رواية نهوة حارث الجزء الرابع عشر
للكاتبة زينب ماجد
🔹🔸🥇🔹🔸
ﻓﺎﻃﻤﻪ .. ﻫﺴﻪ ﺭﺍﺡ ﺗﺤﺠﻲ ﻭﻳﻪ ﺣﺎﺭﺙ ﻳﺮﺟﻊ ﺟﻬﺎﻟﻲ ..
ﺭﻓﻞ .. ﺧﻞ ﻳﺠﻲ ﻭﺍﻛﻮﻟﻪ ﻭﺍﻧﺸﺎﻟﻠﻪ ﻳﺼﻴﺮ ﺧﻴﺮ ..
ﻓﺎﻃﻤﻪ .. ﻛﻮﻥ ﻳﺒﺠﻮﻥ .. ﻭﻛﻠﺘﻴﻬﻢ ﺷﺮﺑﺘﻴﻬﻢ
ﺭﻓﻞ .. ﻣﻮ ﺑﻨﺖ ﺍﺑﻠﻴﺲ ﺍﻧﻲ ﻭﻣﺎ ﺍﻭﻛﻠﻬﻢ .. ﻣﺎﻛﻠﻴﻦ ﻭﺷﺎﺑﻌﻴﻦ ﻭﻧﺎﻳﻤﻴﻦ ﺍﻟﺤﻤﺪﻟﻠﻪ .. ﻛﻤﻠﺖ ﻣﻨﻬﺎ ﺳﺪﻳﺖ ﺍﻟﺨﻂ .. ﻛﻌﺪ ﻣﺮﺗﻀﻰ
ﻛﺎﻝ ﺟﻮﻋﺎﻥ .. ﺳﻮﻳﺖ ﺑﻴﺾ ﺳﻠﻚ .. ﻛﻌﺪ ﻣﺼﻄﻔﻰ ﻛﺎﻝ ﺍﻛﻞ ﺑﺪﻭﻥ ﺧﺒﺰ .. ﻛﺘﻠﻪ ﻋﺎﺩﻱ .. ﻛﺎﻝ ﻣﺎﻣﺎ ﻣﺎ ﺗﻘﺒﻞ ﻛﺘﻠﻪ ﺍﻟﻴﻮﻡ ﺳﻤﺎﺡ .. ﺿﺤﻚ ﻭﺍﻛﻞ ﺑﻴﻀﺘﻴﻦ ﺳﻠﻚ ﻭﻓﺮﺣﺎﻥ ﻣﺴﻮﻱ ﺍﻧﺠﺎﺯ ﻫﻬﻬﻪ
ﻣﺮﺗﻀﻰ ﻛﻌﺪﺕ ﺍﻟﻌﺐ ﻭﻳﺎﻩ .. ﻭﻋﻠﻤﺘﻪ ﺍﺑﻄﻨﻲ ﻧﻮﻧﻮ ﻳﺒﻮﺳﻪ ﻭﻳﺤﺠﻲ ﻭﻳﺎﻫﺎ ﻭﻳﻜﻠﻪ ﺩﺍﺩﻩ .. ﺑﻌﺪﻳﻦ ﺧﺎﺑﺮﺕ ﺣﺎﺭﺙ ﻋﻠﻐﺪﺍ ﻛﺎﻝ ﺍﻧﻲ ﺍﺟﻴﺐ ﺩﺟﺎﺝ ﻣﺸﻮﻱ ﻻ ﺗﺴﻮﻳﻦ ..
ﺍﺧﺬﺕ ﺍﻻﻃﻔﺎﻝ ﻛﻌﺪﺗﻬﻢ ﻋﻠﺘﻠﻔﺰﻳﻮﻥ ﻃﻠﻌﺘﻠﻬﻢ ﺍﻓﻼﻡ ﻛﺎﺭﺗﻮﻥ .. ﺑﻘﻮ ﻳﺒﺎﻭﻋﻮﻥ .. ﻟﺸﻮﻱ ﺗﺮﺳﺖ ﺍﻟﺒﺎﻧﻴﻮ ﻟﻠﻨﺺ ..
ﻭﺻﺤﺖ ﻋﻠﻴﻬﻢ ﻣﻨﻮ ﻳﻄﺒﺶ ﻭﻳﺎﻳﻪ .. ﺛﻨﻴﻨﻬﻢ ﺗﺮﺍﻛﻀﻮ ﻗﺒﻠﻲ ﻭﻳﺼﻴﺤﻮ ﻫﻴﻴﻴﻴﻲ .. ﻛﻌﺪﺕ ﺑﺎﻟﺒﺎﻧﻴﻮ ﻭﻛﻌﺪﺗﻬﻢ ﻭﻳﺎﻱ ﻭﻧﻐﻨﻲ ﻳﻠﻲ ﺑﻴﺴﻤﻊ ﻛﻠﻤﺔ ﺍﻫﻠﻮ ﺷﻮ ﺑﻨﺄﻟﻮ ﻭﻫﻤﻪ ﻳﺼﻴﺤﻮﻥ ﺷﺎﻃﺮ ﺷﺎﻃﺮ ﻭﻳﻄﺒﺸﻮﻥ ﺑﺎﻟﻤﻲ ﺑﺄﻳﺪﻫﻢ
ﻛﺎﻋﺪ ﻧﻐﻨﻲ ﻳﻠﻲ ﺑﻴﻨﺠﺢ ﻓﻲ ﻣﺪﺭﺳﺘﻮ ﻭﻣﺒﻴﻌﺬﺏ ﻣﻌﻠﻤﺘﻮ ﺑﻨﺤﺒﻮ ﻭﻣﻨﻀﻞ ﺍﻧﺄﻟﻮ .. ﻣﺪ ﺭﺍﺳﻪ ﺣﺎﺭﺙ ﻛﺎﻝ ﺯﻋﻄﻮﻃﻪ ﺯﻋﻄﻮﻃﻪ ..
ﺿﺤﻜﺖ .. ﺍﻟﺠﻬﺎﻝ ﺷﺎﻓﻮ ﺍﺑﻮﻫﻢ ﺭﻛﻀﻮﻟﻪ .. ﻫﻮﻩ ﻧﺰﻉ ﻣﻼﺑﺴﻪ ﻭﺩﺧﻞ ﻟﻠﺤﻤﺎﻡ .. ﺑﻮﺳﺘﻪ .. ﻛﺘﻠﻪ ﺍﺳﺒﺢ ﻭﻳﺎﻫﻢ ﻋﻠﻰ ﻣﺎ ﺍﺳﻮﻱ ﺍﻻﻛﻞ ..
ﺟﺎﻱ ﺍﻃﻠﻊ ﻛﺎﻝ ﻭﺍﻟﻠﻪ ﺍﻋﺸﻘﺞ .. ﺿﺤﻜﺖ .. ﻭﻛﺘﻠﻪ ﻭﺍﻧﻲ ﺍﻣﻮﻭﻭﺕ ﻋﻞ ﺍﻟﻤﻠﻴﻖ ﻣﺎﻝ ﺍﻧﻲ ﻭﻛﺮﺻﺖ ﻣﻦ ﺧﺪﺕ .. ﺿﺤﻚ .. ﺑﺎﺳﻨﻲ ﺑﺨﺪﻱ .. ﻭﻃﻠﻌﺖ
ﺳﻤﻌﺘﻪ ﻧﺰﻝ ﻭﻳﺎﻫﻢ ﺑﺎﻟﺒﺎﻧﻴﻮ ﻭﻛﻤﻞ ﺍﻻﻏﻨﻴﻪ .. ﺭﺣﺖ ﺣﻈﺮﺕ ﺍﻟﺼﻴﻨﻴﻪ .. ﻭﺍﻟﻜﻼﺻﺎﺕ ﺟﺎﻳﺐ ﺑﻴﺒﺴﻲ ..
ﺍﻧﻮﺏ ﺭﺣﺖ ﻃﻠﻌﺖ ﻣﻼﺑﺲ ﻟﺤﺎﺭﺙ ﻭﻟﻼﻃﻔﺎﻝ .. ﻭﺩﺧﻠﺖ ﻋﻠﻴﻬﻢ .. ﻳﻠﻪ ﺍﻃﻔﺎﻟﻲ ﺍﻟﺤﻠﻮﻳﻦ .. ﺧﻠﺺ ﺍﻟﺤﻤﺎﻡ .. ﺟﺎﻥ ﺣﺎﺭﺙ ﻳﺼﻴﺢ ﻻﺍﺍﺍﺍﺍ ﻣﺎﻣﺎ ﺑﻌﺪ ﺑﻌﺪ ..
ﻛﺘﻠﻪ ﻭﻛﻴﺢ ﻭﺭﺍﻙ ﺳﺒﺢ ﻛﻮﻣﻪ ﻛﻮﻭﻭﻡ ﻭﻏﻤﺰﺗﻠﻪ … ﻛﺎﻝ ﺍﻟﻠﻪ ﻛﺎﻳﻢ . ﻫﻬﻬﻬﻬﻪ .. ﺍﺧﺬﺕ ﺍﻟﺠﻬﺎﻝ ﻧﺸﻔﺘﻬﻢ ﻭﻟﺒﺴﺘﻬﻢ ﻭﻣﺸﻄﺘﻬﻢ ..
ﻭﻛﺘﻠﻬﻢ ﺭﻭﺣﻮ ﻟﻠﺼﺎﻟﻪ ﺣﺠﻴﺐ ﺍﻻﻛﻞ .. ﺟﺒﺖ ﺍﻻﻛﻞ ﻭﺧﻠﻴﺘﻪ ﺑﺎﻟﻜﺎﻉ .. ﺍﺗﻌﺎﺭﻛﻮ ﻋﻠﻔﺨﺬ ﻣﺎﻝ ﺍﻟﺪﺟﺎﺝ 🍗 ﻣﻨﻮ ﺍﻟﻴﺎﺧﺬﻩ ..
ﻛﺴﺮﺕ ﺍﻟﻔﺨﺬ ﻣﺎﻝ ﺍﻟﺪﺟﺎﺟﻪ ﺛﻨﻴﻨﻬﻢ ﻭﺍﻧﻄﻴﺘﻬﻢ .. ﺣﺎﺭﺙ ﻛﺎﻝ ﻻ ﻳﺪﻣﺮﻭﻥ ﻧﻔﺴﻬﻢ ﻫﺴﻪ ﺳﺒﺤﻮ ﺧﻞ ﻳﺎﻛﻠﻮﻥ ﺑﺨﺒﺰ
ﻛﺘﻠﻪ ﻗﺎﺑﻞ ﺍﻟﻤﻲ ﺑﻔﻠﻮﺱ ﺧﻞ ﺍﻟﻄﻔﻞ ﻋﻠﻰ ﺭﺍﺣﺘﻪ ﻫﺬﻱ ﻃﻔﻮﻟﺘﻪ ﻻﺯﻡ ﻳﺎﺧﺬ ﺣﺮﻳﺘﻪ ﺑﺎﻻﻛﻞ .. ﻳﻜﻤﻞ ﺍﻛﻮ ﻣﻲ ﻭﻳﻐﺴﻞ ..
ﻛﺎﻝ ﺗﻌﺒﻮﺝ .. ﻛﺘﻠﻪ ﻻ ﻭﺍﻟﻠﻪ ﺍﺑﺪ ﺑﺲ ﻣﺎ ﺍﺭﻳﺪ ﻳﺒﻘﻮﻥ ﻳﻤﻲ .. ﻋﻘﺪ ﺣﺎﺟﺒﻪ .. ﻛﺎﻝ ﻟﻴﺶ .. ﻛﺘﻠﻪ ﻣﻮ ﺍﻃﻔﺎﻟﻲ .. ﺍﻟﻬﻢ ﺍﻡ ﺗﺒﺠﻲ ﻋﻠﻴﻬﻢ
ﻛﺎﻝ ﺍﻣﻬﻢ ﺣﺬﺭﺗﻬﺎ ﻭﻣﺎ ﺳﻤﻌﺖ ﻛﺘﻠﻬﺎ ﻣﺎ ﺍﺭﻳﺪ ﻣﺸﺎﻛﻞ ﻭﺗﺸﺘﺮﻱ ﺍﻟﻤﺸﺎﻛﻞ ﻣﺸﺘﺮﻩ .. ﻛﺘﻠﻪ ﺣﺎﺭﺙ ﻟﺘﻮﻛﻒ ﻋﻠﻰ ﻫﻠﺴﻮﺍﻟﻒ ..
🔸🔹🥇🔸🔹
ﺍﺣﻨﻪ ﻧﺴﻮﺍﻥ ﻏﻴﺮﺗﻨﻪ ﺗﻜﺘﻞ .. ﺍﻧﻲ ﻛﺪﺍﻣﻚ ﺍﻛﺶ ﻣﻨﻚ ﻟﻤﺎ ﺗﻮﺻﻞ ﻳﻤﻬﺎ ﻭﺗﺠﻴﻨﻲ .. ﺑﺲ ﻣﻦ ﻏﻴﺮﺗﻲ ﺑﺬﺍﻙ ﺍﻟﻴﻮﻡ ﻧﺴﻴﺖ ﺣﺘﻰ ﻟﻌﺒﺎﻥ ﻧﻔﺴﻲ ..
ﻭﺳﻮﻳﺖ ﺍﻟﺴﻮﻳﺘﻪ ﻣﻦ ﻏﻴﺮﺗﻲ ﻓﻼ ﺗﻠﻮﻣﻬﺎ ﺍﻟﻐﻴﺮﻩ ﺗﻜﺘﻞ .. ﺷﻠﻮﻥ ﻟﻤﺎ ﺗﺸﻮﻑ ﻭﺍﺣﺪ ﻳﺒﺎﻭﻉ ﻋﻠﻴﻪ ﻭﻳﺮﻳﺪﻧﻲ ﺗﻘﺒﻞ .. ﻛﻞ ﻻ ﺗﺎﻛﻠﻴﻦ ﻧﻌﻞ .. ﻛﺘﻠﻪ ﺑﺎﻭﻉ ﻣﺘﻘﺒﻞ ﺭﺟﻌﻬﻢ ﻻﻣﻬﻢ
ﻭﻫﺪﺩﻫﺎ .. ﺍﺫﺍ ﻣﻤﺸﺖ ﻋﺪﻝ ﻭﺭﺟﻌﺖ ﺗﺴﻮﻱ ﻣﺸﺎﻛﻞ ﻛﻠﻬﺎ ﺍﺧﺬ ﺟﻬﺎﻟﻲ ﻭﺍﻃﻠﻜﺞ .. ﺑﺲ ﺣﺮﺍﻡ ﺗﻌﻮﻑ ﺍﻻﻃﻔﺎﻝ ﻫﻴﺞ
ﻣﻬﻤﺎ ﺍﺳﻮﻳﻠﻬﻢ ﻣﻮ ﻣﺜﻞ ﺍﻣﻬﻢ .. ﺍﺷﻮﻑ ﻧﻔﺴﻲ ﺷﻜﺪ ﻣﺎ ﺍﻧﺘﻪ ﻣﺪﻟﻠﻨﻲ ﻭﺗﺤﺒﻨﻲ .. ﺍﺭﻳﺪ ﺍﻫﻠﻲ ﻭﺍﻣﻴﻠﻠﻬﻢ ﻭﺍﺗﻤﻨﻰ ﺗﻜﻮﻟﻲ ﺭﻭﺣﻲ ﻻﻫﻠﺞ ..
ﻛﺎﻝ ﺗﺘﻤﻨﻴﻦ ﺗﺮﺣﻴﻦ .. ﻛﺘﻠﻪ ﺍﺭﻭﺡ ﻳﻤﻬﻢ ﺍﻱ ﺑﺲ ﺍﻋﻮﻓﻚ ﻻ .. ﻛﺎﻝ ﺟﺎ ﺷﻠﻮﻥ .. ﻛﺘﻠﻪ ﻣﺘﺸﻮﻓﻨﻲ ﻣﺘﻌﻠﻌﻠﻪ ﻻ ﺍﻧﻲ ﺭﺍﺿﻴﻪ ﺑﻮﺿﻌﻜﻢ ﻭﻻ ﺍﻧﻲ ﺍﻟﻤﺘﻘﺒﻠﻪ
ﻛﺎﻝ ﻋﺎﻳﻨﻲ ﺭﻓﻞ .. ﺍﻧﻪ ﻓﺎﻃﻤﻪ ﻣﺎ ﺍﻃﻠﻜﻬﺎ ﻭﻻ ﻧﺎﻭﻱ ﺍﻃﻠﻜﻬﺎ ﺑﺲ ﺍﺭﻳﺪ ﺍﺩﺑﻬﺎ ﻻﻥ ﻏﻴﺮﺗﻬﺎ ﻣﻮ ﻣﻌﻘﻮﻟﻪ .. ﺣﺬﺭﺗﻬﺎ ﺫﻳﺞ ﺍﻟﻤﺮﻩ
ﻭﻫﻢ ﺑﺎﺳﺖ ﺍﻳﺪﻱ ﻭﺑﺎﺳﺖ ﺭﺟﻠﻲ ﻭﺗﻮﺳﻠﺖ ﻭﺑﺠﺖ .. ﻭﺣﻠﻔﺖ ﻣﺎ ﺗﺴﻮﻱ ﻣﺸﺎﻛﻞ ﻭﻫﺎﻱ ﺭﺟﻌﺖ .
ﻛﺘﻠﻪ ﻳﺎ ﺍﺧﻲ ﻫﺎﻱ ﻋﻘﻠﻴﺘﻬﺎ ﺷﺘﺴﻮﻳﻠﻬﺎ .. ﺍﺗﺮﻛﻬﺎ .. ﻛﺎﻝ ﻻ ﺧﻞ ﺍﺳﻮﻳﻠﻬﺎ ﺩﺭﺱ ﻓﺪ ﺍﺳﺒﻮﻉ ﻣﺘﺸﻮﻑ ﺟﻬﺎﻟﻬﺎ ﻋﻠﻤﻮﺩ ﻳﺼﻴﺮﻟﻬﺎ ﻛﻠﺐ ﻣﺘﻌﻴﺪ ﺍﻟﺴﻮﺗﻪ ..
ﻛﺘﻠﻪ ﺑﻜﻴﻔﻚ ﺑﻌﺪ ﺍﻧﺘﻪ ﺍﺩﺭﻩ .. ﻏﻤﺰ ﻭ ﻛﺎﻝ ﺫﻭﻟﻪ ﺑﻴﻬﻢ ﻧﻮﻣﻪ ﻻ .. ﻛﺘﻠﻪ ﻧﺠﺮﺏ .. ﺻﻔﻜﺖ ﻭﻛﺘﻠﻬﻢ ﻣﻨﻮ ﻳﻨﺎﻡ ﺍﻭﻝ ﻋﻠﻤﻮﺩ ﺍﻟﻌﺼﺮ ﻧﺎﺧﺬﻩ ﻟﻼﻟﻌﺎﺏ ﺻﻴﺤﻮ ﺍﻧﻲ ﺍﻧﻲ
ﻛﺘﻠﻬﻢ ﻳﻠﻪ ﻭﺭﺍﻳﻪ .. ﻛﻤﺖ ﻭﻫﻤﻪ ﻣﺸﻮ ﻭﺭﺍﻳﻪ ﻏﺴﻠﺘﻠﻬﻢ ﻭﻃﺒﻴﻨﻪ ﻟﻠﻐﺮﻓﻪ .. ﻛﺎﻝ ﻭﺍﻟﺼﻴﻨﻴﻪ ﻣﻨﻮ ﻳﺸﻴﻠﻬﺎ ﺍﻟﺨﻠﻔﺞ .. ﻛﺘﻠﻪ ﺣﻠﻮﻩ ﺍﻟﻤﺴﺎﻋﺪﻩ ﺣًِــ ℓσνє ـًِﺒٌُﻲُ ..
ﻛﺎﻝ ﺧﺮﺑﺖ ﻭﺍﻟﻌﺒﺎﺱ .. ﺗﺮﺩﻳﻦ ﺍﻏﺴﻠﻬﻦ ﺑﻄﺮﻳﻘﻲ ﺧﺎﻧﻢ .. ﻛﺘﻠﻪ ﻻ ﺣﺒﻴﺒﻲ ﺷﻜﺮﺍ ﺍﻧﺘﻪ ﺑﺲ ﺷﻴﻠﻬﻦ .. ﻓﺸﺮ ﻃﻮ .…… ﻁ ﻫﻬﻬﻬﻬﻪ
ﻓﺮﺷﺖ ﺍﻟﻔﺮﺍﺵ ﺑﺎﻟﻜﺎﻉ ﻭﻧﻮﻣﺘﻬﻢ ﻭﻧﻤﺖ ﻳﻤﻬﻢ ﺍﺣﺠﻴﻠﻬﻢ ﻗﺼﻪ . ﺍﻧﻲ ﺍﺣﺠﻲ ﻭﻫﻤﻪ ﻳﺴﺄﻟﻮﻥ ﻣﻨﻮ ﻫﺬﺍ ﻭﻟﻴﺶ ﺭﺍﺡ .. ﻛﺘﻠﻬﻢ ﻣﻤﻨﻮﻉ ﺍﻻﺳﺌﻠﻪ . ﺍﻧﺘﻮ ﺑﺲ ﺍﺳﻤﻌﻮ ﺍﻟﻴﺤﺠﻲ ﻳﺎﻛﻠﻪ ﺍﻟﻮﺣﺶ ..
ﺳﻜﺘﻮ .. ﺿﻠﻴﺖ ﺍﺣﺠﻲ ﺍﺣﺠﻲ .. ﻟﺤﺪ ﻣﺪﺍﺧﻮ ﻭﻧﺎﻣﻮ .. ﻏﻄﻴﺘﻬﻢ ﻭﻛﻤﺖ .. ﻟﻜﻴﺖ ﺣﺎﺭﺙ ﻳﺸﺮﺏ ﺟﻜﺎﻳﺮ .. ﻭﺻﺎﻓﻦ ..
ﻛﺘﻠﻪ ﻭﻳﻦ ﺻﺎﻓﻦ ﺍﻟﺤﻠﻮ .. ﻛﺎﻝ ﻻ ﺣﺴﺒﺖ ﺷﻐﻞ .. ﻛﺘﻠﻪ ﻣﺘﻌﺐ ﺷﻐﻠﻚ .. ﻛﺎﻝ ﻛﻠﺶ ﺟﺮﺍﻳﻢ ﻭﺍﺭﻫﺎﺏ ﻭﻧﺎﺱ ﻟﻌﺒﺎﻥ ﻧﻔﺲ ..
ﻛﺘﻠﻪ ﻟﻴﺶ ﺻﺮﺕ ﻇﺎﺑﻂ ﻟﻌﺪ .. ﻛﺎﻝ ﺑﻮﻗﺖ ﺻﺪﺍﻡ ﻫﻴﺒﺔ ﺍﻟﻀﺎﺑﻂ ﺗﺴﻄﺮ .. ﺟﻨﺖ ﺍﺷﻮﻑ ﺍﻟﺸﺮﻃﻲ ﺍﻟﻴﻔﻮﺕ ﻛﻠﻬﺎ ﺗﺨﺎﻑ ﻣﻨﻪ ﺣﺒﻴﺖ ﺍﺻﻴﺮ ﻫﻴﺞ
ﻛﺘﻠﻪ ﻣﺘﻨﺪﻡ .. ﻛﺎﻝ ﻻﺍﺍﺍ ﻣﻮ ﻣﺘﻨﺪﻡ ﺑﺲ ﺗﻌﺐ … ﻭﻣﻮ ﺗﻌﺐ ﺟﺴﺪ ﻻ ﺗﻌﺐ ﻧﻔﺴﻲ .. ﻭﻣﺠﺎﻱ ﺍﻟﻜﻪ ﺍﻟﺮﺍﺣﻪ .. ﺍﺭﻭﺡ ﺍﻟﺸﻐﻠﻲ ﺣﺮﻛﺎﻥ ﺍﻋﺼﺎﺏ ﻭﻓﺴﺎﺩ ﻭﻓﻮﺿﻰ
ﺍﺭﺟﻊ ﻟﺒﻴﺘﻲ ﺍﻟﻜﺎﻩ ﻛﺎﺏ ﺑﻨﺴﻮﺍﻧﻪ .. ﻭﺍﻟﻠﻪ ﻣﺎ ﺍﺑﺪﻱ ﺍﺭﺟﻊ ﻫﻨﺎﻙ .. ﻟﻮ ﺑﻴﺪﻱ ﺍﺿﻞ ﻛﻞ ﻋﻤﺮﻱ ﻫﻨﺎ ﻭﻳﺎﺝ ﻭﻳﻪ ﺍﻃﻔﺎﻟﻲ .. ﺑﺲ ﺍﻭﻑ ﻳﻜﻠﺒﻲ ﻣﺎ ﻳﻨﻄﻴﻨﻲ ﺍﻋﻮﻓﻬﻦ
ﻧﻤﺖ ﻋﻠﻰ ﺻﺪﺭﻩ ﻭﺑﺴﺖ ﻛﻠﺒﻪ ﻛﺘﻠﻪ ﻓﺪﻳﺘﻪ ﻻﺑﻮ ﻛﻠﺐ ﺍﻟﺤﻨﻮﻥ .. ﻛﺎﻝ ﺭﻓﻞ ﻭﺍﻟﻠﻪ ﺗﻌﺒﺖ ﻭﻟﺞ ﻣﺎ ﺟﺎﻱ ﺍﺭﺗﺎﺡ ﺷﻠﻮﻥ ..
