رواية لم تكن خطيئتنا ج1 الجزء الأول

رواية لم تكن خطيئتنا ج1 الجزء الأول


رواية لم تكن خطيئتنا ج1 الجزء الأول 

للكاتبة نور ناصر 
. 
ﻣﻦ ﺳﻨﺘﻴﻦ ﺗﺮﻛﺖ ﻭﺿﻴﻔﺘﻲ .. ﻛﺸﺮﻃﻲ ﻣﺮﻭﺭ .. ﻭﺍﺗﺨﺬﺕ ﻣﻦ ﺍﻟﺴﻴﺎﺭﺓ ﻫﺬﻩ ﻣﺼﺪﺭ ﺭﺯﻗﻲ .. ﺍﻣﺘﻬﻨﺖ ﻣﻬﻨﺔ ﺳﺎﻳﻖ ﺗﻜﺴﻲ ..
ﻳﻤﻜﻦ ﺟﺎﻧﺖ ﺳﺎﻋﺔ ﻋﺼﺒﻴﻪ ﻻ ﺑﻞ ﻣﻦ ﺍﻟﻤﻤﻜﻦ ﺍﻥ ﺍﻋﺘﺒﺮﻫﺎ ﻟﺤﻈﺔ ﻏﺒﺎﺀ
ﺻﺢ ﺷﻐﻞ ﺍﻟﻤﺮﻭﺭ ﻣﺘﻌﺐ ﺑﺲ ﻋﻠﻰ ﺍﻻﻗﻞ .. ﺭﺍﺗﺐ ﻧﻬﺎﻳﺔ ﻛﻞ ﺷﻬﺮ ﻭﻋﻨﺪﻱ ﻋﻄﻠﺔ ﺑﺎﻻﺳﺒﻮﻉ ..
ﻓﻜﺮﺕ .. ﺧﺎﻑ ﺍﻣﻮﺕ ﻭﺃﻣﺎﻟﻴﺪ ﺗﺎﺧﺬ ﺭﺍﺗﺒﻲ ﻣﺎﺍﺭﻳﺪﻫﺎ ﺗﺘﻤﺘﻊ ﺑﻲ ﻣﻦ ﺑﻌﺪﻱ .. ﻣﺎﺍﺭﻳﺪ ﻫﺎﻟﺸﻲ ﻳﺼﻴﺮ .
ﻭﺣﺘﻰ ﺣﺼﺘﻲ ﻣﻦ ﺍﻟﺒﻴﺖ ﺭﺍﺡ ﺍﺗﻨﺎﺯﻝ ﻋﻨﻬﺎ ﻻﻣﻲ
ﺧﺎﻑ ﺗﺤﻀﻰ ﺑﻴﻬﺎﺍ .. ﺍﻣﻲ ﻣﺎﺗﻈﻠﻢ ﺑﻨﺎﺗﻲ ﺍﺑﺪ ..
ﻭﺍﻧﻲ ﺍﺟﻮﻝ ﺑﺸﻮﺍﺭﻉ ﺍﻟﺒﺼﺮﺓ .. ﺑﺤﺜﺎ ﻋﻦ ﺍﻟﺮﺯﻕ ..
ﺍﻟﻈﻬﺮ ﻭﺍﻟﺠﻮ ﺣﺎﺭ .. ﻭﺍﻟﺘﺒﺮﻳﺪ ﻋﻄﻼﻥ ﻣﺎﺍﺩﺭﻱ ﺷﺒﻲ
ﻓﻜﺮﺕ ﺑﻌﺪﻳﻦ ﺍﺧﺬ ﺍﻟﺴﻴﺎﺭﻩ ﻟﻠﺼﻨﺎﻋﻴﻪ .
ﻭﺍﺻﻠﺢ ﺍﻟﺘﺒﺮﻳﺪ ..
ﺭﻛﻨﺘﻬﺎ ﻋﻠﻰ ﺻﻔﺤﻪ .. ﺳﺤﺒﺖ ﺍﻟﺨﺎﻭﻟﻲ ﺍﻟﻲ ﻧﺸﻒ ﻣﻦ ﺍﻟﺤﺮ .. ﻧﺰﻟﺖ ﻣﻦ ﺍﻟﺴﻴﺎﺭﻩ ..
ﻭﺑﻴﺪﻱ ﺍﻟﺨﺎﻭﻟﻲ .. ﻭﺻﻠﺖ ﻟﻠﺼﻨﺪﻭﻕ ﻣﺎﻝ ﺍﻟﺴﻴﺎﺭﻩ ﻃﻠﻌﺖ ﻣﻨﻪ ﺗﺮﻣﺰ ﺍﻟﻤﺎﻱ .. ﻭﺳﺪﻳﺘﻪ .. ﺧﻠﻴﺘﻪ ﻋﻠﻰ ﻣﺆﺧﺮﺓ ﺍﻟﺴﻴﺎﺭﻩ ﻭﻓﺘﺤﺖ ﺍﻟﻤﺎﻱ ﻭﺑﺪﻳﺖ ﺍﺑﻠﻞ ﺍﻟﺨﺎﻭﻟﻲ
ﺑﺎﻟﻤﺎﻱ ﺍﻟﺒﺎﺭﺩ .. ﺍﻟﻲ ﺳﻮﺗﻪ ﺍﻟﻲ ﺭﻗﻴﻪ .. ﺍﺑﻠﻠﻪ ﻭﺍﺗﺬﻛﺮﻫﺎ ﻛﻞ ﻳﻮﻡ ﻗﺒﻞ ﻻﺍﻃﻠﻊ ﻟﻠﺸﻐﻞ ﺑﺎﻟﺴﻴﺎﺭﻩ ﻣﻦ ﺍﻟﺼﺒﺢ .. ﺍﺷﻮﻓﻬﺎ ﻛﺒﺎﻟﻲ ﻭﺍﺑﺘﺴﺎﻣﺔ ﺑﺮﻳﺌﺔ ﻣﺮﺳﻮﻣﺔ ﻋﻠﻰ ﻭﺟﻬﻬﺎ ..
ﻭﺑﻴﺪﻫﺎ ﺍﻟﺘﺮﻣﺰ ﺗﺎﺭﺳﺘﻪ ﻣﺎﻱ ﻭﺛﻠﺞ .. ﺍﺑﻮﺳﻬﺎ ﻋﻠﻰ ﺭﺍﺳﻬﺎﺍ ﻭﺍﻃﻠﻊ ..
ﺗﺬﻛﺮﺗﻬﺎ ﻭﺿﺤﻜﺖ .. ﺍﻧﺮﺳﻤﺖ ﻛﺒﺎﻟﻲ ﻣﻼﻣﺤﻬﺎ ﻭﻫﻲ ﻣﺒﺘﺴﻤﺔ ..
ﺑﻠﻠﺖ ﺍﻟﺨﺎﻭﻟﻲ ﻭﺧﻠﺼﺖ .. ﺷﺮﺑﺖ ﻣﺎﻱ ﺑﺎﺭﺩ .. ﺭﺟﻌﺖ ﺍﻟﺘﺮﻣﺰ ﻟﻤﻜﺎﻧﻪ ..
ﻭﺭﺟﻌﺖ ﺻﻌﺪﺕ ﺑﺎﻟﺴﻴﺎﺭﻩ .. ﺧﻠﻴﺖ ﺍﻟﺨﺎﻭﻟﻲ ﻋﻠﻰ ﺭﺍﺳﻲ ﺣﺘﻰ ﺍﺣﺲ ﺑﺎﻟﺒﺮﻭﺩﺓ ﺷﻮﻳﻪ ﻭﻟﻮ ﻟﻔﺘﺮﻩ ﻗﺼﻴﺮﻩ ﻋﻠﻰ ﺍﻻﻗﻞ ...
ﺳﻘﺖ ﺍﻟﺴﻴﺎﺭﻩ . .. ﻭﻇﻠﻴﺖ ﺍﺩﻭﺭ ﻋﻠﻰ ﺭﺯﻗﻲ ..
ﻭﺍﻓﻜﺮ ﺑﺒﻨﺎﺗﻲ ..
ﺍﺗﻤﻨﻰ ﺗﺠﻴﻬﻦ ﻗﺴﻤﻪ ﻭﺍﻃﻠﻌﻬﻦ .. ﺍﻻﺛﻨﻴﻦ ﺍﻟﻜﺒﺎﺭ ﻳﻤﺸﻦ
ﺑﺲ ﺭﻗﻴﻪ ﺷﻠﻮﻥ؟ ﻭﻣﻨﻮ ﻳﺘﺰﻭﺟﻬﺎ؟ .. ﻭﻫﻲ ﺑﻬﺬﻩ ﺣﺎﻟﺘﻬﺎﺍ ..
ﺍﻟﻪ ﺍﺷﻮﻓﻠﻲ ﻭﺍﺣﺪ ﻣﻦ ﻭﻟﺪ ﺍﺧﻮﺍﻧﻲ ﻟﻮ ﺧﻮﺍﺗﻲ .. ﺣﺘﻰ ﻟﻮ ﻣﺘﺰﻭﺝ .. ﻳﻜﻮﻟﻮﻥ ﺍﺧﻄﺐ ﻟﺒﻨﺘﻚ ﻗﺒﻞ ﺍﺑﻨﻚ ..
ﻭﺍﻧﺎ ﻣﺎﻋﻨﺪﻱ ﻭﻟﺪ .. ﺍﺭﻳﺪ ﺍﺯﻭﺟﻬﻦ ﻭﺍﻫﺎﺟﺮ ﻣﻨﺎ
ﻭﺍﻣﻲ ﺷﻠﻮﻥ؟ ﺍﻣﻲ ﻳﺎﺧﺬﻫﺎ ﻭﺍﺣﺪ ﻣﻦ ﺍﺧﻮﺍﻧﻲ ﺍﻭ ﺍﺧﺘﻲ ﺯﻳﻦ ﻭﺍﺫﺍ ﻫﺎﺟﺮﺕ ﻭﻫﻦ ﻣﺎﺍﺭﺗﺎﺣﻦ ﻭﻳﺎ ﺍﺯﻭﺍﺟﻬﻦ؟
ﻫﻢ ﺍﻟﺒﻨﺎﺕ ﻟﻠﻤﻤﺎﺕ ﻣﺎﺟﺬﺑﻮﺍ ﻣﻦ ﻛﺎﻟﻮﻫﺎﺍﺍ ..
ﻗﻄﻊ ﺳﻠﺴﻠﺔ ﺍﻓﻜﺎﺭﻱ .. ﺭﺟﺎﻝ ﻛﺒﻴﺮ ﺑﺎﻟﻌﻤﺮ ﻻﺑﺲ ﺩﺷﺪﺍﺷﺔ ﺑﻴﻀﻪ ﻭﻏﺘﺮﻩ .. ﺍﺷﺮﻟﻲ .. ﻭﻛﻔﺖ ﺍﻟﺴﻴﺎﺭﻩ .. ﻣﺪﻳﺖ ﺭﺍﺳﻲ ﻣﻦ ﺟﺎﻣﺔ ﺍﻟﺴﻴﺎﺭﻩ
ﮔﺘﻠﻪ .. ﻫﺎﺍ ﻋﻤﻲ ﻭﻳﻦ ﺗﻮﺻﻞ؟ ؟
.. ﻛﺎﻝ .. ﻟﻠﺪﻳﺮ
.. ﻓﻜﺮﺕ ﺷﻮﻳﻪ ﺍﻟﺪﻳﺮ ﺑﻌﻴﺪﻩ .. ﻛﺘﻠﻪ ﻳﻼ ﻋﻤﻲ ﺍﺻﻌﺪ
ﺭﺯﻕ ﻭﺟﺎﻳﻨﻲ ..
ﺻﺎﺡ ﻣﺮﻩ ﻛﺒﻴﺮﻩ ﻛﺎﻋﺪﻩ ﻉ ﺍﻻﺭﺽ ﻭﻓﺘﺢ ﺍﻟﻬﺎ ﺍﻟﺒﺎﺏ ﺑﺨﻤﻮﻝ ﻭﺍﻳﺪ ﻣﺘﻌﺒﻪ ﻋﻠﻴﻬﺎ ﺗﺠﺎﻋﻴﺪ ﺳﻨﻴﻦ ﻣﺮﺳﻮﻣﻪ ﺑﺎﻟﻢ ﺻﻌﺪﺕ ﺍﻟﻤﺮﻳﻪ ﻭﻫﻲ ﺗﺘﻨﻬﺪ ﻣﻦ ﺍﻟﺘﻌﺐ .. ﺳﺪ ﺍﻟﺒﺎﺏ ﻭﺻﻌﺪ ﻳﻤﻲ ﺍﻟﺮﺟﺎﻝ ..
ﺍﻟﺮﺟﻞ ﺍﻟﻌﺠﻮﺯ .. ﺍﻟﻠﻪ ﺑﺎﻟﺨﻴﺮ ..
ﺃﻳﻮﺏ .. ﺍﻟﻠﻪ ﺑﺎﻟﺨﻴﺮ ﻋﻤﻲ ﺣﻴﺎﻙ .. ﺗﺮﻳﺪﻭﻥ ﻣﺎﻱ ﺧﺎﻑ ﻋﻄﺸﺎﻧﻴﻴﻦ .. ،؟
ﺍﻟﺮﺟﻞ ﺍﻟﻌﺠﻮﺯ .. ﻛﻠﻚ ﺧﻴﺮ ﻭﺑﺮﻛﻪ .. ﻋﺪﻧﻪ ﺑﻄﻞ ﻣﻲ ﺟﺒﻴﺮ .. ﺧﻠﺘﻪ ﺍﻟﻨﻪ ﺑﻨﺘﻲ ﻛﺎﻟﺖ ﺗﻌﻄﺸﻮﻥ ﺑﺎﻟﻄﺮﻳﻖ ..
ﺃﻳﻮﺏ .. ﻋﻠﻰ ﺑﺮﻛﺔ ﺍﻟﻠﻪ ..
ﺳﻘﺖ ﺍﻟﺴﻴﺎﺭﻩ .. ﻋﺮﻓﺖ ﻣﻦ ﺧﻼﻝ ﻛﻼﻣﻪ ﺍﻧﻪ ﺟﺎﻱ ﻳﺰﻭﺭ ﺑﻨﺘﻪ ﻫﻨﺎ .. ﻭﺻﻠﺘﻬﻢ ﺑﻌﺪ ﻃﻮﻭﻝ ﻃﺮﻳﻖ .. ﻭﻋﺪﺕ ﺍﺩﺭﺍﺟﻲ ﺭﺟﻌﺖ ﻟﺪﻳﺮﺗﻲ . . ﻭﺻﻠﺖ ﻟﺒﻴﺘﻨﺎ .. ﺩﺧﻠﺖ ﺍﻟﺴﻴﺎﺭﻩ ﺑﺎﻟﮕﺮﺍﺝ .. ﻭﺭﺣﺖ ﻟﻠﺒﻴﺖ .. ﻃﺒﻴﺖ ﻣﻦ ﺑﺎﺏ ﺍﻟﻤﻄﺒﺦ .. ﺷﻔﺖ ﺍﻣﻲ ﻛﺎﻋﺪﻩ ﻉ ﺍﻻﺭﺽ .. ﺗﺸﻠﻒ ﺭﮔﻲ ﻭﺗﺎﻛﻞ .. ﺭﻓﻌﺖ ﺭﺍﺳﻬﺎ ﺷﺎﻓﺘﻨﻲ .. ﮔﺎﻟﺖ .. ﻫﺎﺍ ﻳﻤﻪ ﺍﺟﻴﺖ؟
.. ﻻ ﻳﻤﻪ ﺑﻌﺪﻧﻲ ﻓﺪ ﺷﻮﻳﻪ ..
