رواية حكاية سمر ج1 الجزء العشرين
للكاتبة زينب ماجد
.. .
ﻛﺘﻠﻪ ﺑﺲ ﺷﻮﻓﻨﻲ ﻋﻴﻨﻚ ﺑﻜﺮ .. ﺑﺲ ﺍﺷﻮﻓﻬﺎ .. ﺍﺭﻳﺪ ﺍﻟﺰﻣﻪ .. ﻭﻫﻮﻩ ﻛﺪﺍﻣﻲ ﻳﺼﻴﺢ ﻭﻣﺪﻧﻚ .. ﺷﺎﻝ ﻋﻴﻨﻪ ..
ﻭﺷﻔﺘﻬﺎ ﺳﻮﺩﻩ ﻭﺗﺒﺠﻲ ﺩﻡ .. ﻳﻤﻪ ﻓﺮﻓﺤﺖ ﺭﻭﺣﻲ ﻛﻤﺖ ﺍﻟﻄﻢ ﻋﻠﻰ ﺧﺪﻱ ﻭﺍﺑﺠﻲ ﺭﺍﺣﺖ ﻋﻴﻨﻪ ﺭﺍﺍﺍﺍﺣﺖ .. ﻳﺮﺑﻲ ﻋﻤﺖ ﻋﻴﻨﻴﻴﻲ ..
ﺍﺭﻳﺪ ﺍﻟﺰﻣﻪ ﺭﻭﺣﻪ ﺗﻔﺮﻓﺢ ﻣﻦ ﺍﻻﻟﻢ ﻳﺮﻭﺡ ﻣﻨﺎ ﻭﻳﺠﻲ ﻫﻨﺎ .. ﺍﻟﺘﻤﻮ ﺍﻫﻠﻪ ﺑﺲ ﻳﺮﺩﻭﻥ ﻳﺸﻮﻓﻮﻥ ﻋﻴﻨﻪ ..
ﻣﺎ ﻳﻮﻛﻒ ﻭﺑﺲ ﻻﺯﻡ ﻋﻴﻨﻪ .. ﺍﺣﺲ ﺭﻭﺣﻲ ﺧﻠﺼﺖ ﻣﺘﺖ ﻭﺍﻧﻲ ﺍﺷﻮﻓﻪ ﻫﻴﺞ .. ﻋﺎﺩﻝ ﻛﺎﻟﻪ ﺑﺲ ﺍﺑﺪﻝ ﻭﺍﺧﺬﻙ .. ﻃﺐ ﻋﺎﺩﻝ
ﻭﺑﻜﺮ ﻳﺼﻴﺢ ﻋﺎﺍﺍﺍﺍﺩﻝ ﻭﻳﻨﻚ ﻋﺎﺍﺍﺍﺍﺍﺍﺍﺍﺍﺩﻝ .. ﻋﺎﺩﻝ ﻛﺎﻝ ﻳﻠﻪ ﺍﺟﻴﺖ .. ﺍﻣﻪ ﻟﺒﺴﺖ ﻋﺒﺎﺗﻬﺎ ﻭﻣﺸﺖ .. ﺍﻧﻲ ﺟﺮﻳﺖ ﻟﻔﺎﻑ ﻋﻠﺸﺒﺎﻙ ﺧﻠﻴﺘﻪ ﻋﻠﻰ ﺷﻌﺮﻱ ﻭﻃﻠﻌﺖ ..
ﻛﺎﻟﺖ ﺍﻣﻴﺮﻩ ﺳﻤﺮ ﺍﻧﻲ ﺭﺍﺡ ﺍﺭﻭﺡ ﺍﻛﻌﺪﻱ .. ﻣﺎ ﺳﻤﻌﺘﻬﺎ .. ﻃﻠﻌﺖ ﻭﺭﺍﻫﻢ ﻭﺭﻭﺣﻲ ﻃﺎﻳﺮﻩ .. ﺍﺣﺴﻪ ﻭﺟﻌﻪ . ﺑﻴﻪ ..
ﻛﻌﺪﺕ ﻋﻤﺘﻲ ﻫﻴﻪ ﻭﻋﺎﺩﻝ ﻛﺪﺍﻡ .. ﻭﺍﻧﻲ ﺻﻌﺪﺕ ﺑﻜﺮ ﻭﺭﻩ .. ﻳﺸﻴﻞ ﺑﺮﺍﺳﻪ ﻭﻳﺮﺟﻌﻪ ﻣﻦ ﺍﻻﻟﻢ .. ﻟﺰﻣﺖ ﺍﻳﺪﻩ .. ﻭﺧﻠﻴﺖ ﺍﻳﺪﻱ ﺍﻟﺜﺎﻧﻴﻪ ﻋﻠﻰ ﻛﺘﻔﻪ ..
ﻳﻌﺼﺮ ﺍﻳﺪﻱ ﺑﻘﻮﻩ .. ﻭﻳﻜﻠﻲ ﺳﻤﺮ ﻋﻴﻨﻲ ﺩﻣﺮﺗﻨﻲ ﺳﻤﺮ ﺧﻠﺼﻴﻨﻲ ﻣﻦ ﺍﻻﻟﻢ .. ﺩﻣﻮﻋﻲ ﺗﻨﺰﻝ ﻭﺍﺑﺎﻭﻋﻠﻪ .. ﻳﺮﻭﺡ ﺳﻤﺮ ﺍﻧﺘﻪ ﺍﺻﺒﺮ ﻫﺴﻪ ﻧﻮﺻﻞ ..
ﻋﻤﺖ ﻋﻴﻨﻲ ﻭﻻ ﻋﻴﻨﻚ ﺑﻜﺮ .. ﺍﺣﺠﻲ ﻭﻫﻮﻩ ﻳﻌﺼﺮ ﺑﺎﻳﺪﻱ ﺣﻴﻞ ﻣﻦ ﺍﻻﻟﻢ .. ﻭﺩﻣﻮﻉ ﺗﺠﺮﻱ ﺑﻘﻮﻩ .. ﺍﺭﻳﺪ ﺍﺑﺎﻭﻋﻠﻪ ..
ﺣﺴﻴﺖ ﺍﻟﻄﺮﻳﻖ ﺻﺎﺭ ﺳﺎﻋﻪ ﻣﻦ ﻛﺪ ﻣﺎ ﺣﺴﻴﺖ ﺑﺄﻟﻤﻪ .. ﺭﻏﻢ ﻋﺎﺩﻝ ﻳﻤﺸﻲ ..140 ﻃﺎﻳﺮ ﺑﻴﻨﻪ .. ﺑﺲ ﻳﺮﻳﺪ ﻳﻮﺻﻞ ..
ﻭﺻﻠﻨﻪ ﻟﻤﺴﺘﺸﻔﻰ ﺍﺑﻦ ﺍﻟﻬﻴﺜﻢ ﻧﺰﻟﻨﺎﻩ .. ﻋﺎﺩﻝ ﻛﺎﻝ ﺳﻤﺮ ﺍﺧﺬﻳﻪ ﺑﺴﺎﻉ .. ﺍﻛﺼﻠﻪ ﺑﺎﺹ ﻭﺍﺟﻲ ﻭﺭﺍﻛﻢ ..
ﺍﺧﺬﺕ ﺑﻜﺮ ﻭﻋﻴﻨﻪ ﺗﺠﺮﻱ ﺩﻡ .. ﻣﺸﻴﺘﻪ ﺑﻴﻪ ﻟﻠﻄﻮﺍﺭﺉ ﻣﺎﻝ ﺍﺑﻦ ﺍﻟﻬﻴﺜﻢ .. ﺗﻠﻜﻮﻩ ﺍﻟﺪﻛﺎﺗﺮﻩ .. ﻛﺎﻟﻮ ﺷﺒﻴﻪ ..
ﻛﺘﻠﻬﻢ ﺍﺷﻌﺎﻝ ﻧﺎﺭﻱ ﺍﻧﻔﺠﺮ ﺑﺄﻳﺪﻩ .. ﻭﺷﻀﺎﻳﺎ ﻧﺎﺭ ﺩﺧﻠﺖ ﻟﻌﻴﻨﻪ .. ﻭﺩﺗﻨﺰﻝ ﺩﻡ .. ﻭﺣﻴﻞ ﺩﻳﺘﻮﺟﻊ .. ﻛﻌﺪﻭﻭﻭﻩ .. ﻛﺎﻟﻮ ﺍﻟﺒﺎﺹ ﻣﺎﻟﺘﻪ ﻭﻳﻴﻴﻦ ..
ﻛﺘﻠﻬﻢ ﻫﺴﻪ .. ﺩﻧﺤﺠﻲ ﻋﺎﺩﻝ ﻛﺎﻝ ﻫﺬﺍ ﻫﺬﺍ ﺟﺒﺘﻪ .. ﻋﻤﺘﻲ ﺗﺒﺠﻲ ﻭﻟﻴﺪﻱ ﻳﻤﻪ ﺑﻜﺮ ﻋﻴﻮﻧﻲ ﺍﻟﺘﻌﻤﻪ ﻭﻻ ﺍﻧﺘﻪ ﻳﻤﻪ ﻳﺎ ﺿﻮﻩ ﻋﻴﻮﻥ ﺍﻣﻚ ..
ﻛﺎﻟﻠﻬﺎ ﺍﻟﺪﻛﺘﻮﺭ ﺍﻫﺪﻱ ﺣﺠﻴﻪ ﺍﻧﺸﺎﻟﻠﻪ ﺧﻴﺮ .. ﻋﺎﻳﻨﻪ ﻭﻫﺰ ﺭﺍﺳﻪ .. ﻛﺎﻝ ﺷﻜﺪ ﻧﺤﺬﺭ ﻣﻦ ﻫﻠﺸﻌﺎﻻﺕ ﻳﺎﺑﻪ ﺧﻄﺮﻩ ﻳﺎﺑﻪ ﻻ ﺗﺴﺘﺨﺪﻣﻮﻫﺎ ..
ﻣﺎﻛﻮ ﻓﺎﻳﺪﻩ .. ﻭﻫﺎﻱ ﺍﻟﻌﺎﻟﻢ ﺭﺍﻳﺤﻪ ﺑﻴﻬﺎ .. ﻛﺘﻠﻪ ﺳﻨﻪ ﻛﺸﺮﻩ ﻣﻮ ﺳﻨﺔ ﺧﻴﺮ ﻃﻠﻌﺖ .. ﻫﺎﻱ ﺑﺪﺍﻳﺘﻬﺎ ﺍﻟﻠﻪ ﻳﺴﺘﺮ ﻣﻦ ﺗﺎﻟﻴﻬﺎ ..
ﺍﺣﺠﻲ ﻭ ﺍﺑﺎﻭﻉ ﻟﺒﻜﺮ .. ﻭﺩﻣﻮﻋﻲ ﺗﺠﺮﻱ ﻭﺍﻣﺴﺢ .. ﻛﺎﻝ ﺍﻟﺪﻛﺘﻮﺭ .. ﺍﻟﺸﻀﻴﻪ ﻣﺨﺘﺮﻗﻪ ﺟﻔﻦ ﻋﻴﻨﻪ ﻭﻭﺍﺻﻠﻪ ﻟﻠﻌﻴﻦ .. ﻭﻣﺄﺫﻳﺘﻬﺎ ..
ﻛﺘﻠﻪ ﺩﻛﺘﻮﺭ ﻭﺗﺎﻟﻲ .. ﻛﺎﻝ ﺣﺎﻟﻴﺎ ﺭﺍﺡ ﻧﻨﻄﻴﻪ ﺍﻻﺯﻡ .. ﻭﻧﺨﻀﻌﻪ ﺍﻟﺼﺒﺢ ﻟﻼﺳﺘﺸﺎﺭﻳﻪ .. ﻋﻠﻤﻮﺩ ﻧﻘﺮﺭ ﻣﻮﻗﻔﻪ ﺷﻨﻮ ..
ﻛﺘﻠﻪ ﺯﻳﻦ ﺩﻛﺘﻮﺭ .. ﻧﺮﻭﺡ ﺍﺧﺘﺼﺎﺹ ﺍﻓﻀﻞ ﻟﻮ ﻧﺒﻘﻰ ﻫﻨﺎ .. ﻛﺎﻝ ﻭﺍﻟﻠﻬﻲ ﻃﺒﻌﺎ ﺍﻻﺧﺘﺼﺎﺹ ﺍﻓﻀﻞ ﻳﺎﺭﻳﺖ .. ﺗﻮﺩﻭﻩ ﻃﺒﻴﺐ ﻋﻴﻮﻥ .. ﻳﺸﺮﻑ ﺣﺎﻟﺘﻪ
🌿🌿🌿
ﻻﻥ ﺍﻟﺼﺮﺍﺣﻪ ﺻﻌﺒﻪ .. ﻭﻣﻮ ﻻﺯﻡ ﻛﻞ ﻭﺍﺣﺪ ﻳﻨﻄﻲ ﻋﻼﺝ ﺷﻜﻞ .. ﺧﺎﻑ ﺗﻨﻀﺮ ﻋﻴﻨﻪ ﻭﺗﺴﻜﻂ .. ﻛﺎﻟﻪ ﻋﺎﺩﻝ ﻳﻌﻨﻲ ﻧﻄﻠﻌﻪ ﻟﻮ ﺷﻠﻮﻥ ..
ﻛﺎﻟﻪ ﺍﻭﻻ ﻻﺯﻡ ﺍﻧﻀﻔﻬﺎ ﻭﻧﻌﻘﻤﻬﺎ .. ﻭﻧﻨﻄﻴﻪ ﻣﺴﻜﻦ ﻳﻨﺎﻡ ﻋﻠﻴﻬﺎ .. ﻭﻣﻤﻨﻮﻉ ﻳﻤﺪ ﺍﻳﺪﻩ ﺣﺘﻰ ﻟﻮ ﻟﻤﺴﻪ ﻗﻠﻴﻠﻪ ﺗﺘﻀﺮﺭ ﻭﺗﺴﻘﻂ ﺍﻟﺸﺒﻜﻴﻪ ﻣﺎﻝ ﻋﻴﻨﻪ ..
ﻛﺎﻟﺖ ﻋﻤﺘﻲ ﻳﻤﻪ ﻳﻌﻨﻲ ﻳﻄﻴﺐ ﻭﻟﻴﺪﻱ ﻟﻮ ﻻ .. ﻛﺎﻟﻠﻬﺎ ﺣﺠﻴﻪ .. ﻫﻮﻩ ﻋﻤﻠﻴﻪ ﺍﻭﻝ ﺗﺎﻟﻲ .. ﺍﻧﺘﻲ ﻭﺍﻟﺪﻩ ﺍﺩﻋﻴﻠﻪ ﺍﻟﻴﻮﻡ .. ﻭﻻﺩﺓ ﺳﻴﺪ ﺍﻟﻤﺴﻴﺢ ..
ﺍﻟﻤﻌﺮﻭﻑ ﻳﺸﻔﻲ ﺍﻟﻤﺮﺿﻰ ﻭﺍﻻﻋﻤﻰ .. ﺍﻃﻠﺒﻴﻬﺎ ﻣﻦ ﻋﻴﺴﻰ ﺍﻟﻤﺴﻴﺢ ﻭﻫﻮﻩ ﻳﻨﻄﻴﺞ ﻣﺮﺍﺩﺝ ﻳﻤﻪ
ﻛﺎﻟﺘﻠﻪ ﺑﺠﺎﻩ ﺭﻭﺡ ﺍﻟﻠﻪ ﻳﺸﻔﻲ ﻋﻴﻦ ﻭﻟﻴﺪﻱ .. ﻭﺑﻘﺖ ﺗﺪﻋﻲ .. ﺭﺍﺡ ﺍﻟﺪﻛﺘﻮﺭ .. ﺍﻧﻲ ﺩﻣﻮﻋﻲ ﺗﺠﺮﻱ ..
ﺑﻜﺮ ﻛﺎﻋﺪ ﻣﻐﻤﺾ .. ﺑﺲ ﻳﻀﺮﺏ ﻋﻠﻰ ﺭﺟﻠﻪ ﻣﻦ ﺍﻻﻟﻢ .. ﻛﻤﺖ ﻭﻛﻔﺖ ﻳﻤﻪ .. ﺍﺧﺬﺗﻪ ﻭﺧﻠﻴﺖ ﺭﺍﺳﻪ ﺑﺤﻈﻨﻲ .. ﻭﺍﻣﺴﺢ ﻋﻠﻰ ﺷﻌﺮﻩ ..
ﻫﻮﻩ ﻣﺘﭽﻲ ﺭﺍﺳﻪ .. ﻭﻻﺯﻡ ﺟﺎﻛﻴﺘﻲ ﻭﻳﻌﺼﺮ ﺑﻘﻮﻩ .. ﻛﺘﻠﻪ ﺍﺻﺒﺮ ﺑﻜﺮ ﺍﻧﺸﺎﻟﻠﻪ ﺗﺼﻴﺮ ﺯﻳﻨﻪ ﻭﺍﻟﻠﻪ ﻣﺎﻛﻮ ﺷﻲ ..
ﻛﺎﻝ ﺳﻤﺮ ﺍﺣﺲ ﻧﺎﺭ ﻣﺸﺘﻌﻠﻪ ﺑﻌﻴﻨﻲ ﻣﻮﺗﺘﻨﻴﻴﻴﻴﻴﻲ .. ﻋﻤﺘﻲ ﺗﻤﺸﻲ ﻭﺗﺒﺠﻲ ﻭﺗﺪﻋﻲ .. ﻭﻋﺎﺩﻝ ﻣﻜﺮﻓﺺ ﻋﻠﻰ ﺭﺟﻠﻴﻪ ﺑﺎﻟﻜﺎﻉ .. ﻭﻻﺯﻡ ﺍﻳﺪ ﺑﻜﺮ ..
ﻭﺍﻟﺪﻣﻮﻉ ﻣﺘﺠﻤﻌﻪ ﺑﻌﻴﻨﻪ ﻭﻳﺒﺎﻭﻋﻠﻪ .. ﻭﺑﻜﺮ ﻛﺎﻋﺪ ﻭﺭﺍﺳﻪ ﺑﺤﻈﻨﻲ .. ﺍﺟﻪ ﺍﻟﻤﻤﺮﺽ .. ﻧﻮﻣﻪ ﻭ ﻋﻘﻢ ﺍﻟﺠﺮﺡ ..
ﺍﻧﻮﺏ ﺧﻼﻟﻪ ﻛﺎﻧﻮﻧﻪ .. ﻭﻛﺎﻡ ﻳﻀﺮﺑﻪ ﺍﺑﺮ .. ﻭﻳﺨﻠﻴﻠﻪ ﻗﻄﺮﺍﺕ ﺑﻌﻴﻨﻪ .. ﻛﻤﻞ ﻛﺘﻠﻪ ﻟﻤﻤﺮﺽ ﻋﻔﻮﺍ .. ﻧﻄﻠﻊ ﻟﻮ ﻧﺒﻘﻰ ..
ﻛﺎﻝ ﻣﺎ ﺍﻋﺮﻑ ﺍﺳﺌﻠﻲ ﺍﻟﺪﻛﺘﻮﺭ .. ﻛﺘﻠﻪ ﻋﺎﺩﻝ ﺭﻭﺡ ﺍﺳﺌﻞ ﻫﺰ ﺭﺍﺳﻪ ﻭﻣﺸﻰ .. ﺍﺗﻘﺮﺑﺖ ﻳﻢ ﺑﻜﺮ ﻛﺘﻠﻪ ﻫﺎﺍﺍ ..
ﻫﺰ ﺭﺍﺳﻪ ﻭﻫﻮﻩ ﻣﺘﻤﺪﺩ ﻭﻣﻐﻤﺾ ﻋﻴﻮﻧﻪ .. ﻟﺰﻣﺖ ﺍﻳﺪﻩ . ﻭﻛﻌﺪﺕ ﻋﻠﻰ ﺟﺎﻧﺐ ﺍﻟﺴﺮﻳﺮ .. ﻭﺍﻣﻪ ﻋﻠﻰ ﺭﺍﺳﻪ .. ﻣﺨﻠﻴﻪ ﺍﻳﺪﻫﺎ ﻋﻠﻰ ﻛﺼﺘﻪ ﻭﺗﺪﻋﻲ ..
ﺍﺟﻪ ﻋﺎﺩﻝ .. ﻛﺎﻝ ﻳﻜﻮﻝ ﺍﻟﺪﻛﺘﻮﺭ ﺍﺑﻘﻮ ﻛﻢ ﺳﺎﻋﻪ .. ﻟﺤﺘﻰ ﺗﺴﺘﻘﺮ ﻋﻴﻨﻪ .. ﻣﻮ ﺯﻳﻦ ﻋﻠﻴﻬﺎ ﺍﻟﻤﺸﻲ ﻭﺍﻟﺤﺮﻛﻪ ﻳﺼﻴﺮ ﻋﻠﻴﻬﺎ ﺿﻐﻂ ..
ﻛﺎﻋﺪﻳﻦ ﻛﻠﻪ ﺑﺼﻤﺖ ﻳﻢ ﺑﻜﺮ .. ﻭﺑﺮﻭﺩﻩ ﻭﻫﺪﻭﺀ ﺑﺲ ﺍﻟﻜﻠﻮﺏ ﺗﺤﺠﻲ ﻭﺗﺪﻋﻲ .. ﻋﺎﺩﻝ ﻛﺎﻋﺪ ﻋﻠﺴﺪﻳﻪ ﺍﻟﺜﺎﻧﻴﻪ ..
