻀﺮﺏ ﻋﻠﻰ ﺭﺟﻠﻬﺎ ﺑﺎﻳﺪﻳﻬﺎ ﻭﻣﺎﺗﻌﺮﻑ ﺷﺘﺴﻮﻱ .
ﻛﻮﻩ ﺟﺮﻭﻧﻲ ﻭﺍﺧﺬﻭﻧﻲ ﻟﺒﺴﻮﻧﻲ ﺍﺳﻮﺩ ﻭﺟﺎﺑﻮﻟﻲ ﺑﻮﺷﻴﺔ ﺍﻟﻠﺒﺴﻬﺎ .. ﺍﺟﻮﺍ ﺧﻮﺍﺗﻲ ﻭﻛﻞ ﺍﻗﺎﺭﺑﻲ
ﺣﻀﻨﺖ ﺳﻤﻴﺔ ﻭﺍﺑﺠﻲ ﺍﻛﻠﻠﻬﺎ ﻣﻮﻳﺪﺭﻱ ﺑﻴﻪ ﺍﺣﺒﻪ ﻟﻴﺶ ﻋﺎﻓﻨﻲ ..
ﻣﺎﻛﻮ ﺍﺟﺎﺑﺔ ﺣﺪ ﻳﻮﻣﻪ ﻭﻭﺻﻞ ..
ﻛﻌﺪﻧﻪ ﻫﻮﺍﻱ ﻧﻨﺘﻈﺮ ﺍﻟﺘﺎﺑﻮﺕ ﻳﺠﻴﺒﻮﻧﻪ ﻟﻠﺒﻴﺖ ﺣﺘﻰ ﻳﻮﺩﻉ ﺑﻴﺘﻪ ﻭﻳﻮﺩﻭ ﻟﻤﺜﻮﺍﻩ ﺍﻻﺧﻴﺮ ..
ﺍﺻﻌﺐ ﻟﺤﻈﺎﺕ ﻫﺎﻳﻪ ﻋﺒﺎﻟﻚ ﺭﺍﺡ ﻳﺠﻴﺒﻮﻧﻪ ﺍﻟﻲ ﻋﺪﻝ ﻣﻮﻣﻴﺖ ..
ﻛﺎﻟﻮﺍ ﺟﺎﺑﻮ ﺑﺎﻟﺠﺎﻣﻊ ﺍﻟﻘﺮﻳﺐ ﻣﻨﻪ ﺭﺍﺡ ﻳﻐﺴﻠﻮﻧﻪ ﻭﻧﻮﺏ ﻳﺠﻴﺒﻮﻧﻪ ﻫﻨﺎ .. ﻛﻠﺴﺎﻉ ﺗﺠﻴﻨﻲ ﻭﺣﺪﻩ ﻻﻳﻄﻠﻊ ﺻﻮﺗﺞ ﻻﺗﺒﺠﻴﻦ ﺍﻟﺒﻮﺷﻴﻪ ﻻﺗﺮﻓﻌﻴﻬﻪ ﺗﺮﻩ ﺗﺄﺫﻳﻨﻪ ﺑﮕﺒﺮﻩ ﻭﻳﺼﻴﺮ ﺑﺮﮔﺒﺘﻪ ﻃﻮﮒ ﺣﺪﻳﺪ ﻣﻦ ﻧﺎﺭ ﻭﺑﺲ ﺗﻤﻮﺗﻴﻦ ﻳﺼﻴﺮ ﺑﺮﮔﺒﺘﺞ .
ﻓﻮﮒ ﺍﻟﻤﻴﺖ ﻭﺣﺪﺓ ﺍﺟﺖ ﻛﻠﺘﻠﻲ ﻫﺎﻟﺤﺠﻲ ﻭﺍﻧﻪ ﻏﺎﺩﻳﻪ ﻧﺎﺭ ﻭﺍﻟﺠﻮ ﺻﻴﻒ ﻭﺣﺎﺭﻩ ﻭﻛﻠﺴﺎﻉ ﻛﺎﻟﻦ ﻧﺰﻟﻲ ﺍﻟﺒﻮﺷﻴﺔ ﻻﺗﺄﺫﻳﻨﻪ ﻣﺎﻳﺼﻴﺮ ﻳﻄﻠﻊ ﺷﻲ ﻣﻨﺞ .
ﻛﺎﻟﻮﺍ ﺟﺎﻳﺒﻴﻨﻪ ﻳﻢ ﺍﻟﺒﺎﺏ ﻭﻫﻨﻪ ﺍﺟﻨﻲ ﻟﺒﺴﻲ ﻭﺳﻜﺘﻲ ﻭﺻﻮﺗﺞ ﻻﻳﻄﻠﻊ ..
ﺻﻴﺤﺖ ﺳﻤﻴﻪ ﻭﺧﺮﻥ ﻭﺧﺮﻥ ﻣﻮﺗﻨﻬﻪ ﺷﺠﺎﺟﻦ ﻭﻛﺘﺠﻦ ﻫﺴﺴﻪ .. ﺻﻴﺤﻲ ﻭﺻﺮﺧﻲ ﻭﻣﺎﻋﻠﻴﺞ ﺑﻴﻬﻦ ﺭﺍﺡ ﺗﻤﻮﺗﻴﻴﻦ .
ﺑﻌﺪ ﻣﺎﻭﺻﻠﻦ ﻳﻤﻲ ﻭﺍﻧﻪ ﺑﺲ ﺍﻭﻭﻥ .
ﺟﺎﺑﻮﺍ ﺍﻟﺘﺎﺑﻮﺕ ﻓﺮﻭﺍ ﺑﺎﻟﺒﻴﺖ ﺍﻟﻠﻄﻢ ﻭﺍﻟﺼﺮﻳﺦ ﻭﺍﻟﺒﺠﻲ ﺳﺪ ﺍﺫﻧﻲ ﺧﻠﻴﺖ ﺭﺍﺳﻲ ﻉ ﺍﻟﺘﺎﺑﻮﺕ ﻳﻢ ﺭﺍﺳﻪ
ﻛﺘﻠﻪ ﺳﺎﻣﺤﻨﻲ ﺍﺑﺮﻳﻨﻲ ﺍﻟﺬﻣﻪ ﺧﺎﻑ ﺍﺫﻳﺘﻚ ﺑﻴﻮﻡ
ﺍﻟﻜﻞ ﺑﺠﻪ ﻋﻠﻴﻪ ﻧﺴﻮﺍﻥ ﻭﺯﻟﻢ ﺍﻫﻞ ﻭﺟﻴﺮﺍﻥ ﻭﻏﺮﺑﺔ ﻣﺎﻣﺄﺫﻱ ﺍﺣﺪ ﺑﻌﻤﺮﻩ ﻛﻠﻪ ..
ﻣﺎﺍﻋﺮﻑ ﺷﻮﻥ ﺧﻠﺼﺖ ﺍﻟﻔﺎﺗﺤﺔ ﻣﺤﺪ ﻣﺎﺗﻤﺮﺽ ﻋﻠﻴﻪ ﺣﺘﻰ ﺍﺑﻮ ﻳﻠﻮﻡ ﺭﻭﺣﻪ ﺍﺑﻮ ﺍﻟﻤﻮﻟﺪﺓ ﺍﺟﻪ ﻳﺒﺠﻲ ﺑﺠﻲ ﻣﺎﺻﺎﻳﺮ ﻛﺎﻝ ﻧﺴﻴﺖ ﺍﻧﺰﻝ ﺍﻟﺠﻮﺯﺓ ﻫﻮ ﺧﺎﺑﺮﻧﻲ ﻭﺍﻧﻪ ﺍﻟﻠﺘﻬﻴﺖ .
ﺻﻌﺪﺕ ﺍﻟﻐﺮﻓﺘﻪ ﻛﻮﺓ ﺭﺟﻠﻲ ﺗﺎﺫﺕ ﻭﺍﻟﻠﺘﻬﺐ ﺍﻟﻌﺼﺐ ﻇﻠﻴﺖ ﺍﺗﺎﻟﻢ ﻣﻨﻬﺎ .
ﺍﺑﺎﻭﻉ ﺍﻟﻐﺮﺍﺿﻪ ﻣﻼﺑﺴﻪ ﻭﺍﺻﺮﺥ ﻭﺍﺑﺠﻲ
ﻟﺤﺪ ﻣﺎﻳﻐﻤﻰ ﻋﻠﻴﻪ
ﺍﺧﺬﺕ ﺍﻟﻤﻜﺺ ﻛﺼﻴﺖ ﺷﻌﺮﻱ ﻛﻠﻪ ﻭﺫﺑﻴﺘﻪ ﺍﻟﻮﻗﺖ ﻣﺎﺍﻋﺮﻑ ﺷﻮﻥ ﻳﻤﺮ ﻣﻮﺣﺶ ﻣﻈﻠﻢ ﻣﻦ ﺩﻭﻥ ﺻﻮﺗﻪ ﻭﺿﺤﻜﺘﻪ ..
ﺑﻴﻮﻡ ﺍﻟﺴﺎﺑﻊ ﺟﺎﺑﻮ ﺻﻮﺭﺗﻪ ﺍﻟﻲ ﻳﺮﺩﻭﻥ ﻳﺨﻠﻮﻫﺎ ﻋﻠﻰ ﻗﺒﺮﻩ ﺍﺻﺪﻗﺎﺋﻪ ﻣﺴﻮﻳﻨﻬﻪ
ﺑﺎﻭﻋﺘﻠﻬﺎ
ﺟﺎﻧﺖ ﺻﻮﺭﺓ ﺑﺎﻟﺸﺘﻪ ﻭﻻﺑﺲ ﺟﺎﻛﻴﺖ ﺭﺻﺎﺻﻲ ﺷﺘﻮﻱ ﻭﺍﻛﻒ ﻳﻢ ﺳﻴﺎﺭﺗﻪ ﻭﺿﺎﺣﻚ .. ﻣﺮﺩ ﻗﻠﺒﻲ ﻣﺮﺩ ﻋﺒﺎﻟﻚ ﻭﺍﻛﻒ ﻳﻤﻲ ﻭﺟﺎﻱ ﻳﺤﺎﺟﻴﻨﻲ ﻭﺍﻟﻀﺤﻜﻪ ﻫﺎﻱ ﻣﺮﺳﻮﻣﺔ ﺍﻟﻲ .
ﺑﺤﻴﺎﺗﻲ ﻛﻠﻬﺎ ﻣﺎﻋﺸﺖ ﻣﺜﻞ ﺍﻻﻭﺍﺩﻡ ﺑﺲ ﻫﺎﻻﻳﺎﻡ ﺍﻟﻌﺸﺘﻬﺎ ﻭﻳﺎ ﻣﻜﺘﻮﺏ ﻋﻠﻴﻪ ﻫﺎﻻﻟﻢ ﻭﺍﻟﺤﺰﻥ ﺑﻔﺮﺍﮔﻪ
ﺑﻨﻔﺲ ﺍﻟﻴﻮﻡ ﺟﻨﺖ ﺑﺎﻟﻐﺮﻓﺔ ﻭﺍﺣﺎﺟﻲ ﺻﻮﺭﺗﻪ
ﺷﻔﺖ ﺳﻤﻴﺔ ﺩﺧﻠﺖ ﻋﻠﻴﻪ
ﺣﻀﻨﺘﻨﻲ ﻭﺑﻮﺳﺘﻨﻲ
ﻛﺎﻟﺖ ﻳﻠﻠﻪ ﺍﺑﻮﻱ ﻳﻜﻮﻝ؟
ﺷﻨﻮ ﻳﻠﻠﻪ؟
ﺍﻣﺸﻲ ﻭﻳﺎﻧﻪ ﺍﺑﻮﻱ ﻳﻜﻮﻝ ﻫﻨﺎ ﻋﻨﺪﺝ ﺣﻤﻮﻳﻴﻦ ﻭﻧﺎﺱ ﻃﺎﺑﻪ ﻭﻃﺎﻟﻌﻪ ﻭﻣﺎﻟﻬﺎ ﺩﺍﻋﻲ ﮔﻌﺪﺗﺞ ﻫﻨﺎ .
ﺭﻭﺣﻲ ﺳﻤﻴﺔ ﮔﻠﻴﻠﻪ ﻣﺎﺭﻭﺡ ﻣﺎﺍﺗﺮﻙ ﻏﺮﻓﺘﻪ ﺍﻧﻪ ﻭﻣﺎﺍﺗﺮﻙ ﺍﻫﻠﻪ ﻭﻫﻢ ﺑﻤﺼﺎﺑﻬﻢ .
ﺍﻣﺸﻲ ﺻﻔﺎ ﻳﻠﻠﻪ ﻫﻨﺎﻙ ﻟﺰﻣﻲ ﻋﺪﻩ ﺍﺑﻴﺘﻨﻪ ﻳﻠﻠﻪ ﻋﻤﺮﻱ .
ﺍﺭﻳﺪ ﺍﻟﻠﺰﻡ ﻫﻨﺎﻧﻪ ﻋﺪﺓ ﺳﻤﻴﺔ ﺧﺎﻑ ﺍﻃﻠﻊ ﺣﺎﻣﻞ ﻭﻣﺎﺍﺣﺮﻣﻬﻢ ﻣﻦ ﺣﻔﻴﺪﻫﻢ ﻣﺜﻠﻤﺎ ﺍﻧﺤﺮﻣﻮﺍ ﻣﻦ ﺍﺑﻨﻬﻢ .
ﺳﻤﻴﺔ .. ﻫﺬﺍ ﺣﺠﻲ ﺍﺑﻮﻱ ﻛﻮﻣﻲ ﻳﻠﻠﻪ ﻳﻨﺘﻈﺮﺝ ﺟﻮﻩ .
ﺻﻔﺎ .. ﺯﺩﺕ ﺑﺎﻟﺒﺠﻲ ﻭﻟﺞ ﺧﻄﻴﺔ ﻋﻤﺘﻲ ﺍﻋﻮﻓﻬﺎ ﻣﺘﺄﻣﻠﺔ ﺍﻃﻠﻊ ﺣﺎﻣﻞ ﻭﺍﺑﻘﻰ ﻳﻤﻬﺎﺍﺍﺍ .. ﻧﺰﻟﻲ ﻭﻛﻮﻟﻲ ﻻﺑﻮﻱ ﻣﺎﺍﺭﻭﺡ ﻭﻳﺎﻛﻢ ﺍﺑﻘﻰ ﻫﻨﺎﻧﻪ ﻣﺎﺍﺗﺮﻛﻬﻢ ﺑﻤﺼﺎﺑﻬﻢ
.