🔹🔸🥇🔹🔸
ﻛﺘﻠﻪ ﺣﺒﻴﺒﻲ ﻻ ﺗﺸﻴﻞ ﻫﻤﻨﻪ .. ﻭﻋﺪ ﺑﻌﺪ ﻣﺎ ﺍﺿﻮﺟﻚ ﻭﺍﺷﻜﻴﻠﻚ .. ﻛﺎﻝ ﻫﻮﻩ ﻣﻨﺞ .. ﻳﻤﻌﻮﺩﻩ ﻣﻨﻬﻦ .. ﻛﺘﻠﻪ ﺍﻧﻲ ﺍﺗﺼﺮﻑ ﻭﻳﺎﻫﻦ ﻭﺍﺧﺬ ﺣﻘﻲ ﺑﻴﺪﻱ ..
ﻭﺍﻟﻴﺠﻲ ﻳﻤﻚ ﻛﻠﻬﻢ ﺣﻴﻠﻜﻢ ﺑﻴﻨﻜﻢ ﻃﻠﻌﻮﻧﻲ .. ﻛﺎﻝ ﻣﺎ ﺗﺮﻫﻢ .. ﻏﻨﻢ ﺑﻼ ﺭﺍﻋﻲ ﻳﺘﻴﻪ .. ﻛﺘﻠﻪ ﻟﻌﺪ ﺷﻠﻮﻭﻥ .. ﻛﺎﻝ ﺑﺲ ﺍﻟﻌﺪ ﻣﺎﻟﺘﺞ ﺭﺍﺣﻪ ﻭﺿﺤﻚ
ﺿﺤﻜﺖ .. ﻛﺘﻠﻪ ﻟﻌﺪ ﺷﻌﺒﺎﻟﺞ .. ﻛﺎﻝ ﺍﻭﻭﻑ ﻳﺒﺖ ﺑﻐﺪﺍﺩ ﺷﺴﻮﻳﺘﻲ ﺑﻴﻪ .. ﻛﺘﻠﻪ ﻣﺴﻮﻳﺖ ﺷﻲ ﻭﺭﺑﻚ ﻓﺘﺤﺖ ﻛﻠﺒﻚ ﻭﻧﻤﺖ ﻭﺗﻐﻄﻴﺖ ﺑﻴﻪ ﻭﺑﺲ ..
ﻛﺎﻝ ﻭﻟﺞ ﻣﺪﻣﺮﺗﻨﻲ ﻭﻋﻠﻲ .. ﺍﻣﺸﻲ ﺍﻓﻜﺮ ﺑﻴﺞ ﺍﻛﻌﺪ ﺍﻓﻜﺮ ﺑﻴﺞ .. ﺑﺪﻭﺍﻣﻲ ﺍﻓﻜﺮ ﺑﻴﺞ .. ﻟﻮ ﺑﻴﺪﻱ ﺍﺧﺬﺝ ﻭﺍﺷﺮﺩ ﺑﺪﻳﺮﻩ ﻭﺣﺪﻧﻪ ..
ﻛﺘﻠﻪ ﺍﻛﻮ ﺍﻏﻨﻴﻪ ﺍﺗﺬﻛﺮﻙ ﺑﻴﻬﺎ ﻭﺍﺣﺐ ﺍﺳﻤﻌﻬﺎ ﻻﻥ ﺗﺬﻛﺮﻧﻲ ﺑﻴﻚ .. ﻛﺎﻝ ﻭﻫﻴﻪ .. ﻛﺘﻠﻪ ﻟﻬﻴﺜﻢ ﻳﻮﺳﻒ .. ﺗﻜﻮﻝ ﺣﻠﻮ ﺣﺒﻚ ﺍﻟﻴﻪ ﺣﻠﻮ ﺧﻮﻓﻚ ﻋﻠﻴﻪ ﻭﺍﻻﺣﻠﻰ ﻣﺎ ﺑﻴﻚ ﺍﻧﻚ ﺣﺒﻴﺒﻲ ﺗﺤﺲ ﺑﻴﻪ ﺣﺒﻴﻴﻴﻴﻴﻴﻴﻴﻴﻴﻴﻴﻴﻴﺒﻲ ﻃﺮﺑﻚ ﻃﺮﺑﻚ ﻃﺮﺑﻚ
ﻛﺎﻝ ﺷﻨﻬﺎﻱ ﺍﻟﻄﺮﺑﻚ .. ﻛﺘﻠﻪ ﻣﻦ ﺿﻤﻦ ﺍﻟﻠﺤﻦ ﻏﻠﺲ .. ﺿﺤﻚ ﺑﻌﻠﻮ ﺻﻮﺗﻪ ﻭﺣﻈﻨﻲ ﺣﻴﻞ ﻭﺑﺎﺳﻨﻲ .. ﻛﺎﻝ ﻣﺴﻮﺩﻧﻪ ﻭﺍﺣﺒﺞ
ﻛﻌﺪﺕ ﻋﻠﻰ ﺭﺟﻠﻴﻪ ﻭﻟﻔﻴﺖ ﺍﺩﻳﻪ ﻋﻠﻰ ﺭﻛﺒﺘﻪ ﻛﺘﻠﻪ ﻣﻮ ﺑﻜﺪﻱ .. ﻛﺎﻝ ﻻ ﻭﺍﻟﻌﺒﺎﺱ ﺍﻛﺜﺮ .. ﺿﺤﻜﺖ ﻫﻬﻬﻬﻬﻬﻪ ﻛﺎﻝ ﻳﻢ ﺍﻟﻌﻴﻮﻥ ﺍﻟﺴﻮﺩ ﺷﻠﻌﺒﺘﻲ ﺑﺤﺎﻟﻲ ..
ﻫﻤﺴﺘﻠﻪ ﻭﻏﻨﻴﺘﻠﻪ ﺍﺷﻐﻠﻚ ﻭﺍﺷﻐﻞ ﺣﻴﺎﺗﻚ ﻭﺍﻟﻌﺐ ﺑﻜﻠﺒﻚ ﻟﻌﺐ .. ﻛﺎﻝ ﻭﺗﺪﻟﻌﻴﻦ ﺑﻌﺪ ﺩﺗﻌﺎﻱ ﻭﻭﻭ 💏
ﻣﺘﻤﺪﺩ ﻛﺎﻝ ﻛﻮﻣﻲ ﺟﻴﺒﻴﻠﻲ ﻣﻲ .. ﻛﺘﻠﻪ ﺗﺄﻣﺮ .. ﻛﻤﺖ ﺷﻔﺖ ﺟﻬﺎﺯﻩ ﻳﺪﻭﻙ .. ﻛﺘﻠﻪ ﺣﺒﻴﺒﻲ ﺟﻬﺎﺯﻙ ﺩﻳﺪﻭﻙ ..
ﻛﺎﻝ ﻣﻨﻮ .. ﻛﺘﻠﻪ ﻣﻜﺘﻮﺏ ﻧﺒﺾ ﻛﻠﺒﻲ ﺍﻣﻲ .. ﻛﺎﻝ ﻫﺎﻱ ﺍﻣﻲ ﺟﻴﺒﻲ .. ﺭﻓﻊ ﺧﻂ .. ﻛﺎﻟﺘﻠﻪ ﺷﻨﻬﻲ ﻣﻨﺎﻭﻱ ﺗﺮﺟﻊ ﺍﻟﺠﻬﺎﻝ ..
ﻛﺎﻟﻬﺎ ﺍﻟﺴﻼﻡ ﻋﻠﻴﻜﻢ .. ﻛﺎﻟﺘﻠﻪ ﻣﺎ ﻋﻠﻴﻚ ﺳﻼﻡ ﺍﻧﺘﻪ .. ﻛﺎﻝ ﺯﻳﻦ ﻣﻊ ﺍﻟﺴﻼﻣﻪ .. ﻛﺎﻟﺘﻠﻪ ﺣﻮﻳﺮﺙ ﻻ ﺍﺩﻭﻟﺒﻨﻲ ﺟﻴﺐ ﻣﺮﺗﻚ ﻭﺍﻟﺠﻬﺎﻝ ﻭﺗﻌﺎﻝ
ﻛﺎﻟﻬﺎ ﻟﻴﺶ .. ﻛﺎﻟﺘﻠﻪ ﻋﺎﻳﻒ ﺑﻴﺘﻚ ﻭﺯﻋﻼﻥ ﺷﻨﻬﻲ ﺯﻳﻨﻴﻪ ﻫﺎﻱ .. ﻛﺎﻟﻬﺎ ﻣﻨﻮ ﻛﺎﻝ ﺯﻋﻼﻥ ﻭﻋﺎﻳﻒ ﺑﻴﺘﻲ .. ﺍﻧﻪ ﻃﻠﻌﺖ ﺑﺲ ﺍﺭﻳﺪ ﺍﺧﻠﺺ ﻣﻦ ﺩﻭﺧﺘﻜﻢ ﺗﻌﺒﺘﻮﻧﻲ
ﺧﻠﻮﻧﻲ ﺍﺭﺗﺎﺡ ﻫﻨﺎ ﻭﻳﻪ ﻣﺮﺗﻲ ﻭﺟﻬﺎﻟﻲ .. ﻳﻤﻪ ﺍﺑﺪﺍﻝ ﻣﺪﻭﺭﻳﻦ ﺭﺍﺣﺘﻲ ﻭﺍﻧﻪ ﻭﺣﻴﺪﺝ .. ﺗﺰﻳﺪﻳﻦ ﻫﻤﻲ ..
ﻛﺎﻟﺘﻠﻪ ﻭﻟﻚ ﺣﻮﻳﺮﺙ ﻳﻤﻪ ﺷﻌﺪﻱ ﻏﻴﺮﻙ ﺍﻧﻪ ﺑﺲ ﺍﻧﺘﻪ ﺍﻟﻠﻪ ﺍﻧﻄﺎﻧﻴﺎﻩ .. ﻛﺎﻟﻠﻬﺎ ﻳﻤﻪ ﻭﺣﻴﺪﺝ ﺟﺎ ﺭﺣﻤﻴﻨﻲ .. ﺍﻟﻤﻦ ﺍﺻﻴﺮ ﻛﻠﻴﻠﻲ
ﻟﻨﺴﻮﺍﻧﻲ ﻟﻮ ﻟﺨﻮﺍﺗﻲ ﻟﻮ ﻟﺠﻬﺎﻟﻲ ﻟﻮ ﺷﻐﻠﻲ ﻟﻮ ﺍﻟﻤﻦ ﺍﺻﻴﺮ ﻳﺎﻳﻤﻪ .. ﻛﺎﻟﺘﻠﻪ ﻫﻴﻪ ﻣﺮﺗﻚ ﺗﺘﺠﺎﻭﺯ .. ﻛﺎﻟﻬﺎ ﻓﻠﻨﻔﺘﺮﺽ ﺍﺗﺎﺟﻮﺯﺕ .. ﻟﻴﺶ ﻏﻴﺮ ﺿﺮﺑﺘﻴﻬﺎ
ﻳﻤﻪ ﺭﻓﻞ ﺻﻐﻴﺮﻩ ﻭﻏﺮﻳﺒﻪ ﻋﻦ ﺍﻃﺒﺎﻋﻨﻪ ﻭﺍﻧﺘﻲ ﺍﻟﺠﺒﻴﺮﻩ ﻏﻴﺮ ﺗﻌﻠﻤﻴﻬﺎ ﺗﻔﻬﻤﻴﻬﺎ ﻣﻮ ﺗﺰﻳﺪﻳﻦ ﻭﺗﺼﻔﻴﻦ ﻭﻳﻪ ﻓﺎﻃﻤﻪ .. ﺧﻠﻴﺞ ﺑﻀﻬﺮﻱ ﻭﺳﺎﻧﺪﻳﻨﻲ .. ﺍﻧﻪ ﺍﺑﻨﺞ ﻟﻮ ﻓﺎﻃﻤﻪ
ﻛﺎﻟﺘﻠﻪ ﻭﻋﻴﻮﻧﻚ ﺑﻌﺪ ﻣﺎ ﺍﺩﺧﻞ .. ﻛﺎﻟﻠﻬﺎ ﻭﺍﻟﻠﻪ ﻗﺒﻞ ﻫﻠﻤﺮﻩ ﻫﻢ ﻛﻠﺘﻲ ﻭﻫﺎﻱ ﻣﺨﻠﻴﻪ ﺟﺴﻢ ﺍﻟﺒﻨﻴﻪ ﺍﺯﺭﻙ ﺍﻧﺘﻲ ﻭﺑﻨﺎﺗﺞ ..
ﻛﺎﻟﺘﻠﻪ ﻫﺴﻪ ﻋﻮﻓﻨﻪ ﻣﻦ ﺭﻓﻞ ﺍﺣﺠﻴﻠﻲ ﻋﻠﺠﻬﺎﻝ ﻫﺎﻱ ﻧﻄﺖ ﻣﻦ ﺍﻟﺒﺠﻲ ﺗﺮﻳﺪ ﺟﻬﺎﻟﻬﺎ .. ﻛﺎﻟﻬﺎ ﺍﻧﻲ ﻣﻮ ﺑﺎﻟﻨﺎﺻﺮﻳﻪ ﺍﺑﻐﺪﺍﺩ .. ﻣﻦ ﺍﻛﻤﻞ ﺍﻟﺸﻐﻞ ﺍﻟﺒﻴﺪﻱ ﺍﺟﻴﺒﻬﻢ
🔸🔹🥇🔸🔹
ﺳﺪ ﺍﻟﺨﻂ ﻭﺷﻤﺮ ﺍﻟﺠﻬﺎﺯ .. ﻛﺘﻠﻪ ﺭﺟﻌﻬﻢ .. ﻛﺎﻝ ﺍﻧﻲ ﺍﺟﺮﺕ ﺍﻟﺒﻴﺖ ﺍﺳﺒﻮﻉ ﺧﻞ ﻧﺮﺗﺎﺡ ﺍﺳﺒﻮﻉ .. ﻫﻢ ﻳﺘﺄﺩﺑﻦ ﻫﻨﻪ ﻭﻫﻢ ﺍﺣﻨﻪ ﻧﺎﺧﺬ ﺭﺍﺣﺘﻨﻪ ..
ﻭﻓﻌﻼ ﺑﻘﻴﻨﻪ ﺍﺳﺒﻮﻉ ﻛﻞ ﻳﻮﻡ ﺍﻛﻮﻟﻪ ﻭﺩﻱ ﺍﻟﺠﻬﺎﻝ ﻭﻳﻜﻠﻲ ﺳﺪﻱ ﺍﻟﻤﻮﺿﻮﻉ ﻟﺤﺪ ﻣﺎ ﺧﻠﺺ ﺍﻻﺳﺒﻮﻉ ﻟﻤﻴﻨﻪ ﻏﺮﺍﺿﻨﻪ ﻭﺭﺟﻌﻨﻪ ﻟﻠﺒﻴﺖ
ﻃﺒﺖ ﻓﺎﻃﻤﻪ ﺭﻛﻀﺖ ﺍﻟﺠﻬﺎﻟﻬﺎ ﺗﺒﺠﻲ ﻭﻫﻤﻪ ﻫﻢ ﺍﺗﻠﻜﻮﻫﺎ ﺍﺛﻨﻴﻨﻬﻢ .. ﺩﻣﻌﺖ ﻋﻴﻨﻲ ﻣﻦ ﺷﻔﺘﻬﻢ .. ﺭﺣﺖ ﻻﻣﻪ .. ﺑﺴﺖ ﺭﺍﺳﻬﺎ ..
ﻛﺘﻠﻬﺎ ﻣﺎﻣﺎ ﺍﻧﻲ ﺍﺳـ ŝøŗŗý ـــﻔﻪ ﺍﺗﺠﺎﻭﺯﺕ ﻋﻠﻴﺞ ﺑﺪﻭﻥ ﻗﺼﺪ .. ﻣﺎ ﺑﺎﻭﻋﺘﻠﻲ ﻭﻻ ﺣﺠﺖ .. ﻭﻳﺎﻳﻪ .. ﺍﺷﺮﻟﻲ ﺣﺎﺭﺙ ﻋﻮﻓﻴﻬﺎ ..
ﻣﺮﻳﺖ ﻣﻦ ﻓﺎﻃﻤﻪ .. ﺟﺎﻥ ﺗﻜﻮﻝ ﻳﻤﻪ ﺍﻣﻮﺗﺘﻬﻢ ﺟﻮﻉ ﻋﺎﻳﻦ ﺷﻠﻮﻥ ﺿﻌﻔﺎﻧﻴﻦ ﺍﻟﻠﻪ ﻋﻠﻰ ﻛﻞ ﻇﺎﻟﻢ . ﻛﺘﻠﻬﺎ ﻣﺘﺼﻴﺮﻟﺞ ﺟﺎﺭﻩ ﻻ ﻭﺍﻟﻠﻪ ..
ﺩﺧﻠﺖ ﺍﻟﻐﺮﻓﺘﻲ ﺭﺗﺒﺘﻬﺎ ﻭﻣﺴﺤﺘﻬﺎ ﻭﻋﻄﺮﺗﻬﺎ .. ﺍﺟﻪ ﺣﺎﺭﺙ .. ﻛﺎﻝ ﻫﺎﺝ ﺭﻓﻞ .. ﻛﺘﻠﻪ ﺷﻨﻮ ﻫﺎﻱ .. ﻛﺎﻝ ﻫﺎﻱ 150 ﺭﻭﺣﻲ ﺍﻧﻄﻴﻬﺎ ﻻﻣﻲ ﻛﻠﻴﻠﻬﺎ ﻫﺬﺍ ﺭﺍﺗﺒﺞ ..
ﻛﺘﻠﻪ ﻭﻟﻴﺶ ﻣﺘﻨﻄﻴﻪ ﺍﻧﺘﻪ .. ﻛﺎﻝ ﺍﻣﻲ ﺍﺗﺤﺐ ﺍﻟﻤﺎﺩﻩ ﻭﺍﻧﻪ ﺯﻳﺪﺗﻬﺎ ﻫﻠﺸﻬﺮ 50 ﻭﺍﺧﻠﻴﻬﻦ ﻣﻦ ﺧﻼﻟﺞ ﻳﻮﺻﻠﻦ ﻋﻠﻤﻮﺩ ﺗﻜﻮﻝ ﻫﻴﻪ ﺯﻭﺩﺗﻬﺎ ﻭﺗﻜﺴﺮ ﻭﻳﺎﺝ
ﺿﺤﻜﺖ .. ﺍﺧﺬﺕ ﺍﻟﻔﻠﻮﺱ .. ﺧﻠﻴﺖ ﺍﻝ 100 ﻋﻠﻰ ﺻﻔﺤﻪ .. ﻭﺍﻝ 50 ﺑﺼﻔﺤﻪ .. ﺭﺣﺖ ﻳﻤﻬﺎ ﺍﻧﻄﻴﺘﻬﺎ ..100
ﻛﺘﻠﻬﺎ ﻣﺎﻣﺎ ﻫﺬﺍ ﻣﺼﺮﻓﺞ ﺍﻟﺸﻬﺮﻱ ﺣﺎﺭﺙ ﺍﺳﺘﻠﻢ ﺭﺍﺗﺐ ﺻﺎﺭ 10 ﺍﻳﺎﻡ .. ﻛﺎﻟﺖ ﻧﻌﻢ ﺍﻟﻠﻪ .. ﻛﺘﻠﻬﺎ ﻭﻫﺎﻱ 50 ﻣﻨﻲ ﺍﻟﺞ ﺍﺷﺘﺮﻳﻠﺢ ﺑﻴﻬﺎ ﻋﺒﺎﻳﻪ ..
ﻛﺎﻟﺖ ﻻ ﻣﺎ ﺍﺣﺘﺎﺝ .. ﻛﺘﻠﻬﺎ ﺍﻋﺮﻑ ﻣﻤﺤﺘﺎﺟﻪ ﺑﺲ ﺍﻋﺘﺒﺮﻳﻬﺎ ﻫﺪﻳﻪ ﻣﻨﻲ .. ﻛﺎﻟﺖ ﺷﻜﺮﺍ ﻧﻌﻢ ﺍﻟﻠﻪ ﻋﻠﻴﺞ
ﺑﺴﺖ ﺭﺍﺳﻬﺎ .. ﺿﺤﻜﺖ ﻛﺎﻟﺖ ﻳﺤﻔﻈﻠﺞ ﺍﻟﺒﻄﻨﺞ ﺍﻧﺸﺎﻟﻠﻪ .. ﺍﺑﺘﺴﻤﺖ ﻛﺘﻠﻬﺎ ﻭﻳﺤﻔﻈﺞ ﻣﺎﻣﺎ ..
ﻋﻔﺘﻬﺎ ﻭﻃﻠﻌﺖ .. ﻣﺸﺖ ﺍﻳﺎﻡ ﻭﺍﻟﺤﻤﺪﻟﻠﻪ ﺍﻻﻣﻮﺭ ﺯﻳﻨﻪ .. ﺑﺲ ﻣﺎ ﺗﺨﻠﻰ ﻣﻦ ﺍﻟﺒﺴﺎﻣﻴﺮ ﻭﺍﻟﺤﺠﻲ ﺍﻟﻠﻲ ﻳﺸﻞ ﺍﻟﺮﺍﺱ ﺑﺲ ﻣﺘﺤﻤﻠﻪ ﻭﻣﺎ ﺍﻛﻮﻝ ﻟﺤﺎﺭﺙ ﻻﻥ ﻫﻮﻩ ﺗﻌﺒﺎﻥ ﺍﺣﺴﻪ ..
ﻓﺪ ﻳﻮﻡ ﺟﺎﻱ ﺍﻛﻨﺲ ﺑﺎﻟﻤﻤﺮ .. ﺻﺎﺣﻠﻲ ﺳﺠﺎﺩ .. ﻛﺎﻝ ﺭﻓﻞ ﺗﻌﺎﻱ .. ﻛﺘﻠﻪ ﻫﺎﺍ .. ﺩﺧﻠﺖ ﻏﺮﻓﺘﻪ .. ﻛﺎﻝ .. ﺗﻌﺮﻓﻴﻦ ﺗﺤﻔﻴﻦ
ﺿﺤﻜﺖ ﻛﺘﻠﻪ ﺍﻟﻤﻦ ﺍﺣﻒ .. ﻛﺎﻝ ﺑﺲ ﻛﺼﺘﻲ ﻣﻨﺎ ﺣﺪﺩﻳﻬﺎ ﻭ ﻭﺟﻨﺎﺗﻲ .. ﻛﺘﻠﻪ ﺍﻭﻙ ﺍﻛﻌﺪ .. ﻛﺘﻠﻪ ﻋﺪﻙ ﺧﻴﻂ ..
ﻛﺎﻝ ﺍﻱ ﻫﺬﺍ .. ﻛﺘﻠﻪ ﻫﺬﺍ ﻧﺎﻳﻠﻮﻥ ﻣﻴﺤﻒ .. ﺷﻮﻓﻠﻲ ﻏﻴﺮﻩ .. ﺑﻘﻴﻨﻪ ﺍﻧﺪﻭﺭ ﻛﺘﻠﻪ ﻟﺤﻈﻪ ﺍﺷﻮﻓﻠﻚ ﺑﻐﺮﻓﺘﻲ ..
ﺭﺣﺖ ﺍﻟﻐﺮﻓﺘﻲ .. ﺍﺟﻪ ﻛﺎﻝ ﻫﺎ ﻟﻜﻴﺘﻲ .. ﻛﺘﻠﻪ ﺍﻱ ﻫﺬﺍ ﺗﻌﺎﻝ .. ﻭﻛﻒ ﻛﺒﺎﻟﻲ .. ﻛﺘﻠﻪ ﺍﺩﺭﻱ ﺗﻴﻞ ﺧﻮﻣﺎ ﺗﻴﻞ ﺷﻄﻮﻟﻚ ﻭﻳﻦ ﺍﻟﻮﺣﻚ
ﻛﺎﻝ ﺩﺳﻜﺘﻲ ﻫﻮﻩ ﺍﻧﺘﻲ ﺯﻗﺠﻪ .. ﻛﺘﻠﻪ ﺧﺐ ﺩﻃﻴﺮ ﻃﻮﻟﻲ 160 ﺑﻌﺪ ﺷﺼﻴﺮ ﻛﻮﻝ ﺍﻧﺘﻪ ﻃﻮﻟﻚ ﻃﻮﻝ ﺧﺎﻟﻚ .. ﻫﻤﺲ ﻳﻌﻨﻲ ﺧﺎﻟﻲ ﺗﻴﻞ
ﺿﺤﻜﺖ .. ﻛﺘﻠﻪ ﻣﺮﺍﺕ ﺍﻟﺘﻐﻠﻴﺲ ﺣﻠﻮ .. ﺿﺤﻚ ﻛﺎﻝ ﺭﺍﺡ ﻧﻤﺸﻴﻬﺎ .. ﻛﺘﻠﻪ ﺍﻧﺘﻪ ﺷﻜﺪ ﻋﻤﺮﻙ
ﻛﺎﻝ ﺍﻧﻪ 19 ﺳﻨﻪ .. ﻛﺘﻠﻪ ﺍﻧﻲ ﺍﻛﺒﺮ ﻣﻨﻚ ﺏ 5 ﺳﻨﻮﺍﺕ 😌 ﻛﺎﻝ ﻭﺍﻧﻪ ﺍﻃﻮﻝ ﻣﻨﺞ ﺏ 20 ﺳﺎﻧﺘﻴﻢ .. ﻛﺘﻠﻪ ﻣﻦ ﺧﻔﻪ ﻫﻄﻮﻝ ﻃﻮﻝ ﺍﻟﺘﻴﻞ .. ﻛﺎﻝ ﺍﺳﻜﺘﻲ ﺍﻟﺰﻗﺠﻪ
ﻛﺘﻠﻪ ﺍﻧﺸﺎﻟﻠﻪ ﻫﻠﺴﻨﻪ ﻛﻠﻴﻪ ﺷﺮﻃﻪ ﻣﻮﻭ .. ﺍﺣﺠﻲ ﻭﺍﻟﻒ ﺑﺎﻟﺨﻴﻂ ﻛﺎﻝ ﺑﺤﻴﻞ ﺍﻟﻠﻪ .. ﻛﺘﻠﻪ ﻟﻴﺶ ﺍﻻ ﻛﻠﻴﺔ ﺷﺮﻃﻪ ﻭﺍﻟﻮﺿﻊ ﻣﻮ ﺣﻠﻮ
🔹🔸🥇🔹🔸
ﻛﺎﻝ ﻣﻦ ﺍﻧﻪ ﻭﺻﻐﻴﺮ ﺍﺗﻤﻨﻰ ﺍﺻﻴﺮ ﻣﺜﻞ ﺧﺎﻟﻮ ﺣﺎﺭﺙ .. ﻭﻟﻼﻥ ﺍﻣﻨﻴﺘﻲ ﺍﺻﻴﺮ ﻣﺜﻠﻪ ﻭﻣﺜﻞ ﺷﺨﺼﻴﺘﻪ .. ﻛﺘﻠﻪ ﺍﺑﺮﺯ ﺷﺨﺼﻴﺘﻚ ﻭﻻ ﺗﻘﻠﺪ ﺍﺣﺴﻦ
ﻛﺎﻝ ﻻ ﻣﻮ ﺍﻗﻠﺪﻩ ﺑﺲ ﻣﺘﺨﺬﻩ ﻗﺪﻭﻩ .. ﻛﺘﻠﻪ ﺩﺭﻓﻌﻠﻲ ﻭﺟﻬﻚ ﺧﻞ ﺍﺣﻒ .. ﺍﺧﺬﺕ ﺑﺎﻟﺨﻴﻂ ﺻﺮﺥ .. ﻛﺘﻠﻪ ﻳﺎﻟﻠﻪ ﻫﺴﻪ ﺑﺪﻳﻨﻪ
ﻛﺎﻝ ﻭﺍﻟﻠﻪ ﺗﻮﺟﻊ .. ﻛﺘﻠﻪ ﻻ ﺗﺮﻩ ﻫﻮﺍﻱ ﺩﺧﻠﺖ ﻛﻠﻴﺔ ﺍﻟﺸﺮﻃﻪ .. ﻛﺎﻝ ﻋﻴﻨﻲ ﺩﻛﺘﻮﺭﺓ ﺍﻻﺳﻨﺎﻥ ﺗﺘﺤﻤﻠﻴﻦ ﻭﺟﻊ ﺍﻻﺳﻨﺎﻥ ..