ﻭﻋﻤﺘﻲ ﺑﺎﻟﻜﺎﻉ ﻛﺎﻋﺪﻩ ﻭﻣﺨﻠﻴﻪ ﺍﺩﻳﻬﺎ ﻋﻠﻰ ﺭﺍﺳﻬﺎ .. ﻭﻣﺪﻧﻜﻪ .. ﻭﺍﻧﻲ ﻻﺯﻣﻪ ﺍﻳﺪ ﺑﻜﺮ ﻭﻛﺎﻋﺪﻩ ﻭﻳﺎﻩ ﻋﻠﺴﺮﻳﺮ ..
ﻟﺸﻮﻱ .. ﺟﻤﺪﺕ ﻭﺭﺟﻠﻲ ﻣﻦ ﺍﻟﻜﻌﺪﻩ .. ﻃﻠﻌﺖ ﺑﺮﺍ ﺍﺗﻤﺸﻰ .. ﺍﻣﺸﻲ ﻭﺍﺑﺠﻲ .. ﺍﺟﺖ ﺍﻟﻤﻤﺮﺿﻪ .. ﻛﺎﻟﺖ ﺍﻧﺘﻲ ﺯﻭﺟﺘﻪ ..
ﻫﺰﻳﺖ ﺭﺍﺳﻲ ﻟــ NO ـﺎ .. ﻛﺎﻟﺖ ﺗﺤﺒﻴﻪ .. ﺍﺑﺘﺴﻤﺖ ﻭﺍﻟﺪﻣﻮﻉ ﺑﻌﻴﻦ .. ﻛﺎﻟﺖ ﺍﻟﻴﻮﻡ ﻭﻻﺩﺓ ﺍﻟﻤﺴﻴﺢ ..
ﺭﻭﺣﻲ ﻟﻠﻜﻨﻴﺴﻪ ﺷﻐﻠﻲ ﺷﻤﻌﻪ ﻟﻠﻌﺬﺭﺍﺀ ﻭﺍﻃﻠﺒﻲ ﺑﺤﻖ ﻳﺴﻮّﻉ ﺭﺍﺡ ﺗﻠﺒﻲ ﻧﺪﺍﺋﻚ ﻭﺗﻘﻀﻲ ﺣﺎﺟﺘﻚ ﻣﺠﺮﺑﻪ ..
ﻛﺘﻠﻬﺎ ﺍﻧﺸﺎﻟﻠﻪ .. ﺑﺲ ﺍﻛﻮ ﻫﻨﺎ ﻛﻨﻴﺴﻪ .. ﻛﺎﻟﺖ ﻣﺎ ﺍﻋﺮﻑ ﺍﺳﺌﻠﻲ .. ﻛﺘﻠﻬﺎ ﺍﻧﺸﺎﻟﻠﻪ .. ﺍﺟﻪ ﻋﺎﺩﻝ ﻛﺎﻝ ﻫﺎﺍ .. ﻛﺘﻠﻪ ﺗﻜﻮﻟﻲ ﺍﻃﻠﺒﻲ ﻣﻦ ﺍﻟﻌﺬﺭﺍﺀ ﺑﺤﻖ ﻳﺴﻮﻉ ﺷﺎﻓﻲ ﺍﻟﻤﺮﺿﻰ ﻳﺸﻔﻲ ﻋﻴﻨﻪ .
ﻛﺎﻝ ﺍﻃﻠﺒﻲ .. ﻛﺘﻠﻪ ﻻﺯﻡ ﺍﺷﻐﻞ ﺷﻤﻌﻪ ﺑﺎﻟﻜﻨﻴﺴﻪ .. ﻛﺎﻝ ﻭﻳﻦ ﻧﻠﻜﻪ ﻛﻨﻴﺴﻪ ﻫﺴﻪ .. ﻛﺘﻠﻪ ﻧﺴﺄﻝ ﻭﻧﺮﻭﺡ ﻧﺪﻋﻲ ﻋﺎﺩﻝ ﻓﺪﻭﻭﻩ ﺑﻠﻜﺖ ﻳﺴﺘﺠﻴﺐ ﺍﻟﻠﻪ ﻟﺪﻋﻮﺍﺗﻨﻪ ..
ﻛﺎﻝ ﻟﺤﻈﻪ ﺍﻛﻮﻝ ﻻﻣﻲ .. ﺩﺧﻞ ﻛﺎﻟﻠﻬﺎ ﻳﻤﻪ .. ﺭﺍﻳﺢ ﺷﻮﻱ ﻭﺟﺎﻱ .. ﺩﻳﺮﻱ ﺑﺎﻟﺞ ﻋﻠﻰ ﺑﻜﺮ .. ﻫﺰﺕ ﺭﺍﺳﻬﺎ ﺍﻱ
🌿🌿🌿
ﻛﺎﻝ ﻳﻠﻪ ﺍﻣﺸﻲ .. ﺳﺌﻠﻨﻪ ﻻﺳﺘﻌﻼﻣﺎﺕ ﻋﻠﻰ ﻛﻨﻴﺴﻪ .. ﺩﻻﻧﻪ .. ﻭﺍﺧﺬﻧﻪ ﺍﻟﺴﻴﺎﺭﻩ ﻭﻣﺸﻴﻨﻪ .. ﺭﺩﻧﻪ ﻧﺪﺧﻞ ..
ﺣﺮﺱ ﺍﻟﻜﻨﻴﺴﻪ .. ﻛﺎﻟﻮ ﻣﺴﻠﻤﻴﻦ .. ﻛﺎﻟﻪ ﻋﺎﺩﻝ ﻧﻌﻢ .. ﻛﺎﻝ ﻣﻤﻨﻮﻉ .. ﺍﻧﻲ ﺍﺑﺠﻲ ﻭﺍﺩﻋﻲ ﻃﻮﻝ ﺍﻟﻄﺮﻳﻖ ﻭﻳﻜﻠﻲ ﻣﻤﻨﻮﻉ ..
ﻛﺘﻠﻪ ﻟﻴﺶ ﻣﻤﻨﻮﻉ ﺍﻟﻤﺴﻴﺢ ﺍﻧﺨﻠﻖ ﻟﻠﻨﺼﺎﺭﻯ ﻓﻘﻂ ..
ﻫﺬﺍ ﻧﺒﻲ ﻭﻣﻦ ﺣﻘﻨﻪ ﻧﺪﺧﻞ ﺩﺍﺭﻩ ﻭﻧﻄﻠﺐ ﻣﻨﻪ .. ﺍﻟﺤﺮﺱ ﺍﻟﺜﺎﻧﻲ .. ﺷﺎﻑ ﺩﻣﻮﻋﻲ .. ﻛﺎﻟﻪ ﺧﻠﻬﺎ ﺗﺪﺧﻞ ﺗﻄﻠﺐ ﺣﺎﺟﺘﻬﺎ ﻣﻦ ﺍﻟﻌﺬﺭﺍﺀ ..
ﺍﺧﺘﻲ ﺫﻳﻴﺞ ﺷﻤﻮﻉ .. ﺍﺧﺬﻱ ﺷﻤﻌﻪ ﻭﺷﻐﻠﻴﻬﺎ . ﻭﺍﻫﺪﻳﻬﺎ ﻟﻠﻌﺬﺭﻩ ﺑﺤﻖ ﻳﺴﻮﻉ ﻭﻳﺘﻘﺒﻞ ﻧﺪﺍﺋﻚ ﺑﻤﺸﻴﺌﺔ ﺍﻟﺮﺏ ..
ﻛﺘﻠﻪ ﺷﻜﺮﺍ .. ﺍﺧﺬﻧﻪ ﺷﻤﻌﻪ ﻭﺩﺧﻠﻨﻪ ﺍﻧﻲ ﻭﻋﺎﺩﻝ .. ﺍﻭﻝ ﻣﺮﻩ ﺍﺩﺧﻞ ﻛﻨﻴﺴﻪ ﻣﺒﺎﻭﻋﺖ ﻟﺘﻔﺎﺻﻴﻠﻬﺎ .. ﺑﻜﺪ ﻣﺎ ﻋﻴﻨﻲ ﻋﻠﻌﺬﺭﺍ ..
ﺗﻘﺪﻣﺖ .. ﺷﻐﻠﺖ ﺍﻟﺸﻤﻌﻪ ﻭﻗﺪﻣﺘﻬﺎ .. ﻭﻛﻌﺪﺕ ﺍﺩﻋﻴﻬﺎ ﻭﺍﺑﺠﻲ .. ﺑﺤﻖ ﺍﻟﻤﺴﻴﺢ ﺷﺎﻓﻲ ﺑﻜﺮ .. ﻳﺎ ﺷﺎﻓﻲ ﺍﻟﻤﺮﺿﻰ ﻋﻦ ﺿﻼﻟﻬﻢ ..
ﻳﺎ ﺭﺏ ﺑﺤﻖ ﺭﻭﺣﻚ ﺍﻟﻤﺴﻴﺢ ﺷﺎﻓﻲ ﻋﻴﻦ ﺑﻜﺮ ﻭﻻ ﺗﻌﻤﻴﻬﺎ .. ﺍﺑﻌﺪ ﻋﻨﻪ ﺍﻻﻟﻢ ﺑﺠﺎﻫﻚ ﻳﺎﺭﺏ ﺑﺠﺎﻫﻚ ..
ﺩﻧﻜﺖ ﺍﺑﺠﻲ .. ﻛﻤﻠﺖ .. ﻟﻜﻴﺖ ﻋﺎﺩﻝ ﻛﺎﻋﺪ ﻭﻣﺨﻠﻲ ﺍﺩﻳﻪ ﻋﻠﻰ ﺭﺍﺳﻪ .. ﻛﺘﻠﻪ ﻫﺎﺍ .. ﻛﺎﻝ ﺧﻠﺼﺘﻲ .. ﻛﺘﻠﻪ ﺍﻱ .. ﻛﺎﻝ ﻳﻠﻪ ..
ﺭﺟﻌﻨﻪ ﻟﻠﻤﺴﺘﺸﻔﻰ ﺑﻜﺮ ﺑﻌﺪﻩ ﻧﺎﻳﻢ .. ﻛﺘﻠﻬﺎ ﻋﻤﻪ ﻫﻢ ﻛﻌﺪ .. ﻣﺴﺤﺖ ﺩﻣﻮﻋﻬﺎ ﻭﻛﺎﻟﺖ ﻟــ NO ـﺎ ..
ﺳﺎﻋﻪ ﻭﺍﺧﺬﻧﻪ ﺑﻜﺮ ﻭﺭﺟﻌﻨﻪ ﻟﻠﺒﻴﺖ .. ﺩﺧﻠﺘﻪ ﻟﻐﺮﻓﺘﻪ .. ﻛﺎﻟﺖ ﻋﻤﺘﻲ ﺳﻤﺮ ﺗﺒﻘﻴﻦ ﻳﻤﻪ ﻟﻮ ﺍﻧﻲ ﺍﺑﻘﻰ ﻛﺘﻠﻬﺎ ﻋﻤﻪ ﺭﻭﺣﻲ ..
ﺍﻧﻲ ﺭﺍﺡ ﺍﺑﻘﻰ ﻳﻢ ﺭﺍﺳﻪ .. ﻧﻮﻣﺘﻪ .. ﻛﺘﻠﻪ ﺗﺤﺲ ﺑﺎﻟﻢ .. ﻛﺎﻝ ﻗﻠﻴﻞ .. ﻛﺘﻠﻪ ﻧﺎﻡ .. ﺟﺮﻳﺖ ﺍﻟﻜﺮﺳﻲ ﺍﻟﻤﺘﺤﺮﻙ ﻭﺟﺒﺘﻪ ﻳﻤﻪ ..
ﻣﺨﻠﻴﻪ ﺍﻳﺪﻱ ﻋﻠﻰ ﺭﺍﺳﻪ . ﻣﻐﻤﺾ ﻭﺍﻧﻲ ﺍﻣﺴﺢ ﺑﺸﻌﺮﻩ .. ﻟﺤﺪ ﻣﺎ ﻏﻔﺖ ﻋﻴﻮﻧﻲ .. ﻧﺰﻟﺖ ﻟﻠﻜﺎﻉ ..
ﻟﺰﻣﺖ ﺍﻳﺪﻩ ﻭﺧﻠﻴﺖ ﺭﺍﺳﻲ ﻳﻢ ﺍﻳﺪﻩ ﻭﻧﻤﺖ ﻛﻌﺪﻩ .. ﻭﺍﻳﺪﻱ ﺑﺄﻳﺪﻩ ﺷﺎﺑﻜﺘﻬﺎ .. ﺣﺘﻰ ﻟﻮ ﻛﻌﺪ ﺍﻧﺘﺒﻪ ..
ﻧﺎﻳﻤﻪ .. ﻣﺮﺕ ﺳﺎﻋﻪ .. ﻭﺳﺤﺐ ﺍﻳﺪﻩ .. ﻓﺰﻳﺖ .. ﻛﺘﻠﻪ ﻫﺎﺍ ﺑﻜﺮ .. ﻛﺎﻝ ﺣﺮﻛﺘﻨﻲ ﻣﻮﺗﺘﻨﻲ ﺷﺴﻮﻱ .. ﻛﺘﻠﻪ ﺭﺍﺡ ﺍﻧﻄﻴﻚ ﻓﺎﻟﻴﻮﻡ ..
ﺍﻧﻄﻴﺘﻪ ﻓﺎﻟﻴﻮﻡ .. ﻭﻫﻮﻩ ﺑﻌﺪﻩ ﻳﻠﻮﻭﺏ .. ﺍﻣﺴﺢ ﺑﺸﻌﺮﻩ ﻭﺍﺭﺗﻞ ﻗﺮﺍﻥ ﻟﺤﺘﻰ ﻳﺴﻜﻦ ﺑﻴﻬﺎ .. ﺭﺟﻊ ﻧﺎﻡ ..
ﺭﺟﻌﺖ ﻧﻤﺖ .. ﻟﻠﺼﺒﺢ ﺩﺧﻠﺖ ﻋﻠﻴﻨﻪ ﺭﻧﺎ ﻭﺧﻮﺍﺗﻪ .. ﺍﻧﻲ ﻧﺎﻳﻤﻪ ﻓﺰﻳﺖ ﻣﻦ ﺩﻭﺳﺖ ﺭﻧﺎ ﻋﻠﻰ ﺭﺟﻠﻲ ..
ﻛﺎﻟﺖ ﺍﺭﻳﺪ ﺍﺷﻮﻓﻪ .. ﻫﻤﻴﺖ ﻣﻮ ﻫﺴﻪ ﺭﻧﺎ ﺧﻞ ﻳﻜﻌﺪ ﻛﻮﻩ ﻧﺎﻡ .. ﻛﺎﻟﺖ ﻣﻌﻠﻴﺞ ﺍﻧﺘﻲ .. ﻛﺎﻟﺘﻠﻬﺎ ﺍﻣﻴﺮﻩ ﺍﺫﺍ ﻧﺎﻳﻢ ﻋﻮﻓﻴﻪ .. ﺧﻄﻴﻪ ..
ﻃﻠﻌﻦ .. ﻛﺎﻝ ﺳﻤﺮ ﻣﻲ .. ﻛﺘﻠﻪ ﺍﻱ .. ﻛﻌﺪﺗﻪ ﻭﺷﺮﺑﺘﻪ .. ﻛﺘﻠﻪ ﺗﻜﻮﻡ ﻳﻤﻬﻢ ﻟﻮ ﻣﺎ ﺑﻴﻚ ﺣﻴﻞ .. ﻛﺎﻝ ﺍﻟﻢ ﺫﺍﺑﺤﻨﻲ ﻣﺎﺑﻴﻪ ﺩﻭﺧﺘﻬﻢ .. ﺭﺍﺳﻲ ﻳﻨﺼﺪﻉ ﻣﻦ ﺣﺠﻴﻬﻢ ..
ﻛﺘﻠﻪ ﺑﺮﺍﺣﺘﻚ .. ﺍﺣﺠﻲ ﻭﻻﺯﻣﻪ .. ﺍﻳﺪﻩ .. ﺭﺩﺕ ﺍﻛﻮﻡ .. ﻟﺰﻡ ﺍﻳﺪﻱ .. ﻛﺎﻝ ﻭﻳﻦ .. ﻛﺘﻠﻪ ﺑﺲ ﺍﺭﻭﺡ ﺍﺑﺪﻝ ﻣﻼﺑﺴﻲ ..
ﺑﻨﻄﺮﻭﻧﻲ ﺻﺎﺭ ﻛﻠﻪ ﻃﻴﻦ ﻣﻦ ﺍﻟﺸﺎﺭﻉ .. ﻛﺎﻝ ﻣﻦ ﺍﻧﺎﻡ ﺭﻭﺣﻲ .. ﺍﺑﻘﻲ ﻳﻤﻲ ﺳﻤﺮ .. ﻛﺘﻠﻪ ﻣﺎﺷﻲ ﺑﺲ ﺍﺭﺗﺎﺡ ..
ﻛﺎﻝ ﻣﻮﺗﻨﻲ ﺍﻻﻟﻢ ﺳﻤﺮ ﺷﺴﻮﻱ ﻣﻮ ﻃﺒﻴﻌﻲ ﻳﺬﺑﺢ .. ﺍﺭﻳﺪ ﺍﺣﻜﻬﺎ ﺣﺮﻛﺘﻨﻲ .. ﻛﺘﻠﻪ ﻣﻴﺼﻴﺮ ﻋﻴﻮﻧﻲ .. ﺗﻨﺪﻣﺮ ﻟﻮ ﻟﺰﻣﺘﻬﺎ ..
🌿🌿🌿🌿
ﻣﺪﻳﺖ ﺍﻳﺪﻱ .. ﺷﺒﻜﺘﻬﺎ ﺑﺄﻳﺪﻩ .. ﻭﺍﻧﻲ ﻛﺎﻋﺪﻩ ﻳﻤﻪ .. ﻛﺘﻠﻪ ﺍﺗﺨﻴﻞ ﺷﻐﻼﺕ ﺣﻠﻮﻩ .. ﺭﻭﺡ ﻟﻌﺎﻟﻢ ﺑﻌﻴﺪ ﻭﺍﻧﺘﻪ ﺭﺍﺡ ﺗﻨﺴﻰ ﺍﻻﻟﻢ ..
ﻛﺎﻝ ﺍﺧﺬﻳﻨﻲ .. ﻛﺘﻠﻪ ﺍﺧﺬﻙ ﻟﻴﺶ ﻻ .. ﺍﺧﺬﻙ ﻣﻦ ﺍﻟﻌﺎﻟﻢ ﻛﻠﻪ .. ﺍﺧﺬ ﺭﻭﺣﻚ ﻭﺭﻭﺣﻲ .. ﻭﻧﻤﺸﻲ ﺑﻌﻴﻴﻴﻴﺪ ﺑﻌﻴﻴﻴﺪ ..
ﻛﺎﻝ ﻭﻳﻦ .. ﻛﺘﻠﻪ ﻟﻼﺣﻼﻡ .. ﺍﻟﻤﻜﺎﻥ ﺍﻟﻮﺣﻴﺪ ﺍﻟﻠﻲ ﻧﻤﺎﺭﺱ ﺣﺒﻨﻪ ﺑﺪﻭﻥ ﻗﻴﻮﺩ .. ﻧﺤﺐ ﺑﻌﻀﻨﻪ ﻟﺤﺪ ﻣﻨﺬﻭﺏ ..
ﻧﺼﻴﺮ ﺍﺟﻤﻞ ﺍﺛﻨﻴﻦ ﻃﺎﻳﺮﻳﻦ ﺑﺎﻟﻬﻮﺍ .. ﺑﺲ ﺍﻧﻲ ﻭﻳﺎﻙ .. ﺑﺎﻻﺣﻼﻡ .. ﺑﻌﻴﺪ ﻋﻦ ﻛﻞ ﻫﻠﻨﺎﺱ ﻭﺍﻟﻌﺎﻟﻢ ﺑﻜﺮ ﻭﺳﻤﺮ ﺑﺲ ..
ﺍﺧﺬ ﻧﻔﺲ ﻭﻛﺎﻝ ﺷﻮﻛﺖ .. ﻛﺘﻠﻪ ﻣﻮ ﺟﺎﻱ ﺍﻛﻠﻚ ﺑﺎﻻﺣﻼﻡ .. ﻛﺎﻝ ﺗﺎﻟﻲ ﺍﻟﺤﻠﻢ ﺗﻔﺰ ﻭﺗﺨﻠﺺ ﺳﻌﺎﺩﺗﻚ .. ﺳﻤﺮ ﺍﺭﻳﺪﺝ ﺩﻭﻭﻡ ﻣﻮ ﻳﻮﻡ .. ﻳﺤﺠﻲ ﻭﻫﻮﻩ ﻣﻐﻤﺾ
ﻛﺘﻠﻪ ﺍﻧﺸﺎﻟﻠﻪ ﺍﻟﻠﻪ ﻳﺒﺎﻭﻋﻠﻨﻪ ﻭﻣﺪﺍﻡ ﻧﺤﺐ ﺑﻨﻴﻪ ﺻﺎﻓﻴﻪ ﻓﺪ ﻳﻮﻡ ﻳﺴﻌﺪﻧﻪ ﺛﻖ .. ﺍﻟﻠﻪ ﻳﻌﺼﺮ ﺍﻻﻧﺴﺎﻥ ﺍﻟﺰﻳﻦ ﻣﺜﻞ ﻋﺼﺮ ﺍﻟﻌﻨﺐ ..