ﺳﻤﻴﺔ .. ﺻﻔﺎ ﻳﺎﺣﻤﻞ ﺍﻟﻠﻪ ﻻﻳﻜﻮﻟﻬﺎ ﺗﺮﺩﻳﻦ ﺗﺠﻴﺒﻴﻦ ﺍﻟﻄﻔﻞ ﻟﻬﺎﻱ ﺍﻟﺪﻧﻴﺎ ﺍﻟﺘﻌﺒﺎﻧﺔ ﻳﺘﻴﻢ ..
ﺻﻔﺎ .. ﺍﻱ ﺍﺭﻳﺪ ﺍﺟﻴﺒﻪ ﻣﻦ ﺭﻳﺤﺔ ﻓﺮﺍﺱ ﻭﻳﺤﻦ ﻋﻠﻴﻪ ﻣﺜﻞ ﺍﺑﻮ ..
ﺳﻤﻴﺔ .. ﺍﻭﻭﻑ ﺻﻔﺎ ﻛﺎﻓﻲ ﮔﻄﻌﺘﻲ ﮔﻠﺒﻲ ﻭﻫﻮ ﺷﻨﻮ ﻇﻞ ﺑﻲ ﻳﺎﺍﻟﻠﻪ ﻳﺎﺍﺧﺘﻲ ﻳﻠﻠﻪ ﻫﺬﺍ ﻣﻘﺴﻮﻡ ﻭﻣﻜﺘﻮﺏ ﺷﻨﻮ ﻧﺴﻮﻱ ﺑﻌﺪ ﺍﻟﻌﻮﺽ ﺑﻠﻲ ﺟﺎﻱ ﻳﻠﻠﻪ ﮔﻮﻣﻲ ﻣﺎﻳﺼﻴﺮ ﺗﺒﻘﻴﻦ ﻫﻨﺎ ...
ﺻﻔﺎ ..
ﻛﻮﻩ ﻛﺪﺭﺕ ﺍﻓﺎﺭﮒ ﺍﻟﻐﺮﻓﺔ ﻭﺍﻟﺒﻴﺖ ﻇﻠﺖ ﻋﻨﺪﻱ ﺍﻣﻨﻴﺔ ﻭﺣﺪﺓ ﺑﺪﺍﺧﻠﻲ ﺍﺭﺟﻊ ﻫﻨﺎ ﺑﻌﺪ ﻣﺎﺍﺧﻠﺺ ﺍﻟﻌﺪﺓ ﻭﺍﺣﻤﻞ ﻃﻔﻞ ﻳﺸﻴﻞ ﺍﺳﻤﻪ ..
ﻛﻞ ﺷﻲ ﻣﺎﺍﺧﺬﺕ ﻣﻦ ﺍﻟﻐﺮﻓﺔ ﺑﺲ ﺿﺮﻭﺭﻳﺎﺕ
ﻭﻧﺰﻟﺖ ﺟﻮﻩ . ﺑﺎﻟﻌﺒﺎﻳﺔ ﻭﺍﻟﺒﻮﺷﻴﺔ ..
ﺷﻔﺖ ﻋﻤﺘﻲ ﻣﻨﺘﻬﻴﻪ ﺧﻄﻴﺔ ﻭﻋﻤﻲ ﻣﺮﻳﺾ ﻣﻦ ﺍﻟﻔﺎﺗﺤﺔ ﻭﻳﻠﻮﻡ ﺑﺮﻭﺣﻪ ﻣﺘﻌﺬﺏ ﻳﻜﻮﻝ ﻋﺴﺎﻧﻲ ﻻ ﮔﻌﺪﺗﻪ ﻣﻦ ﻧﻮﻣﺘﻪ ﻟﻮ ﻣﻴﺘﻴﻦ ﺣﺮﺭ ﻟﻮ ﻣﺘﺤﻤﻞ ﺍﻟﺤﺮﺭ ﺷﺠﺎﻧﻲ .
ﻭﺩﻋﺘﻬﻢ ﻭﻋﺒﺎﻟﻚ ﻫﺴﺘﻮﻩ ﻣﻴﺖ ﺑﺠﻲ ﺧﻮﺍﺗﻪ ﻭﺻﻞ ﻟﻠﺠﻴﺮﺍﻥ ﻭﺍﻧﻪ ﻳﻜﻠﻮﻟﻲ ﻻﻳﻄﻠﻊ ﺻﻮﺗﺞ .
ﻟﺰﻣﺖ ﺭﮔﺒﺘﻲ ﺍﻛﺘﻢ ﺷﻬﮕﺎﺗﻲ ..
ﻭﻃﻠﻌﻨﻪ ..
ﺻﻌﺪﺕ ﺑﺴﻴﺎﺭﺓ ﺍﺑﻮﻱ ..
ﻭﺩﺍﻧﻲ ﻟﻠﺒﻴﺖ ..
ﻣﺮﺕ ﻛﻢ ﻳﻮﻡ ﻭﺍﻧﻪ ﺍﻟﺪﻧﻴﺎ ﻣﺎﻃﺎﻳﻘﺘﻬﺎ
ﺍﺑﺠﻲ ﺍﻟﻜﻞ ﻳﺒﺠﻲ ﻭﻳﺎﻱ .. ﺑﻮﻛﺘﻬﺎ ﺟﺎﻧﺖ ﺍﻟﺸﻬﺮﻳﺔ ﻣﺘﺄﺧﺮﺓ .. ﻃﻠﺒﺖ ﺗﺤﻠﻴﻞ ﺣﻤﻞ ﺑﻴﺘﻲ
ﺳﻮﻳﺘﻪ ﻃﻠﻊ ﺳﻠﺒﻲ ..
ﻇﻠﻴﺖ ﺍﻣﻠﺦ ﺑﺮﻭﺣﻲ ﻭﺍﺿﺮﺏ ﻋﻠﻰ ﺑﻄﻨﻲ ﻟﻴﺶ ﻣﺎﺇﻟﻪ ﺷﻲ ﺑﻴﻪ ﻟﻴﺶ ﺍﺭﻳﺪ ﺫﻛﺮﻯ ﻣﻨﻪ ..
ﺍﺑﻮﻱ ﺍﻧﻘﻬﺮ ﻋﻠﻴﻪ ﺍﺟﻪ ﮔﻌﺪ ﮔﺒﺎﻟﻲ
ﻛﺎﻝ ﻛﺎﻓﻲ ﺑﺠﻲ ﻳﺎﺑﻨﻴﺘﻲ ﺭﺍﺡ ﻳﺼﻴﺮ ﺑﻴﺞ ﺷﻲ ﻫﺬﺍ ﺍﻣﺮ ﺭﺑﺞ ﻭﻛﻠﻨﺎ ﻧﻤﻮﺕ .
ﮔﺘﻠﻪ ﻣﺎﺑﻴﺪﻱ ﺷﻲ ﻋﻠﻰ ﺭﻭﺣﻲ ﻭﺩﻳﻨﻲ ﺍﻟﮕﺒﺮﺓ ﺑﻠﻜﻲ ﺍﺭﺗﺎﺡ ..
ﻫﺰ ﺭﺍﺳﻪ ﺑﻘﺒﻮﻝ .. ﻳﻮﻡ ﺛﺎﻧﻲ ﺍﺧﺬﻧﻲ ﻟﻠﻤﻘﺒﺮﺓ
ﺑﻌﺪﻩ ﮔﺒﺮﻩ ﺗﺮﺍﺏ ﻭﻣﺎﻣﺒﻨﻲ .. ﺗﻤﺪﺩﺕ ﺑﺼﻔﻪ ﻭﻧﻤﺖ
ﺍﻟﺠﻮ ﺣﺎﺭ ﻳﻜﺘﻞ ﻣﺎﻫﻤﻨﻲ ﺑﺲ ﺍﺭﻳﺪ ﺍﺭﺗﺎﺡ ﺣﺘﻰ ﻟﻮ ﻳﺘﻌﺬﺏ ﺟﺴﻤﻲ ..
ﻋﺎﺗﺒﺘﻪ ﻓﺮﺍﺱ ﻟﻴﺶ ﺑﺨﻠﺖ ﻋﻠﻴﻪ ﺑﻄﻔﻞ ﻣﺎﺍﺭﺩﺕ ﺷﻲ ﺑﺲ ﻃﻔﻞ ﻳﺸﻴﻞ ﺍﺳﻤﻚ ﺑﺲ ﺭﺩﺕ ﺷﻲ ﻣﻦ ﺭﻭﻳﺤﺘﻚ ﻣﺎﺑﺨﻠﺖ ﻋﻠﻴﻪ ﺑﺲ ﺑﺎﻟﻄﻔﻞ ﻟﻴﺶ؟
ﺑﺠﻴﺖ ﺣﺪ ﻣﺎﻏﻔﻴﺖ ﻳﻤﻪ .. ﻭﺭﺩﺕ ﻃﻴﻔﻪ ﻳﺰﻭﺭﻧﻲ ﻣﺎﻛﻮﻭ
ﺭﺟﻌﺖ ﻟﻠﺒﻴﺖ ﻭﺍﻧﺘﻜﺴﺖ ﻭﺟﻊ ﺑﻜﻞ ﺟﺴﻤﻲ ﻭﺭﻭﺣﻲ ﻭﺟﻊ ﻣﺎﻳﻨﺤﻤﻞ ﻭﻻﻳﻨﻄﺎﻕ ..
-------------
ﺳﻤﻴﺔ .. ﺍﻟﻲ ﺳﻤﻌﺘﻪ ﺑﺬﺍﻙ ﺍﻟﻴﻮﻡ ﺧﻼﻧﻲ ﺍﺳﺘﻌﻴﺪ ﻧﻔﺴﻲ ﺍﻟﻘﺪﻳﻤﺔ ﺍﻟﻲ ﻓﻘﺪﺗﻬﺎ ﻣﻦ ﻭﻛﻌﺖ ﺑﺤﺐ ﺍﻣﺎﻥ
.
ﻣﻮ ﺍﻧﺎ ﺍﻟﻲ ﺍﻧﻬﺎﻥ ﻭﻻﺍﺣﺐ ﺍﻧﺬﻝ .. ﺳﻤﻌﺖ ﻛﻼﻣﻬﻢ ﻭﻣﻦ ﺑﻴﻨﻪ ﻛﻼﻡ ﺍﻣﺎﻥ ﻭﺍﺳﺘﻘﺘﺎﻟﻪ ﻋﻠﻴﻪ ﺑﺲ ﻣﺎﺍﻫﺘﻤﻴﺖ
ﻛﻞ ﺍﻟﻲ ﻳﻬﻤﻨﻲ ﻧﻔﺴﻲ ﻭﺑﺲ ﻣﺎﺍﺣﺐ ﺍﻟﺬﻝ ﺍﻟﻨﻔﺴﻲ ﻭﻻﻣﺤﺘﺎﺟﺔ ﺍﺣﺪ ﺣﺘﻰ ﺍﺛﺒﺖ ﺫﺍﻧﻲ ﻭﺍﻛﻮﻥ ﻧﻔﺴﻲ .
ﺍﻧﺎ ﺍﺳﻨﺪ ﻧﻔﺴﻲ ﺑﻨﻔﺴﻲ ﻭﻟﻮ ﺍﻇﻞ ﻃﻮﻝ ﻋﻤﺮﻱ ﺑﺪﻭﻥ ﺭﺟﺎﻝ ﻣﺎﺭﺍﺡ ﻳﻬﻤﻨﻲ ..
ﺣﺬﻓﺖ ﻛﻞ ﺍﻟﺒﺮﺍﻣﺞ ﻭﻏﻴﺮﺕ ﺍﻟﺴﻴﻢ ﻛﺎﺭﺩ
ﺑﺲ ﺗﻮﺍﺻﻠﺖ ﻭﻳﺎ ﺭﺿﻮﺍﻥ ﻭﻛﺎﻝ ﺗﻌﺎﻟﻲ ﻟﻠﻤﺠﻤﻊ ﺍﻋﻠﻤﺞ ﻋﻠﻰ ﺍﻟﺸﻐﻞ ..
ﻃﻠﻌﺖ ﻣﻦ ﺍﻟﻐﺮﻓﺔ ﺍﻟﻤﻐﺮﺏ ..
ﺩﻭﺭﺕ ﺍﺑﻮﻱ ﺍﺭﻳﺪ ﺍﺣﺎﺟﻲ ﻋﻠﻰ ﻣﻮﺿﻮﻉ ﺍﻟﺸﻐﻞ
ﻣﺎﺷﻔﺘﻪ .. ﻃﺒﻴﺖ ﻟﻠﻤﻄﺒﺦ ﺷﻔﺖ ﻓﺎﻃﻤﺔ ﻭﺍﻛﻔﻪ ﻋﻠﻰ ﺍﻟﺴﻨﮓ ﺗﻐﺴﻞ ﻣﻮﺍﻋﻴﻦ .. ﻻﺑﺴﻪ ﺩﺷﺪﺍﺷﺔ ﺭﺑﻊ ﺭﺩﻥ ﻭﺳﻤﻨﺎﻧﻪ ﺷﻮﻳﺔ ﺑﻄﻨﻬﺎ ﻛﺒﺮﺍﻥ .. ﺷﺎﻳﻠﻪ ﺷﻌﺮﻫﺎ ﻟﻴﻔﻮﻙ ﺳﺮﺡ ﺣﻠﻮﻭ ﻣﺼﺒﻮﻍ ﺧﺼﻞ ﺣﻤﺮﺓ ﻭﺍﻟﺒﺎﻗﻲ ﺑﻨﻲ ﻣﺤﻤﺮ ..
ﺑﺎﻭﻋﺘﻠﻲ ﻣﺎﺣﺎﺟﻴﺘﻬﺎ ﺍﺭﻳﺪ ﺍﻃﻠﻊ ﺩﺭﺕ ﻭﺟﻬﻲ
ﻛﺎﻟﺖ ﺳﻤﻴﺔ ﺗﺮﺩﻳﻦ ﺷﻲ .
ﺭﺟﻌﺖ ﺩﺭﺕ ﻋﻠﻴﻬﺎ ﮔﺘﻠﻬﺎ ﺍﺑﻮﻱ ﻭﻳﻦ؟
ﻓﺎﻃﻤﺔ : ﺍﺑﻮﺝ ﻃﻠﻊ ﻳﺠﻴﺐ ﻋﺸﺎ ﺗﺮﺩﻳﻦ ﺷﻲ ﻣﺸﺘﻬﻴﺔ ﺷﻲ ﺍﺧﺎﺑﺮﻩ ﻳﺠﻴﺒﻠﺞ ﻭﻳﺎ؟
ﺳﻤﻴﺔ : . ﻻ ﺑﺲ ﺭﺩﺕ ﺍﺣﺎﺟﻲ ﺑﺸﻐﻠﺔ ..