ﻛﺘﻠﻪ ﻋﻮﺫﻩ ﺣﺘﻰ ﺭﺩﻙ ﻋﻠﻰ ﺧﺎﻟﻚ .. ﺩﺩﻭﺭ ﺧﻞ ﺍﻛﻤﻞ ﻭﺭﺍﻳﻪ ﺷﻐﻞ .. ﻭﻛﻔﺖ ﺍﺣﻔﻠﻪ ﻭﺍﺿﺤﻚ ﻋﻠﻴﻪ ..
ﺣﺎﺭﺙ .. ﺟﻨﺖ ﺑﺮﺍ ﻃﺒﻴﺖ ﻟﻠﻐﺮﻓﻪ ﻣﺎﻟﺘﻲ .. ﻭﺍﻟﻜﻪ ﺳﺠﺎﺩ ﻛﺎﻋﺪ ﻋﻠﺴﺮﻳﺮ .. ﻭﺭﻓﻞ ﺗﺤﻔﻠﻪ ﻭﺍﻟﻜﻠﺒﻴﻪ ﻧﺎﺯﻟﻪ ﻭﺻﺪﺭﻫﺎ ﻛﻠﻪ ﻃﺎﻟﻊ ﻭﻳﺘﻀﺎﺣﻜﻮﻥ
ﺻﺤﺖ ﻟﺞ ﻧﻌﻞ ﺷﻨﻬﺎﺍﺍﺍﺍﺍﻱ .. ﻛﻤﺰﻭ ﺍﺛﻨﻴﻨﻬﻢ .. ﻛﺎﻝ ﺳﺠﺎﺩ ﺍﻟﻌﻔﻮ ﺧﺎﻟﻮ ﺑﺲ ﺣﻔﺘﻠﻲ ﻭﺟﻨﺎﺗﻲ .. ﺻﺤﺖ ﺍﻃﻠﻊ ﺑﺮﺍ ﻟﻚ
ﺍﺗﻘﺪﻣﺖ ﻳﻤﻬﺎ .. ﺩﻓﻌﺘﻬﺎ ﻛﺘﻠﻬﺎ ﻓﺪ ﻣﺮﻩ ﺍﻧﺰﻋﻴﻬﺎ ﻟﻠﻜﻠﺒﻴﻪ
ﺭﻓﻞ .. ﻫﺎﻱ ﺷﺒﻴﻚ ﺣﺎﺭﺙ ﺗﺨﺒﻠﺖ
ﺣﺎﺭﺙ .. ﻭﻟﺞ ﻣﻦ ﺍﻟﻠﻲ ﺍﺗﺨﺒﻞ ﺍﺷﻮ ﺍﻧﺘﻲ ﻣﺎ ﺗﻌﺮﻓﻴﻦ ﺗﺤﺠﻴﻦ .. ﺿﺮﺑﺘﻬﺎ ﺭﺍﺷﺪﻱ
ﺭﻓﻞ .. ﺿﺮﺑﻨﻲ ﺭﺍﺷﺪﻱ ﺍﺣﺲ ﺍﺫﻧﻲ ﺻﻔﺮﺕ .. ﻛﻤﺖ ﻭﺩﻓﻌﺘﻪ ﺣﻴﻞ .. ﻛﺘﻠﻪ ﺍﻧﺘﻪ ﻣﻨﻮ ﻭﺗﻀﺮﺑﻨﻲ ﺍﺷﺎﻳﻔﻨﻲ ﻛﺪﺍﻣﻚ ﻓﺎﻃﻤﻪ . ﺍﺳﻜﺘﻠﻚ
ﻛﺎﻝ ﻻ ﺗﺠﻴﺒﻴﻬﺎ ﻋﻠﻰ ﺍﻟﺴﺎﻧﺞ ﻫﺎﻱ ﺍﺷﺮﻑ ﻣﻨﺞ ﻭﺍﻧﻌﺎﻟﻬﺎ ﻳﺸﺮﻓﺞ ﻋﻼﻗﻞ ﺳﺎﺗﺮﻩ ﺭﻭﺣﻬﺎ ﻣﻮ ﻣﺜﻠﺞ .. ﺍﺑﺘﻌﺪ ﻛﺘﻠﻪ ﻧﻌﺎﻟﻬﺎ ﻳﺸﺮﻓﻨﻲ ﻭﺍﺷﺮﻑ ﻣﻨﻲ
ﺑﺴﻴﻄﻪ .. ﺧﻠﻴﻚ ﻭﻳﻪ ﺍﻟﺸﺮﻳﻔﻪ ﻳﺎ ﺷﺮﻳﻒ ﻭﺍﻧﻲ ﻃﺎﻟﻌﻪ .. ﻛﺎﻝ ﺍﻛﺴﺮ ﺭﺟﻠﻴﻚ ﺑﺲ ﺍﻃﻠﻌﻴﻦ .. ﻛﺘﻠﻪ ﺍﻋﻠﻰ ﻣﺎ ﺑﺨﻴﻠﻚ ﺍﺭﻛﺒﻪ ﺑﺎﺑﺎﺗﻲ
ﺑﺎﻭﻋﻠﻲ ﺯﻳﻦ ﻭﺭﻛﺰﺯﺯﺯﺯ ﺍﻧﻲ ﻣﻮ ﺍﻟﺸﺮﻳﻔﻪ ﺍﻟﺘﺤﺠﻲ ﻋﻨﻬﺎ ﻭﺍﻧﻬﺎﻥ ﻭﺍﺑﻘﻰ ﺗﺤﺖ ﺭﺣﻤﺘﻚ .. ﻣﺘﺤﻤﻠﻪ ﻛﻞ ﻫﻠﻨﻤﺎﺫﺝ ﺍﻟﺘﻌﺒﺎﻧﻪ ﻋﻠﻤﻮﺩﻙ ﻭﻋﺎﻳﻔﻪ ﺷﻬﺎﺩﻩ ﺗﺴﻮﻩ ﻋﺸﺮﻩ ﻣﻦ ﺍﻣﺜﺎﻟﻜﻢ
ﻟﺰﻣﻨﻲ ﻣﻦ ﺍﻳﺪﻱ ﻛﺎﻝ ﻭﻟﺞ ﺍﻣﺜﺎﻝ ﻣﻨﻮﻭ ﻭﻟﺰﻣﻨﻲ ﻣﻦ ﻓﻜﻲ ﺣﻴﻴﻞ ﺩﻓﻌﺘﻪ ﻛﺘﻠﻪ ﻭﺧﺮﺭﺭ ﻻ ﺗﻤﺪ ﺍﻳﺪﻙ ﻫﺎﻱ ﻣﻮ ﺭﺟﻮﻟﻪ ﺗﺘﻘﻮﻩ ﻋﻠﻰ ﻣﺮﻩ ﺑﻌﻀﻼﺗﻚ
ﺍﺭﻭﺡ ﻳﻢ ﺍﺑﻮﻱ ﻭﻋﻮﺩ ﺍﻟﺰﻣﻨﻲ ﻭﺍﺿﺮﺑﻨﻲ ﻛﺪﺍﻣﻪ .. ﻛﺎﻝ ﺍﻛﺼﺒﺞ ﺍﻧﺘﻲ ﻭﺍﺑﻮﺝ ﻭﺍﻟﻠﻪ .. ﻛﺘﻠﻪ ﻳﺼﻴﺮ ﺧﻴﺮ ..
ﻟﻤﻴﺖ ﻏﺮﺍﺿﻲ .. ﻛﺎﻝ ﻣﺎﻛﻮ ﺭﻭﺣﻪ .. ﻛﺘﻠﻪ ﺍﺭﻭﺡ ﻭﺍﻟﻠﻪ ﻭﻣﺎ ﺗﻤﻨﻌﻨﻲ .. ﺍﺧﺬ ﻧﻔﺲ ﻭ ﻛﺎﻝ ﺭﻓﻞ ﺍﺗﻌﻮﺫﻱ ﻣﻦ ﺍﺑﻠﻴﺲ ..
ﻛﺘﻠﻪ ﺍﺷﻮ ﺍﺭﻳﺪ ﺍﺧﺎﻭﻱ ﺑﻠﻴﺲ ﺗﻮﺧﺮ ﻟﻮ ﺷﻠﻮﻭﻭﻥ .. ﻛﺎﻝ ﻭﻟﺞ ﻭﺍﻛﻔﻪ ﻛﺪﺍﻣﻪ ﻭﺻﺪﺭﺝ ﻃﺎﻟﻊ ﺍﻧﺘﻲ ﻣﺎ ﺗﺴﺘﺤﻴﻦ .. ﻛﺘﻠﻪ ﺷﻨﻮ ﻣﺘﻘﺼﺪﻩ ﻭﺑﻌﺪﻳﻦ ﺳﺠﺎﺩ ﻣﺜﻞ ﺍﺧﻮﻳﻪ ﺷﻨﻮ ﺗﺸﻚ ﺑﻴﻪ
ﻛﺎﻝ ﻭﻟﺞ ﻻ ﺗﺴﻮﺩﻧﻴﻨﻲ ﺭﺟﺎﻝ ﺷﻜﺒﺮﻩ ﺷﺎﺭﺑﻪ ﺧﺎﻁ ﺍﺧﻮﺝ ﺷﻨﻮ .. ﻛﺘﻠﻪ ﺣﺎﺭﺙ ﺍﺑﺘﻌﺪ .. ﻛﺎﻝ ﺭﻓﻞ ﻛﺎﻓﻲ .. ﺑﺠﻴﺖ ﻛﺘﻠﻪ ﺍﻟﺨﺎﻃﺮ ﺍﻟﻠﻪ ﻋﻮﻓﻨﻲ ﻣﺎ ﺍﺗﺤﻤﻞ ﻋﻮﻓﻨﻲ
ﻧﺰﻋﺖ ﺍﻟﺤﺠﺎﺏ ﻭﻛﻤﺖ ﺍﻣﻠﺦ ﺑﺸﻌﺮﻱ .. ﻓﻘﺪﺕ .. ﻛﺘﻠﻪ ﻣﺘﺖ ﻣﺎ ﺍﺗﺤﻤﻞ ﻋﻴﺸﺘﻜﻢ ﻛﻮﻭﻭﻭﻭﻩ ﻣﺎ ﺍﺭﻳﺪ .. ﺑﻘﻴﺖ ﺍﺑﺠﻲ .. ﻭﺍﺻﻴﺢ ﻛﻠﻪ ﻣﻨﻚ
ﻧﻬﻴﺖ ﺣﻴﺎﺗﻲ ﺟﺒﺘﻨﻲ ﻫﻨﺎ ﺣﺮﻣﺘﻨﻲ ﻣﻦ ﺩﺭﺍﺳﺘﻲ .. ﻭﺧﺮ ﻋﻨﻲ ﻣﺎ ﺍﺭﻳﺪﻛﻢ ﻣﺎ ﺍﺗﺤﻤﻠﻜﻢ ﻭﺧﺮ .. ﻓﺘﺤﺖ ﺍﻟﺒﺎﺏ .. ﺟﺎﻥ ﻓﺎﻃﻤﻪ ﺗﻜﻮﻝ ﺣﻠﻠﻞ ﻋﺴﺎ ﺩﺭﺏ ﺍﻟﺴﺪ ﻻ ﺭﺩ
ﺻﺎﺡ ﺑﻴﻬﺎ ﻭﺩﻓﻌﻬﺎ ﻭﻛﺎﻟﻠﻬﺎ ﻣﻌﻠﻴﺞ ﻃﺒﻲ ﺟﻮﻩ ﻟﺞ .. ﻛﺘﻠﻪ ﻻ ﻟﻴﺶ ﻣﻮ ﻫﺎﻱ ﺍﻟﺘﺴﻮﻩ ﺭﺍﺳﻲ .. ﻣﻮ ﻫﺎﻱ ﺍﻟﺸﺮﻳﻔﻪ ..
ﺍﺟﺖ ﺍﻣﻪ ﻛﺎﻟﺖ ﺍﺷﺮﻑ ﻣﻨﺞ ﻃﺒﻌﺎ ﻋﻼﻗﻞ ﻣﺎ ﺷﺮﺩﺕ ﻭﻳﻪ ﺻﺎﺣﺒﻬﺎ ﺻﺎﺡ ﺑﻴﻬﺎ ﺣﺎﺭﺙ ﻳﻤﻪ ﻃﺒﻲ ﻣﻌﻠﻴﻴﻴﻴﻴﺞ ..
ﺩﺭﺕ ﻭﺟﻬﻲ ﻋﻠﻴﻬﺎ ﻛﺘﻠﻬﺎ ﻫﻬﻬﻬﻬﻪ ﺗﻌﻴﺮﻧﻲ ﺑﻌﺎﺭﻫﺎ ﻭﻻ ﺗﻌﻠﻢ ﻣﺎ ﺑﺪﺍﺭﻫﺎ .. ﻋﻠﺴﺎﺱ ﺑﻨﺖ ﺍﺧﻮﺝ ﺭﺍﺣﺖ ﺗﻠﻌﺐ ﺷﻨﺎﻭ ﻣﺜﻼ
ﺣﺠﻴﺖ ﻫﻴﺞ ﺿﺮﺑﻨﻲ ﺣﺎﺭﺙ .. ﻛﺎﻝ ﻻ ﺗﺠﻴﺒﻲ ﺑﺖ ﺧﺎﻟﻲ ﻋﻠﻰ ﺍﻟﺴﺎﻧﺞ .. ﻛﺘﻠﻪ ﺍﻧﺘﻪ ﻟﻴﺶ ﺗﻀﺮﺏ ﻭﺩﻓﻌﺘﻪ ﻟﻴﺸﺸﺸﺶ ﻭﻟﻚ ﻣﻮ ﺧﺪﺍﻣﺘﻚ ﺍﻧﻲ ﻭﺗﻀﺮﺑﻨﻲ ﻻ ﺗﻀﺮﺭﺭﺭﺭﺏ
ﻣﺎ ﻃﻠﺒﺖ ﻣﻨﻜﻢ ﺗﺴﺘﺮﻭﻥ ﻋﻠﻴﻪ ﻭﺗﻌﻴﺮﻭﻧﻲ ﻣﺎ ﺍﺭﻳﺪﻛﻢ ﻭﺍﻟﻠﻪ ﻣﺎ ﺍﺭﻳﺪﻛﻢ ﻳﺎ ﺿﻼﻡ ﺍﻟﻠﻪ ﻳﺠﺎﺯﻳﻜﻢ ... ﺟﺮﻳﺖ ﺟﻨﻄﺘﻲ ﻭﻃﻠﻌﺖ ﺍﺭﻛﺾ ﺍﺑﺠﻲ
🔸🔹🥇🔸🔹
ﺭﻓﻞ .. ﺍﺧﺬﺕ ﺟﻨﻄﺘﻲ ﻭﺭﻛﻀﺖ ﻟﻠﺸﺎﺭﻉ ﺍﺑﺠﻲ .. ﻟﺤﻜﻨﻲ ﺣﺎﺭﺙ .. ﻛﺎﻝ ﺍﻭﻛﻔﻲ ﻛﺘﻠﻪ ﻋﻮﻓﻨﻲ ﺍﻟﺨﺎﻃﺮ ﺍﻟﻠﻪ ﻋﻮﻓﻨﻲ ..
ﺍﻣﺸﻲ ﻭﻫﻮﻩ ﻳﻤﺸﻲ ﻭﺭﺍﻱ ﺍﺧﺮ ﺷﻲ ﻟﺰﻣﻨﻲ ﺣﻴﻞ ﻭﻭﻛﻔﻨﻲ ﻛﺎﻝ ﺑﺲ ﺍﻫﺪﻱ ﻛﺘﻠﻪ ﻣﺎ ﺍﺭﻳﺪ ﺍﺭﻳﺪ ﺍﺭﻭﺡ ﻻﻫﻠﻲ .. ﻛﺎﻝ ﺑﺲ ﺻﻮﺗﺞ ﺩﻧﻴﺎ ﺍﻟﻀﻬﺮ ﻭﺍﻟﺸﺎﺭﻉ ﻓﺎﺭﻍ
ﻛﺘﻠﻪ ﻭﺧﺮ ﻣﻨﻲ ﻟﻌﺪ .. ﻛﺎﻝ ﺭﻓﻞ ﺷﺒﻴﺞ .. ﺷﻨﻮ ﺗﺮﺩﻳﻬﺎ ﺣﺠﻪ ﻋﻠﻤﻮﺩ ﺍﻃﻠﻌﻴﻦ .. ﻛﺘﻠﻪ ﻻ ﻣﻮ ﺣﺠﻪ .. ﺑﺲ ﻣﺎ ﺍﻗﺒﻞ ﺑﺎﻻﻫﺎﻧﻪ ﺍﺑﺪ ﻟﻮ ﻋﻠﻰ ﻛﺺ ﺭﻛﺒﺘﻲ ..
ﺣﺎﺭﺙ .. ﻭﻟﺞ ﻭﺍﻟﻠﻪ ﺗﺴﻮﺩﻧﺖ ﻣﻦ ﺷﻔﺖ ﺻﺪﺭﺝ ﻃﺎﻟﻊ ﻭﻣﺪﻧﻜﻪ ﺗﺤﻔﻴﻪ ..
ﺭﻓﻞ .. ﺣﺎﺭﺙ ﺍﺳﺴﺴﺲ ﻛﺎﻓﻲ ﻣﻠﻴﺖ ﻛﺎﻓﻲ .. ﻳﺎ ﺍﺧﻲ ﻣﺎ ﺍﺗﺤﻤﻞ ﻃﺒﻌﻚ ﻭﻏﻴﺮﺗﻚ ﺻﻌﺒﻪ .. ﻋﻮﻓﻨﻲ ﺍﺭﻭﺡ ﻓﺪﻭﻩ ﻟﻌﻴﻨﻚ ﻋﻮﻓﻨﻲ ..
ﻣﺸﻴﺖ ﻭﺍﻧﻲ ﺍﺑﺠﻲ .. ﻛﺎﻝ ﺯﻳﻦ ﺍﺻﻌﺪﻱ ﺑﺎﻟﺴﻴﺎﺭﻩ ﺍﻧﻪ ﺍﺧﺬﺝ .. ﻛﺘﻠﻪ ﻣﺎ ﺍﺭﻳﺪ ﺍﺭﻳﺪ ﺍﺭﻭﺡ ﻻﻫﻠﻲ ﻛﺎﻝ ﻭﺍﻟﻠﻪ ﺍﻭﺩﻳﺞ ﺑﺲ ﻻ ﺗﺒﺠﻴﻦ ..
ﺻﻌﺪﺕ .. ﻭﻳﺎﻩ ﻭﺍﺑﺠﻲ .. ﻣﺸﺎ ﺑﺎﻟﺴﻴﺎﺭﻩ ﻭﻳﺒﺎﻭﻋﻠﻲ ﻭﻳﻜﻠﻲ ﻻ ﺗﺒﺠﻲ ﻭﺍﻧﻲ ﺍﻛﻮﻟﻪ ﻣﻌﻠﻴﻚ .. ﺍﻧﺘﺠﻴﺖ ﻋﻞ ﻛﺮﺳﻲ ﻣﺎﻝ ﺍﻟﺴﻴﺎﺭﻩ ﻭﺩﺭﺕ ﻭﺟﻬﻲ ﻟﻠﺸﺒﺎﻙ
ﺷﻐﻞ ﺍﻏﻨﻴﻪ ﺑﺎﻟﺴﻴﺎﺭﻩ .. ﻭﺍﻧﻲ ﺩﺍﻳﺮﻩ ﻭﺟﻬﻲ ﻭﺍﺳﻤﻊ .. ﺟﺮﺣﺘﻚ ﺣﺒﻴﺒﻲ ﺟﺮﺣﺘﻚ ﺳﺎﻣﺤﻨﻲ .. ﺑﻌﺎﺩﻙ ﺣﺒﻴﺒﻲ ﻓﻲ ﻗﻠﺒﻲ ﺟﺎﺭﺣﻨﻲ .. ﺑﻘﻴﺖ ﺍﺳﻤﻊ ﻭﺍﻟﺪﻣﻮﻉ ﺗﻨﺰﻝ ..
ﺣﺎﻭﻝ ﻳﺤﺠﻲ .. ﻃﻮﻝ ﺍﻟﻄﺮﻳﻖ ﻣﺎ ﺳﻤﺤﺘﻠﻪ .. ﻭﺻﻠﻨﻪ .. ﻟﻠﺒﻴﺖ .. ﺍﺟﻴﺖ ﺍﻧﺰﻝ ﻟﺰﻡ ﺍﻳﺪﻱ .. ﻭﻛﺎﻝ ﺭﻓﻞ ﻋﻠﻴﺞ ﺑﺪﺍﻋﺘﻲ ﺍﺫﺍ ﺗﺤﺒﻴﻨﻲ .. ﻻ ﺗﻌﻮﻓﻴﻨﻲ .. ﻣﺎ ﺍﻛﺪﺭ ﺑﺪﻭﻧﺞ ﻭﻋﻠﻲ
ﻛﺘﻠﻪ ﺍﺣﺒﻚ ﺑﺲ ﺍﺗﻬﺎﻣﻚ ﺍﻟﻲ ﻭﺍﻫﺎﻧﺘﻚ ﺻﻌﺐ ﺍﺗﺤﻤﻠﻬﺎ .. ﻛﺎﻝ ﺍﻭﻋﺪﺝ .. ﻛﺘﻠﻪ ﻻ .. ﻻ ﺗﻮﻋﺪ ﺑﺸﻲ ﻣﺎ ﺗﻜﺪﺭﻟﻪ .. ﻣﻦ ﺗﻌﺼﺐ ﺗﺼﻴﺮ ﺍﻧﺴﺎﻥ ﺛﺎﻧﻲ ..
ﻛﺎﻝ ﺍﻫﺎﺍ ﺍﻧﺴﺎﻥ ﺛﺎﻧﻲ ﻳﻌﻨﻲ ﻣﻮ ﺑﻴﺪﻱ .. ﺩﻧﺤﺠﻲ .. ﻃﻠﻊ .. ﺑﺎﺑﺎ .. ﺻﺎﺡ ﺭﻓﻞ .. ﻧﺰﻟﺖ ﺍﺭﻛﺾ ﻟﺤﻈﻦ ﺑﺎﺑﺎ .. ﺍﺑﺠﻲ ..
ﻛﺎﻝ ﺷﻜﻮ ﺑﺎﺑﺎﺗﻲ ﺷﺒﻴﻜﻢ .. ﻧﺰﻝ ﺣﺎﺭﺙ ﺳﻠﻢ ﻋﻠﻰ ﺑﺎﺑﺎ ﻛﺎﻟﻪ ﺟﺮﺣﺘﻬﺎ ﺷﻮﻱ ﻭﺍﺗﻀﺎﻳﻘﺖ .. ﺧﻠﻴﻬﺎ ﺗﺮﺗﺎﺡ ﻛﻢ ﻳﻮﻡ ﻫﻨﺎ ..