.. ﻫﺎﺍ ﺧﻮﺵ ﺟﺎ ﻟﻮ ﺟﻴﺖ ﺟﻴﺐ ﻭﻳﺎﻙ ﺧﻀﺮﻩ ..
.. ﻫﻬﻬﻬﻬﻪ ﺿﺤﻜﻨﺎ ﻭﺍﺣﺪ ﻳﺤﺸﺶ ﻉ ﺛﺎﻧﻲ ..
... ﻫﺎﺍ ﻳﻤﻪ ﺍﻟﻠﻪ ﻳﺴﺎﻋﺪﻙ
... ﻭﻳﺴﺎﻋﺪ ﺑﺨﺘﺞ ..
ﺭﺣﺖ ﻏﺴﻠﺖ ﺍﻳﺪﻳﻨﻲ ﺑﺎﻟﺴﻨﮓ .. ﻭﻛﻌﺪﺕ ﻳﻤﻬﺎ
ﺗﻨﺎﻭﺷﺘﻠﻲ ﺷﻠﻒ ﻭﻇﻠﻴﺖ ﺍﻛﻞ ..
.. ﺳﻮﺩﻩ ﻋﻠﻴﻪ ﻳﻤﻪ ﺟﻮﻋﺎﻥ .. ﺍﺻﻴﺢ ﻟﻠﺒﻨﺎﺕ ﻳﺼﺒﻠﻚ ﻏﺪﺍ
.. ﺷﻮ ﻣﺎﻛﻮ ﻭﻻ ﻭﺣﺪﻩ ﻣﻨﻬﻦ ﺷﻌﺠﺐ؟
.. ﺗﻼﻛﻴﻬﻦ ﺑﺎﻟﻐﺮﻓﻪ ﺍﻟﻔﻮﻙ ..
.. ﺍﻟﻐﺮﻓﻪ ﺍﻟﻔﻮﻙ ﺣﺎﺭﻩ ﺷﻌﺠﺐ ﻛﺎﻋﺪﺍﺕ ﺑﻴﻬﺎ ..
.. ﻣﺎﺍﺩﺭﻱ ﻳﻴﻤﻪ ﺻﻴﺤﻠﻬﻦ
. 
ﺻﺤﺖ ﺭﻗﻴﺔ، ﺭﻗﻴﻪ ..
ﺍﻣﻲ .. ﻳﻠﻠﻪ ﺑﻠﻠﻪ ﻣﺎﺗﺼﻴﺢ ﺍﻟﻪ ﻟﺮﻗﻴﺔ ﻣﻨﻴﻦ ﺗﺴﻤﻌﻚ ..
ﺃﻳﻮﺏ .. ﻫﻢ ﺻﺪﮔﺘﻲ ﻳﻤﻪ ﺑﺲ ﺷﺴﻮﻱ ﻫﺎﻟﺒﻨﻴﻪ ﺩﻭﻡ ﻟﺴﺎﻧﻲ ﻳﻠﻬﺞ ﺑﺎﺳﻤﻬﺎ ..
.. ﺍﻱ ﺍﺩﺭﻱ ﺑﻴﻚ ﺗﻌﺰﻫﺎ ﺍﻛﺜﺮ ﻭﺣﺪﻩ ﻭﺍﻟﻠﻪ ﺍﻧﻪ ﻫﻢ ﻣﻜﺴﻮﺭ ﮔﻠﺒﻲ ﻋﻠﻴﻬﺎ ﻣﻦ ﻳﻮﻡ ﺍﻟﺼﺎﺭﺕ ﻟﻬﺴﻪ ..
.. ﺍﻟﻠﻪ ﻛﺮﻳﻢ ﻳﻤﻪ .. ﺍﻛﻮﻝ ﺻﻔﺎ ﻭﺳﻤﻴﺔ ﺳﻤﻌﻮﺍ ﺻﻮﺗﻲ ﺷﻮ ﻣﺎﺍﺟﻦ .. ؟
.. ﻳﻤﻪ ﺧﺎﻑ ﻧﺎﻳﻤﺎﺕ .. ؟
.. ﺑﻬﺎﻟﺤﺮ ﻳﻨﺎﻣﻦ ﻭﻫﺴﻪ ﺍﻟﺴﺎﻋﻪ ﺏ 4 ﺍﻟﻌﺼﺮ .. ﻣﻮ ﻣﻦ ﻋﻮﺍﻳﺪﻫﻦ .. ﺍﻛﻮﻡ ﺍﺷﻮﻓﻬﻦ ﻭﻳﻦ ..
.. ﺍﻱ ﻳﻤﻪ ﻛﻮﻡ ..
.. ﻃﻠﻌﺖ ﻣﻦ ﺍﻟﻤﻄﺒﺦ ﻭﺗﻮﺟﻬﺖ ﻟﻠﻐﺮﻓﻪ ﺍﻟﺠﻮﻩ .. ﻓﺘﺤﺘﻬﺎ ﻣﺎﻛﻮ ﺍﺣﺪ ﺑﻴﻬﺎ ﺗﺼﻔﺮ .. ﺍﺳﺘﻐﺮﺑﺖ ﻭﻳﻦ ﺭﺍﺣﻦ ﻳﻮﻣﻴﻪ ﻣﺎﻟﻴﺎﺕ ﺍﻟﺒﻴﺖ .. ﺑﺼﻴﺎﺣﻬﻦ ﻭﻋﺮﻛﺘﻬﻦ ﺍﺳﻤﻌﻬﺎ ﻣﻦ ﺍﺩﺧﻞ ﺍﻟﺴﻴﺎﺭﻩ ﻟﻠﻜﺮﺍﺝ ﻭﻣﻦ ﺍﺩﺧﻞ ﻳﺴﻜﺘﻦ ..
ﺍﻟﻴﻮﻡ ﺳﻨﻄﻪ .
ﻃﻠﻌﺖ ﻣﻦ ﺍﻟﻐﺮﻓﻪ .. ﻭﻛﻔﺖ ﻳﻢ ﺍﻟﺪﺭﺝ .. ﻭﻇﻠﻴﺖ ﺍﺻﻴﺢ
ﺻﻔﺎ ﺳﻤﻴﻪ ﻭﻳﻨﺠﻦ ..
ﻭﻻﺟﻨﻪ ﺍﺻﻴﺢ ﻭﻻﺍﻛﻮ ﺻﻮﺕ ﺍﻟﻬﻦ ..
ﺗﻨﻬﺪﺕ ﻭﺯﺍﺩ ﺍﺳﺘﻐﺮﺍﺑﻲ .. ﺍﻟﻮﺿﻊ ﻣﺜﻴﺮ ﻟﻠﺸﻚ ..
ﺭﻏﻢ ﺗﻌﺒﻲ ﻭﺷﻌﻮﺭﻱ ﺑﺎﻻﻋﻴﺎﺀ .. ﺷﻜﻠﺖ ﺍﻟﺪﺷﺪﺍﺷﻪ ﻭﺻﻌﺪﺕ ﻓﻮﻙ .. ﻭﺍﻧﻲ ﺍﺻﻴﺢ ﺑﺄﺳﻤﺎﺀ ﺑﻨﺎﺗﻲ ..
ﺻﻔﺎ، ﺳﻤﻴﻪ ..
ﻭﺻﻠﺖ ﻟﻠﻐﺮﻑ ﺍﻟﻔﻮﻙ ﻭﻋﺪﺩﻫﻦ 3 .. ﺑﺲ ﻛﻠﻬﻦ ﻣﻮ ﺻﺎﻟﺤﺎﺕ ﻟﻠﻌﻴﺶ .. ﻻﻥ ﻫﺬﺍ ﺑﻴﺖ ﺍﻟﻌﺎﺋﻠﻪ ﻭﻗﺪﻳﻢ ﻛﻠﺶ ..
ﻓﺘﺤﺖ ﺍﻟﻐﺮﻑ ﻭﺣﺪﻩ ﻭﺣﺪﻩ ﻣﺎﻛﻮ ﺍﻟﻬﻦ ﺍﺛﺮ ..
ﺯﺍﺩ ﺍﺳﺘﻬﺠﺎﻧﻲ ﻭﺍﺳﺘﻐﺮﺍﺑﻲ .. ﻭﻳﻦ ﺭﺍﺣﻦ ﻳﺎﺗﺮﻯ؟
ﻻﺃﻛﻮﻝ ﻭﻛﺖ ﻣﺪﺭﺳﻪ ﻭﺭﺍﺣﻦ ﻟﻠﻤﺪﺭﺳﻪ .. ﺍﺷﻮ ﺑﻌﺪ ﺷﻬﺮ ﻳﻼ ﺗﺨﻠﺺ ﺍﻟﻌﻄﻠﻪ ﺍﻟﺼﻴﻔﻴﻪ ..
ﻭﻻ ﻣﺘﻌﻠﻤﺎﺕ ﻳﻄﻠﻌﻦ ﻳﺸﺘﺮﻥ ﻟﻮ ﻳﺮﺣﻦ ﻟﻤﻜﺎﻥ ..
ﺭﺟﻌﺖ ﻷﻣﻲ .. ﻟﮕﻴﺘﻬﺎ ﺑﻤﻜﺎﻧﻬﺎ ﺑﺎﻟﻤﻄﺒﺦ ..
ﺑﻌﺪﻫﻪ ﺗﺎﻛﻞ ﺭﮔﻲ .. ﺑﺎﻭﻋﺘﻠﻲ ﻛﺎﻟﺖ ﻫﺎ ﻭﻳﻨﻬﻦ
.. ﻣﺎﻛﻮ ﻣﻬﻨﻪ ...
.. ﺣﺘﻰ ﺑﺎﻟﻐﺮﻓﻪ ﺍﻟﻔﻮﻙ؟
.. ﺍﻱ ﺳﺄﻟﺘﻬﺎ .. . ﻳﻤﻪ ﺍﻧﺖ ﻭﻳﻦ ﺟﻨﺘﻲ ﮔﺒﻞ ﻻﺗﺠﻴﻦ ﻟﻠﻤﻄﺒﺦ .. ؟
.. ﺟﻨﺖ ﻧﺎﻳﻤﻪ ﺑﺎﻟﻬﻮﻝ .. ﻛﻌﺪﺕ ﻭﺟﻴﺖ ﻟﻠﻤﻄﺒﺦ ﺷﺮﺑﺖ ﻣﺎﻱ ﻭﻛﻌﺪﺕ ﺍﻛﻞ ..
.. ﻣﺎﺍﺷﻔﺘﻴﻬﻦ ﻃﻠﻌﻦ ﻣﺎﺣﺴﻴﺘﻲ ﻣﺎﺳﻤﻌﺘﻲ ﺷﻲ ﻏﺮﻳﺐ ؟
.. ﻻﻳﻤﻪ ﻭﺍﻟﻠﻪ ﺟﻨﺖ ﻧﺎﻳﻤﻪ ..
ﻋﺼﺒﺖ ﻛﻠﺶ ﻭﺭﺣﺖ ﺍﺩﻭﺭ ﺑﺎﻟﺤﻤﺎﻡ ﻭﻭﺭﻩ ﺍﻟﺒﻴﺖ ﻉ ﺍﻟﺴﻄﺢ ﻣﺎﻛﻮ ﻓﺺ ﻣﻠﺢ ﻭﺫﺍﺏ ..
ﺭﺟﻌﺖ ﻳﻢ ﺍﻣﻲ .. ﺷﺎﻓﺘﻨﻲ ﻛﺎﻟﺖ .. ﺭﻭﺡ ﺷﻮﻓﻬﻦ ﺧﺎﻑ ﻳﻢ ﺑﻴﺖ ﺍﺧﻮﻙ ﺍﻟﻤﺮﺣﻮﻡ ..
.. ﻫﻦ ﻣﺘﻌﻮﺩﺍﺕ ﻳﺮﺣﻦ ﻫﻴﺞ ﻭﻛﺖ ﻳﻌﻨﻲ .. ؟
.. ﻻ ﻭﺍﻟﻠﻪ ﻳﻤﻪ ﻭﻻ ﻳﻄﻠﻌﻦ ..
.. ﻋﺠﻴﻴﻴﺐ ﻭﻳﻦ ﻭﻭﻟﻦ .. ﺑﺪﻳﺖ ﺍﻏﻠﻲ ..
ﺍﺭﻭﺡ ﻭﺍﺷﻮﻑ ﺍﻣﺮﻱ ﻟﻠﻪ ..
ﻃﻠﻌﺖ ﻣﻦ ﺍﻟﺒﻴﺖ ﻃﻜﺖ ﺍﻟﺸﻤﺲ ﺑﻴﻪ ﻭﻣﻨﺎ ﺍﻧﻪ ﻣﺸﺘﻌﻞ ﺷﻌﻞ .. ﻋﺎﺋﻠﺔ ﺑﻴﺖ ﺍﺧﻮﻱ ﺍﻟﻤﺮﺣﻮﻡ ﺑﺼﻔﻨﻪ ﻛﻠﺶ ..
ﺩﻛﻴﺖ ﺍﻟﺒﺎﺏ . ﺑﻘﻮﺓ . ﻣﺮﻩ ﺛﻨﻴﻦ ﻣﺤﺪ ﻃﻠﻊ .. ﺩﻓﺮﺗﻪ ﻭﭼﻔﺘﺖ ..
ﻭﺻﻠﺖ ﻟﻨﺺ ﺍﻟﺤﺪﻳﻘﻪ .. ﺍﻧﻔﺘﺤﺖ ﺍﻟﺒﺎﺏ ﺍﻟﺮﺋﻴﺴﻴﻪ ﻭﻃﻠﻊ ﻣﻨﻬﺎ ﺍﺳﻼﻡ ﺍﺑﻦ ﺍﺧﻮﻱ .. ﻻﺑﺲ ﻓﺎﻧﻴﻠﺔ ﺗﻌﻼﻛﺔ ﻭﺟﺎﻱ ﻳﻠﺒﺲ ﺑﺎﻟﻘﻤﻴﺺ .. ﻭﺷﻌﺮﻩ ﻣﺒﻌﺜﺮ ﻋﻠﻰ ﮔﺼﺘﻪ .. ﺷﺎﻓﻨﻲ
ﺍﺟﻪ ﺣﺎﻓﻲ ﻭﻳﻤﺸﻲ ﺳﺮﻳﻊ ..