ﻃﻠﻌﺖ ﻣﻦ ﺍﻟﻤﻄﺒﺦ ﻭﻛﻌﺪﺕ ﺑﺎﻟﻬﻮﻝ
ﺍﻧﺘﻈﺮﻩ .. ﺳﻤﻌﺖ ﺻﻮﺕ ﺳﻴﺎﺭﺗﻪ ﺑﻘﻴﺖ ﺑﻤﻜﺎﻧﻲ ..
ﺣﺴﻴﺘﻪ ﺩﺧﻞ ﻟﻠﻤﻄﺒﺦ ﻭﻳﺤﺠﻲ ﻭﻱ ﻓﺎﻃﻤﺔ ..
ﻣﺎﻋﺮﻓﺖ ﻋﻦ ﺷﻨﻮ؟
ﺑﻌﺪﻫﺎ ﺍﺟﻪ ﻟﻠﻬﻮﻝ .. ﻛﺎﻝ ﻫﺎﺍ ﺳﻤﻴﺔ ﺷﻨﻮ ﺭﺩﺗﻲ ﺗﺤﺎﺟﻴﻨﻲ
ﺍﻛﻴﺪ ﻛﻠﺘﻠﻪ ﻓﺎﻃﻤﺔ ..
ﻛﻤﺖ ﻋﻠﻰ ﺭﺟﻠﻴﻪ ﻛﺘﻠﻪ ﺍﺭﻳﺪ ﺍﺷﺘﻐﻞ ﻭﻳﺎ ﺭﺿﻮﺍﻥ ﺑﺎﻟﻤﺠﻤﻊ ﺍﻟﻄﺒﻲ ..
ﺍﻳﻮﺏ .. ﻟﻴﺶ ﻣﺤﺘﺎﺟﻪ ﻓﻠﻮﺱ ﻣﻘﺼﺮﻳﻦ ﻭﻳﺎﺝ ﺍﺣﻨﺎ .
: ﻻ ﺍﻧﻪ ﺿﺎﻳﺠﻪ ﺑﺎﻟﺒﻴﺖ ﻭﺍﻟﻌﻄﻠﺔ ﺑﻌﺪ ﻫﻮﺍﻱ ﻳﻠﻠﻪ ﺗﺨﻠﺺ
ﺍﺭﻭﺡ ﺍﮔﻀﻲ ﻭﻛﺖ ﻭﺍﺗﻌﻠﻤﻠﻲ ﺷﻐﻠﺔ ﺗﻔﻴﺪﻧﻲ ..
: ﺑﺲ ﻫﺬﺍ ﻣﻮ ﺍﺧﺘﺼﺎﺻﺞ .. .. ..
: ﻫﻮ ﻣﻨﻮ ﺑﺎﻟﻌﺮﺍﻕ ﻳﺸﺘﻐﻞ ﺑﺎﺧﺘﺼﺎﺻﻪ ﺑﺲ ﺭﺩﺕ ﺍﺳﺘﻔﻴﺪ
ﻭﺍﻗﻀﻲ ﻭﻗﺖ ﻫﺎﻱ ﺭﻏﺒﺘﻲ ﻭﺭﺩﺕ ﺍﺳﺘﺄﺫﻥ ﻣﻨﻚ ..
: ﺍﻱ ﺭﻭﺣﻲ ﻣﺪﺍﻡ ﻫﺎﻱ ﺭﻏﺒﺘﺞ .
ﻫﺰﻳﺖ ﺭﺍﺳﻲ ﺑﻘﺒﻮﻝ .. ﺩﺧﻠﺖ ﻓﺎﻃﻤﺔ ﺑﻴﺪﻫﻪ ﺻﻴﻨﻴﺔ ﺍﻟﻌﺸﺎ .. ﻛﺎﻡ ﺍﺑﻮﻱ ﺍﺧﺬﻫﻪ ﻣﻦ ﺍﻳﺪﻫﺎ .. ﺗﺬﻛﺮﺕ ﻣﻦ ﺟﺎﻥ ﻳﻜﻮﻡ ﻳﺘﻨﺎﻭﺵ ﺍﻟﺼﻴﻨﻴﻪ ﻣﻦ ﺍﻣﻲ ..
ﺍﻧﻌﺼﺮ ﮔﻠﺒﻲ .. ﻣﻮ ﻋﻠﻰ ﺍﻣﻲ ﻻ ﻋﻠﻰ ﻛﻞ ﺍﻟﻲ ﺻﺎﺭ ﻭﻣﺎﺍﻟﻨﺎ ﺫﻧﺐ ﺑﻲ .. ﺑﺎﻻﺿﺎﻓﺔ ﺍﻟﻰ ﺷﻲ ﺛﺎﻧﻲ ﺍﺟﻬﻠﻪ ..
ﺍﻧﻘﻤﺖ ﻗﻠﺒﻲ ﻭﺯﻋﺖ ﻧﻈﺮﺍﺗﻲ ﺑﻴﻦ ﺑﻄﻦ ﻓﺎﻃﻤﺔ ﻭﺑﻴﻦ ﻧﻈﺮﺍﺕ ﺍﺑﻮﻱ ﺍﻟﺤﻨﻴﻨﺔ ﺍﻟﻬﺎ ﻭﺍﺑﺘﺴﺎﻣﺘﻬﺎ ﺍﻟﺒﺮﻳﺌﺔ ..
ﺩﺭﺕ ﻭﺟﻬﻲ ﺍﺭﻳﺪ ﺍﺭﻭﺡ ﻟﻠﻐﺮﻓﺔ .. ﺻﺎﺣﺖ ﻋﻠﻴﻪ ﻓﺎﻃﻤﺔ
ﻳﻠﻠﻪ ﺳﻤﻴﻪ ﺑﺴﻢ ﺍﻟﻠﻪ ﻭﻳﻦ ﺭﺍﻳﺤﻪ ﺗﻌﺎﻱ ﺗﻌﺸﻲ ..
ﺑﺎﻭﻋﺖ ﺍﻟﻬﺎ ﻭﻟﻠﺼﻴﻨﻴﺔ ﺑﻴﻬﺎ ﻣﺸﺎﻭﻱ ﻭﻃﺮﺷﻲ ﻭﻃﻤﺎﻃﺔ ﻣﺸﻮﻳﻪ ﻭﺧﻀﺮﺓ ﻭﻗﻮﺍﻃﻲ ﺑﺒﺴﻲ 3 ..
ﻛﺘﻠﻬﻢ ﻣﺎﺍﺷﺘﻬﻲ .. ﺍﻛﻠﻮﺍ ﺍﻧﺘﻮﺍ ﺍﻟﻒ ﻋﺎﻓﻴﺔ ..
ﻭﺩﺧﻠﺖ ﻟﻠﻐﺮﻓﺔ .. ﺭﺟﻌﺖ ﺧﺒﺮ ﻟﺮﺿﻮﺍﻥ ﻭﺑﻠﻐﺘﻪ ﺑﻤﻮﺍﻓﻘﺔ ﺍﺑﻮﻱ ﻋﻠﻰ ﺷﻐﻠﻲ ﻭﻳﺎ ..
ﺧﻠﻴﺖ ﺭﺍﺳﻲ ﻋﻠﻰ ﺍﻟﻤﺨﺪﺓ .. ﻭﻓﻜﺮﺕ ﺑﻔﻌﻠﺘﻲ ﻫﺎﻳﻪ ﻭﻣﻮﺍﻓﻘﺘﻲ ﻋﻠﻰ ﻋﺮﺽ ﺭﺿﻮﺍﻥ ﺍﻛﻴﺪ ﺭﺍﺡ ﺍﻏﻀﺐ ﺍﻣﺎﻥ
ﺍﻱ ﺍﻧﻪ ﺍﺭﻳﺪ ﻳﺤﻤﻖ ﻋﻠﻴﻪ ﺍﺭﻳﺪﻩ ﻳﻜﺮﻫﻨﻲ .
ﻣﺎﺍﻛﺪﺭ ﺑﻌﺪ ﺍﺳﺘﻤﺮ ﻭﻳﺎ ﻏﻠﻄﺖ ﻏﻠﻂ ﺟﺒﻴﺮ ﻭﻣﺎﺍﺩﺭﻱ ﺷﻠﻮﻥ ﻭﻛﻌﺖ ﻭﻣﺎﻓﻜﺮﺕ ﺑﺎﻟﻌﻮﺍﻗﺐ ..
ﺣﻀﺮﺕ ﻣﻼﺑﺴﻲ .. ﺍﻟﻠﻴﻞ ﻃﻮﻳﻞ ﻣﺎﺟﺎﻱ ﺍﻛﺪﺭ ﺍﺧﻠﺼﻪ ﻭﺍﻧﻪ ﻭﺣﻴﺪﺓ
.
ﻛﻌﺪﺕ ﺍﻟﺼﺒﺢ ﺟﺎﻥ ﻛﻞ ﺷﻲ ﻣﻤﻞ ﻋﺎﺩﻱ ﻭﺭﻭﺗﻴﻨﻲ ..
ﻟﻠﻈﻬﺮ ﻳﻠﻠﻪ ﺑﺪﻳﺖ ﺍﺣﻀﺮ ﻟﺮﻭﺣﺘﻲ ﻟﻠﻤﺠﻤﻊ ﻗﺮﻳﺐ ﻋﻠﻴﻨﻪ ﻣﺴﺎﻓﺔ ﺭﺑﻊ ﺳﺎﻋﻪ ﻣﺸﻲ ..
ﺧﺎﺑﺮﻧﻲ ﺭﺿﻮﺍﻥ ﺟﻨﺖ ﺟﺎﻱ ﺍﺭﺗﺐ ﻭﺟﻬﻲ ﺑﻤﻜﻴﺎﺥ ﺧﻔﻴﻒ ..
ﺟﺎﻭﺑﺘﻪ ..
ﻛﺎﻝ ﺗﺤﺒﻴﻦ ﺍﺟﻲ ﻋﻠﻴﺞ ﺑﺎﻟﺴﻴﺎﺭﺓ ﻭﻧﻄﻠﻊ ﺳﻮﻩ ..
ﻻ ﻣﺎﻳﺤﺘﺎﺝ ﺍﻧﻪ ﺍﺟﻲ ﺍﻣﺸﻲ ..
ﺣﺎﺭﺓ ﺷﻮﻥ ﺗﺘﺤﻤﻠﻴﻦ ﺍﻟﻤﺸﻲ ﺧﻠﻲ ﺍﺟﻲ ﻋﻠﻴﺞ .
ﻻﺭﺿﻮﺍﻥ ﻭﺍﻟﻠﻪ ﻣﺎﻳﺤﺘﺎﺝ ﺍﻧﻪ ﺍﻣﺸﻲ ﺍﻟﺤﺮﻛﺔ ﺑﺮﻛﺔ ..
ﺍﻭﻙ ﺑﺮﺍﺣﺘﺞ ﺑﺲ ﺍﺫﺍ ﺗﺤﺒﻴﻦ ﺍﺟﻲ ﻋﻠﻴﺞ ﻣﺎﻗﺼﺮ ﻭﺍﻟﻠﻪ
ﺧﺘﻤﺘﻬﺎ ﻭﻳﺎ ﺑﺎﻟﺮﻓﺾ .. ﻭﺍﺳﺄﻝ ﻧﻔﺴﻲ ﺍﻟﻲ ﺟﺎﻱ ﺍﺳﻮﻱ ﺧﻄﺄ ﻟﻮ ﺻﺢ .. ﺑﻌﺪﺕ ﻋﻨﻲ ﻣﺎﻳﺄﺛﺮ ﻋﻠﻰ ﺣﻤﺎﺳﻲ ﺑﺎﻟﺸﻐﻞ ..
ﻟﺒﺴﺖ ﻗﻤﻴﺺ ﺍﺣﻤﺮ ﻣﻘﻔﻞ ﺑﺎﺳﻮﺩ ﻃﻮﻳﻞ ﻭﻭﻳﺎ ﺑﻨﻄﺮﻭﻥ ﺟﻴﻨﺰ ﻭﺗﺮﺍﻧﺸﻮﺯ ﺍﺳﻮﺩ ﻭﻗﻴﺎﻃﻴﻨﻪ ﺣﻤﺮ .
ﺷﺎﻝ ﺍﺳﻮﺩ ﻋﻠﻴﻪ ﻓﻴﻮﻧﻜﻪ ﺣﻤﺮﺓ ﻧﺎﻋﻤﻪ ..
ﻭﻃﻠﻌﺖ ﺍﺗﻤﺸﻰ ﻣﻦ ﻓﺮﻋﻨﻪ ..
ﻟﻔﺮﻉ ﺭﺋﻴﺴﻲ ﻭﻧﻮﺏ ﻋﻠﻰ ﺍﻟﺸﺎﺭﻉ ﺍﻟﻌﺎﻡ ..
ﻭﺣﺪﻱ ﺑﺴﺮﻋﺔ ﻭﺻﻠﺖ ﻟﻠﻤﺠﻤﻊ ﺩﺧﻠﺖ ﻣﻦ ﺍﻟﺒﺎﺏ ﺍﻟﺠﺎﻡ
ﻛﻌﺪﺕ ﺑﺼﺎﻟﺔ ﺍﻻﻧﺘﻈﺎﺭ .. ﺍﻧﺘﻈﺮ ﺭﺿﻮﺍﻥ ﻳﺠﻲ ..
ﺷﻔﺘﻪ ﺩﺧﻞ ﻣﻦ ﺍﻟﺒﺎﺏ .. ﻭﻛﺒﻞ ﻃﺐ ﻟﻠﺼﻴﺪﻟﻴﺔ
ﺍﻟﻲ ﻣﻔﺼﻮﻟﺔ ﻋﻦ ﺻﺎﻟﺔ ﺍﻧﺘﻈﺎﺭ ﺍﻟﻤﺮﺍﺟﻌﻴﻦ ﺑﺤﺎﺟﺰ ﺯﺟﺎﺟﻲ ﺷﻔﺎﻑ .. ﺟﺎﻧﺖ ﺍﻛﻮ ﺻﻴﺪﻻﻧﻴﺔ
ﺑﻨﻴﻪ ﻣﺮﺗﺒﺔ ﻭﻧﺎﻋﻤﻪ ﻇﻠﺖ ﺗﺤﺠﻲ ﻭﻳﺎ
ﻇﻬﺮﻩ ﻋﻠﻴﻪ ﻭﻫﻲ ﻣﻘﺎﺑﻴﻠﻲ ﻭﺟﻬﻪ ﻋﻠﻴﻪ
ﻣﻼﻣﺤﻬﺎ ﺗﻀﺤﻚ ﻭﻧﻈﺮﺍﺗﻬﺎ ﺑﻴﻬﺎ ﺍﻋﺠﺎﺏ ﻭﻳﻤﻜﻦ ﺣﺐ .