ﻟﺤﺘﻰ ﻳﻄﻠﻊ ﻣﻨﻪ ﺍﻃﻴﺐ ﻭﺍﺣﻠﻰ ﺷﻲ .. ﻭﻫﻮﻩ ﺻﺒﺮﻩ ﻭﺍﻳﻤﺎﻥ ﺍﻻﻧﺴﺎﻥ .. ﻭﻟﻌﻞ ﺍﻟﻠﻪ ﻳﺤﺪﺙ ﺑﻌﺪ ﺫﻟﻚ ﺍﻣﺮﺍ .. ﺑﻜﻴﻔﻪ ..
ﻛﺎﻝ ﻳﺮﺍﺩﻟﻬﺎ ﺑﺨﺖ ﺍﻭﻭﻭﻑ ﻋﻤﺖ ﻋﻴﻮﻧﻲ ﻭﺑﻌﺪ ﻣﺎ ﺍﺷﻮﻓﺞ .. ﻛﺘﻠﻪ ﻟﻴﺶ ﺍﻟﺜﺎﻧﻴﻪ ﻫﻢ ﻣﺘﺸﻮﻑ ﺑﻴﻬﺎ ..
ﻛﺎﻝ ﻟــ NO ـﺎ .. ﺑﺲ ﻣﻦ ﻭﺟﻊ ﺍﻻﻭﻟﻰ ﺍﻟﺜﺎﻧﻴﻪ ﻣﺎ ﻋﻨﺪﻱ ﻗﺪﺭﻩ ﺍﻓﺘﺤﻬﺎ .. ﻋﺼﺮ ﺍﻳﺪﻱ ﺣﻴﻞ .. ﻭﻛﺎﻝ ﺳﻤﺮ ﻻ ﺗﻌﻮﻓﻴﻨﻲ ..
ﻗﺮﺑﺞ ﻳﻤﻲ ﻳﺮﻳﺤﻨﻲ .. ﻟﺪﺭﺟﺔ ﺗﺮﺗﺨﻲ ﺍﻋﺼﺎﺑﻲ ﻭﺍﻧﺴﻰ ﺣﺘﻲ ﻭﺟﻌﻲ .. ﻋﺼﺮﺕ ﺍﻳﺪﻩ ﺑﺎﻳﺪﻱ .. ﻭﻃﺒﻄﺒﺖ ﻋﻠﻴﻬﺎ ..
ﻛﺘﻠﻪ ﺑﻌﻴﻮﻥ ﺍﺧﻠﻴﻚ ﻭﺍﻟﻠﻪ . ﻣﺎ ﺍﻋﻮﻓﻚ ﻟﺘﺨﺎﻑ .. ﺩﻧﺤﺠﻲ ﻭﻃﺒﺖ ﺍﻣﻪ .. ﺗﺴﺄﻟﻪ ﻋﻠﻰ ﺍﺫﺍ ﺧﻒ ﺍﻻﻟﻢ ﺍﻭ ﻻ ..
ﺍﻧﻮﺏ ﺧﻮﺍﺗﻪ ﻭﻋﺎﺩﻝ ﻫﻢ ﺍﺟﻪ .. ﻭﻧﺎﺱ ﻋﻤﺎﻣﻲ ﻭﺍﻗﺎﺭﺑﻨﻪ ﻭﺣﺘﻲ ﺍﻫﻠﻲ ﺍﺟﻮ .. ﻣﺎﻣﺎ ﻭﺑﺎﺑﺎ ﺷﺎﻓﻮﻩ .. ﻛﻞ ﻫﺬﺍ ﻭﺍﻧﻲ ﺍﺑﺪ ..
ﻣﺎ ﻛﻤﺖ ﻣﻦ ﻳﻤﻪ .. ﻭﺍﻛﻔﻪ ﻓﻮﻙ ﺭﺍﺳﻪ .. ﻭﺣﺘﻪ ﻟﻜﻤﻪ ﻣﺎ ﺧﻠﻴﺖ ﺑﺤﻠﻜﻲ .. ﻫﻮﻩ ﻣﻴﺸﺘﻬﻲ .. ﻭﺍﻧﻲ ﻭﻳﺎﻩ .. ﻳﺎ ﻧﻔﺲ ﺍﻟﺘﻘﺒﻞ ﺍﻟﺰﺍﺩ .. ﻭﺑﻜﺮ ﻫﻴﺞ ﺣﺎﻟﺘﻪ ..
ﺍﺧﺮ ﺷﻲ .. ﺻﺎﺡ ﺳﻤﺮ .. ﻛﺘﻠﻪ ﻋﻴﻮﻧﻲ .. ﻛﺎﻝ ﻃﻠﻌﻴﻬﻢ ﻛﻠﻬﻢ ﻭﺍﻟﻠﻪ ﺩﺧﺖ ﺭﺍﺳﻲ ﺍﻧﻔﺠﺮ .. ﺍﻣﻪ ﻛﺎﻟﺖ ﻳﻠﻪ ﻛﻮﻣﻮ ..
ﻃﻠﻌﺘﻬﻢ .. ﻭﺑﻘﻴﺖ ﻛﺎﻋﺪﻩ ﻳﻤﻪ ﻭ ﺍﻏﻨﻴﻠﻪ ﺩﺭﺕ ﺍﻧﺴﺎﻙ ﻭﺍﺧﻠﺺ ﻣﻦ ﻛﻼﻡ ﺍﻟﻨﺎﺱ .. ﺍﻏﻨﻲ ﺑﻬﺪﻭﺀ ﻭﺍﻟﻌﺐ ﺑﺸﻌﺮﻩ .. ﻭﻫﻮﻩ ﻣﻐﻤﺾ ﻋﻴﻨﻪ ﻭﻣﺘﻤﺪﺩ ..
ﺍﻋﺮﻓﻪ ﻣﻦ ﻳﺤﺲ ﺑﺎﻟﻢ ﻳﻜﻮﻡ ﻳﻘﺒﺾ ﺍﻳﺪﻩ ﻭﻳﻀﺮﺏ ﻋﻠﺴﺮﻳﺮ ﻟﻮ ﻳﻌﺼﺮ ﺍﻳﺪﻱ ﺍﻭ ﺍﻟﻔﺮﺍﺵ ﻻﻥ ﻣﻴﻜﺪﺭ ﻳﺤﻜﻬﺎ ﻭﺗﺤﺮﻛﻪ .. .. ﺑﺲ ﺍﺫﺍ ﺍﺭﺗﺨﻰ ﻣﻌﻨﺎﻫﺎ ﻣﺮﺗﺎﺡ ..
ﻧﺎﻡ .. ﻟﻠﻌﺼﺮ .. ﺍﺟﻪ ﺍﺑﺮﺍﻫﻴﻢ ﺍﺑﻦ ﻋﻤﺘﻲ .. ﻛﺎﻟﻪ ﺍﻣﺸﻲ ﺍﻭﺩﻳﻚ ﻟﻄﺒﻴﺐ ﻛﻮﻟﺶ ﺯﻳﻦ ﻳﻌﺎﻳﻨﻚ ..
ﻛﺎﻝ ﺑﻜﺮ ﺳﻤﺮ ﺭﻭﺣﻲ ﻭﻳﺎﻱ .. ﻛﺎﻟﺘﻠﻪ ﺍﻣﻪ ﺷﺘﺴﻮﻱ ﺳﻤﺮ .. ﻛﺎﻟﻠﻬﺎ ﺗﺴﺎﻋﺪﻧﻲ .. ﻻﻥ ﻛﻮﻩ ﺍﻓﺘﺢ ﻋﻴﻨﻲ ﻣﺎ ﺍﻛﺪﺭ ﺍﺷﻮﻑ ..
ﻛﺎﻟﺘﻠﻪ ﺍﻧﻪ ﺍﺭﻭﺡ ﻭﻳﺎﻙ .. ﻛﺎﻟﻠﻬﺎ ﻋﺎﺩﻝ ﺧﻞ ﺗﺮﻭﺡ ﻭﻳﺎﻩ ﺳﻤﺮ ﻳﻤﻪ ﺍﺣﺴﻦ .. ﺳﻤﺮ ﺧﻔﻴﻔﺔ ﺑﺎﻟﺤﺮﻛﻪ .. ﺗﻜﺪﺭﻟﻪ ..
ﻛﺘﻠﻪ ﺍﻭﻙ ﻟﺤﻈﺎﺕ .. ﺑﺲ ﺍﺳﺒﺢ ﻭﺍﺑﺪﻝ .. ﺭﻛﺾ ﺭﺣﺖ ﺳﺒﺤﺖ ﻭﺑﺪﻟﺖ .. ﺩﺧﻠﺖ ﻭﺍﻛﻒ ﺑﻜﺮ ﻛﺪﺍﻡ ﺍﻟﻜﻨﺘﻮﺭ ..
ﻭﻛﻮﻩ ﻳﻔﺘﺢ ﻋﻴﻨﻪ ﺍﻟﺜﺎﻧﻴﻪ ﻭﻳﺸﻮﻑ ﺷﻨﻮ ﻳﺨﺘﺎﺭ .. ﻃﺒﻴﺖ ﺍﺧﺘﺎﺭﻳﺘﻠﻪ ﺍﻟﻤﻼﺑﺲ .. ﺩﺭﺕ ﻭﺟﻬﻲ ﻣﻨﻪ .. ﻭﻫﻮﻩ ﻳﺒﺪﻝ .. ﺍﻧﻲ ﺭﺣﺖ ﻟﻠﺠﺮﺍﺭﻩ .. ﺣﻈﺮﺗﻠﻪ ﺍﻟﺴﺎﻋﻪ ﻭﺍﻟﻨﻈﺎﺭﻩ
🌿🌿🌿
ﺩﺭﺕ ﻟﻜﻴﺘﻪ ﻳﻠﺒﺲ ﺑﺎﻟﺒﻠﻮﺯﻩ .. ﺟﺮﻳﺖ ﺍﺩﻳﻪ ﻟﺒﺴﺘﻪ ﺍﻟﺴﺎﻋﻪ .. ﻭﺍﻧﻄﻴﺘﻪ ﺍﻟﻨﻈﺎﺭﻩ ﺑﺄﻳﺪﻩ .. ﻛﺎﻝ ﺗﻌﺒﺘﺞ .. ﻛﺘﻠﻪ ﺑﻜﺮ ﺍﻧﺘﻪ ﺗﺤﺠﻲ ﻫﻴﺞ ..
ﻟﻚ ﻟﻮ ﺍﻧﻄﻴﻚ ﻋﻴﻮﻧﻲ ﺍﺑﺪﺍﻝ ﻋﻴﻨﻚ ﻭﺍﻟﻠﻪ ﻣﺎ ﺍﻭﺍﻓﻴﻚ .. ﻛﺎﻝ ﻟﺘﻜﻮﻟﻴﻦ ﻫﻴﺞ .. ﺍﺳﻢ ﺍﻟﻠﻪ ﻋﻠﻰ ﻋﻴﻮﻧﺞ ..
ﺍﺧﺬﺗﻪ ﻭﻣﺸﻴﻨﻪ .. ﺍﺑﺮﺍﻫﻴﻢ ﺍﺧﺬﻧﻪ ﻟﻠﺪﻛﺘﻮﺭ .. ﺣﺠﺰﻧﻪ .. ﻛﺪﺍﻣﻨﻪ ﻫﻮﺍﻳﻪ .. ﻛﻌﺪﻧﻪ ﻧﻨﺘﻀﺮ .. ﺑﻜﺮ ﻻﺯﻡ ﺍﻳﺪﻱ ..
ﺍﺣﺴﻪ ﺍﺗﻌﻠﻖ ﺑﻴﻪ ﻣﺜﻞ ﺍﻟﻄﻔﻞ ﺍﻟﻤﺮﻳﺾ ﻣﻦ ﻳﺘﻌﻠﻖ ﺑﺄﻣﻪ .. ﻭﺍﻧﻲ ﻣﺮﺗﺎﺣﻪ ﺑﺘﻌﻠﻘﻪ .. ﻳﺎﺭﻳﺖ ﺍﺭﺩﻟﻪ ﻭﻟﻮ ﺟﺰﺀ ﻗﻠﻴﻞ ﻣﻦ ﺗﻌﺒﻪ ﻭﻳﺎﻱ ..
ﻛﺎﻋﺪﻩ ﻭﻫﻮﻩ ﻛﺎﻋﺪ .. ﻋﻠﻰ ﻛﻌﺪﺗﻲ .. ﻏﻔﻴﺖ ﻣﻦ ﺍﻟﻨﻌﺎﺱ .. ﺻﺎﺣﻮ ﺑﻜﺮ ﺧﻠﻴﻞ ﺣﺎﻣﺪ ..
ﺗﺤﺮﻛﺖ ﺍﻳﺪﻩ ﺑﺄﻳﺪﻱ ﻓﺰﻳﺖ .. ﻛﺎﻝ ﺳﻤﺴﻢ ﺷﻨﻮ ﻧﻤﺘﻲ .. ﻣﻐﻤﺾ ﻋﻴﻮﻧﻪ .. ﻛﺘﻠﻪ ﻻ ﺑﺲ ﻏﻤﻀﺖ ﻋﻴﻮﻧﻲ .. ﻛﺎﻝ ﻧﻌﺴﺘﻲ ..
ﻛﺘﻠﻪ ﻣﻴﻬﻢ ﻛﻮﻡ ﻳﻠﻪ .. ﻛﻮﻣﺘﻪ ﺩﺧﻠﻨﻪ ﻟﻠﺪﻛﺘﻮﺭ .. ﻓﺤﺼﻪ .. ﻫﺰ ﺭﺍﺳﻪ .. ﻛﺘﻠﻪ ﻫﺎﺍ ﺩﻛﺘﻮﺭ .. ﻛﺎﻝ ﺣﻴﻞ ﻣﺘﺄﺫﻳﻪ ﻟﻼﺳﻒ ..
ﻛﺘﻠﻪ ﻭﺍﻟﺤﻞ .. ﻛﺎﻝ ﺍﻧﺴﻮﻳﻠﻪ ﻋﻤﻠﻴﻪ ﻭﺑﻠﻜﺖ ﻳﺼﻴﺮ ﺍﺣﺴﻦ .. ﻛﺎﻟﻪ ﺍﺑﺮﺍﻫﻴﻢ .. ﺯﻳﻦ ﻟﻮ ﺳﻔﺮﻧﺎﻩ ﺑﺮﻩ ﺍﺣﺴﻦ ..
ﻛﺎﻟﻪ ﻃﺒﻌﺎ ﺍﺣﺴﻦ .. ﺑﺮﺍ ﺍﺟﻬﺰﻩ ﺣﺪﻳﺜﻪ ﻭﺍﻟﻌﻠﻢ ﺍﻛﺜﺮ ﺗﻄﻮﺭ .. ﻟﻮ ﺗﻜﺪﺭﻭﻥ ﺗﺴﻔﺮﻭﻩ .. ﺳﻔﺮﻭﻩ ﻓﻮﺭﺍ ..
ﻣﻴﺼﻴﺮ ﻳﺘﺄﺧﺮ .. ﺍﺳﺒﻮﻉ ﻟﻮ ﻣﺎ ﺍﺟﺮﻳﺖ ﺍﻟﻌﻤﻠﻴﻪ .. ﺗﻨﻌﻤﻲ ﻋﻴﻨﻪ .. ﻭﺍﺳﺘﺤﺎﻟﻪ ﺗﺮﺟﻊ ﻧﻀﺮﻫﺎ ..
ﻭﺑﻤﺮﻭﺭ ﺍﻟﻮﻗﺖ ﺗﻀﺮﺏ ﻋﻠﺜﺎﻧﻴﻪ .. ﻟﺬﻟﻚ ﺍﺳﺘﻌﺠﻠﻮ .. ﺗﺮﺩﻭﻥ ﺍﻛﺘﺒﻠﻪ ﻋﻤﻠﻴﻪ ﻓﻮﺭﺍ ﻟﻮ ﺗﺴﻔﺮﻭﻩ .. ﻛﺎﻝ ﺧﺎﻟﺪ ﻻﺍ ﻧﺴﻔﺮﻩ ﺍﺣﺴﻦ .. ﻣﺎ ﻧﻜﺪﺭ ﻧﺠﺎﺯﻑ ﻫﻨﺎ ..
ﺑﻜﺮ ﻣﺪﻧﻚ ﺭﺍﺳﻪ ﻭﻣﻐﻤﺾ ﻋﻴﻨﻪ .. ﺷﺪﻳﺖ ﻋﻠﻰ ﺍﻳﺪﻩ . ﻛﺘﻠﻪ ﺍﻋﺮﻓﻚ ﻛﺪﻫﺎ .. ﻟﺘﺨﺎﻑ ﺍﻟﻠﻪ ﻣﻮﺟﻮﺩ .. ﻫﺰ ﺭﺍﺳﻪ .. ﻛﺘﺒﻠﻨﻪ ﺍﻟﺪﻛﺘﻮﺭ ﺩﻭﺍ ﻭﻃﻠﻌﻨﻪ
ﻛﺘﻠﻪ ﺍﺑﺮﺍﻫﻴﻢ ﻭﻳﻦ ﻧﺴﻔﺮﻩ .. ﻛﺎﻝ ﺍﻛﻮ ﺻﺪﻳﻖ ﻋﻨﺪﻱ ﻫﻢ ﻋﻴﻨﻪ ﺳﻜﻄﺖ ﻭﺳﻮﻭﻟﻬﺎ ﻋﻤﻠﻴﻪ ﻫﻨﺎ ﻭﻓﺸﻠﺖ .. ﻭﺩﻭﻩ ﻻﻟﻤﺎﻧﻴﺎ ﻭﻫﺴﻪ ﻳﺸﻮﻑ ﻣﺜﻞ ﺍﻟﻮﺭﺩ ..
ﻛﺘﻠﻪ ﺧﺎﺑﺮﻟﻨﻴﺎﻩ .. ﺟﺮ ﻓﻮﻧﻪ .. ﻭﺧﺎﺑﺮ .. ﺣﺠﻪ ﺑﻌﻴﺪ ﻭﺍﺟﻪ .. ﻛﺘﻠﻪ ﻫﺎﺍ .. ﻛﺎﻝ ﻫﺎﻫﻴﻪ ﻧﺼﺤﻨﻲ ﺑﻴﻪ ﻭﻛﺎﻝ ﺩﻛﺘﻮﺭ ﺟﺪﺍ ﻋﺒﻘﺮﻱ ..
ﻛﺎﻝ ﺑﻜﺮ ﻣﺴﺘﻌﺪ ﺗﺴﺎﻓﺮ .. ﻛﺎﻟﻪ ﻟﻴﺶ ﻛﺪﺍﻣﻲ ﻏﻴﺮ ﺣﻞ .. ﻛﺎﻝ ﻫﺎﻫﻴﻪ ﻣﻦ ﺑﺎﺟﺮ ﺍﺑﻌﺚ ﺗﻘﺎﺭﻳﺮﻩ ﺑﺎﻻﻳﻤﻴﻞ ﻟﺼﺪﻳﻖ ﺑﺎﻟﻤﺎﻧﻴﺎ ..
ﻭﺍﺳﻮﻳﻠﻪ ﺍﻟﻔﻴﺰﻩ ﻭﺍﻃﻠﻊ ﺑﻴﻪ .. ﻛﺘﻠﻪ ﺑﺠﺎﻩ ﺍﻟﻨﺒﻲ ﺍﻧﺸﺎﻟﻠﻪ ﻳﻴﺴﺮﻫﺎ .. ﻛﺎﻝ ﺍﻧﺸﺎﻟﻠﻪ .. ﻳﻠﻪ ﻧﺮﺟﻊ ﻟﻠﺒﻴﺖ ..
ﺭﺟﻌﻨﺎ .. ﻧﻮﻣﺖ ﺑﻜﺮ .. ﻭﺭﺣﺖ ﻟﻐﺮﻓﺘﻲ ﺑﺪﻟﺖ .. ﻛﻌﺪﺕ ﻣﺎ ﺍﺣﺴﻴﺖ ﺍﻻ ﻏﻔﻴﻴﺖ .. ﻧﺎﻳﻤﻪ .. ﻭﺩﺧﻠﺖ ﺍﻣﻴﺮﻩ .. ﺳﻤﺮ ﺍﻛﻌﺪﻱ ﺳﻤﺮ ..
ﻛﻤﺰﺕ .. ﻛﺘﻠﻬﺎ ﺷﺒﻴﻪ ﺑﻜﺮ .. ﻛﺎﻟﺖ ﺧﺒﺺ ﺍﻻﻣﻪ ﻋﻠﻴﺞ .. ﻣﻮ ﺗﻜﻮﻝ ﻋﻴﻮﻧﻪ ﻣﻮﺟﻮﻋﻪ ﺗﻜﻮﻝ ﻣﻔﻄﻮﻡ ﻋﻠﻴﺞ ..
ﻛﻤﺖ ﻣﻦ ﻣﻜﺎﻧﻲ ﺭﻛﺾ .. ﻋﻤﺘﻲ ﺗﻜﻠﻪ ﻳﺎ ﻳﻤﻪ ﺑﺲ ﻛﻮﻝ ﺷﺘﺮﻳﺪ .. ﻫﻮﻩ ﻭﺍﻛﻒ ﻭﻳﺼﻴﺢ ﺻﻴﺤﻮﻟﻴﺎﺍﺍﺍﻩ ﺍﻛﻠﻜﻢ ﺻﻴﺤﻮﻟﻴﺎﺍﺍﻫﺎ ..