ﺇﺳﻼﻡ . ﺑﻘﻠﻖ . ﻫﺎ ﻋﻤﻮ ﺧﻴﺮ ﺻﺎﻳﺮ ﺷﻲ .. ؟
ﺍﻳﻮﺏ .. ﺍﻟﺒﻨﺎﺕ ﻋﺪﻛﻢ؟
.. ﻳﺎ ﺑﻨﺎﺕ ﻋﻤﻮ؟
.. ﺑﻨﺎﺗﻲ ﺑﻌﺪ ﻣﻨﻮ؟
.. ﻫﺎ ﻭﺍﻟﻠﻪ ﻋﻤﻮ ﻣﺎﺍﺩﺭﻱ ﺟﻨﺖ ﻧﺎﻳﻢ ﺑﺎﻟﺪﻳﻮﺍﻧﻴﻪ ﻫﺴﻪ ﺍﺩﺧﻞ ﺍﺷﻮﻓﻬﻦ ..
.. ﻳﻠﻠﻪ ﻭﻟﻚ ﺑﺎﻟﻌﺠﻞ .
ﺩﺧﻞ ﺍﺳﻼﻡ ﻭﺍﻧﻪ ﺑﻘﻴﺖ ﺍﻧﺘﻈﺮﻩ .. ﺑﺎﻟﻄﺎﺭﻣﻪ ﻭﻳﻦ ﺭﺍﺣﻦ؟
ﺛﻮﺍﻧﻲ ﻭﻃﻠﻊ ﺍﺳﻼﻡ .. ﮔﺎﻝ ﻋﻤﻮ ﻣﺎﻛﻮ ﻭﻻ ﻭﺣﺪﻩ ﻣﻨﻬﻦ ﻫﻨﺎ ..
.. ﻟﻌﺪ ﻭﻳﻦ ﺭﺍﺣﻦ .. ؟ﻋﻔﺘﻪ ﻭﺍﺭﻳﺪ ﺍﻃﻠﻊ .. ﺻﺎﺡ ﻋﻠﻴﻪ ﻭﻫﻮ ﻳﻤﺸﻲ ﻭﺭﺍﺍﻱ ..
ﻫﺎ ﻋﻤﻮ ﻭﻳﻦ ﺭﺍﻳﺢ؟
ﺭﺍﻳﺢ ﻟﺒﻴﺖ ﻋﻤﻚ ﺳﻠﻴﻤﺎﻥ ﻳﻤﻜﻦ ﺍﻻﮔﻴﻬﻦ ﻫﻨﺎﻙ ..
ﺟﺎﻱ ﻭﺭﺍﻙ ﻋﻤﻲ ﺑﺲ ﺍﻟﻠﺒﺲ ﺷﺤﺎﻃﺘﻲ ..
ﺍﻧﺖ ﺍﺑﻘﻰ ﻳﻢ ﺑﻴﺒﻴﺘﻚ ﺧﺎﻑ ﻳﺮﺟﻌﻦ ..
ﻃﻠﻌﻨﻪ ﻣﻦ ﺑﻴﺖ ﺍﺧﻮﻱ ﺍﻧﻲ ﻭﺍﺳﻼﻡ ..
ﺷﻔﺖ ﺍﻣﻲ ﻛﺎﻋﺪﻩ ﺑﺎﻟﺒﺎﺏ ﻭﻭﺟﻬﻪ ﻛﻠﻪ ﺧﻮﻑ ﻭﺗﺮﻗﺐ ..
ﺭﻓﻌﺖ ﺭﺍﺳﻬﺎ ﺑﺎﻭﻋﺘﻠﻲ .. ﮔﺎﻟﺖ .. ﻫﺎ ﻳﻤﻪ ﻭﻳﻨﻬﻦ ﻟﮕﻴﺘﻬﻦ .
.. ﻣﺎﻛﻮ ﺭﺍﻳﺢ ﻟﺒﻴﺖ ﺳﻠﻴﻤﺎﻥ ﺍﺩﻭﺭﻫﻦ ..
ﺃﺳﻼﻡ .. ﻋﻤﻮ ﺍﺭﻭﺡ ﻟﻼﺳﻮﺍﻕ ﺍﺷﻮﻓﻬﻦ ﺧﺎﻑ ﺭﺍﻳﺤﺎﺕ ﻳﺸﺘﺮﻥ؟
ﺍﻡ ﺍﻳﻮﺏ .. ﻳﻤﻪ ﻫﻨﻪ ﻣﺎﻳﻄﻠﻌﻦ ﻟﻼﺳﻮﺍﻕ .. ﻭﻻ ﻟﺒﻴﺖ ﺳﻠﻴﻤﺎﻥ ﺧﺎﻑ ﻃﻠﻌﻦ ﻭﺿﺎﻋﻦ ﺑﺎﻟﻤﻨﻄﻘﻪ ..
ﺍﻳﻮﺏ .. ﻳﻤﻪ ﺷﻴﻀﻴﻌﻦ ﻗﺎﺑﻞ ﻫﻨﻪ ﺟﻬﺎﻝ ﺷﻮ ﺍﻟﺘﻮﻡ ﻋﻤﺮﻫﻦ ﻃﻚ ﺑﺎ 17 ﻭﺭﻗﻴﻪ 15 ﺳﻨﻪ ﺳﻮﻟﻔﻴﻬﻪ ﻟﻠﻤﺨﺒﻞ ﻳﻤﻪ ﺍﻧﻪ ﺭﺍﻳﺢ ﻟﺒﻴﺖ ﺳﻠﻴﻤﺎﻥ ﻭﺍﺫﺍ ﻣﺎﻟﻜﻴﺘﻬﻦ ﻫﻨﺎﻙ ﺍﻟﺴﺎﻟﻔﻪ ﺑﻴﻬﻪ ﺇﻧﻪ ..
ﺧﻠﻴﺖ ﺍﻣﻲ ﺗﺒﺠﻲ ﻭﺗﻨﻌﻲ .. ﻭﺍﺳﻼﻡ ﻣﻜﺮﻓﺺ ﻳﻤﻬﺎ ﻭﻳﻔﺮﻙ ﺑﺸﻌﺮﻩ ﻭﻣﺒﻴﻨﻪ ﺍﻟﺤﻴﺮﻩ ﺑﻴﻦ ﻣﻼﻣﺤﻪ ﻭﻫﻴﺌﺘﻪ ..
ﺗﺮﻛﺘﻬﻢ ﻭﻃﺒﻴﺖ ﺑﺎﻟﻔﺮﻉ ﺍﻟﻲ ﺑﺼﻔﻨﻪ .. ﺍﻣﺸﻲ ﻭﺍﻟﻠﻬﺚ ..
ﻭﺻﻠﺖ ﻟﺒﻴﺖ ﺍﺧﻮﻱ ﺳﻠﻴﻤﺎﻥ .. ﺩﮔﻴﺖ ﺍﻟﺒﺎﺏ ..
ﻃﻠﻌﺖ ﻣﺮﺗﻪ ﺟﺎﻧﺖ ﻳﻢ ﺍﻟﺒﺎﺏ .. ﺗﻐﺴﻞ ﺍﻟﻄﺎﺭﻣﻪ ..
ﺗﺮﻳﺪ ﺗﺴﻠﻢ ﻗﺎﻃﻌﺘﻬﺎ ﻭﺑﺪﺍﺕ ﻃﺎﻗﺔ ﺻﺒﺮﻱ ﺑﺎﻟﻨﻔﺎﺫ .
ﺑﻠﺤﻈﺔ ﮔﺘﻠﻬﺎﺍ .. ﺯﻳﻨﺐ ﺑﻨﺎﺗﻲ ﻣﺎﻫﻤﺎ ﻋﺪﻛﻢ؟
ﺯﻳﻨﺐ .. ﻻ ﻭﺍﻟﻠﻪ ﺍﻳﻮﺏ ﺟﺎ ﻭﻳﻨﻬﻦ ﻣﻮ ﺍﺑﻴﺘﻜﻢ .. ؟
ﻣﺎﺟﺎﻭﺑﺘﻬﺎ ﻋﻔﺘﻬﺎ ﻭﻣﺸﻴﺖ ﻭﺍﻧﻲ ﻋﺎﺟﺰ .. ﻗﺮﺑﺖ ﺍﻭﺻﻞ
ﻟﻨﻬﺎﻳﺔ ﺍﻟﻔﺮﻉ ﻭﺍﻧﺎ ﺷﺎﺭﺩ ﺍﻟﺬﻫﻦ .. ﺳﻤﻌﺖ ﺻﻮﺕ ﺳﻠﻴﻤﺎﻥ .. ﺍﻳﻮﺏ، ﺍﻳﻮﺏ ..
ﻣﺎﺩﺭﺕ ﻭﺟﻬﻲ .. ﻣﻦ ﺍﻟﻴﺄﺱ ﻣﺎﺟﺎﻱ ﺍﺣﺲ ﺑﺸﻲ ..
ﻭﺻﻞ ﻳﻤﻲ ﻟﺰﻣﻨﻲ ﻣﻦ ﻛﺘﻔﻲ . .. ﺩﺍﺭﻧﻲ ﺍﻟﻪ ﺑﺎﻳﺪ ﻭﺣﺪﻩ
ﻛﺎﻝ ﻭﻳﻨﻬﻦ ﺑﻨﺎﺗﻚ ﻭﻳﻦ ﻭﻟﻦ ﺯﻳﻨﺐ ﺗﻜﻮﻝ ﺟﺎﻱ ﺗﺪﻭﺭ ﻋﻠﻰ ﺑﻨﺎﺗﻚ؟
ﺍﻳﻮﺏ .. ﺑﻴﺄﺱ ﮔﺘﻠﻪ ﺍﻧﻪ ﺍﺩﺭﻱ ﻭﻳﻨﻬﻦ ﻭﺍﺟﻴﻚ
ﻋﻔﺘﻪ ﻭﻣﺸﻴﺖ ..
ﻣﺸﻲ ﻭﻳﺎﻱ .. ﺍﺳﻤﻌﻪ ﻳﻜﻮﻭﻝ .. ﻫﻤﺰﻳﻦ ﻣﺎﻋﻨﺪﻱ ﺑﻨﺎﺕ ﺑﺲ ﻫﻢ ﻭﺷﻠﻌﺎﻥ ﮔﻠﺐ ..
ﻣﺎﺍﻫﺘﻤﻴﺖ ﻟﺤﭽﻴﻪ ﺭﻏﻢ ﻏﺜﻨﻲ ..
ﻣﺸﻴﻨﻪ ﻭﺻﻠﻨﻪ ﻟﺒﻴﺘﻨﻪ .. ﺍﻣﻲ ﻛﺎﻋﺪﻩ ﻳﻢ ﺍﻟﺒﺎﺏ ﻭﺗﺒﺠﻲ ﻭﺍﺳﻼﻡ ﻣﻜﺮﻓﺺ ﻳﻤﻬﺎ ﻭﻣﺪﻧﮓ ﺭﺍﺳﻪ .. ﺷﺎﻓﻨﻪ ﻣﻦ ﺑﻌﻴﺪ ﺍﺟﻪ ﻳﻤﻨﻪ ..
ﺍﺳﻼﻡ .. ﻋﻤﻮ ﺭﺣﺖ ﻟﺴﻮﺑﺮ ﻣﺎﺭﻛﺖ ﺩﻭﺭﺗﻬﻦ ﻣﺎﻛﻮ ﻣﺎﻟﻜﻴﺘﻬﻦ ..
ﻋﻔﺘﻪ ﻣﺎﺍﻫﺘﻤﻴﺖ ﻟﻜﻼﻣﻪ
ﺭﺣﺖ ﺑﺴﻄﺖ ﻳﻤﻬﻢ .. ﺍﺟﻪ ﺳﻠﻴﻤﺎﻥ ﻛﻌﺪ ﻳﻤﻲ ..
ﺍﻻﻡ .. ﺳﺎﻣﺤﻨﻲ ﻳﻤﻪ ﺍﻳﻮﺏ ﻣﺎﺩﺍﺭﻳﺖ ﺑﺎﻟﻲ ﻋﻠﻰ ﺑﻨﺎﺗﻚ .
ﻭﺍﻟﻠﻪ ﺧﺬﺗﻨﻲ ﺍﻟﻨﻮﻣﻪ ..
ﺍﺳﻼﻡ .. ﻋﻤﻮ ﺍﻣﺸﻲ ﻧﺒﻠﻎ ﺍﻟﺸﺮﻃﻪ ﺧﺎﻑ ﺧﻄﻔﻮﻫﻦ ..
ﺳﻠﻴﻤﺎﻥ .. ﺍﻱ ﻳﻠﻠﻪ ﺍﻣﺸﻴﻨﻪ ..
ﺍﻳﻮﺏ .. ﻻﻻ ﻣﺎﻳﺤﺘﺎﺝ ﺍﻧﻪ ﻳﻤﻜﻦ ﺍﺩﺭﻱ ﺑﻴﻬﻦ ﻭﻳﻦ
. 
ﺃﻳﻮﺏ .. ﮔﺘﻠﻬﻢ ﻳﻤﻜﻦ ﺍﻧﺎ ﺍﻋﺮﻑ ﻭﻳﻦ ﻫﻦَ ..
ﺑﻮﺳﻂ ﺗﺴﺎﺅﻻﺗﻬﻢ ﮔﻤﺖ ﻣﻦ ﻳﻤﻬﻢ ..
ﻭﻫﻢَ ﺩﺧﻠﻮﺍ ﻭﺭﺍﻱ ..
ﻃﺒﻴﺖ ﻟﻠﻬﻮﻝ .. ﻃﻠﻌﺖ ﺗﻠﻴﻔﻮﻥ .. ﻣﻦ ﺟﻴﺐ ﺩﺷﺪﺍﺷﺘﻲ .
ﺩﻭﺭﺕ ﺭﻗﻢ ﺟﺎﺑﺮ ﺧﺎﻝ ﺑﻨﺎﺗﻲ ﻭﺧﺎﺑﺮﺗﻪ ..
ﺟﺎﻭﺏ ..
ﮔﺘﻠﻪ ﺍﻟﻮ ﺟﺎﺑﺮ ﺷﻠﻮﻧﻚ ..
.. ﻫﻼ ﺑﻴﻚ ﺍﺑﻮ ﺳﻤﻴﺔ ﺍﻧﺖ ﺷﻠﻮﻧﻚ ..
.. ﺍﻛﻠﻚ ﺟﺎﺑﺮ .. ﺑﻨﺎﺗﻲ ﻣﺎ ﻫﻦَ ﻋﻨﺪﻛﻢ ﻣﺎﺍﺧﺬﺗﻬﻢ ﺑﻴﺒﻴﺘﻬﻢ ﺍﻣﻬﻢ؟
.. ﻻ ﻭﺍﻟﻠﻪ ﺍﻧﻪ ﻫﺴﻪ ﺍﺑﻴﺘﻨﻪ ﻣﺎﻛﻮ ﻋﺪﻧﻪ ﻭﺃﻣﺎﻟﻴﺪ ﺍﺑﻴﺖ ﺭﺟﻠﻬﺎ .. ﺷﻌﺠﺐ ﻭﻳﻦ ﺭﺍﺣﻦ .. ؟
.. ﻣﺎﺍﺩﺭﻱ ﺍﻧﻪ ﺟﺎﻱ ﺍﺳﺄﻟﻚ .. ﺍﺟﻴﺖ ﻟﻠﺒﻴﺖ ﻣﺎﻟﮕﻴﺘﻬﻦ ..