ﺧﻠﺺ ﺣﺠﻲ ﻭﻳﺎﻫﺎ ﻭﺍﺟﻪ ﺑﺎﻭﻋﺘﻠﻪ ﻻﺑﺲ ﻗﻤﻴﺺ ﺭﺻﺎﺻﻲ ﻭﺟﻴﻨﺰ ..
ﺷﺎﻓﻨﻲ ﻣﻦ ﺑﻌﻴﺪ ﺍﺑﺘﺴﻢ .. ﺍﻧﺎ ﻫﻢ ﺍﺑﺘﺴﻤﺖ .
ﺳﻠﻢ ﻋﻠﻴﻪ .. ﻛﺎﻝ ﻫﺎ ﻭﺻﻠﺘﻲ ﻗﺒﻠﻲ ﻣﺎﺳﺎﺀﺍﻟﻠﻪ ﻋﻠﻴﺞ ..
: ﺍﻣﻢ ﺷﻌﺒﺎﻟﻚ ﻟﻌﺪ ﺑﺲ ﺍﻧﺖ ﻣﺘﺄﻛﺪ ﺍﻧﺎ ﺭﺍﺡ ﺍﺩﺑﺮﻫﺎ
: ﺍﻱ ﻭﺍﻧﺎ ﻛﻠﻲ ﺛﻘﺔ ﺑﻴﺞ .. ﻳﻠﻠﻪ ﺟﺎﻫﺰﺓ ..
ﮔﺘﻠﻪ ﺍﻱ ..
ﺍﺧﺬﻧﻲ ﺩﺧﻠﻨﻪ ﻣﻤﺮ ﻗﺼﻴﺮ ﮔﺒﺎﻟﻪ ﻏﺮﻓﺔ ﻛﺎﻧﻬﺎ ﻣﺨﺘﺒﺮ
ﻭﺑﻌﺪﻫﺎ ﻣﻤﺮ ﺛﺎﻧﻲ ﻋﻠﻰ ﺟﻬﺔ ﺍﻟﻴﻤﻴﻦ .. ﺍﻗﺼﺮ ﻣﻦ ﺍﻟﺴﺎﺑﻖ ﻭﺿﻴﻖ ﺻﺎﺭﺕ ﮔﺒﺎﻟﻨﺎ ﻏﺮﻓﺔ ﻣﻜﺘﻮﺏ ﻏﺮﻓﺔ ﻃﺒﻴﺐ ﺍﻻﺳﻨﺎﻥ ..
ﺩﺧﻠﻨﻪ ﺑﻴﻬﺎ ﺍﻧﻄﺎﻧﻲ ﺻﺪﺭﻳﺔ ﺑﻴﻀﺔ ﺍﺷﺒﻪ ﺑﺼﺪﺍﺭﻱ ﺍﻻﻃﺒﺎﺀ ﺑﺎﻭﻋﻠﻲ ﮔﺎﻝ ﻻﻳﮕﻪ ﻋﻠﻴﺞ ..
ﺿﺤﻜﺖ ..
ﺑﺪﺃ ﻳﻌﻠﻤﻨﻲ ﻋﻠﻰ ﺍﻟﺸﻐﻞ ﻭﺷﻨﻮ ﺍﺳﻮﻱ ﺷﻮﻳﺔ ﺩﺧﺖ ﮔﺎﻝ ﻻﺗﺪﻭﺧﻴﻦ ﺍﻧﺖ ﮔﺪﻫﺎ ﻭﺍﻧﺎ ﺭﺍﺡ ﺍﺑﺪﻱ ﻭﻳﺎﺝ ﻣﻦ ﺍﻟﺼﻔﺮ ..
ﻫﺰﻳﺖ ﺭﺍﺳﻲ ﻭﺑﻠﺸﻨﻪ ﺷﻐﻞ ..
ﺍﻟﻤﺠﻤﻊ ﻋﺒﺎﺭﺓ ﻋﻦ ﻋﻴﺎﺩﺗﻴﻦ ..
ﻟﻼﺳﻨﺎﻥ ﻭﻋﻴﺎﺩﺓ ﻋﺎﻣﺔ .. ﻭﻣﺨﺘﺒﺮ
ﺧﻠﺺ ﺍﻟﻴﻮﻡ ﺍﻟﻤﻐﺮﺏ ﺭﺟﻌﺖ ﻟﻠﺒﻴﺖ ..
ﺧﺎﺑﺮﺕ ﺍﺑﻮﻱ ﻳﺠﻲ ﻋﻠﻴﻪ ﻭﺭﺟﻌﺖ ﻭﻳﺎﻩ
ﺭﻏﻢ ﺍﻟﺤﺎﺡ ﺭﺿﻮﺍﻥ ﺑﺘﻮﺻﻴﻠﻲ ﺑﺲ ﺭﻓﻀﺖ ..
ﺭﺟﻌﺖ ﻟﻠﺒﻴﺖ ﺳﺄﻟﻨﻲ ﺍﺑﻮﻱ ﻋﻠﻰ ﺍﻟﺸﻐﻞ
ﮔﺘﻠﻪ ﻣﺘﻌﺐ ﺑﺲ ﻋﺠﺒﻨﻲ ﺍﻛﻤﻞ ..
ﻫﻨﻪ ﻫﺎﻟﻜﻢ ﺷﻬﺮ ﻭﺑﻌﺪﻫﺎ ﻳﺒﺪﻱ ﺍﻟﺪﻭﺍﻡ ﻭﺍﺗﺮﻛﻪ ..
ﻳﻮﻡ ﺛﺎﻧﻲ ﻭﺻﻠﺖ ﻟﻠﻤﺠﻤﻊ ﻗﺒﻞ ﺭﺿﻮﺍﻥ ..
ﻓﺘﺤﺖ ﺍﻟﻐﺮﻓﺔ ﺷﻐﻠﺖ ﺍﻟﺴﺒﻠﺖ .. ﺟﻴﻜﺖ ﺍﻟﻜﺮﺳﻲ ﺍﻟﻲ ﻳﺴﺘﻠﻘﻲ ﻋﻠﻴﻪ ﺍﻟﻤﺮﻳﺾ ﺷﻔﺘﻪ ﻣﺤﺘﺎﺝ ﺷﺤﻦ ﺷﺤﻨﺘﻪ .
ﻃﻠﻌﺖ ﺍﻻﺩﻭﺍﺕ ﺍﻟﻤﻐﺴﻮﻟﺔ ﻭﺍﻟﻤﻌﻘﻤﺔ ﻣﻦ ﺍﻟﻔﺮﻥ
ﺣﻀﺮﺗﻬﻦ ﻭﺧﻠﻴﺘﻬﻦ ﻋﻠﻰ ﺍﻟﻤﻴﺰ ﺍﻟﻲ ﻳﺼﻴﺮ ﻣﺘﻼﺻﻖ ﻭﻱ ﺍﻟﻜﺮﺳﻲ
ﻃﻠﻌﺖ ﺍﻟﮕﻄﻦ ﻭﺍﺑﺮ ﺍﻟﺰﺍﻳﻠﻮﻛﺎﺋﻴﻦ ﺍﻭ ﺍﺑﺮ ﺍﻟﺒﻨﺞ .
ﻭﻧﻴﺪﻝ ﻭﻭﻳﺎ ﺯﻳﺖ ﺍﻟﻘﺮﻧﻔﻞ ﻭﺍﺩﻭﺍﺕ ﺛﺎﻧﻴﻪ ﻫﻮﺍﻳﻪ ..
.
ﺍﺟﻪ ﺭﺿﻮﺍﻥ ﻭﻛﻞ ﺷﻲ ﺟﺎﻫﺰ ﺑﺎﻭﻋﻠﻲ ﻛﺎﻝ ﺷﻄﻮﺭﺓ
ﺿﺤﻜﺖ ﮔﺘﻠﻪ ﺍﻋﺠﺒﻚ .. ﺻﻔﻦ ﺑﻮﺟﻬﻲ ..
ﺍﻧﺎ ﻣﺎﺟﺎﻥ ﻗﺼﺪﻱ ﺷﻲ .. ﺭﺃﺳﺎ ﺩﺭﺕ ﻭﺟﻬﻲ
ﻭﺳﻮﻳﺖ ﻧﻔﺴﻲ ﺟﺎﻱ ﺍﻓﺼﻞ ﺍﻟﺸﺎﺣﻦ ﻋﻦ ﺍﻟﻜﺮﺳﻲ .
ﻣﻨﻬﺎ ﺗﻌﻠﻤﺖ ﺍﺣﻘﻦ ﺍﻟﻤﺮﺍﺟﻌﻴﻦ ﺑﺎﻟﺒﻨﺞ ..
ﺍﺟﻪ ﻣﺮﺍﺟﻊ ﺷﻜﻠﻪ ﻣﻮ ﺭﺍﺣﻪ
ﻭﻻﺯﻡ ﺍﺣﻘﻨﻪ ﺑﺎﻟﺒﻨﺞ .. ﻃﻠﺒﺖ ﻣﻨﻪ ﻳﻔﺘﺢ ﺣﻠﮕﻪ ﺣﺘﻰ ﺍﺿﺮﺑﻪ ﺑﺎﻟﻤﻜﺎﻥ ﺍﻟﻤﻄﻠﻮﺏ
ﻛﺎﻡ ﻟﺰﻡ ﺍﻳﺪﻱ ﺻﻴﺤﺖ ﻋﻠﻴﻪ
ﺍﺟﻪ ﺭﺿﻮﺍﻥ ﻳﻤﻲ
ﻛﺎﻝ ﺷﻜﻮﻭ
ﺍﻟﻮﻟﺪ ﻛﺎﻟﻪ ﻫﺎﻱ ﻣﺴﺎﻋﺪﺗﻚ ﺯﻳﻦ ﻣﺎﺍﻛﻠﺘﻨﻲ ﺑﺎﻟﻐﻠﻂ ﻟﺰﻣﺖ ﺍﻳﺪﻫﺎ ﻻﻥ ﺍﺧﺎﻑ ﻣﻦ ﺍﻻﺑﺮ ..
ﺍﺧﺬ ﺍﻻﺑﺮﺓ ﻣﻨﻲ ﺭﺿﻮﺍﻥ ﻭﺍﻧﺎ ﻣﻌﺼﺒﺔ
ﻇﻞ ﻳﻀﺤﻚ ﻭﻫﻮ ﺑﻨﺠﻪ
ﻟﻢ ﻳﺤﺘﺎﺝ ﺷﻲ ﻣﻦ ﺍﻟﺼﻴﺪﻟﻴﺔ ﺭﺿﻮﺍﻥ ﻭﺍﺭﻭﺡ ﺍﺟﻴﺒﻠﻬﻴﺎ
ﺍﺷﻮﻑ ﺍﻟﺼﻴﺪﻻﻧﻴﺔ ﺗﺒﺎﻭﻋﻠﻲ ﺑﻨﻈﺮﺍﺕ ﻣﺎﺗﺘﻔﺴﺮ
ﻋﺮﻓﺖ ﺭﺍﺡ ﺍﻭﺍﺟﻪ ﻣﺸﺎﻛﻞ ﻫﻨﺎﻧﻪ ..
ﻏﻠﺴﺖ ﻋﻠﻴﻬﺎ ..
ﻣﺮﺕ ﻛﻢ ﻳﻮﻡ ﺍﺭﻭﺡ ﻟﻠﺸﻐﻞ ﻭﺍﺭﺟﻊ ..
ﺑﺲ ﺍﺣﺲ ﺑﻮﺟﻊ ﻗﻮﻱ ﺑﺮﻭﺣﻲ
ﺍﺣﺲ ﻗﻠﺒﻲ ﻭﻱ ﻛﻞ ﻧﺒﻀﺔ ﻳﻠﻌﻨﻨﻲ ..
ﺷﻮﮔﻲ ﻻﻣﺎﻥ ﺗﺨﻄﻰ ﻛﻞ ﺍﻟﺤﺪﻭﺩ ..
ﺑﺲ ﻋﺰﺓ ﻧﻔﺴﻲ ﻭﻛﺒﺮﻳﺎﺋﻲ ﻛﺎﻥ ﺍﻗﻮﺓ ..
ﻣﺎﻛﻮ ﺍﻱ ﺗﻮﺍﺻﻞ ﺑﻴﻨﻲ ﻭﺑﻴﻨﻪ ..
ﻓﺪ ﻳﻮﻡ ﻃﻠﻌﺖ ﻣﻦ ﺍﻟﺒﻴﺖ
ﻟﺒﺴﺖ ﺻﺪﺭﻳﺔ ﺷﻴﺎﻻﺕ ﺑﻴﻬﺎ ﻋﺮﻳﻀﺔ
ﺍﻟﻮﺍﻧﻬﺎ ﺣﻴﻮﻳﻪ ﻭﺣﻠﻮﻩ ﺑﺼﻠﻲ ﻭﺳﻤﺎﺋﻲ
ﻭﺍﻟﺒﺪﻱ ﺳﻤﺎﺋﻲ ..
ﻭﺗﺮﺍﻧﺸﻮﺯ ﺍﺑﻴﺾ .. ﻭﺷﺎﻝ ﺳﻤﺎﺋﻲ .. ﻭﻧﻈﺎﺭﺍﺕ ﺷﻤﺴﻴﺔ ﻋﺮﻳﻀﺔ ..
ﻃﻠﻌﺖ ﺍﺗﻤﺸﻰ .. ﺍﺿﺤﻚ ﻭﻳﺎ ﺍﻟﺠﻬﺎﻝ ﺑﺎﻟﺸﺎﺭﻉ ﻭﻳﻀﺤﻜﻮﻟﻲ ﻳﺴﻠﻤﻮﻥ ﻋﻠﻴﻪ ﺷﻮﻧﺞ ﺧﺎﻟﻪ .. ﻭﺍﺑﺘﺴﻢ
ﺳﺎﻋﻪ ﺍﺭﺑﻌﻪ ﻭﻧﺺ ﺍﻟﻌﺼﺮ .. ﺍﻟﺠﻮ ﺣﺎﺭ ﺑﺲ ﻫﻮﺍ ﻋﺎﻟﻲ ﻭﺑﻲ ﺣﺮﻭﺭﻩ ..
ﺍﺑﺘﺴﻢ ﺍﺣﺲ ﺑﺎﻟﺤﺮﻳﺔ ﺑﺲ ﺑﺪﺍﺧﻠﻲ ﺍﻟﻢ ﻣﺎﻳﻌﻠﻢ ﺑﻲ ﺍﻟﻪ ﺭﺑﻲ ..
ﺟﺎﻱ ﺍﻣﺸﻲ .. ﺑﺎﻟﻔﺮﻉ ﺍﻟﺮﺋﻴﺴﻲ .. ﻃﻠﻌﺖ ﻣﻦ ﺍﻟﻔﺮﻉ ﺍﻟﻲ ﻋﻦ ﻳﺴﺎﺭﻱ ﺳﻴﺎﺭﺓ ﺑﻴﻀﺔ ﻋﺮﻓﺘﻬﺎ ﺍﻟﻤﻦ ..