ﻛﺎﻝ ﺗﻔﻀﻠﻮ ﻟﻴﺶ ﻋﻠﺒﺎﺏ .. ﺩﺧﻠﺖ .. ﺷﺎﻓﺘﻨﻲ ﻣﺎﻣﺎ ﺗﻠﻜﺘﻲ ﻛﺎﻟﺖ ﻫﻼ ﻣﺎﻣﺎ .. ﺑﻮﺳﺘﻨﻲ ﻭﻫﻤﺴﺖ ﺧﻴﺮ ﺍﻛﻮ ﺷﻲ .. ﻫﺰﻳﺖ ﺑﺮﺍﺳﻲ .. ﻭﻣﺸﻴﺖ
ﻛﻌﺪﺕ ﻭﻛﻌﺪ ﺑﺎﺑﺎ ﻭﺣﺎﺭﺙ .. ﻛﺎﻝ ﺷﻨﻮ ﺍﻟﻘﺼﻪ ﻓﻬﻤﻮﻧﻪ .. ﻛﺘﻠﻪ ﺑﺎﺑﺎ ﺍﻧﻲ ﺍﺣﺠﻴﻠﻚ .. ﻛﺎﻝ ﻻ ﺗﺤﺠﻴﻦ ﻗﺒﻞ ﺯﻭﺟﺞ ﺑﻨﺘﻲ .. ﺗﻔﻀﻞ ﺍﺑﻨﻲ ﺣﺎﺭﺙ ﺍﺣﺠﻲ
ﻛﺎﻝ ﻋﻤﻲ ﻃﺒﻴﺖ ﺍﻟﻀﻬﺮﻳﻪ ﻭﻟﻜﻴﺘﻬﺎ ﺗﺤﻒ ﻻﺑﻦ ﺍﺧﺘﻲ ﺷﺎﺏ ﺷﻄﻮﻟﻪ ﻣﺪﻧﻜﻪ ﻭﺻﺪﺭﻫﺎ ﻃﺎﻟﻊ .. ﺍﺗﺴﻮﺩﻧﺖ ﻭﺑﻼ ﻭﻋﻲ ﺿﺮﺑﺘﻬﺎ ..
ﻫﻴﻪ ﻛﺎﻣﺖ ﺗﺼﻴﺢ ﻭﺗﻌﻴﻂ ﻭﺍﺩﻓﻊ .. ﺍﻧﻪ ﻏﻠﻄﺎﻥ ﺍﻋﺘﺮﻑ ﺿﺮﺑﺘﻬﺎ ﺑﺲ ﻋﻤﻲ ﻣﺎ ﺍﺗﺤﻤﻞ ﻣﺮﺗﻲ ﺑﻬﻠﻮﺿﻊ ﻛﺪﺍﻡ ﺍﺑﻦ ﺍﺧﺘﻲ ﻭﺍﻟﻒ ﻣﺮﻩ ﻛﺘﻠﻬﺎ ﺗﺤﺠﺒﻲ ﻛﺪﺍﻣﻪ
ﺭﻓﻞ .. ﺑﺎﺑﺎ ﺳﺠﺎﺩ ﻛﺎﻋﺪ ﻭﻳﺎﻧﻪ ﺑﺎﻟﺒﻴﺖ ﻳﻌﻨﻲ ﻫﻢ ﺑﺎﻟﺒﻴﺖ ﺍﻟﺒﺲ ﺣﺠﺎﺏ .. ﻫﺎﻱ ﻋﺬﺍﺏ ﻣﻮ ﻋﻴﺸﻪ ..
ﺣﺎﺭﺙ .. ﻭﻳﺎﻧﻪ ﻣﻮ ﻭﻳﺎﻧﻪ ﺷﺎﺏ ﻭﻃﻮﻟﻪ ﻳﺴﺪ ﺍﻟﺸﻤﺲ ﻭﻣﺤﺮﻡ ﻋﻠﻴﺞ ﻭﺍﺟﺐ ﺗﻠﺒﺴﻴﻦ ﺍﻟﺤﺠﺎﺏ ﻛﺪﺍﻣﻪ ..
🔹🔸🥇🔹🔸
ﻳﺎﺳﻴﻦ .. ﺍﻫﺪﻭ ﻳﻤﻌﻮﺩﻳﻦ ﺍﻫﺪﻭ ﺷﻨﻮ ﻫﻠﺤﺠﻲ ﺷﺒﻴﻜﻢ .. ﺑﻨﺘﻲ ﻛﻮﻣﻲ ﺍﺧﺬﻱ ﺭﺍﺣﺘﺞ ﺟﻮﻩ .. ﻏﻤﺰﺕ ﻻﻣﻞ ﺍﺧﺬﻳﻬﺎ ..
ﻃﻠﻌﻮ .. ﻛﺘﻠﻪ ﺍﺑﻨﻲ ﺣﺎﺭﺙ ﺍﻟﺤﻖ ﺍﻟﻚ ﺑﺲ ﻣﻮ ﺑﻬﻠﻄﺮﻳﻘﻪ ﺍﻟﺘﻌﺎﻣﻞ .. ﺟﺎﻥ ﺻﺤﺖ ﺑﺪﻭﻥ ﻏﻠﻂ ﻭﻛﺘﻠﻬﺎ ﻳﺎ ﻣﺮﻩ ﺍﺳﺘﺮﻱ ﻧﻔﺴﺞ ..
ﺟﺎﻥ ﺳﺘﺮﺕ ﻧﻔﺴﻬﺎ ﻭﺑﺪﻭﻥ ﻣﺸﺎﻛﻞ
ﺣﺎﺭﺙ .. ﻋﻤﻲ ﻭﻫﻮﻩ ﺍﻧﻪ ﺑﻘﻰ ﺑﺮﺍﺳﻲ ﻋﻘﻞ ﻭﺍﻓﻜﺮ ﺑﻴﻪ .. ﺗﺴﻮﺩﻧﺖ ﻣﻦ ﺷﻔﺘﻬﺎ ﺑﻬﻠﻮﺿﻊ ﻭﺍﻟﻌﺒﺎﺱ ..
ﻳﺎﺳﻴﻦ .. ﻋﻤﻮ ﺣﻠﻮﻩ ﺍﻟﻐﻴﺮﻩ ﻋﻨﺪ ﺍﻟﺮﺟﻞ ﻟﻜﻦ ﻛﻠﺸﻲ ﻳﺰﻳﺪ ﻋﻦ ﺍﻟﺤﺪ ﻳﻨﻘﻠﺐ ﺿﺪ .. ﻭﺍﻧﺘﻪ ﻏﻴﺮﺗﻚ ﻭﻋﺼﺒﻴﺘﻚ ﻳﺎ ﻋﻤﻮ ﻣﺎ ﺗﻨﺤﻤﻞ
ﻭﺭﻓﻞ ﺑﻨﺖ ﺻﻐﻴﺮﻩ ﻭﻭﺣﻴﺪﺗﻲ ﻭﺍﻟﻤﺪﺩﻟﻪ ﻣﺎﻟﺘﻲ .. ﻻ ﻓﺪ ﻳﻮﻡ ﺻﺤﺖ ﻋﻠﻴﻬﺎ ﻭﻻ ﻓﺪ ﻳﻮﻡ ﻏﻠﻄﺖ ﻋﻠﻴﻬﺎ ﻭﻋﻠﻤﺘﻬﻢ ﻋﻼﺣﺘﺮﺍﻡ .. ﻣﻮ ﻫﻴﺞ ﺗﺘﺼﺮﻑ ﻭﻳﺎﻫﺎ
ﺣﺎﺭﺙ .. ﻋﻤﻲ ﻭﺍﻧﻪ ﻻ ﻓﺪ ﻳﻮﻡ ﻏﻠﻄﺖ ﻋﻠﻴﻬﺎ ﻭﻻ ﺿﺎﺭﺑﻬﺎ ﻭﺍﺣﺒﻬﺎ ﻭﺍﻟﻠﻪ ﺑﺲ ﺷﺴﻮﻱ ﻛﻞ ﺍﻧﺴﺎﻥ ﻋﻨﺪﻩ ﻋﻴﺐ ﻭﺍﻧﻪ ﻋﻴﺒﻲ ﻋﺼﺒﻴﺘﻲ ﻣﺎ ﺍﻛﻆ ﻧﻔﺴﻲ ﺑﻮﻗﺘﻬﺎ ﺍﻋﺼﺎﺑﻲ ﻧﺎﺭ ﻭﺗﺸﺐ ﺑﺠﺴﻤﻲ ..
ﻳﺎﺳﻴﻦ .. ﺍﻋﺮﻑ ﻋﻤﻮ ﻫﻠﺸﻲ ﻣﻮ ﺑﻴﺪﻙ ﺑﺲ ﺣﺎﻭﻝ ..
ﺣﺎﺭﺙ .. ﺍﻧﺸﺎﻟﻠﻪ ﻋﻤﻲ .. ﻳﻠﻪ ﺍﻧﻪ ﺍﺗﺮﺧﺺ ..
ﻳﺎﺳﻴﻦ .. ﻭﻳﻦ ﻣﺎﻛﻮ ﻃﻠﻌﻪ ﺍﻟﻴﻠﻪ ﻳﻤﻨﻪ ..
ﺣﺎﺭﺙ .. ﻣﺘﻘﺼﺮ ﻋﻤﻲ ﻋﺴﺎﻙ ﺳﺎﻟﻢ .. ﻻﺯﻡ ﺍﺭﺟﻊ ﻟﻠﻨﺎﺻﺮﻳﻪ ﺑﺎﺟﺮ ﻋﻨﺪﻱ ﺧﻔﺎﺭﻩ
ﻳﺎﺳﻴﻦ .. ﻋﻤﻮ ﻛﻮﻝ ﻏﻴﺮﻫﺎ ﻧﺰﻝ ﺍﻟﻐﺮﻭﺏ ﻭﻳﻦ ﺭﺍﻳﺢ ﻫﺴﻪ ﺩﻛﻌﺪ ﺍﻛﻌﺪ
ﺣﺎﺭﺙ .. ﻻ ﻭﺍﻟﻠﻪ ﻋﻤﻲ ﻣﺎ ﺍﻛﺪﺭ ﺑﻴﺖ ﺍﻟﻌﺎﻣﺮ ﺍﻧﺸﺎﻟﻠﻪ ..
ﻳﺎﺳﻴﻦ .. ﻫﺎﺍﺍ ﺑﻌﺪ ﺑﻜﻴﻔﻚ ﻣﺎ ﻧﻜﺪﺭ ﻧﻠﺰﻣﻚ ﺍﺫﺍ ﻋﻨﺪﻙ ﻭﺍﺟﺐ .. ﺳﻠﻤﻨﻪ ﻋﻼﻫﻞ ﻋﻼﻋﻤﺎﻡ
ﺣﺎﺭﺙ .. ﺍﻧﺸﺎﻟﻠﻪ ﻋﻤﻲ .. ﻃﻠﻌﺖ 300 ﺍﻟﻒ ﻛﺘﻠﻪ ﻋﻤﻲ ﻫﺎﻱ ﺗﻨﻄﻴﻬﺎ ﻟﺮﻓﻞ .. ﻛﺎﻝ ﻇﻤﻬﺎ ﻋﻴﺐ ﺟﺎﻳﻪ ﻟﺒﻴﺖ ﺍﺑﻮﻫﺎ ﻣﺎ ﻳﺤﺘﺎﺝ ..
ﻛﺘﻠﻪ ﺍﻋﺮﻑ ﺑﻴﻚ ﻋﻤﻲ ﻣﺘﻘﺼﺮ . ﺍﻟﻨﻌﻢ . . ﺑﺲ ﻫﺬﻱ ﻣﺮﺗﻲ ﺍﻧﻪ ﺍﻻﺻﺮﻑ ﻋﻠﻴﻬﺎ .. ﺍﻧﻄﻴﻬﺎ ﺍﻟﻬﺎ .. ﻛﺎﻝ ﺍﻧﺸﺎﻟﻠﻪ .. ﻃﻠﻌﺖ ﻭﺳﻠﻤﺖ .. ﻭﺍﻟﻬﻢ ﻣﺎﻛﻞ ﻛﻠﺒﻲ
ﻣﺸﻴﺖ ﻭﺍﻟﻄﺮﻳﻖ ﻛﻠﻪ ﻛﻠﺒﻲ ﻳﻮﺟﻌﻨﻲ .. ﻭﺻﻠﺖ ﻋﻠﻄﺮﻳﻖ ﺍﻟﺴﺮﻳﻊ ﻭﺍﻟﺸﺎﺭﻉ ﻣﻨﺎ ﻭﻣﻨﺎ ﻣﻬﺠﻮﺭ .. ﻭﻛﻔﺖ ﺍﻟﺴﻴﺎﺭﻩ ﻭﻧﺰﻟﺖ ﺭﺍﺳﻲ ﻭﺑﺠﻴﺖ
ﺍﻧﻮﺏ ﺭﻓﻌﺖ ﺭﺍﺳﻲ ﻟﻠﻪ ﻛﺘﻠﻪ ﺭﺑﻲ ﻻ ﺗﺤﻤﻠﻨﻲ ﻣﺎ ﻻ ﺍﻃﻴﻖ .. ﺗﻌﺮﻑ ﻟﻮ ﺭﻓﻞ ﺑﻌﺪﺕ ﻋﻨﻲ ﻣﻌﻨﺎﻫﺎ ﺍﻟﻤﻮﺕ ..
ﻧﺰﻟﺖ ﻣﻦ ﺍﻟﺴﻴﺎﺭﻩ ﻣﺸﻴﺖ ﻟﻠﺠﻮﻝ ﻭﻛﻤﺖ ﺍﺻﻴﺢ ﺑﻌﻠﻮ ﺻﻮﺗﻲ ﺍﺭﻳﺪ ﺍﻃﻠﻊ ﺍﻟﺨﻨﻜﻪ ﺍﻟﺒﺪﺍﺧﻠﻲ ﺗﺬﺑﺤﻨﻲ .. ﺟﻦ ﻋﻔﺖ ﺭﻭﺣﻲ ﺍﺑﻐﺪﺍﺩ ﻭﺍﺟﻴﺖ
ﻛﻤﻠﺖ ﺍﺧﺬﺕ ﺳﻴﺎﺭﺗﻲ ﻭﺭﺣﺖ ﻟﺒﻴﺘﻲ ﻭﺻﻠﺖ ﺩﺧﻠﺖ ﻏﺮﻓﺔ ﺭﻓﻞ ﻭﺗﻤﺪﺩﺕ .. ﺍﺟﺖ ﻓﺎﻃﻤﻪ ﻛﺎﻟﺖ ﺗﺮﻳﺪ ﺷﻲ ﻣﺘﻌﺸﻲ ..
ﻛﺘﻠﻬﺎ ﻣﺎ ﺍﺭﻳﺪ ﺍﻃﻠﻌﻲ ﺑﺮﺍ .. ﻃﻠﻌﺖ ﻭﺳﺪﺕ ﺍﻟﺒﺎﺏ .. ﺍﺭﻳﺪ ﺍﻟﻨﻮﻡ ﻳﻤﺮ ﻋﻴﻮﻧﻲ ﻣﺎ ﻏﻔﺖ ﻟﺤﺪ ﻣﺎ ﻃﻠﻊ ﺿﻮﻩ ﺍﻟﻔﺠﺮ ..
ﻛﻤﺖ ﺭﺣﺖ ﻟﺪﻭﺍﻣﻲ .. ﻟﻨﺺ ﺍﻟﺪﻭﺍﻡ ﺍﺳﺘﺄﺫﻧﺖ ﻭﻃﻠﻌﺖ .. ﺭﺣﺖ ﻟﻜﻴﺖ ﺑﻴﺖ ﻋﻤﻲ ﺳﻠﻤﺎﻥ ﺍﺑﻴﺘﻲ .. ﺍﻭﻝ ﻣﺎ ﺷﺎﻓﻨﻲ ﻋﻤﻲ .. ﻛﺎﻝ ﻫﺎﺍﺍﺍﺍ ﺳﺪﺧﺎﻥ ﻫﺠﺮﺗﻚ ﺑﻠﻘﻴﺲ .. ﺍﺑﺘﺴﻤﺖ ﺍﺑﺘﺴﺎﻣﻪ ﺟﺬﺑﻴﻪ ﻭﺳﻠﻤﺖ
ﻛﻌﺪﺕ ﻫﻤﻪ ﻳﺤﺠﻮﻥ ﻭﺍﻧﻪ ﺟﺴﻤﻲ ﻣﻨﻬﺪ ﻻ ﺍﻛﻞ ﻭﻻ ﻧﻮﻡ ﻭﻋﻘﻠﻲ ﻣﻮ ﻳﻤﻬﻢ .. ﻳﺤﺎﺟﻴﻨﻲ ﻳﻜﻠﻲ ﻋﻤﻲ ﻣﻮ ﺍﺣﺠﻲ ﻭﻳﺎﻙ ﺷﻤﺎﻟﻚ
🔸🔹🥇🔸🔹
ﻛﺘﻠﻪ ﻋﻤﻲ ﺍﻟﻤﻌﺬﺭﻩ ﺑﺲ ﻣﺎ ﻧﺎﻳﻢ ﺍﻟﺒﺎﺭﺣﻪ ﻭﺗﻌﺒﺎﻥ ﻣﻦ ﺷﻐﻠﻲ .. ﻛﺎﻝ ﻟﻌﺪ ﺍﺣﻨﻪ ﻧﺮﻓﻊ ﺍﻟﺰﺣﻤﻪ .. ﻛﺘﻠﻪ ﻻ ﻭﺍﻟﻠﻪ ﻋﻤﻲ ﻣﺎ ﻳﺼﻴﺮ ﺍﻟﻴﻮﻡ ﻋﺸﺎﻛﻢ ﻫﻨﺎ
ﻛﺎﻝ ﻻ ﻭﺍﻟﻠﻪ ﻣﺮﻳﻨﻪ ﻧﺸﻮﻓﻜﻢ ﻳﻠﻪ ﺛﻴﻤﺎﻟﻠﻪ .. ﻛﺘﻠﻪ ﺍﻟﻠﻪ ﻭﻳﺎﻙ ﻋﻤﻲ .. ﻭﺻﻠﺘﻬﻢ ﻟﻠﺒﺎﺏ ﻭﻃﺒﻴﺖ ﻟﻠﺒﻴﺖ
ﺭﺍﺩﺕ ﺗﺤﺠﻲ ﺍﻣﻲ ﻭﻳﺎﻱ ﺍﺷﺮﺗﻠﻬﺎ ✋ ﺍﻱ ﻳﻌﻨﻲ ﻻ ﺗﺤﺠﻴﻦ ﻣﺎ ﺍﺭﻳﺪ ﺍﺳﻤﻊ ﺷﻲ .. ﺩﺧﻠﺖ ﻟﻠﻐﺮﻓﻪ ﻭ ﺻﺤﺖ ﺍﻧﻌﻞ ﻭﺍﻟﺪﻳﻪ ﺍﻟﻴﻮﺻﻞ ﻳﻤﻲ ﻟﻮ ﻳﻜﻌﺪﻧﻲ ..
ﻭﺑﺲ ﺍﺳﻤﻊ ﺻﻮﺕ ﺑﺎﻟﺒﻴﺖ ﺑﺎﻟﻌﺒﺎﺱ ﺍﺑﻮ ﻓﺎﻇﻞ ﺍﻗﺼﺒﻜﻢ ﻭﺫﺭ ﻭﺫﺭ . ﻭﺻﺪﻙ ﺧﻠﺴﻮ ﺩﺧﻠﺖ ﻭﺍﻻﺑﺮﻩ ﻣﺎ ﺳﻤﻌﺘﻬﺎ ﺣﺴﻬﺎ ..
ﻛﻌﺪﺕ ﺑﻠﻴﻞ ﺑﺪﻟﺖ ﻭﻃﻠﻌﺖ ﺭﺣﺖ ﻛﻌﺪﺕ ﻋﻠﺸﻂ ﻟﻞ 2 ﺑﻠﻴﻞ ﻳﻠﻪ ﺭﺟﻌﺖ ﻧﻤﺖ .. ﺟﺎﻥ ﺛﺎﻧﻲ ﻳﻮﻡ ﺟﻤﻌﻪ .. ﺻﺒﺤﺖ ﻣﻦ ﺍﻟﺼﺒﺢ ﻟﻠﻨﺠﻒ ..
ﺯﺭﺕ ﺍﻻﻣﺎﻡ ﻭﻧﺨﻴﺘﻪ ﻭﻃﻠﻌﺖ ﻟﻠﻤڪﺎﺑﺮ .. ﻛﻌﺪﺕ ﻳﻢ ﻛﺒﺮ ﺟﺪﻱ .. ﻭﻛﻤﺖ ﺍﺷﻜﻲ ﻭﺍﺑﺠﻲ .. ﺍﻛﻠﻪ ﺟﺪﻱ ﻛﻠﺒﻚ ﻫﻢ ﺟﺎﻥ ﻳﻮﺟﻌﻚ ﻣﻦ ﻋﺎﻓﺘﻚ
ﺩﻣﻌﻚ ﻫﻢ ﻧﺰﻝ .. ﺭﺍﺳﻚ ﺧﻠﻴﺘﻪ ﺑﻴﻦ ﺭﺟﻠﻴﻚ ﻭﺑﺠﻴﺖ .. ﺟﺪﻱ ﻳﻜﻮﻟﻮﻥ ﺍﻟﺰﻟﻤﻪ ﻣﺎ ﻳﺼﻴﺮ ﻳﺒﺠﻲ ﻭﺍﻧﻪ ﺣﺘﻰ ﺑﻔﺎﺗﺤﺔ ﺍﺑﻮﻱ ﻣﺎ ﺑﺠﻴﺖ ﺣﺘﻰ ﻣﺎ ﺍﺿﻌﻒ
ﺑﺲ ﺟﺪﻱ ﺣﻴﻞ ﺍﺫﺍﻧﻲ ﺟﻔﺎﻫﺎ .. ﺟﺪﻱ ﻛﻠﺒﻲ ﺣﻴﻞ ﻳﻮﺟﻌﻨﻲ ﻓﻬﻤﻨﻲ .. ﺷﻠﻮﻥ ﻧﺴﻴﺖ .. ﺍﺩﺭﻱ . ﻣﺎ ﻧﺴﻴﺖ ﻭﺍﺩﺭﻱ ﺍﻧﺠﻠﻄﺖ ﻣﻦ ﺍﻟﻘﻬﺮ ﻋﻠﻴﻬﺎ .. ﻭﻣﺘﺖ ﻭﻣﺎ ﺗﺤﻤﻠﺖ ﻓﺮﺍﻛﻬﺎ
ﺟﺪﻱ ﻭﺍﻟﻠﻪ ﺍﻟﻤﻮﺕ ﺍﻫﻮﻥ ﻋﻠﻲ ﻣﻦ ﻓﺮﻛﺎﻫﺎ .. ﺍﻧﻬﺠﻢ ﺑﻴﺖ ﺍﻟﻌﺸﻚ ﺷﻜﺪ ﻳﺬﻝ .. ﺍﻧﻪ ﺍﻟﻨﺎﺱ ﻣﺎ ﺗﺤﻨﻴﻠﻲ ﺭﻛﺒﻪ ﺍﺧﻠﻲ ﺭﺍﺳﻲ ﺑﻴﻦ ﺭﺟﻠﻴﻪ ﻭﺍﺑﺠﻲ ﻋﻠﻴﻬﺎ ..
ﻛﻌﺪﺕ ﻳﻤﻪ ﺍﺣﺠﻲ ﻭﺍﺑﺠﻲ .. ﻛﻤﻠﺖ ﺭﺷﻴﺘﻪ ﻣﻲ ﻭﻛﻤﺖ ﻣﻨﻪ ﻭﺭﺣﺖ .. ﺟﺎﻱ ﺍﻣﺸﻲ ﺑﺎﻟﺴﻴﺎﺭﻩ ﻭﺩﻙ ﻣﻮﺑﺎﻳﻠﻲ ..
ﻋﺎﻳﻨﺖ ﻛﺎﺗﺐ ﻋﻠﻰ ﺭﻗﻤﻬﺎ ﺍﻟﻤﻠﻴﻘﻪ .. ﺭﺩﻳﺖ .. ﻛﺘﻠﻬﺎ ﻫﻼ .. ﻛﺎﻟﺖ ﻫﻠﻮ ﺣﺎﺭﺙ .. ﻛﺘﻠﻬﺎ ﺷﻠﻮﻧﺞ .. ﻛﺎﻟﺖ ﺯﻳﻨﻪ .. ﻛﺘﻠﻬﺎ ﺍﺷﺘﺎﻗﻴﺘﻲ ..
ﻛﺎﻟﺖ ﺷﺘﻜﻮﻝ .. ﻛﺘﻠﻬﺎ ﻟــ NO ـﺎ .. ﻛﺎﻟﺖ ﻫﻴﺞ ﺗﺘﻮﻗﻌﻨﻲ .. ﻛﺘﻠﻬﺎ ﻟﻮ ﻣﺸﺘﺎﻗﻪ ﺟﺎﻥ ﺭﺟﻌﺘﻲ .. ﻛﺎﻟﺖ ﺍﻧﻲ ﻣﺎ ﺍﺧﻠﻲ ﻋﻮﺍﻃﻔﻲ ﺗﻤﺸﻴﻨﻲ ﺍﺷﺘﺎﻗﻠﻚ ﻧﻌﻢ ﺑﺲ ﻛﺮﺍﻣﺘﻲ ﺧﻂ ﺍﺣﻤﺮ
ﻛﺘﻠﻬﺎ ﺟﻴﺪ .. ﺍﻟﻤﻄﻠﻮﺏ .. ﻛﺎﻟﺖ ﺍﺟﻴﺖ ﺍﻧﻄﻴﻚ ﺧﺒﺮ ﺣﺮﻭﺡ ﻟﻠﺸﻤﺎﻝ .. ﻛﺘﻠﻬﺎ ﺣﻠﻮ ﻋﺎﻳﺸﻪ ﺣﻴﺎﺗﺞ .. ﻛﺎﻟﺖ ﻟﻴﺶ ﺍﻧﺘﻪ ﻣﻴﺖ ﻣﺜﻼ .. ﻛﺘﻠﻬﺎ ﻻ ﻣﺤﺪ ﻳﻤﻮﺕ .. ﺍﻧﺴﻲ ..