ﺍﺟﻴﺖ ﻟﺰﻣﺖ ﺍﻳﺪﻩ .. ﺧﻠﻪ ﺍﻳﺪﻩ ﻋﻠﻰ ﻋﻴﻨﻪ ﻭﺑﺎﻭﻋﻠﻲ .. ﻛﺘﻠﻪ ﺗﻌﺎﻝ ﻟﺘﺼﻴﺢ ﺑﻜﺮ ﻣﻮ ﺯﻳﻦ ﻋﻠﻴﻚ .. ﻳﺰﻳﺪ ﺍﻟﻀﻐﻂ ﻋﻠﻰ ﻋﻴﻮﻧﻚ ..
ﻛﺎﻝ ﻭﻳﻦ ﺭﺣﺘﻲ .. ﻛﺘﻠﻪ ﻭﺍﻟﻠﻪ ﻏﻔﻴﺖ ﺑﺪﻭﻥ ﻣﺎ ﺍﺩﺭﻱ .. ﻛﻌﺪ ﻭﺧﻠﻪ ﺍﻳﺪﻩ ﻋﻠﻰ ﺭﺍﺳﻪ .. ﻭﻛﺎﻝ ﺗﻌﺒﺘﺞ ﺍﺩﺭﻱ ﻭﺍﻟﻠﻪ ﺑﺲ ﺳﻤﺮ ﺭﺍﺡ ﺍﺗﺨﺒﻞ ﻭﺍﻟﻠﻪ ﺭﺍﺡ ﺍﺗﺨﺒﻞ ..
🌿🌿🌿
ﺍﺣﺲ ﺣﺮﻳﻖ ﺑﻌﻴﻨﻲ ﻣﻮ ﺍﻟﻢ .. ﺫﺑﺤﻨﻲ ﺭﺍﺳﻲ ﺭﺍﺡ ﻧﻔﺠﺮ ﻣﻦ ﻭﺟﻌﻲ ﻣﻮ ﻣﺘﺤﻤﻞ ﺻﻮﺗﻬﻢ ﻭﻫﻤﻪ ﻳﺤﺠﻮﻥ ﻫﻮﺍﻱ ..
ﻛﺘﻠﻪ ﻳﻌﻴﻮﻥ ﺳﻤﺮ ﺍﻧﺘﻪ .. ﻟﺘﻌﺐ ﻧﻔﺴﻚ .. ﺍﺳﻔﻪ ﻏﻔﻴﺖ .. ﺑﻌﺪ ﻣﺎ ﺍﺭﻭﺡ ﻭﺍﻟﻠﻪ ﻧﺎﻡ .. ﺳﺎﻋﺪﺗﻪ ﻭﻧﻮﻣﺘﻪ ﻋﻠﺴﺮﻳﺮ ..
ﺑﻘﻴﺖ ﺍﻟﻌﺐ ﺑﺸﻌﺮﻩ .. ﻫﻮﻩ ﻳﻌﺼﺮ ﺑﺄﻳﺪﻱ ﻣﻦ ﺍﻻﻟﻢ .. ﺑﻘﻴﺖ ﺍﺭﺗﻞ ﻗﺮﺍﻥ ﺍﺭﺗﻞ ﻟﺤﺪ ﻣﺎ ﺍﺭﺗﺨﻰ ﻭﻧﺎﻡ ..
ﺳﺤﺒﺖ ﻧﻔﺴﻲ ﻣﻦ ﻋﻨﺪﻩ ﺑﺨﻔﻪ ﻋﻠﻤﻮﺩ ﻟﻴﺤﺲ .. ﻭﻋﻠﻰ ﺍﻃﺮﺍﻑ ﺍﺻﺎﺑﻴﻌﻲ ﻃﻠﻌﺖ .. ﺳﻮﻳﺘﻠﻪ ﺷﻮﺭﺑﺔ ﺧﻀﺎﺭ ..
ﺩﺍ ﺍﺭﺟﻊ .. ﺍﺟﻪ ﻋﺎﺩﻝ .. ﻛﺎﻝ ﺳﻤﺮ .. ﻫﺬﻱ ﺍﻻﺩﻭﻳﻪ ﻣﺎﻝ ﺑﻜﺮ .. ﺗﻨﻄﻴﻬﺎ ﺍﻟﻪ ﻋﻠﻮﻗﺖ . ﻭﻫﺎﻱ ﺍﻟﻘﻄﺮﻩ ﻛﻞ ﺳﺎﻋﺘﻴﻦ .. 4 ﻗﻄﺮﺍﺕ ..
ﺗﻮﻗﺘﻴﻦ ﺍﻟﻤﻮﺑﺎﻳﻞ ﺣﺘﻰ ﻟﻮ ﻧﺎﻳﻢ ﺗﻨﻄﻴﻬﻴﺎﻩ .. ﻣﺎﺷﻲ .. ﻛﺘﻠﻪ ﭐפﮔـﻴﮧ .. ﻛﺎﻝ ﻣﺎ ﺍﻭﺻﻴﺞ ﻋﻠﻴﻪ ﺳﻤﺮ .. ﻣﻮ ﺗﻨﺴﻴﻦ .. ﺗﺮﻩ ﺍﺫﺍ ﻏﻠﻄﺘﻲ ﺑﺎﻟﺪﻭﻩ ﻭﺑﺎﻻﻭﻗﺎﺕ ﺗﺤﺘﺮﻙ ﻋﻴﻨﻪ ..
ﻛﺘﻠﻪ ﻻ ﺍﻧﺸﺎﻟﻠﻪ ﺭﺍﺡ ﺍﺣﻔﻈﻬﻢ ﻭﺍﻭﻗﺖ ﺍﻟﻤﻮﺑﺎﻳﻞ .. ﺍﺧﺬﺕ ﺍﻟﺪﻭﻩ .. ﺧﻠﻴﺘﻪ ﺑﺎﻟﺼﻴﻨﻴﻪ ﻭﺩﺧﻠﺖ ﺍﻟﻐﺮﻓﻪ .. ﻫﻮﻩ ﺑﻌﺪﻩ ﻧﺎﻳﻢ ..
ﺗﺮﻛﺘﻬﺎ .. ﻭﻛﻌﺪﺕ ﻳﻤﻪ .. ﺍﻧﻮﺏ ﺭﺣﺖ ﺷﻐﻠﺖ ﺍﻟﻜﻮﻣﺒﻴﻮﺗﺮ ﻣﺎﻟﺘﻪ .. ﻭﻛﻌﺪﺕ ﺍﺗﺼﻔﺢ ﻣﻮﺍﻗﻊ ﻭﺍﺑﺎﻭﻉ ﻓﻴﺪﻳﻮﻫﺎﺕ ..
ﺣﺴﻴﺘﻪ ﺍﺗﺤﺮﻙ .. ﻛﻤﺖ .. ﻛﺘﻠﻪ ﻫﺎﺍ ﺑﻜﺮ .. ﻛﺎﻝ ﺳﻤﺮ ﺟﻮﻋﺎﻥ .. ﻛﺘﻠﻪ ﻫﺎﻱ ﺳﻮﻳﺘﻠﻚ ﺷﻮﺭﺑﻪ .. ﻛﺎﻝ ﺍﻧﻄﻴﻨﻴﺎﻫﺎ ..
ﺍﻧﻄﻴﺘﻪ .. ﺑﺎﻭﻋﺖ ﻳﻔﺘﺢ ﻧﺺ ﻋﻴﻦ ﻳﺒﺎﻭﻉ ﻭﻳﺎﻛﻞ .. ﻛﺘﻠﻪ ﺍﻧﻄﻴﻨﻲ ﺍﻧﻲ ﺍﻭﻛﻠﻚ .. ﺍﺑﺘﺴﻢ .. ﻛﺎﻝ ﻟﻮ ﻣﺎ ﺍﻻﻟﻢ .. ﺟﺎﻥ ﺩﻋﻴﺖ ﺍﻟﻠﻪ ﺩﻭﻡ ﻳﺨﻠﻴﻨﻲ ﺍﻋﻤﻰ ..
ﻛﺘﻠﻪ ﺑﻌﻴﺪ ﺍﻟﺸﺮ ﺷﻨﻮ ﻫﻠﻜﻼﻡ .. ﻛﺎﻝ ﻭﺍﻟﻠﻪ ﻗﺎﺑﻞ ﺣﺘﻰ ﻟﻮ ﺍﺧﺴﺮ ﻋﻴﻮﻧﻲ ﻭﺗﺼﻴﺮﻳﻦ ﺍﻟﻲ .. ﺍﻗﺒﻞ ﺑﺲ ﺻﻴﺮﻱ ﻣﻠﻜﻲ ..
ﻛﺘﻠﻪ ﺗﻜﻮﻡ ﻭﺍﻟﻠﻪ .. ﻭﺍﻟﻠﻪ ﻳﻜﺘﺒﻠﻨﻪ ﺍﻟﻜﺎﺗﺒﻪ .. ﺑﺲ ﻛﻮﻧﻚ ﺳﺎﻟﻢ .. ﻣﺎ ﺍﺭﻳﺪ ﻣﻦ ﺍﻟﺪﻧﻴﺎ ﺷﻲ .. ﻛﻤﻠﺖ ﺍﻧﻄﻴﺘﻪ ﺍﻟﺪﻭﻩ ..
ﻭﺑﻘﻴﺖ ﻳﻤﻪ ﺍﺳﻮﻟﻒ ﻭﺍﺩﺭﺩﺵ ﻭﺍﺿﺤﻜﻪ .. ﻟﺤﺪ ﻣﺎ ﺗﻌﺐ ﻭﻃﻠﻊ ﻋﻠﻴﻪ ﺍﺛﺮ ﺍﻟﺪﻭﻩ ﻭﺍﻟﻤﺴﻜﻨﺎﺕ ﻭﻧﺎﻡ ..
ﺑﻘﻴﺖ ﻛﺎﻋﺪﻩ ﺑﻐﺮﻓﺘﻪ .. ﺳﺎﻋﻪ ﺍﺭﻭﺡ ﻟﻠﻜﻮﻣﺒﻴﻮﺗﺮ .. ﻭﺳﺎﻋﻪ ﺍﻓﺘﺮ ﻭﺍﻛﻠﺐ ﺑﻐﺮﺍﺿﻪ .. ﺩﻙ ﺍﻟﻤﻮﺑﺎﻳﻞ ..
ﻋﺒﺎﻟﻲ ﻣﻨﺒﻪ .. ﻃﻠﻊ ﺍﺗﺼﺎﻝ .. ﺭﺣﺖ ﻟﻠﺤﻤﺎﻡ . ﻛﻠﺖ ﺍﻟﻮ ﻣﻨﻮﻭ .. ﻭﺍﺣﺪ ﻳﺘﻨﻔﺲ ﻭﻣﺜﻞ ﺍﻟﻤﻨﺸﻮﻝ .. ﻳﻌﻨﻲ ﻳﺒﺠﻲ ..
ﻛﻠﺖ ﻣﻨﻮ .. ﻛﺎﻝ ﻣﺎ ﺗﺮﺗﺎﺣﻴﻦ ﺑﺤﻴﺎﺗﺞ ﻭﺍﻟﻠﻪ ﻣﺪﺍﻡ ﻛﺴﺮﺗﻲ ﻛﻠﺒﻲ .. ﻛﺘﻠﻪ ﺍﺭﻛﺎﻥ ﻫﺬﺍ ﺍﻧﺘﻪ .. ﻛﺎﻝ ﻛﻞ ﻏﺼﻪ ﺑﻜﻠﺒﻲ ﻋﺴﺎﻫﺎ ﺑﺬﻣﺘﺞ ..
ﻋﺸﺘﻲ ﻭﻣﺎ ﻫﻤﺞ ﺣﺎﻟﻲ .. ﻭﻋﺎﺟﺒﺞ ﺑﻜﺮ ﻭﺑﺎﻗﻴﺘﻠﻪ .. ﻛﺘﻠﻪ ﺷﻨﻮ ﺑﻜﺮ .. ﺷﻌﻠﻴﻪ .. ﻛﺎﻝ ﺳﻤﺮ ﺍﻧﺘﻲ ﺗﺮﻛﻀﻴﻦ ﻭﺭﻩ ﻣﺼﻠﺤﺘﺞ ...
ﺍﺑﺪﺍ ﻣﻮ ﺑﺮﻳﺌﻪ ﻻ ﻭﺍﻟﻠﻪ .. ﺍﻭﻝ ﻭﺍﺣﺪ ﻋﺎﺩﻝ ﺍﻟﺤﻠﻮ ﺍﻟﻠﻲ ﺗﺴﻤﻲ ﺟﻨﺘﻠﻤﺎﻥ ﺑﻌﺘﻴﻨﻲ ﻋﻠﻰ ﻣﻮﺩﻩ .. ﻭﻣﻦ ﺑﻌﺪﻫﺎ ﻣﺎ ﺻﺮﻓﻠﺞ ﺍﻟﺠﻤﺎﻝ ﺣﻮﻟﺘﻲ ﻋﻠﻰ ﺍﺑﻮ ﺍﻟﺠﻴﺐ ﺍﻟﻤﺘﺮﻭﺱ ..
ﺑﺲ ﺣﺴﺎﻓﻪ ﺣﺒﻴﺘﺞ .. ﺍﺧﺬﺕ ﻧﻔﺲ .. ﻛﺘﻠﻪ ﺷﺘﺮﻳﺪ ﺍﺭﻛﺎﻥ .. ﻭﻟﻴﺶ ﺍﻟﻴﻮﻡ ﺫﻛﺮﺗﻨﻲ .. ﻛﺎﻝ ﺍﻟﻴﻮﻡ ﻟﻴﻠﺔ ﻋﺮﺳﻲ ﻭﻣﻮ ﻛﺎﺩﺭ ﺍﻭﺻﻞ ﻣﺮﺗﻲ ﻣﻦ ﻭﺭﺍﺝ ..
ﺭﺣﺘﻲ ﺍﻟﻠﻪ ﻭﻳﺎﺝ .. ﺍﺧﺬﻱ ﺣﺒﺞ ﻣﻦ ﻛﻠﺒﻲ ﻟﻴﺶ ﺗﺒﻘﻴﻪ .. ﻭﺍﻟﻠﻪ ﻛﻞ ﻋﻤﺮﺝ ﻣﺎ ﺗﺮﺗﺎﺣﻴﻦ ﻭﺗﺒﻘﻴﻦ ﻣﻨﻔﻮﺳﻪ ﺑﻌﻴﻨﻲ ..
ﻭﻣﺎ ﺗﺸﻮﻓﻴﻦ ﺍﻟﺴﻌﺎﺩﻩ ﻭﺍﺗﺬﻛﺮﻳﻬﺎ ﻭﻛﻮﻟﻲ ﻫﺎﻱ ﺣﻮﺑﺔ ﺳﻴﺪ ﺍﺭﻛﺎﻥ .. ﺟﺪﻱ ﻣﺤﻤﺪ ﻭﻣﺎ ﺗﻌﺪﻱ ﺣﻮﺑﺘﻲ ﺍﻧﺸﺎﻟﻠﻪ ﺍﺷﻮﻓﻬﺎ ﺑﻴﺞ
🌿🌿🌿
ﻛﺘﻠﻪ ﺍﺭﻛﺎﻥ .. ﺍﺫﺍ ﺍﻧﺘﻪ ﺑﺲ ﻛﻠﺒﻚ ﻳﻮﺟﻌﻚ .. ﺍﻧﻲ ﻛﻠﻲ ﻭﺟﻊ .. ﻋﺒﺎﻟﻚ ﻣﺮﺗﺎﺣﻪ ﺑﻌﻴﺸﺘﻲ .. ﻭﺍﻟﻠﻪ ﻋﺬﺍﺏ .. ﺑﺲ ﻣﺠﺒﻮﺭﻩ ..
ﻣﺘﺮﻳﺪﻧﻲ ﺍﺭﺗﺎﺡ ﻋﺴﺎﻧﻲ ﻛﻞ ﻋﻤﺮﻱ ﻣﺎ ﺍﺭﺗﺎﺡ .. ﺑﺲ ﺍﺭﻳﺪ ﻣﻨﻚ ﺷﻐﻠﻪ ﻭﺣﺪﻩ ﺍﺗﺮﺟﺎﻙ .. ﺍﺫﺍ ﺍﻧﺘﻪ ﺻﺪﻙ ﺳﻴﺪ ﻭﺍﺑﻦ ﺭﺳﻮﻝ ﺍﻟﻠﻪ ..
ﺍﻃﻠﺐ ﻣﻦ ﺟﺪﻙ ﻳﺸﺎﻓﻲ ﺑﻜﺮ .. ﻛﺎﻝ ﺷﺒﻴﻪ .. ﻛﺘﻠﻪ ﺍﻧﻀﺮﺑﺖ ﻋﻴﻨﻪ ﺑﺎﺷﻌﺎﻝ ﻧﺎﺭﻱ .. ﻭﻋﻤﻠﻴﺘﻪ ﺻﻌﺒﻪ ﻭﺧﻄﺮﻩ .. ﻓﺪﻭﻩ ﺍﺭﻛﺎﻥ ﺍﺩﻋﻴﻠﻪ ..
ﻛﺎﻝ ﻫﻠﻜﺪ ﺧﺎﻳﻔﻪ ﻋﻠﻴﻪ ﻭﺗﺤﺒﻴﻪ .. ﻛﺘﻠﻪ ﺍﻧﺘﻪ ﻣﻨﻮ ﻳﻮﺻﻠﻚ ﺍﺧﺒﺎﺭﻱ .. ﻛﺎﻝ ﺳﺄﻟﺖ ﺍﻣﺞ .. ﻛﺎﻟﺖ ﻋﺎﻳﺸﻪ ﺑﺨﻴﺮ ﺑﻜﺮ ..
ﻛﺘﻠﻪ ﺍﺫﺍ ﻋﺎﻳﺸﻪ ﺑﺨﻴﺮﻩ ﺍﺩﻋﻲ ﺍﻟﻠﻪ ﻳﺤﻔﻈﻠﻴﺎﻩ .. ﻛﺎﻝ ﺑﺴﻴﻄﻪ ﺍﺭﻭﺡ ﺍﻟﺼﺒﺢ ﺍﻟﻤﺴﺠﺪ ﺍﻟﻜﻮﻓﻪ ﻭﺍﺻﻠﻴﻠﻪ ﻭﺍﻃﻠﺐ ﺍﻟﺪﻋﻮﻩ ..
ﺑﺲ ﺍﺩﻋﻲ ﻳﺸﻔﻲ .. ﺑﺲ ﻛﻮﻥ ﻣﺘﺮﺗﺎﺣﻴﻦ ﺍﻧﺘﻲ . ﻭﺗﺒﻘﻴﻦ ﻣﻌﻠﻌﻠﻪ ﻣﺜﻞ ﻛﻠﺒﻲ ﻃﻮﻝ ﻋﻤﺮﺝ .. ﻛﺘﻠﻪ ﻗﺎﺑﻠﻪ ..
ﺳﺪﻳﺖ ﺍﻟﺨﻂ .. ﺍﺧﺬﺕ ﻧﻔﺲ .. ﻃﻠﻌﺖ ﻣﻦ ﺍﻟﺤﻤﺎﻡ .. ﺍﻧﻀﺮﺑﺖ ﺍﺑﻜﺮ ﻣﻜﺘﻒ ﻭﻭﺍﻛﻒ ﺍﺑﺎﺏ ﺍﻟﺤﻤﺎﻡ .. ﻛﺘﻠﻪ ﺷﺪﺳﻮﻱ ﻫﻨﺎ .. ﻛﺎﻝ ﺍﺭﻳﺪ ﺍﺳﺘﺨﺪﻡ ﺍﻟﺤﻤﺎﻡ ..
ﻛﺘﻠﻪ ﺍﺩﺧﻞ .. ﺩﺧﻞ ﻭﻃﻠﻊ .. ﺭﺟﻊ ﻟﻠﺴﺮﻳﺮ .. ﺑﺲ ﻣﺒﻴﻦ ﺿﺎﻳﺞ .. ﻛﺘﻠﻪ ﺍﺭﻛﺎﻥ .. ﻛﺎﻝ ﺷﻨﻮ .. ﻛﺘﻠﻪ ﻟﺘﻔﻜﺮ ﻣﻨﻮ ﺟﻨﺖ ﺍﺣﺠﻲ ﻭﻳﺎﻩ .. ﺍﺭﻛﺎﻥ ﺍﻧﻲ ﺍﻛﻮﻟﻜﻴﺎﻩ ..
ﻛﺎﻝ ﺷﻌﻨﺪﻩ .. ﻛﺘﻠﻪ ﺍﻟﻴﻮﻡ ﻋﺮﺳﻪ .. ﻭﻳﻜﻮﻟﻲ ﻣﺘﺮﺗﺎﺣﻴﻦ ﻭﺍﻧﻲ ﻣﻌﺬﺏ ﻭﻣﻦ ﻫﻠﻜﻼﻡ .. ﻛﺎﻝ ﻫﺬﺍ ﻫﻢ ﺟﺮﻣﺘﻲ ﺑﺤﺎﻟﻪ .. ﻛﺘﻠﻪ ﻣﻦ ﻓﻜﺮ ﺣﻈﻲ ﻏﻴﺮ ..