ﻭﻛﻔﻬﺎ ﺑﺼﻔﻲ .. ﻧﺰﻝ ﺍﻟﺠﺎﻣﺔ ..
ﻭﻛﻔﺖ ﺍﻧﻪ .. ﺑﺎﻭﻋﺘﻠﻪ .. ﺍﻟﺤﻤﺪﻟﻠﻪ ﻻﺑﺴﺔ ﻧﻈﺎﺭﺍﺕ ﻻﻥ ﻋﻴﻮﻧﻲ ﺍﻛﻴﺪ ﺭﺍﺡ ﺗﻔﻀﺤﻨﻲ ﺣﺘﻰ ﺩﻣﻌﺖ
ﻟﻚ ﻗﺴﻤﺎ ﺑﺎﻟﻠﻪ ﻣﻴﺘﻪ ﻋﻠﻴﻚ ..
ﻟﻴﺶ ﺟﺎﻱ ﺍﺷﻮﻓﻚ ﺑﻌﻴﻮﻧﻲ ﺍﺣﻠﻰ ﻣﻦ ﮔﺒﻞ ..
ﻻﺑﺲ ﻗﻤﻴﺺ ﺯﻳﺘﻮﻧﻲ ﻣﻔﺘﻮﺣﺔ ﺍﻟﺪﮔﻤﺔ ﻣﺒﻴﻦ ﺻﺪﺭﻩ
ﻧﻈﺎﺭﺍﺕ ﺳﻮﺩﺓ ..
ﮔﺎﻝ ﺻﻌﺪﻱ ﻭﺷﻜﻠﻪ ﺣﻴﻴﻞ ﻋﺼﺒﻲ ﺻﻌﺪﻱ ﻧﺘﻔﺎﻫﻢ
: ﺧﻠﺺ ﺍﻣﺎﻥ ﻣﺎﻛﻮ ﺗﻔﺎﻫﻢ ﺍﺣﻨﺎ ﺍﻧﺘﻬﻴﻨﺎﺍ ..
ﺿﺮﺏ ﻗﺒﻀﺔ ﺍﻳﺪﻩ ﻋﻠﻰ ﺍﻟﺴﺘﻴﺮﻥ ﻗﻮﻱ
ﮔﺎﻝ ﺻﻌﺪﻱ ﺩﺍﮔﻮﻭﻟﺞ ﻭﻛﺎﻓﻲ ﻋﻨﺎﺩ ..
ﺑﺎﻭﻋﺖ ﻟﻠﺸﺎﺭﻉ ﻣﺎﺗﺮﻫﻢ ﺍﺑﻘﻰ ﻫﻴﺞ ﺍﺣﺠﻲ ﻭﻳﺎ
ﺍﺻﻌﺪ ﺍﺧﺼﻤﻬﺎ ﺍﺳﻤﻌﻪ ﻛﻼﻡ ﻣﻮﺣﻠﻮ ﺣﺘﻰ ﻳﻔﻚ ﻣﻨﻲ ﻭﺍﻧﺎ ﮔﺪﻫﺎ ..
ﺗﺤﺴﺮﺕ ﺑﺎﻧﺰﻋﺎﺝ ﻭﺩﺭﺕ ﻓﺘﺤﺖ ﺍﻟﺒﺎﺏ ﻭﺻﻌﺪﺕ ﺳﺪﻳﺘﻪ ﺑﺎﻭﻋﺖ ﺍﻟﻪ
ﮔﺘﻠﻪ ﺷﺘﺮﻳﺪ ﻣﻮ ﮔﺘﻠﻚ ﺍﻧﺘﻬﻴﻨﺎ ﺍﺣﻨﺎﺍ ﻻﺗﻠﺢ ﻭﻳﺎﻱ ﺑﻌﺪ .
ﻗﺮﺏ ﻣﻨﻲ ﻧﺰﻉ ﻧﻈﺎﺭﺍﺗﻪ ﺷﻤﺮﻫﺎ .. ﻛﺎﻝ
: ﺍﻧﻲ ﺟﺎﻱ ﺍﺻﻠﺢ ﻛﻞ ﺷﻲ ﺑﻴﻨﻨﺎ ﺭﻏﻢ ﺷﻐﻠﺞ ﻭﻳﺎ ﺭﺿﻮﺍﻥ ﻭﻣﻌﺎﺭﺿﺘﻲ ﺍﻟﻪ ﺑﺲ ﻓﻮﺗﺘﻬﺎ ﺍﻟﺞ ..
: ﺍﻣﺎﻥ ﺍﻧﺎ ﻣﺎﺍﻓﻴﺪﻙ ﺷﻮﻓﻠﻚ ﻭﺣﺪﺓ ﻏﻴﺮﻱ ﺍﻫﻠﻚ ﻣﺎﻳﻌﻴﺮﻭﻧﻬﺎ ﻳﺤﺘﺮﻣﻮﻧﻬﺎ ﻭﻣﺎﺗﺴﻴﺊ ﺍﻟﺴﻤﻌﺘﻬﻢ ..
: ﻫﺬﺍ ﻛﻠﻪ ﻣﺎﻳﻬﻤﻨﻲ ﻻﺍﻫﻠﻲ ﻭﻻﺍﻫﻠﺞ ﻭﻻﺍﺣﺪ ﺍﻟﻲ ﻳﻬﻤﻨﻲ ﺷﻲ ﻭﺍﺣﺪ ﺍﺭﺗﺒﻂ ﺑﻴﺞ ﻭﻧﻨﻘﺬ ﺣﺒﻨﺎ ﻭﻧﻌﺎﻟﺠﻪ ﺑﺎﻟﺰﻭﺍﺝ ..
: ﺣﺒﻨﺎ ﻣﺎﻛﻮ ﺍﻣﺎﻥ ﺣﺒﻨﺎ ﻏﻠﻄﺔ ..
: ﺍﻟﺨﺎﻃﺮ ﺍﻟﻠﻪ ﺧﻠﻴﻨﺎ ﻏﻠﻄﺎﻧﻴﻴﻦ ..
: ﻛﺮﺍﻣﺘﻲ ﻭﻋﺰﺓ ﻧﻔﺴﻲ ﻋﻨﺪﻱ ﻓﻮﻕ ﺍﻟﺤﺐ ﻭﻓﻮﻕ ﻛﻞ ﺷﻲ ﻣﺎﺍﺣﺐ ﺍﻧﻬﺎﻥ ﻭﻻﺍﻧﺬﻝ ﻭﻻﺍﻧﻮﺧﺬ ﺑﺬﻧﺐ ﻣﺎﺍﺭﺗﻜﺒﺘﻪ .
: ﺍﻟﺤﺐ ﻣﻮ ﻓﺪ ﺷﻲ ﺗﻤﺘﻠﻜﻴﻨﻪ ﻭﻗﺖ ﻏﺮﻭﺭﺝ ﻭﺗﺘﺮﻛﻴﻪ ﻭﻗﺖ ﻛﺒﺮﻳﺎﺋﺞ ﺍﻟﻲ ﻳﺤﺐ ﻟﻠﻤﻮﺕ ﻣﺎﻳﺘﺨﻠﻰ ﻋﻦ ﺣﺒﻴﺒﻪ .
: ﺑﺒﺮﻭﺩ ﮔﺘﻠﻪ ﻭﺍﻧﺎ ﻣﻴﺘﻪ ﻟﻼﺳﻒ ..
ﺍﻣﺎﻥ ﺑﻌﺼﺒﻴﺔ .. ﺍﻇﺎﻫﺮ ﺍﻧﻲ ﺍﻧﻄﻴﺘﺞ ﺍﻛﺜﺮ ﻣﻦ ﻗﻴﻤﺘﺞ ﻭﻟﻬﻨﺎ ﻭﺑﺲ ﺍﻛﺘﻔﻴﺖ ﻣﻨﺞ .. ﻭﺩﺍﻋﺔ ﺟﺮﺣﺞ ﺍﻟﻲ ﻭﺍﻟﺨﺬﻻﻥ ﻭﻣﺜﻠﻤﺎ ﻛﺘﻠﺞ ﺍﺣﺒﺞ ﺭﺍﺡ ﺍﻛﻠﺞ ﻧﺴﻴﺘﺞ ..
ﺩﻓﻌﻨﻲ ﻣﻦ ﺯﻧﺪﻱ ﻋﻠﻰ ﺑﺎﺏ ﺍﻟﺴﻴﺎﺭﺓ .. ﮔﺎﻝ ﻳﻠﻠﻪ ﻧﺰﻟﻲ
ﻭﺧﺮﺕ ﺍﻳﺪﻩ ﻣﻨﻲ ﮔﺘﻠﻪ ﻻﺗﺘﺠﺎﻭﺯ ﻻ ﺍﻧﺖ ﻭﻻﺍﻫﻠﻚ ﻳﻘﻴﻤﻮﻧﻲ ﺍﻧﺎ ﺍﻋﺮﻑ ﺷﻮﻥ ﺍﺛﺒﺖ ﺫﺍﺗﻲ ..
ﮔﺎﻡ ﻣﻴﻞ ﺟﺴﻤﻪ ﻋﻠﻴﻪ ﻃﺦ ﺯﻧﺪﻩ ﺑﻴﺪﻱ ﺗﻤﻨﻴﺖ ﻣﺎﺍﺗﺮﻛﻪ ﻣﺪ ﺍﻳﺪﻩ ﻓﺘﺤﻠﻲ ﺑﺎﺏ ﺍﻟﺴﻴﺎﺭﺓ ﻭﺻﺎﺡ ﻧﺰﻟﻲ ﺑﻌﺼﺒﻴﺔ ..
ﺻﺤﺖ ﻭﺷﻌﻨﺪﻱ ﺑﺎﻗﻴﺔ ﺍﺻﻼ ﻣﺎﺍﺗﺸﺮﻑ
ﻧﺰﻟﺖ ﺑﺴﺮﻋﻪ .. ﺳﻴﺎﺭﺗﻪ ﻋﺎﻟﻴﺔ ﻃﻔﺮﺕ ﻃﻔﺮﺭ ﺭﻛﻌﺖ ﺍﻟﺒﺎﺏ ﺣﻴﻴﻞ . .
ﺷﺨﻂ ﺳﻴﺎﺭﺗﻪ ﻭﺭﺍﺡ .. ﻭﻛﻔﺖ ﺑﻤﻜﺎﻧﻲ ﻣﺎﺍﺗﺤﺮﻛﺖ
ﻟﻮ ﺑﺲ ﺷﺎﻳﻞ ﻧﻈﺎﺭﺍﺗﻲ ﻭﺷﺎﻳﻒ ﻋﻴﻮﻧﻲ ﻭﺍﻟﺪﻣﻮﻉ ﺍﻟﻲ ﺗﺠﻤﻌﺖ ﺑﻴﻬﺎ ﺟﺎﻥ ﻣﺎﺻﺪﮔﺖ ﻛﻼﻣﻲ
.
ﺳﻤﻴﺔ .. ﻇﻠﻴﺖ ﻭﺍﻛﻔﺔ ﺍﺑﺎﻭﻉ ﻟﺴﻴﺎﺭﺗﻪ ﻭﻫﻲ ﺗﺒﺘﻌﺪ
ﺑﺪﺍﺧﻠﻲ ﺻﺮﺧﺔ ﺍﮔﻠﻪ ﺍﺭﺟﻊ ..
ﺑﺲ ﺍﻋﺮﻑ ﻣﺎﺗﻔﻴﺪ ﺻﺮﺧﺘﻲ ..
ﺭﺟﻌﺖ ﺧﻄﻮﺍﺗﻲ ﻣﺜﻞ ﻏﺮﮔﺎﻧﻪ ﺑﺒﺤﺮ ﻫﺎﺋﺞ
ﻭﺍﻣﻮﺍﺟﻪ ﺍﻟﻢ ﻧﺪﻡ ﻭﺣﻴﺮﺓ ..
ﻣﺸﻴﺖ ﺍﻟﻔﺮﻉ ﺍﻟﺮﺋﻴﺴﻲ ﻭﻃﺒﻴﺖ ﺑﺎﻟﻔﺮﻉ ﺍﻟﻲ ﺑﻲ ﺑﻴﺘﻨﺎ
ﺍﺣﺘﺮﻳﺖ ﻛﻠﺶ ..
ﻭﺻﻠﺖ ﻟﺒﻴﺘﻨﻪ ﻭﻣﺎﺍﻛﺪﺭﺕ ﺍﺩﺧﻞ ﻃﻠﻌﺖ ﮔُﺒﻞ
ﻣﺸﻴﺖ ﺩﺧﻠﺖ ﻳﺴﺮﻯ ﻣﻦ ﺍﻟﺠﻬﺘﻴﻦ ﺑﻴﻮﺕ ﻭﺷﺎﺭﻉ ﻣﺒﻠﻂ
ﺍﻃﻔﺎﻝ ﻳﻠﻌﺒﻮﻥ ..
ﻟﻮ ﻣﺎ ﺍﻟﻨﻈﺎﺭﺍﺕ ﺟﺎﻥ ﺍﻟﻜﻞ ﺍﻧﺘﺒﻪ ﻋﻠﻰ ﺩﻣﻮﻋﻲ
ﺍﻟﻲ ﻣﺎﺍﻥ ﺗﺘﺨﻄﻰ ﺣﺎﺟﺰ ﺍﻟﻨﻈﺎﺭﺓ ﺍﻣﺴﺤﻬﺎ
ﺣﺪ ﻣﺎ ﻗﺮﺏ ﺍﻟﻤﻨﺪﻳﻞ ﻳﺘﻔﺘﺖ ..
ﻇﻠﻴﺖ ﺍﻣﺸﻲ ﻋﺒﺮﺕ ﺟﺴﺮ .. ﺻﺎﺭﻭﺍ ﺍﻟﺒﻴﻮﺕ ﻣﻦ ﺟﻬﻪ ﻭﺣﺪﺓ ﻻﻥ ﺑﺼﻒ ﻧﻬﺮ ﺟﺎﻱ ﺍﻣﺸﻲ ..
ﻣﺸﻴﺖ ﻭﺻﻠﺖ ﻟﺸﻂ ﺍﻟﻌﺮﺏ .. ﻧﺰﻟﺖ ﺑﺎﻟﺠﺮﻑ ..