ﺍﻱ ﺗﺮﺣﻴﻦ ﺑﺎﻟﻌﺒﺎﻳﻪ .. ﻛﺎﻟﺖ ﻫﻠﻠﻠﻠﻠﻠﻮ ﺍﻛﻠﻚ ﺍﻧﻲ ﺭﺍﻳﺤﻪ ﻟﻠﺸﻤﺎﻝ ﻳﻌﻨﻲ ﺍﺗﺴﻠﻖ ﺟﺒﺎﻝ ﺍﻧﺰﻝ ﺷﻼﻻﺕ ﺍﻟﻌﺒﺎﻳﻪ ﺷﺴﻮﻱ ﺑﻴﻬﺎ ..
ﻛﺘﻠﻬﺎ ﺟﺎ ﻣﺎﻛﻮ ﺭﻭﺣﻪ .. ﻛﺎﻟﺖ ﻫﻮﻩ ﻣﻮ ﺻﻮﺟﻚ ﺻﻮﺟﻲ ﺍﻧﻲ ﺧﺎﺑﺮﺕ .. ﻛﺘﻠﻬﺎ ﺍﻟﻤﺮﻩ ﺍﻟﺘﻄﻠﻊ ﺑﺪﻭﻥ ﺍﺫﻥ ﺯﻭﺟﻬﺎ ﻣﻠﻌﻮﻧﻪ ﻋﻠﻰ ﻟﺴﺎﻥ ﺍﻟﻠﻪ ﻭﻣﻼﺋﻜﺘﻪ ﻭﺭﺳﻮﻟﻪ ..
ﻛﺎﻟﺖ ﺣﺎﺭﺙ ﻭﺗﺎﻟﻲ ﻳﻌﻨﻲ ﺻﺎﺭ ﺷﻬﺮﻳﻦ ﺍﺑﻴﺘﻚ ﺍﻧﺤﺒﺴﺖ ﺍﻧﻘﺒﻀﺖ ﺭﻭﺣﻲ ﺍﺭﻳﺪ ﺍﻧﻌﺶ ﻧﻔﺴﻴﺘﻲ ﺗﻌﺒﺖ ﻣﻦ ﺟﻮ ﺍﻟﺒﻴﺖ ﻭﺍﻟﻤﺸﺎﻛﻞ
ﻛﺘﻠﻬﺎ ﻭﻳﻦ ﺭﺍﺡ ﺗﺮﺣﻴﻦ .. ﻛﺎﻟﺖ ﻟﺒﻴﺖ ﺧﺎﻝ ﺑﺎﺑﺎ ﺑﻌﻴﻦ ﻛﺎﻭﻩ .. ﻛﺘﻠﻬﺎ ﺟﻴﺪ .. ﺭﻭﺣﻲ .. ﻛﺎﻟﺖ ﺣﺎﺭﺙ ﻟﺘﻀﻮﺝ .. ﻛﺘﻠﻬﺎ ﻣﺎﻛﻮ ﺷﻲ ﻳﺴﻮﻩ ﺍﺿﻮﺝ ﻋﻠﻴﻪ ..
ﻛﺎﻟﺖ ﺍﻱ ﺯﻳﻦ .. ﻳﻠﻪ ﺑﺎﻱ .. ﻛﺘﻠﻬﺎ ﺍﻟﻠﻪ ﻭﻳﺎﺝ ..
ﺭﻓﻞ .. ﻣﻦ ﺍﺟﻴﺖ ﺍﻟﺒﻴﺖ ﺑﺎﺑﺎ ﻭﺷﺎﻓﻮﻧﻲ ﺷﻠﻮﻥ ﻣﺤﺒﻮﺳﻪ ﻭﻧﻔﺴﻴﺘﻲ ﺯﻓﺖ ﺧﻄﻴﻪ ﺑﺎﺑﺎ ﻃﻠﻌﻨﻪ ﻟﻠﺰﻭﺭﺍﺀ ﺍﺗﻮﻧﺴﻨﻪ ..
🔹🔸🥇🔹🔸
ﺑﺲ ﻓﻘﺪﺍﻧﻲ ﻟﺤﺎﺭﺙ ﻣﺄﺛﺮ ﺑﻨﻔﺴﻴﺘﻲ .. ﺟﻨﺖ ﻋﻨﺪﻩ ﻣﺤﺒﻮﺳﻪ ﻭﺍﻟﺒﻴﺖ ﻛﺌﻴﺐ ﺑﺲ ﻛﻠﺒﻲ ﻓﺮﺣﺎﻥ ﺑﻴﻪ .. ﻣﻦ ﺍﺟﻴﺖ ﻫﻨﺎ ﺍﻟﺠﻮ ﺣﻠﻮ ﻭﻓﺮﺡ ﻭﺿﺤﻚ ﺑﺲ ﻛﻠﺒﻲ ﺑﺪﻭﻧﻪ ﻛﺌﻴﺐ
ﺑﺎﺑﺎ ﻋﺮﻑ ﺷﻨﻮ ﺑﺪﺍﺧﻠﻲ ﻭﺣﺲ ﺑﻴﻪ .. ﻛﺎﻝ ﺑﺎﺑﺎ ﻧﻄﻠﻊ ﻟﻠﺸﻤﺎﻝ ﻧﻐﻴﺮ ﺟﻮ ﻛﺘﻠﻪ ﻳﺎﺭﻳﺖ .. ﻛﺎﻝ ﺍﻟﺠﻮ ﻫﺴﻪ ﻫﻨﺎﻙ ﻳﺨﺒﻞ ﻭﺍﻟﺪﻭﺍﻡ ﻣﺎ ﺑﻘﻰ ﻋﻠﻴﻪ ﺷﻲ ..
ﻛﺘﻠﻪ ﻟﻴﺶ ﺑﺎﺑﺎ ﻫﺎﻱ ﺍﻟﺴﻨﻪ ﺍﺩﺍﻭﻡ .. ﻛﺎﻝ ﺑﺎﺑﺎ ﺍﻧﻲ ﻣﻦ ﺍﺟﻴﺘﻲ ﻭﺯﻋﻠﺘﻲ ﻛﻠﺒﻲ ﻋﻴّﺪ ﺟﻨﺖ ﺣﺎﻳﺮ ﺷﻠﻮﻥ ﺍﺟﻴﺒﺞ ﻭﺍﺧﻠﻴﺞ ﺗﻜﻤﻠﻴﻦ ﻫﻠﺴﻨﻪ ..
ﻛﺘﻠﻪ ﺑﺎﺑﺎ ﺣﺎﺭﺙ ﻣﺮﺍﺡ ﻳﻘﺒﻞ .. ﻛﺎﻝ ﺍﻧﺘﻲ ﻣﻌﻠﻴﺞ ﻭﻻ ﺗﺤﺠﻴﻦ ﺑﺄﻱ ﺷﻲ ﺧﻠﻴﻬﺎ ﻭﺭﺍﻱ ﻭﺍﻃﻠﻌﻲ ﻣﻨﻬﺎ .. ﺑﺲ ﺍﻧﻄﻲ ﺧﺒﺮ ﻭﻛﻮﻟﻴﻠﻪ ﺭﺍﻳﺤﻪ ﺗﺮﻩ ﻣﻴﺼﻴﺮ ﺍﻃﻠﻌﻴﻦ ﻭﻫﻮﻩ ﻣﺎ ﻳﻘﺒﻞ
ﻛﺘﻠﻪ ﺍﻧﺸﺎﻟﻠﻪ .. ﻓﺮﺣﺖ ﻻﻥ ﺻﺎﺭﺗﻠﻲ ﺣﺠﻪ ﺍﺳﻤﻊ ﺻﻮﺗﻪ ﺧﺎﺑﺮﺗﻪ ﻭﺣﺎﺟﻴﺘﻪ ﺑﺲ ﺻﻮﺗﻪ ﺟﺎﻥ ﺣﺎﺩ ﻭﻣﺎ ﺍﻋﺮﻑ ﺷﺒﻴﻪ ﺷﻜﻠﻪ ﺗﻌﺒﺎﻥ ..
ﻣﺎ ﺭﺩﺕ ﺍﺿﻐﻂ ﻋﻠﻴﻪ ﺍﻛﺜﺮ ﻭﺳﺪﻳﺘﻪ .. ﻟﻤﻴﻨﻪ ﺣﺎﺟﻴﺎﺗﻪ ﻭﻏﺮﺍﺿﻨﻪ ﻭﺍﺷﺘﺮﻳﺖ ﻣﻼﺑﺲ ﺛﺨﻴﻨﻪ ﻟﻠﺠﺒﻞ ﻭﻣﻼﺑﺲ ﻟﻠﺸﻼﻝ ..
ﺭﺣﻨﻪ ﺍﺣﻨﻪ ﻭﺑﻴﺖ ﺧﺎﻟﻲ ﻫﻢ ﺑﻨﺎﺕ ﺧﺎﻟﻮ ﺳﺎﺭﻩ ﻭﻧﻮﺭ ﻭﺍﺑﻦ ﺧﺎﻟﻮ ﺳﻴﺮﺍﺝ .. ﻫﺬﺍ ﺯﻣﻴﻠﻲ ﺑﺎﻟﻜﻠﻴﻪ .. ﻃﺎﻟﺐ ﻃﺐ ﺑﺲ ﻣﻮ ﻗﺴﻤﻲ ﻋﻠﺘﺸﺮﻳﺢ ..
ﺍﺳﻤﻲ ﻋﻜﺮﻭﻙ ﻻﻥ ﻣﺮﻩ ﺷﻔﺘﻪ ﻣﻜﺼﺺ ﺿﻔﺪﻉ ﻭﻳﺸﺮﺡ ﺑﻴﻪ ﻭﺑﻘﻴﻨﻪ ﻧﻀﺤﻚ ﺍﻧﻲ ﻭﻳﺎﻩ .. ﺍﺟﻪ ﻟﺒﻴﺘﻨﻪ ﺍﻭﻝ ﻣﺎ ﺷﺎﻓﻨﻲ ﺻﺎﺡ ﻋﺎﺍﺍﺍﺍﺍﺍﺍ ﻋﺼﻌﻮﻭﻭﻭﻭﻭﻭﻭﻭﺹ ﻛﺘﻠﻪ ﻟﻚ ﻫﻼﺍﺍﺍﺍ ﻋﻜﺮﻭﻭﻭﻭﻭﻙ ﻭﺗﺎﺣﻈﻨﻪ ..
ﻛﺎﻝ ﻭﻟﺞ ﺷﺠﺎﺑﺞ ﻛﻠﻨﻪ ﺑﻌﺪ ﻣﻨﺸﻮﻓﻬﺎ ﺍﺧﺬﻫﺎ ﺍﻟﻬﻤﺠﻲ ﻭﻏﺮﻛﻬﺎ ﺑﺎﻟﻬﻮﺭ .. ﻛﺘﻠﻪ ﺍﻧﺠﺐ ﻟﻚ ﺗﺮﻭﺣﻠﻪ ﻓﺪﻭﻩ ﻫﻤﺠﻲ ﺷﻨﻮ ﺍﻧﺘﻪ ﺍﻟﻬﻤﺠﻲ
ﻛﺎﻝ ﺑﻮﻳﻪ ﻫﺬﺍ ﻣﺴﻮﻳﻠﺞ ﻏﺴﻴﻞ ﻣﺦ ﻭﻟﺞ ﻣﻮ ﺟﻨﺘﻲ ﺗﺴﻤﻲ ﺍﻟﻬﻤﺠﻲ ..
ﺭﻓﻞ .. ﻛﺘﻠﻚ ﺍﻧﺠﺐ ﻋﺰﻳﺰﻱ ﻫﺬﺍ ﺯﻭﺟﻲ ﺣﺒﻴﺒﻲ ﺍﻱ ﻳﻌﻨﻲ ﺗﺎﺝ ﺭﺍﺳﻚ
ﺳﻴﺮﺍﺝ .. ﻧﻌﺎﻝ ﺍﺣﺴﻦ ..
ﺭﻓﻞ .. ﺑﺤﻠﻜﻚ ﺣﻴﺎﺗﻮ ..
ﺳﻴﺮﺍﺝ .. ﻻ ﻻ ﻭﻟﺞ ﺍﻧﺘﻲ ﻣﻮ ﺭﻓﻞ ﺑﻠﻪ ﺍﺷﻮﻑ ﺧﺎﻑ ﻣﺒﺪﻟﻴﺞ ﻻ ﻭﺍﻟﻠﻪ ﺍﻧﺘﻲ ﻣﺎ ﻣﺰﻭﺭﻩ .. ﺷﻐﻴﺮﺝ ﻫﻴﺞ
ﺭﻓﻞ .. ﺧﺨﺨﺨﺨﺨﺦ ﻛﺘﻠﻪ ﺟﺎ ﺧﻮﻳﻪ ﻏﻴﺮ ﻭﻛﻌﻨﻪ ﺑﺎﻟﺤﺐ
ﺳﻴﺮﺍﺝ .. 😨😨😨 ﻻ ﻭﺍﻧﻮﺏ ﺟﺎﺍﺍﺍ 😂😂😂😂😂 ﻻ ﻻ ﻻ ﺍﻧﺘﻲ ﻛﻮﻭﻭﻭﻭﻭﻟﺶ ﻣﺘﻐﻴﺮﻩ
ﺭﻓﻞ .. ﻫﻬﻬﻬﻬﻪ ﻳﺎﺍﺍﺍﺍ ﺩﻫﺮ ﻓﺮﻙ ﻭﻟﻚ ﺧﺎﻳﺐ ﺟﺎ ﺷﻤﺎﻟﻚ ﻏﻴﺮ ﺍﺣﺒﻨﻪ .. ﻛﻠﻬﻢ ﺿﺤﻜﻮ ﻛﺎﻝ ﻭﺍﻟﻠﻪ ﻭﺍﻟﻤﺎﻳﻌﻪ ﻋﺮﻓﺖ ﺗﺤﺠﻲ ﺷﺮﻭﻛﻲ
ﻣﺎﻣﺎ ﻛﺎﻟﺖ ﻻ ﻻ ﻫﺎﻱ ﻣﻮ ﺭﻓﻞ ﺍﻛﻴﺪ ﺍﺑﻦ ﺣﺎﺭﺙ ﺍﻟﻠﻲ ﺍﺑﻄﻨﻬﺎ ﺟﺎﻱ ﻳﺤﺠﻲ .. ﻛﺘﻠﻬﺎ ﻳﺎﺍﺍﺍﺍ ﻳﻤﻪ ﺷﻤﺎﻟﺞ .. ﻏﻴﺮ ﺭﺟﻠﻲ ﻭﺍﺣﺠﻲ ﻣﺜﻠﻪ ﻋﺒﻦ ﺍﺣﺒﻨﻪ ﻭﺍﻣﻮﺗﻦ ﻋﻠﻲ
ﻛﻠﻬﻢ ﺿﺤﻜﻮ .. ﻛﺎﻟﻮ ﺩﻳﻠﻪ ﺣﺠﻴﻪ ﻓﺘﻨﻪ ﺍﻣﺸﻲ .. ﻛﺘﻠﻪ ﺳﺮﺍﺝ ﻭﺍﻟﻠﻪ ﻟﻮ ﺷﺎﻓﻨﻲ ﻫﺴﻪ ﺣﺎﺭﺙ ﺑﻬﻠﺒﻨﻄﺮﻭﻥ ﻻ ﺣﺮﺍﻡ ﻳﺼﻴﺮ ﻛﺘﻠﻲ ﺑﻔﻠﺲ
ﻛﺎﻝ ﻭﻳﻦ ﺍﻟﻨﺒﻲ ﻭﻳﺠﻲ ﻭﺍﺷﻮﻓﺞ ﺷﻠﻮﻥ ﺗﻨﻜﺘﻠﻴﻦ .. ﻛﺘﻠﻪ ﻻ ﻭﺍﻟﻠﻪ ﺍﺫﺍ ﺍﺟﻪ ﻣﻌﻨﺎﻫﺎ ﺗﺨﺮﺏ ﺍﻟﻄﻠﻌﻪ .. ﻭﺭﺑﻚ ﻳﻠﻔﻨﻲ ﺑﻜﻮﻧﻴﻪ ﻭﻳﻜﻠﻲ ﺍﻃﻠﻌﻲ .. ﺿﺤﻚ ﻛﺎﻝ ﻭﺍﻟﻠﻪ ﺩﻭﻩ
ﻣﺸﻴﻨﺎ ﺳﻴﺎﺭﺗﻴﻦ ﻭﺣﺪﻩ ﺻﻌﺪ ﺑﻴﻬﺎ ﺳﻴﺮﺍﺝ ﻭﺍﺧﻮﻳﻪ ﻋﺒﺪﻟﻠﻪ ﻭﺑﻨﺎﺕ ﺧﺎﻟﻮ ﻧﻮﺭ ﻭﺻﺎﺑﺮﻳﻦ ﻭﺍﻧﻲ ..
ﻭﺍﻟﺴﻴﺎﺭﻩ ﺍﻟﺜﺎﻧﻴﻪ ﺍﺑﻮﻳﻪ ﻭﺍﻣﻲ ﻭﺧﺎﻟﻮ ﻭﻣﺮﺕ ﺧﺎﻟﻮ .. ﺍﻟﻄﺮﻳﻖ ﻛﻠﻪ ﻧﺪﻙ ﻭﻧﺮﻛﺺ ﻋﻠﻰ ﺍﻏﻨﻴﺔ ﻳﻤﻪ ﻛﺮﺻﺘﻨﻲ ﺍﻟﻌﻜﺮﺑﻪ ﻭﻃﺮﻃﺎﺭﺍﺍ ﻃﺮﻃﺎﺭﺍ ..
ﺩﺧﻠﻨﻪ ﺍﺭﺑﻴﻞ ﻭﺍﻟﺘﻼﻝ ﻭﺍﻟﺠﺒﺎﻝ ﻋﻠﻄﺮﻳﻖ ﻭﺍﺿﺤﻪ ﻭﺍﻟﺠﻮ ﻋﻄﺮ ﺑﺎﺭﺩ ﻳﺨﺒﻞ .. ﻃﻠﻌﺖ ﻣﻦ ﺍﻟﺸﺒﺎﻙ ﻭﺻﺮﺧﺖ ﻧﻌﻤﻤﻤﻤﻤﻤﻤﻤﻤﻤﻤﻤﻤﻢ ﺍﻧﻬﺎﺍﺍﺍﺍﺍﺍ ﺍﻟﺤﺮﻳﺔ ﻳﺎﺍﺍﺍﺍﺍ ﻋﺎﺍﺍﻟﻢ
ﺳﻴﺮﺍﺝ ﻣﺎ ﺟﺬﺏ ﺧﺒﺮ ﻛﺎﻡ ﻳﺪﻙ ﻫﻮﺭﻥ ﻭﻳﺼﺮﺥ ﻋﺎﺍﺍﺍﺍﺍﺍﺍﺍﺍ ﻭﻭﻛﻒ ﺍﻟﺴﻴﺎﺭﻩ ﻛﺘﻠﻪ ﻫﺎﺍ ﻛﺎﻝ ﻧﺤﺘﻔﻞ ﺑﺎﻟﺤﺮﻳﻪ ﻏﻴﺮ ..
ﻧﺰﻟﻨﻪ ﺍﻧﻲ ﻭﺧﻮﺍﺗﻪ ﻭﺍﺧﻮﻳﻪ ﻭﻫﻮﻩ ﻭﻛﻤﻨﻪ ﻧﻬﻮﺱ ﻋﻠﻄﺮﻳﻖ ﻋﻠﻰ ﺍﻏﻨﻴﺔ ﺷﻴﺼﺒﺮ ﺍﻟﻌﺎﺷﻚ ﻳﺎ ﺧﺎﻟﻪ ..
ﻓﺎﺗﺖ ﺳﻴﺎﺭﺓ ﺑﺎﺑﺎ ﻣﻦ ﻳﻤﻨﻪ ﻭﺻﺎﺣﺖ ﻣﺎﻣﺎ ﻟﻮ ﺗﺸﻮﻓﺞ ﺍﻡ ﺣﺎﺭﺙ ﺷﺘﺴﻮﻭﻱ .. ﻛﺘﻠﻬﺎ ﺧﺮﺭﺭﺏ ﺧﻠﺼﺖ ﻣﻨﻬﺎ ﻭﻣﻦ ﻓﺎﻃﻤﻪ ﻭﺍﺧﻴﺮﺍﺍﺍﺍﺍ ﺍﻧﻬﺎ ﺍﻟﺤﺮﻳﻪ ﻳﻬﻮﻭﻭﻭﻭﻭﻭﻭﻭﻭﻭﻭ
ﺻﻒ ﺑﺎﺑﺎ ﺻﺎﺡ ﻳﻠﻪ ﺍﺻﻌﺪﻭ ﻛﺎﻓﻲ .. ﺻﻌﺪﻧﻪ ﻭﺭﺟﻌﻨﻪ ﻟﻠﺴﻴﺎﺭﻩ .. ﻭﺻﻠﻨﻪ ﻟﺒﻴﺖ ﺧﺎﻝ ﺑﺎﺑﺎ .. ﺍﺳﺘﻘﺒﻠﻮﻧﻪ .. ﻭﺟﺎﻧﻮ ﻣﺴﻮﻳﻦ ﺍﻟﻌﺸﺎ ﺑﺮﺍ ﻣﺸﻮﻳﺎﺕ ﻭﻃﺎﻭﻻﺕ
ﻛﻌﺪﻧﻪ ﻳﻮﻣﻴﻦ ﻟﻤﻪ ﻭﺳﻮﺍﻟﻒ ﻭﺿﺤﻚ .. ﺛﺎﻧﻲ ﻳﻮﻡ ﻃﻠﻌﻨﻪ ﻟﻠﺠﺒﻞ ﻫﻢ ﺗﻮﻧﺴﻨﻪ ﻫﻨﺎﻙ .. ﺑﺲ ﺣﻴﻞ ﺑﺎﺭﺩ ..
ﺛﺎﻟﺚ ﻳﻮﻡ ﺧﻠﺼﻨﻬﺎ ﺑﺲ ﻧﻮﻡ ﻣﻦ ﺍﻟﺘﻌﺐ .. ﺭﺍﺑﻊ ﻳﻮﻡ ﺭﺣﻨﻪ ﻟﺸﻼﻝ ﻋﻠﻲ ﺑﻴﻚ .. ﻟﺒﺴﺖ ﻓﺎﻧﻴﻠﻪ ﻭﺑﻄﺮﻭﻥ ﻭﺟﻮﺍﻫﺎ ﺳﺘﺮﻳﺞ ﺍﺳﻮﺩ ﺧﻔﻴﻒ ﻭﺭﻓﻌﺖ ﺍﻟﺒﻄﺮﻭﻥ ﻟﻠﺮﻛﺒﻪ
ﻭﻧﺰﻟﻨﻪ ﺑﺎﻟﺸﻼﻝ ﻟﻌﺐ ﻭﻭﻧﺴﻪ .. ﺻﺢ ﻣﺎ ﻧﺎﺳﻴﻪ ﺣﺎﺭﺙ ﻭﺍﺗﺬﻛﺮﻩ ﺑﺼﻔﻨﺎﺗﻲ ﺑﺲ ﻣﺘﻮﻧﺴﻪ ﻭﻓﺮﺣﺎﻧﻪ ﻻﻥ ﺍﺣﺲ ﺧﻠﺼﺖ ﻣﻦ ﺳﺠﻨﻬﻢ ﻭﺭﺟﻌﺖ ﻟﺤﻴﺎﺗﻲ
ﺑﺲ ﺣﻴﻞ ﻣﺸﺘﺎﻗﺘﻠﻪ .. ﻭﺍﻛﻔﻴﻦ ﻧﻠﻌﺐ ﺑﺎﻟﻤﻲ ﻭﺍﻧﺸﻤﺮ ﻣﻲ ﻋﻠﻰ ﺑﻌﺾ .. ﺍﺑﺎﻭﻉ ﻭﺍﺣﺪ ﻳﺸﺒﻪ ﺣﺎﺭﺙ ﻧﻔﺲ ﺿﺨﺎﻣﺔ ﺍﻟﺼﺪﺭ ﻭﺍﻟﻮﻛﻔﻪ
ﺍﺑﺘﺴﻤﺖ .. ﺟﺞ ﺍﺑﺎﻭﻉ ﺯﻳﻦ ﻟﻚ ﻫﺬﺍ ﺣﺎﺭﺙ ﻻ ﻻ ﻣﺴﺘﺤﻴﻞ .. ﺧﻠﻴﺖ ﺍﻳﺪﻱ ﻋﻠﻰ ﻋﻴﻮﻧﻲ ﻻﻥ ﺍﻟﺸﻤﺲ ﺑﻌﻴﻮﻧﻲ ﻣﺎ ﺍﺷﻮﻑ ﺯﻳﻦ
ﻭﺍﻟﻠﻪ ﻫﺬﺍ ﺻﺪﻭﻙ ﺣﺎﺭﺙ .. ﻻﺑﺲ ﺑﺮﻣﻮﺩﺍ ﻭﻓﺎﻧﻴﻠﻪ ﺑﻴﺞ ﻃﺎﻟﻊ ﻳﺨﺒﻞ .. ﻣﻦ ﺍﺷﺘﻴﺎﻗﻲ ﺍﻟﻪ ﻧﺴﻴﺖ ﺍﻟﺰﻋﻞ ﻧﺴﻴﺖ ﺍﻟﻨﺎﺱ ﻧﺴﻴﺖ ﺍﻟﻌﺎﻟﻢ ..