ﺩﻧﺎﻡ ﻧﺎﻡ .. ﺍﻧﻄﻴﺘﻪ ﺩﻭﺍﻫﺎ ﻭﻧﺎﻡ .. ﺑﻘﻴﺖ . ﻛﻞ ﺳﺎﻋﺘﻴﻦ ﻓﺎﺯﻩ ﻭﺍﻧﻄﻴﻪ ﺍﻟﺪﻭﻩ .. ﻛﻌﺪﺕ ﺍﻟﺼﺒﺢ ﻋﻤﺘﻲ ﻣﺘﻀﺎﻳﻘﻪ ﻣﻨﻲ ﻋﺸﻨﻮ ﻣﺎ ﺍﺩﺭﻱ ..
ﺍﺟﻪ ﺍﺑﺮﺍﻫﻴﻢ .. ﻛﺎﻝ ﺳﻤﺮ ﻃﻠﻌﻴﻠﻲ ﺟﻮﺍﺯ ﺑﻜﺮ .. ﺧﻞ ﺍﺧﺬﻩ ﺍﻓﻴﺰﻩ .. ﻛﺘﻠﻪ ﺍﻱ .. ﺟﺎﻥ ﺑﻜﺮ ﻛﺎﻟﻪ ﺳﻤﺮ ﺗﺮﻭﺡ ﻭﻳﺎﻧﻪ . ﺍﺑﺮﺍﻫﻴﻢ ..
ﺩﺭﺗﻠﻪ ﻭﺟﻬﻲ ﺑﺘﻌﺠﺐ .. ﻛﺎﻟﻪ ﺑﺮﺍﺣﺘﻚ .. ﻛﺎﻟﺘﻠﻪ ﺍﻣﻪ ﻭﺷﻨﻮ ﺗﺎﺧﺬﻫﺎ ﻋﻠﻰ ﺷﻨﻮ ﺗﺮﻩ ﺧﺒﻠﺘﻨﻪ ﺑﻜﺮ ﺳﻤﺮ ﺳﻤﺮ ﺷﻨﻮ ﻣﻔﻄﻮﻡ ﺍﻧﺘﻪ ..
ﻛﺎﻟﻠﻬﺎ ﻳﻤﻪ ﻻ ﺗﺴﺘﻐﻠﻴﻦ ﻭﺟﻌﻲ ﻣﺎﺑﻴﻪ ﺣﻴﻞ ﺍﺻﻴﺢ .. ﻛﺎﻟﺖ ﺍﻧﺘﻲ ﺷﻌﻨﺪﺝ ﻭﻳﺎﻩ .. ﻛﺘﻠﻬﺎ ﻋﻤﻪ ﺷﻨﻮ ﻫﻠﺤﺠﻲ ﺍﻧﻲ ﺍﺫﺍ ﺩﺍ ﺍﺧﺪﻡ ﺑﻜﺮ ﻭﺍﺩﺍﺭﻳﻪ ..
ﻓـ ﻻﻧﻪ ﻳﺴﺘﺎﻫﻞ ﻫﻮﻩ ﺍﻟﻮﻛﻒ ﻭﻳﺎﻳﻪ ﻛﻞ ﻋﻤﺮﻩ ﻭﻣﺨﻼﻧﻲ ﺍﺣﺘﺎﺝ ﺍﻱ ﺷﻲ .. ﺗﺮﺩﻳﻦ ﻫﺴﻪ ﺍﻋﻮﻓﻪ .. ﻛﺎﻝ ﻋﺎﺩﻝ ﻳﻤﻪ .. ﺍﺗﺮﻛﻲ ﻫﻠﻜﻼﻡ ﻫﺬﺍ ..
ﺳﻮﻭ ﺍﻟﻠﻲ ﻳﺮﺗﺎﺣﻠﻪ ﺑﻜﺮ ﺑﺲ ﺧﻞ ﺍﻃﻴﺐ ﻋﻴﻨﻪ .. ﻻ ﺗﻀﺎﻳﻘﻮﻩ ﺑﺲ ﻭﺟﻌﻪ ﻛﺎﻓﻲ ﻋﻠﻴﻪ .. ﻛﺎﻟﺘﻠﻪ ﺍﻧﺘﻪ ﺷﻨﻮ ﻣﺎ ﻋﻨﺪﻙ ﻏﻴﺮﻩ ..
ﺗﺨﻠﻲ ﻣﺮﺗﻚ ﺗﺮﻭﺡ ﻭﻳﻪ ﺍﺛﻨﻴﻦ ﺷﺒﺎﺏ ﻣﺤﺮﻣﻴﻦ ﻋﻠﻴﻬﺎ .. ﻛﺎﻟﻠﻬﺎ ﺍﺑﺮﺍﻫﻴﻢ ﻋﻤﻪ ﺷﺒﻴﺞ ﺷﻨﻮ ﺷﺒﺎﺏ .. ﺍﺣﻨﻪ ﻣﻨﻮ ﻭﺳﻤﺮ ﻣﻨﻮ ... ﻏﻴﺮ ﺍﺧﺘﻨﻪ ..
ﻛﺎﻟﺘﻠﻪ ﻫﺬﺍ ﺍﻟﺤﺠﻲ ﻣﺎ ﻳﻤﺸﻲ ﻳﻢ ﺍﻟﻠﻪ .. ﻛﺎﻟﻠﻬﺎ ﻋﻤﻪ ﻫﺴﻪ ﺍﺗﺮﻛﻴﻨﻪ ﻣﻦ ﺍﻟﺤﺮﺍﻡ ﻭﺍﻟﻌﻴﺐ ﺍﻟﺮﺟﺎﻝ ﻣﺤﺘﺎﺟﻬﺎ ﻭﻳﺎﻩ ..
ﻭﻫﻴﻪ ﻓﺎﺭﻏﻪ ﻣﺎ ﻋﺪﻫﺎ ﺷﻲ .. ﻭﺻﺮﺍﺣﻪ ﻳﺎﺭﻳﺖ ﺗﺮﻭﺡ ﻭﻳﺎﻧﻪ .. ﻻﻥ ﻫﻴﻪ ﺗﺘﻜﻠﻢ ﻟﻐﻪ ﺍﻧﻜﻠﻴﺰﻳﻪ ﻭﺧﺮﻳﺠﺔ ﺍﻧﻜﻠﻴﺰﻱ ..
ﻭﺍﻧﻲ ﻭﺑﻜﺮ ﻣﺎ ﻧﻔﻬﻢ ﻧﻜﻠﻴﺰﻱ ﺷﺮﺍﺡ ﻧﻔﺘﻬﻢ ﻫﻨﺎﻙ .. ﺍﺣﺴﻦ ﻣﻨﺮﻭﺡ ﻧﺘﺮﺟﻢ ﻭﻗﻮﺍﻣﻴﺲ ﻭﺩﻭﺧﻪ ﻫﻴﻪ ﻭﻳﺎﻧﻪ .
ﻭﺍﺣﻨﻪ ﻧﺤﺘﺎﺝ ﻣﺮﻩ ﻭﻳﺎﻧﻪ ﺍﺩﺍﺭﻳﻪ ﺗﻀﺒﻄﻠﻪ . ﻣﻮﻋﺪ ﺍﻟﺪﻭﻩ ﺗﺨﺪﻣﻨﻪ .. ﻛﺎﻝ ﺑﻜﺮ ﺳﻤﺮﺭ ﺟﻴﺒﻲ ﺍﻟﺠﻮﺍﺯ ﻣﺎﻟﺘﺞ ﺗﺮﻩ ﺩﺧﺖ ﻭﺭﺍﺳﻲ ﺣﻴﻨﻔﺠﺮ ..
ﻭﺍﻟﻠﻪ ﺍﻛﻮﻡ ﺍﻃﻠﻊ ﻛﻞ ﻭﺟﻊ ﻋﻴﻮﻧﻲ ﺑﻴﻜﻢ .. ﻣﻮ ﺗﻜﻮﻟﻮﻥ ﻣﺎ ﺍﺷﻮﻑ .. ﻭﺍﻟﻠﻪ ﺍﻟﻌﻈﻴﻢ ﺍﻟﺒﻴﺖ ﺍﺯﻟﺰﻟﻪ ﻓﻮﻙ ﺭﻭﺳﻜﻢ ..
ﺍﻣﻪ ﺭﺍﺩﺕ ﺗﺤﺠﻲ .. ﺻﺎﺡ ﺑﻴﻬﺎ ﻋﻤﻮ ﺧﻠﻴﻞ .. ﻛﺎﻟﻠﻬﺎ ﺳﺎﻣﻴﻪ ﺗﺨﺒﻠﺘﻲ ﺷﺒﻴﺞ .. ﻫﺴﻪ ﻭﻛﺖ ﻫﻠﺴﻮﺍﻟﻒ ﺍﻟﻮﻟﺪ ﺭﺍﺡ ﻳﻌﻤﻪ . ﻭﺍﻧﺘﻲ ﺣﺎﻳﺮﻩ ﺑﺴﻮﺍﻟﻒ ﺍﻟﻐﻴﺮﻩ ..
ﺍﺟﻴﺖ ﺍﻧﻲ ﺍﻧﻄﻴﺖ ﺟﻮﺍﺯﻱ ﻭﺟﻮﺍﺯ ﺑﻜﺮ ﻻﺑﺮﺍﻫﻴﻢ .. ﻭﺭﺍﺡ ﻳﺴﻮﻳﻬﻦ .. ﺍﻧﻲ ﺍﺧﺬﺕ ﺑﻜﺮ ﻭﺩﺧﻠﺘﻪ ﻟﻐﺮﻓﺘﻪ .. ﺭﻳﻜﺘﻪ ﻭﺍﻧﻄﻴﺘﻪ ﺩﻭﺍﻩ ﻭﻧﻮﻣﺘﻪ ..
ﻃﻠﻌﺖ ﺩﺍ ﺍﻭﺩﻱ ﻏﺮﺍﺽ ﻟﻠﻤﻄﺒﺦ .. ﻟﺰﻣﺘﻨﻲ ﻋﻤﺘﻲ .. ﻛﺎﻟﺖ ﻋﺮﻓﺖ ﺷﻨﻮ ﺍﻟﺒﻴﻨﺞ ﻭﺑﻴﻦ ﺑﻜﺮ ﻭﺳﻤﻌﺖ ﻛﻠﺸﻲ .. ﺗﺨﻠﺺ ﺳﺎﻟﻔﺔ ﺑﻜﺮ ﻭﺍﺩﻟﻠﻲ ﺳﻤﺮ ﺍﻧﻲ ﺍﻟﺞ ...
🌺🌺🌺🌺🌺
ﻭﻣﻦ ﻫﻨﺎ ﺳﻨﻨﻄﻠﻖ ﺑﺎﻟﻤﻌﺎﻧﺎﺕ ﺍﻟﺤﻘﻴﻘﻴﻪ ﻫﻬﻬﻬﻪ ﻳﻠﻪ ﺷﺎﺭﻛﻮﻧﻲ ﺍﺭﺍﺋﻜﻢ ﻭﺗﻮﻗﻌﺎﺗﻜﻢ
🌿🌿🌿
ﺳﻤﺮ .. ﺩﺍ ﺍﺭﻭﺡ ﻟﻠﻤﻄﺒﺦ ﺍﻭﺩﻱ ﻏﺮﺍﺽ .. ﺟﺎﻥ ﺗﻠﺰﻣﻨﻲ ﻋﻤﺘﻲ .. ﻭﺗﻜﻠﻲ .. ﻋﺮﻓﺖ ﺷﻨﻮ ﺑﻴﻨﺞ ﻭﺑﻴﻦ ﺑﻜﺮ ﻭﺳﻤﻌﺖ ﻛﻠﺸﻲ ..
ﺑﺴﻴﻄﻪ ﻳﺎ ﺳﻤﺮ .. ﺧﻞ ﺗﺨﻠﺺ ﺳﺎﻟﻔﺔ ﻋﻴﻦ ﺑﻜﺮ .. ﻭﺍﻧﻲ ﺍﺗﺼﺮﻑ ﻭﻳﺎﺝ .. ﺑﻘﻴﺖ ﺟﺎﻣﺪﻩ ﻭﺍﻧﻲ ﺍﺳﻤﻌﻬﺎ .. ﺷﺴﻤﻌﺖ .. ؟؟
ﺑﺲ ﻻ ﺗﺼﻨﺖ ﻋﻠﻰ ﻛﻼﻣﻨﻪ ﺍﻧﻲ ﻭﺑﻜﺮ ﺑﺎﻟﻐﺮﻓﻪ .. ﻳﺮﺑﻲ ﺷﻠﻮﻥ ﻣﺼﻴﺒﻪ .. ﻭﺩﻳﺖ ﺍﻟﻐﺮﺍﺽ ﻭﺭﺟﻌﺖ .. ﻛﻌﺪﺕ ﻋﻠﻜﺮﺳﻲ ..
ﻛﺎﻝ ﺑﻜﺮ .. ﺳﻤﺴﻢ ﻫﺎﻱ ﺍﻧﺘﻲ .. ﻛﺘﻠﻪ ﻫﺎ ﺑﻜﺮ .. ﻛﺎﻝ ﻣﺴﻜﻦ ﺍﻱ ﺷﻲ ﻋﻴﻨﻲ ﺣﺮﻛﺘﻨﻲ ﻭﺍﻟﻠﻪ .. ﻛﺘﻠﻪ ﻗﺒﻞ ﺷﻮﻱ ﺍﺧﺬﺕ ﻓﺎﻟﻴﻮﻡ ..
ﺷﻠﻮﻥ ﺍﻧﻄﻴﻚ ﻫﺴﻪ .. ﻛﺎﻝ ﻣﺎ ﺍﻋﺮﻑ .. ﻣﺘﺖ .. ﺷﻠﺘﻠﻪ ﻣﺴﻜﻦ ﺍﻟﻢ ﻋﻨﺪ ﺍﻟﺤﺎﺟﻪ ﻭﺍﻧﻄﻴﺘﻪ .. ﺑﻘﻰ ﻳﻀﺮﺏ ﺑﺄﻳﺪﻩ ﻋﻠﺴﺮﻳﺮ ﻣﻦ ﺍﻻﻟﻢ ..
ﺍﺗﻘﺮﺑﺖ ﻳﻤﻪ .. ﻭﻟﺰﻣﺖ ﺍﻳﺪﻩ .. ﻭﺍﻟﻌﺐ ﺑﺸﻌﺮﻩ .. ﻛﺘﻠﻪ ﺑﻜﺮ .. ﻛﺎﻝ ﻫﺎﺍﺍﺍ .. ﺑﺄﻟﻢ .. ﻛﺘﻠﻪ ﻋﻤﺘﻲ ﻋﺮﻓﺖ ﺷﻨﻮ ﺑﻴﻨﻪ ..
ﻛﻤﺰ .. ﺧﻠﻪ ﺍﻳﺪﻩ ﻋﻠﻰ ﻋﻴﻨﻪ ﻭﺑﺎﻭﻋﻠﻲ ﺑﺎﻟﺜﺎﻧﻴﻪ . ﻛﺎﻝ ﺷﻨﻮ ﻋﺮﻓﺖ .. ﻛﺘﻠﻪ ﺳﻤﻌﺖ ﺍﻟﺒﺎﺭﺣﻪ ﻛﻼﻣﻨﻪ .. ﻭﻋﺮﻓﺖ ﺑﻤﺸﺎﻋﺮﻧﻪ ..
ﺍﺧﺬ ﺍﻳﺪﻱ .. ﻛﺎﻝ ﻟﺘﺸﻴﻠﻴﻦ ﻫﻢ .. ﻭﺍﻟﻠﻪ ﺑﺲ ﺍﻃﻴﺐ ﻣﻦ ﻋﻴﻨﻲ .. ﺍﺧﺼﻢ ﻫﻠﻤﻮﺿﻮﻉ . ﻛﺘﻠﻪ ﺷﻨﺴﻮﻱ .. ﻛﺎﻝ ﺧﻠﻴﻬﺎ ﻟﻤﺎ ﻳﺠﻲ ﻭﻗﺘﻬﺎ .. ﻧﺸﻮﻑ ﺷﻨﻮ ﻳﺴﻮﻱ ..
ﻻ ﻧﺴﺒﻖ ﺍﻻﺣﺪﺍﺙ .. ﺍﻟﻠﻪ ﺑﻠﻴﻠﻪ ﻭﻳﻮﻡ ﻳﻘﻠﺐ ﺍﻟﻤﻮﺍﺯﻳﻦ .. ﺍﺭﺗﺎﺣﻲ ﻭﺛﻘﻲ ﺑﻠﻠﻪ ﻣﻴﺨﻴﺐ ﺍﻟﻈﻦ ﺑﻴﻪ .. ﻛﺘﻠﻪ ﺍﻣﻨﺖ ﺑﻠﻠﻪ ..
ﻛﺘﻠﻪ ﺯﻳﻦ ﺍﻟﻔﻴﺰﻩ ﺷﻠﻮﻥ .. ﺧﺎﻑ ﻣﺘﻄﻠﻊ ﺧﻼﻝ ﻫﻼﻳﺎﻡ .. ﻭﺗﺼﻌﺐ ﻋﻠﻴﻨﻪ ﺍﻟﻤﺎﻧﻴﺎ .. ﻛﺎﻝ ﻻﺗﺨﺎﻓﻴﻦ .. ﺍﺑﺮﺍﻫﻴﻢ ﻧﺴﺎﺑﺘﻪ ﻫﻨﺎﻙ ﻣﻘﻴﻤﻴﻦ ..
ﻭﺭﺍﺡ ﻳﺴﺎﻋﺪﻭﻧﻪ .. ﺑﻠﻜﺖ ﺗﻄﻠﻊ ﻓﻴﺰﺗﻨﻪ ﺑﻬﻠﻴﻮﻣﻴﻦ .. ﻛﺘﻠﻪ ﺍﻧﺸﺎﻟﻠﻪ .. ﺿﺤﻚ .. ﻛﺘﻠﻪ ﺷﺒﻴﻚ .. ﻛﺎﻝ ﻣﻦ ﻛﺪ ﻣﺎ ﺧﺮﻋﺘﻴﻨﻲ ﻋﻴﻨﻲ ﺧﺎﻓﺖ ﻭﻫﺪﺕ ﻫﻬﻬﻪ ..
ﺿﺤﻜﺖ .. ﻛﺘﻠﻪ ﻫﺎﻱ ﻋﻴﻨﻚ ﻫﻢ ﺍﻻ ﺑﺎﻟﺨﻮﻑ ﻳﻠﻪ ﺗﺠﻲ ﻫﻬﻬﻪ .. ﻣﺪﺩﺗﻪ ﻭﻧﺎﻡ .. ﺑﻘﻴﻨﻪ ﻧﺴﻮﻟﻒ ﺍﻟﻴﻞ ﻛﻠﻪ .. ﻟﺤﺪ ﻣﺎ ﺗﻌﺐ ﻭﻧﺎﻡ ..
ﻣﺮﺕ 3 ﺍﻳﺎﻡ .. ﻃﻠﻌﺖ ﺍﻟﻔﻴﺰﺍ .. ﺍﺟﻪ ﺍﺑﺎﺭﻫﻴﻢ ﻛﺎﻝ ﺣﻈﺮﻱ ﻣﻼﺑﺲ ﺑﻜﺮ ﻭﻣﻼﺑﺴﺞ .. ﻭﻣﺴﺘﻤﺴﻜﺎﺗﻨﻪ .. ﺑﺎﺟﺮ ﺍﻟﺼﺒﺢ ﻃﺎﻟﻌﻴﻦ ..
ﻛﺘﻠﻪ ﺍﻧﺸﺎﻟﻠﻪ .. ﺣﻈﺮﺕ ﻭﻛﻤﻠﺖ ﺍﻟﺠﻨﻄﻪ .. ﻭﺛﺎﻧﻲ ﻳﻮﻡ ﻃﻠﻌﻨﻪ .. ﻭﻃﻠﻌﺖ ﻣﻦ ﻇﻴﻢ ﺭﻧﺎ ﻭﻋﻤﺘﻲ ﻭﺣﻨﻴﻦ .. ﺷﻜﺪ ﺣﺠﻦ ﻭﺷﻜﺪ ﻏﻠﻄﻦ ﻭﻳﺴﻤﻌﻨﻲ ﻛﻼﻡ ﻣﺜﻞ ﺍﻟﺴﻢ ..
ﻋﻠﻴﻪ ﻭﻋﻠﻰ ﺍﻣﻲ .. ﻭﺍﺳﻜﺖ ﻟﻌﻴﻮﻥ ﺑﻜﺮ .. ﻻﻥ ﻣﺮﻳﺾ .. ﻭﺻﻠﻨﻪ ﺍﻟﻤﻄﺎﺭ .. ﺑﻌﺪ ﺍﺟﺮﺍﺀﺍﺕ .. ﺍﻧﻄﻠﻘﺖ ﺍﻟﻄﻴﺎﺭﻩ ..
ﻭﺍﻧﻲ ﻛﺎﻋﺪﻩ .. ﻳﻢ ﺍﻟﺸﺒﺎﻙ .. ﻭﺑﻜﺮ ﻳﻤﻲ .. ﺧﻔﺖ ﺣﻴﻞ ﻟﻤﺎ ﻗﻠﻌﺖ ﺍﻟﻄﻴﺎﺭﻩ .. ﺑﻘﻴﺖ ﻻﺯﻣﻪ ﺍﻳﺪ ﺑﻜﺮ ﺑﺨﻮﻑ ..