ﻛﻌﺪﺕ ﺟﻮﻩ .. ﻛﺒﺎﻟﻲ ﺍﻟﺒﻼﻣﻪ ﺑﺎﻟﺒﻠﻢ ﻣﺎﻟﺘﻬﻢ ﺟﺎﻱ ﻳﺬﺑﻮﻥ ﺷﺒﻜﺔ ﺍﻟﺼﻴﺪ .. ﻭﻣﻨﺎﻙ ﺍﻃﻔﺎﻝ ﺟﺎﻱ ﻳﺴﺒﺤﻮﻥ
ﻭﺑﻌﻴﺪ ﻋﻨﻲ ﺑﻨﺎﺕ ﺑﻌﻤﺮﻱ ﻭﺍﺻﻐﺮ ﻭﻭﻳﺎﻫﻢ ﺍﻃﻔﺎﻝ
ﺑﻴﺪﻫﻢ ﺗﻠﻴﻔﻮﻧﺎﺗﻬﻢ ﻭﻳﻄﻜﻮﻥ ﺻﻮﺭ ﻭﺻﻮﺕ ﺿﺤﻜﺎﺗﻬﻢ ﺗﻮﺻﻠﻨﻲ ..
ﻛﻞ ﺷﻮﻳﻪ ﻳﻔﻮﺕ ﻗﺎﺭﺏ ﻭﻳﺨﻠﻲ ﺍﻻﻣﻮﺍﺝ ﺗﺘﺤﺮﻙ ﻭﺗﻮﺻﻠﻨﻲ ﺗﺒﺒﻠﻠﺖ ﻣﻼﺑﺴﻲ ﻭﺣﺬﺍﺋﻲ
ﺍﺭﻳﺪ ﺷﻲ ﻳﺒﺮﺩﻧﻲ ..
ﺍﺣﺲ ﺍﻟﻜﻞ ﻋﺎﻳﺶ ﻭﺍﻧﺎ ﻣﻴﺘﺔ ..
ﺍﻧﺒﻨﻲ ﺿﻤﻴﺮﻱ ﺍﻧﻘﻬﺮﺕ
ﺭﺍﺡ ﻳﺮﺟﻊ ﻭﻳﺼﺎﻟﺤﻨﻲ ﻣﺎﻳﻜﺪﺭ ﺑﺪﻭﻧﻲ ﺍﻧﺎ ﻣﺘﺄﻛﺪﺓ ..
ﻭﺍﺫﺍ ﻣﺎﺳﻮﺍﻫﺎ ﺍﻧﺎ ﺍﺳﻮﻳﻬﺎ ﻭﺍﺧﺎﺑﺮﻩ ﻭﺍﺍﺭﺍﺿﻲ ﻣﺎﺍﻛﺪﺭ ﺑﺪﻭﻧﻪ ﻭﻻﺍﺭﻳﺪ ﻭﺍﺣﺪ ﻏﻴﺮﻩ ﺭﺍﺡ ﺍﻭﻓﻲ ﺑﻮﻋﺪﻱ ﻭﻣﺎﺍﺧﺬﻟﻪ
ﻧﺴﻴﺖ ﻧﻔﺴﻲ ﻭﺍﻧﺎ ﺍﻓﻜﺮ
ﺩﮒ ﺗﻠﻴﻔﻮﻧﻲ ﺑﺴﺮﻋﺔ ﻓﺘﺤﺖ ﺍﻟﺠﻨﻄﺔ .. ﻓﻜﺮﺗﻪ ﺍﻣﺎﻥ ﺍﻟﻲ ﺍﺗﺼﻞ ﺑﺲ ﺷﻔﺘﻪ ﺭﺿﻮﺍﻥ .. ﺗﺤﺴﺮﺕ ﻭﺟﺎﻭﺑﺘﻪ ..
ﮔﺎﻝ ﺍﻧﺖ ﻭﻳﻨﺞ ..
ﺑﺎﻭﻋﺖ ﻟﻨﻔﺴﻲ ﻣﻼﺑﺴﻲ ﻣﺒﻠﻠﻪ ﻣﻦ ﻣﺎﻱ ﺍﻟﺸﻂ
ﻣﺎﺭﺍﺡ ﺍﻟﻠﺤﮓ ﺑﻌﺪ ﺍﺭﻭﺡ ﺍﻟﺒﻴﺖ ﺍﺑﺪﻝ ﻭﺍﺭﺟﻊ ﻟﻠﻤﺠﻤﻊ ..
ﮔﺘﻠﻪ ﻣﺎﺍﺟﻲ ﺍﻟﻴﻮﻡ ..
ﻟﻴﺲ ﺧﻮ ﻣﺎ ﺻﺎﻳﺮ ﺳﻲ ..
ﻻ ﻫﻴﺞ ﺑﺲ ﺍﺧﺬﺗﻨﻲ ﻧﻮﻣﺔ ..
ﻭﮔﻌﺪﺗﻲ ﻏﻴﺮ ﺗﺤﺠﻴﻦ ﻏﻴﺮ ﺗﮕﻮﻟﻴﻦ ..
ﻫﺴﻪ ﻣﺎﺻﺎﺭ ﺷﻲ ﻋﻮﺩ ﺍﺧﺼﻤﻬﺎ ﻣﻦ ﺭﺍﺗﺒﻲ ﺩﻛﺘﻮﺭ ..
ﻳﻠﻠﻪ ﺑﺎﻱ ﻣﺴﻐﻮﻝ ..
ﺍﻭﻭﻭ ﺍﻧﺎ ﻧﺴﻴﺖ ﻧﻔﺴﻲ ﺑﻌﺪ ﻣﻮ ﺍﻟﺸﻐﻞ ..
ﻛﻤﺖ ﻣﻜﺎﻧﻲ ﻭﺗﻮﺟﻬﺖ ﻟﻠﺒﻴﺖ ﻭﺍﻟﺪﻧﻴﺎ ﻏﺮﻭﺏ .. ،
ﺣﺴﻴﺖ ﺑﺮﺍﺣﺔ ﺍﺣﺲ ﺷﻤﺮﺕ ﻫﻤﻮﻣﻲ ﺑﺎﻟﺸﻂ ..
ﻣﺮ ﺍﺳﺒﻮﻉ .. ﻛﻠﻤﺎ ﺍﻟﺰﻡ ﺍﻟﺘﻠﻴﻔﻮﻥ ﺍﺭﻳﺪ ﺍﺧﺎﺑﺮ ﺍﻣﺎﻥ
ﺷﻲ ﻳﻤﻨﻌﻨﻲ ﺧﺠﻞ ﻋﻠﻰ ﻛﺒﺮﻳﺎﺀ ..
ﻛﻞ ﻣﺮﺓ ﺍﺩﻙ ﺭﻗﻤﻪ ﺍﻟﻲ ﺣﺎﻓﻈﺘﻪ ﻋﻠﻰ ﻗﻠﺒﻲ ﻭﺍﺗﺮﺍﺟﻊ ..
ﺧﻠﺺ ﺍﻻﺳﺒﻮﻉ ﻭﺑﺪﺃ ﺟﺪﻳﺪ .. ﺩﺍﻭﻣﺖ ﻓﺪ ﻳﻮﻡ ﺭﺣﺖ ﻋﻠﻰ ﻭﻛﺖ .. ﻃﺒﻴﺖ ﻣﻦ ﺍﻟﺒﺎﺏ .. ﺷﺎﻓﺘﻨﻲ ﺍﻟﺼﻴﺪﻻﻧﻴﺔ
ﺍﺳﻤﻬﺎ ﺷﻐﺎﻑ ..
ﻣﺘﻮﺳﻄﺔ ﺍﻟﻄﻮﻝ ﺣﻨﻄﺎﻭﻳﺔ ﺍﻟﻲ ﻳﺒﺎﻭﻉ ﺍﻟﻬﺎ ﺭﺍﺡ ﻳﺘﺄﻛﺪ ﺍﻧﻬﺎ ﺫﺍﺕ ﺷﺨﺼﻴﺔ ﻗﻮﻳﺔ ﺷﻜﻠﻬﺎ ﻣﻘﺒﻮﻝ ﻭﻣﺮﺗﺒﺔ ﺻﺎﺣﺘﻨﻲ ..
ﺣﺴﻴﺖ ﺗﺮﻳﺪ ﺗﻜﻮﻝ ﺷﻲ ﺿﺎﻣﺘﻪ ﺑﮕﻠﺒﻬﺎ ..
ﻻﻥ ﻧﻈﺮﺍﺗﻬﺎ ﺗﺤﺠﻲ ..
ﮔﺘﻠﻬﺎ ﻧﻌﻢ ﻭﺟﺮﻳﺖ ﻧﻔﺲ ﻣﺰﻋﻮﺟﺔ ﻷﻥ ﺍﺣﺴﻬﺎ ﺿﺎﻳﺠﺔ ﻣﻨﻲ ..
ﺍﺷﺮﺗﻠﻲ ﺍﻛﻌﺪ ﻳﻤﻬﺎ ..
ﻣﻮ ﻣﺎﻝ ﻛﻌﺪﺓ ﺍﺭﻳﺪ ﺍﺭﻭﺡ ﺍﺧﻠﺺ ﺷﻐﻞ ﺑﻐﺮﻓﺔ ﺍﻟﺪﻛﺘﻮﺭ .
ﻗﺒﻞ ﻻﻳﺠﻲ ..
ﺷﻐﺎﻑ .. ﺍﻭﻙ ﻧﺪﺧﻞ ﺑﺎﻟﻤﻬﻢ ﺍﺳﻤﻌﻲ ﺳﻤﻴﺔ ﺍﺣﻨﺎ ﻗﺒﻞ ﻣﻦ ﺟﻨﺎ ﺍﺻﺪﻗﺎﺀ ﺍﻧﺎ ﻭﺭﺿﻮﺍﻥ ﺣﺎﺟﻴﻠﻲ ﻋﻨﺞ ﻭﻋﻦ ﺣﺒﻪ ﺍﻟﺞ ﻭﺍﻋﺠﺎﺑﻪ ﺑﻴﺞ ..
ﺳﻤﻴﺔ .. ﺑﻘﻠﺒﻲ ﮔﻠﺖ ﺍﺥ ﻳﺎﺛﺮﺛﺎﺭ ﻳﺎﺭﺿﻮﺍﻥ ﺷﻜﻮ ﻳﻜﻠﻠﻬﻪ ﻫﻴﺞ .
ﻛﺘﻠﻬﺎ ﺍﻱ ﻛﻤﻠﻲ ﺑﺴﺮﻋﻪ ﺍﺭﻳﺪ ﺍﺭﻭﺡ ..
ﺍﻧﺰﻋﺠﺖ ﻭﻇﻠﺖ ﺗﻨﻔﺦ ﮔﺎﻟﺖ ﺍﻱ ﻭﻫﺴﻪ ﺍﺣﻨﺎ ﻣﺘﻔﻘﻴﻦ ﻋﻠﻰ ﺍﻟﺨﻄﻮﺑﺔ ﺑﺲ ﺍﻧﺼﺪﻣﺖ ﻣﻦ ﺷﻔﺘﻪ ﺟﺎﻳﺒﺞ ﺗﺸﺘﻐﻠﻴﻦ ﻭﻳﺎ ﻭﺻﺎﺭﺕ ﺑﻴﻨﺎ ﻣﺸﺎﻛﻞ ﺑﺴﺒﺒﺞ
.
ﺳﻤﻴﺔ .. ﻳﻌﻨﻲ ﺍﻧﺖ ﻣﺎﻭﺍﺛﻘﺔ ﻣﻦ ﻣﺸﺎﻋﺮﻩ ﺗﺠﺎﻫﺞ ﻭﺟﺎﻳﻪ ﺗﺤﻤﻠﻴﻨﻲ ﺫﻧﺐ ﻣﺪﺍﻡ ﻫﻮ ﻭﻋﺪﺝ ﺑﺎﻟﺰﻭﺍﺝ ﺍﻧﻪ ﺷﻜﻮﻭ؟
ﻃﺐ ﺍﻟﺼﻴﺪﻻﻧﻲ ﻭﺳﻜﺘﻨﺎ ﻋﻔﺘﻬﺎ ﻭﻃﻠﻌﺖ ..
ﺭﺣﺖ ﻟﻠﻐﺮﻓﺔ ..
ﺍﺷﺘﻐﻞ ﻭﺍﻓﻜﺮ ﺷﻜﺪ ﺟﻨﻪ ﺍﻧﺎ ﻭﺍﻣﺎﻥ ﻧﺘﻤﻨﻰ ﺭﺿﻮﺍﻥ ﻳﺮﺗﺒﻂ ﻭﻫﺴﻪ ﺭﺍﺡ ﻫﻮ ﻣﺮﺗﺒﻂ ﻭﺍﺣﻨﺎ ﻣﻔﺘﺮﻗﻴﻦ ﺍﺧﺦ ﻳﺎﺍﻣﻲ ﺍﺧﺦ ﻟﻴﺶ ﺧﻠﻴﺘﻲ ﺍﻟﻜﻞ ﻳﻌﻴﺮﻧﻪ ﺑﻴﺞ ..
ﺑﻠﻠﻪ ﺍﻣﻲ ﻭﺣﺪﺓ ﺷﻬﻮﺍﻧﻴﺔ ﻋﻤﺘﻲ ﺍﺷﻮﺍﻕ ﻭﺯﻭﺟﻬﺎ ﺷﺒﻴﻬﻢ ﻳﺎﺧﺬﻭﻧﻪ ﺑﺬﻧﺒﻬﺎ .. ..
ﺩﺧﻞ ﺭﺿﻮﺍﻥ .. ﻭﻛﻤﻠﺖ ﺷﻐﻞ ﻭﻳﺎ ..
ﻋﺒﺎﻟﻬﺎ ﺷﻐﺎﻑ ﺍﺗﺮﻙ ﺍﻟﺸﻐﻞ ﻋﻠﻤﻮﺩ ﻛﻼﻣﻬﺎ ﺍﻟﻲ ﻛﺎﻟﺘﻪ
ﻧﻮﺏ ﻋﻠﻴﻪ ﺷﻐﺎﻑ ﻣﺪﺭﻱ ﺷﻴﺪﻟﻌﻬﺎ ﺭﺿﻮﺍﻥ ﺍﻛﻴﺪ ﺳﻮﺳﻮ ﻣﺎﺗﻘﺒﻞ ﻏﻠﻂ .. ﺍﻟﻤﻬﻢ ﻇﻠﻴﺖ ﻋﻠﻰ ﮔﻠﺒﻬﺎ ﺣﻠﻮ ﺍﻟﻮﺍﺣﺪ ﻣﻦ ﻳﺼﻴﺮ ﺧﺒﻴﺚ ﻭﻳﻌﺮﻑ ﺑﻨﻔﺴﻪ ﺧﺒﻴﺚ ﻳﺤﺲ ﺑﺴﻌﺎﺩﺓ ﻋﺎﺭﻣﺔ .