ﺍﻭﻝ ﺷﻲ ﺳﻮﻳﺖ ﺭﻛﻀﺖ ﻋﻠﻴﻪ ﺑﻜﻞ ﺳﺮﻋﺘﻲ ﻭﻫﻮﻩ ﻳﺼﻴﺢ ﺑﻄﻨﺞ ﻳﻤﻌﻮﺩﻩ ﺍﻟﻄﻔﻞ ﻭﺷﺒﻜﺘﻪ ﺣﻴﻴﻴﻞ
🔸🔹🥇🔸🔹
ﺣﺎﺭﺙ .. ﻣﻦ ﺧﺎﺑﺮﺗﻨﻲ ﻭﻛﺎﻟﺘﻠﻲ ﺭﺍﺡ ﻧﺮﻭﺡ ﻻﺭﺑﻴﻞ ﻭﻛﺎﻟﺖ ﻣﺎ ﺍﻟﺒﺲ ﻋﺒﺎﻳﻪ .. ﺍﻟﻨﺎﺭ ﻛﺎﻣﺖ ﺗﺎﻛﻞ ﺑﺮﺍﺳﻲ ..
ﺍﺣﺠﻲ ﻭﻳﻪ ﺍﻟﺸﺮﻃﻪ ﻭﺍﻛﻠﻪ ﺑﺲ ﻛﻮﻥ ﺍﻟﺒﻨﻄﺮﻭﻥ ﻣﻮ ﺣﺼﺮ .. ﻳﻜﻠﻲ ﺷﻨﻮ ﺳﻴﺪﻱ .. ﻛﺘﻠﻪ ﺍﻧﺸﺎﻟﻠﻪ ﺍﻟﻘﻤﻴﺺ ﻃﻮﻳﻞ ..
ﺻﺎﺡ ﺳﻴﻴﻴﻴﻴﻴﺪﻱ ﻛﺘﻠﻪ ﻧﻌﻢ .. ﻛﺎﻝ ﺷﻨﻮ ﺍﻟﺒﻨﻄﺮﻭﻥ ﺣﺼﺮ ﺷﻨﻮ ﺍﻟﻘﻤﻴﺺ ﻃﻮﻳﻞ .. ﻛﺘﻠﻪ ﺷﻨﻮ ﺍﻧﻲ ﻛﻠﺖ ﻫﻴﺞ .. ﻛﺎﻝ ﺍﻱ ﺳﻴﺪﻱ ..
ﻛﺘﻠﻪ ﻻ ﻫﻴﺞ ﺍﺣﻼﻡ ﺍﻟﻴﻘﻀﻪ ﺭﻭﻭﺡ .. . ﻳﺮﺑﻲ ﺷﻠﻮﻥ ﺍﺭﺗﺎﺡ ﻭﻫﻴﻪ ﺭﺍﺡ ﺗﻄﻠﻊ .. ﺍﻧﻮﺏ ﺗﻜﻮﻝ ﺟﺒﻞ ﻭﺗﺮﻭﺡ ﺷﻼﻝ ﻫﻠﻬﻠﻪ ﻭﺗﻠﻌﺐ ﺑﺎﻟﻤﺎﻱ ﻭﻫﺪﻭﻣﻬﺎ ﺗﻠﻄﺶ
ﻭﺍﻟﺰﻟﻢ ﺗﻌﺎﻳﻦ ﻋﻠﻴﻬﺎ .. ﻳﺎﺭﺑﻲ ﺭﺍﺡ ﺗﺴﻮﺩﻥ ﻭﺍﻟﻌﺒﺎﺱ .. ﻳﺎﺭﺏ ﺑﺠﻬﺎﻙ ﻳﻄﻚ ﺍﻟﺠﻮﺏ ﻣﺎﻝ ﺍﻟﺴﻴﺎﺭﻩ ﻭﺗﺨﺮﺏ ﺍﻟﺮﻭﺣﻪ ..
ﻫﺴﻪ ﻳﻄﻠﻊ ﻋﺪﻫﻢ ﺳﺒﻴﺮ ﻓﺪ ﻣﺸﻜﻠﻪ .. ﻳﺎﺭﺏ ﻛﻮﻥ ﺗﻨﺴﺪ ﺣﺪﻭﺩ ﺍﻻﻗﻠﻴﻢ ﻭﻣﺎ ﻳﺨﻠﻴﻬﻢ ﻳﻄﺒﻮﻥ .. ﺧﺮﺏ ﺧﺎﻝ ﺍﺑﻮﻫﺎ ﻫﻨﺎﻙ ﻋﺎﻳﺶ ﻳﺘﻮﺳﻄﻠﻬﻢ ﻭﻳﺪﺧﻠﻬﻢ
ﺿﻠﻴﺖ 3 ﺍﻳﺎﻡ ﺍﻣﺸﻲ ﻭﺍﺣﺠﻲ ﺍﺣﺲ ﺗﺴﻮﺩﻧﺖ .. ﺍﺭﻳﺪ ﺍﺧﺎﺑﺮﻫﺎ ﻭﺍﺗﺮﺍﺟﻊ .. ﺍﺧﺮ ﺷﻲ ﺧﺎﺑﺮﺕ ﻋﻤﻲ ..
ﻛﺘﻠﻬﺎ ﻋﻤﻲ ﺷﻠﻮﻧﻚ .. ﻛﺎﻝ ﻫﻼ ﻋﻤﻮ ﺣﺎﺭﺙ .. ﺷﻠﻮﻧﻜﻢ .. ﻛﺘﻠﻪ ﺑﺨﻴﺮ ﻋﺴﺎﻙ ﺑﺨﻴﺮ .. ﺗﺴﻠﻢ .. ﻛﺘﻠﻪ ﻋﻤﻲ ﻃﻠﻌﺘﻮ ﻻﺭﺑﻴﻞ
ﻛﺎﻝ ﺍﻱ ﺍﺑﻨﻲ ﺣﺎﻟﻴﺎ ﺑﻴﻬﺎ .. ﻛﺘﻠﻪ ﺭﺣﺘﻮ ﺷﻼﻝ ﺟﺒﻞ .. ﺿﺤﻚ ﻛﺎﻝ ﺍﻟﺒﺎﺭﺣﻪ ﺍﺧﺬﻧﺎﻫﻢ ﻟﻠﺠﺒﻞ .. ﻭﺍﻟﻴﻮﻡ ﻛﻠﻬﺎ ﻧﻴﺎﻡ ﺗﻌﺒﺎﻧﻴﻦ ..
ﻛﺘﻠﻪ ﻋﻤﻲ ﻫﻢ ﺗﺎﺧﺬﻫﻢ ﺷﻼﻝ .. ﻛﺎﻝ ﺍﻱ ﻋﻤﻮ ﺑﺎﺟﺮ ﺍﻧﺸﺎﻟﻠﻪ ﻧﻄﻠﻊ ﻣﻦ ﺍﻟﺼﺒﺢ ﻟﺸﻼﻝ ﻋﻠﻲ ﺑﻴﻚ .. ﻛﺘﻠﻪ ﻋﻤﻲ ﻫﺬﺍ ﺍﺯﺩﺣﺎﻡ ..
ﻛﺎﻝ ﻏﻴﺮ ﻭﻧﺴﺘﻬﻢ ﻳﺎﻋﻤﻮ ﺷﻨﺴﻮﻱ ﻧﻐﻴﺮ ﺟﻮ .. ﻛﺘﻠﻪ ﺟﺎ ﺧﻮﺵ ﻋﻤﻲ .. ﻛﺎﻝ ﺭﺍﻳﺪ ﺷﻲ ﻛﺘﻠﻪ ﻻ ﺳﻼﻣﺘﻚ ﺑﺲ ﺍﻧﻪ ﺍﻛﻮﻝ ﻟﻮ ﻣﺎ ﺗﺎﺧﺬ ﺭﻓﻞ ﻭﻳﺎﻛﻢ ﻟﻠﺸﻼﻝ
ﻻﻥ ﺣﺎﻣﻞ ﻭﺑﻄﻨﻬﺎ ﺍﺧﺎﻑ ﺗﺰﻟﻚ ﺗﻮﻛﻊ ﺗﻌﺮﻑ ﻣﻮ ﺯﻳﻦ ﻋﻠﻴﻬﺎ .. ﻛﺎﻝ ﻻ ﺍﺣﻨﻪ ﻳﻤﻬﺎ ﺩﺍﻳﺮﻳﻦ ﺑﺎﻟﻨﻪ ﻋﻠﻴﻬﺎ ﻭﺗﺤﺖ ﻋﻴﻮﻧﻪ
ﻛﺘﻠﻪ ﻣﻦ ﺩﺑﺶ ﺗﺤﺖ ﻋﻴﻮﻧﻚ ﻭﻫﻴﻪ ﺗﻤﺸﻲ ﻛﺪﺍﻣﻚ ﺑﺎﻟﺒﻨﻄﺮﻭﻥ .. ﻛﺎﻝ ﻫﺎ ﻋﻤﻮ ﻛﺘﻠﻪ ﻻ ﻣﺎﻛﻮ ﺷﻲ ﻳﻠﻪ ﻣﻊ ﺍﻟﺴﻼﻣﻪ ﻋﻤﻲ ﻛﺎﻝ ﺍﻟﻠﻪ ﻭﻳﺎﻙ
ﺑﻘﻴﺖ ﺍﻓﺘﺮ ﺑﺎﻟﻐﺮﻓﻪ .. ﺭﺍﺡ ﺗﺮﻭﺡ ﻟﻠﺸﻼﻝ ﺭﻓﻞ . ﻭﺍﻋﺮﻓﻬﺎ ﻭﺍﻟﻠﻪ ﺍﻃﺐ ﺑﺎﻟﻤﺎﻱ .. ﺍﺳﺘﻐﻔﺮ ﺍﻟﻠﻪ ﺷﻠﻮﻥ
ﻃﺐ ﻣﺼﻄﻔﻰ ﺻﺎﺡ ﺑﺎﺑﺎ ﻛﺘﻠﻪ ﺍﻧﻌﻞ ﺍﺑﻮﻙ ﻻﺑﻮ ﺍﻟﺨﻠﻔﻚ ﺍﻣﺸﻲ ﻋﻨﻲ .. ﺭﺍﺡ ﻭﺭﻩ ﺷﻮﻳﻪ ﺍﺟﺖ ﺍﻣﻲ .. ﻛﺎﻟﺖ ﻳﻤﻪ ﺷﻤﺎﻟﻚ ﺭﺍﺡ ﺗﺘﺨﺒﻞ .. ﻛﺘﻠﻬﺎ ﺭﺍﺡ ﺗﺮﻭﺡ ﻟﻠﺸﻼﻝ
ﻛﺎﻟﺖ ﻣﻨﻲ ﻫﺎﻱ .. ﻛﺘﻠﻬﺎ ﻣﻨﻴﻪ .. ﻛﺎﻟﺖ ﺍﻟﺘﺮﻭﺡ ﻟﻠﺸﻼﻝ .. ﻛﺘﻠﻬﺎ ﻻ ﻳﻤﻪ ﺷﺒﻴﺞ ﺟﺎﻱ ﺍﻗﺮﻩ ﺑﺘﺎﻳﺘﻞ ﻣﺎﻝ ﺍﻟﺘﻠﻔﺰﻳﻮﻥ ..
ﻛﺎﻝ ﻭﻟﻚ ﻳﻤﻪ ﺷﻤﺎﻟﻚ ﺍﺗﺴﻮﺩﻧﺖ ﺻﺎﺭﻟﻚ ﺍﺳﺒﻮﻉ ﺣﺎﺑﺲ ﻧﻔﺴﻚ ﺍﻫﻨﺎ ﺣﺘﻰ ﺍﻛﻞ ﻣﺎ ﺗﻄﻠﻊ ﻭﺗﺎﻛﻞ ﻭﻳﺎﻧﻪ .. ﻛﺘﻠﻬﺎ ﻳﻤﻪ ﻣﺎ ﺍﺭﻳﺪ ..
ﻛﺎﻟﺖ .. ﻋﻠﻰ ﺭﻓﻞ .. ﻛﺘﻠﻬﺎ ﺷﺒﻴﻬﺎ ﺭﻓﻞ .. ﻛﺎﻟﺖ ﺩﻫﺮ ﺻﺎﺏ ﺑﺖ ﺑﻠﻘﻴﺲ ﻛﻮﻥ ﺳﻮﺩﻧﺖ ﺍﻟﻮﻟﺪ ﺑﺎﻟﻌﺒﺎﺱ ..
ﻛﺘﻠﻬﺎ ﻳﻤﻪ ﻣﺎﻟﻲ ﺧﻠﻚ ﻫﻠﺴﻮﺍﻟﻒ ﻋﻮﻓﻴﻨﻲ .. ﺍﺗﻤﺪﺩﺕ ﻋﻠﺴﺮﻳﺮ .. ﺭﺍﺩﺕ ﺗﻜﻮﻡ .. ﻛﺘﻠﻬﺎ ﻳﻤﻪ .. ﻛﺎﻟﺖ ﻫﺎﺍ .. ﻛﺘﻠﻬﺎ ﺑﺎﺟﺮ ﺏ 4 ﺍﻟﻔﺠﺮ ﻃﺎﻟﻊ ﻟﺸﻼﻝ ﻋﻠﻲ ﺑﻴﻚ
🔹🔸🥇🔹🔸
ﻛﺎﻟﺖ ﻳﻤﻪ ﺩﻫﺮ ﺍﺑﻨﻲ ﺗﺴﻮﺩﻥ ﻭﻋﻠﻲ .. ﻳﻤﻪ ﻳﺎ ﺷﻼﻝ ﻫﺬﺍ ﺷﺒﻴﻚ .. ﻛﺘﻠﻬﺎ ﺧﺎﻑ ﺗﻜﻌﺪﻭﻥ ﻣﺎ ﺗﻠﻜﻮﻧﻲ ﻛﺘﻠﺞ ﺍﻧﻪ ﻃﺎﻟﻊ .. ﺳﺪﻱ ﺍﻟﻀﻮﻩ ﺑﻄﺮﻳﻘﺞ ﻭﺳﺪﻱ ﻭﺭﺍﺝ ﺍﻟﺒﺎﺏ ﺗﺼﺒﺤﻴﻦ ﻋﻠﻰ ﺧﻴﺮ
ﻛﺎﻟﺖ ﻳﻤﻪ ﺍﻣﻬﺎﺕ ﺍﻟﺴﺤﻮﺭﻩ ﺳﺤﺮﻧﻪ ﻟﻠﻮﻟﺪ ﻳﻤﻪ ﻫﺬﺍ ﺷﻤﺎﻟﻪ ﺍﻧﻜﻠﺒﺖ ﺍﺣﺎﻭﻟﻪ .. ﺻﺤﺖ ﻳﻤﻤﻤﻤﻤﻪ ﺍﻟﻀﻮﻩ ..
ﻃﻔﺘﻪ ﻭﻃﻠﻌﺖ .. ﻭﻗﺘﺖ ﺍﻟﻤﻮﺑﺎﻳﻞ ﻭﻧﻤﺖ ﺏ 3 ﻭﻧﺺ ﺩﻙ .. ﻛﻌﺪﺕ ﺣﻈﺮﺕ ﻏﺮﺍﺿﻲ ﻭﺟﻨﻄﺘﻲ ﻭﻃﻠﻌﺖ ﺑﺴﻴﺎﺭﺗﻲ ﻻﺭﺑﻴﻞ
ﻣﺸﻴﺖ ﺳﺮﻳﻊ ﻋﺪﻳﺖ ﺍﻟﺴﻴﻄﺮﺍﺕ ﺍﺑﺎﺟﻲ ﺍﻟﻌﺴﻜﺮﻱ ﺿﺎﺑﻂ .. ﺑﺲ ﺍﺭﻳﺪ ﺍﻭﺻﻞ ﻛﺒﻞ ﻻ ﺗﺮﻭﺡ ﻟﻠﺸﻼﻝ ..
ﻛﻮﻩ ﻭﺻﻠﺖ ﺍﻟﻀﻬﺮ .. ﻧﺰﻟﺖ ﻟﻠﻤﺤﻼﺕ ﺍﺷﺘﺮﻳﺖ ﻣﻼﺑﺲ ﻏﻴﺮﺕ ﻣﻼﺑﺴﻲ .. ﻭﺗﻮﺟﻬﺖ ﻟﻠﺸﻼﻝ .. ﺍﺩﻭﺭ ﻋﻠﻴﻬﺎ ..
ﺷﻔﺖ ﻋﻤﻲ ﻭﻣﺮﺗﻪ ﺑﺲ ﺭﻓﻞ ﻣﺎﻛﻮ .. ﺍﻋﺎﻳﻦ ﺧﺮﺏ ﺑﺄﺑﻮ ﻟﻬﺐ .. ﻫﺎﻱ ﺑﻨﺺ ﺍﻟﻤﺎﻱ .. ﻭﺍﻛﻒ ﺍﻋﺎﻳﻦ ﻋﻠﻴﻬﺎ .. ﻫﻴﻪ ﻟﻤﺤﺘﻨﻲ
ﻛﺎﻣﺖ ﺗﺮﻛﺰ ﻭﺗﺨﻠﻲ ﺍﻳﺪﻫﺎ ﻋﻠﻰ ﻋﻴﻨﻬﺎ ﻭﺗﻌﺎﻳﻦ ﻋﻠﻲ .. ﻋﺮﻓﺘﻨﻲ ﺭﻛﻀﺖ ﺣﻴﻞ ﺭﺍﺡ ﻛﻠﺒﻲ ﻛﺘﻠﻬﺎ ﻭﻟﺞ ﺑﻄﻨﺞ ﻻ ﺗﺮﻛﻀﻴﻦ ﺍﻟﻄﻔﻞ
ﺷﺒﻜﺘﻨﻲ ﺣﻴﻞ .. ﺷﺒﻜﺘﻬﺎ ﻭﺿﺤﻜﺖ .. ﺑﺎﻭﻋﺘﻠﻲ ﻟﺰﻣﺖ ﻭﺟﻬﻲ .. ﻛﺎﻟﺖ ﺍﺷﺘﺎﻗﻴﺘﻠﻚ .. ﺭﺩﺕ ﺍﻛﻠﻬﺎ ﻭﺍﻧﻲ ﺍﻛﺜﺮ .. ﻋﺎﻳﻨﺖ ﻟﻠﺒﻨﻄﺮﻭﻥ ﻣﻮ ﺑﺲ ﺿﻴﻚ ﻭﺭﺍﻓﻌﺘﻪ ﻟﻠﺮﻛﺒﻪ ﻫﻢ
ﻛﺘﻠﻬﺎ ﺑﺖ ﺍﻟﻨﻌﻞ ﺷﻨﻲ ﻫﺎﺍﺍﺍﺍﺍﺍﻱ .. ﻛﺎﻟﺖ ﺵ ﺷﺸﺒﻴﻚ ﻡ ﻡ ﻣﻤﺎ ﺑﻴﻪ ﺷﻲ ﻭﺍﻟﻠﻪ ﻻﺑﺴﻪ ﺟﻮﺍﻩ ﺳﺘﺮﻳﺞ .. ﺍﺭﺗﺒﻜﺖ ﻭ ﺑﻘﺖ ﺗﻨﺰﻝ ﺑﺎﻟﺒﻨﻄﺮﻭﻥ ..
ﻛﺘﻠﻬﺎ ﻻ ﺍﺩﻧﻜﻴﻦ ﻻ ﺍﺩﻧﻜﻴﻦ .. ﺍﻟﺒﻄﺮﻭﻥ ﺣﺼﺮ ﻭﺍﻣﺔ ﻣﺤﻤﺪ ﻛﻠﻬﺎ ﻭﺭﺍﺝ .. ﺟﺮﻳﺖ ﺍﻟﻐﺘﺮﻩ ﺟﻨﺖ ﺷﺎﻣﺮﻫﺎ ﻋﻠﻰ ﺟﺘﺎﻓﻲ ..
ﻛﺘﻠﻬﺎ ﻟﻔﻴﻬﺎ ﻋﻠﻰ ﺧﺼﺮﺝ .. ﻟﻔﺘﻬﺎ .. ﻛﺘﻠﻬﺎ ﻳﻠﻪ ﺍﻣﺸﻲ .. ﻛﺎﻟﺖ ﻭﻳﻴﻴﻦ ﺍﻧﻲ ﺍﺻﻼ ﺯﻋﻼﻧﻪ ﻭﻣﺠﺎﻳﻪ ﻭﻳﺎﻙ ﺷﻜﻮ ﻻﺣﻜﻨﻲ .
ﻛﺘﻠﻬﺎ ﺗﻤﺸﻴﻦ ﻻ ﺍﺳﻄﺮﺝ ﻭﺍﻟﻌﺒﺎﺱ .. ﺯﻋﻼﻧﻪ ﻭﺭﻛﻀﺘﻠﻲ ﻛﺪﺍﻡ ﺍﻟﻌﺎﻟﻢ ﻭﺗﺸﺒﻚ ﺑﻴﻪ ﺧﻮﺵ ﻋﻴﺎﺭﻩ ﻫﺎﻱ ..
ﻛﺎﻟﺖ ﺣﺎﺭﺙ ﺷﺒﻴﻚ ﻣﺸﺘﺎﻗﺘﻠﻚ ﻭﻧﺴﻴﺖ ﺍﻧﻲ ﺯﻋﻼﻧﻪ ﻭﺑﻌﺪﻳﻦ ﺟﻨﺖ ﻣﺘﺎﻧﻴﺘﻬﺎ ﻣﻦ ﺍﻟﻠﻪ ﺍﺟﻲ ﻟﻠﺸﻼﻝ ﺍﺗﻮﻧﺲ ﻭﺍﺟﻴﺖ ﺗﺨﺮﺑﻬﺎ ﻋﻠﻴﻪ
ﻛﺎﻋﺪ ﻧﺤﺠﻲ .. ﻭﺍﺟﻪ ﻭﻟﺪ .. ﺿﺮﺑﻬﺎ ﻋﻠﻰ ﺟﺘﻔﻬﺎ ﻭﻛﺎﻟﻠﻬﺎ ﻫﺎ ﻋﺼﻌﻮﺹ ﺷﺮﻑ ﺟﻨﺘﻠﻤﺎﻥ ﻣﺎﻟﺘﺞ .. ﻟﺰﻣﺘﻪ ﻣﻦ ﻣﻦ ﺍﻫﺪﻭﻣﻪ ﻭﺷﻠﺘﻪ ﻛﺘﻠﻪ ﺍﻧﺘﻪ ﻣﻨﻮ ﻭﺗﻀﺮﺏ ﻣﺮﺗﻲ ﻋﻠﻰ ﺟﺘﻔﻬﺎ
ﻛﺎﻟﺖ ﺣﺎﺭﺙ ﻟﺤﻈﻪ ﻟﺤﻈﻪ ﺷﺒﻴﻚ ﻫﺬﺍ ﺍﺑﻦ ﺧﺎﻟﻲ ﺳﺮﺍﺝ .. ﻛﺎﻝ ﺻﺪﻙ ﻟﻮ ﻛﺎﻟﺖ ﻋﻨﻚ ﺭﻓﻞ .. ﻭﻛﻔﺖ ﺑﻌﻴﻨﻪ ﻛﺘﻠﻪ ﺷﻜﺎﻟﺖ ..
ﺭﻓﻞ .. ﻛﺘﻠﻪ ﺍﺣﺒﻪ ﻭﺍﻟﻠﻪ .. ﺩﻓﻊ ﺳﻴﺮﺍﺝ ﻋﻠﻰ ﺻﺪﺭﻩ ﻭﻛﺎﻟﻪ ﺯﻟﻤﻪ ﻛﻤﻞ ﻛﻼﻣﻚ ﻻ ﺗﺨﻠﻴﻪ ﻧﺎﻗﺺ ﻭﻛﻮﻝ ﺷﻜﺎﻟﺖ ﻋﻨﻲ ..
ﺿﺤﻚ ﻛﺎﻝ ﻻ ﻭﺍﻟﻠﻪ ﻛﺎﻟﺖ ﺧﻮﺵ ﻭﻟﺪ ﻭﺍﺣﺒﻪ .. ﻛﺎﻟﻪ ﺣﺎﺭﺙ .. ﺧﻔﺖ ﺗﻜﻮﻟﻬﺎ .... ﻛﺘﻠﻪ ﺣﺎﺭﺙ ﺷﺒﻴﻚ ﺗﻌﺎﻝ
ﺟﺮﻳﺘﻪ .. ﻭﻛﺎﻝ ﺗﻤﺸﻴﻦ ﻟﻮ ﺗﺨﻠﻴﻨﻲ ﺍﺗﺴﻮﺩﻥ .. ﻛﺘﻠﻪ ﺣﺎﺭﺙ ﻋﻠﻴﺖ ﻛﻠﺒﻲ ﻳﺎ ﺍﺧﻲ ﺷﻮﻑ ﺍﻟﻨﺎﺱ ﺷﻮﻑ ﺍﻟﻌﺎﻟﻢ ﺷﻠﻮﻥ ﻓﺮﺣﺎﻧﻪ ﺧﻠﻴﻨﻪ ﻧﻔﺮﺡ ﻣﺜﻠﻬﻢ
ﻛﺎﻝ ﺍﻱ ﻭﻣﺮﺗﻲ ﺗﻨﺰﻝ ﺑﺎﻟﻤﺎﻱ ﻭﺍﻟﺰﻟﻢ ﺗﻌﺎﻳﻨﻬﺎ ﻭﺍﻧﻲ ﻻﺯﻡ ﺍﻓﺮﺡ .. ﺷﻨﻲ ﺭﺍﻳﺞ ﺍﺷﺪﻟﻲ ﻛﺮﻭﻥ ﻓﺪ ﻣﺮﻩ ..