.. ﺗﺪﻟﻞ ﻫﺴﻪ ﺃﺧﺎﺑﺮ ﺍﻣﺎﻟﻴﺪ ﻭﺍﺳﺘﻔﺴﺮ ﻣﻨﻬﺎﺍ ....
ﺳﺪﻳﺘﻪ ﻣﻨﻪ ﻭﻛﻌﺪﺕ ﻋﻠﻰ ﺍﻟﻜﺮﻭﻳﺘﻪ .. ﺑﻜﻞ ﻫﺪﻭﺀ ﻭﺗﺴﻤﺮ ﺑﺲ ﺑﺪﺍﺧﻠﻲ ﺑﺮﺍﻛﻴﻦ ﻣﻨﻔﻠﻘﻪ .. ﻟﻮ ﻃﻠﻌﺘﻬﺎ ﺗﺴﻊ ﻫﺬﺍ ﺍﻟﻜﻮﻥ ﻛﻠﻪ ..
ﺳﻠﻴﻤﺎﻥ .. ﻳﺎﺍﺃﺧﻲ ﻉ ﺍﻟﺒﺮﻭﺩ ﺍﻟﻌﻨﺪﻙ ﻟﻮ ﻣﻨﻚ ﻫﺴﻪ ﺍﻃﻠﻌﻬﻦ ﻣﻦ ﺟﻮﺍ ﺍﻟﻜﺎﻉ ﻭﺍﺫﺑﺤﻬﻦ ﻉ ﺍﻟﻘﺒﻠﺔ .. ﺍﻟﻒ ﺣﻤﺪ ﻭﺷﻜﺮ ﺍﻟﻠﻚ ﻳﺎﺭﺑﻲ ﻣﺎﺍﻧﻄﻴﺘﻨﻲ ﺑﻨﺎﺕ ﺷﻜﺪ ﺍﻛﺮﻩ ﺍﻟﺒﻨﺎﺕ ﻭﺧﻠﻔﺘﻬﻦ ..
ﺃﻳﻮﺏ .. ﻣﺎﺟﺎﻭﺑﺖ ﺳﻠﻴﻤﺎﻥ .. ﺳﻜﺘﺖ ﻋﻨﻪ ..
ﻭﺭﺍ ﺩﻗﺎﻳﻖ ﺩﻙ ﺗﻠﻴﻔﻮﻧﻲ .. ﺍﺧﺬﺗﻪ ﻣﻦ ﻉ ﺍﻟﻄﺒﻠﻪ ..
ﺷﻔﺖ ﺭﻗﻢ ﺟﺎﺑﺮ .. ﺟﺎﻭﺑﺘﻪ .. ﺃﻛﺪﻟﻲ ﺑﺎﻧﻪ ﺍﻟﺒﻨﺎﺕ ﻳﻢ ﺍﻣﻬﻦ ﻭﻛﺎﻝ ﺍﺫﺍ ﺗﺮﻳﺪ ﻫﺴﻪ ﺍﺭﻭﺡ ﺍﺧﺬﻫﻦ ﻭ ﺍﺟﻴﺒﻬﻦ ﺍﻟﻚ
ﮔﺘﻠﻪ ﻻ ﺧﻠﻴﻬﻦ .. ﺳﺪﻳﺘﻪ ﻣﻨﻪ ..
ﻭﻛﻤﺖ ﻉ ﺣﻴﻠﻲ .. ﮔﺘﻠﻬﻢ ﺍﻟﺒﻨﺎﺕ ﻳﻢ ﺍﻣﻬﻦ ﺭﺍﻳﺢ ﺍﻧﺎﻡ .. ﻟﺤﺪ ﻳﮕﻌﺪﻧﻲ ..
ﺳﻠﻴﻤﺎﻥ / ﺍﻧﺖ ﺻﺪﻙ ﺗﺤﺠﻲ ﺍﻳﻮﺏ ﺍﻣﺸﻲ ﻫﺴﻪ ﻧﺠﻴﺒﻬﻦ ﻧﺴﺤﻠﻬﻦ ﺳﺤﻞ ..
ﺍﻳﻮﺏ / ﻻﺍﺍﺀ ﺭﺍﺡ ﻳﺒﻘﻦ ﻋﻨﺪ ﺍﻣﻬﻦ ﮔﺘﻠﻚ ..
ﺇﺳﻼﻡ / ﻋﻤﻲ ﺍﻧﺖ ﺻﺪﻙ ﺗﺤﺠﻲ؟ ﺷﻮﻥ ﺗﺨﻠﻴﻬﻦ ﻋﻨﺪ ﺍﻣﻬﻦ ﻭﻫﻲ ! !!!
ﺃﻳﻮﺏ / ﺇﺳﻼﺍﺍﺍﻡ ﻟﺤﺪ ﻳﺘﺪﺧﻞ ..
ﻋﻔﺘﻬﻢ ﻭﺻﻮﺕ ﺳﻠﻴﻤﺎﻥ ﺑﻘﻰ ﻭﺭﺍﻱ ﻳﺼﻴﺢ ﺍﻧﺖ ﻣﺨﺒﻞ ﻋﺎﻗﻞ ﺗﺨﻠﻴﻬﻦ ﻳﻢ ﻫﻲ ﺍﻟﺴﺎﻗﻄﻪ ﻭﻟﻚ ﻫﺬﻥ ﺑﻨﺎﺗﻚ ﻫﺬﻥ ﻋﺮﺿﻚ ﺻﺪﻙ ﺗﺤﺠﻲ ﺍﻧﺖ ..
ﺃﻳﻮﺏ / ﺗﻈﺎﻫﺮﺕ ﺑﺎﻟﺒﺮﻭﺩ ﻭﻻ ﺟﻦ ﺍﺳﻤﻌﻬﻢ ..
ﻭﺭﺣﺖ ﺩﺧﻠﺖ ﺟﻮﻩ ..
ﺫﺑﻴﺖ ﺩﺷﺪﺍﺷﺘﻲ .. ﺧﺬﻳﺘﻠﻲ ﺧﺎﻭﻟﻲ ﻭﻃﺒﻴﺖ ﻟﻠﺤﻤﺎﻡ .
ﺳﺒﺤﺖ ﺍﺭﻳﺪ ﺍﺧﻤﺪ ﺍﻟﻨﺎﺭ ﺍﻟﺒﻴﻪ .. ﺳﻤﻌﺘﻬﻢ ﻭﺍﻛﻔﻴﻦ ﻳﻢ ﺍﻟﺒﺎﺏ ﻣﺎﻝ ﺍﻟﺤﻤﺎﻡ . ﻭﺳﻠﻴﻤﺎﻥ ﻳﺼﻴﺢ ﻭﻟﻚ ﺍﻳﻮﺏ ﺍﺫﺍ ﻣﺎﺗﺮﻭﺡ ﺗﺠﻴﺒﻬﻦ ﺍﻧﻪ ﺍﺭﻭﺡ ﺑﺲ ﺍﻃﻴﻨﻲ ﺍﻟﻌﻨﻮﺍﻥ
ﺻﺤﺖ ﺻﻮﺕ ﻣﻦ ﺟﻮﺍ ﺍﻟﺤﻤﺎﻡ ﺯﻟﺰﻟﺘﻬﻢ ﺑﻲ .. ﺳﻜﺘﻮﺍ ﻭﺑﻌﺪ ﻣﺎﺳﻤﻌﺘﻠﻬﻢ ﺣﺲ .
.. ﺧﻠﺼﺖ ﻭﻃﻠﻌﺖ ..
ﻭﻛﻔﺖ ﺑﻨﺺ ﺍﻟﻐﺮﻓﻪ ﺟﺎﻱ ﺍﻧﺸﻒ ﺷﻌﺮﻱ ..
ﺩﺧﻠﺖ ﺍﻣﻲ ﻭﻋﻼﻣﺎﺕ ﺍﻟﺨﻮﻑ ﻭﺍﻟﺘﻮﺗﺮ ﻭﺩﻣﻮﻉ ﺑﻌﻴﻮﻧﻬﺎ ﺑﺎﻳﻨﻪ .. ﻭﺑﺘﻮﺳﻞ ﺑﺎﻭﻋﺘﻠﻲ
ﻭﻛﺎﻟﺖ .. ﻳﻤﻪ ﺍﻳﻮﺏ ﺧﻮ ﻣﺎ ﺍﺧﺬﺕ ﻋﻠﻰ ﺧﺎﻃﺮﻙ ﻣﻨﻲ ..
.. ﻻ ﻳﻤﻪ ﻣﺎﺍﺯﻋﻞ ﻋﻠﻴﺞ ..
.. ﺟﺎ ﻳﻤﻪ ﺭﻭﺡ ﺟﻴﺒﻬﻦ ..
.. ﻻﺍﻉ ﺧﻠﻴﻬﻦ ﻫﻨﺎﻙ ..
.. ﺷﻨﻮﻭ؟ ﻣﺘﻌﺎﻳﺰ ﻣﻦ ﻟﮕﻤﺘﻬﻦ
.. ﺍﻟﻠﻬﻢ ﺍﻧﻄﻴﻨﻲ ﺍﻟﺼﺒﺮ ..
.. ﺍﻳﻮﺏ ﻳﻤﻪ ﺍﻧﺖ ﺗﻌﺮﻑ ﻛﻠﺶ ﺯﻳﻦ ﺷﻜﻮﻥ ﺍﺭﻳﺪ ﺍﺣﺠﻲ ﺍﻣﻬﻦ ﻣﺮﻩ ﻋﻠﻴﻬﺎ ﺳﻤﻌﻪ ﻣﻮﺯﻳﻨﻪ ﻭﺑﻨﺎﺗﻚ ﺣﺪﻳﺜﺎﺕ ﻣﺎﻳﺼﻴﺮ ﻳﺒﻘﻦ ﻋﺪﻫﺎ ﻭﺭﺟﻠﻬﺎ ﺻﺎﺣﺐ ﻣﻴﺰ ﻭﺑﻄﻞ ﻭﻛﻠﻬﺎ ﺍﻟﻨﺎﺱ ﺗﺤﺠﻲ ﻋﻠﻲ ..
.. ﺧﻠﻴﻬﻦ ﻫﻨﺎﻙ ﺍﻧﻪ ﺍﺭﻳﺪ ﺍﻧﻄﻴﻬﻦ ﺩﺭﺱ ﻳﺘﻌﻠﻤﻨﻪ ﻃﻮﻝ ﻋﻤﺮﻫﻦ ..
.. ﺍﻳﻮﺏ
.. ﻳﻤﻪ ﺩﺭﺏ ﺍﻟﺠﻠﺐ ﻉ ﺍﻟﮕﺼﺎﺏ ﺍﺫﺍ ﻣﺎﺭﺟﻌﻦ ﻭﺣﺪﻫﻦ ﻫﺬﺍ ﺷﺎﺭﺑﻲ ﺍﺯﻳﻨﻪ .. ﺑﺲ ﺍﻧﺖ ﻳﺎ ﻳﻤﻪ ﻣﺎﺗﺴﻤﻌﻴﻦ ﻛﻼﻡ ﻛﺘﻠﺞ ﻣﺎﺍﺭﻳﺪ ﺗﻠﻴﻔﻮﻥ ﻟﻠﺒﻴﺖ ﺣﺘﻰ ﻻ ﻳﺘﻮﺍﺻﻠﻦ ﻭﻳﻪ ﺍﻣﻬﻦ ﻣﺎﺗﺎﺧﺬﻳﻦ ﺍﻟﺤﺠﻲ ..
.. ﻳﺎﻳﻤﻪ ﺍﻟﺘﻠﻴﻔﻮﻥ ﺍﺧﺬﺗﻪ ﺍﺧﺎﺑﺮ ﺑﻲ ﻻﺷﻮﺍﻕ ﺍﺧﺘﻚ ﺍﺧﺎﺑﺮﻙ ﻣﻦ ﺗﺘﺎﺧﺮ ﻫﻢ ﺍﺣﺘﺎﺟﻪ .
... ﻳﻌﻨﻲ ﺍﺷﻮﺍﻕ ﻣﺎﺗﻌﺮﻑ ﺗﺠﻲ ﻳﻮﻣﻴﻪ ﺗﺴﺄﻝ ﻋﻠﻴﺞ ﺷﻨﺎﻗﺼﻬﺎ
.. ﻣﻮ ﻣﺮﺍﺕ ﺗﺴﺎﻓﺮ ﺗﻈﻞ ﺍﺳﺒﻮﻉ ﺍﺳﺒﻮﻋﻴﻦ ﺗﺨﺎﺑﺮﻧﻲ ﺗﺴﺎﻝ ﻋﻨﻲ ..
.. ﺍﻱ ﻃﺒﻌﺎ ﻛﺎﺿﻴﺘﻬﺎ ﺗﻔﺮﻓﺮ ﻻﻇﻠﺖ ﺗﺮﻛﻴﺎ ﻻ ﻇﻠﺖ ﺍﻳﺮﺍﻥ ﻻﻇﻠﺖ ﺗﺎﻳﻠﻨﺪ ﻭﻣﺎﻟﻴﺰﻳﺎ ﺟﻮﺭﺟﻴﺎ ﻭﺍﺭﺑﻴﻞ
ﻣﺴﻮﻳﺘﻬﻦ ﺑﺼﺮﻩ ﻋﺸﺎﺭ
ﻛﻮﻝ ﻓﺪ ﻣﺮﻩ ﺑﺎﻟﺠﺬﺏ ﻛﻠﺘﻠﺞ ﺧﻞ ﺍﺧﺬﺝ ﺍﻋﺘﻤﺮﻱ
ﻗﺪﻣﺘﻠﺞ ﻉ ﺍﻟﺤﺞ ﻟﻮ ﺑﺲ ﺗﻘﺸﻤﺮﺝ ﺑﻘﻄﻊ ﻟﻘﻤﺎﺵ ﻭﺣﺘﻰ ﻓﻠﻮﺱ ﺧﻴﺎﻃﻬﻦ ﻣﺎﺗﻨﻄﻴﺞ ..
.. ﻳﻤﻪ ﺗﺮﻳﺪ ﺍﺣﻄﻠﻚ ﻏﺪﻩ .. ؟
.. ﺍﻱ ﺍﻱ ﻣﺎﺗﻘﺒﻠﻴﻦ ﻋﻠﻴﻬﺎ ﺗﻐﻴﺮﻳﻦ ﺍﻟﻤﻮﺿﻮﻉ
ﺍﺫﺍ ﺍﻛﻮ ﻟﮕﻤﻪ ﺣﻄﻴﻠﻪ ﺧﻞ ﺍﺳﻤﻢ ..