ﻋﻠﻤﺎ ﺗﺨﻠﺺ ﻫﺎﻟﺸﻬﺮﻳﻦ ﻳﻤﻜﻦ ﺷﻐﻮﻓﻪ ﺗﺒﻠﻊ ﺍﺩﻭﻳﺔ ﺍﻟﻀﻐﻂ ﻭﺍﻟﺴﻜﺮ ﺍﻟﻲ ﻳﻤﻬﺎ ﻛﻠﻬﺎ ..
ﺭﺟﻌﺖ ﻟﻠﺒﻴﺖ .. ﺑﺪﻟﺖ ﻣﻼﺑﺴﻲ ﻭﻃﻠﻌﺖ ..
ﺑﻴﺒﻴﺘﻲ ﺑﺎﻟﻤﻄﺒﺦ ﻭﻓﺎﻃﻤﺔ ﻳﻤﻬﺎ ﻛﺎﻋﺪﺓ ﺑﺎﻟﻜﺎﻉ ﺗﻠﻒ ﻛﺒﺔ ..
ﺷﺎﻓﺘﻨﻲ ﺑﻴﺒﻴﺘﻲ ﺳﺄﻟﺘﻨﻲ ﻋﻦ ﺭﺿﻮﺍﻥ ..
ﻛﺘﻠﻬﺎ ﺯﻳﻦ ﺷﺒﻲ ﺷﻐﺎﺍﻝ ..
ﺑﻴﺒﻲ : .. ﻭﻟﺞ ﻗﺎﺑﻞ ﻫﻮ ﻣﻮﻟﺪﺓ ..
ﺿﺤﻜﺖ ﻓﺎﻃﻤﺔ . . ﻭﺍﻧﺪﮔﺖ ﺍﻟﺒﺎﺏ ..
ﺑﻴﺒﻴﺘﻲ .. ﻛﻮﻣﻲ ﺳﻤﻴﺔ ﺷﻮﻓﻲ ﻣﻨﻮ ﺑﺎﻟﺒﺎﺏ ﺧﻄﻴﺔ ﻓﺎﻃﻤﺔ ﻣﺎﺑﻴﻬﺎ ﺗﻜﻮﻡ .
ﻛﺘﻠﻬﺎ ﺍﻱ ﺍﻧﻪ ﺍﻃﻠﻊ ..
ﻃﻠﻌﺖ ﻟﻠﺒﺎﺏ ﻓﺘﺤﺘﻬﺎ .. ﺍﻧﻘﺮﻓﺖ ﻣﻦ ﺷﻔﺖ ﺍﺷﻮﺍﻕ .
ﻭﻭﻳﺎﻫﺎ ﻫﺠﺮﺍﻥ .. ،
ﻛﺎﻟﺖ ﺍﺑﻮﺝ ﻫﻨﺎ ﻭﺩﻓﻌﺖ ﺍﻟﺒﺎﺏ ﻭﺩﺧﻠﺖ .. ﻗﺒﻞ ﻻﺍﺟﺎﻭﺑﻬﺎ .
ﻫﺠﺮﺍﻥ ﺷﺎﻓﺘﻨﻲ ﻛﺎﻟﺖ ﻫﻼﻭﻭﻭ ﺳﻤﺴﻢ ﺍﻣﻤﺢ ﺷﻮﻧﺞ ﻭﺗﻀﺤﻚ .
ﺩﺧﻠﺖ ﻭﺭﻩ ﺍﻣﻬﺎ ..
ﺣﺴﻴﺖ ﺑﺸﻲ ﻏﺮﻳﺐ .. ﻃﻠﻴﺖ ﺑﺮﺓ ﺑﻠﻜﻲ ﺍﻣﺎﻥ ﺍﻟﻲ ﻣﻮﺻﻠﻬﻦ .. ﺑﺎﻭﻋﺖ ﻣﺎﻛﻮ ﺑﺲ ﺳﻴﺎﺭﺗﻬﺎ ﺟﺎﻳﻴﻦ ﺑﻴﻬﺎ .
ﺗﺤﺴﺮﺕ ﺭﺩﺕ ﺑﺲ ﺍﺷﻮﻓﻪ ..
ﺭﺣﺖ ﻭﺭﺍﻫﻦ ﺷﻔﺘﻬﻦ ﺩﺧﻠﻦ ﺑﺎﻟﻤﻄﺒﺦ ..
ﺩﺧﻠﺖ ﻭﻛﻔﺖ ﺑﺎﻟﺒﺎﺏ ﮔﻠﺒﻲ ﮔﺎﺭﺻﻨﻲ
ﻇﻠﻴﺖ ﺍﺑﺎﻭﻋﻠﻬﻦ .. ﻛﻌﺪﻥ ﻋﻠﻰ ﻛﺮﺍﺳﻲ ﻣﻴﺰ ﺍﻟﻄﻌﺎﻡ ﻭﻓﺎﻃﻤﺔ ﺗﻜﻠﻠﻬﻦ ﺍﻣﺸﻮﺍ ﺑﺎﻟﺪﻳﻮﺍﻧﻴﻪ
ﺍﺷﻮﺍﻕ ..: ﻻ ﺍﺣﻨﺎ ﺟﺎﻳﻴﻦ ﻧﻌﺰﻣﻜﻢ ﻋﻠﻰ ﺣﻔﻠﺔ ﺧﻄﻮﺑﺔ ﺍﻣﺎﻥ ﺍﻟﺨﻤﻴﺲ ﺍﻟﺠﺎﻱ ﺍﻥ ﺷﺎﺀﺍﻟﻠﻪ ..
ﻭﻇﻠﺖ ﺗﺒﺎﻭﻋﻠﻲ .. ﺍﺣﺲ ﺍﻧﺼﻌﻘﺖ ﺣﺮﺍﺭﺗﻲ ﺍﺭﺗﻔﻌﺖ ﻻ ﻣﺴﺘﺤﻴﻞ ﻣﺎﺟﺎﻱ ﺍﺻﺪﮒ ﻣﻌﻘﻮﻟﺔ ﺳﻮﺍﻫﺎ ﺑﻘﻴﺖ ﺟﺎﻣﺪﺓ ﺑﻤﻜﺎﻧﻲ ..
ﺑﻴﺒﻲ .. ﺷﺎﻳﻒ ﺍﻟﻒ ﺧﻴﺮ ﻣﻨﻴﻦ ﺧﻄﺐ؟
ﺍﺷﻮﺍﻕ : ﺑﻨﺖ ﻋﻤﻪ ﻓﺮﺡ ﺷﺎﻳﻔﺘﻬﺎ ﺍﻧﺖ ﻳﻤﻪ ﺧﻮﺵ ﺑﻨﻴﻪ ﺣﻠﻮﺓ ﻭﺍﺧﻼﻗﻬﺎ ﺳﺎﺑﻘﺘﻬﺎ ..
ﺑﻴﺒﻲ : ﺍﻱ ﻳﻤﻪ ﺍﻟﻒ ﻋﻠﻰ ﺍﻟﺨﻴﺮ .
ﻫﺠﺮﺍﻥ .. ﻣﻮ ﻣﺎﺗﺠﻴﻦ ﺳﻤﻴﺔ ﻧﺰﻋﻞ ﻋﻠﻴﺞ ﺗﺮﻩ .
ﺳﻤﻴﺔ .. ﻣﻦ ﺑﻴﻦ ﻧﻈﺮﺍﺕ ﺑﻴﺒﻴﺘﻲ ﺍﻟﺤﺰﻳﻨﺔ ﺍﻟﻲ ﺍﻟﻲ ﻇﻠﺖ ﺗﺒﺎﻭﻋﻠﻲ ﺑﻨﻈﺮﺓ ﺍﻟﻔﺎﻫﻢ ﻛﻞ ﺷﻲ .
ﻇﻠﻴﺖ ﺍﺟﺮ ﺑﻘﻮﺗﻲ ﺟﺮ ﺑﻠﻜﻲ ﺗﺴﻌﻔﻨﻲ ﻭﺍﺧﻴﺮﺍ ﻃﻠﻊ ﺻﻮﺗﻲ ﮔﺘﻠﻬﺎ ﺍﻱ ﺍﻛﻴﺪ ﺍﻧﺎ ﺍﻭﻝ ﺍﻟﺤﺎﺿﺮﻳﻴﻦ .
ﺍﺷﻮﺍﻕ : ﺍﻱ ﻣﺎﺭﺍﺡ ﻳﺤﻠﻰ ﺍﻟﺤﻔﻞ ﺑﺪﻭﻧﺞ ..
ﺳﻤﻴﺔ .. ﻫﻲ ﻭﻋﻴﻮﻧﻬﺎ ﺑﻌﻴﻮﻧﻲ ﮔﺎﻟﺖ ﻫﺎﻟﻜﻼﻡ
ﻫﺰﻳﺖ ﺭﺍﺳﻲ ﺑﺎﺑﺘﺴﺎﻣﺔ ﻛﻠﻬﺎ ﺍﻟﻢ ﻛﺘﻠﻬﺎ ﺍﻛﻴﺪ .
ﺍﺑﺎﻭﻉ ﻟﻔﺎﻃﻤﺔ ﺣﺎﺳﺔ ﺑﺸﻲ ﻏﺮﻳﺐ ﺑﺲ ﻛﻞ ﺷﻲ ﻣﺎﻣﻔﺘﻬﻤﺔ ﺑﻴﻨﻤﺎ ﺑﻴﺒﻴﺘﻲ ﻓﺎﻫﻤﺔ ﻛﻞ ﺷﻲ .
ﻭﻣﺒﻴﻨﺔ ﻣﺎﺭﺍﺿﻴﺔ ﻋﻠﻰ ﺧﻄﻮﺑﺘﻪ ﻭﺗﻮﺯﻉ ﻧﻈﺮﺍﺗﻬﺎ ﺑﻴﻨﻨﺎ ﺑﻘﻬﺮ .
ﺍﺭﻳﺪﻫﻢ ﺑﺲ ﻳﺮﺣﻮﻥ ﺣﺘﻰ ﺍﻧﻬﺰﻡ ﻭﺍﻧﻔﺮﺩ ﺑﺤﺰﻧﻲ ..
ﺍﺷﻮﺍﻕ : ﻳﻠﻠﻪ ﺍﺣﻨﺎ ﺍﻧﺮﻭﺡ ﻭﺍﻳﻮﺏ ﺍﻧﺎ ﺍﺧﺎﺑﺮﻩ ﺍﻋﺰﻣﻪ .
ﻓﺎﻃﻤﺔ : ﻇﻠﻮﺍ ﻟﻠﻌﺸﻪ ﻳﻤﻨﻪ
.
ﺍﺷﻮﺍﻕ : ﻻ ﺩﺍﻳﻤﺔ ﻣﺴﺘﻌﺠﻠﻴﻦ .
ﻃﻠﻌﻮﺍ ﻭﻃﻠﻌﺖ ﺑﻴﺒﻴﺘﻲ ﻭﺭﺍﻫﻢ ..
ﻭﺍﻧﺎ ﺩﺧﻠﺖ ﻟﻠﻬﻮﻝ .. ﻭﻛﻔﺖ ﻳﻢ ﺍﻟﺸﺒﺎﻙ ﻭﺍﺑﺎﻭﻋﻠﻬﺎ ﺍﺷﻮﺍﻕ ﻭﻫﻲ ﺗﻤﺸﻲ ﺑﺎﻟﻄﺎﺭﻣﺔ ﺗﺮﻳﺪ ﺗﻄﻠﻊ
ﻃﺎﺣﻦ ﺩﻣﻮﻋﻲ ﻭﺍﺧﺘﻨﮕﺖ .
ﺍﺑﺎﻭﻋﻠﻬﺎ ﻭﺍﺣﺠﻲ ﻭﻱ ﺭﻭﺣﻲ ﺍﻛﻠﻠﻬﺎ ﻫﺎﺍ ﺍﺷﻮﺍﻕ ﺳﻮﻳﺘﻲ ﺍﻟﻲ ﺭﺩﺗﻲ ﺍﺭﺗﺎﺣﻴﺘﻲ ﻫﺴﻪ ﻣﻮﻭﻭ . ؟
ﻟﺤﻈﺎﺕ ﻭﺍﺳﻤﻊ ﺑﻴﺒﻴﺘﻲ ﺗﮕﻠﻠﻬﻪ ﻟﻴﺶ ﻣﺎﺧﻄﺒﺘﻲ ﺳﻤﻴﺔ ﺍﻟﻪ ﻫﻮ ﺟﺎﻥ ﺭﺍﻳﺪﻫﺎ .
ﺍﺷﻮﺍﻕ .. ﺧﺘﻮﻟﻲ ﻫﺎﻱ ﺳﻌﻴﺪ ﻣﺎﻗﺒﻞ ﺑﻴﻬﺎ .
ﺑﻴﺒﻲ .. ﻟﻴﺶ ﻳﻤﻪ ﻣﻮ ﺑﻨﺖ ﺍﺧﻮﺝ ﺷﻨﺎﻗﺼﻬﺎ؟
ﺍﺷﻮﺍﻕ .. ﻳﻤﻪ ﻣﺎﺗﺮﻫﻢ ﺍﻟﻨﻪ ﻫﺎﻱ ﺍﺣﻨﻪ ﻭﻳﻦ ﻭﻫﺎﻱ ﻭﻳﻦ ﺳﻤﻌﺔ ﺍﻣﻬﺎ ﺑﺎﻟﻄﻴﻦ ﻻﺗﺄﺛﺮ ﻋﻠﻴﻨﻪ .
ﻋﻔﺘﻬﻢ ﻭﺩﺧﻠﺖ ﻟﻠﻐﺮﻓﺔ ﻛﻌﺪﺕ ﻋﻠﻰ ﺍﻟﺠﺮﺑﺎﻳﺔ ﻣﺎﻟﺘﻲ ﺑﺪﻭﻥ ﺍﻱ ﺣﺮﻛﺔ .. ﻋﻴﻮﻧﻲ ﺟﻒ ﺑﻴﻬﺎ ﺍﻟﺪﻣﻊ ..
ﺩﺧﻠﺖ ﺑﻴﺒﻴﺘﻲ ﻭﻛﻔﺖ ﻳﻢ ﺍﻟﺒﺎﺏ ..
ﻛﺎﻟﺖ ﻣﻮ ﻛﺘﻠﺞ ﻣﻮ ﺣﺬﺭﺗﺞ ﻣﻨﻪ ﻟﻴﺶ ﻫﻴﺞ ﺳﻮﻳﺘﻲ ﺑﺮﻭﺣﺞ .
ﺩﻓﻨﺖ ﺭﻭﺣﻲ ﺑﺎﻟﻤﺨﺪﻩ ﻭﻣﺎﺟﺎﻭﺑﺘﻬﺎ .