ﻟﺤﺪ ﻣﺎ ﺣﺴﻴﺘﻬﺎ ﻫﺪﺕ ﻭﻳﻴﻲ ﻧﺰﻟﺖ ﺑﻌﺎﻟﻢ ﺛﺎﻧﻲ ﻭﺍﻧﻲ ﺍﺑﺎﻭﻉ ﺍﻟﻐﻴﻮﻡ ﻭﺍﻟﻤﻨﻈﺮ ﺍﻟﺮﻫﻴﺐ .. ﺑﺎﻭﻋﺖ ﺑﻜﺮ .. ﻣﺨﻠﻲ ﺭﺍﺳﻪ ﻭﻧﺎﻳﻢ ..
ﺍﻧﻲ ﻣﺎ ﻧﻤﺖ ﺍﺑﺪ ﺑﺎﻟﻄﻴﺎﺭﻩ ﻣﻦ ﺍﻟﺨﻮﻑ .. ﻛﻞ ﺿﻨﻲ ﺷﻮﻱ ﻭﺗﻌﻄﻞ ﺍﻟﻄﻴﺎﺭﻩ ﻭﻧﻤﻮﺕ .. ﺑﺲ ﺍﻟﺤﻤﺪﻟﻠﻪ ﻭﺻﻠﻨﻪ ﻣﻄﺎﺭ ﺑﺮﻟﻴﻦ ﺑﺴﻼﻡ ..
ﺭﺣﻨﻪ ﻻﻗﺎﺭﺏ ﺍﺑﺮﺍﻫﻴﻢ .. ﻧﺎﺱ ﺟﺪﺍ ﺭﺍﻗﻴﻦ ﻭﻣﺤﺘﺮﻣﻴﻦ .. ﺑﺲ ﺷﻘﺘﻬﻢ ﻛﺎﻧﺖ ﺻﻐﻴﺮﻩ .. ﺑﻜﺮ ﻣﺎ ﻗﺒﻞ ﻳﻀﺎﻳﻘﻬﻢ
🌿🌿🌿
ﺭﺣﻨﻪ ﺣﺠﺰﻧﻪ ﻓﻨﺪﻕ .. ﻏﺮﻓﻪ ﺏ 3 ﺍﺳﺮﻩ .. ﺻﺮﺍﺣﻪ ﺷﻌﻮﺭﻱ ﺟﺎﻥ ﻣﺎ ﺍﻋﺮﻑ ﻣﺎ ﺍﻛﻮﻝ ﺧﺎﻳﻔﻪ ﻭﺍﻧﻤﺎ ﺧﺠﻞ ..
ﺍﻧﻮ ﻭﺟﻮﺩﻱ ﻣﻊ 2 ﺷﺒﺎﺏ ﻣﺤﺮﻣﻴﻦ ﻋﻠﻴﻪ .. ﺟﺎﻥ ﺍﻻﻣﺮ ﻣﺨﻮﻓﻨﻲ .. ﻭﺍﻧﻲ ﺑﻨﺖ .. ﺑﺲ ﺟﻨﺖ ﺍﺷﻮﻑ ﺍﻟﻄﻤﺄﻧﻴﻨﻪ ﺑﻌﻴﻮﻥ ﺑﻜﺮ ..
ﻓﻘﺘﻠﺖ ﺷﻌﻮﺭ ﺍﻟﺨﻮﻑ .. ﻭﺑﻘﻴﺖ ﻣﺄﻣﻨﻪ ﺭﻭﺣﻲ ﺑﻴﻪ .. ﻭﻫﻮﻩ ﻣﺎ ﺧﺎﻥ ﺛﻘﺘﻲ .. ﺷﻜﺪ ﻣﺎ ﺟﺎﻥ ﻳﺤﺒﻨﻲ .. ﺑﺲ ﻳﻌﺎﻣﻠﻨﻲ ﻛﺄﺥ ..
ﻋﻤﺮﻱ ﻣﺎ ﺷﻔﺖ ﻣﻨﻪ ﻧﻈﺮﻩ ﺍﻟﻴﻪ ﻣﻮ ﺯﻳﻨﻪ ﺍﻭ ﻳﺒﺎﻭﻉ ﺑﺠﺴﻤﻲ ﺍﻭ ﻫﻴﺞ .. ﺍﺑﺪﺍﺍﺍ ﻣﺤﺘﺮﻡ ﺣﺪ ﺍﻟﻌﻼﻗﻪ ﺑﻴﻨﺎﺗﻨﻪ ﻣﺸﺎﻋﺮ ﺑﻘﻠﺒﻲ ﻭﺑﻘﻠﺒﻪ ﻓﻘﻂ ..
ﻣﺘﺨﺮﺝ .. ﺣﺘﻰ ﺑﻜﻠﻤﺔ ﺣﺒﻴﺒﻲ ﺍﻭ ﻣﻐﺎﺯﻟﻪ .. ﻭﺟﻨﺖ ﺍﺣﺘﺮﻡ ﻫﻠﺸﻲ ﻣﻨﻪ ﻭﺍﻋﺸﻘﻪ ﻻﺣﺘﺮﺍﻣﻪ .. ﺭﺣﻨﻪ ﻟﻠﺪﻛﺘﻮﺭ ..
ﻭﻗﺪﻣﻨﻪ ﺗﻘﺎﺭﻳﺮ ﺑﻜﺮ .. ﻋﺎﻳﻦ ﺑﻜﺮ ..
( ﺍﻟﻜﻼﻡ ﺍﻟﻠﻲ ﺑﻠﻠﻐﻪ ﺍﻟﻌﺮﺑﻴﻪ .. ﻳﻌﻨﻲ ﻛﻼﻡ ﺍﻧﻜﻠﺶ )
ﻗﺎﻝ ﻳﺤﺘﺎﺝ ﺍﻟﺨﻀﻮﻉ ﻟﻌﻤﻠﻴﻪ .. ﻗﻠﺖ .. ﻫﻞ ﻓﻲ ﺍﻣﻞ ﺑﺎﺳﺘﺮﺟﺎﻉ ﻧﻈﺮﻩ ﻳﺎﺩﻛﺘﻮﺭ .. ﻛﺎﻝ ﻭﻟﻢَ ﻻ .. ﺍﻻﻣﻞ ﺧﻄﻮﻩ ﺟﻴﺪﮦ ﻧﺤﻮ ﺍﻟﻨﺠﺎﺡ .. ﻟﻢَ ﻫﻜﺬﺍ ﻣﺘﺸﺎﺋﻤﻪ ..
ﻗﻠﺖ ﻻ ﺍﻧﺎ ﻏﻴﺮ ﻣﺘﺸﺎﺋﻤﻪ .. ﻟﻜﻨﻨﻲ ﻗﻠﻘﻪ ﺟﺪﺍ ﺣﻴﺎﻝ ﺫﻟﻚ .. ﻗﺎﻝ ﻫﻞ ﺍﻧﺘﻲ ﺯﻭﺟﺘﻪ .. ﻗﻠﺖ . ﻻ ﺍﻧﺎ ﺍﺑﻨﺔ ﻋﻤﺘﻪ .. ﻛﺎﻝ ﺍﻩ ﺿﻨﻨﺘﻚ ﺯﻭﺟﺘﻪ ﻟﺸﺪﺓ ﻗﻠﻘﻚ ..
ﺍﺑﺘﺴﻤﺖ .. ﺑﻜﺮ ﺩﺍﺭ ﻭﺟﻪ .. ﻛﺎﻝ ﺷﺠﺎﻱ ﻳﻠﻐﻲ ﻭﻳﺎﺝ .. ﻛﺘﻠﻪ ﻳﺴﺄﻟﻨﻲ ﻋﻠﻰ ﻋﻼﻗﺘﻚ ﺑﻴﻪ .. ﻛﺎﻝ ﻭﺷﻜﻠﺘﻴﻠﻪ .. ﻛﺘﻠﻪ ﺍﻧﻲ ﺑﻨﺖ ﻋﻤﺘﻚ .. ﻳﻜﻮﻝ ﺍﻋﺘﻘﺪﺗﺞ ﺯﻭﺟﺘﻪ ..
ﻛﺎﻝ ﻣﻦ ﺣﻠﻜﻪ ﻟﺒﺎﺏ ﺍﻟﺴﻤﺎ ﺿﺤﻜﺖ .. ﺣﺪﺩﻟﻨﻪ ﺍﻟﺪﻛﺘﻮﺭ ﻣﻮﻋﺪ ﺍﻟﻌﻤﻠﻴﻪ .. ﻭﺭﺟﻌﻨﻪ .. ﻟﺤﺪ ﻣﺎ ﺍﺟﻪ ﻳﻮﻡ ﺍﻟﻌﻤﻠﻴﻪ ..
ﺟﻨﺖ ﺣﻴﻞ ﺧﺎﻳﻒ .. ﺩﺧﻞ ﺑﻜﺮ ﻟﻠﻌﻤﻠﻴﺎﺕ .. ﻭﺍﻧﻲ ﻭﺍﺑﺮﺍﻫﻴﻢ ﻛﺎﻋﺪﻳﻦ ﺑﺮﻩ .. ﺍﻧﻲ ﺧﻮﻑ ﻭﺍﻟﺪﻣﻮﻉ ﻣﺘﺠﻤﻌﻪ ﺑﻌﻴﻨﻲ ﻭﺍﺩﻋﻲ ..
ﺑﺎﻭﻋﻠﻲ ﺍﺑﺮﺍﻫﻴﻢ .. ﻛﺎﻝ ﺷﻜﺪ ﺗﺤﺒﻴﻪ .. ﻛﺘﻠﻪ ﻣﻨﻮ .. ﻛﺎﻝ ﻣﺎ ﺣﺎﺝ ﺗﺨﻔﻴﻦ .. ﻋﻴﻮﻧﻜﻢ ﻭﺍﻫﺘﻤﺎﻣﻜﻢ ﺍﺑﻌﺾ .. ﻭﺍﺿﺢ ﻣﻴﺤﺘﺎﺟﻠﻪ ﺗﻔﺴﻴﺮ ..
ﻛﺘﻠﻪ ﺍﺑﺮﺍﻫﻴﻢ ﻣﺎ ﺍﻋﺮﻑ ﺷﻨﻮ ﺍﻛﻮﻟﻚ ﺑﺲ ﺍﻟﺼﺎﺭ ﻭﺍﻟﺪﻳﺼﻴﺮ ﺛﻖ ﻣﻮ ﺑﻴﺪﻱ ﻭﻻ ﺑﻴﺪ ﺑﻜﺮ .. ﻣﺸﺎﻋﺮﻧﻪ ﻣﺪﺍ ﻧﻜﺪﺭ ﻧﺘﺤﻜﻢ ﺑﻴﻬﺎ ..
ﻛﺎﻝ ﺑﺎﻟﻌﻜﺲ ﺍﺗﻤﻨﺎﻟﻜﻢ ﺍﻟﺨﻴﺮ .. ﻻﻥ ﺗﻠﻮﻛﻮﻥ ﻟﺒﻌﺾ .. ﻛﺘﻠﻪ ﺍﺷﻜﺮﻙ .. ﻟﺰﻡ ﺍﻳﺪﻱ .. ﻭﻛﺎﻝ ﻟﺘﺨﺎﻓﻴﻦ ﻳﻄﻴﺐ ﻭﺍﻟﻠﻪ .. ﻛﺘﻠﻪ ﺍﻧﺸﺎﻟﻠﻪ ..
ﺳﺎﻋﻪ ﻭﻃﻠﻌﻮ ﺑﻜﺮ .. ﺟﺎﻥ ﻛﺎﻋﺪ .. ﻛﺘﻠﻪ ﺗﺤﺲ ﺑﺸﻲ .. ﻛﺎﻝ ﻣﺎ ﺍﺣﺲ ﺑﺸﻲ ﺑﻌﻴﻨﻲ .. ﺍﺟﻪ ﺍﻟﺪﻛﺘﻮﺭ ﻟﻠﻐﺮﻓﻪ ﺍﻧﻄﺎﻫﺎ ﺍﻟﻌﻼﺝ ..
ﺷﻮﻱ ﺷﻮﻱ ﻛﺎﻡ ﻳﺮﻭﺡ ﺍﻟﻤﺨﺪﺭ ﻣﻦ ﺑﻜﺮ .. ﻛﺎﻡ ﻳﻀﺮﺏ ﺑﺄﻳﺪﻩ .. ﻭﻳﺼﻴﺢ ﻣﻦ ﺍﻟﻮﺟﻊ .. ﻟﺰﻣﺖ ﺍﻳﺪﻩ ﻭﺍﻧﻲ ﺍﺑﺠﻲ .. ﻭﺍﻛﻠﻪ ﺍﺗﺤﻤﻞ ﻳﺮﻭﺣﻲ ..
ﻛﺎﻝ ﻭﻟﺞ ﻋﻴﻨﻲ ﺍﺣﺴﻬﺎ ﺍﺣﺘﺮﻛﺖ ﺍﺭﻳﺪ ﺍﺣﻜﻬﺎ ﻣﻮﺗﺘﻨﻲ . ﻛﺘﻠﻪ ﻣﻴﺼﻴﺮ ﻭﺍﻟﻠﻪ ﺑﺲ ﺍﺻﺒﺮ .. ﺑﻘﻴﺖ ﻻﺯﻣﺘﻪ ﻭﻫﻮﻩ ﻳﻠﻮﺏ ..
ﻟﺤﺪ ﻣﺎ ﺳﻜﻦ ﻭﻧﺎﻡ .. ﺗﻌﻠﻴﻤﺎﺕ ﺍﻟﺪﻛﺘﻮﺭ ﻣﻴﻨﺰﻝ ﺭﺍﺳﻪ ﻟﻠﻜﺎﻉ ﻳﺒﻘﻪ ﻧﺎﻳﻢ .. ﻭﻟﻮ ﻛﺎﻡ ﻳﺮﻓﻊ ﺭﺍﺳﻪ .. ﻣﺎ ﺍﻋﺮﻑ ﺍﻟﺴﺒﺐ ﺑﺲ ﺟﻨﺖ ﺍﻋﺎﻧﻲ ﻣﻨﻬﺎ ..
ﺑﻜﺮ ﻣﺎ ﻳﻜﻌﺪ ﺍﺑﻤﻜﺎﻧﻪ ﻣﻦ ﻛﺪ ﺍﻟﻤﻪ .. ﻳﻀﻠﻲ ﻳﺮﻭﺡ ﻣﻨﺎ ﻭﻳﺠﻲ ﻣﻨﺎ .. ﻣﺮﺕ 5 ﺍﻳﺎﻡ .. ﺻﺎﺭ ﺍﻟﻤﻪ ﺍﻗﻞ ..
ﺍﺧﺬﻧﺎﻩ ﺍﻧﻲ ﻭﺍﺑﺮﺍﻫﻴﻢ ﻳﻨﺰﻩ ﻋﻦ ﻧﻔﺴﻪ ﻻﻥ ﺗﻌﺐ ﻛﻮﻟﺶ ﻣﻦ ﺍﻭﺟﺎﻋﻪ ﻭﺣﺘﻰ ﺻﺎﺭ ﻣﺎ ﻳﺘﺤﻤﻞ ﺍﻟﻜﻠﻤﻪ ﺣﺘﻰ ﻋﻠﻴﻪ ﻛﺎﻡ ﻳﻐﻠﻂ ﻭﻳﺮﺯﻝ
🌿🌿🌿
ﻧﻔﺴﻴﺘﻪ ﺗﻌﺒﺖ ﻣﻦ ﻛﺪ ﺍﻻﻟﻢ .. ﺭﺣﻨﻪ ﺍﺧﺬﻧﺎ ﻧﺰﻫﻪ ﺑﺤﺪﺍﺋﻖ ﻋﺎﻣﻪ .. ﺟﺎﻥ ﺍﻟﺠﻮ ﺑﺎﺭﺩ ﻛﻮﻭﻭﻭﻟﺶ ﺑﺎﻟﻤﺎﻧﻴﺎ .. ﺑﺲ ﺍﻛﻮ ﺷﻤﺲ ﻗﻠﻴﻠﻪ ..
ﻛﻌﺪﺕ ﺍﻧﻲ ﻭﻳﺎﻩ .. ﺑﺎﻟﺤﺪﻳﻘﻪ .. ﻛﺘﻠﻪ ﺍﻧﺸﺎﻟﻠﻪ ﻫﻨﺎ ﻣﺮﺗﺎﺡ .. ﻛﺎﻝ ﺍﻱ ﺑﺲ ﺷﻮﻱ ﺑﺮﺩ .. ﻛﺘﻠﻪ ﻧﺮﺟﻊ ..
ﻛﺎﻝ ﻻ ﺧﻠﻴﻨﻲ ﻫﻨﺎ ﻣﺮﺗﺎﺡ ﺍﺣﺴﻦ ﻣﻦ ﺟﻮ ﺍﻟﻤﺴﺘﺸﻔﻰ ﻭﺍﻟﻐﺮﻑ .. ﻛﺘﻠﻪ ﻳﺮﻭﺣﻲ .. ﺍﻧﺸﺎﻟﻠﻪ ﻫﻼﻟﻢ ﻛﻠﻪ ﻳﺼﻴﺮ ﺳﻮﺍﻟﻒ ..
ﻭﻧﻜﻌﺪ ﺑﻌﺪ 50 ﺳﻨﻪ ﻭﺍﻃﻔﺎﻟﻨﻪ ﻧﺠﻴﺒﻬﻢ ﻫﻨﺎ ﻭﻳﻠﻌﺒﻮﻥ ﻭﺍﺣﻨﻪ ﻣﻌﺠﺰﻳﻦ ﻭﻧﺒﺎﻭﻉ ﻋﻠﻴﻬﻢ ﻫﻬﻬﻬﻬﻪ .. ﻛﺎﻝ ﺍﻭﻭﻭﻑ ﺷﻮﻛﺖ .. ﻛﺘﻠﻪ ﺑﻌﺪ 50 ﺳﻨﻪ ﺷﺒﻴﻚ ..
ﻛﺎﻝ ﻭﺍﻟﻠﻪ ﺑﻴﺞ ﺩﻓﺮﻩ .. ﺿﺤﻜﺖ .. ﻛﺎﻝ ﺍﻧﺸﺎﻟﻠﻪ ﺍﻟﻠﻪ ﻳﺤﻘﻖ ﺍﻣﻨﻴﺎﺗﻨﻪ ﻭﻭﻋﺪ ﻟﻮ ﺻﺎﺭ ﻫﻠﺸﻲ ﻭﺍﺗﺰﻭﺟﻨﻪ ..
ﺍﺟﻲ ﻭﺍﺟﻴﺒﺞ ﻟﻬﻠﻤﻜﺎﻥ ﺍﻟﻠﻲ ﻳﺸﻬﺪ ﺣﺒﻨﻪ .. ﻛﺘﻠﻪ ﻳﺎﺭﺏ ﻳﺤﻘﻘﻬﺎ .. ﺍﺩﺭﺩﺵ ﻭﻳﺎﻩ ﻋﻠﻤﻮﺩ ﻳﻨﺴﻰ ﻋﻴﻨﻪ ..
ﻛﺎﻝ ﺳﻤﺮ ﻫﻮﺍﻱ ﺍﻓﻜﺮ ﻭﺗﺄﻧﻴﺐ ﺿﻤﻴﺮﻱ ﻳﻜﺘﻠﻨﻲ ﻻﻥ ﺍﻓﻜﺮ ﺑﺤﺒﺞ ﻭﺷﻠﻮﻥ ﺍﻧﻲ ﺍﻋﺸﻘﺞ .. ﺍﺣﺲ ﺍﻟﻠﻲ ﺩﺍ ﺍﺳﻮﻳﻪ ﻏﻠﻂ ﻻﻥ ﻣﺮﺕ ﺍﺧﻮﻳﻪ ..
ﻭﻣﺮﺍﺕ ﺍﺭﺟﻊ ﺍﻛﻮﻝ ﻫﻴﻪ ﻣﻮ ﻣﺮﺗﻪ .. ﺍﻟﺰﻭﺍﺝ ﺍﻟﺒﻴﻨﻬﻢ ﻏﻠﻂ ﻭﺍﺑﻘﻰ ﺑﺤﺮﺏ ﻧﻔﺴﻲ ﺑﻴﻦ ﻛﻠﺒﻲ ﻭﺻﻮﺕ ﺿﻤﻴﺮﻱ ..
ﺳﻤﺮ .. ﻫﻬﻬﻬﻪ ﺍﻧﺸﺎﻟﻠﻪ ﺍﻟﻠﻬﻢ ﺍﻣﻴﻦ .. ﻳﻠﻪ ﺑﺮﺩ ﺍﻟﺠﻮ ﺧﻞ ﻧﺮﺟﻊ .. ﻛﻤﻨﻪ ﺭﺣﻨﻪ ﻟﻠﻔﻨﺪﻕ .. ﻭﺑﻌﺪ ﺍﻳﺎﻡ ﻓﺘﺤﻮ ﻋﻴﻨﻪ ..
ﻭﺟﺎﻧﺖ ﺍﻟﻌﻤﻠﻴﻪ ﻧﺎﺟﺤﻪ ﺍﻟﺤﻤﺪﻟﻠﻪ .. ﻛﺘﺒﻮﻟﻨﻪ ﺍﻟﺪﻭﻩ ﻭﻭﺻﻮﻧﻪ ﻳﺴﻤﺮ ﻋﻠﻴﻪ ﻭﻣﺸﻴﻨﻪ .. ﻛﻤﻠﻨﻪ ﺍﺟﺮﺍﺀﺗﻨﻪ ﻭﺭﺟﻌﻨﻪ ..