.. ﺍﺳﻢ ﺍﻟﻠﻪ ﻋﻠﻴﻚ ﻳﺎﺑﻌﺪ ﻃﻮﺍﻳﻒ ﻫﻠﻲ ﻫﺴﻪ ﺭﺍﻳﺤﻪ ﺍﺣﻄﻠﻚ ﻟﮕﻤﻪ
. 
ﻃﻠﻌﺖ ﺍﻣﻲ .
ﺷﻤﺮﺕ ﺍﻟﺨﺎﻭﻟﻲ ﻉ ﻛﺮﺳﻲ ﺧﺎﻟﻴﻨﻪ ﺑﺮﻛﻦ ﺍﻟﻐﺮﻓﺔ ..
ﺗﻤﺪﺩﺕ ﻉ ﺟﺮﺑﺎﻳﻪ . ﻣﺎﻛﺪﺭﺕ ﺍﻏﻔﻰ ﺍﺣﺲ ﻧﺎﺭ ﻭﻣﺸﺘﻌﻠﺔ ﺑﻴﻪ .. ﻣﺎﺟﺎﻱ ﺍﮔﺪﺭ ﺍﻧﺎﻡ .. ﻛﻤﺖ ﻣﻦ ﺍﻟﻔﺮﺍﺵ ..
ﻭﺍﺫﺍ ﺣﺮﺍﺭﺓ ﺍﻟﺠﻮ 56 ﺍﻧﺎ ﺣﺮﺍﺭﺗﻲ ﺍﻟﻒ .
ﺩﻗﺎﻳﻖ ﻭﺩﺧﻠﺖ ﺍﻣﻲ .
.. ﻳﻤﻪ ﺍﻳﻮﺏ ﺍﻟﺠﺪﻭﺭﺓ ﻣﺎﺑﻴﻬﻦ ﺗﻤﻦ ﻭﻣﺮﻙ ﺗﺮﻳﺪ ﺍﻛﻠﻴﻠﻚ ﺑﻴﻨﺬﺍﻥ * ؟
.. ﻳﻮﻣﻴﻪ ﻣﺎﺗﺨﻠﻮﻟﻲ ﺗﻤﻦ ﻭﻣﺮﻙ ﻋﺒﺎﻟﻚ ﺍﻟﺒﻄﻪ ﺍﻟﺴﻮﺩﻩ
ﺍﻱ ﮔﻠﻴﻠﻲ ﺧﻠﻲ ﺍﺳﻜﺖ ﻭﺻﺎﻭﻳﺺ ﺑﻄﻨﻲ ﺳﻄﺮﺗﻨﻲ ..
.. ﻫﺴﻪ .. ﺍﻛﻠﻴﻠﻚ ﻭﺍﻛﻞ ﻭﺍﺳﻜﺘﻬﺎ ﻭﺍﺳﻜﺖ ﺍﺑﻴﻬﻪ ..
.. ﺍﻱ ﺧﻮﺵ ﺍﺯﺍﻣﻄﻴﻦ ﻳﻤﻪ ..
.. ﺍﻱ ﺷﻌﺪﻱ ﻏﻴﺮﻙ ﺍﺣﺒﻞ ﺍﺟﻴﺐ ﺷﻮ ﺍﺑﻮﻙ ﻭﻣﺎﺕ ..
ﻃﻠﻌﺖ ﻣﻦ ﺍﻟﻐﺮﻓﻪ ﻭﺑﻘﻴﺖ ﻣﺪﺩ
ﻭﺭﺍ ﺭﺑﻊ ﺳﺎﻋﻪ ﺭﺣﺖ ﻟﻠﻤﻄﺒﺦ ..
ﺷﻔﺘﻬﺎ ﻛﺎﻋﺪﻩ ﺑﺎﻟﻜﺎﻉ ﻭﻣﺎﺩﻩ ﺭﺟﻠﻴﻬﺎ ﻭﺑﺼﻔﻬﺎ ﻣﺎﻋﻮﻧﻴﻦ ﻭﺍﺣﺪ ﺑﻲ ﻛﺸﻮﺭ ﺑﻴﺬﻧﺠﺎﻥ ﻭﺍﻟﺜﺎﻧﻲ ﺑﻲ ﺑﻴﺬﻧﺠﺎﻥ ﻣﻜﺼﺺ ﺩﻭﺍﺋﺮ ..
.. ﻫﺎﺍ ﻳﻤﻪ ﻣﺎﮔﻠﻴﺘﻲ؟
.. ﻳﻤﻪ ﻣﺎﺑﻴﻪ ﺍﻛﻮﻡ ﺭﻳﻠﻲ ‏( ﺭﺟﻠﻲ ‏) ﺗﻌﻮﺭﻧﻲ ..
.. ﻋﺒﺎﻟﻲ ﮔﻠﻴﺘﻲ ﻣﻦ ﻣﺴﺎﻉ ﻟﻬﺴﻪ ..
.. ﻭﺍﻟﻠﻪ ﻳﻤﻪ ﻫﺎﻟﺴﻮﻓﺎﻥ ﺑﺮﻛﺒﺘﻲ ﻣﻮﺗﻨﻲ ﺍﺗﺎﻧﻲ ﺍﺷﻮﺍﻕ ﺗﺠﻲ ﻭﺗﻮﺩﻳﻨﻲ ﻟﻠﺪﻛﺘﻮﺭ ..
.. ﺍﻱ ﺍﻱ ﺗﻼﮔﻴﻨﻬﺎ ﻫﺴﻪ ﺑﺠﻮﺭﺟﻴﺎ ﻣﺪﺭﻱ ﺑﻤﺎﻟﻴﺰﻳﺎ ﺗﺘﻮﻧﺲ ﻫﻲ ﺑﺎﻟﺼﻴﻒ ﻭﻳﻦ ﺗﻜﻌﺪ ﺑﺎﻟﺒﺼﺮﻩ ﻋﻠﻰ ﻫﺎﻟﺮﻃﻮﺑﻪ ﻭﺍﻟﻈﻴﻢ ﻭﺍﻟﺤﺮ ﻭﺍﻟﺸﺮﺟﻲ .. ﻭﻓﻠﻮﺳﻬﺎ ﻭﻳﻦ ﺗﻮﺩﻳﻬﺎ ﺗﺮﻭﺡ ﺗﺘﻮﻧﺲ ﺑﻴﻬﺎ
.. ﻻ ﻳﻤﻪ ﻭﺩﺍﻋﺘﻚ ﺭﺍﺣﺖ ﻻﺭﺑﻴﻞ ﺗﺸﻮﻑ ﺍﻣﺎﻥ ﺧﻄﻴﻪ ﺍﺑﻨﻬﺎ ﺻﺎﺭﻟﻬﺎ ﺷﻜﺪ ﻣﺎﺷﺎﻳﻔﺘﻪ ﺧﻄﻴﻪ
.. ﻭﺷﺒﻲ ﻣﺎﻳﺠﻲ ﻫﻨﺎ ﻳﺸﻮﻓﻬﺎ ﺷﻮ ﺻﺎﺭ ﺑﻜﺪ ﺍﻟﺒﻌﻴﺮ
ﺍﻧﺖ ﻣﺎﺗﺮﺿﻴﻦ ﻣﻦ ﺍﺣﺠﻲ ﻋﻠﻴﻬﺎ ﻣﺨﺘﺼﺮ ﻣﻔﻴﺪ ﻳﻤﻪ ﺑﺘﺞ ﻣﺎﺗﺸﺒﻊ ﻣﻦ ﺍﻟﻔﻠﻮﺱ ﺣﺘﻰ ﺍﺑﻨﻬﺎ ﺍﻣﺎﻥ ﻣﺎﺭﺣﻤﺘﻪ ﺑﺎﻟﺪﻭﺍﻡ ﻳﺪﺭﺱ ﺑﺒﻐﺪﺍﺩ ﻭﺑﺎﻟﻌﻄﻠﻪ
ﺗﺪﺯﻩ ﻻﺭﺑﻴﻞ ﻳﺸﺘﻐﻞ ..
.. ﺍﻱ ﻏﻴﺮ ﺣﺘﻰ ﻳﺼﻴﺮ ﺇﺯﻟﻤﻪ ..
.. ﻭﻟﻴﺶ ﻫﺎﻟﻜﺪ ﻣﻬﻠﻜﺘﻪ ﻭﻳﻦ ﺗﻮﺩﻱ ﺭﺍﺗﺒﻬﻪ ﻣﻮ ﺍﺳﺘﺎﺫﺓ ﺟﺎﻣﻌﻪ ﻭﻫﺎﻟﻠﻪ ﻫﺎﻟﻠﻪ ﻭﺭﺟﻠﻬﺎ ﺩﻛﺘﻮﺭ ..
ﺍﻛﻠﺞ ﻳﻤﻪ ﺍﻧﺖ ﺗﻤﻮﺗﻴﻦ ﻋﻠﻰ ﺷﻮﻳﻘﻪ ﻭﻻﺗﺮﺿﻴﻦ ﻭﺍﺣﺪ ﻳﻔﻚ ﺣﻠﮕﻪ ﻭﻳﺤﺠﻲ ﻋﻠﻴﻬﻪ .. ﻭﻫﻲ ﻧﺎﺳﻴﺘﺞ ﻭﺭﺍﻳﺤﻪ ﺗﺘﻮﻧﺲ .
.. ﺷﺴﻮﻱ ﻳﺎﻳﻤﻪ ﻫﻲ ﻇﻠﺖ ﻫﺎﻟﻮﺣﺪﻩ ﺑﻌﺪ ﻣﻮﺕ ﺍﺧﺘﻚ ﺍﻣﺎﻝ ﺧﻄﻴﻪ ..
.. ﺍﻱ ﺍﻟﻠﻪ ﻳﺮﺣﻤﻬﺎ ..
.. ﻫﺴﻪ ﺍﺻﻴﺮ ﺯﻳﻨﻪ ﻭﺍﻛﻮﻡ ﺍﮔﻠﻲ ..
.. ﻻ ﮔﻮﻣﻲ ﺍﺭﺗﺎﺣﻲ ﺍﻧﻪ ﺭﺍﺡ ﺍﺳﻮﻳﻠﻲ ﺍﻛﻞ ..
ﺳﺤﺒﺘﻬﻪ ﻣﻦ ﺍﻳﺪﻫﺎ ﻭﺩﻳﺘﻬﺎ ﻟﻠﻬﻮﻝ ﻛﻌﺪﺕ ﻉ ﺍﻟﻤﻨﺪﺭ ..
ﺭﺟﻌﺖ ﺍﻧﻪ ﻟﻠﻤﻄﺒﺦ ..
ﺗﻨﺎﻭﺷﺘﻠﻲ ﺭﺍﺱ ﺑﺼﻞ .. ﺛﺮﻣﺘﻪ ﻧﺎﻋﻢ ﻭﺭﺷﻴﺘﻪ ﻣﻠﺢ
ﻃﻠﻌﺘﻠﻲ ﻃﺎﻭﻩ .. ﺧﻠﻴﺖ ﺑﻴﻬﻪ ﺩﻫﻦ
ﻭﺧﻠﻴﺘﻬﺎ ﻉ ﺍﻟﻨﺎﺭ ﺍﻧﺘﻈﺮﺗﻪ ﻳﺤﻤﻰ ﺫﺑﻴﺖ ﺑﻲ ﺍﻟﺒﺼﻞ ﺍﻟﻤﺜﺮﻭﻡ
ﻃﻠﻌﺘﻠﻲ ﺑﻴﻀﺘﻴﻦ ﻣﻦ ﺍﻟﺜﻼﺟﻪ ﻃﻜﻴﺘﻬﻦ ﺧﺒﻄﺘﻬﻦ ﻭﺭﺷﻴﺘﻬﻦ ﻣﻠﺢ .. ﻭﺫﺑﻴﺘﻬﻦ ﻉ ﺍﻟﺰﻳﺖ ﻭﺍﻟﺒﺼﻞ
ﺍﻧﺘﻈﺮﺗﻬﺎ ﺗﺴﺘﻮﻱ ﻭﺗﺼﻴﺮ ﻟﻮﻧﻬﺎ ﺑﻨﻲ .. ﻭﺍﻃﺮﺍﻓﻬﺎ ﺗﮕﺴﺐ ﺷﻮﻳﻪ ..
ﻫﻴﺞ ﺍﺣﺒﻬﺎ .. ﻓﺮﻏﺘﻬﺎ ﺑﻤﺎﻋﻮﻥ ﻃﻠﻌﺖ ﺧﺒﺰ ﻭﻛﻌﺪﺕ ﺍﻛﻞ .
ﺩﺧﻠﺖ ﺍﻣﻲ .. ﺭﻓﻌﺖ ﺭﺍﺳﻲ ﮔﺘﻠﻬﺎ . ﻛﻌﺪﻱ ﺍﻛﻠﻲ ﻭﻳﺎﻱ .
.. ﻻ ﻳﻤﻪ ﺍﺧﺎﻑ ﻣﻦ ﺍﻟﻜﻮﺳﺘﺮﻛﻮﻝ ..
.. ﻛﻮﺳﺘﺮ؟ ﺧﺎﻑ ﻛﻴﺎ؟ ﺯﻳﻦ ﺑﻌﺪ ﺷﻜﺪ ﺍﻟﻬﺎ ﻭﺗﻘﺒﻂ؟
.. ﻧﻔﺮﻳﻦ
.. ﻫﻬﻬﻪ ﻳﻤﻪ ﺍﺳﻤﻪ ﻛﻮﻟﺴﺘﺮﻭﻝ ..
.. ﺷﻤﺪﺭﻳﻨﻲ ﺍﻧﻪ ﺃﻓﺎﺩﻱ ‏( ﻓﺆﺍﺩﻱ ‏) ﻏﺎﺩﻱ ﻧﺎﺭ ﻭﺍﻧﺖ ﺗﻨﻜﺖ .. .. ﺷﺒﻴﻪ ﺍﻓﺎﺩﺝ ﺑﻌﺪ؟
.. ﺑﺎﻟﻲ ﻳﻢ ﻟﺒﻨﻴﺎﺕ ﺧﺎﻑ ﻳﺼﻴﺮ ﺑﻴﻬﻦ ﺷﻲ ..
.. ﻭﺍﻟﻠﻪ ﺍﻧﺖ ﺑﺎﻟﺞ ﻳﻢ ﺷﻮﻳﻘﻪ .
.. ﻻ ﻭﺍﻟﻠﻪ ﻳﻤﻪ ﺍﻓﻜﺮ ﺍﺑﻨﺎﺗﻚ ..
.. ﻳﻤﻪ ﺍﻟﺤﻴﺎﺓ ﺻﻌﺒﻪ ﻭﻣﻮ ﺍﻱ ﻭﺍﺣﺪ ﻳﮕﺎﻳﺶ ﺑﻴﻬﺎ ﺧﻠﻴﻬﻦ ﻳﺎﺧﺬﻥ ﺩﺭﺱ ﻭﻳﺸﻮﻓﻦ ﺍﻟﻔﺮﻕ ﺑﻴﻦ ﻭﺍﺑﻮﻫﻢ ﻭﺩﺭﺏ ﺍﻟﭽﻠﺐ؟
.. ﻉ ﺍﻟﮕﺼﺎﺏ ﺧﺒﺼﺘﻨﻲ .