ﻃﻠﻌﺖ ﻭﻛﻀﻴﺖ ﺍﻟﻠﻴﻞ ﻭﺣﺪﻱ
ﻭﺍﻟﻠﻮﻡ ﻧﻔﺴﻲ ﻭﺍﻋﺎﺗﺒﻪ
ﺍﺣﺘﺎﺭﻳﺖ ﺷﻨﻮ ﺍﺳﻮﻱ ﺑﺮﻭﺣﻲ
ﻛﻌﺪﺕ ﻛﺼﻴﺖ ﺷﻌﺮﻱ ..
ﻃﻠﻌﺖ ﺍﻟﺪﺑﺪﻭﺏ ﺍﻟﺠﺎﺑﻪ ﻛﺼﺼﺘﻪ ﺗﻜﺼﺺ .
ﻭﺷﻤﺮﺗﻪ ﺑﺎﻟﺰﺑﺎﻟﺔ ..
ﺑﻘﻰ ﺑﺲ ﺍﺳﻤﻪ ﻇﻠﺖ ﺍﻋﻮﺝ ﺑﻲ ﺑﻴﺪﻱ ﻟﺤﺪ ﻣﺎﺗﺰﻟﻐﺖ ﻭﺍﻧﺠﺮﺣﺖ ..
ﺍﻻﻛﺜﺮ ﻣﻦ ﻫﺬﺍ ﻇﻞ ﺿﻤﻴﺮﻱ ﻳﺄﻧﺒﻨﻲ ﻳﻤﻜﻦ ﻟﻮ ﻣﺘﺼﻠﺔ ﺑﻲ ﺧﻼﻝ ﻫﺎﻻﻳﺎﻡ ﻣﺎﺟﺎﻥ ﺧﻄﺐ ﺟﺎﻥ ﻋﺬﺭﻧﻲ ﺑﺲ ﺍﻧﻪ ﺧﺴﺮﺗﻪ ..
ﻻ ﻟﻴﺶ ﻣﺎﺍﻧﺘﻈﺮﻧﻲ ﻟﻮ ﻳﺤﺒﻨﻲ ﻳﺴﻮﻱ ﺍﻟﻤﺴﺘﺤﻴﻞ ﺣﺘﻰ ﻳﺠﻲ ﻳﺮﺿﻴﻨﻲ ﻭﻣﺎﻳﻬﻤﻪ ﻛﺮﺍﻣﺘﻪ ﻭﻛﺒﺮﻳﺎﺋﻪ
ﻟﻌﺪ ﻟﻴﺶ ﺍﻧﺎ ﺍﻫﺘﻢ ..
ﻟﻴﺶ ﺻﺮﺕ ﺍﻧﺎﻧﻴﺔ ﻭﻳﺎ ﻭﻣﻐﺮﻭﺭﺓ .. ﻳﺎﺭﺑﻲ ﺍﺣﺲ ﺗﺨﺒﻠﺖ
ﺻﺪﺍﻉ ﻣﻮﺗﻨﻲ ﺍﻳﺪﻱ ﺗﺠﺮﻱ ﺩﻡ .
ﻟﻠﻔﺠﺮ ﺍﻧﺎ ﺍﺑﺠﻲ ﻭﺣﻴﺪﺓ ..
ﺻﺎﺭ ﺍﻟﺼﺒﺢ ﻭﺍﻟﻜﻞ ﻛﻌﺪ ﻭﺍﻧﺎ ﺍﺣﺲ ﺍﻟﺤﻴﺎﺓ ﻧﻔﺴﻲ ﻣﻴﺘﻪ ﻭﺍﻟﺤﻴﺎﺓ ﻣﺪﻓﻮﻧﻪ ﺑﻴﻪ ﻭﻧﺎﻳﻤﻪ ﻣﻮ ﺭﺍﺿﻴﺔ ﺗﮕﻌﺪ ..
ﺑﻌﺪ ﺻﺮﺍﻉ ﻃﻮﻳﻠﻞ ﻭﻳﺎ ﺭﻭﺣﻲ ﻭﺍﻟﻤﻲ ﻭﺑﺪﻭﻥ ﺭﺣﻤﺔ ﺍﻭ ﺭﺃﻓﺔ
ﺍﺧﺮ ﺷﻲ ﻗﺮﺭﺕ ﺍﺭﻭﺡ ﻟﻠﺤﻔﻠﺔ ﻭﺑﺪﻳﺖ ﺍﺣﻀﺮ ﺍﻟﻬﺎ .
ﻗﺮﺭﺕ ﺍﺭﻭﺡ ﻷﻣﻲ ﻟﻠﺼﺎﻟﻮﻥ ﻣﺎﻟﺘﻬﺎ
ﺑﻴﻮﻡ ﺍﻟﺤﻔﻠﺔ ﻓﺎﻃﻤﺔ ﺷﻮﻳﺔ ﻣﻌﻘﺪﺓ ﻭﻣﺎﺗﺤﺐ ﺍﻻﺟﻮﺍﺀ ﺍﻟﺤﻔﻼﺕ ﻭﺍﻻﻋﺮﺍﺱ ﻓﺘﺤﺠﺠﺖ . ﺑﺎﻟﺤﻤﻞ ﻣﺘﻌﺒﻬﺎ
ﻃﻠﻌﺖ ﻣﻦ ﺍﻟﺒﻴﺖ ﺍﻟﻈﻬﺮ ﻭﺗﻮﺟﻬﺖ ﻟﺼﺎﻟﻮﻥ ﺍﻣﻲ .
ﺩﺧﻠﺖ ﻭﺳﻠﻤﺖ ﻋﻠﻴﻬﺎ ..
ﺗﻤﻨﻴﺘﻬﺎ ﺗﺤﺲ ﺑﻴﻪ ﺗﻤﻨﻴﺖ ﺍﺷﻜﻴﻠﻬﺎ
ﺑﺲ ﻣﺎﺍﺷﻮﻑ ﻋﺪﻫﺎ ﺍﻫﺘﻤﺎﻡ ﺳﻮﺍ ﺑﻨﻔﺴﻬﺎ .
ﺗﻤﻨﻴﺘﻬﺎ ﻣﺜﻞ ﺑﺎﻗﻲ ﺍﻻﻣﻬﺎﺕ ﺗﻬﺘﻢ ﺍﻟﻨﺎ ﺗﻔﻜﺮ ﺑﻴﻨﺎ
ﺍﺷﻮ ﻧﺎﺳﻴﺘﻨﺎ
ﮔﺘﻠﻬﺎ ﻭﻳﻨﺞ ﺍﺷﻮ ﻣﺎﻛﻮ؟
ﺍﻣﺎﻟﻴﺪ .. ﻭﻟﺞ ﺟﻨﺖ ﻣﺴﺎﻓﺮﺓ ﻭﺭﺣﺖ ﺟﺒﺖ ﺑﻀﺎﻋﺔ ﻭﺍﺟﻴﺖ .
.. ﺍﺭﻳﺪ ﻓﺴﺎﺗﻴﻦ ﺣﻠﻮﺓ .
.. ﺍﻟﻤﺤﻞ ﻛﻠﻪ ﻛﺪﺍﻣﺞ ﺑﻨﻴﺘﻲ ..
ﺍﺧﺬﺗﻨﻲ ﻟﻘﺴﻢ ﺍﻟﻔﺴﺎﺗﻴﻦ .. ﺳﺤﺒﺖ ﻓﺴﺘﺎﻥ
ﺍﺳﻮﺩ ﻓﺨﻢ ﻭﺑﻲ ﻭﺭﻭﺩ ﺣﻤﺮ ﺗﺄﻣﻠﺘﻪ ..
ﻛﺘﻠﻬﺎ ﻣﺎﺭﺭﻳﺪﻩ ﻭﺑﺪﺍﺧﻠﻲ ﺍﻛﻮﻝ ﺧﺎﻑ ﻳﺸﻮﻓﻨﻲ ﺑﺎﻻﺳﻮﺩ ﻭﻳﻜﻮﻝ ﺣﺰﻳﻨﺔ ..
ﻛﺎﻟﺖ ﻣﺎﻻﺯﻡ .. ﻫﺴﻪ ﺍﻃﻠﻌﻠﺞ ﺍﺣﻠﻰ ﺍﻟﻔﺴﺎﺗﻴﻦ .
ﻃﻠﻌﺘﻲ ﻓﺴﺘﺎﻥ ﺍﺣﻤﺮ .. ﻛﻠﺖ ﺍﻻﺣﻤﺮ ﻳﻌﻨﻲ ﺣﺐ ﺧﺎﻑ ﻳﻜﻮﻝ ﺑﻌﺪﻧﻲ ﺍﺣﺒﻪ .
ﻫﻢ ﻣﺎﺭﺩﺗﻪ .. ﮔﺘﻠﻪ ﻏﻴﺮﻩ ..
ﻃﻠﻌﺘﻠﻲ ﻭﺍﺣﺪ ﺍﺻﻔﺮ .. ﻭﺍﻻﺻﻔﺮ ﻳﺪﻝ ﻋﻠﻰ ﺍﻟﻐﻴﺮﺓ ﺧﺎﻑ ﻳﻜﻮﻝ ﻏﻴﺮﺍﻧﺔ ..
ﺣﻴﺮﺕ ﺍﻣﻲ ﻭﻳﺎﻱ ..
ﺍﺧﺮ ﺷﻲ ﻋﺠﺒﻨﻲ ﻓﺴﺘﺎﻥ ﻭﺭﺩﻱ ﻟﻮﻧﻪ ﺣﻠﻮ ﻭﺣﻴﻮﻱ
ﻣﺸﺘﻐﻠﻲ ﺑﺎﻟﺪﺍﻧﺘﻴﻞ ﻭﺍﻟﻜﺮﺳﺘﺎﻝ ﺍﻟﻔﻀﻲ ﻣﻦ ﻓﻮﮒ ﻭﺟﻮﻩ ﺳﺎﺩﺓ ﻭﺑﻲ ﻓﺘﺤﺔ ﻣﻦ ﺍﻟﻮﺳﻂ ﻟﺤﺪ ﺍﻟﺮﻛﺒﺔ ..
ﮔﺘﻠﻬﺎ ﻫﺬﺍ ﻫﻮ ﺍﺭﻳﺪﻩ .. ﺍﺧﺬﺗﻪ .. ﻭﻛﻌﺪﺕ
ﻓﺘﺤﺖ ﺷﻌﺮﻱ ﺭﺗﺒﺘﻪ ﺍﻟﻲ ﻻﻥ ﺧﺮﺑﺘﻪ ﻛﻠﺶ ..
ﺳﻮﺗﻪ ﺍﻟﻲ ﻛﺎﺭﻳﻪ ..
ﻭﺻﻠﻨﺎ ﻟﻠﻤﻜﻴﺎﺝ ﻛﺎﻟﺖ ﺍﺧﺘﺎﺭﻱ ﺷﻨﻮ ﺗﺮﺩﻳﻦ ﺍﺧﻠﻴﻠﺞ .
ﺑﮕﻠﺒﻲ ﮔﻠﺖ ﺍﺭﻳﺪ ﻛﺤﻠﺔ ﺗﻤﻨﻊ ﻋﻴﻨﻲ ﻣﻦ ﺍﻟﺒﺠﻲ
ﻭﺣﻤﺮﺓ ﺗﺨﻠﻴﻨﻲ ﻣﺒﺘﺴﻤﺔ ..
ﺍﺭﻳﺪ ﺑﺪﻝ ﻫﺬﺍ ﻛﻠﻪ ﺷﻲ ﻳﻘﻮﻱ ﮔﻠﺒﻲ
ﺍﺗﻮﺳﻞ ﺑﺎﻟﺪﻣﻊ ﺗﻮﺳﻞ ﺑﺲ ﻻﺗﻨﺰﻝ ﻭﺗﻔﺸﻠﻨﻲ ..
ﺍﺧﺘﺎﺭﻳﺖ ﻣﻜﻴﺎﺝ ﺧﻔﻴﻒ ..
ﻣﻜﻴﺠﺘﻨﻲ .. ﺍﺧﺬﺕ ﺍﻟﻔﺴﺘﺎﻥ ﻭﺭﺟﻌﺖ ﻟﻠﺒﻴﺖ . ﺩﺧﻠﺖ ﻟﻠﻐﺮﻓﺔ ﻟﺒﺴﺖ ﺍﻟﻔﺴﺘﺎﻥ ﻭﻃﻠﻌﺖ ﻛﻌﺪﺕ ﺑﺎﻟﻬﻮﻝ . ﺍﻧﺘﻈﺮ ﺍﺑﻮﻱ ﻳﻮﺩﻳﻨﻲ ..
ﺻﺎﺭﺕ ﺑﺎﻻﺭﺑﻌﺔ ﻳﻠﻠﻪ ﺍﺟﻪ ﻭﻋﻠﻤﺎ ﺳﺒﺢ ﻭﺑﺪﻝ
ﻳﻠﻠﻪ ﻃﻠﻌﻨﻪ ﻭﺻﻠﻨﻪ ﻟﻠﻘﺎﻋﺔ ..
ﺩﺧﻠﺖ ﺭﺃﺳﺎ ﻟﻠﺤﻤﺎﻡ ..
ﻃﻠﻌﺖ ﻣﻜﻴﺎﺝ ﻣﻦ ﺟﻨﻄﺘﻲ ﻃﻮﺧﺖ ﺍﻟﺤﻤﺮﺓ ﺳﻮﻳﺘﻬﺎ ﻭﺭﺩﻱ ﺻﺎﺭﺥ ..
ﻧﺰﻋﺖ ﺍﻟﺒﺸﺖ ﻭﺧﻠﻴﺖ ﺷﺎﻝ ﻋﻠﻰ ﺍﻛﺘﺎﻓﻲ ﺍﻟﻔﺴﺘﺎﻥ ﺑﻼ ﺍﻛﻤﺎﻡ ..
ﻋﺪﻟﺖ ﺷﻌﺮﻱ ﻟﺰﻣﺖ ﻗﻠﺒﻲ ﻭﻧﺎﺩﻳﺖ ﻳﺎﺭﺑﻲ ﻗﻮﻳﻨﻲ ..
ﻃﻠﻌﺖ ﻣﻦ ﺍﻟﺤﻤﺎﻡ ﻭﺩﺧﻠﺖ ﻟﻠﻘﺎﻋﺔ ..
ﻭﺍﺣﺲ ﺍﻻﻧﻈﺎﺭ ﻛﻠﻬﺎ ﺻﺎﺭﺕ ﻋﻠﻴﻪ ..
ﻳﺘﺒﻊ
السلام عليكم ورحمة الله وبركاته ، موقع روايات-Novels يهتم بنشر جديد الروايات للكتاب العراقين ، حمل تطبيقنا على جوجل بلاي وستمتع بلقراءة ، تمنياتنا لكم بلتوفيق