ﻛﺘﻠﻪ ﺣﺸﺎﻙ .. ﺑﺲ ﺷﻠﻮﻥ .. ﻛﺎﻝ ﺗﺮﺣﻴﻦ ﻭﻳﺎﻱ .. ﻛﺘﻠﻪ ﺭﻭﺣﻪ ﻭﻳﺎﻙ ﺍﻧﺴﻰ ﻣﺎ ﺍﺭﺟﻊ ﺑﻌﺪ .. ﺷﻮﻑ ﺣﻴﺎﺗﻲ ﻫﻨﺎ ﻭﻗﺎﺭﻧﻬﺎ ﺑﺤﻴﺎﺗﻲ ﺍﺑﻴﺖ ﺍﻫﻠﻚ
🔸🔹🥇🔸🔹
ﺟﻨﺖ ﻣﻠﻄﺸﻪ ﺑﻴﺪ ﺧﻮﺍﺗﻚ ﻭﺍﻣﻚ ﻭﻣﺮﺗﻚ .. ﺍﺗﺮﻛﻨﻲ ﺑﺤﻴﺎﺗﻲ ﻭﺷﻮﻑ ﺣﻴﺎﺗﻚ .. ﻛﺎﻝ ﻭﺍﻟﻠﻪ ﻟﻮ ﺗﻮﺫﻧﻴﻦ .. ﺍﺭﻓﻊ ﻋﻠﻴﺞ ﺩﻋﻮﻩ ﻭﺍﺟﻴﺒﺞ ﺑﻴﺖ ﺍﻟﻄﺎﻋﻪ ﻏﺼﺐ ﻋﻨﺞ
ﻛﺘﻠﻪ ﺍﻧﻮﻭﻭﺏ ﺑﻴﺖ ﺍﻟﻄﺎﻋﻪ .. ﺧﻠﺼﻨﻪ ﻣﻦ ﺍﻟﻨﻬﻮﻩ ﺻﺎﺭﺕ ﻫﺴﻪ ﺑﻴﺖ ﺍﻟﻄﺎﻋﻪ .. ﻛﺎﻝ ﺟﺎ ﺍﻣﺸﻲ ﻭﻳﺎﻱ ﺑﺪﻭﻥ ﻟﻐﻮﻩ ..
ﻛﺘﻠﻪ ﺣﺎﺭﺙ ﺧﻼﺍﺍﺹ ﻓﻜﻬﺎ ..
ﺣﺎﺭﺙ .. ﻻ ﺗﺨﻠﻴﻨﻲ ﻭﻋﻠﻲ ﻫﻨﺎ ﺍﺷﻚ ﺍﻫﺪﻭﻣﻲ ﻭﺍﺗﺴﻮﺩﻥ ﻭﻟﺞ ﻋﺎﻳﻨﻲ ﻋﺎﻳﻨﻲ ﻫﺎﻱ ﻫﺪﻭﻡ ﻣﺎﻟﺖ ﺍﻟﻠﻪ
ﺭﻓﻞ .. ﺣﺎﺭﺙ ﻣﺴﺘﻮﺭﻩ ﻭﻻﺑﺴﻪ ﺣﺠﺎﺏ ﻭﻳﻦ ﺍﻟﻐﻠﻂ ﺑﻌﺪ .. ﻛﺎﻝ ﺍﻱ ﻣﻮ ﻫﻮﻩ ﺍﻟﺴﺘﺮ ﺑﺲ ﺑﺎﻟﺤﺠﺎﺏ .. ﺍﻣﺸﻲ ﺟﺎﻱ ﺍﻛﻠﺞ ..
ﻛﺘﻠﻪ ﻣﺎ ﺑﻴﻚ ﺍﻣﻞ .. ﻛﺎﻝ ﻻ .. ﻛﺘﻠﻪ ﻣﺎ ﺍﺭﻭﺡ ﻟﻤﻜﺎﻥ ﺗﻔﺮﻧﻲ ﻫﻨﺎ ﺑﻴﻦ ﺍﻟﺠﺒﺎﻝ .. ﻛﺎﻝ ﻋﻮﺩ ﺧﻮﺵ ﺍﻣﺸﻲ ..
ﻛﺎﻟﺖ ﻟﺤﻈﻪ ﺑﺲ ﺍﻛﻮﻝ ﻟﺒﺎﺑﺎ
ﻛﺘﻠﻬﺎ ﻣﻨﻲ ﺗﺎﺧﺬﻳﻦ ﺍﻻﻣﺮ ﻣﻮ ﻣﻦ ﺍﺑﻮﺝ .. ﻛﺎﻟﺖ ﺍﻋﺮﻑ ﺑﺲ ﻏﻴﺮ ﺍﻧﻄﻴﻪ ﺧﺒﺮ ﺍﻧﻲ ﺭﺍﻳﺤﻪ .. ﺭﺣﺖ ﻳﻢ ﺍﻫﻠﻲ ﻟﻜﻴﺘﻬﻢ ﻳﺒﺎﻭﻋﻮﻟﻨﻪ ﻭﻳﻀﺤﻜﻮﻥ
ﻛﺘﻠﻬﻢ ﺷﻜﻮ ﺗﻀﺤﻜﻮﻥ .. ﻛﺎﻟﺖ ﻣﺎﻣﺎ ﺷﻜﺪ ﻳﺤﺒﺞ .. ﻛﺘﻠﻪ ﺣﺎﺭﺙ .. ﻣﺨﺒﻞ .. ﻛﺎﻟﺖ ﺻﺪﻙ ﻣﺨﺒﻞ ﺑﺤﺒﻪ .. ﻟﺤﻜﺞ ﻻﺭﺑﻴﻞ ﻭﺩﻭﺭﺝ ﺑﻨﺺ ﺍﻟﺸﻼﻝ ﻋﻠﻤﻮﺩ ﻳﻠﺰﻣﺞ ﻭﻳﺤﺎﺳﺒﺞ
ﻛﺘﻠﻬﺎ ﺣﻈﻲ ﻏﻴﺮ .. ﻛﺎﻟﺖ ﺍﺣﻠﻰ ﺣﻆ .. ﻳﺎ ﺑﺨﺖ ﺍﻟﻤﺮﻩ ﺍﻟﺘﻠﻜﻪ ﻋﺪﻫﺎ ﻫﻴﺞ ﺭﺟﺎﻝ ﻳﺨﺎﻑ ﻋﻠﻴﻬﺎ ﻣﻦ ﺍﻟﻬﻮﻩ ..
ﻛﺘﻠﻬﺎ ﻗﺼﺪﻙ ﻳﻤﻨﻊ ﻋﻨﻲ ﺍﻟﻬﻮﻩ .. ﻛﺎﻟﺖ ﺍﻣﺸﻲ ﺟﺎﻱ ﻳﺒﺎﻭﻋﻠﺞ ﺑﺘﻚ ﻋﻴﻦ ﻭﺭﺍﻓﻊ ﺣﺎﺟﺒﻪ .. ﻭﺍﻟﺸﻤﺲ ﻋﻠﻴﻪ ﺍﻣﺸﻴﻪ ..
ﻛﺘﻠﻬﺎ ﺭﺍﻳﺤﻪ ﺭﺍﻳﺤﻪ .. ﺑﺎﺑﺎ ﺍﻧﻲ ﺣﺮﻭﺡ ﻭﻳﺎﻩ ﺗﺮﻩ .. ﻛﺎﻝ ﻭﻳﻦ .. ﻛﺘﻠﻪ ﻣﺎ ﺍﻋﺮﻑ ﻛﺎﻝ ﺭﻭﺣﻲ ﺑﺎﺑﺎ ﻫﻮﻩ ﺯﻭﺟﺢ ﻗﺎﺑﻞ ﻏﺮﻳﺐ ..
ﻛﺘﻠﻬﻢ ﻳﻠﻪ ﺑﺎﻱ ﺍﻟﺘﻘﻴﻜﻢ ﺍﺑﻴﺖ ﺟﺪﻭ ﻋﺜﻤﺎﻥ .. ﻛﺎﻟﻮ ﻣﺎﺷﻲ ﺍﻟﻠﻪ ﻭﻳﺎﺝ .. ﺭﺣﺖ ﻳﻤﻪ .. ﻛﺎﻝ ﺷﺒﻴﻬﻢ ﻳﻀﺤﻜﻮﻥ ..
ﻛﺘﻠﻪ ﻻﻥ ﻻﺣﻜﻨﻲ ﻟﻬﻨﺎ ﻳﻜﻮﻟﻮﻥ ﺷﻜﺪ ﻳﺤﺒﺞ ﻟﻌﺪ .. ﻛﺎﻝ ﺍﻟﻨﺎﺱ ﻋﺮﻓﺖ ﺑﺤﺒﻲ ﻭﻃﺸﺖ ﺳﺎﻟﻔﺘﻲ ﻭﺍﻧﺘﻲ ﻣﺎ ﺗﺤﺴﻴﻦ ﻋﻠﻰ ﺭﻭﺣﺞ ..
ﺑﺎﻭﻋﺘﻠﻪ 😕 ﻛﺘﻠﻪ ﺣﺎﺭﺙ ﺷﻜﺪ ﺗﺮﺯﻟﻨﻲ .. ﻛﺎﻝ ﻻﻥ ﺗﺴﺘﺎﻫﻠﻴﻦ .. ﻛﺘﻠﻪ ﺷﻜﺮﺍ .. ﺍﺧﺬﻧﻪ ﻃﺮﻳﻖ ﻣﻦ ﺟﺎﻧﺐ ﺍﻟﺸﻼﻝ ﻭﻣﺸﻴﻨﻪ ﺑﻴﻪ
ﻛﻤﻨﻪ ﻧﻤﺸﻲ ﺑﺄﻣﺎﻛﻦ ﻓﺎﺭﻏﻪ ﻭﻧﺴﻮﻟﻒ ﻛﺎﻝ ﻣﺎ ﻧﺎﻭﻳﻪ ﺗﺮﺟﻌﻴﻦ ﻛﺎﻓﻲ .. ﻛﺘﻠﻪ ﺗﺮﻳﺪ ﺣﺎﺭﺙ ﺗﻌﺎﻝ ﻟﺒﻐﺪﺍﺩ ﻧﻌﻴﺶ ..
ﻛﺎﻝ ﻭﻫﺎﻱ ﺑﺲ ﺍﻧﻪ ﺍﺗﺮﻙ ﺍﻣﻲ ﻭﺧﻮﺍﺗﻲ ﻭﻋﺎﺋﻠﺘﻲ ﻭﺩﻳﺮﺗﻲ ﻭﻋﺸﻴﺮﺗﻲ .. ﻭﺍﻟﺤﻜﺞ ﻫﻨﺎ ﺧﻮ ﻣﺎﻛﻮ ﺷﻲ .. ﻫﻴﻪ ﺍﻟﻤﺮﻩ ﺗﺒﻴﻌﺖ ﺭﺟﻠﻬﺎ ﻟﻮ ﺍﻟﺮﺟﺎﻝ ﻳﺘﺒﻌﻬﺎ
ﺷﻨﻮ ﻧﺎﻭﻳﻪ ﺗﺬﻟﻴﻨﻲ ﻻﻥ ﺍﺣﺒﺞ ﻟﻮ ﺷﻨﻬﻮ .. ﻛﺘﻠﻪ ﻻ ﺍﺑﺪﺍ ﺣﺒﻴﺒﻲ ﻣﻮ ﻫﻴﻚ ﺑﺲ ﻋﻴﺸﺘﻜﻢ ﺻﻌﺒﻪ ﻭﻣﺪﺍ ﺍﺗﻘﻠﻢ ﻭﻳﺎﻛﻢ ﻋﻮﻓﻨﻲ ﻫﻨﺎ .. ﻛﺎﻝ ﺷﻨﻮ ﻋﻴﺸﺘﻜﻢ .. ﻃﻠﻌﻪ ﻭﺿﺤﻚ ﻭﺑﻨﻄﺮﻭﻥ
ﺗﺮﻩ ﻣﻮ ﻫﺬﻱ ﺍﻟﺤﻴﺎﺓ ﺭﻓﻞ .. ﺍﻧﺘﺠﻴﺖ ﻋﻠﻰ ﺣﺠﺮ ﺟﺒﻴﺮ ﻭﻛﺘﻠﻪ ﺍﻋﺮﻑ ﻭﺍﻟﻠﻪ .. ﺻﺢ ﺍﻟﺤﻴﺎﺓ ﺣﻠﻮﻩ ﻫﻨﺎ ﻭﻛﻮﻟﻬﺎ ﻓﺮﺡ ﻭﺿﺤﻚ ﻭﻣﺘﻌﻪ .. ﺑﺲ ﻭﺍﻟﻠﻪ ﻣﺎ ﺍﺣﺲ ﺑﻄﻌﻤﻬﺎ ﻭﺍﻧﺘﻪ ﻣﺎ ﻣﻮﺟﻮﺩ
ﻭﺍﻛﻒ ﻛﺪﺍﻣﻲ ﻫﻮﻩ ﻭﻣﺨﻠﻲ ﺍﺩﻳﻪ ﺑﺠﻴﻮﺑﻪ .. ﺟﺮﻳﺖ ﺍﻳﺪﻩ .. ﻭﻛﻤﺖ ﺍﺑﺎﻭﻋﻠﻬﺎ .. ﻛﺘﻠﻪ ﺗﻌﺮﻑ ﺟﻴﺘﻚ ﺷﻜﺪ ﻓﺮﺣﺘﻨﻲ ..
ﺍﺻﻼ ﻭﻻ ﺟﻦ ﺯﻋﻼﻧﻪ ﻭﻻ ﺟﻦ ﺻﺎﻳﺮ ﻛﻞ ﺧﻼﻑ ﺑﻴﻨﻪ .. ﺧﻠﻴﺖ ﺍﻳﺪﻱ ﻋﻠﻰ ﺧﺪﻩ .. ﻛﺘﻠﻪ ﺗﺘﻮﻗﻊ ﻧﺎﺳﻴﺘﻚ ﻟﻮ ﺍﻛﺪﺭ ﺍﻧﺴﺎﻙ ..
🔹🔸🥇🔹🔸
ﻛﺎﻝ ﻣﻮ ﻣﺜﻠﻲ .. ﻭﻟﺞ ﺍﻧﻪ ﻣﻦ ﺭﺣﺘﻲ ﺍﺩﻣﺮﺕ ﻭﺍﻟﻌﺒﺎﺱ .. ﻛﻠﻬﺎ ﻛﺎﻣﺖ ﺗﻜﻮﻟﻪ ﻫﺬﺍ ﺍﺗﺴﻮﺩﻥ .. ﻛﺘﻠﻪ ﺣﺸﺎﻙ .. ﻛﺎﻝ ﻻ ﻭﺍﻟﻠﻪ ﺻﺪﻙ ﺍﻣﺸﻲ ﻭﺍﺣﺠﻲ ﻭﻱ ﺭﻭﺣﻲ
ﻛﺘﻠﻪ ﺣﺎﺭﺙ ﺍﺣﺒﻚ ﻭﺍﻟﻠﻪ ﺑﺲ ﺍﺗﻔﻬﻤﻨﻲ .. ﻻ ﺗﻜﻮﻥ ﻣﺜﺎﻝ ﺍﻟﺮﺟﻞ ﺍﻟﺸﺮﻗﻲ ﺍﻻﻧﺎﻧﻲ ﻛﺪﺍﻣﻲ .. ﺍﻧﻲ ﺯﻭﺟﺘﻚ .. ﻣﺜﻞ ﻣﺎ ﺍﺣﺎﻭﻝ ﺍﻃﺎﻭﻋﻚ ﻭﺍﺗﻔﺘﻬﻤﻚ ﺍﺗﻔﻬﻤﻨﻲ
ﺣﺎﺭﺙ .. ﺷﺘﻔﻬﻢ ﺍﺑﻨﻄﺮﻭﻧﺞ ﻫﺎﺫ .. ﻟﻮ ﻭﻛﻔﺘﺞ ﺑﻨﺺ ﺍﻟﺸﻼﻝ ﻭﺍﻟﺰﻟﻢ ﺩﺍﻳﺮ ﻣﺪﺍﻳﺮﺝ ﺗﻌﺎﻳﻦ ..
ﺭﻓﻞ .. ﻫﻬﻬﻬﻪ ﻳﺎﺑﻪ ﺷﻜﺪ ﺍﺣﺐ ﻏﻴﺮﺗﻚ ﺑﺲ ﻻ ﺗﺰﻭﺩﻫﺎ ﺗﺮﻩ ﺗﺼﻴﺮ ﺗﺨﻨﻚ .. ﺍﺗﻘﺮﺏ ﺣﻴﻞ ﻛﺎﻝ ﺟﺎ ﺷﺘﺮﺩﻳﻦ ..
ﻛﺘﻠﻪ ﺍﺑﺘﻌﺪ ﻻ ﻳﺠﻲ ﺍﺣﺪ . ﻛﺎﻝ ﻭﻳﺠﻲ ﺷﺴﻮﻳﻠﻪ ﻳﻄﺒﻪ ﻫﺮﺵ .. ﺣﻼﻟﻲ .. ﻛﺘﻠﻪ ﺣﺎﺭﺙ ﺑﺲ ﻻ ﻧﺎﻭﻱ ﺗﺴﻮﻱ ﺷﻲ ﺑﻨﺺ ﻫﻠﻬﻴﻤﻪ ..
ﻛﺎﻝ ﻭﻛﺢ ﻣﻮ ﺑﻴﺪﻱ ﺷﺴﻮﻱ .. ﻛﺘﻠﻪ ﺑﺮﺑﻚ ﺣﺎﺭﺙ ﺗﺴﻮﻳﻬﺎ ﻫﻨﺎ .. ﻛﺎﻝ ﻻ ﻃﺒﻌﺎ ﺍﻧﺘﻲ ﻣﺮﺗﻲ ﻭﻣﺎ ﺍﺩﻧﺲ ﻋﺮﺿﻲ ﺑﺎﻟﺸﺎﺭﻉ ﻣﺎ ﺍﺣﺐ ﻫﺴﻮﺍﻟﻒ ﺍﻟﻤﺎﺻﺨﻪ ..
ﺿﺤﻜﺖ .. ﻛﺘﻠﻪ ﺭﺍﺡ ﻛﻠﺒﻲ .. ﻛﺎﻝ ﺑﺲ ﺗﺮﻩ ﻋﺎﺩﻱ ﺍﺧﺬ ﺑﻮﺳﻪ ﻣﺤﺪ ﻳﺤﺎﺳﺒﻨﻲ ﻣﻮ .. ﺍﺑﺘﺴﻤﺖ .. ﺧﻠﻴﺖ ﺍﻳﺪﻱ ﻋﻠﻰ ﺍﻛﺘﺎﻓﻪ ﻭﻛﺘﻠﻪ ﻻ ﻣﺤﺪ ..
ﺑﻮﺳﻨﻪ ﺑﻌﺾ ﺍﻧﻮﺏ ﻭﺧﺮﺕ .. ﻛﺘﻠﻪ ﺍﻛﻮﻟﻚ ﺻﺪﻭﻙ ﺍﺣﻨﻪ ﻣﻮ ﺯﻋﻼﻧﻴﻦ .. ﻛﺎﻝ ﻣﺎ ﺍﻋﺮﻑ ﻳﻜﻮﻟﻮﻥ .. ﻣﻌﻠﻴﺞ ﺑﻴﻬﻢ ﺗﻌﺎﻱ 💏
ﻭﺧﺮﺕ ﻛﺘﻠﻪ ﻛﻮﻟﺸﻲ ﺍﺿﻠﻢ ﻭﺍﻧﺘﻪ ﻣﺎ ﻣﻮﺟﻮﺩ ﻭﻣﻦ ﺗﺠﻲ ﺗﻨﻮﺭ ﺣﻴﺎﺗﻲ .. ﻛﺎﻝ ﺍﻱ ﻳﻢ ﺍﻟﺴﺎﻥ ﺍﻛﻠﻲ ﻛﻠﺒﻲ ﺑﻬﺪﻟﻊ ﻭﺑﻌﺪﻳﻦ ﺷﻤﺮﻳﻨﻲ ..
ﺿﺤﻜﺖ ﺑﺼﻮﺕ ﻋﺎﻟﻲ ﻭﺩﻧﻜﺖ ﺷﻔﺖ ﺣﻴﻪ ﺟﻮﻩ ﺭﺟﻠﻴﻨﻪ .. ﻛﻤﺰﺕ ﻛﺘﻠﻪ ﺣﺎﺍﺍﺍﺍﺍﺭﺙ ﺣﻴﻪ .. ﻫﻮﻩ ﺑﺎﻭﻋﻠﻬﺎ ﺑﺴﺎﻉ ﻟﺰﻣﻬﺎ ﻣﻦ ﺭﺍﺳﻬﺎ ﺳﺪ ﺣﻠﻜﻬﺎ
ﻭﺧﻠﻪ ﺭﺟﻠﻪ ﻭﻛﻌﺪ ﻋﻠﻰ ﺫﻳﻠﻬﺎ .. ﻛﺎﻝ ﺑﺴﺎﻉ ﺷﻮﻓﻴﻠﻲ ﺻﺨﺮﻩ ﺟﻠﻤﻮﺩ ﺑﺴﺎﺍﺍﻉ ﻛﺘﻠﻪ ﺣﺎﺭﺙ ﻻ ﺗﺄﺫﻳﻚ ﻋﻮﻓﻬﺎ .. ﻛﺎﻝ ﻟﻮ ﻋﻔﺘﻬﺎ ﺗﻠﺪﻏﻨﻪ ﺛﻨﻴﻨﻪ ﺍﻣﺸﻴﻴﻴﻴﻲ
ﻣﺸﻴﺖ ﻣﺜﻞ ﺍﻟﻤﺨﺒﻠﻪ ﺍﺩﻭﺭ ﺑﺎﻟﻜﺎﻉ .. ﺷﻔﺖ ﻣﺜﻞ ﺍﻟﺤﺼﻮﺍﻳﻪ ﺍﻟﺠﺒﻴﺮﻩ ﺑﺎﻟﻜﺎﻉ ﺷﻠﺘﻬﺎ ﻭﻭﺩﻳﺘﻬﺎ ﺍﻟﻪ ..