ﺑﺎﻟﻤﻄﺎﺭ .. ﺍﻣﺸﻲ ﻭﺍﺑﺎﻭﻋﻠﻪ .. ﻛﺘﻠﻪ ﺑﻜﺮ ﺗﺸﻮﻑ ﺑﻌﻴﻨﻚ .. ﻛﺎﻝ ﺍﻱ ﻗﻠﻴﻞ ﺑﺲ ﻣﻮ ﻣﺜﻞ ﻗﺒﻞ ..
ﻛﺘﻠﻪ ﺍﻟﻤﻬﻢ ﺭﺟﻌﺖ ﻳﺮﺑﻲ ﻭﺍﻟﻠﻪ ﻓﺮﺣﺎﻧﻪ ﻭﺍﻧﻲ ﺍﺷﻮﻑ ﻋﻴﻮﻧﻚ ﻣﻔﺘﺤﻪ .. ﺿﺤﻚ ﻭﻛﺎﻝ ﻳﺤﻔﻈﺞ ﺍﻟﻲ .. ﺻﻌﺪﻧﻪ ﺍﻟﻄﻴﺎﺭﻩ .. ﻭﻛﻠﺒﻲ ﻃﺎﻳﺮ ﺑﻌﻴﻮﻧﻪ ..
.. ﻭﺑﻜﺮ ﻧﺎﻡ .. ﺍﻭﻭﻭﻑ ﺷﻜﺪ ﺍﺭﺗﺎﺡ ﻭﺍﻧﻲ ﺍﺑﺎﻭﻋﻠﻪ .. ﺍﺣﺲ ﺍﻧﻲ ﺑﺄﻣﺎﻥ .. ﺑﻘﻴﺖ ﺻﺎﻓﻨﻪ ﺑﻮﺟﻬﻪ ﻭﻫﻮﻩ ﻧﺎﻳﻢ ..
ﻭﻳﻦ ﺟﺎﻥ .. ﻭﻟﻴﺶ ﻣﺎ ﺣﺒﻴﺘﻪ ﻣﻦ ﺯﻣﺎﻥ .. ﻟﻴﺶ ﻫﻴﺞ ﺻﻌﺐ ﻋﻠﻴﻪ .. ﺍﻭﻭﻑ ﺷﺼﺎﺭ ﻟﻮ ﻫﻮﻩ ﺍﻟﺨﻄﺒﻨﻲ ﻣﻮ ﻋﺎﺩﻝ ..
ﻭﺻﻠﻨﻪ ﻣﻄﺎﺭ ﺑﻐﺪﺍﺩ .. ﺧﺎﺑﺮﻧﻪ ﺍﻫﻠﻪ ﻭﻛﻨﺎﻟﻬﻢ ﻭﺻﻠﻨﻪ .. ﺍﺧﺬﻧﻪ ﺗﻜﺴﻲ ﻭﻟﻼﺳﻜﺎﻥ .. ﻭﺻﻠﻨﻪ ﺍﻟﺒﻴﺖ .. ﺍﺑﻮﻩ ﺟﺎﻥ ﻣﺤﻈﺮ ﻋﺰﻑ ﻭﻣﻮﺳﻴﻘﻰ ..
ﻭﺧﺮﻭﻑ ﺫﺑﺤﻮﻩ ﺟﻮﻩ ﺭﺟﻠﻪ ﻭﺍﻟﻔﺮﻉ ﻛﻠﻪ ﺍﻟﺘﻢ ﻳﺮﻛﺺ ﻋﻠﻤﻮﺳﻴﻘﻰ ﻭﺍﻟﻄﺒﻞ ﻭﺑﻜﺮ ﻣﺒﺘﺴﻢ ﻭﻓﺮﺣﺎﻥ ﺑﻴﻨﻬﻢ ..
ﺩﺧﻠﺖ ﻟﻠﺒﻴﺖ .. ﺳﻠﻤﺖ ﺳﻼﻣﻬﻦ ﺛﻜﻴﻞ .. ﺑﺲ ﻋﻤﺘﻲ ﻭﺑﻨﺎﺕ ﻋﻤﻲ ﻭﺍﻣﻲ .. ﺩﺧﻞ ﺑﻜﺮ ﻟﻠﺒﻴﺖ ﻭﻛﺒﺖ ﺍﻟﻬﻼﻫﻞ ﻭﺍﻟﺠﻜﻠﻴﺖ ﻓﻮﻙ ﺭﺍﺳﻪ ..
ﻭﻳﻜﻠﻠﻪ ﻳﻮﻡ ﻋﺮﺳﻚ ﺍﻧﺸﺎﻟﻠﻪ .. ﻭﻫﻮﻩ ﻓﺮﺣﺎﻥ ﻭﻳﺒﺎﻭﻋﻠﻲ ﻭﻳﻜﻠﻬﻢ ﺍﻧﺸﺎﻟﻠﻪ ﻫﻴﺞ ﻭﺍﺗﺰﻭﺝ ﺍﻻ ﺍﺫﺑﺢ ﺛﻮﺭ ﻫﻬﻬﻬﻬﻬﻪ ..
ﻛﺎﻟﺘﻠﻪ ﺍﻣﻪ ﺟﻨﻚ ﻋﻠﻰ ﺯﻭﺍﺝ ﺍﻧﺘﻪ ﺑﺲ ﻛﻮﻝ ﺍﺻﻔﻂ ﺍﻟﻨﺴﻮﺍﻥ ﻛﺪﺍﻣﻚ .. ﻛﺎﻟﻠﻬﺎ ﺍﺳﺘﺮﻳﺤﻲ ﺍﻧﺘﻲ ﻭﻧﺴﻮﺍﻧﺞ ..
ﺍﻧﻲ ﺭﺍﻳﺪ ﺍﻟﺒﺎﻟﻲ .. ﺿﺎﺟﺖ ﻭﺑﻘﺖ ﺗﺮﺍﻗﺐ ﻋﻴﻮﻧﻪ ﻭﻋﻴﻮﻧﻲ .. ﺍﻧﻲ ﻣﺎ ﻛﻤﺖ ﺍﺑﺎﻭﻉ ﻟﺒﻜﺮ ﺿﺎﻳﻘﺘﻨﻲ ﺑﻤﺮﺍﻗﺒﺘﻬﺎ ..
ﺭﺣﺖ ﻟﻐﺮﻓﺘﻲ ﺑﺪﻟﺖ ﻭﻧﻤﺖ .. ﺍﺟﺖ ﺍﻣﻲ .. ﻛﻌﺪﺕ ﻛﺘﻠﻬﺎ ﻫﺎﺍﺍ ﻳﻮﻡ .. ﻛﺎﻟﺖ ﺷﻮ ﻧﺎﻳﻤﻪ .. ﻛﺘﻠﻬﺎ ﺻﻮﺕ ﺍﻟﻄﻴﺎﺭﻩ ﺑﺮﺍﺳﻲ ..
🌿🌿🌿
ﻭﻣﻨﺎﻳﻤﻪ ﺍﺑﺪ ﻣﻦ ﺍﻟﺒﺎﺭﺣﻪ .. ﻛﺎﻟﺖ ﻳﻤﻪ ﻋﻤﺘﺞ ﺗﻌﺮﻑ ﺑﺴﺎﻟﻔﺔ ﺑﻜﺮ .. ﻛﺘﻠﻬﺎ ﻳﺎ ﺳﺎﻟﻔﻪ .. ﻛﺎﻟﺖ ﺗﻔﻬﻤﻴﻨﻲ ﺷﻨﻮ ﺍﻗﺼﺪ ..
ﺍﺧﺬﺕ ﻧﻔﺲ .. ﻭﻛﺘﻠﻬﺎ ﻣﺎ ﺍﺩﺭﻱ ﻫﻴﻪ ﺗﻜﻮﻝ ﺳﺎﻣﻌﺘﻨﻪ .. ﻛﺎﻟﺖ ﺷﻨﻮ ﻳﻌﻨﻲ ﺳﺎﻣﻌﺘﻜﻢ ﺳﻤﺮ .. ﺷﻨﻮ ﺑﻴﻨﺞ ﻭﺑﻴﻦ ﺑﻜﺮ ..
ﺍﻧﺘﻲ ﻣﺎ ﺗﺠﻮﺯﻳﻦ ﻣﺎ ﺗﺨﺎﻓﻴﻦ .. ﻛﻞ ﺍﻟﺼﺎﺭ ﻣﺎ ﺍﺧﺬﺗﻲ ﻋﺒﺮﻩ ﻣﻨﻪ .. ﺑﻌﺪﺝ ﻣﺴﺘﻌﺪﻩ ﺗﻐﻠﻄﻴﻦ ﻭﺗﻨﺪﻛﻴﻦ .. ﻛﺘﻠﻬﺎ ﻭﺍﻟﻠﻪ ﻳﻤﻪ ﻣﺎ ﺍﻋﺮﻑ ..
ﺍﺳﻮﻱ ﺍﻟﺼﺢ ﻭﺍﻋﻴﺶ ﺑﺬﻝ ﻟﻮ ﺍﺳﻮﻱ ﺍﻟﻐﻠﻂ ﻭﺍﻋﻴﺶ ﺑﺮﺍﺣﻪ ﻣﺎ ﺍﻋﺮﻑ .. ﻛﺎﻟﺖ ﻳﻌﻨﻲ ﺷﻨﻮ ﻗﺼﺪﺝ ﺗﺴﻮﻳﻦ ﺍﻟﻐﻠﻂ ﻭﺗﺮﺗﺎﺣﻴﻦ ..
ﻋﻠﻰ ﺷﻨﻮ ﻧﺎﻭﻳﻪ ﺳﻤﺮ .. ﻛﺘﻠﻬﺎ ﻧﺎﻭﻳﻪ ﺍﻃﻠﻚ ﻣﻦ ﻋﺎﺩﻝ .. ﻻﻥ ﺣﺮﺍﻡ ﺍﺑﻘﻰ ﺑﺬﻣﺘﻪ ﻭﺍﻧﻲ ﻣﺸﺎﻋﺮﻱ ﺑﻐﻴﺮ ﻣﻜﺎﻥ ..
ﺣﺘﻰ ﻟﻮ ﻋﺎﺩﻝ ﻣﻤﺘﻘﺮﺑﻠﻲ ﻭﻣﻤﺤﺴﺴﻨﻲ ﺍﻧﻲ ﺯﻭﺟﺘﻪ .. ﺑﺲ ﺧﻴﺎﻧﻪ ﺍﻋﺘﺒﺮﻫﺎ ﻣﺸﺎﻋﺮﻱ ﻟﻐﻴﺮﻩ ﻭﺿﻤﻴﺮﻱ ﻣﻤﺮﺗﺎﺡ ﺑﻬﺸﻜﻞ ..
ﻛﺎﻟﺖ ﺳﻤﺮ ﺍﺳﺘﺮﻱ ﻋﻠﻴﻨﻪ ﻭﻋﻠﻰ ﻧﻔﺴﺞ ﻻ ﺗﻈﻨﻴﻦ ﺑﻴﻮﻡ ﺍﺑﻮﺝ ﻟﻮ ﺍﺧﻮﺝ ﻳﻮﺍﻓﻘﻮﻥ ﻋﻠﻰ ﺯﻭﺍﺟﺞ ﻣﻦ ﺍﻟﻠﻲ ﺍﺑﺎﻟﺞ ..
ﺷﻨﻜﻮﻝ ﻳﻤﻪ ﺍﻃﻠﻜﺖ ﻻﻥ ﺗﺤﺐ ﺍﺧﻮ ﺯﻭﺟﻬﺎ ﻭ ﺗﺮﻳﺪ ﺗﺘﺰﻭﺟﻪ .. ﻛﺘﻠﻬﺎ ﻳﻮﻡ ﻋﺎﺩﻝ ﻣﻮ ﺯﻭﺟﻲ .. ﻛﺎﻟﺖ ﻫﺬﺍ ﺍﻟﺤﺠﻲ ﺍﺣﺠﻲ ﻟﻠﻨﺎﺱ ﻣﻮ ﺍﻟﻴﻪ ﺳﻤﺮﺭﺭ ..
ﺧﺎﻓﻲ ﺍﻟﻠﻪ ﺑﻴﻨﻪ ﻭﺍﺳﺘﺮﻱ ﻋﻠﻰ ﺭﻭﺣﺞ ﻳﻤﻪ .. ﻛﺘﻠﻬﺎ ﻟﻌﺪ ﺷﻠﻮﻥ ﻳﻮﻭﻭﻡ .. ﻗﺎﺑﻞ ﺍﻧﻬﺰﻡ ﻣﺜﻞ ﻣﺴﻮﻳﺘﻲ ﻳﻠﻪ ﺍﺭﺗﺎﺡ ..
ﺿﺮﺑﺘﻨﻲ ﺭﺍﺷﺪﻱ ﺣﻴﻞ .. ﻛﺎﻟﺖ ﻫﺬﺍ ﺍﻟﺤﺠﻲ ﻟﻮ ﻋﺪﺗﻲ ﻣﺮﻩ ﺛﺎﻧﻴﻪ ﺍﻛﺺ ﺍﻟﺴﺎﻧﺞ ﻭﺍﻟﻠﻪ .. ﺍﻧﻲ ﻣﻦ ﺷﺮﺩﺕ ﻣﻦ ﺍﻫﻠﻲ .. ﺷﺮﺩﺕ ﻭﻳﻪ ﺍﻟﻐﺮﻳﺐ ..
ﻭﺍﻫﻠﻲ ﻛﺎﻟﻮ ﺍﻧﻄﻴﻨﺎﻫﺎ ﺍﺗﺰﻭﺟﺖ ﺍﺑﻐﺪﺍﺩ ﻭﺳﺘﺮﻭ ﺍﻟﺴﺎﻟﻔﻪ .. ﻟﻮ ﺍﻧﻬﺰﻣﺘﻲ ﺍﻧﺘﻲ ﺷﻨﻜﻮﻝ ﻳﻤﻪ ..
ﺷﺮﺩﺕ ﻭﻳﻪ ﺍﺧﻮ ﺭﺟﻠﻬﺎ .. ﻏﻴﺮ ﺍﺑﻮﺝ ﻳﻄﻚ ﻭﻳﻤﻮﺕ .. ﻫﻮﻩ ﻣﻦ ﺳﻮﺍﻟﻔﺞ ﺷﻜﻞ ﻭﻳﺎﻩ ﺿﻐﻂ ﻭﻳﻮﻣﻴﻪ ﻭﺍﻛﻊ ..
ﺗﺴﻮﻳﻦ ﻫﻴﺞ ﻳﻤﻮﺕ ﻭﺍﻟﻠﻪ .. ﻛﺘﻠﻬﺎ ﻳﻮﻡ ﺍﺑﻮﻱ ﻣﻔﻜﺮ ﺑﻴﻪ ﻓﺪ ﻳﻮﻡ ﻣﺎ ﻓﻜﺮ ﺑﻤﺸﺎﻋﺮﻱ .. ﻳﻌﻨﻲ ﺍﻧﺘﻮ ﻣﻦ ﺣﺒﻴﺘﻮ ﺣﻼﻝ ﻭﺍﻧﻲ ﺣﺮﺍﻡ ..
ﻛﺎﻟﺖ ﻭﻟﺞ ﻳﺎ ﺣﻼﻝ ﻳﺎ ﺣﺮﺭﻡ ﻳﻤﻪ ﻫﺬﺍ ﺍﺧﻮ ﺭﺟﻠﺞ ﺍﻧﺘﻲ ﻧﺎﻭﻳﻪ ﺗﺼﺨﻤﻴﻦ ﻭﺟﻮﻫﻨﻪ ﻭﻟﺞ ﺳﻤﺮ ﻋﻘﻠﻲ ﻳﻤﻪ ﻭﺍﻧﺴﻲ ..
ﻟﻮ ﺍﻃﻠﻜﺘﻲ ﻳﺠﺒﺮﻭﺝ ﺗﺘﺰﻭﺟﻴﻦ ﺍﻱ ﻭﺍﺣﺪ ﻭﺍﻟﻠﻪ ﻭﻣﺎ ﻳﺨﻠﻮﺝ ﺗﺤﺠﻴﻦ .. ﻭﺣﺘﻰ ﻟﻮ ﺍﻧﻬﺰﻣﺘﻲ ﻣﻔﻜﺮﻩ ﺍﺑﻮﺝ ﻣﺎ ﻳﻮﺻﻠﺞ ..
ﻭﺍﻟﻠﻪ ﻟﻮ ﺗﺮﺣﻴﻦ ﻻﺧﺮ ﺍﻟﻌﺎﻟﻢ ﻫﻢ ﻳﺠﻴﺒﺞ .. ﺳﻤﺮ ﺍﻋﻘﻠﻲ ﻭﺳﺪﻱ ﺍﻟﺴﺎﻟﻔﻪ .. ﻫﺰﻳﺖ ﺭﺍﺳﻲ .. ﻛﺘﻠﻬﺎ ﻳﻮﻡ ﻫﺴﻪ ﺍﻧﻲ ﺍﺭﻳﺪ ﺍﻧﺎﻡ ..
ﺧﻠﻴﺖ ﺭﺍﺳﻲ ﻋﻠﻤﺨﺪﻩ ﻃﻠﻌﺖ ﻫﻴﻪ .. ﺍﻭﻭﻭﻑ ﺭﺟﻌﺖ ﻟﻬﻨﺎ ﻻ ﻫﻠﻪ ﻭﻻ ﻣﺮﺣﺒﺎ .. ﺷﻜﺪ ﺟﻨﺖ ﻣﺮﺗﺎﺣﻪ ﻭﺍﻧﻲ ﺑﻌﻴﺪﻩ ﻋﻨﻬﻢ .. ﺍﻭﻭﻑ ﻳﺎﺭﺏ ﺭﺣﻤﺘﻚ ﻭﻋﻔﻮﻙ ..
ﻧﻤﺖ ﺳﺎﻋﻪ ﻭﻛﻌﺪﺕ .. ﻃﻠﻌﺖ ﻟﻜﻴﺖ ﺑﻜﺮ .. ﻛﺘﻠﻪ ﻻ ﺗﻨﺴﻰ ﻋﻼﺟﻚ ﺗﺮﻩ ﺍﺫﺍ ﺧﺮﺑﻄﺖ ﻋﻴﻨﻚ ﺗﺮﺟﻊ ..
ﻛﺎﻝ ﻭﺍﻟﻠﻪ ﻧﺎﺳﻴﻪ .. ﻛﺘﻠﻪ ﻻ ﺗﻜﻠﻲ ﺍﺧﺮ ﻗﻄﺮﻩ ﺍﻟﻠﻲ ﺧﻠﻴﺘﻠﻜﻴﺎﻫﺎ ﺑﻠﻄﻴﺎﺭﻩ .. ﻛﺎﻝ ﺍﻱ ﻭﺍﻟﻠﻪ .. ﻛﺘﻠﻪ ﺗﺤﺠﻲ ﺻﺪﻭﻙ ﺑﻜﺮﺭﺭﺭ ..
ﺭﺣﺖ ﺭﻛﺾ ﻃﻠﻌﺖ ﺍﻟﺪﻭﻩ ﻭﻣﺸﻴﺘﻠﻪ .. ﻛﺎﻋﺪ ﻳﻢ ﺍﻫﻠﻪ ﻳﺤﺠﻲ ﻭﻳﺎﻫﻢ ﻭﺍﺑﻮﻳﻪ ﻭﺍﻣﻲ ﻛﺎﻋﺪﻳﻦ ﻭﻋﻤﺎﺗﻲ ﻭﺍﺛﻨﻴﻦ ﻣﻦ ﻋﻤﺎﻣﻲ
🌿🌿🌿
ﻭﺍﻫﻠﻪ .. ﻛﺘﻠﻪ ﻳﻠﻪ ﺑﻜﺮ .. ﻭﺍﻧﻲ ﺍﻫﺰ ﺑﺎﻟﻘﻄﺮﻩ .. ﻛﺎﻝ ﺗﻌﺎﻱ .. ﻭﻛﻔﺖ ﻛﺘﻠﻪ ﻫﺎﻱ ﺻﺪﻙ ﺗﺤﺠﻲ .. ﺟﻨﻚ ﻋﻤﻮﺩ ﻛﻬﺮﺑﺎﺀ ﺩﻛﻌﺪ ﺧﻠﻲ ﺍﺣﻄﻠﻚ ..
ﻣﺸﻰ ﻟﻠﻘﻨﻔﻪ ﻛﻌﺪ ﻭﺭﻓﻊ ﺭﺍﺳﻪ .. ﻓﺘﺤﺖ ﻋﻴﻨﻪ ﻭﺧﻠﻴﺘﻠﻪ .. ﻛﺘﻠﻪ ﻣﻮ ﺗﻨﺴﻪ ﺑﻜﺮ ﺗﺮﻩ ﻣﻮ ﺯﻳﻦ ﻭﺍﻟﻠﻪ ..
ﻛﺎﻝ ﻭﻗﺘﻴﻠﻲ ﺍﻟﻤﻮﺑﺎﻳﻞ ﻭﻛﻠﻤﺎ ﻳﺪﻙ ﺭﻣﺸﻴﻠﻲ ﻭﺫﻛﺮﻳﻨﻲ ﺗﺮﻩ ﻭﺍﻟﻠﻪ ﻣﺎ ﺍﺗﺬﻛﺮ .. ﻛﺘﻠﻪ ﺑﻌﻴﻨﻲ ﺍﺩﻟﻞ .. ﻳﺤﺠﻲ ﻭﺍﻧﻲ ﻻﺯﻣﻪ ﻭﺟﻬﻪ ﻭﺭﺍﻓﻌﺘﻪ ..