.. ﺍﻱ ﻳﺮﺟﻌﻦ ﻳﺮﺟﻌﻦ ﻻﺗﺨﺎﻓﻴﻦ ﺍﺫﺍ ﻣﻮ ﺍﻟﻴﻮﻡ ﺑﺎﺟﺮ ﻭﺍﺫﺍ ﻣﻮ ﺑﺎﺟﺮ ﺑﻌﺪ ﺷﻬﺮ .. ﻭﺍﻟﺼﻮﻧﺪﻩ ﻭﺍﻟﺠﺪﺍﺣﻪ ﻋﻠﻰ ﺍﻫﺒﺔ ﺍﻻﺳﺘﻌﺪﺍﺩ ..
... ﺍﻭﻭﻭﻭ
. 
ﺧﻠﺼﺖ ﺍﻛﻞ .. ﺷﻠﺖ ﺍﻟﻤﻮﺍﻋﻴﻦ ﺧﻠﻴﺘﻬﻦ ﺑﺎﻟﺴﻨﮓ ﻭﺑﺪﻳﺖ ﺍﺟﻠﻒ ﺑﻴﻬﻦ ..
ﺃﻡ ﺃﻳﻮﺏ .. ﻳﻤﻪ ﺧﻠﻴﻬﻦ ﺍﻧﻪ ﺍﻣﻮﺻﻬﻦ ‏( ﺍﻏﺴﻠﻬﻦ ‏) ..
.. ﻻ ﻳﻤﻪ ﻣﺎﺑﻴﺞ ﺍﻧﻪ ﻫﺴﻪ ﺍﻏﺴﻠﻬﻢ ﻣﺎﻋﻨﺪﻱ ﺷﻲ .
ﻏﺴﻠﺘﻬﻢ ﻭﺭﺣﺖ ﻟﻠﻐﺮﻓﻪ ﺍﺧﺬﺕ ﻣﻼﺑﺴﻲ ﻭﺭﺣﺖ ﻟﻠﺤﻤﺎﻡ ﺧﻠﻴﺖ ﻣﺎﻱ ﺑﺎﻟﻄﺎﺳﻪ ﻭﻛﻌﺪﺕ ﺍﺟﻠﻒ ﺑﻴﻬﻦ
ﻟﻮ ﻭﺍﺣﺪ ﻏﻴﺮﻱ ﻣﺘﺰﻭﺝ ﺑﺲ ﺧﻔﺖ ﻉ ﺑﻨﺎﺗﻲ ﻻﺗﻈﻠﻤﻬﻦ ﻣﺮﺓ ﺍﻻﺑﻮ .. ﺍﻭ ﺷﻮﻥ ﺟﺎﺯﻧﻲ ﺧﻠﻨﻲ ﻭﺷﺮﺩﻥ ..
ﺧﻠﺼﺖ ﺟﻠﻒ ﺍﻟﻤﻼﺑﺲ ﺷﻄﻔﺘﻬﻦ ﻭﺭﺣﺖ ﺷﺮﻳﺘﻬﻦ ..
ﺟﺎﻧﺖ ﺭﻗﻴﻪ ﻫﻲ ﻣﺴﺆﺅﻟﻪ ﻋﻦ ﻣﻼﺑﺴﻲ ﻭﺻﻔﺎ ﺗﻄﺒﺦ ﻭﺗﺴﻮﻱ ﺍﻛﻞ .. ﺳﻤﻴﻪ ﻟﻮ ﻧﺎﻳﻤﻪ ﻟﻮ ﻣﻜﺎﺑﻠﻪ ﺍﻟﺘﻠﻔﺰﻳﻮﻥ .
ﺭﺣﺖ ﻟﻠﻐﺮﻓﻪ ﺑﺪﻟﺖ ﻣﻼﺑﺴﻲ .. ﻭﺍﺧﺬﺕ ﻓﻠﻮﺱ .
ﻭﻃﻠﻌﺖ ﺩﻭﺭﺕ ﺍﻣﻲ .. ﺷﻔﺘﻬﺎ ﺑﺎﻟﻬﻮﻝ ﺟﺎﻱ ﺗﺒﺎﻭﻉ ﻣﺴﻠﺴﻞ ﺗﺮﻛﻲ ..
ﻣﺪﻳﺖ ﺍﻳﺪﻱ ﻭﻧﻄﻴﺘﻬﺎ ﺍﻟﻔﻠﻮﺱ .. ﺭﻓﻌﺖ ﺭﺍﺳﻬﺎ ﺑﺎﻭﻋﺘﻠﻲ
ﮔﺎﻟﺖ ﻣﺸﺎﻧﻴﺶ ‏( ﺍﻟﻤﻦ ‏) ﻫﻲ ﺍﻟﻔﻠﻮﺱ ﻳﻤﻪ ؟
.. ﻳﻤﻪ ﺧﻠﻲ ﺍﻡ ﺇﺳﻼﻡ ﺗﻮﺩﻳﺞ ﻟﻠﺪﻛﺘﻮﺭ ﻋﻠﻤﻮﺩ ﺭﺟﻠﺞ .
.. ﻻ ﻳﻤﻪ ﺧﺎﻑ ﻣﺎﻋﻨﺪﻙ .. ؟
.. ﻋﻨﺪﻱ ﻭﻣﺪﺍﻡ ﺍﻟﺒﻨﺎﺕ ﻳﻢ ﺍﻣﻬﻦ ﺍﻟﻤﻠﻌﻮﻧﻪ ﻓﻜﺎ ﺗﻮﻓﻴﺮ ﻣﺼﺎﺭﻳﻒ ﺯﺍﻳﺪﻩ ..
ﺍﺧﺬﺗﻬﻦ ﺑﺎﺳﺘﻬﻦ ﻭﺟﻪ ﻭﮔﻔﺎ ﻭﻇﻠﺖ ﺗﺪﻋﻲ ..
ﻧﻌﻢ ﺍﻟﻠﻪ ﻋﻠﻴﻚ ﻳﻤﻪ ﺍﻟﻠﻪ ﻳﺮﺯﻗﻚ ﻣﻦ ﺑﺮ ﻭﺑﺤﺮ ﻳﺒﻌﺪ ﻃﻮﺍﻳﻔﻲ ﻭﺍﻫﻠﻲ ﻛﻠﻬﻢ ..
ﺑﺴﺖ ﺭﺍﺳﻬﺎ ﻭﻃﻠﻌﺖ .. ﺩﻛﻴﺖ ﺍﻟﺒﺎﺏ ﻋﻠﻰ ﺑﻴﺖ ﺍﺧﻮﻱ ﺍﻟﻤﺮﺣﻮﻡ .. ﻃﻠﻌﺘﻠﻲ ﺑﺘﻪ ﺍﻳﻨﺎﺱ ..
ﻫﺎﺍ ﻋﻤﻮ ﺷﻠﻮﻧﻚ ..
ﻫﻼ ﺍﻧﻮﺳﻪ ﺑﻴﺒﺘﺞ ﺑﺎﻟﺒﻴﺖ ﺩﻳﺮﻭﺍ ﺑﺎﻟﻜﻢ ﻋﻠﻴﻬﺎ ﺧﺎﻑ ﺍﺗﺄﺧﺮ ﺍﻧﻪ ﻻﺗﺨﻠﻮﻧﻬﺎ .. ﺑﺤﺪﻫﺎ ‏( ﻭﺣﺪﻫﺎ ‏) ..
ﺍﻥ ﺷﺎﺀﺍﻟﻠﻪ ﻋﻤﻮ ﻫﺴﻪ ﺍﺭﻭﺡ ﻳﻤﻬﺎ
ﺍﻱ ﻋﻔﻴﻪ ﺑﻨﻴﺘﻲ ﻓﻴﻤﺎﻧﺎﻟﻠﻪ ‏( ﻓﻲ ﺍﻣﺎﻥ ﺍﻟﻠﻪ ‏)
ﺍﻟﻠﻪ ﻭﻳﺎﻙ ﻋﻤﻮ ..
ﺭﺣﺖ ﻟﺴﻴﺎﺭﺗﻲ ﺳﻘﺘﻬﺎ ﺧﺬﻳﺘﻠﻲ ﺟﻢ ﻛﺮﻭﻩ ﺭﺣﺖ ﻟﻠﻜﻮﺭﻧﻴﺶ ﻳﻢ ﺭﺑﻌﻲ ‏( ﺍﺻﺪﻗﺎﺋﻲ ‏) ﻧﺮﻛﻴﻠﻪ ﻭﺳﻮﺍﻟﻒ ﻭﻣﻨﻈﺮ ﺷﻂ ﺍﻟﻌﺮﺏ ﺑﺎﻟﻠﻴﻞ ﻳﺄﺳﺮ ﺍﻟﺮﻭﺡ ﻭﻳﺎﺧﺬﻫﺎ ﻟﻐﻴﺮ ﻋﺎﻟﻢ ﺍﻻﺿﻮﻳﻪ ﻣﻌﻜﻮﺳﻪ ﺑﺎﻟﻤﺎﻱ ﻭﻧﺴﻤﺎﺕ ﻫﻮﺍ ﻋﻠﻴﻠﻪ ﻭﻧﻘﻴﻪ ﺗﺪﺍﻋﺐ ﺍﻻﺣﺴﺎﺱ ﻭﺗﻨﻌﺸﻪ
. ﻛﻞ ﻫﺬﺍ ﻭﻓﻜﺮﻱ ﻳﻢ ﺑﻨﺎﺗﻲ ﺍﻛﻴﺪ .. ﺗﻌﺸﻴﺖ . ﻭ ﺭﺟﻌﺖ ﻟﻠﺒﻴﺖ .. ﺑﺎﻟﻠﻴﻞ .. ﺩﺧﻠﺖ ﺍﻟﺴﻴﺎﺭﻩ ﺑﺎﻟﻜﺮﺍﺝ .. ﻓﺘﺤﺖ ﺍﻟﺒﺎﺏ ﻣﻦ ﺍﻟﻴﺪﻩ ﻣﺎﺍﻧﻔﺘﺢ ﻣﺒﻴﻦ ﻣﻘﻔﻮﻝ ﻳﻌﻨﻲ ﺍﻣﻲ ﻣﻮ ﺑﺎﻟﺒﻴﺖ ﻓﺘﺤﺘﻪ ﺑﺎﻟﻤﻔﺘﺎﺡ ﻭﺩﺧﻠﺖ .. ﻇﻠﻤﺎ ﺷﻌﻠﺖ ﺍﻻﺿﻮﻳﻪ
ﻃﻠﻌﺖ ﺗﻠﻴﻔﻮﻧﻲ .. ﺧﺎﺑﺮﺕ ﺇﺳﻼﻡ ﺳﺄﻟﺘﻪ ﻋﻠﻰ ﺍﻣﻲ
ﮔﺎﻝ ﻳﻤﻨﻪ ﻭﻧﺎﻳﻤﻪ ﻫﺴﻪ ..
ﺳﺒﺤﺖ ﺑﺪﻟﺖ ﻣﻼﺑﺴﻲ ..
ﻭﺗﻤﺪﺩﺕ ﻉ ﺍﻟﺠﺮﺑﺎﻳﻪ ..
ﺍﻧﻪ ﺍﻳﻮﺏ ﻋﻤﺮﻱ 45 ﺳﻨﻪ . ﻣﻄﻠﻖ ﻭﻋﻨﺪﻱ 3 ﺑﻨﺎﺕ
ﺳﻤﻴﺔ ﻭﺻﻔﺎ ﺗﻮﺃﻡ ﻭﻋﻤﺮﻫﻢ 17 ﺳﻨﻪ ..
ﺭﻗﻴﺔ .. ﻋﻤﺮﻫﺎ 15 ﺳﻨﻪ ..
. ﻧﺮﺟﻊ ﻟﻠﻮﺭﺍﺀ ﻗﺒﻞ 19 ﺳﻨﻪ
ﺗﻘﺮﻳﺒﺎ ..
ﻣﻦ ﺍﻃﻠﻊ ﻣﻦ ﺍﻟﺒﻴﺖ ﻣﺮﺍﺕ ﺍﺷﻮﻓﻬﺎ ﻃﺎﻟﻌﻪ ﻭﻱ ﺍﻣﻬﺎ ..
ﺍﻭ ﻟﻠﻤﺪﺭﺳﺔ .. ﺟﺎﻧﺖ ﺑﺎﻟﻨﺴﺒﺔ ﺍﻟﻲ ﺣﻠﻢ ..
ﻧﻈﺮﺍﺗﻬﺎ ﺍﻟﺠﺮﻳﺌﺔ ﻭﺍﺑﺘﺴﺎﻣﺘﻬﺎ ﺍﻟﻤﺜﻴﺮﺓ ﺷﻐﻠﻲ ﺍﻟﺸﺎﻏﻞ ..
ﻣﻨﻄﻘﺘﻨﻪ ﻣﺤﺎﻓﻈﻪ ﻭﺍﻏﻠﺒﻬﻢ ﻓﻼﻟﻴﺢ ﻭﺍﻫﻢ ﺷﻲ ﺳﻤﻌﺔ ﺍﻟﺒﻨﻴﻪ ﻋﺪﻫﻢ .. ﺍﻏﻠﺐ ﺍﻟﺸﺒﺎﺏ ﻳﻨﺠﺬﺑﻮﻥ ﻟﻠﺒﻨﺖ ﺍﻟﻤﺆﺩﺑﻪ .
ﻟﻜﻦ ﺍﻧﺎ ! !!! ﻫﺬﻩ ﺟﺬﺑﺘﻨﻲ ..
ﺟﺎﻧﺖ ﺻﻐﻴﺮﺓ ﻋﻤﺮﻫﺎ 14 ﻟﻜﻦ ﺟﺜﻠﺔ ﻳﻌﻨﻲ ﺑﻨﻴﺘﻬﺎ ﺿﺨﻤﻪ .. ﺍﻟﻲ ﻳﺸﻮﻓﻬﺎ ﻳﮕﻮﻝ ﻋﻤﺮﻫﺎ 20 ..
ﺣﺒﻴﺘﻬﺎ ﻛﻠﺶ .. ﻓﺎﺗﺤﺖ ﺍﻫﻠﻲ ﺑﺎﻟﻤﻮﺿﻮﻉ .. ﻛﺘﻠﻬﻢ ﺍﺭﻳﺪﻫﺎ .. ﺗﺨﺒﻠﻮﺍ ﺗﺨﺒﻠﻮﺍ ..
ﺧﺎﺻﺔ ﺍﺷﻮﺍﻕ .. ﺗﻜﺮﻫﺎ ﺗﻤﻮﺕ ﻣﻨﻬﺎ ..