ﺛﺒﺘﻬﺎ ﺟﺴﻤﻬﺎ ﺑﺮﺟﻠﻴﻪ ﻭﺧﺮ ﺍﻳﺪﻩ ﻣﻦ ﺭﺍﺳﻬﺎ ﻭﻓﺠﺮ ﺭﺍﺳﻬﺎ ﺑﺎﻟﺤﺠﺮ ﻣﺎﺗﺖ .. ﻛﺎﻝ ﻫﺎﻱ ﺧﻠﺼﺖ .. ﻛﺘﻠﻪ ﺭﺍﺡ ﻛﻠﺒﻲ . ﺍﻟﻠﻪ ﻋﻔﻴﻪ ﻋﻠﻴﻚ ﻛﺪﺭﺕ ﺗﻜﺘﻠﻬﺎ ﻛﻠﺖ ﺭﺍﺡ ﺗﻠﺪﻏﻨﻪ
ﻛﺎﻝ ﻻ ﻳﻤﻌﻮﺩﻩ .. ﻋﺴﻜﺮﻳﺔ ﺻﺪﺍﻡ ﺳﻮﺗﻠﻨﻪ ﻛﻠﻮﺏ .. ﻳﺎ ﺣﻴﺎﻳﻪ ﻳﺎ ﻋﻜﺎﺭﺏ .. ﻛﻤﻨﻪ ﻧﻜﻄﻌﻬﻦ ﻭﻧﺎﻛﻞ ﻛﺘﻠﻪ ﻋﻴﻴﻴﻊ ﻋﻮﺩ ﺻﺪﻭﻭﻭﻙ .. ﺿﺤﻚ
ﻛﺎﻝ ﻳﻠﻪ ﺍﻣﺸﻲ ﻻ ﻧﺘﺄﺫﻩ .. ﻃﻠﻌﻨﻪ ﻣﻦ ﻫﻠﻤﻜﺎﻥ .. ﻛﻤﻨﻪ ﻧﻤﺸﻲ ﻭﻧﺴﻮﻟﻒ ﻟﺤﺪ ﻣﺎ ﻭﺻﻠﻨﻪ ﺍﻟﻜﺮﺍﺝ .. ﻛﺘﻠﻪ ﺗﺮﻭﺡ ﻟﺒﻴﺖ ﺧﺎﻝ ﺑﺎﺑﺎ
ﻛﺎﻝ ﻻ ﺗﻌﺎﻱ ﻧﻤﺸﻲ ﻓﻨﺪﻕ .. ﻛﺘﻠﻪ ﻻ ﺷﺒﻴﻚ ﺍﺗﻌﺮﻑ ﻋﻠﻴﻬﻢ .. ﻭﺍﺻﻼ ﺭﺍﺡ ﺗﺒﺪﻱ ﻟﻌﺒﺔ ﺍﻟﻌﺮﺍﻕ ﻭﻛﻮﺭﻳﺎ ﺍﻟﺠﻨﻮﺑﻴﻪ ﺍﻟﻴﻮﻡ ﻗﺒﻞ ﺍﻟﻨﻬﺎﺋﻲ
ﻛﺎﻝ ﺣﻠﻮ ﺻﺎﻳﺮﻩ ﺍﺗﺎﺑﻌﻴﻦ ﻣﺒﺎﺭﻳﺎﺕ .. ﻛﺘﻠﻪ ﻻ ﻭﺍﻟﻠﻪ ﺑﺲ ﻫﻠﻤﺮﻩ ﻣﺘﺤﻤﺴﻪ ﻭﻳﻪ ﺍﻟﻤﻨﺘﺨﺐ .. ﻭﺑﻴﻨﺎﺗﻨﻪ ﺍﻟﺤﺠﻲ ﻣﺸﺠﻌﻪ ﻟـ ﻫﻮﺍﺭ ﻣﻼ ﻣﺤﻤﺪ 😌✌
ﻛﺎﻝ ﺭﺍﺡ ﻳﺠﻴﺞ ﺍﻟﺮﺍﺷﺪﻱ .. ﻛﺘﻠﻪ ﻛﺘﻠﻚ ﺍﺷﺠﻌﻪ ﻣﺎ ﻛﺘﻠﻚ ﻣﻌﺠﺒﻪ ﺑﻴﻪ ﻭﻋﺎﺷﻜﺘﻪ .. ﻛﺎﻝ ﺩﻣﺸﻲ ﻟﺞ ﺍﻣﺸﻲ .. ﺍﺧﺬﻧﻪ ﺍﻟﺴﻴﺎﺭﻩ ﻭﺭﺟﻌﻨﻪ ﻟﺒﻴﺖ ﺧﺎﻟﻲ ﺑﺄﺭﺑﻴﻞ
ﻭﺻﻠﻨﻪ ﺑﺎﺑﺎ ﺭﺣﺐ ﺑﺤﺎﺭﺙ ﻭﺧﻮﺍﻟﻲ ﻭﺍﻗﺮﺑﺎﺋﻨﻪ ﻛﻠﻬﻢ ﺍﻟﺘﻤﻮ ﻳﺴﻮﻟﻔﻮﻥ ﻭﻳﺎﻩ ﻭﻳﺤﺠﻮﻥ .. ﺍﺟﺖ ﺑﻴﺒﻲ ﺑﻠﻘﻴﺲ ﺳﻠﻤﺖ ﻋﻠﻴﻪ
🔸🔹🥇🔸🔹
ﻛﺎﻣﻠﻬﺎ ﺑﺎﺱ ﺭﺍﺳﻬﺎ .. ﻛﺎﻟﺘﻠﻪ ﺗﺸﺒﻪ ﺟﺪﻙ ﺑﺸﺒﺎﺑﻪ . . ﻛﺎﻟﻠﻬﺎ ﻗﻠﺒﺎ ﻭﻗﺎﻟﺒﺎ ﻣﻦ ﻓﻜﺮ ﺣﻈﻲ ﻏﻴﺮ .. ﺿﺤﻜﻮ .. ﻛﺎﻟﻪ ﺑﺎﺑﺎ ﺷﻔﺎﻳﺘﻠﻚ ﺗﺼﻴﺮ ﻣﺜﻞ ﺍﺑﻮﻱ ﺳﺪﺧﺎﻥ
ﺍﻟﻨﺎﺱ ﻟﻠﻴﻮﻡ ﺗﺤﺠﻲ ﺑﻴﻪ ﻭﺗﺬﻛﺮ ﻣﺤﺎﺳﻨﻪ ﻭﺯﻳﻨﺎﺗﻪ ..
ﺣﺎﺭﺙ .. ﺑﺲ ﻫﻠﻤﺮﻩ ﻫﺎﻱ ﺟﻠﻄﺘﻪ ﻭﻣﻮﺗﺘﻪ ﻭﻫﻴﻪ ﻋﺎﻳﺸﻪ ﻣﻮ ﻳﻤﻬﺎ
ﻛﺎﻟﺖ ﺣﺒﻮﺑﻪ .. ﺍﻟﺤﻲ ﻳﺘﻌﺬﺏ ﺍﻛﺜﺮ ﻣﻦ ﺍﻟﻤﻴﺖ .. ﻗﻀﻴﺖ ﻋﻤﺮﻱ ﻛﻠﻪ ﻣﺤﺪ ﺷﺎﻑ ﻃﻮﻟﻲ ﻭﺟﺴﻤﻲ ﻏﻴﺮ ﺟﺪﻙ .. ﻭﺣﺘﻰ ﻣﻦ ﻋﻔﺘﻪ ﻣﺎ ﺷﻔﺖ ﻭﺍﺣﺪ ﻳﺴﺘﺎﻫﻞ ﺍﻛﺜﺮ ﻣﻨﻪ ﻭﺍﻧﻄﻴﻪ ﺭﻭﺣﻴﻲ
ﻭﻣﻦ ﻛﺎﻟﻮ ﻣﺎﺕ ﻭﻫﻮﻩ ﻳﺼﻴﺢ ﺑﺴﻤﻲ .. ﺭﻭﺣﻲ ﻣﺎﺗﺖ ﻭﻳﺎﻩ .. ﻭﻛﻞ ﺟﻤﻌﻪ ﺍﻧﻪ ﻋﻠﻜﺒﺮﻩ .. ﻛﺘﻠﻬﺎ ﺍﻟﻠﻪ ﺍﻛﺒﺮ ﺗﻜﺘﻠﻴﻨﻪ ﻭﺗﺒﺠﻴﻦ ﻋﻠﻴﻪ ..
ﻛﺎﻟﺖ ﺣﺘﻰ ﺍﻟﺴﺎﻧﻚ ﻭﺷﻤﺮﺕ ﺣﺠﺎﻳﺘﻚ ﻣﺜﻞ ﺟﺪﻙ .. ﻛﺘﻠﻬﺎ ﺍﻓﺘﺨﺮ .. ﻛﺎﻟﺘﻠﻪ ﺍﻱ ﻭﺍﻟﻨﻌﻢ .. ﻫﻠﻪ ﻫﻠﻪ ﺑﺮﻓﻞ ﺗﺮﺍﻫﺎ ﻣﻮ ﺑﻠﻘﻴﺲ ﺍﻟﺜﺎﻧﻴﻪ ﻭﺗﻜﺴﺮ ﺑﻴﻬﺎ
ﺣﺎﺭﺙ .. ﻫﺎﻱ ﺍﻣﺮ ﻣﻨﺞ ﺑﻌﺪ ﻭﺍﻧﻪ ﻛﻠﺒﻲ ﻣﺜﻞ ﻛﻠﺐ ﺟﺪﻱ ﻛﻠﺐ ﺳﻤﺠﻪ ﺑﺴﺎﻉ ﻳﺤﺐ ﻭﻳﻌﺸﻚ ﻭﻳﺬﻭﺏ ﺭﻭﺣﻪ .. ﻭﻏﻴﺮﻩ ﻣﺎ ﻳﺤﺲ ﺑﻴﻪ
ﻛﺎﻟﺘﻠﻪ ﻻ ﺍﻧﺸﺎﻟﻠﻪ ﺍﻟﻠﻪ ﻳﺤﻔﻈﻜﻢ ﺍﻟﺒﻌﺾ .. ﺍﻋﺎﻳﻨﻠﻬﺎ ﺭﻏﻢ ﺟﺒﻴﺮﻩ ﺑﺎﻟﻌﻤﺮ 70 ﺗﻘﺮﻳﺒﺎ ﺑﺲ ﺑﻌﺪﻫﺎ ﺑﻄﻮﻟﻬﺎ ..
ﻭﻻﺑﺴﻪ ﺣﺠﺎﺏ ﺣﺘﻰ ﻣﻮ ﻓﻮﻃﻪ .. ﻭﺟﺒﻪ .. ﻭﺷﺨﺼﻴﺘﻬﺎ ﺑﺎﺭﺯﻫﺎ ﺑﻤﻤﻼﻣﺤﻬﺎ .. ﺍﻛﻴﺪ ﺟﺪﻱ ﺷﺎﻑ ﺑﻴﻬﺎ ﺍﻟﻠﻲ ﺷﻔﺘﻪ ﺑﺮﻓﻞ ﻭﻋﺸﻜﻬﺎ ..
ﺟﺎﻱ ﺍﻋﺎﻳﻦ ﻋﻠﻴﻬﺎ ﻭﺍﺷﻮﻑ ﺭﻓﻞ ﻭﺍﻛﻔﻪ ﻭﻳﻪ ﺍﺑﻦ ﺧﺎﻟﺘﻬﺎ ﻭﻫﻮ ﻳﺤﺠﻲ ﻭﻳﺎﻫﺎ .. ﺧﺰﺭﺗﻬﺎ .. ﻭﻛﻔﺖ ﻋﺪﻝ ﻭﻃﺒﺖ ﻟﻠﻤﻄﺒﺦ ..
ﻟﻬﻨﺎﻙ .. ﺑﺪﺕ ﺍﻟﻤﺒﺎﺭﺍﺓ ﻭﺍﻟﻜﻞ ﻛﺎﻋﺪ ﻳﻌﺎﻳﻦ .. ﻭﺍﻧﻪ ﻋﻴﻦ ﻋﻞ ﺍﻟﻌﺒﻪ ﻭﻋﻴﻦ ﻋﻠﻰ ﺭﻓﻞ ﺧﺎﻑ ﺍﺩﻭﺭ ﻣﻨﺎ ﻣﻨﺎ .. ﻣﺘﺤﻤﺴﻪ ﻋﻞ ﺍﻟﻠﻌﺒﻪ ﺯﺍﻳﺪ
ﻟﻤﺘﻬﻢ ﺣﻠﻮﻩ ﻭﺍﻧﻪ ﻛﺎﻋﺪ ﻭﻳﺎﻫﻢ ﻭﻧﺤﻠﻞ ﻭﻧﺤﺠﻲ ﻋﻠﻌﺒﻪ .. ﻛﻤﻠﺖ ﺍﻟﻠﻌﺒﻪ ﺗﻌﺎﺩﻝ ﻛﻠﻬﺎ ﺻﺮﺧﺖ ﻻﺍﺍﺍﺍﺍ ﺫﻭﻟﻪ ﺍﻗﻮﻳﺎﺀ ﺑﺎﻟﺠﺰﺍﺋﺎﺕ
ﺑﺪﺕ ﺍﻟﺠﺰﺍﺀﺍﺕ ﻛﻠﻨﻪ ﻭﻛﻔﻨﻪ ﺯﻟﻢ ﻭﻧﺴﻮﺍﻥ ﻭﺍﻛﻔﻴﻦ ﻋﻠﻰ ﺍﻋﺼﺎﺑﻨﻪ .. ﻭﻧﺼﺮﺥ ﻭﻳﻪ ﻛﻞ ﻛﻮﻝ .. ﺍﺧﺮ ﺷﻲ ﻧﻮﺭ ﺻﺒﺮﻱ ﺻﺪ ﺍﻟﺮﻣﻴﻪ ﺍﻻﺧﻴﺮﻩ ﻭﺣﺴﻢ ﺍﻟﻤﺒﺎﺭﺍﺓ ﺑﻔﻮﺯ ﺍﻟﻌﺮﺍﻕ ﻭﺗﺄﻫﻠﻪ ﻟﻜﺄﺱ ﺍﺳﻴﺎ 2007
ﻛﻞ ﺍﺣﻨﻪ ﺻﺮﺧﻨﺎ ﻣﻦ ﺍﻟﻔﺮﺣﻪ ﻭﺍﻋﺎﻳﻦ ﻟﺮﻓﻞ ﺻﻌﺪﺕ ﻋﻠﻘﻨﻔﻪ ﻭﺗﺼﻴﺢ ﻋﺎﺍﺍﺍﺵ ﺍﻟﻌﺮﺍﻕ ﻋﺎﺍﺍﺍﺵ .. ﻛﺘﻠﻬﺎ ﺩﻧﺰﻟﻲ ﻻ ﻳﻌﻴﺶ ﺍﻟﻌﺮﺍﻕ ﻭﻳﻤﻮﺕ ﺍﺑﻨﻲ
ﻛﻠﻬﺎ ﺿﺤﻜﺖ .. ﻧﺰﻟﺖ .. ﺳﻴﺮﺍﺝ ﻛﺎﻝ ﻭﻟﻜﻢ ﻛﻠﻬﺎ ﻃﺎﻟﻌﻪ ﺑﺸﺎﺭﻉ ﺗﺤﺘﻔﻞ ﺑﻔﻮﺯ ﺍﻟﻤﻨﺘﺨﺐ ﺗﻌﺎﻟﻮ ﺍﻃﻠﻌﻮ ..
ﻛﺎﻟﺘﻠﻪ ﺻﺪﻭﻭﻭﻙ ﺍﺑﺪﻝ ﻭﺍﺟﻲ .. ﻛﺘﻠﻬﺎ ﻭﻳﻦ ﻭﻳﻦ ﺗﻠﻜﻴﻬﺎ ﻛﻠﻬﺎ ﺯﻟﻢ .. ﻛﺎﻟﺖ ﺣﺒﻴﺒﻲ ﻭﺍﺫﺍ ﺯﻟﻢ ﺍﺣﻨﻪ ﻧﺒﻘﻰ ﺑﺎﻟﺴﻴﺎﺭﻩ ﻧﺸﻐﻞ ﺍﻏﺎﻧﻲ ﺍﻟﻤﻨﺘﺨﺐ ﻭﻧﺸﺎﺭﻙ ﺍﻟﻔﺮﺣﻪ
ﻛﺎﻝ ﻋﻤﻲ ﺣﺎﺭﺙ ﻋﻤﻮ ﺍﺫﺍ ﺗﺮﻳﺪ ﺍﺧﺬ ﺭﻓﻞ ﻭﺭﻭﺣﻮ ﺍﺣﺘﻔﻠﻮ .. ﺍﻧﻲ ﺭﺍﺡ ﺍﺧﺬ ﺍﻟﻌﺎﺋﻠﻪ ﻭﻧﻄﻠﻊ ﻧﺤﺘﻔﻞ ﺑﻔﻮﺯ ﺍﻟﻤﻨﺘﺨﺐ
ﻛﺘﻠﻪ ﺍﻣﺮﻱ ﻟﻠﻪ ﺭﺍﺡ ﺍﻃﻠﻊ .. ﺍﻟﺒﺴﻲ ﻣﻼﺑﺲ ﻋﺪﻟﻪ ﻻ ﺍﻧﻮﺏ ﺗﺼﻮﺭﻧﻪ ﺍﻟﻘﻨﻮﺍﺕ ﻭﺍﺷﺘﻬﺮ .. ﻳﺎﺭﺑﻲ ﻭﺍﻟﻠﻪ ﻓﺸﻠﻪ ﺍﺧﺎﻑ ﻳﺼﻮﺭﻭﻧﻪ ﻭﺗﻌﺎﻝ ﻫﺬﺍ ﺍﻟﻨﻘﻴﺐ ﺣﺎﺭﺙ ﻣﻄﻠﻊ ﻣﺮﺗﻪ ﺑﻨﺺ ﺍﺭﺑﻴﻞ ﻳﺤﺘﻔﻞ ﺑﻔﻮﺯ ﺍﻟﻤﻨﺘﺨﺐ
ﻭﺍﻟﻌﺒﺎﺱ ﻏﻴﺮ ﺍﺻﻴﺮ ﻋﻠﺞ ﺑﺤﻠﻮﻙ ﺍﻟﻌﺎﻟﻢ .. ﺍﺟﺖ ﻣﺒﺪﻟﻪ ﻣﻼﺑﺲ ﻣﻌﻘﻮﻟﻪ .. ﻛﺘﻠﻬﺎ ﺭﻓﻞ ﺍﺫﺍ ﺍﻛﻮ ﺗﺼﻮﻳﺮ ﺍﻭ ﻗﻨﺎﺓ ﺍﺩﻧﻜﻴﻦ ﺭﺍﺳﺞ ﻭﻣﺎ ﺗﻌﺎﻳﻨﻴﻦ
ﺗﺮﻩ ﺍﻟﻌﺎﻟﻢ ﺗﻌﺮﻓﻨﻲ ﻭﺍﺷﺘﻬﺮ .. ﻛﺎﻟﺖ ﻻ ﺗﺨﺎﻑ ﺣﺒﻴﺒﻲ ﺍﻋﺮﻑ .. ﻃﻠﻌﻨﻪ ﺍﻣﺔ ﺍﻟﺜﻘﻠﻴﻦ ﻣﻜﻠﻮﺑﻪ ﻭﻛﻠﻬﺎ ﻧﺎﺯﻟﻪ ﺑﺎﻟﺸﻮﺍﺭﻉ ﺗﺮﻛﺺ
ﻧﺴﻮﺍﻥ ﻭﺯﻟﻢ ﻭﻣﺤﺘﻔﻠﻴﻦ .. ﻭﺍﺣﻨﻪ ﻣﺸﻐﻠﻴﻦ ﺍﻟﻴﻮﻡ ﻳﻮﻣﻚ ﻳﺎ ﻋﺮﺍﻗﻲ ﻫﻼ ﻳﺎﺑﻮ ﺍﻟﻐﻴﺮﻩ .. ﻭﻧﺼﻔﻚ ﻭﻣﺤﺘﻔﻠﻴﻦ ﻭﺍﻟﻌﺎﺏ ﻧﺎﺭﻳﻪ ﺭﻭﻋﻪ ﻓﻌﻼ ﺍﺟﻮﺍﺀ ﺣﻠﻮﻩ ﻭﺗﻔﺮﺡ
ﻟﻠﻠﻴﻞ ﻛﻤﻠﻨﻪ ﻭﺭﺟﻌﻨﺎ .. ﺟﻬﺰﻭﻟﻲ ﻏﺮﻓﻪ ﺑﺎﻟﺒﻴﺖ ﻭﺭﺣﺖ .. ﺑﺲ ﺿﺠﺖ ﻻﻥ ﻣﺎ ﺣﺴﺒﻮ . ﺭﻓﻞ ﻭﻳﺎﻱ .. ﻏﻴﺮ ﺭﺟﻠﻬﺎ .. ﺑﺲ ﻋﻤﻲ ﺣﺲ ﻋﻠﻴﻪ
ﺻﺎﺡ ﺑﺎﺑﺎ ﺭﻓﻞ ﺍﺗﺒﻌﻲ ﺯﻭﺟﻚ .. ﻛﺎﻟﺘﻠﻪ ﺗﺄﻣﺮ ﺑﺎﺑﺎ .. ﺍﺟﺖ ﻳﻤﻲ .. ﻛﺘﻠﻬﺎ ﻭﻋﻠﻲ ﻟﻮ ﻣﺎ ﺟﺎﻳﻪ ﺟﺎﻥ ﻟﻌﺒﺖ ﻃﻮﺑﻪ .. ﻛﺎﻟﺖ ﺷﺒﻴﻚ ﺣﺘﻰ ﻟﻮ ﺑﺎﺑﺎ ﻣﻜﺎﻳﻠﻲ
ﺟﺎﻥ ﺗﺴﻠﻠﺖ ﺑﺎﻟﻴﻞ ﻭﺍﺟﻴﺖ .. ﺿﺤﻜﺖ ﻭﺍﺧﺬﺗﻬﺎ ﺑﺤﻈﻨﻲ ﻧﺴﻮﻟﻒ ﻭﻧﻀﺤﻚ ﻋﻼﺣﺘﻔﺎﻝ ﻭﺳﺎﻋﻪ ﻧﺤﺠﻲ ﻋﻠﻤﻨﺘﺨﺐ ﻫﻬﻬﻬﻪ ﻭﻭﻭ 💏 😴
ﻛﻌﺪﺕ ﺛﺎﻧﻲ ﻳﻮﻡ .. ﺭﺟﻌﻨﻪ ﺍﻟﺒﻐﺪﺍﺩ .. ﺍﺧﺬﺕ ﺭﻓﻞ ﻭﻭﺻﻠﺘﻬﺎ ﻟﺒﻴﺖ ﺍﻫﻠﻬﺎ .. ﺑﺘﺖ ﻋﺪﻫﻢ ﻳﻮﻡ ﻟﺜﺎﻧﻲ ﻳﻮﻡ ﺟﻨﺖ ﻣﻘﺮﺭ ﺍﺣﺠﻲ ﻭﻳﻪ ﻋﻤﻲ ﺑﺮﺟﻮﻉ ﺭﻓﻞ
ﻛﻌﺪﺕ ﺟﺎﻥ ﻋﻤﻲ ﻳﻜﻠﻲ ﺍﺑﻨﻲ ﺣﺎﺭﺙ ﻃﺎﻟﺒﻚ ﻭﺍﻧﺸﺎﻟﻠﻪ ﻣﺘﺮﺩﻧﻲ .. ﻛﺘﻠﻪ ﺍﺑﺸﺮ ﻋﻤﻲ ﺍﻧﺸﺎﻟﻠﻪ ﻣﻘﻀﻴﻪ ..
ﻛﺎﻝ ﻋﻤﻮ ﺍﻧﻲ ﺍﺏ ﻭﺗﻌﺒﺖ ﻋﻠﻰ ﺗﺮﺑﻴﺔ ﺑﻨﺘﻲ ﻫﻮﺍﻱ ﻭﺍﺗﻤﻨﻰ ﺗﻌﻴﺶ ﻭﻳﺎﻙ ﻭﺗﻨﺴﻌﺪ ﺑﺲ ﻋﻨﺪﻱ ﻃﻠﺐ ﺍﺭﻳﺪ ﺣﻖ ﺗﻌﺒﻲ ﺑﻴﻬﺎ
ﻛﺘﻠﻪ ﺷﻠﻮﻥ ﻋﻤﻲ .. ﻛﺎﻝ ﺗﺨﻠﺺ ﻫﻠﺴﻨﺘﻴﻦ ﺍﻟﺪﺭﺍﺳﻪ ﻋﻨﺪﻱ ﻭﻣﻦ ﺑﻌﺪﻫﺎ ﺗﺎﺧﺬﻫﺎ .. ﺻﻔﻨﺖ ﺑﻮﺟﻬﺎ .. ﻛﺘﻠﻪ ﻋﻤﻲ ﺷﺘﺤﺠﻲ ﻛﻼﻣﻚ ﻣﻮ ﻣﻌﻘﻮﻝ
ﻛﺎﻝ ﺍﻋﺮﻑ ﺻﻌﺐ ﻋﻠﻴﻚ .. ﺑﺲ ﺍﺑﻨﻲ ﺍﻧﺘﻪ ﺭﺟﻞ ﺩﺍﺭﺱ ﻭﻣﺜﻘﻒ ﻭﻭﺍﺻﻞ ﺿﺎﺑﻂ ﺍﻟﺤﻤﺪﻟﻠﻪ .. ﺗﻌﺮﻑ ﺷﻨﻮ ﻗﻴﻤﺔ ﺍﻟﺸﻬﺎﺩﻩ ﺍﻟﻄﺒﻴﻪ
ﺭﻓﻞ ﻣﺴﺘﻘﺒﻞ ﺩﻛﺘﻮﺭﺓ ﺍﺳﻨﺎﻥ .. ﻻﺯﻡ ﺗﻜﻤﻞ ﺍﻟﺪﺭﺍﺳﻪ ﻭﺗﺎﺧﺬ ﺍﻟﺸﻬﺎﺩﻩ ﻋﻼﻗﻞ .. ﻛﺘﻠﻪ ﻋﻤﻲ ﺻﻌﺐ ﻭﺍﻟﻠﻪ ﺷﻠﻮﻥ ﺍﻋﻮﻓﻬﺎ ﺳﻨﺘﻴﻦ
ﻛﺎﻝ ﺍﻧﺘﻪ ﺗﻜﺪﺭ ﺗﺠﻴﻬﺎ ﻛﻞ ﺍﺳﺒﻮﻉ ﻭﺍﻟﺒﻴﺖ ﺑﻴﺘﻚ ﻭﻫﺎﻱ ﻏﺮﻓﺘﻜﻢ .. ﺍﺗﺤﻤﻞ ﻟﺨﺎﻃﺮﻱ ﺑﺲ ﻫﻠﺴﻨﺘﻴﻦ ﺗﺎﺧﺬ ﺍﻟﺸﻬﺎﺩﻩ ﻭﺍﻧﻄﻴﻜﻴﺎﻩ ﻣﺎ ﺍﻟﻲ ﺣﻖ ﺑﻴﻬﺎ ﺑﻌﺪ ﺍﻟﻚ
ﻛﺘﻠﻪ ﻭﺭﻓﻞ ﻗﺎﺑﻠﻪ ﺑﻬﻠﺸﻲ .. ﻛﺎﻝ ﺗﺘﻤﻨﺎﻫﺎ ﻣﻮ ﺑﺲ ﻗﺎﺑﻠﻪ .. ﺑﻘﻴﺖ ﺻﺎﻓﻦ ﺑﻮﺟﻬﺎ .. ﻛﺘﻠﻪ ﻭﺍﻟﻠﻪ ﻣﺎ ﺍﻋﺮﻑ ﻳﺎ ﻋﻤﻲ ﺻﻌﺒﻪ ﺣﻴﻞ ﺻﻌﺒﻪ … ﻳﺘﺒﻊ
🌺🌺🌺🌺
ﺷﺎﺭﻛﻮﻧﻲ ﺍﺭﺍﺋﻜﻢ ﻭﺗﻮﻗﻌﺎﺗﻜﻢ .. ﻣﺘﺎﺑﻌﻪ ﻣﻤﺘﻌﻪ
السلام عليكم ورحمة الله وبركاته ، موقع روايات-Novels يهتم بنشر جديد الروايات للكتاب العراقين ، حمل تطبيقنا على جوجل بلاي وستمتع بلقراءة ، تمنياتنا لكم بلتوفيق
تحويل كودإخفاء محول الأكواد الإبتساماتإخفاء