ﻭﻫﻮﻩ ﻣﻐﻤﺾ ﻋﻠﻤﻮﺩ ﺍﻟﻌﻼﺝ ﻣﻴﻨﺰﻝ .. ﻭﺍﻧﻔﺦ ﻋﻠﻰ ﻋﻴﻮﻧﻪ .. ﻭﺧﺮﺕ ﺍﻳﺪﻱ ﻭﻛﺘﻠﻪ ﻳﻠﻪ ﺍﻓﺘﺢ ﻋﻴﻨﻚ ..
ﻓﺘﺢ ﻭﻫﻮﻩ ﻳﺮﻣﺶ .. ﺩﺭﺕ ﻋﻤﺘﻲ ﻭﺍﻣﻲ ﻭﺍﺑﻮﻱ ﻳﺒﺎﻭﻋﻮﻥ ﺷﻠﻮﻥ ﺍﺧﻠﻴﻠﻪ .. ﺍﻣﻲ ﺗﺨﺰﺭ ﺑﺼﻔﺤﻪ ﻭﻋﻤﺘﻲ ﺗﺰﻓﺮ ﺑﺼﻔﺤﻪ ..
ﺣﺠﺖ ﻣﺮﺕ ﻋﻤﻲ .. ﻛﺎﻟﺖ ﺷﻠﻮﻥ ﺍﺩﺍﺭﻳﻪ ﺗﻜﻮﻝ ﺍﻣﻪ ﻣﻮ ﻣﺮﺕ ﺍﺧﻮﻩ .. ﺑﺮﺑﺞ ﺳﻤﺮ ﺷﻜﺪ ﺗﻌﺰﻳﻦ ﺑﻜﺮ .. ﻛﺘﻠﻬﺎ ﻣﺎﻛﻮ ﻭﺻﻒ ..
ﻛﻠﺖ ﻫﻴﺞ ﻟﻮ ﺣﺴﻴﺖ ﻋﻴﻮﻥ ﺍﻣﻲ ﺭﺍﺡ ﺗﻨﻂ ﻭﻋﻤﺘﻲ ﻛﺎﻣﺖ .. ﻛﺎﻝ ﻋﻤﻮ ﺧﻠﻴﻞ ﻫﻮﻩ ﻟﻮ ﻣﺎ ﺑﻜﺮ ﻫﺴﻪ ﻫﻴﻪ ﻫﻴﺞ ﺣﺎﻟﻬﺎ ..
ﻟﻮ ﺗﻔﺮﺵ ﻋﻴﻮﻧﻬﺎ ﻣﺘﺠﺎﺯﻳﻪ .. ﻳﺎﻣﺎ ﻋﺎﺩﻝ ﺷﺒﻊ ﻛﺘﻞ ﻣﻦ ﻭﺭﻩ ﺑﻜﺮ ﻋﻠﻤﻮﺩ ﺳﻤﺮ .. ﺍﺑﺘﺴﻤﺖ .. ﺍﻟﺤﻤﺪﻟﻠﻪ ﻋﺎﺩﻝ ﻣﻮ ﻫﻨﺎ ﺟﺎﻥ ﺗﻀﺎﻳﻖ ..
ﻣﺮ ﺍﺳﺒﻮﻉ ﺟﻨﺖ ﻭﺍﻛﻔﻪ ﺑﺎﻟﻤﻄﺒﺦ ﺍﺳﻮﻱ ﺍﻛﻞ .. ﺍﺟﺖ ﻋﻤﺘﻲ ﻛﺎﻟﺖ ﻋﻮﺩ ﻋﺒﺎﻟﺞ ﻧﺎﺳﻴﻪ ﻣﻮﺿﻮﻉ .. ﺗﺒﺘﻌﺪﻳﻦ ﻋﻦ ﺑﻜﺮ ﻟﻮ ﺍﺳﺘﺨﺪﻡ ﻏﻴﺮ ﺍﺳﻠﻮﺏ ﻭﺍﻟﻠﻪ ﺍﺧﻠﻴﻬﻢ ﻳﺬﺑﺤﻮﺝ ..
ﻛﺘﻠﻬﺎ ﻋﻤﻪ ﻣﺎﻛﻮ ﺷﻲ ﻭﺭﺑﺞ .. ﻛﺎﻟﺖ ﻧﺠﺒﻲ ﺍﺻﺪﻛﺞ ﻟﻮ ﺍﺻﺪﻙ ﺍﺫﺍﻧﻲ ﺍﺳﻤﻌﺞ ﺗﻜﻠﻴﻪ ﺍﺧﺬﻙ ﺑﻌﻴﺪ ﻟﻐﻴﺮ ﻋﺎﻟﻢ ﺑﺲ ﺳﻤﺮ ﻭﺑﻜﺮ ﻭﺣﺒﻨﻪ .. ﻳﻠﻤﺎﺗﺴﺘﺤﻴﻦ
ﺑﻘﻴﺖ ﺻﺎﻓﻨﻪ .. ﻛﺎﻟﺖ ﺍﺻﺒﺮﻱ ﺑﺲ ﺍﺻﺒﺮﻱ ﻭﺷﻮﻓﻲ ﺷﺴﻮﻱ ﻭﺭﺍﺣﺖ .. ﺻﻔﻨﺖ ﻫﺎﻱ ﺷﻠﻮﻥ ﻣﺼﻴﺒﻪ ﻳﺮﺑﻲ
ﻣﺸﻴﺖ .. ﺟﺎﻥ ﻳﻄﺐ ﻋﺎﺩﻝ ﻭﺣﻨﻴﻦ ﻣﻦ ﺑﺮﻩ ﻭﻋﺎﺩﻝ ﺿﺎﻳﺞ ﻭﻃﺎﻟﻌﻪ ﺭﻭﺣﻪ .. ﻛﺎﻟﺖ ﻋﻤﺘﻲ ﻫﺎﺍ .. ﻛﺎﻟﺘﻠﻬﺎ ﺣﻨﻴﻦ ﺷﻜﻠﺘﻠﻜﻢ ﺍﻟﺼﻮﺝ ﻣﻮ ﻣﻨﻲ ﺗﺴﻤﻮﻧﻲ ﺍﻟﻌﺎﺟﺮ .. ﻋﺎﺩﻝ ﻋﻨﺪﻩ ﺿﻌﻒ ..
ﻫﻮﻩ ﺍﺟﻪ ﺿﺮﺑﻬﺎ ﺑﻘﻮﻩ ﻳﻜﻠﻬﺎ ﺑﻌﺪ ﺻﻴﺤﻲ ﺑﻌﺪ .. ﻛﻮﻟﻲ ﻋﺎﺩﻝ ﻣﺎ ﺑﻴﻪ ﺧﻴﺮ ﻭﻣﺎ ﻳﺨﻠﻒ .. ﺑﻘﻴﺖ ﺻﺎﻓﻨﻪ ..
ﺩﺭﺕ ﻭﺟﻬﻲ ﻋﻠﻰ ﺭﻧﺎ .. ﻛﺘﻠﻬﺎ ﺷﻜﻮ . ﻛﺎﻟﺖ ﺍﻣﻲ ﻣﻮ ﺗﺤﺠﻲ ﻋﻠﻰ ﺭﻧﺎ ﻻﻥ ﺻﺎﺭ ﺳﻨﻪ ﻭﻧﺺ ﻭﻣﺎ ﺣﺒﻠﺖ ..
ﺗﻜﻠﻬﺎ ﺍﻧﻲ ﻣﺎﺑﻴﻪ ﺷﻲ ﺍﻟﺼﻮﺝ ﻣﻦ ﺍﺑﻨﺞ .. ﻭﺍﺧﺬﺕ ﻋﺎﺩﻝ ﻭﺳﻮﺗﻠﻪ ﺗﺤﻠﻴﻞ .. ﻛﺘﻠﻬﺎ ﻭﻃﻠﻊ ﻋﺎﺩﻝ ﻣﻴﺨﻠﻒ .. ﻛﺎﻟﺖ ﻣﺎ ﺍﺩﺭﻱ .. ﺍﻟﺘﺤﻠﻴﻞ ﻫﻴﺞ ﻳﻜﻮﻝ ..
ﺑﻘﺖ ﺑﻴﻮﻣﻬﺎ ﺍﻻﺟﻮﺍﺀ ﻣﺘﻮﺗﺮﻩ ﺑﺎﻟﺒﻴﺖ ﺑﺴﺒﺐ ﻋﺎﺩﻝ ﻭﺍﻟﻠﻲ ﺻﺎﺭ .. ﺍﻧﻲ ﺗﺎﻧﻴﺖ ﻟﻠﻴﻞ .. ﺧﺎﺑﺮﺕ ﺑﻜﺮ ..
ﻛﺎﻝ ﻫﻼ ﺑـ ﺳﻤﺴﻤﺎﻳﻪ .. ﺍﻧﻲ ﺑﺎﻟﺒﻴﺖ ﺗﺮﻩ ﺗﻌﺎﻱ ﻟﻐﺮﻓﺘﻲ ﻟﻴﺶ ﺗﺨﺎﺑﺮﻳﻦ .. ﻛﺘﻠﻪ ﺍﺳﻤﻌﻨﻲ ﺑﻜﺮ .. ﻋﻤﺘﻲ ﺍﺟﺖ ﻭﻫﺪﺩﺗﻨﻲ ﺍﺑﺘﻌﺪ ﻣﻨﻚ ﻭﺗﻜﻮﻝ ﺗﻌﺮﻑ ﺑﺴﺎﻟﻔﻪ ..
ﻛﺎﻝ ﺍﻭﻑ ﻣﻦ ﺍﻣﻲ ﺍﻭﻭﻑ ﺍﻟﻴﻮﻡ ﻓﺎﺗﺤﺘﻨﻲ ﺑﻤﻮﺿﻮﻉ ﺯﻭﺍﺟﻲ ﻭﺗﻜﻠﻲ ﺍﺭﻳﺪ ﺍﺯﻭﺟﻚ .. ﻛﺘﻠﻬﺎ ﻣﺎ ﺍﺭﻳﺪ ﺍﺳﺘﺮﻳﺤﻲ ..
ﻛﺎﻟﺖ ﺍﻟﺒﺎﻟﻚ ﻻ ﺗﺤﻠﻢ ﺗﺼﻴﺮ .. ﻛﺘﻠﻬﺎ ﻟﻌﺪ ﺍﺧﺬﻱ ﺭﺍﺣﺘﺞ ﻭﺍﻃﻤﻨﻲ ﻛﻞ ﻋﻤﺮﻱ ﻣﺎ ﺗﺘﺰﻭﺝ ﺍﺫﺍ ﻫﻴﺞ ..
ﻛﺘﻠﻪ ﺑﻜﺮ ﻻﺯﻡ ﻧﺎﺧﺬ ﻗﺮﺍﺭ ﻭﻧﺤﺴﻢ ﻫﻼﻣﺮ ﻣﺎ ﻧﻜﺪﺭ ﻧﺴﺘﻤﺮ ﺍﻛﺜﺮ ﺑﻬﻠﻮﺿﻊ .. ﻛﺎﻝ ﺳﻤﺮ ﺍﻧﻲ ﻣﺘﺎﻧﻲ ﺍﻟﻜﻠﻤﻪ ﻣﻨﺞ ﺍﺧﺬﺝ ﻭﺍﺭﻭﺡ ..
ﻛﺘﻠﻪ ﻭﻳﻦ ﺗﺎﺧﺬﻧﻲ .. ﻛﺎﻝ ﻟﻌﺪ ﺷﻠﻮﻥ .. ﻛﺘﻠﻪ ﺑﻜﺮ ﻧﺘﺰﻭﺝ ﻫﻨﺎ ﻭﺑﻨﺺ ﺍﻫﻠﻨﻪ .. ﻛﺎﻝ ﺍﻛﻴﻒ ﺑﺲ ﺳﻤﺮ ﻣﻨﻮ ﺭﺍﺡ ﻳﻘﺒﻞ ﺑﻄﻼﻛﺞ ﻭﺑﺰﻭﺍﺟﻨﻪ ..
ﺍﻧﻲ ﺧﺎﻳﻒ ﻋﻠﻴﺞ ﻣﻮ ﻋﻠﻴﻪ .. ﻛﺘﻠﻪ ﺑﻜﺮ ﻟﻨﺼﻴﺮ ﺍﻧﺎﻧﻴﻴﻦ .. ﻋﻨﺪﻱ ﺍﻫﻞ ﻟﻮ ﺷﺮﺩﺕ ﻭﻳﺎﻙ ﺷﻴﻜﻮﻟﻮﻥ ﻟﻠﻨﺎﺱ ..
ﺍﺑﻮﻳﻪ ﻋﻨﺪﻩ ﺿﻐﻂ ﻟﻮ ﻋﺰﻳﺖ ﻭﺟﻬﻪ ﻭﺷﺮﺩﺕ ﻭﻳﺎﻙ ﻳﻤﻮﺕ .. ﻣﺎ ﺍﻛﺪﺭ ﺍﺟﻴﺒﻠﻬﻢ ﺍﻟﻌﺎﺭ ﺣﺘﻰ ﻟﻮ ﺍﺫﻭﻧﻲ ﺍﻟﻠﻪ ﻣﺴﺘﺤﻴﻞ ﻳﻮﻓﻘﻨﻪ ﻭﻳﺒﺎﻭﻋﻠﻨﻪ ﻭﺍﻫﻠﻨﻪ ﻏﺎﺿﺒﻴﻦ ﻋﻠﻴﻨﻪ ..
ﻭﺑﻌﺪﻳﻦ ﺍﻫﻠﻚ ﺑﻜﺮ .. ﺗﻜﺪﺭ ﺗﻌﻮﻑ ﺍﻫﻠﻚ ﻭﺗﻤﺸﻲ ﻭﻳﺎﻱ .. ﺍﻫﻠﻚ ﻛﻞ ﺍﻋﺘﻤﺎﺩﻫﻢ ﻋﻠﻴﻚ ﺍﺑﻮﻙ ﻣﺮﻳﺾ ﻭﻋﺎﺩﻝ ﻣﺎ ﻳﻌﻴﻦ ﻧﻔﺴﻪ ﻏﺮﻛﺎﻥ ﺑﺎﻟﻌﺮﻙ ..
ﻛﻮﻟﻲ ﺗﻜﺪﺭ ﺗﺘﺮﻛﻬﻢ ﻭﻧﻨﻬﺰﻡ .. ﺳﻜﺖ .. ﻛﺘﻠﻪ ﺍﻋﺮﻓﻚ ﻣﺘﻜﺪﺭ .. ﻳﺨﺎﺑﺮﻭﻙ ﻳﻜﺴﺮﻭﻥ ﺧﺎﻃﺮﻙ .. ﺗﺎﺧﺬﻧﻲ ﻭﻧﺮﺟﻊ ..
ﻭﻳﺬﺑﺤﻮﻧﻲ ﻭﺍﻟﻠﻪ .. ﻛﺎﻝ ﻟﻮ ﺻﺮﺗﻲ ﻣﺮﺗﻲ ﺑﻌﺪ ﻣﻨﻮ ﻳﻤﺴﺞ .. ﻛﺘﻠﻪ ﺑﻜﺮ ﺣﺘﻰ ﻟﻮ ﻣﺮﺗﻚ ﻣﺎ ﺍﻛﺪﺭ ﺍﺟﺎﺯﻑ ﻭﺍﻫﺮﺏ ﻭﻳﺎﻙ ﻭﺍﻧﻲ ﻋﻠﻰ ﺫﻣﺔ ﻋﺎﺩﻝ ..
ﺻﻌﺐ .. ﻛﺎﻝ ﺳﻤﺮ ﻣﺮﺍﺡ ﻳﻘﺒﻠﻮﻥ ﺑﻴﻨﻪ ﻭﺍﻟﻠﻪ .. ﻛﺘﻠﻪ ﺍﻭﻝ ﺑﺲ ﺍﻃﻠﻚ ﻣﻨﻜﻠﻬﻢ ﻋﻠﻰ ﻋﻼﻗﺘﻨﻪ .. ﺗﻤﺮ ﻭﻗﺖ ﻛﻔﺎﻳﻪ ﻭﻧﺒﻠﻐﻬﻢ ..
ﻛﺎﻝ ﺳﻤﺮ ﺑﻌﺪ ﻣﺘﻄﻠﻜﻴﻦ ﻭﺍﺧﻄﺒﺞ ﻟﻮ ﻣﺎ ﻗﺒﻠﻮ ﺍﺧﺬﺝ ﻭﺍﻧﻬﺰﻡ ﻟﺘﻠﻮﻣﻴﻨﻲ .. ﻛﺘﻠﻪ ﻻﺍﺍﺍ ﺍﺫﺍ ﺍﻃﻠﻘﺖ ﻭﻣﻘﺒﻠﻮ ﺑﻌﻼﻗﺘﻨﻪ ﺑﻜﻞ ﺍﻟﻄﺮﻕ ..
ﻧﻀﻄﺮ ﻧﻬﺮﺏ ﻛﻢ ﺳﻨﻪ ﻭﺑﻌﺪﻫﺎ ﻧﺨﻠﻴﻬﻢ ﺍﻣﺎﻡ ﺍﻻﻣﺮ ﺍﻟﻮﺍﻗﻊ ﺍﻣﺎ ﻫﺴﻪ ﻣﺎ ﺍﻛﺪﺭ ﺍﻧﻬﺰﻡ ﻭﻳﺎﻙ ﻭﺍﻧﻲ ﻣﺮﺕ ﻋﺎﺩﻝ ..
ﺍﻃﻠﻊ ﺑﻌﻴﻮﻧﻬﻢ ﻋﺎﻫﺮﻩ ﻭﺍﻟﻠﻪ .. ﻛﺎﻝ ﻫﺎﻫﻴﻪ ﻫﺴﻪ ﺑﺲ ﺍﻃﻠﻘﻲ .. ﻭﺍﻟﻠﻪ ﻛﺮﻳﻢ .. ﻛﺘﻠﻪ ﺭﺍﺡ ﻧﻨﺠﻤﻊ ﺑﻜﺮ ﻣـ ℳO ــﻮ ..
ﻛﺎﻝ ﺗﺄﻛﺪﻱ ﻓﺪ ﻳﻮﻡ ﺍﻟﻠﻪ ﺭﺍﺡ ﻳﺠﻤﻌﻨﻪ ﻻ ﺗﺨﺎﻓﻴﻦ .. ﻛﺘﻠﻪ ﻳﻠﻪ ﻣﻊ ﺍﻟﺴﻼﻣﻪ .. ﻛﺎﻝ ﺗﺮﺍﻓﻘﺞ ﺍﻟﺴﻼﻣﻪ ﺳﻤﺴﻢ ..
ﺳﺪﻳﺘﻪ ﻭﻃﻠﻌﺖ ﺑﺮﺍ ﺍﺧﺬﺕ ﻧﻔﺲ .. ﺷﻔﺖ ﻋﺎﺩﻝ ﻛﺎﻋﺪ ﻳﺸﺮﺏ ﺍﺭﻛﻴﻠﻪ .. ﺍﺗﻘﺮﺑﺖ ﻣﻨﻪ .. ﻛﺘﻠﻪ ﻳﺼﻴﺮ ﻧﻜﻌﺪ ﻳﻤﻚ ..
ﺷﻔﺘﻪ ﻣﺨﻠﻲ ﺍﻟﺸﺮﺏ ﻛﺪﺍﻣﻪ .. ﻛﺎﻝ ﻛﻌﺪﻱ . ﻛﺘﻠﻪ ﺷﺮﺑﺖ ﻟﻮ ﺑﻌﺪﻙ .. ﻛﺎﻝ ﻻ ﺍﻛﻤﻞ ﺍﺭﻛﻴﻠﻪ ﻭﺍﺷﺮﺏ ..
ﻛﺘﻠﻪ ﻋﺎﺩﻝ ﺑﻄﻞ ﻣﻨﻬﻦ ﻭﺍﻟﻠﻪ ﺭﺍﺡ ﻳﺪﻣﺮﻧﻚ .. ﻛﺎﻝ ﻋﺴﺎﻧﻲ ﻫﺴﻪ ﻋﺎﺩ ﺍﻧﻲ ﺷﻠﻮﻧﻲ ..
ﻛﺘﻠﻪ ﻋﺎﺩﻝ ﺍﺭﻳﺪ ﺍﺣﺠﻲ ﻭﻳﺎﻙ ﺑﻤﻮﺿﻮﻉ .. ﻛﺎﻝ ﺗﻔﻀﻠﻲ ..
ﻛﺘﻠﻪ ﻋﺎﺩﻝ ﺍﺭﻳﺪ ﺍﻃﻠﻖ ﻣﻨﻚ … ﻳﺘﺒﻊ
🌺🌺🌺🌺🌺
ﻭﺍﻧﻄﻘﺖ ﺍﺧﻴﺮﺍ 😃😃😃 ﺷﺎﺭﻛﻮﻧﻲ ﺍﺭﺍﺋﻜﻢ ﻭﺗﻮﻗﻌﺎﺗﻜﻢ .. ﻣﺘﺎﺑﻌﻪ ﻣﻤﺘﻌﻪ ..
# ﺯﻳﻨﺐ _ ﻣﺎﺟﺪ
السلام عليكم ورحمة الله وبركاته ، موقع روايات-Novels يهتم بنشر جديد الروايات للكتاب العراقين ، حمل تطبيقنا على جوجل بلاي وستمتع بلقراءة ، تمنياتنا لكم بلتوفيق