ﻭﺍﻧﺖ ﺷﻮﻥ ﺗﺎﺧﺬ ﺑﻨﺖ ﺍﻟﺪﻻﻟﺔ .. ﻣﺎﻟﮕﻴﺖ ﻏﻴﺮﻫﺎ؟ ﺷﻨﻮ ﮔﻠﺔ ‏( ﻗﻠﺔ ‏) ﻧﺴﻮﺍﻥ .. ﻭﻣﻦ ﻫﺎﻟﺤﺠﻲ .. ﺍﻣﻲ ﻭﺍﺑﻮﻱ ﻭﺍﺧﻮﺍﻧﻲ ﻛﻠﻬﻢ ﻧﻔﺲ ﺍﻟﻤﻮﻗﻒ ﻳﻜﻮﻟﻮﻥ ﻋﻠﻴﻬﻢ ﺳﻤﻌﺘﻬﻢ ﻣﻮﺯﻳﻨﻪ ﺍﺑﻮﻫﻢ ﺳﻜﻴﺮ ﻭﺍﻣﻬﻦ ﺩﻻﻟﺔ ..
ﺑﺲ ﺍﻧﻪ ﺟﺎﻥ ﺗﻔﻜﻴﺮﻱ ﻏﻴﺮ .. ﺟﻨﺖ ﺍﺷﻮﻓﻬﺎ ﻃﻔﻠﺔ ﺑﺮﻳﺌﻪ ﻭﻣﺎﻣﺴﻮﻳﻪ ﺍﻟﻌﻴﺒﻪ .. ﻭﺭﺍﺡ ﺍﺭﺑﻴﻬﺎ ﻋﻠﻰ ﺍﻳﺪﻱ ..
ﺭﺩﺕ ﺍﺣﺪ ﻳﺮﻭﺡ ﻳﺨﻄﺒﻬﺎ ﺍﻟﻲ ﻣﺤﺪ ﻗﺒﻞ ﻳﺮﻭﺡ ..
. ﻣﺮﺕ ﺍﻳﺎﻡ ﻭﺍﺟﺖ ﺍﻳﺎﻡ ﻭﺍﻧﻪ ﺍﺗﻮﺳﻞ ﻭﻛﻠﻬﻢ ﻣﻌﺎﺭﺿﻴﻦ ﻭﻣﺤﺪ ﻗﺎﺑﻞ ..
ﻳﻮﻡ ﻋﻦ ﻳﻮﻡ ﻭﺍﻧﺎ ﺍﺭﻳﺪﻫﺎ ﺑﻜﻞ ﺟﻮﺍﺭﺣﻲ ..
ﻛﻠﻬﻢ ﺟﺎﻧﻮﺍ ﻳﻜﻮﻟﻮﻥ ﻭﻛﺤﻪ ﺑﺲ ﺍﻧﻪ ﻣﺎﺟﻨﺖ ﺍﺷﻮﻓﻬﺎ ﻫﻴﺞ .
ﺣﺘﻰ ﻻﻣﻬﺎ ﺭﺣﺖ ﻭﻛﺘﻠﻬﺎ ﺍﺭﻳﺪﻫﺎ ﻛﺎﻟﺖ ﺗﺮﻩ ﺗﻌﺬﺑﻚ ﻭﺗﺸﻮﻑ ﺍﻟﻮﻳﻞ ﻣﻨﻬﺎ .. ﺗﻮﻗﻌﻮﺍ ﺣﺘﻰ ﺍﻣﻬﺎ ﺣﺬﺭﺗﻨﻲ ﻣﻨﻬﺎ .
ﻫﻨﺎ ﻣﻘﻮﻟﺔ ﺍﻟﺤﺐ ﺍﻋﻤﻰ ﺟﺎﻧﺖ ﻣﺘﻔﻌﻠﻪ ﻋﻨﺪﻱ ﺟﻨﺖ ﺍﻋﻤﻰ ﻭﻣﺎﺍﺷﻮﻑ ﻭﻛﺎﺣﺘﻬﺎ .. ﺑﺲ ﺣﺒﻬﺎ ﺍﻧﺰﺭﻉ ﺑﮕﻠﺒﻲ ﻭﺻﺎﺭ ﻳﻨﺒﺾ ﺑﺎﺳﻤﻬﻪ ..
ﻓﺪ ﻳﻮﻡ ﺿﺎﻗﺖ ﺑﻴﻪ ﺍﻟﺴﺒﻞ .. ﺍﺧﺬﺕ ﺭﺟﺎﻝ ﻣﻦ ﺍﻟﻤﻨﻄﻘﻪ ﺍﻟﻪ ﻓﺪ ﺻﻴﺖ ﺟﺒﻴﺮ ﻭﺍﻟﻨﺎﺱ ﺗﺤﺒﻪ ﻭﺭﺣﺖ ﺧﻄﺒﺘﻬﺎ ﻭﺍﻧﻄﺎﻫﺎ ﺍﻟﻲ ﺍﺑﻮﻫﺎ ﺟﺎﻥ ﻳﻮﻡ ﺳﻌﺪ ﺑﺎﻟﻨﺴﺒﻪ ﺍﻟﻲ .. ﺑﻌﺪ ﺳﻨﻪ ﻛﺎﻣﻠﻪ ﻣﻦ ﺍﻟﻤﺤﺎﻭﻟﺔ ..
ﺍﺟﺮﺕ ﺑﻴﺖ ﻭﺗﺰﻭﺟﺘﻬﺎ ﺯﻭﺍﺝ ﺑﺴﻴﻂ ﻣﺎﺣﻀﺮﻩ ﺍﺣﺪ ﻣﻦ ﺍﻫﻠﻲ .. ﺭﻏﻢ ﺣﺰﻧﻲ ﻟﻜﻦ ﻓﺮﺣﺖ ﺑﻌﺮﻭﺳﻲ .. ﺻﺎﺭﺕ ﺍﻟﻲ ﺍﻣﺎﻟﻴﺪ ﺍﻟﻌﺸﻖ .. ﺟﻨﺖ ﻣﺘﻌﻴﻦ ﺷﺮﻃﻲ ﻣﺮﻭﺭ ﺻﺢ ﺍﻟﺮﺍﺗﺐ ﻣﻮ ﺷﻲ ﺑﺲ ﻛﺪﺭﺕ ﺍﺟﺮ ﺷﻘﺔ ﻉ ﻛﺪﻧﺎ ..
ﺟﺎﻧﺖ ﺑﺒﺪﺍﻳﺔ ﺯﻭﺍﺟﻨﺎ ﻣﻄﻴﻌﻪ ﺣﺎﻭﻟﺖ ﺍﻣﺸﻴﻬﺎ ﻉ ﻃﺮﻳﻖ ﺍﻟﺰﻳﻦ .. ﻭﻓﻌﻼ ﻣﺎﺷﻔﺖ ﻣﻨﻬﺎ ﺷﻲ .. ﺻﺎﺭ ﻋﺪﻧﻪ ﺑﻨﺎﺕ ﺍﺛﻨﻴﻦ ﺗﻮﺃﻡ ﻣﺨﺘﻠﻔﺎﺕ ﺑﺎﻟﺸﻜﻞ ﻏﻴﺮ ﻣﺘﻤﺎﺛﻼﺕ ﻭﺣﺘﻰ ﺍﺧﺘﻼﻑ ﺑﺎﻟﺸﺨﺼﻴﺔ ..
ﻣﺮﺕ ﺳﻨﺘﻴﻦ ﺻﺎﺭﺕ ﻋﺪﻧﻪ ﺭﻗﻴﺔ .. ﺧﺮﺳﺎﺀ ﻣﺎﺗﺤﺠﻲ
ﻛﻠﺶ ﺗﺄﺛﺮﺕ ﻣﻦ ﻋﺮﻓﺖ ﺧﺮﺳﻪ ﺷﻜﺮﺕ ﺍﻟﻠﻪ ﻭﺣﻤﺪﺗﻪ ﻋﻠﻰ ﻧﻌﻤﺘﻪ ﺷﺴﻮﻱ ..
ﺃﻫﻠﻲ ﺑﺲ ﺑﺎﻻﻋﻴﺎﺩ ﺍﺭﻭﺡ ﺍﺷﻮﻑ ﺍﻣﻲ ﺍﻋﻴﺪﻫﺎ
. ﺍﺟﺖ ﻋﻠﻴﻨﻪ ﺳﻨﻪ . ﺗﻮﻓﻰ ﺑﻴﻬﺎ ﺍﺑﻮﻳﻪ ..
ﺣﺰﻧﺖ ﻛﻠﺶ ﻣﺎﺕ ﻭﻣﺎﺭﺍﺿﻲ ﻋﻨﻲ ..
ﺑﻌﺪﻩ ﺗﻮﻓﻰ ﺍﺧﻮﻳﻪ ﺍﺑﻮ ﺇﺳﻼﻡ ﺑﺤﺎﺩﺙ ..
ﺗﻮﺍﻟﺖ ﻋﻠﻴﻪ ﺍﻟﻤﺼﺎﻳﺐ ﻣﺎﺍﺭﺗﺎﺣﻴﺖ ﻛﻠﺶ ..
ﺍﻧﺘﻘﻠﺖ ﻟﻐﻴﺮ ﺷﻘﺔ .. ﻫﻨﺎ ﻛﻞ ﺷﻲ ﺗﻐﻴﺮ
ﺍﺭﺟﻊ ﻟﻠﺒﻴﺖ ﻓﺠﺎﺃﻩ ﻣﺎﺍﻻﻛﻴﻬﺎ ﺍﺳﺄﻝ ﺍﻟﺒﻨﺎﺕ ﺟﺎﻧﻦ ﺯﻏﺎﺭ
ﻳﻜﻮﻟﻦ ﻳﻢ ﺻﺪﻳﻘﺘﻬﺎ ﻣﻦ ﺗﺠﻲ .. ﻳﻮﻣﻴﻪ ﺗﺴﺮﻳﺤﻪ ﺷﻜﻞ ﻭﺻﺒﻎ ﺷﻜﻞ .. ﺗﻜﻮﻝ ﺟﻨﺖ ﺑﺎﻟﺼﺎﻟﻮﻥ
ﺻﺎﻟﻮﻥ ﻳﻮﻣﻴﻪ؟ ؟
ﻭﺍﻟﻠﻪ ﻳﺎﺍﻳﻮﺏ ﺑﻨﺎﺗﻚ ﻛﺒﺮﻥ ﻭﻳﺤﺘﺎﺟﻦ ﻣﺼﺎﺭﻳﻒ ﻭﺍﻧﻪ ﻫﻢ ﺟﺎﻱ ﺍﺭﻭﺡ ﻟﻠﺼﺎﻟﻮﻥ ﺍﺷﺘﻐﻞ ﺷﻮﻳﻪ ﻭﺍﺭﺟﻊ .
. 
ﻭﺍﻧﻪ ﻫﻨﺎ ﺷﻨﻮ ﻃﺮﻃﻮﺭ ﻟﻴﺶ ﻣﺎﺗﻜﻠﻴﻠﻲ ﺭﺍﺡ ﺍﻃﻠﻊ؟
.. ﺍﺩﺭﻱ ﺑﻴﻚ ﻣﺎﺗﻘﺒﻞ ﻟﻬﻴﺞ ﻣﺎﮔﺘﻠﻚ ..
.. ﺍﺩﺭﻱ ﻣﻘﺼﺮ ﻭﻳﺎﺝ ﺍﻧﻪ ﻣﻘﺼﺮ ﻭﻳﺎ ﺑﻨﺎﺗﺞ ﻫﺬﺍ ﺍﻟﻲ ﺍﻛﺪﺭ ﻋﻠﻴﻪ ﻭﺟﺎﻱ ﺍﺑﺬﻝ ﻛﻞ ﺟﻬﺪﻱ ﺑﻌﺪ ﺷﺴﻮﻱ؟ ؟
.. ﺍﺩﺭﻱ ﻳﺎﺍﻳﻮﺏ ﻫﻲ ﻛﻞ ﻃﺎﻗﺘﻚ ﻭﻣﺎﺗﻜﺪﺭ ﺷﺴﻮﻱ ﻣﺎﺗﻜﻮﻟﻲ ﺍﻻﻳﺠﺎﺭ ﻣﺎﺧﺬ ﻧﺺ ﺍﻟﺮﺍﺗﺐ ﻭﻳﺎﺭﻳﺖ ﺷﻘﺔ ﺑﻴﻬﺎ ﺧﻴﺮ ﺍﺛﺎﺙ ﺑﻲ ﺧﻴﺮ .
.. ﺍﻟﺤﻤﺪﻟﻠﻪ ﺍﺣﺴﻦ ﻣﻦ ﻏﻴﺮﻧﻪ .. ﻳﺎﺍﻣﺎﻟﻴﺪ ﻭﺑﻌﺪﻳﻦ ﺑﻨﺎﺗﺞ ﺯﻏﺎﺭ ﻭﺍﻟﻮﺿﻊ ﻣﻮ ﺗﻤﺎﻡ ﺷﻮﻥ ﺗﻌﻮﻓﻴﻬﻦ ﻫﻨﺎ ﻭﺣﺪﻫﻦ .
.. ﻣﺎﻋﻠﻴﻬﻦ ﺷﻲ ﺻﻔﺎ ﻭﺳﻤﻴﻪ ﻛﺒﺎﺭ ﻭﻳﻜﺪﺭﻥ ﻳﻬﺘﻤﻦ ﺣﺘﻰ ﺑﺮﻗﻴﺔ ..
.. ﺍﻣﺎﻟﻴﺪ ﻫﻲ ﺍﻟﺴﺎﻟﻔﻪ ﺗﻨﺴﻴﻨﻬﺎ ﺭﻭﺣﻪ ﻟﻠﺼﺎﻟﻮﻥ ﺑﻌﺪ ﻣﺎﻛﻮ ﺍﻓﺘﻬﻤﺘﻲ ﻭﺍﺫﺍ ﺭﺣﺘﻲ ﺭﺟﻠﻴﺞ ﺍﻛﺴﺮﻫﻦ ..
.. ﺷﻨﻮ ﺗﺎﻳﻬﺘﻠﻚ ﻭﺗﻜﺴﺮﻟﻲ ﺭﺟﻠﻴﻪ؟
.. ﺗﺎﻳﻬﺘﻠﻲ ﺯﻭﺟﺞ ﻭﻏﺼﺒﺎ ﻋﻠﻴﺞ ﻭﺍﺍﺿﺢ .. ﻭﻫﺬﺍ ﺍﻟﻤﻮﺿﻮﻉ ﻳﻨﺴﺪ ﺍﻧﺎ ﺭﺍﺡ ﺍﺣﺎﻭﻝ ﺍﻟﮕﺎﻟﻨﻪ ﻏﻴﺮ ﻣﻜﺎﻥ ..
ﺍﺣﺴﻦ ﻣﻦ ﻫﺬﺍ ..
ﻋﻔﺘﻬﺎ ﻣﺮﺕ ﺍﻳﺎﻡ .. ﻫﻢ ﺍﺭﺟﻊ ﻣﺎﺍﺷﻮﻓﻬﺎ ﻭﺍﻛﺘﻠﻬﺎ ﻭﻣﺎﻳﻔﻴﺪ ﻭﻻ ﺟﻨﻪ ﺍﻛﺘﻞ ﻭﺍﺻﻴﺢ ﻭﺍﺣﺠﻲ ﺗﺮﻛﺪﻟﻬﺎ ﺟﻢ ﻳﻮﻡ ﻭﺗﺮﺟﻊ ﻭﺗﺮﻭﺡ ﻭﺍﺭﺟﻊ ﻣﺎﺍﺷﻮﻓﻬﺎ .. ﺣﺒﺴﺘﻬﺎ ﺑﺎﻟﺒﻴﺖ ﻭﻣﺎﻇﻠﺖ ﺗﻄﻠﻊ ﺣﻴﺎﺗﻨﺎ ﺍﻧﻘﻠﺒﺖ ﺭﺃﺳﺎ ﻋﻠﻰ ﻋﻘﺐ .. ﻣﺸﺎﻛﻞ ﺿﺮﺏ ﻭﺻﻴﺎﺡ ﻭﻋﻨﺎﺩ ﻃﺒﺦ ﻣﺎﺗﻄﺒﺦ ﻛﻠﻪ ﺍﻟﺒﻨﺎﺕ ﻭﻫﻨﻪ ﺻﻐﺎﺭ ﺍﺭﺟﻊ ﺍﺷﻮﻑ ﺣﺘﻰ ﺍﻳﺪﻳﻬﻦ ﻣﺤﺮﻛﺎﺕ ﻣﻦ ﺍﻟﮕﻠﻲ ﻛﻠﻪ ﻫﺬﺍ ﻋﻨﺎﺩ ﻣﺎﺗﻄﺒﺦ ﻭﺗﻠﺢ ﺗﺮﻳﺪ ﺗﺸﺘﻐﻞ ..
ﻓﺪ ﻳﻮﻡ ﺍﺟﺖ ﺳﻤﻴﺔ ﻭﻛﻠﺘﻠﻲ ﻳﺎﺑﻪ ﺗﺮﻩ ﺍﻣﻲ ﺗﺨﺎﺑﺮ ﻭﻟﺪ ﻭﺗﻀﺤﻚ ﻭﺗﺴﻮﻟﻒ ﻭﻭﻭ ..
ﺍﻧﺼﺪﻣﺖ ﻟﺰﻣﺘﻬﺎ ﺟﻨﺰﺗﻬﺎ ﺗﺠﻨﺰ ﺍﺿﺮﺑﻬﺎ ﺑﻮﻛﺴﻲ ﺗﻮﻛﻊ ﺑﺎﻟﻜﺎﻉ ﺛﻮﺍﻧﻲ ﻭﺗﻜﻮﻡ ﻣﺎﺑﻴﻬﻪ ﺷﻲ ﻭﺗﻌﺎﺭﻙ ﻭﺗﻐﻠﻂ ﻭﺗﺼﻴﺢ ﻛﺘﻠﺘﻬﻪ ﻭﺷﻤﺮﺗﻬﺎ ﻋﻠﻰ ﺍﻫﻠﻬﺎ .. ﺧﺬﻳﺖ ﺑﻨﺎﺗﻲ ﻭﺭﺣﺖ ﻟﺒﻴﺖ ﺍﻫﻠﻲ .. ﺍﻟﻲ ﻫﺴﻪ ﺳﺎﻛﻦ ﺑﻲ .. ﺍﻣﻲ ﺍﺳﺘﻘﺒﻠﺘﻨﻲ ﺑﺲ ﺳﻠﻴﻤﺎﻥ ﻭﺟﻬﻪ ﺛﻜﻴﻞ ﻋﻠﻴﻪ . ﻭﻣﺎﻳﺸﺘﻬﻲ ﺑﻨﺎﺗﻲ ﻛﻠﺶ .
ﺍﺷﻮﺍﻕ ﻇﻠﺖ ﻓﺘﺮﺓ ﻣﺎﺗﺤﺎﺟﻴﻨﻲ .. ﻭﻣﺎﺗﺠﻲ ﻟﻠﺒﻴﺖ . .
ﺳﻠﻴﻤﺎﻥ ﺟﺎﻥ ﺳﺎﻛﻦ ﺑﺎﻟﺒﻴﺖ ﺑﻘﻴﻨﻪ ﺳﻮﺍ ﻓﺘﺮﻩ .
ﺑﻌﺪﻫﺎ ﺍﻟﺒﻴﺖ ﻗﺪﻳﻢ ﻭﺍﻟﻐﺮﻑ ﺑﺎﻳﺪﻩ .. ﺷﺎﻝ ﺑﻐﻴﺮ ﺑﻴﺖ .
ﺷﻜﺪ ﺣﺎﻭﻟﺖ ﺍﻣﺎﻟﻴﺪ ﺗﺮﺟﻌﻠﻲ ﻣﺎﺭﺟﻌﺘﻬﺎ ﺗﻨﺪﻣﺖ ﻋﻠﻰ ﺍﻟﻴﻮﻡ ﺍﻟﻲ ﺣﺒﻴﺘﻬﺎ ﺑﻲ .. ﺣﺎﻭﻟﺖ ﺗﺎﺧﺬ ﺍﻟﺒﻨﺎﺕ ﻣﻨﻲ ﺑﻜﻞ ﺍﻟﺴﺒﻞ ﺑﺲ ﻣﺎﻛﺪﺭﺕ ﺍﻧﺎ ﺍﻧﺘﺼﺮﺕ ﻋﻠﻴﻬﺎ ..
ﻻﻥ ﺍﻫﻠﻬﺎ ﻣﺎﻳﺮﺩﻭﻫﻢ ..
ﻃﻠﮕﺘﻬﺎ ﻭﺍﻧﺘﻬﻰ ﻛﻞ ﺷﻲ ﺑﻴﻨﻪ .. ﺳﻤﻌﺖ ﺑﻴﻬﺎ ﺗﺰﻭﺟﺖ
ﺣﺴﻴﺖ ﺍﻧﺎ ﺍﻟﺨﺴﺮﺕ ﻛﻞ ﺷﻲ ﻭﺍﻧﺎ ﺍﻟﻲ ﺗﻀﺮﺭﺕ ..
ﻫﻲ ﻭﻻ ﻫﺎﻣﻬﺎ .. ﺳﻤﻌﺘﻬﺎ ﺑﺎﻟﺤﻀﻴﺾ ﻳﻮﻣﻴﻪ ﺍﺳﻤﻊ ﻋﻨﻬﺎ ﺳﺎﻟﻔﻪ ﻣﻮ ﺣﻠﻮﻩ .. ﺭﺟﻠﻬﺎ ﺳﻜﻴﺮ ..
ﺷﻜﺪ ﺣﺎﻭﻟﺖ ﺍﻣﻲ ﺗﺰﻭﺟﻲ ﭼﺰﺕ ﺭﻭﺣﻲ ﻣﻦ ﺍﻟﻨﺴﻮﺍﻥ ﺑﻌﺪﻫﺎ .. ﻛﺮﻫﺘﻬﻦ ﻛﻠﻬﻦ .. ﻭﻫﻲ ﻗﺼﺘﻲ ﻭﻱ ﺍﻣﺎﻟﻴﺪ ﺑﺎﺧﺘﺼﺎﺭ ﻣﺎﻛﺪﺭﺕ ﺍﺳﻴﻄﺮ ﻋﻠﻴﻬﺎ ﻣﺎﻛﺪﺭﺕ ﺍﺣﺘﻮﻳﻬﺎ ..
ﻣﺎﺍﻋﺮﻑ ﺷﻨﻮ ﺧﻄﺌﻲ ﻭﺑﻨﺎﺗﻲ ﺷﻨﻮ ﺫﻧﺒﻬﻦ ..
ﻣﺮﺕ ﺍﻳﺎﻡ ﻣﻨﻮ ﻳﺸﻮﻓﻨﻲ ﻣﻦ ﺍﻫﻠﻲ ﻳﻜﻮﻟﻲ ﺭﻭﺡ ﺟﻴﺐ ﺑﻨﺎﺗﻚ ﻭﺧﺎﺻﺔ ﺍﺳﻼﻡ ﻭﺳﻠﻴﻤﺎﻥ ﻛﻠﻤﺎ ﻳﺸﻮﻓﻮﻧﻲ ﻭﻏﻴﺮ ﺍﻟﺤﺎﺡ ﺍﻣﻲ ﺑﺎﻟﺒﻴﺖ ..
ﺑﻌﺪ ﻣﺮﻭﺭ ﺷﻬﺮ .. ﺟﻨﺖ ﻃﺎﻟﻊ ﺑﻜﺮﻭﺓ .. ﻟﻤﻜﺎﻥ ﺑﻌﻴﺪ ..
ﺩﮒ ﺗﻠﻴﻔﻮﻧﻲ .. ﺭﻓﻌﺘﻪ .. ﺷﻔﺘﻪ ﺍﺳﻼﻡ ﺟﺎﻭﺑﺘﻪ ..
ﮔﺎﻝ .. ﻋﻤﻮ ﺧﺎﺑﺮﻧﻲ ﻓﺮﺍﺱ .. ﺻﺪﻳﻘﻲ ﻭﺍﺑﻦ ﺟﻴﺮﺍﻧﻪ
ﻳﻜﻮﻝ ﺷﻔﺖ ﺑﻨﺎﺕ ﻋﻤﻚ . ﻧﺰﻟﻦ ﻣﻦ ﺳﻴﺎﺭﺓ ﻭﺍﺣﺪ ﺷﻤﺮﻫﻦ ﺷﻤﺮ . ﺑﺎﻟﺸﺎﺭﻉ ﺭﺍﻳﺤﻠﻬﻦ ﻳﺤﺎﺟﻴﻬﻦ ﺧﺎﻳﻔﺎﺕ ﻭﻳﺒﺠﻦ ﻭﺣﺎﻟﺘﻬﻦ ﻣﺰﺭﻳﺔ .. ﻛﻠﺖ ﺧﻠﻲ ﺍﺧﺎﺑﺮﻙ ﻛﺒﻞ ﻻﺍﺭﻭﺡ ﺍﻟﻬﻦ .
.. ﻻﺍﺍ ﺑﺸﺮﻓﻚ ﻭﻳﻦ ﺑﻴﺎ ﻣﻨﻄﻘﻪ؟ ؟
.. ﻳﻜﻮﻝ ﻋﻠﻰ ﻃﺮﻳﻖ ﺍﻟﻘﺼﻮﺭ ﻣﺸﻤﻮﺭﺍﺕ ..
.. ﺧﺎﺏ ﺍﻧﻪ ﺑﻌﻴﺪ ﻫﺴﻪ ﺻﻮﺏ ﺍﻟﻔﺎﻭ ﻃﺎﻟﻊ ﺭﻭﺡ ﺭﺟﻌﻬﻦ ﻟﻠﺒﻴﺖ .. ﻭﺍﻧﺎ ﺍﻭﺻﻞ ﺍﻟﻜﺮﻭﺓ ﺍﻟﻌﻨﺪﻱ ﻭﺍﺭﺟﻊ ..
ﺻﺎﺭ ﻋﻤﻮ .. ..
ﻇﻠﻴﺖ ﺍﺳﻮﻕ ﻣﺎﺍﺩﺭﻱ ﺷﻠﻮﻥ ﻭﺍﻓﻜﺮ ﺑﻴﻬﻦ ﺷﻨﻮ ﺻﺎﺭ ﻭﻳﺎﻫﻦ ﺑﺲ ﻧﺎﺭ ﺟﻮﺍﻱ ﻭﺍﺭﻳﺪ ﺍﻃﻔﻴﻬﺎ
ﻭﺻﻠﺖ ﺍﻟﻨﺎﺱ ﺍﻟﻲ ﻣﺄﺟﺮﻳﻨﻲ ﻭﺳﻘﺖ ﻟﻠﺒﻴﺖ ..
ﺧﺎﺑﺮﺕ ﺃﺳﻼﻡ ..
ﻫﺎﺍ ﺍﺳﻼﻡ ﺭﺟﻌﺘﻬﻦ ..
ﺍﻱ ﻋﻤﻮ ﺍﺑﻴﺘﻜﻢ ﻫﺴﻪ ..
ﺧﻮﺵ
ﺳﺪﻳﺘﻪ ﻣﻨﻪ ﻭﻛﻤﻠﺖ ﻃﺮﻳﻘﻲ .. ﻭﺻﻠﺖ ﻟﻠﺒﻴﺖ
ﺩﺧﻠﺖ ﺍﻟﺴﻴﺎﺭﻩ ﺑﺎﻟﻜﺮﺍﺝ ..
ﻭﻧﺰﻟﺖ ﻣﻨﻬﺎ ..
ﺟﺎﻥ ﺍﻛﻮ ﺻﻮﻧﺪﻩ ﺭﻓﻴﻌﻪ ﺑﺎﻟﺤﺪﻳﻘﻪ .. ﻣﻠﺼﺘﻬﺎ ﻭﺩﺧﻠﺖ ﻟﻠﺒﻴﺖ ﻭﺍﻧﻪ ﺍﺻﻴﺢ ﺑﺄﻋﻠﻰ ﺻﻮﺕ ﻋﻨﺪﻱ ...
ﻭﻳﻨﻬﻦ ﻭﻳﻨﻬﻦ ...........
ﻳﺘﺒﻊ ..
ﻣﻼﺣﻈﺔ ﻟﻬﺠﺔ ﺍﻟﺤﺠﻴﻪ ﺍﻡ ﺍﻳﻮﺏ ﻟﻬﺠﺔ ﺍﻫﻞ ﺍﺑﻮ ﺍﻟﺨﺼﻴﺐ ﺍﻟﻘﺪﺍﻣﻰ ﺑﻴﻦ ﻗﻮﺳﻴﻦ ﺍﻟﻘﺪﺍﻣﻰ ﻫﺴﻪ ﺍﻻﺟﻴﺎﻝ ﻫﺬﻩ ﻟﻬﺠﺘﻬﻢ ﺗﻐﻴﺮﺕ ﻭﺍﺣﻨﻪ ﻣﻨﻬﻢ ﻭﻗﻠﻴﻞ ﺻﺎﺭﻭﺍ ﻳﺤﺠﻮﻥ ﻫﻴﺞ ﺑﺲ ﺍﻟﻜﺒﺎﺭﻳﻪ ﺑﺎﻟﻌﻤﺮ .
ﺍﻳﻮﺏ ﺑﺲ ﻳﺮﺍﺩﻟﻪ ﻟﻴﻔﻪ ﻭﺻﺎﺑﻮﻧﻪ 👇😂
ﺗﺮﻩ ﺍﻟﺒﻄﻞ ﺍﻧﺬﻛﺮ ﺍﺳﻤﻪ ﺑﺎﻟﺒﺎﺭﺕ ﺑﺲ ﺑﻌﺪﻩ ﻣﺎﻃﻠﻊ ﻟﻠﻌﻠﻢ
ﻳﻌﻨﻲ ﺍﻳﻮﺏ ﻣﻮ ﻫﻮ ﺍﻟﺒﻄﻞ

يتبع

روايات - Novels

السلام عليكم ورحمة الله وبركاته ، موقع روايات-Novels يهتم بنشر جديد الروايات للكتاب العراقين ، حمل تطبيقنا على جوجل بلاي وستمتع بلقراءة ، تمنياتنا لكم بلتوفيق